TABC AUTHAWNG

2011, JanuaryTABC Authawng A ngeitu: Thantlang Association of Baptist Churches A chuahtu: Literature Department (TABC) Tawlreltu: Rev. K.L. Tial Hre Ling (Editor) Rev. Dr. Lal Uk (GS) Rev. Ram Er (AGS) Rev. Van Duh Tling Dr. Hmuh Thang Pu Ngun Hram Ptr. Dr. Tawk Lian Bawi Ptr. Thawng Peng Pu Siang Bik Pu Ram Khar Ca cutu - Lily Sung

CHUNG UM01. Biazai 02. TABC kan pa Rev. Dr. Sang Awr Ruakvui Pumhnak 03. Rev. Dr. Sang Awr Ruakvui tonh Sermon 04. Rev. Dr. Sang Awr Funeral Service Biachim 05. Rev. Dr. Sang Awr Ruakvui Tonh Biachim 06. Zuun ngaihnak hla 07. Nun Hrawmh A Thiamtukmi ... 08. Ka Nun Nih A Philh Khawhlomi..... . Pu Ni Uk Beauty 1, 2

Rev. Dr. Lal Uk

3

Rev. M. Thawng Kam

7

Dr. Hmuh Thang

12

Pu Ral Tu

14 13, 22, 24 20 23

A chung cabia hna hi cattialtu pakhat cio i an hmuhning le an ruahning a si.

Editor hmurkaThihnak hi minung nih kan duhlo bikmi le kan hrialkhawhlobikmi a si. Ahohmanh nih thihnak cu kan fahsak i kan duhlobik lio ah Laiminih kan i bochan i kan pacan taktak ah kan i chiahmi Rev. Dr. Sang Awr (Sangpui pa) nih thing bang purtak in mual a kan liamtak cu kan ngaih a chia i, mikip nih poi kan ti cio. Kan pa, Sangpui pa nih hi vawlei cung a nunnak in kum saupi a rian a tuanpiakmi a Pathian sin i a kan dinhtak cu Laimi lawng silo in Kawlram pumpi hmanh a ngaih a chia i an tuar cio. Kawlram mi kan van a cimh a si ko. Cucaah tuthla (2011 January) Authawng cu a mah philhlonak caah ti in kan van chuahmi a si. Hi kan Authawng hin tantakmi chungkhar zong thla kan campiak hna hna. Pathian nih an mitthli hnawhpiak hna sehlaw hmailei an nunnak zong amah nih lam hruai ko hna seh. Kan pa Rev. Dr. Sang Awr, Sangpui pa na lennak van khin rauthla in van kan leng law kan zanmang tal ah na siaherhmi bia kan ruah ko law kan i lungsak deuh rua hnga. Na tantakmi na naule le na fale nih kan in ngai peng ko lai.

SIAN LO KAN PA SuiliankamVawlei van kildeng tiang, na tlei thawng nih li bang a hnin Thing bang na kiak tuan ai kan dawt sianlo cu ka thin Par tha bang na tilh tuan fah hi maw kan pa Dar bang buur than awk na thatlo cu ka thin Sakhnem run le chumtual ah na aanthlam nih a bang than lai Zingnu Sang Cem Bawi thangthat in Khukthi rual le lenpi hawi nih na tlei rairum kan zaw ai Na liamh tuan kan ruah zawn ah, vai sii huai dinh bang kan thin a lin, kan lung a mawl Siseh, Cung Chin Mang Bawi van inn nuam ah, tonnak caan tha um te lai sian lo kan pa.

ODE TO BELOVED FATHER OF THE CHINS(Rev. Dr. Sang Awr) Sui Lian Kam

How we miss you in Every walking day and moment We nearly curse the one who created you Dismiss and go a way from us We miss your warm making friends And we miss the talks we had We want the memories back New and happy still Yet we know we never will If you know how much we looking foreward and cared We might not feel so sad and scared.

Salai C.K Ngan Bawm

Mei in zung cu a rak ciam A ciam kholo kan pa thinlung A khuasik mei bang kan horh lio Thing bang kan i hngohchanmi Kaam lo chuncha, kanpa na si. Hruang tha a pur, hluai tha a uai Chun ni tangah zan khua hong mui Lai pasal tha, zumhthlak kan pa Na tlei ni cu.....Ar bang kan vai Kan celh lo...... tuar thiam a har Na liam ai kun, na rianh na pa sin ah Zawtnak a um ti lo, retheih a um lai lo Kan pa ram ah na hnu zul in kan ra te lai Rak kan dong te Laimi dawtu kan pa aw... Na tlei rang ai, ruah nawl a har Vawlei dongh tiang philh um lai lo. Zangfahnawlnak January thla le February thla Authawng a tu lawng ah kan rak thlah khawhmi hi kan ngaithiam hram u. Kan internet a that lo ruang ah le TABC khawmpi he zong a van I ton caah kan rak thlah manh lo nak a si. Kan ngai thiam hram uh.

TABC KAN PA Rev. Dr. SANG AWR RUAK VUI PUMHNAKRev. Dr. Lal UkTABC le Laimi phun i kan pa Rev. Dr. Sang Awr ( Sangpui pa) cu AD 2000 kum ah khan a pawpi cancer rak hlaipiak a si i kum 7 a dam hnu ah 2008 January in a ruh ah cancer zawtnak a um than i kum 3 chung Singapore le Yangon ah ai thlop i 2011 January 16 zan suimilam 11:30 ah a umnak Yangon khua in a rian tuanpiakmi Pathian sin ah ai din cang. 2011 January 18 chun suimilam 1:00 ah kan pa Funeral Service cu Yangon, Insein Bible sianginn kulh chung Hpu Tha Byu Memorial Hall ah tuah a si i MBC-GS, Rev. Dr. Zaw Win nih Thawngtha in thazaang peknak le Rev. Dr. Simon Pau Khan En nih chungkhar caah thlacamnak an ngeihpiak hna. Thlan hmun ah Rev. Sawi Kung nih ruak a vui. Cu caan liote ah cun Thantlang Khrihfabu, cingla rualchan le khuami hna zong nih kan pa a riantuannak le a saktami TABC zung inntual ah Funeral Service (ruakvui pumhnak) cu kan rak tuah ve. Duhning in thawng i thanh kho manh hmanh kan si lo nain TABC inn tual khat phitphet in kan pa a dawtu hna cu an hung chuak i kan lung a tling ngaingai. Kan pumhnak cu Rev. N. Lai Uk nih a kan hruai i UPC pastor Van Hlei Thang nih hramthoknak thla a cam. Kan pa nih a duh ngaimi Khrihba hla bu No. 50 Zungzal kan hngat chanmi Pathian timi kha zapi dirbu in kan sak. Chungkhar lei in Pu Thawng Cem le Pu Biak Ling nih lunglawmhnak le thlacam cah nak bia an chim. Rev. K. L Tial Hre Ling nih kan pa upatnak le sianlo nak hla in a hlawi.TABC GS Rev. Dr. Lal Uk nih kan pa tuanbia tawi le rovuih biachimnak a ngei. Pi Sui Tha nih hla in a hlawi. Kan pa le Dr. Hmuh Thang le Pu Ral Tu hna nih mithli he biatawi an chim. Rev. Lian Hre nih thinlung kekkuai in mithli he chungkhar caah thla a cam. TBC nubu nih hlaremh dawh in kan pa tah hla an lawh. Rev. M. Thawng Kam nih kan pa lungput le a nun lang ko in thawngtha a chim. Hla No. 447 Ceunak ram ah him in timi hla kan sak i Rev. S. Hre Kam Thluachuah peknak in zanlei 3:00 ah kan pumhnak cu kan donghter. TABC zung inn tual khat in kan pa dawtnak le upatnak he a thumi hna mithmai cu kan pa sianlonak le zunngaihnak mithli nih a zelh hna i a ruak khi kan hmaika ah vai hunh ko usihlaw cu tluk te cun kan pa a zuun cu kan tuar hna. TABC GS nih kan pa REV. DR. SANG AWR TUANBIA TAWI le Rovuih Bia a Chimmi REV. DR. SANG AWR TUANBIA TAWI Rev. Dr. Sang Awr cu Thantlang peng, Thau khua ah kum 1941 July 23 ah a chuak. Pu That Vung le Pi Chiah Zing i an fapa upa bik a si. A chuahpi a unau hna cu: Pu Hmun Cem (Thantlang), Pu Thla Cung (Maingyawng), Pu Lai Rung (Malaysia), Pu Biak Hlun (Australia), le Nu Hniang Hnem (Yangon) an si hna. Kum 1975 April 6 ah Thantlang khua um Rev. Hai Mang le Pi Sui Hliang fanu Pi Mah Cin he an i thi-um. Fapa pali: Pu Ram Lian Sang + Pi Hnem Sung Chin (USA), Pu Van Biak Hmung + Pi Nu Nu Sung (Yangon), Pa Cung Bawi Thawng (Singapore), Pa Za Uk Sang (Philippines) le fanu pakhat: Pi Licky Rem Hlei Sung + Pu Moses Sang Nawl Lian (USA) a ngeih hna. Tufa pahnih, Deborah Par Chin Sang (USA) le Francis Van Bawi Sang (Yangon) a ngeih hna.

Kum 1965 thawk in Rangoon Art and Science University ah Upadi lei a cawng i 1968 kum ah B.A. (Law), 1969 ah LL.B. (Law) degree a hmuh. Upadi degree a hmumi a si bantuk in 1975 ah Supreme Court Advocate awnnak lehmah a hmuh i, Thantlang, Hakha, Falam, Yangon le Mandalay ah kum 1969 in 1979 tiang kum hra chung sihni a rak tuan. Kum 1969 in 1971 tiang MIT ah Bachelor of Religious Education a cawng. Sihni kum hra a tuan lioah hin Thantlang Association of Baptist Churches (TABC) nih ca lei riantuannak ah an rak sawm i 1979 July thla thawk in TABC Literature Secretary riantuan hram a thawk. Kum 1980 in 1986 tiang TABC General Secretary a rak tuan. Kum 1983 in 1986 tiang Zomi Baptist Convention ah President zong a rak tuan. Kum 1986 in 1990 tiang Myanmar Institute of Theology (MIT) ah Bachelor of Divinity a cawng i sianginn a dih in MIT ah lecturer a tuan colh. Kum 1991 ah Princeton Theological Seminary, United State of America in Th. M. degree a hmu. Kum 1994 ah Trinity Theological College, Singapore in M. Th. degree a hmu than. Kum 1993 ah MIT nih Professor sinak an pek. Kum 1998 in 2006 tiang MIT ah Vice-Principal a tuan. A riantuannak an zoh tikah MIT Board of Trustees nih upat pek awk a tlak ko an ti caah 2003 ah Doctor of Divinity degree an pek. Rev. Dr. Sang Awr cu MIT rian a tuan pah in Yangon um Lai Baptist Church ah 1992-2002 kum tiang Honorary Pastor in siseh, 2002-2008 kum tiang Senior Pastor siseh a tuan. Caantling riantuantu sinak in ai dinh hnu ah LBC nih Pastor Emeritus in siseh, MIT nih Professor Emeritus in siseh Bawipa rian cu a ti khawh tawk in a tuan. 2006-2008 kum tiang Myanmar Baptist Convention ah President zong a rak tuan. Rev. Dr. Sang Awr cu kum 2000 lioah khan pawpi cancer in a pawpi cheuthum cheukhat an rak lakpiak. Kum sarih a dam hnu kum 2008 January thla thawk khan a pawpi khan a ruh ah cancer zawtnak a phan than. Cuticun Pathian dawtnak thawng in ramchung/ramleng Khrihfabu kip thlacampiaknak, hawikom dawt bawmhnak thawng in kum thum chung Singapore le Yangon ah ai thlop i, 2011 January 16 zan suimilam 11:30 ah a dawtmi Pathian sinah ai din. Kan pa rovuihbia 2010 December 11 zaan suimilam 7:30-9:00 kar ah a si. Kan pa ai thlopnak Tuhkhah Kaba siikhan ah pastor Duh Sang le Rev. N. Lai Uk he ti in kan va leng hna. Chungkhar lei in Sangpui nu, Cung Bawi, Zi Zi, Zo Uk le A Nu hna an rak um lio a si. An umnak khan ah cun kan va lut i kan ruahnak leng in na thawndeuh tung tiah kan pa cu kaa hnih thum kan chawnh i a rethei deuh sual lai kan ti caah Sangpui nu he tu bia kan i ruah hna. A tawkfang kan thut hnu ah khin kan pa nih ka thutter u a ti i an van thutter i a fapa Cung Bawi nih a pom. Thazaang a hun la i tlawmpal hnu ah khin bia ka chim ta lai a ti. A biachimmi cu hiti hin a si. Hmailei ah damte ton ding cu kan i ruahchan ko na in caan cu kanmah ta a si lo caah atu hi caan tha a si rua tiah ka ruah i ka lunglawmhnak le ka bia siaherh ka chim ta lai. - Pakhatnak ah cun TABC le kan inn chungkhar pehtlaihnak ah hin ka lung a tling i riantuantu nan cungah kan i lawm. TABC le TBC nih Yangon tiang nan ra i Upatnak zong nan rak tuah. Cu pin ah TABC nih Upat peknak cauk tiangin nan ka tuahpiak. Hi thil vialte nan tuahmi hi minung caah si lo in amah Pathian sunparnak caah si ko seh. -Pahnihnak i chim ka duhmi cu Pathian riantuannak ah hin hlan deuh ah cun fimthiamnak, chimrel thiamnak le thil tikhawhnak rumro hna hi biapi cem in ka rak ruah caan a um tawn. Cu hna cu a biapi lo ka tinak cu a si hrimhrim lo. Sihmanhsehlaw ka ruah lengmang tikah hin Pathian riantuannak ah hin a biapi bikmi cu lungput a si ko tiah ka ruah cang. Cu caah TABC riantuantu hna nih toidornak lungput he pumpek in Pathian riantuan hi van i zuam ko u.

-Pathumnak ah chim ka duhmi cu Pathian nih fapa 4 le fanu 1 laksawng a kan pek. Hi kan fale hna hi mirum milian si hna seh tinak in TABC ca le miphun caah thahnem santlaimi si hna seh ti hi ka thlacamnak a si deuh. Cubantuk in TABC zong nih kan fale hna hi van i hmaithlak peng hna u ti ka duh. a ti. Cu hnu ah cun Sangpui nu nih van chim ve seh a ti i Sangpui nu nih cun, Kanmah chung hi TABC rian bak in Pathian riantuan ai thawkmi kan si . TABC budget bak in Baibal sianginn kaitermi zong kan si. Cucaah TABC le kannih chungkhar hi ai then khomi kan silo tiah kan i ruah. Sihmanhsehlaw TABC caah kan tuah khawhmi cu zeihmanh a um lo. Cu bu ah cun TABC nih nan chawva, nan caan le nan thlacamnak he nan kan dawtnak cungah kan chungkhar ningpi in kan lung a lawm. a ti.

NA LIAM LUNG HERH HLAHHla phuahtu - Za Iap

A satu

- Pi Sui Tha Par

Zanmang chia bang run ka hlau e Pacan, thing bang kiak cang ti hna Aize! ka thin ka tuar thiam lo, leidai tang ciamser lan lai hi Kapa awnem um ti lai lo, Ngaihchiat ka ton caan hnemhnak aw, Zeitik ton caan um ti lo in, nu lo ar bang vaih ko lai hi. Aw na biak Pathian tangnem chung ah, Nai din cang harnak um ti lo in Van sui khua chung in hong kan leng law Rauthla tal in hong kan umpi ko Har caan suttung bang kan hngatchan Thlichia hran caan hupphengtu aw Kei ca ngaihchiat ningzah tuar kha, hotal airawl kho um hnga maw Na tawl na rel TABC Semnak Thau khua le Thantlang peng A leng na dawt u le nau hna, na zuun tuar in tap ruangmang hna. Ka pa na liam lungher hlah law Na tuan lohma kan lim lai tin Laitlai unau rualhawi vialte, ralhruang bang in dir cang hna e.

Rev. Dr. Sang Awr ruakvuipumhnak Sermon(TABC, Thantlang)Ani January 18,2011 (1:00pm) Rev. M. Thawng Kam

Heb. 13:7 Pathian bia a rak in chimtu nan hruaitu hmasa hna kha philhhna hlah u. Zeitindah an nuncan a si i zeitindah an thihning a si kha ruat than ulaw an zumhnak kha cawng hna u. Kan upat i kan dawtmi Sangpui pa, na rak rianhmi le na rak saktami TABC zungtual ah Thantlang mizapi nih mitthli he na ruak kan in humh. Na nun le na uantami neh zunbung kan philh lai lo. Sangpui nu, Sangpui pi le Sangpui le a nau le vialte tuchun ah nan ngaihchiatnak Thantlang mizapi nih kan in tuarpi hna. Nan mitthli Pathian nih in hnawhpiak ko hna seh. Rev. Sang Awr nupi, Rev.Sang Awr fale nan simi hi i lawm u. A nun zahpi lo ding pasal ha asi. Zumhnak ah kan pa le tiah kan timi hna Van Lo, Sang Fen, Van Bik, Sang Awi te hna kha kan pa tiah a ti duh velotu phungchimtu cheukhat nih Heb. 13:7 nak i Pathian bia a rak chimtu nan hruaitu hmasa hna a timi cu Heb. 11 chung i a ummi Abrahamte hna, Noahte hna kha pei an si ko cu an ti tawn. Hebru cakuat ial lio ah hihna (laimi kan pe le) hi an um rihtung lo tiah tan an la. Cu ti an ti taktak ahcun Bible ca hi kan caah a si kan ti kho lailo. Zeicahtiah Bible tiallio ah laimi kan rak um rihlo caah asi. Asinain Bible hi kan caah a si hrimhrim ko. Cu caah kan nih caah cun Rev. Van Lo te hna , Rev. D. Van Bik te hna le Rev. Sang Awr bantuk hi Bible nih nan hruaitu hmasa tiah a kan timi an si hrimhrim ko. Cu caah kan hruaitu hmasa a simi kan pa a thih ni ah hin kan pa i a nun le zeitindah a thihning a si ti kha kan zoh le kan ruah a phumi a si. Hruaitu hna hi palhnak a pelpawite hmanh an ngeilo ti asi ballo. Palh an hiam ve ko. Tlinlonak an ngei ve ko. Moses zong a no lio ah cun mi thintawi a si, hate khuaruat hmasalo in mi a thatmi, cun a ih tikah thil fianter timlo in a zammi a rak si ko. Nain a nun hnudung, ai thihpimi nun ah cun miphun pa a si. Siangpahrang David zong mi nupi a chutmi le lainawng a rak si bal. Nain a nun hnudung ahcun nun duhnung le ram sertu siangpahrang ngan a si. An palhmi nun kha Pathian nih a ukmi an nun nih a let tampi in a khuh. Sangpui pa zong palhnak ngeilo a si ka tilo. Asinain Pathian nih a ukmi a nun ka theihmi tu chim ka duh. TABC hi 1973 kum ah HBA in inn dang a rak chuak. Inn dang a chuah lio ah ballpen pakhatte hmanh a rak ngeilo. Cu dirhmun cun Rev. Cuai Sang, Rev. Biak Kam le Rev. Ci Lian hna nih i chawng in an rak hruai. Inn le lo an zalh, han tawk an rak hanpi. Kum 67 a hong rauh tikah mi thinlung ah hruaitu thar hlamnak a hong um. Mi an kawl. Hi lio ah hin Saya Sang Awr cu TABC ah a rak i tel len cang i mi nih an bochanmi a rak si nain a dirhmun nih GS uan kho ding a tlinhlo. Ordained pastor lo nih GS uan khawh a si lo. Saya Sang Awr cu ordained cu van chimlo pastor hmanh a si lo caah GS si khawhnak ding lam a rak umlo. Cu bu cun upa hna nih upadi bauh in GS ah an rak thim. I alnak a chuak nain an thim chih ko. Hi bantuk hi hi hnu zong ah a um kho tilo ding a si. GS a

uan hnu ah ordination pek chommi a si. Hi lio thimtu upa hna tuchun ni ah upat kan pek hna. Kan ram nih a herh lio ah hruaitu ha nan rak thim khawh mi nih kan peng a tunmer taktak. A. Lincoln zong nih kan ram himnak ding caah kan upadi cu ka nunnak in ka ven lai, sihmanhsehlaw kan ram rawknak ding a si ahcun kan upadi cu ka bauh lai a rak ti bal ve. Cu ticun 1980 kum, amah kum 39 ah TABC GS uan a rak thok. Hi can hrawng hi zumhnak pomning fakpi a rak i hen lio, bu an kuai thluahmah lio caan a rak si. Baptist pastor lak hmanh ah a za bikbik hna nih Baptist an rak doh i Khrifabu fakpi i ai hninh lio caan a si caah Saya Sang Awr cu i din thiamlo in kum thluan khual a rak tlawng. A Bible cawnmi a tlawm nain fekhup in zumhnak a rak dirkamh khawh. Motor chimlo cycle hmanh a rak umlo. An rak hmanbikmi cu rang a si. TABC ram khua 86 a cul dih hirhiar. Vanchiat ee tiah, Rev. Biak Kam nih a zalh ta i Rev. Ci Lian nih pehzulh in a van sakmi MCC bawmhnak APC innpi 80x20dot hnih cu 1981 November zan ah mei in a ciam put ko. Mi vial te thinlung a zaw dih. TABC a rawk lai ti tluk in an rak ruah. Sihmanhsehlaw Sangpui pa nih cu mi vialte lungrawhnak cu TABC hanghnak ah a rak thlen. A rauh hlan ah atu i kan hmanmi innlo hna hi a hun sak hna. A uannak le ai peknak ruangah ramchung ramleng ah mi nih an van theih chin lengmang. Upat hmaizahnak an van ngeih. 1983 kum a phak tikah ZBC zong nih bochannak nganpi he President uanvo an van pek. Hi 1983 kum hin Thantlang khua in Laimi Khrihfa caah a biapi tukmi CCOC rianuan nak hram an rak thok. A raulo. Cozah sinah CCOC cu politics a si tiah report a phan i ZBC cu lungrethei ngai in an rak um. Cozah hlathlaitu bawi ngan pakhat nih Rev. Sang Awr sin ah a rak hlathlai. ihlo le ralha ngai in CCOC an lunghrinnak dai lak in a rak chimh khawh. Hi lio can ah hin NGO timi biafang a rak um rihlo. MCC in TICPIND timi hanchonak lei rianuannak an rak tuah i cu rianuannak ah Laitlang hruaitu bik ah an rak hman. Motor hmanh hate a phanlomi Thantlang khua in Laitlang huap hruaitu si cu thilmak pakhat a tling. Thantlang khua timerh hmuh hmasami kha amah hruainak in hmuhmi asi. Khua dangdang zongah an tuahpiak hna. TABC GS a uan pah in rian tampi a uan chih caah amah lawng an theih silo in TABC zong mi tampi theih ah a van cawisan chih. 1986 ah TABC in a uan khawhmi caan khiahpiakmi cu a dih. ZBC zong thim kum a si caah mikip nih Sang Awr nih a uan a hau an ti cio. Upa hna nih ZBC GS uanding in an chimh, an nawl. Nain a cohlang hna lo. ZBC GS si cu mi tampi nih upatmi le duhmi rian a si nain a al hna. Pathian rian ah kai phum cang caah Bible ca tlamtling deuh ka cawn a herh a ti. Hi ah hin amah kum 45 a si cang. Upa sinak a cuanmi caah cun GS rian cu thim fawite a si. Upa sinak nakin Pathian rian taktak tu ai thim deuh caah kum upat hnu a si ko nain cacawn ai thawh. Biathlehnak a tuahmi hi hmailei caah a hmanmi biathlehnak a rak si. Hi hnuah hin Pathian hruainak thuk chin lengmang in a lang. 1986 kum ah Yangon MIT ah BD cawn ai thok. Hihi hate ka theih hram thoknak a si. Hmunkhat ah kan kai i. TABC nih a lahkhah ningte in BD a lim tiang an bawmh. An chungkhar in Yangon ah cun an i hial. Sangpui pa kong chim ah hin Sangpui nu tello in a tlam a tling hrimhrim lo. Sangpui nu hi Sangpui pa sinak ah thukpi in hmunhma a ngei. A va he a fale he siahgnakchia lawngte an si. I zalo ngai bu in khua an sa. Tawlreltu bik amah a si cang. Chuaklak in chungkhar a hruai. Va he fale he chuaklak in a cawnter dih hna. Nu sal ha taktak a si. Sangpui pa cu upa cia a si cang nain ca kan cawn i kan umi

tikah kanmah bantukte in a um i zeipaoh kanchimh ngam. Komh a nuam, a pawng um ah hna a kan ngamh. Biatak a kan chimh. BD a dihka in MIT nih saya caah an lak colh. Cun America le Singapore ah Bible a cawng han. Cu hnu cun Vice Principal ah an hman. Principal a silo nain Principal bantuk in rian a uan i MIT umtuning tampi a sersiam. Inn le lo thar a chap. Program thar a tuahpi hna. MIT kha muihmai thar a ngeihter, a tunmer. Cun MBC ah chairman a uan fawn. MBC chairman hi cantling rian a silo nain a biapi tukmi rian a si. Cozah he pehtlai in ton le chim a herhmi rian a si. Fek ngai le zumhtlak in a dirkamh. MBCpi nih pacan ah an ruah. Amah chairman a uan chung hi meeting le khuakhan a nuamh bik caan caan khat a si an ti cio. Ka chim thlulomi riandang tampi a uanmi an um ko. A uannak kip ah ai biatak, daithlang in a uanlo caah bochanmi a si peng. A pumpak nun tlawmte in chim han ka duh. Duh a nunnak bik pakhat cu zuk-hmawm le din-ei ah a thiang. Zohbelh ding zeihmanh a umlo. A chimmi le a tuahmi ai danglo, mi ca a chimmi cu amah nun a si i a nun cu mi caah a si. Midang lawng cawnpiak i a thlithup in mah nih a zul unglomi a silo. Kawmh nuam bik i nan theih ciomi cu mi bia hate a ngaihmi a si. Sangpui pa sin bia a chimmi an i chir ballo. hate a ngaih piak hna caah an duhmi a tlinlo hmanh ah an di a riam. Mi kha an minte in, an fale min tiang in a auh khawh hna. Ka theih ngaimi nu pakhat nih Sangpui pa cu nan tluk bal lailo, anih cu kan minte in a kan auh peng. Nang cu a tu ah hin ka fa min hmanh in na ka au kho lailo tiah a ka ti. Cun Sangpui pa cu mi bawmh a duh ngaingaimi a si. Zapi caah hihi a fawilomi a si. Anih cu mi bawmh kha a nuamh in ai nuam. Midang caah ai manh peng. Voikhat cu an motorcar in Sangpui nu le pa he tiah a fapa Ukte nih a kan mongh. Khrihfabu kong kan caih pah ah khin a lungtlinlo deuhmi pumpak min a van chim. Sangpui nu nih sii a van ti he i ruang in Ukte nih Ka pa cu bia cu ziah nangmah nih na chim tiah a van caak. A pa cu a daidep. Nan lung a tlinglo mu a ti i a peh tilo. A cawnpiakmi nun a fahniang nih ai nunpi i cu a fa nih a van chimh han ve tikah a cohlang khotu pa a si. Hi bantuk hi a fawimi a silo. Midang lawng a cawnpiaktu a silo, a herhtik ah midang cawnpiaknak ngaih le zulh ai harhlo mi pa a si. Hi inn (Development training center) hi Japan nih an kan bawmhmi si. Japan embassy zung ah voi 3 kan kal i. Bawmh ding in an kan ti cang. Bawmhnak phaisa kha US dollar in an kan chuah. A leng phaisa thlen rette in kan tuak i cucu 1st Secretary pa nih a kan remhter. Hihi kannih Embassy theihning a silo caah niamdeuh in va remh u a kan ti. Dollar pakhat ah Ks. 13 renglo ai thlau. Hi ti remh ahcun nan kan pekding phaisa a zat a kai tuk lai tiah kan ti konain si ko seh, va remh ko u a kan ti. Hi ruangah Kawl phaisa tampi a khawh. Cu ruangah kan halmi cu break nocking a si nain concreat in kan sak khawhnak asi. Hlep timh ahcun aho mawhchiat khawhlo ding a simi kha a duhlo. Kan sak dih hnu ah lunglawmhnak laksawng kan pekmi zong a duhlo. Ramdang a kal tik zongah an zumh. Sangpui pa sin in ramdang um kan unau hna nih bawmhnak pek dingcu an hna a ngam. Phaisa ah zumhtlak a si. Laimi ca ah vision a ngei. ZBC hi CBC in thlen a herh tiah tuandeuh liopi khan a kan ti. Kan duh ko nain kan no tuk rih caah a herhlomi buainak dang kan tong sual lai ti phan ah kan kalpi ngamlo. Atu ah a herhning a fiang chin lengmang. Pensen a lak in Lai Khrihfa Caialtu Phu (LKCP) a kan tuahpi i kan herhtukmi Laica hrilhfiah ial a thok han. Hihi

ai thihpimi rian a si. Khat lei ah lunghmui ngai le khat lei ah siaherh ngai i ai thihpimi rian lianngan a si. Laiholh i a holhmi hna caah rosung taktak a si. Mannei te in a nung i man neite in a nun a liammi kan pa a si. A ialtami cauk uk 15 nih a nun a fim zungzal ko lai. Sangpui pa cu a pum a thi nain a nun a thilomi pa a si. Tuchun ah hin a taksa thihnak ruangah ahnak le a rak nunmi ruangah nihnak cawh in kan um. Sunghnak nganpi kan tong nain miaknak nganpi a kan rohta. Hi hruaitu, Sangpui pa, nun hi ruah i cawn ding in Bible nih a kancawn piak.

Rev. Dr. Sang Awr Funeral Service I Dr. Hmuh Thang Chimmi Bia tawi(18.1 . 2011)

Kan dawtmi, kan upatmi, Ram Lian Sang pa ruak ni ah biatawi chimnak caan ka hmuh caah Pathian ka thanghat. Thih a fahning hi 1. A nu nih, hnuk ding lio a fa a thih tak tik ah, 2. Pa Bik nih innchungkhar a hon thihtak tik hna ah 3. Nungak tlangval an hawn lio, an i dawhbik lio caan i thihnak an ton tik ah, 4. Thih ka duh rih lo e tiah aw thang in a au cuahmahmi nu/pa an thih tik ah, celh a um hrim lo. Kan ton pengmi, ka hmuh pengmi a si i, mi theih loin ka ah ve caan a tampi. Hruaitu nih ram mi an thihtak tik ah, ram chungmi cu thinphang thlalau le ngaihchia lileng in um a si. Igypt President Nasa cu ruahlopi in, lungzawtnak in a thih tik ah, Igypt miphun an ram ning in nu he pa he an ap. Isarael nih kan ram an kan chuh lai, ti hmanh an rak phang. Laimi kan pa Rev. Dr. Van Bik a thih tikah, Rev. James Sang Awi, Rev. Dr. Sang Awr, Rev. Dr. E. Za Bik an um rih kan rak ti hna. Rev. James Sang Awi a thi. Atu Rev. Dr. Sang Awr a thih tik ah hin, Hakha Thantlanag cu, nu ngeilo pa ngeilo bantuk kan si ko, tiah ka ruah i ka ngaih a chia hringhran. Hmaizah awk cu hmaizah hna u, upat awk cu upat hna u. (Rome 13:7) tiah kan Bible ah kan hmuh bang Sangpui pa cu hmaizah awk, upat awk hrimhrim a si. A nun lio ah TABC le TBC nih Pathian sin thlacamnak kan tuahpiak manhmi hrim kha, keimah le keimah ka lunghmuihmi a si. Rak tuahpiak manh hlah usih law, a ka ciah tuk hnga. Sangpui pa hi ram a dawmi a si. Khrihfabu a dawtu a si. Miphun a dawtu a si. A lung a sau, a thin a fual, Tei a rialmi a si. A chim lei nak in uan lei ah tha a chuah deuhmi a si.

Zeitik paoh ah Sangpui pa a um ko kan ti. Ruahnak hal duh tik ah, bawmhnak hal duh tikah, ram chung i pehtlaihnak ah, ram chung leng i peh tlaihnak ah. Sangpui pa cu kan rualchan a si kan ti. MIT ah Vice Principal tiang a uan lawng si lo in, Asia huap, vawlei huap in rianuanmi a si. A theihngaltu an tam. Rev. Dr. Sang Awr na hngal maw? an kan ti ah, ka hngalh ko ti lawng hmanh a za lo. Ka rualchan a si kan timi pa a si. Miphun dang lak ah Laimi kan hmai a kan hngaltertu a si. Hlammi pa a si. A harmi thil a um tik ah, rian har a um tik ah, buainak a um tikah, fakpi in khua tuaktan a herh tikah Rev. Dr. Sang Awr um sehlaw cu, tiah hlammi pa a si. Arian a lim mipa a si, tiah ka ruah. Vawleicung mi nih, hruaitu nih, tinhmi le uanmi ngeih cio dih a si. Pumpak caah siseh, ram le miphun caah siseh, saduhthahnak le vision ngeih cio a si. Cu saduhthahnak vialte hi a uanchuah dihmi le a limmi an tlawm lai. Amah zong nih hin uan dingmi tampi kan ngei rih tiah a ruah ko hnga. Nunnak reserve pakhat ngei rih ning law a ti men ko lai. Asinain keimah hmuhning ah cun ram le miphun ca le Khrihfa rianuannak lei ah hin a rian hi a tlangpi cun a lim ko tiah ka hmuh. A zawt bu hmanh in tampi a uan. Cucaah a nunzia i cawn usih. A cawnpiaknak zul usih. A phichuak a hami pa a si caah, kan phichuah ha cio ding in i zuam usih. Vanram a phan hrimhrim lai tiah ka zumh caah Pathian thanghat hna usih. Dr. Hmuh Thang

RAK KAN DONG TE

Maw kan pa Sangpui pa aw na liam ko ne mu kan in sianglo tin tlaih awk thalo na liam lung herh ko laimu na chungkhar hna le na dawtmi na semnak Lai khua hi. Maw kan pa vungliam ai ko kun ne law kum saupi na rianhmi Bawipa tang ah vanram khin rak kan dong te then um tilo in van hla thar kan sa ti than te lai.

K.L. Tial Hre Ling

Tuan na rel tawnnak Thantlang khuazung le Thau khua na ngai ruangmang theo lai mu kan pa na remh hlei TABC hmun kan cuanh zawn ah mitthlam ah na cuang peng ko lai. Ho ianglo kan ti lio ah hruang bang pur ruangmang na tlei thawng nih khua za cul kan pa an tuar kho cio hna lo ee. Lungzuur kiarmar in hram hna maw nulo ngaktah rual.Note: Sangpuipa ruak tonh lio i Nubu hlaremhmi a si.

TABC zungtual Rev. Sang Awr Ruakvuicaan tonh, Pu Ral Tu Biachimmi

Rev. Huat Vung te chungkhar pastor uan ding ah Thau khua in Hriangkhan an phak hrawng ah hin, pastor fa upabik Tei Thang he a rak i kommi kan si. An naudeuh ka si na in an sin tlong lengmangmi ka rak si. Hakha Hight School ka rak phak ah hin, Yangon University a rak phan cang, upadi Digree a lak le Thantlang khuapi thar ser hi a tong ve. A hawile sihni awngmi hna he Sihni tuanding hmunhma an rak i phawtning saduhthah kha an rak ka chimh. Sihni Van Thio - Falam, sihni Hre Lian Kio - Hakha, sihni Sang Awr - Thantlang le sihni Lian Uk, sihni Hniar Kio hna hi thlanglei Laitlang ti in saduhthah an ngei, Sihni rian lawng tuan lo in, miphun dirkamh, Biaknak lei dirkamh le Lai miphun hanchoter zuamnak, kemhchih kha kan zuam cio lai kan rak ti a ti. Cu ruang ah cun, Rev. Hrang Tin Khum nih ZBC Counvention a auh tirte lio, Paletwa Ka phanh lio ah, Banbul pate Lian Uk an timi nih khan, Thlanglei Laimi caah hin ZBC nih program suai in riannganpi

uan kan herh tiah ruahnak a ka cheuh a rak ti ve. Cu convention cun CCOC program a chuah le rianuan hi a rak si. Thantlang a um thokka ah cun, sihni uanding an rak um lo. Thantlang High School a dir kate a si, saya rian a uan ta ve. U Ni Win cozah suaimi upadi soisel virhkhoih an si sual lai ti lunghrinh ruangah, sihni dang he thong an tla dih. Thong a chuah hnu lawng in sihni rian cu uan an si. Thantlang peng biacaih zung hu ka si lio 1974 kum hnu ah rianuan a thok ve. TABC a voi khatnak civuipi cu Hriphi (B) certual ah tuah a rak si. TABC tawlreltu EC upa hna cu, Erea cio secretary le lenglei upa (Layman) chung in Zo lei aiawh upa Pu Za Khar (Dawt Men Pa) Thantlang electric zung rianuan Pu Sen Thang a pa, Hmawngtlang khua le lai lei ai-awhtu ah Pu Ral Tu (Bawi Bik Thawng pa) keimah kha rak thim kan si. Hriphi civui kar le HBA in inn dang kan chuah karlak caan kha cu, Tlangpi pastor Rev. Cuai Sang nih Secretary a rak uan. Hriphi civui ah cun Rev. Sang Awi ( Duh Ceu pa) nih uan seh tiah hnatlak a rak si. Rev.Sang Awi a rak si thiamlo caah Thantlang khua ah cun emergency meeting auh a si. Cu meeting nih cun Sihhmuh pastor Biak Kam kha thim han a si. TABC Tikir civui in Rev. Ci Lian (Sung Tial pa) Leitak pastor thim a si han. Rev. Ci Lian uan kum khat chungah miram tlang Ngaphaipi Baptist Biakinn kha MEC Khrihfabu chungah tamdeuh kan kal caah kan kal pi lai ti in cuhkalhnak a rak um. Culio Ngaphaipi Baptist pastor Rev. Ral Cin le a chungkhar rel chih in member rel chih in 19 lawng Baptist ah an tang. General Secretary Rev. Ci Lian, Sihni Sang Awr le keimah, Pu Ral Tu cu Ngaphaipi kal ding in TABC EC nih fial kan rak si. Hlamphei khua kan phak tikah Rev. Zakariah le Khrihfabupi nih sunglawi tuk in an rak kan don. Cu donnak cu kan ton hmasabik a sunglawi tukmi a si tiah Sihni Sang Awr le Rev. Ci Lian nih cun an rak ti hna. A thaizing cu Hlamphei khua cun kan i thawh Khuabung khua taw tiva Azui va ah kan i kholh. Bungkur pakhat ah kan i paih hna. Kan sum i tah usih kan ti. Tlanglei ah ka hei kal, zunhrite ka va dawh i ka van tah hna, keimah tahnak cun hrukpi hmur khang in ka van thlau hna ka van tei hna cu. An lung a tlinglo tuk. Sangpui pa nih cun, Natang zuu taangte bang na kan tei lai lo a van ti pah in a van ka tah. Sung ial pa cu, a hei tah, a si ko ee a ti, Heh tiah a ni pah. Sung ial pa nih cun a kan tah ve. A nih a chuak tuk ve. A kan tei pah hrimhrim. A aang a pum hme hi a ti. An nih a chuak i, kan i nuamh ngai lio caan kha ka ti i bia ka chim pah ah hin ka ap. Kan i kholhnak kan chungnawhte kha lu khuhpah in Lawnngtlang lei ah cun kan kal mu kha, ka ti pah in ka ah hiam hna maw! a luancia caan ngai kha. Ka U le kapa le lawngte he, chantong, uanti kan rak si ngai kha mu ka ti. Ngaphaipi cu zan sml. 8 ah kan phan. MEC President pa Rev. Tei Tu te cu minung (8) an si an van ti. Nitlak hlan ah an phan an van ti. Nannih TABC upa pawl cu an tlung lai lo tiah an hong chim lengmang. Kan thin a phangtuk, tiah Rev. Ral Cin nupi nih a ah aw he a van kan tuk ve. Athaizing khua a dei i, Biak inn tlum ding a si lo caah, khuabawi hlun Pu Mang Hlei inntual ah pumh a si. TABC GS, Rev. Ci Lian cu biatawi an chimter. Thawngthabia cu MEC President, Rev. Tei Tu nih a chim. Mara holh in a chim i, kei le Sangpui pa cu kan thei ve ti lo. Pumhdih in Rev. Ral Cin a bawmtu pastor uan tharte Saya No Khar te inn ah tonnak cu tuah a si. Tonnak chairman cu keimah, Pu Ral Tu ka si. Ahmasabik ah TABC-

GS Rev. Ci Lian nih a chim. HBA lio in siseh, TABC kan si hnu zong in, Baptist Khrihfabu cu cunglei nawl pekmi Khrihfabu kan si lo. Tanglei Krihfabupi hnathlaknak in a hruaimi kan si a ti. Atu Ngaphaipi kan rat zong hi Khrihfabu ai-awhtu pastor sawmnak ca le thawngthanhmi ca zoh in kan ra ti kha a chim. Cu dih cun MEC Persident Founder Rev. Tei Tu nih a chim ve. Ngaphaipi cu Mara miphun kan khualipi pakhat a si. An khuapite in MEC ah kan tamcem cang tiah, ca kan hmuh ve. Kan Secretarypa le kan zung Clerkpa kan van thlah hna. Cu hnu lawng ah, Rev. Ral Cin cu ka lut lailo a ti han caah, lungkhah lonak a chuak han. Cu ruangah, TABC upa, cu ni ah an tlung lai an ti caah kan ra ve a si ko a ti. Nannih cu, Biacaih bawi le Sihni tiang zong nan ra kho. Nan khuapi nih lungkhat ah cun, zei bu lei um zong a ha ngai ko. Lungkhahlo ahcun mi caihmi si a fawite lai ti kha a chim. Sihni Sang Awr chim caan a si ve. HBA hruainak tang um lio te in, HBA ram chung Khrihfabu pakhatkhat nih, zumhnak ruangah siseh, a ruang pakhat nih Khrihfabu a ngeihmi thilri pakhatkhat kha a kalpi kho lo. Biakinn zong Baptist zumtu pakhatkhat a taan zongah Baptist Biakinn a si tiah phunghram ser cia a sinak le TABC zong nih inn dang a chuah hnu tiang kha phunghram ning khan zulhdawi peng a si ko rih. Atu Ngaphaipi Biakinn zong hi an dihlak an khuapi Baptist member pakhatkhat hmanh taanglo in kal pi ahcun, kan Biakinn tiah zulh dawi a si lem hngalo. Ngaphaipi cu Mara miphun khuapi a si caah MEC Khrihfabu chung luh cu kan thlauh hna hngalo tiah a chim. Laimi kan pa Rev. Tei Tu le a rianuanti hawi cungah kai lawmtuk. Kei cu, TABC - EC, upa zong ka si lo. TABC-EC fialnak in ka ra ve a si ko. Miram miphun cu, van ha ngaingai nan si. Kanmah lei HBA, TABC nak cun serkor siangpawite thawng in, Baibal ca, Hla cauk hna nanmah holh tein nan ngei hmasa. Si kho sehlaw cozah hmai ah sikhiat le cuhkalhnak um lo tein zohdawh tein khuapi le Khrihfabu dihlak nih remdai tein caihkhang kho usihlaw a habik ti kha a donghnak ah a chim. (Diary chung in note mi) Meeting donghnak cu, Chairman nih ka chim ve. Nihin kan i ton hi lunglawm tak a si. Tazacuai a si lo. Biakinn cuh a si lo. Aho nih co seh tiah bia kan khiak lo. Ram hruaitu upa kha hmuhtonnak hmurka theihnak caan a kan serpiak a si ko. Ton herh ti lo in bia ngaitu le bia thlektu Pathian a si ko. Ton herh ti hmanh ah uktu cozah sin i ton ceo a si cang hnga caah nannih le kannih cu ram le miphun kilvennak phung ruangah, kan i ton a si ko ti hmuh thiam zuam usih ti kha ka chim. Nihin kan i tonnak cu bia chahnak digree a um lo mi a si ko. Pathian nih damte in tonnak caan tu kan serpiak han ko seh, ti kha ka chim ve. TABC thoknak in kum 6 renglo caan zoh tikah, Saya Sang Awr nih TABC GS cu uan sehlaw ti lungthli bia phun supsap thawng din kan theih pah cang. Rev. Ci Lian uan caan a dih kum le Saya Sang Awr tuan thok kum cu, Thantlang Baptist Church hmunpi ah cun tonh a si ngelcel. Thimnak (nomination) committee upa cu kan rak si ve bak ai. Nomination list a tanhtu ah cun fial chih ka si chapbei. BM meeting kaimi vial mithmai zoh tik ah cun, uihuam, naktuam in an hu cio hna. Mithmai panh kho kan um ti lo. Saya Sang Awr siseh ti a duh ngai pawl zong kha a si kholo an van ti sual te lai maw? ti phangmi hna thinlung cu ruakkung hlahmaw a si ti an cuang tuk thim. TABC phung buar pei kan si ne hnga cu tiah, mithmai panh le biazang dawh thim ning law tiah chim thiam mifim le chim fialtu hna zong, lung chung ektu, utlak khuang

beng lo ve hna. Zei an hmaipanh ve hlei hlah. A sum kholo cil dawlh thawng hmanh ku..ru.. ruk a ti. Atu le atu zun chuak bantuk an lo cang. Pumh uktu, chairman pa nih thim caan a si cang lai. Nomination pawl nih caan an van hman cang lai a van ti vial ah cun; hlacawnnak black board, playwoodpi cu a tungtudupi cun an van chon pup colh. Thungrang bawm cu an van chiah chih. Thungrang sau cem cu ka kut kar ah cun ka van tenh ve ko. Mizapi cu ka hei zoh hna. Pacal cang ve nih; duh lei chim ding he duhlo lei chim ding dawh he cun ka van zohnak hna in, ka van hngalhfiang manh ko hna. Saya Sang Awr GS uan fial cu zeitin?.. tiah biathli kan kawl lio ah hin, Rev. Dr.David Van Bik nih cun, Nan zapite hnathlak in, kan in herh kan uanpiak ti khawh ahcun a ha ko hnga na in, a duhlo, a soiselmi um sual i nan khuhhliah lo ah cun, a mui nan chiatter a si ko lai a rak ti. Rev. Hai Mang(Khua Thawng pa) nih cun nan i chuahsual citcet i nan ben khawh ung lo ahcun, khuaibu hremte nan lo ko lai. Khua khom ai hlum ngam ti hng dek maw? voikhat tio cu tio kan chuak kho men. Ti hrawng na, tlang kai na teh ai si te ko hnga. Mino nih nan ih le nan ngamh dek maw? a ti ve. Kan nu pa, Rev. Huat Vung kha ka hal hramhram. Anih nih cun ai awlh tuk ve hoi. Pa Awr tluktu an umlo ka hei ti ko. Baibal zong a cawng ve ko. Sihni nengmangpi hna nan thim ah cun lomh tuk ding. A duh lomi an um lai ka zum lo a ti men ve. Nomination hna ai awh cun, blackboard ah cun ka van dir hap ve. GS cu Saya Sang Awr siseh kan ti ko ka van ti hngap. Mahsahlah chan bawi pakhat pa ralha ve, a hmai sentertar na in, ka duhlo cu a si lo; kan duh dih lai ka zumh. Aho hmanh nih kan tluk lai lo. TABC upadi hrawk cu amah nih a duh lai ka zum lo a van ti ai. Khuate lei cozah rianuan lak ah a sang deuh bawi tetuai deuh pa nih, TABC hi a no tuk rih: cu kar ah upadi hrawk cu HBA nih a kan nihsawh lai. American upadi cu kum 200 chung ah hrawh cu chimlo an remh ballo. a van ti chap ve. Khuate lei upa fim a van dir ve, A duhlo kan um lai lo. TABC,GS cu Rev. a hmu ciami a si lai. Orden pastor a si lai ti hngalh bu tein nan taar, nan chuahpi ko i, BRE Digree a ngei taktak maw? ngeitak lo hme? ti kha bia hal thiam lei in a van kan virhkhoih ve fawn. Ka rian a si bantuk in an bia leh cu a herh cang. Hi caan lio hi, TABC ram mi nih an ka dawt lingcing te a si in kai ruah. Khuate lei mi le pastor pawl tlunkal caan ah an poiherh cini, sapiat tbk... kha Tamahwazamah zung in lehmah ka pek hna i, an cawk khawh hrawng hrang. Biacaih zung ah ka rak thut ka hrawng a si hlei ah TABC civui ah baulote in a kal pengmi ka rak si kha ve ngeingei in kai ruah lio ve a si. Nihin kan ram caan zoh chih te in ka uan in ka ruah pah ko. TABC ram hi cozah mit cun, kan thianghlim tuklo in kan ruah. A tlungkal chawnbiatu holh thiam kan herh ngaingai. TABC ran hi a zaw ngai in kan hmuh. A damnak ah Bible digree a si ti lo. Ordance zong a dam nak a si hlei lo ti kan hmuh ko. Baibal digree le Rev. ko nih pei TABC ram a cheuhmal cang lai hi. Cawnnak tling le tlinglo le (income) phaisa lut chuak cun kan tah ballo. A duhmi uan fial theng a um ballo. A duh na lo in nawl le fial chih hi biaknak nih ai hit hruaimi thilri bantuk a si. Vawleipi nih a herhbikmi ai tinhbikmi cu han a si. han cu thlennak, tharchuahnak lo cun a har tuk, vawlei uknak reeng, biaknak reeng nih thlen caan an tuahchan cu thancho duh ruangah a si. TABC kum 6 renglo siapi thah ding hren i a hrengmi in kan ruah ve cu teh ti kha raltha tak sining dik leh cun ka van leh ve hna.

Cu ka van leh hna hnu ah cun, ZBC civui zong hrelhlo in a zawh vemi khuabawi zong a uan sau vemi TABC-EC upa Pu Za Khar (Hmawngtlang mifim) nih a van dir hngap i Lio u hna, ka duale hna vei mu, kei cu upadi cu a herh ah cun remh khawh phung a si ko. Atu cu upadi remhnak in kan duhdeuhmi kha a um caah khumh ko usihlaw cu hnu ah a herh le kan remh te ko hnga ka ti. A rawk lei nak cun a remh lei a si deuh tu ko hi kei cu ka hna a tla ka ti ko hna ee; a van ti sit ko ee. Cu lio meeting caan chairman cu Thantlang pastor Ngun Awi a van hut lio a si caah Pu Za Khar cu a van ti colh ko ai. Zeizat dah an si timi rel zong umlo in thim a rak si ko. Mizapi thinlung chungah Thiang thlarau fimchimhnak le ruah thiam, nawlthiamnak thinlung a rak um ca le Sangpuipa nunzia cawlcangh zia kha TABC hramdirhtu ah Pathian fial a rak si kha a si ko rua in ruah cio a si ko. Rev. Dr. Sang Awr (Sangpui pa) TABC hramdirh rianuan lio i Pathian hniksaknak na ton i zung inn vialte kangh-uh kha, na rawl thaw le na thazaang petu ah nai serh hna a si kha. Tlakrawh lawlaw in sak han nan tum lio i, Na zaial pemkeu le tivun chiat vialte, kan i ton caan kha na zaial pem le hniar hratmi zoh cem hramh dai lo, roling in; TABC na neh zuun chumtual cung khan daw-ngaitu zaleng kai mithli he, liamcia caan kan cuanh hi, rauthla mitsir tal in van cuan han hna law, zungzal nun hmun sui khua lian kutka in dongtu pa can rian, nai thim han ah cang ko ne seh law. Bawi Bik Thawng pa Thantlang.

Pathian Sal Tha

K.L. Tial Hre Ling

Maw kan pa thing bang pur ruangmang ai mu cu ka thin liamcia caan vialte hna kha la bang in zelh than awk nih tha fawn tung lo tialtungfang bang in kan zoh zun lio thengte ah Pathian sal tha uai riangmang fah cu. Ram le miphun dawtu kan pa vung kal riangmang ai kun law Bawipa Pathian tangah na kutnem kan in tlaih. na

Maw kiak tuan chan tawi aw na liam ni cu nu lo sia an hram bang tlang kip kan cul chunlai cer ah kan van niceu a mui ee van a sang lei a pit thinlung a kuai kan pa zatial tlaih manhlo na liam ni cu. Zingtial khua nu nih lairel hrat cu mu hrial khawh nih si tunglo maw kan pa aw zanmang silo vung liam ruangmang ko ne law na semnak lai lungrawn khirh in rung langte mu maw kanpa kan in siang hrim lo ee.

A val hawi hna lakah cuang khun ve ko kan zahpi naisailo kan pa Sang Awr Laimi caah van arfi ceu dawh na si na nehnang hmun kip ah par in en chin ko seh na hnu ah mikip hoi len awk in.Note: Sangpuipa ruak tonh lio i K.L. Tial Hre Ling sakmi a si.

Tahnak hla

Pu Ni Uk

1. Miphun kan pa, leidai tangah ciam ser hmanhlaw, philh um lai lo, chim tak na bia ho valpa nih, hun rawl kho lai. 2. Lim taa manhlo, a lo hmabaan airawl khotu,ti bang kan hal tin cung Pathian sin,Thlaza kan cam

TABC rianuantu kan pale nih Rev. Sang Awr he pehtlai in lungduh siaherh bia ial a duhmi nan um ahcun TABC Authawng ah rak ial cio u law kan in chuahpiak hna lai tiah thawng an kan thanhmi ka theih tikah ka lung ai lawm taktak. Pa cu ah ruangmang i ah hla lawh zong kan ti khawhmi a sio caah ka ah can ah hi catlang tlawmte hi ka vun ial ve. 1976 kum lio ah hin Thantlang ah sihni a rak uan lio a si. A voikhatnak Pyithuh Council chan si i Thantlang Myone tazazi i biacaih bawi a rak uanmi hna cu Pu Lian Mang, Pu Ral Tu, Pu Rung Ling an rak si. Pu Ral Tu le Pu Rung Ling hi an rian in an rak dinhter hna i anmah thlahnak caah Sangpui pa nih ram kan riahpi hna lai tiah a rak kan sawm. Amah le ngakchia pahnih buk an hngak. Sihni pakhat a si nain buk hngak rian a simi poahpoah kha ngakchia he cun an tuah dih. Ngakchia bia a ruah peng hna. Ram vak pawl kan hun lawi, zanriah thawte in a kan pek. Zan khuadei ti awk bia a phunphun a kan ruah. Ramchung hmailei vision a kan chimh. Ram fim le ram rum hna tuanbia a kan chimh. Ka philh khawhlomi cu Tuluk ram hruaitu Mosiung uknak kong a kan chimhmi kha atu tiang in ka philhlo. Kan kal zan ah Phun Kil nih vavu hlipi a kan kahpiak, ai lawmtuk. A kut a tlaih, lawmhnak bia a chim. A thaizan ah Khen That nih sakhi a kah ve

ai lawmtuk, a kut a tlaih, lawmhnak bia a chim. Sa cu kan can, saril siam ah ngakchia a rinh duh hna lo amah bak nih a ser dih. Samei bul pah ah ca a rel peng i a relmi hi a kan chimh colh. Chun ah khan kan dum i keimah nih nengpi tlaih riak ka kah ve. Ai lawmtuk i ka kut voihnih a ka tlaih. ( Ka lihlo ka kah taktak ko, atu ka ruah hin tuanbia ial awk ah Pathian nih a rak ka pek ko tiah ka lung a fiang.) Pathian ihzahmi le zumtu taktak a si bangin rawl ei lai paoh ah thla a cam zungzal. Thlacam tikah Saram le ngaleng na taa a si i kan nih na fale zong na kan dawt ruangah na kan pekmi an si, na cungah kan i lawm a ti zungzal. Midang nun i hrawm ve hi a thiam tuk. TABC G.S a uan lio, 1982 ah Hniarlawn Khrihfabu nih kan pa Rev. Nawl Tling Jubilee an tuah i phungchim an rak thiah ve. Bangku pa Hniarlawn ah kal ding ka si i hung ka zul law ka duh ko tiah a ka sawm. Kan unaute cun kan kete in kan i thawh. Hakha le Thantlang kar lam hi RTC kalnak lam a rak si i vankham cho khin kan rak kal. Vankhamtlang chuah Hmet Dun pa lobua lam kawi khi Thantlang khua cuanhnak a si kan dir ta rih lai a ka ti. Thantlang khua cu kan cuan i a mitthli a tla. Baangku pa naingnganzi( ) ruang i an rak kan tlaih lio ah khan hika hmun hin Thantlang ka rak cuanh i ka rak ap ko. Ka pa bak ve ko ka ti na in ka rak celh hrimhrim lo tiah a ka ti. Ram le miphun caah cun zei kan ton paoh ah kan rak ti ko nain Thantlang ka chuah taktak hi cu a poi tuk ko tiah a nolh han. Kan pa Sangpui pa hi kan Thantlang khua a dawt lawng silo in a tlaihchan ngaimi a si. Khua kan timi a vawlei, a fingtlang le umnak inn hi a si lo. A khua chung i a ummi minung tu hi kan si deuh. Thantlang a tlaihchan tuk kan ti tikah a chung i khua a sami sifak, santlailo le mihrut sa-nga vialte kaltak a kan sianlo caah a si. Sangpui pa hi amah chimmi ngaihternak in midang chimmi a dong tiang in a ngai khomi pa a si. Keimah bantuk santlailote zong hi kan bia a dongh tiang a ngeih peng. Hi zawn te hin dah mi a tei cemnak a si rua ka ti. 2010 kum October 11 zan kha Baangku pa hung ka riak seh tiah bia a ka cah i an inn ah ka riak. Cu liote cu a hung dam karlakte caan kha a si. Zan pahra tiang bia kan i ruah. Bangku pa Thantlang kong hung ka chim tuah, nanmah pumpak nan thaithawh zanriah nan kawl ning, fale tangka kuat chom i nan nunning nan fawi, nan harnak vialte hung ka ruah, tiah a ka ti. Na chim dingmi ka ngaihtuk a ka ti. Sangpui nu le Sangpui pi zong an hu ve. Ka pi keimah duhmi a dih in nangmah caan a si ve te lai tiah a pi kha a hei chimh ta. Kanmah innchungkhar kong kha ka vun chimh. Kan nu he facang kan rial i phuainuh kan zuar man tangka cu kan nu nih ai ken. Ngun Lian nu nih chaw a tuah ve i a hmuhmi cu ai ken ve. Ruakhumhnak le sazawhnak ka herh chel ah hin Ngun Lian nu ka hal lengmang, ka angki zal ah hin tangka sanh awk ka ngei ballo tinak kong kha ka vun chim i a nih a chuak tuk thangpi in a ni lengmang. Mi biachimmi a caah santlai theng a si lomi khi ha nawnngai in a kan ngaih piaktu kan pa vawlei a can ruangmang hi a vun rawltu an um te hnga maw ka ti. Sangpui pa kong ka siaherh bia ka ial tikah hin ial chinlo awk a halomi cu kan pa Rev. Hai Mang (Khua Thawng pa) kong hi a si. Kan pa Thawngte pa le Sangpui pa hi keimah pumpak caah cun ka sianginn an si ko. Catlap le cafung in cun an ka chimlo nain Thantlang kum 40 renglo ka um chung i ka nun hruaitu, fimchimtu, cawnpiaktu an si ko ti le an ka roh takmi bia dawh bia ha ngaih nuam tete ka philhlomi cu ka nun chung ka chim peng lai i a nun zong kai nunpi ko lai ti hi thlarau ram ah bia ka hei cah hna.

KA NUNNAK NIH A PHILH KHAWHLOMI SANGPUI PA Beauty

Sangpui pa nunnak hi mi tampi nih chimcawklo in nan ngeih cio ko caah, keimah ka nunnak nih thlankhur ka luh tiangah ka philh khawhlomi tlawmpalte chim bu in Sangpui pa upatnak ka pek. Sangpui pa hi zeibantuk minung hmanh nih bia an chimmi hi a ti khawh chung in a ngaihpiak hna i a tuahpiak tawntu hna a si bantuk in, TABC nubu hruaitu ding rian ka luh tikah, TABC ngaktah (PCH) umnak inn sakding hi tinhmi kan rak ngei na in, zeitihmanh in tuaktan khawh dih ding kan si lo caah Yangon ah civui zawh pah in sangpui pa te inn ah ni hnih ka cam i ramdang a theihhngalhmi sinah bawmh haldingmi rian ritpi ka khinh tikah lunglawmte in a ka cohlan. Asinain, a van tuak taktak ram 10 hrawng ca a tial tikah ngakah cu an thinlung ah a um lo, hanchonak ca lawng an duhmi a si a ti caah, Japan ram ah hanchonak inn caah a kan halpiak i, atu ah TABC Quarter kulh chung ah inn nganpi kan ngeih khawhnak a si. A tangah PCH kan fale cu thlamtlingte in hmunhma thami an ngeih hlan chung vialte an um kho. Cupin ah ngakah inn saknak ca ah nubu nih kan kawlhawl khawhmi vialte cu ngakah inn an ngeih cang caah TABC nubu Sui Jubilee philh lonak caah ti in women Secretary umnak le nubu hanchonak sianginn saknak caah a hram vialte dirhnak ah kan hman. Hi vialte hi Sangpui pa thawng lawngte in a si. Sangpui pa hi thil tha le a herhmi caah cun tlam a tlinter zungzal tu zumh awltlak le bochan awktlak pasal tha a sinak hi ka nunnak nih ka thih tiang ka philh khawh lomi a ka lawmhtertu a si. Pathian rian i ka luh than hlan ah hin, a khualtlawnnak le a umkalnak ah hin a rak ka sawm tawn tik ah, ziahhme Pastor zong ka si tunglo, hi ti na ka sawm lengmang ka ti i, a rak ka lehmi cu Beaute kan dawttuk caah hin

mizapi nih in thei hna sehlaw in daw ve hna seh ti ka duh caah kan (cawngia) mi a si tiah a rak ka ti. ZBC nubu meeting le training zongah a rak ka kalter tawnmi nih hin, ka nunnak ah ralthatnak le thawnnak zong tampi a ka pek i, nihin ni tiang Pathian rian ka tuannak ah ka thawnnak muru a si tihi fiangte in ka theih chin lengmang caah ka nunnak nih ka theih khawhlo tiangin a rak ka dawtnak hi ka thih tiang ka philh khawhlomi a si ee. Ka nun nak ah a hohmanhnih an ka auh ballo nak ( A Beau) tiah nemte in a rak ka au zungzaltu nunnak sining hi ka thinlung ah chumbang ai zel zungzal mi hi keimah lung hnangamnak ah Sangpui pa ka dawt ve nak ka upatnak le ka philh khawhlonak, hi capar tlawmpal te in ka van langhter ve.THANTLANG ASSOCIATION OF BAPTIST CHURCHES THANTLANG, CHIN STATE Zuun Ngaihnak Roca Rev. Dr. Sang Awr, nangmah cu Thantlang Association of Baptist Churches (TABC) dirhpitu le tungmertu, Laimi phun a cawisang i a dirkamhtu kan pa na si. Pathian rian thih tiang in na tuannak ah zumhtlak saltha na si. Vawlei cu thennak ram a si bantuk in 2011 January 16 zan ah hi vawlei nunnak in a rian na tuanpiakmi na Pathian sinah na kan dinhtaknak thawng kan theih tikah TABC ram chung na dawtmi zumtu vialte nih mithli he na zuun kan tuar. Nihin ah cun ngaihchiatnak mitthli he i then ko hmanh usihlaw ni khatkhat ah Van sui khualipi ah lunglawmte in kan i tong than te lai ti zumhnak le ruahchannak he na ruak kan in thlah.

Rev. Dr. Lal Uk General Secretary 2011 January 18

Rev. S. Tha Ceu President