ilocano bible new testament
TRANSCRIPT
Ilocano Bible - New Testament
|New Testament|
Mateo
Marcos
Lucas
Juan
Aramid
Roma
1 Corinto
2 Corinto
Galacia
Efeso
Filipos
Colosas
1 Tesalonica
2 Tesalonica
1 Timoteo
2 Timoteo
Tito
Filemon
Hebreo
Santiago
1 Pedro
2 Pedro
1 Juan
2 Juan
3 Juan
Judas
Paltiing
The New Testament of our Lord and Saviour Jesus Christ
Mateo 1
1 Daytoy ti libro ti kapuonan ni Jesu-Cristo a nagtaud iti kaputotan ni
David, a nagtaud met iti kaputotan ni Abraham. 2-6a Manipud ken ni
Abraham agingga ken ni ari David, adtoy dagiti nailista a kaputotan:
Abraham, Isaac, Jacob, Juda ken dagiti kakabsatna; sumaruno da Fares
ken Zara nga annak ni Tamar; Esrom, Aram, Aminadab, Naason, Salmon,
Boaz nga anak ni Rahab, Obed nga anak ni Ruth, Jesse ken ni ari David. 6
b-11 Dagiti kaputotan manipud ken ni David agingga idi napagtalaw dagiti
Israelita a kas balud ket naipanda idiay Babilonia: David, Solomon (putot
ni David iti asawa idi ni Urias), Roboam, Abias, Asa, Josias, ken ni
Jeconias agraman dagiti kakabsatna. 12 -16 Dagiti kaputotan kalpasan ti
pannakaipan dagiti Israelita idiay Babilonia agingga iti pannakayanak ni
Jesus: Jeconias, Salatiel, Zorobabel, Abiud, Eliakim, Azor, Sadoc, Akim,
Eliud, Eleazar, Matan, Jacob, Jose nga asawa ni Maria nga ina ni Jesus a
maawagan iti Cristo. 17 Ngarud, adda 14 a kaputotan manipud ken
Abraham agingga ken ni David. Sangapulo ket uppat met ti kaputotan
manipud ken ni David agingga a naipan dagiti Israelita idiay Babilonia.
Adda met 14 a kaputotan manipud pannakaipanda idiay Babilonia agingga
iti pannakayanak ti Cristo. 18 Kastoy ti pakasaritaan ti pannakayanak ni
Jesu-Cristo: Naitulag ni Maria nga inana a mayasawa ken ni Jose. Ngem
sakbay ti panagkasarda, naammoan a masikogen ni Maria babaen iti
pannakabalin ti Espiritu Santo. 19 Agsipud ta nasingpet a lalaki ni Jose a
nakaitulaganna, ket dina kayat a maibabain ni Maria, pinanggepna nga
isina a sililimed. 20 Ngem idi pampanunotenna daytoy, nagparang
kenkuana ti anghel ti Apo iti maysa a tagtagainep. Kinunana, “Jose nga
anak ni David, dika agamak a mangikasar ken ni Maria, ta aramid ti
Espiritu Santo ti sikogna. 21 Ipasngaynanto ti maysa a lalaki ket
panaganamto iti Jesus, agsipud ta isalakannanto dagiti tattaona kadagiti
basbasolda.” 22 Naaramid amin daytoy tapno matungpal ti insao ti Apo
babaen iti profeta: 23 “Agsikogto ti birhen a balasang. Ipasngaynanto ti
maysa a lalaki, ket mapanagananto iti Immanuel a kayatna a sawen, ‘Adda
kadatayo ti Dios.’” 24 Idi makariing ni Jose, tinungpalna ti imbaga ti
anghel ket inkasarna ni Maria. 25 Ngem saanna a dinennaan ni Maria
sakbay a nangipasngay iti anak a lalaki a pinanaganan ni Jose iti Jesus.
Mateo 2
1 Nayanak ni Jesus iti ili a Betlehem idiay Judea, idi ni Herodes ti agdama
nga ari. Saan a nabayag kalpasan ti pannakayanakna, adda mamasirib a
lallaki a taga-daya a napan idiay Jerusalem. 2 “Sadino ti ayan ti ubing a
nayanak nga ari dagiti Judio?” sinaludsodda. “Nakitami ti bituenna a
nagparang idiay daya ket immaykami agdaydayaw kenkuana.” 3 Idi
madamag daytoy ni ari Herodes, napalalo ti pannakariribukna, kasta met ti
tunggal maysa a taga-Jerusalem. 4 Pinaayabanna ngarud dagiti panguloen
a papadi ken mamaestro iti Linteg ket sinaludsodna kadakuada no sadino
ti pakayanakan ti Cristo. 5 “Iti ili a Betlehem idiay Judea,” insungbatda,
“ta daytoy ti insurat ti profeta: 6 ‘Sika, Betlehem, iti daga ti Juda, Saanka a
maudi kadagiti ili iti Juda; Ta tumaudto kenka ti maysa a pangulo A
mangaywan iti ilik nga Israel.’” 7 Inayaban ngarud ni Herodes dagiti
sangaili ket kinasaritana ida iti nalimed. Sinaludsodna kadakuada no kaano
ti panagparang ti bituen. 8 Iti kasta, imbaonna ida idiay Betlehem ket
imbilinna kadakuada, “Inkay sapulen a naimbag ti ubing; no masapulanyo,
ipakaammoyonto kaniak tapno innak met agdaydayaw kenkuana.” 9-10
Pimmanawda ket idi addada iti dalan, nakitada manen daydi bituen a
nagparang idiay daya. Idi makitada, anian a ragsakda, anian a rag-oda!
Indaldalanna ida agingga a nagsardeng iti ngatoen ti balay a yan ti ubing.
11 Simrekda iti balay ket nakitada ti ubing ken ni Maria nga inana.
Nagparintumengda a nagrukbab kenkuana. Kalpasanna, inruarda dagiti
sagsagutda a balitok, insenso ken mirra ket indatonda kenkuana. 12 Idi
agawidda iti ilida, sabalin a dalan ti nagnaanda ta iti tagtagainep,
pinakdaaran ida ti Dios a didan agsubli ken ni Herodes. 13 Kalpasan ti
ipapanaw dagiti mamasirib, nagparang ken ni Jose ti maysa nga anghel ti
Apo, iti maysa a tagtagainep. Kinunana, “Bumangonka; inka ipakni dagiti
agina idiay Egipto. Agyankayo sadiay agingga’t ibagak a pumanawkayo.
Ta sapulento ni Herodes ti ubing tapno papapatayna.” 14 Bimmangon ni
Jose, innalana dagiti agina ket nagrubbuatda iti dayta a rabii a napan idiay
Egipto. 15 Nagyanda sadiay agingga’t ipapatay ni Herodes. Naaramid
daytoy tapno matungpal ti insao ti Apo babaen iti profeta, “Manipud
Egipto inayabak ti anakko.” 16 Napalalo a pungtot ni Herodes idi
madlawna a sinikapan dagiti mamasirib. Iti kasta, imbilinna a mapapatay
amin nga ubbing a lallaki nga agtawen iti dua wenno nababbaba iti ili a
Betlehem ken kadagiti kabangibangna. Naibatay daytoy nga aramid iti
kinuna dagiti sangaili maipapan iti panagparang ti bituen. 17 Natungpal
ngarud ti impadto ni profeta Jeremias: 18 “Idiay Rama, nangngeg ti
panagikkis, Dungdung-aw ken nasaem a sangsangit; Dungdung-awan ni
Raquel dagiti annakna, Agsangsangit ket dina kayat ti maliwliwa, Ta
natayda amin a padapada.” 19 Kalpasan a natay ni Herodes, nagparang iti
tagtagainep ti maysa nga anghel ti Apo ken ni Jose idiay Egipto. 20
“Bumangonka,” kinuna ti anghel. “Yawidmon dagiti agina iti daga ti
Israel. Natayen dagiti nagpanggep a mangpapatay iti ubing.” 21
Bimmangon ngarud ni Jose. Innalana dagiti agina ket nagsublida idiay
Israel. 22 Ngem idi nadamag ni Jose a ni Arkelao nga anak ni Herodes ti
simmukat nga ari ti Judea, nagbuteng a mapan sadiay. Babaen iti
tagtagainep, napakdaaran manen ni Jose ket napan iti probinsia ti Galilea.
23 Nagtaeng iti ili a maawagan iti Nazaret. Iti kasta, natungpal ti kinuna
dagiti profeta, “Maawaganto iti Nazareno.”
Mateo 3
1 Iti dayta a tiempo, napan ni Juan a Mammuniag idiay let-ang ti Judea ket
nangaskasaba. 2 “Agbabawikayo kadagiti basbasolyo,” kinunana,
“agsipud ta asidegen ti Pagarian ti langit.” 3 Ni Juan ti kayat a sawen ni
profeta Isaias idi kinunana, “Idiay let-ang, adda mangipukpukkaw:
‘Isaganayo ti dalan ti Apo, Pasayaatenyo ti pagnaanna!’” 4 Naabel a
dutdot ti kamelio ti kawes ni Juan. Sinturon a lalat ti barikesna. Dudon ken
diro ti taraonna. 5 Napan kenkuana dagiti tattao a naggapu idiay Jerusalem
ken entero a probinsia ti Judea, agraman amin a dagdaga iti agsumbangir
iti karayan Jordan. 6 Nagbabawida a silalatak kadagiti basbasolda ket
binuniagan ida ni Juan idiay karayan Jordan. 7 Idi makita ni Juan dagiti
adu a Fariseo ken Saduceo tapno agpabuniagda kenkuana, kinunana
kadakuada: “Dakayo a kaputotan ti uleg, siasino ti nangibaga a malisianyo
ti dusa a dandanin idissuor ti Dios? 8 Ipakitayo babaen iti aramidyo a
nagbabawikayon kadagiti basbasolyo. 9 Diyo ipagarup a makalisikayo iti
panagkunayo, ‘Uray ta amami ni Abraham.’ Ibagak kadakayo a kabaelan
ti Dios a pagbalinen dagitoy a bato nga annak ni Abraham. 10 Naisaganan
ti wasay a pangpukan kadagiti kayo agingga iti ramut; mapukan ket
maipuor amin a kayo a di agbunga iti nasayaat. 11 Buniagankayo iti
danum kas pakakitaan ti panagbalbaliwyo. Ngem ti umay a sumarsaruno
kaniak buniagannakayto iti Espiritu Santo ken iti apuy. Dakdakkel ti
pannakabalinna ngem siak; diak pay maikari a mangbitbit iti sandaliasna.
12 Adda kenkuana ti bigao a pangtaep iti irik. Urnongen ken idulinnanto ti
irikna iti kamalig; ngem puorannanto ti taep iti apuy a di maiddep.” ni
Jesus 13 Dimteng ni Jesus idiay Jordan a naggapu idiay Galilea tapno
pabuniagan ken ni Juan. 14 Ngem kayat a lapdan ni Juan ket kinunana ken
Jesus, “Siak koma ti rebbengna a buniagam, ngem apay nga umayka
kaniak?” 15 “Bay-am a maaramid ita daytoy tapno matungpalta ti amin a
pagayatan ti Dios,” insungbat ni Jesus. Immanamong ngarud ni Juan. 16
Apaman a nabuniagan ni Jesus, simmang-at a dagus manipud iti danum
ket adtoy, naglukat kenkuana ti langit. Nakitana ti Espiritu ti Dios a
bumabbaba a kas maysa a kalapati ket nagdisso kenkuana. 17 Ket kinuna
ti maysa a timek a naggapu sadi langit, “Daytoy ti dungdungngoek nga
Anak a pakaragsakak unay.”
Mateo 4
1 Ti Espiritu inturongna ni Jesus idiay let-ang tapno sulisogen ti Diablo. 2
Kalpasan ti uppat a pulo nga aldaw ken rabii a saanna a pannangan,
nabisinan ni Jesus. 3 Immasideg kenkuana ti Diablo ket kinunana, “No
sika ti Anak ti Dios, pagbalinem a tinapay dagitoy a bato.” 4 Ngem
insungbat ni Jesus, “Kuna ti Nasantoan a Surat, ‘Saan laeng a tinapay ti
pagbiag ti tao no di pay ket ti tunggal balikas nga aggapu iti Dios.’” 5 Ti
Diablo inturongna ni Jesus iti Nasantoan a Siudad ket impanna iti
kangatoan a paset ti Templo, 6 sana kinuna, “No sika ti Anak ti Dios,
tumappuakka man, agsipud ta kuna ti Nasantoan a Surat, ‘Bilinento ti Dios
dagiti anghelesna a mangaywan kenka: Tapayaendakanto Tapno uray
dagiti sakam saan a madunor iti bato.’” 7 Ngem insungbat ni Jesus, “Kuna
met ti Nasantoan a Surat, ‘Dimo sulisogen ti Apo a Diosmo.’” 8 Impan ti
Diablo iti nakangatngato a bantay ket impakitana kenkuana dagiti amin a
pagarian ditoy lubong, agraman dayagda. 9 “Itedko kenka amin dagitoy,”
kinuna ti Diablo, “no agparintumeng ken agdaydayawka kaniak.” 10
Insungbat ni Jesus, “Pumanawka, Satanas! Kuna ti Nasantoan a Surat,
‘Agdaydayawka iti Apo a Diosmo ket isu laeng ti pagserbiam.’” 11 Iti
kasta, pimmanaw ti Diablo. Dimteng dagiti angheles ket nagserbida ken ni
Jesus. 12 Idi nadamag ni Jesus a naibalud ni Juan, nagsubli idiay Galilea.
13 Saan a nagtaeng idiay Nazaret. Napan ketdi nagnaed idiay Capernaum,
maysa nga ili iti igid ti Dan-aw ti Galilea, iti sakup dagiti daga ti Zabulon
ken Neftali. 14 Naaramid daytoy tapno matungpal ti impadto ni profeta
Isaias: 15 “Daga ti Zabulon, ken daga ti Neftali, Iti sibay ti dan-aw, iti
ballasiw ti Jordan, Galilea a pagnaedan dagiti Hentil! 16 Dagiti tattao nga
agnaed iti kasipngetan Nakitada ti naraniag a lawag! Ket kadagiti agnaed
iti nasipnget a daga ni patay Nagraniag ti lawag!” 17 Manipud iti dayta a
tiempo, rinugian ni Jesus ti nangasaba: “Agbabawikayo kadagiti
basbasolyo, agsipud ta asidegen ti Pagarian ti langit.” 18 Idi magmagna ni
Jesus iti igid ti Dan-aw ti Galilea, nakitana dagiti agkabsat a mangngalap,
ni Simon (a managan Pedro) ken ni Andres. Iwaywayatda idi ti iketda
idiay dan-aw. 19 “Surotendak ket pagbalinenkayto a mangngalap kadagiti
tao,” kinuna ni Jesus kadakuada. 20 Pinanawanda a dagus dagiti iketda ket
simmurotda kenkuana. 21 Intuloy ni Jesus ti nagna ket nakitana ti sabali
pay nga agkabsat, da Santiago ken Juan nga annak ni Zebedeo.
Siluluganda iti bangka agraman ni Zebedeo ket isagsaganada dagiti iketda.
Inayaban ni Jesus ida. 22 Dagus a pinanawanda ti amada ken ti bangka ket
simmurotda ken ni Jesus. 23 Sinursor ni Jesus ti amin a paset ti Galilea.
Nangisursuro iti uneg dagiti sinagogada. Inkaskasabana ti Naimbag a
Damag maipapan iti Pagarian. Nangag-agas kadagiti nadumaduma a
saksakit ken sagsagabaen dagiti tattao. 24 Nagdinamag ni Jesus iti entero a
daga ti Siria. Impan dagiti tattao kenkuana dagiti addaan iti nadumaduma a
saksakit ken an-annayen: dagiti linuganan dagiti demonio, dagiti
agkiskissiw, ken dagiti paralitiko. Pinaimbag amin ida ni Jesus. 25
Simmurot kenkuana dagiti adu a tattao a naggapu idiay Galilea, Decapolis,
Jerusalem, Judea ken dagiti dagdaga iti ballasiw ti Jordan.
Mateo 5
1 Idi makita ni Jesus dagiti adu a tattao, simmang-at iti bantay. Nagtugaw,
ket immasideg kenkuana dagiti adalanna. 2 Insurona ida. Kinunana: 3
“Nagasat dagiti mangbigbig a napanglawda iti imatang ti Dios, ta kukuada
ti Pagarian ti Langit. 4 “Nagasat dagiti agladingit, ta liwliwaento ida ti
Dios. 5 “Nagasat dagiti napakumbaba, ta maitedto kadakuada ti daga. 6
“Nagasat dagiti nasged ti tarigagayda a mangtungpal iti pagayatan ti Dios,
ta mapnekdanto. 7 “Nagasat dagiti manangngaasi, ta kaasianto ida ti Dios.
8 “Nagasat dagiti nadalus ti panagpuspusoda, ta makitadanto ti Dios. 9
“Nagasat dagiti mamagkakappia, ta managandanto nga annak ti Dios. 10
“Nagasat dagiti maidadanes gapu iti panangtungpalda iti pagayatan ti
Dios, ta kukuada ti Pagarian ti Langit. 11 “Nagasatkayo no
mapabpabainan, maidaddadanes ken mapadpadakeskayo gapu kaniak. 12
Agrag-o ken agragsakkayo, agsipud ta dakkel ti gunggonayo sadi langit.
Ta kastoy ti panangidadanes dagiti tattao kadagiti profeta nga immun-una
ngem dakayo.” 13 “Dakayo ti pannakaasin dagiti amin a tattao. Ngem no
timmamnayen ti asin, saanen a mapaapgad. Awan serserbinan, no di ket
maibelleng ken mapaypayatan. 14 “Dakayo ti pannakasilaw ti lubong.
Saan a mailinged ti ili a nabangon iti rabaw ti maysa a bantay. 15 Awan ti
tao a manggangat iti pagsilawan sana kaluban. Iparabawna ketdi iti
nairanta a pagsaadanna tapno aglawag kadagiti amin a tattao nga adda iti
balay. 16 Masapul a kasta met ti panaglawag ti silawyo iti imatang dagiti
tattao, tapno makitada dagiti naimbag nga aramidyo ket idaydayawda ni
Amayo sadi langit.” 17 “Diyo ipagarup nga umayko waswasen ti Linteg ni
Moises ken dagiti pannursuro dagiti profeta. Diak immay tapno waswasek
dagitoy no di ket tapno ibanagko ida. 18 Laglagipenyo a bayat ti
panagpaut ti langit ken daga, dinto mapukaw ti uray maysa a tulnek wenno
kabassitan a paset ti Linteg, agingga a matungpalda amin. 19 Isut’ gapuna
a ti mangsalungasing iti kabassitan kadagiti bilbilin ken mangisungsong
kadagiti dadduma nga agsalungasing met, isunto ti kanumoan iti Pagarian
ti Langit. Ngem ti siasinoman nga agtungpal iti Linteg ken mangisuro pay
kadagiti sabali tapno agtungpalda met, isunto ti natan-ok iti Pagarian ti
Langit. 20 Ngarud, ibagak kadakayo: makastrekkayto iti Pagarian ti Langit
no napaspasnek ti panagtulnogyo iti pagayatan ti Dios ngem ti
panagtungpal dagiti Fariseo ken dagiti mamaestro iti Linteg.” 21
“Nangngegyo a naisao kadagiti tattao idi un-unana: ‘Dika mamapatay.
Siasinoman a pumatay, maidarum.’ 22 Ngem ita, ibagak kadakayo a
siasinoman a makapungtot iti kabsatna, maisaklangto iti ukom.
Siasinoman nga agkuna iti kabsatna: ‘Awan serserbim,’ maisaklang iti
Sanhedrin; ket ti agkuna iti kabsatna, ‘Maagka,’ sungbatannanto idiay
infierno. 23 Ngarud, no mangidatagka iti datonmo iti altar, ket malagipmo
nga adda gura kenka ni kabsatmo, 24 ibatim ti datonmo iti sango ti altar;
umuna pay nga inka makikappia ken ni kabsatmo sakanto agsubli a
mangidatag iti datonmo. 25 “No adda mangidarum kenka, makiaregloka
nga umuna kenkuana sakbay a mayuli ti darum. Ta no saan, isaklangnaka
iti ukom, ket ti ukom yawatnaka iti guardia a mangipupok kenka iti
pagbaludan. 26 Ibagak kenka nga idiaymonto agingga a mabayadam ti
amin a multam.” 27 “Nangngegyo a naisao: ‘Dika makikamalala.’ 28
Ngem ita, ibagak kadakayo a ti siasinoman a mangmatmat iti maysa a
babai, ket gartemanna, iti pusona nakabasolen iti pannakikamalala. 29
Ngarud, no ti makannawan a matam ti pakaigapuan ti panagbasolmo,
suatem samo ibelleng. Nasaysayaat a mapukaw ti maysa a paset ti bagim
ngem ti amin a bagim a maitappuak iti infierno. 30 Ket no ti makannawan
nga imam ti pakaigapuan ti panagbasolmo, putdem samo ibelleng.
Nasaysayaat nga awan ti maysa a takkiagmo ngem ti sibubukel a bagim a
maitappuak iti infierno.” 31 “Naisao pay: ‘Siasinoman a lalaki a
mangisina iti asawana, masapul nga ikkanna iti kasuratan ti panagsina.’ 32
Ngem ita, ibagak kadakayo a no ti lalaki isinana ti asawana, idinto a
sipupudno kenkuana ti babai, mapabasol dayta a lalaki iti pannakikamalala
ti asawana no makiasawa manen. Kasta met a makabasol iti
pannakikamalala ti mangasawa iti naisina a babai.” 33 “Nangngegyo met a
naisao kadagiti tattao idi un-unana, ‘Dimo paglikudan ti karim, ngem
tungpalem dagiti sinapataam iti Apo nga aramiden.’ 34 Ngem ita, ibagak
kadakayo a dikay agsapata a pulos no agkarikayo. Diyo pagsaksi ti langit
ta isu ti trono ti Dios, 35 wenno ti daga ta isu ti pagbatayan dagiti sakana
wenno ti Jerusalem ta isu ti siudad ti naindaklan nga Ari. 36 Dimo met
pagsapata ti ulom, agsipud ta dika makaaramid iti uray maysa la a buok,
puraw man wenno nangisit. 37 Kastoy laeng ti kunayo: no wen, ‘Wen;’ no
saan, ‘Saan,’ ta agtaud iti Managdakdakes ti aniaman nga inayonyo.” 38
“Nangngegyo a naisao, ‘Mata iti mata; ngipen iti ngipen.’ 39 Ngem ita,
ibagak kadakayo a diyo balsen ti siasinoman a mangdangran kadakayo.
No adda mangtungpa iti makannawan a pingpingmo, itayam pay ti
makannigid. 40 Kasta met a no adda mangidarum kenka tapno alaenna ti
badom, bay-am nga alaenna pay ti kagaymo. 41 Siasinoman a
mangipapilit a kumuyogka kenkuana iti maysa a kilometro, kuyogem pay
iti maikadua. 42 No adda dawatenda kenka, itedmo; no adda bulodenda
kenka, ipabulodmo.” 43 “Nangngegyo a naisao, ‘Ayatem dagiti
gagayyemmo ngem guraem dagiti kabusormo.’ 44 Ngem ita, ibagak
kadakayo: Ayatenyo dagiti kabusoryo ket ikararaganyo dagiti
mangidadanes kadakayo, 45 tapno agbalinkayo nga annak ni Amayo sadi
langit. Ta padapada a pagraniagenna ti initna kadagiti naimbag ken
kadagiti dakes a tattao. Mangted iti tudo kadagiti agaramid iti naimbag,
kasta met kadagiti agaramid iti dakes. 46 Apay a gunggonaannakayo koma
ti Dios no dagiti laeng agayat kadakayo ti ayatenyo? Kasta met ti aramiden
dagiti agsingsingir iti buis! 47 Ket no dagiti laeng gagayyemyo ti kasaoyo,
adda kadi pakaidumaanyo kadagiti sabali a tattao? Kasta met ti aramid
dagiti Hentil! 48 Masapul ngarud nga awan pagkuranganyo a kas ken ni
Amayo sadi langit nga awan pagkuranganna.”
Mateo 6
1 “Kitaenyo ta diyo pagpasindayag ti panagaramidyo iti naimbag kadagiti
tattao. Ta no kasta ti aramidenyo, dinakayto gunggonaan ni Amayo sadi
langit. 2 “Ngarud, no mangtedka iti tulong, dimo iwaragawag a kas iti ar-
aramiden dagiti aginsisingpet iti uneg dagiti sinagoga ken kadagiti
kalsada. Aramidenda daytoy tapno dayawen ida dagiti tattao.
Laglagipenyo nga inawatdan ti gunggonada. 3 No manglimoska,
mangtedka a saan a maammoan uray ti kaasitgan a gayyemmo, 4 no di ket
aramidem a sililimed. Ket ni Amam a makakita iti aramidmo a sililimed,
gunggonaannakanto.” 5 “No agkararagkayo, diyo tuladen dagiti
aginsisingpet! Igagarada ti agkararag a sitatakder kadagiti sinagoga ken
kadagiti lanlansangan tapno makita ida dagiti tattao. Laglagipenyo nga
inawatdan ti gunggonada. 6 Ngem no agkararagka, sumrekka iti kuartom,
irikepmo ti ridaw, saka agkararag ken ni Amam a di makita. Ket isu a
makakita kenka nga agkararag iti nalimed, gunggonaannakanto. 7 “No
agkararagkayo, diyo ulit-uliten dagiti awan serserbina a sasao, kas kadagiti
pagano a mangipagarup a maipangagda gapu kadagiti atiddog a kararagda.
8 Diyo tuladen ida; ta ammon ni Amayo dagiti kasapulanyo sakbay nga
agdawatkayo kenkuana. 9 Kastoy ngarud ti panagkararagyo: ‘Amami sadi
langit: Madaydayaw koma ti nasantoan a naganmo; 10 Umay koma ti
Pagariam; Matungpal koma ti pagayatam ditoy daga a kas sadi langit. 11
Itedmo kadakami ti taraonmi ita nga aldaw; 12 Pakawanennakami kadagiti
basbasolmi, A kas iti pammakawanmi kadagiti nakabasol kadakami; 13
Dinakam iturong iti nakaro a pakasuotan; Ilisinakami ketdi iti
Managdakdakes.’ 14 “No pakawanenyo dagiti nakabasol kadakayo
pakawanennakayto met ni Amayo sadi langit. 15 Ngem no diyo
pakawanen dagiti nakabasol kadakayo, dinto met pakawanen ni Amayo
dagiti basbasolyo.” 16 “No agayunarkayo, dikay agparang a naliday a kas
kadagiti aginsisingpet, ta agpammarangda a nakakaasi tapno maammoan
dagiti tattao nga agay-ayunarda. Laglagipenyo nga inawatdan ti
gunggonada. 17 Ngem no agayunarka, agdiram-oska ket sagaysayem ti
buokmo 18 tapno awan makadlaw nga agay-ayunarka—ni laeng Amam a
di makita ti makaammo. Ket isu a makaimatang iti aramidmo a nalimed,
gunggonaannakanto.” 19 “Dikay agurnong iti kinabaknang nga agpaay
kadakayo ditoy daga, ta ditoy dadaelen ti sanga ken lati, ket serken ken
takawen dagiti mannanakaw. 20 Agurnongkayo ketdi iti kinabaknang nga
agpaay kadakayo sadi langit, ta sadiay saan nga agratik ken aglati, ket saan
a serken ken takawen dagiti mannanakaw. 21 Ta no sadino ti ayan ti
gamengmo, adda met idiay ti pusom.” 22 “Ti mata ti pannakasilaw ti bagi:
no nasalun-at ti matam, nalawag ti entero a bagim. 23 Ngem no saan a
nasalun-at ti matam, nasipnget ti entero a bagim. Isut’ gapuna a no
nakudrep ti silawmo, anian a kinasipnget!” 24 “Awan ti makapagserbi iti
dua nga appo: ta guraenna ti maysa ket ayatenna ti sabali, wenno agserbi a
sipupudno iti maysa ket umsienna ti sabali. Diyo mapaggiddan a
pagserbian ti Dios ken ti sanikua.” 25 “Daytoy ti gapuna nga ibagak
kadakayo a diyo pakadanagan ti pagbiagyo, no ania ti kanenyo ken
inumenyo, wenno ti lupot a pagkawesyo. Saan aya a napatpateg ti biag
ngem ti taraon? Saan aya a napatpateg ti bagi ngem ti kawes? 26 Kitaenyo
dagiti tumatayab: dida agmula, dida agani, dida agipempen iti kamalig.
Ngem taraonan ida ni Amayo sadi langit. Saankayo aya a napatpateg ngem
dagiti tumatayab? 27 Siasino kadakayo ti makapaatiddog iti biagna babaen
iti panagdandanagna? 28 “Ken apay a pakadanaganyo ti pagan-anay?
Kitaenyo ti panagdakkel dagiti lirio iti tay-ak: dida agtrabaho wenno
agabel. 29 Ngem ibagak kadakayo nga uray ni Solomon, iti amin a
kinabaknangna, awan kawesna a napimpintas ngem iti uray maysa
kadagitoy a sabsabong. 30 No ti Dios kawesanna dagiti ruot iti tay-ak, ruot
nga adda ita ket inton bigat maisungrod, saan aya a nangnangruna a
kawesannakayo? Nagbassit ketdin ti pammatiyo! 31 Isut’ gapuna a dikay
masikoran. Diyo kunkuna, ‘Pangalaanminto ngarud iti kanenmi? wenno
inumenmi? wenno kawesmi?’ 32 Dagitoy ti ipangpangruna a biroken
dagiti Hentil. Ammo ni Amayo sadi langit a masapulyo amin dagitoy. 33
Ipangpangrunayo ketdi a biroken ti Pagarianna ken tungpalen ti
pagayatanna, ket itednanto amin a kasapulanyo. 34 Isut’ gapuna a diyo
pakasikoran ti agpaay kadakayo inton bigat; ta ti sumaganad nga aldaw
adda bukodna a parikut. Umdasen ti parikut ti maysa nga aldaw iti dayta
nga aldaw.”
Mateo 7
1 “Diyo ukomen dagiti sabali tapno dinakayto met ukomen ti Dios, 2 ta
ukomennakayto ti Dios a kas iti panangukomyo kadagiti sabali. Ti
pangrukodyo iti sabali isunto met laeng ti pangrukod ti Dios kadakayo. 3
Apay a dillawem ti puling iti mata ni kabsatmo, no dimo pay madlaw ti
troso iti matam? 4 Kasano nga ibagam nga ikkatem ti puling iti mata ni
kabsatmo no dimo pay madlaw ti troso iti matam? 5 Aginsisingpet!
Ikkatem pay nga umuna ti troso iti matam, tapno nalawag ti panagkitam a
mangikkat iti puling iti mata ni kabsatmo. 6 “Diyo ited kadagiti aso ti
aniaman a nasantoan, amangan no darupen ken kagatendakayo. Diyo met
ipurruak dagiti perlasyo kadagiti baboy—ta baddebaddekandanto laeng.” 7
“Agdawatkayo ket maikkankayto; agsapulkayo ket makabirokkayto;
agtuktokkayo ket mailukatto ti ruangan kadakayo. 8 Ta ti amin nga
agdawat, maikkan; ti agsapul, makabirok; ti agtuktok, mailukatto
kenkuana ti ruangan. 9 Siasino kadakayo nga amma ti mangted iti bato iti
anakna no dumawat iti tinapay? 10 Wenno ikkanna aya iti uleg no
dumawat iti ikan? 11 No dakayo idinto a dakeskayo, ammoyo ti mangted
iti naimbag kadagiti annakyo, dinto ket ad-addan ti pannangted ni Amayo
sadi langit iti naimbag kadagiti agdawat kenkuana? 12 “Aramidenyo
kadagiti tattao ti kayatyo nga aramidenda kadakayo; ta daytoy ti
kaipapanan ti Linteg ken ti pannursuro dagiti profeta.” 13 “Sumrekkayo iti
nailet a ruangan, ta nalawa ti ruangan ken kasta met ti dalan nga agturong
iti agnanayon a pakadadaelan, ket adu ti magna sadiay. 14 Ngem nailet ti
ruangan ti biag ken narigat ti dalan nga agturong iti biag, ket manmano ti
makasarak.” 15 “Agannadkayo kadagiti sinan-profeta. Umayda kadakayo
ket agparangda a kas karnero, ngem iti kinapudnona, narawetda a lobo. 16
Mailasinyonto ida babaen kadagiti aramidda. Adda aya kalkalunay nga
agbunga iti ubas, wenno sisiitan a kayo nga agbunga iti igos? 17 Ti
nasayaat a kayo nasayaat ti bungana; ti dakes a kayo dakes ti bungana. 18
No nasayaat ti kayo, saan nga agbunga iti dakes; no dakes ti kayo, saan
nga agbunga iti nasayaat. 19 Ti kayo a saan nga agbunga iti nasayaat,
mapukan ket maisungrod. 20 Ngarud, mailasinyonto dagiti sinan-profeta
babaen kadagiti aramidda.” 21 “Saan a ti tunggal maysa nga agkuna
kaniak iti ‘Apo, Apo,’ makastrekto iti Pagarian ti langit, no di laeng dagiti
mangtungpal iti pagayatan ni Amak sadi langit. 22 Inton dumteng dayta
nga Aldaw, adunto ti agkuna kaniak, ‘Apo, Apo! Iti naganmo, dimi aya
inwaragawag ti Naimbag a Damag? Iti naganmo, dikam aya nagpaksiat iti
adu a demonio? Iti naganmo, dikam aya nagaramid kadagiti milagro?’ 23
Ngem kunakto kadakuada, ‘Dikay am-ammo! Umadayokayo kaniak,
dakayo a managdakdakes!’ ” 24 “Ngarud, siasinoman a dumngeg
kadagitoy saok ket tungpalenna ida, mayarig iti masirib a tao a
nagpatakder iti balayna iti rabaw ti bato. 25 Nagtudo ken nagangin iti
napigsa ken naglayus, ngem saan a narba dayta a balay, agsipud ta
naipatakder iti rabaw ti bato. 26 Ngem ti siasinoman a dumngeg kadagitoy
saok ket dina tungpalen ida, mayarig iti maag a tao a nagpatakder iti
balayna iti kadaratan. 27 Nagtudo ken nagangin iti napigsa ken naglayus
ket narba dayta a balay. Nakaam-amak ti pannakarbana!” 28 Idi naisaon ni
Jesus dagitoy, nasdaaw dagiti tattao iti wagas ti panangisurona. 29 Ta
nangisuro a kas maysa nga addaan turay, saan a kas kadagiti mamaestroda
iti Linteg.
Mateo 8
1 Simmalog ni Jesus iti bantay ket sinurot ti adu a tattao. 2 Immasideg
kenkuana ti maysa a lalaki nga agkukutel ket nagparintumeng iti
sangoananna. Kinunana, “Apo, no pagayatam, mapaimbagnak.” 3 Sinagid
ni Jesus ti lalaki sana kinuna, “Kayatko. Umimbagkan!” Dagus nga
immimbag ti lalaki. 4 Ket kinuna ni Jesus kenkuana, “Denggem! Awan
pangibagbagaam iti daytoy, ngem inka a dagus iti padi tapno kitaenna no
naimbagkan. Kalpasanna, kas mayannatup iti Linteg ni Moises, ipaaymo ti
daton a pammaneknek kadagiti tattao nga immimbagkan.” 5 Idi
sumungsungad ni Jesus idiay Capernaum, sinabat ti maysa a kapitan ti
armada ti Roma ket nagdawat iti tulong. 6 “Apo,” kinunana, “masakit ti
adipenko idiay balay; naparalitiko ket marigatan unay.” 7 “Umayko
paimbagen,” kinuna ni Jesus. 8 Insungbat ti kapitan, “Saan a masapul nga
umayka, Apo. Diak maikari nga umawat kenka iti balayko. Agsaoka laeng
ket umimbag ti adipenko. 9 Ta uray siak, addaak iti babaen dagiti
naturturay ngem siak a pagtungpalak ket adda met dagiti soldado a
mangtungpal kadagiti bilinko. No kunak iti maysa, ‘Mapanka idiay,’
mapan. No kunak iti sabali, ‘Umayka,’ umay. Ket no ibilinko iti tagabuk,
‘Aramidem daytoy,’ aramidenna.” 10 Nasdaaw ni Jesus idi nangngegna
daytoy ket kinunana kadagiti sumursurot kenkuana: “Ibagak kadakayo,
diak pay nakasarak iti Israel iti siasinoman nga addaan iti kastoy a
pammati. 11 Laglagipenyo nga adunto ti aggapu iti laud ken daya a
makisango iti panganan kada Abraham, Isaac ken Jacob iti Pagarian ti
langit. 12 Ngem dagiti naituding nga agtawid iti Pagarian,
maipurruakdanto iti ruar a nasipnget, ket agsangit ken agngaretngetdanto
gapu iti rigatda.” 13 Kinuna ni Jesus iti kapitan, “Agawidkan. Maaramidto
kenka a kas iti panamatim.” Immimbag ti adipen ti kapitan iti daydi met la
nga oras. 14 Napan ni Jesus iti balay ni Pedro, ket nakitana a nakaidda ti
babai a katugangan ni Pedro, ta aggurigor. 15 Sinagid ni Jesus ti ima ti
babai ket awanen ti gurigorna. Bimmangon ket rinugianna ti nagserbi
kenkuana. 16 Idi dumteng ti rabii, inyeg dagiti tattao ken ni Jesus dagiti
adu a linuganan dagiti demonio. Babaen iti balikas, pinaksiat ni Jesus
dagiti dakes nga espiritu ket pinaimbagna amin a masakit. 17 Inaramidna
dagitoy tapno matungpal ti sinao ni profeta Isaias: “Isu a mismo ti
nangikkat kadagiti sagubanittayo ken nangibaklay kadagiti sakittayo.” 18
Idi makita ni Jesus dagiti adu a tattao a nangaribungbong kenkuana,
imbilinna kadagiti adalanna, “Bumallasiwtayo.” 19 Immasideg kenkuana
ti maysa a maestro iti Linteg ket kinunana, “Maestro, sisasaganaak a
sumurot kenka iti sadinoman a papanam.” 20 Simmungbat ni Jesus
kenkuana, “Adda rukib dagiti musang, ken adda umok dagiti tumatayab,
ngem awan pagiddaan ken paginanaan ti Anak ti Tao.” 21 Kinuna ti
maysa a lalaki nga adalan met, “Apo, agawidak man pay a mangipumpon
ken ni amak.” 22 Insungbat ni Jesus, “Bay-am dagiti natay a
mangipumpon kadagiti minatayda; umayka ket surotennak.” 23
Limmugan ni Jesus iti bangka agraman dagiti adalanna. 24 Pagammoan,
dimteng ti napigsa nga angin iti dan-aw ket sinabbuasabbuagan dagiti
dalluyon ti bangka. Ngem matmaturog idi ni Jesus. 25 Napanda riniing ket
kinunada, “Umarayatka, Apo! Lumnedtayon!” 26 “Apay nga
agbutengkayo?” kinuna ni Jesus. “Nagbassit ketdin ti pammatiyo!”
Bimmangon ni Jesus. Pinagtalnana ti angin ken dagiti dalluyon ket
nagkalma iti kasta unay. 27 Nagsiddaawda amin ket kinunada, “Ania ti
katataona daytoy? Uray ti angin ken ti dalluyon agtulnogda kenkuana!” 28
Idi dumteng ni Jesus iti daga dagiti Gadareno, iti ballasiw ti dan-aw,
sinabat ti dua a lallaki a rimmuar kadagiti rukib a pagitantaneman.
Linuganan ida dagiti demonio ket napalalo ti rungsotda, isu nga awan
makaitured a magna iti dayta a dalan. 29 Idi makaasidegda ken Jesus,
nagikkisda a dagus ket kinunada kenkuana, “Anak ti Dios, ania ti kayatmo
nga aramiden kadakami? Umaynakami kadi dusaen sakbay ti naituding a
tiempo?” 30 Iti saan unay nga adayo kadakuada, adda dakkel nga arban ti
baboy a mangmangan. 31 Nagpakpakaasi dagiti demonio ket kinunada ken
Jesus, “No paksiatennakami, ibaonnakami ngarud iti dayta nga arban ti
baboy.” 32 “Inkayo,” kinuna ni Jesus. Pimmanawda ngarud ket simrekda
kadagiti baboy. Nagtataray ti entero nga arban a nagturong iti teppang
sada timmappuak iti dan-aw ket nalmesda amin. 33 Nagtataray dagiti
agtartaraken kadagiti baboy a napan idiay ili. Impadamagda ti napasamak
agraman ti naaramid kadagiti dua a lallaki a linuganan dagiti demonio. 34
Isut’ gapuna a napan simmabat ken ni Jesus ti amin nga umili. Idi
makitada ni Jesus, dinawatda kenkuana a panawanna ti ilida.
Mateo 9
1 Limmugan ni Jesus iti bangka ket bimmallasiw iti dan-aw a napan iti
ilina. 2 Inyeg ti sumagmamano a tattao kenkuana ti maysa a paralitiko a
nakaidda iti papag. Nabigbigna ti kaadda ti pammatida ket kinunana iti
paralitiko, “Pakirdem ta pakinakemmo, anakko. Napakawanen dagiti
basbasolmo.” 3 Iti kasta, kinuna ti sumagmamano kadagiti mamaestro iti
Linteg iti nakemda, “Agsasao daytoy a tao iti maibusor iti Dios.” 4
Agsipud ta ammo ni Jesus ti pampanunotenda, kinunana, “Apay nga
agpampanunotkayo iti dakes? 5 Ania ti nalaklaka a sawen, ‘Napakawanen
dagiti basbasolmo,’ wenno, ‘Bumangonka ket magnaka’? 6 Paneknekak
ngarud kadakayo a ti Anak ti Tao adda pannakabalinna ditoy daga a
mamakawan kadagiti basbasol.” Ket kinunana iti paralitiko,
“Bumangonka, bagkatem ta iddam ket agawidkan.” 7 Timmakder ti
paralitiko ket nagawid. 8 Idi maimatangan dagiti tattao daytoy,
nagbutengda ket indaydayawda ti Dios ta intedna ti kastoy a pannakabalin
iti tao. 9 Pimmanaw ni Jesus iti dayta a lugar. Idi magmagna, nakitana ni
Mateo, maysa nga agsingsingir iti buis, nga agtugtugaw iti ofisinana.
Kinuna ni Jesus kenkuana, “Surotennak.” Timmakder ni Mateo ket
simmurot kenkuana. 10 Idi mangmangan ni Jesus iti balay ni Mateo,
dimteng ti adu nga agsingsingir iti buis ken dadduma pay a dakes a tattao.
Nakisangoda kenkuana ken kadagiti adalanna iti panganan. 11 Nakita
dagiti sumagmamano a Fariseo daytoy, ket kinunada kadagiti adalanna,
“Apay a makipangan ti maestroyo kadagiti kakasta a tattao?” 12
Nangngeg ni Jesus ida ket simmungbat: “Saan a dagiti nasalun-at ti
makasapul iti mangngagas, no di ket dagiti masaksakit. 13 Inkay adalen ti
kaipapanan daytoy a paset ti Nasantoan a Surat, ‘Asi ti kalikagumak, saan
a daton a mapuoran.’ Immayak tapno ayabak dagiti managbasol, saan a
dagiti agkunkuna a naimbag.” 14 Kalpasanna, napan ken ni Jesus dagiti
pasurot ni Juan Bautista ket sinaludsodda, “Apay a masansan nga
agayunarkami kasta met dagiti Fariseo, ngem pulos a di agayunar dagiti
adalam?” 15 Sinaludsod met ni Jesus, “Agladingit kadi dagiti makiboda
no adda ti nobio iti arpadda? Saan a mabalin! Ngem dumtengto ti tiempo a
maipanaw ti nobio kadakuada; isunton ti panagayunarda. 16 “Awan ti tao
a mangitakup iti baro a lupot iti daan a pagan-anay, agsipud ta no kumsen
ti baro a lupot, lumawa ti pigis ti pagan-anay. 17 Awan met ti mangikarga
iti baro nga arak iti daan a supot a lalat, ta bumtak ti supot, maibelleng ti
arak, ket madadael pay ti lalat. Ikarga ketdi ti baro nga arak iti baro a
supot a lalat tapno agpadada nga awanto ti pakaan-anoanda.” 18 Madama
a sarsaritaen ni Jesus daytoy kadakuada idi immasideg ti maysa a pangulo
a Judio. Nagparintumeng iti sangoanan ni Jesus sana kinuna, “Kapatpatay
ti anakko a balasitang. Umaymo kadi ipatay ta imam kenkuana ket
agbiagto.” 19 Iti kasta, timmakder ni Jesus ket sinurotna ti pangulo.
Kimmuyog met kenkuana dagiti adalanna. 20 Adda babai a sangapulo ket
dua a tawenen a napalalo ti panagbulos ti darana. Napan iti likudan ni
Jesus ket sinagidna ti gayadan ti kagayna. 21 Ta kinunana iti bagina, “No
masagidko la koma ti kagayna, umimbagakon.” 22 Timmalliaw ni Jesus
ket nakitana ti babai. “Pakirdem ta pakinakemmo, anakko,” kinunana.
“Pinaimbagnaka ti pammatim.” Iti dayta met la a kanito, immimbagen ti
babai. 23 Ket dimteng ni Jesus iti balay ti pangulo. Idi makitana dagiti
agtuktukar iti pamumpon a musika ken dagiti umariwawa a tattao, 24
kinunana, “Rummuarkayo amin! Saan a natay ti ubing—matmaturog
laeng.” Kinatkatawaanda ni Jesus. 25 Apaman a nakaruar dagiti tattao,
simrek ni Jesus iti kuarto a yan ti balasitang. Iniggamanna ti ima ti
balasitang ket bimmangonen. 26 Nagdinamag daytoy iti amin a suli dayta
a lugar. 27 Pimmanaw ni Jesus iti dayta a lugar. Idi magmagna, sinurot
dagiti dua a bulsek a lallaki ket impukkawda, “Anak ni David,
kaasiannakami!” 28 Idi nakastreken ni Jesus iti balay, immasideg
kenkuana dagiti dua a bulsek. “Patienyo kadi a kabaelankayo nga
agasan?” sinaludsodna kadakuada. “Wen, Apo,” insungbatda. 29 Iti kasta,
sinagid ni Jesus dagiti matada sana kinuna, “Maaramid ngarud a kas iti
panamatiyo.” 30 Ket naisubli ti panagkitada. Impaganetget ni Jesus
kadakuada nga awan pangibagbagaanda iti naaramid. 31 Ngem
pimmanawda ket inwarasda ti damag maipapan ken ni Jesus iti isuamin a
suli dayta a lugar. 32 Idi pumampanawda, impan ti sumagmamano a tattao
ken ni Jesus ti maysa a lalaki nga umel agsipud ta linuganan ti demonio.
33 Apaman a napaksiat ti demonio nga adda kenkuana, nangrugin nga
agsao ket nasdaaw ti tunggal maysa. Kinunada, “Ditay pay nakakita iti
kastoy ditoy Israel!” 34 Ngem kinuna dagiti Fariseo, “Ti pangulo dagiti
demonio ti mangmangted kenkuana iti pannakabalin a mangpaksiat
kadagiti demonio.” 35 Sinursor ni Jesus dagiti amin nga il-ili ken
barbarrio. Nangisuro kadagiti sinagogada, inkasabana ti Naimbag a
Damag maipapan iti Pagarian ken pinaimbagna dagiti tattao kadagiti amin
a kita ti sakit ken sagabaen. 36 Simnek ti kaasi ni Jesus kadagiti tattao idi
makitana ida a mabutbuteng ken nakakaasi. Kasda la karnero nga awan
pastorda. 37 “Adu ti anien, ngem bassit ti agani,” kinuna ni Jesus kadagiti
adalanna. 38 “Agdawatkayo ngarud iti akinkukua iti maani tapno
mangibaon kadagiti agani.”
Mateo 10
1 Inayaban ni Jesus dagiti sangapulo ket dua nga adalanna. Inikkanna ida
iti pannakabalin a mangpaksiat kadagiti dakes nga espiritu, ken
mangpaimbag kadagiti agsagsagaba iti amin a kita ti sakit ken an-annayen.
2 Dagitoy dagiti sangapulo ket dua nga apostoles: umuna, da Simon (a
managan Pedro) ken Andres a kabsatna; da Santiago ken Juan nga annak
ni Zebedeo; 3 da Felipe ken Bartolome; ni Tomas ken ni Mateo, ti
agsingsingir iti buis; ni Santiago nga anak ni Alfeo, ken ni Tadeo; 4 ni
Simon a Patriota ken ni Judas Iscariote a mangliput ken ni Jesus. 5 Imbaon
ni Jesus dagitoy sangapulo ket dua. Kastoy ti imbilinna kadakuada:
“Dikayo mapmapan iti uray sadino a daga dagiti Hentil wenno iti uray
sadino nga ili dagiti Samaritano. 6 Ngem inkayo ketdi kadagiti napukaw a
karnero iti nasion ti Israel. 7 Inkayo ikasaba daytoy, ‘Asidegen ti Pagarian
ti Langit!’ 8 Paimbagenyo dagiti masakit, pagungarenyo dagiti natay,
agasanyo dagiti agkukutel ken paksiatenyo dagiti demonio. Awan
imbayadyo iti inawatyo. Ngarud, diyo pabayadan ti ipaayyo. 9 Dikayo
mangitugot iti kuarta—balitok man wenno pirak wenno gambang. 10
Dikayo met mangitugot iti bay-on, uray bado a pagsukatan, uray sapatos
wenno sarukod, ta karbengan ti mangmangged ti maikkan iti kasapulanna.
11 “No dumtengkayo iti maysa nga ili wenno barrio, bumirokkayo iti
mayat nga umawat kadakayo. Agyankayo kenkuana agingga a
pumanawkayo iti dayta a lugar. 12 No sumrekkayo iti maysa a balay,
kunayo, ‘Dios ti mangted iti talna kadakayo.’ 13 No awatendakayo dagiti
akimbalay, ibatiyo ti inkablaawyo a talna. No didakayo awaten, ibabawiyo
ti inkablaawyo. 14 “Kasta met a no adda balay wenno ili a dinto umawat
wenno dumngeg kadakayo, panawanyo ida ket pampagenyo ti tapok
kadagiti sakayo. 15 “Laglagipenyo nga inton Aldaw ti Panangukom,
nalaglag-anto ti dusa nga ipalak-am ti Dios kadagiti taga-Sodoma ken
Gomorra ngem kadagiti tattao iti dayta nga ili.” 16 “Dumngegkayo!
Ibaonkayo a kas karnero iti ayan ti arban dagiti lobo. Ngarud, masapul a
nasiribkayo a kas iti uleg ken naamokayo a kas iti kalapati. 17
Agannadkayo, ta addanto dagiti tattao a mangtiliw ken mangisaklang
kadakayo iti pangukoman. Saplitendakayto iti uneg dagiti sinagoga. 18
Gapu kaniak, maisaklangkayto iti sangoanan dagiti agtuturay ken ar-ari
tapno paneknekanyo kadakuada ken kadagiti Hentil ti Naimbag a Damag.
19 Ngem inton addakayo iti sangoanan ti ukom, diyonto pakadanagan no
anianto ti sawenyo wenno kasanonto ti panangisaoyo. Maipaltiingto ti
sawenyo inton dumteng dayta a tiempo. 20 Ta saanto nga agtaud kadakayo
ti ibalikasyo; agtaudto iti Espiritu ni Amayo nga agsasao kadakayo. 21
“Papapatayto dagiti tattao dagiti bukodda a kakabsat. Kastanto met ti
aramiden dagiti amma kadagiti annakda. Busorento dagiti annak dagiti
nagannak kadakuada ket papapataydanto ida. 22 Guraendakayto dagiti
tattao gapu kaniak. Ngem ti siasinoman a makaibtur agingga iti
panungpalan, maisalakanto. 23 No idadanesdakayo iti maysa nga ili,
inkayo agkamang iti sabali nga ili. Ibagak kadakayo a diyonto pay malpas
ti trabahoyo iti amin nga il-ili ti Israel, inton umay ti Anak ti Tao. 24
“Saan a natantan-ok ti agad-adal ngem ti maestrona; saan met a naturturay
ti adipen ngem ti apona. 25 Ngarud, mapnek koma ti agad-adal no agbalin
a kas iti maestrona; kasta met ti adipen, no agbalin a kas iti apona. No
Beelzebub ti ipanaganda iti pangulo ti maysa a familia, naal-alasto pay ti
maipanagan kadagiti kamkameng ti familiana.” 26 “Dikay ngarud
agbuteng kadagiti tattao; ta awan ti nailemmeng a dinto maiparangarang,
ket awan met ti palimed a dinto mailatak. 27 Ti ibagak kadakayo iti
kasipngetan, isaoyo iti lawag; ket ti mayarasaas kadakayo, ipukkawyo iti
tuktok dagiti balbalay. 28 Dikay agbuteng kadagiti mangpapatay iti bagi,
ngem dida mabalin a papatayen ti kararua. Agbutengkayo ketdi iti Dios,
isu a makabalin a mangpatay iti bagi ken kararua idiay infierno. 29 Iti
maysa a sentimo makagatangkayo iti dua a sallapingaw. Nupay kasta,
awan matnag uray maysa kadakuada no di ipalubos ni Amayo. 30 No
maipapan kadakayo, uray dagiti buokyo nabilangda aminen. 31 Isut’
gapuna a dikay agbuteng ta napatpategkayo nga adayo ngem ti adu a
sallapingaw.” 32 “Siasinoman a mangipaduyakyakto kaniak,
ipaduyakyakkonto met iti imatang ni Amak sadi langit. 33 Ngem ti
mangilibak kaniak, ilibakkonto met iti sangoanan ni Amak sadi langit.” 34
“Diyo ipagarup nga immayak mangyeg iti kappia ditoy lubong. Diak
immay mangyeg iti kappia no di ket kampilan. 35 Immayak tapno
pataudek ti ibubusor dagiti annak a lallaki kadagiti ammada, dagiti annak a
babbai kadagiti innada, dagiti manugang a babbai kadagiti katuganganda a
babbai. 36 Dagiti kabusor ti tao isuda met laeng dagiti kameng ti
familiana. 37 “Ti dakdakkel ti panagayatna iti amana wenno iti inana
ngem ti panagayatna kaniak, saan a maikari nga agbalin nga adalak; ti
dakdakkel ti panagayatna kadagiti annakna ngem ti panagayatna kaniak,
saan a maikari nga agbalin nga adalak. 38 Siasinoman a di mangibaklay iti
krusna ken sumurot kaniak, saan a maikari nga agbalin nga adalak. 39
Siasinoman a mangipangpangruna iti biagna, mapukawnanto; ket ti
makapukaw iti biagna gapu kaniak, masarakannanto.” 40 “Siasinoman nga
umawat kadakayo, siak met laeng ti awatenna. Siasinoman nga umawat
kaniak, awatenna met ti nangibaon kaniak. 41 Siasinoman nga umawat iti
profeta gapu ta maysa a profeta, magunggonaanto met a kas iti
pannakagunggona ti profeta. Siasinoman nga umawat iti nalinteg a tao,
gapu ta isu ket nalinteg, magunggonaanto met a kas iti pannakagunggona
ti nalinteg a tao. 42 Laglagipenyo a ti siasinoman a mangted iti uray
sangabaso laeng a nalamiis a danum iti maysa kadagitoy nanumo a
pasurotko, gapu ta isu ket pasurotko, awan duadua nga awatennanto ti
gunggonana.”
Mateo 11
1 Kalpasan ti panangbilin ni Jesus kadagiti sangapulo ket dua nga
adalanna, pimmanaw iti dayta a lugar tapno mapan mangisuro ken
mangasaba kadagiti il-ili nga asideg sadiay. 2 Adda ni Juan a Mammuniag
iti pagbaludan idi nadamagna dagiti ar-aramiden ni Cristo ket imbaonna
ken ni Jesus ti sumagmamano kadagiti adalanna. 3 “Sika kadi ti umayto a
kas inkaskasaba ni Juan, wenno agpadaankami iti sabali?” sinaludsodda
kenkuana. 4 Simmungbat ni Jesus, “Agsublikayo ken ni Juan ket ibagayo
kenkuana ti mangngeg ken makitayo: 5 makakita dagiti bulsek,
makapagna dagiti pilay, mapaimbag dagiti agkukutel, makangngeg dagiti
tuleng, mapagungar dagiti natay, ket maikaskasaba ti Naimbag a Damag
kadagiti napanglaw. 6 Nagasat ti tao a di agduadua kaniak!” 7 Idi
pumanaw dagiti adalan, nagsao ni Jesus kadagiti tattao maipapan ken ni
Juan, “Idi napankayo ken ni Juan idiay let-ang, ania aya ti ninamnamayo a
makita? Maysa a runo a mayangin-angin? 8 Ania kadi ti napanyo kinita?
Maysa a tao a nagkawes iti napintas a pagan-anay? Kinapudnona, palasio
ti pagnaedan dagiti agkawes iti kasta. 9 Ibagayo man, ania ti napanyo
kinita? Profeta? Wen, ibagak kadakayo, nangnangruna pay ngem profeta ti
nakitayo. 10 Ta ni Juan ti sarsaritaen daytoy a paset ti Nasantoan a Surat:
‘Adtoy ti babaonek, kuna ti Dios; Ibaonko nga umun-una ngem sika tapno
isaganana ti dalanmo.’ 11 Laglagipenyo a kadagiti amin a tao a nayanak,
awan ti nangnangruna ngem ni Juan a Mammuniag. Nupay kasta,
natantan-ok ngem isu ti kanumoan iti Pagarian ti Langit. 12 Manipud idi
inkasaba ni Juan ti mensahena agingga ita, nagsagaba iti napalalo a
pannakaidadanes ti Pagarian ti Langit ken kayat a rabsuten dagiti
narungsot a tattao. 13 Agingga iti tiempo ni Juan, amin dagiti profeta ken
ti Linteg ni Moises nagsaoda iti maipapan iti Pagarian. 14 No patienyo ti
saoda, ni Juan ti Elias a naipadto ti yaayna. 15 Dumngeg ngarud ti
siasinoman nga addaan pannakaawat. 16 “Ngem ania ti pangipadaak
kadagiti tattao kadagitoy nga aldaw? Kasda la ubbing nga agtugtugaw iti
tiendaan. Ipukkaw ti maysa a grupo kadagiti kaay-ayamda: 17
‘Nagtokarkami iti naragsak, ngem dikay nagsala. Nagkantakami iti
naliday, ngem dikay nagsangit!’ 18 “Immay ni Juan ket nagay-ayunar ken
saan nga immin-inum iti arak, ket kunkuna dagiti tattao nga isu ket
linuganan ti demonio. 19 “Immay ti Anak ti Tao, nangnangan ken immin-
inum, ket kunkunada, ‘Kitaenyo daytoy a tao, narawet ken mammartek,
gayyem dagiti agsingsingir iti buis ken dadduma pay a dakes a tattao!’
Nupay kasta, maipakita ti kinasirib ti Dios babaen kadagiti gapuananna.”
20 Binabalaw ni Jesus dagiti il-ili a nakaaramidan ti kaaduan kadagiti
milagrona agsipud ta di nagbabawi dagiti tattao kadagiti basbasolda. 21
“Asikanto pay, Corazin! Asikanto met, Betsaida! No naaramid koma idiay
Tiro ken Sidon dagiti milagro a naaramid kadakayo, nabayag koman nga
impakita dagiti tattao sadiay ti panagbabawida babaen iti panagkawesda iti
nakersang ken ti panangwarakiwakda iti dapu kadagiti bagbagida. 22
Laglagipenyo ngarud nga inton Aldaw ti Panangukom, nalaglag-anto ti
panangdusa ti Dios iti Tiro ken Sidon ngem ti panangdusana kadakayo. 23
“Ket sika met, Capernaum, kayatmo kadi ti maitan-ok sadi langit? Saan a
mabalin! Maitappuakkanto idiay infierno! No idiay koma Sodoma ti
nakaaramidan dagiti milagro a naaramid iti yanmo, adda koma pay laeng
ita ti Sodoma. 24 Laglagipem ngarud nga inton umay ti Aldaw ti
Panangukom, nalaglag-anto ti panangdusa ti Dios iti Sodoma ngem ti
panangdusana kenka.” 25 Iti dayta a tiempo, kinuna ni Jesus, “Agyamanak
kenka, Ama nga Apo ti langit ken daga, ta impakitam kadagiti awan
adalna ti inlemmengmo kadagiti mamasirib ken kadagiti nasaririt. 26 Wen,
Ama, naaramid daytoy ta isu ti pagayatam. 27 “Inted kaniak ni Amak ti
isuamin a banag. Awan ti makaam-ammo iti Anak no di laeng ti Ama.
Awan met ti makaam-ammo iti Ama no di laeng ti Anak ken dagiti kayat
ti Anak a pangipakaammoan kenkuana. 28 “Umaykayo kaniak, dakayo
amin a nabannog ken madagdagsenan, ket paginanaenkayo. 29 Alaenyo ti
sangolko, ket agsursurokayo kaniak agsipud ta naemma ken
napakumbabaak, ket masarakanyonto ti inana. 30 Ta nanam-ay ti sangol
nga itedko kadakayo, ket nalag-an ti awit nga ipabaklayko kadakayo.”
Mateo 12
1 Iti saan a nabayag, iti maysa nga Aldaw a Panaginana, magmagna ni
Jesus iti kataltalonan a namulaan iti trigo. Aldaw a Panaginana idi. Gapu
ta mabisin dagiti adalanna, nagrurosda kadagiti dawa ti trigo ket kinnanda.
2 Idi makita dagiti Fariseo daytoy, kinunada ken ni Jesus, “Kitaem, iparit
ti Lintegtayo ti ar-aramiden dagiti adalam iti Aldaw a Panaginana.” 3
“Saanyo kadi a nabasa ti inaramid ni David idi isu ken dagiti tattaona
nagbisinda?” insungbat ni Jesus. 4 “Simrek ni David ken dagiti kaduana iti
balay ti Dios ket kinnanda ti tinapay a naidaton iti Dios. Maisalungasing
iti linteg ti inaramidda ta dagiti laeng papadi ti mapalubosan a mangan iti
dayta a tinapay. 5 Wenno diyo aya nabasa iti Linteg ni Moises nga iti
Aldaw a Panaginana saan a makabasol dagiti papadi iti uneg ti Templo
nupay salungasingenda ti Linteg ti Panaginana? 6 Ibagak kadakayo nga
adda ditoy ti maysa a nangnangruna ngem ti Templo. 7 Kuna ti Nasantoan
a Surat, ‘Asi ti kalikagumak—saan a daton a mapuoran.’ No agpayso nga
ammoyo ti kaipapanan daytoy, diyo koma ukomen dagiti awan basolna 8
agsipud ta ti Anak ti Tao isu ti Apo ti Aldaw a Panaginana.” 9 Pimmanaw
ni Jesus iti dayta a lugar ket napan iti sinagoga. 10 Adda lalaki sadiay a
paralitiko ti maysa nga imana. Ket gapu ta kayat ti sumagmamano a tattao
sadiay nga idarum ni Jesus, sinaludsodda, “Iparit aya ti Lintegtayo ti
panangagas iti Aldaw a Panaginana?” 11 Kinuna ni Jesus kadakuada, “Kas
pangarigan, iti Aldaw a Panaginana, ti karnero ti maysa kadakayo matnag
iti abut, dina aya alaen ken aonen? 12 Napatpateg nga adayo ti tao ngem ti
karnero! Isut’ gapuna nga ipalubos ti Linteg ti panagaramid iti naimbag iti
Aldaw a Panaginana.” 13 Kinuna ngarud ni Jesus iti lalaki, “Unnatem ta
imam.” Inunnat ti lalaki ti imana ket immimbag a kas iti maysa nga imana.
14 Pimmanaw dagiti Fariseo tapno tulagenda no kasano ti
panangpapatayda ken ni Jesus. 15 Idi naammoan ni Jesus ti gandat dagiti
Fariseo, pimmanaw sadiay. Simmurot kenkuana dagiti adu a tattao.
Inagasanna amin dagiti masakit. 16 Binilinna ida nga awan
pangibagbagaanda iti maipapan kenkuana 17 tapno matungpal ti kinuna ti
Dios babaen ken ni profeta Isaias: 18 “Adtoy ti adipenko a pinilik, Ti ay-
ayatek ken pakaay-ayoak unay. Itedkonto ti Espirituk kenkuana, Ket
ipakaammonanto kadagiti amin a tattao ti yaay ti tiempo ti hustisia. 19
Ngem dinto makisuppiat wenno agpukkaw kadagiti kalkalsada; Ket dinto
makatitileng ti timekna. 20 Dinanto tukkolen ti naparpar a runo, Wenno
iddepen ti agkurkuridemdem a silaw. Saanto nga agsardeng agingga iti
dina mapagballigi ti kinalinteg; 21 Ket mangnamnamanto kenkuana dagiti
amin a tattao.” 22 Kalpasanna, impan ti sumagmamano a tattao ken ni
Jesus ti maysa a lalaki a bulsek ken umel agsipud ta linuganan ti demonio.
Pinaimbag ni Jesus daytoy a lalaki, ket iti kasta, makasao ken makakitan.
23 Nasdaaw amin dagiti tattao iti inaramid ni Jesus. “Saan ngata nga isu
daytoy ti Anak ni David?” sinaludsodda. 24 Idi nangngeg daytoy dagiti
Fariseo kinunada, “Paksiatenna dagiti demonio gapu laeng iti
pannakabalin nga inted kenkuana ni Beelzebub a prinsipe dagiti demonio.”
25 Ammo ni Jesus ti pampanunotenda ket kinunana kadakuada, “Saan nga
agbayag ti pagarian a mabingaybingay ken aggiginnubat met laeng.
Aniaman nga ili wenno familia a mabingaybingay ken aggiginnura, dinto
agpaut. 26 No agbibinnusor dagiti pasurot ni Satanas, kasano a
mataginayon ti pagarianna? 27 Kunayo a paksiatek dagiti demonio gapu ta
ikkannak ni Beelzebub iti pannakabalin a mangaramid iti kasta. Sinno
ngarud ti mangted kadagiti pasurotyo iti pannakabalin a mangpaksiat
kadagiti demonio? 28 Kinapudnona, ti Espiritu ti Dios ti mangted kaniak
iti pannakabalin a mangpaksiat kadagiti demonio. Daytoy ti
mangpaneknek nga addan kadakayo ti Pagarian ti Dios. 29 “Awan ti
makastrek iti balay ti napigsa a tao tapno alaenna dagiti kukuana.
Reppetenna pay nga umuna ti napigsa a tao sa agsamsam iti uneg ti balay.
30 “Ti saan a makikadua kaniak, busorennak. Ti saan a tumulong kaniak
nga agurnong, agiwara. 31 Daytoy ti gapuna nga ibagak kadakayo:
mapakawan ti siasinoman a makabasol wenno agsao iti kinadakes, ngem
dinto mapakawan ti agsao iti maibusor iti Espiritu Santo. 32 Mapakawan ti
agsao iti maikontra iti Anak ti Tao, ngem saan a mapakawan ti agsao iti
maibusor iti Espiritu Santo—iti daytoy a biag wenno iti masakbayan.” 33
“No nasayaat ti kayo, agbunga iti nasayaat. No saan a nasayaat ti kayo,
saan a nasayaat ti bungana. Ta mailasin ti kayo gapu iti bungana. 34
Dakayo a kaputotan ti uleg, kasano ti panagsaoyo iti naimbag idinto a
dakeskayo? Ta isawang ti ngiwat ti linaon ti puso. 35 Iruar ti naimbag a
tao dagiti naimbag nga iduldulinna. Iruar ti dakes a tao dagiti dakes nga
iduldulinna. 36 “Ibagak kadakayo nga inton Aldaw a Panangukom,
sungbatanto ti tunggal maysa dagiti awan serserbina nga insawangna. 37
Ta dagitinto saom ti pakaukomam met laeng—no nakabasolka wenno
saan.” 38 Nagsao ti sumagmamano a mamaestro iti Linteg ken
sumagmamano a Fariseo. “Maestro,” kinunada, “ipakitaannakami man iti
milagro.” 39 “Anian a nagdakes dagiti tattao kadagitoy nga aldaw! Awan
pammatida iti Dios,” insungbat ni Jesus. “Agdawatkayo iti milagro? Awan
ti maipakita kadakayo no di laeng ti milagro ni profeta Jonas. 40 Kas iti
panagyan ni Jonas iti tian ti dakkel nga ikan iti las-ud ti tallo nga aldaw
ken rabii, kastanto met ti panagyan ti Anak ti Tao iti uneg ti daga. 41 Inton
Aldaw a Panangukom, tumakderto dagiti taga-Nineve a mangpabasol
kadakayo, ta nagbabawida kadagiti basbasolda idi nangngegda ti
panangaskasaba ni Jonas. Ibagak kadakayo nga adda ditoy ti maysa a
natantan-ok ngem ni Jonas. 42 Inton Aldaw a Panangukom, tumakderto ti
Reyna a taga-Abagatan a mangidarum kadakayo agsipud ta nagdalliasat iti
adayo a lugar tapno umayna laeng denggen ti nainsiriban a pannursuro ni
Solomon. Ibagak kadakayo nga adda ditoy ti maysa a natantan-ok ngem ni
Solomon.” 43 “No rummuar ti dakes nga espiritu iti maysa a tao, mapan
agsursor kadagiti luglugar a namaga nga agsapul iti paginanaanna. No
awan ti masapulanna, 44 kunana iti nakemna, ‘Agsubliak iti balayko.’
Agsubli ngarud ket masarakanna ti balay nga awan nagyanna, nadalus ken
natarimaan. 45 Iti kasta, rummuar ket mangisangpet iti pito nga espiritu a
dakdakes pay ngem isu, ket kaduana ida nga agnaed sadiay. Ngarud,
dakdakesto ti kasasaad dayta a tao ngem iti immuna. Kastoyto met ti
pagbanagan dagiti dakes a tattao iti daytoy a kaputotan.” 46 Madama pay
laeng nga agsasao ni Jesus kadagiti tattao idi sumangpet ni inana ken
dagiti kakabsatna a lallaki. Nagyanda iti ruar ket kayatda ti makisao ken ni
Jesus. 48 Ngem insungbatna iti tao a nangibaga kenkuana, “Siasino kadi ti
inak? Siasino kadi dagiti kakabsatko?” 49 Ket intudo ni Jesus dagiti
adalanna sana kinuna, “Kitaenyo! Daytoy ti inak ken dagiti kakabsatko!
50 Ti siasinoman nga agaramid iti pagayatan ni Amak sadi langit, isu ti
kabsatko ken ti inak.”
Mateo 13
1 Iti dayta met la nga aldaw, pimmanaw ni Jesus iti balay, ket napan
nagtugaw iti igid ti dan-aw tapno mangisuro. 2 Gapu ta adu unay ti tao nga
immaribungbong kenkuana, limmugan iti bangka sa nagtugaw. Nagtakder
dagiti tattao iti sang-at. 3 Insursurona ida kadagiti adu a bambanag babaen
iti pangngarig. Kinunana: “Adda maysa a tao a napan nagpurruak iti
bukel. 4 Idi agpurpurruak, nagdisso ti sumagmamano a bukel iti igid ti
dalan ket tinuktok dagiti tumatayab. 5 Adda met sumagmamano a bukel a
nagdisso iti kabatoan a bassit laeng ti dagana. Gapu ta narabaw ti dagana,
nabiit a nagtubo dagiti bukel. 6 Idi makatangkayagen ti init, nalaylay
dagiti apagtubo a mula ket nagangoda a dagus agsipud ta di unay
nakauneg dagiti ramutda. 7 Nagdisso met ti sumagmamano a bukel iti
nagtuboan dagiti siitan a mula a dimmakkel ken nangleppes kadakuada. 8
Ngem nagdisso ti dadduma a bukel iti nadam-eg a daga, ket nagdawada:
adda nagdawa iti sangagasut, adda met innem a pulo ken adda pay
tallopulo.” 9 Inggibus ni Jesus, “Dumngeg ngarud ti siasinoman nga
addaan pannakaawat!” 10 Napan dagiti adalan ken ni Jesus ket
sinaludsodda, “Apay nga aramatem dagiti pangngarig no agsaoka kadagiti
tattao?” 11 Simmungbat ni Jesus, “Naited kadakayo ti panangammo
kadagiti palimed ti Pagarian ti Langit, ngem kadakuada, saan. 12 Ta ti
addaan, maikkanto pay iti ad-adu tapno aglaplapusanan ngem ti awanan,
maikkatto pay uray ti bassit nga adda kenkuana. 13 Daytoy ti gapuna nga
aramatek dagiti pangngarig no agsaoak kadakuada: ta kumitkitada ngem
dida makailasin, agdengdengngegda ngem dida makaawat. 14 Iti kasta,
matungpal ti padto ni Isaias maipapan kadakuada: ‘Dengngegkayto la a
dengngeg ngem dikay makaawat; Kitakayto la a kita ngem dikay
makailasin. 15 Agsipud ta natangken ti ulo dagitoy a tattao, Sinullatanda
dagiti lapayagda, Ken inkidemda dagiti matada, Amangan no makakita
ken makangngegda, ket makaawatda, Ken amangan no agsublida kaniak,
kuna ti Dios, Ket paimbagek ida.’ 16 “Ngem nagasatkayo ta makakita
dagiti matayo ken makangngeg dagiti lapayagyo! 17 Laglagipenyo nga
adu a profeta ken dadduma pay a tattao ti Dios ti nagtarigagay a kumita
kadagiti makitayo, ngem dida nakita, ken dumngeg kadagiti mangngegyo,
ngem dida nangngeg.” 18 “Denggenyo ngarud ti kaipapanan ti pangngarig
maipapan iti agmulmula: 19 “Dagiti dumngeg iti sao maipapan iti
Pagarian ngem dida maawatan, mayarigda iti bukel a nagdisso iti igid ti
dalan. Umay ti Managdakdakes ket rabsutenna ti naimula kadakuada. 20
Ti bukel a nagdisso iti kabatoan iladawanna dagiti tattao a siraragsak nga
umawat iti mensahe apaman a mangngegda. 21 Ngem saan nga umuneg ti
sao kadakuada ket saanda nga agbayag. Isut’ gapuna a maupayda a dagus
no dumteng ti rigrigat ken pannakaidadanes gapu iti sao. 22 Ti bukel a
nagdisso iti kasisiitan iladawanna dagiti nakangngeg iti sao. Gapu kadagiti
pakaringgoran iti daytoy a biag ken ti panagagum iti kinabaknang,
lineppesda ti sao ket dida agbunga. 23 Ti bukel a naimula iti nadam-eg a
daga iladawanna dagiti dumngeg ken makaawat iti sao ket agbungada;
adda makaibunga iti sangagasut, adda makainnem a pulo ket adda pay
makatallopulo.” 24 Adda pay sabali a pangngarig nga insarita ni Jesus
kadakuada. Kinunana: “Mayarig ti Pagarian ti Langit iti sumaganad: Adda
maysa a tao a nagpurruak iti nasayaat a bukel iti talonna. 25 Iti maysa a
rabii, idi matmaturog dagiti tattao, napan ti kabusorna ket nagmula iti ruot
iti nagbabaetan dagiti trigo, sa pimmanaw. 26 Idi dimmakkel dagiti mula,
ket mangrugidan nga agdawa, nagparang met dagiti ruot. 27 Napan dagiti
adipen iti akinkukua iti talon ket kinunada kenkuana. ‘Apo, nasayaat met a
bukel ti immulam iti talonmo; ngem apay nga adda metten dagiti ruot?’ 28
“ ‘Aramid ti kabusor dayta,’ kinunana. “ ‘Kayatmo nga inkami paruten
dagiti ruot?’ sinaludsodda. 29 “Insungbatna, ‘Saan, amangan no mairaman
a maparut dagiti trigo no parutenyo dagiti ruot. 30 Bay-anyo nga aggiddan
a dumakkel dagiti trigo ken ruot. Ket inton panagani, ibagakto kadagiti
agani nga unaenda a paruten dagiti ruot, sada reppeten nga ipuor.
Kalpasanna, anienda dagiti trigo ket idulinda iti kamaligko.’ ” 31-32 Adda
pay sabali a pangngarig nga insarita ni Jesus kadakuada. Kinunana:
“Mayarig ti Pagarian ti Langit iti sumaganad: Adda maysa a tao a mangala
iti bukel ti mostasa ket imulana iti talonna. Ti mostasa ti kabassitan
kadagiti amin a bukel, ngem inton dumakkel, isu ti kadakkelan kadagiti
amin a mula. Agbalin a kayo ket agumok dagiti tumatayab kadagiti
sangsangana.” 33 Adda pay sabali a pangngarig nga insarita ni Jesus
kadakuada. Kinunana, “Mayarig ti Pagarian ti Langit iti sumaganad:
Mangala ti maysa a babai iti lebadura sana igamay iti uppat a pulo a litro
nga arina. Gapu iti lebadura, bumsog ti entero a masa.” 34 Inaramat ni
Jesus dagiti pangngarig iti panangibagana amin kadagitoy a bambanag
kadagiti tattao. Dina kasao ida no di agaramat iti pangngarig. 35
Inaramidna daytoy tapno matungpal ti insao ti profeta: “Aramatekto dagiti
pangngarig no makisaoak kadakuada; Ibagakto kadakuada dagiti
bambanag a di pay naammoan manipud naparsua ti lubong.” 36
Pinanawan ni Jesus dagiti tattao ket simrek iti balay. Napan kenkuana
dagiti adalanna ket kinunada, “Ilawlawagmo man kadakami ti pangngarig
maipapan kadagiti ruot iti talon.” 37 “Ti tao a nagmula iti nasayaat a bukel
isu ti Anak ti Tao,” insungbat ni Jesus. 38 “Ti talon isu ti lubong. Ti
nasayaat a bukel isuda dagiti annak ti Pagarian. Dagiti ruot isuda dagiti
annak ti Managdakdakes. 39 Ti kabusor a nagmula kadagiti ruot isu ti
Diablo. Ti panagani isu ti kanibusanan ti lubong, ket dagiti agani isuda
dagiti angheles. 40 Kas iti pannakaurnong ken pannakapuor dagiti ruot,
kastanto met ti mapasamak inton aggibus ti lubong. 41 Ibaonto ti Anak ti
Tao dagiti anghelesna a mangurnong ken mangikkat manipud iti
Pagarianna dagiti amin a pakaigapuan ti panagbasol dagiti tattao ken dagiti
amin a managdakdakes. 42 Isebbadanto ida iti gumilgil-ayab nga apuy.
Sadiay, agsasangit ken agngangaretngetdanto. 43 Kalpasanna, agraniagto
dagiti tattao ti Dios a kas init iti Pagarian ni Amada. Dumngeg ngarud ti
siasinoman nga addaan pannakaawat.” 44 “Mayarig ti Pagarian ti Langit
iti kastoy: Adda tao a nakasarak iti gameng a naikali iti maysa a talon.
Gaburanna met laeng ket iti ragsakna, mapanna ilako amin a sanikuana sa
agsubli tapno gatangenna dayta a talon.” 45 “Mayarig pay ti Pagarian ti
Langit iti kastoy: Adda agtagtagilako nga agsapsapul iti napipintas a
perlas. 46 No makasarak iti naidumduma ti pintasna, ilakona amin a
sanikuana ket gatangenna dayta a perlas.” 47 “Mayarig met ti Pagarian ti
Langit iti sumaganad: Adda sumagmamano a mangngalap a mangiwayat
iti iketda iti dan-aw ket makaalada iti amin a kita ti ikan. 48 No mapnon ti
iket, isang-atda sada agtugaw a mamaglalasin kadagiti ikan. Ikargada
dagiti nasayaat kadagiti tiklis ket ibellengda dagiti dakes. 49 Kastoyto met
inton aggibus ti lubong. Rummuarto dagiti angheles ket ilasindanto dagiti
dakes a tattao kadagiti naimbag. 50 Isebbadanto dagiti dakes iti gumilgil-
ayab nga apuy. Sadiay, agsasangit ken agngaretngetdanto.” 51 Sinaludsod
ni Jesus kadakuada, “Maawatanyo kadi daytoy?” “Wen,” insungbatda. 52
Iti kasta, kinuna ni Jesus kadakuada, “Ngarud, kayatna a sawen a tunggal
maestro iti Linteg nga agbalin nga adalan iti Pagarian ti Langit, mayarig iti
agtagibalay a mangiruar kadagiti baro ken daan a gameng iti kuarto a
pagiduldulinanna.” 53 Idi nasaon ni Jesus dagitoy a pangngarig,
pimmanaw iti dayta a lugar, 54 ket nagsubli iti ilina. Nangisuro iti
sinagogada ket nagsiddaaw dagiti nagdengngeg kenkuana. “Sadino ti
nangalaanna iti kasta a sirib ken pannakabalin nga agaramid kadagiti
milagro?” sinaludsodda. 55 “Saan aya nga isu ti anak ti karpintero? Saan
aya a ni Maria ti inana ket da Santiago, Jose, Simon ken Judas dagiti
kakabsatna? 56 Saan aya nga agnanaed ditoy dagiti kakabsatna a babbai?
Sadino ngarud ti nangalaanna amin kadagitoy?” 57 Inumsida ngarud ni
Jesus. Kinuna ni Jesus kadakuada, “Mapadayawan ti profeta iti amin a
lugar malaksid iti ilina ken iti bukodna a familia.” 58 Bassit laeng ti
milagro nga impakitana sadiay agsipud ta awan pammatida kenkuana.
Mateo 14
1 Iti daydi a tiempo, nadamag ni Herodes nga agturay iti Galilea ti
maipapan ken ni Jesus. 2 “Pudno nga isu daytoy ni Juan a Mammuniag a
napagungar,” kinunana kadagiti ofisialesna. “Dagitoy ti gapuna nga adda
kenkuana daytoy a pannakabalin nga agaramid kadagiti milagro.” 3
Pinatiliw ngamin idi ni Herodes ni Juan sana pinareppet ken pinaibalud.
Inaramidna daytoy gapu ken ni Herodias nga asawa ni Felipe a kabsatna. 4
Kinunkuna ngamin ni Juan ken ni Herodes, “Saan a rumbeng nga
ikabbalaymo ni Herodias nga asawa ni kabsatmo.” 5 Kayat idi ni Herodes
a papapatay ni Juan, ngem nagbuteng kadagiti Judio agsipud ta imbilangda
ni Juan a maysa a profeta. 6 Idi agkasangay ni Herodes, nagsala ti
balasang nga anak ni Herodias iti sango dagiti sangaili. Naay-ayo ni
Herodes 7 ket inkarina kenkuana, “Isapatak nga ited kenka ti aniaman a
dawatem.” 8 Kas insingasing ni inana, kinuna ti balasang, “Itedmo kaniak
ditoy ti naibandehado nga ulo ni Juan a Mammuniag.” 9 Nagliday ti ari,
ngem gapu iti panagkarina iti imatang dagiti sangailina, imbilinna a
matungpal ti dawat ti balasang. 10 Pinaputolanna ni Juan idiay
pagbaludan. 11 Nayeg ti ulo a naibandehado ket naited iti balasang a
nangited met ken ni inana. 12 Dimteng dagiti adalan ni Juan, innalada ti
bangkayna ket intanemda. Kalpasanna, napanda impadamag ken ni Jesus
ti napasamak. 13 Idi naammoan ni Jesus ti napasamak, nagbangka a napan
nagpakni nga is-isuna iti maysa a lugar nga awan matagtagitao. Ngem idi
nadamag dagiti tattao ti ipapanawna, pinanawanda dagiti il-ilida ket
nagnagnada a simmurot kenkuana. 14 Dimsaag ni Jesus iti bangka. Idi
makitana dagiti adu a tattao, naasian kadakuada ket inagasanna dagiti
masakitda. 15 Idi mumalemen, napan dagiti adalanna kenkuana ket
kinunada, “Sumipngeten ket awan matagtagitao ditoy. Pagawidem dagiti
tattao tapno mapanda kadagiti barbarrio ket gumatangda iti kanenda.” 16
“Saan a masapul a pumanawda,” kinuna ni Jesus kadakuada. “Ikkanyo
ketdi ida iti kanenda.” 17 “Lima a tinapay ken dua nga ikan laeng ti adda,”
kinunada. 18 “Yegyo ida ditoy,” kinuna ni Jesus. 19 Pinagtugawna dagiti
tattao iti karuotan. Innalana dagiti tinapay ken ikan, timmangad sadi
langit, sa nagyaman iti Dios. Pinispisina dagiti tinapay ket intedna kadagiti
adalan tapno ibunongda kadagiti tattao. 20 Nanganda amin ket nabsogda.
Adda 12 a basket a napno kadagiti natda nga inurnong dagiti adalan. 21
Aglimaribu a lallaki ti nangan, malaksid dagiti babbai ken ubbing. 22
Bayat ti panangpagawid ni Jesus kadagiti tattao, pinaluganna met dagiti
adalan iti bangka ket pinaunana ida a bumallasiw iti dan-aw. 23 Idi
napagawidnan dagiti tattao, simmang-at nga is-isu iti maysa a turod tapno
agkararag. Idi rumabiin, maymaysa ni Jesus sadiay. 24 Iti dayta met la nga
oras, nakaadayon ti bangka iti igid ti dan-aw ket mayallo-allon agsipud ta
subsubaen ti angin. 25 Iti parbangon, nagna ni Jesus iti rabaw ti danum a
napan iti yanda. 26 Nagbuteng dagiti adalan idi makitada ni Jesus a
magmagna iti rabaw ti danum. “Al-alia!” inyikkisda gapu iti butengda. 27
Ngem dagus a kinuna ni Jesus, “Dikay agbuteng! Siak ni Jesus, dikay
agdanag.” 28 “Apo,” kinuna ni Pedro, “no agpayso a sika, ayabannak man
dita yanmo a magna iti rabaw ti danum.” 29 “Umayka,” kinuna ni Jesus.
Dimsaag ngarud ni Pedro iti bangka ket nagna iti danum a mapan ken ni
Jesus. 30 Ngem nagbuteng idi madlawna ti angin, ket idi lumneden,
inyikkisna, “Apo, isalakannak!” 31 Ginaw-at a dagus ni Jesus ti ima ni
Pedro ket ginuyodna sana kinuna, “Nagbassit ket ti pammatimon! Apay a
nagduaduaka?” 32 Limmuganda a dua iti bangka ket nagtalnan ti angin. 33
Dagiti adda iti bangka nagdaydayawda ken ni Jesus. “Pudno a sika ti Anak
ti Dios,” kinunada. 34 Bimmallasiwda iti dan-aw ket simmangladda idiay
Genesaret. 35 Nailasin dagiti tattao ni Jesus, isu a pinaayaban dagiti taga-
sadiay dagiti amin a masaksakit kadagiti kabangibang a luglugar ket
inyegda ida kenkuana. 36 Nagpakpakaasida kenkuana a sagiden dagiti
masakit uray la koma ti gayadan ti kagayna, ket naimbagan dagiti amin a
simmagid.
Mateo 15
1 Napan ken ni Jesus dagiti sumagmamano a Fariseo ken mamaestro iti
Linteg a naggapu idiay Jerusalem ket sinaludsodda kenkuana, 2 “Apay a
di tungpalen dagiti adalam ti pannursuro a tinawidtayo kadagiti
kapuonantayo? Saan nga umisu ti panangbuggoda kadagiti imada sakbay a
manganda.” 3 “Ket dakayo,” insungbat ni Jesus, “apay a salungasingenyo
ti bilin ti Dios gapu laeng iti ayatyo a mangtungpal kadagiti
pannursuroyo? 4 Ta kinuna ti Dios, ‘Dayawem da amam ken inam,’ ken
‘Ti agsao iti dakes ken ni amana wenno inana, rebbengna ti mapapatay.’ 5
Ngem isursuroyo a no ibaga ti maysa a tao kada ama ken inana a ti
itulongna koma kadakuada ipaayna laengen iti Dios, 6 saanen a masapul a
dayawenna ni amana. Iti kasta, laksidenyo ti pannursuro ti Dios tapno
surotenyo ti bukodyo a pannursuro. 7 Dakayo nga aginsisingpet! Pudno
unay ti impadto ni Isaias maipapan kadakayo: 8 ‘Kuna ti Dios, dagitoy a
tattao kunkunada a dayawendak, Ngem adayo ti pusoda kaniak. 9 Awan
serserbi ti panagdaydayawda kaniak Gapu ta isursuroda dagiti linteg nga
aramid ti tao ket ibilangda a bilinko.’ ” 10 Inayaban ni Jesus dagiti tattao
sana kinuna kadakuada, “Denggen ken awatenyo daytoy: 11 Saan a ti
ipauneg ti tao ti mangtulaw kenkuana no di ket ti rummuar iti ngiwatna.”
12 Napan kenkuana dagiti adalanna ket kinunada, “Dimo kadi ammo a
napasakitan dagiti Fariseo iti sinaom?” 13 “Tunggal mula a saan nga
immula ni Amak sadi langit, maparutto,” insungbat ni Jesus. 14 “Saanyo a
pakadanagan ida. Bulsekda a mangidadaulo. Ket no idalan ti bulsek ti
padana a bulsek, matnagda a dua iti abut.” 15 “Ipalawagmo man kadakami
daytoy a pagsasao,” kinuna ni Pedro. 16 “Kayatyo a sawen nga uray
dakayo diyo maawatan?” kinuna ni Jesus. 17 “Diyo aya ammo a ti
aniaman a sumrek iti ngiwat ti maysa a tao mapan iti tianna ket
rummuarto? 18 Ngem dagiti rummuar iti ngiwat agtaudda iti puso, ket
dagitoy ti mangtulaw iti tao. 19 Ta ti puso ti pagtaudan dagiti dakes a
pampanunot a mangiturong kenkuana a pumatay, makikamalala, agderrep,
agtakaw, agulbod ken mamadpadakes. 20 Dagitoy ti mangtulaw iti tao.
Ngem ti saan a panagbuggo sakbay a mangan, saan nga isu ti mangtulaw
iti tao.” 21 Pimmanaw ni Jesus iti dayta a lugar ket napan iti asideg ti Tiro
ken Sidon. 22 Napan kenkuana ti maysa a babai a taga-Canaan ken agnaed
iti dayta a disso ket kinunana, “Apo, Anak ni David, kaasiannak kadi!
Linuganan ti demonio ti anakko a babai ket marigatan unay.” 23 Ngem
saan a sinungbatan ni Jesus. Immasideg dagiti adalanna ket kinunada,
“Patgamon ti dawatna ta di ket agik-ikkis a sumursurot kadatayo.” 24
Kinuna ni Jesus, “Naibaonak laeng kadagiti nayaw-awan a tattao ti Israel.”
25 Ngem napan nagparintumeng ti babai iti sango ni Jesus sana kinuna,
“Tulongannak kadi, Apo!” 26 “Saan a rumbeng nga alaen ti kanen dagiti
ubbing sa ipurruak kadagiti aso,” kinuna ni Jesus. 27 “Agpayso ta kunam,
Apo,” insungbat ti babai, “ngem uray dagiti aso kanenda dagiti murkat a
maregreg iti sirok ti lamisaan ti apoda.” 28 Iti kasta, kinuna ni Jesus
kenkuana, “Babai, dakkel ti pammatim! Maited kenka ti dawatmo.” Ket iti
dayta met la nga oras, immimbag ti anakna. 29 Pinanawan ni Jesus dayta a
lugar ket nagna iti igid ti Dan-aw ti Galilea. Simmang-at iti maysa a turod
sa nagtugaw. 30 Adu a tattao ti napan kenkuana. Nangikuyogda kadagiti
pilay, bulsek, lugpi, umel ken adu pay a masakit sada impan iti
sangoananna, ket pinaimbagna ida. 31 Nasdaaw dagiti tattao idi makitada
a makasaon dagiti umel, naimbagen dagiti lugpi, makapagnan dagiti pilay
ken makakitan dagiti bulsek, ket indaydayawda ti Dios ti Israel. 32
Inayaban ni Jesus dagiti adalanna ket kinunana, “Maasianak kadagitoy a
tattao ta tallo nga aldawdan ditoy yanko ket ita, awanen ti kanenda. Diak
kayat a pagawiden ida a sibibisin amangan no matalimudawda iti dalan.”
33 “Sadino ti pangalaantayo ditoy let-ang iti umanay a kanen ti kastoy a
kaadu ti tao?” sinaludsod dagiti adalan. 34 “Adda mano a tinapayyo?”
dinamag ni Jesus. “Pito, ken sumagmamano a babassit nga ikan,”
insungbat dagiti adalan. 35 Imbilin ngarud ni Jesus kadagiti tattao nga
agtugawda iti daga. 36 Innalana dagiti pito a tinapay ken dagiti ikan sa
nagyaman iti Dios. Kalpasanna, pinispisina sana inted kadagiti adalan
tapno ibunongda kadagiti tattao. 37-38 Nanganda amin ket nabsogda.
Uppat a ribu a lallaki ti nangan, malaksid dagiti babbai ken ubbing. Pito a
basket ti napno kadagiti natda nga inurnong dagiti adalan. 39 Pinagawid ni
Jesus dagiti tattao sa limmugan iti bilog ket napan iti sakup ti Magadan.
Mateo 16
1 Napan ken ni Jesus dagiti sumagmamano a Fariseo ken Saduceo. Kas
pangsuot kenkuana, kiniddawda nga iparanganna ida iti milagro a
pakakitaan a naggapu sadi langit ti pannakabalinna. 2 Ngem kinuna ni
Jesus, “No lumlumnek ti init, kunayo, ‘Nasayaat ti tiempo ita ta nalabaga
ti tangatang.’ 3 Iti agsapa, kunayo met, ‘Agtudo ita ta nalabaga ken
nasipnget ti tangatang.’ Maibagayo ti tiempo babaen iti panangkitayo iti
tangatang. Ngem diyo maibaga ti kaipapanan dagiti mapaspasamak
kadagitoy a panawen! 4 Anian a nagdakes dagiti tattao kadagitoy nga
aldaw! Awan pammatida iti Dios. Agkiddawkayo iti milagro? Awan ti
maipakita kadakayo no di laeng ti milagro ni Jonas.” Iti kasta, pinanawan
ida ni Jesus. 5 Idi nakaballasiwen dagiti adalan iti dan-aw, natakkuatanda
a nalipatanda ti nagbalon iti tinapay. 6 “Agsiputkayo,” kinuna ni Jesus
kadakuada. “Agannadkayo iti lebadura dagiti Fariseo ken Saduceo.” 7
Nagsasaritaanda ti sinaona. “Imbagana daytoy ta awan ngamin balontayo a
tinapay,” kinunada. 8 Ammo ni Jesus ti pagsasaritaanda ket sinaludsodna,
“Apay a pagsusuppiatanyo ti kaawan balonyo a tinapay? Nagbassit ketdin
ti pammatiyo! 9 Dikayo pay la makaawat? Nalipatanyo kadin daydi
panangpispisik iti lima a tinapay a naipakan kadagiti limaribu a tattao?
Mano a basket ti pinunnoyo kadagiti natda? 10 Wenno dagiti pito a
tinapay a naipakan kadagiti uppat a ribu a tattao? Mano a basket ti
pinunnoyo kadagiti natda? 11 Diyo pay la maawatan aya a saan a
maipanggep iti tinapay ti sarsaritaek kadakayo? Alluadanyo ti lebadura
dagiti Fariseo ken Saduceo!” 12 Naawatanen dagiti adalan a saan a ti
lebadura a pagaramid iti tinapay ti kuna ni Jesus nga annadanda, no di ket
ti pannursuro dagiti Fariseo ken Saduceo. 13 Idi dimteng ni Jesus iti disso
nga asideg iti ili ti Cesarea Filipos, sinaludsodna kadagiti adalanna,
“Siasino ti Anak ti Tao iti panagkuna dagiti tattao?” 14 “Sika kano ni Juan
a Mammuniag,” insungbatda. “Kuna met ti sumagmamano a sika ni Elias.
Kuna pay dagiti dadduma a sika ni Jeremias wenno maysa kadagiti
profeta.” 15 “Ket dakayo,” sinaludsod ni Jesus, “siasinoak iti
panagkunayo?” 16 “Sika ti Cristo, ti Anak ti sibibiag a Dios,” insungbat ni
Simon Pedro. 17 Kinuna ni Jesus, “Nagasatka, Simon nga anak ni Jonas.
Saan a tao no di ket ni Amak sadi langit ti nangipaltiing kenka iti daytoy a
kinapudno. 18 Ibagak ngarud kenka a sika ket Pedro. Iti rabaw daytoy a
bato, bangonekto ti iglesiak ket uray ni patay dinto agballigi kenkuana. 19
Itedkonto kenka dagiti tulbek ti Pagarian ti Langit. Ti aniaman nga
iparitmo ditoy daga, maiparitto met sadi langit. Ket ti aniaman nga
ipalubosmo ditoy daga, maipalubosto met sadi langit.” 20 Kalpasanna,
imbilin ni Jesus kadagiti adalanna nga awan ti pangibagbagaanda nga isu
ti Cristo. 21 Manipud idin, impakaammo ni Jesus kadagiti adalanna:
“Masapul a mapanak idiay Jerusalem ket adu ti sagabaek a pamarparigat
dagiti panglakayen, dagiti panguloen a papadi ken dagiti mamaestro iti
Linteg. Mapapatayakto ngem mapagungarakto iti maikatlo nga aldaw.” 22
Inyadayo bassit ni Pedro ni Jesus sana binabalaw. “Apo, saan koma a
kasta ti sasawem,” kinunana. “Saanto a maaramid kenka dayta.” 23
Sinango ni Jesus ni Pedro ket kinunana, “Adaywannak, Satanas! Maysaka
a lapped iti dalanko agsipud ta saan a ti pagayatan ti Dios ti
pampanunotem no di ket ti pagayatan ti tao.” 24 Kalpasanna, kinuna ni
Jesus kadagiti adalanna: “Ti agtarigagay a sumurot kaniak masapul a
tallikudanna ti bagina, ibaklayna ti krusna, ket surotennak. 25 Ta ti
siasinoman a mangipatpateg iti biagna, mapukawnanto. Ngem ti
siasinoman a mangyawat iti biagna gapu kaniak, maisalakannanto. 26
Adda aya magunggona ti tao no matagikuana ti entero a lubong ngem
mapukawna met ti biagna? Awan! Awan ti maited ti tao a pangsubbot iti
biagna. 27 Ta dandanin umay ti Anak ti Tao agraman dagiti anghelesna.
Umay iti dayag ni Amana, ket gunggonaannanto ti tunggal maysa kas
mayannatup kadagiti aramidna. 28 Laglagipenyo nga adda sumagmamano
kadakayo ditoy a saanto pay a matay agingga a makitada ti Anak ti Tao
nga umay nga Ari.”
Mateo 17
1 Kalpasan ti innem nga aldaw, inkuyog ni Jesus ni Pedro ken dagiti
agkabsat a Santiago ken Juan ket is-isuda a simmang-at iti nangato a
bantay. 2 Sadiay, nagbalbaliw ti langa ni Jesus iti imatang dagiti tallo nga
adalan: nagraniag ti rupana a kas iti init, ket rimmangrang a kas lawag
dagiti pagan-anayna. 3 Pagammoan, nakitada da Moises ken Elias a
makisarsarita ken ni Jesus. 4 Kinuna ni Pedro, “Apo, nagsayaaten ti
kaaddatayo ditoy! No kayatmo, mangipatakderak ditoy iti tallo a kalapaw:
maysa ti para kenka, maysa ti para ken ni Moises, ket ti maysa para ken ni
Elias.” 5 Agsasao pay laeng ni Pedro idi adda naraniag nga ulep a
nanglinong kadakuada. Adda timek a naggapu iti ulep a nagkuna, “Daytoy
ti Anakko a dungdungngoek ken pakaragsakak unay. Dumngegkayo
kenkuana!” 6 Napalalo ti buteng dagiti adalan a nakangngeg iti timek.
Nagpaklebda iti daga. 7 Immasideg ni Jesus ket sinagidna ida.
“Bumangonkayo,” kinunana. “Dikay agbuteng.” 8 Idi timmangadda, awan
sabali a nakitada no di laeng ni Jesus. 9 “Awan pangibagbagaanyo iti
naimatanganyo. Ibagayonto laeng daytoy kalpasan ti pannakapagungar ti
Anak ti Tao,” imbilin ni Jesus kadakuada idi sumalsalogda iti bantay. 10
Sinaludsod kenkuana dagiti adalan, “Apay a kuna dagiti mamaestro iti
Linteg a masapul nga umay nga umuna ni Elias?” 11 Insungbat ni Jesus,
“Pudno nga umay nga umuna ni Elias tapno tarimaanenna amin a banag.
12 Ngem daytoy ti ibagak kadakayo: Immayen ni Elias ngem saan a
nailasin dagiti tattao. Inaramidda ketdi kenkuana ti kinaykayatda. Kastanto
met ti panangparigatda iti Anak ti Tao.” 13 Ket naawatan dagiti adalan a
ni Juan a Mammuniag ti sarsaritaenna kadakuada. 14 Idi nagsublida iti yan
dagiti tattao, adda lalaki nga immasideg ken ni Jesus ket nagparintumeng
iti sangoananna 15 sana kinuna, “Apo, kaasiam kadi ti anakko a lalaki.
Agkiskissiw ket agsagsagaba iti napalalo. Masansan a matnag iti apuy
wenno iti danum. 16 Impanko kadagiti adalam ngem dida mapaimbag.” 17
Simmungbat ni Jesus, “Tattao a managdakdakes ken awanan pammati!
Kasano pay kabayag ti kaaddak iti dennayo? Kasano pay kabayag ti
panaganusko kadakayo? Yegyo man kaniak ti ubing!” 18 Inungtan ni
Jesus ti demonio, ket rimmuar manipud iti ubing. Immimbag ti ubing iti
dayta met la nga oras. 19 Kalpasanna, sililimed a napan dagiti adalan ken
ni Jesus ket sinaludsodda kenkuana, “Apay a dimi mapaksiat ti demonio?”
20 “Gapu ta bassit ti pammatiyo,” insungbat ni Jesus. “Laglagipenyo a no
adda pammatiyo a kas iti kadakkel ti bukel ti mostasa, mabalinyo a kunaen
iti daytoy a bantay, ‘Umaliska ket inka sadiay,’ ket umalis. Mabalinyo nga
aramiden ti uray ania!” 22 Idi naguurnong dagiti adalan idiay Galilea,
kinuna ni Jesus kadakuada, “Dandanin mayawat ti Anak ti Tao kadagiti
tattao 23 a mangpapatayto kenkuana. Ngem mapagungarto iti maikatlo
nga aldaw.” Kasta unay ti ladingit dagiti adalan. 24 Idi napan ni Jesus ken
dagiti adalanna idiay Capernaum, immasideg ken ni Pedro dagiti
agsingsingir iti buis nga agpaay iti Templo, ket sinaludsodda. “Agbubuis
met la ni maestroyo iti maipaay iti Templo?” 25 “Wen, a,” insungbat ni
Pedro. Idi simrek ni Pedro iti balay, immuna a nagsao ni Jesus, “Simon,
ania ti makunam? Siasino ti agbayad iti buis kadagiti ar-ari ditoy lubong?
Dagiti umili wenno dagiti ganggannaet?” 26 “Dagiti ganggannaet,”
insungbat ni Pedro. “No kasta ngarud,” kinuna ni Jesus, “saan a masapul
nga agbayad dagiti umili. 27 Ngem ditayo kayat nga adda makuna dagitoy
a tattao. Inka ngarud agbanniit idiay dan-aw. Alaem ti umuna nga ikan a
mabanniitam ket ngangaem ti ngiwatna. Masarakamto ti kuarta nga
umanay a pagbuista. Alaem ket inka bayadan ti buista.”
Mateo 18
1 Iti dayta a kanito, immasideg dagiti adalan ken ni Jesus ket
sinaludsodda, “Siasino ti kangrunaan iti Pagarian ti Langit?” 2 Nangayab
ni Jesus iti ubing, pinagtakderna iti sangoananda 3 ket kinunana,
“Laglagipenyo a dikayto makastrek iti Pagarian ti Langit no dikay
agbalbaliw ken agbalin a kas kadagiti ubbing. 4 Siasinoman nga
agpakumbaba ken agbalin a kas iti daytoy nga ubing, isu ti kangrunaan iti
Pagarian ti Langit. 5 Ket ti siasinoman nga umawat iti maysa kadagiti
kakastoy nga ubbing gapu kaniak, siak ti awatenna.” 6 “No adda
siasinoman a pakaigapuan ti panagbasol ti maysa kadagitoy nga ubbing a
mamati kaniak, nasaysayaat koma a maigalut ti dakkel a gilingan a bato iti
tengnged dayta a tao sa mailemmes iti taaw. 7 Asi pay ti lubong gapu ta
adda dagiti bambanag a pakaigapuan ti pannakapukaw dagiti tattao iti
pammatida! Umay a di bumurong dagitoy a sulisog, ngem asi pay ti tao a
pakaigapuanda! 8 “No ta imam wenno ta sakam ti pakaigapuan ti
panagbasolmo, putdem ket ibellengmo! Nasaysayaat a pawad wenno
pukolka a sumrek iti biag nga agnanayon ngem ti addaanka iti dua nga ima
ken dua a saka ket maitappuakka iti agnanayon nga apuy. 9 No ta matam ti
pakaigapuan ti panagbasolmo, suatem ket ibellengmo! Nasaysayaat a
buldingka a sumrek iti biag nga agnanayon ngem ti addaanka iti dua a
mata ket maitappuakka iti apuy idiay infierno.” 10 “Kitaenyo diyo laisen ti
uray maysa kadagitoy nga ubbing. Ibagak kadakayo a dagiti anghelesda
idiay langit, kankanayon nga addada iti imatang ni Amak nga adda sadi
langit. 12 “Ania ti makunayo? Ania ti aramiden ti maysa a tao nga addaan
sangagasut a karnero no mapukaw ti maysa kadakuada? Panawanna dagiti
siam a pulo ket siam nga agar-arab iti turod ket mapanna sapulen ti
napukaw a karnero. 13 Ibagak kadakayo a no masapulanna, ad-addanto ti
ragsakna iti daytoy a karnero ngem kadagiti siam a pulo ket siam a saan a
napukaw. 14 Kasta met a di kayat ni Amayo sadi langit a mapukaw ti uray
maysa kadagitoy nga ubbing.” 15 “No makabasol kenka ti kabsatmo, inka
kenkuana ket ilawlawagmo ti nagbasolanna. Ngem aramidem daytoy no
duduakayo. No dumngeg kenka, napasublimon ti kabsatmo. 16 Ngem no
dina aklonen ti basolna, mangikuyogka iti maysa wenno dua a kaduam
tapno, kas nailanad iti Nasantoan a Surat, ‘Mapatalgedan ti amin a
pammabasol babaen iti pammaneknek ti dua wenno tallo a saksi.’ 17
Ngem no dina denggen ida, ipakaammom iti iglesia. Ket no dina latta
denggen ti iglesia, ibilangmon dayta a kabsat a kas maysa a ganggannaet
wenno agsingsingir iti buis.” 18 “Ibagak ngarud kadakayo: Ti aniaman
nga iparityo ditoy daga, maiparitto met idiay langit; ket ti aniaman nga
ipalubosyo ditoy daga, maipalubosto met idiay langit. 19 “Adda pay
ibagak kadakayo: No pagnummoan ti dua kadakayo ditoy daga ti aniaman
a dawatenyo, itedto kadakayo ni Amak sadi langit. 20 Ta no sadino ti ayan
ti dua wenno tallo nga aguummong gapu iti naganko, addaak kaduada
sadiay.” 21 Napan ni Pedro ken ni Jesus ket sinaludsodna, “Apo, mamin-
ano a pakawanek ti kabsatko nga agbasbasol kaniak? Mamimpito?” 22
Kinuna ni Jesus, “Saan laeng a mamimpito no di ket mamimpitopulo a
pito. 23 Ta ti Pagarian ti Langit mayarig iti kastoy: Adda idi maysa nga ari
a nangikeddeng a makikuenta kadagiti agserserbi kenkuana. 24 Idi
mangrugi a makikuenta, inyegda kenkuana ti maysa nga adipen a
nakautang iti sangapulo ribu a talento. 25 Awan ti umanay a pagbayadna.
Tapno makabayad, imbilin ti ari a mailako a kas tagabu agraman ti
asawana, annakna ken amin a sanikuana. 26 “Nagparintumeng ti adipen iti
sangoanan ti ari ket nagpakpakaasi. ‘Anusannak kadi,’ kinunana, ‘ta
bayadakto amin nga utangko.’ 27 “Naasian ti ari iti adipen ket
pinakawanna ti utangna sana pinagawid. 28 “Rimmuar ti lalaki.
Nasarakanna ti padana nga adipen a nakautang kenkuana iti sangagasut a
denario. Tiniliwna sana binekkel. ‘Bayadam ti utangmo,’ kinunana. 29
“Nagparintumeng ti nakautang, ket nagpakpakaasi kenkuana, ‘Anusannak
kadi ta agbayadakto met laeng.’ 30 “Dina pinatgan ti dawat ti padana nga
adipen. Pinaibaludna ketdi agingga a mabayadanna ti utangna. 31
“Nagladingit dagiti dadduma nga adipen idi makitada ti napasamak.
Napanda iti ari ket impulongda amin kenkuana. 32 “Ngarud, pinaayaban ti
ari ti adipen. Kinunana, ‘Nagdakeska ketdin nga adipen! Pinakawanko ti
amin nga utangmo agsipud ta nagpakpakaasika. 33 Kinaasiam met koma ti
padam nga adipen a kas iti panangngaasik kenka.’ 34 “Iti napalalo a
pungtot ti ari, pinaibaludna ti adipen tapno madusa agingga a
mabayadanna ti amin nga utangna.” 35 Kalpasanna, kinuna ni Jesus,
“Kastanto ti aramiden ni Amak sadi langit iti tunggal maysa kadakayo no
iti pusoyo, diyo pakawanen ti kabsatyo.”
Mateo 19
1 Idi naisaon ni Jesus dagitoy, pimmanaw idiay Galilea ket napan iti sakup
ti Judea iti ballasiw ti Karayan Jordan. 2 Adu a tattao ti simmurot
kenkuana ket pinaimbagna ida sadiay. 3 Immasideg kenkuana ti
sumagmamano a Fariseo tapno suotenda babaen iti panagsaludsodda,
“Ipalubos kadi ti Linteg nga isina ti lalaki ti asawana iti uray ania a gapu?”
4 Simmungbat ni Jesus, “Diyo kadi nabasa daytoy a paset ti Nasantoan a
Surat? ‘Idi punganay, ti Namarsua inaramidna ida a lalaki ken babai.’ 5
Kinunana pay, ‘Daytoy ti gapuna a panawanto ti lalaki dagiti nagannak
kenkuana ket makitiponto iti asawana, ket agbalindanton a maymaysa.’ 6
Isut’ gapuna a saandan a dua no di ket maymaysadan a bagi. Ngarud, saan
a pagsinaen ti tao ti pinagtipon ti Dios.” 7 Sinaludsod kenkuana dagiti
Fariseo, “Apay ngarud nga imbilin ni Moises nga ikkan ti lalaki ti asawana
iti kasuratan ti panagsina sana papanawen?” 8 “Natangken ngamin ti
uloyo, isu a nangituyang ni Moises iti linteg a mangipalubos nga isinayo ti
asawayo,” kinuna ni Jesus. “Ngem saan a kastoy idi punganay. 9 Ngarud,
kunak kadakayo a ti lalaki a mangisina iti asawana, idinto a sipupudno
kenkuana, makabasol iti pannakikamalala no mangasawa iti sabali.” 10
Kinuna dagiti adalan, “No kasta ti kasasaad ti agassawa, nasaysayaat la
ngaruden nga awan ti agas-asawa.” 11 Simmungbat ni Jesus, “Saan nga
agpaay daytoy a pannursuro iti tunggal maysa, no di laeng kadagiti
pakaitedanna. 12 Ta nadumaduma ti gapu ti saan a panagasawa dagiti
lallaki. Adda di mangasawa ta nayanakda nga adda pagkurangan ti
kinalalakida. Adda met dagiti di mangasawa gapu ta nakaponda, ket dagiti
dadduma, gapu iti panagserbida iti Pagarian ti Langit. “Ti makatungpal iti
daytoy a pannursuro, ipatungpalna koma.” 13 Adda sumagmamano a
tattao a nangyasideg kadagiti ubbing ken ni Jesus tapno ipatayna ti imana
kadakuada ken ikararaganna ida. Ngem inungtan ida dagiti adalan gapu iti
inaramidda. 14 “Palubosanyo dagiti ubbing nga umay kaniak,” kinuna ni
Jesus. “Diyo paritan ida ta dagiti kas kadakuada ti agtagikua iti Pagarian ti
Langit.” 15 Ket impatayna ti imana kadakuada sa pimmanaw. 16 Napan ti
maysa nga agtutubo ken ni Jesus ket sinaludsodna, “Maestro, ania ti
naimbag nga aramidek tapno magun-odko ti biag nga agnanayon?” 17
“Apay a saludsodem kaniak no ania ti naimbag?” insungbat ni Jesus.
“Maymaysa laeng ti naimbag. No kayatmo ti sumrek iti biag nga
agnanayon, tungpalem dagiti bilbilin.” 18 “Ania a bilbilin?” sinaludsodna.
Insungbat ni Jesus: “Dika mamapatay; dika makikamalala; dika agtakaw;
dika agsaksi iti ulbod; 19 agraemka kadagiti nagannak kenka; ken ayatem
ti padam a tao a kas iti panagayatmo iti bagim.” 20 “Tungtungpalek amin
dagitoy a bilbilin,” insungbat ti agtutubo. “Ania pay ti pagkurangak?” 21
Kinuna ni Jesus kenkuana, “No kayatmo nga awan ti pagkurangam, inka
ilako ti amin a sanikuam. Itedmo kadagiti napanglaw ti paglakoam, ket
addanto kinabaknangmo idiay langit. Kalpasanna, umayka sumurot
kaniak.” 22 Idi mangngeg ti agtutubo daytoy, sililiday a pimmanaw
agsipud ta nabaknang unay. 23 Kinuna ni Jesus kadagiti adalanna: “Ibagak
kadakayo a narigatto a sumrek dagiti baknang iti Pagarian ti Langit. 24
Ulitek: narigrigat ti iseserrek ti baknang iti Pagarian ti Dios ngem ti
ilulusot ti kamelio iti abut ti dagum.” 25 Napalalo ti siddaaw dagiti adalan
idi mangngegda daytoy. “Siasino ngaruden ti maisalakan?” sinaludsodda.
26 Minatmatan ida ni Jesus ket insungbatna, “Saan a maaramid ti tao
daytoy ngem kabaelan amin ti Dios.” 27 Nagsao ni Pedro: “Kitaem, Apo,
binaybay-anmi amin ket simmurotkami kenka. Anianto ngarud ti
gunggonami?” 28 Kinuna ni Jesus kadakuada, “Ibagak daytoy kadakayo:
Inton agtugaw ti Anak ti Tao iti nagloriaan a tronona iti baro a lubong,
dakayo a simmurot kaniak, agtugawkayto met kadagiti sangapulo ket dua
a trono a mangituray kadagiti 12 a tribu ti Israel. 29 Ket siasinoman a
nangpanaw iti balay, kakabsat, nagannak, annak wenno dagdagana gapu
kaniak, umawatto iti maminggasut a kaadu ket tawidennanto ti biag nga
agnanayon. 30 Ngem adu dagiti umun-una ita a maud-udinto, ket adu
dagiti maud-udi ita nga umun-unanto.”
Mateo 20
1 “Mayarig ti Pagarian ti Langit iti kastoy: Adda idi maysa a tao a nasapa
a napan nagbirok iti tangdananna nga agtrabaho iti kaubasanna. 2
Nakitulag kadagiti tattao a tangdananna ti tunggal maysa iti maysa a bagi
ti pirak sana imbaon ida iti kaubasanna. 3 “Napan manen iti tiendaan iti
alas nuebe, ket nakitana ti sumagmamano a lallaki nga agtatakder. 4
Kinunana kadakuada, ‘Inkayo met agtrabaho idiay kaubasan ta itedkonto ti
rumbeng a tangdanyo.’ 5 “Iti kasta, napanda. Rimmuar manen daydi lalaki
iti alas dose, ken iti alas tres. 6 Idi dandani alas singko, napan iti tiendaan
ket nakitana ti sumagmamano a lallaki nga agtatakder. Kinunana
kadakuada, ‘Apay a daddadaelenyo ti tiempoyo nga agmalmalem ditoy?’ 7
“ ‘Awan ngamin pagtrabahoanmi,’ insungbatda. “Imbagana kadakuada,
‘Inkayo met agtrabaho iti kaubasan.’ 8 “Idi sumipngeten, kinuna ti
akinkukua iti kaubasan iti katalekna, ‘Ayabam dagiti mangmangged ta
tangdanam ida. Irugim kadagiti naudi a simrek.’ 9 “Natangdanan iti
gagangay a sueldo iti agmalem ti tunggal maysa kadagiti nangrugi a
nagtrabaho iti alas singko. 10 Idi napan dagiti immun-una a naayaban,
impagarupda nga ad-adu ti awatenda. Ngem naipada met ti tangdanda
kadagiti naud-udi. 11 Inawatda ti tangdanda ngem dinayamudomanda ti
nagpatrabaho. 12 Kinunada, ‘Maysa laeng nga oras ti panagtrabaho
dagitoy naudi a simrek. Ngem dakami a nagmalmalem a
nagkapkapudotan, impadam ti tangdanmi.’ 13 “ ‘Gayyem,’ kinuna ti
akinkukua iti kaubasan iti maysa kadakuada, ‘saanka a sinaur.
Immanamongka a matangdanan iti gagangay a sueldo iti agmalem. 14
Alaem ti tangdanmo ket pumanawkan. Kayatko nga ipada ti tangdanmo iti
intangdanko iti naudi. 15 Awan aya ti kalintegak a manggasto iti kuartak
kas iti pagayatak? Wenno, umapalka kadi agsipud ta naparaburak?’ ” 16
Inggibus ni Jesus: “Ngarud, umunanto dagiti maudi, ket maudinto dagiti
umuna.” 17 Idi sumangsang-at ni Jesus idiay Jerusalem, inyadayona dagiti
sangapulo ket dua nga adalan ket kinasaritana ida bayat ti pannagnada.
Kinunana kadakuada, 18 “Denggenyo, sumang-attayo idiay Jerusalem ket
mayawatto sadiay ti Anak ti Tao kadagiti panguloen a papadi ken kadagiti
mamaestro iti Linteg. Ikeddengdanto a mapapatay 19 sadanto yawat
kadagiti Hentil a mangang-angaw, mangsapsaplit ken mangilansa
kenkuana iti krus. Ngem mapagungarto iti maikatlo nga aldaw.” 20
Immasideg ken ni Jesus ti asawa ni Zebedeo agraman dagiti annakna a
lallaki. Nagparintumeng iti sangoananna, ket nagdawat kenkuana. 21
“Ania ti kayatmo?” sinaludsod ni Jesus. Simmungbat ti ina, “Ipalubosmo
koma nga inton agarika, makitugawto kenka dagitoy dua nga annakko, ti
maysa iti makannawanmo, ket ti sabali iti makannigidmo.” 22 “Diyo
ammo ti dawdawatenyo,” kinuna ni Jesus kadagiti agkabsat. “Kabaelanyo
kadi ti uminum iti kopa a paginumak?” “Wen, kabaelanmi,” insungbatda.
23 “Agpayso nga uminumkayto iti kopa a paginumak,” kinuna ni Jesus,
“ngem awan ti karbengak a mangpili no siasinonto ti agtugaw iti
makannawan ken makannigidko. Maited dagitoy a pagsaadan kadagiti
nangisaganaan ni Amak.” 24 Idi mangngeg daytoy dagiti sangapulo a
kaduada nga adalan, nakapungtotda kadagiti agkabsat. 25 Iti kasta,
inayaban amin ida ni Jesus ket kinunana, “Pagaammoyo a kadagiti Hentil,
dagiti agturay addaanda iti dakkel a pannakabalin kadagiti tattaoda. 26
Saanto koma a kasta ti aramidenyo. Ti agtarigagay nga agpangulo,
masapul nga agserbi kadakayo amin. 27 Ket ti agtarigagay nga isu ti
kangrunaan, masapul nga isu ti adipenyo, 28 a kas iti Anak ti Tao a saan
nga immay a paserbian no di ket tapno agserbi ken yawatna ti biagna a
pangsubbot kadagiti adu a tattao.” 29 Idi pumanaw ni Jesus ken dagiti
adalanna idiay Jerico, nakaad-adu a tattao ti simmurot. 30 Adda dua a
bulsek a lallaki nga agtutugaw iti igid ti dalan. Apaman a nangngegda a
lumabas ni Jesus, impukkawda, “Anak ni David! Kaasiannakami!” 31
Inungtan ida dagiti tattao ket imbagada nga agulimekda. Ngem
impigpigsada ketdi nga impukkaw, “Anak ni David, kaasiannakami,
Apo!” 32 Nagsardeng ni Jesus. Inayabanna ida ket sinaludsodna, “Ania ti
kayatyo nga aramidek kadakayo?” 33 “Apo,” kinunada, “makakitakami
koma.” 34 Naasian ni Jesus kadakuada ket sinagidna dagiti matada. Dagus
a nakakitada, ket simmurotda kenkuana.
Mateo 21
1 Idi asidegdan idiay Jerusalem ket nakadanondan idiay Betfage iti Bantay
Olivo, pinauna ni Jesus ti dua kadagiti adalan. Imbilinna kadakuada, 2
“Inkayo iti masungad a barrio, ket makitayonto a dagus ti maysa a
sigagalut nga asno ken ti urbonna. Warwaranyo ket yegyo ida kaniak. 3
No adda agsaludsod, daytoy ti ibagayo, ‘Masapul ida ti Apo’ ket
ipalubosnanto a dagus nga alaenyo ida.” 4 Naaramid daytoy tapno
matungpal ti kinuna ti profeta: 5 “Ipakaammoyo iti siudad ti Sion:
Umayen ti arim, Napakumbaba ken sisasakay iti asno; Wen, iti urbon ti
asno.” 6 Napan ngarud dagiti adalan ket tinungpalda ti naibilin kadakuada.
7 Insangpetda ti asno ken ti urbonna. Inyap-apda dagiti kagayda kadagiti
asno ket simmakay ni Jesus. 8 Inyaplag dagiti adu a tattao dagiti kagayda
iti kalsada. Nagsep-ak met dagiti dadduma kadagiti sangsanga ti kaykayo
ket inyaplagda iti dalan. 9 “Madaydayaw ti Anak ni David!”
impukpukkaw dagiti tattao a magmagna iti sangoanan ni Jesus ken dagiti
sumursurot kenkuana. “Bendisionan koma ti Dios ti umay iti nagan ti
Apo! Madaydayaw koma ti Dios!” 10 Idi simrek ni Jesus idiay Jerusalem,
nariribuk dagiti amin a tattao iti siudad. “Siasino daytoy?” sinaludsodda.
11 “Daytoy ni Jesus a profeta a taga-Nazaret idiay Galilea,” insungbat
dagiti tattao. 12 Simrek ni Jesus iti Templo ket pinaruarna dagiti amin nga
agtagtagilako ken aggatgatang sadiay. Binalintuagna dagiti lamisaan dagiti
agsuksukat iti kuarta ken dagiti tugaw dagiti aglaklako iti kalapati. 13
Kinunana kadakuada, “Nailanad iti Nasantoan a Surat a kuna ti Dios,
‘Managanto ti balayko iti balay a pagkararagan.’ Ngem pagbalbalinenyo
met a rukib dagiti mannanakaw!” 14 Napan dagiti bulsek ken lugpi ken ni
Jesus idiay Templo ket pinaimbagna ida. 15 Nakaunget dagiti panguloen a
papadi ken mamaestro iti Linteg idi makitada dagiti nakaskasdaaw nga ar-
aramidenna ken mangngegda ti ipukpukkaw dagiti ubbing iti Templo,
“Madaydayaw ti Anak ni David!” 16 Ngarud, sinaludsodda ken ni Jesus,
“Mangngegmo ti sasawenda?” “Wen,” insungbatna. “Diyo aya nabasa ti
kuna ti Nasantoan a Surat? ‘Insurom dagiti ubbing ken maladaga a
mangyebkas iti umisu a panagdaydayaw.’ ” 17 Pinanawan ida ni Jesus,
rimmuar iti siudad ket napan immian idiay Betania. 18 Iti agsapa iti
sumuno a bigat, idi agsubli ni Jesus iti siudad, nabisinan. 19 Nakitana ti
maysa a kayo nga igos iti igid ti dalan. Inasitganna ngem awan nakitana a
bunga no di laeng bulong. Iti kasta, kinunana iti kayo, “Saankanton nga
agbunga!” Dagus a nagango ti kayo. 20 Nasdaaw dagiti adalan idi
makitada daytoy. “Kasano ti panaggango a dagus daytoy nga igos?”
sinaludsodda. 21 Insungbat ni Jesus, “Laglagipenyo daytoy! No
mamatikayo ket dikay agduadua, maaramidyonto ti kas iti inaramidko iti
daytoy a kayo. Saan la a dayta. Mabalinyonto pay a kunaen iti daytoy a
turod, ‘Umaliska ditoy ket tumpuakka idiay baybay,’ ket maaramidto a
kasta. 22 No adda pammatiyo, awatenyonto ti aniaman a dawatenyo iti
kararagyo.” 23 Nagsubli ni Jesus idiay Templo. Idi madama a
mangisursuro, immasideg kenkuana dagiti panguloen a papadi ken dagiti
panglakayen a Judio, ket sinaludsodda, “Ania ti kalintegam a mangaramid
kadagitoy? Siasino ti nangted kenka iti daytoy a turay?” 24 “Agsaludsodak
met kadakayo,” insungbat ni Jesus. “No masungbatandak, ibagak met
kadakayo no ania ti kalintegak nga agaramid kadagitoy. 25 Naggapuan ti
turay ni Juan a Mammuniag: iti Dios wenno iti tao?” Nagsisinnaludsodda,
“Ania ti isungbattayo? No kunatayo, ‘Naggapu iti Dios,’ kunananto
kadatayo, ‘Apay ngarud a dikay namati ken ni Juan?’ 26 Ngem no
kunatayo, ‘Naggapu iti tao,’ mabutengtayo met no ania ti aramiden dagiti
tattao ta imbilangda ni Juan a maysa a profeta.” 27 Iti kasta, insungbatda
ken ni Jesus, “Dimi ammo.” Kinuna ni Jesus kadakuada, “Diak met
ngarud ibaga kadakayo no ania ti kalintegak nga agaramid kadagitoy.” 28
“Ania ti makunayo iti daytoy? Adda idi ama nga addaan iti dua nga annak
a lallaki. Napan iti inauna ket kinunana, ‘Anakko, inka agtrabaho ita idiay
kaubasan.’ 29 “‘Diak kayat,’ kinuna ti anak, ngem kalpasanna, nagbabawi
ket napan met laeng. 30 “Napan met ti ama iti maikadua ket imbagana ti
kas iti insaona iti inauna. “ ‘Wen, ama,’ kinunana, ngem saan a napan. 31
“Siasino kadakuada ti nangtungpal iti pagayatan ti amada?” sinaludsod ni
Jesus. “Ti inauna,” kinunada. Kinuna ni Jesus, “Ngem daytoy met ti kunak
kadakayo. “Umun-unanto ngem dakayo a mapan iti Pagarian ti Dios dagiti
agsingsingir iti buis ken dagiti dakes a babbai. 32 Ta immay kadakayo ni
Juan a nangisuro iti pudno a dalan a surotenyo ket diyo pinati; ngem
namati kenkuana dagiti agsingsingir iti buis ken dagiti dakes a babbai. Ket
uray pay kalpasan ti pannakakitayo iti daytoy, dikay latta nagbabawi ken
namati kenkuana.” 33 Kinuna ni Jesus, “Denggenyo ti maysa pay a
pangngarig: Adda tao a nagmula iti adu nga ubas. Inaladanna ti kaubasan,
nangaramid iti pagpespesan iti ubas sa nangipatakder iti torre a
pagwanawanan. Kalpasanna, impaabangna ti kaubasan kadagiti
makitaltalon sa nagbiahe iti sabali a daga. 34 “Idi dumteng ti
panagbuburas iti ubas, imbaon ti akinkukua iti kaubasan dagiti adipennaa
mapan kadagiti makitaltalon tapno alaenda ti bingayna. 35 Ngem tiniliw
dagiti makitaltalon dagiti adipen. Kinabilda ti maysa kadakuada, pinatayda
ti maikadua ket inuborda ti maikatlo. 36 “Nangibaon manen kadagiti
adipen nga ad-adu ngem idi damo ket kasta met laeng ti inaramidda
kadakuada. 37 “Kamaudiananna, imbaonna kadakuada ti anakna. ‘Awan
duadua a padayawandanto toy anakko,’ kinunana. 38 “Ngem idi makita
dagiti makitaltalon ti anak ti akinkukua iti kaubasan, kinunada iti maysa
ken maysa, ‘Daytoyen ti agtawid! Umaykayo ta papatayentayo ket
kukuatayton ti kaubasan!’ 39 “Iti kasta, tiniliwda ti anak, ket inruarda iti
kaubasan sada pinatay. 40 “Ita,” sinaludsod ni Jesus, “inton umay ti
akinkukua iti kaubasan, anianto ti aramidenna kadagiti makitaltalon?” 41
Kinunada, “Awan duadua a patayennanto dagiti naranggas a makitaltalon.
Ket ipaabangnanto ti kaubasan kadagiti sabali a makitaltalon a mangtedto
kenkuana iti bingayna iti tiempo ti panagapit.” 42 Kinuna ni Jesus
kadakuada, “Diyo pay aya nabasa ti nailanad iti Nasantoan a Surat? ‘Ti
bato nga imbelleng dagiti agipatpatakder, Nagbalin a kangrunaan a bato.
Inaramid daytoy ti Apo, Ket anian a nakakaskasdaaw iti imatangtayo!’ 43
“Isut’ gapuna nga ibagak kadakayo,” innayon pay ni Jesus, “a maikkatto
kadakayo ti Pagarian ti Dios ket maitedto kadagiti tattao a makaited
kadagiti umno a bunga. 44 Maburburakto ti siasinoman a matnag iti
daytoy a bato, ket matumekto a kas tapok ti siasinoman a matupakanna.”
45 Nangngeg dagiti panguloen a papadi ken dagiti Fariseo dagiti
pangngarig ni Jesus ket naawatanda nga isuda ti sarsaritaenna. 46
Pinadasda a patiliw, ngem mabutengda kadagiti tattao ta imbilangda ni
Jesus a maysa a profeta.
Mateo 22
1 Nagaramat manen ni Jesus kadagiti pangngarig iti pannakisaona kadagiti
tattao. Kinunana, 2 “Mayarig ti Pagarian ti Langit iti kastoy: Adda idi
maysa nga ari a nagpadaya gapu iti panagkasar ti anakna a lalaki. 3
Imbaonna dagiti adipenna a mangayab kadagiti naimbitaran, ngem dida
kayat ti umay. 4 Nangibaon manen kadagiti sabali nga adipen ket
kinunana: ‘Ibagayo kadagiti naawis a naisaganan ti padayak. Napartin
dagiti kalakian a baka ken dagiti napalukmeg nga urbon a baka ket
naisagana aminen a masapul. Ibagayo nga umaydan.’ 5 “Ngem saan a
nangikaskaso dagiti naimbitaran: napan ti maysa iti talonna, ti sabali iti
negosiona; 6 ket dagiti dadduma tiniliwda dagiti adipen sada pinarparigat
ken pinatay ida. 7 “Gapu iti napalalo a pungtot ti ari, imbaonna dagiti
soldadona ket pinatayda dagiti nangpapatay kadagiti adipen sada pinuoran
ti siudadda. 8 “Kalpasanna, inayaban ti ari dagiti adipenna ket kinunana,
‘Naisaganan ti padaya, ngem saan a maikari dagiti inimbitarak. 9 Inkayo
ngarud kadagiti kalkalsada ket awisenyo nga umay makidaya dagiti amin a
makitayo’. 10 “Napan ngarud dagiti adipen kadagiti kalkalsada. Inawisda
amin a tao a nasarakanda, naimbag man wenno dakes, ket napno ti
pagbodaan kadagiti makidaya. 11 “Idi sumrek ti ari a mangkita kadagiti
sangaili, nakitana ti maysa a tao a saan a nagkawes iti pakidaya. 12
Sinaludsod ti ari, ‘Gayyem, saanka a nagkawes iti pakidaya. Kasano a
nakastrekka?’ “Ngem nagulimek ti lalaki. 13 “Kinuna ngarud ti ari
kadagiti agserserbi, ‘Rimpongenyo daytoy a tao ket ipurruakyo iti
kasipngetan. Sadiay, agsangit ken agngaretngetto.’ ” 14 Kamaudiananna,
kinuna ni Jesus, “Adu dagiti maayaban ngem bassit dagiti mapili.” 15
Pimmanaw dagiti Fariseo ket nagtutulagda no kasano ti panangtiliwda ken
ni Jesus gapu kadagiti saona. 16 Imbaonda ngarud kenkuana dagiti
pasurotda ken sumagmamano a kameng ti partido Herodiano. Kinuna
dagiti naibaon, “Maestro, ammomi a saanka nga agul-ulbod. Isursurom ti
pudno maipapan iti pagayatan ti Dios. Dimo pakaringgoran no ania ti kuna
ti tao agsipud ta awan idumdumam. 17 Ibagam man ngarud kadakami no
ania ti kapanunotam iti daytoy? Maisalungasing kadi iti Linteg wenno
saan ti panagbayad iti buis iti Emperador?” 18 Ngem nadlaw ni Jesus ti
dakes a panggepda, ket kinunana, “Dakayo nga aginsisingpet! Apay a
suotendak? 19 Ipakitayo man kaniak ti kuarta a pagbuis!” Intedda
kenkuana ti kuarta. 20 “Siasino ti akinladawan ken akinnagan iti daytoy?”
sinaludsodna. 21 “Ti Emperador,” insungbatda. Iti kasta, kinuna ni Jesus,
“Itedyo ngarud iti Emperador ti kukua ti Emperador, ket itedyo met iti
Dios ti kukua ti Dios.” 22 Nasdaawda idi mangngegda daytoy, ket
pinanawanda ni Jesus. 23 Iti dayta met la nga aldaw, napan ken ni Jesus ti
sumagmamano a Saduceo. (Kunkuna dagiti Saduceo a saan nga agungar
dagiti natay.) 24 Kinunada, “Maestro, insuro ni Moises a no matay ti
maysa a lalaki nga awan anakna, asawaen ti kabsatna ti balo tapno
maaddaanda iti pannakaanak ti natay. 25 Adda idi pito a lallaki nga
agkakabsat ditoy lugarmi. Nangasawa ti inauna ngem natay nga awan
putotna. Iti kasta, nabati ti asawana iti adienna. 26 Kasta met ti napasamak
iti maikadua, iti maikatlo ken kadagiti sumarsaruno a kakabsatna agingga
iti maikapito. 27 Kamaudiananna, natay ti babai. 28 “Ngarud,”
sinaludsodda, “inton aldaw ti panagungar, siasinonto ti akin-asawa
kenkuana? Ta nakikallaysada met amin kenkuana!” 29 “Agbiddutkayo!”
insungbat ni Jesus. “Diyo ngamin maawatan dagiti Nasantoan a Sursurat
wenno ti pannakabalin ti Dios. 30 Inton agungar dagiti natay,
mayarigdanto kadagiti angheles sadi langit, ket didanto mangasawa wenno
makiasawa. 31 No, maipapan iti panagungar dagiti natay, diyo pay aya
nabasa ti sinao kadakayo ti Dios? Kinunana, 32 ‘Siak ti Dios ni Abraham,
ti Dios ni Isaac ken ti Dios ni Jacob.’ Kayatna a sawen nga isu ti Dios
dagiti sibibiag, saan a Dios dagiti natay.” 33 Idi mangngeg daytoy dagiti
tattao, nasdaawda iti pannursurona. 34 Naguummong dagiti Fariseo idi
nadamagda a pinagulimek ni Jesus dagiti Saduceo. 35 Maysa a maestro iti
Linteg a kaduada ti nagsaludsod ken ni Jesus tapno ipalab-ogda. 36
“Maestro,” kinunana, “ania ti kangrunaan a bilin iti Linteg?” 37 Insungbat
ni Jesus, “ ‘Ayatem ti Apo a Diosmo iti amin a pusom, iti amin a
kararuam, ken iti amin a panunotmo.’ 38 Daytoy ti umuna ken kangrunaan
a bilin. 39 Ti maikadua a kangrunaan a bilin umasping iti umuna, ‘Ayatem
ti padam a tao a kas iti bagim.’ 40 Dagitoy dua a bilin ti pagbatayan ti
entero a Linteg ni Moises ken ti pannursuro dagiti profeta.” 41 Idi
naguummong dagiti sumagmamano a Fariseo, sinaludsod ni Jesus
kadakuada, 42 “Ania ti makunayo maipapan iti Cristo? Ania a kaputotan ti
nagtaudanna?” “Nagtaud iti kaputotan ni David,” insungbatda. 43
Sinaludsod manen ni Jesus, “Apay ngarud a ti Espiritu pinaltiinganna ni
David nga awaganna ti Cristo iti ‘Apo’? Kinuna ni David, 44 ‘Kinuna ti
Apo iti Apok: Agtugawka ditoy makannawanko, Agingga a maparmekko
dagiti kabusormo ket addada iti babaem.’ 45 No ‘Apo’ ti kuna ni David
kenkuana, kasano ngarud a nagtaud ti Cristo iti kaputotan ni David?” 46
Awan a pulos ti naisungbatda ken ni Jesus, ket manipud iti dayta nga
aldaw, awanen ti makaitured nga agsaludsod kenkuana.
Mateo 23
1 Kinuna ni Jesus kadagiti tattao agraman kadagiti adalanna, 2 “Adda
kalintegan dagiti mamaestro iti Linteg ken dagiti Fariseo a mangilawlawag
iti Linteg ni Moises. 3 Isut’ gapuna a tungpalen ken surotenyo amin nga
ibagada nga aramidenyo. Nupay kasta, diyo tultuladen dagiti aramidda, ta
dida ar-aramiden dagiti isursuroda. 4 Pabaklayanda dagiti tattao iti
nadagsen a karga ngem dida met tumulong nga agawit. 5 Aramidenda
amin tapno madlaw dagiti tattao a relihiosoda. Kitaenyo ti kaakaba ti
nakaisuratan dagiti paset ti Nasantoan a Surat nga adda kadagiti muging
ken takiagda! Kitaenyo ti kagayad ti baruyboy dagiti kawesda! 6
Magustoanda dagiti katan-okan a lugar kadagiti fiestaan ken kangrunaan a
tugaw kadagiti sinagoga. 7 Magustoanda ti makablaawan iti publiko ken
maawagan iti ‘Maestro.’ 8 Dikayo paawagan iti ‘Maestro’ agsipud ta
agkakabsatkay amin ket maymaysa laeng ti Maestroyo. 9 Diyo awagan iti
‘Ama’ ti siasinoman ditoy daga agsipud ta maymaysa ti Amayo sadi
langit. 10 Dikayo met a paawagan iti ‘Pangulo,’ ta ti Cristo laeng ti
panguloyo. 11 Ti kangrunaan kadakayo masapul nga isu ti adipenyo. 12 Ti
siasinoman a mangitan-ok iti bagina, maipababanto. Ngem ti siasinoman
nga agpakumbaba, maitan-okto.” 13 “Asikayo pay, dakayo a mamaestro
iti Linteg ken dakayo a Fariseo! Aginsisingpetkayo! Serraanyo ti ruangan
ti Pagarian ti Langit kadagiti tattao ngem dikay met sumrek ket paritanyo
pay dagiti mayat a sumrek. 15 “Asikayo pay, dakayo a mamaestro iti
Linteg ken dakayo a Fariseo! Aginsisingpetkayo! Ballasiwenyo dagiti
taaw ken sursorenyo dagiti dagdaga tapno makaawiskayo iti maysa a
pasurot; ket no adda mapasurotyon pagbalinenyo nga ad-adda ti
pannakaikarina iti infierno ngem dakayo. 16 “Asikayo pay, dakayo a
bulsek a mangidaldalan! Ta isursuroyo a no pagsapata ti maysa a tao ti
Templo, saan a masapul a tungpalenna ti karina; ngem no pagsapatana ti
balitok iti Templo, masapul a tungpalenna ti karina. 17 Maag a bulsek!
Ania aya ti napatpateg? Ti balitok wenno ti Templo a mamagbalin a
nasantoan ti balitok? 18 Isursuroyo pay a no pagsapatana ti altar, saan a
masapul a tungpalenna ti karina; ngem no pagsapatana ti daton iti altar,
masapul a tungpalenna ti karina. 19 Anian a kinabulsekyo! Ania aya ti
napatpateg? Ti daton wenno ti altar a mamagbalin a nasantoan ti daton? 20
Ngarud, no agsapata ti tao iti sango ti altar, isapatana ti altar agraman ti
amin a daton iti rabawna; 21 ket no agsapata ti maysa a tao iti Templo,
agsapata met iti Templo ken iti Dios nga agnaed sadiay; 22 ket no
agsapata ti tao iti langit, agsapata met iti trono ti Dios ken iti situtugaw
sadiay. 23 “Asikayo pay, dakayo a mamaestro iti Linteg ken dakayo a
Fariseo! Aginsisingpetkayo! Itedyo ti apagkapullo dagiti rekrekado a
mulayo kas iti yerbabuena, anis ken kumino, ngem diyo met tungpalen
dagiti nasken a pannursuro ti Linteg a kas iti kinalinteg, kinamanangngaasi
ken kinapudno. Dagitoy ti rebbengyo a tungpalen ket diyo liwayan dagiti
dadduma. 24 Bulsek a mangidaldalan! Sagatenyo ti lamok iti inumenyo,
ngem alun-onenyo ti kamelio. 25 “Asikayo pay, dakayo a mamaestro iti
Linteg ken dakayo a Fariseo! Aginsisingpetkayo! Ta dalusanyo ti ruar ti
tasa ken pingganyo, ngem iti uneg, napnoda iti sinamsamyo. 26 Bulsek a
Fariseo! Dalusam pay nga umuna ti uneg ti tasa, tapno nadalusto met ti
ruarna. 27 “Asikayo pay, dakay a mamaestro iti Linteg ken dakay a
Fariseo! Aginsisingpetkayo! Ta kaskayla napapudaw a tantanem a
napintas ti buyada iti ruar, ngem iti uneg napnoda iti tultulang ken
agruprupsa a bangkay dagiti natay. 28 Kasta met nga agpamarangkayo a
kas naimbag kadagiti amin a tao, ngem napno ti unegyo iti
kinamanaginsisingpet ken kinadakes.” 29 “Asikayo pay, dakayo a
mamaestro iti Linteg ken dakay a Fariseo! Aginsisingpetkayo!
Yaramidanyo dagiti profeta kadagiti napipintas a tantanem ken arkosanyo
dagiti monumento dagiti nagbiag a nalinteg. 30 Kunayo pay, ‘No addakam
la koma idi tiempo dagiti ammami dimi koma tinulongan ida a nagpapatay
kadagiti profeta.’ 31 No kasta, annugotenyo a nagtaudkayo iti kaputotan
dagiti nangpapatay kadagiti profeta! 32 Ala ngarud, leppasenyo ti inrugi
dagiti ammayo. 33 Karasaen! Annak dagiti uleg! Kasano ti pananglisiyo
iti dusa idiay infierno? 34 Isut’ gapuna nga ibagak kadakayo: Ibaonkonto
kadakayo dagiti profeta ken mamasirib ken mamaestro iti Linteg. Ngem
papatayenyonto ida wenno ilansayonto ida iti krus. Addanto dagiti
saplitenyo kadagiti sinagogayo ket addanto met dagiti kamaten ken
idadanesyo iti inilin-ili. 35 Iti kasta, madusakayto gapu iti pannakapapatay
dagiti nalinteg a tattao manipud ken ni Abel agingga ken ni Zacarias nga
anak ni Barakias a pinatayyo iti nagbaetan ti Templo ken ti altar. 36
Ibagak kadakayo ti pudno: Sagabaento daytoy a kaputotan ti dusa gapu
kadagitoy a kinadakes!” 37 “Jerusalem, Jerusalem a mangpapatay kadagiti
profeta ken mangubor kadagiti imbaon kenka ti Dios! Namin-anon a
kayatko nga arakupen dagiti annakmo a kas iti panangsallukob ti maysa
nga upa kadagiti piekna, ngem dimo met kayat. 38 Ita, mabaybay-an ken
aglangalangton ti Temployo. 39 Ibagak kadakayo a didakton makita
agingga a kunayo, ‘Bendisionan koma ti Dios ti umay iti nagan ti Apo!’ ”
Mateo 24
1 Rimmuar ni Jesus iti Templo. Nakaadayo bassiten idi immasideg
kenkuana dagiti adalan ket intudoda kenkuana dagiti pasdek ti Templo. 2
Kinunana kadakuada, “Wen, makitayo amin dagitoy ita. Ngem ibagak
kadakayo nga awanto ti uray maysa a bato ditoy a mabati iti yanna.
Marbadanto amin.” 3 Agtugtugaw ni Jesus idiay Bantay Olivo idi
umasideg kenkuana dagiti adalan. “Ibagam man kadakami no kaanonto a
mapasamak dagitoy?” sinaludsodda. “Anianto ti mapasamak a
mangipakita iti yaaymo ken iti panungpalan ti lubong?” 4 Insungbat ni
Jesus, “Agannadkayo, ket dikayo paallilaw. 5 Adunto ti umay ket
aramatendanto ti naganko a kunkunada, ‘Siak ti Cristo,’ ket adunto ti
allilawenda. 6 Mangngegyonto ti arimbangaw dagiti agdadangadang ken
damdamag maipapan kadagiti dadduma pay a gubgubat. Ngem dikay
agdanag. Masapul a mapasamak dagitoy ngem dina kayat a sawen a
dimtengen ti panungpalan. 7 Aggugubatto dagiti nasion; agririnnautto
dagiti pagarian. Addanto bisin ken ginggined iti amin a lugar. 8
Pangrugian laeng amin dagitoy ti panagsagaba a kas iti panangrugi ti
panagsagaba ti agpasngay. 9 “Matiliw ken mayawatkayto a madusa.
Mapapataykayto. Guraendakayto dagiti amin a tattao gapu kaniak. 10 Iti
dayta a tiempo, adunto dagiti mangtallikud iti pammatida. Aglilinniput
ken aggiginnuradanto. 11 Tumaudto dagiti adu a sinan-profeta a
mangyaw-awan kadagiti adu a tattao. 12 Kastanto ti panagsaknap ti
kinadakes, ket ti ayat dagiti adu a tattao lumamiisto. 13 Ngem
maisalakanto ti siasinoman a makaibtur agingga iti panungpalan. 14
Maikaskasabanto iti entero a lubong daytoy Naimbag a Damag maipapan
iti Pagarian kas pammaneknek iti sangkataoan. Kalpasanna, umayton ti
panungpalan.” 15 “Iti kasta, inton makitayo ‘Ti Nakabutbuteng a
Mangdadael’ nga agtakder iti nasantoan a lugar a kas insao ni profeta
Daniel (maawatan koma ti agbasa ti kaipapanan daytoy), 16 masapul a
kumamang dagiti adda idiay Judea kadagiti bambantay. 17 Umulog a
dagus ti adda iti tuktok ti balay ket saanen a sumrek iti balayna tapno
mangala iti uray ania a mabalinna nga itugot. 18 Ti adda iti taltalon saanen
nga agawid a mangala iti kagayna. 19 Kadagita nga aldaw, kakaasinto
dagiti masikog ken dagiti inna a di pay napusot dagiti annakda. 20
Dawatenyo iti Dios a saan koma nga iti tiempo ti nepnep wenno Aldaw a
Panaginana ti panagpakniyo! 21 Ta kadagita nga aldaw, nakarkaronto nga
adayo ti rigat ngem iti aniaman a napasamak manipud pannakaparsua ti
lubong agingga kadagitoy nga aldaw. Ket uray kaano awanton ti kastoy a
mapasamak. 22 Ngem kinissayan ti Dios ti bilang dagita nga al-aldaw, ta
no saan, awan ti makalasat. Ngem gapu kadagiti pinilina a tattao,
kissayanna ti bilang dagita nga al-aldaw. 23 “Daytoy ti gapuna a no adda
agkuna, ‘Kitaenyo, adda ditoy ti Cristo!’ wenno ‘Adda sadiay!’ diyo
patpatien. 24 Ta agparangto dagiti sinan-Cristo ken dagiti sinan-profeta,
ket agipakitadanto kadagiti datdatlag ken nakaskasdaaw a banag tapno, no
mabalin, yaw-awanda uray dagiti pinili ti Dios. 25 Denggenyo,
impakaammokon kadakayo dagitoy sakbay a mapasamakda. 26 “Wenno,
no kunada, ‘Kitaenyo, adda iti let-ang!’ dikay mapmapan sadiay. Ket no
kunada, ‘Kitaenyo, adda nga aglemlemmeng ditoy!’ diyo patpatien. 27 Ta
umayto ti Anak ti Tao a kas iti kapardas ti kimat nga aggilap iti daya nga
agpa-laud. 28 “Sadinoman a yan ti bangkay, sadiayto ti paguurnongan
dagiti agila.” 29 “Apaman a malpas dagita a rigrigat, agsipngetto ti init,
dinto agraniag ti bulan, agtinnagto dagiti bituen, ket mawarawaranto dagiti
pannakabalin iti tangatang. 30 Agparangto idiay langit ti pagilasinan iti
yaay ti Anak ti Tao. Ket agdung-awto dagiti amin a tattao ditoy daga inton
makitada ti Anak ti Tao iti rabaw dagiti ulep ti langit nga umay a napnoan
pannakabalin ken naindaklan a dayag. 31 Aguninto ti dakkel a trumpeta,
ket ibaonto ti Anak ti Tao dagiti anghelesna kadagiti uppat a suli ti lubong
sadanto urnongen dagiti tattao a pinili ti Dios, manipud iti maysa a pungto
ti daga agingga iti sabali.” 32 “Adalenyo ti sursuro a maadaw iti kayo nga
igos: no aguggot ket agrusingen dagiti bulongna, ammoyo nga agbaliwen
ti panawen. 33 Kasta met nga inton makitayo amin dagitoy, ammoyo nga
asidegen ti tiempo ket dandanin mangrugi. 34 Laglagipenyo a
mapasamakto amin dagitoy sakbay a matay amin a tattao iti daytoy a
kaputotan. 35 Mapukawto ti langit ken ti daga, ngem pulos a dinto
mapukaw dagiti saok.” 36 “Ngem no maipapan iti idadateng dayta nga
aldaw ken oras, awan ti makaammo—uray dagiti angheles sadi langit
wenno ti Anak. Ti laeng Ama ti makaammo. 37 Kas iti napasamak idi
tiempo ni Noe, kastanto met ti mapasamak inton umay ti Anak ti Tao. 38
Kas kadagidi aldaw sakbay ti Layus, nangnangan, nagiinum ken
nagaassawa dagiti tattao, agingga iti iseserrek ni Noe iti daong. 39 Dida
ammo ti mapaspasamak agingga idi umay ti Layus a nangyanud
kadakuada amin. Kastanto met ti mapasamak inton umay ti Anak ti Tao.
40 Iti dayta a tiempo, addanto dua a lallaki nga agtartrabaho iti talon:
maalanto ti maysa ket mabatinto ti kaduana. 41 Addanto dua a babbai nga
aggilgiling: maalanto ti maysa ket mabatinto ti kaduana. 42 Agsaganakayo
ngarud ta saanyo nga ammo ti aldaw a yaay ti Apoyo. 43 Laglagipenyo a
no ammo koma ti ama ti familia no kaano ti yaay ti mannanakaw, siririing
koma tapno saan a serken ti mannanakaw ti balayna. 44 Daytoy ti gapuna
a masapul a kanayon a sisasaganakayo, ta umayto ti Anak ti Tao iti tiempo
a diyo ipagpagarup.” 45 “Siasino ngarud ti mapagtalkan ken masirib nga
adipen? Isu ti insaad ti apona a mangimaton kadagiti dadduma nga adipen
tapno ikkanna ida iti kanen iti umisu a tiempo. 46 Nagasat dayta nga
adipen no masangpetan ti apona a kasta ti ar-aramidenna. 47 Wen, ibagak
kadakayo, isaadto ti apo daytoy nga adipen a mangaywan iti amin a
sanikuana. 48 Ngem no isu ket dakes nga adipen, kunananto iti bagina:
‘Mabayag pay ti isasangpet ti apok.’ 49 Pangpang-orenna dagiti padana
nga adipen sa makipangan ken makiinum kadagiti mammartek. 50
Sumangpetto ti apona iti aldaw a dina ipagpagarup ken iti oras a dina
ammo. 51 Dusaento ti apona iti nadagsen ket mairamanto iti
kinadaksanggasat dagiti aginsisingpet. Sadiay, agsangit ken
agngaretngetto.”
Mateo 25
1 “Inton dumteng dayta nga aldaw, mayarigto ti Pagarian ti Langit iti
kastoy: Adda idi sangapulo a babbalasang a nangala kadagiti
pagsilawanda tapno mapanda sabten ti nobio. 2 Lima ti maag, ket lima met
ti masirib. 3 Intugot dagiti maag ti pagsilawanda ngem awan reserbada a
lana. 4 Ngem nangitugot dagiti masirib iti reserba a lana, malaksid ti adda
kadagiti pagsilawanda. 5 Gapu ta naladaw ti isasangpet ti nobio, nagtuglep
dagiti babbalasang ket nakaturogda. 6 “Iti tengnga ti rabii, adda
nangipukkaw: ‘Adtoyen ti nobio! Umayyo sabtenen!’ 7 “Bimmaringkuas
dagiti babbalasang ket insaganada dagiti pagsilawanda. 8 “‘Ikkandakam
man iti lanayo ta maiddepen ti silawmi,’ kinuna dagiti maag kadagiti
masirib. 9 “‘Saan!’ insungbat dagiti masirib. ‘Amangan no awan ti
umanay a para kadatayo amin. Inkay la gumatangen iti para kadakayo.’ 10
“Napan ngarud gimmatang dagiti maag iti lana. Ngem bayat ti kaawanda,
simmangpet ti nobio. Kimmuyog kenkuana dagiti nakasagana a
babbalasang a simrek iti pagbodaan ket naserraan ti ridaw. 11 “Iti saan a
mabayag, simmangpet dagiti maag. ‘Apo, Apo!’ kinunada. ‘Pastrekendaka
man.’ 12 “ ‘Ngem saankayo met nga am-ammo!’ insungbat ti nobio.” 13
Kamaudiananna, kinuna ni Jesus: “Agsaganakayo ngarud ta diyo ammo ti
aldaw wenno ti oras.” 14 “Iti dayta a tiempo, mayarigto ti Pagarian ti
Langit iti kastoy: Adda idi maysa a tao a mapan agbiahe. Inayabanna
dagiti adipenna ket intalekna kadakuada ti sanikuana. 15 Inikkanna ti
maysa iti lima a talento, ti maikadua, dua a talento, ket ti maikatlo, maysa
a talento, kas mayannatup iti kabaelan ti tunggal maysa. Kalpasanna,
nagbiahen. 16 “Ti adipen nga immawat iti lima a talento pinagnegosiona a
dagus ti inawatna, ket nakaganansia iti lima. 17 Kasta met ti inaramid ti
adipen nga immawat iti dua a talento. Nakaganansia iti dua a talento. 18
Ngem ti adipen nga immawat iti maysa a talento napanna inkali ti kuarta
ni amongna. 19 “Kalpasan ti nabayag a tiempo, simmangpet ti among
dagiti adipen ket nakikuenta kadakuada. 20 Napan kenkuana daydi
naikkan iti lima a talento ket inyawatna ti sangapulo a talento. ‘Apo,’
kinunana, ‘inikkannak idi iti lima a talento. Kitaem, lima a talento pay ti
naganansiak.’ 21 “‘Nasayaat ti inaramidmo, naimbag ken mapagtalkan
nga adipen!’ kinuna ti amongna. ‘Gapu ta napagtalkanka iti bassit a banag,
pagaywanenkanto iti adu. Umayka makipagragsak kaniak.’ 22 “Napan met
daydi adipen a nakaawat iti dua a talento ket kinunana, ‘Apo, inikkannak
idi iti dua a talento ket adtoy pay ti dua a naganansiak.’ 23 “Kinuna ti
amongna, ‘Nasayaat ti inaramidmo, naimbag ken mapagtalkan nga adipen!
Gapu ta napagtalkanka iti bassit a banag, pagaywanenkanto iti adu.
Sumrekka a makipagragsak kaniak.’ 24 “Kalpasanna, napan met daydi
adipen a naikkan iti maysa a talento. ‘Apo, ammok a naingetka,’ kinunana.
‘Agburaska iti dimo minulaan ket aganika iti dimo rinaepan. 25
Nagbutengak isu nga inkalik ti kuarta nga intedmo. Ne, isublikon ti
kukuam.’ 26 “Kinuna ti amongna, ‘Dakeska nga adipen! Sadut! Ammom
la ngaruden nga agburasak iti diak minulaan ken aganiak iti diak rinaepan.
27 Indepositom koma iti bangko ti intedko tapno ita ta simmangpetakon,
isublim agraman ti interesna.’ 28 Kinunana kadagiti dadduma, ‘Alaenyo
ngarud ti kuarta nga adda kenkuana ket itedyo iti adipen nga addaan iti
sangapulo a talento. 29 Ta ad-adunto ti maited iti addaan ket
agsobsobraanto; ngem iti awanan, uray pay ti bassit nga adda kenkuana,
maikkatto. 30 Ket daytoy awan serserbina nga adipen, ipurruakyo iti
kasipngetan. Sadiay, agsangit ken agngaretngetto.’ ” 31 “Inton umay ti
Anak ti Tao a kas Ari a kuyogen dagiti amin nga angheles, agtugawto iti
nadayag a tronona. 32 Matipontiponto amin a nasion iti sangoananna.
Paglasinennanto ida iti dua a grupo a kas iti panamaglalasin ti agay-aywan
kadagiti karnero ken kalding. 33 Ikabilnanto dagiti naimbag iti
makannawanna, ket dagiti dakes iti makannigidna. 34 Kalpasanna,
kunanto ti Ari kadagiti tattao iti makannawanna: ‘Umaykayo, dakayo a
binendisionan ni Amak! Awatenyo ti pagarian a naisagana para kadakayo
manipud pannakaparsua ti lubong. 35 Ta nabisinanak ket pinakandak;
nawawak ket pinainumdak; immayak a kas ganggannaet ket
pinadagusdak. 36 Idi lamolamoak, binadoandak; nagsakitak ket
inaywanandak; naibaludak ket binisitadak.’ 37 Isungbatto kenkuana dagiti
nalinteg: ‘Kaano, Apo, ti pannakakitami kenka a mabisin ket pinakandaka
wenno mawaw ket pinainumdaka? 38 Kaano ti pannakakitami kenka a
ganggannaet ket pinadagusdaka wenno lamolamo ket binadoandaka? 39
Kaano ti pannakakitami kenka a masakit wenno balud ket binisitadaka?’
40 Kunanto ti Ari, ‘Ibagak kadakayo: no inaramidyo daytoy iti
kanunumoan kadagitoy a kakabsatko, inaramidyo met kaniak!’ 41
“Kunananto kadagiti adda iti makannigidna: ‘Umadayokayo kaniak,
dakayo nga inlunod ti Dios! Inkayo iti agnanayon nga apuy a naisagana iti
Diablo ken kadagiti anghelesna. 42 Nabisinanak ngem didak pinakan;
nawawak ngem didak pinainum; 43 maysaak idi a ganggannaet ngem
didak pinadagus; lamolamoak ngem didak binadoan; nagsakit ken
naibaludak ngem didak sinarungkaran.’ 44 Isungbatdanto: ‘Kaano, Apo, ti
pannakakitami kenka a mabisin wenno mawaw, a ganggannaet wenno
lamolamo, a masakit wenno balud ket didaka tinulongan?’ 45 Isungbatto ti
Ari, ‘Ibagak kadakayo: No diyo tinulongan ti maysa kadagitoy
kanunumoan a kakabsatko, didak met tinulongan.’ 46 Ngarud, dagitoyto ti
mapan iti agnanayon a pannakadusa. Ngem mapanto dagiti nalinteg iti
agnanayon a biag.”
Mateo 26
1 Idi nalpasen nga insuro ni Jesus amin dagitoy a bambanag, kinunana
kadagiti adalanna, 2 “Ammoyo a dua nga aldaw laengen sakbay ti Fiesta ti
Paskua. Mayawatto ti Anak ti Tao tapno mailansa iti krus.” 3 Naguurnong
dagiti panguloen a papadi ken dagiti panglakayen dagiti Judio iti palasio ni
Caifas a Kangatoan a Padi. 4 Nagtutulaganda a tiliwen a sililimed ni Jesus
sada papatayen. 5 “Ditay iranrana iti fiesta, amangan no rumsua ti
riribuk,” kinunada. 6 Adda idi ni Jesus idiay Betania, iti balay ni Simon
nga agkukutel. 7 Idi madama a mangmangan, napan kenkuana ti maysa a
babai a nakaiggem iti sangabotelia a nangina a bangbanglo, ket
imbukbokna iti ulo ni Jesus. 8 Nakapungtot dagiti adalan idi makitada ti
inaramidna ket kinunada, “Apay a sinayangna ti bangbanglo? 9 Nangina
koma ti pakailakoanna sa maited ti kuarta kadagiti napanglaw!” 10 Ammo
ni Jesus ti sasawenda isu a kinunana kadakuada, “Apay a babalawenyo
daytoy a babai? Nasayaat unay ti inaramidna kaniak. 11 Ta kankanayon
nga adda dagiti napanglaw iti dennayo, ngem saan a kankanayon nga
addaak iti arpadyo. 12 Imbukbokna iti bagik daytoy a bangbanglo tapno
isagananak a maitanem. 13 Kinapudnona, kunak kadakayo: Sadinoman a
pakaikaskasabaan daytoy Naimbag a Damag, masarsaritanto ti inaramid
daytoy a babai a pakalaglagipan kenkuana.” 14 Kalpasan daytoy, maysa
kadagiti sangapulo ket dua nga adalan nga agnagan iti Judas Iscariote ti
napan kadagiti panguloen dagiti papadi. 15 “Ania ti itedyo kaniak no
yawatko ni Jesus kadakayo?” kinunana. Inikkanda iti tallopulo a bagi ti
pirak. 16 Manipud iti dayta a kanito, binirbirok ni Judas ti gundawayna a
mangliput ken Jesus. 17 Iti umuna nga aldaw ti Fiesta ti Tinapay nga awan
Lebadurana, napan dagiti adalan ken ni Jesus ket sinaludsodda, “Sadino ti
kayatmo a pangisaganaanmi iti pangrabiim iti Paskua?” 18 Kinunana
kadakuada, “Inkayo iti maysa a tao iti siudad ket ibagayo kenkuana, ‘Kuna
ti Maestro: Dimtengen ti orasko. Ditanto balaymo ti pangrambakanmi iti
Paskua kadagiti adalak.’ ” 19 Tinungpal dagiti adalan ti imbilin ni Jesus
ket insaganada ti pangrabii a pangrambak iti Paskua. 20 Idi rumabiin,
simmango ni Jesus ken dagiti sangapulo ket dua nga adalan iti panganan.
21 Bayat ti pannanganda, kinuna ni Jesus, “Ibagak kadakayo ti pudno:
maysanto kadakayo ti mangliput kaniak.” 22 Kasta unay ti pannakariribuk
dagiti adalan ket maysa-maysa nagsaludsod kenkuana, “Apo, siak kad
dayta kunkunam?” 23 “Ti kinagiddanko a nangisawsaw ti tinapay iti
malukong, isunto ti mangliput kaniak,” insungbat ni Jesus. 24 “Matayto ti
Anak ti Tao kas kuna ti Nasantoan a Surat, ngem asi pay ti mangliputto iti
Anak ti Tao! Naim-imbag pay koma no di nayan-anak dayta a tao.” 25
Nagsao ni Judas a nangliput kenkuana: “Maestro, siak kadi ti kunam?”
“Nasaomon!” insungbat ni Jesus. 26 Idi mangmanganda, nangala ni Jesus
iti tinapay, nagyaman iti Dios, ket pinisina sana inted kadagiti adalanna.
“Alaenyo daytoy ket kanenyo,” kinunana. “Daytoy ti bagik.” 27
Kalpasanna, nangala iti kopa, nagyaman iti Dios, sana inyawat kadakuada.
Kinunana, “Uminumkayo amin iti daytoy; 28 daytoy ti darak a
mamatalged iti tulag ti Dios, ti darak a naibuyat nga agpaay iti adu a tao,
tapno mapakawan dagiti basbasol. 29 Ibagak kadakayo: Diakto uminumen
iti arak ti ubas agingga iti dayta nga aldaw a pannakiinumko kadakayo iti
baro nga arak ti ubas idiay Pagarian ni Amak.” 30 Kalpasan ti
panangkantada iti maysa nga himno, rimmuarda a napan idiay Bantay
Olivo. 31 Kinuna ni Jesus kadakuada, “Iti daytoy met la a rabii,
panawandakto, dakay amin, agsipud ta kuna ti Nasantoan a Surat,
‘Patayento ti Dios ti agpaspastor ket mawarawaranto ti arban dagiti
karnero.’ 32 Ngem kalpasan ti pannakapagungarko, umun-unaakto ngem
dakayo a mapan idiay Galilea.” 33 “Uray panawandakanto amin,” kinuna
ni Pedro, “dikanto panawan.” 34 Kinuna ni Jesus kenkuana, “Laglagipem
daytoy: Sakbay nga agtaraok ti kawitan ita a rabii, namitlonton nga
imbagam a dinak am-ammo!” 35 “Uray matayak a mairaman kenka,”
insungbat ni Pedro, “pulos a dikanto ilibak.” Kasta met ti kinuna dagiti
amin nga adalan. 36 Kalpasanna, napan ni Jesus ken dagiti adalanna iti
maysa a disso a managan Getsemani. Kinunana kadakuada:
“Agtugawkayo ditoy, ta innak agkararag sadiay.” 37 Inkuyogna ni Pedro
ken dagiti dua nga annak ni Zebedeo. Nagladingit ken nagtuok iti
napalalo. 38 “Matayak iti nakaro a ladingit,” kinunana kadakuada.
“Agbatikayo ditoy ket makipagpuyatkayo kaniak.” 39 Immadayo bassit sa
nagpakleb iti daga ket nagkararag: “Ama, no mabalin, ilisinak iti daytoy a
kopa ti panagsagaba. Nupay kasta, saan a ti pagayatak ti maaramid no di
ket ti pagayatam.” 40 Nagsubli ni Jesus kadagiti tallo nga adalan ket
nadanonna ida a matmaturog. Kinunana ken ni Pedro: “Diyo aya kabaelan
ti makipagpuyat kaniak iti uray maysa la nga oras? 41 Agridam ken
agkararagkayo tapno saankay a matnag iti sulisog. Sisasagana ti espiritu,
ngem nakapuy ti lasag.” 42 Immadayo manen ni Jesus tapno mapan
agkararag. “Ama,” kinunana, “no masapul nga inumek daytoy a kopa ti
panagsagaba, maaramid koma ti pagayatam.” 43 Nagsubli manen kadagiti
adalan ket nadanonna ida a matmaturog, ta makaturturogda la unay. 44
Pinanawan manen ni Jesus ida sa napan nagkararag iti maikatlo a daras.
Inulitna ti kararagna. 45 Kalpasanna, nagsubli kadagiti adalan ket
kinunana: “Ania? Matmaturog ken agin-inanakayo pay kadi? Dimtengen ti
oras a mayawat ti Anak ti Tao iti ima dagiti managbasol. 46
Bumangonkayo ta intayon. Kitaenyo, adtoyen ti tao a mangliput kaniak.”
47 Agsasao pay laeng ni Jesus idi sumangpet ni Judas, maysa kadagiti
sangapulo ket dua nga adalan. Kimmuyog kenkuana dagiti adu a tao a
nagtagikampilan ken nagtagipang-or. Imbaon ida dagiti panguloen a
papadi ken dagiti panglakayen dagiti Judio. 48 Daytoy ti pagilasinan nga
inted ti mangliput kadagiti kimmuyog kenkuana sakbay a mapanda:
“Daydiay ungngoak isu ti masapulyo. Tiliwenyo!” 49 Immasideg a dagus
ni Judas ken ni Jesus ket kinunana, “Naimbag a rabiim, Maestro,” sana
inagkan. 50 “Gayyem,” insungbat ni Jesus, “dagdagusem nga aramiden ti
panggepmo!” Immasideg dagiti tattao, ket tiniliwda ni Jesus. 51 Inasut ti
maysa kadagiti kadua ni Jesus ti bunengna sana tinagbat ti adipen ti
Kangatoan a Padi ket napingasan ti lapayagna. 52 Ngem kinuna ni Jesus,
“Idulinmo ta bunengmo agsipud ta ti mangaramat iti buneng matayto iti
buneng. 53 Dimo aya ammo a mabalinko ti agpatulong ken ni Amak ket
ibaonna a dagus ti nasurok a sangapulo ket dua nga armada dagiti
angheles? 54 Ngem no maaramid dayta, kasano ti pannakatungpal ti kuna
ti Nasantoan a Surat a masapul a kastoy ti mapasamak?” 55 “Tulisanak
aya, ta nagtagikampilan ken nagtagipang-orkayo nga umay mangtiliw
kaniak?” kinuna ni Jesus kadagiti tattao. “Inaldaw nga agtugtugawak a
mangisursuro idiay Templo ket didak tiniliw. 56 Ngem maaramid amin
dagitoy tapno matungpal ti sinao dagiti profeta a nailanad iti Nasantoan a
Surat.” Nagtataray amin dagiti adalan ket binaybay-anda ni Jesus. 57
Kalpasan ti panangtiliwda ken ni Jesus, impanda iti balay ni Caifas a
Kangatoan a Padi, a naguurnongan dagiti mamaestro iti Linteg ken dagiti
panglakayen. 58 Simmurot ni Pedro nga adda iti adayo, agingga iti
paraangan ti balay ti Kangatoan a Padi. Simrek a nakikatugaw kadagiti
guardia tapno kitaenna ti pagbanagan ti amin. 59 Nagbirbirok dagiti
panguloen a papadi ken ti entero a Sanhedrin iti ulbod a pammaneknek a
maibusor ken Jesus tapno papapatayda. 60 Ngem awan ti nasarakanda,
nupay adu ti nagsao iti ulbod a maikontra kenkuana. Kamaudiananna,
timmakder ti dua a tao 61 a nagkuna, “Kinuna daytoy a tao a kabaelanna a
rebbaen ti Templo ti Dios, ket bangonenna met laeng kalpasan ti tallo nga
aldaw.” 62 Timmakder ti Kangatoan a Padi ket kinunana ken Jesus, “Ania
ti maisungbatmo kadagitoy nga ipabpabasolda kenka?” 63 Ngem
nagulimek ni Jesus. Kinuna manen kenkuana ti Kangatoan a Padi,
“Isapatam iti nagan ti sibibiag a Dios ket ibagam kadakami no sika ti
Cristo nga Anak ti Dios.” 64 “Nasaomon!” insungbat ni Jesus. “Ngem
kunak kadakayo amin: Makitayonto ti Anak ti Tao a situtugaw iti
makannawan ti Mannakabalin-amin. Makitayonto nga umay kadagiti ulep
ti langit.” 65 Iti kasta, rinay-ab ti Kangatoan a Padi ti pagan-anayna. “In-
insultoenna ti Dios! Ania pay la ti pakasapulantayo kadagiti saksi?”
kinunana. “Nangngegyon dagiti saona a maikaniwas iti Dios. 66 Ania ti
pangngeddengyo?” “Nakabasol,” insungbatda. “Masapul a matay!” 67 Ket
tinupratupraanda ti rupana ken dinanogdanogda. Tinungpatungpa met
dagiti dadduma. 68 “Pugtoam man, Cristo, no siasino ti nangtungpa
kenka?” kinunada. 69 Agtugtugaw ni Pedro iti paraangan idi umasideg
kenkuana ti maysa nga adipen a babai a nagkuna: “Uray sika,
nakikadkaduaka met ken ni Jesus a taga-Galilea.” 70 Ngem naglibak ni
Pedro iti sangoananda amin. “Diak ammo ti sasawem,” kinunana. 71
Rimmuar ni Pedro a nagturong iti ruangan. Nakita ti sabali nga adipen a
babai ket kinunana kadagiti tattao sadiay, “Nakikuykuyog met daytoy a
tao ken ni Jesus a taga-Nazaret.” 72 Naglibak manen ni Pedro ket
kinunana: “Isapatak a diak am-ammo dayta a tao.” 73 Iti saan a mabayag,
immasideg kenkuana dagiti tattao nga agtatakder sadiay. “Agpayso a
maysaka kadakuada,” kinunada. “Dayta bengngatmo ti pakailasinan.” 74
“Uray dusaennak ti Dios no saan a pudno ti ibagbagak!” insapata ni Pedro.
“Diak am-ammo dayta a tao.” Pagammoan, nagtaraok ti maysa a kawitan,
75 ket nalagip ni Pedro ti imbaga ni Jesus kenkuana: “Sakbay ti
panagtaraok ti kawitan, namitlonton nga imbagam a dinak am-ammo!”
Rimmuar ni Pedro ket nagsangit iti nasaem.
Mateo 27
1 Idi bumigaten, nagtutulag dagiti amin a panguloen a papadi ken dagiti
panglakayen dagiti Judio a papatayenda ni Jesus. 2 Pinungoda sada napan
inyawat ken ni Pilato a gobernador. 3 Idi naammoan ni Judas a nangliput a
naikeddeng a madusa ni Jesus, nagbabawi ket insublina ti tallopulo a bagi
ti pirak kadagiti panguloen a papadi ken kadagiti panglakayen. 4
“Nagbasolak!” kinunana, “ta inyawatko a mapapatay ti maysa a tao nga
awan basolna.” “Ania ti bibiangmi?” kinunada kenkuana. “Problemam
daytan.” 5 Impurruak ni Judas dagiti tallopulo a bagi ti pirak iti uneg ti
Templo. Kalpasanna, napanna pinatay ti bagina babaen iti panagbitayna. 6
Pinidut dagiti panguloen a papadi dagiti pirak. “Daytoy a kuarta ti bayad ti
biag ti maysa a tao,” kinunada. “Iparit ti Lintegtayo a maikabil iti kaha ti
Templo.” 7 Kalpasan ti panagtutulagda, inggatangda ti kuarta iti “Daga ti
Agdamdamili” nga agpaay a kamposanto dagiti ganggannaet. 8 Isut’
gapuna a maaw-awagan pay laeng dayta a talon iti “Daga ti Dara” agpapan
kadagitoy nga aldaw. 9 Natungpal ti sinao ni profeta Jeremias, “Innalada
dagiti 30 a bagi ti pirak, ti gatad a nagnunumoan dagiti Israelita a pateg ti
biagna, 10 ket inggatangda iti daga ti agdamdamili, kas imbilin kaniak ti
Apo.” 11 Nagtakder ni Jesus iti sangoanan ti gobernador a nangusisa
kenkuana. “Sika kadi ti Ari dagiti Judio?” sinaludsodna. “Nasaomon,”
insungbat ni Jesus. 12 Ngem idi pagsaludsodan dagiti panguloen a papadi
ken dagiti panglakayen, dina sinungbatan dagiti pammabasolda kenkuana.
13 Isut’ gapuna a kinuna ni Pilato kenkuana, “Dimo aya mangngeg dagiti
ipabpabasolda kenka?” 14 Ngem pulos nga awan insungbat ni Jesus ket
kasta unay ti siddaaw ti gobernador. 15 Tunggal Fiesta ti Paskua,
kadawyan ti gobernador a wayawayaan ti uray siasinoman a balud a
dawaten dagiti tattao. 16 Iti dayta a tiempo, adda maysa nga agdindinamag
a balud nga agnagan iti Jesus Barrabas. 17 Idi naguurnong dagiti tattao,
sinaludsod kadakuada ni Pilato: “Siasino ti kayatyo a wayawayaak? Ni
Jesus Barrabas wenno ni Jesus a maaw-awagan iti Cristo?” 18 Ammo
ngamin ni Pilato nga inyawatda kenkuana ni Jesus gapu iti apalda. 19
Maysa pay, idi agtugtugaw ni Pilato iti pangukoman, pinaibaga ti asawana
daytoy: “Dimo pakibiangan dayta nalinteg a tao, ta natagtagainepko idi
rabii a nagsagabaak iti kasta unay gapu kenkuana.” 20 Dinurogan dagiti
panguloen a papadi ken dagiti panglakayen dagiti tattao tapno dawatenda
ken ni Pilato a wayawayaanna ni Barrabas ket papapatayna ni Jesus. 21
Ngem sinaludsod manen kadakuada ti gobernador: “Siasino kadagiti dua ti
kayatyo a wayawayaak?” “Ni Barrabas!” insungbatda. 22 “Ania ngarud ti
aramidek ken ni Jesus a maaw-awagan iti Cristo?” sinaludsod ni Pilato.
“Ilansam iti krus,” kinunada amin. 23 Nagsaludsod manen ni Pilato
kadakuada: “Ania kadi ti basolna?” “Ilansam iti krus,” inyad-addada ketdi
nga impukkaw. 24 Agsipud ta awanen ti maaramid ni Pilato, ket
madlawna nga adda rumsua a riribuk, nangala iti danum sana binuggoan
dagiti imana iti sangoanan dagiti tattao. “Awan ti pakaibiangak iti
pannakapapatay daytoy a tao,” kinunana. “Makaammokayo ditan.” 25
“Bay-am ta dakami ken dagiti annakmi ti mangsungbat iti
pannakapapatayna,” kinuna dagiti tattao. 26 Kalpasanna, winayawayaanna
ni Barrabas. Pinasaplitna ni Jesus sana inyawat kadagiti soldado tapno
ilansada iti krus. 27 Innala dagiti soldado ti gobernador ket inserrekda ni
Jesus iti Pretorio. Inaribungbongan ti amin a soldado ti kompania. 28
Inuksobda ti pagan-anayna sada kinagayan iti nalabaga a lupot. 29
Nagaramidda iti korona a sisiitan ket imbalangatda kenkuana.
Impaiggemda ti maysa a runo iti makannawan nga imana.
Nagparintumengda iti sangoananna sada nagang-angawan. “Agbiag ti Ari
dagiti Judio!” kinunkunada. 30 Tinupratupraanda. Innalada ti runo
kenkuana ket imbautda iti ulona. 31 Idi nalpasdan a nagangangawan,
inikkatda ti kagay, ket imbadoda met laeng kenkuana ti pagan-anayna.
Kalpasanna, inruarda tapno ilansada iti krus. 32 Idi rummuarda iti siudad,
nasabatda ti maysa a lalaki nga agnagan Simon a taga-Cirene. Pinilitda a
mangawit iti krus ni Jesus. 33 Dimtengda iti maysa a disso a managan
Golgota, kayatna a sawen “Lugar ti Bangabanga.” 34 Inikkanda ni Jesus
iti arak a nalaokan iti apro, ngem idi naramananna, dina ininum. 35
Inlansada ni Jesus iti krus. Nagbibingayanda ti pagan-anayna babaen iti
panagbibinnunotda 36 sada nagtugaw a mangbantay kenkuana. 37 Iti
ngatoen ti ulona, naisurat ti naipabasol kenkuana: “Daytoy ni Jesus nga
Ari dagiti Judio.” 38 Inlansada met ti dua a tulisan kadagiti krusda: maysa
iti makannawan ni Jesus ket ti sabali iti makannigidna. 39
Winingwingiwingan dagiti aglabas ken linalaisda ni Jesus: 40
“Kinunkunam a rebbaem ti Templo samo bangonen met laeng iti uneg ti
tallo nga aldaw. No Anaknaka ti Dios, isalakanmo man ta bagim ket
bumabaka iti krus!” 41 Nakipagang-angaw met dagiti panguloen a papadi,
dagiti mamaestro iti Linteg ken dagiti panglakayen. 42 “Insalakanna dagiti
dadduma ngem dina maisalakan ti bagina!” kinunkunada. “Di met aya isu
ti Ari ti Israel? No bumaba ita iti krus, mamatitayo kenkuana. 43 Agtalek
iti Dios ken kunana nga isu Anak ti Dios. Kitaentayo man ngarud no kayat
ti Dios nga isalakan ita!” 44 Kasta met ti pananglalais kenkuana dagiti
tulisan a kinagiddanna a nailansa iti krus. 45 Iti tengnga ti aldaw,
nagsipnget iti entero a daga ket nagpaut iti tallo nga oras. 46 Idi dandani
alas tres iti malem, impukkaw ni Jesus iti napigsa a timek: “Eli, Eli, lema
sabachthani?” kayatna a sawen: “Diosko, Diosko, apay a binaybay-
annak?” 47 Nangngeg daytoy ti sumagmamano nga adda sadiay ket
kinunada: “Denggenyo, ay-ayabanna ni Elias!” 48 Nagtaray a dagus ti
maysa kadakuada a napan nangala iti espongha. Impasagepsepna iti
naalsem nga arak sana inkabil iti sukdal tapno ipasepsepna ken ni Jesus.
49 Ngem kinuna ti dadduma: “Bay-am, kitaentayo man no umay isalakan
ni Elias.” 50 Nagpukkaw manen ni Jesus iti napigsa ket nauyosen ti
biagna. 51 Napigis ti kurtina a naibengbeng iti Templo: naggudua
manipud iti ngato agingga iti baba. Nagginggined, naburburak dagiti bato,
52 naglukat dagiti tanem, ket napagungar dagiti adu a nasantoan a tattao.
53 Rimmuarda kadagiti tanem ket kalpasan ti panagungar ni Jesus,
napanda iti Nasantoan a Siudad a nakakitaan kadakuada dagiti adu a
tattao. 54 Nagbuteng ti kapitan ken dagiti soldadona a mangbambantay
ken ni Jesus idi mariknada ti ginggined ken makitada ti amin a napasamak.
Kinunada, “Pudno gayam nga Anak ti Dios daytoy!” 55 Iti pangadaywen
bassit, kumitkita dagiti adu a babbai. Isuda dagiti simmursurot ken
nagserserbi ken ni Jesus manipud Galilea. 56 Adda kadagitoy da Maria
Magdalena, Maria nga ina da Santiago ken Jose ken ti asawa ni Zebedeo.
57 Idi sumipngeten, simmangpet ti maysa a baknang nga agnagan iti Jose
a taga-Arimatea ken adalan met ni Jesus. 58 Napan ken ni Pilato ket
dinawatna ti bangkay ni Jesus. Imbilin ni Pilato a maited ti bangkay ken ni
Jose. 59 Innala ngarud ni Jose ti bangkay, binungonna iti baro a linen a
lupot, 60 ket inkabilna iti tanem a naikungkong iti bato nga agpaay koma
kenkuana. Kalpasanna, nangitulid iti dakkel a bato a pinangserrana iti
tanem sa pimmanaw. 61 Adda sadiay da Maria Magdalena ken sabali pay
a Maria a nakatugaw iti sangoanan ti tanem. 62 Iti sumuno nga aldaw,
kayatna a sawen, kalpasan ti Aldaw a Panagsagana, nakiuman ken ni
Pilato dagiti panguloen a papadi ken dagiti Fariseo. 63 “Apo,” kinunada,
“malagipmi nga idi sibibiag pay dayta a mangal-allilaw, kinunana a
mapagungarto kalpasan ti tallo nga aldaw. 64 Ibilinmo ngarud a
maguardiaan a naimbag ti tanem agingga iti maikatlo nga aldaw amangan
no mapan takawen dagiti adalanna ti bangkay sadanto ibaga kadagiti tattao
a napagungar ni Jesus. Ta no kasta ti mapasamak, dakdakesto ti maudi a
panangallilaw ngem ti immuna.” 65 “Mangalakayo iti guardia,” kinuna ni
Pilato, “ket pabantayanyo a naimbag ti tanem.” 66 Iti kasta, pimmanawda
ket napanda sinerraan a naimbag ti tanem babaen iti panangmarkada iti
bato a rikepna, ket nangibatida kadagiti soldado a mangguardia.
Mateo 28
1 Kalpasan ti Aldaw a Panaginana, idi pumarbangon iti umuna nga aldaw
ti lawas, napan kinita ni Maria Magdalena ken ti sabali a Maria ti
nakaitaneman ni Jesus. 2 Pagammoan, nagginggined iti napigsa. Bimmaba
ti maysa nga anghel ti Apo manipud langit. Tinulidna ti bato a naiserra iti
tanem sana nagtugawan. 3 Makapurar a kasla kimat ti langana ken
nakapudpudaw ti pagan-anayna. 4 Nagtigerger dagiti guardia gapu iti
butengda ket kasla natay ti langada. 5 Nagsao ti anghel kadagiti babbai.
“Dikay agbuteng,” kinunana. “Ammok a sapsapulenyo ni Jesus a nailansa
iti krus. 6 Awan ditoyen; nagungaren kas iti kinunana. Umayyo kitaen ti
lugar a nagiddaanna. 7 Kalpasanna, inkay ipakaammo a dagus kadagiti
adalanna a nagungaren. Umun-unanto ngem dakayo a mapan idiay
Galilea. Makitayonto sadiay! Tandaananyo daytoy imbagak kadakayo.” 8
Nagdardarasda a pimmanaw iti tanem. Nupay sibubutengda, napnoanda iti
rag-o. Ket nagtartarayda a napan nangipakaammo iti damag kadagiti
adalanna. 9 Pagammoan, sinabat ida ni Jesus ket kinablaawanna ida.
Immasidegda kenkuana ket inarakupda dagiti sakana sada nagdaydayaw
kenkuana. 10 “Dikay agbuteng,” kinuna ni Jesus. “Inkay ibaga kadagiti
kakabsatko a mapanda idiay Galilea ket makitadakto sadiay.” 11
Kabayatanna, idi nakapanawen dagiti babbai, napan iti siudad ti
sumagmamano kadagiti soldado a nagguardia iti tanem, ket impadamagda
kadagiti panguloen a papadi ti amin a napasamak. 12 Nakiuman dagiti
panguloen a papadi kadagiti panglakayen. Kalpasan ti panagtutulagda,
inikkanda dagiti soldado iti adu a kuarta 13 sada imbilin, “Ibagayo
kadagiti tattao nga immay dagiti adalanna iti rabii ket tinakawda ti
bangkayna idi matmaturogkayo. 14 No maammoan daytoy ti gobernador,
dakamto ti makisarita kenkuana tapno awan ti pakaan-anoanyo.” 15 Iti
kasta, innala dagiti guardia ti kuarta ket inaramidda ti naibaga nga
aramidenda. Daytoy ti damag a nagwaras kadagiti Judio agpapan
kadagitoy nga aldaw. 16 Napan dagiti sangapulo ket maysa nga adalan iti
bantay idiay Galilea nga imbaga ni Jesus a papananda. 17 Idi makitada ni
Jesus, nagdaydayawda kenkuana, numan pay nagduadua ti sumagmamano
kadakuada. 18 Immasideg ni Jesus ket kinunana, “Naited kaniak ti amin a
pannakabalin idiay langit ken ditoy daga. 19 Inkay ngarud kadagiti amin a
tattao iti amin a lugar, ket pagbalinenyo ida nga adalak: buniaganyo ida iti
nagan ti Ama, ti Anak ken ti Espiritu Santo, 20 ken isuroyo ida nga
agtungpal kadagiti amin nga imbilinko kadakayo. Laglagipenyo nga
addaakto nga agnanayon kadakayo agingga iti panungpalan ti lubong.”
Marcos 1
1 Daytoy ti pangrugian ti Naimbag a Damag maipapan ken ni Jesu-Cristo
nga Anak ti Dios, 2 kas nailanad iti libro ni profeta Isaias: “‘Sakbay a
mapanka,’ kinuna ti Dios, ‘adtoy ti ibaonko a mangisagana iti dalanmo.’ 3
Idiay let-ang, adda mangipukpukkaw: ‘Isaganayo ti dalan ti Apo,
pasayaatenyo ti pagnaanna!’” 4 Nagparang ni Juan idiay let-ang a
namumbuniag ken nangaskasaba. Impakaammona kadagiti tattao nga
agbabawida kadagiti basbasolda ken mabuniaganda tapno pakawanen ti
Dios dagiti basbasolda. 5 Adu ti napan nagdengngeg kenkuana.
Naggapuda iti entero a probinsia ti Judea ken iti siudad ti Jerusalem.
Nagbabawida a silalatak kadagiti basbasolda ket binuniagan ida ni Juan
idiay karayan Jordan. 6 Naaramid iti dutdot ti kamelio ti kawes ni Juan.
Lalat ti barikesna. Dudon ken diro ti pinagbibiagna. 7 “Sumarsaruno
kaniak ti addaan iti dakdakkel a pannakabalin ngem siak,” impakaammona
kadagiti tattao. “Diak pay maikari nga agrukob a mangwarwar iti
sandaliasna. 8 Buniagankayo iti danum ngem buniagannakayo iti Espiritu
Santo.” ni Jesus 9 Iti saan a nabayag, simmangpet ni Jesus a naggapu idiay
Nazaret, maysa nga ili iti probinsia ti Galilea. Binuniagan ni Juan idiay
karayan Jordan. 10 Apaman a nakasang-at ni Jesus iti danum, nakitana a
naglukat ti langit ken ti Espiritu Santo a kas kalapati a bumabbaba
kenkuana. 11 Adda maysa a timek a naggapu iti langit. “Sika ti Anakko a
dungdungngoek,” kinunana. “Maay-ayoak unay kenka.” 12 Ti Espiritu
inturongna a dagus ni Jesus idiay let-ang. 13 Nagyan sadiay ni Jesus iti 40
nga aldaw ket iti dayta a tiempo, sinulsulisog ni Satanas. Adda dagiti atap
nga ayup sadiay, ngem napan dagiti angheles ket nagserbida ken ni Jesus.
14 Kalpasan ti pannakaibalud ni Juan, napan ni Jesus idiay Galilea.
Inkaskasabana ti Naimbag a Damag a naggapu iti Dios. 15 “Dimtengen ti
aldaw,” kinunana. “Asidegen ti Pagarian ti Dios. Agbabawikayo kadagiti
basbasolyo ket mamatikayo iti Naimbag a Damag.” 16 Idi magmagna ni
Jesus iti igid ti Dan-aw ti Galilea, nakitana ti dua a mangngalap, da Simon
ken Andres nga agkabsat, a mangiwaywayat iti iketda. 17 “Surotendak ket
pagbalinenkayto a mangngalap iti tao,” kinuna ni Jesus kadakuada. 18
Pinanawanda a dagus dagiti iketda ket simmurotda kenkuana. 19 Intuloy
ni Jesus ti nagna. Idi makaadayo bassit, nakitana da Santiago ken Juan nga
annak ni Zebedeo. Silulugan dagiti agkabsat iti bangkada ket isagsaganada
dagiti iketda. 20 Inayaban a dagus ni Jesus ida. Pinanawanda ni amada iti
bangka, agraman dagiti lallaki a natangdanan a tumulong kadakuada, ket
simmurotda ken ni Jesus. 21 Dimteng ni Jesus ken dagiti adalanna iti ili a
Capernaum. Iti Aldaw a Panaginana, napan nangisuro ni Jesus iti
sinagoga. 22 Nasdaaw dagiti nagdengngeg gapu iti wagas ti
panangisurona. Insurona ida a kas maysa nga addan turay, saan a kas
kadagiti mamaestro iti Linteg. 23 Pagammoan, simrek iti sinagoga ti
maysa a lalaki a linuganan ti dakes nga espiritu. 24 “Ania ti gagaram
kadakami, Jesus a taga-Nazaret?” inyikkisna. “Immayka kadi a
mangdadael kadakami? Am-ammoka: sika ti nasantoan nga imbaon ti
Dios!” 25 “Agulimekka!” intubngar ni Jesus iti dakes nga espiritu.
“Rummuarka iti dayta a tao!” 26 Ti dakes nga espiritu pinagkuyegyegna ti
lalaki, imkis iti napigsa ket rimmuar kenkuana. 27 Nasdaaw dagiti tattao
ket nagsisinnaludsodda, “Ania daytoy? Maysa kadi a baro a pannursuro?
Addaan daytoy a tao iti turay a mangbilin kadagiti dakes nga espiritu ket
agtungpalda kenkuana!” 28 Dagus a nagdinamag ni Jesus iti amin a suli ti
probinsia ti Galilea. 29 Pimmanawda a dagus iti sinagoga ket nagturongda
iti balay da Simon ken Andres. Kaduada da Santiago ken Juan. 30
Aggurigor idi ti babai a katugangan ni Simon ket agid-idda. Apaman a
simmangpet ni Jesus, imbagada kenkuana ti kasasaad ti masakit. 31 Napan
ni Jesus iti ayan ti masakit, iniggamanna ti imana ket tinulonganna a
bumangon. Naawan a dagus ti gurigorna, ket sinerbianna ida. 32-33 Idi
nakalneken ti init iti dayta nga aldaw, nagdudupudop dagiti tattao iti dayta
a lugar iti sango ti balay nga ayan ni Jesus. Impanda kenkuana dagiti
masaksakit ken dagiti linuganan ti demonio. 34 Pinaimbag ni Jesus dagiti
adu nga agsagsagaba iti nadumaduma a kita ti sakit. Pinaksiatna ti adu a
demonio. Ngem dina pinalubosan nga agsao dagiti demonio ta ammoda ti
kinasiasinona. 35 Nasipnget pay laeng iti sumuno a bigat idi bumangon ni
Jesus ket pimmanaw iti balay. Nagturong iti disso nga awan matagtagitao
iti ruar ti ili, ket nagkararag sadiay. 36 Ngem napan binirok ni Simon ken
dagiti kakaduana. 37 Idi masarakanda kinunada kenkuana,
“Sapsapulendaka dagiti amin a tattao.” 38 “Intayo kadagiti kabangibang
nga il-ili,” insungbat ni Jesus. “Masapul a mangasabaak met kadagita a
lugar, ta daytoy ti gapuna a pimmanawak idiay Capernaum.” 39 Ngarud,
sinursorna amin a paset ti Galilea. Nangaskasaba kadagiti sinagogada ken
namakpaksiat kadagiti demonio. 40 Adda lalaki nga agsagsagaba iti
kukutel. Napan ken ni Jesus, nagparintumeng ket nagpakpakaasi
kenkuana. “No kayatmo, mapaimbagnak,” kinunana. 41 Naasian ni Jesus,
ket sinagidna ti masakit. Kinunana, “Kayatko. Umimbagkan!” 42 Dagus a
naikkat ti sakit ti lalaki ket immimbagen. 43 Pinapanaw a dagus ni Jesus ti
lalaki kalpasan ti nainget a panangbilinna: 44 “Denggem! Awan
pangibagbagaam iti daytoy. Inka agparang iti padi tapno kitaennaka.
Kalpasanna, kas imbilin ni Moises, mangipaayka iti daton a
pammaneknekmo kadagiti tattao nga immimbagkan.” 45 Ngem idi
nakapanawen ti lalaki, impadpadamagna iti amin a lugar ti napasamak
kenkuana. Isut’ gapuna a saanen a makastrek a silalatak ni Jesus iti uray
ania nga ili. Nagyan ketdi kadagiti disso nga awan matagtagitao ngem
uray no kasta, dinanon dagiti tattao a naggapu kadagiti nadumaduma a
lugar.
Marcos 2
1 Nagsubli ni Jesus idiay Capernaum kalpasan ti sumagmamano nga
aldaw. Nagdinamag a simmangpeten iti balayna, 2 ket adu a tattao ti
natipontipon sadiay. Awan payen ti pagpisipisan, uray pay iti asideg ti
ridaw. Madama nga ikaskasaba ni Jesus ti Naimbag a Damag 3 idi
simmangpet ti uppat a lallaki a nagbaklay iti maysa a paralitiko nga ipanda
kenkuana. 4 Ngem gapu iti kaadu ti tao, dida mayasideg ken ni Jesus ti
masakit. Winangwanganda ngarud ti atep iti ngatoen ni Jesus sada imbaba
ti paralitiko a nakaidda iti papag. 5 Idi makita ni Jesus ti pammatida,
kinunana iti paralitiko, “Anakko, napakawanen dagiti basbasolmo.” 6
Sadiay, adda nga agtugtugaw ti sumagmamano a mamaestro iti Linteg.
Kinunada iti nakemda, 7 “Apay a kasta ti sao daytoy a tao? Maibusor iti
Dios ti sasawenna! Ni laeng Apo Dios ti makapakawan iti basol!” 8
Ammo a dagus ni Jesus ti adda iti panunotda ket kinunana, “Apay a kasta
ti pampanunotenyo? 9 Ania ti nalaklaka nga isao iti daytoy a paralitiko:
‘Napakawanen dagiti basbasolmo’ wenno ‘Bumangonka, alaem ta iddam
ket magnaka’? 10 Paneknekak ngarud kadakayo a ti Anak ti Tao adda
pannakabalinna ditoy daga a mamakawan kadagiti basbasol.” 11 Kinunana
iti paralitiko, “Ibilinko kenka: bumangonka, bagkatem ta iddam ket
agawidkan.” 12 Iti imatangda amin, bimmangon ti lalaki, binagkatna ti
iddana ket nagdardaras a nagawid. Nagsiddaawda amin, ket indaydayawda
ti Dios. “Dikam pay nakaimatang iti kastoy a pasamak,” kinunada. 13
Nagsubli manen ni Jesus iti igid ti Dan-aw ti Galilea. Napan kenkuana
dagiti adu a tattao ket insurona ida. 14 Idi magmagna, nakitana ti maysa
nga agsingsingir iti buis, ni Levi nga anak ni Alfeo. Agtugtugaw ni Levi iti
ofisinana a pagbayadan iti buis. “Surotennak,” kinuna ni Jesus.
Timmakder ni Levi ket simmurot kenkuana. 15 Idi mangmangan ni Jesus
iti balay ni Levi, nakilanglang kenkuana ken kadagiti adalanna ti adu nga
agsingsingir iti buis ken tattao a managbasol. Ngamin, adu dagiti
simmurot kenkuana. 16 Adda sumagmamano a mamaestro iti Linteg a
kamkameng ti grupo dagiti Fariseo. Idi makitada a makipangpangan ni
Jesus kadagiti managbasol ken agsingsingir iti buis, sinaludsodda kadagiti
adalanna, “Apay a kalanglangna dagiti agsingsingir iti buis ken dagiti
managbasol?” 17 Nangngeg ida ni Jesus ket kinunana: “Saan a dagiti
nasalun-at ti makasapul iti mangngagas, no di ket dagiti masaksakit. Diak
immay tapno ayabak dagiti nalinteg a tattao. Immayak tapno ayabak dagiti
managbasol.” 18 Iti naminsan, agay-ayunar dagiti adalan ni Juan a
Mammuniag ken dagiti Fariseo. Napan ti sumagmamano a tattao ken ni
Jesus ket sinaludsodda, “Apay nga agayunar dagiti adalan ni Juan a
Mammuniag ken dagiti adalan dagiti Fariseo, ngem dagiti adalam saan?”
19 Simmungbat ni Jesus, “Mabalin aya a di mangan dagiti sangaili iti
paboda? Manganda! Saanda nga agayunar no adda ti nobio iti sidongda.
20 Ngem dumtengto ti tiempo a maipanaw ti nobio kadakuada. Isunton ti
panagayunarda. 21 “Saan nga itakup ti baro a lupot iti daan a pagan-anay,
ta no kumsen ti naitakup, dumakdakkel ti pigis. 22 Saan met nga ikabil ti
baro nga arak iti daan a supot a lalat, ta bettaken ti arak ti supot ket
agpadada a madadael. Ikarga ketdi ti baro nga arak iti baro a supot a
lalat!” 23 Iti maysa nga Aldaw a Panaginana, magmagna ni Jesus ken
dagiti adalanna iti kataltalonan a namulaan iti trigo. Bayat ti pannagnada,
nagruros dagiti adalanna kadagiti dawa ti trigo. 24 Sinaludsod dagiti
Fariseo ken ni Jesus, “Kitaem, apay nga ar-aramiden dagiti adalam ti
maisalungasing iti Aldaw a Panaginana?” 25 Insungbat ni Jesus, “Diyo
pay aya nabasa ti inaramid ni David ken dagiti tattaona idi mabisinda? 26
Simrek ni David iti balay ti Dios sa nangan iti tinapay a naidaton iti Dios.
Napasamak daytoy idi ni Abiatar ti Kangatoan a Padi. Iti paglintegantayo,
dagiti laeng papadi ti mapalubosan a mangan iti dayta a tinapay. Ngem
nangan ni David ket inikkanna pay dagiti tattaona. 27 “Naaramid ti Aldaw
a Panaginana nga agpaay iti pagimbagan ti tao. Saan a naaramid ti tao nga
agpaay iti Aldaw a Panaginana. 28 Ngarud, ti Anak ti Tao isu ti Apo uray
pay ti Aldaw a Panaginana.”
Marcos 3
1 Iti naminsan nga ipapan manen ni Jesus iti sinagoga, adda lalaki sadiay a
paralitiko ti maysa nga imana. 2 Adda tattao a mangpalpaliiw ken ni Jesus
no paimbagenna ti lalaki iti Aldaw ti Panaginana tapno adda
pangpabasolanda kenkuana. 3 “Umayka ditoy,” kinuna ni Jesus iti lalaki. 4
Ket sinaludsodna kadagiti tattao: “Ania ti ipalubos ti Linteg nga
aramidentayo iti Aldaw a Panaginana? Tumulong wenno mangranggas?
Mangispal iti tao wenno mangpatay?” Ngem nagulimekda. 5 Sipupungtot
ni Jesus a kimmita kadakuada. Nupay kasta, inay-ayna ida gapu iti
kinatangken ti uloda. “Unnatem ta imam,” kinunana iti lalaki. Inunnat ti
lalaki ti imana ket immimbag. 6 Rimmuar dagiti Fariseo iti sinagoga.
Nakiumanda a dagus iti sumagmamano a kameng ti partido Herodiano.
Nagtutulaganda no kasano ti panangpatayda ken ni Jesus. 7 Nagpakni ni
Jesus ken dagiti adalanna iti igid ti Dan-aw ti Galilea ket simmurot
kenkuana ti adu a tao. Naggapuda idiay Galilea, Judea, 8 Jerusalem,
Idumea, agraman kadagiti disso iti ballasiw ti Jordan ken kadagiti luglugar
nga asideg iti siudad ti Tiro ken Sidon. Napan amin dagitoy a tattao ken
Jesus ta adu ngamin ti nadamagda nga ar-aramidenna. 9 Gapu iti kaadu ti
tao, binilin ni Jesus dagiti adalanna nga isaganaanda iti bangka tapno saan
a madippit. 10 Ta adu ti inagasanna ket agdidinnuron amin dagiti masakit
nga umasideg a sumagid kenkuana. 11 Tunggal maimatangan dagiti tattao
a linuganan dagiti dakes nga espiritu, agpaklebda iti sakaananna sada
yikkis: “Sika ti Anak ti Dios!” 12 Ngem nainget ti bilin ni Jesus kadagiti
dakes nga espiritu nga awan pangibagbagaanda iti kinasiasinona. 13
Simmang-at ni Jesus iti maysa a turod ket inayabanna dagiti kinayatna.
Napanda kenkuana ket 14 pimmili iti sangapulo ket dua a dinutokanna nga
apostoles. “Pinilikayo a makikadkadua kaniak,” imbagana kadakuada.
“Ibaonkayonto pay a mapan mangaskasaba 15 ket maikkankayto iti
pannakabalin a mangpaksiat kadagiti demonio.” 16 Dagitoy dagiti 12 a
pinilina: ni Simon (a pinanagananna iti Pedro); 17 da Santiago ken Juan
nga annak ni Zebedeo (pinanagananna dagiti agkabsat iti Boanerges,
kayatna a sawen, “Annak ti Gurruod”); 18 Andres, Felipe, Bartolome,
Mateo, Tomas; ni Santiago nga anak ni Alfeo; Tadeo, Simon a Patriota 19
ken ni Judas Iscariote a nangliput ken Jesus. 20 Nagawid ni Jesus. Adu
manen a tattao ti naguummong ket saanen a masango ni Jesus ken dagiti
adalanna ti mangan. 21 Apaman a nadamag daytoy dagiti kabagianna,
napanda iti ayan ni Jesus tapno ipanawda. “Agmauyongen,” kunkuna
ngamin dagiti tattao. 22 “Linuganan ni Beelzebub!” kinuna ti
sumagmamano a maestro iti Linteg a naggapu idiay Jerusalem. “Ti
pangulo dagiti demonio ti mangmangted kenkuana iti bileg a mangpaksiat
kadagiti dakes nga espiritu.” 23 Isut’ gapuna nga inayaban ni Jesus dagiti
tattao ket sinaritana kadakuada ti sumagmamano a pangngarig: “Mabalin
aya a paksiaten ni Satanas ti bagina met laeng? 24 No agbibinnusor dagiti
tattao iti maysa a pagarian, marpuog dayta a pagarian. 25 No agririri dagiti
kameng ti maysa a familia, marakrak dayta a familia. 26 Ngarud, no
mabingbingay ti pagarian ni Satanas, ket agdidinnadael dagiti taona, di
agpaut ket dumtengen ti kanibusananna. 27 “Awan makastrek iti balay ti
napigsa a tao tapno italawna dagiti sanikuana. Reppetenna pay nga umuna
ti napigsa a tao santo agsamsam iti uneg ti balay. 28 “Laglagipenyo a
mapakawan amin a basol dagiti tattao ken amin nga isasaoda a maibusor
iti Dios. 29 Ngem pulos a dinto mapakawan ti siasinoman nga agsao iti
maibusor iti Espiritu Santo, ta nakaaramid iti agnanayon a basol.” 30 Insao
ni Jesus dagitoy ta adda sumagmamano a nagkuna, “Linuganan ti dakes
nga espiritu.” 31 Simmangpet ti ina ken dagiti lallaki a kakabsat ni Jesus.
Nagtatakderda iti ruar ket nangibaonda iti mangayab kenkuana. 32 Adu a
tattao ti nakatugaw idi iti likmutna. “Adda ni nanangmo ken dagiti
kakabsatmo a lallaki idiay ruar,” kinunada. “Masapuldaka.” 33 “Siasino
kadi ti inak?” insungbat ni Jesus. “Siasino kadi dagiti kakabsatko?” 34
Kinitana dagiti nanglawlaw kenkuana ket kinunana, “Kitaenyo! Adtoy ti
inak ken dagiti kakabsatko! 35 Ta dagiti agaramid iti pagayatan ti Dios,
isuda dagiti kakabsatko ken ti inak.”
Marcos 4
1 Nangisuro manen ni Jesus iti igid ti Dan-aw ti Galilea. Gapu ta adu unay
dagiti tattao nga immaribungbong kenkuana, napan nagtugaw iti maysa a
bangka a sitatapog iti danum. Nagyan dagiti tattao iti takdang iti igid ti
dan-aw. 2 Pangngarig ti inaramat ni Jesus a nangisuro kadakuada kadagiti
adu a bambanag. Kinunana kadakuada, 3 “Dumngegkayo! Adda maysa a
tao a napan nagpurruak kadagiti bukel. 4 Idi agipurpurruak, nagdisso ti
sumagmamano a bukel iti igid ti dalan, ket tinuktok dagiti tumatayab. 5
Adda met sumagmamano a bukel a nagdisso iti kabatoan a bassit laeng ti
dagana. Gapu ta narabaw ti dagana, nabiit a nagtubo dagiti bukel. 6 Idi
makatangkayagen ti init, nalaylay dagiti apagtubo a mula ket nagangoda a
dagus agsipud ta dida unay nakapagramut. 7 Nagdisso ti sumagmamano a
bukel iti nagtuboan dagiti siitan a mula a dimmakkel ken nangleppes
kadakuada. Iti kasta, saan a nakapagdawa dagiti mula. 8 Ngem adda dagiti
bukel a nagdisso iti nadam-eg a daga, ket nagtubo, dimmakkel ken
nagdawada. Adda nagdawa iti 30, adda met 60 ken adda pay 100.” 9 Ket
inggibus ni Jesus, “Dumngeg ngarud ti siasinoman nga addaan
pannakaawat.” 10 Idi agmaymaysa ni Jesus, napan kenkuana ti
sumagmamano kadagiti nagdengngeg agraman dagiti sangapulo ket dua
nga adalan. Kiniddawda nga ilawlawagna dagiti pangngarig. 11 Kinuna ni
Jesus, “Naipakaammo kadakayo ti palimed maipapan iti Pagarian ti Dios,
ngem kadagiti sabsabali, maisuro amin a banag babaen kadagiti
pangngarig. 12 Iti kasta, ‘Uray no kitkitaenda, dida mailasin, Uray no
dengdenggenda, dida maawatan. No mailasin ken maawatanda Amangan
no agsublida iti Dios ket pakawanennanto ida.’” 13 “Diyo aya maawatan
daytoy a pangngarig?” sinaludsod ni Jesus kadakuada. “No diyo
maawatan, kasano ngarud a maawatanyo ti uray ania a pangngarig?” 14
Ket inlawlawagna ti pangngarig: “Ti agmulmula iwaragawagna ti sao ti
Dios. 15 Dagiti bukel nga agdisso iti dalan mayarigda kadagiti tattao a
makangngeg iti sao ti Dios; apaman a mangngegda, umay ni Satanas ket
ikkatenna ti mensahe kadakuada. 16 “Dagiti dadduma a tattao mayarigda
kadagiti bukel a nagdisso iti kabatoan. Apaman a mangngegda ti sao,
awatenda a siraragsak. 17 Ngem saan a makapagramut ti sao kadakuada,
ket saanda nga agbayag. Isut’ gapuna a maupayda a dagus no dumteng
dagiti rigrigat ken pannakaidadanes gapu iti sao. 18 Ket dagiti dadduma a
tattao mayarigda kadagiti bukel a nagdisso iti nagtuboan dagiti siitan a
mulmula. Isuda dagitoy ti makangngeg iti sao, 19 ngem umay dagiti
pakaringgoran iti daytoy a biag, ti panagagum iti kinabaknang ken ti
nalabes a panagtarigagay kadagiti dadduma pay a bambanag, ket
leppesenda ti sao. Iti kasta, dida makapagbunga. 20 Ngem dagiti dadduma
a tattao, mayarigda kadagiti bukel a nagdisso iti nadam-eg a daga.
Ipapusoda a denggen ti sao, ket agbungada: adda agbunga iti tallopulo,
adda met innem a pulo ken adda pay sangagasut.” 21 Intuloy ni Jesus,
“Gangtan aya ti pagsilawan tapno kaluban iti salup wenno ipasirok iti
katre? Saan aya nga ikabil ketdi iti nairanta a pagyananna? 22 Awan ti
nailemmeng a dinto mailatak. Awan met ti palimed a di maammoan. 23
Dumngeg ngarud ti siasinoman nga addaan pannakaawat.” 24 Kinunana
pay kadakuada: “Panunotenyo a nalaing ti mangngegyo! No kasano ti
panangrukodyo kadagiti sabsabali, kastanto met ti panangrukod ti Dios
kadakayo; ket naing-ingetto pay! 25 Ta ti addaan, maikkanto iti ad-adu.
Ngem ti awanan, uray ti bassit nga adda kenkuana, maikkatto pay!” 26
Intuloy ni Jesus ti nagsao, “Kastoy ti kayarigan ti Pagarian ti Dios. Adda
tao nga agpurruak kadagiti bukel iti talonna. 27 Maturog iti rabii ket
agtrabaho iti aldaw. Kabayatanna, agtubo dagiti bukel ket dumakkelda.
Ngem di ammo ti nagmula no kasano ti irurusing ken idadakkelda. 28 Ti
daga met laeng ti mangpadakkel ken mangpabunga kadagiti mula:
agparang nga umuna ti bulong, sumaruno ti dawa, ket kamaudiananna,
mamsek ti dawa. 29 No matangkenanen dagiti dawa, rugianen ti aggapas,
ta dimtengen ti panagapit.” 30 Nagsaludsod ni Jesus: “Ania ti
pangyarigantayo iti Pagarian ti Dios? Ania a pangngarig ti
pangilawlawagtayo iti daytoy? 31 Mayarig iti bukel ti mostasa a
kabassitan a bukel ditoy lubong. 32 Bassit-usit a bukel ngem no maimula,
dumakkel ket agbalin a kadakkelan kadagiti amin a mulmula. Agsanga iti
dadakkel a mabalin a pagumokan dagiti tumatayab.” 33 Babaen kadagiti
kakastoy a pangngarig, inkaskasaba ni Jesus ti mensahena kadagiti tattao,
kas iti kabaelanda nga umawat. 34 Saan nga agsao idi kadakuada no dina
aramaten dagiti pangngarig. Ngem no is-isuda laeng kadagiti adalanna,
ilawlawagna amin kadakuada. 35 Idi sumipngeten iti dayta met la nga
aldaw, kinuna ni Jesus kadagiti adalanna, “Bumallasiwtayo.” 36
Pinanawanda ngarud dagiti tattao sada limmugan iti bangka nga ayan ni
Jesus ket bimmallasiwda. Adda pay sabsabali a bilog a nakikuyog
kenkuana. 37 Pagammoan, nagangin iti nakapigpigsa. Timmaud dagiti
dadakkel a dalluyon a nangsabbuasabbuag iti bangka. Iti kasta,
ngannganin mapno ti bangka iti danum. 38 Adda ni Jesus iti kutit ti
bangka. Magmaturog a nakapungan. Riniing dagiti adalanna. “Maestro,”
kinunada, “awan aya ti aniamanna kenka no lumnedtayo?” 39 Bimmangon
ni Jesus, ket binilinna ti angin, “Agsardengka!” sana kinuna iti dalluyon,
“Agtalnaka!” Nagsardeng ti angin, ket nagtalna ti dalluyon. 40 Kinuna ni
Jesus kadagiti adalan, “Apay nga agbutengkayo? Awan pay kadi ti
pammatiyo?” 41 Ngem kasta unay ti butengda, ket kinunada iti maysa ken
maysa, “Ania ti katataona daytoy? Uray ti angin ken ti dalluyon
agtungpalda kenkuana!”
Marcos 5
1 Nakadanon ni Jesus ken dagiti adalanna iti ballasiw ti Dan-aw ti Galilea
ket simmangladda iti daga dagiti Geraseno. 2 Apaman a nakadissaag ni
Jesus iti bangka, sinabat ti maysa a lalaki a naggapu kadagiti rukib a
pagitantaneman sadiay. Linuganan ti dakes nga espiritu daytoy a lalaki 3
ket agnanaed kadagiti tantanem. Awan ti makakawar kenkuana. 4 Namin-
adu a rineppetda ti imana ken imbaudda ti sakana, ngem pinugsapugsatna
dagiti kawar ket linettatna dagiti posas. Nagpaiduma ti pigsana ket awan ti
makaparukma kenkuana. 5 Aldaw ken rabii nga agpagnapagna kadagiti
tantanem ken turturod. Patinayon nga agik-ikkis. Dundunorenna ti bagina
iti bato. 6 Adayo pay laeng ni Jesus idi makita daytoy a lalaki. Nagtaray
ket nagparintumeng iti sangoananna sana inyikkis, 7 “Jesus, Anak ti Dios
a Kangatoan. Apay a singaennak? Iti nagan ti Dios, dinak kadi parigaten.”
( 8 Sinaona daytoy gapu ta kinuna ni Jesus kenkuana, “Dakes nga espiritu,
rummuarka iti daytoy a tao!”) 9 “Ania ti naganmo?” sinaludsod ni Jesus.
“‘Armada,’ ta adukami,” kinuna ti lalaki. 10 Namin-adu nga
impakpakaasina ken ni Jesus a dina koma papanawen dagiti dakes nga
espiritu iti dayta a lugar. 11 Iti asideg sadiay, adda dakkel nga arban ti
baboy nga mangmangan iti bakras ti turod. 12 Nagpakpakaasi dagiti
espiritu, “Ibaonnakami a sumrek kadagiti baboy.” 13 Pinalubosan ni Jesus
ida. Rimmuar dagiti dakes nga espiritu iti lalaki ket simrekda kadagiti
baboy. Nagdadarison ti arban—agduaribuda amin a baboy—iti teppang
sada timpuak iti dan-aw, ket nalmesda amin. 14 Nagtataray dagiti
agtartaraken kadagiti baboy a napan iti ili ken kadagiti barbarrio ket
impadamagda ti napasamak. Rimmuar dagiti tattao tapno mapanda kitaen
ti naaramid. 15 Idi makaasidegda ken ni Jesus, nakitada ti lalaki a
linuganan dagiti demonio. Agtugtugaw, nakakawes ken nagpulangen ti
nasayaat a panunotna. Nagbutengda amin. 16 Dagiti nakakita iti daytoy
impadamagda kadagiti tattao ti napasamak iti naluganan a lalaki ken
kadagidi baboy. 17 Iti kasta, dinawat dagiti tattao a pumanaw ni Jesus iti
lugarda. 18 Idi lumugan ni Jesus iti bangka, nagpakpakaasi ti tao
naluganan a makikuyog kenkuana. 19 Ngem linapdan ni Jesus. Kinunana,
“Agawidka iti familiam ket ipadamagmo kadakuada ti naindaklan nga
inaramid ti Apo kenka gapu iti kaasina.” 20 Pimmanaw ti lalaki, ket
impakaammona iti sakup ti Decapolis ti inaramid ni Jesus kenkuana.
Nagsidsiddaaw amin a nakangngeg iti impadamagna. 21 Bimmallasiw
manen ni Jesus a napan idiay bangir ti dan-aw. Idi addan iti igid,
inaribungbongan ti nakaad-adu a tao. 22 Dimteng ni Jairo, maysa nga
ofisial iti sinagoga iti dayta a lugar. Idi makitana ni Jesus, nagparintumeng
ket nagpakpakaasi kenkuana, 23 “Ngannganin matay ti balasitang nga
anakko. Pangngaasim ta umaymo ipatay ta imam kenkuana tapno
umimbag ket agbiag pay!” 24 Kimmuyog ni Jesus kenkuana. Nakikuyog
met ti nakaad-adu a tattao nga agdidinnuron iti likmutna. 25 Adda sadiay
idi ti maysa a babai a sangapulo ket dua a tawenen nga agsagsagaba iti
panagbulos ti dara. 26 Nupay adun ti nangag-agas kenkuana, ket
nagastonan ti amin a kuartana a pinagpapaagas, saan nga immimbag, no di
ket kimmaro ti sakitna. 27 Nadamagna ti maipapan ken ni Jesus.
Nakilinnetlet ngarud kadagiti tattao agingga a nakaasideg iti likudan ni
Jesus. 28 Kinunana iti bagina, “No masagidko la koma uray ti kawesna
laeng, umimbagakton!” 29 Sinagidna ti kagay ni Jesus. Dagus a
simmardeng ti panagbulos ti darana ket nariknana nga immimbagen. 30 Iti
dayta a kanito, nadlaw ni Jesus nga adda pannakabalin a nauyos kenkuana
ket sinangona dagiti adda iti likudanna. Sinaludsodna, “Siasino ti
nangsagid iti kawesko?” 31 Kinuna dagiti adalanna, “Makitam dagiti adu
a tao nga agdidinnuron iti likmutmo, ket saludsodem pay laeng no siasino
ti nangsagid kenka?” 32 Ngem inwaras ni Jesus ti panagkitana tapno
bigbigenna no siasino ti nangsagid kenkuana. 33 Nadlaw ti babai ti
napasamak kenkuana, isu nga agtigtigerger iti buteng nga immasideg ken
Jesus sa nagparintumeng iti sangoananna. Impudnona ti amin a naaramid.
34 “Anakko,” kinuna ni Jesus iti babai, “pinaimbagnaka ti pammatim.
Inkan a sitatalna ket saanton nga agsubli ti sakitmo!” 35 Madama pay la
nga agsasao ni Jesus idi dumteng dagiti naggapu iti balay ni Jairo.
“Natayen ti anakmo,” impadamagda ken ni Jairo. “Apay a ringgorem pay
laeng ti Maestro?” 36 Saan nga inkaskaso ni Jesus ti imbagada ken ni
Jairo. Kinunana ketdi kenkuana, “Dika agdanag. Papigsaem ketdi ti
pammatim.” 37 Saanen nga impalubos ni Jesus a makikuyog dagiti tattao
kenkuana, malaksid ni Pedro ken dagiti agkabsat a Santiago ken Juan. 38
Idi sumangpetda idiay balay ni Jairo, nakita ni Jesus ti kumaribuso a
tattao. Agsangsangit ken agdungdung-awda iti napigsa. 39 Simrek ni Jesus
ket kinunana kadakuada, “Apay nga umariwawakayo? Apay nga
agdungdung-awkayo? Saan a natay ti balasitang; matmaturog laeng!” 40
Kinatkatawaan dagiti tattao. Pinaruarna amin ida sana inayaban dagiti
nagannak ken dagiti adalanna, ket simrekda iti siled a yan ti balasitang. 41
Iniggaman ni Jesus ti ima ti balasitang sana kinuna: “Talita, kum!”
(Kayatna a sawen, “Balasitang, bumangonka!”) 42 Dagus a bimmangon ti
balasitang ket nagpagnapagna. (Sangapulo ket dua ti tawenna.) Kasta unay
ti siddaawda iti napasamak. 43 Ngem impaganetget ni Jesus nga awan
pangibagbagaanda iti daytoy. “Pakanenyo ti balasitang,” kinunana.
Marcos 6
1 Pimmanaw ni Jesus iti dayta a lugar ket nagsubli iti ilina. Simmurot
kenkuana dagiti adalanna. 2 Iti Aldaw a Panaginana, napan nangisuro iti
sinagoga. Adu dagiti tattao sadiay. Nasdaawda amin a nakangngeg
kenkuana. Sinaludsodda, “Sadino ti nangalaan daytoy a tao kadagitoy?
Kasano ti pannakagun-odna iti kasta a kinasirib? Kasano a makaaramid iti
milagro? 3 Saan aya nga isu ti karpintero nga anak ni Maria, ken kabsat da
Santiago, Jose, Judas ken Simon? Saan aya nga agnanaed ditoy dagiti
kakabsatna a babbai?” Dagitoy ti kinunkuna dagiti nagdengngeg kenkuana
gapu iti siddaawda. Iti kasta, inumsida ni Jesus. 4 Ket insungbat ni Jesus
kadakuada: “Mapadayawan ti profeta iti sadinoman a lugar, malaksid iti
ilina, kadagiti kabagian ken familiana.” 5 Awan a pulos ti naaramidna a
milagro sadiay, malaksid ti panangpaimbagna iti sumagmamano a masakit
babaen iti panangipatayna iti imana kadakuada. 6 Masdaaw unay gapu ta
awan pammati dagiti tattao. Napan ni Jesus a nangisursuro kadagiti
aglikmut a barbarrio. 7 Inayabanna dagiti sangapulo ket dua nga adalanna,
ket imbaonna ida a sagdudua. Inikkanna ida iti pannakabalin a
mangpaksiat kadagiti dakes nga espiritu. 8 Binilinna ida, “Dikay
mangitugtugot iti uray ania: tinapay man wenno bay-on wenno kuarta
kadagiti bulsayo. Sarukod laeng ti itugotyo. 9 Agsapatoskayo, ket
umanayen ti maysa a kagayyo.” 10 Innayonna pay, “Iti sadinoman a lugar
nga adda mangawat kadakayo, agyankayo iti dayta a balay agingga iti
ipapanawyo iti dayta nga ili. 11 No dumtengkayo iti lugar nga awan
umawat ken dumngeg kadakayo, pumanawkayo, ket pampagenyo ti tapok
kadagiti saksakayo a kas ballaag kadakuada.” 12 Napan ngarud dagiti
adalanna ket inkaskasabada kadagiti tattao a masapul nga agbabawida
kadagiti basbasolda. 13 Pinaksiatda ti adu a demonio. Sinapsapoanda iti
lana dagiti adu a masaksakit ket naimbaganda amin. 14 Naammoan amin
dagitoy ni ari Herodes gapu ta nagdinamagen ti nagan ni Jesus iti amin a
lugar. Kinuna ti sumagmamano a tattao, “Nagungar ni Juan a
Mammuniag! Isut’ gapuna nga adda kenkuana daytoy a pannakabalin nga
agaramid iti milagro.” 15 Kinuna met dagiti dadduma, “Isu ni Elias!”
Adda pay nagkuna, “Maysa daytoy a profeta, kas kadagiti profeta idi un-
unana.” 16 Idi mangngeg daytoy ni Herodes, kinunana, “Isu dayta ni Juan
a pinaputolak ngem napagungar!” 17 Mismo a ni Herodes ti nangpatiliw
ken nangpaibalud ken ni Juan. Inaramidna daytoy gapu ken ni Herodias
nga inkabbalayna, nupay asawa ni Felipe a kabsatna. 18 Kinunkuna
ngamin idi ni Juan a Mammuniag ken ni Herodes: “Saan a rumbeng nga
ikabbalaymo ti asawa ni kabsatmo!” 19 Isut’ gapuna a napalalo ti gura ni
Herodias ken ni Juan, ket kinayatna a mapapatay, ngem dina naallukoy ni
Herodes nga umanamong iti daytoy a gandat. 20 Bigbigen ngamin idi ni
Herodes ti kinaimbag ken kinasanto ni Juan. Dina intulok a madangran.
Magusgustoanna a dengdenggen ni Juan, nupay mariribuk tunggal
mangngegna. 21 Ngem dimteng ti gundaway ni Herodias. Agkasangay idi
ni Herodes ket nagpadaya para kadagiti nangato nga agtuturay iti
gobierno, dagiti ofisiales ti militar ken dagiti nalalatak nga umili ti Galilea.
22 Simrek ti balasang nga anak ni Herodias ket nagsala. Naay-ayo ni
Herodes ken dagiti sangailina. Isut’ gapuna a kinuna ti ari iti balasang,
“Dawatem ti aniaman a kayatmo, ket itedko kenka!” 23 Insapatana pay,
“Itedko ti aniaman a dawatem, uray pay ti kagudua ti pagariak!” 24
Rimmuar ti balasang ket dinamagna ken ni inana, “Ania ti dawatek?”
“Dawatem ti ulo ni Juan a Mammuniag!” insungbat ni Herodias. 25
Nagsubli a dagus ti balasang iti yan ti ari ket dinawatna, “Kayatko nga
itedmo kaniak ditoy ken ita met laeng ti ulo ni Juan a Mammuniag a
maikabil iti bandehado!” 26 Kasta unay ti liday ti ari. Ngem dina mabalin
a paayen ti balasang gapu iti inkarina iti imatang dagiti amin a sangailina.
27 Iti kasta, binilinna a dagus ti maysa a guardia nga yegna ti ulo ni Juan.
Napan ti guardia idiay pagbaludan ket pinutolanna ni Juan. 28 Inyegna ti
ulo a naikabil iti bandehado. Inyawat met ti balasang ken ni inana. 29 Idi
nadamag dagiti adalan ni Juan ti napasamak, napanda innala ti bangkayna
ket intanemda. 30 Nagsubli dagiti apostoles iti ayan ni Jesus ket
impadamagda kenkuana dagiti amin nga inaramid ken insuroda. 31
Masublasublat nga umay ken pumanaw dagiti adu a tattao iti ayanda ket
dida pay masangon ti mangan. Iti kasta, kinuna ni Jesus kadagiti adalanna,
“Intayo iti maysa a disso tapno makainanatayo.” 32 Ket nagbangkada a
napan iti disso nga awan matagtagitao. 33 Ngem adu ti nakakita iti
ipapanawda ken nakailasin kadakuada. Iti kasta, manipud kadagiti amin
nga ili, nagtatarayda a napan iti nasao a lugar. Immun-unada ngem ni
Jesus ken dagiti adalanna a dimteng. 34 Apaman a dimsaag ni Jesus iti
bilog, nakitana dagitoy a tattao ket naasian kadakuada, ta kasda la karnero
nga awan mangaywan kadakuada. Iti kasta, insurona ida kadagiti adu a
bambanag. 35 Idi mumalemen, napan dagiti adalan ken ni Jesus ket
kinunada, “Mumalemen, ket awan matagtagitao ditoy. 36 Pagawidemon
dagiti tattao tapno makagatangda iti kanenda kadagiti kabangibang a
barbarrio ken il-ili.” 37 “Ikkanyo ketdi ida iti kanenda,” kinuna ni Jesus.
“Kayatmo a sawen nga inkam gumatang iti tinapay nga agpateg iti dua
gasut a denario ket itedmi a kanenda?” kinuna dagiti adalanna. 38 “Adda
mano a tinapayyo?” sinaludsod ni Jesus. “Inkayo kitaen.” Napan kinita
dagiti adalan ket impakaammoda, “Adda lima a tinapay ken dua nga
ikan.” 39 Binilin ni Jesus dagiti adalanna a pagtugawenda a magrupo-
grupo dagiti tattao iti nalangto a karuotan. 40 Iti kasta, nagrupo-grupo a
nagtugaw dagiti tattao: adda sagsasangagasut, adda met saglilimapulo. 41
Innala ni Jesus dagiti lima a tinapay ken dua nga ikan. Timmangad sadi
langit sa nagyaman iti Dios. Pinispisina dagiti tinapay ket intedna kadagiti
adalanna tapno ibunongda kadagiti tattao. Biningbingayna met dagiti dua
nga ikan tapno maibunong kadakuada amin. 42 Nanganda amin ket
nabsogda. 43 Napno ti sangapulo ket dua a basket ti natda kadagiti tinapay
ken ikan nga inurnong dagiti adalan. 44 Kadagiti nangan, 5,000 dagiti
nataengan a lallaki. 45 Bayat ti panangpagawid ni Jesus kadagiti tattao,
pinaluganna a dagus dagiti adalanna iti bangka. Pinaunana ida a mapan
idiay Betsaida, iti ballasiw ti dan-aw. 46 Apaman a napalubosanna dagiti
tattao, simmang-at iti maysa a turod tapno agkararag. 47 Idi rumabiin,
addan ti bangka iti tengnga ti dan-aw, ngem maymaysa ni Jesus iti sang-at.
48 Nakitana a marigatan dagiti adalanna nga aggagaud, ta subsubaen ida ti
angin. Iti agarup nagbaetan iti alas tres ken alas seis iti parbangon, nagna
ni Jesus iti danum a napan kadakuada. Labsanna koma ida 49 ngem
nakitada a magmagna iti rabaw ti danum. “Al-alia!” kinunada ket
naggiikkisda. 50 Nagbutengda a nakakita kenkuana. Ngem dagus a kinuna
ni Jesus, “Dikay agbuteng! Siak ni Jesus. Dikay agdanag!” 51 Nakilugan
ni Jesus kadakuada, ket nagtalnan ti angin. Kasta unay ti siddaaw dagiti
adalanna. 52 Dida naawatan ti pudno a kaipapanan ti panangpaadu ni
Jesus kadagiti tinapay. Dida matukod a panunoten. 53 Bimmallasiw ni
Jesus ken dagiti adalanna iti dan-aw ket simmangladda idiay Genesaret a
nangipundoanda iti bilog. 54 Apaman a nakadissaagda, dagus a nailasin
dagiti tattao ni Jesus. 55 Iti kasta, nagtataray dagiti tattao a napan kadagiti
kabangibang a luglugar ket impanda kenkuana dagiti masakit a siiidda iti
papag. 56 Iti sadinoman a napanan ni Jesus, purok man wenno barrio
wenno plasa, impan dagiti tattao dagiti masakitda kenkuana.
Nagpakpakaasida kenkuana nga uray sagiden la koma dagiti masakit ti
gayadan ti kagayna. Ket naimbagan dagiti amin a nangsagid iti kagayna.
Marcos 7
1 Naguurnong iti ayan ni Jesus dagiti Fariseo ken sumagmamano a
mamaestro iti Linteg a naggapu idiay Jerusalem. 2 Nadlawda a
mangmangan ti sumagmamano nga adalan ni Jesus a dida nagbuggo, kas
naipakadawyan dagiti amin a Judio. ( 3 Ta annuroten dagiti Fariseo,
agraman dagiti dadduma a Judio dagiti pannursuro nga impatawid dagiti
ammada. Dida mangan no dida buggoan dagiti imada iti umisu a
panagbuggo. 4 Dida mangan iti aniaman nga aggapu iti tiendaan no saan a
mabuggoan nga umuna. Adu pay ti annurotenda a pannursuro dagiti
ammada, kas iti tumutop a panangugas kadagiti tasa, banga, lunglongan a
gambang ken papag.) 5 Iti kasta, sinaludsod dagiti Fariseo ken mamaestro
iti Linteg ken ni Jesus, “Apay a di tungpalen dagiti adalam ti pannursuro
nga impatawid dagiti amma, ta dida agbuggo a mangan?” 6 Insungbat ni
Jesus, “Pudno unay ti impadto ni Isaias maipapan kadakayo!
Aginsisingpetkayo kas insuratna, ‘Dagitoy a tattao,’ kuna ti Dios,
‘kunkunada a dayawendak babaen kadagiti bibigda. Ngem adayo kaniak ti
pusoda. 7 Awan serbi ti panagdaydayawda kaniak, gapu ta isursuroda
dagiti annuroten nga inaramid ti tao a kasla ketdin bukodko a linteg.’ 8
“Binaybay-anyon ti bilin ti Dios ket dagiti pannursuro ti tao ti
tungtungpalenyo.” 9 Ket intuloyna, “Nagsayaat ketdin ti panangilaksidyo
iti bilin ti Dios tapno mataginayon dagiti pannursuro a tinawidyo. 10 Ta
imbilin ni Moises, ‘Dayawem da amam ken inam,’ ken ‘Ti agsao iti dakes
ken ni ama wenno inana rebbengna a mapapatay.’ 11 Ngem isursuroyo
met a no adda mabalin nga ipaay ti maysa a tao kadagiti nagannak
kenkuana ket kunana, ‘Korban daytoy’ (kayatna a sawen, “Naikarin iti
Dios”), 12 saanen a masapul a tulonganna ida. 13 Iti kastoy, binaybay-
anyon ti sao ti Dios gapu iti pannursuro nga ipatawidyo kadagiti tattao.
Adu pay dagiti kastoy a bambanag nga ar-aramidenyo.” 14 Pinaasideg
manen ni Jesus dagiti tattao ket kinunana kadakuada: “Dumngegkayo
amin kaniak ket amirisenyo a nalaing daytoy. 15 Saan a ti ipauneg ti tao ti
mangtulaw kenkuana, no di ket dagiti agtaud iti pusona.” 17 Idi
pinanawan ni Jesus dagiti tattao ket simrek iti balay, sinaludsod dagiti
adalanna ti kaipapanan daytoy a pagsasao. 18 Kinuna ni Jesus kadakuada,
“Uray dakayo, diyo met aya maawatan? Saan a ti makan ti mangtulaw iti
tao, 19 ta saan a mapan iti pusona no di ket iti tianna ket kalpasanna
rummuar.” (Iti panagkuna ni Jesus iti kastoy, impakaammona a mabalin a
kanen ti amin a taraon.) 20 Insarunona pay, “Dagiti agtaud iti tao ti
mangtulaw kenkuana. 21 Ta manipud iti uneg ti puso ti tao, rumusing
dagiti dakes a panunot a pagtaudan dagiti maikaniwas a bambanag a kas iti
pannakiabig, panagtakaw, pammapatay, 22 pannakikamalala, panagagum
ken dadduma pay a kita ti kinadakes; panangallilaw, kinaderrep, kinaapal,
pammadpadakes, kinapalangguad ken kinamaag. 23 “Agtaud iti puso ti tao
amin dagitoy dakes a bambanag, ket isuda ti mangtulaw kenkuana.” 24
Pimmanaw ni Jesus sadiay ket napan iti lugar nga asideg iti siudad ti Tiro.
Nakidagus iti maysa a balay. Dina koma kayat nga adda makaammo iti
ayanna, ngem naammoan latta dagiti tattao. 25 Adda idi maysa nga ina.
Linuganan ti dakes nga espiritu ti anakna a babai. Nadamagna ti maipapan
ken ni Jesus ket dinagdagusna ti napan kenkuana sa nagparintumeng iti
sakaananna. 26 Griego daytoy a babai a nayanak idiay Fenicia, maysa nga
ili iti Siria. Nagpakpakaasi a paksiaten koma ni Jesus ti demonio a
nanglugan iti anakna. 27 Kinuna ni Jesus, “Masapul a pakanen nga umuna
dagiti ubbing ta saan a rumbeng nga alaen ti kanenda sa ipurruak kadagiti
aso.” 28 “Agpayso ta kunam, Apo,” kinuna ti babai, “ngem dagiti aso nga
adda iti sirok ti lamisaan kanenda met dagiti regreg dagiti ubbing.” 29
Kinuna ni Jesus, “Gapu iti daytoy a panagsaom, mabalinmon ti agawid.
Pimmanawen ti dakes nga espiritu iti anakmo!” 30 Nagawid ngarud ti
babai ket nasangpetanna ti anakna nga agid-idda a sitatalna, ta pudno a
pimmanawen ti demonio kenkuana. 31 Pimmanaw ni Jesus iti beddeng ti
Tiro. Nagna idiay Sidon ket nanglikaw iti sakup ti Decapolis agingga a
dimteng iti Dan-aw ti Galilea. 32 Inyeg dagiti tattao ken ni Jesus ti maysa
a lalaki a tuleng ken umel ket nagpakpakaasida kenkuana nga ipatayna ti
imana iti lalaki. 33 Inyadayo ni Jesus ti lalaki kadagiti tattao. Idi
agwaywayasdan insullatna dagiti tammudona kadagiti lapayag ti lalaki.
Kalpasanna, timmupra sana sinagid ti dila ti lalaki. 34 Tinangad ni Jesus ti
langit, nagsennaay sana kinuna iti lalaki, “Efata,” (kayatna a sawen,
“Maluktanka”). 35 Dagus a nakangngeg ti lalaki, limmukay ti dilana ket
saanen a marigatan nga agsao. 36 Imbilin ni Jesus kadagiti tattao a dida
ipadpadamag daytoy iti siasinoman; ngem no kasano ti
panangigunamgunamna a dida isarsarita, ad-adda pay ti gagarda a
nangipadpadamag. 37 Napalalo ti siddaaw dagiti amin a nakangngeg iti
daytoy a damag. Kinunkunada, “Nagsayaat ketdin ti amin nga aramidna!
Agasanna dagiti tuleng ken dagiti umel ket makangngeg ken makasaoda
manen.”
Marcos 8
1 Iti saan a nabayag kalpasanna, naguurnong manen dagiti adu a tattao.
Agsipud ta awan ti kanenda, inayaban ni Jesus dagiti adalanna. 2
“Maasianak kadagitoy a tattao,” kinunana. “Tallo nga aldawdan ditoy
yanko, ket ita, awanen ti kanenda. 3 No pagawidek ida a sibibisin,
matalimudawdanto iti dalan ta adayo ti naggapuan dagiti dadduma.” 4
“Sadino ditoy let-ang ti pangalaantayo iti umanay nga ipakan iti kastoy
kaadu a tattao?” sinaludsod dagiti adalanna. 5 “Adda mano a tinapayyo?”
sinaludsod ni Jesus. “Pito,” insungbatda. 6 Imbilin ni Jesus kadagiti tattao
nga agtugawda iti daga. Innalana dagiti pito a tinapay ket nagyaman iti
Dios. Kalpasanna, pinispisina sana inted kadagiti adalanna tapno
ibunongda kadagiti tattao. Ket tinungpalda ti imbilinna. 7 Adda pay
sumagmamano a babassit nga ikan. Nagyaman ni Jesus iti Dios gapu
kadagitoy sana inted kadagiti adalanna tapno ibunongda met kadagiti
tattao. 8-9 Nanganda amin ket nabsogda—aguppat a ribu ti bilang dagiti
tattao. Kalpasanna, innala dagiti adalan dagiti pito a basket a napno
kadagiti natda. Pinagawid ni Jesus dagiti tattao 10 sa dagus a limmugan iti
bangka agraman dagiti adalanna ket napanda iti sakup ti Dalmanuta. 11
Napan ti sumagmamano a Fariseo ken ni Jesus ket nakisuppiatda
kenkuana. Kas pangsuotda kenkuana, kiniddawda a mangiparang iti
milagro a pakakitaan a naggapu sadi langit ti pannakabalinna. 12
Nagsennaay ni Jesus iti nauneg ket kinunana, “Apay nga agkiddaw iti
milagro dagiti tattao kadagitoy nga al-aldaw? Kunak kadakayo nga awan ti
maited a pammaneknek kadagita a tattao!” 13 Pinanawanna ida ket
nagsubli iti bilog sa bimmallasiw iti dan-aw. 14 Nalipatan dagiti adalanna
ti nagbalon iti tinapay malaksid ti maysa nga adda kadakuada iti bangka.
15 “Agsiputkayo!” imballaag ni Jesus kadakuada. “Annadanyo ti lebadura
dagiti Fariseo, kasta met ti lebadura ni Herodes.” 16 Nagsasaritaanda
maipapan iti imbagana. “Kasta ti saona ta awan tinapaytayo,” kinunada.
17 Nadlaw daytoy ni Jesus ket kinunana, “Apay a pagsasaritaanyo ti
kaawan ti tinapayyo? Diyo pay kadi ammo wenno maawatan?
Nagnengnengkayo ketdin! 18 Adda matayo; dikayo kadi makakita? Adda
lapayagyo; dikayo kadi makangngeg? Diyo kadi malagip 19 idi pinispisik
dagiti lima a tinapay a kinnan dagiti limaribu a tattao? Mano a basket ti
tedda nga inurnongyo?” “Sangapulo ket dua,” insungbat dagiti adalan. 20
Sinaludsod ni Jesus, “Idi pinispisik dagiti pito a tinapay a kinnan dagiti
uppat a ribu a tattao, mano a basket ti tedda a naurnongyo?” “Pito,”
insungbatda. 21 Kinuna ni Jesus kadakuada, “Agpapan ita, diyo kadi pay
la maawatan?” 22 Simmangpet ni Jesus ken dagiti adalanna idiay
Betsaida. Impan ti sumagmamano a tattao ti maysa a bulsek a lalaki iti yan
ni Jesus. Impakpakaasida kenkuana a sagidenna ti bulsek. 23 Kinibin ni
Jesus ti bulsek ket inturongna iti ruar ti barrio. Kalpasan ti panangtuprana
kadagiti mata ti bulsek, impatayna dagiti imana kenkuana sana sinaludsod,
“Adda makitam?” 24 Kimmita ti lalaki iti aglawlawna. “Wen, makitak
dagiti tattao,” kinunana, “ngem kasda la kayo a magmagna.” 25 Sinagid
manen ni Jesus dagiti mata ti lalaki. Nagmulagat a naimbag ti lalaki ket
naimbaganen dagiti matana. Nalawagen ti panagkitana iti amin. 26 Idi
pagawiden ni Jesus ti lalaki, imbilinna, “Dika dumagdagasen iti barrio.”
27 Napan ni Jesus agraman dagiti adalanna kadagiti purpurok iti Cesarea
Filipos. Idi magmagnada, sinaludsodna kadakuada, “Ibagayo man kaniak,
siasinoak kano iti panagkuna dagiti tattao?” 28 “Sika kano ni Juan a
Mammuniag,” insungbatda. “Adda met dagiti agkuna a sika ni Elias. Adda
pay mangibaga a maysaka kadagiti profeta.” 29 “Ket dakayo met,”
sinaludsodna, “siasinoak iti panagkunayo?” “Sika ti Cristo,” insungbat ni
Pedro. 30 Imbilin ni Jesus kadakuada nga awan pangibagbagaanda iti
kinasiasinona. 31 Kalpasanna, rinugian ni Jesus nga insuro dagiti
adalanna: “Masapul nga agsagabanto iti napalalo ti Anak ti Tao.
Laksidento dagiti panglakayen, dagiti panguloen a papadi ken dagiti
mamaestro iti Linteg. Mapapatayto, ngem agungar met laeng kalpasan ti
tallo nga aldaw.” 32 Nalawag ti panangibagana kadakuada iti daytoy. Isut’
gapuna nga inyadayo bassit ni Pedro ni Jesus sana binabalaw. 33 Ngem
timmallikud ni Jesus, kinitana dagiti adalanna ket inungtanna ni Pedro.
“Adaywannak, Satanas,” kinunana, “ta saan nga agtaud iti Dios ti
pampanunotem no di ket agtaud iti tao.” 34 Pinaasideg ni Jesus dagiti
tattao ken dagiti adalanna. “Ti agtarigagay a sumurot kaniak,” kinunana,
“masapul a tallikudanna ti bagina, ibaklayna ti krusna ket surotennak. 35
Ta ti siasinoman a mangipatpateg iti biagna, mapukawnanto; ngem ti
mangyawat iti biagna gapu kaniak ken iti ebanghelio, maisalakannanto. 36
Adda aya magunggona ti tao no matagikuana ti entero a lubong ngem
mapukawna met ti biagna? Awan! 37 Awan ti mabalin nga ited ti tao a
pangsubbot iti biagna. 38 Ngarud, ti mangibain kaniak ken dagiti saok iti
daytoy managbasol ken awanan pammati a kaputotan, ibainto met ti Anak
ti Tao inton umay iti dayag ni Amana a kuyogen dagiti nasantoan nga
angheles.”
Marcos 9
1 Kinunana pay, “Laglagipenyo daytoy! Adda sumagmamano kadakayo
ditoy a saanto pay a matay agingga a makitada ti yaay ti Pagarian ti Dios
agraman ti amin a pannakabalin.” 2 Kalpasan ti innem nga aldaw, inkuyog
ni Jesus da Pedro, Santiago ken Juan ket simmang-atda iti nangato a
bantay. Sadiay, nagbalbaliw ti langa ni Jesus iti imatangda. 3 Makapurar ti
pudaw dagiti pagan-anayna ket awan ti siasinoman ditoy lubong a
makapapudaw kas iti kapudawda. 4 Pagammoan, nakita dagiti tallo nga
adalan da Elias ken Moises a makisasao ken ni Jesus. 5 Nagsao ni Pedro
ket kinunana ken ni Jesus: “Maestro, nagsayaaten ti kaaddatayo ditoy!
Mangbangonkami ketdi iti tallo a kalapaw: maysa ti para kenka, maysa ti
para ken ni Moises, ket ti maysa para ken ni Elias.” 6 Kasta unay ngamin
ti buteng dagiti adalan ket saan nga ammo ni Pedro ti tumutop a sawenna.
7 Nagparang ti ulep a nanglinong kadakuada ket adda nangngegda a timek
a naggapu iti ulep. Kinunana, “Daytoy ti Anakko a dungdungngoek.
Dumngegkayo kenkuana.” 8 Dinagdagusda nga inwaras ti panagkitada,
ngem awanen sabali a nakitada no di laeng ni Jesus. 9 Idi sumalsalogda iti
bantay, imbilin ni Jesus kadakuada, “Awan pangibagbagaanyo iti
naimatanganyo. Ibagayonto laeng daytoy kalpasan ti panagungar ti Anak ti
Tao.” 10 Tinungpalda dayta a bilin, nupay nagsisinnaludsodda, “Ania ti
kayat a sawen ti ‘panagungar kadagiti natay’?” 11 Inimtuodda kenkuana,
“Apay a kuna dagiti mamaestro iti Linteg a masapul nga umay nga umuna
ni Elias?” 12 Insungbat ni Jesus, “Pudno nga umay nga umuna ni Elias
tapno tarimaanenna amin a banag. Ngem apay a nailanad iti Nasantoan a
Surat nga agsagaba iti napalalo ti Anak ti Tao ket maumsinto? 13 Ibagak
kadakayo nga immayen ni Elias, ket inaramid dagiti tattao ti amin a
kinaykayatda kenkuana, kas naisurat maipapan kenkuana.” 14 Idi
agsublida iti ayan dagiti dadduma nga adalan, nakitada ti nakaad-adu a
tattao iti likmutda ken sumagmamano a mamaestro iti Linteg a
makisinsinnuppiat kadakuada. 15 Apaman a nakita dagiti tattao a
sumungad ni Jesus, naragsakanda ket nagtatarayda a kimmablaaw
kenkuana. 16 “Ania ti pagsusuppiatanyo?” sinaludsod ni Jesus. 17
“Maestro,” kinuna ti maysa kadagiti tattao, “inyegko kenka ti anakko a
lalaki ta linuganan ti dakes nga espiritu ket saan a makasao. 18 No sumro
ti dakes nga espiritu, itublakna ti ubing. Aglabutab ti ngiwatna, agngariet
ken sumkil ti entero a bagina. Kiniddawko kadagiti adalam a paksiatenda
ti dakes nga espiritu, ngem dida nabaelan.” 19 Kinuna ni Jesus kadakuada,
“Tattao nga awanan pammati! Kasano pay kabayag ti kaaddak iti
dennayo? Kasano pay kabayag ti panaganusko kadakayo? Yegyo man
kaniak ta ubing.” 20 Inyasidegda kenkuana ti ubing. Apaman a nakita ti
dakes nga espiritu ni Jesus, pinagkuyegyegna ti ubing. Napasag ti ubing iti
daga, naggulgulagol nga aglablabutab ti ngiwatna. 21 “Kaano pay a kastoy
ti maar-aramid kenkuana?” inimtuod ni Jesus iti ama ti ubing. “Manipud
pay idi ubing,” insungbat ti amana. 22 “Masansan nga isebba ti dakes nga
espiritu iti apuy wenno ilemmesna iti danum tapno patayenna. No
kabaelam, pangngaasim ta tulongannakami!” 23 “Apay a kunam ‘No
kabaelam?’ Amin a banag kabaelan ti tao nga adda pammatina,” kinuna ni
Jesus. 24 “Adda pammatik ngem saan a naan-anay,” dagus nga inyikkis ti
ama. “Punnoam ti pagkurangan ti pammatik.” 25 Nadlaw ni Jesus dagiti
tattao nga agdidinnuron nga umasideg kenkuana. Binilinna ti dakes nga
espiritu, “Sika a tuleng ken umel nga espiritu, pumanawka itoy nga ubing
ket dimo subsublianen.” 26 Nagikkis ti dakes nga espiritu, pinagkissiwna
ti ubing sa pimmanaw. Kasla bangkayen ti ubing ket adu ti nagkuna:
“Natayen!” 27 Ngem iniggaman ni Jesus ti ima ti ubing sana binangon.
Timmakder ti ubing. 28 Idi nakastreken ni Jesus iti balay, sinaludsod a
sililimed dagiti adalanna, “Apay a dimi napaksiat ti espiritu?” 29 “Kararag
laeng ti makapaksiat iti dayta a kita ti espiritu,” insungbat ni Jesus, “ket
awanen sabali.” 30 Pimmanawda iti dayta a lugar ket limmasatda idiay
Galilea. Kayat ni Jesus a saan a maammoan dagiti tattao ti ayanna 31
agsipud ta isursurona daytoy kadagiti adalanna: “Mayawatto ti Anak ti
Tao kadagiti mangpapatayto kenkuana. Ngem agungarto iti maikatlo nga
aldaw.” 32 Ngem saan a maawatan dagiti adalanna ti kaipapanan daytoy a
pannursurona ket nagamakda nga agsaludsod kenkuana. 33 Dimtengda
idiay Capernaum ket idi addadan iti balay, sinaludsod ni Jesus kadakuada,
“Ania ti nagsusuppiatanyo iti dalan?” 34 Ngem nagulimekda, ta iti dalan
nagsusuppiatanda no siasino kadakuada ti kangrunaan. 35 Nagtugaw ni
Jesus. Inayabanna dagiti sangapulo ket dua nga adalan sana kinuna
kadakuada, “Ti agtarigagay nga isu ti umuna, masapul nga agpaudi, ket
agserbi iti amin.” 36 Nangala iti maysa nga ubing ket pinagtakderna iti
sangoananda. Kalpasanna, sinaklotna sana kinuna, 37 “Ti umawat iti
maysa kadagiti kakastoy nga ubbing gapu kaniak, siak ti awatenna. Ket ti
umawat kaniak, saan laeng a siak ti awatenna no di pay ket ti nangibaon
kaniak.” 38 “Maestro,” kinuna ni Juan ken ni Jesus, “nakitami ti maysa a
tao a mangpakpaksiat kadagiti demonio babaen iti panangaramatna iti
naganmo. Pinaritanmi gapu ta ditay met kadua.” 39 Imbaga ni Jesus
kadakuada, “Diyo parparitan, ta awan ti agaramid iti milagro babaen iti
panangaramatna iti naganko sa kalpasanna agsao kadagiti dakes a banag
maipapan kaniak. 40 Ta kaduatayo ti siasinoman a di bumusor kadatayo.
41 Laglagipenyo a ti siasinoman a mangpainum kadakayo iti sangabaso a
danum gapu ta taonakayo ni Cristo, awatennanto nga awaten ti
gunggonana.” 42 “Ti siasinoman a pakaigapuan ti panagbasol ti maysa
kadagitoy nga ubbing a mamati kaniak, nasaysayaat koma no maigalut ti
dakkel a gilingan a bato iti tengngedna sa maitappuak iti taaw. 43 Ngarud,
no ti imam ti pakaigapuan ti panagbasolmo, putdem. Nasaysayaat a
pukolka a sumrek iti biag nga agnanayon ngem ti addaanka iti dua nga ima
ket mapanka idiay infierno nga ayan ti apuy a di maiddep. 45 No ti sakam
ti pakaigapuan ti panagbasolmo, putdem. Nasaysayaat a maymaysa ti
sakam a sumrek iti biag nga agnanayon ngem ti addaanka iti dua a saka
ket maitappuakka idiay infierno. 47 No ti matam ti pakaigapuan ti
panagbasolmo, suatem. Nasaysayaat a buldingka a sumrek idiay Pagarian
ti Dios ngem ti addaanka iti dua a mata ket maitappuakka idiay infierno.
48 Sadiay, ‘saan a matay dagiti igges nga agkaan kadakuada ket ti apuy di
met maiddep.’ 49 “Ta ti tunggal maysa magugoranto iti apuy. 50 Nasayaat
ti asin; ngem no awanen ti apgadna, kasano ti panangpaapgadyo manen?
Maaddaankayo koma iti asin ti pannakigayyem, ket agkakappiakayo.”
Marcos 10
1 Kalpasan ti ipapanaw ni Jesus iti dayta a lugar, napan idiay Judea ken
binallasiwna ti karayan Jordan. Adu manen a tattao ti napan iti yanna ket
insurona ida a kas iti masansan nga ar-aramidenna. 2 Immasideg kenkuana
ti sumagmamano a Fariseo tapno suotenda. Sinaludsodda, “Ibagam man:
Ipalubos aya ti Linteg nga isina ti lalaki ti asawana?” 3 Simmungbat ni
Jesus babaen ti maysa met a saludsod, “Ania kadi ti imbilin ni Moises
kadakayo?” 4 Insungbatda, “Impalubos ni Moises a mangisurat ti lalaki iti
pakakitaan iti panagsina sana papanawen ti asawana.” 5 Kinuna ni Jesus
kadakuada: “Insurat ni Moises daytoy a linteg nga agpaay kadakayo gapu
ta narigatkayo a makasursuro. 6 Ngem idi punganay, idi pinarsua ti Dios
daytoy lubong, naisao, ‘Inaramid ti Dios ida a lalaki ken babai,’ kas kuna
ti Nasantoan a Surat. 7 ‘Ket daytoy ti gapuna a panawanto ti lalaki dagiti
nagannak kenkuana ket makitiponto iti asawana; 8 agbalindanton a
maymaysa. Iti kasta, saandan a dua, no dida ket maymaysa a bagi.’ 9
Ngarud, saan a pagsinaen ti tao ti pinagtipon ti Dios.” 10 Idi nagsublida iti
balay, pinalutpot dagiti adalan kenkuana daytoy a banag. 11 Kinuna ni
Jesus kadakuada, “Ti lalaki a mangisina iti asawana ket kalpasanna
mangasawa iti sabali, makabasol iti pannakikamalala a maikaniwas iti
umuna nga asawana. 12 Kasta met, ti babai a mangisina iti asawana sa
makiasawa iti sabali, makabasol iti pannakikamalala.” 13 Adda tattao a
nangyeg kadagiti ubbing ken ni Jesus tapno ipatayna koma ti imana
kadakuada, ngem pinaritan ida dagiti adalan. 14 Idi madlaw ni Jesus ti
inaramid dagiti adalanna, nakaunget ket kinunana kadakuada,
“Palubosanyo dagiti ubbing nga umay kaniak. Diyo paritan ida ta dagiti
kas kadakuada ti agtagikua iti Pagarian ti Dios. 15 Laglagipenyo a dinto
makastrek iti Pagarian ti Dios ti siasinoman a di umawat iti daytoy a
Pagarian a kas iti panangawat ti maysa nga ubing.” 16 Kalpasanna,
sinaklotna dagiti ubbing ket impatayna ti imana iti tunggal maysa
kadakuada sana binendisionan ida. 17 Agrubrubbuat ni Jesus a pumanaw
sadiay idi adda maysa a lalaki a nagtaray a napan kenkuana.
Nagparintumeng iti sangoananna, ket sinaludsodna, “Naimbag a Maestro,
ania ti aramidek tapno magun-odko ti biag nga agnanayon?” 18 Kinuna ni
Jesus, “Apay nga awagannak iti naimbag? Awan ti naimbag no di laeng ti
Dios. 19 Ammom dagiti bilbilin: ‘Dika mamapatay. Dika makikamalala.
Dika agtakaw. Dika agsaksi iti ulbod. Dika agsuitik. Agraemka kadagiti
nagannak kenka.’” 20 “Maestro,” insungbat ti tao, “manipud kinaubingko
tinungtungpalko amin dagitoy a bilbilin.” 21 Minatmatan ni Jesus a
siaayat ket kinunana kenkuana, “Adda maysa a pagkurangam. Inka ilako ti
amin a sanikuam samo ited ti paglakoam kadagiti napanglaw, ket addanto
kinabaknangmo sadi langit. Kalpasanna, umayka sumurot kaniak.” 22 Idi
nangngegna daytoy, limmiday ti rupana ti lalaki ket silaladingit a
pimmanaw agsipud ta nabaknang unay. 23 Inwaras ni Jesus ti panagkitana
sana kinuna kadagiti adalanna, “Nagrigat ketdin a sumrek dagiti
nabaknang iti Pagarian ti Dios!” 24 Nasdaaw dagiti adalan gapu kadagitoy
a saona, ngem intuloy ni Jesus ti nagkuna, “Annakko, anian a nagrigat ti
sumrek iti Pagarian ti Dios! 25 Nalaklaka ti ilulusot ti kamelio iti abut ti
dagum ngem ti iseserrek ti baknang iti Pagarian ti Dios.” 26 Ad-adda
manen ti siddaaw dagiti adalan, ket nagsisinnaludsodda, “Siasino
ngaruden ti maisalakan?” 27 Minatmatan ni Jesus ida sana kinuna: “Saan a
maaramid ti tao daytoy, ngem kabaelan ti Dios. Ta kabaelan nga aramiden
ti Dios dagiti amin a bambanag.” 28 “Adtoy,” kinuna ni Pedro, “binaybay-
anmi amin ket simmurotkami kenka.” 29 Kinuna ni Jesus kadakuada,
“Pudno dayta ket ibagak kadakayo, siasinoman a mangpanaw iti balay
wenno kakabsat wenno nagannak wenno annak wenno dagdagana gapu
kaniak ken iti Naimbag a Damag, 30 ad-adunto ti awatenna ditoy a biag.
Awatennanto ti nasursurok pay ngem ginasgasut a balbalay, kakabsat,
nagannak, annak ken dagdaga—agraman pannakaidadanes; ket iti
mapasungad a panawen, awatennanto ti biag nga agnanayon. 31 Ngem adu
dagiti umun-una ita a maud-udinto, ket adu dagiti maud-udi ita nga umun-
unanto.” 32 Addan idi da Jesus ken dagiti adalanna iti dalan a sumang-at
idiay Jerusalem. Immun-una ni Jesus ngem dagiti madandanagan nga
adalan ket sumarsaruno met dagiti sibubuteng a tattao. Inyadayo manen ni
Jesus dagiti sangapulo ket dua nga adalan sana sinarita dagiti
mapasamakto kenkuana. 33 Kinunana, “Denggenyo, sumang-attayo idiay
Jerusalem ket mayawatto sadiay ti Anak ti Tao kadagiti panguloen a
papadi ken kadagiti mamaestro iti Linteg. Ikeddengdanto a mapapatay
sadanto yawat kadagiti Hentil 34 a mangang-angaw, mangtuptupra,
mangsapsaplit ken mangpapatay kenkuana. Ngem agungarto kalpasan ti
tallo nga aldaw.” 35 Immasideg ken ni Jesus da Santiago ken Juan nga
annak ni Zebedeo, ket kinunada, “Maestro, adda koma dawatenmi kenka.”
36 “Ania ti kayatyo nga ipaayko kadakayo?” sinaludsod ni Jesus. 37
“Ipalubosmo koma nga inton agtugawka iti tronom idiay nadayag a
Pagarian, makikatugawkamto kenka, ti maysa iti makannawanmo ket ti
sabali iti makannigidmo,” indawatda. 38 “Diyo ammo ti dawdawatenyo,”
imbaga ni Jesus. “Kabaelanyo kadi ti uminum iti kopa a paginumak?
Kabaelanyo aya ti mabuniagan a kas iti pannakabuniagko?” 39 “Wen,
kabaelanmi,” insungbatda. Kinuna ni Jesus kadakuada, “Kabaelanyo ti
uminum iti kopa a paginumak ken mabuniagan a kas iti pannakabuniagko.
40 Ngem awan ti karbengak a mangpili no siasinonto ti agtugaw iti
makannawanko wenno iti makannigidko. Ti Dios ti mangted kadagitoy
kadagiti nakaisaganaanna.” 41 Nakapungtot dagiti sangapulo nga adalan
kada Santiago ken Juan idi nadamagda daytoy. 42 Isut’ gapuna nga
inayaban ni Jesus dagiti sangapulo ket dua ket kinunana, “Pagaammoyo a
dagiti maibilang nga agturay kadagiti Hentil adipenenda dagiti iturayanda,
ket dagiti panguloda adipenenda met dagitoy nga agturay. 43 Ngem saan
koma a kasta ti aramidenyo. Ti agtarigagay nga agpangulo, masapul nga
agserbi kadakayo amin. 44 Ket ti agtarigagay nga isu ti kangrunaan,
masapul nga isu ti adipenyo. 45 Ta uray ti Anak ti Tao saan nga immay a
pagserbian, no di ket tapno agserbi ken yawatna ti biagna a pangsubbot
kadagiti adu a tattao.” 46 Dimteng ni Jesus ken dagiti adalanna agraman
dagiti adu a tattao idiay Jerico. Idi a pumampanawda sadiay, adda nga
agtugtugaw iti igid ti dalan ti maysa nga agpalpalama, ni Bartimeo a
bulsek nga anak ni Timeo. 47 Apaman a nangngegna nga adda ni Jesus a
taga-Nazaret, impukkawna, “Jesus nga Anak ni David, kaasiannak kadi!”
48 Adu kadagiti tattao ti nagunget kenkuana ket imbagada nga agulimek,
ngem inyad-addana ketdi ti nangipukkaw, “Anak ni David, kaasiannak
kadi!” 49 Nagsardeng ni Jesus. “Ayabanyo man ditoy,” kinunana.
Inayabanda ngarud ti bulsek. “Agragsakka!” kinunada kenkuana.
“Tumakderka, ta paayabannaka.” 50 Inwarsi ni Bartimeo ti kagayna,
timmakder a dagus ket immasideg ken ni Jesus. 51 “Ania ti kayatmo nga
aramidek kenka?” sinaludsod ni Jesus. “Maestro, makakitaak koma!”
insungbat ti bulsek. 52 “Inkan,” kinuna ni Jesus. “Pinaimbagnaka ti
pammatim.” Nakakita a dagus ti bulsek ket simmurot ken ni Jesus.
Marcos 11
1 Idi sumungsungadda idiay Jerusalem, ket addadan idiay Bantay Olivo,
iti nagbaetan dagiti ili a Betfage ken Betania, pinauna ni Jesus dagiti dua
nga adalanna. 2 Imbilinna, “Inkayo iti masungad a barrio. Apaman a
makadanonkayo sadiay, masarakanyonto ti sigagalut nga urbon ti asno a di
pay nasaksakayan. Warwaranyo ket yegyo ditoy. 3 No adda agsaludsod
kadakayo no apay a warwaranyo ti urbon, ibagayo kenkuana, ‘Ti Apo
masapulna a pagsakayan; paisublinanto met laeng a dagus.’” 4 Napanda
ngarud ket nasarakanda ti maysa nga urbon ti asno nga adda iti kalsada
ken sigagalut iti ridaw ti maysa a balay. Idi warwarwaranda ti urbon, 5
sinaludsod kadakuada ti sumagmamano a tattao nga agtaktakder sadiay,
“Apay a warwaranyo ti urbon?” 6 Imbaga dagiti adalanna ti imbilin ni
Jesus kadakuada ket pinalubosan ida dagiti tattao. 7 Impanda ti urbon iti
yan ni Jesus. Inikkatda dagiti kagayda ket inyap-apda iti bukot ti urbon sa
nagsakay ni Jesus. 8 Adu a tattao ti nangyaplag kadagiti kagayda iti dalan.
Nangala met dagiti dadduma kadagiti narukbos a sangsanga nga adda iti
taltalon ket inyaplagda iti dalan. 9 “Madaydayaw ti Dios!” impukpukkaw
dagiti tattao a magmagna iti sangoanan ni Jesus, ken dagiti adda iti
likudanna. “Bendisionan koma ti Dios ti umay iti nagan ti Apo! 10
Bendisionan koma ti Dios ti umay a pagarian ni amatayo a David!
Madaydayaw ti Dios!” 11 Simrek ni Jesus idiay Jerusalem. Napan iti
Templo ket kinitana dagiti amin nga adda iti aglawlaw. Ngem gapu ta
mumalemen, napan idiay Betania agraman dagiti sangapulo ket dua nga
adalan. 12 Iti sumuno nga aldaw, idi agsubsublida a naggapu idiay
Betania, nabisinan ni Jesus. 13 Nakitana iti adayo ti narukbos a kayo nga
igos. Inasitganna ti kayo bareng no adda masarakanna a bunga. Ngem
pasig met a bulong ti nakitana agsipud ta saan pay idi a panagbubunga ti
igos. 14 “Manipud ita,” kinuna ni Jesus iti kayo, “dikanto agbungan!”
Nangngeg dagiti adalanna ti sinaona. 15 Idi dumtengda idiay Jerusalem,
napan ni Jesus idiay Templo. Pinapanawna dagiti agtagtagilako ken
aggatgatang iti uneg ti Templo. Binalintuagna dagiti lamisaan dagiti
agsuksukat iti kuarta, kasta met dagiti tugaw dagiti aglaklako iti kalapati.
16 Pinaritanna pay ti siasinoman nga adda awitna a lumasat iti paraangan
ti Templo. 17 Kalpasanna, insurona dagiti tattao, “Nailanad iti Nasantoan
a Surat a kuna ti Dios, ‘Managananto ti balayko iti balay a pagkararagan
nga agpaay kadagiti amin a tattao.’ Ngem pinagbalinyo a rukib dagiti
tulisan!” 18 Nadamag dagiti panguloen a papadi ken dagiti mamaestro iti
Linteg daytoy a pasamak. Ngarud, impampamuspusanda ti
panangpapatayda ken ni Jesus. Nagbutengda kenkuana agsipud ta
nagsidsiddaawan dagiti amin a tao ti pannursurona. 19 Idi sumipngeten,
pimmanaw ni Jesus iti siudad agraman dagiti adalanna. 20 Iti agsapa, idi
magmagnada iti dalan, nakitada ti kayo nga igos a nagangon agraman
dagiti ramutna. 21 Nalagip ni Pedro ti pannakailunod ti kayo. “Maestro,”
kinunana ken ni Jesus, “kitaem! Nagangon ti igos nga inlunodmo idi
kalman!” 22 Insungbat ni Jesus kadakuada, “Laglagipenyo daytoy! No
adda pammatiyo iti Dios, 23 mabalinyo a kuna iti daytoy a bantay,
‘Umaliska ditoy ket tumpuakka idiay baybay.’ No saankayo la ket nga
agduadua, ngem patienyo a matungpalto ti kunayo, maaramidto kadakayo.
24 Gapu iti daytoy, ibagak kadakayo: Tunggal agkararagkayo ket adda
dawatenyo, patienyo a naawatyon, ket maitedto ti aniaman a dawatenyo.
25 Tunggal tumakderkayo nga agkararag, pakawanenyo ti siasinoman a
nakabasol kadakayo tapno pakawanento met ni Amayo sadi langit dagiti
basbasolyo.” 27 Nagsublida manen idiay Jerusalem. Idi agpagnapagna ni
Jesus iti uneg ti Templo, inasitgan dagiti panguloen a papadi, dagiti
mamaestro iti Linteg ken dagiti panglakayen. 28 Sinaludsodda kenkuana,
“Ania ti kalintegam a mangaramid kadagitoy? Siasino ti nangted kenka iti
turay a mangaramid kadagitoy?” 29 Insungbat ni Jesus, “Adda saludsodek
kadakayo, ket no masungbatandak, ibagak met no siasino ti nangted iti
kalintegak nga agaramid kadagitoy. 30 Ibagayo man, naggapuan ti turay ni
Juan a mangbuniag: naggapu iti Dios wenno iti tao?” 31
Nagsisinnaludsodda, “Ania ti isungbattayo? No kunatayo a naggapu iti
Dios, kunananto, ‘Apay ngarud a dikay namati ken ni Juan?’ 32 Ngem no
kunatayo a naggapu iti tao…” (Nagbutengda kadagiti tattao, ta bigbigenda
ni Juan a maysa a profeta.) 33 Iti kasta, insungbatda ken Jesus, “Dimi
ammo.” “Diak met ngarud ibaga kadakayo no ania ti kalintegak nga
agaramid kadagitoy,” kinuna ni Jesus.
Marcos 12
1 Inrugi ni Jesus ti nagsao kadakuada babaen kadagiti pangngarig: “Adda
idi maysa a tao a nagmula iti adu nga ubas. Inaladanna ti kaubasan,
nangaramid iti pagpespesan iti ubas sa nangipatakder iti torre a
pagwanawanan. Kalpasanna, impaabangna ti kaubasan kadagiti
makitaltalon sa nagbiahe iti sabali a daga. 2 “Idi dumteng ti panagbuburas
iti ubas, imbaonna ti maysa nga adipenna a mapan kadagiti makitaltalon
tapno alaenna ti bingayna. 3 Ngem tiniliw dagiti makitaltalon ti naibaon,
kinabkabilda, ket pinagawidda nga ima-ima. 4 “Sabali manen nga adipen
ti imbaon ti akinkukua iti kaubasan, ket minalo dagiti makitaltalon ti ulona
sada pinabpabainan. 5 “Nangibaon manen iti sabali nga adipen, ket
pinatayda. Kasta a kasta ti namay-anda kadagiti adu pay a naibaon.
Pinangpang-orda dagiti dadduma, ket pinatayda dagiti sabali. 6
Maymaysan ti natda a maibaonna. Isu ti dungdungngoenna nga anak a
lalaki. Kamaudiananna, imbaonna kadakuada ta kinunana, ‘Awan duadua
a raemendanto toy anakko.’ 7 Ngem kinuna dagiti makitaltalon iti maysa
ken maysa kadakuada, ‘Daytoyen ti agtawid. Umaykayo ta papatayentayo,
ket kukuatayton ti tawidenna!’ 8 “Tiniliwda ti anak ket pinatayda sada
imbelleng ti bangkayna iti ruar ti kaubasan. 9 “Anianto ngarud ti aramiden
ti akinkukua iti kaubasan?” sinaludsod ni Jesus. “Mapannanto papatayen
dagidiay a tattao ket ipasublatnanto ti kaubasan kadagiti sabali a
makitaltalon. 10 Nabasayo kadin daytoy a paset ti Nasantoan a Surat? ‘Ti
bato nga imbelleng dagiti agipatpatakder, Nagbalin a kangrunaan a bato.
11 Inaramid daytoy ti Apo, Ket anian a nakaskasdaaw iti imatangtayo!’”
12 Pinadas dagiti panguloen dagiti Judio a patiliw ni Jesus gapu ta
naawatanda a sinaona daytoy a pangngarig a maibusor kadakuada. Ngem
agsipud ta nagbutengda kadagiti adu a tattao, binaybay-anda ni Jesus ket
pinanawanda. 13 Naibaon ken ni Jesus ti sumagmamano a Fariseo ken
Herodiano tapno palab-oganda babaen kadagiti saludsodda. 14 Napanda
kenkuana ket kinunada, “Maestro, ammomi a saanka nga agul-ulbod.
Dimo ikankano no ania ti pampanunoten dagiti tattao agsipud ta awan
idumdumam, no di ket isurom kadakuada ti pudno a pagayatan ti Dios.
Ibagam man ngarud kadakami no maisalungasing iti Linteg ti panagbayad
iti buis iti Emperador? Agbayadkami kadi wenno saan?” 15 Ngem nadlaw
ni Jesus ti sikapda ket kinunana, “Apay a suotendak? Ikkandak man iti
bagi ti pirak ta kitaek.” 16 Inikkanda iti bagi ti pirak. “Siasino ti
akinladawan ken akinnagan iti daytoy?” sinaludsod ni Jesus. “Ti
Emperador,” insungbatda. 17 “Itedyo ngarud iti Emperador dagiti kukua ti
Emperador,” kinuna ni Jesus. “Itedyo met iti Dios dagiti kukua ti Dios.”
Ket nagsiddaawda kenkuana. 18 Napan ken ni Jesus ti sumagmamano
kadagiti Saduceo. (Saan a mamati dagiti Saduceo nga agungar dagiti
natay.) 19 Kinunada, “Maestro, insurat ni Moises daytoy a linteg
kadatayo, ‘No matay ti maysa a lalaki ket mapanawanna ti asawana nga
awan anakda, rebbeng ti kabsatna nga asawaen ti balo tapno aganakda iti
pannakaanak daydi nagawan.’ 20 “Adda idi pito nga agkakabsat a lallaki.
Nangasawa ti inauna ngem natay nga awan putotna. 21 Inasawa ngarud ti
maikadua ti balo, ngem natay met nga awan putotna. Kasta met laeng ti
naaramid iti maikatlo, 22 ken kadagiti sumarsaruno a kakabsatna.
Nagsasaruno dagitoy pito nga agkakabsat a nangasawa iti babai ket
natayda nga awanan annak. Kamaudiananna, natay met ti babai. 23
“Ngarud,” sinaludsodda, “inton agungarda iti aldaw ti panagungar,
siasinonto ti akin-asawa iti babai, idinto ta inasawa met amin dagiti pito
nga agkakabsat?” 24 Insungbat ni Jesus, “Agbiddutkayo. Ammoyo no
apay? Gapu ta diyo ammo ti Nasantoan a Surat wenno ti pannakabalin ti
Dios. 25 Ta inton agungar dagiti natay, didanto agaassawa, ta kasladanto
kadagiti angheles sadi langit. 26 No maipapan iti pannakapagungar dagiti
natay, diyo aya nabasa iti Libro ni Moises ti maipapan iti sumsumged a
kayo? Naisurat a kinuna ti Dios ken ni Moises, ‘Siak ti Dios ni Abraham,
ti Dios ni Isaac, ken ti Dios ni Jacob.’ 27 Kayatna a sawen nga isu ti Dios
dagiti sibibiag, saan a Dios dagiti natay. Agbiddutkayo iti napalalo.” 28
Nangngeg ti maysa a maestro iti Linteg ti panagsusuppiatda. Nakitana a
napintas ti sungbat ni Jesus kadagiti Saduceo, ket immasideg kenkuana.
“Ania kadi ti kangrunaan kadagiti bilbilin?” sinaludsodna. 29 Insungbat ni
Jesus, “Daytoy ti kangrunaan a bilin, ‘Denggem, Israel! Ti Apo a Diostayo
isu laeng ti Apo. 30 Ayatem ti Apo a Diosmo iti amin a pusom, iti amin a
kararuam, iti amin a panunotmo ken iti amin a pigsam.’ 31 Ti maikadua a
kangrunaan a bilin isu daytoy: ‘Ayatem ti padam a tao a kas iti bagim.’
Awanen ti bilin a nangnangruna ngem dagitoy.” 32 Kinuna ti maestro iti
Linteg. “Agpayso dayta, Maestro. Pudno ti kunam a ti Apo laeng ti Dios,
ket awan sabali a dios no di isu. 33 Ket masapul a ti tao ayatenna ti Dios
iti amin a puso, iti amin a panunot ken iti amin a pigsana; ket masapul nga
ayatenna ti padana a tao a kas iti panagayatna iti bagina. Naim-imbag nga
adayo a tungpalen dagitoy dua a bilin ngem ti mangidaton iti Dios kadagiti
animal ken kadagiti dadduma pay a sakrifisio iti altar.” 34 Nadlaw ni Jesus
a simmungbat a sisisirib ti maestro iti Linteg, isut’ gapuna a kinunana
kenkuana, “Saanka nga adayo iti Pagarian ti Dios.” Kalpasan daytoy,
awanen ti nakaitured nga agsaludsod ken Jesus. 35 Kabayatan ti
panangisuro ni Jesus idiay Templo, sinaludsodna daytoy: “Apay a kuna
dagiti mamaestro iti Linteg a ti Cristo ket agtaud iti kaputotan ni David?
36 Kinuna ni David met laeng, babaen iti paltiing ti Espiritu Santo:
‘Kinuna ti Apo iti Apok: Agtugawka ditoy makannawanko, Agingga a
maparmekko dagiti kabusormo. Ket addada iti babaem.’ 37 No ‘Apo’
kuna ni David kenkuana, kasano ngarud ti panagtaud ti Cristo iti kaputotan
ni David?” Siraragsak dagiti adu a tattao a nangdengngeg ken ni Jesus. 38
Bayat ti panangisursurona kadakuada, kinunana: “Annadanyo dagiti
mamaestro iti Linteg. Magustoanda ti magna a sikakawes iti nagayad ken
makablaawan a siraraem iti publiko. 39 Pilienda dagiti kangrunaan a
tugaw kadagiti sinagoga ken katan-okan a lugar iti fiestaan. 40
Gundawayanda dagiti balo a babbai, ket takawenda dagiti sanikuada sada
ipakpakita ti atiddog a panagkararagda. Nadagdagsento ti dusada.” 41 Idi
agtugtugaw ni Jesus iti asideg ti pagitintinnagan iti daton idiay Templo,
pinalpaliiwna ti panagipisok dagiti tattao iti kuartada. Adu a babaknang ti
nagitinnag iti nawadwad a kuarta. 42 Adda balo a babai a napanglaw a
nangitinnag iti dua a siping. 43 Inayaban ni Jesus dagiti adalanna.
Kinunana, “Ibagak kadakayo, ad-adu ti intinnag ti napanglaw a balo iti
pagitintinnagan iti daton ngem ti intinnag dagiti dadduma. 44 Ta
intinnagda dagiti sobra ti kinabaknangda. Ngem ti balo, numan pay
napanglaw, intedna ti kakaisuna nga adda kenkuana—intedna ti amin a
mabalinna a pagbiag.”
Marcos 13
1 Idi pumampanaw ni Jesus idiay Templo, maysa kadagiti adalanna ti
nagkuna kenkuana, “Maestro, kitaem! Nagpipintas ketdin dagiti bato ken
dagiti patakder!” 2 “Makitam dagitoy dadakkel a patakder?” insungbat ni
Jesus. “Awanto ti uray maysa a bato ditoy a mabati iti yanna. Marbadanto
amin.” 3 Idi agtugtugaw ni Jesus idiay Bantay Olivo a kasumbangir ti
Templo, sililimed a napan kenkuana da Pedro, Santiago, Juan ken Andres.
4 “Ibagam man kadakami no kaanonto a mapasamak daytoy?”
insaludsodda kenkuana. “Anianto ti mapasamak a pakakitaan a dimtengen
ti tiempo a pannakatungpal amin dagitoy?” 5 Imballaag ni Jesus,
“Agannadkayo! Diyo ipalubos nga adda mangallilaw kadakayo. 6 Adunto
ti umay ket aramatenda ti naganko a kunkunada, ‘Siak ti Cristo!’ ket
adunto ti allilawenda. 7 Dikay agdanag inton mangngegyo ti arimbangaw
ti gubat ken damdamag maipapan kadagiti dadduma a gubgubat iti adayo.
Masapul a mapasamak dagitoy, ngem dida kayat a sawen a dimtengen ti
panungpalan. 8 Aggugubatto dagiti nasion, kasta met dagiti pagpagarian.
Addanto ginggined kadagiti nadumaduma a lugar. Umayto ti bisin.
Pangrugian laeng dagitoy ti panagsagaba a kas iti panagpasikal ti
agpasngay. 9 “Agannadkayo. Tiliwen ken idarumdakayto. Saplitendakayto
iti uneg dagiti sinagoga. Maisaklangkayto kadagiti agtuturay ken ar-ari
gapu kaniak tapno paneknekanyo kadakuada ti Naimbag a Damag. 10
Ngem sakbay a dumteng ti panungpalan, masapul a maikasaba ti Naimbag
a Damag kadagiti amin a tattao. 11 No matiliw ken maidarumkayo, saanyo
a pakadanagan no anianto ti sawenyo. Maipaltiing kadakayo iti dayta a
kanito. Ta dagiti isaoyonto saan nga agtaud kadakayo no di ket iti Espiritu
Santo. 12 Dagiti tattao papapataydanto dagiti mismo a kakabsatda, ket
kastanto met ti aramiden dagiti amma kadagiti annakda. Dagiti annak
busorendanto dagiti nagannak kadakuada ket papapataydanto ida. 13
Guraendakayto dagiti amin a tattao gapu kaniak. Ngem maisalakanto ti
siasinoman a makaibtur agingga iti panungpalan.” 14 “Makitayonto ‘Ti
Nakabutbuteng a Mangdadael’ nga adda iti di rumbeng a pagsaadanna
(maawatan koma ti agbasa ti kaipapanan daytoy). No agnaedkayo idiay
Judea iti dayta a tiempo, masapul a kumamangkayo kadagiti bambantay.
15 Umulog a dagus ti adda iti tuktok ti balay ket saanen a sumrek iti
balayna a mangala iti mabalinna nga itugot. 16 Ti adda iti taltalon saanen
nga agawid a mangala iti kagayna. 17 Kadagita nga aldaw, kakaasinto
dagiti masikog ken dagiti agpaspasuso. 18 Ikarkararagyo iti Dios a saan
koma a mapasamak dagitoy iti tiempo ti nepnep. 19 Ta ti rigat kadagita
nga aldaw, saan pay a napaspasamak manipud pannakaparsua ti lubong.
Dinto met masunotanen iti uray kaanoman. 20 Ngem pinabassit ti Apo ti
bilang dagita nga aldaw, ta no saan, awan koma ti tao a makalasat. Ngem
gapu kadagiti pinilina, kinissayanna ti bilang dagita nga aldaw. 21
“Daytoy ti gapuna a no adda agkuna, ‘Kitaenyo, adda ditoy ti Cristo!’
wenno ‘Kitaenyo, adda sadiay!’ diyo patpatien. 22 Ta agparangto dagiti
sinan-cristo ken dagiti sinan-profeta, ket agipakitadanto kadagiti
pagilasinan ken datdatlag tapno yaw-awanda dagiti pinili ti Dios. 23
Agannadkayo! Impakaammokon kadakay amin dagitoy sakbay a
mapasamakda.” 24 “Kadagita nga aldaw, kalpasan ti panawen ti rigat,
agsipngetto ti init, dinto agraniag ti bulan, 25 agtinnagto dagiti bituen, ket
dinto agsusurot ti urnos dagiti pannakabalin iti tangatang. 26 Kalpasanna,
agparangto ti Anak ti Tao iti rabaw ti ulep nga umay a napnoan iti
pannakabalin ken dayag. 27 Ibaonnanto dagiti angheles a mapan kadagiti
uppat a suli ti daga tapno ummongendanto dagiti tattao a pinili ti Dios
manipud iti amin a paset ti lubong.” 28 “Adalenyo ti sursuro a maadaw iti
kayo nga igos: no aguggot ken agrusingen dagiti bulongna, ammoyo nga
agbaliwen ti panawen. 29 Kasta met nga inton makitayo a mapasamak
dagitoy, ammoyo nga asidegen ket dandanin mangrugi. 30 Laglagipenyo a
mapasamakto amin dagitoy sakbay a matay dagiti amin a tattao iti daytoy
a kaputotan. 31 Mapukawto ti langit ken ti daga, ngem pulos a dinto
mapukaw dagiti saok.” 32 “Ngem no maipapan iti yaay dayta nga aldaw
wenno oras, awan ti makaammo. Saan nga ammo dagiti angheles sadi
langit wenno ti Anak. Ti laeng Ama ti makaammo. 33 Agannadkayo.
Agsaganakayo, ta diyo ammo no kaano a dumteng dayta a tiempo. 34
“Mayarig daytoy iti maysa a tao nga agbiahe iti adayo a lugar.Sakbay a
pumanaw, italekna ti balayna kadagiti adipenna. Ikkanna ti tunggal maysa
iti pagrebbengan ket bilinenna nga agridam ti agaywan iti ruangan. 35
“Agridamkayo ngarud, ta diyo ammo no kaano ti isasangpet ti akimbalay:
mabalin nga iti sardam wenno iti tengnga ti rabii wenno iti parbangon
wenno iti agsapa. 36 Wen, agsaganakayo amangan no sumangpet a kellaat
ket madanonnakayo a matmaturog. 37 “Ti ibagak kadakayo, isaok met
kadagiti amin a tattao: Agsaganakayo!”
Marcos 14
1 Dua pay nga aldaw, dumtengen ti Paskua ken ti Fiesta ti Tinapay nga
awan Lebadurana. Agsapsapul dagiti panguloen a papadi ken mamaestro
iti Linteg iti nalimed a panangtiliw ken panangpapatayda ken ni Jesus. 2
“Ditay iranrana iti fiesta, amangan no rumsua ti riribuk,” kinunada. 3
Adda idi ni Jesus idiay Betania iti balay ni Simon nga agkukutel. Idi
madama a mangmangan, dimteng ti maysa a babai a nakaiggem iti
sangabotelia a nardo, maysa a nangina a bangbanglo. Binuongna ti botelia
sana imbukbok ti bangbanglo iti ulo ni Jesus. 4 Nakapungtot ti
sumagmamano a tattao nga adda sadiay ket kinunada iti maysa ken maysa,
“Apay a sinayangna ti bangbanglo? 5 Nailako koma iti nasurok a
tallogasut a denario a maited kadagiti napanglaw.” Kasta unay ti
panangbabalawda iti babai, 6 ngem kinuna ni Jesus, “Baybay-anyo! Apay
a babalawenyo? Nasayaat unay ti impaayna kaniak. 7 Kankanayon nga
adda dagiti napanglaw iti dennayo, ket uray ania a kanito matulonganyo
ida. Ngem saan a kankanayon nga addaak iti arpadyo. 8 Inaramidna ti
kabaelanna. Sinapsapoannan toy bagik a maisagana iti pannakaitanem. 9
Kinapudnona, kunak kadakayo: Sadinoman iti entero a lubong a
pakaikaskasabaanto ti Naimbag a Damag, masarsaritanto ti inaramid
daytoy a babai a pakalaglagipan kenkuana.” 10 Maysa ni Judas Iscariote
kadagiti sangapulo ket dua nga adalan. Napan kadagiti panguloen a papadi
tapno makitulag a yawatna ni Jesus kadakuada. 11 Naragsakanda a
nakangngeg iti imbagana, ket inkarida nga ikkan iti kuarta. Isut’ gapuna a
binirbiroken ni Judas ti gundawayna a mangliput ken ni Jesus. 12 Umuna
idi nga aldaw ti Fiesta ti Tinapay nga awan Lebadurana ket maidaton
dagiti urbon a karnero nga agpaay iti Paskua. Sinaludsod dagiti adalan ni
Jesus, “Sadino ti kayatmo a pangisaganaanmi iti pangrabiim iti Paskua?”
13 Imbaon ni Jesus ti dua kadagiti adalanna. Kinunana, “Inkayo idiay
siudad ket masabatyonto ti maysa a tao a nakaawit iti sangakaramba a
danum. 14 Surotenyo iti balay a serkanna ket kunaenyonto iti akimbalay:
‘Kuna ti Maestro, Sadino ti kuarto a pangananminto kadagiti adalan iti
pangrabii ti Paskua?’ 15 Ipakitananto kadakayo ti maysa a nalawa a kuarto
nga akingngato, naisagana ken addaan kadagiti masapsapul. Sadiay ti
pangisaganaanyo iti pangrabiitayo.” 16 Pimmanaw dagiti adalanna.
Napanda iti siudad ket nasarakanda amin kas imbaga ni Jesus ket
insaganada ti pangrabii a pangrambak iti Paskua. 17 Idi rumabiin, dimteng
sadiay ni Jesus ken dagiti sangapulo ket dua nga adalanna. 18 Kabayatan ti
pannanganda, kinuna ni Jesus, “Ibagak kadakayo ti pudno: maysa
kadakayo a makilanglanglang kaniak ita ti mangliputto kaniak.” 19
Nagliday dagiti adalanna ket maysa-maysa ti nagsaludsod kenkuana, “Siak
kadi dayta kunkunam?” 20 Insungbat ni Jesus, “Maysa kadakayo a
sangapulo ket dua a makisawsawsaw kaniak iti tinapay iti malukongko. 21
Matayto ti Anak ti Tao kas naisurat maipapan kenkuana, ngem kaasinto
pay ti mangliput iti Anak ti Tao. Naim-imbag pay koma a saan a nayan-
anak dayta a tao!” 22 Idi mangmanganda, nangala ni Jesus iti tinapay ket
kalpasan ti panagyamanna iti Dios, pinisina sana inted kadagiti adalanna.
“Alaenyo ket kanenyo. Daytoy ti bagik,” kinunana. 23 Nangala ni Jesus iti
kopa, nagyaman iti Dios sana inyawat kadakuada, ket imminumda amin.
24 Kinunana kadakuada: “Daytoy ti darak a mamatalged iti tulag ti Dios,
ti darak a maiparukpok nga agpaay iti adu a tattao. 25 Kinapudnona,
kunak kadakayo, diakto uminumen iti arak ti ubas agingga iti dayta nga
aldaw nga uminumak iti baro a tubbog ti ubas iti Pagarian ti Dios.” 26
Kalpasanna, nagkantada iti maysa nga himno sada rimmuar a napan idiay
Bantay Olivo. 27 Kinuna ni Jesus kadakuada: “Dakay amin panawandakto
ta kuna ti Nasantoan a Surat, ‘Patayento ti Dios ti agpaspastor ket
mawarawaranto dagiti karnero.’ 28 Ngem kalpasan ti pannakapagungarko,
umun-unaakto ngem dakayo a mapan idiay Galilea.” 29 “Uray
pumanawdanto amin,” insungbat ni Pedro, “dikanto panawan.” 30 Kinuna
ni Jesus kenkuana, “Laglagipem daytoy: Sakbay ti maikadua a
panagtaraok ti kawitan iti daytoy a rabii, namitlonton nga imbagam a
dinak am-ammo.” 31 “Uray no matayak a mairaman kenka,” sipapasnek
nga insungbat ni Pedro, “pulos a dikanto paglikudan.” Kasta met ti kinuna
dagiti dadduma nga adalan. 32 Dimteng ni Jesus ken dagiti adalanna iti
maysa a disso a managan Getsemani. Kinunana kadakuada,
“Agtugawkayo ditoy bayat ti panagkararagko.” 33 Inkuyogna da Pedro,
Santiago ken Juan. Nagdanag ken nariribukan. 34 “Arigna a matayak gapu
iti nakaro a ladingit,” kinunana kadakuada. “Agbatikayo ditoy ket
agbantaykayo.” 35 Immadayo bassit sa nagpakleb iti daga, ket inkararagna
a no mabalin koma maliklikanna dayta nga oras ti panagsagaba. 36
“Ama,” indawatna, “Ama, no mabalin koma, ilisinak iti daytoy kopa ti
panagsagaba. Ngem saan a ti pagayatak ti maaramid, no di ket ti
pagayatam.” 37 Idi agsubli ni Jesus, nadanonna a matmaturog dagiti tallo
nga adalan. “Simon,” kinunana ken ni Pedro, “matmaturogka kadi? Dika
aya makapagpuyat iti maysa nga oras?” 38 Kinunana kadakuada: “Agpuot
ken agkararagkayo tapno saankayo a matnag iti sulisog. Natudio ti
espiritu, ngem nakapuy ti lasag.” 39 Immadayo manen ni Jesus ket
nagkararag. Inulitna ti dawatna. 40 Nagsubli manen kadagiti adalan ket
nadanonna ida a nakaturog, ta makaturturogda la unay. Dida ammo no
ania ti ibagada kenkuana. 41 Idi kapamitlo ni Jesus ti agsubli, kinunana
kadakuada: “Ania? Matmaturog ken agin-inanakayo pay laeng? Husto
daytan! Dimtengen ti oras! Kitaenyo, mayawaten ti Anak ti Tao kadagiti
managbasol. 42 Bumangonkayo ta intayon. Kitaenyo, adtoyen ti
mangliput kaniak!” 43 Agsasao pay laeng ni Jesus idi sumangpet ni Judas,
maysa kadagiti sangapulo ket dua nga adalan. Kimmuyog kenkuana dagiti
adu a tattao a nagtagikampilan ken nagtagipang-or. Imbaon ida dagiti
panguloen a papadi, dagiti mamaestro iti Linteg, ken dagiti panglakayen.
44 Sakbay ti ipapanda, inted ti mangliput daytoy a pagilasinan kadagiti
kimmuyog kenkuana: “Daydiay agekak isu ti sapsapulenyo. Tiliwen ken
ipanawyo ket guardiaanyo a naimbag.” 45 Immasideg a dagus ni Judas
ken ni Jesus. “Maestro!” kinunana sana inagkan iti namin-adu. 46
Tiniliwda ni Jesus ket tinengngelda a nalaing. 47 Ngem inasut ti maysa
kadagiti agtaktakder sadiay ti bunengna sana tinagbat ti adipen ti
Kangatoan a Padi ket napingasan ti lapayagna. 48 Nagsao ni Jesus ket
kinunana kadakuada, “Tulisanak aya, ta nagtagikampilan ken
nagtagipang-orkayo nga umay mangtiliw kaniak? 49 Inaldaw a
nakipulpulapolak kadakayo ken nangisursuroak idiay Templo ket didak
tiniliw. Ngem masapul a matungpal ti Nasantoan a Surat.” 50 Nagtataray
amin dagiti adalan ket binaybay-anda ni Jesus. 51 Sumursurot ken ni Jesus
ti maysa nga agtutubo a lalaki a nakakagay laeng iti linen a lupot.
Tiniliwda, 52 ngem nakalapsut iti kagayna ket timmaray a lamolamo. 53
Impanda ni Jesus iti balay ti Kangatoan a Padi a naguurnongan dagiti
panguloen a papadi, dagiti panglakayen ken dagiti mamaestro iti Linteg.
54 Simmurot ni Pedro nga adda a sumarsaruno iti adayo. Simrek iti
paraangan ti balay ti Kangatoan a Padi ket sadiay, nakitugaw kadagiti
guardia ken nakiinudo. 55 Nagbirbirok dagiti panguloen a papadi ken ti
entero a Sanhedrin kadagiti pammaneknek a maibusor ken ni Jesus tapno
papapatayda, ngem awan ti nasarakanda. 56 Adu ti nagsao iti ulbod a
maikontra kenkuana ngem saan a nagtutunos dagiti pammaneknekda. 57
Timmakder ti sumagmamano a lallaki ket kastoy ti ulbod a pammaneknek
nga imbagada: 58 “Nangngegmi nga insaona, ‘Rebbaekto daytoy a
Templo a binangon dagiti tattao, ket iti uneg ti tallo nga aldaw
mangbangonakto iti sabali a saan nga aramid ti tao.’” 59 Uray isuda
kaskasdi a saan a nagtutunos dagiti pammaneknekda. 60 Timmakder ti
Kangatoan a Padi iti sangoananda. “Awan aya ti maisungbatmo kadagiti
ipabpabasol dagitoy a tattao?” sinaludsodna ken ni Jesus. 61 Ngem
nagulimek ni Jesus ket saan a simmungbat. “Sika kadi ti Cristo nga Anak
ti Nasantoan a Dios?” sinaludsod manen ti Kangatoan a Padi. 62 “Wen,
siak!” insungbat ni Jesus. “Makitayonto ti Anak ti Tao a situtugaw iti
makannawan ti Mannakabalin-amin. Makitayonto nga umay kadagiti ulep
ti langit.” 63 Rinay-ab ti Kangatoan a Padi ti kagayna. “Ania pay la ti
pakasapulantayo kadagiti saksi?” kinunana. 64 “Nangngegyon dagiti
saona a maikaniwas iti Dios. Ania ti pangngeddengyo?”
Sangsangkamaysa ti pangngeddengda: nakabasol ni Jesus ket masapul a
mapapatay. 65 Sumagmamano kadakuada ti nangtupratupra ken ni Jesus
ket inabbonganda ti rupana sada dinanogdanog. “Pugtoam man no siasino
ti nangdisnog kenka?” kinunada. Kalpasanna, innala dagiti guardia sada
ginagara iti tungpa. 66 Adda pay la ni Pedro iti paraangan idi umasideg ti
maysa a babai nga adipen ti Kangatoan a Padi. 67 Idi makitana ni Pedro
nga agin-inudo, miningminganna sana kinuna, “Uray sika,
nakikadkaduaka met ken ni Jesus a taga-Nazaret.” 68 “Diak ammo ken
diak maawatan ti ibagbagam,” inlibak ni Pedro. Ket rimmuar a nagturong
iti ruangan. Apag-isu met a nagtaraok ti maysa a kawitan. 69 Nakita
manen sadiay ti babai nga adipen ket inulitna kadagiti adda sadiay,
“Maysa kadakuada daytoy a lalaki!” 70 Ngem naglibak manen ni Pedro.
Iti saan a mabayag, kinuna met kenkuana dagiti adda sadiay, “Saanmo a
mailibak a maysaka kadakuada, ta taga-Galileaka met.” 71 “Uray
dusaennak ti Dios no saan a pudno ti ibagbagak!” insapata ni Pedro. “Diak
am-ammo dayta tao nga ibagbagayo!” 72 Pagammoan, nagtaraok manen ti
kawitan ket nalagip ni Pedro ti kinuna ni Jesus kenkuana: “Sakbay ti
maikadua a panagtaraok ti kawitan, namitlonton nga imbagam a dinak am-
ammo.” Ket naganug-og gapu iti ladingitna.
Marcos 15
1 Idi bumigaten, nagmimiting dagiti panguloen a papadi agraman dagiti
panglakayen, dagiti mamaestro iti Linteg ken amin a kamkameng ti
Sanhedrin. Tinulagda no ania ti aramidenda. Pinungoda ni Jesus sada
impan ken ni Pilato. 2 “Sika kadi ti Ari dagiti Judio?” sinaludsod
kenkuana ni Pilato. “Nasaomon,” insungbat ni Jesus. 3 Adu ti impabasol
kenkuana dagiti panguloen a papadi. 4 “Awan kadi ti maisungbatmo?”
sinaludsod manen ni Pilato. “Denggem dagiti nakaad-adu nga
ipabpabasolda kenka!” 5 Ngem saan manen a simmungbat ni Jesus, ket
nasdaaw ni Pilato. 6 Tunggal Fiesta ti Paskua, kadawyan ni Pilato a
wayawayaanna ti siasinoman a balud a dawaten dagiti tattao. 7 Iti dayta a
tiempo, adda lalaki nga agnagan Barrabas a sibabalud a kaduana dagiti
immalsa a nakapapatay bayat ti riribuk. 8 Idi naguummong dagiti tattao iti
sangoanan ni Pilato, dinawatda nga ipaayna koma kadakuada ti ar-
aramidenna iti tunggal fiesta. 9 “Kayatyo a wayawayaak kadakayo ti Ari
dagiti Judio?” sinaludsod ni Pilato. 10 Ammona ngamin a gapu iti apal
dagiti panguloen a papadi, inyawatda kenkuana ni Jesus. 11 Ngem
sinugsogan dagiti panguloen a papadi dagiti tattao tapno dawatenda a ni
Barrabas laengen ti wayawayaanna kadakuada. Nagsao manen ni Pilato
kadagiti tattao. 12 “Ania ngarud ti kayatyo nga aramidek iti kunkunayo
nga Ari dagiti Judio?” dinamagna. 13 “Ilansam iti krus!” impukkawda. 14
“Ania kadi ti basolna?” kinuna ni Pilato. “Ilansam iti krus!” inyad-addada
ketdi nga impukkaw. 15 Gapu ta kayat ni Pilato a pagustoan dagiti tattao,
winayawayaanna ni Barrabas. Kalpasanna, pinasaplitna ni Jesus sana
inyawat kadagiti soldado tapno ilansada iti krus. 16 Inserrek dagiti soldado
ni Jesus iti pangukoman (iti palasio ti Gobernador) sada inayaban dagiti
dadduma a soldado. 17 Kinagayanda ni Jesus iti nalabaga a lupot.
Nagaramidda iti korona a sisiitan ket imbalangatda kenkuana. 18
Kalpasanna, nagindadayawda a nangkablaaw kenkuana: “Agbiag ti Ari
dagiti Judio!” 19 Tinik-otik-olanda ti ulona iti runo. Tinupratupraanda.
Nagparintumengda a naginrurukbab kenkuana. 20 Idi nalpasdan a nagang-
angawan, inikkatda ti nalabaga a kagay. Imbadoda met laeng kenkuana ti
pagan-anayna sada inruar tapno ilansada iti krus. 21 Iti dalan, nasabatda ni
Simon a taga-Cirene nga ama da Alejandro ken Rufo. Naggapu ni Simon
iti away ket mapan iti siudad. Pinilit dagiti soldado a baklayenna ti krus ni
Jesus. 22 Impanda ni Jesus iti disso a managan Golgota, a kayatna a
sawen, “Lugar ti Bangabanga.” 23 Inikkanda iti arak a nalaokan iti mirra,
ngem dina ininum. 24 Inlansada iti krus. Kalpasanna, biningbingayda ti
pagan-anayna, babaen iti panagbibinnunotda no ania ti alaen ti tunggal
maysa. 25 Alas nuebe iti bigat idi ilansada. 26 Daytoy ti naisurat a
naipabasol kenkuana: “Ti Ari dagiti Judio.” 27 Inggiddanda met nga
inlansa iti krus ti dua a tulisan: ti maysa iti makannawan ni Jesus, ket ti
sabali iti makannigidna. 29 Nagngirsi dagiti tattao nga aglabas.
Pinagsasaoanda ni Jesus: “Kinunkunam a rebbaem ti Templo samo
bangonen met laeng iti uneg ti tallo nga aldaw. 30 Isalakanmo man ngarud
ta bagim ket bumabaka iti krus.” 31 Nakipagang-angaw dagiti panguloen a
papadi, ken dagiti mamaestro iti Linteg. “Insalakanna dagiti dadduma
ngem dina maisalakan ti bagina,” kinunkunada. 32 “No isu ti Cristo nga
Ari ti Israel, kitaentayo man a bumaba ita iti krus tapno mamatitayo
kenkuana.” Nakipaglalais met dagiti padana a nailansa iti krus. 33 Iti
tengnga ti aldaw, nagsipnget iti entero a daga ket nagpaut iti tallo nga oras.
34 Iti alas tres iti malem, impukkaw ni Jesus, “Eloi, Eloi, lama sabaktani?”
a kayatna a sawen, “Diosko, Diosko, apay a binaybay-annak?” 35
Nangngeg daytoy ti sumagmamano nga adda sadiay ket kinunada,
“Denggenyo, ay-ayabanna ni Elias!” 36 Adda nagtaray a napan nangala iti
espongha. Impasagepsepna iti suka sana inkabil iti sukdal ket
intanggayana ken ni Jesus. “Aguraykayo!” kinunana. “Kitaentayo man no
umay ni Elias a mangibaba kenkuana iti krus!” 37 Nagikkis ni Jesus iti
napigsa ket nauyosen ti biagna. 38 Napigis ti kurtina a naibengbeng iti
Templo: naggudua manipud iti ngato agingga iti baba. 39 Iti sangoanan ti
krus, adda nga agtaktakder ti kapitan dagiti soldado. Naimatanganna ti
pannakatay ni Jesus. “Pudno gayam nga anak ti Dios daytoy a tao,”
kinunana. 40 Iti pangadaywen bassit, adda met babbai a mangbuybuya iti
mapaspasamak. Adda kadagitoy da Maria Magdalena ken Salome ken ni
Maria nga ina da Jose ken Santiago nga ub-ubing. 41 Simmursurotda ken
ni Jesus idi adda idiay Galilea, ket nagserserbida kenkuana. Adu pay dagiti
sabsabali a babbai nga adda sadiay a kimmuyog kenkuana idi napan idiay
Jerusalem. 42 Dandanin sumipnget idi dumteng ni Jose a taga-Arimatea,
43 maysa a madaydayaw a kameng ti Sanhedrin. Makipagpaspasungad
met iti Pagarian ti Dios. Agsipud ta Aldaw a Panagsagana idi, kayatna a
sawen, aldaw sakbay ti Panaginana, situtured ni Jose a napan ken ni Pilato
tapno dawatenna ti bangkay ni Jesus. 44 Nasdaaw ni Pilato idi
maammoanna a natayen ni Jesus. Inayabanna ti kapitan dagiti soldado ket
sinaludsodna kenkuana no nabayagen a natay ni Jesus. 45 Pinatalgedan ti
kapitan a natayen ni Jesus. Impalubos ni Pilato nga alaen ni Jose ti
bangkay. 46 Gimmatang ni Jose iti linen a lupot. Imbabana ti bangkay ni
Jesus, binungonna iti lupot ket inkabilna iti tanem a naikungkong iti bato.
Kalpasanna, nangitulid iti dakkel a bato a pinangserrana iti tanem. 47
Siiimatang idi da Maria Magdalena ken Maria nga ina ni Jose. Nakitada ti
nakaitaneman ni Jesus.
Marcos 16
1 Idi nakalabasen ti Aldaw a Panaginana, gimmatang da Maria
Magdalena, Salome ken Maria nga ina ni Santiago iti bangbanglo a
pangsapsapoda iti bangkay ni Jesus. 2 Iti agsapa, idi lumgaken ti init, iti
umuna nga aldaw ti lawas, napanda iti nakaitaneman ni Jesus. 3 Iti dalan,
kinunada iti maysa ken maysa, “Siasinonto ti kasaotayo a mangitulid iti
bato a naiserra iti tanem?” 4 Ngem idi kitaenda ti tanem, nakitada a
natuliden ti bato. Ket nakadakdakkel! 5 Simrekda iti tanem ket nasdaawda
ta adda nakitada nga agtutubo a lalaki nga agtugtugaw iti makannawan
ken nakakawes iti puraw. 6 Kinuna ti lalaki, “Dikay masdaaw! Ammok a
sapsapulenyo ni Jesus a taga-Nazaret a nailansa iti krus. Awan ditoy.
Napagungaren! Kitaenyo, adtoy ti disso a nangikabilanda kenkuana. 7 Ita,
inkay ibaga daytoy a mensahe kadagiti adalanna, agraman ni Pedro:
‘Umun-unanto ngem dakayo a mapan idiay Galilea. Makitayonto sadiay a
kas kinunana kadakayo.’” 8 Iti kasta, nagtataray dagiti babbai a rimmuar
iti tanem. Napalalo ti kigtot ken butengda. Awan ti siasinoman a
nangibagaanda iti napasamak ta kasta unay ti butengda. 9 Napan dagiti
babbai kada Pedro ken dagiti gagayyemna, ket iti ababa a sarita,
impadamagda amin a naibaga kadakuada. 10 Kalpasanna, imbaon ni Jesus
dagiti adalanna a mapan iti amin a lugar a mangiwaragawag iti nasantoan
ken saan nga agpatingga a damag iti agnanayon a pannakaisalakan. 11
Uray nangngegda a kinunana a sibibiag ni Jesus ken nagparang kenkuana,
saanda latta a namati. 12 Kalpasan daytoy, iti sabali a wagas, nagparang ni
Jesus kadagiti dua nga adalan a magmagna a mapan iti away. 13 Nagsubli
dagiti dua ket impakaammoda kadagiti kakaduada a nagparang ni Jesus,
ngem saanda a namati kadakuada. 14 Kamaudiananna, nagparang ni Jesus
kadagiti sangapulo ket maysa nga adalan idi mangmanganda. Inungtanna
ida gapu iti kaawan ti pammatida ken iti katangken ti uloda, ta dida namati
kadagiti nakakita kenkuana a nagungaren. 15 Imbagana kadakuada:
“Inkay iti entero a lubong ket ikasabayo ti Naimbag a Damag kadagiti
amin a parsua. 16 Ti mamati ken mabuniagan, maisalakanto. Ngem ti di
mamati, madusanto. 17 Maitedto kadagiti mamati dagitoy a pannakabalin:
Iti naganko, paksiatendanto dagiti demonio. Agsaodanto kadagiti sabali a
pagsasao. 18 Uray no agiggemda kadagiti uleg, wenno uminumda iti
sabidong, didanto maan-ano. Ipataydanto ti imada kadagiti masakit ket
umimbagdanto.” 19 Kalpasan ti pannakisao ni Apo Jesus kadakuada,
nayuli sadi langit, ket nagtugaw iti makannawan ti Dios. 20 Napan
nangaskasaba dagiti adalan iti amin a disso. Timmultulong ti Apo
kadakuada ket pinasingkedanna ti kinapudno ti panangaskasabada babaen
kadagiti milagro a naaramid.
Lucas 1
1 Patgek a Teofilo, Adun ti nagsurat maipapan kadagiti napaspasamak
kadatayo, 2 kas nadamagtayo kadagidi nakakita kadagitoy manipud idi
damo ken kadagidi nangikasaba iti mensahe. 3 Kalpasan ti panangadalko a
naimbag kadagitoy manipud panangrugida, napanunotko nga isurat kenka
ti naurnos a pakasaritaanda. 4 Kayatko ngamin a maammoam ti amin a
kinapudno maipapan kadagiti amin a naisuro kenka. 5 Idi a ni Herodes ti
ari idiay Judea, adda padi nga agnagan Zacarias a kameng ti bunggoy
dagiti papadi nga ipanguloan ni Abias. Elisabet ti nagan ti asawana a
nagtaud met iti kaputotan ni Aaron a padi. 6 Iti imatang ti Dios, nagbiag a
sililinteg dagiti agassawa. Awan pagkurangan ti panagtungpalda kadagiti
amin a paglintegan ken bilin ti Apo. 7 Awan anakda agsipud ta lupes ni
Elisabet. Maysa pay, lakay ken baketdan. 8 Iti maysa nga aldaw, dimteng
ti batang ti bunggoy ni Zacarias nga agserbi iti Templo, ket madama nga
ar-aramidenna ti rebbengna a kas padi. 9 Kas kadawyan dagiti papadi,
nagbibinnunotda no siasino ti sumrek iti Templo ti Apo a mangpuor iti
insenso iti altar. Napagasatan ni Zacarias ket simrek iti Templo ti Apo. 10
Bayat ti pannakapuor ti insenso iti uneg, agkarkararag met dagiti tattao iti
ruar. 11 Maysa nga anghel ti Apo ti nagparang ken ni Zacarias. Nagtakder
iti makannawan ti altar a pakapupuoran ti insenso. 12 Nariribukan ni
Zacarias idi makitana ket nagbuteng iti napalalo. 13 Ngem kinuna ti
anghel kenkuana, “Dika agbuteng, Zacarias! Impangag ti Dios ti
kararagmo. Aganakto ni Elisabet nga asawam. Lalakinto ti anakyo ket
panaganamto iti Juan. 14 Agragsakkanto iti kasta unay, ket adunto met ti
agragsak iti pannakaipasngayna. 15 Ta naindaklanto a tao iti imatang ti
Apo. Masapul a dinto uminum iti arak wenno uray ania a makabartek.
Mapnonto iti Espiritu Santo uray adda pay laeng iti tian 16 ket adunto
kadagiti Israelita ti pagsublienna iti Apo a Diosda. 17 Umun-unanto a
maibaon ngem ti Apo. Nabileg ken mannakabalinto a kas ken ni profeta
Elias. Pagtutunosennanto manen dagiti amma ken dagiti annak.
Pagsubliennanto iti kinalinteg dagiti nasukir. Isaganananto dagiti tattao a
maipaay iti Apo.” 18 “Kasanonto ti pannakaammok a mapasamak
daytoy?” sinaludsod ni Zacarias iti anghel. “Lakayakon ket baket metten
ni asawak.” 19-20 “Siak ni Gabriel,” kinuna ti anghel. “Agserserbiak iti
imatang ti Dios a nangibaon kaniak a makisao ken mangidanon kenka iti
daytoy a damag. Ngem dika met mamati iti mensahek a matungpalto iti
naituding a tiempo. Gapu ta dika mamati, agumelkanto ket dikanto
makasao agingga iti aldaw a matungpal dagiti sinaok.” 21 Kabayatanna,
masmasdaaw dagiti tattao nga agur-uray ken ni Zacarias agsipud ta
nabayag unay ti kaaddana iti Templo. 22 Idi rummuar, saanen a makasao,
ket daytoy ti nakaammoanda nga adda nagparang kenkuana iti Templo.
Gapu ta saanen a makasao, nagsensenias lattan kadakuada. 23 Nagawid ni
Zacarias kalpasan ti batangna nga agserbi iti Templo. 24 Iti saan a
mabayag, nagsikog ni Elisabet nga asawana, ket lima a bulan a di
rimrimmuar iti balay. 25 “Kamaudianna, tinulongannak ti Apo,” kinuna ni
Elisabet. “Inikkatnan ti pakaibabainak iti imatang ti tao.” 26 Iti maikanem
a bulan ti sikog ni Elisabet, imbaon ti Dios ni Gabriel nga anghel a mapan
iti maysa nga ili ti Galilea, a managan Nazaret. 27 Naibaon ni Gabriel iti
maysa a birhen a naitulag a mayasawa iti lalaki nga agnagan Jose a
nagtaud iti kaputotan ni ari David. Maria ti nagan ti balasang. 28
Nagparang ti anghel ken ni Maria ket kinunana, “Kappia koma ti adda
kenka. Agragsakka ta agtaeng ti Apo kenka ket naindaklan ti
bendisionna.” 29 Napalalo ti pannakariribuk ni Maria iti insao ti anghel.
“Ania ngata ti kaipapanan daytoy?” kinunana iti bagina. 30 Ngem kinuna
ti anghel kenkuana: “Dika agbuteng, Maria, ta pinaraburannaka ti Dios. 31
Agsikogkanto. Ipasngaymonto ti maysa a lalaki, ket panaganamto iti
Jesus. 32 Naindaklanto. Maawaganto iti Anak ti Kangatoan. Pagbalinento
ni Apo Dios nga ari, a kas ken ni David a kapuonanna. 33 Iturayannanto iti
agnanayon dagiti kaputotan ni Jacob, ket dinto agpatingga ti panagarina.”
34 Kinuna ni Maria iti anghel: “Kasano a maaramid daytoy idinto a
maysaak a birhen?” 35 “Umayto kenka ti Espiritu Santo,” insungbat ti
anghel. “Salinongannakanto ti pannakabalin ti Dios. Daytoy ti gapuna a
nasantoanto ti ubing, ket maawaganto iti Anak ti Dios. 36 Malagipmo ni
kabagiam nga Elisabet a kunkunada a lupes? Masikog nupay baket
unayen. Innem a bulanen ti sikogna. 37 Ta awan ti saan a kabaelan ti Dios
nga aramiden.” 38 “Adtoyak nga adipen ti Apo,” kinuna ni Maria.
“Maaramid koma kaniak, kas insaom.” Ket pimmanaw ti anghel. 39 Iti
saan a mabayag, nagrubbuat ni Maria ket nagdardaras a napan iti maysa
nga ili iti kabambantayan ti Judea. 40 Napan iti balay ni Zacarias ket
kinablaawanna ni Elisabet. 41 Apaman a nangngeg ni Elisabet ti kablaaw
ni Maria, naggaraw ti ubing iti tianna. Napno ni Elisabet iti Espiritu Santo.
42 “Sika ti kagasatan kadagiti amin a babbai!” impukkawna. “Nagasat ti
ubing nga ipasngaymonto. 43 Anian a pannakapadayawko, ta umaynak
sarungkaran ti ina ti Apok! 44 Ta apaman a nangngegko ti kablaawmo,
naggaraw ti ubing iti tianko gapu iti ragsakna. 45 Wen, nagasatka ta
mamatika a matungpalto ti insao kenka ti Apo!” 46 Kinuna ni Maria: “Toy
pusok idaydayawna ti Apo, 47 Ket agragsak toy kararuak gapu iti Dios a
Mangisalakan kaniak. 48 Ta nalagipnak, siak a nanumo nga adipenna, Ket
manipud ita, awagandakto a nagasat dagiti amin a tattao, 49 Gapu kadagiti
naindaklan a bambanag nga inaramid kaniak ti Mannakabalin a Dios.
Nasantoan ti naganna; 50 Kaasianna dagiti agbuteng kenkuana, Manipud
iti maysa a kaputotan agingga kadagiti sumarsaruno. 51 Imparangna ti
pannakabalin ti takkiagna, Ket winarawarana dagiti natangsit a tattao ken
amin a gandatda. 52 Inikkatna dagiti mannakabalin nga ari iti tronoda, Ket
intan-okna dagiti nanumo. 53 Pinennekna dagiti mabisin kadagiti
agkakaimbag; Pinagtalawna nga ima-ima dagiti babaknang. 54
Tinungpalna ti karina kadagiti ammatayo; Tinulonganna ti Israel nga
adipenna, 55 Ket nalagipna a kaasian ni Abraham, Ken ti amin a
kaputotanna iti agnanayon.” 56 Agtallo a bulan a nakipagyan ni Maria ken
ni Elisabet. Kalpasanna, nagawid idiay balayda. 57 Dimteng ti panaganak
ni Elisabet, ket impasngayna ti maysa nga ubing a lalaki. 58 Nadamag
dagiti kaarruba ken kakabagianna ti nakaskasdaaw a kinaimbag ti Apo
kenkuana. Nakipagragsakda amin kenkuana. 59 Idi walo nga aldawnan ti
maladaga, napanda pinakugit. Kayatda koma a panaganan iti Zacarias, kas
ken ni amana. 60 Ngem kinuna ni inana: “Saan! Juan ti maipanagan
kenkuana.” 61 “Ngem awan met kabagiam nga agnagan iti kasta,”
kinunada. 62 Sineniasanda ni Zacarias tapno ammoenda ti kayatna a
maipanagan iti ubing. 63 Dimmawat ni Zacarias iti pagsuratan. “Juan ti
naganna,” insuratna. Anian a siddaawda amin! 64 Iti dayta met la a kanito,
makasao manen ni Zacarias, ket indaydayawna ti Dios. 65 Nagbuteng
dagiti amin a kaarrubada. Nagwaras ti damag maipapan kadagitoy a
bambanag iti amin a disso iti kabambantayan ti Judea. 66 “Anianto ngata
ti pagbalinan daytoy nga ubing?” kinunkuna dagiti amin a nakadamag.
Nalawag ngamin nga adda kenkuana ti pannakabalin ti Apo. 67 Napno iti
Espiritu Santo ni Zacarias nga ama ni Juan ket imbagana ti mensahe ti
Dios: 68 “Madaydayaw ti Apo a Dios ti Israel! Immayna tinulongan dagiti
tattaona ket winayawayaanna ida. 69 Inikkannatayo iti maingel a
Mangisalakan a nagtaud iti kaputotan ni David nga adipenna. 70
Nabayagen nga imbagana daytoy, babaen kadagiti nasantoan a profetana.
71 Inkarina nga isalakannatayo kadagiti kabusortayo, iti pannakabalin
dagiti amin a gumurgura kadatayo; 72 Inkarina met a kaasianna dagiti
ammatayo, Ken laglagipenna ti nasantoan a tulagna, 73-74 Ti
sinapataanna a kari ken ni Abraham nga amatayo, Nga ispalennatayo
kadagiti kabusortayo, Tapno awan pagbutngantayo nga agserbi kenkuana,
75 Ket nasantoan ken nalintegtayo iti imatangna kadagiti amin nga aldaw
ti panagbiagtayo. 76 “Sika, anakko, managanankanto iti profeta ti Dios a
Kangatoan. Ta umun-unakanto ngem ti Apo, Tapno isaganam ti
pagnaanna, 77 Ken ipakaammom kadagiti tattaona a maisalakandanto,
Babaen iti pannakapakawan dagiti basbasolda. 78 Naasi ken naayat ti
Diostayo; Pagbannawagennanto ti pannakaisalakantayo, 79 Ket manipud
sadi langit, silnaganna dagiti agbibiag iti kasipngetan ni patay, Ket
iturongna dagiti addangtayo iti dalan ti kappia.” 80 Dimmakkel ti ubing
ken pimmigsa iti espiritu. Nagnaed idiay let-ang agingga iti aldaw a
panagparangna a silalatak kadagiti tattao iti Israel.
Lucas 2
1 Kadagidi nga aldaw, impaulog ni Emperador Augusto ti bilin a mailista
ti amin nga umili iti Imperio ti Roma. 2 Daytoy ti umuna a sensus a
naaramid idi madama a gobernador ni Kirenio idiay Siria. 3 Iti kasta,
napan ti tunggal maysa iti ilina tapno agpailistada. 4 Agsipud ta nagtaud ni
Jose iti kaputotan ni David, pimmanaw iti ili a Nazaret idiay Galilea, ket
napan iti ili a Betlehem idiay Judea. Idiay Betlehem ti nakayanakan ni ari
David. 5 Kadua ni Jose ni Maria a naitulag nga asawaenna iti
panagdaliasatna. Masikog idi ni Maria 6 ket idi addada idiay Betlehem,
dimteng ti oras a panagpasngayna. 7 Inyanakna ti inauna nga anakna a
lalaki ket binungonna iti lampin sana impaidda iti kulluong ta awan
pagyananda iti pagdagdagusan. 8 Iti dayta a paset ti pagilian, adda
sumagmamano nga agpaspastor nga adda idi iti away nga agbambantay
kadagiti karneroda iti rabii. 9 Nagparang kadakuada ti maysa nga anghel ti
Apo, ket sinilnagan ida ti dayag ti Apo. Napalalo ti butengda, 10 ngem
kinuna ti anghel kadakuada, “Dikay agbuteng! Addaak ditoy a mangyeg
kadakayo iti naimbag a damag a pakaragsakanyo, wen, dakayo ken dagiti
amin a tattao. 11 Ita nga aldaw, ditoy ili ni David, naipasngay ti
mangisalakan kadakayo—ni Cristo nga Apo! 12 Daytoy ti pagilasinanyo:
masarakanyonto ti maysa nga ubing a nabungon iti lampin ken nakaidda
iti kulluong.” 13 Pagammoan, adda dakkel a nailangitan a bunggoy a
nagparang iti asideg ti anghel. Ikankantada dagiti pagdaydayaw iti Dios:
14 “Gloria iti Dios iti kangatoan a langit! Ket ditoy daga, kappia ken talna
kadagiti tattao a pakaragsakanna!” 15 Apaman a nakapanaw dagiti
angheles nga agsubli sadi langit, kinuna dagiti agpaspastor iti maysa ken
maysa, “Intayon idiay Betlehem! Intayo kitaen daytoy napasamak nga
impakaammo ti Apo kadatayo!” 16 Nagdardarasda ngarud a napan.
Nasarakanda da Maria ken Jose, ken ti ubing a nakaidda iti kulluong. 17
Idi makitada ti maladaga, sinaritada kadakuada ti imbaga ti anghel
maipapan iti ubing. 18 Nasdaaw amin a nakangngeg iti impadamagda. 19
Tinandaanan ken pinampanunot ni Maria amin dagitoy. 20 Nagsubli dagiti
agpaspastor a mangikankanta kadagiti pagdaydayaw iti Dios gapu kadagiti
amin a nangngeg ken nakitada. Napasamak ti amin kas imbaga kadakuada
ti anghel. 21 Kalpasan ti walo nga aldaw, dimteng ti tiempo a
pannakakugit ti ubing, ket napanaganan iti Jesus. Daytoy ti impanagan
kenkuana ti anghel sakbay ti pannakainawna. 22 Dimteng ti tiempo a
panangtungpal da Jose ken Maria iti seremonia ti pannakadalus, kas
mayannurot iti Linteg ni Moises. Impanda ngarud ti ubing idiay Jerusalem
tapno idatonda iti Apo 23 kas nailanad iti linteg ti Apo: “Maidaton iti Apo
ti amin nga inauna a lalaki.” 24 Napanda tapno mangidatagda met iti
sakrifisio a sangaparis a pagaw wenno dua a sibong ti kalapati, kas
mayannurot iti linteg ti Apo. 25 Iti dayta a tiempo, adda lakay nga
agnagan Simeon nga agnaed idiay Jerusalem. Naimbag ken managbuteng
iti Dios ket padpadaananna ti pannakaisalakan ti Israel. Adda kenkuana ti
Espiritu Santo. 26 Impaltiing kenkuana ti Espiritu Santo a dinto matay
agingga iti makitana ti Cristo nga inkari ti Apo. 27 Babaen iti
panangidalan ti Espiritu, simrek ni Simeon iti Templo. Idi impan dagiti
nagannak ti ubing a Jesus idiay Templo tapno aramidenda kenkuana ti
ibilin ti Linteg, 28 sinakruy ni Simeon ti ubing ket nagyaman iti Dios.
Kinunana: 29 “Ita, ta tinungpalmon ti karim, O Apo, Palubosamon a
pumusay a sitatalna toy adipenmo. 30 Ta nakitakon kadagiti bukodko a
mata ti panangisalakanmo, 31 Nga insaganam iti imatang dagiti amin a
tattao: 32 Maysa a silaw a mangipakaammo kadagiti Hentil ti pagayatam.
Ken mangyeg iti dayaw iti ilim nga Israel.” 33 Nasdaaw dagiti nagannak
iti ubing iti sinao ni Simeon maipapan kenkuana. 34 Binendisionan ida ni
Simeon. “Pinili ti Dios daytoy nga ubing a pakadadaelan ken
pakaisalakanan ti adu iti Israel,” kinunana ken ni Maria. “Naituding a
pagilasinan a suppiatento ti adu a tattao. 35 Iti kasta, mailatakto dagiti
nalimed a pampanunotda. Ket ta pusom salputento ti ladingit a kas
natadem a kampilan.” 36 Adda met maysa a profeta a baket unayen. Isu ni
Ana nga anak ni Fanuel iti tribu ti Aser. Pito a tawen a nagdennada iti
asawana 37 ket 84 a tawenen a nabalo. Saan a pimmampanaw iti Templo.
Aldaw-rabii a nagdaydayaw iti Dios, nagay-ayunar ken nagkarkararag. 38
Iti daydi met la nga oras, simmangpet ni Ana ket nagyaman iti Dios sa
nagsao maipapan iti ubing kadagiti amin nga agur-uray iti
panangwayawaya ti Dios iti Jerusalem. 39 Idi naaramiden da Jose ken
Maria ti amin nga ipaannurot ti linteg ti Apo, nagsublida iti ilida a Nazaret
idiay Galilea. 40 Dimmakkel ken pimmigsa ti ubing. Napnoan iti sirib ket
adda kenkuana ti parabur ti Dios. 41 Tinawen a mapan dagiti nagannak
ken ni Jesus idiay Jerusalem iti Fiesta ti Paskua. 42 Idi agtawen ni Jesus iti
sangapulo ket dua, napanda nakifiesta a kas kadawyanda. 43 Idi nalpasen
ti fiesta ket agaw-awiddan, nagbati ni Jesus idiay Jerusalem a di ammo
dagiti nagannak kenkuana. 44 Impagarupda nga adda iti bunggoyda.
Maysa nga aldawda a magmagna idi madlawda nga awan ni Jesus, isu a
sinapsapulda kadagiti kakabagian ken gagayyemda. 45 Agsipud ta dida
masarakan, nagsublida idiay Jerusalem tapno sapulenda sadiay. 46 Iti
maikatlo nga aldaw, nasarakanda ni Jesus idiay Templo. Makikatkatugaw
kadagiti mamaestro a Judio. Agdengdengngeg ken agsalsaludsod
kadakuada. 47 Nagsiddaaw amin a nakangngeg kenkuana gapu kadagiti
nainsiriban a sungbatna. 48 Nasdaaw dagiti nagannak kenkuana idi
makitada. “Anakko,” kinuna ni inana, “apay nga inaramidmo daytoy
kadakami? Kasta unay ti danagmi ken ni amam a mangbirbirok kenka.” 49
“Apay aya a binirbirokdak?” insungbat ni Jesus. “Diyo kadi ammo a
masapul nga addaak iti balay ni Amak?” 50 Ngem dida naawatan ti
imbagana kadakuada. 51 Nakikuyog ni Jesus kadakuada a nagawid idiay
Nazaret, ket sadiay, nagbalin a natulnog nga anak. Sinalimetmetan amin
dagitoy ni inana iti pusona. 52 Dimmakkel ni Jesus iti bagi ken nagbalin a
masirib. Naay-ayo kenkuana ti Dios ken dagiti tattao.
Lucas 3
1 Maikasangapulo ket lima a tawen idi ti panagturay ni Emperador
Tiberio. Ni Poncio Pilato ti gobernador ti Judea. Ni Herodes ti agturay
idiay Galilea ket ni kabsatna a Felipe ti agturay iti sakup ti Iturea ken
Traconite. Ni Lisanias ti agturay iti Abilene. 2 Da Anas ken Caifas dagiti
agdama a Kangatoan a Papadi. Iti dayta a tiempo, dimteng ti sao ti Dios
ken ni Juan nga anak ni Zacarias. Adda idi ni Juan idiay let-ang. 3 Ngarud,
sinursorna ti amin a disso a madalanan ti karayan Jordan. “Agbabawikayo
kadagiti basbasolyo, ket pabuniagankayo,” inkaskasabana. “Iti kasta,
pakawanen ti Dios dagiti basbasolyo.” 4 Kas nailanad iti libro ni profeta
Isaias: “Idiay let-ang adda mangipukpukkaw: ‘Isaganayo ti dalan ti Apo,
Pasayaatenyo ti pagnaanna! 5 Masapul a magaburan dagiti amin a lungog,
Mapasimpa dagiti amin a bantay ken turod, Mapalinteg dagiti killo-killo a
dalan, Matarimaan dagiti lasonglasong a kalsada, 6 Makitanto dagiti amin
a tattao ti panangisalakan ti Dios!’” 7 Nakaad-adu a tattao ti napan ken ni
Juan tapno agpabuniagda kenkuana. Kinunana kadakuada, “Dakayo a
kaputotan ti karasaen, siasino ti nangibaga a malisianyo ti dandanin
dumteng a pannusa ti Dios? 8 Ipakitayo babaen iti aramidyo a
nagbabawikayon kadagiti basbasolyo. Ket diyo kunkuna iti bagiyo: ‘Uray
ta nagtaudkam iti kaputotan ni Abraham!’ Ibagak kadakayo a kabaelan ti
Dios a pagbalinen dagitoy a bato nga annak ni Abraham! 9 Naisaganan ti
wasay a pangpukan kadagiti kayo agingga iti ramut. Mapukan ket maipuor
amin a kayo a di agbunga iti nasayaat.” 10 “Ania ngarud ti masapul nga
aramidenmi?” sinaludsod dagiti tattao. 11 “Ti addaan iti dua a bado,”
insungbat ni Juan, “masapul nga itedna ti maysa iti awanan. Ti addaan
kanen, masapul a mangibingay.” 12 Napan ti sumagmamano nga
agsingsingir iti buis tapno agpabuniagda kenkuana. “Maestro,” kinunada,
“ania ti aramidenmi?” 13 “Dikay agsingsingir iti ad-adu ngem iti
tumutop,” imbagana kadakuada. 14 “Ket dakami,” sinaludsod met dagiti
soldado, “ania ti masapul nga aramidenmi?” “Diyo butbutngen wenno
padpadaksen ti siasinoman tapno maalayo ti kuartana. Mapnekkayon iti
sueldoyo,” kinunana kadakuada. 15 Dimmakkel ti namnama dagiti tattao.
Impapanda a ni Juan ti Cristo. 16 Kinuna ni Juan kadakuada:
“Buniagankayo iti danum, ngem sumarsaruno kaniak ti maysa a dakdakkel
ti pannakabalinna ngem siak. Diak pay maikari a mangwarwar iti
sandaliasna. Buniagannakayto iti Espiritu Santo ken apuy. 17 Adda
kenkuana ti bigao a pangtaepna iti irik. Urnongen ken idulinnanto ti irik iti
kamaligna. Ngem puorannanto ti taep iti apuy a di maiddep.” 18 Kastoy
ken dadduma pay a balakad ti imbagbaga ni Juan kadagiti tattao iti
panangikasabana kadakuada iti Naimbag a Damag. 19 Ngem binabalawna
ni gobernador Herodes iti panangikabbalayna ken ni Herodias nga asawa
ni kabsatna, ken gapu kadagiti adu a kinadakes nga inar-aramidna. 20
Mainayon pay kadagiti inaramidna ti panangpaibaludna ken ni Juan. ni
Jesus 21 Kalpasan ti pannakabuniag dagiti amin a tattao, nabuniagan met
ni Jesus. Idi agkarkararag, naluktan ti langit, 22 ket bimmaba kenkuana ti
Espiritu Santo a kas maysa a kalapati. Adda timek a naggapu sadi langit.
“Sika ti dungdungngoek nga Anakko,” kinunana. “Maay-ayoak unay
kenka.” 23 Agtallopulo ti tawen ni Jesus idi rugianna ti trabahona.
Imbilang dagiti tattao nga isu ti anak ni Jose, nga anak ni Eli, 24 nga anak
ni Matat, nga anak ni Levi, nga anak ni Melki, nga anak ni Jane, nga anak
ni Jose, 25 nga anak ni Matatias, nga anak ni Amos, nga anak ni Nahum,
nga anak ni Esli, nga anak ni Nage, 26 nga anak ni Maat, nga anak ni
Matatias, nga anak ni Semei, nga anak ni Jose, nga anak ni Juda, 27 nga
anak ni Joana, nga anak ni Resa, nga anak ni Zorobabel, nga anak ni
Sealtiel, nga anak ni Neri, 28 nga anak ni Melki, nga anak ni Adi, nga
anak ni Cosam, nga anak ni Elmadam, nga anak ni Er, 29 nga anak ni
Josue, nga anak ni Eliezer, nga anak ni Jorim, nga anak ni Matat, nga anak
ni Levi, 30 nga anak ni Simeon, nga anak ni Juda, nga anak ni Jose, nga
anak ni Jonan, nga anak ni Eliakim, 31 nga anak ni Melea, nga anak ni
Mena, nga anak ni Matata, nga anak ni Natan, nga anak ni David, 32 nga
anak ni Jesse, nga anak ni Obed, nga anak ni Booz, nga anak ni Salmon,
nga anak ni Naason, 33 nga anak ni Aminadab, nga anak ni Armi, nga
anak ni Arni, nga anak ni Esron, nga anak ni Fares, nga anak ni Juda, 34
nga anak ni Jacob, nga anak ni Isaac, nga anak ni Abraham, nga anak ni
Tare, nga anak ni Nacor, 35 nga anak ni Serug, nga anak ni Ragau, nga
anak ni Peleg, nga anak ni Heber, nga anak ni Selah, 36 nga anak ni
Cainan, nga anak ni Arfaxad, nga anak ni Sem, nga anak ni Noe, nga anak
ni Lamec, 37 nga anak ni Matusalem, nga anak ni Enoc, nga anak ni Jared,
nga anak ni Mahalaleel, nga anak ni Cainan, 38 nga anak ni Enos, nga
anak ni Set, nga anak ni Adan, nga anak ti Dios.
Lucas 4
1 Napno ni Jesus iti Espiritu Santo idi aggapu idiay Jordan ket inturong ti
Espiritu idiay let-ang. 2 Sinulisog sadiay ti Diablo iti uneg ti uppat a pulo
nga aldaw. Kabayatan dayta a tiempo, pulos a saan a nangnangan ni Jesus
isut’ gapuna a nabisinan kalpasanna. 3 “No sika ti Anak ti Dios,” kinuna ti
Diablo, “bilinem nga agbalin a tinapay daytoy a bato.” 4 “Kuna ti
Nasantoan a Surat,” insungbat ni Jesus, “‘Saan laeng a tinapay ti pagbiag
ti tao.’” 5 Kalpasan daytoy, inturong ti Diablo ni Jesus iti nangato a disso
ket iti apagdarikmat impakitana kenkuana dagiti amin a pagarian ti
lubong. 6 “Itedkonto kenka amin dagitoy a pannakabalin ken dagitoy a
kinabaknang,” kinuna ti Diablo. “Nayawatda amin kaniak ket mabalinko
nga ited iti siasinoman a kayatko a pangtedan. 7 Ngarud, no agrukbabka
kaniak, kukuamto amin dagitoy.” 8 “Kuna ti Nasantoan a Surat:
‘Agdayawka iti Apo a Diosmo ket isu laeng ti pagserbiam,’” insungbat ni
Jesus. 9 Kamaudianna, impan ti Diablo ni Jesus idiay Jerusalem ket
pinagtakderna iti kangatoan a paset ti Templo sana kinuna kenkuana, “No
Anaknaka ti Dios, tumapuakka man. 10 Ta kuna ti Nasantoan a Surat:
‘Bilinento ti Dios dagiti anghelesna a mangaywan kenka.’ 11 Kunana pay:
‘Tapayaendakanto tapno uray dagiti sakam saan a madunor iti bato.’” 12
Insungbat ni Jesus, “Kuna ti Nasantoan a Surat: ‘Dimo sulisogen ti Apo a
Diosmo.’” 13 Idi naaramiden ti Diablo ti amin a mabalinna a pangsulisog
ken ni Jesus, pinanawanna pay laeng agingga iti dumteng ti sabali a
gundaway. 14 Nagsubli ni Jesus idiay Galilea nga adda kenkuana ti
pannakabalin ti Espiritu Santo. Nagwaras ti damag maipapan kenkuana iti
amin a masakupan dayta a lugar. 15 Nangisursuro iti uneg dagiti sinagoga,
ket dinaydayaw dagiti amin a tattao. 16 Napan ni Jesus idiay Nazaret, ti ili
a dimmakkelanna. Kas kadawyanna iti Aldaw a Panaginana, simrek iti
sinagoga. Timmakder a mangbasa iti Nasantoan a Surat, 17 ket nayawat
kenkuana ti libro ni profeta Isaias. Inukradna ti nalukot a pagbasaan ket
nasarakanna ti paset a nakaisuratan dagitoy sumaganad: 18 “Adda kaniak
ti Espiritu ti Apo. Pinilinak a mangikasaba iti Naimbag a Damag kadagiti
napanglaw, Imbaonnak a mangiwaragawag iti pannakawayawaya dagiti
balud, Iti pannakakita manen dagiti bulsek, Iti pannakaruk-at dagiti
maparparigat, 19 Ken mangipakaammo a dimtengen ti tiempo a
panangsubbot ti Apo kadagiti tattaona.” 20 Linukot ni Jesus ti pagbasaan,
inyawatna iti agserserbi sa nagtugaw. Sikikita kenkuana dagiti adda iti
sinagoga 21 idi kinunana kadakuada, “Ita nga aldaw, natungpalen daytoy a
paset ti Nasantoan a Surat a nangngegyo a naibasa.” 22 Dinayaw dagiti
amin a tattao, ket nagsiddaawda kadagiti agkakapintas nga imbalikasna.
Kinunada, “Saan aya nga isu ti anak ni Jose?” 23 Ngem simmungbat ni
Jesus, “Awan duadua nga ibagayo kaniak daytoy a pagsasao: ‘Doktor,
agasam ta bagim.’ Kunayo ngata pay: ‘Aramidem ditoy ilim dagiti
nadamagmi nga inar-aramidmo idiay Capernaum.’” 24 Innayon ni Jesus,
“Ibagak kadakayo nga awan profeta a mapadayawan iti ilina met laeng. 25
Denggenyo daytoy: Pudno nga adu dagiti balo iti Israel idi tiempo ni Elias.
Tallo ket gudua a tawen idi a saan a nagtudo, ket napasamak ti nakaro a
bisin iti amin a daga. 26 Ngem awan kadakuada ti nakaibaonan ni Elias no
di laeng iti maysa a balo idiay Serepta, maysa nga ili idiay Sidon. 27 Adu
met dagiti agkukutel iti Israel idi tiempo ni profeta Eliseo. Ngem awan
kadakuada ti naimbagan malaksid ni Naaman a taga-Siria.” 28 Kasta unay
ti pungtot dagiti tattao iti sinagoga idi mangngegda daytoy. 29
Timmakderda, sada ginuyodguyod ni Jesus nga inruar iti ili. Impanda iti
tapaw ti turod a nakabangonan ti ilida tapno itappuakda iti derraas. 30
Ngem nagna ni Jesus iti nagbabaetanda ket pimmanaw. 31 Simmalog ni
Jesus idiay Capernaum, maysa nga ili idiay Galilea. Nangisuro kadagiti
tattao iti Aldaw a Panaginana. 32 Nasdaawda amin iti panangisurona
agsipud ta naturay ti panagsaona. 33 Iti sinagoga, adda lalaki a linuganan
ti dakes nga espiritu. Nagikkis iti napigsa. 34 “Ania ti kayatmo kadakami,
Jesus a taga-Nazaret?” kinunana. “Umaynakami kadi dadaelen? Am-
ammoka! Sika ti Nasantoan nga imbaon ti Dios.” 35 Binilin ni Jesus ti
espiritu. “Agulimekka,” kinunana, “ket rummuarka iti dayta a tao!”
Tinumba ti demonio ti tao iti sangoananda amin ket rimmuar kenkuana a
dina inan-ano. 36 Nasdaawda amin ket kinunada iti maysa ken maysa:
“Ania dagitoy a saona? Adda turay ken pannakabalinna a mangbilin
kadagiti dakes nga espiritu, ket rummuarda!” 37 Nagsaknap iti dayta a
lugar ti damag maipapan ken ni Jesus. 38 Pimmanaw ni Jesus iti sinagoga
ket napan iti balay ni Simon. Nakaro idi ti gurigor ti katugangan ni Simon,
ket kiniddawda ken ni Jesus a tulonganna ti babai. 39 Immasideg ni Jesus
iti idda ti masakit ket pinabaawna ti gurigorna. Apaman a naimbagan ti
masakit, dagus a bimmangon ket nagserbi kadakuada. 40 Idi lumlumneken
ti init, amin nga adda gagayyemna nga agsagsagaba iti uray ania a kita ti
sakit, impanda dagitoy a masakit ken ni Jesus. Impatayna ti imana iti
tunggal maysa ket naimbaganda amin. 41 Rimmuar met dagiti demonio
kadagiti adu a tattao ket inyik-ikkisda: “Sika ti Anak ti Dios!” Ngem
inungtan ida ni Jesus. Dina impalubos nga agsaoda ta ammoda nga isu ti
Cristo. 42 Iti parbangon, pimmanaw ni Jesus iti ili ket napan iti lugar nga
awan matagtagitao. Binirbirok dagiti tattao, ket apaman a nasarakanda,
kayatda a lapdan ti ipapanawna. 43 Ngem kinunana kadakuada, “Nasken
nga ipakaammok ti Naimbag a Damag maipapan iti Pagarian ti Dios
kadagiti dadduma pay nga ili, ta daytoy ti nangibaonan kaniak ti Dios.” 44
Nangaskasaba ngarud ni Jesus kadagiti sinagoga iti entero a Judea.
Lucas 5
1 Iti naminsan, idi agtaktakder ni Jesus iti igid ti Dan-aw ti Genesaret,
nagdidinnuron dagiti tattao nga umasideg kenkuana tapno dumngegda iti
sao ti Dios. 2 Nakitana ti dua a bangka iti igid ti dan-aw a pinanawan
dagiti mangngalap a napan nangbuggo kadagiti iketda. 3 Limmugan ni
Jesus iti maysa kadagiti bangka, ti kukua ni Simon, ket dinawatna
kenkuana ipatengngana bassit. Nagtugaw ni Jesus iti bangka ket insurona
dagiti tattao. 4 Kalpasan ti panagsaona, kinunana ken ni Simon:
“Ipatengngam ti bangka, ket iwayatyo ti iketyo ta agkalapkayo.” 5
“Maestro,” insungbat ni Simon, “nagpatpatnagkami a nagkalap. Awan
pulos ti naalami. Ngem no kasta ti kunam, iwayatko dagiti iket.” 6
Inwayatda dagiti iket. Adu ti naalada nga ikan ket dandani la mabsang ti
iketda. 7 Pinayapayanda ngarud dagiti kakaduada iti sabali a bangka tapno
mapanda tumulong kadakuada. Napan dagitoy ket kinargaanda dagiti dua
a bangka agingga a napnoda iti kasta unay nga ikan ket ngannganidan
lumned. 8 Idi makita ni Simon Pedro ti napasamak, nagparintumeng iti
sangoanan ni Jesus ket kinunana, “Apo, adaywannak! Maysaak a
managbasol.” 9 Nasdaaw ni Pedro ken dagiti kakaduana iti kaadu ti
nakalapanda. 10 Nasdaaw met da Santiago ken Juan nga annak ni
Zebedeo, isuda a kinakuyog ni Simon. “Dika agbuteng, Simon,” kinuna ni
Jesus, “manipud ita, tattaonton ti kalapem.” 11 Insang-atda dagiti bangka,
pinanawanda amin, ket simmurotda ken ni Jesus. 12 Iti naminsan, adda ni
Jesus iti maysa nga ili nga ayan ti maysa a lalaki nga agkukutel. Apaman a
nakitana ni Jesus, nagpakleb iti sangoananna ket impukkawna kenkuana,
“Apo, no kayatmo, mapaimbagnak.” 13 Sinagid ni Jesus ti lalaki sana
kinuna, “Kayatko! Umimbagkan.” Ket dagus a naikkat ti sakit ti lalaki. 14
Imbilin ni Jesus kenkuana: “Awan pangibagbagaam iti daytoy, ngem inka
agparang a dagus iti padi tapno kitaennaka. Kalpasanna, iruknoymo ti
daton nga imbilin ni Moises a pammaneknekmo kadagiti tattao nga
immimbagkan.” 15 Immad-adda ketdi a nagdinamag ni Jesus. Napan ti
nakaad-adu a tattao nga agdengngeg kenkuana ken agpaagas kadagiti
saksakitda. 16 Ngem masansan nga agpakni ni Jesus kadagiti disso nga
awan matagtagitao tapno agkararag. 17 Iti maysa nga aldaw, idi
mangisursuro ni Jesus, agtutugaw sadiay ti sumagmamano a Fariseo ken
mamaestro iti Linteg. Naggapuda kadagiti amin nga il-ili iti Galilea ken
Judea, agraman Jerusalem. Adda ken ni Jesus ti pannakabalin ti Apo a
mangpaimbag kadagiti masaksakit. 18 Napan kenkuana ti sumagmamano
a lallaki a nangyeg iti maysa a paralitiko a nakaidda iti papag. Iserrekda
koma ti lalaki iti uneg ti balay tapno ipanda iti sango ni Jesus. 19 Ngem
gapu iti kaadu ti tao, saanda a maiserrek ti paralitiko. Napanda ngarud iti
tuktok ti balay, binutbotanda ti atep, ket imbabada a nakaidda iti papag
sada indisso iti tengnga dagiti tattao iti sangoanan ni Jesus. 20 Idi makita
ni Jesus ti pammatida, kinunana iti paralitiko, “Gayyem, napakawanen
dagiti basbasolmo.” 21 Nagtantanabutob dagiti mamaestro iti Linteg, kasta
met dagiti Fariseo, ket kinunkunada: “Apay a kastoy ti panagsao daytoy a
tao? Maibusor iti Dios ti sasawenna! Ti laeng Dios ti makapakawan
kadagiti basbasol!” 22 Ammo ni Jesus ti kapanunotanda ket kinunana
kadakuada, “Apay a kasta ti pampanunotenyo? 23 Ania ti nalaklaka nga
isao: ‘Napakawanen dagiti basbasolmo’ wenno ‘Bumangonka ket
magnaka’? 24 Paneknekak ngarud kadakayo a ti Anak ti Tao adda
pannakabalinna ditoy daga a mamakawan kadagiti basbasol.” Kinunana iti
paralitiko, “Ibilinko kenka: bumangonka, bagkatem ta iddam, ket
agawidkan!” 25 Timmakder a dagus ti paralitiko iti imatangda amin,
binagkatna ti nagiddaanna ket nagawid a mangidaydayaw iti Dios. 26
Anian a siddaawda! Nagbutengda amin a nagdaydayaw iti Dios ket
kinunkunada, “Anian a nakaskasdaaw dagiti naimatangantayo ita nga
aldaw!” 27 Kalpasan daytoy, rimmuar ni Jesus ket nakitana ni Levi, maysa
nga agsingsingir iti buis. Agtugtugaw iti ofisinana. Kinuna ni Jesus
kenkuana, “Surotennak.” 28 Timmakder ni Levi, pinanawanna amin, ket
simmurot ken ni Jesus. 29 Kas pammadayawna ken ni Jesus, nangisagana
ni Levi iti dakkel a padaya idiay balayna. Timmabuno ti adu nga
agsingsingir iti buis ken dadduma pay a tattao. 30 Nagtantanabutob dagiti
Fariseo ken dagiti kakaduada a mamaestro iti Linteg ket kinunada kadagiti
adalan ni Jesus, “Apay a kalanglang ken kain-inumyo dagiti agsingsingir
iti buis ken dagiti dakes a tattao?” 31 Simmungbat ni Jesus kadakuada:
“Saan a dagiti nasalun-at ti makasapul iti mangngagas no di ket dagiti
masaksakit. 32 Saanak nga immay tapno ayabak dagiti nalinteg ngem
immayak agayab kadagiti managbasol ket iti kasta agbabawida.” 33
Kinuna ti sumagmamano a tattao ken ni Jesus: “Masansan nga agayunar
ken agkararag dagiti adalan ni Juan, kasta met dagiti adalan dagiti Fariseo;
ngem mangan ken uminum dagiti adalam.” 34 Simmungbat ni Jesus:
“Mabalin aya a di mangan dagiti makiboda no adda ti nobio iti arpadda?
Saan a mabalin! 35 Ngem dumtengto ti tiempo a maipanaw ti nobio
kadakuada ket isunton ti panagayunarda.” 36 Sinarita pay ni Jesus
kadakuada daytoy a pangngarig: “Awan ti tao a mangala iti baro a lupot
tapno itakupna iti daan a pagan-anay. No kasta ti aramidenna, dadaelenna
ti baro a kawes ket saan pay a maibagay iti nakaitakupanna. 37 Awan met
mangikabil iti baro nga arak iti daan a supot a lalat. No kasta ti
aramidenna, bettakento ti baro nga arak ti supot, maibelleng ti arak ken
madadael ti supot. 38 Saan! Masapul nga ikarga ti baro nga arak iti baro a
supot a lalat. 39 Ket ti nakaraman iti baak nga arak, dina pagan-ano ti
uminum iti baro. Ta kunana: ‘Naim-imas ti baak.’”
Lucas 6
1 Iti maysa nga Aldaw a Panaginana, magmagna ni Jesus iti kataltalonan a
namulaan iti trigo. Nagruros dagiti adalanna kadagiti dawa, binuksilanda
sada kinnan. 2 Kinuna ti sumagmamano a Fariseo, “Apay nga aramidenyo
ti iparit ti Lintegtayo iti Aldaw a Panaginana?” 3 “Diyo pay aya nabasa ti
inaramid ni David idi mabisin, kasta met dagiti tattaona?” insungbat ni
Jesus. 4 “Simrek ni David iti balay ti Dios, innalana ti tinapay a naidaton
iti Dios ket nangan. Inikkanna met dagiti kakaduana. Iti paglintegantayo,
dagiti laeng papadi ti mapalubosan a mangan iti dayta a tinapay.” 5 Ket
inggibus ni Jesus, “Ti Anak ti Tao isu ti Apo ti Aldaw a Panaginana.” 6 Iti
sabali nga Aldaw a Panaginana, napan ni Jesus iti sinagoga ket nangisuro.
Adda sadiay ti maysa a tao a paralitiko ti makannawan nga imana. 7
Palpaliiwen ti sumagmamano a mamaestro iti Linteg, kasta met dagiti
Fariseo, no mangagas ni Jesus iti Aldaw a Panaginana tapno adda
panggapuanda a mangidarum kenkuana. 8 Ngem ammo ni Jesus ti
pampanunotenda. Kinunana iti lalaki, “Tumakderka ket umayka ditoy
sango.” Timmakder ti lalaki ket napan iti sangoananda. 9 “Saludsodek
man kadakayo,” kinuna ni Jesus. “Ania ti ipalubos ti Linteg nga
aramidentayo iti Aldaw a Panaginana: ti panagaramid iti naimbag wenno
iti dakes? Ti panangisalakan wenno ti panangdadael iti biag?” 10
Inwarasna ti panagkitana kadakuada amin sana kinuna iti lalaki, “Unnatem
ta imam.” Inunnat ti lalaki ti imana ket immimbagen. 11 Ngem napalalo ti
pungtot dagiti Fariseo ken mamaestro iti Linteg ket nagsasaritaanda no
ania ti aramidenda ken ni Jesus. 12 Iti dayta a tiempo, simmang-at ni Jesus
iti bantay tapno agkararag. Nagpatpatnag sadiay a nagkararag iti Dios. 13
Kabigatanna, inayabanna dagiti adalanna ket pimmili iti sangapulo ket dua
kadakuada a dinutokanna nga apostoles: 14 ni Simon (a pinanagananna iti
Pedro) ken ni Andres a kabsatna, da Santiago ken Juan, da Felipe ken
Bartolome, 15 da Mateo ken Tomas, ni Santiago nga anak ni Alfeo, ni
Simon (a managan Patriota), 16 ni Judas nga anak ni Santiago ken ni Judas
Iscariote a nagbalin a mangliliput. 17 Idi sumalsalogda iti bantay,
nagsardeng ni Jesus iti nasimpa a disso nga ayan ti adu nga adalanna.
Adda met sadiay dagiti nakaad-adu a tattao a naggapu iti amin a paset ti
Judea ken Jerusalem, kasta met kadagiti siudad ti Tiro ken Sidon nga
asideg iti baybay. 18 Napanda sadiay tapno agdengngegda kenkuana ken
paagasanda dagiti saksakitda. Napan met dagiti agsagsagaba kadagiti
dakes nga espiritu, ket immimbagda. 19 Kayat ti tunggal maysa a sagiden
ni Jesus, ta adda aggapu kenkuana a pannakabalin a mangpaimbag
kadakuada amin. 20 Kinita ni Jesus dagiti adalanna ket kinunana:
“Nagasatkayo, dakay a napanglaw, ta kukuayo ti Pagarian ti Dios! 21
“Nagasatkayo, dakayo a mabisin ita, ta mapnekkayto! “Nagasatkayo,
dakayo nga agsangit ita, ta agkatawakayto! 22 “Nagasatkayo no
guraendakayo dagiti tattao, no didakay awaten, no pabainandakayo, no
kunada a dakeskayo, gapu iti Anak ti Tao! 23 Agragsakkayo no
mapasamak ti kasta ket aglagtokayo iti rag-o, ta adda dakkel a
gunggonayo sadi langit. Kasta met ti inaramid dagiti kapuonanda kadagiti
profeta. 24 “Ngem asikayo pay, dakay a nabaknang ita, ta linak-amyon ti
nam-ay ti biag! 25 “Asikayo pay, dakay a mapnek ita, ta mabisinankayto!
“Asikayo pay, dakay nga agkatawa ita, ta agdung-aw ken agsangitkayto!
26 “Asikayo pay no nasayaat ti sawen ti amin a tao maipapan kadakayo; ta
kasta met ti kinunkuna dagiti kapuonanda maipapan kadagiti sinan-
profeta.” 27 “Ngem ibagak kadakayo nga agdengdengngeg kaniak:
Ayatenyo dagiti kabusoryo ket ipaayanyo iti imbag dagiti manggura
kadakayo. 28 Bendisionanyo dagiti mangilunod kadakayo ket
idawdawatanyo dagiti mangidadanes kadakayo. 29 No adda mangtungpa
iti maysa a pingpingmo, patungpam pay ti bangir. No adda mangala iti
kagaymo, bay-am nga alaenna pay ta badom. 30 Ikkam ti siasinoman a
dumawat kenka, ket no adda mangala iti sanikuam, dimo paisublin. 31
Aramidenyo kadagiti tattao ti kayatyo nga aramidenda kadakayo. 32 “No
dagiti laeng agayat kadakayo ti ayatenyo, adda aya magunggonayo? Uray
dagiti managbasol, ayatenda met dagiti agayat kadakuada. 33 Ket no dagiti
laeng mangipaay kadakayo iti imbag ti ipaayanyo iti imbag, adda aya
magunggonayo? Uray dagiti managbasol, kasta met ti aramidda! 34 No
dagiti laeng ammoyo a mangisublinto kadagiti bulodenda kadakayo ti
pabulodanyo, adda aya magunggonayo? Uray dagiti managbasol
pabulodanda dagiti managbasol ta namnamaenda a maisubli met laeng ti
ipabulodda. 35 Saan a kasta ti aramidenyo! Ayatenyo ketdi dagiti
kabusoryo ket ipaayanyo ida iti imbag. Agpabulodkayo, ngem diyo
namnamaen a masupapakankayo. No aramidenyo dagitoy, dakkelto ti
gunggonayo ket annaknakayto ti Kangatoan. Ta naasi ti Dios kadagiti di
makaammo nga agyaman ken kadagiti managdakdakes. 36 Masapul a
manangngaasikayo a kas ken ni Amayo a manangngaasi.” 37 “Diyo
ukomen ti padayo a tao tapno dinakayto met ukomen ti Dios. Diyo ilunod
ti padayo a tao tapno dinakayto met ilunod ti Dios. Mamakawankayo ket
pakawanennakayto met ti Dios. 38 Mangtedkayo ket ikkannakayto met ti
Dios: sukat a naan-anay, nasedsed ken agliplipias ti maipasab-okto
kadakayo. Ta ti pangrukodyo iti sabali isunto met la ti pangrukod ti Dios
kadakayo.” 39 Sinarita pay ni Jesus kadakuada daytoy a pangngarig:
“Saan a mabalin nga idalan ti maysa a bulsek ti padana a bulsek. No kasta
ti maaramid, matnagdanto a dua iti abut. 40 Saan a nangatngato ti agad-
adal ngem ti maestrona. Ngem no maturposnan ti adalna, agbalinton a kas
iti maestrona. 41 “Apay a dillawem ti puling iti mata ni kabsatmo ngem
dimo madlaw ti troso iti matam? 42 Kasano ti panagkunam nga ikkatem ti
puling iti mata ni kabsatmo no dimo pay madlaw ti troso iti matam? Sika
nga aginsisingpet! Ikkatem pay nga umuna ti troso iti matam, tapno
nalawag ti panagkitam a mangikkat iti puling nga adda iti mata ni
kabsatmo.” 43 “Saan nga agbunga ti nasayaat a kayo iti dakes. Saan met
nga agbunga ti dakes a kayo iti nasayaat. 44 Mailasin ti kayo babaen iti
bungana. Awan mapuros nga igos kadagiti sisiitan, wenno maburas nga
ubas kadagiti kalkalunay. 45 Iruar ti naimbag a tao dagiti naimbag nga
adda iti pusona, ket iruar met ti dakes a tao dagiti dakes nga adda
kenkuana. Ta isawang ti tao dagiti linaon ti pusona.” 46 “Apay nga
awagandak iti ‘Apo, Apo,’ ngem diyo met aramiden ti ibagak? 47 Amin
nga umay kaniak ken dumngeg iti saok, ket tungpalenna ida—ibagak
kadakayo ti pakaipadaanna. 48 Maipada iti maysa a tao a nagpatakder iti
balay. Nagkali iti nauneg ket insaadna ti fondasion iti bato. Immay ti layus
ket dinalapusna dayta a balay, ngem saan a naan-ano ta nasayaat ti
pannakaipatakderna. 49 Ngem ti tao a dumngeg iti saok ket dina met
tungpalen, maipada iti maysa a tao a nagpatakder iti balay iti rabaw ti daga
ngem awan inkabilna a fondasion. Idi dumteng ti layus, dinalapusna dayta
a balay ket dagus a narba. Anian a nakaam-amak ti pannakarbana!”
Lucas 7
1 Napan ni Jesus idiay Capernaum apaman a nasaona amin dagitoy
kadagiti tattao. 2 Adda sadiay ti maysa a kapitan dagiti soldado ti Roma.
Masakit ti patpatgenna unay nga adipen ket dandanin matay. 3 Idi
madamag ti kapitan ti maipapan ken ni Jesus, imbaonna ti sumagmamano
a panglakayen a Judio tapno dawatenda kenkuana nga umayna agasan ti
adipenna. 4 Napanda ken ni Jesus ket nagpakpakaasida kenkuana. “Pudno
a maikari daytoy a tao iti tulongmo,” kinunada, 5 “ta ay-ayatenna dagiti
tattaomi ket imbangonannakami pay iti sinagoga.” 6 Kimmuyog ni Jesus
kadakuada. Idi asidegen ni Jesus iti balay, nangibaon ti kapitan kadagiti
gagayyemna tapno ibagada daytoy kenkuana: “Apo, dika la
agbambannogen ta diak maikari nga umawat kenka iti balayko. 7
Ipapanko pay a diak maikari nga umay kenka iti personal. Agbilinka laeng
ket umimbagto ti adipenko. 8 Uray siak, adda dagiti ofisiales a mangituray
kaniak ket adda met soldado nga iturayak. ‘Inka,’ kunak iti maysa ket
mapan. ‘Umayka,’ kunak iti sabali ket umay. ‘Aramidem daytoy,’ kunak
iti adipenko ket aramidenna.” 9 Nasdaaw ni Jesus a nakangngeg iti daytoy.
Sinangona dagiti adu a sumursurot kenkuana sana kinuna: “Ibagak
kadakayo a diak pay nakakita iti kastoy a pammati, uray iti entero nga
Israel!” 10 Nagsubli dagiti naibaon iti balay ti kapitan ket nasangpetanda
nga immimbagen ti adipen. 11 Iti saan a nabayag, napan ni Jesus iti maysa
nga ili a managan Nain. Kimmuyog kenkuana dagiti adalanna ken adu a
tattao. 12 Idi makaasideg iti ruangan ti ili, apag-isu met a rummuar dagiti
tattao iti maysa a pamumpon. Ti natay isu ti bugbugtong nga anak a lalaki
ti maysa a balo a babai. Kimmuyog kenkuana ti adu a tattao a taga-siudad.
13 Naasian ti Apo idi makitana ti ina. “Dika agsangsangit,” kinunana
kenkuana. 14 Immasideg ni Jesus ket sinagidna ti lungon. Nagsardeng
dagiti mangbakbaklay iti lungon. Kinuna ni Jesus, “Barok, bumangonka!”
15 Nagtugaw daydi natay ket nagsao. Inyawat ni Jesus ken ni inana. 16
Nagbuteng dagiti amin a tattao ket indaydayawda ti Dios. “Nagparang
kadatayo ti maysa a naindaklan a profeta!” kinunkunada. “Immay ti Dios a
mangisalakan kadagiti tattaona!” 17 Nagwaras daytoy a damag maipapan
ken ni Jesus iti entero a Judea ken kadagiti kabangibang a luglugar. 18
Naammoan ni Juan kadagiti adalanna ti amin maipapan kadagitoy ket
inayabanna ti dua kadakuada. 19 Imbaon ni Juan ida iti Apo tapno
saludsodenda daytoy, “Sika kadi ti umay a kuna ni Juan, wenno
aguraykami pay iti sabali?” 20 Idi makadanonda ken ni Jesus, kinunada,
“Imbaonnakami ni Juan a Mammuniag tapno saludsodenmi kenka no sika
ti kunana nga umay, wenno aguraykami pay iti sabali?” 21 Iti dayta nga
oras, adu dagiti tattao a pinaimbag ni Jesus kadagiti saksakit ken an-
anayenda. Pinaksiatna dagiti dakes nga espiritu. Inagasanna ti adu a bulsek
ket nakakitada. 22 Kinuna ni Jesus kadagiti imbaon ni Juan, “Agsublikayo
ken ni Juan ket ibagayo kenkuana dagiti nakita ken nangngegyo: makakita
dagiti bulsek, makapagna dagiti pilay, mapaimbag dagiti agkukutel,
makangngeg dagiti tuleng, mapagungar dagiti natay ken maikaskasaba ti
Naimbag a Damag kadagiti napanglaw. 23 Nagasat ti tao a di agduadua
kaniak!” 24 Idi nakapanawen dagiti binaon ni Juan, kinuna ni Jesus
kadagiti tattao maipapan ken ni Juan: “Idi mapankayo ken ni Juan idiay
let-ang, ania ti ninamnamayo a makita? Maysa a runo a gargarawen ti
angin? 25 Ania ti napanyo kinita? Maysa a tao a nagkawes iti napintas a
pagan-anay? Kinapudnona, palasio ti pagnaedan dagiti agkawes iti kasta
ken agbiag a sibubuslon! 26 Ibagayo man kaniak no ania ti napanyo
kinita? Maysa a profeta? Wen, ket ibagak kadakayo a nangnangruna pay
ngem profeta ti nakitayo. 27 Ta ni Juan ti pakaiturongan ti kuna ti
Nasantoan a Surat: ‘Adtoy ti babaonek,’ kuna ti Dios; ‘ibaonko nga umun-
una ngem sika tapno isaganana ti dalanmo.’ 28 Ibagak kadakayo a kadagiti
amin a nayanak, awan nangnangruna ngem ni Juan. Nupay kasta,
natantan-ok ngem isu ti kanumoan iti Pagarian ti Dios.” 29 Dimngeg
kenkuana dagiti amin a tattao ken dagiti agsingsingir iti buis.
Nagdaydayawda iti Dios, gapu ta inawatda ti panangbuniag kadakuada ni
Juan. 30 Ngem inumsi dagiti Fariseo ken mamaestro iti Linteg ti panggep
ti Dios kadakuada ket dida kinayat ti pabuniagan ken ni Juan. 31 “Ania ti
pangipadaak kadagiti tattao kadagitoy nga aldaw?” intuloy ni Jesus. “Ania
ti pakayaspinganda? 32 Kasda la kadagiti ubbing nga agtutugaw iti
tiendaan. Ipukkaw ti maysa a grupo kadagiti kaay-ayamda, ‘Nagtokarkami
iti naragsak, ngem dikay nagsala. Nagkantakam iti naliday, ngem dikayo
nagladingit!’ 33 Immay ni Juan a Mammuniag, nagayunar ken di
imminum iti arak, ket kinunayo: ‘Linuganan ti demonio!’ 34 Immay ti
Anak ti Tao. Nangnangan ken immin-inum ket kinunayo: ‘Kitaenyo
daytoy a tao! Narawet ken mammartek. Gayyem dagiti agsingsingir iti
buis ken dadduma pay a dakes a tattao!’ 35 Nupay kasta, maipakita a
pudno ti sirib ti Dios babaen kadagiti aramid dagiti annakna.” 36 Maysa a
Fariseo ti nangawis ken ni Jesus a makipangan kenkuana. Napan ni Jesus
iti balay ti Fariseo ket simmango iti panganan. 37 Iti dayta nga ili, adda
babai a dakes unay ti panagbiagna. Idi nadamagna a mangmangan ni Jesus
iti balay ti Fariseo, napan met sadiay ket nangitugot iti sangafraskita a
bangbanglo. 38 Nagtakder nga agsangsangit iti likudan ni Jesus.
Nagtedted dagiti luana kadagiti saka ni Jesus, ket pinunasanna ida iti
buokna. Inagkanna dagiti saka ni Jesus sana binukbokan iti bangbanglo.
39 Idi makita daytoy ti Fariseo a nangawis ken Jesus, kinunana iti
nakemna: “No pudno a profeta daytoy a tao, ammona koma no siasino
daytoy a babai a mangsagsagid kenkuana. Ammona koma ti kadakes ti
panagbiagna!” 40 “Simon,” kinuna ni Jesus iti Fariseo, “adda ibagak
kenka.” “Ania dayta, Maestro?” insungbat ni Simon. 41 “Adda dua a tao
nga immutang iti kuarta,” inrugi ni Jesus. “Ti maysa, immutang iti 500 a
denario, ti maikadua, limapulo. 42 Agsipud ta dida makabayad, pinakawan
ida ti immutanganda. Siasinonto kadagitoy ti dakdakkel ti panagayatna iti
nagpautang?” 43 Insungbat ni Simon, “Pagarupek a ti tao nga ad-adu ti
napakawan nga utangna.” “Pudno ta kunam,” kinuna ni Jesus. 44
Tinaliawna ti babai, sana kinuna ken Simon: “Makitam daytoy a babai?
Simrekak iti balaymo ket dinak inikkan iti danum a pangbuggok kadagiti
sakak, ngem binuggoan daytoy a babai dagiti sakak iti luana ken
pinunasanna ida iti buokna. 45 Sika, dinak sinabat iti agek. Ngem manipud
itay simmangpetak, di pay nagsardeng a mangag-agep kadagiti saksakak.
46 Sika, dimo linanaan ti ulok, ngem isu, dinigosna dagiti sakak iti
bangbanglo. 47 Ngarud, ibagak kenka, gapu iti dakkel a panagayat nga
impakitana, napakawanen dagiti adu a basbasolna. Ngem ti tao a bassit ti
mapakawan kenkuana, bassit met ti panagayatna.” 48 Kinuna ni Jesus iti
babai, “Napakawanen dagiti basbasolmo.” 49 “Siasino daytoy a tao a
mamakawan uray pay kadagiti basbasol?” kinuna iti nakem dagiti
dadduma a sisasango iti panganan. 50 Ngem kinuna ni Jesus iti babai,
“Insalakannaka ti pammatim. Agawidkan a sitatalna.”
Lucas 8
1 Iti saan a nabayag, sinursor ni Jesus dagiti il-ili ken barbarrio ket
inkaskasabana ti Naimbag a Damag maipapan iti Pagarian ti Dios.
Kimmuyog kenkuana dagiti sangapulo ket dua nga adalan. 2 Kimmuyog
met ti sumagmamano a babbai a naagasan kadagiti sakitda ken kadagiti
dakes nga espiritu: ni Maria a managan Magdalena a nakapaksiatan
kadagiti pito a demonio, 3 ni Juana nga asawa ni Cusa a katalek ni
Herodes, ni Susana ken adu pay a babbai a nangipaay kadagiti sanikuada a
kas tulong ken ni Jesus ken kadagiti adalanna. 4 Saan nga agsardeng ti
panagsangpet dagiti tattao a mapan ken ni Jesus. Naggapuda kadagiti
nadumaduma nga ili. Idi naurnongen ti adu a tao, sinaritana daytoy a
pangngarig: 5 “Adda maysa a tao a napan nagpurruak kadagiti bukel. Idi
agpurpurruak, nagdisso ti sumagmamano a bukel iti igid ti dalan a
nakapaypayatanda ket tinuktok dagiti tumatayab. 6 Adda met
sumagmamano a bukel a nagdisso iti kabatoan. Idi agtuboda, nalaylayda ta
saan a nadam-eg ti daga a nagdissoanda. 7 Nagdisso ti sumagmamano a
bukel iti nagtuboan dagiti siitan a mula a nakigiddan a dimmakkel ken
nangleppes kadakuada. 8 Adda met kadagiti bukel a nagdisso iti nadam-eg
a daga, nagtubo ken nagbungada iti sagsasangagasut. “Dumngeg ngarud ti
siasinoman nga addaan pannakaawat,” inggibus ni Jesus. 9 Sinaludsod
dagiti adalan ni Jesus ti kaipapanan daytoy a pangngarig. 10
“Naipakaammo kadakayo dagiti palimed ti Pagarian ti Dios,” insungbat ni
Jesus. “Ngem maipakaammo dagitoy kadagiti dadduma babaen kadagiti
pangngarig, tapno ‘uray kitkitaenda, dida mailasin, ken uray
dengdenggenda, dida maawatan.’” 11 “Daytoy ti kaipapanan ti
pangngarig: Ti bukel isu ti sao ti Dios. 12 Dagiti nagdisso iti igid ti dalan,
iladawanda dagiti tattao a dumngeg. Ngem umay ti Diablo ket ikkatenna ti
mensahe iti pusoda tapno dida mamati ken maisalakan. 13 Dagiti nagdisso
iti kabatoan, iladawanda dagiti tattao a dumngeg iti mensahe ken awatenda
a siraragsak. Ngem saan nga umuneg ti mensahe kadakuada. Mamatida iti
apagbiit, ngem suminada no dumteng ti tiempo a pannakasuot. 14 Dagiti
nagdisso iti ayan dagiti siitan a mula, kayariganda dagiti tattao a dumngeg;
ngem dagiti pakaringgoran ken kinabaknang ken ragragsak ditoy a biag,
leppesenda ida ket saan a matangkenan dagiti bungada. 15 Dagiti nagdisso
iti nadam-eg a daga, iladawanda dagiti tattao a dumngeg iti mensahe,
salimetmetanda iti naimbag ken natulnog a puso, ket agtalinaedda agingga
iti agbungada.” 16 “Awan manggangat iti pagsilawan sana kaluban wenno
ikabil iti sirok ti pagiddaan. Ikabilna ketdi iti nairanta a pagyananna tapno
makita dagiti tattao ti lawagna no sumrekda. 17 Ta awan ti nailemmeng a
dinto mailatak, ket awan ti palimed a dinto maammoan ken
maiparangarang. 18 “Agannadkayo ngarud iti panagdengngegyo. Ta ti
addaan, maikkanto pay iti ad-adu, ket ti awanan, uray pay ti ipagarupna
nga adda kenkuana maikkatto pay.” 19 Napan ken ni Jesus ni inana ken
dagiti lallaki a kakabsatna, ngem dida makaasideg kenkuana gapu iti
kaadu ti tao. 20 “Adda idiay ruar ni inam ken dagiti lallaki a kakabsatmo,
ket kayatdaka a makita,” adda nagkuna ken ni Jesus. 21 “Ti inak ken
kakabsatko, isuda dagiti dumngeg ken mangtungpal iti sao ti Dios,”
kinuna ni Jesus kadakuada amin. 22 Iti maysa nga aldaw, limmugan ni
Jesus ken dagiti adalanna iti bangka ket kinunana kadakuada,
“Bumallasiwtayo.” Nagrubbuatda ket 23 idi aglaylayagda, nakaturog ni
Jesus. Dimteng ti napigsa nga angin iti dan-aw ket mangrugin a mapno ti
bangka iti danum. Iti kasta, napeggad ti kasasaadda. 24 Napan dagiti
adalan ken ni Jesus ket riniingda. “Apo! Apo!” kinunada, “lumnedtayon.”
Bimmangon ni Jesus ket binilinna ti angin ken dagiti nadawel a dalluyon.
Nagtalnada ket nalinak manen ti dan-aw. 25 Kinuna ni Jesus kadagiti
adalan, “Sadino ti yan ti pammatiyo?” Ngem gapu iti siddaaw ken
amakda, kinunada iti maysa ken maysa: “Ania ti katataona daytoy?
Bilinenna ti angin ken dagiti dalluyon, ket agtulnogda kenkuana!” 26
Intuloyda ti naglayag ket dimtengda iti daga dagiti Gergeseno, iti ballasiw
ti Dan-aw ti Galilea. 27 Idi sumanglad ni Jesus, sinabat ti maysa a lalaki a
taga-ili a nabayagen a linuganan dagiti demonio. Lamolamo, ket saan nga
agtaeng iti balay no di ket kadagiti tantanem. 28 Apaman a nakitana ni
Jesus, nagikkis sa nagparintumeng iti sangoananna. “Jesus nga Anak ti
Dios a Kangatoan!” impukkawna. “Ania ti kayatmo kaniak? Pangngaasim
ta dinak parigaten.” 29 Kasta ti sinaona ta imbilin ni Jesus iti dakes nga
espiritu a rummuar iti dayta a lalaki. Masansan a parigatenna ket uray
tenglen ken kawaranda dagiti ima ken sakana, pugsotenna ti kawar sa
iturong ti demonio iti let-ang. 30 “Ania ti naganmo?” sinaludsod ni Jesus.
“Armada,” insungbat ti tao, ta adu a demonio ti limmugan kenkuana. 31
Dinawat dagiti demonio ken ni Jesus a dina ibaon ida iti yuyeng. 32 Iti
asideg sadiay, adda dakkel nga arban ti baboy a mangmangan iti bakras ti
turod. Nagpakpakaasi dagiti demonio ken Jesus a palubosanna ida a
sumrek kadagiti baboy. Pinalubosanna ida. 33 Rimmuar ngarud dagiti
demonio iti tao ket simrekda kadagiti baboy. Nagdadarison ti entero nga
arban iti teppang, sada timmapuak iti dan-aw ket nalmesda amin. 34 Idi
makita dagiti agtartaraken kadagiti baboy ti napasamak, nagtatarayda a
napan nagipadamag iti ili ken kadagiti barbarrio. 35 Napan kinita dagiti
tattao ti napasamak. Idi makadanonda iti ayan ni Jesus, nasarakanda ti
lalaki a nakapaksiatan dagiti demonio. Agtugtugaw a nakabadon iti
sakaanan ni Jesus. Nagpulangen ti nasayaat a panunotna. Nagbuteng dagiti
amin a tattao. 36 Sinarita dagiti nakaimatang iti napasamak no kasano ti
pannakapaimbag ti lalaki. 37 Gapu iti kasta unay a buteng dagiti
Gergeseno, dinawatda ken ni Jesus a pumanaw sadiay. Limmugan ngarud
ni Jesus iti bangka ket pimmanaw. 38 Nagpakpakaasi ken Jesus ti lalaki a
nakapaksiatan dagiti demonio a makikuyog koma kenkuana. Ngem
pinagawid ni Jesus a kunana: 39 “Agawidka ketdi ket saritaem ti amin nga
inaramid ti Dios kenka.” Nagawid ti lalaki ket impadamagna iti entero nga
ili ti inaramid ni Jesus kenkuana. 40 Idi agsubli ni Jesus iti ballasiw ti dan-
aw, inawat a siraragsak dagiti adu a tattao a nangpaspasungad kenkuana.
41 Ket dimteng ti maysa a tao nga agnagan Jairo, maysa a pangulo iti
sinagoga sadiay. Nagrukbab iti sangoanan ni Jesus ket nagpakpakaasi
kenkuana a mapan iti balayna. 42 Dandani ngamin matay ti kakaisuna nga
anakna a babai nga agtawen iti sangapulo ket dua. Idi magmagna ni Jesus,
inaribungbongan dagiti tattao. 43 Adda sadiay ti maysa a babai nga
agsagsagaba iti panagbulos ti dara. Sangapulo ket dua a tawenen nga
agsagsagaba ket nagastona aminen a sanikuana kadagiti mangngagas
ngem awan nakapaimbag kenkuana. 44 Nakilinnetlet kadagiti tattao ket
napan iti likudan ni Jesus. Sinagidna ti gayadan ti kagay ni Jesus, ket
dagus a nagsardeng ti panagbulos ti darana. 45 “Siasino ti nangsagid
kaniak?” sinaludsod ni Jesus. “Saan a siak,” maysa-maysa ti nagkuna.
“Apo,” kinuna ni Pedro, “adu a tattao ti agdidinnuron iti lawlawmo.” 46
“Adda nangsagid kaniak,” impapati ni Jesus, “ta nariknak nga adda
pannakabalin a nauyos kaniak.” 47 Idi makita ti babai a naduktalanen,
agtigtigerger a napan ken ni Jesus sa nagrukbab iti sangoananna. Iti
imatang dagiti amin a tattao, impalawagna no apay a sinagidna ni Jesus
ken ti pannakapaimbagna a dagus. 48 “Anakko, pinaimbagnaka ti
pammatim,” kinuna ni Jesus. “Agawidkan a sitatalna.” 49 Madama pay
laeng a sasawen daytoy ni Jesus idi dumteng ti naibaon a naggapu iti balay
ni Jairo. “Natayen ti anakmo,” kinunana ken ni Jairo. “Saanmon a
ringgoren ti Maestro.” 50 Ngem nangngeg daytoy ni Jesus ket kinunana
ken ni Jairo, “Dika agdanag. Papigsaem ketdi ti pammatim ket umimbagto
ti anakmo.” 51 Idi dumteng ni Jesus iti balay, awan pinastrekna no di
laeng da Pedro, Juan, Santiago ken dagiti nagannak iti ubing. 52 Amin nga
adda sadiay sangsangitan ken dungdung-awanda ti ubing. “Dikay
agsangsangit,” kinuna ni Jesus. “Saan a natay ti ubing—matmaturog
laeng!” 53 Linalaisda ni Jesus, ta ammoda a natayen ti ubing. 54 Ngem
iniggaman ni Jesus ti ima ti ubing. “Anak, bumangonka,” kinuna ni Jesus.
55 Nagungar ti ubing ket timmakder a dagus. Imbilin ni Jesus nga ikkanda
iti kanenna. 56 Nasdaaw dagiti nagannak, ngem imbilin ni Jesus
kadakuada nga awan pangibagbagaanda iti napasamak.
Lucas 9
1 Inayaban ni Jesus dagiti sangapulo ket dua nga adalan ket intedna
kadakuada ti pannakabalin ken turay a mangpaksiat kadagiti amin a
demonio ken mangpaimbag kadagiti masakit. 2 Kalpasanna, imbaonna ida
a mangikasaba iti Pagarian ti Dios ken mangpaimbag kadagiti masakit. 3
Kinunana kadakuada, “Dikayo mangitugtugot iti uray ania, sarukod man
wenno bay-on, kanen man wenno kuarta, uray pay pagsukatanyo. 4 No
adda mangawat kadakayo, agdaguskayo iti dayta a balay inggana a
pumanawkay iti dayta nga ili. 5 No didakay awaten, panawanyo dayta nga
ili ket pampagenyo ti tapok iti sakayo a kas pakaballaaganda.” 6
Pimmanaw dagiti adalan ket sinursorda ti amin a barrio. Inkaskasabada ti
Naimbag a Damag, ken nangag-agasda kadagiti masakit iti amin a lugar. 7
Nadamag ni Herodes nga agturay iti Galilea dagiti amin a mapaspasamak
ket napalalo ti pannakariribukna gapu ta adda sumagmamano a tattao nga
agkunkuna a nagungar ni Juan a Mammuniag. 8 Kuna met dagiti dadduma
a nagparang ni Elias. Adda pay nagkuna a nagungar ti maysa kadagiti
immun-una a profeta. 9 “Pinaputolak ni Juan,” kinuna ni Herodes, “ngem
siasino daytoy a tao a madamdamagko?” Manipud idin, tinarigagayanna a
makita ni Jesus. 10 Nagsubli dagiti apostoles ket sinaritada ken ni Jesus ti
amin nga inaramidda. Inkuyogna ida a napan iti ili a managan Betsaida. 11
Nadamag daytoy dagiti tattao ket simmurotda kenkuana. Inawatna ida ket
inkasabana kadakuada ti Pagarian ti Dios. Pinaimbagna dagiti masapul a
maagasan. 12 Mumalemen idi napan kenkuana dagiti sangapulo ket dua
nga adalan. “Pagawidemon dagiti tattao,” kinunada, “tapno mapanda
kadagiti kabangibang nga il-ili ken barbarrio ket agbirokda iti kanen ken
pagdagusanda, ta adayotayo kadagiti balbalay.” 13 “Ikkanyo ketdi ida iti
kanenda!” insungbat ni Jesus. “Lima a tinapay ken dua nga ikan laeng ti
adda kadakami,” kinunada. “Kayatmo kadi nga inkam gumatang iti ipakan
kadakuada amin?” 14 (Aglimaribu ti bilang dagiti lallaki sadiay.)
“Pagtugawenyo a magrupo-grupo dagiti tattao; saglilimapulo iti tunggal
grupo,” imbilin ni Jesus kadagiti adalan. 15 Nagtungpal dagiti adalan ket
pinagtugawda dagiti amin a tattao. 16 Innala ni Jesus dagiti lima a tinapay
ken dua nga ikan. Timmangad sadi langit sa nagyaman iti Dios.
Pinispisina dagiti tinapay ket intedna kadagiti adalan tapno ibunongda
kadagiti tattao. 17 Nanganda amin ket nabsogda. Inurnong dagiti adalan
dagiti natda ket napno ti sangapulo ket dua a basket a nagikabilanda. 18 Iti
maysa nga aldaw, idi agkarkararag a maymaysa ni Jesus, immasideg
kenkuana dagiti adalan. “Siasinoak kano iti panagkuna dagiti tattao?”
sinaludsodna kadakuada. 19 “Adda agkuna a sika ni Juan a Mammuniag,”
insungbatda. “Adda met agkuna a sika ni Elias. Adda pay agkuna a
nagungar ti maysa kadagiti immun-una a profeta.” 20 “Ket dakayo,”
sinaludsodna kadakuada, “siasinoak iti panagkunayo?” “Sika ti Cristo ti
Dios,” insungbat ni Pedro. 21 Siiinget ni Jesus a nangbilin kadakuada nga
awan pangibagbagaanda iti daytoy. 22 Kinunana pay: “Masapul nga
agsagabanto iti napalalo ti Anak ti Tao ken laksiden dagiti panglakayen,
dagiti panguloen a papadi ken dagiti mamaestro iti Linteg. Mapapatayto,
ngem mapagungarto iti maikatlo nga aldaw.” 23 Ket kinunana kadakuada
amin: “Ti agtarigagay a sumurot kaniak, masapul a tallikudanna ti bagina,
ibaklayna ti krusna iti inaldaw, ket surotennak. 24 Ta ti tao a mangisalakan
iti biagna, mapukawnanto. Ngem ti makapukaw iti biagna gapu kaniak,
maisalakannanto. 25 Adda aya magunggona ti tao no matagikuana ti
entero a lubong ngem mapukaw wenno madadael met ti biagna? Awan! 26
Ti mangibain kaniak ken iti pannursurok, ibainto met ti Anak ti Tao inton
umay iti bukodna a dayag, iti dayag ti Ama ken dagiti nasantoan nga
angheles. 27 Laglagipenyo daytoy: Adda sumagmamano kadakayo ditoy a
dinto matay agingga iti makitada ti Pagarian ti Dios.” 28 Agarup maysa a
lawas kalpasan ti panangisao ni Jesus kadagitoy, inkuyogna da Pedro, Juan
ken Santiago ket simmang-atda iti bantay tapno agkararag. 29 Idi
agkarkararag, nagbalbaliw ti langana ket makasisirap ti pudaw dagiti
pagan-anayna. 30 Pagammoan, adda dua a lallaki a makisasao kenkuana—
da Moises ken Elias. 31 Nagparangda iti nailangitan a dayag.
Kasarsaritada ni Jesus maipapan iti asidegen a panangtungpalna iti
panggep ti Dios babaen iti ipapatayna idiay Jerusalem. 32 Nargaan idi ti
turog ni Pedro ken dagiti kaduana, ngem idi makariingda, nakitada ti
dayag ni Jesus ken dagiti dua a lallaki nga agtatakder iti abayna. 33 Bayat
ti ipapanaw dagiti dua iti yan ni Jesus, kinuna ni Pedro kenkuana: “Apo,
nagsayaaten ti kaaddatayo ditoy! Mangaramidkam iti tallo a kalapaw:
maysa para kenka, maysa para ken ni Moises, ket ti maysa para ken ni
Elias.” (Dina ammo idi ti sasawenna.) 34 Madama pay la nga agsasao idi
agparang ti maysa nga ulep a nanglinong kadakuada ket nagbuteng dagiti
adalan idi kumotan ida ti ulep. 35 Adda timek a naggapu iti ulep a
nagkuna: “Daytoy ti Anakko, ti pinilik. Isu ti denggenyo.” 36 Idi
agpukawen ti timek, ni laengen Jesus ti adda. Nagulimek dagiti adalan ket
awan nangibagbagaanda idi iti aniaman a nakitada. 37 Iti sumaruno nga
aldaw, simmalogda iti bantay. Adu a tattao ti simmabat ken Jesus. 38
Pagammoan, maysa kadakuada ti nagpukkaw. “Maestro,”
impakpakaasina, “kitaem kadi daytoy barok, ti kakaisuna nga anakko. 39
No luganan ti dakes nga espiritu, pagikkisenna a kellaat, pagkissiwenna
ket paglabutabenna ti ngiwatna. Parigatenna unay ket dina kayat a
panawan. 40 Dinawatko kadagiti adalam a paksiatenda koma, ngem dida
nabalinan.” 41 “Tattao a managdakdakes ken awanan pammati!” kinuna ni
Jesus. “Kasano pay kabayag ti kaaddak iti dennayo? Kasano pay kabayag
ti panagan-anusko kadakayo?” Ket kinunana iti ama ti ubing, “Yegmo
ditoy ti anakmo.” 42 Idi umas-asideg ti ubing, imbalat ti demonio ket
pinagkissiwna. Ngem inungtan ni Jesus ti dakes nga espiritu, pinaimbagna
ti ubing sana inyawat ken ni amana. 43 Nagsiddaaw dagiti amin a tattao iti
naindaklan a pannakabalin ti Dios. Masmasdaaw pay laeng dagiti tattao iti
amin nga inaramid ni Jesus, idi kunana kadagiti adalanna, 44 “Diyo
liplipatan daytoy ibagak kadakayo: Dandanin mayawat ti Anak ti Tao iti
pannakabalin dagiti tattao.” 45 Ngem dida ammo ti kaipapanan ti sinaona
ta nailimed kadakuada tapno dida maawatan. Nagbutengda nga agsaludsod
kenkuana maipapan iti daytoy. 46 Adda rimsua a panagsusuppiat kadagiti
adalan no siasino kadakuada ti kangrunaan. 47 Ammo ni Jesus ti
pampanunotenda, isut’ gapuna a nangala iti maysa nga ubing, ket
pinagtakderna iti abayna 48 sana kinuna kadakuada, “Ti umawat iti daytoy
nga ubing gapu kaniak, siak ti awatenna. Ket ti umawat kaniak, awatenna
met ti nangibaon kaniak. Ta ti kanunumoan kadakay amin, isu ti
kangrunaan.” 49 “Apo,” impulong ni Juan, “nakitami ti maysa a tao a
mangpakpaksiat kadagiti demonio babaen iti naganmo. Pinaritanmi gapu
ta ditayo met kadua.” 50 “Saanyo a paritan,” kinuna ni Jesus kenkuana ken
kadagiti dadduma nga adalan, “ta kaduayo ti saan a bumusor kadakayo.”
51 Idi umasidegen ti aldaw a pannakayuli ni Jesus sadi langit,
inkeddengna ti mapan idiay Jerusalem. 52 Pinaunana ti sumagmamano a
tattao. Napanda iti maysa a barrio idiay Samaria tapno isaganada ti amin
para kenkuana. 53 Ngem saan nga inawat dagiti tattao sadiay, ta nalawag a
mapan ni Jesus idiay Jerusalem. 54 Idi makita daytoy da Santiago ken
Juan nga adalanna, kinunada, “Apo, kayatmo nga awaganmi a bumaba ti
apuy sadi langit tapno uramenna ida?” 55 Sinango ni Jesus dagiti adalan
sana binabalaw ida. 56 Kalpasanna, napan ni Jesus ken dagiti adalanna iti
sabali a barrio. 57 Idi addada iti dalanda, immasideg ti maysa a lalaki ket
kinunana ken ni Jesus, “Sumurotak kenka, uray sadino ti papanam.” 58
“Adda rukib dagiti musang, ken adda umok dagiti tumatayab, ngem awan
pagiddaan ken paginanaan ti Anak ti Tao,” insungbat ni Jesus. 59
Kinunana iti sabali a lalaki, “Surotennak.” Ngem kinuna ti lalaki, “Apo,
innak man pay ipumpon ni amak.” 60 Kinuna ni Jesus kenkuana, “Bay-am
dagiti natay a mangipumpon kadagiti minatayda. Inka ketdi ikasaba ti
Pagarian ti Dios.” 61 Adda manen sabali a nagkuna ken ni Jesus,
“Sumurotak kenka, Apo, ngem innak kadi pay agpakada iti familiak.” 62
Kinuna ni Jesus kenkuana, “Ti mangrugi nga agarado sa taliaw a taliaw,
saan a maikari iti Pagarian ti Dios.”
Lucas 10
1 Kalpasan daytoy, pimmili ni Jesus iti pitopulo ket dua pay a lallaki.
Imbaonna ida a sagdudua tapno umun-unada a mapan iti tunggal ili ken
lugar a papanannanto. 2 Kinunana kadakuada, “Adu ti anien, ngem bassit
ti agani. Agdawatkayo ngarud iti akinkukua iti maani tapno mangibaon
kadagiti agani. 3 Inkayon! Ibaonkayo a kas urbon ti karnero iti ayan ti
arban dagiti lobo. 4 Dikayo mangitugtugot iti supot, bay-on wenno
sapatos. Dikay agsardeng iti dalan a kumablaaw iti siasinoman. 5 No
sumrekkay iti maysa a balay, umuna a kunayo: ‘Adda koma kappia iti
daytoy a balay.’ 6 No iti dayta a balay adda tao a managayat iti kappia,
agbatinto kenkuana ti inkablaawyo. No awan, ibabawiyo ti inkablaawyo. 7
Agdaguskay iti dayta a balay, ket kanen ken inumenyo ti idasarda
kadakayo ta rumbeng a matangdanan ti agtrabaho. Dikay agalis-alis iti
pagdagusanyo. 8 No sumrekkay iti maysa nga ili ket awatendakayo,
kanenyo ti maidasar kadakayo. 9 Paimbagenyo dagiti masakit iti dayta nga
ili ket kunayo kadagiti tattao sadiay, ‘Asidegen kadakayo ti Pagarian ti
Dios.’ 10 Ngem no sumrekkay iti maysa nga ili ket didakay awaten,
mapankayo kadagiti kalkalsada ket kunayo: 11 ‘Uray ti tapok ti iliyo a
kumpet kadagiti sakami, punasenmi a maibusor kadakayo. Nupay kasta,
laglagipenyo nga asidegen kadakayo ti Pagarian ti Dios!’ 12 Ibagak
kadakayo nga inton Aldaw ti Panangukom, dakdakkelto ti asi ti Dios iti
Sodoma ngem iti dayta nga ili!” 13 “Asikanto pay, Corazin! Asikanto met,
Betsaida! No naaramid koma idiay Tiro ken Sidon dagiti milagro a
naaramid kadakayo, nabayag koman nga impakita dagiti tattao sadiay ti
panagbabawida kadagiti basbasolda babaen iti panagtugawda a sikakawes
iti nakersang a lupot ken panangiwarakiwakda iti dapu kadagiti bagbagida.
14 Inton Aldaw a Panangukom, dakdakkelto ti asi ti Dios iti Tiro ken
Sidon ngem kadakayo. 15 Ket sika, Capernaum, kayatmo kadi a maitan-
okkanto sadi langit? Saan! Maitappuakkanto idiay Hades.” 16 Kinuna ni
Jesus kadagiti adalanna, “Ti siasinoman a dumngeg kadakayo, siak ti
denggenna. Ngem ti saan nga umawat kadakayo, siak ti saanna nga
awaten. Ket ti saan nga umawat kaniak, ti nangibaon kaniak ti saanna nga
awaten.” 17 Siraragsak a nagsubli dagiti pitopulo ket dua. “Apo,”
kinunada, “uray dagiti demonio nagtulnogda kadakami idi bilinenmi ida iti
naganmo!” 18 Insungbat ni Jesus, “Nakitak ni Satanas a natnag a kas
kimat manipud langit. 19 Denggenyo: Inikkankayo iti pannakabalin a
mangbaddek kadagiti uleg ken manggagama ken mangparmek iti bileg ti
Kabusor. Awanto ti pakaan-anoanyo. 20 Ngem saankayo koma nga
agragsak gapu ta agtulnog dagiti dakes nga espiritu kadakayo.
Agragsakkayo ketdi ta naisurat dagiti nagnaganyo sadi langit.” 21 Iti dayta
met laeng nga oras, napno ni Jesus iti rag-o babaen ti Espiritu Santo.
Kinuna ni Jesus, “Agyamanak kenka, Ama, sika nga Apo ti langit ken
daga, ta impakaammom kadagiti awan adalna ti inlimedmo kadagiti
mamasirib ken kadagiti nasaririt. Wen, Ama, ta kasta ti nagayatam a
maaramid. 22 “Intalek kaniak ni Amak dagiti amin. Awan makaam-ammo
iti Anak no di laeng ti Ama. Awan met makaam-ammo iti Ama no di
laeng ti Anak ken dagiti kayat ti Anak a pangipakaammoan.” 23
Simmango ni Jesus kadagiti adalan ket kinunana a sililimed, “Nagasatkayo
gapu kadagiti makitkitayo ita! 24 Ibagak kadakayo nga adu a profeta ken
ari ti nagtarigagay a kumita kadagiti makitayo, ken dumngeg kadagiti
mangngegyo. Ngem dida nakita wenno nangngeg.” 25 Timmakder ti
maysa a maestro iti Linteg tapno suotenna ni Jesus. “Maestro,”
sinaludsodna, “ania ti masapul nga aramidek tapno magun-odko ti biag
nga agnanayon?” 26 “Ania ti nailanad iti linteg?” kinuna ni Jesus. “Ania ti
panagawatmo?” 27 “‘Ayatem ti Apo a Diosmo iti amin a pusom, iti amin a
kararuam, iti amin a pigsam ken iti amin a panunotmo,’ ken ‘Ayatem ti
kaarrubam a kas iti bagim,’” insungbat ti maestro iti Linteg. 28 “Husto ti
insungbatmo,” kinuna ni Jesus. “Aramidem daytoy ket agbiagkanto.” 29
Ngem kayat ti maestro nga ikalintegan ti bagina, isut’ gapuna a
nagsaludsod manen ken ni Jesus, “Siasino ti kaarrubak?” 30 Simmungbat
ni Jesus: “Adda maysa a tao a naggapu idiay Jerusalem ket sumalsalog a
mapan idiay Jerico. Sinaneb dagiti tulisan, innalada amin nga adda
kenkuana agraman badona, kinabkabilda sada pinanawan a dandanin
matay. 31 Nairana met a sumalsalog sadiay ti maysa a padi. Idi makitana
daydi lalaki, linisianna ket intuloyna ti nagna. 32 Simmalog met sadiay ti
maysa a Levita. Inasitganna ti lalaki ket kinitana. Linisianna ket intuloyna
ti nagna. 33 “Ngem limmabas met sadiay ti maysa a Samaritano nga
agbibiahe. Idi makitana ti lalaki, naasian kenkuana. 34 Inasitganna ket
sinapsapoanna dagiti sugatna iti lana ken arak sana binedbedan ida.
Insakayna iti bukodna nga animal ket impanna iti maysa a pagdagdagusan
a nangtaripatoanna kenkuana. 35 “Kabigatanna, nangala iti dua a pirak ket
intedna iti agpadpadagus. ‘Taripatoem,’ kinunana kenkuana, ‘ket inton
agsubliak, bayadakto amin a nagastom.’” 36 Kinuna ngarud ni Jesus, “Iti
panagkunam, siasino kadagiti tallo ti pudno a kaarruba daydi tao a sinaneb
dagiti tulisan?” 37 “Daydi nangngaasi kenkuana,” insungbat ti maestro iti
Linteg. Kinuna ni Jesus, “Inka ngarud ket kasta met ti aramidem.” 38
Bayat ti panagdaliasat ni Jesus ken dagiti adalanna, dimtengda iti maysa a
barrio. Sadiay, adda maysa a babai nga agnagan Marta a nangsangaili
kenkuana iti balayna. 39 Adda kabsatna nga agnagan Maria a nagtugaw iti
sakaanan ti Apo ket nagdengngeg iti pannursurona. 40 Gapu ta
maringgoran ni Marta iti panagsaganana, napan ken ni Jesus. “Apo,”
kinunana, “awan kadi aniamanna kenka a baybay-annak ni kabsatko ket
sisiak ti agsagsagana? Ibagam man kenkuana ta tulongannak!” 41
Insungbat ti Apo, “Marta, Marta, adu la amin a pakaringgoram. 42 Ngem
maysa laeng ti masapul. Pinili ni Maria ti kasayaatan ket saanto a maikkat
kenkuana.”
Lucas 11
1 Iti maysa nga aldaw, agkarkararag ni Jesus iti maysa a lugar. Idi
malpasen, kinuna ti maysa kadagiti adalanna, “Apo, isuronakami man nga
agkararag, kas iti panangisuro ni Juan kadagiti adalanna.” 2 Kinuna ni
Jesus kadakuada, “No agkararagkayo, kastoy ti kunayo: ‘Amami,
Madaydayaw koma ti nasantoan a naganmo; Umay koma ti Pagariam. 3
Itedmo kadakami ti taraon a masapulmi iti inaldaw. 4 Pakawanennakami
kadagiti basbasolmi, Ta pakawanenmi met dagiti amin a nakabasol
kadakami. Dinakam iturong iti nakaro a pakasuotan.’” 5 Kinuna pay ni
Jesus kadagiti adalanna: “Kas pangarigan, iti tengnga ti rabii, mapan ti
maysa kadakayo iti balay ti maysa a gayyemna ket kunana, ‘Gayyem,
pabulodannak man iti tallo a tinapay. 6 Dimmagas ngamin ti maysa a
gayyemko iti panagbiahena ket awan a pulos ti ipakanko kenkuana.’ 7
“Kas pangarigan ta isungbat ti adda iti balay, ‘Dinak ringringgoren!
Nairikepen ti ridaw ket nakaiddakamin kadagiti annakko. Diak mabalinen
ti bumangon a mangted kenka iti uray ania.’ 8 “Ibagak kadakayo, numan
pay aggayyemkayo, saanto a bumangon a mangted kenka iti tinapay.
Ngem gapu ta dimo isardeng ti agdawat, bumangonto a mangted kenka iti
amin a masapulmo. 9 “Ibagak ngarud kadakayo: Agdawatkayo ket
maikkankayto. Agsapulkayo ket makabirokkayto. Agtugtogkayo ket
mailukatto kadakayo ti ruangan. 10 Ta ti amin nga agdawat, maikkan. Ti
agsapul, makabirok. Ti agtugtog, mailukatto kenkuana ti ruangan. 11
“Siasino kadakayo nga amma ti mangted iti uleg iti anakna no dumawat iti
ikan? 12 Wenno ikkanna aya iti manggagama no dumawat iti itlog? 13 No
dakayo, idinto a dakeskayo, ammoyo ti mangted iti naimbag kadagiti
annakyo, dinto ket ad-addan ti pannangted ti Ama sadi langit iti Espiritu
Santo kadagiti agdawat kenkuana!” 14 Pakpaksiaten idi ni Jesus ti maysa
nga umel a demonio manipud iti maysa a lalaki. Idi napaksiaten ti
demonio, makasaon daydi tao. Nasdaaw dagiti tattao, 15 ngem kinuna ti
dadduma kadakuada, “Ni Beelzebub a pangulo dagiti demonio ti
mangmangted kenkuana iti pannakabalin a mamaksiat kadagiti demonio.”
16 Kayat met dagiti dadduma a suoten ni Jesus. Dinawatda ngarud
kenkuana a mangiparang iti milagro a pakakitaan iti yaanamong ti Dios
kenkuana. 17 Ngem ammo ni Jesus ti pampanunotenda ket kinunana
kadakuada, “Saan nga agbayag ti pagarian a nabingaybingay ken
agbibinnusor dagiti tattaona. Kasta met a mawarawara ti familia no
agbibinnusor dagiti kamkamengna. 18 Ngarud, no agbibinnusor dagiti
pasurot ni Satanas, kasano ti panagpaut ti pagarianna? Kunayo a paksiatek
dagiti demonio babaen iti tulong ni Beelzebub a mangted kaniak iti
pannakabalin nga agaramid iti kasta. 19 No kasta ti panangpaksiatko
kadagiti demonio, kasano met ti panangpaksiat kadakuada dagiti
pasurotyo? Isuda met laeng ti mangpaneknek nga agbiddutkayo! 20 Ngem
siak, paksiatek dagiti demonio babaen iti pannakabalin ti Dios. Daytoy ti
mangipaneknek a dimtengen kadakayo ti Pagarian ti Dios. 21 “No
bantayan ti napigsa a lalaki ti balayna ket sisasagana ti amin nga armasna,
saan a maan-ano dagiti sanikuana. 22 Ngem no rauten ken parmeken ti
napigpigsa a lalaki, agawenna amin ti armas a nagtaltalkan ti akimbalay.
Kalpasanna, bingbingayenna dagiti tinakawna. 23 “Ti saan a makikadua
kaniak, busorennak. Ti saan a tumulong kaniak nga agurnong, agiwara.”
24 “No rummuar ti dakes nga espiritu iti maysa a tao, mapan agsursor
kadagiti luglugar a namaga nga agsapul iti paginanaanna. No awan
masapulanna, kunana iti nakemna, ‘Agsubliak iti balayko.’ 25 Agsubli
ngarud ket masarakanna ti balay a nadalus ken naurnos. 26 Rummuar ket
mangisangpet iti pito nga espiritu a dakdakes pay ngem isu. Kaduana ida
nga agnaed sadiay. Iti kasta, dakdakes ti maud-udi a kasasaad dayta a tao
ngem ti immuna.” 27 Idi nasaon ni Jesus daytoy, nagpukkaw ti maysa a
babai a naitallaong sadiay. “Naggasat ketdin ti ina a nangipasngay ken
nangtagibi kenka!” kinunana. 28 “Wen, ngem nagasgasat pay dagiti
dumngeg ken mangtungpal iti sao ti Dios!” insungbat ni Jesus. 29 Idi
umad-adu dagiti tattao a nangaribungbong ken ni Jesus, intuloyna ti
nagsao: “Nagdakesen aya dagiti tattao kadagitoy nga aldaw! Agdawatda
iti milagro ngem awanto ti maited kadakuada malaksid ti milagro ni Jonas.
30 Kas iti panagbalin ni profeta Jonas a pagilasinan dagiti taga-Nineve,
kasta met nga agbalinto ti Anak ti Tao a pagilasinan dagiti tattao kadagitoy
a panawen. 31 “Inton Aldaw ti Panangukom, tumakderto ti Reyna iti
Abagatan a mangidarum kadagiti tattao iti daytoy a kaputotan agsipud ta
nagdaliasat manipud iti pagilianna tapno umayna denggen ti nainsiriban a
pannursuro ni Solomon. Ibagak kadakayo, adda ditoy ti maysa a natantan-
ok ngem ni Solomon. 32 Inton Aldaw ti Panangukom, tumakderto dagiti
taga-Nineve a mangidarum kadakayo, ta nagbabawida kadagiti basbasolda
idi nangngegda ti panangaskasaba ni Jonas. Adda ditoy, ibagak kadakayo,
ti maysa a natantan-ok ngem ni Jonas!” 33 “Awan manggangat iti
pagsilawan sana ilinged wenno kaluban. Iparabawna ketdi iti nairanta a
pagsaadanna tapno makita dagiti tattao ti lawagna apaman a sumrekda iti
balay. 34 “Dagiti matam ti pannakasilaw ti bagim. No nasalun-at dagiti
matam, nalawag ti entero a bagim. Ngem no saan a nasalun-at dagiti
matam, nasipnget ti entero a bagim. 35 Agannadka ngarud tapno ti silaw
nga adda kenka saan a kinasipnget. 36 Isut’ gapuna a no nalawag ti entero
a bagim, ket awan ti pasetna a nasipnget, pasigto a nalawag a kasla
silsilnagannaka ti maysa a naraniag a silaw.” 37 Kalpasan ti panagsao ni
Jesus, inawis ti maysa a Fariseo a makipangan kenkuana. Napan ni Jesus
ket simmango iti panganan. 38 Nasdaaw ti Fariseo idi makitana a saan a
nagbuggo ni Jesus sakbay ti pannanganna. 39 Ngem kinuna ti Apo
kenkuana, “Dakayo a Fariseo, dalusanyo ti ruar ti tasa ken pinggan, ngem
napno ti unegyo iti ranggas ken kinadakes. 40 Maagkayo! Ti Dios a
nangaramid iti akinruar, saanna aya nga inaramid met ti akin-uneg? 41
Itedyo ketdi kadagiti napanglaw ti nagyan kadagiti tasa ken pingganyo, ket
nadalusto aminen a banag kadakayo iti imatang ti linteg. 42 “Asikayo pay
a Fariseo! Agpayso nga itedyo iti Dios ti apagkapullo ti apityo a menta,
ruda ken dadduma pay a natnateng. Ngem diyo met ikaskaso ti kinalinteg
ken panagayat iti Dios. Dagitoy ti rebbengyo a tungpalen ket diyo liwayan
dagiti dadduma. 43 “Asikayo pay a Fariseo! Pagay-ayatyo dagiti
kangrunaan a pagtugawan kadagiti sinagoga ken makablaawan iti publiko.
44 Asikayo pay! Mayarigkayo kadagiti tantanem nga awan markana a
badbaddeken dagiti tattao ta dida ammo a tanem.” 45 “Maestro,” kinuna
kenkuana ti maysa a maestro iti Linteg, “insulto met kadakami ti kasta a
panagsaom!” 46 “Asikayo pay a mamaestro iti Linteg!” insungbat ni
Jesus. “Ipabaklayyo kadagiti tattao dagiti nadagsen nga awit, ngem dikay
met aggunay a tumulong kadakuada. 47 Asikayo pay! Ta yaramidanyo
kadagiti napipintas a tantanem dagiti profeta a pinapatay dagidi ammayo.
48 Kinaagpaysona, ipakitayo nga anamonganyo ti inaramid dagidi
kapuonanyo: pinapatayda dagiti profeta sayo yaramidan ida iti tanemda.
49 “Daytoy ti gapuna a kinuna ti Sirib ti Dios, ‘Mangibaonakto kadakuada
kadagiti profeta ken apostoles. Patayendanto ti sumagmamano kadakuada,
ket idadanesdanto dagiti dadduma.’ 50 “Iti kasta, madusanto dagiti tattao
iti daytoy a kaputotan gapu iti pannakapapatay dagiti amin a profeta,
manipud pannakaparsua ti lubong. 51 Nangrugi iti pannakapapatay ni
Abel agingga iti pannakapapatay ni Zacarias iti nagbaetan ti altar ken ti
Nasantoan a Disso. Wen, ibagak kadakayo, madusanto dagiti tattao iti
daytoy a kaputotan gapu amin kadagitoy a pammapatay. 52 “Asikayo pay
a mamaestro iti Linteg! Inlemmengyo ti tulbek a manglukat iti ruangan ti
balay ti sirib. Madikayo a sumrek ket paritanyo pay dagiti agpanggep a
sumrek!” 53 Bayat ti ipapanaw ni Jesus iti balay, napalalo ti
panangbabalaw kenkuana dagiti Fariseo ken mamaestro iti Linteg. Adu ti
sinaludsodda kenkuana ta 54 kayatda la nga adda maisaona a
pangtiliwanda kenkuana.
Lucas 12
1 Agaaribungbong dagiti rinibribu a tattao ket urayda la agbibinnaddeken.
Immuna a kinasao ni Jesus dagiti adalanna. Kinunana “Annadanyo ti
lebadura dagiti Fariseo, kayatko a sawen, ti panaginsisingpetda. 2 Awan ti
nailemmeng a dinto maiparangarang, ket awan met ti palimed a dinto
mailatak. 3 Iti kasta, ti aniaman a nasaoyo iti kasipngetan, mangngegto iti
lawag. Ket amin nga inyarasaasyo kadagiti siririkep a siled, maipukkawto
manipud iti tuktok dagiti balbalay.” 4 “Ibagak kadakayo, gagayyemko:
Dikay agbuteng kadagiti mangpapatay iti bagi ngem awanen ti dakdakes a
mabalinda nga aramiden. 5 Ipakaammok kadakayo ti rumbeng a
pagbutngan: Agbutengkayo iti Dios nga adda pannakabalinna a
mangitappuak iti bagi idiay infierno kalpasan ti panangpapatayna. Wen,
patiendak, isu ti pagbutnganyo! 6 “Saan aya a malako iti dua a sentimo ti
lima a sallapingaw? Nupay kasta, saan a malipatan ti Dios ti uray maysa
laeng a sallapingaw. 7 Uray dagiti buokyo, nabilangda amin. Isut’ gapuna
a dikay agbuteng ta napatpategkayo nga adayo ngem ti adu a
sallapingaw.” 8 “Ibagak kadakayo: Ti mangipakaammo kadagiti tattao iti
pannakikaduana kaniak, kastanto met ti aramiden ti Anak ti Tao iti
imatang dagiti angheles ti Dios. 9 Ngem ti mangilibak kadagiti tattao iti
pannakikaduana kaniak, ilibakto met ti Anak ti Tao kadagiti angheles ti
Dios. 10 “Mapakawanto ti siasinoman nga agsao iti maibusor iti Anak ti
Tao. Ngem dinto mapakawan ti agsao iti maibusor iti Espiritu Santo. 11
“No ipandakayo kadagiti sinagoga a pakausiganyo wenno isaklangdakayo
kadagiti gobernador wenno agtuturay, diyonto pakadanagan ti
panangsalaknibyo kadagiti bagbagiyo wenno anianto ti sawenyo. 12 Ta iti
dayta nga oras, isuronakayto ti Espiritu Santo iti tumutop a sawenyo.” 13
Adda maysa a lalaki a naitallaong sadiay. “Maestro,” kinunana ken ni
Jesus, “ibagam man iti kabsatko a lalaki a bingayenna ti sanikua a
tinawidmi iti daydi amami.” 14 “Gayyem,” insungbat ni Jesus, “siasino
aya ti nangted kaniak iti kalintegan a mangeddeng wenno mangbingay iti
tawidyo nga agkabsat?” 15 Intuloyna a kinuna kadakuada amin: “Kitaenyo
ket agannadkay iti amin a kita ti kinaagum. Ta ti pudno a biag ti tao saan a
maibatay iti sanikua, uray no kasano ti kinabaknangna.” 16 Sinaritana
kadakuada daytoy a pangngarig, “Adda idi baknang a nawadwad ti apitna.
17 Kinunana iti bagina: ‘Ania ngata ti aramidek? Awan umanay a
pagipempenak iti apitko. 18 A, ammokon! Daytoy ti aramidek:
Rakrakekto dagiti sarusarko, ket mangbangonakto kadagiti daddadakkel a
pagipempenan iti apitko ken dadduma a sanikuak. 19 Ket kunakto iti
bagik: ‘Naggasatkan, bagi, ta adda amin a masapulmo iti adu a tawen.
Aginanaka, manganka, uminumka, ket agragsakka.’ 20 Ngem kinuna ti
Dios kenkuana: ‘Maag! Ita met la a rabii, matayka. Ket amin dagitoy nga
urnongmo, siasinonto ti agtagikua?’” 21 Ket inggibus ni Jesus, “Kastanto
ti pagbanagan dagiti agurnong iti adu a sanikua nga agpaay kadakuada,
ngem napanglawda iti imatang ti Dios.” 22 Kinuna ni Jesus kadagiti
adalanna, “Daytoy ti gapuna nga ibagak kadakayo a diyo pakadanagan ti
taraon a pagbiagyo wenno ti lupot a pagkawesyo. 23 Napatpateg nga
adayo ti biag ngem ti taraon, ket napatpateg met ti bagi ngem ti lupot. 24
Kitaenyo dagiti wak. Dida agmula wenno agani. Awan kamalig wenno
sarusarda. Nupay kasta, taraonan ida ti Dios. Napatpategkayo nga adayo
ngem dagiti tumatayab! 25 “Siasino kadakayo ti makapaatiddog iti biagna
babaen iti panagdandanagna? 26 No diyo maaramid ti uray kasta a bassit a
banag, apay a maringgorankayo kadagiti dadduma? 27 Kitaenyo ti
panagdakkel dagiti lirio. Dida agtrabaho wenno agabel. Ngem ibagak
kadakayo a ni Solomon, uray no kasano ti kinabaknangna, awan kawesna
a kas kapintas ti uray maysa kadagitoy a sabsabong. 28 No kawesan ti
Dios dagiti ruot iti tay-ak, ruot nga adda ita ket inton bigat maipuor, saan
aya a nangnangruna a kawesannakayo? Nagbassit ketdin ti pammatiyo! 29
Dikayo ngarud maringgoran iti kanen ken inumenyo. 30 Ta dagitoy ti
pakaringgoran dagiti pagano ditoy lubong. Ammo ni Amayo a masapulyo
dagitoy. 31 Ipangpangrunayo ketdi a biroken ti Pagarianna, ket itednanto
pay dagitoy kadakayo.” 32 “Dikay agbuteng, bassit nga arbanko! Ta
pagayatan ni Amayo nga ited kadakayo ti Pagarian. 33 Ilakoyo ti amin a
kukuayo ket ilimosyo ti paglakoanyo kadagiti napanglaw. Isaganaanyo
dagiti bagbagiyo kadagiti supot a di marunot ken kadagiti di mapukaw a
kinabaknang sadi langit. Ta sadiay saan a matakaw ken saan a mabuot. 34
Ta no sadino ti ayan ti gamengyo, adda met sadiay ti pusoyo.” 35
“Masapul a sisasaganakayo latta iti uray ania a mapasamak ken sigagangat
dagiti pagsilawanyo 36 a kas kadagiti adipen a mangpaspasungad iti
amongda a napan nakiboda. No sumangpet ket agtugtog, dagdagusenda
nga ilukat ti ridaw. 37 Anian a ragsak dagiti kakasta nga adipen a siririing
ken sisasagana a masangpetan ti amongda. Ibagak kadakayo, agkawesto iti
pagserbi, pagtugawennanto ida iti panganan, ket serbiannanto ida. 38
Anian a ragsakda no masangpetanna ida a sisasagana, uray no sumangpet
iti tengnga ti rabii wenno naladladaw pay. 39 Ammoenyo daytoy: No
ammo ti ama ti familia ti oras a yaay ti mannanakaw, dina itulok a serken
ti mannanakaw ti balayna. 40 Kasta met kadakayo, masapul a
sisasaganakayo latta, ta umayto ti Anak ti Tao iti oras a diyo
ipagpagarup.” 41 “Apo,” kinuna ni Pedro, “dakami kadi ti pangiturongam
iti daytoy a pangngarig wenno inrantam nga agpaay iti amin?” 42
Insungbat ti Apo, “Siasino ngarud ti mapagtalkan ken masirib nga adipen?
Isu ti tudingan ti amongna a mangaywan iti balayna ken mangted kadagiti
dadduma nga adipen iti pannakabagida a kanen no dumteng ti pannangan.
43 Nagasat dayta nga adipen no masangpetan ti amongna a kasta ti ar-
aramidenna! 44 Wen, ibagak kadakayo, isaadto ti amo daytoy nga adipen
nga agaywan kadagiti amin a sanikuana. 45 Ngem no kuna dayta nga
adipen iti bagina, ‘Mabayag pay ti isasangpet ti amongko,’ ket iruginan a
kabilen dagiti padana nga adipen, lallaki man wenno babbai, sa mangan,
uminum ken agbartek. 46 Dumtengto ti amongna iti aldaw a dina
ipagpagarup ken iti oras a dina ammo. Dusaento ti amongna ket ipalak-
amnanto kenkuana ti kaikarian dagiti saan a mapagtalkan. 47 “Ti adipen a
makaammo iti kayat a paaramid ti amongna ngem di met agkuti ken
agtungpal, magagaranto iti saplit. 48 Nalaglag-anto ti pannakasaplit ti
adipen a di makaammo iti kayat a paaramid ti amongna nupay no
agaramid iti pakaigapuan ti pannakadusana. “No adu ti naited iti tao,
adunto met ti manamnama nga aggapu kenkuana. Ngem no ad-adu ti
maited iti tao, ad-adunto met ti manamnama nga aggapu kenkuana.” 49
“Immayak a mangyeg iti pannusa ti Dios kadagiti tattao, ket kayatko a
mangrugi koman ti pannakadusada a kasla apuy a mangur-uram
kadakuada. 50 Adda buniag a masapul nga awatek, ket anian a dukotko
agingga a di matungpal. 51 “Ipagarupyo aya nga immayak mangyeg iti
kappia ditoy lubong? Ibagak kadakayo a panagsisina ti inyegko, saan a
kappia. 52 Manipud ita, mabingbingay ti maysa a familia a lima ti
kamkamengna. Kontraen dagiti tallo ti dua, ket kontraen dagiti dua ti tallo.
53 Ti ama kontraenna ti anakna a lalaki, ket ti anak a lalaki kontraenna ti
amana. Ti ina kontraenna ti anakna a babai, ket ti anak a babai kontraenna
ti inana. Ti katugangan a babai kontraenna ti manugangna a babai, ket ti
manugang a babai kontraenna met ti katuganganna a babai.” 54 Kinuna
pay ni Jesus kadagiti tattao, “No makitayo ti ulep nga agparang iti laud,
dagus a kunayo nga umay ti tudo, ket kasta ti mapasamak. 55 No
madlawyo nga aggapu ti angin iti abagatan, kunayo nga umay ti pudot; ket
kasta ti maaramid. 56 Aginsisingpet! Maibagayo ti kasasaad ti panawen
babaen ti panangkitayo iti langa ti langit ken daga, ngem apay a diyo
maawatan ti kayat a sawen ti agdama a tiempo?” 57 “Apay a diyo
panunoten ti rumbeng nga aramidenyo? 58 No adda mangidarum kenka
ket ipannaka iti pangukoman, aramidem ti amin a kabaelam a
makilinnawag kenkuana sakbay a dumatagkay iti ukom. No dika
makirinnisut, pilitennaka nga agparang iti ukom a mangyawat kenka iti
polis, ket maipupokkanto iti pagbaludan. 59 Ibagak kenka a dikanto
makaruar sadiay agingga a mabayadam ti amin a multam.”
Lucas 13
1 Iti dayta a tiempo, adda sumagmamano a tattao sadiay a nangibaga ken
ni Jesus maipapan kadagiti taga-Galilea a pinapatay ni Pilato idi
madamada nga agidatdaton iti Dios. 2 Kinuna kadakuada ni Jesus, “Gapu
ta kasta ti pannakapapatay dagiti taga-Galilea, ipagarupyo kadi a
dakdakkel ti basolda ngem dagiti dadduma a taga-Galilea? 3 Saan! Ibagak
kadakayo a no saankayo nga agbabawi kadagiti basbasolyo, mataykayto
amin a kas kadakuada. 4 “Ket ania met ti panangipagarupyo kadagidi
sangapulo ket walo a natay a nagaburan idi narba ti torre idiay Siloe?
Ipagarupyo kadi a daytoy ti mangipaneknek a dakdakesda ngem dagiti
amin a tattao nga agnaed idiay Jerusalem? 5 Saan! Ibagak kadakayo a no
saankayo nga agbabawi kadagiti basbasolyo, mataykayto amin a kas
kadakuada.” 6 Sinarita ni Jesus daytoy a pangngarig kadakuada: “Adda idi
maysa a tao nga adda mulana nga igos iti kaubasanna. Naminsan, napanna
kinita no adda bungana ngem awan nasarakanna. 7 Kinunana ngarud iti
pagay-aywanenna, ‘Kitaem, tallo a tawenen nga um-umayak ditoy nga
agbirok iti bunga daytoy nga igos. Awan pay nasarakak a bungana.
Pukanemon! Apay nga ibusenna ti kinataba ti daga?’ 8 Ngem insungbat ti
agay-aywan, ‘Apo, bay-am pay, uray ita la a tawenen. Kaliakto ti
lawlawna sakonto abunoan. 9 No agbunga inton umay a tawen, nasayaat.
No saan nga agbunga, papukanmonton.’” 10 Iti maysa nga Aldaw a
Panaginana, mangisursuro ni Jesus iti uneg ti maysa a sinagoga. 11 Adda
babai sadiay a sangapulo ket walo a tawenen a linuganan ti dakes nga
espiritu. Nagbalin a kubbo ket pulos a di makatakder iti nalinteg. 12 Idi
makita ni Jesus ti babai, inayabanna. “Naimbagankan iti sakitmo!” kinuna
ni Jesus kenkuana. 13 Impatay ni Jesus dagiti imana. Dagus a nagtakder ti
babai a sililinteg ket nagdaydayaw iti Dios. 14 Nakapungtot ti agturay iti
sinagoga, gapu ta nangagas ni Jesus iti Aldaw a Panaginana ket kinunana
kadagiti tattao, “Innem nga aldaw ti panagtrabahotayo. Ngarud, umaykayo
agpaagas kadagita nga aldaw, a saan ketdi nga iti Aldaw a Panaginana!”
15 Ngem insungbat ti Apo kenkuana, “Dakayo nga aginsisingpet! Iti
Aldaw a Panaginana, diyo aya warwaran ti baka wenno asnoyo iti
nakaiparngedanda tapno inkay ipainum ida? 16 Sangapulo ket walo a
tawenen a pinarigat ni Satanas daytoy nga anak ni Abraham. Saan aya a
rumbeng nga ita nga Aldaw a Panaginana, mawayawayaan iti
pannakabaludna?” 17 Nabainan amin a kabusor ni Jesus gapu iti
insungbatna. Ngem nagragsak dagiti tattao gapu kadagiti amin a
nakaskasdaaw nga inaramidna. 18 Sinaludsod ni Jesus, “Ania ti kayarigan
ti Pagarian ti Dios? Ania ti mabalinko a pangipadaan? 19 Kastoy ti
kayariganna: mangala ti maysa a tao iti bukel ti mostasa nga imulana iti
minuyonganna. Nagtubo ket nagbalin a kayo, ket nagumokan dagiti
tumatayab dagiti sangsangana.” 20 Sinaludsod manen ni Jesus, “Ania ti
pangyarigak iti Pagarian ti Dios? 21 Kastoy ti kayariganna: mangala ti
maysa a babai iti lebadura ket igamayna iti uppat a pulo a litro nga arina.
Gapu iti lebadura, bumsog ti entero a masa.” 22 Iti dalanna a mapan idiay
Jerusalem, nangisursuro ni Jesus kadagiti nalabasanna nga il-ili ken
barbarrio. 23 Adda nagsaludsod kenkuana, “Apo, manmano kadi dagiti
maisalakan?” Insungbat ni Jesus kadakuada, 24 “Aramidenyo ti
kabaelanyo a sumrek iti nailet a ruangan, agsipud ta adunto ti agtarigagay
a sumrek ngem didanto makastrek. 25 “Inton tumakderen ti ama ti familia
tapno mapanna irikep ti ruangan, mabatikayto iti ruar. Uray agtugtogkayo
ket kunayo, ‘Apo, ilukatmo man ti ruangan,’ isungbatnanto kadakayo,
‘Diak ammo no taga-anokayo.’ 26 Iti kasta, kunayonto, ‘Nakipangpangan
ken nakiin-inumkami kenka ket nangisursuroka idiay ilimi.’ 27
Isungbatnanto manen, ‘Diak ammo no taga-anokayo. Umadayokayo
kaniak, dakay amin a managdakdakes!’ 28 Agsangit ken
agngaretngetkayto inton makitayo nga adda da Abraham, Isaac, Jacob ken
dagiti amin a profeta iti Pagarian ti Dios, idinto nga addakay iti ruar! 29
Umayto dagiti tattao nga aggapu iti daya ken laud, iti amianan ken
abagatan, ket sumangodanto a mangan idiay Pagarian ti Dios. 30
“Kitaenyo, adda dagiti maudi ita nga umunanto, ket adda dagiti umuna ita
a maudinto.” 31 Iti dayta met laeng nga aldaw, napan ken ni Jesus ti
sumagmamano a Fariseo ket kinunada kenkuana, “Masapul a pumanawka
ditoy ket inka iti sabali a lugar, ta kayatnaka a papatayen ni Herodes.” 32
“Inkay ibaga iti dayta nga aso,” insungbat ni Jesus kadakuada. “‘Ita ken
inton bigat, paksiatek dagiti demonio ket mangagasak. Iti maikatlo nga
aldaw, malpaskonton ti aramidko.’ 33 Ngem ita ken inton bigat, ken iti
sumaruno pay nga aldaw, masapul nga ituloyko ti magna. Saan a rumbeng
a mapapatay ti maysa a profeta iti sabali a lugar no saan nga idiay
Jerusalem. 34 “O Jerusalem, Jerusalem a mangpapatay kadagiti profeta
ken mangubor kadagiti imbaon kenka ti Dios! Namin-ano a kinayatko nga
ummongen dagiti annakmo, kas iti panangsallukob ti upa kadagiti piekna,
ngem madikayo met! 35 Ita, mabaybay-an a mamimpinsan ti balayyo.
Ibagak kadakayo a didakton makita agingga iti dumteng ti tiempo a
kunayo: ‘Bendisionan ti Dios ti umay iti nagan ti Apo!’”
Lucas 14
1 Iti maysa nga Aldaw a Panaginana, napan nangan ni Jesus iti balay ti
maysa kadagiti pangulo a Fariseo, ket sinisiim dagiti tattao. 2 Adda lalaki
nga imbal dagiti saka ken takkiagna a napan ken ni Jesus. 3 Sinaludsod ni
Jesus kadagiti mamaestro iti Linteg ken kadagiti Fariseo, “Ipalubos kadi ti
Linteg ti panangpaimbag iti masakit iti Aldaw a Panaginana?” 4 Ngem
nagulimekda. Innala ni Jesus ti tao ket pinaimbagna sana pinagawid. 5
Kalpasanna, kinunana kadakuada, “No ti maysa kadakayo adda anakna
wenno bakana a matnag iti bubon iti Aldaw a Panaginana, dina kadi
dagusen nga aonen uray no Aldaw a Panaginana?” 6 Awan naisungbatda
kenkuana maipapan iti daytoy. 7 Napaliiw ni Jesus a pilien dagiti sangaili
dagiti kasayaatan a pagtugawan. Isut’ gapuna a sinaritana amin kadakuada
daytoy a pangngarig: 8 “No adda mangawis kenka iti paboda, dimo pilien
ti kasayaatan a pagtugawan, amangan no adda naawis a natantan-ok ngem
sika. 9 Umayto kenka ti nangawis kadakayo a dua ket kunana,
‘Pangngaasim ta itedmo dayta a tugaw kenkuana.’ Mabainankanto ket
kapilitan nga agtugawka iti kanumoan a pagyanan. 10 “Ngem no
maawiska, inka ketdi agtugaw iti kanumoan a lugar tapno umayto kenka ti
nangawis ket kunana, ‘Gayyem, umayka idiay nasaysayaat a pagtugawan.’
Iti kasta, maidaydayawkanto iti imatang dagiti sangaili. 11 Ta
maipababanto ti amin a mangitan-ok iti bagina, ket maitan-okto ti amin
nga agpakumbaba.” 12 Kinuna met ni Jesus iti nangawis kenkuana, “No
yawismo ti maysa a pangaldaw wenno pangrabii, dimo awisen dagiti
gagayyemmo wenno dagiti kakabsat, kakabagian wenno babaknang a
kaarrubam. Ta awisendakanto met, ket iti kasta, supapakandakanto iti
impaaymo kadakuada. 13 No agpadayaka, imbitaram dagiti napanglaw,
dagiti lugpi, dagiti pilay ken dagiti bulsek. 14 Nagasatkanto, ta didaka
masupapakan. Ngem gunggonaannakanto ti Dios inton agungar dagiti
nalinteg a tattao.” 15 Nangngeg ti maysa kadagiti nakisango ken ni Jesus
iti panganan daytoy a pangngarig. Kinunana ken ni Jesus, “Anian a ragsak
dagiti sumangonto iti panganan iti Pagarian ti Dios!” 16 Kinuna ni Jesus
kenkuana, “Adda idi maysa a tao a nangisagana iti dakkel a padaya ket
adu ti inawisna. 17 Idi dimtengen ti oras ti padaya, binaonna ti adipenna a
mangibaga kadagiti naawis, ‘Umaykayon, ta naisagana aminen.’ 18
“Ngem nagpambarda amin. Kinuna ti maysa iti adipen, ‘Gimmatangak iti
talon ket masapul nga innak kitaen. Dispensarennak laengen.’ 19 Kinuna
met ti sabali, ‘Gimmatangak iti lima nga agkasangol a baka ket innak
ipadas ida. Dispensarennak laengen.’ 20 Kinuna met ti sabali,
‘Kakaskasarko, isut’ gapuna a diak makaumay.’ 21 “Nagawid ti adipen ket
imbagana amin daytoy iti apona. “Nakapungtot ti apo. Binilinna ti
adipenna, ‘Darasem ti mapan kadagiti kalkalsada ken daldalan iti ili, ket
yegmo ditoy dagiti napanglaw, dagiti lugpi, dagiti bulsek ken dagiti pilay.’
22 “Iti saan a nabayag, kinuna ti adipen, ‘Apo, natungpal ti bilinmo ngem
adu pay laeng ti pagyanan.’ 23 “Iti kasta, kinuna manen ti apo iti adipen,
‘Inka kadagiti daldalan ken bitbit-ang, ket pilitem dagiti tattao nga umay
tapno mapno ti balayko. 24 Ta ibagak kadakay amin nga awanto kadagiti
inawisko ti makaraman iti saganak.’” 25 Iti naminsan, nakaad-adu a tattao
ti sumursurot ken ni Jesus. Simmango ni Jesus kadakuada ket kinunana,
26 “Saan a makapagbalin nga adalak ti siasinoman nga umay kaniak
malaksid no dakdakkel ti panagayatna kaniak ngem ti panagayatna
kadagiti nagannak kenkuana, ti asawana ken dagiti annakna, dagiti
kakabsatna ken uray ti bagina met laeng. 27 Saan met a makapagbalin nga
adalak ti siasinoman a di mangbaklay iti krusna ken sumurot kaniak. 28
“No maysa kadakayo ti agpanggep a mangbangon iti torre, saan aya nga
agtugaw nga umuna tapno panunotenna ti magastonanto, no adda
makaanay a kuartana a pangleppasna? 29 No saan, dinanto maituloy ti
torre kalpasan ti panangikabilna iti fondasion. Ang-angawento dagiti amin
a makakita iti inrugina ket kunadanto, 30 ‘Inrugina a binangon ti torre,
ngem dina met maituloy!’ 31 “No rummuar ti maysa nga ari nga addaan
10,000 a soldado ket mapanna sarangten ti sabali nga ari nga addaan
20,000 a soldado, agtugaw pay a mangpanunot no kabaelanna a sangoen ti
karangetna nga ari. 32 No saan, mangibaon iti sumabat iti dayta nga ari no
adayo pay laeng tapno dawatenna ti panagkappiada.” 33 Kamaudiananna,
kinuna ni Jesus, “Kasta met nga awan kadakayo ti makapagbalin nga
adalak no dina panawan amin nga adda kenkuana.” 34 “Nasayaat ti asin.
Ngem no timmamnayen, saanen a mapaapgad. 35 Awanen ti maiserbina iti
daga wenno iti pagibuntonan iti rugit ti animal ket iti kasta maibelleng.
“Dumngegkayo ngarud, no adda pannakaawatyo!”
Lucas 15
1 Iti maysa nga aldaw, adu nga agsingsingir iti buis ken dadduma a
managbasol ti napan nagdengngeg ken ni Jesus. 2 Nagtanabutob dagiti
Fariseo ken mamaestro iti Linteg. “Awaten daytoy a tao dagiti dakes ti
pakasarsaritaanda ket kasangona pay ida a mangan!” kinunada. 3 Iti kasta,
insarita ni Jesus kadakuada daytoy a pangngarig: 4 “Kas pangarigan, adda
100 a karnero ti maysa kadakayo, ket mapukaw ti maysa kadakuada, ania
ti aramidenna? Panawanna dagiti 99 iti pagar-arabanda sana mapan
sapulen ti napukaw agingga a mabirokanna. 5 No masarakannan, kasta
unay ti ragsakna ket baklayenna 6 nga isangpet idiay balayna. Ayabanna
dagiti gagayyem ken kaarrubana ket kunana kadakuada, ‘Maragsakanak
unay ta nabirokak met laeng ti napukaw a karnerok! Agrambaktayo!’ 7
“Kasta met, ibagak kadakayo a dakdakkelto ti ragsak sadi langit gapu iti
maysa a managbasol nga agbabawi, ngem gapu iti 99 a di makasapul iti
panagbabawi.” 8 Intuloy ni Jesus, “Wenno kas pangarigan, adda
sangapulo a bagi ti pirak ti maysa a babai, ket no mapukawna ti maysa,
ania ti aramidenna? Gangtanna ti pagsilawan, sagadanna ti balayna, ket
agbirok a sipapasnek agingga a masapulanna. 9 Apaman a masarakanna,
ayabanna dagiti gagayyem ken kaarrubana. ‘Agrambaktayo,’ kunana
kadakuada, ‘ta nasapulak met laeng ti napukawko a kuarta.’ 10 “Kasta
met, ibagak kadakayo, nga agragsak dagiti angheles ti Dios gapu iti maysa
a managbasol nga agbabawi.” 11 Sinarita pay ni Jesus daytoy: “Adda idi
tao nga addaan iti dua nga annak a lallaki. 12 Kinuna ti inaudi iti amana,
‘Ama, itedmon ti tawidko.’ Biningay ngarud ti ama ti sanikuana kadagiti
dua nga annakna. 13 Kalpasan ti sumagmamano nga aldaw, inlako ti
inaudi ti bingayna, ket innalana ti naglakoanna sa pimmanaw. Napan iti
adayo a daga ket sadiay binusbosna amin a kuartana iti nabarayuboy a
panagbiag. 14 Idi nagastonan amin a kuartana, dimteng ti nakaro a bisin iti
dayta a daga ket pulos nga awan nabatin kenkuana. 15 Iti kasta, napan
nagtrabaho iti maysa kadagiti umili sadiay a nangibaon kenkuana iti away
tapno agtaraken kadagiti baboy. 16 Kayatna ti mangan iti kankanen dagiti
baboy, ngem awan nangted kenkuana! 17 Idi makapanunot met laeng,
kinunana, ‘Agsobsobraan iti kanen dagiti amin a mangmangged idiay
balay ni amak, ket addaak ditoy a matmatay iti bisin! 18 Pumanawak ketdi
ket agsubliak ken ni amak. Ama, kunakto, nagbasolak iti Dios, kasta met
kenka. 19 Diak maikarin a maawagan nga anakmo. Ibilangnak kadi a kas
maysa kadagiti tangtangdanam.’ 20 Pimmanaw ngarud sadiay ket
nagrubbuat nga agsubli ken amana. “Adayo pay laeng iti balayda idi
makita ni amana. Naasian ti ama ket timmaray a simmabat iti anakna.
Inapungolna sana inagkan. 21 ‘Ama,’ kinuna ti anak, ‘nagbasolak iti Dios,
kasta met kenka. Diak maikarin a maawagan nga anakmo.’ 22 Ngem
inayaban ti ama dagiti katulonganna. ‘Darasenyo!’ kinunana. ‘Alaenyo ti
kasayaatan a bado ket ikawesyo kenkuana. Singsingan ken sapatosanyo.
23 Inkay alaen ti napalukmeg a baka ket partienyo. Agrambaktayo! 24 Ta
natay daytoy nga anakko, ngem nagungar. Napukaw ngem nasapulan met
laeng.’ Ket nangrugin ti ramrambak. 25 “Adda idi ti inauna nga anak idiay
taltalon. Idi agawid ket makaasideg iti balay, nangngegna ti toktokar ken
salsala. 26 Inayabanna ti maysa kadagiti katulongan ket sinaludsodna,
‘Ania ti mapaspasamak?’ 27 ‘Nagsublin ti kabsatmo,’ insungbat ti
katulongan, ‘ket pinaparti ni tatangmo ti napalukmeg a baka, ta
napasangpetna a sisasalun-at ken sikakaradkad.’ 28 Kasta unay ti pungtot
ti inauna a kabsat ket dina kayat ti sumrek iti balay. Iti kasta, rimmuar ti
amana a nangay-ayo kenkuana a sumrek. 29 ‘Kitaem,’ kinuna ti inauna,
‘nabayagen a kaslaak la maysa a tagabu a nagserserbi kenka. Pulos a diak
nagsukir kadagiti bilbilinmo. Ania ti intedmo kaniak? Dinak man la
inikkan iti uray maysa la koma a kalding a pakipagragragsakko kadagiti
gagayyemko. 30 Ngem daytoy nga anakmo—binusbosna amin a sanikuam
kadagiti dakes a babbai. Ket ita ta nagsublin, impartiam iti napalukmeg a
baka!’ 31 ‘Anakko,’ insungbat ti ama, ‘kanayon nga addaka ditoy dennak,
ket kukuam amin a kukuak. 32 Ngem masapul nga agrambak ken
agragsaktayo, ta natay ti kabsatmo ngem nagungar. Napukaw ngem
nasapulan met laeng.’”
Lucas 16
1 Kinuna ni Jesus kadagiti adalanna, “Adda idi maysa a baknang nga adda
pagay-aywanenna kadagiti sanikuana. Naipulong kenkuana a busbusbosen
ti agaywan ti kuarta ti amongna. 2 “Iti kasta, pinaayaban ti amongna ket
kinunana kenkuana, ‘Ania daytoy madamdamagko maipapan kenka?
Itedmo kaniak ti amin a listaan ti panagaywanmo kadagiti sanikuak, ta
ikkatenkan nga agaywan.’ 3 “Kinuna ti tao iti bagina, ‘Ikkatennakon ni
amongko iti trabahok. Anianto ti aramidek? Diak kabaelan ti agkali ket
mabainak met a makipalpalama. 4 A, ammokon ti aramidek tapno inton
maikkatak iti saadko, addanto gagayyemko a mangpasangbay kaniak
kadagiti balbalayda.’ 5 “Inayabanna ngarud dagiti amin a nakautang iti
amongna. Kinunana iti umuna, ‘Mano ti utangmo iti amongko?’ 6
‘Sangagasut a burnay a lana,’ insungbatna. ‘Adtoy ti resibom,’ kinuna ti
agay-aywan. ‘Agtugawka ket isuratmo ti limapulo.’ 7 Iti sabali kinunana,
‘Ket sika, mano met ti utangmo?’ ‘Sangaribu a salup a trigo,’ insungbatna.
‘Adtoy ti resibom,’ kinuna ti agay-aywan. ‘Isuratmo ti walogasut.’ 8
“Nagbanaganna, dinaydayaw ti among ti ulbod a pagay-aywanenna gapu
iti kinasikap nga inaramidna. Nasiksikap ngamin dagiti tattao ditoy lubong
iti maipapan kadagiti ar-aramidda ngem dagiti tattao iti lawag.” 9 Kinuna
pay ni Jesus, “Ibagak ngarud kadakayo, pakigayyemyo dagiti naindagaan
a sanikuayo tapno inton maibusankayo, maawatkayto iti agnanayon a
pagtaengan. 10 Ti tao a mapagtalkan kadagiti babassit a banag,
mapagtalkanto met kadagiti dadakkel. Ngem ti saan a matalek kadagiti
babassit a banag, saan met a mapagtalkan kadagiti dadakkel. 11 Ngarud,
no saankayo a matalek nga agaywan kadagiti naindagaan a gameng,
kasano a mapagtalkankayo kadagiti napaypayso a gameng? 12 No
saankayo a mapagtalkan kadagiti saanyo a kukua, siasinonto ti mangted
kadakayo iti kukuayo? 13 “Awan ti adipen a makapagserbi iti dua nga
among. Ta guraennanto ti maysa ket ayatennanto ti sabali, wenno
agserbinto a sipapasnek iti maysa ket umsiennanto ti sabali. Diyo
mapaggiddan a pagserbian ti Dios ken ti sanikua.” 14 Nangngeg dagiti
Fariseo amin dagitoy, ket inuyawda ni Jesus agsipud ta naagumda iti
kuarta. 15 Kinuna ni Jesus kadakuada, “Agparangkayo a kasla nalinteg iti
imatang dagiti tattao. Ngem ammo ti Dios ti naguneg iti pusoyo. Ta dagiti
ibilang ti tao a kas napateg awan kaes-eskanna iti imatang ti Dios. 16
“Naannurot ti Linteg ni Moises ken dagiti sursurat dagiti profeta agingga
iti tiempo ni Juan a Mammuniag. Manipud idin, naikaskasaba ti Naimbag
a Damag maipapan iti Pagarian ti Dios, ket ipapilit ti tunggal maysa ti
iseserrekna. 17 Nalaklaka ti pannakapukaw ti langit ken daga ngem ti
pannakaikkat ti uray kabassitan laeng a paset ti Linteg. 18 “Makabasol iti
pannakikamalala ti lalaki a mangisina iti asawana sa mangasawa iti sabali
a babai. Ket ti lalaki a mangasawa iti naisina a babai, makabasol met iti
pannakikamalala.” 19 “Adda idi maysa a baknang a kanayon a sikakawes
kadagiti agkakangina a lupot. Inaldaw met nga agbibiag a sibubuslon. 20
“Adda met maysa a napanglaw nga agnagan Lazaro. Nalapunos iti gaddil.
Inaldaw a maipan iti ruangan ti balay ti baknang. 21 Tartarigagayanna
ngamin a pedpeden ti bisinna kadagiti maregreg iti sirok ti lamisaan ti
baknang. Pasaray mapan dildilan dagiti aso ti gaddilna. 22 “Natay ti
napanglaw ket impan dagiti angheles iti ayan ni Abraham. Natay met ti
baknang ket naitanem. 23 Idi agsagaba iti napalalo idiay Hades,
timmangad ket nakitana ni Abraham nga adda iti adayo agraman ni Lazaro
iti abayna. 24 Iti kasta, impukkawna, ‘Ama Abraham! Kaasiannak kadi ta
ibaonmo ni Lazaro a mangbabasa iti ramayna ket palamiisanna toy dilak,
ta kasta unay ti pannakatutuokko iti daytoy nga apuy!’ 25 “Ngem kinuna
ni Abraham, ‘Anakko, laglagipem a kabayatan ti panagbiagmo, naited
kenka ti amin nga agkakaimbag a banag idinto a naglak-am ni Lazaro iti
rigat. Itan, adda ditoy a maliwliwa ket addaka dita a matutuok. 26 Saan la
a dayta! Adda dakkel a yuyeng iti nagbaetantayo tapno saan a
makaballasiw dagiti mayat nga umay dita manipud ditoy wenno dagiti
aggapu dita nga umay ditoy.’ 27 “‘Dawatek ngarud kenka, ama Abraham,’
kinuna ti baknang, ‘nga ibaonmo ni Lazaro iti balay ni amak 28 tapno
bagbagaanna dagiti lima a kakabsatko a lallaki sadiay, amangan no
umayda met ditoy yan ti tuok.’ 29 “Ngem kinuna ni Abraham, ‘Adda ni
Moises ken dagiti profeta a mamagbaga kadakuada. Masapul a dumngeg
dagiti kakabsatmo iti saoda.’ 30 “‘Saan nga umanay dayta, ama Abraham,’
insungbat ti baknang. ‘Ngem no agungar ti maysa kadagiti natay ket
mapan kadakuada, agbabawidanto kadagiti basbasolda.’ 31 “Ngem kinuna
ni Abraham, ‘No dida denggen ni Moises ken dagiti profeta, didanto met
la mamati, uray pay no adda agungar kadagiti natay.’”
Lucas 17
1 Kinuna ni Jesus kadagiti adalanna, “Saan a pagduaduaan ti kaadda dagiti
pakaigapuan ti panagbasol dagiti tattao. Ngem asi pay ti tao a pakaigapuan
ti basol! 2 Nasaysayaat koma no maigalut ti gilingan a bato iti tengngedna
sa maitappuak iti taaw, ngem ti panangisungsongna nga agbasol ti maysa
kadagitoy nga ubbing. 3 Agannadkayo ngarud iti aramidyo! “Babalawem
ti kabsatmo no makabasol. Pakawanem no agbabawi. 4 No mamimpito
nga agbasol kenka iti maysa nga aldaw, ket tunggal makabasol agpakawan
kenka, rebbengmo a pakawanen.” 5 Kinuna dagiti apostoles iti Apo,
“Pabilgem ti pammatimi.” 6 “No adda pammatiyo a kas iti kadakkel ti
bukel ti mostasa,” insungbat ti Apo, “mabalinyo a kuna iti daytoy a kayo ti
sikamoro, ‘Bag-utem ti bagim ket imulam iti taaw,’ ket agtulnog
kadakayo.” 7 “Kas pangarigan, maysa kadakayo ti adda adipenna nga
agar-arado wenno agay-aywan kadagiti karnero, ket sumangpet nga
aggapu iti talon, kunam kadi kenkuana, ‘Darasem ta umayka manganen?’
8 Saan! Kunam ketdi kenkuana, ‘Isaganam ti pangrabiik sakanto agsukat
nga agserbi kaniak bayat ti pannanganko. Kalpasanna, mabalinmonton ti
mangan.’ 9 “Masapul aya nga agyamanka iti adipen gapu iti
panangtungpalna iti naibilin? Saan! 10 Kasta met kadakayo: No
naaramidyon amin a naibilin kadakayo, kunayo, ‘Adipenkami laeng.
Inaramidmi laeng ti pagrebbenganmi.’” 11 Bayat ti panagturong ni Jesus
idiay Jerusalem, nagna iti nagbeddengan ti Samaria ken Galilea. 12 Idi
sumungsungad iti maysa a barrio, sinabat ti sangapulo a lallaki nga
agkukutel. Nagtakderda iti adayo bassit 13 ket impukkawda, “Jesus,
Maestro, kaasiannakami!” 14 Nakita ida ni Jesus ket kinunana, “Inkay
agpakita kadagiti papadi.” Idi addada iti dalan, naimbagandan. 15 Apaman
a nadlaw ti maysa kadakuada a naimbaganen, nagsubli a nangidaydayaw
iti Dios iti napigsa a timek. 16 Nagparintumeng iti sangoanan ni Jesus ket
nagyaman kenkuana. Samaritano daytoy a lalaki. 17 “Saan aya a
sangapulo dagiti napaimbag?” kinuna ni Jesus. “Sadino ti ayan dagiti
siam? 18 Apay a daytoy laeng ganggannaet ti nagsubli nga agyaman iti
Dios?” 19 Kinuna ni Jesus kenkuana, “Tumakderka ket agawidkan.
Pinaimbagnaka ta pammatim.” 20 Sumagmamano a Fariseo ti
nangsaludsod ken ni Jesus no kaanonto ti yaay ti Pagarian ti Dios.
Insungbat ni Jesus, “Saan nga umay ti Pagarian ti Dios babaen kadagiti
makita a pagilasinan. 21 Awanto ti agkuna, ‘Kitaenyo, adda ditoy!’ wenno
‘Adda sadiay!’ Ta adda kadakayo ti Pagarian ti Dios.” 22 Kalpasanna,
kinuna ni Jesus kadagiti adalan, “Dumtengto ti tiempo a tarigagayanyo a
makita ti uray maysa laeng kadagiti aldaw ti Anak ti Tao, ngem diyonto
makita. 23 “Addanto dagiti agkuna kadakayo, ‘Kumitakayo sadiay!’
wenno ‘Kumitakayo ditoy!’ Ngem diyo mapan birbiroken. 24 Kas iti
panaggilap ti kimat ket lawaganna ti tangatang manipud iti maysa a bangir
agingga iti sabali, kastanto met ti Anak ti Tao inton aldawna. 25 Ngem
masapul nga agsagaba nga umuna iti adu ken laksiden dagiti tattao iti
daytoy a kaputotan. 26 Kas idi tiempo ni Noe, kastanto met ti mapasamak
kadagiti aldaw ti Anak ti Tao. 27 Nangnangan, nagiinum ken
nagaassawada agingga iti aldaw nga iseserrek ni Noe iti daong. Dimteng ti
Layus ket nalmesda amin. 28 Maaramidto met ti kas iti naaramid kadagidi
aldaw ni Lot. Nangnangan ken nagiinumda. Naggatgatang ken
naglaklakoda. Nagmulmula ken nagbalbalayda. 29 Idi aldaw nga
ipapanaw ni Lot idiay Sodoma, nagtudo iti apuy ken asufre manipud langit
a nangpatay kadakuada amin. 30 Kastanto ti mapasamak inton aldaw a
pannakaiparangarang ti Anak ti Tao. 31 “Iti dayta nga aldaw, ti adda iti
tuktok ti balayna saanton a bumaba a sumrek iti balay a mangala kadagiti
sanikuana. Kasta met a ti adda iti away dinto agsublin iti balayna. 32
“Laglagipenyo daydi asawa ni Lot! 33 “Ti siasinoman nga agpanggep a
mangisalakan iti biagna, mapukawnanto. Ti siasinoman a makapukaw iti
biagna, mataginayonnanto. 34 “Ibagak kadakayo nga iti dayta a rabii,
addanto dua a lallaki nga agid-idda iti maymaysa a katre. Maalanto ti
maysa ket mabatinto ti sabali. 35 Addanto met dua a babbai nga
aggilgiling iti maymaysa a paggilingan. Maalanto ti maysa ket mabatinto
ti sabali.” 37 Sinaludsod kenkuana dagiti adalan, “Sadino, Apo?” “Iti
sadinoman a yan ti bangkay, sadiay ti paguurnongan dagiti agila,”
insungbat ni Jesus.
Lucas 18
1 Sinarita ni Jesus kadakuada daytoy a pangngarig tapno isurona ida a
masapul nga agkararagda a kanayon ken dida pukawen ti namnamada. 2
Kinuna ni Jesus, “Adda idi maysa a hues iti maysa nga ili. Saan nga
agbuteng iti Dios ket awan raraemenna a tao. 3 “Adda met maysa a balo a
babai iti dayta met laeng nga ili. Masansan a mapan iti hues a kunkunana,
‘Tulongannak kadi a mangtunton iti kalintegak iti kabusorko!’ 4 “Nabayag
a di inkaskaso ti hues, ngem kamaudiananna, kinunana iti bagina, ‘Nupay
no diak agbuteng iti Dios ken awan raemek a tao, 5 ngem gapu ta
maumaakon a singsingaen daytoy a balo, itedko man laengen ti
dawdawatenna. No saan, dinakto sardengan a ringringgoren ket maibuston
ti anusko.’” 6 Intuloy ti Apo: “Nangngegyo ti kinuna ti dakes a hues? 7
Ket dinto aya tulongan ti Dios dagiti tattaona nga umas-asug kenkuana iti
aldaw ken rabii? Dinanto kadi dardarasen ti tumulong kadakuada? 8
Ibagak kadakayo a dagdagusennanto nga ipaay kadakuada ti hustisia.
Ngem inton umay ti Anak ti Tao, addanto ngata masarakanna a pammati
ditoy daga?” 9 Sinarita pay ni Jesus daytoy a pangngarig kadagiti tattao a
mangitangtangsit iti kinaimbagda ken manguy-uyaw kadagiti sabsabali. 10
“Adda dua a lallaki a napan nagkararag idiay Templo: maysa ti Fariseo,
maysa ti agsingsingir iti buis. 11 “Nagtakder ti Fariseo iti napakni a lugar
ket inkararagna a siuulimek: ‘Agyamanak kenka, O Dios, ta saanak a kas
kadagiti dadduma a naagum, naulbod wenno makikamkamalala.
Agyamanak met ta saanak a kas iti daytoy nga agsingsingir iti buis. 12
Maminduaak nga agayunar tunggal lawas, ket itedko ti apagkapullo ti
amin a masapulak.’ 13 “Ngem nagtakder iti adayo ti agsingsingir iti buis
ket dina pay itangad dagiti matana sadi langit. Dinandanogna ketdi ti
barukongna ket kinunkunana, ‘O Dios, kaasiannak kadi a managbasol!’”
14 Kinuna ni Jesus, “Ibagak kadakayo, nagawid ti agsingsingir iti buis a
napalinteg iti sangoanan ti Dios. Ngem ti Fariseo, saan a napalinteg. Ta ti
mangitantan-ok iti bagina, maipababanto. Ngem ti mangipababa iti bagina,
maitan-okto.” 15 Adda sumagmamano a tattao a nangyeg kadagiti
ubbingda tapno ipatay ni Jesus ti imana kadakuada. Nakita dagiti adalan
ket inungtanda ida iti kasta nga inaramidda. 16 Ngem inayaban ni Jesus
dagiti ubbing, ket kinunana, “Palubosanyo dagiti ubbing nga umay kaniak.
Diyo paritan ida, ta dagiti kas kadakuada ti agtagikua iti Pagarian ti Dios.
17 Laglagipenyo a ti siasinoman a di umawat iti Pagarian ti Dios a kas iti
panangawat ti maysa nga ubing, saanto a makastrek sadiay.” 18
Nagsaludsod ken ni Jesus ti maysa a panguloen a Judio. “Naimbag a
Maestro,” kinunana, “ania ti aramidek tapno magun-odko ti biag nga
agnanayon?” 19 Kinuna ni Jesus, “Apay nga awagannak iti naimbag?
Awan ti naimbag no di laeng ti Dios. 20 Ammom dagiti bilbilin: ‘Dika
makikamalala; dika mamapatay; dika agtakaw; dika agsaksi iti ulbod;
agraemka kadagiti nagannak kenka.’” 21 “Sipud pay idi ubingak,
tinungtungpalko amin dagitoy a bilin,” insungbat ti lalaki. 22 Idi
mangngeg daytoy ni Jesus, kinunana, “Adda pay maysa a pagkurangam.
Ilakom amin a sanikuam samo ited kadagiti napanglaw ti naglakoam ket
addanto kinabaknangmo sadi langit. Kalpasanna, umayka sumurot
kaniak.” 23 Ngem nagladingit ti tao idi mangngegna daytoy, agsipud ta
adu ti sanikuana. 24 Nakita ni Jesus ti liday ti baknang. “Nagrigat ketdin a
sumrek dagiti nabaknang iti Pagarian ti Dios!” kinunana. 25 “Nalaklaka ti
ilulusot ti maysa a kamelio iti abut ti dagum ngem ti iseserrek ti baknang
iti Pagarian ti Dios.” 26 Nangngeg dagiti tattao ti kinuna ni Jesus. “Siasino
ngaruden ti maisalakan?” sinaludsodda. 27 “Ti saan a mabalin kadagiti
tattao, mabalin iti Dios,” insungbat ni Jesus. 28 Kinuna ngarud ni Pedro,
“Adtoy, binaybay-anmi dagiti balbalaymi ket simmurotkami kenka.” 29
“Wen,” kinuna ni Jesus kadakuada, “ibagak daytoy kadakayo: ti
siasinoman a nangpanaw iti balay, asawa a babai, kakabsat a lallaki,
nagannak wenno annakna gapu iti Pagarian ti Dios, 30 ad-adunto nga
adayo ti awatenna ditoy a biag, ket iti masakbayan, biag nga agnanayon.”
31 Inyadayo ni Jesus dagiti sangapulo ket dua nga adalan ket kinunana
kadakuada, “Denggenyo! Sumang-attay idiay Jerusalem, ket matungpalto
sadiay ti amin nga insursurat dagiti profeta maipapan iti Anak ti Tao. 32
Mayawatto kadagiti Hentil a mangang-angaw, mangpabpabain ken
mangtuptupranto kenkuana. 33 Sapliten ken papatayendanto, ngem
agungarto iti maikatlo nga aldaw.” 34 Awan a pulos kadagitoy ti naawatan
dagiti adalan. Nailinged kadakuada ti kaipapanan dagiti balikasna, ket dida
ammo no ania ti sasawen ni Jesus. 35 Idi asidegen ni Jesus idiay Jerico,
adda maysa a bulsek nga agtugtugaw ken agpalpalama iti igid ti dalan. 36
Nangngegna dagiti tattao nga aglabas ket sinaludsodna, “Apay, ania
dayta?” 37 “Lumabas ni Jesus a taga-Nazaret,” kinunada kenkuana. 38 Iti
kasta, impukkaw ti bulsek, “Jesus nga Anak ni David! Kaasiannak kadi!”
39 Inungtan dagiti adda iti sango ket imbagada kenkuana nga agulimek.
Ngem inyad-addana ketdi ti nangipukkaw, “Anak ni David, kaasiannak
kadi!” 40 Nagsardeng ngarud ni Jesus ket imbilinna a yasidegda kenkuana
ti bulsek. Idi nayasidegen, sinaludsod ni Jesus kenkuana, 41 “Ania ti
kayatmo nga aramidek kenka?” “Apo,” kinuna ti bulsek, “Kayatko a
makakitaak koma.” 42 “Makakitakan!” insungbat ni Jesus. “Ti pammatim
ti nangpaimbag kenka.” 43 Dagus a makakitan ti bulsek. Simmurot ken ni
Jesus ket indaydayawna ti Dios. Idi makita dagiti tattao ti napasamak,
indaydayawda met ti Dios.
Lucas 19
1 Lumaslasat idi ni Jesus idiay Jerico. 2 Adda baknang sadiay nga
agnagan Zakeo. Panguloen dagiti agsingsingir iti buis. 3 Kayatna a kitaen
no siasino ni Jesus, ngem gapu ta pandek ken adu ti tattao, dina makita ni
Jesus. 4 Iti kasta, nagtaray ket inunaanna dagiti tattao sa immuli iti maysa
a kayo a sikamoro tapno makitana ni Jesus a lumabas sadiay. 5
Timmangad ni Jesus idi mabatoganna ni Zakeo. “Zakeo,” kinunana,
“darasem ti umulog, ta umayak idiay balaymo ita nga aldaw.” 6
Dinagdagus ni Zakeo ti immulog ket siraragsak a nangawat ken ni Jesus. 7
Nagtanabutob amin a nakakita iti daytoy. “Napan pinasangaili daytoy a
tao iti balay ti maysa a managbasol!” kinunada. 8 Timmakder ni Zakeo ket
kinunana iti Apo, “Denggem, Apo! Itedko kadagiti napanglaw ti kagudua
ti sanikuak. No adda sinaurko, isublik kenkuana iti mamimpat a kaadu ti
innalak.” 9 Kinuna ni Jesus kenkuana, “Ita nga aldaw, dimteng ti
pannakaisalakan iti daytoy a balay, ta anak met ni Abraham daytoy a tao.
10 Immay ti Anak ti Tao a mangbirok ken mangisalakan iti napukaw.” 11
Dimngeg dagiti tattao iti imbaga ni Jesus. Gapu ta asidegen ni Jesus idiay
Jerusalem, impagarupda a dandani agparangen ti Pagarian ti Dios. Isut’
gapuna a sinarita ni Jesus daytoy a pangngarig: 12 “Adda idi lalaki a
nangato ti saadna a napan iti adayo a pagilian tapno makoronaan nga ari,
sa met la agsubli. 13 Sakbay ti ipapanawna, inayabanna ti sangapulo
kadagiti adipenna ket inikkanna ti tunggal maysa iti kuarta a balitok.
Imbagana kadakuada, ‘Pagsapulyo daytoy bayat ti kaawanko.’ 14 “Ngem
gurguraen dagiti kailianna, isut’ gapuna a nangibaonda kadagiti tattao a
sumurot kenkuana nga agkuna, ‘Dimi kayat daytoy a tao nga agari
kadakami.’ 15 “Naisaad nga ari ket idi nagsubli, dagus a pinaayabanna
dagiti adipen nga inikkanna iti kuarta tapno ammoenna no mano ti
nasapulanda. 16 “Dimmatag ti umuna nga adipen. ‘Apo,’ kinunana,
‘nakaganansia iti sangapulo a bagi ti balitok daydi intedmo kaniak.’ 17
“‘Nasayaat ti inaramidmo,’ kinuna ti ari. ‘Naimbagka nga adipen. Agsipud
ta mapagtalkanka kadagiti babassit a bambanag, pagturayenkanto iti
sangapulo a siudad.’ 18 “Dimmatag met ti maikadua nga adipen, ‘Apo,’
kinunana, ‘nakaganansia iti lima a kuarta a balitok daydi intedmo kaniak.’
19 “Kinuna kenkuana ti ari, ‘Pagturayenkanto iti lima a siudad.’ 20
“Dimmatag met ti sabali pay nga adipen. ‘Apo,’ kinunana, ‘adtoy daydi
kuartam. Binungonko iti panio ket indulinko. 21 Nagbutengak ngamin
kenka, ta ammok a naungetka. Alaem ti uray saanmo a kukua, ket apitem
ti uray dimo immula.’ 22 “‘Dakeska nga adipen!’ kinuna ti ari. ‘Dusaenka
gapu kadagiti balikasmo met laeng. Ammom la ngaruden a naungetak, ket
alaek ti uray saanko a kukua ken agapitak iti diak immula. 23 Apay ngarud
a dimo indeposito iti banko ti kuartak tapno apaman a sumangpetak,
isublim koma kaniak agraman interesna?’ 24 “Iti kasta, kinuna ti ari
kadagiti agtatakder sadiay, ‘Alaenyo ti kuarta kenkuana ket itedyo iti
addaan iti sangapulo a kuarta.’ 25 “Kinunada iti ari, ‘apo, adda la ngarud
sangapulo a kuartanan!’ 26 “‘Ibagak kadakayo,’ insungbat ti ari, ‘ti
addaan, maikkanto pay iti ad-adu. Ngem iti awanan, uray ti sangkabassit
nga adda kenkuana, maikkatto pay. 27 No maipapan kadagiti kabusorko a
di nangayat a siak ti arida, yegyo ida ditoy ket patayenyo ida iti
sangoanak.’” 28 Kalpasan ti panangisao ni Jesus iti daytoy, nagtuloy a
nagturong idiay Jerusalem. 29 Idi asidegen iti Betfage ken Betania, iti
Bantay Olivo, pinaunana ti dua nga adalan. 30 “Inkay iti masungad a
barrio,” imbilinna kadakuada. “Apaman a sumrekkayo, masarakanyonto ti
sigagalut nga urbon ti asno a di pay nasaksakayan. Warwaranyo ket yegyo
ditoy. 31 No adda agsaludsod kadakayo no apay a warwaranyo ti urbon,
ibagayo kenkuana a masapul ti Apo.” 32 Napanda ngarud ket nasarakanda
amin kas imbaga ni Jesus kadakuada. 33 Idi warwarwaranda ti urbon,
kinuna kadakuada dagiti akinkukua, “Apay a warwaranyo?” 34 “Masapul
ti Apo,” insungbatda. 35 Impanda ken ni Jesus ti urbon. Inap-apanda ti
urbon kadagiti kagayda sada tinulongan ni Jesus a simmakay. 36 Idi
nakasakayen ni Jesus, inyaplag dagiti tattao dagiti kagayda iti dalan. 37 Idi
sumungsungad ni Jesus idiay Jerusalem, iti dalan a sumalog iti Bantay
Olivo, nagdaydayaw iti Dios dagiti amin nga adalanna iti napigsa a timek
gapu kadagiti naindaklan a bambanag a nakitada. 38 “Bendisionan koma ti
Dios ti Ari nga umay iti nagan ti Apo,” ipukpukkawda. “Kappia sadi langit
ken gloria iti Dios!” 39 “Maestro, bilinem dagiti adalam nga agulimekda!”
kinuna ti sumagmamano a Fariseo nga adda iti ummong dagiti tattao. 40
“Ibagak kadakayo a no agulimekda, mangrugi nga agpukkaw dagiti
batbato,” insungbat ni Jesus. 41 Umas-asideg ni Jesus iti Jerusalem ket
nakitana ti siudad, sinangitanna a 42 kunana: “No ammom la koma ita nga
aldaw ti masapul tapno maaddaanka iti kappia! Ngem ita dimo makita. 43
Dumtengto dagiti aldaw a bangenandaka dagiti kabusormo. Lakuben ken
darupendakanto iti amin a suli. 44 Dadaelendakanto a mamimpinsan
agraman dagiti amin a tattaom iti uneg ti padermo. Awanto ti bato nga
ibatida iti sigud a yanna, ta dimo binigbig ti tiempo a yaay ti Dios tapno
isalakannaka!” 45 Simrek ni Jesus iti Templo ket pinaruarna dagiti
agtagtagilako. 46 Kinunana kadakuada, “Nailanad iti Nasantoan a Surat a
kuna ti Dios, ‘Managanto ti balayko iti balay a pagkararagan.’ Ngem
pinagbalinyo metten a rukib dagiti mannanakaw!” 47 Inaldaw a nangisuro
ni Jesus iti Templo. Kayat a patayen dagiti panguloen a papadi, dagiti
mamaestro iti Linteg, ken dagiti pangulo dagiti tattao. 48 Ngem awan
masarakanda a panggapuanda a mangibanag iti panggepda gapu ta
napasnek dagiti amin a tattao a dumngeg kadagiti saona.
Lucas 20
1 Iti maysa nga aldaw, adda ni Jesus idiay Templo. Isursurona dagiti tattao
ken ikaskasabana kadakuada ti Naimbag a Damag. Napan kenkuana dagiti
panguloen a papadi, dagiti mamaestro iti Linteg ken dagiti panglakayen 2
ket kinunada kenkuana, “Ibagam man kadakami no ania ti kalintegam a
mangaramid kadagitoy? Siasino ti nangted kenka iti turay a mangaramid
kadagitoy?” 3 “Adda saludsodek kadakayo,” insungbat ni Jesus. 4
“Ibagayo man kaniak no naggapuan ti turay ni Juan a Mammuniag: iti
Dios wenno iti tao?” 5 “Ania ti isungbattayo?” nagsisinnaludsodda. “No
kunatayo a naggapu iti Dios, kunananto, ‘Apay ngarud a dikayo namati
ken ni Juan?’ 6 Ngem no kunatayo a naggapu iti tao, uborendatayto dagiti
amin a tattao nga adda ditoy agsipud ta patienda a profeta ni Juan.” 7 Iti
kasta, insungbatda, “Dimi ammo.” 8 “Diak met ngarud ibaga kadakayo no
ania ti kalintegak nga agaramid kadagitoy,” kinuna ni Jesus. 9 Sinarita ni
Jesus kadagiti tattao daytoy a pangngarig. “Adda idi maysa a tao a
nagmula iti kaubasanna sana impaabang ti kaubasan kadagiti makitaltalon.
Kalpasanna, napan iti sabali a pagilian ket nabayag a nagyan sadiay. 10
“Idi dumteng ti panagbuburas iti ubas, imbaon ti akinkukua ti maysa nga
adipenna a mapan kadagiti makitaltalon tapno alaenna ti bingayna. Ngem
kinabkabil dagiti makitaltalon ti adipen sada pinagawid nga ima-ima. 11
“Sabali manen nga adipen ti imbaon ti akinkukua ti kaubasan, ngem
kinabkabilda met, pinabpabainanda sada pinagawid nga ima-ima. 12
“Pinitlona ti nangibaon iti adipen. Dinangranda met sada impurruak iti
ruar ti kaubasan. 13 “Kinuna daydi akinkukua iti kaubasan, ‘Ania ti
aramidek? Ibaonko ketdi ti ingungotek nga anak. Awan duadua a
padayawandanto.’ 14 “Ngem idi makita dagiti makitaltalon ti naibaon,
kinunada iti maysa ken maysa, ‘Daytoyen ti agtawid! Papatayentayo ketdi,
ket datayton ti agtagikua iti tawidenna.’ 15 “Inruarda ngarud iti kaubasan,
ket pinatayda. “Anianto ngarud ti aramiden ti akinkukua iti kaubasan
kadagiti makitaltalon?” sinaludsod ni Jesus. 16 “Mapannanto papatayen
ida sana yawat ti kaubasan kadagiti sabali a makitaltalon.” Idi mangngeg
daytoy dagiti tattao, kinunada, “Saan a mabalin a kasta.” 17 Kinita ida ni
Jesus ket sinaludsodna, “Ania ngarud ti kayat a sawen daytoy a paset ti
Nasantoan a Surat? ‘Ti bato nga imbelleng dagiti agipatpatakder, Nagbalin
a kangrunaan a bato.’ 18 “Maburburakto ti siasinoman a matnag iti daytoy
a bato ket matumekto a kas tapok ti siasinoman a matupakanna.” 19
Ammo dagiti mamaestro iti Linteg ken dagiti panguloen a papadi a
sinarita ni Jesus daytoy a pangngarig a naiturong kadakuada. Isut’ gapuna
a pinadasda a patiliw ni Jesus iti dayta met la nga oras. Ngem nagbutengda
kadagiti tattao. 20 Nagurayda ngarud iti nasayaat a gundaway.
Tinangdananda ti sumagmamano a lallaki tapno agparangda a nalinteg.
Imbaonda ida a mapan mangpalab-og ken ni Jesus babaen kadagiti
saludsodda tapno adda pambaranda a mangtiliw ken mangyawat kenkuana
iti turay ken pannakabalin ti gobernador. 21 “Maestro,” kinunada ken ni
Jesus, “ammomi a nasayaat ti amin nga isasao ken isursurom. Ammomi
nga awan idumdumam no di ket isurom ti pudno maipapan iti pagayatan ti
Dios kadagiti tattao. 22 Ibagam man no maisalungasing iti Linteg ti
panagbayadmi iti buis iti Emperador?” 23 Ngem nadlaw ni Jesus ti
sikapda ket kinunana kadakuada, 24 “Mangipakitakayo man kaniak iti
kuarta. Siasino ti akinladawan ken akinnagan iti daytoy?” “Ti
Emperador,” insungbatda. 25 Iti kasta, kinuna ni Jesus, “Itedyo ngarud iti
Emperador dagiti kukua ti Emperador. Itedyo met iti Dios ti kukua ti
Dios.” 26 Agsipud ta awan pangtiliwanda kenkuana iti imatang dagiti
tattao, nagulimekda a masmasdaaw iti insungbatna. 27 Napan ken ni Jesus
ti sumagmamano a Saduceo. (Isuda dagiti agkuna a saan nga agungar
dagiti natay.) 28 “Maestro,” kinunada, “insurat ni Moises daytoy a linteg
kadatayo: ‘No matay ti maysa a lalaki ket mapanawanna ti asawana nga
awan anakda, rebbeng ti kabsatna nga asawaen ti balo tapno aganakda iti
pannakaanak daydi natay.’ 29 “Adda idi pito a lallaki nga agkakabsat.
Nangasawa ti inauna, ngem natay nga awan putotna. 30 Ti maikadua
inasawana ti balo, 31 kasta met ti maikatlo. Kasta ti inaramid dagiti pito
nga agkakabsat ket natayda amin nga awanan anak. 32 Kamaudiananna,
natay ti babai. 33 “Ita, inton agungar dagiti natay, siasino kadakuada ti
akin-asawa kenkuana? Ta nakiasawada amin kenkuana!” 34 Insungbat ni
Jesus, “Agaassawa dagiti lallaki ken babbai iti daytoy a biag. 35 Ngem
saan nga agaassawa dagiti maikari nga agungar iti masakbayan. 36
Maipadadanto kadagiti angheles a saandan a matay. Annak ida ti Dios
agsipud ta nagungardan. 37 “Paneknekan ni Moises a mapagungarto dagiti
natay. Iti paset ti Nasantoan a Surat a pakasaritaan ti sumsumged a kayo,
kunana a ti Apo isu ti ‘Dios ni Abraham, Dios ni Isaac, ken Dios ni Jacob.’
38 Kayat a sawen daytoy nga isu ti Dios dagiti sibibiag, saan a Dios dagiti
natay, ta iti biang ti Dios, sibibiag amin a tao.” 39 Kinuna ti
sumagmamano a mamaestro iti Linteg, “Nasayaat, Maestro, ti
insungbatmo!” 40 Ta dida maitureden ti agsaludsod kenkuana. 41
Kalpasanna, kinuna ni Jesus kadakuada, “Kasano a makuna nga agtaud ti
Cristo iti kaputotan ni David? 42 Ta kuna met laeng ni David iti libro
dagiti Salmo: ‘Kinuna ti Apo iti Apok: Agtugawka ditoy makannawanko
43 Agingga a payatem dagiti kabusormo ket addada iti babaem.’ 44 “No
‘Apo’ kuna kenkuana ni David, kasano ngarud nga agtaud ti Cristo iti
kaputotan ni David?” 45 Bayat ti panagdengngeg dagiti tattao, kinuna ni
Jesus kadagiti adalanna, 46 “Annadanyo dagiti mamaestro iti Linteg.
Magustoanda ti magna a sikakawes iti nagayad ken makabkablaawan a
siraraem iti publiko. Pilienda dagiti kangrunaan a tugaw kadagiti sinagoga
ken katan-okan a lugar iti fiestaan. 47 Gundawayanda dagiti balo a babbai
ket takawenda dagiti sanikuada sada ipakita ti atiddog a panagkararagda.
Nadagdagsento ti dusada.”
Lucas 21
1 Inwaras ni Jesus dagiti matana ket nakitana dagiti babaknang nga
agipispisok iti kuarta a datonda idiay Templo. 2 Nakitana met ti maysa a
nakapangpanglaw a babai a balo a nangipisok iti dua a sentimo. 3 “Ibagak
kadakayo,” kinuna ni Jesus, “ad-adu ti intinnag daytoy napanglaw a balo
ngem iti isuamin nga intinnag dagiti dadduma. 4 Ta indatonda ti sobra ti
kinabaknangda. Ngem isu a balo, nupay napanglaw, intedna ti amin a
pagbiagna.” 5 Pagsasaritaan idi ti sumagmamano kadagiti tattao ti
kinapintas ti Templo gapu kadagiti agkakapateg a batbato ken sagsagut a
naidaton iti Dios. 6 “Makitayo amin dagitoy,” kinuna ni Jesus.
“Dumtengto ti tiempo nga awanto ti uray maysa a bato ditoy a mabati iti
yanna. Marbadanto amin!” 7 “Maestro,” sinaludsodda ken ni Jesus,
“kaanonto a mapasamak daytoy? Ken anianto ti pakakitaan a dimtengen ti
tiempo a pannakaaramidna?” 8 “Agannadkayo ket saankayo a paallilaw,”
kinuna ni Jesus. “Adunto dagiti umay ket aramatenda ti naganko a
kunkunada, ‘Siak ti Cristo,’ ken ‘Asidegen ti tiempo!’ Ngem diyo
patpatien ida. 9 Dikay agbuteng no madamagyo nga adda dagiti gubat ken
riribuk. Masapul a mapasamak nga umuna dagitoy, ngem dina kayat a
sawen nga asidegen ti panungpalan.” 10 Kinunana pay, “Aggugubatto
dagiti nasnasion. Agririnnautto dagiti pagarian. 11 Addanto dagiti
nakaam-amak a ginggined, panagbisin ken angol kadagiti nadumaduma a
disso, ket iti tangatang agparangto dagiti nakabutbuteng a banag ken
nakaskasdaaw a pagilasinan. 12 “Ngem sakbay a mapasamak dagitoy,
tiliwendakayto dagiti tattao ket idadanesdakayto. Maidarumkayto ket
mausigkayto iti uneg dagiti sinagoga, ket maibaludkayto. Gapu kaniak,
maisaklangkayto kadagiti ar-ari ken agtuturay. 13 Daytanto ti gundawayyo
a mangipakaammo iti Naimbag a Damag. 14 Imulayo iti panunotyo: Diyo
pagdanagan no anianto ti isungbatyo. 15 Ta siakto met laeng ti mangted
kadakayo kadagiti sao ken sirib a dinto masuppiat wenno masungbatan
dagiti kabusoryo. 16 Yawatdakayto dagiti nagannak kadakayo, dagiti
kakabsatyo, dagiti kakabagianyo, dagiti gagayyemyo. Papatayendanto ti
sumagmamano kadakayo. 17 Guraendakayto dagiti amin a tattao gapu
kaniak, 18 ngem awanto ti uray maysa laeng a buok a mapukaw iti uloyo.
19 Babaen iti panagibturyo, maisalakanyonto dagiti bagbagiyo.” 20 “Inton
makitayo ti Jerusalem a linakub dagiti armada, ammoyon nga asidegen ti
pannakadadaelna. 21 Iti kasta, masapul a kumamang dagiti adda idiay
Judea kadagiti bambantay. Masapul a pumanaw dagiti adda iti siudad, ket
dagiti adda iti away saandan a sumrek sadiay. 22 Ta dagitoy ‘Dagiti
Aldaw ti Pannakadusa,’ tapno matungpal ti amin a kuna ti Nasantoan a
Surat. 23 Kaasinto dagiti masikog ken dagiti tagtagibian kadagita nga
aldaw! Dumtengto ti nakabutbuteng a didigra iti daytoy a daga, ket
agdissuorto ti pungtot ti Dios kadagitoy a tattao. 24 Addanto dagiti
mapapatay iti kampilan ket maipanto ti dadduma a kas balud kadagiti
amin a pagilian. Baddebaddekento dagiti Hentil ti Jerusalem, agingga iti
panagpatingga dagiti aldaw dagiti Hentil.” 25 “Addanto dagiti
nakaskasdaaw a pagilasinan iti init, iti bulan ken dagiti bituen. Ditoy daga,
masikoranto dagiti nasion gapu iti butengda iti daranudor ti baybay ken
kadagiti dalluyon. 26 Matalimudawto dagiti tattao iti butengda bayat ti
panagurayda iti mapasamak iti entero a lubong, ta mawarawaranto dagiti
pannakabalin ti tangatang. 27 Kalpasanna, agparangto ti Anak ti Tao nga
umay iti ulep agraman naindaklan a pannakabalin ken dayag. 28 Inton
mangrugi dagitoy a mapasamak, tumakder ken tumangadkayo, ta asidegen
ti pannakaisalakanyo.” 29 Kalpasanna, sinarita ni Jesus kadakuada daytoy
a pangngarig. “Laglagipenyo ti kayo nga igos ken dagiti amin a kayo. 30
Apaman a makitayo a mangrugi nga agbulongda, ammoyo nga agbaliwen
ti panawen. 31 Kasta met nga inton makitayo a mapasamak dagitoy,
ammoyo nga asidegen ti Pagarian ti Dios. 32 “Tandaananyo a
mapasamakto amin dagitoy sakbay a matay dagiti amin a tattao a sibibiag
ita. 33 Mapukawto ti langit ken daga, ngem dinto mapukaw dagiti saok.”
34 “Agannadkayo amangan no malmeskay iti nalabes a panagragragsak,
pannangan, ken panaginum ken kadagiti pakasikoran ti biag, amangan no
kellaat a dumteng dayta nga Aldaw ket tiliwennakayo 35 a kas iti palab-
og. Ta umayto dayta nga aldaw kadagiti amin a tattao iti amin a lugar
ditoy daga. 36 Agsalukagkayo ket agkararagkayo a kankanayon tapno
addanto naan-anay a kiredyo nga agibtur kadagiti amin a mapasamak, ken
agtakder iti sangoanan ti Anak ti Tao.” 37 Inaldaw a mangisuro ni Jesus
idiay Templo ket no dumteng ti rabii, rummuar a mapan maturog idiay
Bantay Olivo. 38 Iti agsapa, mapan dagiti tattao idiay Templo tapno
agdengngegda kenkuana.
Lucas 22
1 Umasideg idin ti Fiesta ti Tinapay nga awan Lebadurana, a maawagan iti
Paskua. 2 Nagbirbirok dagiti panguloen a papadi ken dagiti mamaestro iti
Linteg iti pamuspusanda a mangpapatay ken Jesus iti nalimed.
Mabutengda ngamin kadagiti tattao. 3 Sinerrek ni Satanas ni Judas a
managan Iscariote, maysa kadagiti sangapulo ket dua nga adalan. 4 Iti
kasta, napan nakisao ni Judas kadagiti panguloen a papadi ken kadagiti
ofisiales dagiti guardia ti Templo tapno makitulag no kasano ti
panangyawatna ken ni Jesus kadakuada. 5 Naragsakanda ket inkarida nga
ikkan iti kuarta. 6 Immanamong ni Judas ket inrugina ti nagbirok iti
nasayaat a gundaway a panangyawatna ken ni Jesus kadakuada a di
maam-ammoan dagiti tattao. 7 Dimteng ti aldaw ti Fiesta ti Tinapay nga
awan Lebadurana a pannakaisagana dagiti urbon a karnero a maidaton iti
Paskua. 8 Imbaon ni Jesus da Pedro ken Juan. “Inkay isagana ti
pangrabiitayo iti Paskua,” kinunana kadakuada. 9 “Sadino ti kayatmo a
pangisaganaanmi?” sinaludsodda. 10 “Denggenyo!” kinunana. “Apaman a
sumrekkay iti siudad, sabtennakayto ti maysa a lalaki a nakaawit iti
sangakaramba a danum. Surotenyo iti balay a serkanna, 11 ket kunayo iti
akimbalay, ‘Pasaludsod ti Maestro no sadino ti kuarto a panganandanto
kadagiti adalanna iti pangrabii iti Paskua.’ 12 Ipakitananto ti akinngato a
kuarto a dakkel ken addaan amin a masapsapul. Sadiay ti pagsaganaanyo.”
13 Napanda ngarud ket nasarakanda amin nga imbaga ni Jesus.
Insaganada ti pangrabii a pangrambak iti Paskua. 14 Dimteng ti oras ket
simmango ni Jesus ken dagiti apostolesna iti panganan. 15 “Tinarigagayak
unay ti makisango kadakayo iti daytoy a pangrabii iti Paskua sakbay nga
agsagabaak,” kinunana kadakuada. 16 “Ta ibagak kadakayo a diakton
mangan iti daytoy agingga a matungpal ti pudno a kaipapananna iti
Pagarian ti Dios.” 17 Nangala iti kopa, nagyaman iti Dios, ket kinunana,
“Alaenyo daytoy ket pagbibingayanyo. 18 Ibagak kadakayo a manipud ita,
diakton uminum iti daytoy tubbog ti ubas agingga a dumteng ti Pagarian ti
Dios.” 19 Nangala met iti tinapay ket kalpasan ti panagyamanna iti Dios,
pinisina sana inted kadakuada a kunana, “Daytoy ti bagik a maited nga
agpaay kadakayo. Aramidenyo daytoy a panglaglagip kaniak.” 20 Kasta
met a kalpasan ti panangrabii, intedna kadakuada ti kopa ket kinunana,
“Daytoy ti kopa ti baro a pannakitulag ti Dios kadakayo a mapatalgedan iti
darak a maibuyat para kadakayo. 21 “Ngem kitaenyo! Adda ditoy a
kalanglanglangko ti tao a mangliput kaniak. 22 Matayto ti Anak ti Tao kas
inkeddeng ti Dios, ngem asi pay dayta a tao a mangliput kenkuana!” 23
Nagsisinnaludsod dagiti apostoles no siasino kadakuada ti mangaramid iti
kasta. 24 Nagsusuppiat dagiti adalan no siasino kadakuada ti mabigbig a
kangrunaan. 25 Kinuna ni Jesus kadakuada, “Adipenen dagiti ar-ari a
Hentil dagiti tattaoda, ket panaganan dagiti agtuturay dagiti bagbagida a
kas managparabur. 26 Ngem saan a kasta koma kadakayo, no di ket
agbalin ti kangrunaan kadakayo a kasla isu ti kaubingan, ket agbalin ti
pangulo a kasla isu ti adipen. 27 Siasino aya ti naturturay, ti sumango iti
panganan wenno ti mangserbi kenkuana? Saan aya a ti maserbian? Ngem
addaak kadakayo a kas maysa nga agserbi. 28 “Nagtalinaedkayo a
sipupudno kaniak kadagiti amin a nakasuotak. 29 Ngarud, kas iti
pannangted kaniak ni Amak iti kalintegan nga agturay, itedkonto met
kadakayo ti isu met laeng a kalintegan. 30 Mangan ken uminumkayto iti
lamisaanko iti Pagariak ken agtugawkayo kadagiti trono a mangituray
kadagiti sangapulo ket dua a tribu ti Israel.” 31 “Simon, Simon, denggem!
Napalubosan ni Satanas a mangsagat kadakayo a kas iti mannalon a
mangitaep iti trigo tapno mapaglasin ti naimbag iti dakes. 32 Ngem
inkarkararaganka, Simon, tapno saan a mapukaw ti pammatim. Inton
agsublika kaniak, masapul a papigsaem dagiti kakabsatmo.” 33 “Apo,”
insungbat ni Simon, “sisasaganaak a maibalud ken matay a maikuyog
kenka.” 34 “Ibagak kenka, Pedro,” kinuna ni Jesus, “dinto pay agtaraok ti
kawitan ita nga aldaw, namitlonton nga imbagam a dinak am-ammo.” 35
“Idi imbaonkayo nga awan intugotyo a supot wenno bay-on wenno
sapatosyo,” kinuna ni Jesus kadakuada, “adda aya aniaman a
nagkuranganyo?” “Awan,” insungbatda. 36 “Ngem ita,” kinuna ni Jesus,
“ti siasinoman nga adda supotna, alaenna, kasta met ti bay-onna. Ti awan
kampilanna, ilakona ti kagayna ket gumatang. 37 Ta ibagak kadakayo a
masapul a matungpal kaniak ti kuna ti Nasantoan a Surat: ‘Ket naibilang
kadagiti kriminal.’ Wen, umasidegen ti pannakatungpal ti naisurat
maipapan kaniak.” 38 “Adtoy ti dua a kampilan, Apo!” kinuna dagiti
adalan. “Isunan!” insungbat ni Jesus. 39 Rimmuar ni Jesus iti siudad, ket
kas ugalina, napan idiay Bantay Olivo; kimmuyog kenkuana dagiti adalan.
40 Idi makagteng iti disso a pappapananna, kinunana kadakuada,
“Agkararagkayo tapno dikayo masulisog.” 41 Immadayo kadakuada iti
sumagmamano a metro, sa nagparintumeng ket nagkararag. 42 “Ama,”
kinunana, “no pagayatam, yadayom kaniak daytoy a kopa ti panagsagaba.
Ngem saan a ti pagayatak ti maaramid, no di ket ti pagayatam.” 45
Kalpasan ti panagkararagna, timmakder ket napan iti ayan dagiti adalan.
Nadanonna ida a matmaturog, ta nautoyanda iti nakaro a ladingit. 46
“Apay a matmaturogkayo?” kinunana kadakuada. “Bumangonkayo ket
agkararagkayo tapno saankayo a matnag iti sulisog.” 47 Agsasao pay
laeng ni Jesus idi sumangpet ti adu a tattao. Impanguloan ida ni Judas a
maysa kadagiti sangapulo ket dua nga adalan. Immasideg ken ni Jesus
tapno agkanna, 48 ngem kinuna ni Jesus: “Judas, liputam aya ti Anak ti
Tao babaen iti agek?” 49 Idi makita dagiti adalan a kimmuyog ken Jesus
no ania ti mapasamak, kinunada, “Apo, makitinnagbatkamin?” 50 Maysa
kadakuada ti nangtagbat iti adipen ti Kangatoan a Padi. Napingasan ti
makannawan a lapayag ti adipen. 51 Ngem kinuna ni Jesus,
“Isardengyon!” Sinagidna ti lapayag ti adipen ket pinaimbagna. 52
Kalpasanna, kinuna ni Jesus kadagiti panguloen a papadi, kadagiti
ofisiales dagiti guardia iti Templo ken kadagiti panglakayen a napan
nangtiliw kenkuana: “Masapul kadi nga agtagikampilan ken agtagipang-
orkayo nga umay mangtiliw kaniak? Tulisanak aya? 53 Inaldaw a
nakipulpulapolak kadakayo idiay Templo, ngem didak inan-ano. Nupay
kasta, daytoyen ti orasyo—ti oras a panagturay ti sipnget.” 54 Tiniliwda ni
Jesus ket impanda iti balay ti Kangatoan a Padi. Sumarsaruno ni Pedro
ngem adda iti adayo. 55 Adda paginudoan iti tengnga ti paraangan ti
balay, ket nakitugaw ni Pedro kadagiti agin-inudo iti lawlaw ti apuy. 56
Idi mabigbig ti maysa a babai nga adipen a ni Pedro ti maysa kadagiti
agin-inudo, pinerrengna sana kinuna, “Nakikadkadua met daytoy a tao ken
ni Jesus!” 57 “Babai, diak am-ammo dayta a tao!” inlibak ni Pedro. 58 Iti
saan a nabayag, nailasin met ti maysa a lalaki. “Maysaka met kadakuada,”
kinunana ken Pedro. Ngem simmungbat ni Pedro, “Saanko a kadua ida!”
59 Agarup maysa nga oras ti napalabas idi adda manen lalaki a
nangipapilit: “Taga-Galilea met daytoy a tao ket awan duadua a kadua ni
Jesus!” 60 “Diak ammo ti sasawem!” insungbat ni Pedro. Pagammoan, idi
agsasao pay laeng ni Pedro, nagtaraok ti maysa a kawitan. 61 Timmaliaw
ti Apo ket pinerrengna ni Pedro. Nalagip ni Pedro daydi kinuna ti Apo:
“Sakbay nga agtaraok ti kawitan ita nga aldaw, namitlonton nga imbagam
a dinak am-ammo.” 62 Rimmuar ni Pedro ket nagsangit iti nasaem. 63
Kabayatanna, linak-am ni Jesus ti panangrabrabak ken panangkabkabil
dagiti mangguguardia kenkuana. 64 Inabungotanda ket sinaludsodda,
“Pugtoam man no siasino ti nangkabil kenka?” 65 Adu pay ti sinaoda a
pangpabpabain kenkuana. 66 Idi bumigaten, naguummong dagiti
panglakayen dagiti Judio, dagiti panguloen a papadi, ken dagiti mamaestro
iti Linteg, ket naidatag ni Jesus iti Sanhedrin a pangukomanda. 67
“Ibagam man kadakami no sika ti Cristo?” kinunada. Ngem insungbat ni
Jesus, “No ibagak kadakayo, didakto met la patien. 68 No agsaludsodak
kadakayo, dikayto met la sumungbat. 69 Ngem manipud ita, agtugaw ti
Anak ti Tao iti makannawan ti Dios a Mannakabalin-amin.” 70 “No kasta,
sika ti Anak ti Dios?” kinunada amin. “Dakayo ti agkuna a siak,”
insungbatna. 71 “Ania pay la ti pakasapulantayo iti saksi?” kinunada.
“Nangngegtayo a mismo ti imbagana.”
Lucas 23
1 Timmakder dagiti amin a kamkameng ti Sanhedrin ket impanda ni Jesus
ken ni Pilato. 2 Rinugianda ti nagiparang kadagiti pammabasolda
kenkuana. “Natiliwanmi daytoy a tao a mangal-allilaw kadagiti
kailianmi,” kinunada. “Iparparitna ti panagbayad iti buis iti Emperador.
Kunkunana pay nga isu ti Cristo a maysa nga ari.” 3 “Sika kadi ti Ari
dagiti Judio?” sinaludsod ni Pilato. “Nasaomon,” insungbat ni Jesus. 4 Ket
kinuna ni Pilato kadagiti panguloen a papadi ken kadagiti tattao, “Awan
masarakak a pakaigapuan iti pannakadusa daytoy a tao.” 5 Ngem inyad-
addada ti nagkuna: “Babaen iti pannursurona, sugsoganna dagiti tattao a
mangriribuk iti entero a Judea. Inrugina idiay Galilea, ket adda ditoyen.” 6
“Taga-Galilea kadi daytoy a tao?” sinaludsod ni Pilato idi mangngegna
daytoy. 7 Ket naammoanna a naggapu ni Jesus iti lugar nga iturayan ni
Herodes. Imbaonna ngarud ken ni Herodes nga adda idi idiay Jerusalem. 8
Nabayagen a kayat ni Herodes a makitana ni Jesus. Maragsakan unay idi
maidatag kenkuana ta nadamdamagnan ti maipapan kenkuana ket
ninamnamana ti makakita iti milagro nga iparang ni Jesus. 9 Adu ti
sinaludsod ni Herodes, ngem pulos a saan a simmungbat ni Jesus. 10 Adda
a nakatakder sadiay dagiti panguloen a papadi ken mamaestro iti Linteg
ket indatagda dagiti agkakadagsen a pammabasolda ken ni Jesus. 11
Pinagang-angawan ken linalais ni Herodes ken dagiti soldado.
Kinawesanda ni Jesus iti narangrang a lupot sada pinaisubli ken ni Pilato.
12 Manipud iti dayta nga aldaw, aggayyemen da Herodes ken ni Pilato,
numan pay aggin-ginnurada idi. 13 Pinaayaban ni Pilato dagiti panguloen
a papadi, dagiti agtuturay ken dagiti tattao. 14 Kinunana kadakuada,
“Insaklangyo kaniak daytoy a tao ket imbagayo nga al-allilawenna dagiti
tattao. Inusigko iti imatangyo ket awan nasarakak nga inaramidna kadagiti
ipabpabasolyo kenkuana. 15 Uray ni Herodes, awan nasarakanna, isut’
gapuna a pinaisublina kadatayo. Awan naaramid daytoy a tao a
pakaigapuan ti pannakapapatayna. 16 Ngarud, pasaplitko laeng sakonto
palubosan.” 18 Ngem sangsangkamaysa dagiti tattao a nangipukkaw,
“Papapataymo! Ni Barrabas ti kayatmi a wayawayaam!” ( 19 Naibalud ni
Barrabas gapu iti riribuk a naaramid iti siudad, ken gapu ta pimmatay.) 20
Kayat ni Pilato a wayawayaan ni Jesus, isut’ gapuna a kinasaona manen
dagiti tattao. 21 Ngem impukkawda, “Pailansam iti krus! Pailansam iti
krus!” 22 Pinitlo ni Pilato ti nagkuna kadakuada, “Ania kadi ti basolna?
Awan nasarakak nga inaramidna a pakaigapuan ti pannakapapatayna.
Pasaplitko laeng sakonto palubosan.” 23 Ngem inyad-adda dagiti tattao ti
nangyikkis a mailansa ni Jesus iti krus ket iti kamaudianna, naipangag ti
dawatda. 24 Inkeddeng ni Pilato ti sentensia, kas kiddawda. 25
Winayawayaanna ti lalaki a kayatda, ti naibalud gapu iti riribuk ken
pammapatay, ket inyawatna ni Jesus kadakuada tapno aramidenda ti
kaykayatda. 26 Impanaw dagiti soldado ni Jesus. Iti dalan, nasabetda ti
maysa a lalaki nga agnagan Simon a taga-Cirene a naggapu iti away, ket
agturong iti siudad. Tiniliwda ket impabaklayda kenkuana ti krus sada
impasaruno ken ni Jesus. 27 Adu a tattao ti simmurot ken ni Jesus.
Sumagmamano kadakuada ti babbai. Sangsangitan ken dungdung-awanda
ni Jesus. 28 Tinaliawna ida ket kinunana, “Babbai a taga-Jerusalem, didak
sangsangitan! Dagiti bagbagiyo ken dagiti annakyo ketdi ti sangitanyo! 29
Ta umasidegen dagiti aldaw a panagkunanto dagiti tat-tao, ‘Nagasat dagiti
babbai a di nagan-anak, di nagsikog ken di nagpasuso!’ 30 Daytanto ti
tiempo a panagkuna dagiti tattao kadagiti bambantay, ‘Tupakandakami!’
ken kadagiti turturod, ‘Gaburandakami!’ 31 No kastoy ti maaramid no
naata ti kayo, anianto ketdin no nagango?” 32 Adda dua a kriminal nga
inkuyogda a mapapatay met a kagiddan ken ni Jesus. 33 Idi dimtengda iti
lugar a managan “Bangabanga,” inlansada ni Jesus iti krus. Inlansada met
dagiti dua a kriminal, maysa iti makannawan ket ti sabali iti makannigid ni
Jesus. 34 “Ama,” kinuna ni Jesus, “pakawanem ida ta dida ammo ti ar-
aramidenda.” Nagbibingayan dagiti soldado dagiti pagan-anay ni Jesus
babaen iti panagbibinnunotda. 35 Nagtatakder sadiay dagiti tattao nga
agbuybuya idinto a linalais dagiti panguloen a Judio a kunkunada,
“Insalakanna dagiti dadduma. Isalakanna man ngarud ti bagina no isu ti
Cristo a pinili ti Dios!” 36 Linalais met dagiti soldado. Immasidegda ken
ni Jesus sada inyawatan iti suka. 37 “Isalakanmo ta bagim, no sika ti Ari
dagiti Judio!” kinunada. 38 Adda kastoy a naisurat iti ngatoen ni Jesus:
“Daytoy ti Ari dagiti Judio.” 39 Pinabpabainan ti maysa kadagiti kriminal
a nailansa. “Saan kadi a sika ti Cristo?” kinunana. “Isalakanmo ngarud ta
bagim ket isalakannakami met!” 40 Ngem binabalaw ti kaduana a
kriminal. “Dika aya agbuteng iti Dios?” kinunana. “Agpapadatayo amin a
madusdusa. 41 Rebbengna nga agsagabata gapu iti inaramidta. Ngem
daytoy a tao, awan dakes nga inaramidna.” 42 Ket kinunana ken ni Jesus,
“Laglagipennak, Jesus, inton mapanka iti pagariam.” 43 Kinuna ni Jesus
kenkuana, “Ibagak kenka daytoy: Ita nga aldaw, makipagyankanto kaniak
idiay Paraiso.” 44 Dandani tengnga ti aldaw idi agsipnget iti entero a daga
ket nagpaut agingga iti alas tres iti malem. 45 Napigis a naggudua ti
kurtina a naibengbeng iti Templo. 46 Nagpukkaw ni Jesus iti napigsa:
“Ama, kadagita imam yawatko ti espirituk!” Apaman a nasaona daytoy,
nauyosen ti biagna. 47 Idi makita ti kapitan dagiti soldado ti napasamak,
nagdaydayaw iti Dios. “Pudno nga awan basol daytoy a tao!” kinunana. 48
Nakita dagiti tattao a napan nagbuya ti napasamak ket nagawidda amin a
mangdandanog iti barukongda a mangipakita iti panagladingitda. 49 Iti
adayo bassit, nakatakder dagiti amin a gagayyem ni Jesus ken dagiti
babbai a simmursurot kenkuana manipud Galilea. Nakitada dagitoy a
napasamak. 50-52 Adda lalaki a napan ken ni Pilato tapno dawatenna ti
bangkay ni Jesus. Isu ni Jose a naggapu iti ili ti Arimatea idiay Judea.
Nalinteg ken natakneng a tao ni Jose ken paspasungadenna ti idadateng ti
Pagarian ti Dios. Nupay maysa a kameng ti Sanhedrin, saan nga
immanamong iti inkeddeng ken inaramidda. 53 Kalpasan ti panangibabana
iti bangkay, binungonna iti linen a lupot sana inkabil iti tanem a
naikungkong iti bato ken di pay nausar. 54 Aldaw idi a Panagsagana, ket
dandani mangrugin ti Aldaw a Panaginana. 55 Simmurot ken ni Jose dagiti
babbai a kimmuykuyog ken ni Jesus manipud Galilea. Nakitada ti tanem
ken ti pannakaikabil ti bangkayna. 56 Kalpasanna, nagawidda ket
insaganada dagiti bangbanglo ken sapsapo nga agpaay iti bangkay. Ket iti
Aldaw a Panaginana, naginanada kas sagudayen ti Linteg.
Lucas 24
1 Iti umuna nga Aldaw ti lawas, nakasapsapa a napan dagiti babbai iti
tanem ket intugotda dagiti bangbanglo nga insaganada. 2 Nadanonda a
naitulid ken naikkaten ti bato a nangserra iti ruangan ti tanem, 3 isu a
simrekda ngem dida nasarakan ti bangkay ni Apo Jesus. 4 Nagtatakderda
sadiay a masmasdaaw gapu iti daytoy. Pagammoan, nagparang iti sibayda
ti dua a lallaki a makasisirap ti kawesda. 5 Iti napalalo a butengda,
nagdumogda ngem kinuna dagiti lallaki kadakuada: “Apay a birokenyo
kadagiti natay ti tao a sibibiag? 6 Awan ditoy, ta napagungaren.
Lagipenyo nga idi adda idiay Galilea, imbagana kadakayo 7 a masapul a
mayawat ti Anak ti Tao kadagiti managbasol, mailansa iti krus ket agungar
iti maikatlo nga aldaw.” 8 Nalagip dagiti babbai ti sinao ni Jesus. 9
Pimmanawda iti tanem ket napanda impadamag amin dagitoy kadagiti
sangapulo ket maysa nga adalan ken kadagiti dadduma pay a kakaduada.
10 Da Maria Magdalena, Juana ken Maria nga ina ni Santiago ken
dadduma pay a babbai ti nangipadamag kadagitoy kadagiti apostoles. 11
Ngem impagarup dagiti apostoles a sarsarita laeng ti imbaga dagiti babbai,
ket dida namati kadakuada. 13 Iti dayta met la nga aldaw, magmagna ti
dua nga adalan a mapan iti maysa a barrio a managan Emaus. Nasurok a
sangapulo ket maysa a kilometro ti kaadayo ti Emaus manipud Jerusalem.
14 Sarsaritaenda dagiti amin a napasamak. 15 Kabayatan ti
panagsarsaritada, immasideg ni Jesus ket nakikuyog kadakuada. 16
Nakitada ngem kasla nakullaapan dagiti matada ket dida nailasin ni Jesus.
17 “Ania ti pagsarsaritaanyo bayat ti pannagnayo?” kinuna ni Jesus.
Nagsardengda a malidlidayan. 18 “Sikan sa laeng ti sangaili iti Jerusalem
a di makaammo kadagiti napaspasamak sadiay kadagiti napalabas nga
aldaw!” kinuna ti maysa nga agnagan Cleofas. 19 “Ania a
napaspasamak?” sinaludsod ni Jesus. “Dagiti naaramid ken ni Jesus a
taga-Nazaret,” insungbatda. “Maysa a profeta daytoy a tao nga imbilang ti
Dios ken amin a tattao a mannakabalin iti amin a sao ken aramidna. 20
Inyawat dagiti panguloen a papadi ken agtuturaytayo ket naikeddeng a
matay iti krus. 21 Ninamnamami nga isu ti mangwayawaya iti Israel!
Wen, ket saan la a dayta, maikatlo nga aldaw itan manipud
pannakapasamak dagitoy. 22 Maysa pay, pinagsiddaawdakami ti
sumagmamano kadagiti babbai a kaduami. Sinapsapada ti napan iti tanem,
23 ngem dida kano nasarakan ti bangkayna. Nagsublida a nangipadamag a
nagparang pay kadakuada dagiti angheles a nangibaga a sibibiag kano ni
Jesus. 24 Napan ti sumagmamano kadagiti kakaduami iti tanem ket
napaneknekanda a pudno amin ti kinuna dagiti babbai, nupay dida nakita
ni Jesus.” 25 “Nagnengnengkayon!” kinuna ni Jesus kadakuada.
“Nagrigatkayo ketdin a mamati kadagiti sinao dagiti profeta! 26 Saan aya
a masapul a sagabaen ti Cristo dagitoy, sakbay a sumrek iti gloriana?” 27
Ket impalawagna kadakuada dagiti bambanag maipapan kenkuana kas
masarakan kadagiti amin a Sursurat manipud kadagiti libro ni Moises ken
dagiti sursurat dagiti amin a profeta. 28 Idi makaasidegdan iti ili a
pagturonganda, impadlaw ni Jesus a kasla adayo pay ti papananna. 29
Ngem inggawidda. “Makidaguskan kadakami,” kinunada, “ta
sumipngeten.” Iti kasta, nakidagus kadakuada. 30 Idi addada iti panganan,
innala ni Jesus ti tinapay, binendisionanna, ket pinispisina sana inted
kadakuada. 31 Naluktan ti panagkitada ket nailasindan nga isu ni Jesus.
Ngem nagpukaw ni Jesus iti imatangda. 32 Kinunada iti maysa ken maysa,
“Isu met la gayam a kasla bumarbara ti riknata itay makisasao kadata iti
dalan kabayatan ti panangipalpalawagna kadagiti Sursurat!” 33
Nagrubbuatda a dagus ket nagsublida idiay Jerusalem. Nasarakanda dagiti
sangapulo ket maysa nga adalan a naguurnong sadiay agraman dagiti
dadduma a kakaduada. 34 “Pudno a nagungar ti Apo!” kinunada.
“Nagparang ken ni Simon.” 35 Impadamag met dagiti dua ti napasamak
idi addada iti dalan agraman ti pannakailasinda iti Apo idi pinispisina ti
tinapay. 36 Madama nga ipadpadamagda dagitoy idi kellaat a nagparang
ni Jesus a mismo kadakuada. “Kappia koma ti adda kadakayo,” kinunana
kadakuada. 37 Napalalo ti buteng ken kigtotda ket impagarupda nga al-
alia ti kitkitaenda. 38 Iti kasta, kinuna ni Jesus kadakuada, “Apay a
mariribukkayo? Apay nga agduaduakayo? 39 Kitaenyo dagiti im-ima ken
saksakak. Siak a mismo! Sagidendak ket mapaneknekanyo. Awan lasag
ken tulang ti espiritu, ngem adda kaniak kas makitayo.” 41 Dida pay la
mamati gapu iti napalalo a ragsak ken siddaawda. Iti kasta, sinaludsod ni
Jesus kadakuada, “Awan lat’ makan ditoy?” 42 Inikkanda iti tinuno nga
ikan. 43 Inawatna sana kinnan iti imatangda. 44 Kalpasanna, kinunana
kadakuada, “Dagitoy dagiti imbagbagak kadakayo idi addaak pay laeng iti
arpadyo. Masapul a matungpal amin a naisurat maipapan kaniak iti Linteg
ni Moises, kadagiti sursurat dagiti profeta, ken kadagiti Salmo.” 45
Linuktanna ti isipda tapno maawatanda dagiti Sursurat ket kinunana
kadakuada, 46 “Daytoy ti naisurat: ‘Masapul nga agsagaba ti Cristo ken
agungar iti maikatlo nga aldaw. 47 Iti naganna, maikasabanto kadagiti
amin a nasion, manipud Jerusalem, ti mensahe maipapan ti panagbabawi
ken pannakapakawan dagiti basbasol.’ 48 Dakayo ti makasaksi kadagitoy.
49 Ita, ibaonko kadakayo ti inkari ni Amak. Dikayo ngarud pumampanaw
iti siudad agingga iti maawatyo ti pannakabalin nga aggapu sadi langit.”
50 Kalpasan daytoy, impan ni Jesus dagiti adalanna iti ruar ti siudad. Idi
dimtengda idiay Betania, ingngatona dagiti imana sana binendisionan ida.
51 Idi bembendisionanna ida, pimmanaw iti imatangda ket nayuli sadi
langit. 52 Nagdaydayawda kenkuana ket nagsublida a siraragsak idiay
Jerusalem. 53 Kanayon nga addada iti Templo nga agdaydayaw iti Dios.
Juan 1
1 Idi punganay, addan ti Sao, ket ti Sao kadua ti Dios, ket ti Sao, Dios. 2
Manipud idi punganay, ti Sao kadua ti Dios. 3 Pinarsua ti Dios dagiti
isuamin babaen kenkuana. Ket awan ti naparsua no saan a gapu kenkuana.
4 Ti Sao isu ti gubbuayan ti biag, ket daytoy a biag isu ti silaw dagiti
tattao. 5 Agraniag ti silaw iti sipnget, ket di mabalinan ti sipnget nga
iddepen. 6 Imbaon ti Dios ti maysa a tao nga agnagan iti Juan. 7 Immay a
mangpaneknek kadagiti tattao maipapan iti silaw tapno mangngegda ti
mensahe ket mamatida. 8 Saan nga isu a mismo ti silaw, ngem immay
tapno paneknekanna ti maipapan iti silaw. 9 Daytoy ti pudno a silaw, ti
silaw nga umay ditoy lubong ken manglawag kadagiti amin a tattao. 10
Adda idin ti Sao ditoy lubong. Pinarsua ti Dios ti lubong babaen
kenkuana; nupay kasta, saan a binigbig ti lubong. 11 Napan iti ilina, ngem
saan nga inawat dagiti kailianna. 12 Ngem adda met dagiti immawat ken
namati kenkuana, isut’ gapuna nga inikkanna ida iti kalintegan nga agbalin
nga annak ti Dios. 13 Saanda a nagbalin nga annak ti Dios kas iti
gagangay a pannakaipasngay ti tao; ta ti Dios a mismo ti Amada. 14
Nagbalin a tao ti Sao ket nakipagtaeng kadatayo; napnoan iti parabur ken
kinapudno. Nakitami ti dayagna, ti dayag nga inawatna kas kakaisuna nga
Anak ti Ama. 15 Pinaneknekan ni Juan ti maipapan kenkuana ket
impukkawna: “Isu daytoy ti ibagbagak idi kinunak, ‘Umay a sumarsaruno
kaniak, nupay kasta, natantan-ok ngem siak, ta addan sakbay a
nayanakak.’” 16 Gapu ta nabuslon ti paraburna, inawattayo amin ti
bendisionna. Wen, nawadwad a bendision ti impaayna kadatayo. 17 Inted
ti Dios ti Linteg babaen ken ni Moises, ngem immay ti parabur ken
kinapudno babaen ken Jesu-Cristo. 18 Awan pay ti nakakita iti Dios. Ti
laeng Bugbugtong nga Anak, a kadua ti Ama, isu ti nangipakaammo
kenkuana. 19 Nangibaon dagiti Judio a papangulo idiay Jerusalem iti
sumagmamano a papadi ken Levita a mapan ken ni Juan tapno
saludsodenda kenkuana, “Siasinoka?” 20 Saan a nagkedked ni Juan a
nangibaga iti pudno, “Saan a siak ti Cristo,” kinunana a sibabatad. 21
“Siasinoka ngarud?” sinaludsodda manen. “Sika kadi ni Elias?” “Saan,”
insungbat ni Juan. “Sika kadi ti Profeta?” kinunada. “Saan,” insungbatna.
22 “Ibagam ngarud no siasinoka,” kinunada. “Masapul nga adda
isungbatmi kadagiti nangibaon kadakami. Ania ti masaom maipapan
kenka?” 23 Simmungbat ni Juan babaen iti panangibagana iti padto ni
profeta Isaias: “Siak ti timek ti maysa nga agpukpukkaw iti let-ang:
‘Palintegenyo ti dalan a pagnaan ti Apo!’” 24 Adda met dagiti Fariseo a
naibaon ken ni Juan. 25 Sinaludsodda ngarud kenkuana, “No saan a sika ti
Cristo, wenno ni Elias, wenno ti Profeta, apay ngarud a
mamumbuniagka?” 26 “Mamumbuniagak iti danum,” insungbat ni Juan,
“ngem makipulpulapol kadakayo ti maysa a diyo am-ammo. 27
Sumarsaruno kaniak, ngem diak pay maikari a mangwarwar iti
sandaliasna.” 28 Napasamak amin dagitoy idiay Betania, iti ballasiw ti
karayan Jordan a pangbumbuniagan ni Juan. 29 Iti sumuno nga aldaw,
nakita ni Juan nga agturong ni Jesus iti yanna. “Daytoy ti Kordero ti Dios
a mangikkat iti basol ti lubong!” kinuna ni Juan. 30 “Isu daytoy ti
sarsaritaek idi kinunak, ‘Sumarsaruno kaniak ti maysa a tao a natantan-ok
ngem siak, ta addan sakbay a nayanakak.’ 31 Diak am-ammo idi no
siasino, ngem immayak mamuniag iti danum tapno ipakaammok iti
Israel.” 32 Daytoy ti pammaneknek nga inted ni Juan: “Nakitak ti Espiritu
a bumabbaba a kasla kalapati manipud langit ket nagdisso kenkuana. 33
Diak pay am-ammo idi no siasino, ngem ti Dios a nangibaon kaniak a
mamuniag iti danum, kinunana kaniak, ‘Makitamto ti Espiritu a bumaba
ken agdisso iti maysa a tao. Daytoy ti mamuniag iti Espiritu Santo.’ 34
Wen, nakitakon daytoy, ket paneknekak kadakayo nga isu ti Anak ti
Dios.” 35 Iti sumuno nga aldaw, agtaktakder manen ni Juan ken ti dua
kadagiti adalanna. 36 Idi makitana a lumabas ni Jesus, kinunana, “Daytoy
ti Kordero ti Dios!” 37 Nangngeg dagiti dua nga adalan ti kinuna ni Juan,
ket sinurotda ni Jesus. 38 Idi tumalliaw ni Jesus, nakitana ida a sumursurot
kenkuana. “Ania ti sapsapulenyo?” sinaludsodna. “Sadino ti pagtaengam,
Rabbi?” insungbatda. (“Maestro” ti kayat a sawen ti “Rabbi.”) 39
“Umayyo kitaen,” kinuna ni Jesus kadakuada. Nakikuyogda ken ni Jesus
ket nakitada ti pagtaenganna. Gapu ta dandanin alas kuatro iti malem,
nakidagusda kenkuana. 40 Ni Andres a kabsat ni Simon Pedro ti maysa
kadagiti dua a nakangngeg iti imbaga ni Juan ken simmurot ken ni Jesus.
41 Sinapulna a dagus ni Simon a kabsatna ket imbagana kenkuana,
“Nasarakanmi ti Mesias!” (Kayatna a sawen, “Cristo.”) 42 Impanna ni
Simon iti ayan ni Jesus. Minatmatan ni Jesus ni Simon sana kinuna, “Sika
ni Simon nga anak ni Juan. Managanankanto iti Cefas.” (Kayatna a sawen,
“Bato” wenno “Pedro.”) 43 Iti sumuno nga aldaw, inkeddeng ni Jesus ti
mapan idiay Galilea. Nasarakanna sadiay ni Felipe ket kinunana
kenkuana, “Surotennak.” 44 Taga-Betsaida ni Felipe, iti ili da Andres ken
Pedro. 45 Nasarakan ni Felipe ni Natanael ket kinunana kenkuana,
“Nasapulanmi ti tao a sinarita ni Moises iti libro ti Linteg, ken dagiti
Profeta. Isu ni Jesus a taga-Nazaret nga anak ni Jose.” 46 “Adda aya
naimbag a tumaud idiay Nazaret?” sinaludsod ni Natanael. “Umaymo
kitaen,” insungbat ni Felipe. 47 Idi makita ni Jesus nga agturong ni
Natanael iti ayanna, kinunana maipapan kenkuana, “Adtoy ti pudno nga
Israelita. Awan kenkuana ti aniaman a kinaulbod.” 48 “Kasano ti
pannakaam-ammom kaniak?” sinaludsod ni Natanael. “Nakitaka idi
addaka iti sirok ti kayo nga igos, sakbay nga inayabannaka ni Felipe,”
insungbat ni Jesus. 49 “Maestro,” insungbat ni Natanael. “Sika ti Anak ti
Dios! Sika ti Ari ti Israel!” 50 “Mamatika kadi gapu ta kinunak a nakitaka
iti sirok ti kayo nga igos?” kinuna ni Jesus. “Makitamto dagiti
daddadakkel pay a bambanag ngem daytoy!” 51 Ket kinunana kadakuada,
“Ibagak kadakayo ti pudno: makitayonto nga aglukat ti langit ken dagiti
angheles ti Dios nga umuli-umulog iti ayan ti Anak ti Tao.”
Juan 2
1 Kalpasan ti dua nga aldaw, adda boda idiay Cana, maysa nga ili ti
Galilea. Adda sadiay ti ina ni Jesus, 2 ket naawis met ni Jesus ken dagiti
adalanna. 3 Idi naibusen ti arak, kinuna ti ina ni Jesus kenkuana,
“Naibusandan iti arak.” 4 “Babai,” insungbat ni Jesus, “saan a masapul
nga ibagam ti aramidek. Saan pay a dimteng ti orasko.” 5 Kinuna ti ina ni
Jesus kadagiti agserserbi, “Aramidenyo ti aniaman nga ibagana
kadakayo.” 6 Adda alagaden dagiti Judio maipapan iti panagbuggo. Isut’
gapuna nga adda innem a burnay sadiay nga aglaon ti tunggal maysa iti
agarup 100 a litro. 7 “Punnoenyo dagiti burnay iti danum,” kinuna ni Jesus
kadagiti agserserbi. Pinunnoda ngarud dagiti burnay. 8 “Ita,” kinunana
kadakuada, “tumakokayo ket ipanyo iti agaywan iti padaya.” Kasta ti
inaramid dagiti agserserbi. 9 Idi naramanan ti agaywan ti danum a
nagbalin nga arak, inayabanna ti nobio. Saanna nga ammo ti naggapuan ti
arak (nupay ammo dagiti agserserbi, ta isuda ti timmako iti danum). 10
Kinunana iti nobio, “Ugali dagiti tattao nga ipasango nga umuna ti
kaimasan nga arak sadanto ipasango ti ordinario nga arak no adun ti
nainum dagiti sangaili. Ngem sika, inyud-udim nga impasango ti kaimasan
nga arak!” 11 Inaramid ni Jesus daytoy umuna a milagro idiay Cana,
maysa nga ili ti Galilea. Impakitana ti dayagna sadiay, ket namati
kenkuana dagiti adalanna. 12 Kalpasan daytoy, napan ni Jesus idiay
Capernaum. Kaduana ni inana, dagiti kakabsatna a lallaki ken dagiti
adalanna ket nagyanda sadiay iti sumagmamano nga aldaw. 13 Asidegen ti
Paskua dagiti Judio, ket napan ni Jesus idiay Jerusalem. 14 Iti Templo,
nadanonna dagiti aglaklako iti baka, karnero ken kalapati, kasta met dagiti
agsuksukat iti kuarta a situtugaw iti puestoda. 15 Nangaramid ni Jesus iti
pagbaut a tali sana pinaruar dagiti amin a baka ken karnero. Binalintuagna
dagiti lamisaan dagiti agsuksukat iti kuarta. Inwarawarana ti kuartada. 16
Kinuna ni Jesus kadagiti aglaklako iti kalapati. “Iruaryo dagitoy. Diyo
pagbalinen a tiendaan ti balay ni Amak!” 17 Nalagip dagiti adalanna ti
kuna ti Nasantoan a Surat: “Ti panangipategko iti balaymo, O Dios, kasla
apuy a sumsumged iti unegko!” 18 Gapu iti inaramid ni Jesus, sinaludsod
dagiti papangulo a Judio kenkuana, “Ania ti maiparangmo a milagro
kadakami a mangipakita iti kalintegam a mangaramid iti daytoy?” 19
“Rebbaenyo daytoy a Templo ket iti uneg ti tallo nga aldaw, bangonekto
met laeng,” insungbat ni Jesus. 20 Kinuna kenkuana dagiti Judio, “Ania?
Bangonem met laeng iti uneg ti tallo nga aldaw? Nabangon daytoy a
Templo iti uneg ti uppat a pulo ket innem a tawen!” 21 Ngem ti templo a
sasawen ni Jesus isu ti bagina. 22 Isut’ gapuna nga idi napagungaren ni
Jesus, nalagip dagiti adalanna a sinaona daytoy. Ket namatida iti
Nasantoan a Surat ken iti insao ni Jesus. 23 Idi adda ni Jesus idiay
Jerusalem bayat ti Fiesta ti Paskua, adu ti namati kenkuana idi nakitada
dagiti milagro nga inaramidna. 24 Ngem saanna nga intalek kadakuada ti
bagina, agsipud ta ammona ti amin a tattao. 25 Saanna a masapul ti
siasinoman a mangibaga kenkuana maipapan iti tao ta ammona a mismo ti
panunot ken kababalin ti tao.
Juan 3
1 Adda idi Fariseo nga agnagan iti Nicodemo, maysa a pangulo dagiti
Judio. 2 Iti maysa a rabii, napan ni Nicodemo ken ni Jesus. “Rabbi,”
kinunana, “ammomi a maysaka a maestro nga imbaon ti Dios. Awan ti
makaaramid kadagitoy a milagro nga ar-aramidem malaksid no adda
kenkuana ti Dios.” 3 “Ibagak kenka ti pudno,” kinuna ni Jesus. “Awan ti
makakita iti Pagarian ti Dios malaksid no mayanak manen.” 4 “Kasano a
mayanak manen ti tao a nataenganen?” sinaludsod ni Nicodemo.
“Mabalinna aya ti sumrek iti aanakan ni inana tapno mayanak manen?” 5
“Ibagak kenka ti pudno,” insungbat ni Jesus. “Awan ti makastrek iti
Pagarian ti Dios malaksid no mayanak iti danum ken iti Espiritu. 6 Ti tao,
ipasngayna ti tao; ket ti Espiritu, ipasngayna ti espiritu. 7 Dika masdaaw
no kunak kenka, ‘Masapul a mayanakkayo manen.’ 8 Agpuyupoy ti angin
iti sadinoman a kaykayatna. Mangngegmo ti awerna, ngem dimo ammo ti
paggapuan wenno pagturonganna. Kasta met ti mapasamak iti tunggal
maysa a mayanak iti Espiritu.” 9 “Kasano a maaramid daytoy?”
sinaludsod ni Nicodemo. 10 Kinuna ni Jesus, “Maysaka a maestro iti
Israel ket dimo maawatan daytoy? 11 Ibagak kenka ti pudno: Sawenmi ti
ammomi, ket ibagami ti nakitami. Ngem diyo patien ti pammaneknekmi.
12 Ibagbagak kadakayo dagiti naindagaan a bambanag, ngem dikayo
mamati. Kasano ngarud ti panamatiyo kaniak no sawek dagiti nailangitan
a bambanag? 13 Ket awan ti immuli sadi langit malaksid ti Anak ti Tao a
bimmaba manipud langit. 14 Kas iti panangibayog ni Moises iti sinan-uleg
a bronse idiay let-ang, masapul met ti pannakaibayog ti Anak ti Tao 15
tapno agbiag nga agnanayon ti siasinoman a mamati kenkuana.” 16 Gapu
iti kasta unay a panagayat ti Dios iti lubong, intedna ti Bugbugtong nga
Anakna tapno ti siasinoman a mamati kenkuana saan a matay no di ket
agbiag nga agnanayon. 17 Ta saan nga imbaon ti Dios ti Anakna ditoy
lubong tapno ukomenna ti lubong, no di ket tapno isalakanna. 18 Saan a
maukom ti siasinoman a mamati iti Anak. Ngem naukomen ti di mamati
agsipud ta saan a namati iti Bugbugtong nga Anak ti Dios. 19 Daytoy ti
pakaukoman: Immayen ti silaw ditoy lubong, ngem gapu ta dakes dagiti
aramid dagiti tattao, ad-adda nga ayatenda ti sipnget ngem ti lawag. 20 Ti
siasinoman nga agaramid iti dakes, kagurana ti lawag ket saan nga
umasideg iti silaw agsipud ta dina kayat a maipakita dagiti dakes nga
aramidna. 21 Ngem ti agbiag iti kinapudno, umasideg iti silaw tapno
maipakita a mayannurot iti Dios dagiti aramidna. 22 Kalpasan daytoy,
napan ni Jesus ken dagiti adalanna iti probinsia ti Judea. Nagyanda sadiay
ket namumbuniag ni Jesus. 23 Namumbuniag met idi ni Juan idiay Enon,
iti asideg ti Salim, ta adu ti danum sadiay. Napan kenkuana dagiti tattao
ket binuniaganna ida. ( 24 Saan pay a naibalud idi ni Juan.) 25 Iti
naminsan, makisinsinnuppiat dagiti adalan ni Juan iti maysa a Judio
maipapan iti alagaden iti pannakaugas. 26 Napanda ngarud ken ni Juan ket
kinunada kenkuana, “Maestro, malagipmo daydi immay kenka iti
akindaya a ballasiw ti Jordan, daydi imbagam kadakami?
Mamumbuniagen, ket mapmapan kenkuana dagiti amin a tattao!” 27
Insungbat ni Juan, “Awan ti mabalin nga awaten ti tao malaksid no ited
kenkuana ti Dios. 28 Dakayo met laeng ti makasaksi a kinunak, ‘Saan a
siak ti Cristo, ngem naibaonak nga umay nga umun-una ngem isu.’ 29 Ti
nobio ti akinkukua iti nobia; ti gayyem ti nobio agsiput ken agdengngeg
ket maragsakan no mangngegna ti timek ti nobio. Ngarud, naan-anayen ti
ragsakko. 30 Isun ti rumbeng a maitan-ok, ket siak ti maipababa.” 31
Natantan-ok ngem ti isuamin ti umay nga aggapu iti ngato. Taga-daga ti
agtaud iti daga, ket sawenna dagiti naidagaan a bambanag. Nangatngato
ngem ti isuamin ti umay nga aggapu sadi langit. 32 Paneknekanna ti nakita
ken nangngegna, ngem awan umawat iti mensahena. 33 Ti siasinoman nga
umawat iti mensahena, pasingkedanna a pudno ti Dios. 34 Ta ti imbaon ti
Dios sawenna dagiti sao ti Dios, agsipud ta inted ti Dios kenkuana ti
Espirituna. 35 Ti Ama ayatenna ti Anakna ket impaimana kenkuana dagiti
isuamin. 36 Ti siasinoman a mamati iti Anak maaddaan iti biag nga
agnanayon. Siasinoman a di agtulnog iti Anak, dinanto maragpat ti biag,
no di ket agtalinaed kenkuana ti pannusa ti Dios.
Juan 4
1 Nadamag dagiti Fariseo nga ad-adu ti adalan a mapaspasurot ken
bumbuniagan ni Jesus ngem ni Juan. 2 (Kinapudnona, saan a
nangbumbuniag ni Jesus, no di ket dagiti adalanna laeng.) 3 Ngarud, idi
madamag ni Jesus ti maisasao, pimmanaw idiay Judea ket nagsubli idiay
Galilea. 4 Iti panagbiahena, masapul a lumasat idiay Samaria. 5 Idiay
Samaria, dimteng iti maysa nga ili a managan Sicar, a saan nga adayo iti
talon nga inted idi ni Jacob ken ni Jose nga anakna. 6 Adda sadiay ti
bubon ni Jacob. Nagtugaw ni Jesus iti abay ti bubon gapu iti bannogna.
Nganngani tengnga ti aldaw idi. 7 Dimteng ti maysa a Samaritana tapno
sumakdo, ket kinuna ni Jesus kenkuana, “Makiinumak man.” ( 8 Napan
gimmatang idi dagiti adalanna iti kanenda idiay ili.) 9 “Ania?” kinuna ti
babai. “Maysaka a Judio, ket makiinumka kaniak a Samaritana?” (Ta saan
nga ugali dagiti Judio ti makilangenlangen kadagiti Samaritano.) 10 “No
ammom la koma ti sagut nga ited ti Dios ken no siasino ti dumawdawat
kenka iti inumen, dumawatka koma kenkuana ket ikkannaka iti nabiag a
danum,” insungbat ni Jesus. 11 “Apo,” kinuna ti babai, “nauneg ti bubon
ket awan met ti pagsakdum. Pangalaam ngarud iti nabiag a danum? 12
Inted kadakami ni Jacob a kapuonantayo daytoy a bubon. Nagin-inumanna
daytoy a bubon agraman dagiti annak ken tarakenna. Dakdakkelka kadi
ngem ni Jacob?” 13 “Siasinoman nga uminum iti daytoy a danum,
mawawto manen,” kinuna ni Jesus, 14 “ngem ti uminum iti danum nga
itedko, saanton a mawaw. Ta ti danum nga itedko agbalinto nga ubbog iti
unegna a mangted kenkuana iti nabiag a danum ken biag nga agnanayon.”
15 “Apo,” kinuna ti babai, “itedmo kaniak daytoy a danum tapno diakton
mawaw wenno umay sumakdo ditoy.” 16 “Inka ayaban ti asawam saka
agsubli ditoy,” kinuna ni Jesus. 17 “Awan asawak,” kinuna ti babai.
“Agpayso ta kunam nga awan asawam,” kinuna ni Jesus. 18
“Naminlimakan a nakiasawa, ket saanmo nga asawa ti lalaki a
kabbalaymo ita. Pudno ti imbagam kaniak.” 19 “Apo,” kinuna ti babai,
“mabigbigko a profetaka. 20 Ditoy a bantay ti nagdaydayawan dagidi
kapuonanmi iti Dios. Ngem dakayo a Judio kunayo nga idiay Jerusalem ti
rumbeng a pagdaydayawan.” 21 “Babai,” kinuna ni Jesus, “patiem ti
kunak nga umayto ti tiempo a saan a ditoy a bantay wenno idiay Jerusalem
ti pagdaydayawan iti Ama. 22 Dakayo a Samaritano, diyo ammo no
siasino ti daydayawenyo. Dakami, ammomi ti daydayawenmi ta aggapu
kadagiti Judio ti pannakaisalakan. 23 Ngem umasideg ti tiempo, ket
dimtengen, a dagiti napaypayso nga agdaydayaw, daydayawendanto ti
Ama iti espiritu ken kinapudno. Ta dagiti kakasta ti sapsapulen ti Ama nga
agdayaw kenkuana. 24 Ti Dios ket Espiritu. Ngarud, dagiti agdaydayaw
kenkuana masapul nga agdaydayawda iti Espiritu ken kinapudno.” 25
Kinuna kenkuana ti babai, “Ammok nga umayto ti Mesias a maawagan iti
Cristo. Inton umay, ibagananto dagiti amin a bambanag.” 26 “Siak dayta,”
insungbat ni Jesus. “Wen, siak a makisasao kenka.” 27 Iti dayta a kanito,
simmangpet dagiti adalan ni Jesus. Kasta unay ti siddaawda ta nadanonda
a makisasao ni Jesus iti babai. Ngem awan kadakuada ti nagdamag iti
babai no ania ti masapulna. Saanda met a nagsaludsod ken ni Jesus no
apay a makisasao kenkuana. 28 Pinanawan ti babai ti karambana ket
nagsubli iti ili. “Umaykayo!” kinunana kadagiti tattao. 29 “Umayyo kitaen
ti tao a nangibaga kaniak iti amin nga inar-aramidko. Saan ngata nga isu ti
Cristo?” 30 Rimmuarda ngarud iti ili tapno mapanda iti ayan ni Jesus. 31
Kabayatanna, inayaban dagiti adalan ni Jesus, “Maestro, umayka
manganen!” 32 Ngem kinunana kadakuada, “Adda taraonko a diyo
ammo.” 33 Iti kasta, nagsisinnaludsod dagiti adalan, “Adda aya nangyeg
iti kanenna?” 34 “Ti taraonko isut’ panangtungpalko iti pagayatan ti
nangibaon kaniak ken ti panangileppasko iti paaramidna,” kinuna ni Jesus
kadakuada. 35 Innayon ni Jesus: “Adda pagsasaoyo, ‘Uppat pay a bulan
ket panaganin.’ Ngem ibagak kadakayo, kitaenyo a naimbag dagiti
taltalon. Natangkenanen dagiti dawa ket mabalinen nga anien! 36
Matangdanan ti agani ket urnongenna ti apit para iti biag nga agnanayon.
Iti kasta, agpadpada nga agragsak ti agmula ken ti agani. 37 Ta pudno ti
pagsasao: ‘Maysa ti agmula, sabali ti agani.’ 38 Imbaonkayo nga agani iti
saanyo a nagbannogan. Sabali dagiti nagtrabaho, ket dakayo ti aglak-am iti
nagbannoganda.” 39 Adu a Samaritano iti dayta nga ili ti namati ken ni
Jesus gapu ta kinuna ti babai: “Imbagana kaniak ti amin nga inar-
aramidko.” 40 Isut’ gapuna nga idi napanda ken ni Jesus, indawatda a
makipagyan kadakuada. Nagbati sadiay ni Jesus iti dua nga aldaw. 41 Adu
pay dagiti namati ken ni Jesus gapu iti insursurona. 42 Kinuna dagiti tattao
iti babai, “Mamatikamin, saanen a gapu iti saom, ngem gapu ta dakami a
mismo ti nakangngeg kenkuana, ket ammomi a pudno nga isu ti
Mangisalakan iti lubong.” 43 Kalpasan ti dua nga aldaw a panagyan ni
Jesus idiay Samaria, pimmanaw ket napan idiay Galilea. 44 Ta ni met
laeng Jesus ti nagkuna, “Saan a mapadayawan ti maysa a profeta iti mismo
nga ilina.” 45 Idi makasangpet idiay Galilea, inawat dagiti umili, ta idi
napanda dimmar-ay iti Fiesta ti Paskua idiay Jerusalem, nakitada amin nga
inaramidna bayat ti Fiesta. 46 Kalpasanna, nagsubli ni Jesus iti ili a Cana
idiay Galilea, ti lugar a namagbalinanna iti danum nga arak. Adda idi
sadiay ti maysa nga ofisial ti gobierno a masakit ti anakna a lalaki idiay
Capernaum. 47 Nadamagna a simmangpet ni Jesus idiay Galilea a
naggapu idiay Judea, ket napanna impakpakaasi kenkuana a mapan idiay
Capernaum tapno paimbagenna ti anakna a nganngani matay. 48 Kinuna
ni Jesus kenkuana, “No awan makitayo a milagro, saankayo a mamati.” 49
“Apo,” insungbat ti ofisial, “pangngaasim ta umayka amangan no matay ti
anakko.” 50 “Inkan,” kinuna ni Jesus kenkuana. “Agbiag ti anakmo!”
Namati ti ofisial iti sao ni Jesus ket nagawiden. 51 Adda pay laeng ti
ofisial iti dalan idi insabat dagiti babaonenna ti damag nga immimbagen ti
anakna. 52 Dinamagna no kaano a naimbagen ti ubing. “Idi kalman!”
kinunada. “Ala una iti malem idi agbaaw ti gurigorna.” 53 Nalagip ti ama
a dayta met laeng nga oras ti panangibaga ni Jesus kenkuana: “Agbiag ti
anakmo.” Iti kasta, namati agraman ti familiana. 54 Daytoy ti maikadua a
milagro nga inaramid ni Jesus kalpasan ti isasangpetna idiay Galilea
manipud Judea.
Juan 5
1 Kalpasan daytoy, napan ni Jesus idiay Jerusalem tapno dumar-ay iti
maysa a fiesta dagiti Judio. 2 Iti asideg ti Ruangan dagiti Karnero, adda
pagdigosan a lima ti arkona. Maaw-awagan daytoy iti Betsata iti pagsasao
ti Hebreo. 3 Iti linong dagiti arko, agiidda ti adu a masakit: dagiti bulsek,
pilay ken paralitiko. [Ur-urayenda ti panaggaraw ti danum, 4 ta pasaray
bumaba ti maysa nga anghel ti Apo iti pagdigosan ket kiburenna ti danum.
Ti umuna kadagiti masakit a tumapog iti danum kalpasan ti
pannakakiburna, maagasan iti aniaman a sagsagabaenna.] 5 Adda idi
sadiay ti maysa a lalaki a tallopulo ket walo a tawenen a masakit. 6 Idi
makita ni Jesus ti lalaki a nakaidda ket ammona a nabayagen a masaksakit,
kinunana kenkuana, “Kayatmo ti umimbag?” 7 “Apo,” kinuna ti masakit,
“awan ti mangitapog kaniak iti pagdigosan apaman a makibur ti danum.
Ta no irubrubbuatko pay laeng ti mapan, adda nakatapogen.” 8
“Bumangonka,” kinuna ni Jesus. “Bagkatem ta iddam, ket magnakan.” 9
Naimbagan a dagus ti lalaki. Binagkatna ti iddana ket nagnan. Aldaw a
Panaginana idi mapasamak daytoy, 10 isut’ gapuna a kinuna dagiti
pangulo a Judio iti lalaki a napaimbag, “Maiparit nga awitem ti iddam iti
Aldaw a Panaginana.” 11 “Imbaga ti tao a nangpaimbag kaniak a bagkatek
ti iddak ket magnaak,” insungbat ti lalaki. 12 “Siasino daytoy a tao a
nagkuna a bagkatem ti iddam ket magnaka?” sinaludsodda. 13 Ngem saan
nga ammo ti lalaki no siasino ti nangpaimbag kenkuana gapu ta adu ti tao
iti dayta a lugar ket pimmanawen ni Jesus nga awan nakadkadlaw. 14 Iti
saan a mabayag, nasarakan ni Jesus ti lalaki idiay Templo. “Kitaem,
naimbagankan!” kinunana. “Dika agbasolen, amangan no addanto
dakdakes a mapasamak kenka.” 15 Pimmanaw ti lalaki ket
impakaammona kadagiti papangulo a Judio a ni Jesus gayam ti
nangpaimbag kenkuana. 16 Gapu iti daytoy, rinugianda nga indadanes ni
Jesus agsipud ta nangpaimbag iti Aldaw a Panaginana. 17 Kinuna ni Jesus
kadakuada, “Agtartrabaho ni Amak agingga ita, ket masapul met nga
agtrabahoak.” 18 Gapu iti daytoy a saona, ad-adda manen ti pinget dagiti
Judio a mangpapatay kenkuana ta saanna laeng a sinalungasing ti linteg ti
Aldaw a Panaginana, ngem imbagana pay nga Amana ti Dios, ket iti kasta,
impadana ti bagina iti Dios. 19 Isut’ gapuna a kinuna ni Jesus kadakuada,
“Ibagak ti pudno kadakayo: Awan ti maaramid ti Anak a bukbukodna, no
di laeng ti makitana nga ar-aramiden ti Ama. Ta ti aniaman nga aramiden
ti Ama, aramiden met ti Anak. 20 Ta ayaten ti Ama ti Anak ket ipakitana
kenkuana ti amin nga ar-aramidenna. Ipakitana kenkuana dagiti aramid a
daddadakkel pay ngem dagitoy, tapno agsiddaawkayo. 21 Ta kas iti
panamagungar ti Ama kadagiti natay ket biagenna ida, kasta met a ti Anak
ikkanna iti biag dagiti kayatna nga ikkan. 22 Saan a mangukom ti Ama.
Intedna iti Anakna ti naan-anay a kalintegan a mangukom, 23 tapno
padayawan dagiti amin a tattao ti Anak a kas iti panangpadayawda iti
Ama. Ti saan a mangpadayaw iti Anak, saanna met a padayawan ti Ama a
nangibaon kenkuana. 24 “Ibagak ti pudno kadakayo: Ti siasinoman a
dumngeg kadagiti saok ken mamati iti nangibaon kaniak, maaddaan iti
biag nga agnanayon. Saanton a maukom, no di ket nalasatnan ni patay ket
simreken iti biag. 25 “Ibagak ti pudno kadakayo: Adtoyen ti tiempo a
mangngeg dagiti natay ti timek ti Anak ti Dios, ket agbiagto dagiti
makangngeg. 26 Ta ti Ama met laeng ti pagtaudan ti biag. Pinagbalinna
met ti Anakna a pagtaudan ti biag. 27 Ket intednan iti Anak ti turay a
mangukom, agsipud ta isu ti Anak ti Tao. 28 “Diyo pagsiddaawan daytoy,
ta umayen ti tiempo a dagiti amin a natay nga adda kadagiti tantanem
mangngegdanto ti timekna, 29 agungardanto ket rummuarda kadagiti
tantanemda. Agungarto a maipaay iti biag nga agnanayon dagiti
nagaramid iti naimbag ngem agungarto a maipaay iti pannakadusa dagiti
nagaramid iti dakes.” 30 Intuloy ni Jesus: “Awan ti maaramidko iti
bukodko a pannakabalin. Mangukomak laeng kas ibaga kaniak ti Dios,
isut’ gapuna a nalinteg ti panangukomko, ta saan a ti pagayatak ti
aramidek, no di laeng ti pagayatan ti nangibaon kaniak. 31 “No saksiak ti
bukodko a bagi, saan a maawat ti saok kas pammaneknek. 32 Ngem adda
sabali a mangpaneknek kaniak, ket ammok a pudno ti ibagana. 33
Nangibaonkayo kadagiti mapan ken ni Juan, ket pinaneknekanna ti
maipapan iti pudno. 34 Saanko a masapul ti pammaneknek ti tao, ngem
ibagak daytoy tapno maisalakankayo. 35 Sumsumged ken agranraniag a
silaw ti kayarigan ni Juan, ket iti apagbiit, kinayatyo a linak-am ti
lawagna. 36 Ngem adda agsaksi kaniak a nangnangruna ngem ni Juan. Isu
dagiti aramidko nga impaaramid kaniak ti Ama. Dagitoy nga aramid ti
mangipakita nga imbaonnak ti Ama. 37 Ket ti Ama a nangibaon kaniak,
paneknekanna met ti maipapan kaniak. Diyo nangngeg ti timekna wenno
nakita ti rupana 38 ket saan nga agtalinaed ti saona kadakayo, ta diyo pay
patien ti imbaonna. 39 “Ad-adalenyo dagiti Sursurat agsipud ta ipagarupyo
a masarakan kadagitoy ti biag nga agnanayon. Ket dagitoy met laeng a
Sursurat ti agsao maipapan kaniak. 40 Ngem diyo met kayat ti umay
kaniak tapno agbiagkayo. 41 “Diak sapulen a padayawandak dagiti tattao.
42 Ngem am-ammokayo ket ammok nga awan ayatyo iti Dios. 43
Immayak iti turay ni Amak ngem didak inawat. Nupay kasta, no adda
umay iti bukodna a turay, awatenyo. 44 “Agpipinnadayawkayo, ngem
diyo met kalikaguman ti pammadayaw nga aggapu iti maymaysa a Dios.
Kasano ngarud ti panamatiyo kaniak? 45 Diyo ipagarup nga idarumkayo
iti Ama. Ni Moises a nangitalkanyo iti namnamayo ti mangidarum
kadakayo. 46 No agpayso met laeng a namatikayo ken ni Moises,
pinatidak met koma, ta nagsurat iti maipapan kaniak. 47 Ngem no diyo
pinati dagiti insuratna, kasano ti panamatiyo iti saok?”
Juan 6
1 Kalpasan daytoy, napan ni Jesus iti ballasiw ti Dan-aw ti Galilea (wenno
Dan-aw ti Tiberias). 2 Simmurot kenkuana ti nakaad-adu a tattao, agsipud
ta nakitada dagiti nakaskasdaaw nga inaramidna idi pinaimbagna dagiti
masaksakit. 3 Simmang-at ni Jesus iti maysa a bantay. Nagtugaw sadiay
agraman dagiti adalanna. 4 Asideg idin ti Fiesta ti Paskua dagiti Judio. 5
Inwaras ni Jesus ti panagkitana ket naimatanganna ti nakaad-adu a tattao
nga umas-asideg kenkuana. Kinunana ken ni Felipe, “Panggatangantayo
ngata iti makaanay a kanen dagitoy a tattao?” ( 6 Kinunana daytoy a
pangsuot ken ni Felipe. Kinapudnona, ammo idin ni Jesus ti aramidenna.)
7 “Saan nga umanay ti 200 a denario nga igatang iti tinapay a
pagbibingayanda uray saggabassitda laeng,” kinuna ni Felipe. 8-9 “Adda
maysa nga ubing a lalaki ditoy a nagbalon iti lima a tinapay a sebada ken
dua nga ikan,” kinuna ni Andres a maysa kadagiti adalanna ken kabsat ni
Simon Pedro. “Ngem ania met dagitoy iti kastoy a kaadu ti tao?” 10
Karuotan sadiay ket imbaga ni Jesus a pagtugawenda dagiti tattao.
Nagtugaw dagiti amin a tattao. Aglimaribu dagiti lallaki. 11 Innala ni
Jesus dagiti tinapay, nagyaman iti Dios, sana imbunong kadagiti
nakatugaw a tattao. Kasta met ti inaramidna kadagiti ikan. Nangan dagiti
tattao agingga a napnekda. 12 Idi nabsogda aminen, kinuna ni Jesus
kadagiti adalanna, “Urnongenyo dagiti natda ket awan ibellengyo tapno
awan madadael.” 13 Inurnongda ngarud dagiti amin a natda kadagiti lima
a tinapay a saan a naibus dagiti tattao ket napno ti sangapulo ket dua a
basket a nagikargaanda. 14 Idi makita dagiti tattao sadiay ti milagro nga
inaramid ni Jesus, kinunada, “Awan duadua a daytoy ti Profeta nga umay
ditoy lubong!” 15 Idi madlaw ni Jesus nga umay dagiti tattao a mangala
kenkuana tapno pilitenda nga isaad nga ari, nagpakni manen nga is-isuna
kadagiti bambantay. 16 Idi sumipngeten, simmalog dagiti adalanna iti dan-
aw. 17 Limmuganda iti bangka, ket bimmallasiwda a nagpa-Capernaum.
Rabiin, ngem di pay la dimteng ni Jesus kadakuada. 18 Mangrugi idin nga
agdawel ti danum, ta dimteng ti napigsa nga angin. 19 Nakapaggauden
dagiti adalan iti aglima wenno innem a kilometro idi makitada ni Jesus a
magmagna iti rabaw ti danum. Kasta unay ti butengda idi umas-asideg iti
bangka. 20 Ngem kinuna ni Jesus kadakuada, “Dikay agbuteng, siak ni
Jesus!” 21 Siraragsakda a nangilugan kenkuana iti bangka. Iti apagbiit,
simmangladda iti disso a papananda. 22 Iti sumaruno nga aldaw, nakita
dagiti tattao a nagbati iti ballasiw ti dan-aw a maymaysan ti bangka a
nakapundo sadiay. Ammo dagiti tattao a saan a nakilugan ni Jesus kadagiti
adalanna iti bangka. Dagiti laeng adalanna ti nagluas. 23 Nupay kasta,
adda dadduma a bangka a naggapu idiay Tiberias a simmanglad iti asideg
ti disso a nanganan dagiti adu a tattao kadagiti tinapay kalpasan ti
panagyaman ti Apo. 24 Ngem idi makita dagiti tattao nga awan sadiay ni
Jesus wenno dagiti adalanna, nagluganda kadagiti bangka a nangsapul
kenkuana idiay Capernaum. 25 Idi masarakan dagiti tattao nga adda ni
Jesus idiay ballasiw ti dan-aw, kinunada kenkuana, “Maestro, kaano ti
yaaymo ditoy?” 26 “Ibagak kadakayo ti pudno: Sapsapulendak gapu ta
nangankay iti tinapay ket nabsogkayo, saan a gapu ta nakitayo dagiti
nakaskasdaaw nga aramidko,” insungbat ni Jesus. 27 “Dikay agbannog
gapu iti taraon a madadael. Agbannogkayo ketdi gapu iti taraon nga
agpaut iti biag nga agnanayon. Daytoy ti taraon nga itedto kadakayo ti
Anak ti Tao, ta inted ti Dios Ama kenkuana ti yaanamongna.” 28 Iti kasta,
sinaludsodda kenkuana, “Ania ti aramidenmi tapno matungpalmi dagiti
paaramid ti Dios?” 29 “Daytoy ti kayat ti Dios nga aramidenyo: Patienyo
ti imbaonna,” insungbat ni Jesus. 30 Kinunada ngarud kenkuana: “Ania ti
maipakitam a milagro tapno mamatikami kenka? Ania ti aramidem? 31
Nangan dagiti kapuonantayo iti mana idiay let-ang, kas nailanad iti
Nasantoan a Surat, ‘Inikkanna ida iti tinapay a kanenda a naggapu sadi
langit.’” 32 Kinuna ni Jesus, “Ibagak ti pudno kadakayo: Saan a ni Moises
ti nangted kadakayo iti tinapay a naggapu sadi langit. Ni Amak ti mangted
kadakayo iti pudno a tinapay nga aggapu sadi langit. 33 Ta ti tinapay nga
ited ti Dios isu ti bumaba manipud langit a mangted biag iti lubong.” 34
“Apo,” kinunada kenkuana, “ikkannakami man a kanayon iti kasta a
tinapay.” 35 Kinuna ni Jesus kadakuada, “Siak ti tinapay ti biag. Ti umay
kaniak, dinto mabisinan, ket ti mamati kaniak, dinto mawaw. 36 “Ita,
nasaokon kadakayo a nakitadakon ngem dikay met mamati. 37 Umayto
kaniak dagiti amin nga ited ni Amak. Ket ti umay kaniak, diakto
pagtalawen. 38 Ta bimmabaak manipud langit tapno aramidek ti
pagayatan ti nangibaon kaniak, saan a ti pagayatak. 39 Ket pagayatan ti
nangibaon kaniak nga awan ti mapukawko uray maysa kadagiti amin nga
intedna kaniak, no di ket pagungarekto amin ida inton maudi nga aldaw.
40 Ta pagayatan ni Amak nga amin a makakita ken mamati iti Anak adda
biagna nga agnanayon. Ket pagungarekto ida inton maudi nga aldaw.” 41
Nagdadayamudom dagiti Judio gapu iti kinunana nga isu ti tinapay a
bimmaba manipud langit. 42 Kinunada, “Saan aya a daytoy ni Jesus nga
anak ni Jose? Am-ammotayo ti ama ken inana. Apay ngarud a kunana ita a
bimmaba manipud langit?” 43 “Isardengyo ti agdadayamudom,” insungbat
ni Jesus. 44 “Awan ti makaumay kaniak no saan nga allukoyen ti Ama a
nangibaon kaniak; ket pagungarekto inton maudi nga aldaw. 45 Insurat
dagiti profeta: ‘Isuronto ti Dios dagiti amin a tattao.’ Umay kaniak ti
dumngeg ken makasursuro iti Ama. 46 Saanna a kayat a sawen daytoy nga
addan nakakita iti Ama. Ti laeng naggapu iti Dios ti nakakita iti Ama. 47
“Ibagak kadakayo ti pudno: Ti mamati adda biagna nga agnanayon. 48
Siak ti tinapay ti biag. 49 Nangan dagiti kapuonanyo iti mana idiay let-
ang, ngem natayda met laeng. 50 Ngem saan a matay ti uray siasino a
mangan iti tinapay nga aggapu sadi langit. 51 Siak ti sibibiag a tinapay a
naggapu sadi langit. No kanen ti siasinoman daytoy a tinapay, agbiagto
nga agnanayon. Ket ti tinapay nga itedkonto isu ti lasagko. Wen, itedko
tapno agbiag ti lubong.” 52 Gapu iti daytoy, rimsua ti panagsisinnuppiat
dagiti Judio. “Kasano ti pannangted daytoy a tao iti lasagna a kanentayo?”
kinunada. 53 “Ibagak ti pudno kadakayo,” kinuna ni Jesus kadakuada. “No
saanyo a kanen ti lasag ken inumen ti dara ti Anak ti Tao, awan ti biag
kadakayo. 54 Ti mangan iti lasagko ken uminum iti darak, adda biagna
nga agnanayon, ket pagungarekto inton maudi nga aldaw. 55 Ta ti lasagko
ti napaypayso a taraon, ket ti darak ti napaypayso nga inumen. 56 Ti
mangan iti lasagko ken uminum iti darak agtaeng kaniak, ket agtaengak
met kenkuana. 57 Imbaonnak ti sibibiag nga Ama, ket agbiagak met gapu
kenkuana. Kasta met a ti mangan kaniak, agbiagto gapu kaniak. 58 Daytoy
ti tinapay a naggapu sadi langit: Saan a kas iti tinapay a kinnan idi dagiti
kapuonanyo ta natayda met laeng kalpasanna. Ti mangan iti daytoy a
tinapay, agbiagto nga agnanayon.” 59 Imbaga daytoy ni Jesus bayat ti
panangisurona iti uneg ti sinagoga idiay Capernaum. 60 Adu kadagiti
adalanna ti nakangngeg iti daytoy. “Narikut unay daytoy a pannursuro,”
kinunada. “Siasino ti umanamong iti sasawenna?” 61 Nupay no awan ti
nangibagbaga kenkuana, ammo ni Jesus nga agdadayamudom dagiti
adalanna gapu iti daytoy. Iti kasta, kinunana kadakuada: “Maupaykayo
kadi gapu iti daytoy? 62 Anianto la ketdin no makitayo ti Anak ti Tao nga
umuli iti sigud a yanna? 63 Ti Espiritu ti makaited iti biag. Awan a pulos ti
maited ti lasag. Espiritu ken biag dagiti insaok kadakayo. 64 Nupay kasta,
adda sumagmamano kadakayo a di mamati.” (Sigud nga ammo ni Jesus no
siasino dagiti saan a mamati ken no siasino ti mangliputto kenkuana.) 65
Kinunana pay, “Daytoy ti gapuna nga imbagak kadakayo nga awan ti
makaumay kaniak no saan nga ipalubos ti Ama.” 66 Gapu iti daytoy,
pinanawan dagiti adu a pasurotna ket saandan a kimmuyog kenkuana. 67
Iti kasta, kinuna ni Jesus kadagiti sangapulo ket dua nga adalan, “Ket
dakayo, kayatyo met ti pumanaw?” 68 “Apo,” insungbat ni Simon Pedro,
“siasino pay aya ti papananmi? Adda kenka dagiti sao a makaited iti biag
nga agnanayon. 69 Ket ita, mamatikami ken ammomi a sika ti Nasantoan a
naggapu iti Dios.” 70 “Saankay aya a sangapulo ket dua a pinilik?”
insungbat ni Jesus kadakuada. “Nupay kasta, maysa kadakayo ti diablo.”
71 Ni Judas nga anak ni Simon Iscariote ti kayatna a sawen, ta nupay
maysa kadagiti sangapulo ket dua adalan, isunto ti mangliput kenkuana.
Juan 7
1 Kalpasan daytoy, sinursor ni Jesus ti Galilea. Dina kinayat ti agdaliasat
idiay Judea, ta gandaten a papatayen dagiti papangulo a Judio. 2
Umadanin ti pannakarambak ti Fiesta dagiti Abong-abong. 3 Daytoy ti
gapuna a kinuna dagiti lallaki a kakabsat ni Jesus, “Pumanawka ditoy ket
inka idiay Judea, tapno makita dagiti adalam dagiti trabaho nga ar-
aramidem. 4 Ta awan ti tao a mangilimed iti aramidna no tarigagayanna ti
aglatak. Yantangay ar-aramidem dagitoy, ipakaammom ngarud ti bagim iti
entero a lubong!” ( 5 Uray dagiti kakabsatna dida namati kenkuana.) 6
Kinuna ni Jesus kadakuada, “Di pay dimteng ti tiempok. Dakayo, kukuayo
ti amin a tiempo. 7 Dinakay mabalin a guraen ti lubong, ngem guraennak
ta ibagbagak a dakes dagiti aramidna. 8 Dakayo ti mapan makifiesta.
Saanak a mapan iti daytoy a fiesta, ta di pay dimteng ti tiempok.” 9
Imbagana daytoy ket nagtalinaed idiay Galilea. 10 Napan met laeng
nakifiesta ni Jesus idi nakapanen dagiti kakabsatna. Ngem saan a
nagpadlaw a napan. 11 Bayat ti fiesta, binirbirok dagiti pangulo a Judio.
“Sadino ngata ti yanna?” kunkunada. 12 Adu ti sao-sao dagiti tattao
maipapan kenkuana. Kinuna ti sumagmamano kadakuada, “Isu ket
naimbag a tao.” “Saan,” kinuna met dagiti dadduma, “ta allilawenna dagiti
tattao.” 13 Nupay kasta, awan ti nagsao a silalatak maipapan kenkuana ta
mabutengda kadagiti papangulo a Judio. 14 Iti katengngaan ti fiesta, napan
nangisuro ni Jesus idiay Templo. 15 Kasta unay ti siddaaw dagiti Judio.
“Naggapuan ngata ti adu unay nga ammo daytoy a tao, idinto ta di met
nagad-adal a pulos?” kunkunada. 16 “Saanko a bukod a pannursuro ti
isursurok, no di ket agtaud iti Dios a nangibaon kaniak,” insungbat ni
Jesus. 17 “Ti siasinoman a mayat nga agaramid iti pagayatan ti Dios,
maammoannanto no agtaud iti Dios ti isursurok wenno agsaoak iti
kabukbukodak a turay. 18 Ti tao nga agsao iti bukodna a turay,
sapsapulenna ti pakaidayawanna met laeng. Ngem ti agtarigagay iti
pannakaidayaw ti nangibaon kenkuana, napudno ket awan ti kinaulbod
kenkuana. 19 Saan aya nga inted ni Moises ti Linteg kadakayo? Ngem
awan kadakayo ti mangtungpal iti Linteg. Apay a kayatdak a papatayen?”
20 “Agmauyongka!” insungbat dagiti tattao. “Siasino ti agpanggep a
mangpapatay kenka?” 21 “Maysa a milagro ti inaramidko ket nasdaawkay
amin,” kinuna ni Jesus. 22 “Gapu ta imbilin kadakayo ni Moises a
kugitenyo dagiti annakyo, kugitenyo ti ubing iti Aldaw a Panaginana
(nupay saan a ni Moises ti nangirugi iti daytoy no di ket dagiti ammayo).
23 No maipalubos a makugit ti ubing iti Aldaw a Panaginana tapno saan a
masalungasing ti Linteg ni Moises, apay a kaungetdak gapu ta
pinaimbagko ti maysa a tao iti Aldaw a Panaginana? 24 Dikayo
mangukom babaen iti makitayo. Mangukomkayo ketdi babaen iti nalinteg
a panangukom.” 25 Kinuna ti sumagmamano a taga-Jerusalem, “Saan kadi
a daytoy ti tao a kayatda a papatayen? 26 Kitaenyo! Agsasao iti publiko,
ngem awan masaoda a maikontra kenkuana. Agpayson sa ketdi nga ammo
dagiti agtuturay nga isu ti Cristo? 27 Inton umay ti Cristo, awan ti
makaammo no sadino ti paggapuanna. Ngem ammotayo ti naggapuan
daytoy a tao.” 28 Idi madama a mangisursuro ni Jesus idiay Templo,
kinunana iti napigsa a timek, “Pudno kadi nga am-ammodak? Ammoyo
kadi ti naggapuak? Diak immay a naknakemko. Ti nangibaon kaniak isu ti
pudno, ngem diyo am-ammo. 29 Am-ammok ti nangibaon kaniak ta
naggapuak kenkuana.” 30 Gapu iti daytoy, pinanggepda a tiliwen, ngem
awan mayat a mangtengngel kenkuana, ta di pay dimteng ti tiempo a
mapasamak kenkuana daytoy. 31 Nupay kasta, adu kadagiti tattao ti
namati kenkuana. “Inton umay ti Cristo, agaramidto ngata iti ad-adu a
milagro ngem ti inaramid daytoy a tao?” kinunada. 32 Nangngeg dagiti
Fariseo ti sao dagiti tattao maipapan ken ni Jesus. Iti kasta, isuda ken
dagiti panguloen a papadi imbaonda dagiti guardia ti Templo a mangtiliw
kenkuana. 33 Kinuna ngarud ni Jesus, “Makipagyanak pay kadakayo iti
bassit a tiempo. Kalpasanna, agsubliakton iti nangibaon kaniak. 34
Sapulendakto ngem didakto masarakan, gapu ta dikay makaumay iti
papanak.” 35 Kinuna dagiti papangulo a Judio iti maysa ken maysa,
“Sadino ngata ti papananna tapno ditayto masarakan? Mapanto ngata
kadagiti il-ili dagiti Griego a yan dagiti naiwaraswaras a Judio ket
isuronanto dagiti Griego? 36 Ania ti kayatna a sawen iti panagkunana,
‘Sapulendakto ngem didakto masarakan,’ ken ‘Dikay makaumay iti
papanak?’” 37 Iti maudi ken kangrunaan nga aldaw ti fiesta, nagtakder ni
Jesus ket kinunana iti napigsa a timek, “Ti siasinoman a mawaw, umay
kaniak tapno uminum. 38 Kas kuna ti Nasantoan a Surat, ‘Agayusto dagiti
karayan ti sibibiag a danum manipud iti puso ti siasinoman a mamati
kaniak.’” 39 (Sinao daytoy ni Jesus maipapan iti Espiritu ti Dios a
dandanin awaten dagiti namati kenkuana. Ta iti dayta a tiempo, saan pay a
naited ti Espiritu, agsipud ta di pay naitan-ok ni Jesus.) 40 Adu kadagiti
tattao a naitaripnong ti nakangngeg iti daytoy nga imbaga ni Jesus. “Pudno
nga isu daytoy ti profeta!” kinunada. 41 Kinuna dagiti dadduma, “Isu ti
Cristo!” Ngem adda met nagkuna, “Saan nga idiay Galilea ti paggapuan ti
Cristo! 42 Saan aya a kuna ti Nasantoan a Surat nga agtaud ti Cristo iti
kaputotan ni David, ket mayanak idiay Betlehem, iti ili a nagnaedan ni
David?” 43 Iti kasta, rimsua ti panagsusupadi dagiti tattao gapu kenkuana.
44 Kayat idi ti dadduma kadakuada a tiliwen ni Jesus, ngem awan uray
maysa a nangsagid kenkuana. 45 Nagsubli dagiti guardia ti Templo
kadagiti panguloen a papadi ken kadagiti Fariseo. “Apay a diyo inyeg
ditoy?” sinaludsod dagiti panguloen a papadi ken dagiti Fariseo. 46
“Awan pay ti nagsao a kas iti panagsao daytoy a tao!” insungbat dagiti
guardia. 47 Kinuna dagiti Fariseo kadakuada, “Uray dakayo,
inallilawnakayo met kadi? 48 Adda aya naammoanyon nga agtuturay
wenno Fariseo a mamati kenkuana? 49 Ngem mailunod dagitoy a tattao ta
dida ammo ti Linteg ni Moises.” 50 Nupay kasta, nagsao ti maysa
kadakuada, ni Nicodemo, a napan idi nakisao ken ni Jesus. 51 “Segun ti
paglintegantayo,” kinunana, “ditayo mabalin a dusaen ti maysa a tao no
ditay mangngegan ken maammoan no ania ti inaramidna.” 52 “Taga-
Galileaka met kadi?” kinunada kenkuana. “Sukimatem dagiti Sursurat ket
maammoamto nga awan a pulos ti profeta a tumaud idiay Galilea.”
Juan 8
50 a tawenmo?” 1 Nagawid dagiti amin a tattao, ngem napan ni Jesus
idiay Bantay Olivo. 2 Kabigatanna, nasapa a nagsubli idiay Templo.
Inaribungbongan ti adu a tattao ket nagtugaw a nangisuro kadakuada. 3
Inyeg dagiti mamaestro iti Linteg ken dagiti Fariseo ti maysa a babai a
natiliwanda a makikamkamalala. Pinagtakderda iti sangoananda amin. 4
“Maestro,” kinunada ken ni Jesus, “natiliwanmi daytoy a babai a
makikamkamalala. 5 Iti Lintegtayo, imbilin ni Moises a mapapatay ti kasta
a babai iti pannakabato. Ania ti kunam?” 6 Kinunada daytoy ta kayatda a
maisao ni Jesus dagiti balikas a pangigapuanda a mangidarum kenkuana.
Ngem nagrukob ni Jesus ket nagsurat iti daga babaen iti ramayna. 7 Idi
ulit-ulitenda ti saludsodda, timmakder ket kinunana kadakuada, “Ti
awanan basol kadakayo ti umuna a mangbato kenkuana.” 8 Nagrukob
manen a nagsurat iti daga. 9 Ngem idi mangngegda ti kinunana,
saggaysada a pimmanaw. Immuna dagiti nataengan. Ni laeng Jesus ti
nabati ken ti babai nga agtaktakder pay laeng iti sangoananna. 10
Timmakder ni Jesus ket kinunana kenkuana, “Babai, sadino ti ayandan?
Awan kadi ti nagbati a mangdusa kenka?” 11 “Awan, Apo,” insungbatna.
Kinuna ni Jesus, “Uray siak, saanka a dusaen. Inkan, ket saanka nga
agbasolen.” 12 Nagsao manen ni Jesus kadagiti Fariseo, “Siak ti silaw ti
lubong,” kinunana. “Siasinoman a sumurot kaniak maaddaan iti silaw ti
biag, ket dinto magna iti kasipngetan.” 13 Kinuna dagiti Fariseo kenkuana,
“Sika met laeng ti mangsaksi iti bagim. Saan ngarud a pudno ti
ibagbagam.” 14 “Uray no saksiak ti bukodko a bagi,” insungbat ni Jesus,
“pudno ti ibagbagak ta ammok ti naggapuak ken ti papanak. Diyo ammo ti
naggapuak ken ti papanak. 15 Mangukomkayo kas mayannurot iti
pagalagadan ti tao. Diak mangukom iti uray siasino. 16 Ngem no
mangukomak, umno ti panangukomko, ta saan a sisiak ti mangukom no di
ket kaduak pay ti Ama a nangibaon kaniak. 17 Naisurat iti Lintegyo a no
agtunos ti pammaneknek ti dua a saksi, maawat a kas pudno ti ibagada. 18
Saksiak met laeng ti bukodko a bagi, ket saksiannak met ti Ama a
nangibaon kaniak.” 19 “Sadino ti ayan ni amam?” sinaludsodda. “Saandak
nga am-ammo,” insungbat ni Jesus, “ket diyo met am-ammo ni Amak. No
am-ammodak koma, am-ammoyo met koma ni Amak.” 20 Insao ni Jesus
dagitoy bayat ti panangisursurona idiay Templo, iti kuarto a nakaikabilan
dagiti kaha ti daton. Ngem awan ti nangtiliw kenkuana, ta di pay dimteng
ti oras. 21 Kinuna manen ni Jesus kadakuada, “Pumanawakon, ket
sapulendakto, ngem dikay makaumay iti papanak. Mataykayto a
sibabasol.” 22 Iti kasta, kinuna dagiti papangulo a Judio, “Apay ngata a
kunana a ditayo makapan iti papananna? Kayatna kadi a sawen a
patayennanto ti bagina?” 23 “Taga-dagakayo, ngem taga-langitak,”
insungbat ni Jesus. “Aggapukay iti daytoy a lubong, ngem saanak a
naggapu iti lubong. 24 Isut’ gapuna a kinunak kadakayo a mataykayto
kadagiti basbasolyo. Wen, mataykayto kadagiti basbasolyo no dikay
mamati a ‘Siak’ ti ibagbagak.” 25 “Siasinoka aya?” sinaludsodda. “Ti
imbagak kadakayo manipud idi damo. 26 No maipapan kadakayo, adu ti
masaok ken babalawek. Ngem pudno ti nangibaon kaniak, ket ibagak iti
lubong ti nangngegko kenkuana,” insungbat ni Jesus. 27 Saanda a
naawatan a maipapan iti Ama ti sinaona. 28 Iti kasta, kinuna ni Jesus
kadakuada, “Inton maibayogyo ti Anak ti Tao, maammoanyonton a ‘Siak’
ti ibagbagak. Kasta met nga awan ti aramidek a sisiak, ngem sawek laeng
ti insuro kaniak ti Ama. 29 Kaduak ti nangibaon kaniak. Saannak a
binaybay-an nga agmaymaysa, agsipud ta kanayon nga aramidek ti
makaparagsak kenkuana.” 30 Adu ti namati kenkuana idi sasawenna
daytoy. 31 Kinuna ngarud ni Jesus kadagiti Judio a namati kenkuana, “No
agtalinaedkayo iti pannursurok, dakayo dagiti napaypayso nga adalak. 32
Maammoanto ti pudno, ket ti pudno wayawayaannakayto.” 33
“Kaputotannakami ni Abraham,” insungbatda. “Ket uray kaano, awan pay
nangadipen kadakami. Ania ti kayatmo a sawen a
mawayawayaankaminto?” 34 “Ibagak ti pudno kadakayo,” kinuna ni Jesus
kadakuada. “Siasinoman nga agaramid iti basol, adipen ti basol. 35 Ti
anak agnanayon a kameng ti familia, ngem ti adipen saan. 36 Ngarud, no
wayawayaannakayo ti Anak, pudno a siwawayakayton. 37 Ammok a
kaputotannakayo ni Abraham. Nupay kasta, kayatdak a papatayen,
agsipud ta diyo awaten ti pannursurok. 38 Sawek dagiti impakita kaniak ni
Amak, ngem dakayo, aramidenyo dagiti insuro kadakayo ni amayo.” 39
“Ni Abraham ti amami,” insungbatda kenkuana. “No agpayso nga
annaknakayo ni Abraham,” kinuna ni Jesus, “aramidenyo met koma dagiti
inaramidna. 40 Awan ti inaramidko no di imbagak laeng kadakayo ti
pudno a nangngegko iti Dios. Nupay kasta, kayatdak a papatayen. Awan ti
kasta nga inaramid ni Abraham. 41 Dakayo, ar-aramidenyo ti aramid ti
amayo.” “Saankami a bastardo,” insungbatda. “Maymaysa ti Amami, ti
Dios a mismo.” 42 “No agpayso met laeng nga amayo ti Dios,” kinuna ni
Jesus, “ayatendak met koma; ta naggapuak iti Dios, ket ita, addaak
ditoyen. Diak immay a naknakemko, no di ket imbaonnak ti Dios. 43
Apay a diyo maawatan ti ibagbagak? Gapu ta diyo maibturan a denggen ti
mensahek? 44 Annaknakayo ti Diablo nga amayo, ket kayatyo a tungpalen
ti pagayatanna. Mammapatayen manipud idi damo ket pulos a dina
kanunongan ti pudno, ta awan kenkuana ti pudno. No agulbod, ar-
aramidenna laeng ti natural kenkuana ta sigud nga ulbod ken ama ti amin a
kinaulbod. 45 Sawek ti pudno, ket daytoy ti gapuna a didak patien. 46
Siasino kadakayo ti makapaneknek a nagbasolak? No ibagak ti pudno,
apay ngarud a didak patien? 47 Ti agtaud iti Dios, denggenna dagiti sao ti
Dios. Ngem saankayo a nagtaud iti Dios, ket daytoy ti gapuna a dikay
dumngeg.” 48 “Saan kadi a pudno ti kunami a Samaritanoka ket adda
demoniom?” kinuna dagiti Judio ken ni Jesus. 49 “Awan ti demonio
kaniak,” insungbat ni Jesus. “Padayawak ni Amak, ngem dakayo, saandak
a padayawan. 50 Diak sapulen ti pakaidayawak. Ngem adda sabali a
mangsapul iti dayta ket isunto ti ukom. 51 Ibagak ti pudno kadakayo:
Dinto matay ti siasinoman a mangtungpal iti saok.” 52 “Ita, mapnekkamin
nga adda demoniom!” kinuna dagiti Judio. “Natay ni Abraham kasta met
dagiti profeta, ngem kunam a dinto matay ti siasinoman a mangtungpal iti
saom. 53 Natay ni Amami nga Abraham. Kayatmo a sawen a natantan-
okka ngem ni Abraham? Ania ti panangipagarupmo iti bagim?” 54 “No
idaydayawko ti bagik a mismo,” insungbat ni Jesus, “awan serserbi dayta
a pammadayaw. Ti mangidayaw kaniak isu ni Amak a kunayo a Diosyo.
55 Saanyo nga am-ammo, ngem am-ammok. No kunak a diak am-ammo,
ulbodak a kas kadakayo. Ngem am-ammok ket tungpalek ti saona. 56
Nagragsak ni Abraham nga amayo ta ninamnamana a makita ti aldawko;
nakitana ket naragsakan.” 57 Kinuna dagiti Judio kenkuana, “Kasano a
nakitamon ni Abraham, idinto ta awan pay 50 a tawenmo?” 58 Kinuna ni
Jesus, “Ibagak ti pudno kadakayo: Sakbay a nayanak ni Abraham,
addaakon.” 59 Nagpidut dagiti tattao kadagiti bato a pangubor ken ni
Jesus, ngem naglemmeng ket rimmuar iti Templo.
Juan 9
1 Bayat ti pannagna ni Jesus, nakitana ti maysa a lalaki a bulsek manipud
pannakayanakna. 2 Sinaludsod kenkuana dagiti adalanna, “Maestro,
siasino ti akimbasol iti pannakayanak a bulsek daytoy a tao? Basolna kadi
wenno basol dagiti nagannak kenkuana?” 3 “Awan ti pakainaigan ti
kinabulsek daytoy a tao iti basolna wenno iti basol dagiti nagannak
kenkuana,” insungbat ni Jesus. “Bulsek daytoy tapno makita kenkuana ti
pannakabalin ti Dios. 4 Masapul nga aramidentayo dagiti ipaaramid ti
nangibaon kaniak ta aldaw pay. Dumteng ti rabii ket awan ti makatrabaho.
5 Bayat ti kaaddak ditoy lubong, siak ti silaw ti lubong.” 6 Idi naisaon ni
Jesus daytoy, timmupra iti daga. Inggamayna ti tuprana iti tapok ket
inyaprosna iti mata ti bulsek 7 sana kinuna kenkuana, “Inka agdiram-os
idiay pagdidigosan ti Siloe.” (“Naibaon” ti kayat a sawen ti Siloe.) Napan
ngarud ti bulsek ket nagdiram-os. Idi agsubli, makakitan. 8 Idi makita
dagiti kaarrubana ken dagiti tattao a makaam-ammo kenkuana a maysa a
makilimlimos idi, kinunada, “Saan kadi a daytoy ti tao a masansan nga
agtugaw ditoy a makilimlimos?” 9 “Wen, isu!” kinuna ti dadduma. “Saan
nga isu,” kinuna met dagiti dadduma. “Kaing-ingasna laeng!” Iti kasta,
mismo a ti lalaki ti nagkuna, “Wen, pudno a siak daydi makilimlimos.” 10
Kinunada kenkuana, “Ngem apay a makakitaka metten?” 11 “Inggamay ti
maysa a tao nga agnagan Jesus ti tuprana iti tapok sana inyapros kadagiti
matak,” insungbat ti lalaki. “Kalpasanna, imbaonnak a mapan agdiram-os
idiay Siloe. Napanak ngarud, ket apaman a nakadiram-osak, makakitaak
metten!” 12 “Sadino ti ayan ti nangpaimbag kenka?” sinaludsodda. “Diak
ammo,” insungbatna. 13 Kalpasanna, impanda ti naimbagan a bulsek iti
ayan dagiti Fariseo. 14 Aldaw a Panaginana idi nanggamay ni Jesus iti
pitak a pinangagasna kadagiti mata ti bulsek. 15 Ngarud, sinaludsod met
dagiti Fariseo no kasano a napaimbag dagiti matana. “Inaprosanna dagiti
matak iti pitak, nagdiram-osak, ket ita makakitaakon,” kinunana
kadakuada. 16 Kinuna ti sumagmamano a Fariseo, “Saan a naggapu iti
Dios ti tao a nangaramid iti daytoy, agsipud ta dina annuroten ti
paglintegan iti Aldaw a Panaginana.” Kinuna met ti dadduma, “Kasano ti
pannakabalin ti maysa a managbasol nga agaramid kadagiti kakasta a
nakaskasdaaw a pagilasinan?” Agsusupadi ti pampanunotda. 17 Iti kasta,
pinalutpot manen dagiti Fariseo ti lalaki. “Kunam a pinaimbagna dagiti
matam. Ania ti masaom maipapan kenkuana?” “Maysa a profeta,”
insungbatna. 18 Nupay kasta, saan a patien dagiti Judio a bulsek idi daytoy
a tao, ket ita, makakitan. Isut’ gapuna nga inayabanda dagiti nagannak
kenkuana. 19 “Anakyo kadi daytoy?” sinaludsodda. “Kunayo a nayanak a
bulsek. Apay ngarud a makakitan?” 20 “Wen, anakmi daytoy,” insungbat
dagiti nagannak. “Ammomi a nayanak a bulsek. 21 Ngem saanmi nga
ammo no kasano a makakitan. Saanmi met nga ammo no siasino ti
nangpaimbag kenkuana. Isu ti pagsaludsodanyo ta nataengan metten.
Ammona ti isungsungbatna!” 22 Sinao dagiti nagannak daytoy agsipud ta
mabutengda kadagiti papangulo a Judio a nanganamongen a mapagtalaw
iti sinagoga ti siasinoman a mangibaga a mamati a ni Jesus isu ti Cristo. 23
Dayta ti gapuna a kinuna dagiti nagannak, “Nataenganen; isu ti
pagsaludsodanyo!” 24 Inayabanda manen ti tao a nayanak a bulsek ket
kinunada kenkuana, “Ikarim iti sangoanan ti Dios nga ibagam ti pudno!
Ammomi a managbasol dayta a tao!” 25 “Diak ammo no managbasol
wenno saan,” insungbat ti napaimbag. “Daytoy ti ammok: Bulsekak idi,
ngem ita, makakitaakon!” 26 “Ania ti inaramidna kenka?” sinaludsodda.
“Kasano ti panangpaimbagna kadagita matam?” 27 “Imbagak la ngaruden
kadakayo, ngem didak met patien,” insungbatna. “Apay a kayatyo manen
a denggen? Kayatyo met kadi ti agbalin nga adalanna?” 28 Nagsasawanda
ket kinunada, “Sika ti adalanna, ket dakami ti adalan ni Moises. 29
Ammomi a nagsao ti Dios ken ni Moises. Ngem no maipapan iti dayta a
tao, dimi pay ammo ti naggapuanna!” 30 “Nakaskasdaaw unay daytoy!”
insungbatna. “Saanyo nga ammo ti naggapuanna, ngem pinaimbagnak! 31
Ammotayo a saan nga ipangag ti Dios dagiti managbasol, ngem ipangagna
dagiti tattao nga agdayaw kenkuana ken agaramid iti pagayatanna. 32
Manipud pannakaparsua ti lubong, awan pay nadamag a nanglukat
kadagiti mata ti tao a nayanak a bulsek. 33 Awan ti mabalin nga aramiden
dayta a tao no saan a naggapu iti Dios.” 34 “Nayanak ken dimmakkelka iti
basol, dakam ket ti isuromon?” insungbatda kenkuana ket pinagtalawda iti
sinagoga. 35 Nadamag ni Jesus ti napasamak. Sinapulna ti bulsek ket idi
agsarakda, kinunana kenkuana, “Mamatika kadi iti Anak ti Tao?” 36
“Ibagam kaniak, apo, no siasino tapno mamatiak kenkuana!” insungbat ti
lalaki. 37 “Nakitamon,” kinuna ni Jesus. “Isu ti kasasaom.” 38 “Mamatiak,
Apo!” kinuna ti tao, ket nagparintumeng a nagdaydayaw ken ni Jesus. 39
Kinuna ni Jesus, “Immayak mangukom ditoy lubong tapno makakita
dagiti bulsek, ket agbulsek dagiti makakita.” 40 Nangngeg ti
sumagmamano a Fariseo a naitallaong sadiay ti kinuna ni Jesus, ket
sinaludsodda kenkuana, “Ibagbagam kadi a bulsekkami met?” 41 “No
bulsekkayo, awan koma ti pakabasolanyo,” insungbat ni Jesus. “Ngem
gapu ta kunayo met a makakitakayo, kayatna a sawen nga adda latta
basolyo.”
Juan 10
1 Sinarita ni Jesus daytoy a pangngarig kadakuada: “Ibagak ti pudno
kadakayo: Ti tao a saan a sumrek iti ruangan ti pagaponan dagiti karnero,
ngem kumalay-at ketdi iti sabali a pagnaan, maysa a mannanakaw ken
tulisan. 2 Ti sumrek iti ruangan, isu ti pastor dagiti karnero. 3 Isu ti
ilukatan ti agay-aywan iti ruangan. Denggen dagiti karnero ti timekna no
awaganna dagiti nagnaganda, ket iruarna ida. 4 No mairuarnan dagiti
karnero, magna iti sangoda ket sumurotda kenkuana, agsipud ta
mailasinda ti timekna. 5 Saanda a sumurot iti ganggannaet no di ket
itarayanda, agsipud ta saanda a mailasin ti timekna.” 6 Ngem saan a
naawatan dagiti tattao ti kaipapanan daytoy a pangngarig. 7 Kinuna manen
ni Jesus kadakuada, “Ibagak ti pudno kadakayo: Siak ti ruangan a
pagserkan dagiti karnero. 8 Mannanakaw ken tulisan dagiti amin nga
immay nga immun-una ngem siak, ngem saan a dinengngeg ida dagiti
karnero. 9 “Siak ti ruangan. Maisalakanto ti siasinoman a sumrek kaniak;
sumrek ken rummuarto ket makasarakto iti pagaraban. 10 Umay ti tulisan
tapno agtakaw, agpapatay ken agdadael. Immayak tapno maaddaankay iti
biag—biag nga awan pagkuranganna. 11 “Siak ti naimbag a pastor. Ti
naimbag a pastor itedna ti biagna nga agpaay kadagiti karnerona. 12 Ti
makitangtangdan panawan ken itarayanna dagiti karnero no makitana nga
umay ti lobo, ta saan a pastor ken saanna a kukua ida. 13 Agtaray ti
makitangtangdan agsipud ta patangtangdanan laeng ket awan ti
panangisakitna kadagiti karnero. 14-15 “Siak ti naimbag a pastor. Am-
ammonak ti Ama, ket am-ammok met ti Ama. Am-ammok dagiti karnerok
ket am-ammodak met. Madadaanak a mangipaay iti biagko gapu
kadakuada. 16 Adda pay dagiti karnerok nga awan ditoy a pagaponan.
Masapul nga yaponko met ida. Ipangagdanto ti timekko, ket agbalindanton
a maymaysa nga arban nga aywanan ti maymaysa a pastor. 17 “Ay-
ayatennak ti Ama agsipud ta sisasaganaak a mangipaay iti biagko, tapno
alaekto met laeng. 18 Awan ti makaala iti biagko. Itedko kas pagayatak.
Adda kalintegak a mangited iti biagko, ket adda met kalintegak a mangala
met laeng. Daytoy ti imbilin ti Amak nga aramidek.” 19 Rimsua manen ti
panagsusupadi kadagiti Judio gapu kadagitoy a sasao. 20 Adu kadakuada
ti nagkunkuna, “Linuganan ti demonio. Agmauyong! Apay a
dumngegkayo kenkuana?” 21 Ngem kinuna ti dadduma, “Saan a kastoy ti
panagsao ti linuganan ti demonio! Mabalin aya ti demonio ti mangted iti
panagkita kadagiti bulsek?” 22 Tiempo ti lam-ek idi rambakanda ti Fiesta
ti Panagidaton idiay Jerusalem. 23 Magmagna ni Jesus iti Pasilio ni
Solomon idiay Templo 24 idi inaribungbongan dagiti tattao. “Kaanonto
aya ti panangibagam iti pudno?” sinaludsodda kenkuana. “Ibagamon ti
agpayso! Sika kadi ti Cristo?” 25 “Imbagakon kadakayo,” insungbat ni
Jesus, “ngem didak met patien. Dagiti aramidko babaen iti turay ni Amak
ti mangpaneknek iti maipapan kaniak. 26 Ngem dikayo mamati, ta saan a
dakayo ti karnerok. 27 Denggen dagiti karnerok ti timekko. Ammok ida,
ket surotendak. 28 Ikkak ida iti biag nga agnanayon, ket pulos a didanto
matay. Awan ti makarabsut kadakuada kaniak. 29 Natantan-ok ti inted
kaniak ni Amak ngem dagiti isuamin, ket awan ti makarabsut kadakuada
iti panangaywan ti Ama. 30 Siak ken ti Ama, maymaysakami.” 31
Pimmidut manen dagiti tattao kadagiti batbato a panguborda kenkuana. 32
“Adu ti naimbag nga aramid nga impaaramid kaniak ti Ama iti
imatangyo,” kinuna ni Jesus kadakuada. “Ania kadagitoy ti gapu a
panguboranyo kaniak?” 33 “Saandaka nga uboren gapu kadagiti naimbag
nga aramid, no di ket gapu iti saom a maikontra iti Dios,” insungbatda.
“Maysaka la a tao, ket pagbalinem ketdin a Dios ta bagim!” 34 “Naisurat
iti Lintegyo a kinuna ti Dios: ‘Dakayo ket didioskayo!’” insungbat ni
Jesus. 35 “Ammotayo nga agnanayon a pudno ti kuna ti Nasantoan a
Surat, ket inawagan ti Dios a dios dagiti tattao a nakaitedan ti saona. 36
No maipapan kaniak, pinilinak ti Ama ket imbaonnak ditoy lubong. Gapu
ta kinunak a siak ti Anak ti Dios, kunayon a nagsaoak iti maikontra iti
Dios? 37 No diak ar-aramiden dagiti aramid ni Amak, saan koma a
masapul a patiendak. 38 Ngem no aramidek ida, uray no didak patien,
patienyo koma dagiti ar-aramidko tapno mapaneknekanyo nga adda ti
Ama kaniak, ket addaak iti Ama.” 39 Pinadasda manen a tiliwen ngem
nakalapsut kadakuada. 40 Napan manen ni Jesus iti ballasiw ti karayan
Jordan, iti disso a namumbuniagan ni Juan ket nagyan sadiay. 41 Adu a
tattao ti napan kenkuana. “Awan ti milagro nga inaramid ni Juan,”
kinunada, “ngem pudno amin nga imbagana maipapan iti daytoy a tao.” 42
Adu ti namati kenkuana sadiay.
Juan 11
1 Nagsakit ti maysa a lalaki nga agnagan iti Lazaro. Agnaed ni Lazaro iti
maysa nga ili a managan Betania a pagnanaedan met da Maria ken Marta.
Kakabsat ni Lazaro ida. ( 2 Daytoy Maria a kabsat ti masakit ti
nangibukbok idi iti bangbanglo kadagiti saka ti Apo sana pinunasan iti
buokna.) 3 Nangibaon ngarud dagiti agkabsat iti mangipakaammo ken ni
Jesus. “Apo,” pinaibagada, “masakit ti patpatgem a gayyem.” 4 Idi
mangngeg ni Jesus daytoy, kinunana, “Saan nga ipatay ni Lazaro ti
sakitna. Maaramid daytoy tapno maidaydayaw ti Dios, ket isunto met ti
pakaidayawan ti Anak ti Dios.” 5 Ay-ayaten ni Jesus dagiti agkakabsat a
Marta, Maria ken Lazaro. 6 Nupay nadamagna a masakit ni Lazaro,
nagyan pay laeng iti dua nga aldaw iti lugar a yanna. 7 Kalpasanna, kinuna
ni Jesus kadagiti adalanna, “Agsublitayo idiay Judea.” 8 “Maestro,”
insungbat dagiti adalan, “nabiit pay laeng a kayatdaka a batoen dagiti
tattao sadiay. Apay nga inka manen sadiay?” 9 “Saan aya nga adda
sangapulo ket dua nga oras iti agmalem?” kinuna ni Jesus. “Saan a
maitibkol ti tao no magna iti aldaw, ta makitana ti silaw ti lubong. 10
Ngem maitibkol no magna iti rabii, ta awan ti lawag kenkuana.” 11
Kalpasan ti panangibaga ni Jesus iti daytoy, insarunona a kinuna,
“Matmaturog ni gayyemtayo a Lazaro, ngem innak riingen.” 12 “Apo,”
insungbat dagiti adalan, “no matmaturog laeng, umimbagto.” 13 Kayat a
sawen ni Jesus a natayen ni Lazaro ngem impagarupda a nagsao maipapan
iti gagangay a pannaturog. 14 Iti kasta, inlawlawag ni Jesus kadakuada,
“Natayen ni Lazaro. 15 Ngem gapu kadakayo, maragsakanak ta awanak iti
ayanna, tapno mamatikayo. Ala, intayon iti yanna.” 16 Kinuna ni Tomas
(a managan Singin) kadagiti kaduana nga adalan, “Intayo met tapno
mairamantayo ken ni Maestro a matay!” 17 Idi sumangpet ni Jesus,
nadamagna nga uppat nga aldawen a naitanem ni Lazaro. 18 Agtallo a
kilometro ti kaadayo ti Betania manipud Jerusalem, 19 ket adu a taga-
Judea ti napan nangliwliwa kada Marta ken Maria gapu iti ipapatay ti
kabsatda a lalaki. 20 Idi nadamag ni Marta a sumungsungad ni Jesus,
rimmuar a nangsabat kenkuana. Ngem nagbati ni Maria iti uneg ti balay.
21 Kinuna ni Marta ken Jesus, “Apo, no addaka koma ditoy idi, saan a
natay ni kabsatko! 22 Nupay kasta, ammok nga uray ita, ited ti Dios ti
aniaman a dawatem kenkuana.” 23 “Mapagungarto ni kabsatmo,” kinuna
ni Jesus. 24 “Ammok a mapagungarto inton maudi nga aldaw,” insungbat
ni Marta. 25 “Siak ti panagungar ken ti biag,” kinuna ni Jesus. “Ti
siasinoman a mamati kaniak, uray no matay, agbiagto pay. 26 Ket ti
siasinoman nga agbiag ken mamati kaniak, pulos a dinto matay. Patiem
daytoy?” 27 “Wen, Apo,” insungbatna. “Patiek a sika ti Cristo, ti Anak ti
Dios nga umay ditoy lubong.” 28 Apaman a naisao ni Marta daytoy,
nagsubli ket inayabanna a sililimed ni Maria a kabsatna. “Adda ni
Maestro,” kinunana, “ket paayabannaka.” 29 Idi mangngeg ni Maria
daytoy, rimmuar a dagus a mangsabat ken Jesus. ( 30 Saan pay a
nakadanon ni Jesus iti barrio, ta adda pay laeng iti disso a nangsabatan
kenkuana ni Marta.) 31 Simmurot dagiti tattao nga adda iti balay a
mangliwliwa ken ni Maria idi timmakder ken nagdardaras a rimmuar.
Impagarupda a mapan agsangit ni Maria iti ayan ti tanem. 32 Apaman a
nakadanon ni Maria iti ayan ni Jesus, nagparintumeng iti sakaananna ket
kinunana, “Apo, no addaka koma ditoy idi, saan a natay ni kabsatko!” 33
Nakita ni Jesus nga agsangsangit ni Maria ken dagiti tattao a kimmuyog
kenkuana. Natignay ti pusona ket kasta unay ti ladingitna. 34 “Sadino ti
nangitanemanyo kenkuana?” sinaludsod ni Jesus. “Umaymo kitaen, Apo,”
insungbatda. 35 Nagsangit ni Jesus. 36 Iti kasta, kinuna dagiti Judio,
“Kitaenyo ti napalalo a panangipategna kenkuana!” 37 Ngem kinuna
dagiti dadduma kadakuada, “Saan aya nga isu ti nangted iti panagkita iti
daydi lalaki a bulsek? Nabalinanna koma met nga inlisi ni Lazaro iti
patay.” 38 Kasta unay manen ti ladingit ni Jesus idi umasideg iti tanem a
rukib a naserraan iti bato. 39 “Ikkatenyo ti bato,” imbilinna. Kinuna ni
Marta a kabsat ti natay, “Apo, nabuyoken, ta uppat nga aldawnan a
naitanem!” 40 “Diak kadi imbaga kenka a no mamatika, makitamto ti
dayag ti Dios?” kinuna ni Jesus. 41 Inikkatda ti bato. Timmangad ni Jesus
ket kinunana, “Ama, agyamanak ta impangagnak. 42 Ammok nga
ipangagnak a kanayon, ngem kunak daytoy gapu kadagitoy a tattao tapno
patienda nga imbaonnak.” 43 Kalpasan ti panangisaona iti daytoy,
impukkawna, “Lazaro, rummuarka!” 44 Rimmuar ni Lazaro. Naputipotan
iti lupot dagiti ima ken sakana ken naabungotan ti rupana iti panio.
“Warwarenyo dagiti patapatna,” kinuna ni Jesus, “ket palubosanyo.” 45
Adu kadagiti tattao a simmarungkar ken Maria ti nakaimatang iti inaramid
ni Jesus, ket namatida kenkuana. 46 Ngem sumagmamano kadakuada ti
napan kadagiti Fariseo ket impadamagda ti inaramid ni Jesus. 47 Iti kasta,
nakitaripnong dagiti Fariseo ken panguloen a papadi kadagiti kamkameng
ti Sanhedrin. “Ania ti aramidentayo?” kinunada. “Adu ti nakaskasdaaw
nga ar-aramiden daytoy a tao! 48 No baybay-antayo, mamatinto dagiti
amin a tattao kenkuana, ket umayto dagiti agtuturay a taga-Roma a
mangdadael iti Templo ken iti entero a nasiontayo!” 49 Ngem nagsao ti
maysa kadakuada nga agnagan Caifas, ti Kangatoan a Padi iti dayta a
tawen. “Awan ammoyo,” kinunana. 50 “Saanyo aya a maawatan a
nasaysayaat no matay ti maysa a tao, ngem ti madadael ti entero a
nasion?” 51 (Saanna a sinao daytoy a naknakemna, ngem agsipud ta isu ti
Kangatoan a Padi iti dayta a tawen, impadtona ti ipapatay ni Jesus a
maipaay kadagiti Judio 52 ket saan laeng a gapu kadakuada no di ket
tapno pagkaykaysaenna amin dagiti naiwaraswaras nga annak ti Dios.) 53
Manipud iti dayta nga aldaw, nagtutulagan dagiti agtuturay a Judio a
papatayenda ni Jesus. 54 Isut’ gapuna a saanen a nagnagna a silalatak ni
Jesus idiay Judea, ngem pimmanaw sadiay ket napan iti asideg ti let-ang,
iti ili a managan Efraim. Nagyan sadiay agraman dagiti adalan. 55 Asideg
idin ti Fiesta ti Paskua ket adu a tattao a naggapu kadagiti barbarrio ti
simmang-at idiay Jerusalem tapno aramidenda ti seremonia ti
pannakadalus sakbay ti fiesta. 56 Sinapsapulda ni Jesus ket idi
naguurnongda idiay Templo, nagsisinnaludsodda, “Ania ti makunayo?
Umay ngata makifiesta?” 57 Imbilin dagiti panguloen a papadi ken dagiti
Fariseo a no adda makaammo iti ayan ni Jesus, ipakaammona koma
kadakuada tapno patiliwda.
Juan 12
1 Innem nga aldaw sakbay ti Fiesta ti Paskua idi mapan ni Jesus idiay
Betania nga ili ni Lazaro, daydi lalaki a pinagungarna. 2 Insaganaanda
sadiay iti pangrabii. Nagserbi ni Marta ket maysa ni Lazaro a nakisango
ken ni Jesus iti panganan. 3 Iti saan a mabayag, nangala ni Maria iti
kagudua a litro ti nangina unay a bangbanglo a naaramid iti puro a nardo.
Imbukbokna kadagiti saksaka ni Jesus sana pinunasan iti buokna. Napno ti
entero a balay iti ayamuom ti bangbanglo. 4 Maysa kadagiti adalan ni
Jesus, ni Judas Iscariote a mangliputto kenkuana ti nagsao. 5 “Apay a di
nailako daytoy a bangbanglo iti 300 a denario ket maited ti kuarta kadagiti
napanglaw?” kinunana. 6 Sinaona daytoy, saan a gapu ta isakitna dagiti
napanglaw, no di ket gapu ta mannanakaw. Isu ti agig-iggem iti kuarta, ket
masansan a mangala iti maurnong. 7 Ngem kinuna ni Jesus, “Palubosam a
salimetmetan ni Maria ti adda kenkuana para iti aldaw a pannakaitanemko.
8 Kankanayon nga adda dagiti napanglaw iti dennayo, ngem saan a
kankanayon nga addaak iti arpadyo.” 9 Adu a tattao ti nakadamag nga
adda ni Jesus idiay Betania. Iti kasta, napanda sadiay, saan laeng a gapu
ken ni Jesus, no di ket kayatda pay a kitaen ni Lazaro a pinagungarna. 10
Isut’ gapuna a nagtutulag dagiti panguloen a papadi a patayenda met ni
Lazaro. 11 Gapu iti napasamak kenkuana, adu kadagiti Judio ti simmina
kadagiti panguloda ket namatida ken ni Jesus. 12 Iti sumuno nga aldaw,
nadamag dagiti adu a tattao a napan dimmar-ay iti Fiesta ti Paskua a
sumungsungad ni Jesus idiay Jerusalem. 13 Iti kasta, nagalada kadagiti
sangsanga ti palma ket napanda simmabat kenkuana. “Madaydayaw ti
Dios!” impukpukkawda. “Bendisionan koma ti Dios ti umay iti nagan ti
Apo! Bendisionan koma ti Dios ti Ari ti Israel!” 14 Nakasarak ni Jesus iti
urbon ti asno ket nagsakayanna, kas kuna ti Nasantoan a Surat: 15 “Dika
agbuteng, siudad ti Sion! Ita, umayen kenka ti Arim, A sisasakay iti urbon
ti asno.” 16 Iti dayta a tiempo, saan a naawatan dagiti adalanna ti
kaipapanan daytoy, ngem idi naitan-oken ni Jesus, nalagipda a naisurat
maipapan kenkuana ket naaramid daytoy. 17 Adda idi tattao a
nakaimatang ken ni Jesus idi awaganna ni Lazaro iti tanem ket
pinagungarna. Impadamagda ti napasamak. 18 Dayta ti gapuna nga adu a
tattao ti napan simmabat kenkuana, agsipud ta nadamagda nga isu ti
nangaramid iti daytoy a milagro. 19 Isut’ gapuna a kinunkuna dagiti
Fariseo, “Makitayo, awanen ti maaramidtayo! Sumursuroten kenkuana ti
sangalubongan!” 20 Bayat ti Fiesta, adda sumagmamano a Griego a napan
nagdaydayaw idiay Jerusalem. 21 Napanda ken ni Felipe a taga-Betsaida,
iti probinsia ti Galilea. “Apo,” kinunada, “kayatmi koma a kitaen ni
Jesus.” 22 Napan imbaga ni Felipe daytoy ken ni Andres, ket napanda a
dua ken ni Jesus tapno ipakaammoda kenkuana. 23 Kinuna ni Jesus
kadakuada, “Dimtengen ti oras a maitan-ok ti Anak ti Tao. 24 Ibagak ti
pudno kadakayo: Saan nga umadu ti bukel ti trigo no di maregreg iti daga
ket matay. Ngem no matay, agbunga iti adu. 25 Ti agayat iti biagna,
mapukawnanto, ket ti gumura iti biagna ditoy lubong, salimetmetannanto
iti biag nga agnanayon. 26 Ti siasinoman nga agtarigagay nga agserbi
kaniak, masapul a surotennak. Ta no sadino ti ayanko, addanto met sadiay
ti adipenko. Ket padayawan ti Ama ti siasinoman nga agserbi kaniak.” 27
Intuloy ni Jesus ti nagsao: “Ita, mariribukak. Ania ti aramidek? Kunak
kadi, ‘Ama, ilisinak koma iti daytoy nga oras’? Ngem daytoy met ti gapu
ti immayak tapno lasatek daytoy nga oras ti panagsagaba. 28 O Ama, itan-
okmo ti naganmo!” Ket kinuna ti maysa a timek a naggapu sadi langit,
“Intan-okkon, ket itan-okkonto manen!” 29 Nangngeg dagiti tattao nga
agtaktakder sadiay ti timek ket impagarupda a naggurruod. “Kinasao ti
maysa nga anghel!” kinuna met ti dadduma. 30 Ngem kinuna ni Jesus
kadakuada, “Nagsao daytoy a timek saan a gapu kaniak, no di ket gapu
kadakayo. 31 “Itan ti pannakaukom daytoy a lubong. Itan ti
pannakaparmek ti agturay iti daytoy a lubong. 32 Inton maibayogak ditoy
daga, guyugoyekto nga umay kaniak dagiti amin a tattao.” ( 33 Kinunana
daytoy a pangipakaammo no kasano ti ipapatayna.) 34 “Kuna ti Linteg nga
agbiag nga agnanayon ti Cristo,” insungbat dagiti tattao. “Apay a kunam a
masapul a maibayog ti Anak ti Tao? Siasino daytoy nga Anak ti Tao?” 35
“Bassit laengen a tiempo ti kaadda ti silaw kadakayo,” insungbat ni Jesus.
“Agawaanyo ti agbiag ta adda pay la ti silaw kadakayo tapno dinakayo
makamakam ti sipnget. Ta ti magna iti sipnget, dina ammo ti
turturongenna. 36 Ngarud, mamatikay iti silaw bayat ti kaaddana
kadakayo tapno agbalinkayo a tattao ti lawag.” Idi naisaon ni Jesus
daytoy, pimmanaw ket inlemmenganna ida. 37 Uray no inaramidna amin
dagitoy a milagro iti imatangda, saanda a namati kenkuana 38 tapno
matungpal ti kinuna ni profeta Isaias: “Apo, siasino ti namati iti mensahe
nga inkasabami? Siasino ti nangipakitaan ti Apo iti pannakabalinna?” 39
Gapu iti daytoy, saanda a nabalinan ti namati. Ta kinuna pay ni Isaias: 40
“Pinagbulsek ti Dios ida, kinullaapanna dagiti isipda, tapno saanda a
makakita, ken saanda a makaawat, ket saanda nga agsubli kaniak, kuna ti
Dios, tapno paimbagek ida.” 41 Kinuna ni Isaias daytoy ta nakitana ti
dayag ni Jesus, ket nagsao iti maipapan kenkuana. 42 Uray no kasta, adu
kadagiti papangulo a Judio ti namati ken ni Jesus. Ngem saanda nga
inlatlatak gapu iti butengda kadagiti Fariseo amangan no mapagtalawda iti
sinagoga. 43 Ad-adda nga ayatenda ti pammadayaw dagiti tattao ngem ti
pammadayaw ti Dios. 44 Kinuna ni Jesus iti napigsa a timek, “Ti mamati
kaniak, saan la a sisiak ti patienna, no di pay ket ti nangibaon kaniak. 45
Ti makakita kaniak, makitana met ti nangibaon kaniak. 46 Immayak ditoy
lubong a kas silaw tapno saan nga agtaeng iti sipnget dagiti amin a mamati
kaniak. 47 Saanko nga ukomen ti siasinoman a dumngeg iti mensahek
ngem dina met tungpalen; ta diak immay tapno ukomek ti lubong no di ket
tapno isalakanko. 48 Adda mangukom iti mangumsi kaniak ken iti di
umawat iti mensahek. Ti sao nga imbalikasko ti mangukomto kenkuana iti
maudi nga aldaw! 49 Wen, ta diak nagsao iti bukbukodko a turay no di ket
imbilin ti Ama a nangibaon kaniak no ania ti sawek ken ibagak. 50 Ket
ammok a makaited iti biag nga agnanayon ti bilinna. Ngarud, no ania ti
sawek, sawek ti imbilin kaniak ti Ama.”
Juan 13
1 Bisperas idi ti Fiesta ti Paskua. Ammo ni Jesus a dimtengen ti oras nga
ipapanawna ditoy lubong ken isusublina iti Ama. Inay-ayatna dagiti
tattaona ditoy lubong. Wen, ay-ayatenna ida agingga iti panungpalan. 2
Madama idi ti panangrabii ni Jesus ken dagiti adalanna. Inserrek ti Diablo
iti panunot ni Judas nga anak ni Simon Iscariote ti panggep a mangliput
ken ni Jesus. 3 Ammo ni Jesus nga inted ti Ama kenkuana ti amin a
pannakabalin. Ammona met a naggapu iti Dios ket agsublinto iti Dios. 4
Iti kasta, timmakder ni Jesus iti panganan ket inikkatna ti kagayna sa
nangibarikes iti tualia. 5 Kinargaanna ti maysa a palanggana iti danum ket
binuggoanna dagiti saksaka dagiti adalan sana pinunasan ida iti
imbarikesna a tualia. 6 Idi dumanon ni Jesus ken ni Simon Pedro, kinuna
ni Pedro, “Apo, buggoam aya dagiti sakak?” 7 “Saanmo pay a maawatan
ita no ania ti ar-aramidek, ngem maawatamto met laeng,” insungbat ni
Jesus. 8 Kinuna ni Pedro, “Uray kaano, dimonto buggoan dagiti sakak!”
“No diak buggoan dagiti sakam, saankan a maibilang nga adalak,”
insungbat ni Jesus. 9 “Apo,” kinuna ni Simon Pedro, “saan la ngarud a
dagitoy sakak ti buggoam. Buggoam pay dagiti imak ken ti ulok!” 10
Kinuna ni Jesus, “Ti nakadigosen saanna a masapul ti agbuggo, ta
nadalusen, malaksid dagiti sakana. Nadaluskay aminen—malaksid iti
maysa.” ( 11 Ammon ni Jesus ti mangliput kenkuana, isu a kinunana,
“Nadaluskay aminen malaksid iti maysa.”) 12 Idi nabuggoanen ni Jesus
dagiti saksakada, nagkagay manen ket nagsubli iti lugarna iti panganan.
“Maawatanyo kadi ti kalkalpasko nga inaramid kadakayo?” sinaludsodna.
13 “Awagandak iti ‘Maestro’ ken ‘Apo,’ ket pudno la ketdi ti kunayo. 14
Ngarud, no siak nga Apo ken Maestroyo, binuggoak dagiti saksakayo,
rebbengyo met ti agbibinnuggo iti saka. 15 Inikkankayo iti pagtuladan
tapno aramidenyo met ti inaramidko kadakayo. 16 Ibagak ti pudno
kadakayo: Saan a natantan-ok ti adipen ngem ti apona. Saan met a
natantan-ok ti naibaon ngem ti nangibaon kenkuana. 17 Ita, ammoyon
daytoy a kinapudno. Nagasatkayo no aramidenyo! 18 “Saan a dakay amin
ti pakaiturongan dagiti sasawek. Ammok dagiti pinilik. Ngem masapul a
matungpal ti adda a naisurat, ‘Kinugtarannak ti nakipangan kaniak.’ 19
Ibagakon kadakayo daytoy sakbay a maaramid tapno inton mapasamak,
mamatikayo a siak ti siak. 20 Ibagak ti pudno kadakayo: Ti umawat iti
siasinoman nga ibaonko, awatennak met. Ket ti umawat kaniak, awatenna
met ti nangibaon kaniak.” 21 Kasta unay ti pannakariribuk ni Jesus idi
nasaonan daytoy ket impalgakna, “Ibagak ti pudno kadakayo: Maysanto
kadakayo ti mangliput kaniak.” 22 Nagkikinnita dagiti adalan ta dida
ammo no siasino kadakuada ti sarsaritaenna. 23 Iti abay ni Jesus,
agtugtugaw ti idumdumana unay nga adalan. 24 Sineniasan ni Simon
Pedro ti adalan ket kinunana, “Saludsodem man kenkuana no siasino
kadatayo ti sarsaritaenna.” 25 Immasideg dayta nga adalan ket nagsadag
ken ni Jesus sana dinamag, “Siasino ti kunam, Apo?” 26 “Ti pangtedakto
iti isawsawko a tinapay,” insungbat ni Jesus. Nangala ngarud iti tinapay
ket insawsawna sana inted ken Judas nga anak ni Simon Iscariote. 27
Apaman nga inawat ni Judas ti tinapay, simrek ni Satanas kenkuana.
“Aramidem a dagus ti masapul nga aramidem,” kinuna ni Jesus kenkuana.
28 Saan a naawatan dagiti sisasango iti lamisaan no apay a kasta ti imbaga
ni Jesus ken ni Judas. 29 Agsipud ta ni Judas ti agig-iggem iti kuarta,
impagarup dagiti dadduma kadagiti adalan nga imbaga ni Jesus kenkuana
a mapan gumatang iti kasapulanda iti fiesta. Adda met dagiti nangipagarup
a mapan mangted ni Judas iti kuarta kadagiti napanglaw. 30 Innala ni
Judas ti tinapay, ket rimmuar a dagus. Rabii idi. 31 Kalpasan ti ipapanaw
ni Judas, kinuna ni Jesus, “Ita, dandanin maitan-ok ti Anak ti Tao, ket
maitan-ok met ti Dios kenkuana. 32 Ket no maitan-ok ti Dios kenkuana, ti
Dios met laeng ti mangitan-ok iti Anak ti Tao, ket aramidennanto a dagus.
33 Annakko, bassit laengen a tiempo ti kaaddak kadakayo. Sapulendakto,
ket kas iti imbagak kadagiti agtuturay a Judio, kunak met ita kadakayo,
‘Dikay makaumay iti papanak.’ 34 “Adda baro a bilin nga itedko
kadakayo: Agiinnayatkayo. Kas iti panagayatko kadakayo, kasta met
koma ti panagiinnayatyo. 35 No agiinnayatkayo, maammoanto ti amin a
tao a dakayo dagiti adalak.” 36 “Apo,” sinaludsod ni Simon Pedro ken ni
Jesus, “sadino ti papanam?” “Dimo mabalin ita ti sumurot kaniak, ngem
sumurotkanto met laeng,” insungbat ni Jesus. 37 “Apo, apay a diak
mabalin ita ti sumurot kenka?” kinuna ni Pedro. “Sisasaganaak a matay
gapu kenka!” 38 “Pudno kadi a sisasaganaka a matay gapu kaniak?”
insungbat ni Jesus. “Ibagak ti pudno kenka: Sakbay nga agtaraok ti
kawitan, mamitlonton nga imbagam a dinak am-ammo.”
Juan 14
1 Kinuna ni Jesus kadakuada: “Saankayo a madanagan ken mariribukan.
Mamatikayo iti Dios, ken mamatikayo met kaniak. 2 Adu ti kuarto idiay
balay ni Amak, ket innak mangisagana iti pagyananyo. Diak koma ibaga
daytoy kadakayo no saan a pudno. 3 Kalpasan ti ipapanko panangisagana
iti pagyananyo, umaykayto alaen tapno addakayo met iti ayanko. 4
Ammoyo ti dalan nga agturong iti papanak.” 5 “Apo,” kinuna ni Tomas,
“saanmi nga ammo no sadino ti papanam. Kasano ngarud nga ammomi ti
dalan?” 6 “Siak ti dalan, ken ti pudno, ken ti biag; awan ti makapan iti
Ama no di magna kaniak,” insungbat ni Jesus. 7 “Ita, ta am-ammodakon,
am-ammoyo metten ni Amak. Manipud ita, am-ammo ken nakitayon ti
Ama.” 8 Kinuna ni Felipe, “Apo, ipakitam man kadakami ti Ama;
umanayen dayta kadakami.” 9 “Nabayagen a nakikadkaduaak kadakayo,
Felipe, ngem dinak pay la gayam am-ammo?” insungbat ni Jesus.
“Siasinoman a nakakita kaniak, nakitana metten ti Ama. Apay a kunam
pay laeng nga ipakitak kadakayo ti Ama? 10 Dimo kad patien nga addaak
iti Ama ket ti Ama adda kaniak? Saan a naggapu kaniak dagiti insaok
kadakayo. Ti Ama nga agtaeng kaniak, aramidenna dagiti aramidna. 11
Mamatikayo nga addaak iti Ama ket adda met ni Ama kaniak; no saan,
mamatikayo gapu kadagitoy nga aramid. 12 Ibagak ti pudno kadakayo: Ti
mamati kaniak, aramidennanto met dagiti aramidek; wen, dakdakkelto pay
ngem dagitoy ti aramidenna ta innak iti Ama. 13 Aramidekto ti aniaman a
dawatenyo iti naganko tapno maitan-ok ti Ama babaen iti Anak. 14
Aniaman a dawatenyo iti naganko, aramidekto.” 15 Intuloy ni Jesus ti
nagsao: “No ayatendak, tungpalenyo dagiti bilbilinko. 16 Agdawatakto iti
Ama ket ikkannakayto iti sabali a Mammagbaga nga agtaeng kadakayo iti
agnanayon. 17 Isu ti Espiritu a mangipakaammo iti kinapudno maipapan
iti Dios. Saan a mabalin nga awaten ti lubong daytoy nga Espiritu, agsipud
ta saanna a makita wenno am-ammo. Ngem am-ammoyo, ta agtaeng
kadakayo ket adda kadakayo. 18 “Inton pumanawak, saankayto a panawan
a kasla ulila. Agsubliakto met laeng kadakayo. 19 Bassit laengen a tiempo
ket dinakto makitan ti lubong, ngem dakayo, makitadakto. Ket gapu ta
agbiagak, agbiagkayto met. 20 Inton dumteng dayta nga aldaw,
maammoanyonto nga addaak ken ni Amak, ket addakayo met kaniak, kas
iti kaaddak kadakayo. 21 “Ti umawat ken mangtungpal kadagiti
bilbilinko, isu ti agayat kaniak. Ti agayat kaniak, ayatento ni Amak;
ayatekto met ken agparangakto kenkuana.” 22 Kinuna ni Judas (saan a ni
Judas Iscariote), “Apo, apay nga agparangka kadakami a saan ket nga iti
lubong?” 23 “Ti agayat kaniak, tungpalennanto dagiti saok,” insungbat ni
Jesus. “Ayatento ni Amak, ket siak ken ti Ama umaykamto agtaeng
kenkuana. 24 Ti di agayat kaniak, dina tungpalen dagiti saok. Saan a
nagtaud kaniak ti sao a nangngegyo, no di ket naggapu iti Ama a
nangibaon kaniak. 25 “Imbagak daytoy ta addaak pay kadakayo. 26 Ti
Mammagbaga nga ibaonto ti Ama iti naganko, isu ti Espiritu Santo.
Isuronakayto iti amin a banag ken ipalagipnanto dagiti amin nga imbagak
kadakayo. 27 “Kappia ti ibatik kadakayo. Ti bukodko a kappia ti itedko
kadakayo. Ngem saan a kas iti pannangted ti lubong ti pannangtedko
kadakayo. Dikay madanagan ken mariribukan. Dikay agbuteng. 28
Nangngegyo ti imbagbagak kadakayo a pumanawak ngem agsubliakto met
laeng kadakayo. No inay-ayatdak, agragsakkayo koma ta mapanak iti
Ama, ta natantan-ok ti Ama ngem siak. 29 Naibagakon daytoy kadakayo
sakbay a maaramid tapno inton mapasamak, mamatikayo. 30 Diak
makapagbayagen a makisao kadakayo, ta umayen ti agturay iti daytoy a
lubong. Saannak nga iturayan, 31 ngem masapul a maammoan ti lubong
nga ayatek ti Ama. Dayta ti gapuna nga aramidek ti amin nga ibilinna
kaniak. “Ala, umaykayon ket pumanawtayo ditoy.”
Juan 15
1 Intuloy ni Jesus ti nagsao: “Siak ti pudno a puon ti ubas, ket ni Amak ti
agay-aywan. 2 Putdenna amin a sanga a di agbunga ken dalusanna dagiti
agbungbunga a sanga tapno ad-adu pay ti bungada. 3 Nadaluskayon gapu
iti pannursurok kadakayo. 4 Agtalinaedkayo kaniak ket agtalinaedak met
kadakayo. No saankayo a maikamang kaniak, dikayo makapagbunga a kas
iti sanga a saan a maikamang iti puon. 5 “Siak ti puon ti ubas, dakayo
dagiti sanga. Ti agtaeng kaniak ket agtaengak met kenkuana, adunto ti
maibungana. Ta no awanak, awan ti maaramidyo. 6 Ti saan nga agtaeng
kaniak, maibelleng a kas iti sanga ket magango. Maurnong dagiti kakasta
a sanga ket maipuorda. 7 No agtaengkayo kaniak, ket agtaeng dagiti saok
kadakayo, dawatenyo ti aniaman a kayatyo, ket maitedto kadakayo. 8 No
agbungakayo iti adu, maidaydayaw ni Amak, ket iti kasta, agbalinkayo
nga adalak. 9 Ayatenkayo a kas iti panagayat ti Ama kaniak.
Agtalinaedkay iti ayatko. 10 Kas iti panangtungpalko kadagiti bilbilin ni
Amak ket agtaengak iti ayatna, agtalinaedkayo met iti ayatko no
tungpalenyo dagiti bilbilinko. 11 “Imbagak daytoy tapno ti ragsakko adda
koma kadakayo ket naan-anay koma ti ragsakyo. 12 Daytoy ti bilinko:
Agiinnayatkayo a kas iti panagayatko kadakayo. 13 Ti katan-okan nga
ayat nga ipakita ti maysa a tao isut’ panangipaayna iti biagna para kadagiti
gagayyemna. 14 Ket dakayo dagiti gagayyemko no tungpalenyo ti
ibilinko. 15 Saankayon nga ibilang nga adipen, ta saan nga ammo ti adipen
ti ar-aramiden ti apona. Ngem ibilangkayo a gagayyem ta impakaammok
kadakayo ti amin a nangngegko ken ni Amak. 16 Saan a dakayo ti nangpili
kaniak, no di ket siak ti nangpili kadakayo. Imbaonkayo a mapan ken
agbunga iti adu, ket manayon koma ti bungayo. Iti kasta, itedto ti Ama
kadakayo ti aniaman a dawatenyo kenkuana iti naganko. 17 Daytoy
ngarud ti bilinko kadakayo: Agiinnayatkayo.” 18 “No guraennakayo ti
lubong, laglagipenyo a siak ti immuna a ginurana. 19 No kukuanakayo ti
lubong, ayatennakayo koma ti lubong a kas kukuana. Ngem saannakayo a
kukua ti lubong. Pinilikayo a panawanyo ti lubong ket daytoy ti gapuna a
guraennakayo ti lubong. 20 Laglagipenyo ti imbagak kadakayo: ‘Saan a
natantan-ok ti adipen ngem ti apona.’ No indadanesdak, idadanesdakayto
met. No tinungpalda ti saok, tungpalendanto met ti saoyo. 21 Ngem
aramidendanto amin daytoy kadakayo ta kukuakayo. Saanda ngamin nga
ammo ti nangibaon kaniak. 22 Awan koma ti pakabasolanda no saanak
nga immay ken nagsao kadakuada. Ngem ita, awanen ti pagpambarda
kadagiti basbasolda. 23 Ti gumura kaniak, guraenna met ti Amak. 24
Awan koma ti pakabasolanda no diak inaramid iti imatangda dagiti banag
nga awan sabali a makaaramid. Ngem ita, nakitadan ti inaramidko ket
guraendakami a dua ken ni Amak. 25 Nupay kasta, mapasamak ti kastoy
tapno matungpal ti naisurat iti Lintegda: ‘Ginuradak nga awan
gapgapuna.’ 26 “Umayto ti Mammagbaga—ti Espiritu ti kinapudno
manipud iti Ama. Ibaonkonto kadakayo manipud iti Ama, ket agsaonto a
mangpaneknek iti maipapan kaniak. 27 Agsaksikayto met iti maipapan
kaniak, ta nakikadkaduakayo kaniak manipud idi damo.
Juan 16
1 “Imbagak daytoy kadakayo tapno diyonto tallikudan ti pammatiyo. 2
Pagtalawendakayto kadagiti sinagogada. Umayto ti tiempo nga ipagarup ti
pumatay kadakayo nga aramidenna daytoy a kas pagrebbenganna iti Dios.
3 Aramidendanto dagitoy kadakayo ta didak am-ammo, kasta met ti Ama.
4 Ngem imbagak daytoy kadakayo tapno inton dumteng ti tiempo a
panangaramidda kadagitoy, malagipyonto a naisaokon kadakayo.” “Diak
insigsigud nga imbaga dagitoy kadakayo, agsipud ta addaak pay idi
kadakayo. 5 Ngem ita ta innakon iti nangibaon kaniak, awan kadakayo ti
agsaludsod no sadino ti papanak. 6 Ket ita ta imbagakon kadakayo,
agladingitkayo. 7 Ngem ibagak ti pudno kadakayo: Pagimbaganyo met
laeng no pumanawak, ta no diak pumanaw, dinto umay kadakayo ti
Mammagbaga. Ngem no pumanawak, ibaonkonto kadakayo. 8 Ket inton
umay, paneknekannanto kadagiti tattao ti lubong nga agbiddutda
maipapan iti basol, maipapan iti kinapudno, ken maipapan iti panangukom
ti Dios iti lubong. 9 Nagbiddutda maipapan iti basol, agsipud ta saanda a
mamati kaniak. 10 Nagbiddutda maipapan iti kinapudno, agsipud ta
mapanak ken ni Ama ket didakto makitan. 11 Nagbiddutda maipapan iti
panangukom, agsipud ta naukomen ti agturay daytoy a lubong. 12 “Adu
pay ti ibagak kadakayo, ngem diyo pay kabaelan nga awaten ita. 13 Ngem
inton umay ti Espiritu ti kinapudno, idalannakayto iti naan-anay a
kinapudno. Dinto agsao iti bukodna a pannakabalin no di ket ibagananto
dagiti mangngegna, ket ipakaammonanto kadakayo dagiti mapasamak. 14
Itan-oknakto, ta idanonnanto ti kayatko nga ibaga kadakayo. 15 Kukuak
amin a kukua ti Ama. Daytoy ti gapuna a kinunak nga idanonto ti Espiritu
ti kayatko nga ibaga kadakayo.” 16 “Iti saan a mabayag, didakton makita.
Ngem kalpasan met la ti bassit a tiempo, makitadakto manen.” 17 Kinuna
ti sumagmamano nga adalanna kadagiti kaduada, “Ania ti kayat a sawen
daytoy? Imbagana nga iti saan a mabayag, ditayton makita, ngem kalpasan
met la ti bassit a tiempo, makitatayto manen? Kinunana pay, ‘Agsipud ta
mapanak ken ni Amak.’” 18 Iti kasta, nagsisinnaludsodda, “Ania ti
kayatna a sawen ti ‘iti saan a mabayag’? Saanmi a maawatan ti
ibagbagana!” 19 Gapu ta ammo ni Jesus no ania ti kayatda a saludsoden
kenkuana, kinunana kadakuada, “Agsisinnaludsodkayo kadi gapu iti saok
nga ‘Iti saan a mabayag, didakton makita, ngem kalpasan met la ti bassit a
tiempo, makitadakto manen’? 20 Ibagak ti pudno kadakayo: Agsangit ken
agdung-awkayto, ngem agragsakto ti lubong. Agladingitkayo ngem
agbalinto a ragsak ti ladingityo. 21 Agdanag ti babai no agpasikalen, ta
dimtengen ti oras a panagsagabana, ngem no maipasngaynan ti ubing,
malipatannan ti rigatna gapu iti ragsakna ta nayanak ti maysa a maladaga
ditoy lubong. 22 Kasta met kadakayo: Agladingitkayo ita, ngem
makitakayto manen ket agragsakkayto. Wen, addanto rag-o nga awan ti
siasinoman a makaikkat kadakayo. 23 “Inton dumteng dayta nga aldaw,
saanton a siak ti pagdawatanyo. Ibagak ti pudno kadakayo: Ited ti Ama ti
aniaman a dawatenyo kenkuana iti naganko. 24 Agpapan ita, awan pay ti
dinawatyo iti naganko. Agdawatkayo ket umawatkayto tapno naan-anay ti
ragsakyo.” 25 “Pangngarig ti inaramatko a nangibaga kadagitoy kadakayo.
Ngem dumtengto ti tiempo a diak aramaten ti pangngarig ket agsaoakto a
silalawag kadakayo ti maipapan iti Ama. 26 Inton dumteng dayta nga
aldaw, agdawatkayto kenkuana iti naganko. Diak ibaga nga
idawdawatankayto kenkuana. 27 Ay-ayatennakayo a mismo ti Ama,
agsipud ta ay-ayatendak ken patienyo a naggapuak iti Dios. 28 Naggapuak
iti Ama ket immayak ditoy lubong. Ita, panawakon ti lubong ket agsubliak
iti Ama.” 29 Kinuna dagiti adalanna, “Kitaem, dimo inusar ti pangngarig,
ket nalawag ti panagsaom. 30 Ita, maawatanmin nga ammom amin.
Saanmo a masapul ti uray siasinoman nga agsaludsod kenka. Daytoy ti
gapuna a naggapuka iti Dios.” 31 “Mamatikayo itan?” kinuna ni Jesus. 32
“Umayen ti oras, ket dimtengen. Mawarawarakayto amin. Agawidto ti
tunggal maysa iti balayna ket baybay-andakton nga agmaymaysa. Ngem
iti kinapudnona, saanak nga agmaymaysa agsipud ta adda kaniak ti Ama.
33 Imbagak daytoy kadakayo tapno adda talnayo iti pannakikaduayo
kaniak. Parigatennakayto ti lubong. Ngem papigsaenyo ti nakemyo!
Naparmekkon ti lubong!”
Juan 17
1 Kalpasan ti panangisao ni Jesus iti daytoy, timmangad sadi langit.
“Ama,” kinunana, “dimtengen ti oras. Itan-okmo toy Anakmo tapno itan-
oknaka met. 2 Ta inikkam iti pannakabalin nga agturay kadagiti amin a
tattao tapno ikkanna met iti biag nga agnanayon dagiti amin nga intedmo
kenkuana. 3 Ket ti biag nga agnanayon isu daytoy: ti pannakaammo dagiti
tattao kenka, a sika ti kakaisuna a pudno a Dios, ken ti pannakaammoda
ken ni Jesu-Cristo nga imbaonmo. 4 Indaydayawka ditoy daga.
Lineppasko ti trabaho nga intedmo nga aramidek. 5 Ama, itan-oknak ita iti
imatangmo, kas iti panangitan-okmo kaniak idi addaak iti dennam sakbay
a naparsua daytoy lubong. 6 “Impakaammoka kadagiti tattao nga intedmo
kaniak ditoy lubong. Kukuam ida, ket intedmo ida kaniak. Tinungpalda ti
saom, 7 ket ita, ammodan a naggapu kenka dagiti amin nga intedmo
kaniak. 8 Intedko kadakuada ti mensahe nga intedmo kaniak, ket
inawatda. Ammoda a pudno a naggapuak kenka ket patienda nga
imbaonnak. 9 “Idawdawatak ida. Saanko nga idawdawatan ti lubong no di
ket dagiti tattao nga intedmo kaniak, ta kukuam ida. 10 Kukuam amin a
kukuak ket kukuak met amin a kukuam. Ket maidaydayawak kadakuada.
11 Ita, umayakon kenka, Nasantoan nga Ama. Awanakon iti lubong, ngem
addada iti lubong. Aywanam ngarud ida babaen iti pannakabalin ti
naganmo nga intedmo kaniak tapno agmaymaysada a kas kadata. 12 Bayat
ti kaaddak kadakuada, inaywanak ida babaen iti pannakabalin ti naganmo
nga intedmo kaniak. Sinalaknibak ida, ket awan ti uray maysa kadakuada
a napukaw, malaksid daydi tao a naituding a mapukaw tapno matungpal ti
Nasantoan a Surat. 13 Ita, umayakon kenka, ket sawek dagitoy ditoy
lubong tapno adda kadakuada ti naan-anay a ragsakko. 14 Intedko
kadakuada ti saom ket ginura ida ti lubong ta kas kaniak, saanda a taga-
lubong. 15 Diak dawaten nga ipanawmo ida ditoy lubong, no di ket
salaknibam ida iti Managdakdakes. 16 Saanda a taga-lubong a kas kaniak.
17 Pasantoem ida babaen iti kinapudno. Ti saom isut’ pudno. 18 Kas iti
panangibaonmo kaniak ditoy lubong, kasta met ti panangibaonko
kadakuada iti lubong. 19 Gapu kadakuada, idatonko kenka toy bagik tapno
mapasantoda met iti kinapudno. 20 “Saan laeng nga is-isuda ti
idawdawatak. Idawdawatak met dagiti mamati kaniak gapu iti mensaheda.
21 Ikarkararagko nga agmaymaysada amin. Ama, addada koma kadata, a
kas iti kaaddam kaniak ken iti kaaddak kenka. Agmaymaysada koma
tapno patien ti lubong nga imbaonnak. 22 Intedko kadakuada ti dayag nga
intedmo kaniak tapno agmaymaysada a kas iti panagmaymaysata. 23
Addaak kadakuada ket addaka kaniak tapno naan-anay ti
panagmaymaysada. Iti kasta, maammoan ti lubong nga imbaonnak ken
kasta met nga ay-ayatem ida a kas iti panagayatmo kaniak. 24 “Ama,
intedmo ida kaniak, ket kayatko a no sadinoman ti ayanko, addada met
koma sadiay tapno makitada ti dayagko. Wen, ti dayag nga intedmo
kaniak, ta inayatnak sakbay a naparsua ti lubong. 25 Nalinteg nga Ama,
saannaka nga am-ammo ti lubong, ngem am-ammoka, ket ammoda nga
imbaonnak. 26 Impakaammoka kadakuada, ket diak mamingga a
mangipakaammo tapno ti ayatmo kaniak adda kadakuada ket addaak met
kadakuada.”
Juan 18
1 Kalpasan ti panangisao ni Jesus kadagitoy, pimmanaw agraman dagiti
adalanna ket binallasiwda ti waig ti Kidron. Adda hardin iti dayta a disso,
ket nagturongda sadiay. 2 Ammo ni Judas a mangliput kenkuana dayta a
lugar agsipud ta masansan a sadiay ti paguummongan ni Jesus ken dagiti
adalanna. 3 Iti kasta, napan ni Judas iti hardin, ket nangikuyog iti bunggoy
dagiti soldado a taga-Roma ken sumagmamano a guardia ti Templo nga
imbaon dagiti panguloen a papadi ken Fariseo. Nagtagi-armas ken
nagtagi-silaw dagiti soldado ken guardia. 4 Agsipud ta ammo ni Jesus ti
amin a mapasamak kenkuana, sinabatna ida. “Siasino ti sapsapulenyo?”
kinunana. 5 “Ni Jesus a taga-Nazaret,” insungbatda. “Siak,” kinunana.
Agtaktakder iti ayanda ni Judas a mangliput kenkuana. 6 Apaman a kinuna
kadakuada ni Jesus iti “Siak,” napasanud ken natuangda. 7 Sinaludsod
manen ni Jesus kadakuada, “Siasino ti sapsapulenyo?” “Ni Jesus a taga-
Nazaret,” kinunada. 8 “Imbagak la ngaruden a siak,” kinuna ni Jesus. “No
siak ti sapsapulenyo, palubosanyo a pumanaw dagiti kaduak.” ( 9
Kinunana daytoy tapno matungpal daydi sinaona: “Ama, awan ti uray
maysa a napukaw kadagiti intedmo kaniak.”) 10 Adda idi buneng ni
Simon Pedro. Inasutna sana tinagbat ti babaonen ti Kangatoan a Padi, ket
naisina ti akinkannawan a lapayagna. Malco ti nagan ti babaonen. 11
Kinuna ni Jesus ken ni Pedro, “Ibalaymo ta bunengmo. Ipagarupmo kadi a
diak inumen ti kopa ti panagsagaba nga inted kaniak ni Amak?” 12 Ti
bunggoy dagiti soldado nga indauloan ti ofisialda ken dagiti guardia ti
Templo ti nangtiliw ken ni Jesus. Rineppetda dagiti imana. 13 Immuna
nga indatagda ken ni Anas a katugangan ni Caifas, ti Kangatoan a Padi iti
dayta a tawen. 14 Ni Caifas ti nangbagbaga idi kadagiti Judio a
nasaysayaat no matay ti maysa a tao para iti pagimbagan dagiti tattao. 15
Simmurot ni Simon Pedro ken ni Jesus. Simmurot met ti sabali pay nga
adalan. Am-ammo ti Kangatoan a Padi daytoy nga adalan, isut’ gapuna a
nakikuyog ken ni Jesus a simrek iti paraangan ti balay ti Kangatoan a Padi.
16 Ngem nagbati ni Pedro iti ruar iti asideg ti ruangan. Iti kasta, rimmuar
ti adalan nga am-ammo ti Kangatoan a Padi sana kinasao ti babai nga
agbambantay iti ruangan ket pinastrekna ni Pedro. 17 Kinuna ti babai ken
ni Pedro, “Saanka aya a maysa kadagiti adalan dayta a tao?” “Saan,”
insungbat ni Pedro. 18 Agsipud ta nalam-ek idi, nagpuor dagiti adipen ken
dagiti guardia iti paginudoan ket nagtatakderda iti lawlawna. Napan met
nakiinudo ni Pedro. 19 Inimbestigar ti Kangatoan a Padi ni Jesus
maipapan kadagiti adalanna ken iti pannursurona. 20 Simmungbat ni
Jesus, “Nagsaoak a silalatak kadagiti tattao. Masansan a mangisursuroak
iti uneg dagiti sinagoga ken iti Templo a paguurnongan dagiti amin a
tattao. Awan a pulos ti imbagbagak iti nalimed. 21 Apay a
pagsaludsodannak? Agsaludsodka kadagiti tattao a nagdengngeg kaniak
no ania ti imbagak kadakuada ta ammoda ti sinaok.” 22 Idi naisao ni Jesus
daytoy, tinungpa ti maysa kadagiti guardia sadiay. “Apay a kasta ti
panangsungbatmo iti Kangatoan a Padi?” kinunana. 23 “Paneknekam no
adda dakes a sinaok,” insungbat ni Jesus. “No pudno man ti imbagak, apay
a kabilennak?” 24 Iti kasta, pinaipan ni Anas ni Jesus a sirereppet pay
laeng ken ni Caifas a Kangatoan a Padi. 25 Adda pay laeng ni Pedro nga
agtaktakder sadiay nga agin-inudo. Kinuna dagiti dadduma kenkuana,
“Saanka kadi a maysa kadagiti adalan dayta a tao?” Ngem naglibak ni
Pedro. “Saan,” kinunana. 26 Nagsao ti maysa kadagiti adipen ti Kangatoan
a Padi, ken kabagian ti lalaki nga insina ni Pedro ti lapayagna. “Saan aya a
sika ti nakitak a kaduana iti hardin?” kinunana. 27 Naglibak manen ni
Pedro, ket dagus a nagtaraok ti maysa a kawitan. 28 Nasapa pay laeng idi
ipanawda ni Jesus iti balay ni Caifas ket impanda iti palasio ti gobernador.
Saan a simrek dagiti Judio iti palasio ta dida kayat ti matulawan. Ngamin,
no matulawanda, dida mabalin ti mangan iti pangrabii ti Paskua. 29
Rimmuar ngarud ni Pilato ket kinunana kadakuada, “Ania ti
pangidarumanyo iti daytoy a tao?” 30 “Saanmi koma nga idatag kenka
daytoy a tao no saan a nakaaramid iti dakes,” insungbatda. 31 Kinuna ni
Pilato kadakuada, “Alaenyo ngarud ket dakayo a mismo ti mangukom
kenkuana kas mayannurot iti paglinteganyo.” “Saan a maipalubos
kadakami ti mangikeddeng a mapapatay ti tao,” insungbat dagiti Judio. (
32 Napasamak daytoy tapno matungpal ti sinao ni Jesus idi imbagana no
kasano ti ipapatayna.) 33 Simrek ngarud ni Pilato iti palasio sana inayaban
ni Jesus. “Sika kadi ti ari dagiti Judio?” sinaludsodna. 34 “Nagtaud kadi
kenka daytoy a saludsod wenno adda nangibaga kenka?” insungbat ni
Jesus. 35 “Ipagarupmo kadi a Judioak?” kinuna ni Pilato. “Indarumdaka
kaniak dagiti kailiam ken dagiti panguloen a papadi. Ania aya ti
inaramidmo?” 36 “Saan a ditoy lubong ti ayan ti pagariak,” kinuna ni
Jesus. “No ditoy lubong koma, makigubat dagiti pasurotko tapno saanak a
mayawat kadagiti agtuturay a Judio. Ngem saan a ditoy lubong ti ayan ti
pagariak!” 37 Isut’ gapuna a sinaludsod ni Pilato, “No kasta, maysaka nga
ari?” “Nasaomon,” insungbat ni Jesus. “Nayanakak ditoy lubong tapno
paneknekak ti pudno. Dumngeg kaniak ti siasinoman nga adda iti pudno.”
38 “Ania kadi ti pudno?” sinaludsod ni Pilato. Kalpasan ti panangisao ni
Pilato iti daytoy, rimmuar manen a napan iti ayan dagiti tattao ket
kinunana kadakuada: “Awan panggapuak a mangikeddeng iti
pannakadusana. 39 Ngem kas mayannurot iti ugaliyo iti Fiesta ti Paskua,
wayawayaak kadakayo ti maysa a balud. Kayatyo kadi a wayawayaak ti
ari dagiti Judio?” 40 “Saan nga isu!” impukkawda, “Ni Barrabas ti
kayatmi!” (Maysa a tulisan ni Barrabas.)
Juan 19
1 Kalpasanna, pinaala ni Pilato ni Jesus ket pinasaplitna. 2 Nangaramid
dagiti soldado iti korona a siit-siitan sada inkabil iti ulona. Kinagayanda iti
kolor-ube ket inasitganda. 3 “Agbiag ti Ari dagiti Judio!” kunkunada sada
tinungpa. 4 Rimmuar manen ni Pilato ket kinunana kadagiti tattao,
“Adtoy, paipanko ni Jesus ditoy tapno makitayo nga awan panggapuak a
mangikeddeng iti pannakadusana.” 5 Rimmuar ni Jesus a sibabalangat iti
siit-siitan ken siaaruat iti kolor-ube a kagay. Kinuna kadakuada ni Pilato,
“Adtoy ti tao!” 6 Idi makita dagiti panguloen a papadi ken dagiti guardia ti
Templo, impukkawda, “Pailansam iti krus! Pailansam iti krus!” Kinuna ni
Pilato kadakuada, “Alaenyo ngarud. Dakayo ti mangilansa kenkuana iti
krus. Awan panggapuak a mangdusa kenkuana.” 7 “Adda sagudayen ti
lintegmi a rebbengna a mapapatay agsipud ta imbilangna ti bagina nga
Anak ti Dios,” insungbat dagiti Judio. 8 Idi mangngeg ni Pilato daytoy,
ad-adda manen ti butengna 9 ket nagsubli iti uneg. “Taga-anoka kadi?”
sinaludsodna ken ni Jesus. Ngem saan a simmungbat ni Jesus. 10 Kinuna
kenkuana ni Pilato, “Apay a dika sumungbat? Dimo kad ammo nga adda
pannakabalinko a mangwayawaya wenno mangpailansa kenka iti krus?”
11 “Awan koma ti pannakabalinmo kaniak no saan nga inted kenka ti
Dios,” insungbat ni Jesus. “Isut’ gapuna a nakarkaro ti basol ti tao a
nangyawat kaniak.” 12 Idi mangngeg ni Pilato daytoy, ad-adda manen ti
gagarna a mangwayawaya ken ni Jesus. Ngem impukkaw dagiti Judio,
“No wayawayaam dayta a tao, saannaka a gayyem ti Emperador. Ta
kabusor ti Emperador ti siasinoman a mangibilang iti bagina nga ari.” 13
Idi mangngeg ni Pilato dagitoy a sao, inruarna ni Jesus sa napan nagtugaw
iti tugaw ti ukom, iti disso a managan “Plataforma a Bato.” (Iti Hebreo:
“Gabata.”) 14 Dandani tengnga ti aldaw idi sakbay ti Fiesta ti Paskua.
Kinuna ni Pilato kadagiti Judio, “Adtoy ti ariyo!” 15 Impukkawda,
“Papapataymo! Papapataymo! Pailansam iti krus!” Sinaludsod ni Pilato
kadakuada, “Kayatyo kadi a pailansak iti krus ti ariyo?” Simmungbat
dagiti panguloen a papadi, “Awan sabali nga arimi no di la ti Emperador!”
16 Kalpasanna, inyawat ni Pilato ni Jesus kadakuada tapno mailansa iti
krus. Iti kasta, innalada ni Jesus. 17 Rimmuar a sibabaklay iti krusna ket
dimteng iti disso a managan “Lugar a yan ti Bangabanga.” (Iti Hebreo:
“Golgota.”) 18 Sadiay ti nangilansaanda kenkuana iti krus. Inlansada met
ti dua a lallaki kadagiti krusda ket nagtengngaanda ni Jesus. 19 Nangisurat
ni Pilato iti pakaammo ket pinaikabilna iti krus. Kastoy ti naisurat: “Jesus
a taga-Nazaret, ti Ari dagiti Judio.” 20 Adu a tattao ti nakabasa iti daytoy
agsipud ta asideg iti siudad ti disso a nakailansaan ni Jesus. Naisurat ti
pakaammo iti pagsasao a Hebreo, Latin ken Griego. 21 Kinuna dagiti
panguloen a papadi ken ni Pilato, “Baliwam ti insuratmo a ‘Ti Ari dagiti
Judio.’ Kastoy ketdi ti isuratmo: ‘Kinuna daytoy a tao nga isu ti Ari dagiti
Judio.’” 22 “Ti insuratko, naisuraten. Saanen a mabaliwan,” insungbat ni
Pilato. 23 Idi nailansadan ni Jesus, innala dagiti soldado ti kawesna sada
pinagkapat ken nagbibingayan. Innalada met ti tunikana. Awan saip ti
entero a tunikana. 24 Kinuna dagiti soldado iti maysa ken maysa,
“Saantayo a pigpigisen ti lupot, ta pagbibinnunotantayo no siasino ti
mangtagikua.” Napasamak daytoy tapno matungpal ti kuna ti Nasantoan a
Surat: “Nagbibingayanda ti kawesko, Nagbibinnunotanda ti tunikak.”
Kasta ti inaramid dagiti soldado. 25 Iti asideg ti krus ni Jesus, sitatakder ni
inana, ti kabsat ni inana, ni Maria nga asawa ni Cleofas ken ni Maria
Magdalena. 26 Idi makita ni Jesus ni inana ken ti adalan a
dinungdungngona, kinunana ken ni inana, “Babai, adtoy ti anakmo.” 27
Kinunana met iti adalan, “Adtoy ti inam.” Iti dayta nga oras, inyawid ti
adalan ni Maria tapno agtaeng iti balayna. 28 Ammo ni Jesus a nalpas
aminen. Tapno matungpal ti kuna ti Nasantoan a Surat, kinunana,
“Mawawak.” 29 Adda maysa a burnay sadiay a napno iti suka.
Nangipasagepsepda iti maysa nga espongha iti suka sada inkabil iti
murdong ti sanga ti hisopo, ket inggaw-atda iti ngiwatna. 30 Idi
maramanan ni Jesus ti suka, kinunana, “Natungpalen.” Nagdumog ket
natayen. 31 Agsipud ta Aldaw a Panagsagana idi, dinawat dagiti agtuturay
a Judio ken ni Pilato a matukkol dagiti saka dagiti nailansa ken maikkat
dagiti bagida kadagiti krus. Dinawatda daytoy ta dida kayat a mabati dagiti
bangkay kadagiti krus iti Aldaw a Panaginana, ta naisangsangayan dayta
mapasungad nga aldaw. 32 Napan ngarud dagiti soldado, ket tinukkolda
dagiti saka dagiti dua a lallaki a kadua ni Jesus a nailansa. 33 Ngem idi
dumtengda ken ni Jesus, nakitada a natayen isu a didan tinukkol dagiti
sakana. 34 Nupay kasta, induyok ti maysa kadagiti soldado ti pikana iti
bakrang ni Jesus, ket dagus a pimsuak ti dara ken danum. ( 35 Daydi
nakakita iti daytoy a napasamak, paneknekanna ti kinapudno daytoy tapno
mamatikayo met. Pudno ti imbagana ket ammona a pudno ti sasawenna.)
36 Naaramid daytoy tapno matungpal ti kuna ti Nasantoan a Surat:
“Awanto ti uray maysa a tulangna a matukkol.” 37 Kuna pay ti sabali,
“Kitaendanto ti dinuyokda.” 38 Kalpasanna, dinawat ni Jose a taga-
Arimatea ken ni Pilato ti pammalubos nga alaenna ti bangkay ni Jesus.
(Maysa idi ni Jose a pasurot ni Jesus, ngem inlimedna ta mabuteng
kadagiti agtuturay a Judio.) Impalubos ni Pilato. Napan ngarud ni Jose ket
innalana ti bangkay ni Jesus sana impanaw. 39 Kimmuyog ken ni Jose ti
maysa nga agnagan Nicodemo, daydi napan ken ni Jesus iti maysa a rabii.
Nangitugot iti agarup 30 a kilo ti bangbanglo a naaramid iti mirra ken
aloe. 40 Innalada ti bangkay ni Jesus ket binungonda iti linen agraman ti
bangbanglo, kas ugali dagiti Judio no itanemda dagiti minatayda. 41 Adda
maysa a hardin iti disso a nakailansaan ni Jesus iti krus. Adda baro a
tanem sadiay a di pay nausar. 42 Agsipud ta asideg ti tanem ken dandanin
mangrugi ti Aldaw a Panaginana, sadiay ti nangikabilanda iti bangkay ni
Jesus.
Juan 20
1 Nasipnget pay laeng iti agsapa ti umuna nga aldaw ti lawas idi napan ni
Maria Magdalena iti tanem. Idi makitana a naikkaten ti bato a naiserra iti
tanem, 2 nagtaray a napan iti ayan ni Simon Pedro ken ti sabali nga
adalan, daydi dinungdungngo ni Jesus. Kinunana kadakuada, “Inikkatda ti
Apo iti tanem ket saanmi nga ammo ti nangikabilanda kenkuana.” 3
Napan ni Pedro ken ti nasao nga adalan iti tanem. 4 Nagtarayda a dua,
ngem naparpardas ti panagtaray dayta nga adalan ket inunaanna ni Pedro a
dimmanon iti tanem. 5 Simmirip iti tanem, ket nakitana daydi lupot a
linen, ngem saan a simrek. 6 Simmaruno a simmangpet ni Simon Pedro
ket naglayon a simrek iti tanem. Nakitana ti lupot a linen a nayaplag
sadiay, 7 ken ti lupot a naibedbed idi iti ulo ni Jesus, ngem saan a nailaok
iti ayan ti lupot a linen, no di ket nalukot a nailasin iti sabali a disso. 8
Simrek met ti adalan, daydi immun-una a nakadanon iti tanem. Nakitana ti
napasamak ket namati. ( 9 Dida pay la naawatan ti kuna ti Nasantoan a
Surat a masapul nga agungar ni Jesus.) 10 Kalpasanna, nagawid dagiti
adalan. 11 Agtaktakder ni Maria nga agsangsangit iti sibay ti tanem. Idi
madama nga agsangsangit, nagdumog a kimmita iti uneg ti tanem, 12 ket
nakitana ti dua nga angheles a nakapuraw. Agtugtugawda iti disso a
nakaikabilan idi ti bangkay ni Jesus. Adda ti maysa iti uloanan ket ti sabali
iti sakaanan. 13 “Babai,” sinaludsodda, “apay nga agsangsangitka?”
“Impanawda ti Apok, ket diak ammo ti nangikabilanda kenkuana!”
insungbatna. 14 Timmaliaw ni Maria ket nakitana ni Jesus nga agtaktakder
sadiay, ngem dina nailasin. 15 “Babai,” sinaludsod ni Jesus, “apay nga
agsangsangitka? Siasino ti sapsapulem?” Impagarup ni Maria nga isu ti
hardinero, ket kinunana kenkuana, “Apo, no sika ti nangipanaw kenkuana,
ibagam man ti nangikabilam ta innak alaen.” 16 “Maria!” kinuna ni Jesus.
Simmango ni Maria ket kinunana kenkuana iti Hebreo, “Rabboni!”
(Kayatna a sawen, “Maestro.”) 17 “Dinak iggaman, ta diak pay nagsubli
ken ni Ama,” kinuna ni Jesus. “Ngem inka ibaga kadagiti kakabsatko nga
agsubliakto iti Amak nga Amayo met, iti Diosko a Diosyo met.” 18 Napan
impadamag ni Maria Magdalena kadagiti adalan a nakitana ti Apo.
Imbagana pay ti insao ti Apo kenkuana. 19 Idi rumabiin iti dayta met la
nga umuna nga aldaw ti lawas, naguurnong dagiti adalan. Imbalunetda ti
balay gapu ta mabutengda kadagiti papangulo a Judio. Napan ni Jesus ket
nagtakder iti ayanda. “Adda koma kappia kadakayo,” kinunana, 20 sana
impakita kadakuada dagiti imana ken ti bakrangna. Kasta unay ti ragsak
dagiti adalan iti pannakakitada iti Apo. 21 Kinuna manen ni Jesus
kadakuada, “Adda koma kappia kadakayo. Kas iti panangibaon kaniak ti
Ama, kasta met ti panangibaonko kadakayo.” 22 Idi masaonan daytoy,
sinang-awanna ida ket kinunana, “Awatenyo ti Espiritu Santo. 23 No
pakawanenyo ti basol dagiti tattao, mapakawanda. No saanyo a
pakawanen ida, saanda met a mapakawan.” 24 Idi nagparang ni Jesus
kadagiti adalan, awan ti maysa kadakuada, ni Tomas a maaw-awagan iti
“Singin.” 25 Impadamag ngarud dagiti dadduma nga adalan kenkuana a
nakitada ti Apo. Kinuna ni Tomas kadakuada, “Diak mamati no diak
makita ken maarikap ti nagdalanan ti lansa kadagiti imana, wenno
masagid ti bakrangna.” 26 Kalpasan ti maysa a lawas, naguurnong manen
dagiti adalan iti uneg ti balay. Adda idi ni Tomas. Nakabalunet dagiti
ruangan, ngem immay ni Jesus ket nagtakder iti ayanda. “Adda koma talna
kadakayo,” kinunana kadakuada, 27 sana kinuna ken ni Tomas, “Kitaem
dagiti imak ken arikapem toy bakrangko. Pukawem ta duaduam ket
mamatika!” 28 “Apok ken Diosko!” kinuna ni Tomas. 29 Kinuna ni Jesus
kenkuana, “Mamatika kadi gapu ta nakitanak? Nagasat dagiti mamati
nupay didak makita!” 30 Adu pay dagiti milagro nga inaramid ni Jesus iti
imatang dagiti adalanna, ngem saan a naisurat iti daytoy a libro. 31 Dagiti
nailanad iti daytoy a libro, naisuratda tapno mamatikayo a ni Jesus isu ti
Cristo nga Anak ti Dios, ket babaen iti daytoy a pammati, maaddaankayo
koma iti biag gapu kenkuana.
Juan 21
1 Kalpasan daytoy, nagparang manen a mismo ni Jesus kadagiti adalanna
iti Dan-aw ti Tiberias. Kastoy ti pannakapasamakna: 2 Adda sadiay da
Simon Pedro, Tomas (a maaw-awagan iti “Singin”), Natanael (ti taga-
Cana idiay Galilea), dagiti annak ni Zebedeo, agraman dua pay nga adalan
ni Jesus. 3 Kinuna ni Simon Pedro kadagiti kaduana, “Innak agkalap.”
“Umaykam met,” kinunada kenkuana. Napanda ngarud ket limmuganda iti
bangka. Ngem pulos nga awan ti naalada iti nagpatnag. 4 Idi lumlumgaken
ti init, nagtakder ni Jesus iti igid ti dan-aw, ngem saan a nailasin dagiti
adalan. 5 Kinuna ngarud ni Jesus kadakuada, “Gagayyem, adda kadi
nakalapanyo?” “Awan a pulos,” insungbatda. 6 Kinunana kadakuada,
“Iwayatyo ti iketyo iti makannawan ti bangka, ket adda maalayo.”
Inwayatda ngarud ti iket, ket saandan a maisang-at gapu iti kaadu ti
naalada nga ikan. 7 Ti adalan a dinungdungngo ni Jesus kinunana ken ni
Pedro, “Isu daytoy ti Apo!” Idi nangngeg ni Simon Pedro nga isu ti Apo,
nagbado (ta nakauksob idi) ket timmappuak iti danum. 8 Ngem nagbati
dagiti dadduma nga adalan iti bilog a mangisangsang-at iti iket a napno iti
ikan. Saanda unay nga adayo iti sang-at. Agsangagasut a metro laeng. 9
Idi nakasang-atdan, nakitada sadiay ti dumardarang a beggang ken ti
matuntuno nga ikan ken sumagmamano a tinapay. 10 Kinuna ni Jesus
kadakuada, “Mangyegkay iti ikan a kaal-alayo.” 11 Napan ni Simon Pedro
iti bangka ket insang-atna ti iket a napno iti dadakkel nga ikan—153 ti
dagupda amin. Nupay adu unay ti ikan, saan a nabsang ti iket. 12 Kinuna
ni Jesus kadakuada, “Umaykayo mamigaten.” Awan kadagiti adalan ti
nakaitured a nagsaludsod kenkuana iti kinasiasinona. Ammoda nga isu ti
Apo. 13 Iti kasta, innala ni Jesus ket ti tinapay ken ti ikan sana inted
kadagiti adalanna. 14 Daytoy ti maikatlo a panagparang ni Jesus kadagiti
adalanna kalpasan ti pannakapagungarna. 15 Kalpasan ti panamigatda,
kinuna ni Jesus ken ni Simon Pedro, “Simon nga anak ni Juan, ad-adda
kadi ti panangdungngom kaniak ngem dagitoy?” “Wen, Apo,”
insungbatna, “ammom nga ay-ayatenka.” Kinuna ni Jesus kenkuana,
“Aywanam dagiti urbon a karnerok.” 16 Pinidua ni Jesus a sinaludsod,
“Simon nga anak ni Juan, dungdungngoennak kadi?” “Wen, Apo,”
insungbatna, “ammom nga ay-ayatenka.” Kinuna ni Jesus kenkuana,
“Aywanam dagiti karnerok.” 17 Pinitlo ni Jesus a sinaludsod, “Simon nga
anak ni Juan, ay-ayatennak kadi?” Nagliday ni Pedro gapu ta namitlon a
sinaludsod ni Jesus kenkuana, “Ay-ayatennak kadi?” Kinuna ni Pedro,
“Apo, ammom amin a banag. Ammom nga ay-ayatenka!” Kinuna ni Jesus
kenkuana, “Aywanam dagiti karnerok. 18 Ibagak ti pudno kenka: Idi
kabambanuagam, sika ti mangbarbarikes iti bagim ket mapanka iti
sadinoman a kayatmo a papanan. Ngem inton lumakaykan, sabalinto ti
mangbarikes kenka sanaka ipan iti dimo kayat a papanan.” 19 (Iti
panangisao ni Jesus iti daytoy, impakaammona no kasano ti ipapatay ni
Pedro tapno maidaydayaw ti Dios.) Kalpasanna, kinuna ni Jesus kenkuana,
“Surotennak.” 20 Timmaliaw ni Pedro. Nakitana a sumursurot ti adalan a
dinungdungngo ni Jesus. Daytoy ti adalan a nagsadag ken ni Jesus iti
daydi panangrabii tapno saludsodenna no siasinonto ti mangliput iti Apo.
21 Idi makita ni Pedro ti adalan, kinunana ken ni Jesus, “Apo, anianto
ngarud ti mapasamak iti daytoy a tao?” 22 “No kayatko nga agbiag
agingga iti yaayko, apay a maseknanka?” insungbat ni Jesus.
“Surotennak!” 23 Gapu itoy, nagdinamag kadagiti pasurot ni Jesus a dinto
matay daytoy nga adalan. Ngem saan nga imbaga ni Jesus a dinto matay
daytoy a tao, no di ket kinunana, “No kayatko nga agbiag agingga iti
yaayko, apay a maseknanka?” 24 Daytoy ti adalan a nagsao maipapan
kadagitoy a bambanag ken nangisurat pay kadagitoy. Ammomi a pudno ti
pammaneknekna. 25 Wen, adu pay dagiti sabali nga inar-aramid ni Jesus.
No maisuratda koma amin, pagarupek a di malaon ti lubong dagiti libro a
pakaisuratanda.
Aramid 1
1 Ay-ayatek a Teofilo, Iti immuna a librok, insuratko amin nga inar-
aramid ken insursuro ni Jesus, manipud panangirugina iti trabahona 2
agingga iti aldaw a yuulina sadi langit. Sakbay ti yuulina babaen iti
pannakabalin ti Espiritu Santo, binilinna dagiti pinilina nga apostoles. 3 Iti
las-ud ti 40 nga aldaw kalpasan ti ipapatayna, namin-adu a nagparang
kadakuada iti nadumaduma a wagas a mangpaneknek a pudno a sibibiag.
Nakitada ni Jesus ket sinaritana kadakuada ti maipapan iti Pagarian ti
Dios. 4 Idi naguurnongda, imbilin ni Jesus kadakuada: “Dikayo
pumampanaw ditoy Jerusalem, ta urayenyo ti inkari ti Ama kas imbagak
kadakayo. 5 Namuniag ni Juan iti danum, ngem kalpasan ti sumagmamano
pay nga aldaw, mabuniagankayto iti Espiritu Santo.” 6 Idi naguurnong
dagiti apostoles, sinaludsodda ken ni Jesus, “Apo, isublim kadi itan ti
Pagarian iti Israel?” 7 Simmungbat ni Jesus: “Intuding ni Amak, babaen iti
turayna, dagiti tiempo ken pasamak ket saan a masapul a maammoanyo
ida. 8 Ngem inton umay kadakayo ti Espiritu Santo, maikkankayto iti
pannakabalin. Dakayto ti mangpaneknek iti maipapan kaniak idiay
Jerusalem, iti entero a Judea ken Samaria, agingga iti amin a suli ti daga.”
9 Kalpasan ti panangisaona iti daytoy, nakitada a nayuli sadi langit, ket
adda ulep a nanglinged kenkuana iti imatangda. 10 Tumangtangadda pay
laeng a kumitkita kenkuana idi pagammoan, nagparang iti abayda ti dua a
lallaki a nagkawes iti puraw. 11 “Lallaki a taga-Galilea,” kinunada, “apay
nga agtaktakderkayo a tumangtangad iti langit? Daytoy Jesus a nayuli
sadiay a naggapu iti ayanyo, agsublinto iti wagas a kas iti pannakakitayo
kenkuana a napan sadiay.” 12 Nagsubli dagiti apostoles idiay Jerusalem
manipud idiay Bantay Olivo. Agarup a maysa a kilometro ti nagbaetan
dagitoy dua a disso. 13 Idi makagtengda sadiay, napanda iti dagusda a
balay ket nagtarusda iti akingngato a kuarto. Isuda da Pedro, Juan,
Santiago ken Andres, Felipe ken Tomas, Bartolome ken Mateo, Santiago
nga anak ni Alfeo, Simon a Patriota ken ni Judas nga anak ni Santiago. 14
Masansan a sangsangkamaysada amin nga agkarkararag agraman dagiti
sumagmamano a babbai ken ni Maria nga ina ni Jesus ken dagiti lallaki a
kakabsatna. 15 Kalpasan ti sumagmamano nga aldaw, naguurnong ti
agsangagasut ket duapulo a mamati. Nagtakder ni Pedro iti sangoananda
ket kinunana: 16 “Kakabsatko, masapul a matungpal ti paset ti Nasantoan
a Surat, kas impadto ti Espiritu Santo babaen ken ni David iti maipapan
ken ni Judas a nangidaulo kadagiti nangtiliw ken ni Jesus. 17 Kaduami idi,
ta napili met a makipagakem iti daytoy a panagserbi.” ( 18 Sangadisso a
daga ti nakaigatangan ti kuarta nga inawat ni Judas a kas supapak iti dakes
nga inaramidna. Sadiay ti nakatayanna idi matnag nga immuna a nagdisso
ti ulona. Bimtak ti tianna ket naiwarawara dagiti bagisna. 19 Nadamag
daytoy dagiti amin nga agnanaed idiay Jerusalem ket pinanagananda dayta
a daga iti “Akeldama” a kayatna a sawen, “Daga ti Dara.”) 20 “Nailanad
iti libro dagiti Salmo: ‘Mabaybay-an ti balayna, Ket awan ti agyan iti
unegna.’ Naisurat pay: ‘Adda sabali a mangala iti akemna.’ 21-22
“Pumilitayo ngarud iti maysa a kaduami a kas saksi iti panagungar ni Apo
Jesus. Masapul a maysa kadatayo a kanayon a kimmuykuyog kenkuana,
manipud panangikasaba ni Juan iti mensahena iti pannakabuniag agingga
iti pannakayuli ni Jesus sadi langit.” 23 Ngarud, nangisingasingda iti dua a
lallaki: ni Matias ken ni Jose a managan “Barsabas” (managan pay
“Justo”). 24 Kalpasanna, inkararagda, “Apo, ammom ti pampanunoten ti
tunggal maysa. Ipakitam koma kadakami no siasino kadagiti dua ti pinilim
25 nga agserbi a kas apostol a mangsukat ken ni Judas a napan iti lugar a
kaikarianna.” 26 Nagbibinnunotda ket napili ni Matias. Nainayon kadagiti
sangapulo ket maysa nga apostoles.
Aramid 2
1 Idi dumteng ti aldaw ti Pentecostes, naurnongda amin iti maysa a lugar.
2 Pagammoan, nakangngegda iti daranudor a naggapu sadi langit; kasla
ungor ti napigsa nga angin a nangpunno iti entero a balay nga ayanda. 3
Nakakitada kadagiti sinan-dila nga apuy a nagwaras ken saggaysa a
nagdisso iti tunggal maysa kadagiti adda sadiay. 4 Iti kasta, napnoda amin
iti Espiritu Santo ket nangrugida nga agsao iti nadumaduma a pagsasao,
kas inted ti Espiritu kadakuada. 5 Adda dagiti relihioso a tattao nga
agnanaed idiay Jerusalem a naggapu iti nadumaduma a pagilian ditoy
lubong. 6 Idi mangngegda ti daranudor, nagsasangpet ti adu a tattao.
Nasdaawda amin ta nangngegda ida nga agsasao kadagiti bukodda a
pagsasao. 7 Gapu iti napalalo a siddaawda, kinunada, “Saan aya a taga-
Galilea dagitoy a tattao? 8 Apay ngarud nga agsasaoda iti
nakayanakantayo a pagsasao? 9 Adda kadatayo ti taga-Partia, Media ken
Elam; taga-Mesopotamia, Judea, Capadocia, Ponto ken Asia. 10 Adda pay
kadatayo dagiti taga-Frigia ken Pamfilia, Egipto ken dagiti sakup ti Libya,
iti asideg ti Cirene. Adda met taga-Roma, Judio ken Hentil a napasurot iti
Judaismo. 11 Naggapu met ti dadduma idiay Creta ken Arabia. Nupay
kasta, mangngegtayo amin ida nga agsasao iti pagsasaotayo maipapan
kadagiti naindaklan nga aramid ti Dios!” 12 Nasdaawda amin ket saanda a
mailawlawag daytoy, isu a nagsisinnaludsodda, “Ania ti kaipapanan
daytoy?” 13 Ngem adda dagiti nangrabrabak kadagiti mamati. “Nabartek
dagitoy a tattao,” kinunada. 14 Timmakder ngarud ni Pedro ken dagiti 11
nga apostoles, ket kinunana iti napigsa a timek, “Padak a Judio ken
kadakayo nga agnaed iti Jerusalem! Palubosandak a mangilawlawag iti
kaipapanan daytoy. 15 Saan a nabartek dagitoy a tattao a kas ipagarupyo,
gapu ta alas nuebe pay laeng iti bigat. 16 Ngem daytoy ti kinuna ni profeta
Joel: 17 ‘Daytoy ti aramidekto kadagiti maud-udi nga aldaw, kuna ti Dios,
Ibuyatkonto ti Espirituk iti sangkataoan. Ipakaammonto dagiti annakyo ti
mensahek; Makakitanto iti sirmata dagiti agtutuboyo a lallaki; Ket
agtagtagainepto dagiti lallakay kadakayo. 18 Uray kadagiti adipenko,
lalaki man wenno babai, Ibuyatkonto ti Espirituk kadagita nga aldaw, Ket
ipakaammodanto ti mensahek. 19 Agipakitaakto kadagiti pagsidsiddaawan
sadi langit, Ken milagro ditoy daga. Addanto dara, apuy, ken napuskol nga
asuk. 20 Agsipngetto ti init, Ket kaslanto dara a lumabaga ti bulan Sakbay
ti idadateng ti naindaklan ken nadayag nga Aldaw ti Apo. 21 Ket
maisalakanto ti amin nga agpatulong iti Apo.’ 22 “Kakabsat nga Israelita,
denggenyo dagitoy innak ibalikas! Nadiosan a panggep ti nakaibaonan ni
Jesus a taga-Nazaret. Napaneknekan kadagiti milagro, datdatlag ken
pagilasinan nga inaramid ti Dios babaen kenkuana. Ammoyo daytoy ta
naaramidda iti imatangyo. 23 Kas mayannurot iti bukodna a plano,
inkeddengna a mayawat ni Jesus kadakayo. Pinapatayyo—pinalubosanyo
dagiti managbasol a nangilansa kenkuana iti krus. 24 Ngem pinagungar ti
Dios agsipud ta winayawayaanna manipud pannakabalin ni patay. Saan
ngamin a mabalin nga iturayan ni patay. 25 Ta kinuna ni David maipapan
kenkuana: ‘Kankanayon a makitak ti Apo iti sangoanak; Adda iti
makannawanko tapno awan makagaraw kaniak. 26 Gapu iti daytoy,
naragsak toy pusok, napnoan rag-o toy dilak; Ket nupay maysaak la a tao,
sitatalgedak a mangnamnama. 27 Iti lubong dagiti natay dimonto baybay-
an toy kararua; Dimonto ipalubos nga agrupsa toy nasantoan nga
adipenmo. 28 Impakaammom kaniak ti dalan nga agturong iti biag. Iti
sidongmo, iti rag-o malapunosak.’ 29 “Kakabsat, masapul nga
ilawlawagko kadakayo ti maipapan ken ni Ari David a kapuonantayo.
Natay ken naitanem, ket agpapan ita adda ti tanemna iti sidongtayo. 30
Maysa a profeta ni Ari David ket ammona ti inkari ti Dios kenkuana.
Insapata ti Dios a pagbalinennanto nga ari a kas kenkuana ti maysa
kadagiti kaputotanna. 31 Ammo ni David a mapasamakto daytoy ket
nagsao ti maipapan iti panagungar ti Cristo idi kinunana: ‘Saan a
nabaybay-an iti lubong dagiti natay, Saan a nagrupsa ti bagina.’ 32 Daytoy
met laeng a Jesus ti pinagungar ti Dios. Nasaksianmi amin daytoy a banag.
33 Naitan-ok iti makannawan ti Dios nga Amana ket inawatna kenkuana ti
Espiritu Santo kas inkarina. Daytoy ti imbuyatna kas makitkita ken
mangmangngegyo ita. 34 Ta saan a ni David ti immuli sadi langit, ngem
kinunana ketdi: ‘Kinuna ti Apo iti Apok: Agtugawka ditoy
makannawanko, 35 Agingga a maparmekko dagiti kabusormo Ket addada
iti babaem.’ 36 “Ammoen ngarud ti amin a tattao iti Israel nga awan
duadua a daytoy Jesus nga inlansayo iti krus ket pinagbalin ti Dios nga
Apo ken Cristo!” 37 Kasta unay ti pannakariribuk dagiti tattao idi
mangngegda daytoy. Kinunada ken ni Pedro ken kadagiti apostoles, “Ania
ngarud ti aramidenmi, kakabsat?” 38 Kinuna kadakuada ni Pedro,
“Agbabawikayo kadagiti basbasolyo. Pabuniagankayo iti nagan ni Jesu-
Cristo tapno mapakawan dagiti basbasolyo ket awatenyonto ti sagut ti
Espiritu Santo. 39 Agpaay daytoy a kari kadakayo ken kadagiti annakyo,
kasta met kadagiti amin nga adda iti adayo. Wen, maipaay iti tunggal
maysa nga ayabanto ti Apo a Diostayo iti sidongna.” 40 Adu pay ti insao
ni Pedro a pammaneknek a pangguyugoyna kadakuada. Kinunana,
“Isalakanyo dagiti bagbagiyo iti dusa a maipatayto iti daytoy
managdakdakes a kaputotan!” 41 Adu kadakuada ti namati iti saona ket
nabuniaganda. Iti dayta nga aldaw, ag-3,000 a tattao ti nainayon
kadakuada. 42 Inaramatda ti tiempoda a nagsursuro kadagiti apostoles.
Nakikadkaduada kadakuada, nakipimpinnisida iti tinapay ken
nagmaymaysada iti panagkarkararag. 43 Adu a milagro ken pagilasinan ti
inaramid dagiti apostoles, ket timmaud kadagiti tattao ti panagbuteng ken
panagraem. 44 Nadekket ti panaglalangen dagiti amin a mamati ken
nagririnnanudda iti sanikua. 45 Inlakoda dagiti dagdaga ken dadduma pay
a sanikuada sada imbunong ti naglakoanda, segun ti kasapulan ti tunggal
maysa. 46 Inaldaw a mapanda a sangsangkamaysa iti Templo. Siaayat ken
siraragsakda a nagkakapangan kadagiti balbalayda. 47 Indaydayawda ti
Dios ket nagraem kadakuada dagiti amin a tao. Tunggal aldaw, innayon ti
Apo iti gimongda dagiti tattao a maisalakan.
Aramid 3
1 Iti maysa a malem, iti alas tres nga oras ti panagkararag, napan da Pedro
ken Juan iti Templo. 2 Iti asideg ti ruangan nga aw-awagan dagiti tattao iti
“Napintas a Ruangan,” adda maysa a lalaki a pilay. Nayanak a pilay ket
inaldaw a bagkatenda nga ipan sadiay tapno makilimos kadagiti sumrek iti
Templo. 3 Idi makitana da Pedro ken Juan a sumrek iti Templo, dinawatna
a limosanda. 4 Pinerrengda ti lalaki ket kinuna ni Pedro, “Kitaennakami.”
5 Kimmita a dagus kadakuada a namnamaenna nga adda itedda kenkuana.
6 Kinuna ni Pedro, “Awan kuartak, ngem itedko kenka ti adda kaniak: iti
nagan ni Jesu-Cristo a taga-Nazaret, ibilinko a magnaka!” 7 Iniggamanna
ti makannawan nga ima ti pilay sana tinulongan a timmakder. Timmibker
a dagus dagiti susuop ti pilay; 8 napalagto a timmakder, ket rinugianna ti
nagna. Naglaglagto a kimmuyog kadakuada a simrek iti Templo ket
sadiay, indaydayawna ti Dios. 9 Nakita dagiti amin a tattao ti pannagna
ken panangidaydayawna iti Dios. 10 Idi mabigbigda nga isu ti agtugtugaw
a makilimlimos iti “Napintas a Ruangan” ti Templo, nasdaaw ken
nagmalangada gapu iti naaramid kenkuana. 11 Idi kumkumpet ti lalaki
kada Pedro ken Juan, nasdaaw dagiti tattao ket nagtatarayda nga
immasideg kadakuada iti Pasilio ni Solomon. 12 Idi makita ni Pedro dagiti
tattao, kinunana kadakuada, “Kakabsat nga Israelita, apay a masdaawkayo
iti daytoy a napasamak? Apay a kasta ti panagkitayo kadakami?
Pagarupenyo aya a pinapagnami daytoy a tao iti bukodmi a pannakabalin
wenno kinasanto? 13 Ti Dios da Abraham, Isaac ken Jacob—ti Dios dagiti
kapuonantayo—intan-okna ni Jesus nga adipenna, ni Jesus nga inyawatyo
kadagiti agtuturay, ket linaksidyo iti saklang ni Pilato uray idi nalpasnan
nga inkeddeng ti pannakawayawayana. 14 Wen, linaksidyo ti Nasantoan
ken Nalinteg. Dinawatyo ketdi a wayawayaan ni Pilato ti maysa a
mammapatay. 15 Pinatayyo ti mangiturong iti pudno a biag, ngem
pinagungar ti Dios, ket dakami ti makapaneknek iti daytoy a banag. 16 Ti
pannakabalin ti naganna ti nangpapigsa iti daytoy a tao. Ti makita ken
ammoyo ket naaramid babaen ti pammati ti naganna; ti pammati ken ni
Jesus ti nangpaimbag iti daytoy a tao kas makitayo amin. 17 “Kakabsatko,
ammok a diyo ammo ti inaramidyo, kasta met dagiti turayenyo. 18 Ngem
kastoy ti panangipatungpal ti Dios iti nabayagen nga impakaammona
babaen kadagiti amin a profeta, a masapul nga agsagaba ti Cristona. 19
Agbabawikayo ngarud ket agsublikay iti Dios tapno pakawanenna dagiti
basbasolyo. No aramidenyo daytoy, 20 yegto ni Apo Dios dagiti panawen
a panaginanayo, ket ibaonnanto pay ni Jesus, ti Cristo a tinudingannan nga
agpaay kadakayo. 21 Masapul nga agtaeng sadi langit agingga iti tiempo a
pannakapabaro ti amin kas impakaammo ti Dios babaen kadagiti
nasantoan a profetana kadagidi immun-una nga aldaw. 22 Kinuna ni
Moises: ‘Ibaonto kadakayo ti Apo a Diosyo ti maysa a profeta a kas iti
panangibaonna kaniak, ket maysanto kadagiti tattaoyo. Masapul a
tungpalenyo ti amin nga ibagana nga aramidenyo. 23 Ti siasinoman a saan
nga agtungpal iti sao dayta a profeta, mailaksidto kadagiti tattao ti Dios
ket madadaelto.’ 24 Impakdaar dagiti profeta, manipud ken ni Samuel ken
dagiti simmarsaruno kenkuana, ti maipapan kadagiti paspasamak
kadagitoy nga aldaw. 25 Agpaay kadakayo dagiti inkari ti Dios babaen
kadagiti profeta, ket mairamankay iti katulagan ti Dios kadagiti
kapuonanyo idi kinunana ken ni Abraham: ‘Bendisionakto amin a tattao
ditoy daga babaen kadagiti kaputotam.’ 26 Daytoy ti gapuna a pinili ti
Dios ti Adipenna ket imbaonna nga immuna kadakayo tapno
bendisionannakayo babaen iti panamagbabawina kadakayo kadagiti
kinadakesyo.”
Aramid 4
1 Madama pay la nga agsasao da Pedro ken Juan kadagiti tattao idi
sumangpet dagiti papadi, dagiti Saduceo ken ti kapitan dagiti guardia iti
Templo. 2 Napalalo ti rurodda gapu ta isursuro dagiti dua nga apostoles
kadagiti tattao a nagungar ni Jesus ket daytoy ti pammaneknek nga
agungarto dagiti natay. 3 Tiniliwda ida, ket agsipud ta rumabiin,
impupokda ida iti pagbaludan inggana iti sumaruno nga aldaw. 4 Ngem
adu ti namati kadagiti nakangngeg iti mensahe da Pedro ken Juan.
Aglimaribun ti bilang dagiti lallaki. 5 Kabigatanna, naguummong idiay
Jerusalem dagiti papangulo a Judio, dagiti panglakayen ken dagiti
mamaestro iti Linteg. 6 Nakimitingda kada Anas a Kangatoan a Padi, da
Caifas ken Juan, ni Alejandro ken dadduma pay a kamkameng ti familia ti
Kangatoan a Padi. 7 Pinatakderda da Pedro ken Juan iti sangoananda sada
sinaludsod, “Kasano a naaramidyo daytoy? Ania a pannakabalin wenno
ania a nagan ti inaramatyo?” 8 Simmungbat ni Pedro a napno iti Espiritu
Santo: “Appo nga agtuturay ken panglakayen, 9 no mausigkami ita nga
aldaw gapu iti imbag nga impaaymi iti daytoy a pilay ken no kasano a
naimbagan, 10 rebbengyo amin nga ammoen, kasta met dagiti amin a
tattao iti Israel, a sitatakder ita iti imatangyo daytoy a tao a pudno a
naimbaganen babaen iti pannakabalin ti nagan ni Jesu-Cristo a taga-
Nazaret—isu nga inlansayo iti krus ngem pinagungar ti Dios. 11 Ni Jesus
ti sarsaritaen daytoy a paset ti Nasantoan a Surat: ‘Ti bato nga
imbellengyo, dakayo nga agpatpatakder, Nagbalin a kangrunaan a bato.’
12 Isu laeng ti pakasarakantayo iti pannakaisalakan. Iti entero a lubong,
awan sabali a nagan nga inted ti Dios kadagiti tattao a mabalintayo a
pakaisalakanan.” 13 Nasdaaw dagiti kamkameng ti Sanhedrin iti tured nga
impakita da Pedro ken Juan, aglalo idi naammoanda a tattaoda laeng a
gagangay ken awanan adal. Daytoy ti nakailasinanda a kadua ida idi ni
Jesus. 14 Ngem awan maibagada a maibusor kadakuada agsipud ta
kitkitaenda ti napaimbag a lalaki nga agtatakder iti abay da Pedro ken
Juan. 15 Imbilinda a pumanaw dagiti apostoles iti kuarto ti Konseho.
Kalpasanda, nagsasaritada ket kinunada iti tunggal maysa, 16 “Ania ti
aramidentayo kadagita a tattao? Ammo amin nga agnaed iti Jerusalem nga
isuda ti akin-aramid iti daytoy naisangsangayan a milagro, ket ditayo
mailibak. 17 Ngem tapno matiped ti ad-adda a panagwaras daytoy a
banag, masapul a ballaagantay ida a didan agsao iti siasinoman iti nagan ni
Jesus.” 18 Pinastrekda manen dagiti dua nga apostoles ket imbilinda
kadakuada a didan agsao wenno mangisuro iti nagan ni Jesus. 19
Insungbat da Pedro ken Juan, “Dakayo ti mangikeddeng no ania ti nalinteg
iti imatang ti Dios: agtulnogkami kadakayo wenno agtulnogkami iti Dios?
20 Saan a mabalin a dimi ipakaammo dagiti nakita ken nangngegmi.” 21
Naing-inget ti panangballaag ti Sanhedrin kadakuada. Kalpasanna,
pinapanawda ida. Nakitada nga awan pambaranda a mangdusa kadakuada,
ta indaydayaw dagiti amin a tattao ti Dios gapu iti napasamak. 22 Nasurok
a 40 ti tawen ti lalaki a nakaaramidan iti daytoy a milagro. 23 Apaman a
nawayawayaan da Pedro ken Juan, nagsublida iti ayan dagiti kakaduada.
Impadamagda ti kinuna dagiti panguloen a papadi ken dagiti panglakayen.
24 Idi mangngegda daytoy, nagmaymaysada a nagkararag iti Dios.
Kinunada, “O Apo a Namarsua iti langit ken daga, iti taaw ken kadagiti
amin nga adda kadakuada! 25 Sika ti nagsao babaen iti Espiritu Santo a
nangtignay ken ni David nga adipenmo ken kapuonanmi idi kinunana:
‘Apay a kasta unay ti pungtot dagiti Hentil? Apay a nagpanggep dagiti
tattao iti awan serserbina? 26 Nagsagana a makigubat dagiti ari ditoy daga,
Naguurnong dagiti agtuturay A bumusor iti Apo a Dios ken iti Cristona.’
27 Awan duadua a kasta ti napasamak: nagtataripnong da Herodes ken
Poncio Pilato, agraman dagiti Hentil ken dagiti Israelita iti daytoy a
siudad. Nagplanoda iti maibusor ken ni Jesus a nasantoan nga Adipenmo,
isu a dinutokam a Cristo. 28 Nagmimitingda a mangipatungpal iti amin a
maaramid nga inkeddengmo idin babaen iti pannakabalin ken pagayatam.
29 Ita, Apo, denggem dagiti pammutbutengda. Tulongannakami nga
adipenmo a mangipakaammo a situtured iti mensahem 30 babaen iti
panangpaimbagmo kadagiti masakit ken panangaramidmo kadagiti
milagro iti nagan ni Jesus a nasantoan nga Adipenmo.” 31 Nagunggon ti
balay a naguummonganda kalpasan ti panagkararagda. Napnoda amin iti
Espiritu Santo, ket situturedda a nangiwaragawag iti sao ti Dios. 32
Sangsangkamaysa idi ti puso ken nakem dagiti mamati. Awan ti
nangibilang a bukodna ti aniaman a kukuana, no di nagbibingayanda ti
amin nga adda kadakuada. 33 Babaen iti naindaklan a pannakabalin,
pinaneknekan dagiti apostoles a nagungar ni Apo Jesus. Ket nawadwad a
parabur ti inted ti Dios kadakuada amin. 34 Awan nagkurangan ti uray
maysa kadakuada. Dagiti addaan iti talon wenno balay inlakoda dagitoy a
kukuada sada inted ti naglakoanda 35 kadagiti apostoles. Naibunong ti
kuarta segun ti kasapulan ti tunggal maysa. 36 Adda idi maysa a Levita
nga agnagan Jose a nayanak idiay Chipre ken pinanaganan dagiti apostoles
iti Bernabe (a kayatna a sawen, “Anak a Mangliwliwa”). 37 Inlakona ti
talonna ket impanna ti kuarta kadagiti apostoles.
Aramid 5
1 Ngem adda maysa a lalaki nga agnagan Ananias. Safira ti nagan ti
asawana. Nangilako iti dagada 2 ngem nangilemmeng iti paset ti
naglakoanna, babaen iti yaanamong ti asawana, sana inted ti dadduma
kadagiti apostoles. 3 Kinuna ni Pedro, “Ananias, apay a pinaiturayanka
ken ni Satanas ket inulbodmo ti Espiritu Santo babaen iti
panangilemmengmo iti dadduma a naglakoam? 4 Sakbay nga inlakom ti
daga, saan aya a sika ti akinkukua? Ket idi inlakom, saan aya a sika ti
akinkukua iti naglakoan? Apay ngarud a napanunotmo nga aramiden ti
kasta? Saan a tao ti inulbodmo, no di ket ti Dios!” 5 Apaman a nangngeg
ni Ananias daytoy, napasag ket natay. Nagbuteng amin a nakadamag iti
daytoy. 6 Simrek dagiti agtutubo a lallaki, binungonda ti bangkay ni
Ananias sada inruar a napan intanem. 7 Agarup tallo nga oras ti napalabas
idi sumrek met ni Safira. Dina ammo ti napasamak iti asawana. 8 “Ibagam
kaniak,” kinuna ni Pedro, “daytoy kadi laeng ti naglakoanyo iti dagayo?”
“Wen,” insungbat ti babai, “dayta la ti naglakoanmi.” 9 Iti kasta, kinuna ni
Pedro, “Apay a nagtulaganyo nga agassawa a suoten ti Espiritu ti Apo?
Denggem dagiti arimpadek! Addan iti ruangan dagiti lallaki a napan
nangitanem iti asawam. Umaydaka met iruar!” 10 Napasag a dagus ni
Safira iti sakaanan ni Pedro ket natay. Idi sumrek dagiti agtutubo a lallaki,
nakitada a natayen ni Safira. Inruarda sada napan intanem iti abay ti
asawana. 11 Napalalo a buteng ti entero nga iglesia ken amin a nakadamag
iti napasamak. 12 Adu a milagro ken datdatlag a banag ti inaramid dagiti
apostoles ket nasaksian dagiti tattao. Masansan nga aguurnong dagiti amin
a mamati idiay Pasilio ni Solomon. 13 Awan ti nakaitured a tumipon iti
bunggoyda a saanda a kadua. Ngem kasta unay ti panangidayaw dagiti
tattao kadakuada. 14 Immadu nga immadu ti timmipon kadakuada—
lallaki ken babbai a namati iti Apo. 15 Gapu iti ar-aramiden dagiti
apostoles, naipan dagiti masakit kadagiti kalkalsada. Naipaiddada kadagiti
papag ken ikamen tapno no lumabas ni Pedro, uray ti anniniwanna laeng ti
manglinong iti dadduma kadakuada. 16 Manipud kadagiti il-ili a
kabangibang ti Jerusalem, inyeg dagiti tattao dagiti masakit ken dagiti
addaan iti dakes nga espiritu. Ket immimbagda amin. 17 Napalalo ti apal ti
Kangatoan a Padi ken dagiti pasurotna a kamkameng ti bunggoy dagiti
Saduceo, ket nagtutulaganda ti aramidenda. 18 Pinatiliwda dagiti apostoles
sada pinaibalud ida. 19 Ngem iti dayta a rabii, maysa nga anghel ti Apo ti
nanglukat kadagiti ruangan ti pagbaludan ket inruarna dagiti apostoles.
Kinunana kadakuada, 20 “Inkay idiay Templo ket ibagayo kadagiti tattao
ti amin a maipapan iti daytoy baro a biag.” 21 Nagtungpal dagiti apostoles.
Idi bumigaten, simrekda iti Templo ket nangisuroda. Pinaayaban ti
Kangatoan a Padi ken dagiti pasurotna dagiti amin a panglakayen a Judio
ket naangay ti maysa a miting ti entero a Sanhedrin. Kalpasanna,
pinaalada dagiti apostoles iti pagbaludan tapno maidatagda iti Sanhedrin.
22 Ngem idi dumteng dagiti ofisiales iti pagbaludan, dida nasarakan dagiti
apostoles. Iti kasta, nagsublida ket impakaammoda iti Sanhedrin, 23 “Itay
sumangpetkam iti pagbaludan, nakitami a nakandadoan a naimbag dagiti
ruangan ket agbambantay dagiti guardia. Ngem idi luktanmi dagiti
ruangan, awan nasarakanmi iti uneg!” 24 Idi mangngeg daytoy ti kapitan
dagiti guardia ti Templo ken dagiti panguloen a papadi, nasdaawda no ania
ti napasamak kadagiti apostoles. 25 Dimteng ti maysa a lalaki ket
imbagana kadakuada, “Denggenyo! Adda idiay Templo dagiti lallaki a
pinaipupokyo iti pagbaludan. Madamada a mangisursuro kadagiti tattao.”
26 Napan ti kapitan ken dagiti soldadona iti Templo, ket innalada dagiti
apostoles. Dida pinilit ida ta maamakda amangan no uboren ida dagiti
tattao. 27 Idi maidatag dagiti apostoles, iti sangoanan ti Sanhedrin, inusig
ida ti Kangatoan a Padi. Kinunana, 28 “Nainget ti panangbilinmi kadakayo
a dikay mangisuro iti nagan daytoy a tao. Kitaenyo ti aramidyo!
Nagwarasen ti pannursuroyo iti entero a Jerusalem, ket kayatyo pay nga
ipabasol kadakami ti ipapatayna.” 29 Simmungbat ni Pedro ken dagiti
dadduma nga apostoles, “Masapul nga agtungpalkam iti Dios, saan nga iti
tao. 30 Ti Dios dagiti kapuonantayo ti nangpagungar ken ni Jesus a
pinapatayyo babaen iti panangilansayo iti krus. 31 Intan-ok ti Dios iti
makannawanna, kas Pangulo ken Mangisalakan, tapno ikkanna dagiti
Israelita iti gundaway nga agbabawi kadagiti basbasolda ket
mapakawanda. 32 Dakami ti makapaneknek kadagitoy, kasta met ti
Espiritu Santo nga isu a sagut ti Dios kadagiti agtulnog kenkuana.” 33
Kasta unay ti pungtot dagiti kamkameng ti Sanhedrin a nakangngeg iti
daytoy ket kayatda a mapapatay dagiti apostoles. 34 Ngem timmakder ti
maysa kadakuada, ni Gamaliel a maysa a Fariseo ken maestro iti Linteg a
pagraeman dagiti amin a tattao. Imbilinna a mairuar pay laeng dagiti
apostoles. 35 Kalpasanna, kinuna iti Sanhedrin, “Kakabsat nga Israelita,
panunotenyo koma a nalaing no ania ti aramidenyo kadagitoy a tattao. 36
Saan pay a nabayag a timmaud ni Teudas a nagpamarang a naindaklan a
pangulo; aguppat a gasut dagiti lallaki a simmurot kenkuana. Ngem idi
napapatay, nawarawara dagiti pasurotna ket nagpukaw ti tignay nga
inrugina. 37 Kalpasanna, nagparang met ni Judas a taga-Galilea idi
panawen ti sensus ket adu ti napasurotna. Napapatay ni Judas ket
nawarawara met dagiti pasurotna. 38 “Ngarud, daytoy ti isingasingko
kadakayo: Diyo bibiangan dagitoy a tattao. Bay-anyo ida! No nagtaud iti
tao daytoy a plano ken aramidda, awanto ti pagbanaganna. 39 Ngem no
nakem ti Dios, diyo mabalin a parmeken ida. Diyo busoren ida amangan
no ti Dios met laeng ti busbusorenyo!” Impangag ti Sanhedrin ti
patigmaan ni Gamaliel. 40 Pinastrekda dagiti apostoles. Pinasaplitda ida
sada imballaag manen kadakuada a dida agsasao iti nagan ni Jesus.
Kalpasanna, winayawayaanda ida. 41 Pimmanaw dagiti apostoles iti
saklang ti Sanhedrin. Kasta unay ti ragsakda ta imbilang ida ti Dios a
maikari nga agsagaba iti pannakaibabain gapu ken ni Jesus. 42 Tunggal
aldaw, idiay Templo ken kadagiti balbalay dagiti tattao, intuloyda ti
nangisuro ken nangikasaba iti Naimbag a Damag maipapan ken ni Jesus, ti
Cristo.
Aramid 6
1 Kadagidi nga aldaw, idi umadu nga umadu ti bilang dagiti adalan,
timmaud ti riri dagiti Judio a Griego ti pagsasaoda ken dagiti sigud a
Judio. Nagreklamo dagiti Judio a Griego ti pagsasaoda a nabaybay-an
dagiti babbai a balo iti bunggoyda iti inaldaw a pannakaiwaras ti rasion. 2
Inayaban ngarud dagiti sangapulo ket dua nga apostoles dagiti amin nga
adalan ket kinunada, “Saan a rumbeng a baybay-anmi ti
pannakaikaskasaba ti sao ti Dios tapno tamingenmi ti pannakaiwaras
dagiti rasion. 3 Pumilikayo ngarud, kakabsat, iti pito a lallaki iti grupoyo a
nasayaat ti damagna, masirib ken napno iti Espiritu Santo. Isuda ti
isaadtayo a mangasikaso kadagitoy a bambanag. 4 Iti kasta,
maipamaysami ti agkararag ken mangasaba.” 5 Naragsakanda amin iti
imbaga dagiti apostoles. Pinilida ni Esteban, maysa a lalaki a natibker iti
pammati ken napno iti Espiritu Santo, agraman da Felipe, Procoro,
Nicanor, Timon, Parmenas ken ni Nicolas, maysa a Hentil a taga-Antiokia
a napasurot dagiti Judio. 6 Indatagda ida kadagiti apostoles. Kalpasan ti
panagkararagda, impatayda ti imada kadakuada. 7 Nagtuloy a nagsaknap ti
sao ti Dios. Immadu dagiti adalan idiay Jerusalem ken adu dagi-ti papadi a
simmurot iti pam-mati. 8 Napnoan parabur ni Esteban ken naan-anay ti
pannakabalin nga inted kenkuana ti Dios. Naindaklan dagiti milagro ken
datdatlag a pagilasinan ti inaramidna iti imatang dagiti tattao. 9 Ngem
adda dagiti simmupiat kenkuana. Isuda dagiti kamkameng ti maysa a
grupo a maaw-awagan iti “Nawayawayaan a Tattao.” Judio dagitoy a taga-
Cirene ken Alejandria. Kaduada dagiti dadduma a Judio a taga-Cilicia ken
Asia a nakisuppiat ken ni Esteban. 10 Ngem natakuatanda a dida kabaelan
ni Esteban gapu iti kinasiribna ken iti Espiritu a nangibaga iti sawenna. 11
Iti kasta, pinasuksokanda ti sumagmamano a lallaki a mangibaga,
“Nangngegmi ni Esteban a nagsao iti maibusor ken ni Moises ken iti
Dios.” 12 Kasta ti panangsugsogda nga agpungtot kenkuana dagiti tattao,
dagiti panglakayen ken dagiti mamaestro iti Linteg. Tiniliwda ni Esteban
sada indatag iti Sanhedrin. 13 Nagiparangda kadagiti ulbod a saksi a
nagkuna, “Di mamingga nga agsasao daytoy a tao kadagiti maibusor iti
daytoy nasagradoan a Templotayo ken iti Linteg ni Moises. 14
Nangngegmi a kunana a rebbaen daytoy Jesus a taga-Nazaret ti Templo
ket balbaliwanna dagiti ugali nga impatawid ni Moises kadatayo!” 15
Minatmatan dagiti amin a kamkameng ti Sanhedrin ni Esteban ket
nakitada a kasla rupa ti maysa nga anghel ti rupana.
Aramid 7
1 Sinaludsod ti Kangatoan a Padi ken ni Esteban, “Agpayso kadi daytoy?”
2 Nagpalawag ni Esteban, “Ammak ken kakabsatko ida! Dumngegkayo
kaniak. Idi adda ni kapuonantayo nga Abraham idiay Mesopotamia sakbay
a napan nagnaed idiay Haran, nagparang kenkuana ti nadayag a Dios 3 ket
kinunana, ‘Panawam ti pagiliam ken dagiti kakabagiam ket inka iti daga
nga ibagak a papanam.’ 4 “Iti kasta, pinanawanna ti pagilianna ket napan
nagnaed idiay Haran. Kalpasan ti ipapatay ti amana, pimmanaw iti dayta a
lugar ket imbaon ti Dios nga umay ditoy a pagilian a pagnanaedanyo ita. 5
Awan ti sanikua nga inted ti Dios ken ni Abraham, uray la koma
sangkadakulapan a daga, ngem inkarina nga agpaay daytoy a daga
kenkuana ken kadagiti kaputotannanto uray awan pay anakna idi. 6
“Kinuna ti Dios kenkuana, ‘Agnaedto dagiti kaputotam a kas ganggannaet
iti sabali a pagilian. Sadiay, matagabudanto ket maparparigatdanto iti uneg
ti 400 a tawen. 7 Ngem dusaekto dagiti tattao a mangtagabu kadakuada.
Pumanawto dagiti kaputotam iti dayta a daga ket agdaydayawdanto kaniak
iti daytoy a lugar.’ 8 “Kas pakakitaan iti daytoy a tulag, inted ti Dios ken
ni Abraham ti seremonia ti pannakakugit. Daytoy ti gapuna a kinugit ni
Abraham ni Isaac iti maikawalo nga aldaw kalpasan ti pannakayanakna.
Kinugit met ni Isaac ni Jacob. Kasta met ti inaramid ni Jacob kadagiti
sangapulo ket dua nga annakna a lallaki, dagiti nalatak a kapuonan ti
pulitayo. 9 “Gapu iti apal dagiti annak ni Jacob, inlakoda ni Jose a
kabsatda ket naipan a kas tagabu idiay Egipto. Ngem adda ti Dios
kenkuana. 10 Tinulongan ti Dios iti aniaman a pakarigatanna. Inikkanna iti
sirib ken naimbag a kababalin idi agparang iti Faraon nga ari ti Egipto.
Dinutokan ti Faraon ni Jose a gobernador iti Egipto ken iti entero a
familiana. 11 “Dimteng ti panagbisin a nakaigapuan ti nakaro a
panagsagaba iti entero nga Egipto ken Canaan. Awan makan a masarakan
dagidi kapuonantayo. 12 Idi madamag ni Jacob nga adda makan idiay
Egipto, imbaonna a mapan sadiay dagiti annakna, isuda a kapuonantayo.
Daytoy ti damo nga ipapanda idiay Egipto. 13 Iti maikadua nga
isasarungkarda, impudno ni Jose kadagiti kakabsatna ti kinasiasinona ket
naammoan ti ari ti Egipto ti maipapan iti familiana. 14 Iti kasta, pinaala ni
Jose ni Jacob nga amana, kasta met dagiti kakabagianna; 75 ti dagupda
amin. 15 “Napan ngarud ni Jacob idiay Egipto ket sadiay ti nakatayanna
agraman dagiti kapuonantayo. 16 Naipan dagiti bangkayda idiay Sikem,
ket naikabilda iti tanem a ginatang ni Abraham kadagiti annak ni Hamor.
17 “Nakaad-adun dagiti kadaraantayo idiay Egipto idi umasideg ti tiempo
a panangtungpal ti Dios iti karina ken ni Abraham. 18 Mangrugrugi idi
nga agturay ti maysa nga ari a saan a makaam-ammo ken ni Jose. 19
Sinikapanna dagiti kapuonantayo. Naranggas kadakuada ket napilitanda a
mangbaybay-a kadagiti tagtagibida iti ruar ti balayda tapno matayda. 20
“Kadagidi a tiempo, nayanak ni Moises, maysa a nalungpo unay nga
ubing. Tallo a bulan a tinagibi dagiti nagannak kenkuana. 21 Idi
nabaybay-an iti ruar, innala ti babai nga anak ti Faraon, ket pinadakkelna a
kas anakna. 22 Iti kasta, naisuro kenkuana ti amin a sirib dagiti taga-
Egipto ket nagbalin a naindaklan a tao iti sao ken aramid. 23 “Idi 40 ti
tawen ni Moises, napanunotna a sarungkaran dagiti padana nga Israelita
tapno ammoenna ti kasasaadda. 24 Nakitana a rangranggasan ti maysa nga
Egipcio ti maysa kadakuada. Napanna tinulongan ket pinatayna ti Egipcio
a kas panangibalesna iti kadaraanna. ( 25 Impagarup ni Moises a
maawatan dagiti kadaraanna nga isut’ usaren ti Dios a mangwayawaya
kadakuada. Ngem dida naawatan.) 26 “Iti sumuno nga aldaw, nakakita iti
dua nga Israelita nga agap-apa ket kayatna a pagkappiaen ida. ‘Gagayyem,
agpadakayo nga Israelita?’ kinunana. ‘Apay nga agkinkinnabilkayo?’ 27
“Ngem induron ti lalaki a mangluglugob iti kadaraanna ket kinunana,
‘Siasino ti nangisaad kenka a mangituray ken mangukom kadakami? 28
Kayatnak kadi a patayen met a kas iti panangpataymo iti Egipcio idi
kalman?’ 29 “Gapu iti daytoy a sao, nagtalaw ni Moises ket napan
nagnaed iti daga ti Midian. Sadiay, nangasawa ket naaddaan iti dua nga
annak a lallaki. 30 “Kalpasan ti uppat a pulo a tawen, nagparang ti maysa
nga anghel ti Dios ken ni Moises iti sumsumged a bassit a kayo iti let-ang
nga asideg ti Bantay Sinai. 31 Nasdaaw ni Moises iti naimatanganna. Idi
asitganna tapno kitaenna a naimbag, nangngegna ti timek ti Apo: 32 ‘Siak
ti Dios dagiti kapuonam, ti Dios ni Abraham, ni Isaac ken ni Jacob.’
“Nagpigerger ni Moises gapu iti butengna ket dina naitured ti kumita. 33
Kinuna ti Apo kenkuana, ‘Ikkatem ta sandaliasmo ta nasantoan a lugar ti
pagtaktakderam. 34 Nakitak ti pannakaparparigat dagiti tattaok idiay
Egipto. Nangngegko ti asugda ket bimmabaak a mangisalakan kadakuada.
Umayka ta ibaonka idiay Egipto.’ 35 “Daytoy met la a Moises ti linaksid
dagiti Israelita idi kinunada, ‘Siasino ti nangisaad kenka a mangituray ken
mangukom kadakami?’ Isu ti imbaon ti Dios a mangituray ken
mangisalakan kadakuada babaen iti tulong ti anghel a nagparang kenkuana
iti sumsumged a kayo. 36 “Inruarna dagiti tattao manipud Egipto, kalpasan
ti panagaramidna kadagiti milagro ken pagsidsiddaawan, kasta met idiay
Nalabaga a Baybay ken idiay let-ang iti las-ud ti 40 a tawen. 37 Daytoy
met la a Moises ti nagkuna kadagiti Israelita, ‘Mangibaonto ti Dios iti
maysa a profeta nga agtaud iti pagilianyo a kas iti panangibaonna kaniak.’
38 Isu daydi adda idiay let-ang a nakitaripnong kadagiti Israelita.
Nakikadkadua kadagiti kapuonantayo agraman ti anghel a nagsao
kenkuana idiay Bantay Sinai. Inawatna dagiti sibibiag a mensahe ti Dios
tapno itedna kadatayo. 39 “Ngem saan a nagtulnog kenkuana dagiti
kapuonantayo. Inwalinda ket tinarigagayanda ti agsubli idiay Egipto. 40
Isut’ gapuna a kinunada ken ni Aaron: ‘Yaramidannakami kadagiti
didiosen a mangidalan kadakami. Dimi ammo no ania ti napasamak iti
daydiay a Moises a nangiruar kadatayo idiay Egipto.’ 41 “Nangaramidda
ngarud iti didiosen a sinan-urbon a baka. Nagidatonanda iti sakrifisio ken
infiestaanda ti aramid ti bukodda nga ima. 42 “Iti kasta, binaybay-an ida ti
Dios. Inyawatna ida nga agdaydayaw kadagiti bituen ti langit, kas naisurat
iti libro dagiti profeta: ‘Tattao ti Israel! Saan a siak ti nangipaayanyo
kadagiti naparti nga animal ken daton, bayat ti uppat a pulo a tawen a
kaaddayo iti let-ang. 43 Ngem inawityo ti tolda ni Moloch, ken ti ladawan
ti bituen ti didiosenyo a Refam. Inaramidyo dagitoy a ladawan a
pagdaydayawanyo. Isut’ gapuna nga ibellengkayto iti labes ti Babilonia.’
44 “Aw-awiten dagidi kapuonantayo ti Tolda ti Tulag idi addada idiay let-
ang. Imbilin ti Dios ken ni Moises nga aramidenna ti tolda, kas
mayannurot iti ladawan a nakita ni Moises. 45 Kalpasanna, tinawid dagiti
kapuonantayo ti tolda kadagiti ammada ket intugotda idi kimmuyogda ken
ni Josue a nangsakup iti daga dagiti tattao a pinapanaw ti Dios iti imatang
dagiti kapuonantayo. Nagyan sadiay agingga iti tiempo ni David. 46 Naay-
ayo ti Dios ken ni David ket dinawatna a mapalubosan a mangbangon iti
balay ti Dios ni Jacob. 47 Ngem ni Solomon ti nangpatakder iti balay nga
agpaay iti Dios. 48 “Nupay kasta, saan nga agnaed ti Kangatoan a Dios
kadagiti balay nga aramid ti tao. Kas kuna ti profeta: 49 ‘Ti langit isu ti
tronok, kuna ti Apo, Ket ti daga ti pagsaadan dagiti sakak. Ania a kita ti
bangonenyo koma a balayko? Sadino ti lugar a mabalinko a paginanaan?
50 Saan aya a siak ti nangaramid amin kadagitoy?’ 51 “Nagtangken met ti
uloyon! Kaskayo la agpuspuso a pagano! Anian a kinatulengyo iti
mensahe ti Dios! Awan dumayo kadagiti kapuonanyo. Kanayon a
sukirenyo met ti Espiritu Santo. 52 Adda kadi profeta a saan a
pinagsagaba dagidi kapuonanyo? Pinatayda dagiti imbaon ti Dios, isuda a
nangipakaammo idi iti yaay ti Nalinteg nga Adipen. Ket ita, liniputan ken
pinatayyo. 53 Dakayo ti immawat iti linteg ti Dios nga inted dagiti
angheles ngem diyo met tinungpal!” 54 Bayat ti panagdengngeg dagiti
kamkameng ti Sanhedrin, agburburek ti darada ket urayda la agngarngariet
iti pungtotda ken ni Esteban. 55 Ngem napno ni Esteban iti Espiritu Santo.
Timmangad sadi langit ket nakitana ti dayag ti Dios ken ni Jesus nga
agtaktakder iti makannawan ti Dios. 56 “Kitaenyo!” kinunana, “silulukat ti
ruangan ti langit ket makitak ti Anak ti Tao a sitatakder iti makannawan ti
Dios!” 57 Nagriawda iti napigsa ket inapputda dagiti lapayagda.
Sangsangkamaysada a dimmarup kenkuana, 58 ket inruarda iti siudad sada
inubor. Imbati dagiti saksi dagiti akinruar a pagan-anayda iti aywan ti
maysa nga agtutubo nga agnagan Saulo. 59 Idi ub-uborenda ni Esteban,
nagkararag iti Apo ket kinunana, “Apo Jesus, awatem toy kararuak!” 60
Nagparintumeng ket impukkawna, “Apo, dimo koma ipabasol daytoy
kadakuada.” Ket natay apaman a naisaona daytoy.
Aramid 8
1-2 Immanamong ni Saulo iti pannakapapatay ni Esteban. Sumagmamano
a lallaki a relihioso ti nangitanem ken ni Esteban, ket kasta unay ti
panangdung-awda kenkuana. Iti dayta met la nga aldaw, nangrugi ti
nakaro a pannakaidadanes ti iglesia idiay Jerusalem. Malaksid kadagiti
apostoles, nawarawara dagiti amin a mamati iti entero a Judea ken
Samaria. 3 Kabayatanna, pinanggep ni Saulo a pukawen ti iglesia. Inulina
dagiti balbalay dagiti mamati, inyulogna ida—lallaki man wenno babbai—
ket pinaibaludna ida. 4 No maipapan kadagiti nawarawara a mamati,
inkaskasabada ti mensahe iti amin a lugar a napananda. 5 Simmalog ni
Felipe iti kangrunaan a siudad ti Samaria ket inkaskasabana ti maipapan iti
Cristo. 6 Sipapasnek dagiti tattao a dimngeg iti mensahe ni Felipe, gapu ta
nadamagda ken mismo a nakitada dagiti milagro nga inaramidna. 7 Nagik-
ikkis a rimmuar dagiti dakes nga espiritu iti adu a naluganan a tattao. Adu
pay ti naimbagan a paralitiko ken pilay. 8 Ket kasta unay ti rag-o dagiti
tattao iti dayta a siudad. 9 Agnanaed sadiay ti maysa a lalaki nga agnagan
Simon. Nagsalsalamangka idi ket nabayag a pinagsidsiddaawna dagiti
Samaritano. Imbagbagana nga isu ket naindaklan a tao, 10 ket sipapasnek
dagiti amin nga agnaed sadiay a dimngeg kenkuana, baknang man wenno
napanglaw. “Dayta a tao isu ti bileg ti Dios a managan iti Naindaklan,”
kinunada. 11 Sigagagarda a dimngeg kenkuana ta nabayag a
pinagsiddaawna ida babaen ti panagsalamangkana. 12 Ngem idi inkasaba
ni Felipe ti maipapan iti Naimbag a Damag ti Pagarian ti Dios ken ti
maipapan ken ni Jesu-Cristo, namatida ket nabuniaganda amin, lallaki
man wenno babbai. 13 Namati met ni Simon ket kalpasan ti
pannakabuniagna, simmurot ken ni Felipe. Kasta unay ti siddaawna idi
makitana dagiti milagro ken pagilasinan nga ar-aramiden ni Felipe. 14
Nadamag dagiti apostoles idiay Jerusalem nga inawat dagiti taga-Samaria
ti sao ti Dios ket imbaonda sadiay da Pedro ken Juan. 15 Idi
simmangpetda, inkararaganda dagiti Samaritano tapno awatenda met ti
Espiritu Santo. 16 Saan pay ngamin a bimmaba kadakuada ti Espiritu
Santo. Nabuniaganda laeng iti nagan ni Apo Jesus. 17 Ket impatay da
Pedro ken Juan ti imada kadakuada ket inawatda ti Espiritu Santo. 18
Nakita ni Simon a naited ti Espiritu Santo kadagiti mamati idi impatay
dagiti apostoles dagiti imada kadakuada. Iti kasta, pinanggepna nga ikkan
da Pedro ken Juan iti kuarta 19 ket kinunana, “Itedyo met kaniak daytoy a
pannakabalin tapno ti siasinoman a pangipatayak kadagiti imak awatenna
met ti Espiritu Santo.” 20 Ngem kinuna ni Pedro kenkuana, “Mailunodka
koma agraman ti kuartam ta ipagarupmo a magatang ti sagut ti Dios! 21
Awan pakaibiangam wenno kalintegam iti trabahomi. Ammo ti Dios a
saan a nadalus ti pusom. 22 Agbabawika iti dayta dakes a panunotmo ket
agdawatka iti Apo a pakawanennaka. 23 Makitak a naapalka unay ken
sibabaludka iti basol.” 24 Kinuna ni Simon kada Pedro ken Juan,
“Pangngaasiyo ta idawdawatandak iti Apo tapno saan a mapasamak
kaniak ti uray ania kadagitoy.” 25 Nagsubli da Pedro ken Juan idiay
Jerusalem kalpasan ti panangibingayda kadagiti tattao iti ammoda
maipapan iti mensahe ti Apo. Iti dalanda, inkaskasabada ti Naimbag a
Damag iti adu a barrio ti Samaria. 26 Kinuna ti maysa nga anghel ti Apo
ken ni Felipe, “Agsaganaka a mapan iti abagatan. Surotem ti dalan nga
agturong idiay Gaza manipud Jerusalem.” (Saanen a madaldalanan daytoy
a kalsada.) 27-28 Nagrubbuat ngarud ni Felipe. Iti dalan, adda maysa nga
eunoko a taga-Etiopia, maysa nga ofisial a mangimaton iti amin a
kinabaknang ti Candace wenno Reyna ti Etiopia. Napan nagdaydayaw iti
Dios idiay Jerusalem. Agawid idin ket silulugan iti karuahena. Bayat ti
panagtaray ti lugan, basbasaenna ti libro nga insurat ni profeta Isaias. 29
Kinuna ti Espiritu Santo ken ni Felipe, “Magnaka iti asideg ti lugan.” 30
Nagtaray ni Felipe nga immasideg ket nangngegna ti ofisial nga agbasbasa
iti libro ni profeta Isaias. Sinaludsod ni Felipe, “Maawatam met laeng ti
basbasaem?” 31 Insungbat ti ofisial, “Kasano a maawatak no awan met
mangipalawag kaniak?” Ket inawisna ni Felipe a makilugan kenkuana. 32
Daytoy a paset ti Nasantoan a Surat ti basbasaenna: “Kasla karnero a
maipan iti pagpartian, Kasla urbon ti karnero a naulimek no mapukisan,
Ket awan a pulos ti inyesngawna. 33 Iti pannakairurumenna, naikkat ti
kalinteganna. Awanto ti makaibaga maipapan iti kaputotanna, Ta
naggibusen ti biagna ditoy daga.” 34 Kinuna ti ofisial ken ni Felipe,
“Sinno kadi ti sarsaritaen ti profeta? Ti bagina kadi wenno sabali?” 35
Nagsao ni Felipe ket manipud iti daytoy a paset ti Nasantoan a Surat,
sinarita ni Felipe ti Naimbag a Damag maipapan ken ni Jesus. 36
Intuloyda ti panagdaliasatda agingga a dimtengda iti lugar nga adda
danum. Kinuna ti ofisial ken ni Felipe, “Adtoy ti danum. Ania ti
makatiped iti panagbuniagko?” 38 Pinagsardeng ngarud ti ofisial ti lugan.
Napanda a dua iti danum ket binuniagan ni Felipe. 39 Idi makasang-atdan,
impanaw ti Espiritu ti Apo ni Felipe ket saanen a nakita ti ofisial. Intuloy
ti ofisial ti panagawidna a siraragsak. 40 Idi makadlaw ni Felipe, adda
gayamen idiay Azoto. Inkaskasabana ti Naimbag a Damag kadagiti amin
nga il-ili a napagnaanna ingganat nakasangpet idiay Cesarea.
Aramid 9
1 Intuloy ni Saulo ti panamutbutengna a mangpapatay kadagiti adalan ti
Apo. Napan iti Kangatoan a Padi 2 ket dimmawat iti surat a mangyam-
ammo kenkuana kadagiti sinagoga dagiti Judio idiay Damasco tapno
mapalubosan a mangtiliw iti siasinoman a masarakanna a sumursurot iti
Baro a Dalan, lalaki man wenno babai, ket ipanna ida idiay Jerusalem. 3
Iti dalanna nga agpa-Damasco, idi makaasidegen iti siudad, pagammoan la
ta nagraniag ti lawlawna iti makasisirap a lawag a naggapu iti tangatang. 4
Napasag iti daga ket nangngegna ti timek a nagkuna, “Saulo, Saulo, apay
nga idadanesnak?” 5 “Siasinoka, Apo?” sinaludsod ni Saulo. “Siak ni
Jesus nga idaddadanesmo,” kinuna ti timek. 6 “Ngem tumakderka, ket
inka iti siudad ket maibaganto kenka ti aramidem.” 7 Nagsardeng dagiti
lallaki a kinakuyog ni Saulo ket napaumelda. Nangngegda ti timek ngem
awan ti nakitada a tao. 8 Timmakder ni Saulo, immulagatna dagiti matana
ngem saanen a makakita. Iti kasta, kinibinda nga impan idiay Damasco. 9
Tallo nga aldaw a di makakita. Saan met a nangan wenno imminum. 10
Idiay Damasco, adda maysa nga adalan nga agnagan Ananias. Iti maysa a
parmata, kinuna ti Apo kenkuana, “Ananias!” “Adtoyak, Apo,” insungbat
ni Ananias. 11 “Tumakderka,” kinuna ti Apo, “ket inka iti kalsada a
managan Nalinteg. Inka iti balay ni Judas. Damagem sadiay ti maysa a
lalaki nga agnagan Saulo a taga-Tarso. Madama nga agkarkararag ita. 12
Nakitana iti maysa a parmata ti maysa a lalaki nga agnagan Ananias a
simrek iti yanna ket impatayna dagiti imana kenkuana tapno makakita
manen.” 13 Ngem insungbat ni Ananias, “Apo, adun ti nadamdamagko
maipapan iti daytoy a lalaki ken kadagiti nakabutbuteng nga inaramidna
kadagiti tattaom idiay Jerusalem. 14 Immay ditoy Damasco nga addaan
pammalubos dagiti panguloen a papadi tapno tiliwenna dagiti amin nga
agdaydayaw kenka.” 15 Kinuna ti Apo kenkuana, “Mapanka, ta isu ti
pinilik nga agserbi kaniak, tapno ipakaammona ti naganko kadagiti Hentil,
kadagiti ari ken kadagiti Israelita. 16 Ipakitakto kenkuana dagiti amin a
masapul a sagabaenna gapu kaniak.” 17 Iti kasta, napan ni Ananias.
Simrek iti balay ket impatayna dagiti imana ken ni Saulo. “Kabsat a
Saulo,” kinunana, “imbaonnak ni Apo Jesus a nagparang kenka iti dalan
idi umayka ditoy tapno makakitaka manen ken mapnoka iti Espiritu
Santo.” 18 Dagus a naregreg dagiti kasla siksik ti ikan manipud kadagiti
mata ni Saulo ket nakakita manen. Timmakder ket nabuniagan. 19
Kalpasan ti pannanganna, simmubli ti pigsana. Sumagmamano nga aldaw
a nakipagyan ni Saulo kadagiti adalan idiay Damasco. 20 Napan a dagus
kadagiti sinagoga ket inkaskasabana ti maipapan ken ni Jesus. “Isu ti Anak
ti Dios,” kinunana. 21 Nasdaaw dagiti amin a nakangngeg kenkuana ket
kinunada, “Saan aya nga isu daytoy ti nangparparigat kadagiti tattao nga
umaw-awag iti nagan ni Jesus idiay Jerusalem? Saan aya nga immay ditoy
tapno tiliwenna dagiti mamati ket ipanna ida a sirereppet kadagiti
panguloen a papadi?” 22 Ngem immad-adda ti bileg ni Saulo a mangasaba
ket sipipinget a nangpaneknek a ni Jesus isu ti Cristo. Saan a nakasungbat
dagiti Judio nga agnaed idiay Damasco. 23 Kalpasan ti adu nga aldaw,
nagmimiting dagiti Judio ket nagtutulaganda a patayen ni Saulo. 24 Ngem
naipakaammo kenkuana ti panggepda. Aldaw-rabii a pinadpadaananda iti
ruangan ti siudad tapno patayenda. 25 Ngem iti maysa a rabii, innala dagiti
pasurotna ket inkabilda iti kuribot sada imbaba iti abut ti bakud ti siudad.
26 Napan ni Saulo idiay Jerusalem ket pinanggepna ti makitipon kadagiti
adalan. Ngem saanda a namati a maysa nga adalan ket nagbutengda amin
kenkuana. 27 Iti kasta, napan tinulongan ni Bernabe ket intulodna kadagiti
apostoles. Impalawag ni Bernabe kadakuada no kasano ti pannakakita ni
Saulo iti Apo iti dalan ken ti pannakisao ti Apo kenkuana. Impadamagna
pay kadakuada ti tured ni Saulo a nangaskasaba idiay Damasco iti nagan
ni Jesus. 28 Iti kasta, nakipagyan ni Saulo kadakuada. Sinursorna ti entero
a Jerusalem ket awan butengna a nangasaba iti nagan ti Apo. 29 Nagsao
ken nakisuppiat pay kadagiti Judio a Griego ti pagsasaona, ngem kayatda a
papatayen. 30 Idi maammoan daytoy dagiti kakabsat iti pammati, impanda
ni Saulo idiay Cesarea ket pinagawidda idiay Tarso. 31 Iti kasta, awanen ti
panagsagaba ti iglesia iti entero a Judea, Galilea ken Samaria. Babaen iti
tulong ti Espiritu Santo, pimmigsa ken immadu dagiti mamati ket nagbiag
dagiti kamkameng a managbuteng iti Dios. 32 Sinursor ni Pedro ti amin a
lugar. Iti naminsan, sinarungkaranna dagiti tattao ti Dios nga agnaed idiay
Lidda. 33 Nasarakanna sadiay ti maysa a lalaki nga agnagan iti Eneas.
Paralitiko daytoy ket walo a tawenen a sidadalit. 34 Kinuna ni Pedro
kenkuana, “Eneas, paimbagennaka ni Jesu-Cristo. Bumangonka ket
idulinmo ta iddam.” Dinagdagus ni Eneas ti bimmangon. 35 Nakita dagiti
amin a taga-Lidda ken taga-Sarona ni Eneas ket namatida iti Apo. 36 Idiay
met Joppe, adda adalan a babai nga agnagan Tabita. Imbukbokna ti amin a
panawenna nga agaramid kadagiti naimbag ken tumulong kadagiti
napanglaw. 37 Iti dayta a tiempo nagsakit ni Dorcas ket natay.
Binuggoanda ti bangkayna sada immassayag iti akingngato a kuarto. 38
Asideg ti Joppe idiay Lidda. Idi nadamag dagiti adalan a taga-Joppe nga
adda ni Pedro idiay Lidda, nangibaonda iti dua a lallaki a mangkiddaw
kenkuana a dagdagusenna koma ti mapan idiay Joppe. 39 Nagrubbuat
ngarud ni Pedro ket nakikuyog kadakuada. Idi sumangpetda, impanda ni
Pedro iti kuarto nga akingngato. Agsangsangit nga immaribungbong dagiti
amin a balo a babbai iti abay ni Pedro ket impakitada kenkuana dagiti
kagay ken dadduma pay a pagan-anay a dinait ni Dorcas idi sibibiag pay.
40 Pinaruarna amin ida sa nagparintumeng a nagkararag. Kalpasanna,
sinangona ti bangkay ket kinunana, “Tabita, bumangonka.” Nagmulagat ni
Dorcas, kinitana ni Pedro ket nagtugaw. 41 Iniggaman ni Pedro ti imana
sana pinatakder. Inayabanna dagiti tattao ti Dios ken dagiti balo ket
imparangna kadakuada ni Dorcas a sibibiag. 42 Nagdinamag daytoy a
pasamak iti entero a Joppe ket adu dagiti namati iti Apo. 43 Nagyan ni
Pedro idiay Joppe iti adu nga aldaw, iti balay ni Simon nga agkurkurte iti
lalat.
Aramid 10
1 Adda idi idiay Cesarea ti maysa a lalaki nga agnagan Cornelio a kapitan
dagiti soldado iti rehimento ti armada ti Roma a maaw-awagan
“Rehimento Italiana.” 2 Relihioso ken managdaydayaw iti Dios, kasta met
ti familiana. Adun ti intultulongna kadagiti napanglaw a Judio ken
kanayon nga agkararag iti Dios. 3 Agarup alas tres iti malem idi
agparmata: nakitana a simrek iti balayna ti maysa nga anghel ti Dios ket
kinunana kenkuana, “Cornelio.” 4 Sibubuteng a minatmatan ni Cornelio ti
anghel ket kinunana, “Ania kadi, Apo?” Kinuna ti anghel, “Impangag ti
Dios dagiti kararagmo ken nakitana ti panangtultulongmo kadagiti
napanglaw. 5 Mangibaonka kadagiti tattao a mapan idiay Joppe tapno
sukonenda ti maysa a tao nga agnagan iti Simon nga aw-awaganda iti
Pedro. 6 Adda ita a sangaili ti maysa nga agkurkurte iti lalat, ni Simon nga
agnaed iti igid ti baybay.” 7 Idi nakapanawen ti anghel, inayaban ni
Cornelio ti dua kadagiti babaonenna ken maysa a soldado a managbuteng
iti Dios ken agserserbi kenkuana. 8 Imbagana kadakuada ti napasamak
sana imbaon ida idiay Joppe. 9 Kabigatanna, idi adda dagiti naibaon iti
dalanda ket asidegdan idiay Joppe, napan ni Pedro iti tuktok ti balay idi
dandani tengnga ti aldaw tapno agkararag. 10 Nabisinan bayat ti
panagkarkararagna ket kayatna ti mangan. Ngem idi maisagsagana ti
kanenna, nagparmata. 11 Nakitana a naglukat ti langit ket adda kasla
dakkel nga ules a maipabpababa babaen kadagiti uppat a sulina. 12 Iti
unegna, adda dagiti amin a kita ti animal, agkarkarayam ken atap a
tumatayab. 13 Kinuna ti maysa a timek, “Pedro, tumakderka. Pumartika
ket manganka.” 14 Ngem kinuna ni Pedro, “Saanko a maaramid dayta,
Apo. Ni kaanoman, diak pay nangan iti maibilang a narugit wenno di
rumbeng a kanen.” 15 Nagsao manen ti timek, “Dimo ibilang a narugit ti
dinalusan ti Dios.” 16 Namitlo daytoy a naaramid ket kalpasanna, naguyod
a naipangato sadi langit ti banag a nakitana. 17 Bayat ti panangut-utob ni
Pedro iti kaipapanan ti nakitana iti parmata, simmangpet metten dagiti
imbaon ni Cornelio. Naammoanda no sadino ti ayan ti balay ni Simon ket
idi addadan nga agtatakder iti ruangan, 18 dinamagda no adda Simon
Pedro a nagdagus sadiay. 19 Ut-utoben pay laeng ni Pedro no ania ti kayat
a sawen ti parmata, idi kinuna kenkuana ti Espiritu, “Adda tallo a lallaki
nga agsapsapul kenka. 20 Tumakderka ket umulogka. Dika agkedked a
kumuyog kadakuada ta imbaonko ida.” 21 Immulog ni Pedro ket kinunana
kadagiti lallaki, “Siak ti sapsapulenyo. Apay kadi?” 22 Insungbatda,
“Imbaonnakami ni kapitan Cornelio, maysa a tao a nalinteg,
managdaydayaw iti Dios ken raraemen dagiti amin a Judio. Binilin ti
anghel ti Dios nga awisennaka nga umay iti balayna tapno denggenna ti
aniaman nga ibagam.” 23 Pinastrek ni Pedro ida ket pinaummianna ida.
Kabigatanna, nagrubbuat ni Pedro ket simmurot kadakuada. Kimmuyog
met ti sumagmamano a kakabsat a taga-Joppe. 24 Dimtengda idiay
Cesarea iti sumuno nga aldaw. Paspasungaden ida ni Cornelio agraman
dagiti inawisna a kakabagian ken nadekket a gagayyemna. 25 Idi sumrek
ni Pedro, sinabat ni Cornelio a nagparintumeng ken nagrukbab iti
sangoananna. 26 Ngem pinatakder ni Pedro ket kinunana, “Tumakderka,
ta taoak met a kas kenka!” 27 Nakisarsarita ni Pedro kenkuana idi
sumrekda iti balay. Sadiay, nakitana ti adu a tattao a natipontipon. 28
Kinunana kadakuada, “Pagaammoyo nga iparit ti Lintegmi a makilangen
wenno sumarungkarkami iti saan a Judio. Ngem impakita kaniak ti Dios a
saanko nga ibilang ti siasinoman a narugit wenno natulawan. 29 Iti kasta,
idi pinaayabannak, immayak a situtulok. Damagek ngarud no apay nga
inayabannak.” 30 Kinuna ni Cornelio, “Iti agarup kastoy nga oras tallo nga
aldawen ti napalabas, agkarkararagak ditoy balay iti alas tres ti malem.
Pagammoan, nagtakder iti sangoanak ti maysa a lalaki a makapurar ti
kawesna. 31 Kinunana, ‘Cornelio, impangag ti Dios ti kararagmo ken
nakitana dagiti ar-aramidem a pangtultulong kadagiti napanglaw. 32
Mangibaonka iti mapan idiay Joppe a mangayab ken ni Simon Pedro.
Agdagdagus iti balay ni Simon nga agkurkurte iti lalat, nga agnaed iti igid
ti baybay.’ 33 “Daytoy ti gapuna a pinaayabanka a dagus ket naimbag ta
nayan-anusmo ti immay. Ita, addakami amin ditoy iti imatang ti Dios.
Agur-uraykami a dumngeg iti aniaman nga imbaga ti Apo nga
ipakaammom.” 34 Kalpasanna, nagsao ni Pedro: “Makitakon a pudno nga
awan tao nga idumduma ti Dios. 35 Awatenna ti siasinoman nga agbuteng
kenkuana ken agaramid iti nalinteg, uray ania a puli ti nagtaudanna. 36
Ammoyo ti mensahe nga inted ti Dios kadagiti Israelita, idi
impakaammona ti Naimbag a Damag maipapan iti kappia babaen ken ni
Jesu-Cristo nga Apo ti amin a tao. 37 Ammoyo ti naidumduma a pasamak
a naaramid iti entero a daga ti Judea. Nangrugi amin idiay Galilea
kalpasan ti panangikasaba ni Juan ti maipapan iti pannakabuniag. 38
“Ammoyo ti maipapan ken ni Jesus a taga-Nazaret, ken ti
panangkonsagrar ti Dios kenkuana babaen iti pannangtedna kenkuana iti
Espiritu Santo ken pannakabalin. Iti sadinoman a lugar a napanan ni Jesus,
nagar-aramid iti naimbag ken nangpapaimbag kadagiti pinarparigat ti
Diablo, gapu ta adda kenkuana ti Dios. 39 Dakami ti mangpaneknek iti
amin nga inar-aramidna iti daga dagiti Judio ken idiay Jerusalem. Ket
pinatayda babaen iti panangilansada kenkuana iti krus. 40 Ngem iti
maikatlo nga aldaw, pinagungar ti Dios ket nagparang, 41 saan a kadagiti
amin a tattao no di kadakami laeng a saksi a pinili ti Dios—dakami a
nakilanglang kenkuana iti panganan kalpasan ti panagungarna. 42
Binilinnakam a mangikasaba iti ebanghelio ken mangpaneknek nga isu ti
dinutokan ti Dios a mangukom kadagiti nabiag ken natay. 43 Saksian
dagiti amin a profeta ti maipapan ken ni Jesus a ti siasinoman a mamati
kenkuana, mapakawanto dagiti basbasolna babaen iti pannakabalin ti
naganna.” 44 Agsasao pay laeng ni Pedro idi bimmaba ti Espiritu Santo
kadagiti amin nga agdengdengngeg iti mensahe. 45 Nasdaaw dagiti
mamati a Judio a kinakuyog ni Pedro a naggapu idiay Joppe gapu ta inted
met ti Dios ti Espiritu Santo kadagiti Hentil. 46 Nangngegda nga
agsasaoda kadagiti sabali a pagsasao ken itantan-okda ti Dios. Kinuna ni
Pedro, 47 “Inawat dagitoy a tattao ti Espiritu Santo a kas met iti
panangawattayo idi. Adda aya makaiparit iti pannakabuniagda iti danum?”
48 Iti kasta, imbilinna a mabuniaganda iti nagan ni Jesu-Cristo.
Kalpasanna, dinawatda ken ni Pedro a makipagyan kadakuada iti
sumagmamano nga aldaw.
Aramid 11
1 Nadamag dagiti apostoles ken dagiti kakabsat iti pammati idiay Judea
nga inawat met dagiti Hentil ti sao ti Dios. 2 Idi simmang-at ni Pedro idiay
Jerusalem, binabalaw ti grupo dagiti Judio nga umanamong iti seremonia
ti pannakakugit. 3 Kinunada, “Napanka gayam iti balay dagiti tattao a saan
a nakugit ket nakipanganka pay kadakuada!” 4 Ngarud, sinarita ni Pedro ti
amin a napasamak manipud rugina. Kinunana: 5 “Addaak idi iti siudad ti
Joppe ket madamaak nga agkarkararag idi nagparmataak. Nakitak ti kasla
dakkel nga ules a maipabpababa kadagiti uppat a sulina manipud iti langit.
Nagdisso iti asidegko. 6 Minatmatak a naimbag ti unegna. Nakitak dagiti
nadumaduma a kita ti animal, dagiti narungsot nga ayup, dagiti
agkarkarayam ken dagiti atap a tumatayab. 7 Nangngegko ti maysa a
timek a nagkuna, ‘Tumakderka, Pedro. Pumartika ket agsidaka.’ 8 “Ngem
kinunak, ‘Saanko a maaramid dayta, Apo! Awan pay impaunegko a
maibilang a natulawan wenno saan a rumbeng a kanen.’ 9 “Nagsao manen
ti timek a naggapu sadi langit, ‘Dimo ibilang a narugit ti dinalusan ti
Dios.’ 10 Namitlo a naaramid daytoy. Kalpasanna, naipangato amin sadi
langit. 11 “Iti dayta a kanito, simmangpet iti dagusko a balay dagiti tallo a
lallaki a naggapu idiay Cesarea a mangayab kaniak. 12 Imbaga kaniak ti
Espiritu a diak agkedked a kumuyog kadakuada. Kimmuyog met dagiti
innem a kakabsat iti pammati a taga-Joppe ket napankam idiay Cesarea.
Simrekkami iti balay ni Cornelio. 13 “Imbaga ni Cornelio kadakami a
nakitana ti maysa nga anghel nga agtaktakder iti balayna. Kinuna kano ti
anghel, ‘Mangibaonka iti mapan idiay Joppe a mangayab iti tao nga
agnagan Simon Pedro. 14 Ipalawagnanto kenka ti mensahe a
pakaisalakanam ken ti amin a familiam.’ 15 “Idi rugiak ti agsao, bimmaba
ti Espiritu Santo kadakuada a kas met iti panagbabana kadatayo idi damo.
16 Nalagipko ti kinuna ti Apo, ‘Namuniag ni Juan iti danum, ngem
mabuniagankayto iti Espiritu Santo.’ 17 “Nalawag nga inted ti Dios
kadakuada ti isu met laeng a sagut nga intedna kadatay idi namatitayo ken
ni Apo Jesu-Cristo. Siasinoak ngarud a mangsuppiat iti Dios?” 18 Idi
mangngegda daytoy, nagsardengda a mangbabalaw kenkuana.
Indaydayawda ti Dios. Kinunkunada, “No kasta ngarud, inted met ti Dios
kadagiti Hentil ti gundaway nga agbabawi ken agbiag!” 19 Idi nawarawara
dagiti mamati gapu iti pannakaidadanes a rimsua idi napapatay ni Esteban,
nakadanon ti sumagmamano kadakuada idiay Fenicia, Chipre ken
Antiokia. Impakaammoda ti mensahe kadagiti Judio laeng. 20 Ngem adda
met dagiti napan idiay Antiokia, dagiti mamati a taga-Chipre ken Cirene,
ket inkaskasabada ti mensahe kadagiti Hentil. Impakaammoda kadakuada
ti Naimbag a Damag maipapan ken ni Apo Jesus. 21 Adda kadakuada ti
pannakabalin ti Apo ket adu dagiti namati ken simmurot iti Apo. 22
Nadamag daytoy ti iglesia idiay Jerusalem ket imbaonda ni Bernabe idiay
Antiokia. 23 Idi sumangpet ni Bernabe, naragsakan a nakakita iti parabur
ti Dios kadagitoy a mamati. Binalakadanna ida nga agtalinaed a sipupudno
iti Apo iti amin a pusoda. 24 Naimbag a tao ni Bernabe ket napno iti
Espiritu Santo ken pammati. Iti kasta, adu ti naawisna a nainayon kadagiti
pasurot ti Apo. 25 Napan ngarud ni Bernabe idiay Tarso tapno sapulenna
ni Saulo. 26 Idi nasarakanna, inkuyogna idiay Antiokia. Makatawen a
nakipulpulapolda iti iglesia ket adu dagiti tattao a sinursuroanda. Idiay
Antiokia ti immuna a nakapanaganan dagiti adalan iti Kristiano. 27
Kadagidi nga aldaw, simmalog idiay Antiokia dagiti profeta a naggapu
idiay Jerusalem. 28 Babaen iti pannakabalin ti Espiritu, impadto ni Agabo,
maysa kadagiti profeta, nga adda dakkel a bisin a dandani dumteng iti
entero a lubong. (Napasamak daytoy idi emperador ni Claudio.) 29
Nagnunumoan dagiti adalan ti mangted iti tulong kadagiti kakabsat nga
agnaed idiay Judea segun ti kabaelan nga ited ti tunggal maysa. 30
Inaramidda daytoy ket impaw-itda ti kuarta kadagiti panglakayen sadiay
babaen kada Bernabe ken Saulo.
Aramid 12
1 Kadagidi a tiempo, pinarigat ni Ari Herodes dagiti sumagmamano a
kamkameng ti iglesia. 2 Pinaputolanna ni Santiago a kabsat ni Juan. 3 Idi
makitana a naragsakan dagiti Judio, pinatiliwna met ni Pedro. (Napasamak
daytoy iti Fiesta ti Tinapay nga awan Lebadurana.) 4 Kalpasan ti
pannakatiliw ni Pedro, pinaibaludna sana pinabantayan iti uppat a grupo ti
soldado. Uppat a soldado ti mangbukel iti tunggal grupo nga agsisinnublat
a mangbantay kenkuana. Panggep ni Herodes a pausig ni Pedro iti publiko
kalpasan ti Fiesta ti Paskua. 5 Iti kasta, nagtalinaed ni Pedro iti
pagbaludan. Ngem impasnek dagiti kamkameng ti iglesia ti nangikararag
kenkuana iti Dios. 6 Iti rabii sakbay ti panangyawat koma ni Herodes ken
ni Pedro kadagiti tattao, sikakawar a matmaturog iti nagbaetan ti dua a
soldado. Adda met dagiti guardia iti ruangan ti pagbaludan. 7 Pagammoan,
nagparang ti maysa nga anghel ti Apo ket adda silaw a nagraniag iti
pagbaludan. Ginunggon ti anghel ti abaga ni Pedro ket kinunana,
“Bumangonkan! Darasem!” Dagus a naikkat ti kawar dagiti ima ni Pedro.
8 Kinuna ti anghel, “Agbadoka ket agsandaliaska!” Nagtungpal ni Pedro.
Kinuna manen ti anghel, “Agkagayka ket surotennak.” 9 Sinurotna ti
anghel a rimmuar iti pagbaludan. Dina ammo no agpaypayso ti ar-
aramiden ti anghel. Impagarupna nga agparparmata. 10 Linabasanda ti
umuna a grupo dagiti guardia, sa ti maikadua ket dimtengda iti landok a
ruangan nga agturong iti siudad. Naglukat ti ruangan nga awan
nangsagsagid ket rimmuarda. Idi magmagnada iti maysa a kalsada,
pagammoan la ta nagpukaw ti anghel. 11 Naawatan ni Pedro ti napasamak
kenkuana. “Ita, ammokon a pudno daytoy,” kinunana. “Imbaon ti Dios ti
anghelna nga umay mangisalakan kaniak iti pannakabalin ni Herodes ken
iti amin a panggep nga aramiden dagiti Judio kaniak.” 12 Idi madlaw ni
Pedro ti kasasaadna, napan iti balay ni Maria nga ina ni Juan Marcos.
Sadiay, naguurnong ti adu a tattao nga agkarkararag. 13 Nagtugtog ni
Pedro iti ruangan ket maysa a babaonen a babai nga agnagan Roda ti
napan nangammo no siasino ti nagtuktok. 14 Nailasinna ti timek ni Pedro.
Iti napalalo a ragsakna, dinan linuktan ti ruangan no di ket nagtaray a
napan iti uneg ket impakaammona kadagiti tattao nga adda ni Pedro iti
ruar. 15 “Mauyongka!” kinunada kenkuana. Ngem impapilitna a pudno ti
imbagana. “Anghelna dayta,” kinunada. 16 Kabayatanna, saan nga
insardeng ni Pedro ti nagtugtugtog. Idi luktanda ti ruangan, kasta unay ti
siddaawda a nakakita kenkuana. 17 Nagsenias nga agulimekda ket
sinaritana kadakuada no kasano ti panangiruar ti Apo kenkuana iti
pagbaludan. “Ibagayo daytoy ken ni Santiago ken kadagiti kakabsat,”
kinunana. Kalpasanna, pimmanaw a napan iti sabali a lugar. 18
Kabigatanna, napalalo ti pannakariribuk dagiti guardia gapu iti
panagpukaw ni Pedro. Dida ammo no ania ti napasamak kenkuana. 19
Pinasapul ni Herodes ni Pedro ngem saanda a nabirokan. Iti kasta,
pinaimbestigarna dagiti soldado ket imbilinna a mapapatayda. Pimmanaw
ni Herodes idiay Judea ket napan nagyan idiay Cesarea iti sumagmamano
nga aldaw. 20 Napalalo ti pungtot ni Herodes kadagiti taga-Tiro ken taga-
Sidon. Gapu iti daytoy, inkeddeng dagiti umili a sangsangkamaysada a
mangibaon kadagiti pannakabagida a mapan ken ni Herodes. Immuna nga
inallukoyda ni Blasto a mayordomo iti palasio a tumulong kadakuada a
makikappia ken ni Herodes. Aggapu ngamin ti taraonda kadagiti daga a
masakupan ti Herodes. 21 Iti naituding nga aldaw, inkawes ni Herodes ti
pagan-anayna a kas ari, nagtugaw iti tronona sa nagbitla iti sangoanan
dagiti tattao. 22 “Maysa a dios ti agsarsarita, saan a tao!” impukkaw dagiti
tattao. 23 Iti dayta met la a kanito, dinusa ti anghel ti Apo ni Herodes
agsipud ta innalana ti pammadayaw nga agpaay koma iti Dios. Inigges
agingga a natay. 24 Nagtultuloy a nagsaknap ti sao ti Dios ket immadu
dagiti mamati. 25 Idi natungpalen da Bernabe ken Saulo ti aramid a
nakaibaonanda, nagawidda manipud Jerusalem ket inkuyogda ni Juan
Marcos.
Aramid 13
1 Iti iglesia idiay Antiokia, adda idi sumagmamano a profeta ken
mamaestro: isuda da Bernabe, Simeon (a maaw-awagan Negro), Lucio (a
taga-Cirene), Manaen (a kinaubingan ni Herodes a gobernador) ken Saulo.
2 Kabayatan ti panagdaydayawda iti Apo ken panagay-ayunarda, kinuna ti
Espiritu Santo kadakuada, “Ilasinyo da Bernabe ken Saulo. Isuda ti pinilik
a mangaramid iti trabaho a naituding kadakuada.” 3 Kalpasan ti
panagayunar ken panagkararagda, impatayda dagiti imada kada Bernabe
ken Saulo sada imbaon ida. 4 Iti kasta, simmalog idiay Seleucia da
Bernabe ken Saulo nga imbaon ti Espiritu Santo. Manipud sadiay,
nagbarkoda a nagturong iti isla ti Chipre. 5 Idi dumtengda idiay Salamina,
inkasabada ti sao ti Dios kadagiti sinagoga dagiti Judio. Inkuyogda ni Juan
Marcos a tumulong kadakuada iti trabaho. 6 Sinursorda ti puro agingga
idiay Pafo a nakasarakanda iti maysa a salamangkero nga agnagan iti Bar-
Jesus. Judio ni Bar-Jesus ket imbilangna ti bagina a profeta uray no saan. 7
Aggayyemda iti gobernador iti dayta a puro, ni Sergio Paulo, maysa a
nasaririt a tao. Kayat a denggen ti gobernador ti sao ti Dios, isu a
pinaayabanna da Bernabe ken Saulo. 8 Ngem linapdan ida ti salamangkero
(Elimas ti naganna iti Griego), ta kayatna a mayadayo ti gobernador iti
pammati. 9 Iti kasta, ni Saulo a maaw-awagan pay iti Pablo, isu a napno ti
Espiritu Santo, pinerrengna ti salamangkero 10 sana kinuna: “Sika nga
anak ti Diablo! Sika ti kabusor ti amin a kinalinteg. Nasikapka la unay.
Apay a kankanayonmo a balballikugen ti kinapudno maipapan iti Apo? 11
Ita, dissoannaka ti ima ti Apo: Agbulsekka ket dimo makita ti lawag ti init
iti sumagmamano nga aldaw.” Dagus a narikna ni Elimas a kinullaapan ti
sipnget dagiti matana, ket nagar-arikap a nangsapul iti mangkibin
kenkuana. 12 Namati ti gobernador idi maimatanganna ti napasamak.
Napalalo ti siddaawna iti sursuro maipapan iti Apo. 13 Manipud Pafo,
nagbarko ni Pablo ken dagiti kinakuyogna. Dimtengda idiay Perge, maysa
nga ili iti Pamfilia. Ngem pinanawan ni Juan Marcos ida sadiay ket
nagsubli idiay Jerusalem. 14 Manipud Perge, dimtengda iti ili ti Antiokia,
idiay Pisidia. Iti Aldaw a Panaginana, simrekda iti sinagoga ket
nagtugawda. 15 Kalpasan ti pannakaibasa ti maysa a paset ti Linteg ni
Moises ken Dagiti Sursurat dagiti Profeta, adda pinaibaga kadakuada
dagiti pangulo ti sinagoga. “Kakabsat,” kinunada, “kayatmi nga agsaokayo
kadagiti tattao, no adda mensaheyo a pammaregta kadakuada.” 16
Timmakder ni Pablo, sineniasanna ida nga agulimekda ket nagsao: “Padak
nga Israelita ken dakayo nga agdaydayaw iti Dios, dumngegkayo! 17 Ti
Dios dagiti Israelita ti nangpili kadagidi kapuonantayo ket pinagbalinna
ida a naindaklan a pagilian bayat ti panagnaedda a kas ganggannaet idiay
Egipto. Inruarna ida sadiay babaen iti naindaklan a pannakabalinna. 18 Iti
aguppat a pulo a tawen, inanusanna ida idiay let-ang. 19 Pinarmekna ti
pito a nasion iti daga ti Canaan. Intedna dayta a daga a tagikuaen dagiti
tattaona. 20 Naaramid amin dagitoy iti uneg ti ag-450 a tawen.
“Kalpasanna, inikkanna ida kadagiti ukom agingga iti tiempo a dimteng ni
profeta Samuel. 21 Idi dimmawatda iti ari, intedna nga arida ni Saulo nga
anak ni Kis a nagtaud iti tribu ni Benjamin. Nagturay ni Saulo iti uppat a
pulo a tawen. 22 Kalpasan ti panangikkat ti Dios kenkuana, insaadna ni
David a kas arida. Kastoy ti kinuna ti Dios maipapan kenkuana,
‘Nasarakak a ni David nga anak ni Jesse ti lalaki a makatungpal iti amin a
pagayatak!’ 23 “Kas inkari ti Dios, pinagbalinna a Mangisalakan iti Israel
ti maysa kadagiti kaputotan ni David. Isu ni Jesus. 24 Sakbay nga inrugi ni
Jesus ti trabahona, inkasaba ni Juan kadagiti amin nga Israelita a masapul
nga agbabawida kadagiti basbasolda ken pabuniaganda. 25 Idi dandanin
malpas ni Juan ti nakaibaonanna, kinunana kadagiti tattao, ‘Siasinoak iti
panagkunayo? Saan a siak ti ur-urayenyo no di ket ti sumaruno kaniak.
Saanak pay a maikari a mangikkat iti sandaliasna.’ 26 “Kakabsatko,
dakayo a nagtaud iti kaputotan ni Abraham ken dakayo a Hentil nga adda
ditoy nga agdaydayaw iti Dios: datayo ti nakaitedan ti mensahe ti
pannakaisalakan! 27 Ta saan a nabigbig dagiti agnaed idiay Jerusalem ken
dagiti panguloda a ni Jesus ti Mangisalakan. Dida met naawatan ti sao
dagiti profeta a maibasbasa iti tunggal Aldaw a Panaginana. Ngem isuda
met laeng ti nangipatungpal iti sao dagiti profeta idi inukomda ni Jesus. 28
Ket uray no awan nasarakanda a pakaigapuan a makedngan a matay,
dinawatda ken Pilato a papapatayna. 29 Idi naaramiddan ti amin a nailanad
iti Nasantoan a Surat maipapan kenkuana, imbabada iti krus sada intanem.
30 “Ngem pinagungar ti Dios. 31 Adu nga aldaw a nagparparang kadagidi
kinadkaduana manipud Galilea agingga idiay Jerusalem. Isuda itan dagiti
saksina kadagiti tattao. 32 Ket addakami ditoy a mangyeg kadakayo iti
Naimbag a Damag nga inkari ti Dios nga aramidenna kadagiti
kapuonantayo. 33 Tinungpalnan ita kadatayo a kaputotanda babaen iti
panangpagungarna ken ni Jesus. Kas nailanad iti maikadua a Salmo: ‘Sika
ti Anakko; Ita nga aldaw, nagbalinak nga Amam.’ 34 No maipapan iti
panangpagungar ti Dios ken ni Jesus a ni kaanoman dinto agsublin iti
panagrupsa, kastoy ti kinunana: ‘Itedkonto kenka ti nasantoan ken di
pagduaduaan a bendision nga inkarik ken David.’ 35 Isut’ gapuna a
kinunana pay iti sabali a salmo: ‘Dimonto ipalubos nga agrupsa ti
nasantoan nga adipenmo.’ 36 Ta idi panawen ni David, kalpasan ti
panangipatungpalna iti pagayatan ti Dios, natay ken naikali iti denna dagiti
kapuonanna, ket nagrupsa ti bangkayna. 37 Ngem saan a nagrupsa daytoy
a pinagungar ti Dios. 38 Rebbengyo ngarud nga ammoen, kakabsat, a
babaen ken ni Jesus, maipakaammo kadakayo ti pannakapakawan dagiti
basbasol. 39 Rebbengyo pay nga ammoen a ti siasinoman a mamati
kenkuana mapakawan iti amin a basol a saan a mapakawan segun ti Linteg
ni Moises. 40 Agannadkayo ngarud tapno saan a mapasamak kadakayo ti
kinuna dagiti profeta: 41 ‘Kitaenyo, dakayo a nauyaw! Agsiddaaw ken
mataykayo! Ta ti ar-aramidek iti panawenyo, Pulos a diyonto patien, Uray
no adda mangilawlawag kadakayo.’” 42 Idi rummuar da Pablo ken
Bernabe iti sinagoga, inawis dagiti tattao ida nga agsubli iti sumuno nga
Aldaw a Panaginana tapno agsaoda pay maipapan kadagitoy a bambanag.
43 Idi nakapanawen dagiti tattao iti sinagoga, simmurot kada Pablo ken
Bernabe dagiti adu a Judio ken dagiti Hentil a napasurot iti Judaismo. Iti
kasta, binalakadanda ida tapno agtalinaedda nga agbiag iti parabur ti Dios.
44 Iti sumuno nga Aldaw a Panaginana, dimteng ti dandani amin a tattao
iti dayta nga ili tapno dumngegda iti sao ti Apo. 45 Idi makita dagiti Judio
dagiti adu a tattao, napalalo ti apasda ket imbagada nga ulbod ti sasawen
ni Pablo. Pinagsasaoanda pay ni Pablo. 46 Ngem situtured a nagsao da
Pablo ken Bernabe. “Rebbengna a dakayo ti umuna a pakaipalawagan ti
sao ti Dios,” kinunada, “ngem agsipud ta laksidenyo ken diyo ibilang a
maikarikayo iti biag nga agnanayon, panawandakayo ket inkami kadagiti
Hentil. 47 Ta daytoy ti bilin ti Apo kadakami: ‘Insaadka a mangsilaw
kadagiti Hentil, Tapno maisalakan ti entero a lubong.’” 48 Idi mangngeg
daytoy dagiti Hentil, nagrag-oda ket dinaydayawda ti mensahe ti Apo. Ket
nagbalin a mamati dagiti naituding iti biag nga agnanayon. 49 Nagsaknap
ti sao ti Apo iti amin a disso iti dayta a lugar. 50 Ngem sinulbog dagiti
Judio dagiti nalatak a lallaki iti ili, kasta met dagiti babaknang a babbai
nga agdaydayaw iti Dios. Inrugida ti pannakaidadanes da Pablo ken
Bernabe ket kapilitan a nagtalawda iti lugarda. 51 Pinampagda ngarud ti
tapok kadagiti sakada a maibusor kadakuada ket nagturongda idiay Iconio.
52 Idiay Antiokia, kasta unay ti rag-o dagiti adalan ket naan-anay ti
panangituray kadakuada ti Espiritu Santo.
Aramid 14
1 Kasta met ti napasamak idiay Iconio. Napan da Pablo ken Bernabe iti
sinagoga ket adu a Judio ken Hentil ti nagbalin a mamati gapu iti napintas
a panangasabada. 2 Ngem adda dagiti Judio a saan a mamati iti
ikaskasabada. Sinulbogda dagiti Hentil ket sinabidonganda ti panunotda a
bumusor kadagiti kakabsat. 3 Nabayag a nagtaeng sadiay da Pablo ken
Bernabe. Situturedda a nagsao maipapan iti Apo. Pinaneknekan ti Apo a
pudno ti mensaheda maipapan iti paraburna babaen iti pannangtedna iti
pannakabalinda nga agaramid iti milagro ken pagilasinan. 4 Nabingay
dagiti tattao iti siudad: Adda dagiti immanamong kadagiti sasawen dagiti
Judio idinto a dagiti dadduma, inayonanda dagiti apostoles. 5 Inkeddeng
dagiti Hentil ken dagiti Judio agraman dagiti panguloda a dangran ken
uborenda dagiti apostoles. 6 Ngem naammoan dagiti apostoles daytoy ket
napanda nagkamang idiay Listra ken Derbe, il-ili iti Licaonia, ken kadagiti
kabangibang a luglugar. 7 Sadiay ti nangikasabaanda iti Naimbag a
Damag. 8 Idiay Listra, adda lalaki a saan a makapagna ket pulos a dina
pay naaramat dagiti sakana gapu ta nayanak a paralitiko. 9 Agtugtugaw a
dumdumngeg ken ni Pablo. Idi makita ni Pablo nga adda pammati daytoy
a tao a mapaimbag, pinerrengna 10 sana kinuna iti napigsa,
“Tumakderka!” Ket limmagto ti lalaki ket nagpagnapagna. 11 Idi makita
dagiti tattao ti inaramid ni Pablo, impukkawda iti pagsasaoda a taga-
Licaonia, “Nagbalin a tao dagiti dios ket bimmabada kadatayo!” 12
Pinanagananda ni Bernabe iti Zeus. Agsipud ta ni Pablo ti para sao,
pinanagananda iti Hermes. 13 Adda ti templo ni Zeus iti ruar ti ili. Kayat ti
padi ni Zeus ken dagiti tattao ti agidaton kadagiti apostoles. Iti kasta,
nangipan ti padi kadagiti toro a baka ken sabsabong iti ruangan ti ili. 14
Ngem idi maammoan da Bernabe ken Pablo ti kayatda nga aramiden,
rinay-abda dagiti pagan-anayda sada timmaray nga immasideg kadagiti
tattao. 15 “Kakabsat,” impukkawda, “apay nga aramidenyo daytoy?
Tattaokami laeng a kas kadakayo. Addakami ditoy a mangipakaammo iti
Naimbag a Damag tapno panawanyo dagitoy a kinaubbaw ket
agturongkayo iti sibibiag a Dios a namarsua iti langit, daga, taaw ken amin
nga adda kadakuada. 16 Iti napalabas, pinalubosanna amin a tattao nga
agaramid iti kinaykayatda. 17 Nupay kasta, dina impalubos nga awan
pakakitaan iti kaaddana kadagiti aramidna a naimbag: Ikkannakay iti tudo
manipud langit ken iti adu nga apit; ikkannakay iti taraon ken ragsak a
mangpunno kadagiti pusoyo.” 18 Uray no imbaga da Pablo ken Bernabe
dagitoy, narigatanda a nangatipa kadagiti tattao iti panangipaayda iti daton
kadakuada. 19 Ngem simmangpet ti sumagmamano a Judio a naggapu
idiay Antiokia ken Iconio. Naallukoyda dagiti tattao a mamati iti
sasawenda. Inuborda ni Pablo ket gapu ta impagarupda a natayen,
ginuyodda nga inruar iti ili. 20 Ngem idi inaribungbongan dagiti mamati,
timmakder ni Pablo ket nagsubli iti ili. Iti sumuno nga aldaw, napan da
Pablo ken Bernabe idiay Derbe. 21 Inkasaba da Pablo ken Bernabe ti
Naimbag a Damag idiay Derbe, ket adu ti naawisda nga agbalin nga
adalan. Kalpasanna, nagsublida idiay Listra, Iconio ken Antiokia idiay
Pisidia. 22 Pinatibkerda dagiti mamati ket binalakadanda ida nga
agtalinaed a sipupudno iti pammati. Imbagada, “Masapul nga aglasattay iti
adu a rigat sakbay a sumrektay iti Pagarian ti Dios.” 23 Nangdutokda
kadagiti panglakayen nga agpaay iti tunggal iglesia, ket kalpasan ti
panagkararag ken panagayunarda, inyawatda ida iti aywan ti Apo a
nangitedanda iti panagtalekda. 24 Linasat da Pablo ken Bernabe ti sakup ti
Pisidia, ket dimtengda idiay Pamfilia. 25 Inkasabada ti mensahe idiay
Perge sada simmalog idiay Atalia. 26 Manipud Atalia, nagbarkoda a
nagsubli idiay Antiokia. Ditoy ti damo a nakaitalkanda iti Dios tapno
aywananna ida iti trabaho a kalkalpasda nga inaramid. 27 Idi sumangpetda
idiay Antiokia, inurnongda dagiti kamkameng ti iglesia. Sinaritada ti amin
nga inaramid ti Dios babaen kadakuada ken no kasano ti pananglukat ti
Dios iti dalan tapno mamati dagiti Hentil. 28 Nabayag a nakipagtaengda
kadagiti mamati sadiay.
Aramid 15
1 Adda sumagmamano a lallaki a naggapu idiay Judea a napan idiay
Antiokia. Insursuroda dagiti kakabsat sadiay a dida maisalakan no dida
makugit kas mayannurot iti Linteg ni Moises. 2 Rimsua ti napudot a
pannakisuppiat da Pablo ken Bernabe kadakuada. Daytoy ti gapuna a
natudingan da Pablo ken Bernabe, kasta met ti sumagmamano a taga-
Antiokia a mapan idiay Jerusalem tapno makisaritada kadagiti apostoles
ken kadagiti panglakayen maipapan iti daytoy a parikut. 3 Pinarubbuatan
ida dagiti kamkameng ti iglesia. Bayat ti ilalabasda idiay Fenicia ken
Samaria, impadpadamagda kadagiti mamati sadiay no kasano a
nakombertir dagiti Hentil. Ket napalalo a rag-o dagiti kakabsat iti daytoy.
4 Idi sumangpetda idiay Jerusalem, sinangaili ida ti iglesia, dagiti
apostoles ken dagiti panglakayen. Insalaysayda ti amin nga inaramid ti
Dios kadakuada. 5 Ngem timmakder ti dadduma kadagiti mamati a
kamkameng ti partido dagiti Fariseo. Kinunada, “Masapul a makugit
dagiti Hentil ket maibilin a tungpalenda ti Linteg ni Moises.” 6
Nagmimiting dagiti apostoles ken dagiti panglakayen tapno adalenda
daytoy a banag. 7 Kalpasan ti nabayag a panagsusuppiatda, timmakder ni
Pedro ket kinunana, “Kakabsatko, pagaammoyo a kadagiti immun-una nga
aldaw, siak a maysa kadakayo, pinilinak ti Dios a mangikasaba iti
Naimbag a Damag kadagiti Hentil tapno dumngeg ken mamatida. 8 Ket ti
Dios a makaammo iti pampanunoten ti amin, impakitana ti yaanamongna
kadagiti Hentil babaen iti pannangtedna kadakuada iti Espiritu Santo a kas
iti pannangtedna kadatayo. 9 Agpapadatayo iti imatang ti Dios ket awan
pakaidumaantayo kadakuada. Pinakawanna dagiti basolda agsipud ta
namatida. 10 Apay ngarud a suotenyo ti Dios? Apay nga ipabaklayyo
kadagiti mamati ti awit a di nabaelan dagiti kapuonantayo ken uray pay
datayo? 11 Ngem mamatitayo a maisalakantayo babaen iti parabur ni Apo
Jesus, ket kasta met ti panangisalakan kadakuada ti Dios.” 12 Nagulimek
ti entero a taripnong. Dimngegda kada Bernabe ken Pablo a nagipadamag
kadagiti pagilasinan ken milagro nga inaramid ti Dios kadagiti Hentil
babaen kadakuada. 13 Idi malpasda, nagsao met ni Santiago. “Kakabsat,”
kinunana, “denggendak kadi! 14 Kaipalpalawag ni Simon ti panangipakita
ti Dios iti panangipategna kadagiti Hentil, babaen iti panangpilina kadagiti
tattao a maipaay iti naganna. 15 Paneknekan daytoy ti kinuna dagiti
profeta, kas nailanad iti Nasantoan a Surat: 16 ‘Agsubliakto kalpasan
daytoy, kuna ti Apo, ket bangonek manen ti pagarian ni David.
Tarimaanekto dagiti narba a pasetna ket palagdaek manen. 17 Iti kasta,
umayto kaniak dagiti dadduma pay iti sangkataoan, amin a Hentil nga
inayabak nga agbalin a kukuak. 18 Kasta ti kuna ti Apo a nangipakaammo
iti daytoy iti nabayagen a tiempo.’” 19 Intuloy ni Santiago, “Iti
panagkunak, ditay koma parigaten dagiti Hentil nga agturong iti Dios. 20
Suratantayo ketdi ida ket ibagatayo dagitoy: ‘Dikay mangan kadagiti
taraon a naidaton kadagiti didiosen. Lisianyo ti immoralidad. Dikay agsida
iti saan a napadara nga animal ken iti dara.’ 21 Nabayagen a naibasbasa ti
Linteg ni Moises kadagiti sinagoga iti Aldaw a Panaginana, ket
maikaskasaba dagiti saona iti tunggal ili.” 22 Nagnunumoan dagiti
apostoles ken dagiti panglakayen, agraman ti entero nga iglesia a pumilida
iti sumagmamano a lallaki iti grupoda. Ibaonda ida a kumuyog kada Pablo
ken Bernabe a mapan idiay Antiokia. Pinilida ti dua a lallaki a raraemen
unay dagiti kakabsat, ni Judas a managan Barsabas ken ni Silas. 23 Kastoy
ti linaon ti impaw-itda a surat kadakuada: “Ay-ayatenmi a kakabsat a
Hentil nga agnanaed dita Antiokia, Siria ken Cilicia: 24 “Nadamagmi nga
immay dita ti sumagmamano a lallaki a naggapu iti grupomi, ket nariribuk
ken nagduaduakayo gapu kadagiti saoda. Saanmi nga imbilin a kasta ti
aramidenda. 25 Isut’ gapuna a nagtataripnongkami ket
sangsangkamaysakami a nangpili kadagiti ibaonmi nga umay kadakayo.
Kumuyogda kada patpatgenmi a Bernabe ken Pablo 26 a nangipusta iti
biagda iti panagserbi ken ni Apotayo a Jesu-Cristo. 27 Ibaonmi ngarud da
Judas ken Silas a mangipakaammo a personal kadagitoy nga insuratmi. 28
Ta inkeddeng ti Espiritu Santo, ken inkeddengmi met a saandakayo a
padagsenan malaksid dagitoy nasken nga alagaden: 29 Dikayo mangan iti
kanen a naidaton kadagiti didiosen. Dikay agsida iti dara. Dikay agsida iti
saan a napadara nga animal. Adaywanyo met ti immoralidad. Naimbag ti
pagbanaganyo no diyo aramiden dagitoy. Dios ti mangsalluad kadakayo.
Dagitoy kakabsatyo, Apostoles ken Panglakayen.” 30 Naparubbuatan
dagiti naibaon ket napanda idiay Antiokia. Sadiay, tinipontiponda dagiti
amin a mamati sada inted kadakuada ti surat. 31 Idi nabasa dagiti tattao ti
surat, napalalo ti rag-oda, gapu kadagiti balakad a linaonna. 32 Profeta met
da Judas ken Silas. Nabayag a nagsaoda ket pinapigsada ti pakinakem
dagiti kakabsat. 33 Kalpasan ti pannakipagtaengda sadiay iti
sumagmamano nga aldaw, pinalubosan ken binendisionan ida dagiti
kakabsat, ket nagsublida kadagiti nangibaon kadakuada. 35 Ngem nagbati
da Pablo ken Bernabe idiay Antiokia. Babaen iti tulong dagiti adu pay a
kakabsat, insursuro ken inkaskasabada ti sao ti Apo. 36 Kalpasan ti
sumagmamano nga aldaw, kinuna ni Pablo ken ni Bernabe, “Inta
sarungkaran dagiti kakabsat iti tunggal siudad a nangikaskasabaanta iti sao
ti Apo. Kitaenta no kasano ti kasasaadda.” 37 Kayat ni Bernabe nga
ikuyog ni Juan Marcos, 38 ngem inkeddeng ni Pablo a saan a nasayaat nga
ikuyogda gapu ta saan a nakikadkadua kadakuada agingga a nalpas ti
trabahoda no di ket nagsubli ket pinanawanna ida idiay Pamfilia. 39
Rimsua ti nabara a panagsuppiatda ket daytoy ti gapuna a nagsinada.
Inkuyog ni Bernabe ni Marcos ket naglayagda a nagturong idiay Chipre.
40 Pinili met ni Pablo ni Silas a kaduana ket inkumit ida dagiti kakabsat iti
parabur ti Dios, sada nagluas. 41 Sinursorda ti Siria ken Cilicia a
nangpabpabileg kadagiti iglesia.
Aramid 16
1 Napan pay ni Pablo idiay Derbe ken idiay Listra a pagnaedan ti maysa a
mamati nga agnagan Timoteo. Judio ti inana ket maysa met a mamati,
ngem Griego ti amana. 2 Pinaneknekan dagiti kakabsat idiay Listra ken
Iconio ti kinaimbag ni Timoteo. 3 Kinugit ni Pablo ni Timoteo ta kayatna
nga ikuyog. Inaramidna daytoy gapu ta ammo dagiti Judio nga agnaed
sadiay, a Griego ti amana. 4 Iti tunggal ili a papananda, impakaammoda
kadagiti mamati ti alagaden a nagnunummoan dagiti apostoles ken
panglakayen idiay Jerusalem, ket impaganetgetda a tungpalenda. 5 Iti
kasta, pimmigsa ti pammati dagiti kamkameng dagiti iglesia ket inaldaw
nga immadu dagiti mamati. 6 Dinalliasatda ti sakup ti Frigia ken Galacia,
ta saan a pinalubosan ida ti Espiritu Santo a mangikasaba iti mensahe iti
probinsia ti Asia. 7 Idi dumtengda iti beddeng ti Misia, pinanggepda ti
sumrek idiay Bitinia, ngem saan manen a pinalubosan ida ti Espiritu ni
Jesus. 8 Linabasanda ngarud ti Misia ket nagtarusda idiay Troas. 9 Iti
rabii, adda parmata ni Pablo ket nakitana ti maysa a lalaki a taga-
Macedonia a sitatakder nga agpakpakaasi kenkuana. “Umayka koma idiay
Macedonia,” kinunana, “ta tulongannakami!” 10 Kalpasan ti parmatana,
nagrubbuatkami a dagus a nagturong idiay Macedonia. Awan duaduami
nga inawagannakami ti Dios a mangikasaba iti Naimbag a Damag kadagiti
tattao sadiay. 11 Nagbarkokami manipud Troas ket nagtaruskam idiay
Samotracia. Iti sumuno nga aldaw, simmangladkami idiay Neapolis. 12
Manipud sadiay, immunegkami a napan idiay Filipos, maysa a siudad iti
umuna a distrito ti Macedonia, ken sakup ti Roma. Nagyankami iti dayta a
siudad iti sumagmamano nga aldaw. 13 Iti Aldaw a Panaginana,
rimmuarkam iti siudad ket napankam iti igid ti karayan, iti lugar nga
impagarupmi nga adda pagkararagan. Nagtugawkami ket nakisaokami
kadagiti babbai a nagtataripnong sadiay. 14 Mairaman kadagiti
nagdengngeg kadakami ti maysa nga aglaklako iti nangingina a lupot.
Lydia ti naganna ken taga-Tiatira ken agdaydayaw iti Dios; linuktan ti
Apo ti panunotna ket naawatanna dagiti ibagbaga ni Pablo. 15 Nagbuniag
ni Lydia ken dagiti kabbalayna. Kalpasanna, inawisnakam a kunana, “No
namnamaenyo a mamatiak a sipupudno iti Apo, umaykay agdagus idiay
balay.” Ket saankami a nakapagkedked. 16 Iti maysa nga aldaw, bayat ti
ipapanmi iti disso a pagkararagan, sinabatnakami ti maysa a tagabu a
balasang. Linuganan ti dakes nga espiritu a mangted kenkuana iti
pannakabalin a mangibaga iti mapasamak iti masakbayan. Adu a kuarta ti
matgedan dagiti appona babaen iti panagpadlesna. 17 Sinursurotnakami
kada Pablo ket ipukpukkawna, “Adipen ti Kangatoan a Dios dagitoy a
tattao. Ipakaammoda kadakayo ti dalan a pakaisalakanan!” 18 Adu nga
aldaw a kasta ti ar-aramidenna agingga iti nauma ni Pablo ket sinangona ti
balasang sana kinuna iti espiritu, “Iti nagan ni Jesu-Cristo, ibilinko a
rummuarka iti dayta a babai.” Dagus a rimmuar ti espiritu kenkuana. 19
Idi makita dagiti appo ti balasang nga awanen ti pangkukuartaanda,
tiniliwda da Pablo ken Silas. Ginuyodguyodda ida nga impan iti plasa sada
indatag ida kadagiti ofisiales ti siudad. 20 Insaklangda ida kadagiti
Romano nga agtuturay. Kinunada, “Judio dagitoy ket rirriribukenda ti
siudadtayo. 21 Isursuroda dagiti ugali a maisalungasing iti lintegtayo.
Umilitayo iti Roma ket ditay mabalin nga awaten ken tungpalen dagita
nga ugali!” 22 Rimmaman dagiti tattao a nangkabkabil kada Pablo ken
Silas. Inuksoban ida dagiti agtuturay sada imbilin a masaplitda. 23
Naibaludda kalpasan ti nakaro a pannakasaplitda ket nabilin ti guardia a
bantayanna ida a naimbag. 24 Apaman a naawatna ti bilin, impanna ida iti
akin-uneg a paset ti pagbaludan ket inipitna dagiti saksakada iti kayo. 25
Idi tumengnga ti rabii, agkarkararag da Pablo ken Silas ken agkankantada
kadagiti himno a pagdaydayaw iti Dios. Agdengdengngeg kadakuada
dagiti dadduma a balud. 26 Pagammoan, nagginggined iti napigsa.
Nagunggon ti entero a fondasion ti pagbaludan. Naglukat a dagus dagiti
amin a ridaw ket naikkat ti kawar dagiti amin a balud. 27 Nakariing ti
agbambantay. Idi makitana a nalukatan ti pagbaludan, impagarupna a
naglibasen dagiti balud. Iti kasta, inasutna ti kampilanna ket papatayenna
koman ti bagina. 28 Ngem impukkaw ni Pablo, “Dimo ranggasan ta
bagim! Addakam amin ditoy!” 29 Nagpaala ti agbambantay iti silaw.
Simrek a dagus iti ayanda ket agtigtigerger iti buteng a nagrukbab iti
sakaanan da Pablo ken Silas. 30 Kalpasanna, inruarna ida. “Appo, ania ti
rumbeng nga aramidek tapno maisalakanak?” sinaludsodna. 31 Kinunada,
“Mamatika ken ni Apo Jesus ket maisalakankanto, sika ken ti familiam.”
32 Inlawlawagda kenkuana ken iti amin nga adda iti balayna ti mensahe
maipapan iti Apo. 33 Iti dayta met la nga oras iti rabii, nupay naladawen,
innalana ida sana binuggoan dagiti sugsugatda. Dagus a nabuniaganda a
sangafamiliaan. 34 Inyawidna da Pablo ken Silas sana pinakan ida.
Nagrag-oda a sangafamiliaan agsipud ta mamatidan iti Dios. 35
Kabigatanna, imbilin dagiti agtuturay kadagiti polis a kunada, “Paruarenyo
dagidiay a tattao.” 36 Iti kasta, imbaga ti agbambantay iti pagbaludan ken
ni Pablo, “Imbilin dagiti agtuturay a mapalubosankayon. Rummuarkayo
ngaruden ket pumanawkayo a sitatalna.” 37 Ngem kinuna ni Pablo
kadagiti polis, “Nupay awan nasarakanda a basolmi, pinasaplitdakam iti
sangoanan ti adu a tattao idinto nga umilikam iti Roma. Kalpasanna,
pinaibaluddakami. Ita, kayatdakami a papanawen iti nalimed. Saan a
mabalin! Dagiti met laeng agtuturay ti umay mangiruar kadakami.” 38
Impadamag dagiti polis daytoy a sao kadagiti agtuturay. Nagbutengda idi
madamagda nga umili iti Roma da Pablo ken Silas. 39 Isut’ gapuna a
napanda nagpadispensar kadakuada. Inruarda ida iti pagbaludan sada
dinawat a pumanawda iti dayta a siudad. 40 Rimmuar da Pablo ken Silas
iti pagbaludan ket nagtarusda iti balay ni Lydia. Sadiay, nadanonda dagiti
kakabsat iti pammati ket pinapigsada ti pakinakemda babaen iti balakadda.
Kalpasanna, pimmanawda iti siudad.
Aramid 17
1 Sinursor da Pablo ken Silas ti Amfipolis ken Apolonia ket dimtengda
idiay Tesalonica a yan ti maysa a sinagoga dagiti Judio. 2 Kas iti
masansan nga aramiden ni Pablo, napan iti sinagoga, ket iti las-ud ti tallo
nga Aldaw a Panaginana, nakisarsarita kadagiti tattao. Inaramatna dagiti
Nasantoan a Sursurat 3 iti panangilawlawag ken panangipaneknekna a
masapul nga agsagaba ken agungar ti Cristo. “Daytoy Jesus nga
ipakaammok kadakayo,” kinunana, “isu ti Cristo.” 4 Sumagmamano
kadakuada ti namati a pudno ti saona. Kimmaduada kada Pablo ken Silas,
kasta met ti adu a Griego nga agdaydayaw iti Dios ken adu kadagiti
nalatak a babbai iti kagimongan. 5 Ngem nagilem dagiti Judio. Inurnongda
dagiti bulakbol iti kalkalsada sada nangparnuay iti riribuk iti siudad.
Rinautda ti balay ti maysa a tao nga agnagan iti Jason, ta birbirokenda da
Pablo ken Silas tapno idatagda ida kadagiti tattao. 6 Idi saanda a
masarakan dagiti dua, inulodda ni Jason agraman sumagmamano a
kakabsat. Impanda ida iti saklang dagiti ofisiales ti siudad. “Mangriribuk
dagitoy a tattao iti sadinoman a papananda,” impukpukkawda. “Ita,
immayda ditoy siudadtayo, 7 ket pinadagus ida ni Jason iti balayna. Isuda
amin, salsalungasingenda dagiti linteg ti Emperador. Kunkunada nga adda
sabali nga ari a managan Jesus.” 8 Kasta unay ti pannakariribuk dagiti
tattao ken dagiti turayen ti siudad a nakangngeg iti daytoy. 9 Sakbay a
napalubosan ni Jason ken dagiti dadduma a kakabsat, pinagfiansa ida
dagiti agtuturay. 10 Apaman a dimteng ti rabii, imbaon dagiti mamati da
Pablo ken Silas idiay Berea. Idi makasangpetda sadiay, napanda a dagus
iti sinagoga dagiti Judio. 11 Mannakaawat dagiti taga-Berea. Saanda a kas
kadagiti taga-Tesalonica. Sigagagarda a nagdengngeg iti mensahe.
Inaldaw nga adalenda dagiti Nasantoan a Sursurat tapno ammoenda no
pudno met laeng ti sasawen ni Pablo. 12 Adu kadakuada ti namati
agraman ti adu a Griego—dagiti mararaem a babbai ken lallaki iti
kagimongan. 13 Ngem idi madamag dagiti Judio idiay Tesalonica nga
inkasaba met ni Pablo ti sao ti Dios idiay Berea, napanda sadiay ket
sinugsoganda dagiti tattao a mangriribuk. 14 Dinagdagus dagiti kakabsat
nga imbaon ni Pablo a mapan iti igid ti baybay, ngem nagbati da Silas ken
Timoteo. 15 Sumagmamano a lallaki ti nangitulod ken ni Pablo idiay
Atenas. Sakbay a nagsubli idiay Berea, imbilin ni Pablo kadakuada:
“Masapul a sumurot kaniak da Silas ken Timoteo iti kabiitan a tiempo.” 16
Bayat ti panaguray ni Pablo kada Silas ken Timoteo idiay Atenas, napalalo
ti pannakariribukna gapu iti kaadu ti didiosen a nakitana iti siudad. 17 Iti
kasta, iti sinagoga, nakisarsarita kadagiti Judio ken kadagiti Hentil nga
agdaydayaw iti Dios. Inaldaw met a kinasaona dagiti tattao a maisar-ong
iti tiendaan. 18 Nakisuppiat met kenkuana dagiti mamaestro nga Epicureo
ken Estoico. Kinuna ti sumagmamano kadakuada, “Ania ti
salsalawasawen daytoy aginsisirib a tao?” Kinuna met ti dadduma, “Kasla
sabali a dios ti ikaskasabana.” Kinunada daytoy agsipud ta ikaskasaba ni
Pablo ti maipapan ken ni Jesus ken iti panagungar. 19 Inawisda ni Pablo
ket inkuyogda iti taripnong ti konseho ti siudad a maaw-awagan iti
Areopago. “Kayatmi nga ammoen daytoy baro a pannursuro a
sarsaritaem,” kinunada. 20 “Karkarna dagiti sasawem ket kayatmi a
maammoan ti kaipapananda!” ( 21 Magustoan dagiti taga-Atenas ken
dagiti ganggannaet nga agnanaed sadiay ti agsarsarita ken
agdengdengngeg kadagiti kabarbaro a banag.) 22 Timmakder ni Pablo iti
sangoanan ti Areopago ket kinunana kadagiti taga-Atenas, “Makitak a
relihiosokayo iti amin a banag. 23 Ta iti panagpasiarko iti siudadyo ken
pannakakitak kadagiti disso a pagdaydayawanyo, nasarakak ti maysa nga
altar a nakaisuratan ti kastoy: ‘Maipaay iti Dios a di Am-ammo.’ Nupay
diyo am-ammo dayta a pagdaydayawanyo, isu ita ti ipakaammok
kadakayo. 24 Ti Dios a namarsua iti lubong ken kadagiti amin a linaonna,
isu ti Apo ti langit ken daga. Saan nga agnaed kadagiti templo nga aramid
ti tao. 25 Dina met masapul ti aniaman nga ited ti tao babaen iti
panagserbina kenkuana, ta isu ti mangted iti biag iti amin a parsua, ken iti
isuamin a banag. 26 Pinarsuana ti amin a kita ti puli iti sangkataoan, ket
pinagnaedna ida iti amin a paset ti daga. Isu a mismo ti nangikeddeng
kadagiti tiempo ken pagpatinggaan dagiti disso a pagnaedanda. 27
Inaramidna daytoy tapno sapulenda ti Dios, bareng no masarakanda bayat
ti panagar-arikapda a mangbirok kenkuana. Nupay kasta, saan nga adayo ti
Dios iti uray siasinoman kadatayo, 28 ta kastay kunadan, ‘Agbiag,
aggunay ken addatayo kenkuana.’ Kas iti kuna ti sumagmamano a
mannaniwyo, ‘Ta uray datayo, annakna met.’ 29 Yantangay ta
annaknatayo ti Dios, ditay koma ipagarup nga umasping ti Dios iti
ladawan a balitok wenno pirak wenno bato a sinukog ti kinalaing ken
kabaelan ti tao. 30 Pinalabas ti Dios dagiti tiempo a di pannakaammo
kenkuana ti tao. Ngem ita, bilinenna ti amin a tattao a tallikudanda ti
kinadakesda. 31 Ta intudingna ti aldaw a panangukomnanto a sililinteg iti
entero a lubong babaen iti pinilina a tao. Intedna ti pammaneknek kadagiti
amin a tattao babaen iti panangpagungarna iti dayta a tao.” 32 Idi
mangngegda a nagsao ni Pablo maipapan iti panagungar ti natay,
rinabrabak ti sumagmamano kadakuada, ngem kinuna met ti dadduma,
“Kayatmi ti dumngegto manen kenka maipapan iti daytoy.” 33 Iti kasta,
pinanawan ni Pablo ti taripnong. 34 Adda dagiti naallukoyna ket namatida.
Mairaman kadakuada ni Dionisio a kameng ti Areopago ken ti maysa a
babai nga agnagan Damaris. Ket adda pay dagiti dadduma a namati.
Aramid 18
1 Kalpasan daytoy, pimmanaw ni Pablo idiay Atenas ket nagturong idiay
Corinto. 2 Nasarakanna sadiay ti maysa a Judio nga agnagan Akila a
nayanak idiay Ponto. Kagapgapu ni Akila idiay Italia agraman ni Priscila
nga asawana agsipud ta pinapanaw ni Emperador Claudio dagiti amin a
Judio idiay Roma. Sinarungkaran ni Pablo ida 3 ket nakipagnaed ken
nakipagtrabaho kadakuada iti panagaramid iti tolda, ta agpapadada iti
pagsapulan. 4 Iti tunggal Aldaw a Panaginana, nakilinnawag idiay
sinagoga, ket inkagumaanna a maallukoy a mamati dagiti Judio ken
Griego. 5 Idi sumangpet da Silas ken Timoteo a naggapu idiay Macedonia,
impamaysa ni Pablo ti panangaskasabana ket nangted kadagiti
pammaneknek kadagiti Judio a ni Jesus isu ti Cristo. 6 Ngem idi supringen
ken pagsasawanda, winagwagna ti tapok iti pagan-anayna ket kinunana:
“No saankayo a maisalakan, dakayo ti akimbasol, saan a siak. Manipud
ita, panawankayon ket innak mangasaba kadagiti Hentil.” 7 Pinanawanna
ida ket napan nakipagtaeng iti balay ti maysa a Hentil nga agnagan Ticio
Justo a managdaydayaw iti Dios. Adda ti balayna iti abay ti sinagoga. 8
Namati met iti Apo ni Crispo a pangulo ti sinagoga agraman ti familiana.
Adu pay ti namati ken nabuniagan kadagiti taga-Corinto a nakangngeg iti
inkasaba ni Pablo. 9 Iti maysa a rabii, adda parmata ni Pablo. Kinuna ti
Apo kenkuana: “Dika agbuteng. Ituloymo latta ti agsao ket dika maupay,
10 ta addaak kenka. Awanto ti mangranggas kenka, agsipud ta adu ti taok
iti daytoy a siudad.” 11 Maysa ket gudua a tawen a nagyan ni Pablo idiay
Corinto a nangisursuro kadagiti tattao iti maipapan iti sao ti Dios. 12 Idi
maisaad ni Galion a gobernador iti Acaya, nagtataripnong dagiti Judio,
tiniliwda ni Pablo sada insaklang iti pangukoman. 13 “Guyguyugoyen
daytoy a lalaki dagiti tattao tapno agdaydayawda iti Dios iti wagas a
maikontra iti lintegmi!” kinunada. 14 Ngem idi agsao koma ni Pablo,
kinuna ni Galion kadagiti Judio: “No maipanggep iti panagsalungasing
wenno dakes nga aramid, adda koma karbengak a dumngeg kadakayo. 15
Ngem yantangay ta daytoy ket maysa laeng a suppiat maipapan kadagiti
sao ken nagnagan, ken iti linteg a mayaplikar la kadakayo, dakayo ti
mangrisut. Saan a siak ti mangeddeng no ania ti dakes ken no ania ti
naimbag.” 16 Ket pinapanawna ida iti pangukoman. 17 Tiniliwda ngarud
ni Sostenes a pangulo ti sinagoga sada kinabkabil iti sangoanan ti
pangukoman, ngem saan nga inkaskaso ni Galion. 18 Nakipagtaeng ni
Pablo kadagiti kakabsat idiay Corinto. Kalpasan ti adu nga aldaw,
nagbarko a kaduana da Priscila ken Akila a nagturong idiay Siria. Sakbay
a naglayagda manipud Cencrea, nagpakalbo ni Pablo ta adda kari a
sinapataanna. 19 Dimtengda idiay Efeso a nangibatian ni Pablo kada
Priscila ken Akila. Simrek iti sinagoga ket nakisinnuppiat kadagiti Judio.
20 Indawatda kenkuana nga agbayag koma sadiay, ngem saan nga
immannugot. 21 Ngem idi agpakada kadakuada, kinunana, “No ipalubos ti
Dios, agsubliakto kadakayo.” Naglugan iti barko ket nagluas manipud
Efeso. 22 Apaman a simmangpet idiay Cesarea, simmang-at idiay
Jerusalem ket kinablaawanna ti iglesia sa naglayon idiay Antiokia. 23
Pimmanaw manen kalpasan iti panagyanna sadiay iti sumagmamano nga
aldaw. Nagsubli idiay Galacia ken Frigia. Sinursorna dagitoy a luglugar
ket pinapigsana ti pakinakem dagiti amin a mamati. 24 Dimteng idiay
Efeso ti maysa a Judio a nayanak idiay Alejandria. Apolos ti naganna.
Nalaing nga agbitla ken adu ti ammona maipapan kadagiti Nasantoan a
Sursurat. 25 Nasursuroan iti Dalan ti Apo. Sigaganetget a nagsao ket awan
pagkurangan ti panangisurona iti maipapan ken ni Jesus. Nupay kasta, ti
laeng panamuniag ni Juan ti ammona. 26 Situtured a nagsao idiay
sinagoga. Idi mangngeg da Priscila ken Akila, inawisda ni Apolos iti
balayda ket inlawlawagda a naimbag kenkuana ti Dalan ti Dios. 27
Inkeddeng ni Apolos ti mapan idiay Acaya. Tinulongan dagiti mamati
idiay Efeso ket nagsuratda kadagiti kakabsat idiay Acaya tapno awatenda
ni Apolos. Idi addan sadiay, dakkel ti naitulongna kadagiti nagbalin a
mamati babaen iti parabur ti Dios. 28 Ta sibibileg a nakidebate kadagiti
Judio iti plasa ket inabakna ida. Babaen kadagiti Nasantoan a Sursurat,
pinaneknekanna a ni Jesus isu ti Cristo.
Aramid 19
1 Bayat ti kaadda ni Apolos idiay Corinto, dinaliasat met ni Pablo dagiti
naseksek a lugar ti probinsia. Idi dumteng idiay Efeso, nasarakanna ti
sumagmamano nga adalan. 2 “Inawatyo kadin ti Espiritu Santo idi
nagbalinkayo a mamati?” sinaludsodna kadakuada. “Saan,” insungbatda.
“Dimi pay nangnangngeg nga adda Espiritu Santo.” 3 Kinuna ni Pablo,
“Ania ngarud a kita ti buniag ti inawatyo?” “Ti panamuniag ni Juan,”
insungbatda. 4 Kinuna ni Pablo, “Ti panamuniag ni Juan maipaay kadagiti
agbabawi kadagiti basolda. Imbaga ni Juan kadagiti tattao a masapul a
patienda ti sumaruno kenkuana nga isu ni Jesus.” 5 Idi nangngegda
daytoy, nabuniaganda iti nagan ni Apo Jesus. 6 Impatay ni Pablo ti imana
kadakuada, ket bimmaba ti Espiritu Santo kadakuada. Nagsaoda iti
nadumaduma a pagsasao ket impakaammoda met ti sao ti Dios. 7
Agsangapulo ket dua dagitoy a lallaki. 8 Tallo a bulan a napnapan ni Pablo
iti sinagoga. Iti sangoanan dagiti tattao, situtured a nagsao ken
nagilawlawag ken nangguyugoy kadakuada a pudno ti sasawenna
maipapan iti Pagarian ti Dios. 9 Ngem adda dagiti nasukir kadakuada ket
dida namati. Linalaisda ti Dalan ti Apo iti sangoanan ti entero a grupo.
Isut’ gapuna a pimmanaw sadiay ni Pablo a kaduana dagiti adalan.
Inaldaw a makiin-innadal iti pangisursuroan a kukua ni Tirano. 10
Nagtuloy daytoy iti las-ud ti dua a tawen. Ket nangngeg dagiti amin a
Judio ken Hentil nga agnanaed iti probinsia ti Asia ti mensahe maipapan
iti Apo. 11 Nagar-aramid ti Dios kadagiti nakaskasdaaw a milagro babaen
iti panangaramatna ken ni Pablo. 12 Uray dagiti panio ken apron nga
inaramatna, naipanda kadagiti masakit. Napaimbagda ket napaksiat dagiti
dakes nga espiritu kadakuada. 13 Adda sumagmamano nga agpaspasiar a
Judio ket mamakpaksiatda met kadagiti dakes nga espiritu. Pinadasda nga
aramaten ti nagan ni Apo Jesus. Kunkunada kadagiti dakes nga espiritu:
“Iti nagan ni Jesus nga ikaskasaba ni Pablo, bilinenkayo a rummuar iti
dayta a tao.” 14 Mairaman kadakuada dagiti pito a lallaki nga annak ti
Nangato a Padi dagiti Judio nga agnagan Sceva. 15 Ngem kinuna ti dakes
nga espiritu kadakuada, “Am-ammok ni Jesus ket am-ammok met ni
Pablo. Ngem siasinokayo?” 16 Dinarup ida ti tao a linuganan ti dakes nga
espiritu ket kasta unay ti panangkabkabilna kadakuada agingga a
naparmekna ida. Lamolamo ken sugat-sugatda a nagtataray a rimmuar iti
balay. 17 Nadamag dagiti amin a Judio ken dagiti Hentil nga agnanaed
idiay Efeso ti napasamak. Napnoanda amin iti buteng ket ad-adda manen
nga intan-okda ti nagan ni Apo Jesus. 18 Adu kadagiti mamati ti immay
ket silalatak nga inaklon ken impudnoda dagiti kakastoy nga inaramidda.
19 Adu kadagiti managsalamangka ti nangurnong kadagiti libroda sada
pinuoran iti sangoanan ti amin a tao. Aganay a 50,000 a bagi ti pirak ti
nakuentada a gatad dagiti libro. 20 Iti kasta, nagsaknap ken bimmileg ti
sao ti Apo. 21 Kalpasan dagitoy a pasamak, inkeddeng ni Pablo ti
agdaliasat idiay Macedonia ken Acaya sakbay a mapan idiay Jerusalem.
“Inton aggapuak idiay Jerusalem,” kinunana, “masapul nga innak met
kitaen ti Roma.” 22 Imbaonna ngarud da Timoteo ken Erasto, dua kadagiti
katulonganna, a mapan idiay Macedonia, idinto a nagtaeng pay bassit
idiay probinsia ti Asia. 23 Iti dayta a tiempo, timmaud ti nakaro a riribuk
idiay Efeso gapu iti Dalan ti Apo. 24 Adda platero nga agnagan Demetrio.
Agar-aramid iti babassit a pirak a sinan-templo ni Artemis a diosa, ket
nawadwad ti mateggedan dagiti mangmangged iti daytoy a negosiona. 25
Inummong ni Demetrio dagiti amin a trabahadorna ken dagiti padana a
platero ket kinunana kadakuada: “Kakadua, ammoyo a daytoy a trabaho ti
pagrang-ayantayo. 26 Makita ken mangngegyo a mismo ti ar-aramiden
dayta a Pablo. Kunkunana a saan a dios dagiti didiosen nga aramid ti tao.
Ket adun ti nakumbinsirna a mamati a pudno ti ibagbagana, saan laeng a
ditoy Efeso no di pay ket iti isuamin a lugar iti probinsia ti Asia. 27
Ngarud, agpeggadtayo. Dakesto ti pakasarsaritaan daytoy a
pagsapulantayo ket saanton a raemen dagiti tattao ti templo ni Artemis.
Saandanton nga ibilang a naindaklan daytoy a diosa, ti diosa a
pagrukbaban iti amin nga Asia ken iti sangalubongan!” 28 Idi
mangngegda daytoy, nakapungtotda ket inriawda, “Agbiag ni Artemis!
Agbiag ni Artemis ti Efeso!” 29 Nabuak ti entero a siudad, ket immad-adu
a tattao ti nagririaw. Ginammatan dagiti tattao ti dua a taga-Macedonia, da
Gayo ken Aristarco a kakadua ni Pablo; inulod-ulodda nga impan dagitoy
iti auditorium ti plasa. 30 Kayat ni Pablo ti mapan iti sangoanan dagiti
tattao ngem saan a pinalubosan dagiti mamati. 31 Pinaibaga met ti
sumagmamano a gagayyemna a nangato nga agtuturay iti probinsia a saan
koma nga agparparang iti auditorium. 32 Kabayatanna, naariwawa ti
ummong ta aggigiddiat ti yik-ikkis dagiti tattao, ket kaaduanna kadakuada
ti saan a makaammo no apay nga addada sadiay. 33 Impagarup ti
sumagmamano a tattao nga aramid daytoy ni Alejandro, agsipud ta pinauli
dagiti Judio iti sangoanan. Sineniasan ida ni Alejandro tapno agpalawag
koma, 34 ngem idi mabigbigda a Judio, sangsangkamaysada a
nangipukpukkaw iti las-ud ti dua nga oras: “Agbiag ni Artemis! Agbiag ni
Artemis ti Efeso!” 35 Kamaudiananna, napagtalna met laeng ida ti
sekretario ti siudad. “Kakabsat a taga-Efeso,” kinunana, “ammoyo amin a
ti siudad ti Efeso ti mangay-aywan iti templo ni Artemis a naindaklan a
diosa ken iti nasantoan a bato a nagtinnag manipud langit. 36 Awan ti
makailibak iti daytoy. Ngarud, masapul nga agtalnakayo ket dikay
agdardarasudos. 37 Inyegyo ditoy dagitoy a lallaki, nupay awan
tinakawanda a templo wenno insaoda a maikontra iti diosatayo. 38 No
adda pangidaruman da Demetrio ken dagiti platerona iti siasinoman, adda
dagiti aldaw a silulukat ti pangukoman ket adda dagiti agturay a
mangukom. Sadiay ti pagidarumanda. 39 Ngem no adda sabali a
masapulyo, masapul nga usigen dayta ti taripnong dagiti umili. 40 Ta
mabalin a maidarumtay iti panangriribuk gapu iti napasamak ita nga
aldaw. Awan pagpambartay iti daytoy a riribuk, ket awan met
mairasontayo.” 41 Idi maisaonan daytoy, pinagawidna dagiti tattao.
Aramid 20
1 Idi agsardengen ti riribuk, inummong ni Pablo dagiti mamati ket
kalpasan ti panagsaona a kas pammaregtana kadakuada, nagpakada sa
pimmanaw a nagturong idiay Macedonia. 2 Sinursorna dagitoy a luglugar.
Pinarparegtana dagiti tattao iti adu a pammagbaga. Dimteng idiay Grecia.
3 Tallo a bulanna sadiay. Nakasaganan a mapan idiay Siria idi
naammoanna nga isiksikat dagiti Judio. Daytoy ti gapu a napanunotna ti
agsubli a lumasat idiay Macedonia. 4 Kimmuyog kenkuana ni Sopatro nga
anak ni Pirro a taga-Berea. Kimmuyog met da Aristarco ken Segundo a
taga-Tesalonica, ni Gayo a taga-Derbe, ni Timoteo agraman da Tikico ken
Trofimo iti probinsia ti Asia. 5 Immunada ket inuraydakami idiay Troas. 6
Kalpasan ti Fiesta ti Tinapay nga awan Lebadurana, nagbarkokami
manipud Filipos iti las-ud ti lima nga aldaw, ket nadanonmi ida idiay
Troas. Nagyankami sadiay iti makadomingo. 7 Iti umuna nga aldaw ti
lawas, naggigimongkami tapno rambakanmi ti pannakapispisi ti tinapay.
Nagsao ni Pablo kadagiti tattao ket saan a nagsardeng agingga iti tengnga
ti rabii. Pumanaw ngamin iti kabigatanna. 8 Adu ti silaw iti akingngato a
kuarto a nagtataripnonganmi. 9 Adda maysa a baro nga agnagan Eutico a
nakatugaw iti tawa. Agdungdungsa ni Eutico bayat ti panagsao ni Pablo.
Idi nakaturog iti nairut, natnag iti daga manipud iti maikatlo a kadsaaran.
Natay nga inakupda. 10 Ngem immulog ni Pablo ket nagtaray a
nangarakup kenkuana. “Dikay agdanag,” kinunana, “sibibiag pay laeng!”
11 Immuli manen ni Pablo, pinisina ti tinapay sa nangan. Kalpasanna,
nakisarsarita kadakuada agingga iti aglawag sa pimmanaw. 12 Kinuyogda
a nagawid ti agtutubo. Kasta unay ti pannakabang-arda. 13 Immunakami a
nagrubbuat ket nagbarkokami a nagturong idiay Asson a pangdagasanmi
ken ni Pablo. Kasta ti imbagana kadakami agsipud ta magmagna a mapan
sadiay. 14 Idi agkikitakam idiay Asson, pinaluganmi iti barko ket
nagturongkami idiay Mitilene. 15 Intuloymi ti naglayag ket iti sumuno nga
aldaw, simmangpetkam iti ballasiw ti Chio. Kalpasan ti maysa nga aldaw,
dimtengkam idiay Samos. Kabigatanna, nakadanonkam idiay Mileto. 16
Inkeddeng ni Pablo a saanen a dumagas idiay Efeso tapno saan a mataktak
idiay probinsia ti Asia. Maganatan ngamin a dumanon idiay Jerusalem, ket
no adda pannakabalinna, sumangpet sadiay iti kaaldawan ti Pentecostes.
17 Idi adda ni Pablo idiay Mileto, pinaayabanna dagiti panglakayen ti
iglesia idiay Efeso. 18 Idi sumangpetda, kinunana kadakuada, “Ammoyo
no kasano ti panangibukbukko iti amin a panawenko iti panagyanko
kadakayo manipud pay idi umuna nga aldaw a bimmaddekak iti probinsia
ti Asia. 19 Sipapakumbabaak a nagtrabaho a kas adipen ti Apo ket adu a
luluak ti nagarubos kadagiti tiempo ti adu a rigat a linak-amko gapu
kadagiti panangisikat dagiti Judio. 20 Ammoyo met a diak impaidam ti
aniaman a makatulong kadakayo bayat ti panangaskasabak ken
panangisursurok kadakayo iti publiko ken kadagiti balbalayyo. 21
Binallaagak dagiti Judio ken dagiti Hentil a masapul nga agbabawida
kadagiti basbasolda ket agturongda iti Dios, ken mamatida ken ni Apotayo
a Jesus. 22 Ita ngarud, agtulnogak iti Espiritu Santo. Mapanak idiay
Jerusalem, nupay diak ammo ti mapasamak kaniak sadiay. 23 Ammok
laeng nga iti amin a siudad, iparparikna ti Espiritu Santo nga agur-uray
kaniak ti pagbaludan ken ti pannakaparigat. 24 Ngem saan a nasken no
agbiagak man wenno matayak. Matungpalko la ketdi ti nakaibaonak ket
maileppasko ti trabaho nga inted kaniak ni Apo Jesus—ti
panangiwaragawagko iti Naimbag a Damag maipapan iti parabur ti Dios.
25 “Inkaskasabak ti Pagarian ti Dios kadakay amin ket ita, ammok nga
awanton kadakayo ti makakita kaniak. 26 Isut’ gapuna nga ita nga aldaw,
iti sangoanan ti Dios, isapatak a no adda mapukaw kadakayo, saan a siak ti
akimbasol. 27 Ta diak nagliway a nangipakpakaammo kadakayo iti amin a
panggep ti Dios. 28 Annadanyo ngarud ti bagbagiyo ken ti amin nga arban
nga impaaywan ti Espiritu Santo kadakayo. Wen, aywananyo ti iglesia ti
Dios a ginatangna babaen iti dara ti Anakna. 29 Ammok nga inton
awanakon, umayto kadakayo dagiti narungsot a lobo ket didanto
mamingga no dida madangran ti arban. 30 Saan la a dayta, dumtengto ti
tiempo nga agsao iti ulbod ti sumagmamano kadakayo tapno sumina dagiti
mamati ket sumurotda kadakuada. 31 Ngarud, agannadkayo ket
laglagipenyo nga aldaw ken rabii, iti baet ti adu a panagsagabak, a
sinursuroankay amin iti las-ud ti tallo a tawen. 32 “Ket ita, italekkay iti
Dios ken iti paraburna a makaparang-ay ken makaited kadakay iti
bendision nga insaganana kadagiti amin a tattaona. 33 Diak tinarigagayan
nga alaen ti pirak, balitok wenno pagan-anay ti siasinoman. 34 Dakayo a
mismo, ammoyo a nagtartrabahoak ket tineggedko ti umanay a kuarta nga
inggatangko kadagiti masapsapulmi nga agkakadua. 35 Iti kastoy,
impakitak kadakayo a babaen iti napasnek a panagtrabaho, masapul a
tulongantayo dagiti nakapuy. Laglagipentayo ti kinuna ni Apo Jesus,
‘Nagasgasat ti mangted ngem ti umawat.’” 36 Idi naisaon ni Pablo
dagitoy, nagparintumengda amin a nagkararag. 37 Nagsasangitda amin a
nangapungol ken nangagek kenkuana. 38 Maladingitanda unay iti saona a
didanton makita. Kalpasanna, intulodda iti barko.
Aramid 21
1 Nagpakadakami kadakuada. Nagbarkokami a dimteng idiay Coos. Iti
sumuno nga aldaw, dimmanonkam idiay Rodas, ket manipud sadiay,
nagturongkam idiay Patara. 2 Sadiay, nasarakanmi ti barko a mapan
Fenicia ket isut’ naglugananmi a pimmanaw. 3 Dimtengkam iti lugar a
pakatannawaganmi iti Chipre. Naglayagkam iti abagatanna agingga idiay
Siria. Simmangladkam idiay Tiro a pagdiskargaan ti barko. 4 Binirokmi
sadiay ti sumagmamano a mamati ket idi nasarakanmi ida, nakidaguskami
kadakuada iti makadomingo. Babaen iti panangidalan ti Espiritu,
imbagada a saan koma a mapan ni Pablo idiay Jerusalem. 5 Ngem idi
malpas ti pannakipagtaengmi kadakuada, pimmanawkami ket intuloymi ti
nagbiahe. Intuloddakam dagiti adalan agraman dagiti assawa ken annakda,
agingga iti ruar ti siudad. Nagparintumengkami amin iti igid ti baybay ket
nagkararagkami. 6 Kalpasanna, nagpipinnakadakami sakam limmugan iti
barko. Nagawidda metten. 7 Intuloymi ti nagbiahe manipud Tiro agingga
idiay Tolemaida. Kinablaawanmi dagiti kakabsat sadiay. Nakipagyankami
kadakuada iti maysa nga aldaw. 8 Iti sumuno nga aldaw, nagluaskami ket
dimtengkam idiay Cesarea. Sadiay, nakidaguskam iti balay ni Felipe nga
ebanghelista, maysa kadagiti pito a lallaki a napili idi idiay Jerusalem. 9
Adda uppat nga annakna a babbalasang a mangiwarwaragawag iti sao ti
Dios. 10 Bayat ti panagyanmi sadiay iti sumagmamano nga aldaw,
simmangpet ti maysa a profeta nga agnagan Agabo. Naggapu idiay Judea.
11 Immay kadakami sana innala ti barikes ni Pablo. Ginalutan ni Agabo
dagiti saka ken imana met laeng ket kinunana, “Daytoy ti kuna ti Espiritu
Santo: Kastoyto ti panangreppet dagiti Judio idiay Jerusalem iti
akimbarikes iti daytoy, ket yawatda kadagiti Hentil.” 12 Apaman a
nangngegmi daytoy, impakpakaasimi agraman dagiti tattao sadiay a saan
koman a mapan ni Pablo idiay Jerusalem. 13 Ngem kinunana, “Apay a
sangitandak? Apay a pagladingitenyo ’toy pusok? Saanak la a sisasagana a
mareppet. Sisasaganaak pay a matay idiay Jerusalem gapu ken ni Apo
Jesus.” 14 Dimi mabaw-ing ti nakemna, isut’ gapuna nga insardengmin ti
manguy-uyot kenkuana. “Maaramid koma ti pagayatan ti Apo,” kinunami.
15 Kalpasan ti sumagmamano nga aldaw a panagtaengmi sadiay,
inrubbuatmi dagiti alikamenmi ket nagturongkam idiay Jerusalem. 16
Kimmuyog kadakami ti sumagmamano nga adalan a taga-Cesarea.
Intuloddakam iti pagdagusanmi, iti balay ni Mnason a taga-Chipre, maysa
a mamati manipud pay idi damo. 17 Siraragsak dagiti kakabsat a simmabat
kadakami idi sumangpetkami idiay Jerusalem. 18 Iti sumuno nga aldaw,
kimmuyog ni Pablo kadakami a simmarungkar ken ni Santiago. Adda met
sadiay dagiti amin a panglakayen ti iglesia. 19 Kinablaawan ida ni Pablo
ket sinaritana kadakuada ti amin nga inaramid ti Dios kadagiti Hentil
babaen iti panagserbina. 20 Kalpasan ti panagdengngeg dagiti tattao ken ni
Pablo, indaydayawda ti Dios. Kinunada kenkuana: “Kabsat, ammom
daytoy. Rinibu dagiti Judio a nagbalin a mamati ket napasnekda nga
agtulnog iti Linteg. 21 Nadamdamagdaka. Isursurom kano dagiti Judio
nga agnanaed iti lugar dagiti Hentil a bay-anda koma ti Linteg ni Moises.
Ibagbagam pay kano kadakuada a dida pakugit dagiti annakda wenno
sumurot kadagiti ugali dagiti Judio. 22 Maammoanda a maammoan a
simmangpetkan. Ania ti aramidem? 23 Kastoy ti kayatmi nga aramidem.
Adda uppat a lallaki ditoy a nagsapata. 24 Kuyogem ida ket
aggigiddankayo a mangannong iti seremonia ti pannakadalus. Bayadam ti
magastoda tapno mabalinda ti agpakuskos. Iti kasta, maammoan ti amin
nga awan gayam ti kinaagpayso ti damagda maipapan kenka, no di ket
agbibiagka a kas mayannurot iti Linteg ni Moises. 25 Ngem no
maipanggep kadagiti Hentil a nagbalin a mamati, insuratmin kadakuada ti
nagnunummoantayo a masapul a dida mangan kadagiti kanen a naidaton
kadagiti didiosen wenno iti dara wenno kadagiti saan a napadara nga
animal. Insuratmi pay a masapul a liklikanda ti immoralidad.” 26 Inkuyog
ngarud ni Pablo dagiti lallaki, ket iti sumuno nga aldaw, inaramidda ti
seremonia ti pannakadalus. Kalpasanna, simrek iti Templo ket
impakaammona no mano nga aldaw ti palabasen sa aggibus ti aldaw ti
pannakadalus. Isunton ti pannakaidaton ti sagut a maipaay iti tunggal
maysa kadakuada. 27 Dandanin malpas ti naituding a pito nga aldaw ket
adda ni Pablo iti Templo. Sumagmamano a Judio a taga-probinsia ti Asia
ti nakakita kenkuana sadiay. Dinuroganda dagiti tattao ket tiniliwda ni
Pablo. 28 “Lallaki a taga-Israel,” impukkawda, “tumulongkayo! Daytoy ti
tao nga agsursursor iti amin a lugar. Isursurona nga awan serserbi dagiti
Israelita, ti Linteg ni Moises ken daytoy a Templo. Ita, nangiserrek pay
kadagiti Hentil iti Templo ket tinulawanna daytoy nasantoan a disso.” ( 29
Kinunada daytoy ta nakitada ni Trofimo a taga-Efeso a kadua ni Pablo
idiay siudad, ket impagarupda nga inserrekna iti Templo.) 30 Rimsua ti
riribuk iti entero a siudad. Nagtataray nga immay dagiti tattao manipud iti
nadumaduma a lugar. Ginammatanda ni Pablo sada ginuyodguyod nga
inruar iti Templo. Ket dagus a narikpan dagiti ridaw ti Templo. 31
Papatayen koman dagiti tattao ni Pablo idi maipadamag iti komandante ti
buyot ti Roma nga adda riribuk iti entero a Jerusalem. 32 Dagus a nangala
ti komandante iti sumagmamano nga ofisiales ken soldado, ket
nagdardarasda a napan iti ayan dagiti tattao. Idi makita ida dagiti tattao,
insardengda ti panangkabkabilda ken ni Pablo. 33 Immasideg ti
komandante ken ni Pablo. Tiniliwna sana imbilin a mareppet iti dua a
kawar. “Siasino daytoy a tao?” sinaludsodna. “Ania ti inaramidna?” 34
Aggigiddiat ti iririaw dagiti tattao. Agsipud ta di maawatan ti komandante
ti pudpudno a napasamak gapu iti ariwawa, binilinna dagiti soldadona nga
ipanda ni Pablo iti kuartel. 35 Idi makadanonda iti agdan, inawitda ni
Pablo agsipud ta napalalo ti pungtot dagiti tattao. 36 Ta sumursurotda a
mangyik-ikkis iti pannakapapatayna. 37 Idi dandanida iserrek ni Pablo iti
kuartel, kinunana iti komandante, “Adda man ibagak kenka.” “Makasaoka
met gayam iti Griego,” kinuna ti komandante. 38 “Saan ngarud a sika
daydi taga-Egipto a nangipangulo iti yaalsa itay saan pay a nabayag.
Impanguloanna ti 4,000 a nakaarmas a lallaki a napan idiay let-ang.” 39
Simmungbat ni Pablo: “Judioak a nayanak idiay Tarso iti Cilicia ket
umiliak iti nalatak a siudad. Pangngaasim ta palubosannak nga agsao
kadakuada.” 40 Pinalubosan ti komandante. Timmakder ni Pablo iti agdan
sana sineniasan dagiti tattao nga agulimekda. Ket idi nagulimekda, nagsao
kadakuada iti Hebreo:
Aramid 22
1 “Ammak ida ken kakabsat, denggenyo kadi ti panangipalawagko iti
kalintegak!” 2 Idi mangngegda nga agsasao iti Hebreo, ad-adda a
nagulimekda. Intuloy ni Pablo: 3 “Judioak a nayanak idiay Tarso iti
Cilicia, ngem dimmakkelak ditoy Jerusalem a kas adalan ni Gamaliel.
Nainget ti pannakaisurok iti pannursuro ti Linteg dagiti kapuonantayo.
Napasnekak met nga agserserbi iti Dios a kas kadakayo nga adda ditoy ita
nga aldaw. 4 Indadanes ken pinapatayko dagiti sumursurot iti daytoy a
Dalan. Pinatiliw ken pinaibaludko ida—lallaki man wenno babbai. 5
Mapaneknekan ti Kangatoan a Padi ken dagiti kamkameng ti Sanhedrin a
pudno ti ibagbagak. Inikkandak pay ngarud idi iti sursurat nga agpaay
kadagiti kakabsat a Judio idiay Damasco, ket napanak sadiay a mangtiliw
kadagitoy a tattao ken mangyeg kadakuada a sikakawar ditoy Jerusalem
tapno madusada.” 6 “Idi dandaniakon makadanon idiay Damasco, iti
agarup tengnga ti aldaw, pagammoan ta adda naraniag a lawag a
naggapu’t langit a nangsilnag kaniak ken ti aglawlawko. 7 Napasagak iti
daga ket nangngegko ti maysa a timek a nagkuna kaniak, ‘Saulo, Saulo!
Apay nga idadanesnak?’ 8 “‘Siasinoka, Apo?’ sinaludsodko. “‘Siak ni
Jesus a taga-Nazaret nga idaddadanesmo!’ insungbatna. 9 “Nakita dagiti
lallaki a kinakuyogko ti lawag ngem dida mangngeg ti timek ti makisasao
kaniak. 10 ‘Ania ti aramidek, Apo?’ sinaludsodko. “Kinuna ti Apo kaniak,
‘Tumakderka, ket inka idiay Damasco a pakaibagaanto ti amin nga
intuding ti Dios nga aramidem.’ 11 “Diak makakita gapu iti makasisirap a
lawag, ket kinibindak dagiti kakaduak nga inturong idiay Damasco. 12
“Adda lalaki sadiay nga agnagan Ananias. Napasnek a mangan-annurot iti
Lintegtayo ken raraemen dagiti amin a Judio nga agnanaed iti dayta a
siudad. 13 Immay iti ayanko sa nagtakder iti abayko ket kinunana, ‘Kabsat
a Saulo, makakitaka manen!’ “Iti dayta met la a kanito, nagsubli ti
panagkitak ket minatmatak ni Ananias. 14 “‘Pinilinaka ti Dios dagiti
kapuonantayo,’ kinunana, ‘tapno maammoam ti pagayatanna, tapno
makitam ti nalinteg nga Adipenna ken tapno mangngegmo ti mismo a
timekna. 15 Ta sikanto ti saksina a mangipakaammo kadagiti amin a tattao
iti nakita ken nangngegmo. 16 Ket ita, ania pay la ti urayem? Tumakderka.
Awagam ti naganna ket pabuniaganka ken dawatem ti pannakapakawan
dagiti basbasolmo.’” 17 “Nagsubliak ditoy Jerusalem. Bayat ti
panagkarkararagko idiay Templo, adda parmata a nakitak. 18 Nagparang
idi ti Apo ket kinunana, ‘Darasem! Pumanawka a dagus ditoy Jerusalem;
saan nga awaten dagiti tattao ditoy ti pammaneknekmo maipapan kaniak.’
19 “‘Apo,’ insungbatko, ‘ammoda unay a sinerrekko ti amin a sinagoga
ket tiniliw ken kinabkabilko dagiti mamati kenka. 20 Idi mapapatay ni
Esteban a saksim, addaak a mismo sadiay. Immanamongak iti
pannakapapatayna ket inaywanak ti pagan-anay dagiti nangpapatay
kenkuana.’ 21 “‘Inka,’ kinuna ti Apo kaniak, ‘ta ibaonka kadagiti Hentil.’”
22 Nagdengngeg dagiti tattao ken ni Pablo agingga iti nasaona daytoy.
Ngem nagririawda a nakangngeg iti imbagana. “Patayen ti kasta a tao!”
kinunkunada. “Saan a rumbeng nga agbiag!” 23 Nagiikkisda ket
inwagwagisda dagiti kagayda sada nagiwarsi iti tapok iti ngato. 24 Binilin
ti komandante dagiti soldadona nga ipanda ni Pablo iti kuartel, ket
saplitenda tapno ammoenda no apay a kasta la unay ti panangririaw dagiti
Judio kenkuana. 25 Ngem idi mapungo tapno saplitenda, kinuna ni Pablo
iti nakatakder a kapitan sadiay, “Ipalubos aya ti linteg a masaplit ti maysa
nga umili ti Roma a di pay nausig?” 26 Idi mangngeg ti kapitan daytoy,
napan iti komandante ket sinaludsodna, “Ammom kadi no ania daytoy ar-
aramidem? Umili ti Roma dayta a tao!” 27 Inasitgan ti komandante ni
Pablo ket sinaludsodna, “Pudno kadi a maysaka nga umili ti Roma?”
“Wen,” insungbat ni Pablo. 28 Kinuna ti komandante, “Adu ti nagastok iti
panagbalinko nga umili ti Roma.” “Ngem siak, nayanakak nga umili ti
Roma,” insungbat ni Pablo. 29 Dagus a pimmanaw dagiti lallaki a
mangimbestigar koma ken ni Pablo. Nagbuteng met ti komandante ta
pinakawaranna ni Pablo idinto nga umili met gayam ti Roma. 30 Kayat ti
komandante a maammoan ti pudpudno a pangidaruman dagiti Judio ken ni
Pablo. Iti sumuno nga aldaw, pinaikkatna ti kawar ni Pablo.
Pinagtataripnongna dagiti panguloen a papadi ken ti entero a Sanhedrin.
Kalpasanna, innalana ni Pablo sana pinagtakder iti sangoananda.
Aramid 23
1 Minatmatan ni Pablo ti entero a Sanhedrin sana kinuna: “Kakabsatko,
nadalus unay ti konsensiak nga agbibiag iti imatang ti Dios agingga iti
daytoy nga aldaw.” 2 Idi nangngeg daytoy ni Ananias a Kangatoan a Padi,
imbilinna kadagiti agtaktakder iti asideg ni Pablo: “Timamenyo man.” 3
Kinuna ni Pablo kenkuana, “Dusaennakanto ti Dios, sika a pader a
napintaan iti puraw. Situtugawka dita a mangukom kaniak kas mayannurot
iti Linteg, ngem salungasingem met ti Linteg iti panangibilinmo a
makabilak!” 4 Kinuna dagiti adda iti asideg ni Pablo, “Pabpabainam ti
Kangatoan a Padi ti Dios!” 5 “Diak ammo, kakabsat, nga isu ti Kangatoan
a Padi,” insungbat ni Pablo. “Kuna ti Nasantoan a Surat, ‘Dimo pagsawan
iti dakes ti agturay kadagiti tattaom.’” 6 Idi nadlaw ni Pablo a
sumagmamano kadakuada ti Saduceo ket Fariseo ti dadduma, kinunana iti
Sanhedrin, “Kakabsat, Fariseoak ket Fariseo met dagiti nagannak kaniak.
Maus-usigak ditoy ta namnamaek nga agungarto dagiti natay!” 7 Apaman
a nasaona daytoy, rimsua ti panagsusuppiat dagiti Fariseo ken dagiti
Saduceo, ket nabingay ti taripnong. 8 Saan a mamati dagiti Saduceo a
mapagungar dagiti natay, ken awan dagiti anghel ken espiritu. Ngem
patien dagiti Fariseo nga adda amin dagitoy. 9 Pimmigsa ti
panagpipinnukkawda ket timmakder ti sumagmamano a mamaestro iti
Linteg a kamkameng dagiti Fariseo. Sipipingetda a nangikalintegan.
“Awan dakes a masarakanmi iti daytoy a tao,” kinunada. “Nalabit a pudno
nga adda espiritu wenno anghel a nakisao kenkuana!” 10 Bimmara ti
panagsusuppiat ket nagamak ti komandante amangan no pisangpisangenda
ni Pablo, isu a pinababana dagiti soldado tapno yadayoda ni Pablo, ket
iserrekda iti kuartel. 11 Iti sumuno a rabii, nagtakder ti Apo iti abay ni
Pablo ket kinunana, “Dika agdanag! Pinaneknekam ti maipapan kaniak
ditoy Jerusalem, ket masapul a kasta met ti aramidem idiay Roma.” 12
Kabigatanna, nagtataripnong ti sumagmamano a Judio ket insapatada a
dida mangan wenno uminum iti uray ania agingga iti mapatayda ni Pablo.
13 Nasurok nga uppat a pulo a lallaki dagiti nagtutulag iti kastoy. 14
Napanda kadagiti panguloen a papadi ken kadagiti panglakayen ket
kinunada, “Insapatami a dikami mangan iti uray ania agingga iti
mapataymi ni Pablo. 15 Ita ngarud, dakayo ken ti Sanhedrin, paibagayo iti
komandante a paulogenna ni Pablo iti yanyo a kasla kayatyo a palutpoten
ti pudpudno maipapan kenkuana. Ngem sisasaganakamto a mangpatay
kenkuana sakbay a makaasideg ditoy.” 16 Nangngeg ti lalaki nga anak ti
babai a kabsat ni Pablo daytoy a sikat. Napan ti kaanakanna iti kuartel ket
imbagana kenkuana. 17 Inayaban ni Pablo ti maysa kadagiti ofisiales ket
kinunana, “Ipanmo daytoy nga agtutubo iti komandante ta adda ibagana
kenkuana.” 18 Intulod ti ofisial ti agtutubo iti komandante. “Inayabannak
ni Pablo a balud,” kinunana, “ket dinawatna kaniak a yegko kenka daytoy
nga agtutubo, ta adda kano ibagana.” 19 Kinibin ti komandante ti agtutubo
ket inyadayona sana sinaludsod iti nalimed, “Ania ti ibagam kaniak?” 20
Kinuna ti agtutubo, “Nagtutulagan dagiti pangulo a Judio a dawatendanto
kenka inton bigat a paulogem ni Pablo iti Sanhedrin. Kunadanto a kayatda
a palutpoten ti napudpudno maipapan kenkuana. 21 Ngem dimo koma
patgan ti dawatda, ta adda nasurok nga uppat a pulo a lallaki nga
aglemlemmeng ken agur-uray kenkuana. Insapatada a dida mangan wenno
uminum agingga iti mapatayda ni Pablo. Sisasaganada a mangibanag iti
daytoy, ket ur-urayenda ti pangngeddengmo.” 22 Kinuna ti komandante,
“Dimo ibagbaga iti siasinoman nga imbagam kaniak daytoy.” Ket
pinagawidna ti agtutubo. 23 Kalpasanna, inayaban ti komandante ti dua
kadagiti ofisialesna sana kinuna, “Isaganayo ti dua gasut a soldado a
mapan idiay Cesarea, agraman ti pitopulo nga agkabalio ken dua gasut nga
agtagipika, ket agsaganakayo a pumanaw inton alas nuebe ita a rabii. 24
Isaganaanyo met ni Pablo kadagiti kabalio a pagsakayan, ket itulodyo nga
awan pakaan-anoanna ken ni Gobernador Felix.” 25 Kalpasanna, nagsurat
iti kastoy: 26 “Natan-ok a Gobernador Felix: 27 “Kablaawanka. Tiniliw
dagiti Judio daytoy a lalaki ket dandanida pinatay. Naammoak a maysa
nga umili ti Roma, isut’ gapuna nga inarayatmi, siak ken dagiti soldadok.
28 Kayatko idi nga ammoen no ania ti pangidarumanda kenkuana, isu a
pinayulogko iti Sanhedrinda. 29 Awan nasarakak nga inaramidna a
pakaigapuan ti pannakapapatay wenno pannakaibaludna. Naidarum gapu
kadagiti parikut maipapan iti lintegda. 30 Idi maammoak nga isiksikat a
papatayen dagiti Judio, napanunotko nga ibaon kenka. Imbagak kadagiti
mangidarum nga idatagda ti darumda kenka. Toy sidadayaw, Claudio
Lisias.” 31 Tinungpal dagiti soldado ti naibilin kadakuada. Innalada ni
Pablo ket iti dayta a rabii, impanda idiay Antipatrisa. 32 Kabigatanna,
nagsubli dagiti saan a nagsakay a soldado iti kuartelda. Kinuyog dagiti
nakakabalio ni Pablo. 33 Idi dumtengda idiay Cesarea, intedda ti surat iti
gobernador ket inyawatda met ni Pablo kenkuana. 34 Binasa ti gobernador
ti surat sana sinaludsod ken ni Pablo no ania a probinsia ti nagtaudanna.
Idi maammoanna a taga-Cilicia, 35 kinunana, “Denggenkanto inton
sumangpet dagiti nangidarum kenka.” Kalpasanna, imbilinna a maipan ni
Pablo iti palasio a binangon ni Herodes ket maguardiaan sadiay.
Aramid 24
1 Kalpasan ti lima nga aldaw, napan ni Ananias a Kangatoan a Padi idiay
Cesarea. Kinaduana ti sumagmamano a panglakayen ken ti maysa nga
abogado nga agnagan Tertulo. Napanda ken ni Gobernador Felix ket
inyulida ti darum a maibusor ken ni Pablo. 2 Idi naayaban ni Pablo,
indatag ni Tertulo ti pammabasolda kenkuana. Kinunana: “Natan-ok a
Gobernador! Gapu iti nainsiriban a panangidalanmo, nabayagen nga adda
talna ditoy, ket adu ti maar-aramid a pagimbagan ti ilitayo. 3
Maragsakankami nga umawat kadagitoy iti amin a disso, iti amin a
tiempo, ket agyamankam unay kenka. 4 Diak kayat a mataktakka, isu a
dawatek ti anusmo a dumngeg iti ababa a palawagmi. 5 Natakuatanmi a
nakaam-amak daytoy a tao. Idadauloanna ti riribuk kadagiti Judio iti
entero a lubong. Isu pay ti pangulo ti sekta dagiti Nazareno. 6 Pinadasna a
tulawan ti Templo ngem tiniliwmi. 8 No usigem daytoy a lalaki,
maammoamto met dagiti pangidardarumanmi kenkuana.” 9
Kimmanunong dagiti Judio iti darum ket pinaneknekanda a pudno amin
dagitoy. 10 Sineniasan ti gobernador ni Pablo nga agsao. Kinuna ni Pablo:
“Apo Gobernador, ammok nga adun a tawen a sika ti ukom iti daytoy a
pagilian. Isut’ gapuna a maragsakanak a mangipalawag iti kalintegak iti
sangoanam. 11 Kas maammoamto met laeng, awan pay sangapulo ket dua
nga aldaw ti napalabas manipud idi mapanak idiay Jerusalem tapno
agdaydayawak. 12 Didak nasarakan dagiti Judio a makisupsuppiat iti uray
siasinoman idiay Templo, wenno mangriribuk kadagiti tattao iti sinagoga
wenno iti sadinoman a paset ti siudad. 13 Awan met maidatagda kenka a
pammaneknek kadagiti pangidardarumanda kaniak ita. 14 Ngem
annugotek kenka daytoy: Agdaydayawak iti Dios dagiti kapuonanmi
babaen iti isusurotko iti daytoy a Dalan a kunkunada nga ulbod. Ngem
mamatiak met kadagiti amin a naisurat iti Linteg ni Moises ken kadagiti
libro dagiti profeta. 15 Mangnamnamaak iti Dios a kas iti
panangnamnamada, nga agungarto amin a tattao, dakes man wenno
naimbag. 16 Isut’ gapuna nga ar-aramidek ti amin a kabaelak tapno
nadalus ti konsensiak iti imatang ti Dios ken ti tao. 17 “Kalpasan ti
sumagmamano a tawen a kaawanko idiay Jerusalem, nagsubliak manen
sadiay a mangted iti kuarta kadagiti kailiak ken mangiruknoy iti daton. 18
Kasta ti ar-aramidek idi masarakandak idiay Templo, kalpasan ti
panangileppasko iti seremonia ti pannakadalus. Awan ti adu a tao, ket
awan met riribuk. 19 Ngem adda sumagmamano a Judio a taga-probinsia
ti Asia. Agparangda met koma ita iti sangoanam ket idatagda ti darum a
maibusor kaniak, no adda. 20 Wenno, ibaga koma dagitoy a tattao ti
nasarakanda a labsingko idi agtakderak iti sangoanan ti Sanhedrin, 21
malaksid daytoy nga ipukkawko idi sitatakderak iti sangoananda: ‘Us-
usigendak ita nga aldaw, gapu ta mamatiak nga agungarto dagiti natay.’”
22 Gapu ta adu ti ammo ni Felix maipapan iti daytoy a Dalan,
pinasardengna pay laeng ti panagusig ket kinunana, “Ibanagkonto ti kasom
inton sumangpet ni Lisias a komandante.” 23 Binilinna ti kapitan a
maguardiaan ni Pablo, ngem maikkan iti bassit a wayawaya, ken
mapalubosan dagiti gagayyemna a mangted kadagiti kasapulanna. 24
Kalpasan ti sumagmamano nga aldaw, dimteng ni Felix ken ni Drusila nga
asawana a maysa a Judio. Pinaayabanna ni Pablo ket dimngeg kenkuana iti
panagsaona maipapan iti pammati ken ni Cristo Jesus. 25 Ngem idi
ipalpalawag ni Pablo ti maipapan iti kinalinteg, panagteppel ken ti
idadateng ti Aldaw ti Panangukom, nagbuteng ni Felix ket kinunana,
“Pumanawka pay laeng. Ayabankanto manen inton masangok.” 26
Masansan a paayabanna ni Pablo ket kasarsaritana, ta namnamaenna a
mangted ni Pablo kenkuana iti kuarta. 27 Kalpasan ti dua a tawen,
sinukatan ni Porcio Festo ni Felix a kas gobernador. Agsipud ta kayat ni
Felix a pagustoan dagiti Judio, binaybay-anna ni Pablo iti pagbaludan.
Aramid 25
1 Simmangpet ni gobernador Festo iti probinsia nga iturayanna. Kalpasan
ti tallo nga aldaw, napan idiay Jerusalem manipud Cesarea. 2 Sadiay,
indatag dagiti panguloen a papadi ken dagiti papangulo a Judio dagiti
darumda ken ni Pablo. Nagpakpakaasida ken ni Festo 3 a paipanna ni
Pablo idiay Jerusalem, ta panggepda a saneben ket papatayenda iti dalan. 4
Simmungbat ni Festo: “Sibabalud ni Pablo idiay Cesarea. Agsubliak
sadiay iti mabiit. 5 Ibagayo kadagiti panguloyo a kumuyogda kaniak a
sumalog idiay Cesarea ket idarumda dayta a tao no adda nakabasolanna.”
6 Nagyan pay ni Festo idiay Jerusalem iti walo wenno sangapulo nga
aldaw sa simmalog idiay Cesarea. Iti sumuno nga aldaw, nagtugaw iti
pangukoman ket imbilinna a maidatag ni Pablo. 7 Idi sumangpet ni Pablo,
inaribungbongan dagiti Judio a naggapu idiay Jerusalem ket adu nga
agkakadagsen a pammabasol ti nangidarumanda kenkuana, ngem dida met
mapaneknekan. 8 Inkalintegan ni Pablo ti bagina: “Awan inaramidko a
maikaniwas iti Linteg dagiti Judio wenno iti Templo wenno iti Emperador
ti Roma.” 9 Kayat ni Festo a pagustoan dagiti Judio, isu a sinaludsodna
ken ni Pablo, “Kayatmo kadi ti mapan idiay Jerusalem a pangusigak kenka
kadagitoy a darum?” 10 “Agtaktakderakon iti sangoanan ti pangukoman ti
Emperador a rumbeng a pakausigak,” insungbat ni Pablo. “Awan basolko
kadagiti Judio kas pagaammom unay. 11 No adda sinalungasingko a
linteg, ket nakaaramidak iti banag a rumbeng a pakatayak, diak rigaten ti
matay. Ngem no awan kinapudno dagiti nakaidarumak, awan ti kalintegan
ti siasinoman a mangyawat kaniak kadakuada. Agkamangak iti
Emperador.” 12 Nakiuman ni Festo kadagiti mamalbalakad kenkuana, ket
kalpasanna, kinunana, “Kimmamangka iti Emperador. Inka ngarud iti
Emperador.” 13 Kalpasan ti sumagmamano nga aldaw, simmangpet ni Ari
Agripa ken ni Bernice idiay Cesarea tapno kablaawanda ni Festo. 14 Iti
kaaddada sadiay iti sumagmamano nga aldaw, impalawag ni Festo iti ari ti
kasasaad ni Pablo. “Adda maysa a balud ditoy nga imbati ni Felix,”
kinunana. 15 “Idi addaak idiay Jerusalem, nagdarum dagiti panguloen a
papadi ken dagiti panglakayen a Judio ket dinawatda nga ukomek. 16
Ngem imbagak kadakuada a saan nga ugali dagiti Romano ti mangyawat
iti siasinoman a naidarum sakbay a makisango kadagiti nangidarum
kenkuana tapno maikkan iti gundawayna a mangikalintegan iti bagina. 17
Ngarud, idi immayda ditoy, diak nagtaktak. Iti sumuno nga aldaw,
nagtugawak iti pangukoman ket imbilinko a maayaban ti balud. 18
Timmakder dagiti nangidarum kenkuana ngem awan naiparangda a
nakabasolanna a kas impagarupko. 19 Nakisuppiatda laeng kenkuana
maipapan iti relihionda ken maipapan iti maysa a tao nga agnagan Jesus;
natay ngem kuna ni Pablo a sibibiag. 20 Agsipud ta diak ammo no kasano
ti panangpalutpotko kadagitoy, dinamagko ken ni Pablo no kayatna ti
mapan idiay Jerusalem a pakausiganna kadagitoy. 21 Ngem dinawatna nga
agbati pay a kas balud tapno ti Emperador ti mangukom kenkuana. Iti
kasta, imbilinko a mabantayan agingga iti maibaonko ken ni Cesar.” 22
Kinuna ni Agripa ken ni Festo, “Kayatko a denggen a mismo daytoy a
tao.” “Denggemto no bigat,” insungbat ni Festo. 23 Iti kabigatanna,
dimteng da Agripa ken Bernice iti baet ti adu a seremonia ken
pammadayaw ket simrekda iti pangukoman a kinuyog dagiti komandante
ken dagiti mabigbigbig a tattao iti siudad. Nagbilin ni Festo ket naiserrek
ni Pablo. 24 Kinuna ni Festo, “Ari Agripa ken dakay amin a naitallaong
ditoy: Makitayo daytoy a lalaki nga idardarum kaniak dagiti Judio idiay
Jerusalem ken uray pay dagiti adda ditoy. Ipukpukkawda a saanen a
rumbeng nga agbiag. 25 Ngem awan masarakak nga inaramidna a
rumbeng a pakatayanna. Ket agsipud ta kimmamang iti Emperador,
inkeddengko nga ibaon kenkuana. 26 Ngem diak ammo no ania ti isuratko
iti Emperador maipapan kenkuana. Iparangko ngarud iti saklangyo,
nangruna iti sangoanam, Apo Ari Agripa, tapno addanto maisuratko
kalpasan ti pannakausisana. 27 Makitak a saan a rumbeng nga ibaonko ti
maysa a balud no diak ilawlawag dagiti pakaidarumanna.”
Aramid 26
1 Kinuna ni Agripa ken ni Pablo, “Mapalubosanka a mangikalintegan iti
bagim.” Iti kasta, intayag ni Pablo ti imana ket nagsao a kas
panangsalaknibna iti bagina: 2 “Ari Agripa! Ibilangko a nagasatak ita nga
aldaw ta mabalinko a sungbatan iti saklangmo dagiti amin a
pangidardaruman dagiti Judio kaniak. 3 Agsipud ta ammom amin nga
ugali ken pagsusuppiatan dagiti Judio, dawatek ngarud nga anusannak a
denggen. 4 “Ammo amin a Judio ti panagbiagko manipud kinaubingko.
Ammoda met nga iti unos ti panagbiagko, nagnaedak iti ilik ken idiay
Jerusalem. 5 Sigud nga ammoda, no kayatda a saksian a manipud pay idi
damo, a nagbiagak a kas miembro dagiti Fariseo, ti kaingetan a bunggoy ti
relihionmi. 6 Ket ita, agtaktakderak ditoy a mausig gapu ta namnamaek ti
inkari ti Dios kadagiti kapuonantayo, 7 ti kari a namnamaen nga awaten
dagiti sangapulo ket dua a tribu bayat ti panagdaydayawda iti Dios iti
aldaw ken rabii. Ket gapu iti daytoy a namnama, Natan-ok nga Ari,
idarumdak dagiti Judio. 8 Dakayo nga adda ditoy, apay a narigatyo a
patien a pagungaren ti Dios dagiti natay? 9 “Uray siak, impagarupko idi
damo a masapul nga aramidek ti amin a kabaelak a mangdadael iti nagan
ni Jesus a taga-Nazaret. 10 Kasta ti inaramidko idiay Jerusalem.
Inikkandak dagiti panguloen a papadi iti pammalubos ket pinaibaludko ti
adu kadagiti tattao ti Dios. Idi masentensiaanda a mapapatay,
immanamongak met. 11 Namin-adu a pinadusak ida kadagiti amin a
sinagoga; pinilitko ida a mangibaga a tallikudanda ti pammatida. Kasta
unay ti pungtotko kadakuada, ket napanak pay kadagiti ganggannaet a
siudad tapno idadanesko ida.” 12 “Daytoy ti gapuna a napanak idiay
Damasco. Adda kaniak ti pammalubos ken bilin kaniak dagiti panguloen a
papadi. 13 Tengnga ti aldaw idi addaak iti dalan, Natan-ok nga Ari.
Nakitak ti maysa a lawag—naranraniag pay ngem ti init—a naggapu sadi
langit. Makasisirap ti lawag a nanglikmut kadakami a nagkukuyog. 14
Napasagkam amin iti daga. Nangngegko ti maysa a timek a nagkuna
kaniak iti pagsasao iti Hebreo, ‘Saulo, Saulo! Apay nga idaddadanesnak?
Dundunorem laeng ti bagim no kugtaram ti natirad a banag.’ 15
“‘Siasinoka, Apo?’ sinaludsodko. ‘Siak ni Jesus nga idaddadanesmo,’
insungbat ti Apo. 16 ‘Tumakderkan. Nagparangak kenka tapno dutokanka
nga adipenko. Sika ti mangibaga kadagiti tattao iti nakitam ita nga aldaw
maipapan kaniak ken kadagiti ipakitakto pay kenka. 17 Isalakankanto
kadagiti tattao ti Israel ken kadagiti Hentil a pangibaonak kenka. 18
Lukatamto dagiti matada, ket manipud iti sipnget, iturongmonto ida iti
lawag. Manipud iti pannakabalin ni Satanas, iturongmo ida iti
pannakabalin ti Dios tapno babaen iti pammatida kaniak, mapakawanto
dagiti basbasolda ket maibilangdanto kadagiti tattao ti Dios.’” 19 “Isut’
gapuna, Ari Agripa,” intuloy ni Pablo, “a nagtulnogak iti nailangitan a
parmatak. 20 Immuna a nangaskasabaak idiay Damasco, ket kalpasanna,
idiay Jerusalem ken kadagiti amin a lugar dagiti Judio ken kasta met
kadagiti Hentil. Inkasabak a masapul nga agbabawida kadagiti basbasolda,
agsublida iti Dios ket aramidenda dagiti banag a mangipakita a
nagbabawidan. 21 Daytoy ti gapuna a tiniliwdak dagiti Judio idi addaak
idiay Templo ket kayatdak a patayen. 22 Ngem agpapan ita,
tinultulongannak ti Dios, ket agtaktakderak ditoy a mangted iti
pammaneknekko kadagiti amin a tattao, nanumo man wenno natan-ok. Ul-
ulitek laeng ti kinuna ni Moises ken dagiti profeta 23 a masapul nga
agsagaba ti Cristo, ket isunto ti umuna nga agungar tapno ipakaammona ti
lawag ti pannakaisalakan kadagiti Judio kasta met kadagiti Hentil.” 24 Iti
kasta a panangikalintegan ni Pablo iti bagina, binugkawan ni Festo a
kunana, “Agmauyongka, Pablo. Pagmauyongennaka ti adu nga adalmo.”
25 “Saanak nga agmauyong, natan-ok unay a Festo,” insungbat ni Pablo.
“Pudno amin nga ibagbagak. 26 Naturedak nga agsao, agsipud ta ammo ti
ari ti maipapan kadagitoy. Pagaammok a nadlawmo amin dagitoy, ta
saanda a napasamak iti nalemmeng a lugar. 27 Ari Agripa, mamatika kadi
kadagiti profeta? Ammok a mamatika!” 28 Kinuna ni Agripa ken ni Pablo,
“Kayatnak sa ketdi a pagbalinen a Kristiano iti daytoy a kabiit ti tiempo.”
29 “Iti mabiit man wenno mabayag,” insungbat ni Pablo, “ikarkararagko
iti Dios a sika ken dagiti amin nga agdengdengngeg kaniak ita nga aldaw,
agbalinkayo koma a Kristiano a kas kaniak—malaksid laeng ti
pannakaibaludko!” 30 Kalpasanna, timmakder ti ari, ti gobernador, ni
Bernice ken dagiti dadduma. 31 Idi nakapanawdan, kinunada iti maysa
ken maysa, “Awan ti inaramid daytoy a tao a rumbeng a pakatayan wenno
pakaibaludanna.” 32 Kinuna pay ni Agripa ken ni Festo, “Mawayawayaan
koman daytoy a tao no saan a kimmamang iti Emperador.”
Aramid 27
1 Idi maikeddeng nga aglayagkami a mapan idiay Italia, nayawat ni Pablo
ken dadduma pay a balud ken ni Julio, maysa nga ofisial ti rehimiento
dagiti soldado a maaw-awagan, “Ti Rehimiento Emperador.” 2
Limmugankam iti maysa a barko a naggapu idiay Adrumeto nga
agsagsagana a mapan kadagiti puerto iti probinsia ti Asia ket
naglayagkami. Kaduami ni Aristarco a Macedonio a taga-Tesalonica. 3 Iti
sumuno nga aldaw, dimtengkam idiay Sidon. Naasian ni Julio ken ni
Pablo, ket pinalubosanna a mapan bumisita kadagiti gagayyemna ken
maikkan iti kasapulanna. 4 Manipud Sidon, gapu ta masubami ti angin,
naglayagkam iti dayaen ti puro ti Chipre nga awan ti napigsa nga angin. 5
Binallasiwmi ti baybay ti Cilicia ken Pamfilia ket dimtengkam idiay Mira
ti Licia. 6 Sadiay, nakasarak ti ofisial iti maysa a barko a naggapu idiay
Alejandria nga agturong idiay Italia ket inlugannakami. 7 Nainnayad ti
panaglayagmi iti sumagmamano nga aldaw, ket adu a rigatmi a dimmanon
idiay Cinido. Gapu ta masubami ti angin, naglayagkam iti abagatan ti puro
ti Creta, iti kasumbangir ti Salmon, nga awan ti napigsa nga angin ket
limmabaskami idiay Salmon. 8 Nagpapaigidkami. Adu a rigatmi a
dimmanon iti maysa a disso a managan Natalged a Sangladan, iti asideg ti
ili a Lasea. 9 Nagbayagkami sadiay agingga a napeggaden ti
panangituloymi iti biahe agsipud ta nalpasen ti Aldaw a Pannakapakawan
ti Basol. Iti kasta, binalakadan ni Pablo ida: 10 “Appo, makitak a
napeggad ti panagbiahetay ita. Adunto ti madadael a karga. Madadael met
ti barko, ket agpeggad pay ti biagtayo.” 11 Ngem ti ofisial ti armada ad-
adda a pinatina ti imbaga ti kapitan ken ti akinkukua iti barko. Dina
impangag ti kinuna ni Pablo. 12 Agsipud ta ti sangladan saan a nasayaat a
pagpundoan iti tiempo ti lam-ek, kayat ti kaaduan ti agluas bareng no
makadanonda idiay Fenix, maysa a puerto idiay Creta. Nakasango ti
puerto iti abagatan-a-laud ken amianan-a-laud ket mabalinda a palabasen
ti tiempo ti lam-ek sadiay. 13 Idi adda pul-oy nga aggapu iti abagatan,
impagarup dagiti tattao a mabalindan ti agtuloy iti panggepda a papanan.
Ingngatoda dagiti angkla ket tinaraigidda ti puro ti Creta. 14 Iti saan a
mabayag, immay ti napigsa nga angin a managan Amian a naggapu iti
puro. 15 Siniplaganna ti barko ket gapu ta marigatankami a mangsuba iti
angin, intulokmin a mayangin ti barko. 16 Naiturongkami iti
masalinongan a paset ti bassit a puro ti Cauda. Sadiay, inkarkarigatanmi
nga insagpat ti bangka iti barko. 17 Idi maisagpatda ti bangka,
pinarautanda ti aglawlawna. Gapu ta amakenda a maisadsadkam iti
kadaratan ti Sirte, imbabada ti layag ket binaybay-andan a mayangin ti
barko. 18 Nagtuloy ti dawel ti bagio, isut’ gapuna nga iti sumuno nga
aldaw, nagitappuakda kadagiti karga. 19 Iti sumaganad nga aldaw,
intinnagda ti sumagmamano nga alikamen ti barko. 20 Adu nga aldaw a
dimi nakita ti init wenno dagiti bituen, ket nagtultuloy a nagangin iti
napigsa. Awanen ti namnamami a maisalakan. 21 Kalpasan ti nabayag a
tiempo nga awan kinnan dagiti tattao, timmakder ni Pablo iti sangoananda
ket kinunana: “Kakabsat, no impangagdak la koma idi, ket saantayo a
nagluas manipud Creta, naliklikantayo koma dagitoy a dadael ken pukaw.
22 Ngem ita, dawatek a dikay agdanag. Awan ti matay kadakayo. Isuna
laeng ta madadael ti barko. 23 Ta idi rabii, immay ti anghel ti Dios nga
akinkukua kaniak ken pagdaydayawak, 24 ket kinunana, ‘Dika agbuteng,
Pablo! Masapul a sumaklangka iti Emperador. Ket gapu ta naimbag ti
Dios kenka, isalakanna ti amin a kinakuyogmo iti barko.’ 25 Isut’ gapuna,
kakabsat, a patibkerenyo ti pakinakemyo! Agtalekak iti Dios ket awan
duaduak a maaramidto ti kas naibaga kaniak. 26 Ngem masapul a
maisadsadtayo iti maysa a puro.” 27 Dimteng ti maika-14 a rabii. Mayal-
allonkami pay laeng iti Baybay Adriatico. Idi tumengnga ti rabii,
nagparikna kadagiti marinero nga umas-asidegkami iti takdang. 28 Iti
kasta, nangibabada iti pangrukod iti kaadalem ti baybay ket nasarakanda
nga 40 a metro ti kaunegna. Rinukodda manen kalpasan ti sumagmamano
a kanito, ket nasarakanda a 30 a metro ti kaunegna. 29 Nagbutengda
amangan no maidungparkami kadagiti kabatoan, isut’ gapuna a
nangitinnagda iti uppat nga angkla iti kutit ti barko ket inkararagda a
dumteng koman ti bigat. 30 Kayat dagiti marinero a panawan ti barko.
Imbabada ti bangka iti danum ket nagpamarangda a kasla mangitinnagda
iti sumagmamano nga angkla iti parupa ti barko. 31 Ngem kinuna ni Pablo
iti ofisial ken kadagiti soldado, “No saan nga agbati dagiti marinero ditoy
barko, awan ti maisalakan kadakayo.” 32 Iti kasta, pinugsat dagiti soldado
ti tali a nakaibitinan ti bangka ket binaybay-andan a matnag. 33 Idi
bumigaten, dinawat ni Pablo kadakuada amin a manganda. Kinunana:
“Nagur-uraykayo iti sangapulo ket uppat nga aldaw, ket agingga ita awan
pay impaunegyo. 34 Dawatek ngarud a mangankayon. Kasapulanyo
daytoy tapno pumigsakayo. Awan ti pakaan-anoan ti siasinoman
kadakayo.” 35 Idi naisaon ni Pablo daytoy, nangala iti tinapay, nagyaman
iti Dios iti imatangda amin sana pinisipisi ti tinapay ket nangan. 36
Napatured ti nakemda amin ket nanganda met. 37 Duagasut, pitopulo ket
innemkami amin a naglugan. 38 Idi nabsogda aminen, intappuakda dagiti
trigo iti baybay tapno lumag-an ti barko. 39 Bumigaten idi matannawagan
dagiti marinero ti igid ti baybay, nupay no dida mabigbig no ania dayta a
lugar. Ngem nakitada nga adda nasalindeg a kadaratan ket
nagnunummoanda a no mabalin, isadsadda ti barko sadiay. 40 Pinugsatda
ngarud dagiti angkla, ket binay-anda a lumned iti danum. Inukasda met
dagiti tali ti timon. Kalpasanna, ingngatoda ti layag iti purwa ti barko
tapno iduron ti angin nga agturong iti igid ti baybay. 41 Ngem naisadsad ti
barko sakbay a makadanon iti kadaratan. Nailumlom ti parupana. Saanen a
makagaraw. Nalasanglasang ti kutitna gapu kadagiti dadakkel a dalluyon.
42 Panggep dagiti soldado a patayen amin dagiti balud tapno awan
kadakuada ti aglangoy nga aglibas. 43 Ngem inatipa ida ti ofisial dagiti
soldado ta kayatna nga isalakan ni Pablo. Imbilinna ketdi kadagiti amin a
makalangoy a tumappuakda nga agpaigid, 44 sa sumaruno dagiti dadduma
a kumpet iti tabla wenno iti narakrak a paset ti barko. Kastoy ti
idadanonmi amin iti igid nga awan nakaan-anoanmi.
Aramid 28
1 Idi makatakdangkamin a sikakaradkad, naammoanmi a Malta ti nagan ti
puro a sinangladanmi. 2 Napintas ti panangsangaili kadakami dagiti
agnaed sadiay. Impasgedandakam iti paginudoan. Nalam-ek ngamin ket
mangrugin nga agtudo. 3 Nangurnong ni Pablo iti sangabakruy a kayo, ket
insungrodna iti apuy. Gapu iti pudot, rimmuar ti maysa a karasaen ket
tinukkawanna ti ima ni Pablo. 4 Idi makita dagiti umili ti uleg a nakabitin
iti ima ni Pablo, kinunada iti maysa ken maysa, “Awan duadua a
mammapatay daytoy a tao. Nakalasat iti baybay, ngem saan nga ipalubos
ti hustisia nga agbiag.” 5 Ngem inwarsi ni Pablo ti uleg iti apuy, ket awan
ti nakaan-anoanna. 6 Inurayda a lumteg ti bagina wenno kellaat a matuang
ket matay, ngem idi awan maurayda a mapasamak kenkuana, nagbalbaliw
ti panunotda ket kinunada a maysa a dios ni Pablo. 7 Publio ti nagan ti
pangulo iti dayta a puro. Asideg iti ayanda ti sumagmamano a taltalon ni
Publio. Tallo nga aldaw a siraragsak a nangsangaili kadakami. 8 Nairana
nga aggurigor ken agsika ti ama ni Publio. Simrek ni Pablo iti siled ti
masakit. Nagkararag sana impatay dagiti imana ket pinaimbagna. 9 Idi
mapasamak daytoy, immay met dagiti amin a masakit iti puro ket
napaimbagda. 10 Adu ti intedda a sagut kadakami. Idi agluaskamin,
pinabalonandakami kadagiti masapsapulmi iti biahe. 11 Kalpasan ti tallo a
bulan, limmugankam iti “Singin a Dios,” maysa a barko a naggapu idiay
Alejandria ken nagpundo iti dayta a puro iti kalam-ekna. 12
Simmangladkam iti siudad ti Siracusa. Nagyankami sadiay iti las-ud ti
tallo nga aldaw. 13 Manipud sadiay, intuloymi ti naglayag ket
dimtengkam idiay Regio. Kabigatanna, adda angin a naggapu iti abagatan
ket iti maikadua nga aldaw, simmangpetkam idiay Puteoli. 14
Nakasarakkami sadiay iti sumagmamano a kakabsat iti pammati, ket
inawisdakami a makipagtaeng kadakuada iti makalawas. Kamaudiananna,
dimmanonkam idiay Roma. 15 Nadamag dagiti kakabsat sadiay ti
maipapan kadakami ket immaydakami sinabat idiay Plasa ni Appio ken
kasta met idiay Tres Tabernas. Idi makita ida ni Pablo, nagyaman iti Dios
ket napapigsa ti pakinakemna. 16 Idi sumangpetkam idiay Roma,
napalubosan ni Pablo nga agwaywayas iti sabali a balay a guardiaan ti
maysa a soldado. 17 Kalpasan ti tallo nga aldaw, inawisna dagiti pangulo a
Judio iti siudad tapno agtataripnongda. Idi naummongdan, kinunana
kadakuada, “Kakabsatko! Nupay awan inaramidko a maibusor kadagiti
kailiantayo wenno kadagiti ugali a tinawidtayo kadagiti kapuonantayo,
pinabaluddak dagiti Judio idiay Jerusalem ket nayawatak kadagiti
pannakabagi ti gobierno Romano. 18 Kalpasan ti pannakausigko,
mawayawayaanak koman gapu ta awan met nasarakanda nga inaramidko a
rumbeng a pakadusaak a matay. 19 Ngem idi madi dagiti Judio, kapilitan a
nagkamangak iti Emperador, uray no awan pangidarumak kadagiti kailiak.
20 Daytoy ti gapuna a kayatkayo a makita ken makasao, ta nakawaranak
gapu kenkuana a namnama dagiti tattao ti Israel.” 21 Kinunada kenkuana,
“Awan naawatmi a sursurat a naggapu idiay Judea maipapan kenka. Awan
met ti dakes nga impadamag wenno nasao dagiti kakabsat a naggapu
sadiay. 22 Ngem kayatmi a denggen ti kapanunotam ta ammomi nga iti
amin a lugar, agsasao dagiti tattao iti maibusor iti daytoy a sekta a
nakikaduaam.” 23 Iti kasta, nangtudingda iti aldaw a pannakisaoda ken ni
Pablo, ket idi dumteng dayta nga aldaw, adu ti napan iti balay a
pagnanaedanna. Nagmalmalem nga inlawlawagna kadakuada ti
mensahena maipapan iti Pagarian ti Dios. Ket inaramidna amin a
kabaelanna a nangallukoy kadakuada a mamati a pudno ti sasawenna
maipapan ken ni Jesus babaen iti panangaramatna iti Linteg ni Moises ken
dagiti Libro dagiti Profeta. 24 Adda dagiti namati iti saona ngem saan a
naallukoy ti dadduma. 25 Pimmanawda ngarud nga agsusuppiat, kalpasan
ti panagkuna ni Pablo iti daytoy: “Pudno unay ti panagsao ti Espiritu Santo
kadagiti kapuonantayo babaen ken ni profeta Isaias. 26 Ta kinunana, ‘Inka
ibaga iti daytoy nga ili: Dengngegkayto la a dengngeg ngem dikayo
makaawat; Kitakayto la a kita ngem dikayo makailasin. 27 Agsipud ta
natangken ti ulo dagitoy a tattao, Inapputda dagiti lapayagda, Inkidemda
dagiti matada, Amangan no makakita ken makangngegda, Ken
makaawatda, Ket agsublida kaniak, kuna ti Dios, Tapno paimbagek ida.’”
28 Inggibus ni Pablo: “Masapul nga ibagak kadakayo tapno maammoanyo
a naibaonen kadagiti Hentil dagiti mangipakaammo iti mensahe ti Dios
maipapan iti pannakaisalakan. Dumngegdanto!” 30 Dua a tawen a
nagtaeng sadiay ni Pablo iti inabanganna a balay. Inawatna amin a
simmarungkar kenkuana. 31 Situtured ken nawaya a nangikasaba
maipapan iti Pagarian ti Dios ken nangisuro maipapan ken ni Apo Jesu-
Cristo.
Roma 1
1 Siak ni Pablo. Maysaak nga adipen ni Cristo Jesus ken apostol a pinili
ken inayaban ti Dios a mangikasaba iti Naimbag a Damagna. 2 Nabayagen
nga inkari ti Dios daytoy Naimbag a Damag a nailanad kadagiti Nasantoan
a Sursurat. Inaramatna dagiti profeta a nangipakaammo iti daytoy. 3
Daytoy Naimbag a Damag isu ti maipapan iti Anakna, ni Apotayo a Jesu-
Cristo. No maipa-pan iti kinataona, nagtaud iti kaputotan ni David; 4 no
maipapan iti panagtaudna iti Dios ken kinasantona, naipakita babaen iti
naindaklan a pannakabalin nga isu ti Anak ti Dios gapu iti panagungarna.
5 Gapu kenkuana, inted ti Dios kaniak ti gunda-way nga agbalin nga
apostol iti nagan ni Cristo, tapno idalanko amin a tattao a mamati ken
agtulnog. 6 Nairamankayo dita Roma nga inayaban ti Dios tapno
agbalinkayo a kukua ni Jesu-Cristo. 7 Daytoy ti gapuna a nagsuratak
kadakay amin nga adda dita Roma, dakayo nga ay-ayaten ken inayaban ti
Dios nga agbalin a tattaona. Sapay koma ta parabur ken talna ti ited
kadakayo ti Dios nga Amatayo ken ni Apo Jesu-Cristo. 8 Umuna unay,
agyamanak iti Diosko babaen ken ni Jesu-Cristo para kadakayo amin.
Agdindinamag ngamin ti maipapan iti pammatiyo iti entero a lubong. 9
Masaksian ti Dios a pudno ti ibagbagak; wen, ti Dios a pagserserbiak iti
amin a pusok babaen iti panangikaskasabak iti Naimbag a Damag
maipapan iti Anakna. Ammo ti Dios a kanayon a silalagipak kadakayo 10
tunggal agkararagak. Idawdawatko iti Dios a no pagayatanna, mabalinko
met laengen ti bumisita kadakayo. 11 Ta mailiwak unay a kumita
kadakayo tapno ibingayankay iti naespirituan a bendision a mangpapigsa
kadakayo. 12 Kayatko a sawen nga agtitinnulongtayo: matulongankayo
babaen iti pammatik ket matulongandak met babaen iti pammatiyo. 13
Kakabsat, kayatko a maammoanyo koma a namin-adun a pinanggepko ti
sumarungkar kadakayo ngem adda latta maka-lapped kaniak. Tarigagayak
ngamin nga adda met koma mapasurotko kadakayo a kas iti kaadda dagiti
Hentil a napasurotkon. 14 Adda rebbengek kadagiti amin a tattao, Griego
man wenno ganggannaet, kadagiti addaan adal wenno awanan. 15 Isut’
gapuna nga aggagarak a mangikasaba iti Naimbag a Damag kadakayo met
nga agnaed dita Roma. 16 Naan-anay ti panagtalekko iti ebanghelio ta
isut’ pannakabalin ti Dios a mangisalakan kadagiti amin a mamati, umuna
kadagiti Judio kasta met kadagiti Hentil. 17 Ta ipakaammo ti ebanghelio a
ti panangpalinteg ti Dios iti tao mangrugi iti pammati ket agpatingga iti
pammati. Kas kuna ti Nasantoan a Surat: “Agbiagto ti pinalinteg ti Dios
babaen iti pammati.” 18 Manipud langit, impakaammo ti Dios no kasano
nga ukomenna dagiti tattao gapu iti amin a basol ken kinadakes nga
inaramidda. Gapu iti kinadakesda, lappedanda ti pannakaipakaammo ti
pudno. 19 Dusaen ida ti Dios ta nalawag kadakuada dagiti mabalin nga
ammoen maipapan iti Dios, ta ti Dios met laeng ti nangilawlawag
kadakuada. 20 Manipud pay idi pinarsua ti Dios daytoy lubong, ti
agnanayon a pannakabalin ken kinadiosna, uray saan a makita, mabigbig
ken nalawag a makita babaen kadagiti gapuananna. Isut’ gapuna a pulos
nga awan ti mabalinda a pagpambar. 21 Ammoda ti Dios, ngem dida
agdayaw wenno agyaman kenkuana kas maiparbeng. Nagbalin ketdi nga
ubbaw ti panagpampanunotda ket sipnget ti linaon dagiti isipda. 22
Kunkunada a mamasiribda, ngem maagda met. 23 Saanda nga
agdaydayaw iti Dios a di matay, ngem agdaydayawda ketdi kadagiti
ladawan ti tao a matay wenno tumatayab wenno ayup wenno
agkarkarayam a parsua. 24 Gapu iti kasta a kinamaagda, binaybay-an ti
Dios ida nga agaramid kadagiti narugit a tarigagay ti pusoda, ket
nakababain ti ar-aramidenda iti maysa ken maysa. 25 Tinallikudanda ti
kinapudno maipapan iti Dios ket patienda ti kinaulbod. Agdayaw ken
agserbida kadagiti pinarsua ti Dios a saan ketdi nga iti mismo a Namarsua
a rumbeng a daydayawen iti agnanayon! Amen. 26 Daytoy ti gapuna a
binaybay-an ti Dios ida kadagiti nakababain a kinaderrep. Uray ti babai,
saanen a makikaidda iti lalaki. Ti laengen padana a babai ti kaiddaenna. 27
Kasta met ti lalaki. Ti laengen padana a lalaki ti kaiddaenna ket sumgedda
iti kinaderrep. Nakababain ti ar-aramidenda iti maysa ken maysa. Isut’
gapuna a madusada a kas kaikarianda gapu iti dakes nga aramidda. 28
Agsipud ta di bigbigen dagita a tattao ti kinapudno maipapan iti Dios,
binaybay-an ida ti Dios nga agpanunot iti dakes ken agaramid kadagiti
saan a maiparbeng. 29 Napnoda iti amin a kita ti kinadakes, kinaagum,
ken bisio. Naapalda, mammapatayda, mannakiapada, naulbodda ken
managparpardayada. Manarsaritada. 30 Agpipinnadakesda. Kagurada ti
Dios. Natangsit, napalangguad ken napasindayagda. Nalaingda nga
agpanunot iti ad-adu pay a wagas ti kinadakes. Sukirenda dagiti nagannak
kadakuada. 31 Awan babainda. Dida tungpalen dagiti karida, ket awan asi
wenno panangay-ayda kadagiti sabsabali. 32 Ammoda a kuna ti linteg ti
Dios a rumbeng a mapapatay ti kasta ti panagbiagna. Ngem aramidenda
latta dagitoy ket abuloyanda pay dagiti agaramid kadagitoy a kinadakes.
Roma 2
1 Gayyem, uray ania ti katataom, awan a pulos ti panggapuam a
mangukom iti sabali. No ukomem dagiti sabsabali, ngem aramidem met
dagiti ar-aramidenda, ta bagim met laeng ti uk-ukomem. 2 Ammotayo a
nalinteg ti panangukom ti Dios kadagiti agaramid kadagitoy. 3 Sika a
mangukom kadagiti sabsabali ngem aramidem met dagiti ar-aramidenda,
ipagarupmo kadi a malisiam ti panangukom ti Dios? 4 Wenno,
tagibassitem kadi ti aglaplapusanan a kinaimbag, panagibtur ken kinaanus
ti Dios? Awan duadua nga ammom a manangngaasi ti Dios gapu ta
ikalkalikagumna a maiturongka nga agbabawi. 5 Ngem gapu ta natangken
ti panagul-ulom ken nasukirka, nakarkaronto ti pannakadusam inton
Aldaw a maiparangarang ti pungtot ti Dios ken ti nalinteg a
panangukomna. 6 Gunggonaanto ti Dios ti tunggal tao kas maitutop iti
aramidna. 7 Adda tattao a naanus nga agaramid iti naimbag tapno magun-
odda ti dayag, dayaw ken biag nga awan patinggana. Itedto ti Dios
kadakuada ti biag nga agnanayon. 8 Adda dagiti tattao a ti laeng bukodda
a pagimbagan ti sapsapulenda ken laksidenda ti pudno tapno surotenda ti
dakes. Idissuorto ti Dios kadakuada ti pungtot ken gurana. 9 Agrigat ken
agtuokto ti amin a tattao nga agaramid iti dakes, umuna dagiti Judio kasta
met dagiti Hentil. 10 Ngem itedto ti Dios ti dayag, dayaw ken talna
kadagiti amin nga agaramid iti naimbag, umuna kadagiti Judio kasta met
kadagiti Hentil. 11 Awan ti idumduma ni Apo Dios. 12 No agbasol dagiti
Hentil, saan a maipakat kadakuada ti Linteg ni Moises gapu ta saan a
nairanta kadakuada daytoy. No agbasol dagiti Judio, maipakat kadakuada
ti Linteg gapu ta isuda ti nakairantaanna. 13 Ta saan a mapalinteg ti tao iti
imatang ti Dios babaen iti panagdengngegna iti Linteg, no di ket babaen iti
panagtungpalna iti Linteg. 14 Awan ti Linteg kadagiti saan a Judio. Ngem
no gapu iti nakaisigudanda a kababalin, aramidenda dagiti ibilin ti Linteg
nupay dida ammo ti Linteg, agbalin a linteg dayta kadakuada. 15 Babaen
kadagiti aramidda, maiparangarang a naisurat dagiti bilin ti Linteg iti
pusoda. Patalgedan met ti konsensiada a pudno daytoy, ta no maminsan
pabasolen ida ti panunotda, ket no dadduma, ikalinteganna ida. 16 Kas
mayannurot iti Naimbag a Damag nga ikaskasabak, kastoyto ti maaramid
iti dayta nga Aldaw inton ukomen ti Dios babaen ken ni Jesu-Cristo, ti
amin a nalimed a pampanunot dagiti tattao. 17 Ket sika? Kunam a
Judioka. Agtalekka iti Linteg ket pagpasindayagmo ti Dios. 18 Ammom ti
kayat ti Dios nga aramidem, ket nasursurom iti Linteg a pilien ti nasayaat.
19 Kapkapnekam a maidalanmo dagiti bulsek, a masilawam dagiti adda iti
sipnget, 20 a maisurom dagiti nengneng, ken maadalam dagiti awan
ammona. Gapu ta adda kenka ti Linteg, ipagarupmon nga ammom ti amin
ket pudno aminen a sawem. 21 Kasano nga isurom dagiti sabali no dimo
pay maisuro ta bagim? Ikasabam ti saan a panagtakaw, ngem apay nga
agtakawka? 22 Ibagam a maiparit ti pannakikamalala, ngem apay a
makikamalalaka met? Kaguram dagiti didiosen, ngem apay a takawam
met dagiti temploda! 23 Pagpalangguadmo ti kaadda kenka ti linteg ti
Dios, ngem apay nga ibabainmo ti Dios gapu iti panangsalungasingmo iti
lintegna? 24 Kuna ti Nasantoan a Surat, “Gapu kadakayo a Judio, agsao
dagiti Hentil iti dakes a maibusor iti Dios.” 25 Adda pateg ti
panangannurotmo iti tulag ti pannakakugit no tungpalem ti Linteg. Ngem
no salungasingem, naim-imbag la koman a dika nagpakugit. 26 No
tungpalen ti maysa a Hentil ti bilin ti Linteg idinto a saan a nakugit
daytoy, dinto kadi ibilang ti Dios a kas maysa metten a nakugit? 27 Ket
dakayo a Judio, uray no adda kadakayo ti naisurat a Linteg, ken
nakugitkayo, no salungasingenyo ti Linteg, ukomendakayto dagiti saan a
Judio ta agtulnogda iti Linteg uray no dida nakugit. 28 No nakugit ti
maysa a Judio, saanna kayat a sawen nga isu ket napaypayso a Judio. Saan
a Judio ti maysa a tao gapu laeng ta nakugit. 29 Ngem ti pudno a Judio, isu
ti Judio iti uneg, kayatna a sawen, nakugit ti pusona babaen iti Espiritu ti
Dios a saan ket a babaen iti naisurat a Linteg. Ti pannakaidaydayaw ti
kasta a tao aggapu iti Dios, saan a kadagiti tattao.
Roma 3
1 Ngarud, adda kadi pangatiwan dagiti Judio kadagiti saan a Judio? Adda
kadi pateg ti pannakakugit? 2 Adu la ketdi! Umuna, intalek ti Dios ti saona
kadagiti Judio. 3 Ngem no kas pangarigan, saan a mapagtalkan ti
sumagmamano kadakuada, kayatna kadi a sawen a saan metten a
mapagtalkan ti Dios? 4 Saan! Napudno latta ti Dios, uray naulbod ti amin
a tao. Kas kuna ti Nasantoan a Surat: “Masapul a maipakita a nalintegka
no agsaoka, Masapul a mangabakka iti aniaman a pangidarumanda
kenka.” 5 Ngem no ti panagaramidtayo iti dakes, nalawag a maipakita ti
nalinteg nga aramid ti Dios, ania ti makunatayo? Saan kadi a nalinteg ti
Dios no dusaennatayo? (Agsaoak ita kas kaugalian ti tao.) 6 Saan! No saan
a nalinteg ti Dios, kasano ngarud ti panangukomna iti lubong? 7 Ngem no
gapu iti kinaulbodko, maipakita a nalawag ti kinapudno ti Dios ket agserbi
a pakaidaydayawanna, apay a maukomak pay laeng a kas maysa a
managbasol? 8 Apay ngarud a ditayo kuna, “Agaramidtayo iti dakes tapno
tumaud ti imbag”? Agpayso nga adda dagiti mangpadpadakes kaniak ket
pabpabasolendak a sinaok kano daytoy! Rumbeng a madusadanto. 9 Ania
ngaruden? Kayatna kadi a sawen a nasaysayaat ti sasaadenmi a Judio
ngem dagiti saan a Judio? Saan! Naipakitakon nga agpadpada nga iturayan
ti basol dagiti Judio ken dagiti saan a Judio. 10 Kas kuna ti Nasantoan a
Surat: “Awan ti uray maysa a nalinteg a tao, 11 Awan ti uray maysa a
makaawat, wenno mangbirok iti Dios. 12 Pinanawanda ti Dios, nagbalinda
amin a dakes. Awan ti uray maysa nga agaramid iti naimbag. 13 Kasla
tanem a silulukat ti ngiwatda, agkakadakes a kinaulbod ti baliksen dagiti
dilada. Makapatay a sao, kasla gita ti uleg ti yebkas dagiti bibigda. 14
Napno iti napait a lunod dagiti ngiwatda. 15 Napardasda a mangdangran
ken mangpapatay; 16 Iti sadinoman a papananda, pannakadadael ken
kinakas-ang ti ibatida. 17 Dida ammo a pulos ti dalan ti kappia, 18 dida
met nasursuro ti agbuteng iti Dios.” 19 Ita, ammotayo a ti amin a linaon ti
Linteg agpaayda kadagiti agbibiag iti babaen ti Linteg. Adda ti Linteg
tapno sumardeng amin a pambar dagiti tattao ket idatagna ti entero a
lubong tapno ukomen ti Dios. 20 Ta awan ti tao a mapalinteg iti imatang ti
Dios babaen iti panangtungpalna iti Linteg. Agserbi ti Linteg a
mangipakaammo a nakabasol ti tao. 21 Ngem ita, naiparangarangen ti
panangpalinteg ti Dios iti tao. Saan a naibatay daytoy iti linteg, uray no
pinaneknekan ti Linteg ni Moises ken dagiti profeta. 22 Palintegen ti Dios
dagiti tattao gapu ta mamatida ken ni Jesu-Cristo. Aramiden ti Dios daytoy
kadagiti amin a mamati ken ni Cristo, ta awan a pulos ti pagdudumaanda.
23 Nagbasol amin a tattao ket agkurangda iti kinadayag ti Dios. 24 Ngem
gapu iti parabur a siaayat nga inted ti Dios, mapalinteg ti amin a tattao iti
sangoananna babaen ken ni Cristo Jesus a mangwayawaya kadakuada. 25
Indaton ti Dios ni Cristo Jesus tapno, babaen iti ipapatayna, isu ti
pakapakawanan dagiti basol dagiti tattao babaen iti pammatida kenkuana.
Inaramid ti Dios daytoy tapno ipakitana ti kinalintegna. Iti napalabas,
naanus ket pinalabasna dagiti basol ti tao. 26 Ngem iti agdama a tiempo,
dina palabasenen ti basol ti tao tapno ipakitana ti kinalintegna. Kastoy ti
panangipakita ti Dios a nalinteg ti aramidna, ket palintegenna ti amin a
mamati ken ni Jesus. 27 Ania ngarud ti mabalintayo a pagpasindayag?
Awan! Agpasindayag ti tao saan a gapu ta agtulnog iti Linteg, no di ket
gapu ta mamati. 28 Ta ibilangtayo a mapalinteg ti tao iti sangoanan ti Dios
babaen iti pammati, ket saan a babaen iti panangtungpalna iti Linteg. 29
Dagiti Judio laeng aya ti akin-Dios iti Dios? Saan aya nga isu met ti Dios
dagiti Hentil? Wen, isu met ti Diosda. 30 Maymaysa ti Dios, ket
palintegennanto dagiti Judio babaen iti pammatida. Palintegennanto met
dagiti Hentil babaen iti pammatida. 31 Baybay-antayo kadin ti Linteg
gapu iti daytoy a pammati? Saan, no di ket ipakitatayo ti pudno a
kaipapanan ti Linteg.
Roma 4
1 Ania ngarud ti makunatayo ken ni Abraham nga amatayo? Ania ti
padasna? 2 No napalinteg ni Abraham iti sangoanan ti Dios gapu kadagiti
inaramidna, adda koma pagtangsitna. Ngem saan a makapagtangsit iti
sangoanan ti Dios. 3 Kuna ti Nasantoan a Surat, “Namati ni Abraham iti
Dios, ket gapu iti pammatina, inawat ti Dios a kas nalinteg.” 4 Ti
agtrabaho, matangdanan. Saan a maibilang a sagut ti tangdanna no di ket
tineggedna. 5 Ti tao nga agtalek iti pammatina a saan nga iti aramidna,
ngem mamati iti Dios a mangibilang iti nakabasol nga awan basolna,
bigbigen ti Dios ti pammati dayta a tao tapno maibilang a nalinteg. 6
Daytoy ti kayat a sawen ni David idi kinunana a nagasat ti tao nga awaten
ti Dios a kas nalinteg iti sangoananna, saan a gapu kadagiti aramidna: 7
“Nagasat dagiti pinakawan ti Dios ti kinadakesda, dagiti inabbongan ti
Dios ti basolda! 8 Nagasat ti tao a ti basolna ket lipaten ti Apo!” 9 Agpaay
laeng kadi kadagiti nakugit daytoy a kinagasat a sarsaritaen ni David?
Saan! Agpaay met kadagiti saan a nakugit. Ta inaramattayo daytoy a paset
ti Nasantoan a Surat nga agkuna: “Namati ni Abraham iti Dios, ket gapu
iti pammatina, inawat ti Dios a kas nalinteg.” 10 Kaano a napasamak
daytoy? Sakbay kadi wenno kalpasan a nakugit ni Abraham? Sakbay ti
pannakakugitna, saan nga iti kalpasanna. 11 Naud-udi ti pannakakugitna,
ket ti pannakakugitna ti mangpaneknek nga inawat ti Dios a kas nalinteg
ni Abraham gapu iti pammatina sakbay a nakugit. Iti kasta, ni Abraham ti
naespirituan nga ama dagiti amin a mamati iti Dios, ket awaten ti Dios a
kas nalintegda uray pay no saanda a nakugit. 12 Isu met ti ama dagiti
nakugit, saan laeng a gapu ta nakugitda, no di ket gapu ta agbibiagda iti
pammati a kas iti panagbiag ni amatayo nga Abraham sakbay a nakugit.
13 Inkari ti Dios ken ni Abraham ken kadagiti kaputotanna a
tagikuaendanto ti lubong. Inaramidna daytoy, saan a gapu ta nagtulnog ni
Abraham iti Linteg, no di ket gapu ta namati ket inawat ti Dios a kas
nalinteg. 14 Ta no maited ti inkari ti Dios kadagiti agtulnog iti Linteg,
awanen ti serserbi ti pammati ti tao ket awan metten ti pagmamaayan ti
kari ti Dios. 15 Ta ti Linteg pataudenna ti pungtot ti Dios. Ngem no awan
linteg, awan met panagsalungasing. 16 Naibatay ngarud ti kari iti pammati
tapno mapatalgedan ti kari a kas sagut ti Dios kadagiti amin a kaputotan ni
Abraham. Saan laeng nga agpaay daytoy a kari kadagiti agtulnog iti
Linteg, no di pay ket kadagiti mamati a kas iti panamati ni Abraham. Ta ni
Abraham ti naespirituan nga amatayo amin. 17 Kas kuna ti Nasantoan a
Surat, “Pinagbalinka nga ama ti adu a nasion.” Iti kasta, naimbag ti kari iti
imatang ti Dios a pinati ni Abraham, ti Dios a mamagungar kadagiti natay
ken mangparsua kadagiti bambanag nga awan babaen iti panagsaona. 18
Namati ni Abraham ket nangnamnama uray idi awan pangnamnamaanna.
Isut’ gapuna a nagbalin “nga ama ti adu a nasion.” Kas kuna ti Nasantoan
a Surat, “Kas ti kaadu dagiti bituen ti kaadunto ti kaputotam.” 19
Agsangagasuten idi ti tawen ni Abraham. Ngem saan a kimmapuy ti
pammatina uray idi ibilangna ti bagina a kasla natayen ken saan a mabalin
nga aganak ni Sara. 20 Saan a napukaw ti pammatina, ket di nagduadua iti
kari ti Dios. Ti pammatina ti nangpabileg kenkuana ket indaydayawna ti
Dios. 21 Kapkapnekanna unay a tungpalen ti Dios ti inkarina. 22 Gapu iti
daytoy a pammati, naibilang ni Abraham a nalinteg. 23 Saan a naisurat
dagiti balikas a “naibilang a nalinteg” nga agpaay laeng ken ni Abraham.
24 Agpaay met kadatayo a maibilangto a kas nalinteg, datayo a mamati iti
Dios a namagungar ken ni Jesus nga Apotayo. 25 Nayawat ni Jesus a
matay gapu kadagiti basoltayo, ket napagungar tapno mapalintegtayo iti
sangoanan ti Dios.
Roma 5
1 Itan ta napalintegtayo babaen iti pammati, naikappiatayon iti Dios gapu
ken ni Apotayo a Jesu-Cristo. 2 Nayasidegtayo babaen iti pammati iti
parabur ti Dios ket daytoy ita ti laklak-amentayo. Agrag-otayo ngarud iti
namnama a mairanudtayo iti dayag ti Dios! 3 Agragsaktayo met kadagiti
rigrigattayo, ta ammotayo a ti rigat pataudenna ti panagibtur. 4 Ti
panagibtur yegna ti yaanamong ti Dios. Ti yaanamongna pataudenna ti
namnama. 5 Saannatayo a paayen daytoy a namnama ta imbukbok ti Dios
ti ayatna kadagiti pusotayo babaen iti Espiritu Santo a sagutna kadatayo. 6
Iti tiempo a pinili ti Dios, idi awan pay laeng ti kabaelantayo, natay ni
Cristo gapu kadagiti managdakdakes. 7 Awan ti siasinoman a siaayat a
matay gapu iti nalinteg a tao. Nalabit nga adda makaitured a matay gapu
iti naimbag a tao. 8 Ngem impakita ti Dios ti ayatna kadatayo: Idi
managbasoltayo pay laeng, natay ni Cristo gapu kadatayo! 9 Babaen iti
darana, napalintegtayon iti sangoanan ti Dios. Ad-adda pay ngarud a
maisalakantayto gapu kenkuana. 10 Ta idi, kabusornatayo ti Dios. Ngem
ita, pinagbalinnatayo a gagayyemna babaen iti ipapatay ti Anakna. Ita ta
gagayyemnatayon ti Dios, ad-adda pay a maisalakantayo gapu iti biag ni
Cristo! 11 Ngem saan la a dayta, agrag-otayo pay gapu iti inaramid ti Dios
babaen ken ni Apotayo a Jesu-Cristo a namagbalin kadatayo a gagayyem
ti Dios. 12 Babaen iti maysa a tao, immay ti basol ditoy lubong ket babaen
iti basol, immay met ti ipapatay. Iti kasta, nagsaknap ti ipapatay iti entero
a sangkataoan, agsipud ta nagbasol amin a tattao. 13 Addan ti basol ditoy
lubong sakbay a naipaulog ti Linteg. Ngem no awan linteg, awan ti
maibilang a basol. 14 Nupay kasta, manipud idi tiempo ni Adan agingga
iti tiempo ni Moises, nagturay ni patay kadagiti amin a tattao, uray pay no
ti basolda saan a kas iti basol ni Adan idi nagsalungasing iti bilin ti Dios.
Ni Adan ti ladawan ti tao nga umayto. 15 Ngem aggiddiat dagitoy a dua,
ta ti di mabayadan a sagut ti Dios, saan a kas iti basol ni Adan. Agpayso a
natay ti adu a tattao gapu iti basol ni Adan. Ngem nawadwadwad nga
adayo ti parabur ti Dios, kasta met ti sagutna iti adu a tattao babaen iti
parabur ti maysa a tao nga isu ni Jesu-Cristo. 16 Maigiddiat ti sagut ti Dios
iti basol ti maysa a tao. Kalpasan ti pannakaaramid ti maysa a basol,
naikeddeng ti sentensia: “Nakabasol.” Ngem kalpasan ti pannakaaramid ti
adu a basol, umay ti di kaikarian a sagut ket maikeddeng ti sentensia:
“Awan ti basolna!” 17 Agpayso a gapu iti basol ti maysa a tao, nagturay ni
patay, ngem ad-adda pay a gapu iti inaramid ni Jesu-Cristo, agturay iti
biag dagiti amin nga umawat iti nawadwad a parabur ken sagut ti
kinalinteg. 18 Ngarud, kas iti pannakadusa ti sangkataoan gapu iti basol ti
maysa a tao, kasta met ti pannakapakawan ken pannakaited ti biag kadagiti
amin a tao gapu iti nalinteg nga aramid. 19 Kas ti panagbalin a
managbasol ti sangkataoan gapu iti panagsukir ti maysa a tao, kastanto
met ti pannakapalinteg dagiti tattao iti imatang ti Dios gapu iti
panagtulnog ti maysa a tao. 20 Naited ti Linteg tapno paaduenna ti dakes
nga aramid. Ngem no kasano ti yaadu ti basol, ad-adda pay nga umadu ti
parabur ti Dios. 21 Ngarud, kas ti panagturay ti basol babaen ken ni patay,
kasta met ti panagturay ti parabur ti Dios babaen iti kinalinteg a
mangiturong kadatayo iti biag nga agnanayon babaen ken ni Jesu-Cristo
nga Apotayo.
Roma 6
1 Ania ngarud ti kunatayo? Itultuloytayo kadi ti agbasol tapno umadu ti
parabur ti Dios? 2 Saan a mabalin! Nataytayon iti basol—kasano ti
panagtuloytayo nga agbasol? 3 Awan duadua nga ammoyo nga idi
nabuniagantayo ken ni Cristo Jesus, nairamantayo met iti ipapatayna. 4
Ngarud, idi nabuniagantayo, naikaduatayo ken ni Cristo a naitanem, ket
nairanudtayo iti ipapatayna tapno, kas iti pannakapagungar ni Cristo
babaen iti nakaskasdaaw a pannakabalin ti Ama, sumurottayo met koma iti
baro a panagbiag. 5 No nakipagmaymaysatayo kenkuana iti ipapatayna,
makipagmaymaysatayto met kenkuana iti pannakapagungar. 6 Ammotayo
a ti daan a kinataotayo nairaman ken ni Cristo a nailansa iti krus tapno
madadael ti managbasol a bagi. Iti kasta, saantayo koman a paadipen iti
basol. 7 Ta no matay ti maysa a tao, mawayawayaan iti pannakabalin ti
basol. 8 Gapu ta nairamantayo a natay ken ni Cristo, mamatitayo a
makipagbiagtayo met kenkuana. 9 Ammotayo a napagungar ni Cristo ket
saanen a matay. Awanen ti pannakabalin ti patay kenkuana. 10 Ngarud,
gapu ta natay ni Cristo, awan ti pannakabalin kenkuana ti basol. Ita,
agbiagen a maipaay iti Dios. 11 Kasta met nga ibilangyo a nataykayon iti
basol ngem sibibiagkayo iti Dios, gapu ken ni Cristo Jesus. 12 Masapul a
saanen nga agturay ti basol kadagiti narukop a bagiyo tapno diyo pabus-
oyan dagiti dakes a tarigagayyo. 13 Kasta met a diyo itulok nga agbasol ti
uray ania a paset ti bagiyo a maaramat kadagiti dakes a panggep.
Mayarigkayo kadagiti tattao a natay ngem napagungar. Ipaayyo ketdi ti
bagiyo iti Dios ket itulokyo kenkuana ti entero a bagiyo a maaramat
kadagiti nalinteg a panggep. 14 Saan a rumbeng nga agturay ti basol
kadakayo ta saankayon nga agbibiag iti sakup ti linteg, no di ket iti sakup
ti parabur ti Dios. 15 Ania ngaruden? Ituloytayo latta kadi ti agbasol?
Total, awantayo iti sakup ti linteg, no di ket addatayo iti sakup ti parabur ti
Dios. Saan! 16 Awan duadua nga ammoyo a no patagabukayo, isukoyo ti
bagiyo iti apoyo. No tungpalenyo ti basol, agtungpalkayto iti patay. No
tungpalenyo ti Dios, mapalintegkayto iti sangoanan ti Dios. 17 Ngem
yaman pay iti Dios! Ta nayarigkay idi iti tagabu a simmuko kadagiti dakes
a tarigagayyo nga agbasol ngem itan, nagtulnogkayo a naimpusoan
kadagiti pudno a pannursuro nga inawatyo. 18 Nawayawayaankayo iti
basol ket tagabunakayon ti kinalinteg. 19 Agsaoak iti kadawyan a
panagsao tapno nalaka a maawatanyo. Intulokyo ti bagiyo idi a tinagabu ti
kinarugit ken kinadakes nga agpaay kadagiti dakes a panggep. Masapul
nga agtulokkayo met ita a patagabu iti kinalinteg nga agpaay iti
pannakapasantoyo. 20 Idi tagabunakayo ti basol, saan a masapul nga
agtulnogkayo iti kinalinteg. 21 Ngem ania ti nagunggonayo kadagiti inar-
aramidyo a pagbabainanyo ita? Patay ti banagda! 22 Ngem ita,
nawayawayaankayon iti basol, ket tagabunakayon ti Dios. Nagun-odyo ti
biag a naan-anay a naidaton kenkuana, ket biag nga agnanayon ti banagna.
23 Ta patay ti supapak ti basol. Ngem biag nga agnanayon ti isagut ti Dios
gapu iti pannakikaykaysatayo ken ni Cristo Jesus nga Apotayo.
Roma 7
1 Awan duadua a maawatanyo ti ibagak, kakabsatko, agsipud ta ammoyo
amin ti maipapan iti linteg. Iturayan ti linteg ti tao bayat ti panagbiagna
laeng. 2 Ti naasawaan a babai ti alaentayo a pangarigan. Ikeddeng ti linteg
a maisinggalut iti asawana bayat ti panagbiag ti lalaki. Ngem apaman a
matay ti asawana, mawayawayaanen iti linteg a nangisinggalut kenkuana.
3 Ngarud, no makikabbalay ti babai iti sabali a lalaki idinto a sibibiag pay
laeng ti asawana, makikamalala iti imatang ti linteg. Ngem no matay ti
asawana, siwayawaya iti imatang ti linteg ket saan nga agbasol iti
pannakikamalala no makiasawa manen. 4 Kasta met kadakayo,
kakabsatko. Nataykayon iti imatang ti Linteg, ta pasetnakayo ti bagi ni
Cristo. Agpaaykayo itan kenkuana a napagungar tapno nabungatayo nga
agserbi iti Dios. 5 Ta idi agbibiagtayo a mayannurot iti lasag, nagturay
kadagiti bagbagitayo dagiti tarigagay a nangiturong kadatayo nga agbasol
a pinarasuk ti Linteg ket nagserbitayo nga agpaay iti patay. 6 Ngem ita,
nawayawayaantayon iti Linteg, agsipud ta nataytayo—no maipapan iti
linteg a nangbalud idi kadatayo. Saantayon nga agserbi iti daan a wagas ti
naisurat a linteg, no di ket iti baro a wagas ti Espiritu. 7 Ania ngarud ti
kunatayo? Kunatayo kadi a dakes ti Linteg? Saan! Ngem ti Linteg ti
nangipakaammo kaniak no ania ti basol. Diak koma naammoan no ania ti
panagagum no di kinuna ti Linteg: “Dimo aguman ti kukua ti sabali a tao.”
8 Ngem iti daytoy a bilin, nasarakan ti basol ti gundawayna a mangpataud
kaniak iti amin a kita ti kinaagum. Ta no awan ti linteg, natay ti basol. 9
Agbibiagak met idi iti laksid ti linteg. Ngem idi immay ti bilin, nagbiag ti
basol 10 ket natayak. Ti bilin a mangted koma iti biag, inyegna ketdi
kaniak ti patay. 11 Ta babaen iti bilin, nasarakan ti basol ti gundawayna a
mangallilaw ken mangpatay kaniak. 12 Ngarud, nasantoan ti Linteg.
Nasantoan, nalinteg ken naimbag met ti bilin. 13 Ngem kayatna kadi a
sawen a ti naimbag inyegna ti ipapatayko? Saan! Aramid ti basol daytoy.
Inaramatna ti naimbag a pangpatay kaniak tapno maipakita no ania ti
basol. Iti kasta, babaen iti bilin, maipakita ti kinadakes ti basol. 14
Ammotayo a naespirituan ti Linteg. Ngem maysaak laeng a tao, ket
nailakoak a kas tagabu ti basol. 15 Diak maawatan ti ar-aramidek. Ta diak
aramiden dagiti kayatko nga aramiden. Aramidek ketdi dagiti kagurak. 16
No aramidek dagiti diak kayat nga aramiden, maipakita a bigbigek a
naimbag ti Linteg. 17 Saan ngarud a siak ti agaramid iti daytoy, no di ket
ti basol nga adda kaniak. 18 Ammok a saan nga agnaed kaniak ti kabaelan
nga agaramid iti naimbag—kayatko a sawen, ti kababalinko a kas tao.
Nupay kayatko ti agaramid iti naimbag, diak latta maaramid. 19 Diak
maaramid dagiti naimbag a kayatko nga aramiden, ngem aramidek ketdi ti
dakes a diak kayat nga aramiden. 20 No aramidek ti diak kayat nga
aramiden, kayatna a sawen a saanen a siak ti akin-aramid, no di ket ti
basol nga adda kaniak. 21 Mabigbigko ngarud daytoy a paglintegan: No
kayatko ti agaramid iti naimbag, maiturongak met nga agaramid iti dakes.
22 Pagay-ayatan ti kaunggan a kinataok ti linteg ti Dios. 23 Ngem sabali a
linteg ti makitak nga adda iti bagik—maysa a linteg a mangbusor iti linteg
nga anamongan ti nakemko. Pagbalinennak a balud daytoy a linteg ti basol
nga adda iti bagik. 24 Anian a kinadaksanggasatko! Siasino ti mangispal
kaniak iti daytoy bagi a pakaigapuan ti ipapatayko? 25 Yaman pay iti
Dios, ta adda ni Apotayo a Jesu-Cristo a mangisalakan kaniak! Daytoy
ngarud ti kasasaadko: Ti nakemko laeng ti mabalinko a pagserbi iti linteg
ti Dios, ngem ti bagik, agserbi iti linteg ti basol.
Roma 8
1 Ngarud, saan a masentensiaan a madusa dagiti agbibiag ken ni Cristo
Jesus. 2 Ta ti linteg ti Espiritu a mangted kadatayo iti biag iti kaaddatayo
ken ni Cristo Jesus, winayawayaannak iti linteg ti basol ken ti patay. 3
Inaramid ti Dios ti saan a kabaelan nga aramiden ti Linteg gapu iti kinarasi
ti tao. Inukomna ti basol ti kinatao. Imbaonna ti mismo nga Anakna nga
addaan iti naintaoan a kasasaad tapno pukawenna ti basol. 4 Inaramid ti
Dios daytoy tapno matungpal kadatayo ti intuyang ti Linteg—kadatayo
nga agbibiag a mayannurot iti Espiritu a saan nga iti naintaoan a kasasaad.
5 Dagiti agbibiag kas mayannurot iti lasag, paiturayan ti panunotda iti
kayat ti lasag. Dagiti agbibiag kas mayannurot iti Espiritu, paiturayan ti
panunotda iti kayat ti Espiritu. 6 No paiturayantayo iti tarigagay ti lasag,
agtungpaltayo iti patay. No paiturayantayo iti Espiritu, agtungpaltayo iti
biag ken talna. 7 Iti kasta, no paiturayan ti tao iti kababalin ti kinatao,
agbalin a kabusor ti Dios, ta saanna a tungpalen ti linteg ti Dios.
Kinapudnona, saanna a matungpal daytoy a linteg. 8 Dagiti agtungpal iti
tarigagay ti lasag, saanda a maparagsak ti Dios. 9 Ngem saankayo nga
agbibiag kas mayannurot iti lasag. Agbibiagkayo ketdi kas mayannurot iti
Espiritu—no pudno nga agtaeng kadakayo ti Espiritu ti Dios. No awan
kenka ti Espiritu ni Cristo, saannaka a tao ni Cristo. 10 Ngem no agtaeng
ni Cristo kadakayo, uray no natayen ti bagiyo gapu iti basol, sibibiag ti
espirituyo agsipud ta nagbalinkayo a nalinteg iti imatang ti Dios. 11 No
agtaeng kadakayo ti Espiritu ti Dios a namagungar ken ni Jesus, itedto met
daytoy a namagungar ken ni Cristo ti biag kadagiti agrupsa a bagiyo
babaen iti kaadda ti Espirituna kadakayo. 12 Ngarud, kakabsat, adda
pagrebbengantayo nga agbiag, ngem saan a kas iti panangidalan ti lasag.
13 Ta no agbiagkayo kas pagayatan ti lasag, mataykayto. Ngem no
iwaksiyo dagiti dakes nga aramidyo babaen iti tulong ti Espiritu,
agbiagkayto. 14 Annak ti Dios dagiti idalan ti Espiritu ti Dios. 15 Ta
saannakayo a pagbalinen a tagabu ti Espiritu nga inted ti Dios kadakayo.
Saannakayo met a pagbutngen. Pagbalinennakayo ketdi nga annak ti Dios,
ket babaen iti pannakabalin ti Espiritu, umawagtayo iti Dios a kunatayo,
“Ama, O Amak!” 16 Makidanggay ti Espiritu ti Dios kadagiti espiritutayo
a mangipakaammo nga annaknatayo ti Dios. 17 Agsipud ta annaknatayo,
tagikuaentayto dagiti iduldulinna a bendision nga agpaay kadagiti tattaona.
Makipagtagikuatayto met ken ni Cristo kadagiti indulin ti Dios nga agpaay
kenkuana. Ta no mairanudtayo iti panagsagaba ni Cristo, mairanudtayto
met iti dayagna. 18 Awan duaduak a ti sagsagabaentayo iti daytoy agdama
a biag ket saan a maipada iti dayag a maiparangarangto kadatayo. 19
Sigagagar ti sangaparsuaan nga agur-uray iti Dios a mangiparangarang
kadagiti annakna. 20 Ta naikeddeng nga agbalin nga awan serserbi ti
sangaparsuaan, saan a gapu iti bukodna a pagayatan no di ket kasta ti
nagayatan ti Dios a pagbanaganna. Nupay kasta, adda daytoy a namnama:
21 Addanto aldaw a mawayawayaan met laeng ti amin a parsua iti
nakatagabuanda a panagrupsa, ket mairanuddanto iti nagloriaan a
pannakawayawaya dagiti annak ti Dios. 22 Ta ammotayo nga agpapan ita,
kas iti agpasikal, agas-asug iti rigat ti entero a sangaparsuaan. 23 Ngem
saan laeng a ti sangaparsuaan. Uray datayo nga addaan iti Espiritu kas
umuna a sagut ti Dios, agasugtayo met iti kaunggantayo bayat ti
pananguraytay iti panamagbalin kadatayo ti Dios nga annakna ken iti
panangwayawayana kadatayo. 24 Ta naisalakantayo babaen iti namnama.
Ngem no makitatayo ti namnamaentayo, saanen a pudno a namnama. Ta
siasino kadi ti mangnamnama iti makitana? 25 Ngem no namnamaentayo
ti ditay pay makita, urayentayo a siaanus. 26 Kasta met nga iti
kinakapuytayo, umaynatayo tulongan ti Espiritu. Ta ditay ammo ti umno a
panagkararag. Ti Espiritu a mismo ti mangidawdawat kadatayo iti Dios
kadagiti asug a di kabaelan nga ibalikas. 27 Makita ti Dios ti naguneg ti
puso ti tao, ket ammona ti pampanunoten ti Espiritu, agsipud ta
idawdawatan ti Espiritu dagiti tattao ti Dios kas pagayatan ti Dios. 28
Ammotayo a kadagiti amin a banag, agtartrabaho ti Dios para iti
pagimbagan a kaduana dagiti agayat kenkuana, isuda nga inayabanna kas
mayannurot iti panggepna. 29 Dagiti pinili idin ti Dios, tinudinganna met
ida nga agbalin a kas iti Anakna tapno agbalin ti Anak nga inauna kadagiti
adu nga agkakabsat. 30 Iti kasta, inayaban ti Dios dagiti pinilina. Saanna
la nga inayaban ida, no di ket pinagbalinna pay ida a nalinteg. Saanna la a
pinagbalin ida a nalinteg, no di ket imbingayanna pay ida iti gloriana. 31
Kas maibatay kadagitoy, mabalin a kunatayo a no kaduatayo ti Dios, awan
ti makabael a bumusor kadatayo! 32 Dina impaidam ti mismo nga
Anakna, no di ket indatonna nga agpaay kadatayo amin! No impaayna ti
Anakna kadatayo, dinto kadi sisasagana a mangted met kadatayo iti
isuamin? 33 Siasinonto ti mangidarum kadagiti pinili ti Dios? Ti mismo a
Dios, ibilangna ida nga awan basolda! 34 Siasino ngarud ti makabalin a
mangsentensia kadakuada? Ni Cristo Jesus kadi nga adda iti makannawan
ti Dios? Saan! Ta saan la a natay no di ket isu pay ti mangibabaet
kadatayo. 35 Siasino ngarud ti makabalin a mangisina kadatayo iti ayat ni
Cristo? Ti riribuk? Ti rigat? Ti pannakaidadanes? Ti bisin? Ti
kinapanglaw? Ti peggad wenno ti patay? 36 Kas kuna ti Nasantoan a
Surat, “Gapu kenka, kanayon nga agpeggadkami a matay, Maibilangkami
a kas karnero a maparti.” 37 Iti baet dagitoy, awan duadua a naan-anay
nga agballigitayo babaen kenkuana a nagayat kadatayo! 38 Awan duaduak
nga awan ti makaisina kadatayo iti ayatna: ti patay man wenno ti biag,
dagiti angheles man wenno dagiti sabali a nailangitan nga agturay wenno
pannakabalin, ti agdama man wenno ti masakbayan, 39 ti kangatoan a
law-ang man wenno ti kaunggan ti daga. Awan a pulos iti sangaparsuaan ti
makaisina kadatayo iti ayat ti Dios a kukuatayo gapu ken ni Cristo Jesus
nga Apotayo!
Roma 9
1 Pudno ti sasawek ket diak agulbod ta kukuanak ni Cristo. Paneknekan
met ti konsensiak nga iturayan ti Espiritu Santo a diak agul-ulbod 2 no
ibagak a napalalo ti ladingitko. Saan a maep-ep ti saem ti pusok 3 gapu
kadagiti kailiak, isuda a kabagian ken kadaraak! No mabalin la koma, uray
siak laengen ti ilunod ti Dios ken maisina ken ni Cristo gapu kadakuada. 4
Israelitada, ket pinagbalin ti Dios ida nga annakna. Inranudna ida iti
gloriana. Nakitulag kadakuada ket intedna ti Lintegna. Adda kadakuada ti
pudno a panagdaydayaw. Inawatda dagiti karina. 5 Kaputotan ida dagiti
amma, ket kadaraanda ni Cristo no maipapan iti lasag. Madaydayaw koma
iti agnanayon ti Dios a mangituray iti amin! Amen. 6 Diak kunaen nga
awan nagbanagan ti kari ti Dios, agsipud ta saan nga amin nga Israelita ket
pinili ti Dios. 7 Saan met nga amin nga annak ni Abraham ket annak ti
Dios. Kinuna ti Dios ken ni Abraham, “Dagiti annak ni Isaac ti maibilang
a kaputotam.” 8 Kayatna a sawen a saan nga amin nga annak ni Abraham
ket maibilangda nga annak ti Dios. Dagiti laeng naipasngay kas
mayannurot iti kari ti Dios ti maibilang a napudpudno nga annakna. 9 Ta
kastoy ti inkari ti Dios: “Agsubliakto iti naituding a tiempo ket aganakto ni
Sara iti lalaki.” 10 Saan la a dayta. Maymaysa ti ama dagiti dua a lallaki
nga annak ni Rebecca—isu ni Isaac a kapuonantayo. 11-12 Ngem tapno
maipakita a ti pannakapili ti maysa kadakuada ket mayannurot iti panggep
ti Dios, kinuna ti Dios ken ni Rebecca sakbay a naipasngay dagiti
annakna, “Agserbinto ti inauna iti inaudi.” Kinunana daytoy sakbay nga
adda inaramidda a naimbag wenno dakes. Nalawag ngarud a ti panagpili ti
Dios naibatay iti bukodna a nakem, saan nga iti aniaman nga inaramidda.
13 Kas kuna ti Nasantoan a Surat, “Inayatko ni Jacob, ngem ginurak ni
Esau.” 14 Ania ngarud ti makunatayo? Mangidumduma kadi ti Dios?
Saan! 15 Ta kinunana ken Moises, “Kaasiak ti kayatko a kaasian,
makipagriknaak iti kayatko a pakipagriknaan.” 16 Ngarud, ti panangpili ti
Dios iti maysa a tao saan a maibatay iti pagayatan wenno aramid ti tao, no
di iti kaasi ti Dios. 17 Ta kuna ti Nasantoan a Surat iti Faraon nga ari ti
Egipto, “Pinagbalinka nga ari tapno sika ti mangipakita iti pannakabalinko
ken mangipakaammo iti naganko iti entero a lubong.” 18 No kasta ngarud,
kaasian ti Dios ti kayatna a kaasian, ket patangkenenna ti ulo ti kayatna a
patangkenen. 19 Nalabit a kunanto kaniak ti maysa kadakayo, “No kasta
met laeng, apay ngarud a pabasolen ti Dios ti tao? Siasino aya ti
makalapped iti pagayatan ti Dios?” 20 Ngem siasinoka kadi, tao, a
sumungbat iti Dios? Saan a kuna ti nadamili iti nangdamili kenkuana,
“Apay nga inaramidnak a kastoy?” 21 Kinaagpaysona, adda kalintegan ti
agdamdamili a mangusar iti daga iti kayatna a pangusaran. Adda
kalinteganna a mangaramid iti isu met laeng a nagamay a daga iti dua a
damili: ti maysa agpaay iti naisangsangayan nga okasion, ket ti sabali, iti
gagangay a pannakaaramat. 22 Kasta met ti inaramid ti Dios. Kayatna nga
ipakita ti pungtotna ken ipakaammo ti pannakabalinna. Ngem nabayag nga
inan-anusanna dagiti nakaiturongan ti pungtotna, isuda a dandanin
madadael. 23 Kayatna pay nga iparangarang ti awan umasping a
kinadayagna. Imbingayna ti kinadayagna kadatayo a kaasianna, datayo
nga insaganana nga umawat iti daytoy. 24 Ta datayo ti inayabanna, saan
laeng a dagiti Judio, no di pay ket dagiti Hentil. 25 Kastoy ti kuna ti Dios
iti libro ni Oseas: “Dagiti saanko idi a tattao, awagakto ida a ‘Tattaok.’ Ti
nasion a saanko idi nga inayat, awagakto ida nga ‘Ay-ayatek.’ 26 Ket iti
mismo a lugar a nakaibagaan kadakuada, ‘Saan a dakayo dagiti tattaok,’
maawagandanto sadiay nga annak ti sibibiag a Dios.” 27 Ipukkaw ni Isaias
maipapan iti Israel: “Uray pay no kasla kaa-du ti darat ti baybay ti kaadu
dagiti Israelita, bassitto laeng ti maisalakan kadakuada. 28 Apagbiitto a
leppasen ti Apo ti panangukomna iti sangalubongan.” 29 Kas kuna idi ni
Isaias, “No ti Apo a Mannakabalin-amin dinatay inteddaan iti annak,
nagbalintayo koma a kas iti siudad ti Sodoma, ket linak-amtayo koma ti
linak-am ti siudad ti Gomorra.” 30 Ania ngarud ti kunatayo? Kunatayo a
dagiti Hentil, nupay dida inkagumaan ti agbalin a nalinteg iti sangoanan ti
Dios, napalintegda met babaen iti pammati. 31 Ngem idinto a binirbirok
dagiti Israelita ti linteg a mangpalinteg kadakuada iti sangoanan ti Dios,
saanda a nasarakan. 32 Apay a dida nasarakan? Gapu ta saanda a binirok
babaen iti pammati, no di ket babaen kadagiti aramidda. Naitibkolda iti
“bato a pakaitibkolan” 33 a saritaen ti Nasantoan a Surat: “Kitaenyo,
nangikabilak idiay Sion iti bato a pakaitibkolan dagiti tattao, Maysa a bato
a pakatnaganda. Ngem dinto maibabain ti siasinoman a mamati
kenkuana.”
Roma 10
1 Kakabsatko, tarigagayak iti amin a pusok a maisalakan koma dagiti
kadaraak! Nasged ti panangidawdawatko kadakuada iti Dios! 2 Mabalinko
a paneknekan a napasnekda unay nga agserbi iti Dios. Ngem saan a
nainsiriban ti kinapasnekda. 3 Dida ammo no kasano ti panangpalinteg ti
Dios kadagiti tattao. Pinadasda a gun-oden ti bukodda a pannakapalinteg,
ket iti kasta, linaksidda ti wagas ti Dios a panangpalinteg kadagiti tattao. 4
Ta ni Cristo ti pagpatinggaan ti Linteg, tapno ti amin a mamati agbalin a
nalinteg iti sangoanan ti Dios. 5 Kastoy ti insurat ni Moises maipapan iti
pannakapalinteg ti tao iti sangoanan ti Dios babaen iti panagtungpalna iti
Linteg: “Ti siasinoman nga agtungpal iti bilin ti Linteg, agbiagto iti
Linteg.” 6 Ngem kastoy ti masao maipapan iti pannakapalinteg babaen iti
pammati: “Dimo kunkuna, ‘Siasinonto ti umuli sadi langit?’” (Kayatna a
sawen, ti mapan mangyulog ken ni Cristo.) 7 “Dimo met saludsoden iti
bagim, ‘Siasinonto ti umulog iti lubong nga adda iti baba?’” (Kayatna a
sawen, ti mapan mangyuli ken ni Cristo nga aggapu kadagiti natay.) 8
Masao ti kastoy: “Asideg kenka ti sao ti Dios, iti bibigmo ken iti
pusom”—kayatna a sawen, ti mensahe ti pammati nga ikaskasabami. 9 Ta
no babaen iti panagsao, ipaduyakyakmo ni Jesus nga isu ti Apo, ket patiem
iti pusom a pinagungar ti Dios, maisalakankanto. 10 Ta babaen iti puso,
mamatitayo, ket mapalintegtayo iti Dios. Babaen iti bibig,
agipaduyakyaktayo, ket maisalakantayo. 11 Kuna ti Nasantoan a Surat,
“Dinto maibabain ti siasinoman a mamati kenkuana.” 12 Mairaman amin a
tattao iti daytoy, agsipud ta awan ti pakaigiddiatan dagiti Judio kadagiti
Hentil. Ti Dios met laeng ti Apo ti isuamin, ket bendisionanna a
sibubuslon ti amin nga umawag kenkuana. 13 Kas kuna ti Nasantoan a
Surat, “Maisalakan ti siasinoman nga agpatulong iti Apo.” 14 Ngem
kasano nga agpatulongda, no dida mamati kenkuana? Kasano a mamatida
no dida mangngeg ti mensahe? Kasano a mangngegda no di
maipakaammo ti mensahe? 15 Kasano a maiwaragawag ti mensahe, no
saan a maibaon dagiti mangasaba? Kas kuna ti Nasantoan a Surat,
“Nagsayaat ketdin ti yaay dagiti mangyeg iti naimbag a damag!” 16 Ngem
saan nga amin a tattao ket inawatda ti Naimbag a Damag. Ta kinuna ni
Isaias, “Apo, siasino ti namati iti inkasabami?” 17 Ngarud, umay ti
pammati babaen iti panagdengngeg iti mensahe, ket umay ti mensahe
babaen iti pannakaikasaba ni Cristo. 18 Ngem saludsodek man: Pudno
kadi a dida nangngeg ti mensahe? Kinapudnona, nangngeg-da ta kas kuna
ti Nasantoan a Surat: “Nagsaknap ti timekda iti entero a lubong,
Dimmanon ti saoda iti pungto ti daga.” 19 Saludsodek man pay: Saan kadi
a naawatan dagiti Israelita? Ni Moises met laeng ti umuna a sumungbat:
“Pagimonenkayto kadagiti tattao a saan a pudno a nasion;
Pagpungtotenkayto iti nasion a maag dagiti tattaona.” 20 Naturtured pay ni
Isaias idi kunana, “Nasarakandak dagiti saan a mangsapsapul kaniak,
nagparangak kadagiti saan a mangbirbirok kaniak.” 21 Ngem no maipapan
iti Israel, kunana, “Agmalmalem nga igay-atko ti imak a mangawis nga
agsubli kadagiti managlabsing ken nasukir a tattao.”
Roma 11
1 Saludsodek ngarud: Linaksid kadi ti Dios dagiti tattaona? Saan! Siak a
mismo, Israelitaak. Nagtaudak iti kaputotan ni Abraham. Kamkamengak
iti tribu ni Benjamin. 2 Saan a linaksid ti Dios dagiti tattao a pinilina
manipud idi damo. Ammoyo ti paset ti Nasantoan a Surat a nakailanadan
ti panagdawat ni Elias iti Dios a maibusor iti Israel. 3 “Apo,” kinunana,
“pinatayda dagiti profetam ket rinakrakda dagiti altarmo. Siak laengen ti
nabati, ket kayatdak pay a patayen.” 4 Ania ti insungbat ti Dios kenkuana?
Kinunana, “Nangibatiak iti pitoribu a tattaok a di nagrukbab ken ni Baal a
didiosen.” 5 Kasta met ita: adda natda a pinili ti Dios babaen iti paraburna.
6 Naibatay ti panagpilina iti paraburna, saan nga iti inaramidda. Ta no
naibatay ti panagpili ti Dios iti inaramid dagiti tattao, saanen a maibilang a
pudno a parabur. 7 Ania ngarud? Saan a nasarakan dagiti Israelita ti
sapsapulenda. Ti bassit a grupo a pinili ti Dios ti nakasarak. Saan nga
inkaskaso ti dadduma ti ayab ti Dios. 8 Kas kuna ti Nasantoan a Surat,
“Pinatangken ti Dios ti puso ken isipda. Agpapan ita, saanda a makakita
wenno makangngeg.” 9 Ket kuna ni David: “Matiliw ken masiloanda
koma kadagiti fiestaanda; Matnagda koma, madusada koma! 10
Makullaapan koma dagiti matada tapno dida makakita; Ket pagkubboen
koma ti Dios ida iti agnanayon.” 11 Saludsodek ngarud: Idi naitibkol
dagiti Judio, saanda kadin a bimmangon? Natnagda kadi iti
pakadadaelanda? Saan! Gapu ta nagbasolda, immay ti pannakaisalakan
kadagiti Hentil tapno apalan ida dagiti Judio. 12 Inyeg ti basol dagiti Judio
ti nawadwad a bendision ditoy lubong, ket ti kinakurang ti pammatida
inyegna ti nawadwad a bendision kadagiti Hentil. Dinto aya ad-adu pay ti
bendision inton maibilang amin a Judio a tattao ti Dios? 13 Makisaoak ita
kadakayo a Hentil. Yantangay ta apostolak kadagiti Hentil,
pagpannakkelko ti trabahok 14 bareng no umapal dagiti kadaraak, ket iti
kasta, addanto maisalakan kadakuada. 15 Idi nailaksidda, nagbalin ti
sangkataoan a gayyem ti Dios. Anianto ngarud inton awaten ida ti Dios?
Mayarigto iti panagungar kadagiti natay! 16 No maidaton iti Dios ti
umuna a paset ti tinapay, maidaton met ti entero a tinapay. No dagiti ramut
ti kayo ti maidaton iti Dios, maidaton met dagiti sanga. 17 Nasip-ak ti
sumagmamano a sanga ti natartaripato nga olibo, ket naisulbong iti daytoy
a kayo ti sanga ti balang nga olibo. Sika a Hentil, mayarigka iti dayta
balang nga olibo, ket mairanudka ita iti natibker ken nabunga a biag dagiti
Judio. 18 Dimo ngarud laisen dagiti nasip-ak a sanga. Apay nga
agtangsitka? Maysaka laeng a sanga. Laglagipem a saan a sika ti
mangtaraon iti ramut, no di ket sika ti taraonanna. 19 Ngem kunamto,
“Wen, ngem nasip-ak dagiti sanga tapno adda pakaisulbongak.” 20 Pudno
daytoy. Nasip-akda agsipud ta dida namati, ngem agtalinaedka iti lugarmo
agsipud ta mamatika. Ngem dimo pagtangsit daytoy. Agbutengka koma
ketdi. 21 No saan a kinailalaan ti Dios dagiti Judio a mayarig kadagiti
sigud a sanga, kailalaannakanto ketdin? 22 Makitatayo ngarud ti
kinamanangngaasi ken kinainget ti Dios. Nainget kadagiti natnag, ngem
naasi kenka no la ket kankanayon nga agtalinaedka iti
kinamanangngaasina. Ta no saan, uray sika, masip-akkanto met. 23 Ngem
no mamati dagiti Judio, maisublidanto iti sigud a yanda, agsipud ta
kabaelan ti Dios nga isubli ida. 24 Mayarigkayo a Hentil iti nasip-ak a
sanga ti balang nga olibo, ket nupay maikontra iti nakaparsuaan,
maisulbong iti nataraken a kayo ti olibo. Mayarig dagiti Judio iti daytoy
natartaripato a kayo. Nalaklakanto ngarud ti panangisubli ti Dios
kadagitoy a sanga iti kayo a nakasip-akanda. 25 Adda palimed,
kakabsatko, a kayatko a maammoanyo tapno diyo ipagarup a masiribkayo.
Daytoy ti palimed: Agpatingganto ti panagsukir dagiti Israelita, ngem
santo la agpatingga inton makompleto ti bilang dagiti Hentil a mamati iti
Dios. 26 Kalpasanna, maisalakanto ti amin nga Israel. Kas kuna ti
Nasantoan a Surat: “Aggapunto ti Mangisalakan idiay Sion,
pukawennanto ti amin a kinadakes iti kaputotan ni Jacob. 27 Daytoyto ti
pakitulagak kadakuada, inton pakawanek dagiti basolda.” 28 Agsipud ta
saan nga awaten dagiti Judio ti Naimbag a Damag, kabusor ida ti Dios
gapu kadakayo a Hentil. Ngem gapu iti pagayatan ti Dios, ipatpategna met
la ida gapu iti karina kadagiti kapuonanda. 29 Ta saan a baliwan ti Dios ti
panunotna maipapan iti pilien ken bendisionanna. 30 No maipapan
kadakayo a Hentil, nagsukirkayo idi iti Dios. Ngem ita, inawatyon ti asi ti
Dios agsipud ta nagsukir dagiti Judio. 31 Iti kasta, iti agdama, agsukir
dagiti Judio tapno awatenda met ti kaasi a kas iti inawatyo. 32 Ta
pinagbalin ti Dios dagiti amin a tattao a balud ti kinasukir tapno
maipaayna ti kaasi kadakuada amin. 33 Anian a kinabaknang ti Dios!
Anian a naguneg ti sirib ken ammona! Siasino ti makailawlawag kadagiti
pangngeddengna? Siasino ti makasurot kadagiti dalanna? 34 Kas kuna ti
Nasantoan a Surat: “Siasino ti makaammo iti panunot ti Apo? Siasino ti
makabalin a mangbalakad kenkuana? 35 Siasino ti adda naipaayna
kenkuana, Tapno masapul a masupapakan?” 36 Ta isu ti namarsua
kadagiti amin. Agbiagda amin babaen kenkuana ket agserbida kenkuana.
Madaydayaw koma ti Dios iti agnanayon! Amen.
Roma 12
1 Kakabsatko, dawatek ngarud kadakayo, a gapu iti naindaklan nga asi ti
Dios kadatayo, ipaayyo koma ti bagiyo a kas daton a sibibiag, nasantoan
ken makaay-ayo kenkuana. Daytoy ti pudno a panagdaydayaw a rumbeng
nga ipaayyo. 2 Saanyo a tultuladen dagiti ugali iti daytoy a lubong ngem
palubosanyo a baliwannakayo ti Dios ket pabaroenyo a naan-anay ti
panunotyo. Ket maammoanyonto ti pagayatan ti Dios—no ania ti
naimbag, makaay-ayo kenkuana ken awan pagkuranganna. 3 Gapu iti
parabur ti Dios kaniak, ibagak daytoy kadakayo amin: Diyo ipapan ti
bagiyo a nangatngato ngem ti rumbeng. Natanang koma ketdi ti
panagpampanunotyo, ket usigen ti tunggal maysa ti bagina kas
mayannurot iti rukod ti pammati nga inted ti Dios kenkuana. 4 Adu ti
paset ti bagitayo ket agduduma ti usarda. 5 Kasta met a nupay adutayo,
maymaysatayo a bagi ken ni Cristo. Napagkakamangtayo a kas iti
nadumaduma a paset ti bagi. 6 Masapul ngarud nga aramatentayo dagiti
nadumaduma a sagut kas iti parabur nga inted ti Dios kadatayo. No
panangipakaammo iti mensahe ti Dios ti saguttayo, masapul nga
aramidentayo kas mayannurot iti pammati nga adda kadatayo. 7 No
panagserbi, agserbitayo. No panangisuro, mangisurotayo. 8 No
pammaregta, paregtaentayo ti padatayo a tao. Ti adda ibingayna, mangted
a sibubuslon. Ti mangipangulo, agtrabaho a sigagaget. Ti mangngaasi,
mangngaasi a siraragsak. 9 Agayatkayo a sipupudno. Guraenyo ti dakes
ket salimetmetanyo ti naimbag. 10 Nabara koma ti panagiinnayatyo kas
agkakabsat ken ni Cristo, ket nareggetkayo a mangipakita iti panagraemyo
iti maysa ken maysa. 11 Ipasnekyo ti agtrabaho, ket dikay agsadsadut.
Ipapusoyo ti agserbi iti Apo. 12 Agbiagkayo a siraragsak gapu iti
namnamayo. Ibturanyo dagiti rigatyo, ket kanayon nga agkararagkayo. 13
Ibingayanyo dagiti napanglaw a kakabsatyo iti pammati, ket padagusenyo
dagiti sangsangaili. 14 Dawatenyo iti Dios a bendisionanna dagiti
mangidadanes kadakayo. Wen, dawatenyo ti pannakabendisionda a saan
ket a ti pannakailunodda. 15 Makipagragsakkayo kadagiti agragsak.
Makipagsangitkayo kadagiti agsangit. 16 Dikay mangidumduma. Dikay
agpalangguad; makigayyemkayo ketdi kadagiti nanumo a tattao. Diyo
ipagarup a mamasiribkayo. 17 Diyo supapakan iti dakes ti siasinoman nga
agaramid iti dakes kadakayo. Ikagumaanyo nga aramiden ti naimbag iti
imatang ti amin a tattao. 18 Aramidenyo amin a kabaelanyo a makilangen
a sikakappia iti tunggal maysa. 19 Ni kaanoman dikay agibales,
gagayyemko. Bay-anyo a ti Dios ti agibales. Ta nailanad iti Nasantoan a
Surat: “Siakto ti agibales, siakto ti mangsupapak, kuna ti Apo.” 20 Ngem
kas kuna ti Nasantoan a Surat: “No mabisin ti kabusormo, pakanem; no
mawaw, painumem. No aramidem ti kasta, maalananto ti agbain.” 21 Dika
paabak iti dakes. Parmekem ketdi ti dakes babaen iti naimbag nga aramid.
Roma 13
1 Rebbeng ti amin a tattao ti agtulnog kadagiti agtuturay iti gobierno gapu
ta awan ti turay a saan nga agtaud iti Dios. Ti Dios ti nangisaad kadagiti
agtuturay. 2 Ngarud, ti siasinoman a sumukir kadagiti agtuturay, sukirenna
met ti intuyang ti Dios ket yegna ti dusa iti mismo a bagina. 3 Saan a
dagiti agaramid iti naimbag ti agbuteng kadagiti agturay no di ket dagiti
agaramid iti dakes. Tapno awan panggapuam nga agbuteng iti agturay,
aramidem ti naimbag ket idaydayawnakanto. 4 Ta isu ti adipen ti Dios nga
agserbi iti pagsayaatam. Ngem no agaramidka iti dakes, agbutengka
kenkuana, ta saan a sinsinan ti pannakabalinna a mangdusa. Isu ti adipen ti
Dios a mangipatay iti pannusa ti Dios kadagiti agaramid iti dakes. 5 Gapu
iti daytoy, masapul nga agtulnogkayo kadagiti agtuturay, saan la a tapno
malisianyo ti pannusa ti Dios, ngem gapu pay iti nadalus a konsensia. 6
Daytoy pay ti gapuna nga agbayadkayo iti buis. Ta iti panangtungpal
dagiti agtuturay iti pagrebbenganda, agtartrabahoda para iti Dios. 7
Bayadanyo ngarud ti utangyo kadakuada. Itedyo ti buisyo. Raemen ken
padayawanyo ida amin. 8 Awan koma ti utangyo malaksid ti
panagiinnayatyo. Ti agayat iti padana a tao, natungpalnan ti Linteg. 9 Ta
dagiti bilin: “Dika makikamalala, dika mamapatay, dika agtakaw, dika
agagum”—amin dagitoy ken dadduma pay, madagupda iti daytoy
maymaysa a bilin: “Ayatem ti padam a tao a kas iti bagim.” 10 Ti agayat
iti padana a tao, ni kaano man dina aramiden ti dakes kenkuana. Ngarud, ti
panagayat iti pada a tao isu ti panagtungpal iti entero a Linteg. 11 Masapul
nga aramidenyo daytoy ta ammoyo a panawenen tapno agriingkayo. Ta
as-asidegen ti pannakaisalakantayo ngem idi damotayo ti mamati. 12
Lumabasen ti rabii ket bumigaten. Iwaksitayo dagiti aramid ti sipnget ket
ikawestayo dagiti igam ti lawag. 13 Agbiagtayo a natakneng, kas tattao
nga adda iti lawag. Awan ti nalabes a panagragragsak ken panagbarbartek,
awan ti kinaderrep ken naalas nga aramid, ket awan ti ap-apa ken im-
imon. 14 Ikawesyo ketdi ni Apo Jesu-Cristo a kas armasyo ket
isardengyon a pagustoan ti dakes a tarigagay dagiti bagbagiyo.
Roma 14
1 Awatenyo ti tao a nakapuy ti pammatina, ngem diyo kasupsuppiat
maipapan iti kapanunotanna. 2 Adda mamati a mabalinna a kanen ti uray
ania, ngem ti nakapuy ti pammatina, natnateng laeng ti makanna. 3 Ti
mangan iti uray ania, saanna koma a laisen ti saan a mangan a kas
kenkuana. Ti met mangan kadagiti natnateng laeng, saanna koma nga
ukomen ti mangan iti uray ania, gapu ta inawat ti Dios daytoy a tao. 4
Siasinoka kadi a mangukom iti adipen ti sabali? Ti apona met laeng ti
mangikeddeng kenkuana no agballigi wenno saan. Ket agballiginto gapu
iti Apo. 5 Kuna ti maysa a tao nga adda aldaw a napatpateg ngem dagiti
dadduma nga aldaw. Kuna met ti sabali nga agpapadada amin. Awan
koma ti panagduadua ti tunggal maysa iti kapanunotanna maipapan iti
daytoy a banag. 6 Ti siasinoman a mangngilin iti maysa nga aldaw,
ngilinenna a kas pammadayaw iti Apo. Ti siasinoman a mangan iti uray
ania, kanenna a kas pammadayaw iti Apo, ta agyaman daytoy a tao iti
Dios gapu iti taraon. Ti siasinoman a di mangan kadagiti dadduma a
taraon, aramidenna daytoy a kas pammadayaw iti Apo, ket agyaman ti
Dios. 7 Awan kadatayo ti agbiag a maipaay iti bagina laeng. Awan met
kadatayo ti matay a maipaay iti bagina laeng. 8 No agbiagtayo, agbiagtayo
a maipaay iti Apo, ket no mataytayo, mataytayo a maipaay iti Apo.
Ngarud, agbiagtay man wenno mataytayo, kukuanatayo ti Apo. 9 Natay
ken nagungar ni Cristo tapno isu ti Apo dagiti sibibiag ken dagiti natay. 10
Sika, apay ngarud nga ukomem ti kabsatmo? Ket sika met, apay nga
umsiem ti kabsatmo? Agtakdertayto amin iti sangoanan ti Dios tapno
ukomennatayo. 11 Ta kuna ti Nasantoan a Surat, “Kas sibibiagak, kuna ti
Apo, agparintumengto ti amin a tattao iti sangoanak, ket
ipaduyakyakdanto a siak ti Dios.” 12 Ngarud, dumatagto ti tunggal maysa
kadatayo iti sangoanan ti Dios. 13 Ngarud, saantayon nga agiinnukom.
Ikeddengyo ketdi a dikay agaramid iti aniaman a pakaitibkolan wenno
pakaigapuan ti kabsatyo nga agbasol. 14 Iti pannakikaysak ken ni Apo
Jesus, patiek nga awan ti taraon a narugit iti imatang ti linteg. Ngem no
patien ti maysa a tao nga adda taraon a narugit, agbalin a narugit
kenkuana. 15 No madangran ti kabsatmo gapu iti kanem, saanka nga
agbibiag iti ayat! Gapu iti kanen, dimo dadaelen ti tao a nakaigapuan ti
pannakatay ni Cristo! 16 Agannadka tapno saan a dakes ti pakasarsaritaan
ti ibilangmo a naimbag. 17 Ta ti Pagarian ti Dios saan a maipapan iti
pannangan ken panaginum no di ket maipapan iti kinalinteg, kappia ken
rag-o nga ited ti Espiritu Santo. 18 Ket no kastoy ti panagserbi ti maysa a
tao ken Cristo, paragsakenna ti Dios ket magun-odna ti panagraem ti
padana a tao. 19 Ngarud, masapul nga aramidentayo dagiti makaited iti
kappia ken makatulong a mangpapigsa iti maysa ken maysa. 20 Dimo
dadaelen ti inaramid ti Dios gapu iti taraon. Mabalin a kanen ti amin a
taraon, ngem dakes a kanen ti uray ania a pakaigapuan ti panagbasol ti
maysa a tao. 21 Nasayaat koma no saankan nga agsida iti karne, wenno
aginum iti arak, wenno agaramid iti aniaman a pakaigapuan ti panagbasol
ti kabsatmo. 22 Salimetmetam ngarud ti patiem maipapan iti daytoy iti
biangmo laeng ken iti Dios. Nagasat ti tao a di mariribuk ti konsensiana a
mangaramid kadagiti banag nga ammona a nasayaat! 23 No agduadua iti
kanenna, sana met la kanen, dusaen ti Dios ta saan a maibatay ti aramidna
iti pammati. Ta basol ti uray ania a saan a maibatay iti pammati.
Roma 15
1 Datayo a napigsa ti pammatina, rebbengtayo a tulongan dagiti nakapuy a
mangawit kadagiti pakadagsenanda. Saan la a ti bukodtayo a pagragsakan
ti pampanunotentayo. 2 Paragsakentayo ketdi ti padatayo a tao tapno
mapapigsa iti pammati. 3 Ta ni Cristo saan a ti bukodna a bagi ti
pinampanunotna, no di ket, kas kuna ti Nasantoan a Surat,
“Pinadpadakesdaka dagiti tattao ngem iti kinapudnona, siak ti nagtinnagan
dagiti pammadpadakesda.” 4 Ta amin nga adda iti Nasantoan a Surat,
naisuratda tapno isurodatayo a mangnamnama babaen iti anus ken
pammaregta nga ited ti Nasantoan a Surat. 5 Sapay koma ta
tulongannakayo ti Dios a paggapuan ti anus ken pammaregta, tapno
agtutunoskayo a mangsurot iti ulidan nga impakita ni Cristo Jesus. 6 Iti
kasta, agmaymaysa ti timekyo a mangidaydayaw iti Dios ken Ama ni
Apotayo a Jesu-Cristo. 7 Ngarud, kas iti panangawat ni Cristo kadakayo,
awatenyo ti maysa ken maysa tapno maidaydayaw ti Dios. 8 Ta ibagak
kadakayo a nagbalin ni Cristo nga adipen dagiti Judio tapno paneknekanna
a napudno ti Dios, ket tungpalenna dagiti karina kadagidi amma. 9 Iti
kasta, agdaydayaw met dagiti Hentil iti Dios gapu iti asina. Kas kuna ti
Nasantoan a Surat, “Ngarud, idaydayawkanto kadagiti Hentil; Ikantakto
dagiti pagdaydayaw iti naganmo.” 10 Kunana pay, “Makipagrag-okayo,
dakay a Hentil, kadagiti tattao a pinili ti Dios!” 11 Kunana manen,
“Idaydayawyo ti Apo, dakay amin a Hentil; Ipigsayo ti panagdaydayawyo
iti Apo, dakay amin a tattao!” 12 Kuna pay ni Isaias, “Addanto umay nga
agtaud iti kaputotan ni Jesse; Mapadakkelto a mangituray kadagiti Hentil,
Ket isunto ti pangnamnamaanda.” 13 Sapay koma ta ti Dios a paggapuan
ti namnama, punnoennakayo iti amin a rag-o ken talna iti pammatiyo
kenkuana tapno dumakkel a dumakkel ti namnamayo iti pannakabalin ti
Espiritu Santo. 14 Iti biangko, kakabsatko, awan duaduak a napnoankayo
iti kinaimbag, addaankayo iti amin nga ammo ket makapagsisinnurokayo.
15 Nupay kasta, naturedak nga agsurat ita maipapan iti sumagmamano a
bambanag nga impalagipkon kadakayo. Wen, naturedak gapu iti
gundaway nga inted ti Dios kaniak, 16 kas adipen ni Cristo Jesus nga
agtrabaho kadagiti Hentil. Agserbiak a kas padi a mangikaskasaba
kadakuada ti Naimbag a Damag nga aggapu iti Dios, tapno agbalin dagiti
Hentil a daton a makaay-ayo iti Dios, ken naidaton kenkuana babaen iti
Espiritu Santo. 17 Ngarud, iti pannakikaysak ken ni Cristo Jesus,
mabalinko nga itangsit ti aramidko a maipaay iti Dios. 18 Agturedak ket
sawek laeng ti inaramid ni Cristo, ta inaramatnak a mangidalan kadagiti
Hentil tapno agtulnogda iti Dios, babaen iti sao ken iti aramid, 19 babaen
iti pannakabalin dagiti pagilasinan ken milagro, ken babaen iti
pannakabalin ti Espiritu. Isut’ gapuna nga iti panagbibiahek manipud
Jerusalem agingga idiay Ilirico, inaramidko amin a kabaelak a
nangikasaba iti Naimbag a Damag maipapan ken ni Cristo. 20 Panggepko
nga ikasaba ti Naimbag a Damag kadagiti lugar a saan pay a nakangngeg
iti maipapan ken ni Cristo, tapno saanak a mangbangon iti rabaw ti
fondasion nga insaad ti sabali. 21 Kas kuna ti Nasantoan a Surat,
“Makakitanto dagiti saan pay a nakadamag maipapan kenkuana, Ket
makaawatto dagiti saan pay a nakangngeg.” 22 Daytoy ti gapuna a
naminadun a nalapdanak nga umay kadakayo. 23 Ngem ita ta nalpaskon ti
trabahok kadagitoy a lugar, ken yantangay ta nabayagen a panggepkayo a
bisitaen, 24 namnamaek a matungpalkon daytoy a tarigagay. Kayatko ti
dumagas dita a kumita kadakayo inton agpa-Espaniaak ket agpatulongakto
kadakayo a mapan sadiay kalpasan ti bassit a tiempo a pannakiinniliwko
kadakayo. 25 Nupay kasta, innak ita idiay Jerusalem a mangted iti tulong
kadagiti tattao ti Dios sadiay. 26 Ta siaayat dagiti iglesia idiay Macedonia
ken Grecia a nangted iti sagut a pangtulong kadagiti napanglaw a tattao ti
Dios idiay Jerusalem. 27 Isuda met laeng ti akinnakem a tumulong.
Kinapudnona, rebbengda ti tumulong kadagiti napanglaw idiay Jerusalem,
ta no nakiranud dagiti Hentil kadagiti naespirituan a bendision dagiti
Judio, rebbeng met ngarud dagiti Hentil a pagserbi kadagiti Judio dagiti
material a bendisionda. 28 Inton malpasko daytoy annongko ket
mayawatkonton ti amin a naur-or a kuarta nga agpaay kadakuada,
agrubbuatakton nga agpa-Espania ket dumagasakto dita. 29 Ammok nga
inton umayak, umayakto a napno iti bendision ni Cristo. 30 Dawatek
kadakayo, kakabsat, gapu ken ni Apotayo a Jesu-Cristo ken gapu iti ayat
nga ited ti Espiritu a buyogandak iti nasged a panangikararagyo kaniak iti
Dios. 31 Dawatenyo a mailisiak kadagiti saan a mamati idiay Judea.
Dawatenyo met nga awaten dagiti tattao ti Dios idiay Jerusalem ti
panagserbik sadiay. 32 Iti kasta, no ipalubos ti Apo, umayakto a napnoan
iti rag-o, ket ammok a maragsakan ken mabang-aranakto iti
isasarungkarko kadakayo. 33 Sapay koma ta adda kadakayo amin ti Dios a
mangted iti talna. Amen.
Roma 16
1 Irekomendarko kadakayo ni kabsattayo a Febe nga agserserbi iti iglesia
idiay Cencrea. 2 Awatenyo iti nagan ti Apo kas rumbeng nga aramiden
dagiti tattao ti Dios. Tulonganyo iti aniaman a kasapulanna, ta adu a tattao
ti tinultulonganna, ket maysaak kadakuada. 3 Pakomustaak da Priscila ken
Akila a kakaduak a nagserserbi ken ni Cristo Jesus. 4 Nagpeggad ti biagda
gapu kaniak. Saan la a siak ti agyaman kadakuada no di pay ket ti amin
nga iglesia dagiti Hentil. 5 Pakomustaak met ti iglesia nga aggigimong iti
balayda. Pakomustaak ni Epeneto a patgek a gayyem. Isu ti immuna a
namati ken ni Cristo iti probinsia ti Asia. 6 Pakomustaak ni Maria a
nagrigrigat a nagtrabaho para kadakayo. 7 Pakomustaak da Adronico ken
Junia a kadaraak ken kakaduak a naibalud. Am-ammo unay ida dagiti
apostoles. Immun-unada ngem siak a nagbalin a Kristiano. 8 Pakomustaak
met ni Ampliato a patgek a gayyem iti pannakikadkadua iti Apo. 9 Kasta
met ni Urbano a katrabahoanmi iti panagserbi ken Cristo ken ni Estakis a
patgek a gayyem. 10 Pakomustaak ni Apeles a napaneknekanen ti
kinapudnona ken ni Cristo. Kasta met ti familia ni Aristobulo. 11
Pakomustaak ni Herodion a padak a Judio ken dagiti kakabsat a Kristiano
iti familia ni Narciso. 12 Pakomustaak da Trifena ken Trifosa nga
agserserbi iti Apo, kasta met ti patgek a gayyem, ni Persida nga adu ti
nagapuananna a maipaay iti Apo. 13 Pakomustaak ni Rufo a nalatak nga
agserserbi iti Apo, agraman ni inana a nangibilang kaniak a kas maysa nga
anakna. 14 Pakomustaak da Asincrito, Flegonte, Hermes, Patrobas,
Hermas ken dagiti amin a kakabsat a kakaduada. 15 Pakomustaak pay da
Filologo ken Julia, ni Nereo ken ti kabsatna a babai, ni Olimpas, ken amin
a tattao ti Dios a kakaduada. 16 Agkikinnablaawkayo iti nainkabsatan nga
agek. Pakomustaandakayo dagiti amin nga iglesia ni Cristo. 17
Kakabsatko, dawatek nga agannadkayo kadagiti tattao a mamagsisina ken
mangyaw-awan kadakayo iti pammati ken dagiti agsao iti maibusor iti
pannursuro nga inawatyo. Adaywanyo ida. 18 Dagiti agaramid kadagitoy,
saanda nga agserserbi ken ni Cristo nga Apotayo, no di ket iti bukodda a
paggarteman. Allilawenda dagiti nasingpet a tattao babaen kadagiti
napipintas a balikas ken makaay-ayo a panagsao. 19 Agdindinamag ti
kinapudnoyo iti ebanghelio, ket daytoy ti gapuna a maragsakanak
kadakayo. Kayatko a masiribkayo a mangammo no ania ti naimbag, ngem
awan koma ti ammoyo maipapan iti dakes. 20 Iti mabiit, ti Dios a
pagtaudan ti talna, parmekennanto ni Satanas. Adda koma kadakayo ti
parabur ni Apotayo a Jesus. 21 Pakomustaannakayo ni Timoteo a
katrabahoak. Agpakomusta met da Lucio, Jason ken Sosipatro a padak a
Judio. 22 Siak, ni Tercio a nangisurat iti daytoy, idanonko met kadakayo ti
nakristianoan a pakomusta. 23 Pakomustaannakayo ni Gayo a
mangsangsangaili kaniak ken akimbalay iti paggigimongan dagiti mamati.
Pakomustaannakayo met ni Erasto a tesorero ti siudad, ken ni kabsattayo a
Cuarto. 25 Madaydayaw ti Dios! Mabalinnakayo a pagtalinaeden a
natibker iti pammatiyo, kas mayannurot iti Naimbag a Damag nga
ikaskasabak maipapan ken Jesu-Cristo, ken kas mayannurot iti
naiparangarang a palimed ti kinapudno a nailemmeng manipud idi
punganay. 26 Ngem ita, nailatak dayta a kinapudno. Babaen kadagiti
sinuratan dagiti profeta ken kas mayannurot iti bilin ti agnanayon a Dios,
naipakaammo daytoy kadagiti amin a nasion tapno mamati ken agtulnog
amin a tattao. 27 Madaydayaw koma iti agnanayon babaen ken Jesu-Cristo
ti maymaysa a Dios, isu a kakaisuna a masirib iti amin! Amen.
1 Corinto 1
1-3 Kadagiti kamkameng ti iglesia iti Corinto: Napilikayo nga agbalin a
nasantoan a tattao ti Dios iti pannakikaysayo ken ni Cristo Jesus, agraman
dagiti amin a tattao iti sadinoman a lugar nga umawag iti nagan ni Jesu-
Cristo nga Apoda ken Apotayo met. Sapay koma ta parabur ken talna ti
ited kadakayo ti Dios nga Amatayo, kasta met ni Apo Jesu-Cristo.
Naggapu daytoy a surat kadakami—ni Pablo a naayaban nga apostol ni
Cristo Jesus babaen iti pagayatan ti Dios, ken ni kabsat a Sostenes. 4
Kanayon nga agyamanak iti Diosko para kadakayo gapu iti parabur nga
intedna kadakayo babaen ken ni Cristo Jesus. 5 Ta iti pannakikaysayo ken
ni Cristo, napabaknangkayo iti isuamin a parabur agraman ti panagsao ken
kinasirib. 6 Naipasagepsepen kadakayo ti mensahe maipapan ken ni
Cristo, 7 isut’ gapuna a dikayo agkurang iti naespirituan a sagut bayat ti
panagurayyo iti pannakaiparangarang ni Apotayo a Jesu-Cristo. 8
Pagtalinaedennakayo a natibker agingga iti panungpalan tapno awan ti
pakaukomanyo inton dumteng ti Aldaw ni Apotayo a Jesu-Cristo. 9
Mapagtalkan ti Dios a nangpili kadakayo a makikadua iti Anakna, ni Jesu-
Cristo nga Apotayo. 10 Kakabsatko, ipakpakaasik kadakayo iti nagan ni
Apotayo a Jesu-Cristo nga agkaykaysakayo iti amin a sawenyo tapno
dikayo mabingaybingay. Wen, naan-anay koma ti panagtutunosyo iti
panunot ken panggep. 11 Nadamagko kadagiti sumagmamano a tattao iti
familia ni Cloe nga agsususikkayo, kakabsatko. 12 Kastoy ti kayatko a
sawen: Aggigiddiat ti sao ti tunggal maysa kadakayo. “Pasurotnak ni
Pablo,” kuna kano ti maysa. “Pasurotnak ni Apolos,” kuna met ti sabali.
“Pasurotnak ni Pedro,” kuna pay kano ti dadduma, ket adda pay agkuna,
“Pasurotnak ni Cristo.” 13 Nasinasina aya ni Cristo? Ni kadi Pablo ti natay
iti krus gapu kadakayo? Nabuniagankayo kadi a kas pasurot ni Pablo? 14
Agyamanak ta awan binuniagak kadakayo, malaksid kada Crispo ken
Gayo. 15 Ngarud, awan ti makaibaga a binuniagankayo a kas adalak. ( 16
Ay, wen, binuniagak ni Estefanas ken ti familiana. Diak malagip no adda
pay sabali a binuniagak.) 17 Saannak nga imbaon ni Cristo tapno
mangbuniagak, no di ket tapno iwaragawagko ti Naimbag a Damag. Diak
usaren ti nainsiriban a pagsasao amangan no maikkat ti pannakabalin ti
ipapatay ni Cristo iti krus. 18 Ta kadagiti mapukaw, kinamaag ti mensahe
maipapan iti pannakatay ni Cristo iti krus. Ngem kadatayo a maisalakan,
daytoy ti pannakabalin ti Dios. 19 Kas kuna ti Nasantoan a Surat,
“Dadaelekto ti sirib dagiti mamasirib, ikkatekto ti pannakaawat dagiti
nasaririt.” 20 Ania ngarud ita ti serbi dagiti mamasirib? Wenno dagiti
agipalpalawag iti Linteg? Wenno dagiti nalaing a makidiskutir iti agdama
a panawen? Impakitan ti Dios a maysa a kinamaag daytoy a kinasirib ti
lubong! 21 Iti kinasirib ti Dios, inaramidna a saan a mabalin ti tao nga
ammoen ti Dios babaen iti bukodna a sirib. Kinayatna ketdi nga isalakan
dagiti mamati babaen iti panangusarna iti daytoy makuna a “minamaag”
nga ikaskasabami. 22 Ngem milagro ti kayat a kitaen dagiti Judio kas
pammaneknek. Kinasirib met ti sapulen dagiti Griego. 23 Iti biangmi,
iwaragawagmi ti pannakatay ni Cristo iti krus, maysa a mensahe a saan a
mairusok dagiti Judio ken minamaag met kadagiti Griego. 24 Ngem
kadagiti inayaban ti Dios, Judio man wenno Griego, daytoy a mensahe isu
ni Cristo a pannakabalin ken sirib ti Dios. 25 Ta ti maipagarup a kinamaag
ti Dios, nasirsirib ngem ti kinalaing ti tao, ket ti maipagarup a kinakapsut
ti Dios, nabilbileg ngem ti pigsa ti tao. 26 Lagipenyo, kakabsatko, no
aniakayo idi ayabannakayo ti Dios. Manmano kadakayo ti masirib wenno
mannakabalin wenno nagtaud iti nabaknang a familia, segun ti pagrukodan
ti tao. 27 Ta inranta a pinili ti Dios dagiti minamaag iti panagkuna ti
lubong tapno ibabainna dagiti masirib. Ket pinilina dagiti nakapsut iti
panagkuna ti lubong tapno ibabainna dagiti mannakabalin. 28 Wen,
pinilina dagiti mauy-uyaw, dagiti mairurrurumen, dagiti maikuskuspil
ditoy lubong, tapno dadaelenna dagiti banag nga ibilang ti lubong a
nasken. 29 Kayat a sawen daytoy nga awan ti makapagpasindayag iti
imatang ti Dios. 30 Ngem inyasidegnakayo ti Dios ken ni Cristo Jesus
tapno makikadkaduatayo kenkuana, ket pinagbalinna nga isu ti
kinasiribtayo. Babaen ken ni Cristo, mapalintegtayo iti Dios,
mapagsantotayo ken mawayawayaantayo. 31 Ngarud, kas kuna ti
Nasantoan a Surat, “Siasinoman nga agpasindayag, ipasindayagna koma ti
inaramid ti Apo.”
1 Corinto 2
1 Kakabsatko, idi immayak dita tapno ikasabak kadakayo ti nalimed a
kinapudno maipapan iti Dios, diak nagaramat kadagiti agkakauneg a
balikas wenno naindaklan a pampanunot. 2 Ta bayat ti kaaddak iti
dennayo, inkeddengko a lipaten ti amin malaksid ti maipapan ken ni Jesu-
Cristo ken ti pannakailansana iti krus. 3 Iti kasta, idi addaak kadakayo,
nakapuy ken agtigtigergerak iti buteng. 4 Iti panangisurok ken
panangikasabak iti mensahe, diak nagusar kadagiti makaallukoy a balikas
ti kinasirib. Nagsaoak iti makaallukoy a pammaneknek iti pannakabalin ti
Espiritu ti Dios, 5 tapno saan a maibatay ti pammatiyo iti kinasirib ti tao,
no di ket iti pannakabalin ti Dios. 6 Nupay kasta, agsaoak met iti kinasirib
kadagiti nataengan iti pammatida. Ngem saan nga iti kinasirib ti agdama a
panawen wenno dagiti mangituray iti daytoy a lubong—dagiti agtuturay a
mapukpukawen ti pannakabalinda. 7 Ti nalimed a kinasirib ti Dios ti
sawek, ti kinasirib a nailemmeng kadagiti tattao ken intudingna nga
agpaay iti pakaigloriaantayo, uray idi sakbay a maparsua ti lubong. 8
Awan kadagiti agtuturay iti lubong ti makaammo iti daytoy a kinasirib. Ta
no naammoanda, dida koman inlansa iti krus ti nadayag nga Apo. 9 Ngem
kas kuna ti Nasantoan a Surat, “Ti saan pay a nakita wenno nangngeg ti
tao, ti saan nga impagarup ti tao a mapasamak, isu ti insagana ti Dios
kadagiti agayat kenkuana.” 10 Nupay kasta, babaen iti Espiritu,
impakaammo ti Dios kadatayo ti palimedna. Sukimaten ti Espiritu ti amin
a banag, uray dagiti nauneg a panggep ti Dios. 11 Ti laeng panunot ti
maysa a tao ti makaammo iti adda iti nakem dayta a tao, kasta met a ti
laeng Espiritu ti Dios ti makaammo iti panunot ti Dios. 12 Saan a ti
espiritu ti lubong ti inawattayo, no di ket ti Espiritu nga aggapu iti Dios
tapno maawatantayo ti kaipapanan ti amin nga imparabur ti Dios
kadatayo. 13 Ngarud, iti panangilawlawagmi kadagiti naespirituan a
kinapudno kadagiti addaan iti Espiritu, saanmi nga aramaten dagiti
isursuro ti tao, no di ket dagiti isursuro ti Espiritu ti Dios. 14 Ngem ti tao
nga awanan iti Espiritu, dinanto awaten dagiti sagut nga aggapu iti
Espiritu ti Dios. Saanna a maawatan dagitoy ta minamaagda kenkuana.
Ngamin, mabigbig laeng ti pategda babaen iti espiritu. 15 Kabaelan a
rukoden ti naespirituan a tao ti pateg ti amin, ngem awan makarukod
kenkuana. 16 Kas kuna ti Nasantoan a Surat, “Siasino ti makaammo iti
panunot ti Apo? Siasino ti makabalin a mangbagbaga kenkuana?” Nupay
kasta, ammotayo ti panunot ni Cristo.
1 Corinto 3
1 Kinapudnona, kakabsatko, saanak a nagsao a kas iti panagsaok kadagiti
tattao nga addaan iti Espiritu. Nagsaoak kadakayo a kas nailubongan a
tattao ken kas ubbing iti nakristianoan a pammati. 2 Gatas ti impainumko
kadakayo, ta diyo pay mabalin ti mangan iti natangken a taraon. Agpapan
ita, saankayo pay a nakasagana iti daytoy 3 ta agbibiagkayo pay laeng a
kas tattao iti lubong. Wen, ipaneknek ti panagiinnapal ken panagriririyo a
nainlubongankayo, nga agbibiagkayo kas mayannurot iti alagaden ti
lubong. 4 No adda agkuna kadakayo, “Pasurotnak ni Pablo,” ket adda met
agkuna, “Pasurotnak ni Apolos,” diyo kadi iparparangarang a tattaokay iti
lubong? 5 Siasino aya ngamin da Apolos ken Pablo? Agpadpadakami nga
agserserbi iti Dios. Babaen kadakami, namatikayo. Aramiden laeng ti
tunggal maysa kadakami ti intalek ti Apo. 6 Siak ti nangitukit iti bukel. Ni
Apolos ti nagsibug. Ngem ti Dios ti nangpadakkel iti mula. 7 Saan a
nasken no siasino ti agmula wenno ti agsibug. Ti Dios ti nasken agsipud ta
isu ti mangpadakkel iti mula. 8 Awan giddiat ti agmula ken ti agsibug.
Gunggonaanto ti Dios ida segun ti inaramid ti tunggal maysa. 9 Ta
agkakaduakami nga agserserbi iti Dios, ket dakayo ti talonna. Dakayo pay
ti pasdek a binangon ti Dios. 10 Babaen iti panangaramatko iti insagut ti
Dios kaniak, nagtrabahoak a kas maysa a nalaing nga agpatpatakder.
Impasdekko ti fondasion, ket sabali met a tao ti agpatakder iti rabawna.
Ngem naannad koma ti panagpatakder ti tunggal maysa. 11 Ta inkabilen ti
Dios ni Jesu-Cristo a kas maymaysa ken kakaisuna a fondasion, ket
awanen sabali. 12 Adda agaramat iti balitok, pirak wenno dagiti napateg a
bato iti panagpatakderda iti rabaw ti fondasion. Kayo, ruot wenno garami
ti usaren met ti dadduma. 13 Ngem makitanto ti klase ti trabaho ti tunggal
tao inton iparangarang ti Aldaw ni Cristo. Ta babaen iti apuy iti dayta nga
aldaw, makitanto ti trabaho ti tunggal tao; masubokto iti apuy ket
maammoanto ti pudno a klasena. 14 Magunggonaanto ti tao no makalasat
iti apuy ti binangonna iti rabaw ti fondasion. 15 Ngem no mauram ti
trabaho ti maysa a tao, mapukawnanto. Nupay kasta, maisalakanto met
laeng ngem kasla nakalasat iti apuy. 16 Awan duadua nga ammoyo a
dakayo ti templo ti Dios, ket agtalinaed ti Espiritu ti Dios kadakayo. 17
Ngarud, ti siasinoman a mangdadael iti templo ti Dios, dadaelento met ti
Dios. Ta nasantoan ti templo ti Dios, ket dakayo a mismo ti templona. 18
Awan koma ti mangallilaw iti bagina. No adda kadakayo ti mangipagarup
iti bagina a masirib, babaen iti alagaden ti lubong, agbalin koma a maag
tapno agbalin a napaypayso a masirib. 19 Ta minamaag iti imatang ti Dios
ti ibilang ti lubong a kinasirib. Kas kuna ti Nasantoan a Surat, “Ipalab-og
ti Dios dagiti mamasirib iti kinasikapda.” 20 Kunana pay, “Ammo ti Apo
nga awan kaes-eskan ti panunot dagiti mamasirib.” 21 Ngarud, di koma
pagpasindayag ti tao ti kabaelanna nga aramiden. Kinapudnona, kukuayo
ti amin: 22 Ni Pablo, ni Apolos, ni Pedro, daytoy lubong, biag ken patay,
ti agdama ken ti masakbayan. Wen, kukuayo amin dagitoy. 23
Kukuanakayo ni Cristo, ket ni Cristo kukua ti Dios.
1 Corinto 4
1 Masapul nga ibilangdakami a kas adipen ni Cristo ken nadutokan nga
agaywan kadagiti palimed ti Dios. 2 Ngem masapul a napudno ti adipen iti
apona. 3 Awan aniamanna kaniak no ukomendak wenno mausigak iti
pangukoman ti tao. Kinapudnona, diak ukomen ti bagik. 4 Nadalus ti
konsensiak ngem saan a dayta ti mangipaneknek nga awan a pulos ti
basolko. Ti Apo ti mangukom kaniak. 5 Ngarud, saankay a mangukom
agingga iti dumteng ti naituding a tiempo. Wen, urayenyo ti yaay ti Apo ta
isunto ti mangilatak kadagiti palimed ken mangibutaktak kadagiti panggep
a naitalimeng iti puso ti tao. Ket awatento ti tunggal tao ti kaikarianna a
pammadayaw nga aggapu iti Dios. 6 Kakabsatko, para iti pagimbaganyo,
inusarko a pagarigan ti kasasaadmi ken ni Apolos tapno masursuroyo ti
kaipapanan daytoy a pagsasao, “Dikayo lumbes iti adda a naisurat.” Iti
ababa a pannao, tapno awan kadakayo ti mangitangsit iti maysa a tao ket
umsienna ti sabali. 7 Siasino ti namagbalin kadakayo a nangatngato ngem
dagiti dadduma? Saan kadi a ti Dios ti nangted iti amin nga adda
kadakayo? Ngarud, apay nga agpasindayagkayo a kasla ketdin saan a
sagut dagiti adda kadakayo? 8 Adda aminen a kasapulanyo?
Babaknangkayon? Nagbalinkayo kadin nga ari, idinto a dakami, saan?
Sapay koma ta pudno nga arikayon tapno makipagturaykami met
kadakayo. 9 Ta pagarupek a ti kababaan a saad ti inted ti Dios kadakami
nga apostoles. Mayarigkami kadagiti tattao a nakedngan a matay iti
imatang ti publiko, kas naisangsangayan a buyaen ti lubong dagiti
angheles ken dagiti tattao. 10 Gapu ken ni Cristo, maagkami. Ngem adu ti
ammoyo maipapan kenkuana. Nakapsutkami, ngem napigsakayo. Maum-
umsikami, ngem maitantan-okkayo! 11 Agpapan ita, kanayon nga awan
umanay a kanen ken inumenmi; rutayrutay dagiti pagan-anaymi;
makabkabilkami; agalla-allakami. 12 Igaedmi ti agtrabaho tapno
agbiagkami. No mailunodkami, mangbendisionkami ketdi. No
maidadaneskami, ibturanmi. 13 No padpadaksendakami dagiti tattao,
nasayaat ti saomi kadakuada. Maibilangkami a basura iti lubong. Agpapan
ita, mayarigkami iti rugit ti daga. 14 Saanko nga isurat daytoy kadakayo
tapno pabainankayo ngem bagbagaankayo a kas ay-ayatek nga annak. 15
Ta uray no adda sangapulo ribu a mangaywan iti biagyo ken ni Cristo,
maymaysa ti amayo. Ta iti panagbiagyo ken Cristo Jesus, nagbalinak nga
amayo babaen iti panangyegko kadakayo iti Naimbag a Damag. 16
Ngarud, ipakpakaasik kadakayo a tuladendak. 17 Daytoy ti gapuna nga
ibaonko dita ni Timoteo nga ay-ayatek ken napudno nga anakko iti Apo.
Ipalagipnanto kadakayo dagiti pagulidanan a sursurotek iti baro a biag ken
ni Cristo Jesus. Dagitoy met ti isursurok iti amin nga iglesia iti sadinoman
a lugar. 18 Timmangsiten ti sumagmamano kadakayo dita a kasla
saankayo a sarungkaranen. 19 Ngem no ipalubos ti Apo, umayak iti mabiit
ket siakto a mismo ti mangtakuat no ania ti kabaelan nga aramiden dagitoy
natangsit a tattao a ti laeng agsao ti paglainganda. 20 Ta ti Pagarian ti Dios
saan a maipapan iti panagsao no di ket pannakabalin. 21 Ania ti
kaykayatyo: Umayak kadakayo a nakaiggem iti saplit wenno napnoan iti
ayat ken kinaanus?
1 Corinto 5
1 Ita, maipadpadamag nga adda immoralidad iti gimongyo, maysa a kita ti
kinadakes a di aramiden uray pay dagiti pagano. Naibaga kaniak a
kakaiddaen ti maysa a lalaki ti agsiuman kenkuana. 2 Apay a
natangsitkayo pay laeng? Rebbengyo koma ketdi ti agladingit ket
laksidenyo dayta a tao iti grupoyo. 3-4 Iti nagan ni Apotayo a Jesus,
inukomkon dayta a lalaki a nakaaramid iti nakarimrimon a banag. Ta
nupay awanak dita, kasla addaak met laeng ta adda dita ti espirituk.
Ngarud, inton agtataripnongkayo, adda met ti espirituk iti ummongyo
babaen iti pannakabalin ni Apotayo a Jesus, 5 ket yawatyo dayta a lalaki
ken ni Satanas tapno madadael ti managbasol a katataona ket maisalakan ti
espirituna inton dumteng ti Aldaw ti Apo. 6 Saan a rumbeng a
pagtangsityo daytoy. Ammoyo daytoy a pagsasao, “Bassit la a lebadura ti
mamagbussog iti entero a masa.” 7 Masapul ngarud nga ikkatenyo daytoy
daan a lebadura ti basol tapno naan-anay ti kinadalusyo. Iti kasta,
mayarigkayto iti baro a masa nga awan lebadurana ta naidatonen ni Cristo
a korderotayo iti Paskua. 8 Ngarud, rambakantayo ti fiesta babaen iti
tinapay nga awan lebadurana, ti tinapay ti kinadalus ken kinapudno, saan
nga iti tinapay nga addaan iti lebadura ti basol ken kinadakes. 9 Insuratko
idi kadakayo a dikayo makipulpulapol kadagiti mannakikamalala. 10
Ngem saan a dagiti immoral a tattao ditoy lubong ti kayatko a sawen,
wenno dagiti naagum wenno dagiti mannanakaw wenno dagiti agrukbab
kadagiti didiosen, ta maliklikanyo dagitoy no pumanawkay a
mamimpinsan iti lubong. 11 Kayatko a sawen, dikayo makipulapol iti tao
nga ibilangna ti bagina a kabsat idinto nga immoral, naagum, agrukbab
kadagiti didiosen, mamadpadakes, mammartek wenno mannanakaw. Diyo
kapulapol wenno uray kalanglang la koma ti kasta a tao. 12-13 Ania
ngamin ti karbengak a mangukom kadagiti saantayo a kakadua? Ti Dios ti
mangukomto kadakuada. Saan aya a rumbeng a dakayo ti mangukom
kadagiti kakaduayo iti iglesia? Kas kuna ti Nasantoan a Surat,
“Pagtalawenyo ti dakes a tao iti grupoyo.”
1 Corinto 6
1 No adda panggapuan ti maysa kadakayo a mangidarum iti padana a
Kristiano, di ngata mabain a mangisaklang iti pangukoman dagiti saan a
mamati, a saan ketdi nga iti pangukoman dagiti tattao ti Dios? 2 Diyo aya
ammo a dagiti tattao ti Dios ti mangukomto iti lubong? Ket no dakayto ti
mangukom iti lubong, diyo kadi kabaelan nga ukomen dagiti babassit a
bambanag? 3 Diyo kadi ammo a datayto ti mangukom kadagiti angheles?
Anianto ketdin kadagiti bambanag a maipapan iti agdama a biag! 4
Ngarud, no tumaud dagiti kakasta a banag, idatagyo kadi kadagiti tattao
nga awan pannakaibiangda iti iglesia, ket ipalubosyo nga isuda ti
mangukom? 5 Nagawan ket a bainyon! Awan aya kadakayo ti masirib a
makarisut iti riri dagiti kakabsat? 6 Nasken kadi nga agdidinnarumkayo—
Kristiano kontra Kristiano—ket dagiti saan a mamati ti mangukom? 7
Maysa a banag ti ipamatmat ti panagdidinnarumyo: Ipakitana ti
pagkuranganyo. Saan kadi a nasaysayaat no maranggasan wenno
masaurkayo? 8 Ngem dakayo met laeng ti agririnnanggas ken agsisinnaur
ket iramanyo pay dagiti mismo a kakabsatyo! 9 Saanyo aya nga ammo a
dinto tagikuaen dagiti managdakdakes ti Pagarian ti Dios? Dikayo
paallilaw. Dagiti tattao nga immoral, dagiti agrukbab kadagiti didiosen,
dagiti mannakikamalala, dagiti aggartem iti padada a lalaki wenno padada
a babai 10 wenno dagiti agag-agaw, naagum, mammartek, mamadpadakes
wenno dagiti mannanakaw—awanto kadakuada ti makipagtagikua iti
Pagarian ti Dios. 11 Kasta ti sumagmamano kadakayo idi. Ngem
naugasankayon iti basol, naidatonkayon iti Dios, napalintegkayon iti
imatang ti Dios babaen iti nagan ni Apotayo a Jesu-Cristo ken babaen iti
Espiritu ti Diostayo. 12 Adda agkuna: “Maipalubos kaniak ti amin a
kayatko nga aramiden.” Wen, ngem dimo a pagimbagan ti amin a
pagayatam. Mabalinko a kuna: “Maipalubos kaniak ti aniaman a banag.
Nupay kasta, saanak a patagabu iti aniaman a banag.” 13 Kuna met ti
sabali: “Agpaay ti taraon iti tian, ket ti tian, para iti taraon.” Pudno dayta.
Ngem agpadpadadanto a gibusan ti Dios. Ta saan nga agpaay ti bagi iti
immoralidad, no di ket iti Apo. Ket ti Apo agpaay met iti bagi. 14
Pinagungar ti Dios ti Apo, ket pagungarennatayto met babaen iti
pannakabalinna. 15 Ammoyo kadi a pasetnakayo ti bagi ni Cristo?
Maisinak kadi ti maysa a paset ti bagi ni Cristo ket ikamangko iti bagi ti
balangkantis? Saan a mabalin! 16 No kaiddaen ti lalaki ti balangkantis a
babai, diyo kadi ammo a maymaysanto ti bagida? Nalawag ti nailanad iti
Nasantoan a Surat: “Maymaysanto ti bagi dagiti dua.” 17 Ngem ti
siasinoman a mangikamang iti bagina iti Apo, maymaysadanton iti
espiritu. 18 Adaywanyo ti immoralidad. Ta malaksid daytoy, uray ania ti
pagbasolan ti tao, adda iti ruar ti bagina. Ngem no makikamalala,
makabasol metten iti mismo a bagina. 19 Diyo kadi ammo a ti bagiyo ket
templo ti Espiritu Santo? Diyo kadi ammo nga agtaeng kadakayo daytoy
nga Espiritu nga inted ti Dios? Saanyo a kukua ti bagiyo, no di ket kukua
ti Dios. 20 Nangina ti inggatangna kadakayo. Ngarud, aramatenyo ti
bagiyo a pakaidayawan ti Dios.
1 Corinto 7
1 Ita, sungbatak dagiti saludsod iti suratyo: Nasayaat no saan a mangasawa
ti lalaki. 2 Ngem tapno maliklikan ti pannakikamalala, masapul nga adda
bukod nga asawa ti tunggal lalaki, ket kasta met ti tunggal babai. 3
Masapul nga annongen ti lalaki ti rebbengna iti asawana, ket kasta koma
met ti aramiden ti babai. Agpadada koma a mangted iti kasapulan ti
tunggal maysa. 4 Saan a ti babai ti mangituray iti bagina, no di ket ti
lalaki. Kasta met ti lalaki, saan nga isu ti mangituray iti bagina, no di ket ti
babai. 5 Dikay agpinnaidam, malaksid no pagtulaganyo nga agteppelkayo
pay laeng tapno maipamaysayo ti agkararag. Ngem kalpasanna,
agdennakayo manen a kas agassawa tapno dikayo matnag iti pannulisog ni
Satanas gapu iti kaawan ti panagteppelyo. 6 Kunak daytoy kadakayo a kas
pammalubos, saan a kas bilin. 7 Kinapudnona, kaykayatko koma nga
agbalin a kas kaniak ti amin a tattao. Ngem bigbigek met ketdi nga adda
naisangsangayan a sagut ti Dios iti tunggal maysa. Nagduduma a kita ti
parabur ti naited iti tunggal tao. 8 Daytoy met ti ibagak kadagiti awan
asawana ken kadagiti balo: Nasaysayaat no ituloyyo ti agbiag nga
agmaymaysa a kas kaniak. 9 Ngem no diyo magawidan ti riknayo,
mangasawakayo. Wen, naim-imbag ti mangasawa ngem ti sumged iti
derrep. 10 Kadagiti adda asawana, adda bilinko ngem saan a naggapu
kaniak no di iti Apo: Saan koma nga isina ti babai ti asawana. 11 Ngem no
sumina ti babai, masapul a saanen a makiasawa wenno agsubli iti
asawana. Saan koma met nga isina ti lalaki ti asawana. 12 Kadagiti
dadduma, kunak daytoy—siak ti agkuna, saan a ti Apo: No saan a mamati
ti asawa ti Kristiano a lalaki, ngem mayat nga agtultuloyda nga agtipon,
saan koma nga isina ti lalaki. 13 Ket no saan a mamati ti asawa ti
Kristiano a babai, ngem mayat nga agtultuloyda nga agtipon, saan koma
nga isina ti babai. 14 Ta naidaton iti Dios ti saan a mamati a lalaki gapu iti
pannakitiponna iti asawana. Kasta met a naidaton iti Dios ti saan a mamati
a babai gapu iti pannakitiponna iti asawana. No saan koma a kasta,
mayarig dagiti annakda nga ubbing kadagiti saan a mamati, ngem iti
kinapudnona, naidatonda iti Dios. 15 Nupay kasta, no tarigagayan ti saan a
mamati nga isina ti Kristiano nga asawana, bay-an a kasta ti aramidenna.
Iti kasta, siwayawaya ti Kristiano nga asawa, lalaki man wenno babai. Ta
inayabannakayo ti Dios nga agbiag a natalna. 16 Sika a Kristiano a babai,
ammom aya no sika ketdi ti pakaisalakanan ti asawam? Sika a Kristiano a
lalaki, ammom aya no sika ti pakaisalakanan ti asawam? 17 Malaksid
dayta, agtultuloy koma nga agbiag ti tunggal maysa segun ti intuding
kenkuana ti Apo, ken kas iti kasasaadna idi inayaban ti Dios. Isursurok
daytoy a paglintegan iti amin nga iglesia. 18 No nakugit ti lalaki idi
ayaban ti Dios, saanna koma nga ikkaten ti pakakitaan ti pannakakugitna.
No saan a nakugit idi ayaban ti Dios, saan koman nga agpakpakugit. 19
Awan aniamanna no nakugit ti lalaki wenno saan. Nasnasken ti
panagtungpal kadagiti bilin ti Dios. 20 Agtalinaed koma ti tunggal tao iti
kasasaadna idi maayaban. 21 Maysaka kadi a tagabu idi ayabannaka ti
Dios? Awan aniamanna, ngem no adda gundawaymo a mawayawayaan,
dimo palabasen dayta a gundaway. 22 Ta ti tagabu nga inayaban ti Apo,
isu ti siwawaya a tao ti Apo. Kasta met ti siwawaya a tao nga inayaban ni
Cristo, isu ti tagabuna. 23 Ginatangnakayo ti Apo iti nangina. Ngarud,
dikayo patagabu kadagiti tattao. 24 Kakabsatko, agtalinaed koma ti
tunggal maysa iti Dios a kas iti sigud a kasasaadna idi naayaban. 25 Ita, ti
saludsod maipapan iti awan asawana: Awan bilinko a naggapu iti Apo,
ngem ibagak ti kapanunotak a kas maikari a mapagtalkan gapu iti asi ti
Apo. 26 Gapu iti agdama a rigat, nasaysayaat no agtalinaed ti lalaki iti
kasasaadna. 27 Adda kadi asawam? No adda, dimo isinsina. Awan kadi
asawam? No awan, dika sumapsapul. 28 Nupay kasta, saanka a makabasol
no mangasawaka. Saan met a makabasol ti balasang no makiasawa. Ngem
kayatko a liklikanyo dagiti pakabuongan-ti-ulo a dumteng iti inaldaw
kadagiti naasawaan. 29 Kakabsatko, daytoy ti kayatko a sawen: Bassiten ti
natda iti naikeddeng a tiempo. Manipud ita, agbiag koma dagiti naasawaan
a lalaki a kasla awananda iti asawa; 30 dagiti agsangsangit a kasla dida
agsangsangit; dagiti agragragsak a kasla dida agragragsak; dagiti
aggatgatang a kasla dida kukua ti ginatangda; 31 dagiti agaramat kadagiti
nailubongan a banag a kasla saan a dagitoy laeng ti ipangpangrunada. Ta
saanen nga agbayag ti agdama a sasaaden daytoy lubong. 32 Kayatko nga
awan koma ti pakadanaganyo. Asikasoen ti awan asawana dagiti banag
maipapan iti Apo gapu ta kayatna a maragsakan ti Apo. 33 Ngem
asikasoen ti adda asawana a lalaki dagiti banag iti lubong gapu ta kayatna
a maay-ayo kenkuana ti asawana. 34 Iti kasta, mabingay ti panunotna.
Asikasoen met ti awan asawana a babai wenno ti balasang dagiti aramid ti
Apo gapu ta kayatna nga idaton ti sibubukel a kinataona iti Apo. Ngem no
adda asawanan, tamingenna dagiti bambanag ditoy lubong gapu ta kayatna
a paragsaken ti asawana. 35 Ibagbagak daytoy ta kayatkayo a tulongan.
Awan ti rantak a mangiparit iti panangasawayo. Kayatko ketdi nga
aramidenyo ti nainkalintegan ken rumbeng, ken ipamaysayo ti agserbi iti
Apo. 36 No adda lalaki a mangipagarup a saan a maitutop ti marikriknana
iti nobiana ket saannan a magawidan ti riknana kenkuana, ket
mapanunotna a nasaysayaat nga agkallaysadan, surotenna koma ti
pagayatanna. Saanna a pakabasolan daytoy. 37 Ngem no saan a mapilpilit
ti lalaki iti panangikeddengna a di mangasawa, no naan-anay ti
panangiturayna iti panunotna ket ikeddengna ti aramidenna, nasaysayaat a
dina asawaen ti babai. 38 Ngarud, nasayaat no mangasawa ti tao, ngem
nasaysayaat pay no saan a mangasawa. 39 Awan ti wayawaya ti babai nga
adda asawana no adda pay a biag ti asawana. Ngem no natayen ti asawana,
adda wayawayana a makikallaysa iti lalaki a kayatna. Ngem masapul a
nakristianoan ti pannakiasawana. 40 Nupay kasta, nagasgasat no
agtalinaed a balo. Daytoy ti kapanunotak, ket patiek nga adda kaniak ti
Espiritu ti Dios.
1 Corinto 8
1 Ita, saritaek ti maipapan iti taraon a naidaton kadagiti didiosen. Agpayso
ti makunkuna nga “adda amin ammotayo.” Nupay kasta, ti ammo
mamagtangsit. Ngem ti ayat, mangparang-ay. 2 Ti mangipagarup nga adda
ammona, awan pay ti ammona a kas iti rumbeng a pannakaammona. 3
Ngem ti agayat iti Dios, ammo ti Dios. 4 Ngarud, no maipapan iti
pannangan iti taraon a naidaton kadagiti didiosen, ammotayo a ti didiosen
awan ti napudpudno nga iladawanna; ammotayo a maymaysa laeng ti
Dios. 5 Ta uray no adda dagiti makunkuna a “dios,” idiay langit wenno
ditoy daga—ket pudno nga adu ti “dios” ken adu ti “appo”— 6 ngem
kadatayo, maymaysa laeng ti Dios. Isu ti Ama a namarsua iti amin a banag
ket gapu kenkuana, agbiagtayo. Maymaysa met ti Apo nga isu ni Jesu-
Cristo. Naparsua ti amin a banag babaen kenkuana ket agbiagtayo gapu
kenkuana. 7 Ngem saan nga ammo ti amin a tao daytoy a kinapudno.
Adda dagiti tattao a nairuam nga agrukbab kadagiti didiosen, ket agpapan
ita, no kanenda ti kasta a taraon, ipagarupda a ti kinnanda ket taraon dagiti
didiosen. Gapu ta nakapsut ti konsensiada, kunada a matulawanda iti dayta
a taraon. 8 Ngem saan a pasayaaten ti taraon ti pannakilangentayo iti Dios.
Awan mapukawtayo no ditayo mangan ket awan met magun-odtayo no
mangantayo. 9 Nupay kasta, agannadkayo amangan no daytoy a
wayawayayo ti pakairuboan kadagiti nakapsut ti pammatina. 10 Kas
pagarigan, no sika nga adda “ammona,” mangmanganka iti uneg ti templo
dagiti didiosen. No makitanaka ti maysa a tao a nakapsut ti konsensiana,
saan kadi a mapatured a mangan met iti taraon a naidaton kadagiti
didiosen? 11 Gapu iti “pannakaammom,” madadaelto ti kabsatmo a
nakapsut ti konsensiana, ti kabsatmo a nakaigapuan ti pannakatay ni
Cristo! 12 Iti kasta, makabasolka ken ni Cristo ta nagbasolka kadagiti
kakabsatmo ket sinugatmo ti nakapsut a konsensiada. 13 Ngarud, no ti
taraon ti pakaigapuan ti panagbasol ti kabsatko, pulos a diak agsidan iti
karne tapno saan a matnag iti basol.
1 Corinto 9
1 Saanak kadi a siwayawaya? Saanak kadi a maysa nga apostol? Saanko
kadi a nakita ni Jesus nga Apotayo? Saan kadi a dakayo ti bunga ti
trabahok iti Apo? 2 Uray no di bigbigen dagiti dadduma a maysaak nga
apostol, awan duadua a dakayo, bigbigendak, ta ti kaaddayo iti sidong ti
Apo ipaneknekna ti kinaapostolko. 3 Daytoy ti sungbatko kadagiti
mangbabalaw kaniak: 4 Awan kadi ti kalintegak a maikkan iti taraon ken
inumen a kas supapak iti trabahok? 5 Awan kadi ti kalintegak a
mangikuyog iti asawa iti panagbiahek, kas ar-aramiden dagiti dadduma
nga apostoles, dagiti kakabsat ti Apo ken ni Pedro? 6 Wenno dakami kadi
laeng ken ni Bernabe ti mangged iti pagbiagmi? 7 Adda aya soldado a
gastoenna ti bukodna a kuarta iti panagserbina iti armada? Adda aya
mannalon a di mangan iti bunga ti immulana iti kaubasanna? Adda aya
agpaspastor a di uminum iti gatas ti karnerona? 8 Saanen a nasken nga
alaek dagitoy inaldaw a pangarigan ta kasta met ti kuna ti Linteg. 9
Mabasatayo daytoy iti Linteg ni Moises, “Dimo busalan ti baka nga agir-
irik.” Saan a dagiti baka ti pakaseknan ti Dios. 10 Datayo ti kayatna a
sawen idi insuratna daytoy. Wen, inturongna daytoy kadatayo. Agtrabaho
ti agarado ken ti agapit ta adda namnamaenda a bingayda. 11 Naimulamin
kadakayo ti naespirituan a bukel. Dakkel aya a banag no agapitkami
kadakayo kadagiti namaterialan a gunggona? 12 No adda kalintegan dagiti
dadduma a matulongan, saan kadi a dakdakkel ti kalinteganmi? Ngem
dimi inusar daytoy a kalintegan. Inibturanmi ketdi ti amin tapno awan ti
uray ania a lapped iti pannakaiwaragawag ti Naimbag a Damag maipapan
ken ni Cristo. 13 Diyo kadi ammo nga agtaud iti Templo ti taraon dagiti
agserserbi iti Templo ket dagiti agserserbi iti altar, makibingayda met
kadagiti daton? 14 Kasta met nga imbilin ti Apo a ti pagbiag dagiti
mangikasaba iti ebanghelio agtaud iti daytoy a trabaho. 15 Ngem diak
inaramat ti uray ania kadagitoy a kalintegan. Diak met nagsurat tapno
maited kaniak dagitoy. Naim-imbag pay a matayak ngem ti adda
mangikkat iti panggapuak nga agpasindayag! 16 Uray no ikaskasabak ti
ebanghelio, awan ti kalintegak nga agparammag. Naipabaklay kaniak
daytoy nga aramid, ket asiak pay no diak ikasaba ti ebanghelio! 17 No
bukodko a nakem ti panangaramidko iti trabahok, namnamaek a
matangdananak. Ngem aramidek a kas pagrebbengak agsipud ta inted
kaniak ti Dios daytoy a trabaho. 18 Ania ngarud ti tangdanko? Isu daytoy:
ti gundawayko a mangikasaba iti Naimbag a Damag a diak patangdanan.
Iti sabali a pannao, diak kalikaguman ti kalintegak a kas agserserbi iti
ebanghelio. 19 Siwayawayaak. Saanak a tagabu ti uray siasinoman. Ngem
patagabuak iti amin a tao tapno ad-adu pay ti maawisko. 20 Iti
panagtrabahok kadagiti Judio, agbiagak a kas Judio tapno maawisko ida.
Ket uray no dinak iturayan ti Linteg ni Moises, agbiagak a kasla
paiturayan iti daytoy a linteg no agtrabahoak iti arpad dagiti tattao nga
adda iti babaen daytoy a linteg tapno maawisko ida. 21 Kasta met a no
addaak kadagiti Hentil, agbiagak a kasla Hentil, iti laksid ti Linteg dagiti
Judio, tapno maawisko ida. Saanna a kayat a sawen a diak agtungpal iti
linteg ti Dios. Kinapudnona, addaak iti babaen ti linteg ni Cristo. 22 Iti
sidong dagiti nakapuy ti pammatina, agbalinak a nakapuy a kas kadakuada
tapno maawisko ida. Iti kasta, iti aniaman a pamuspusan, agbalinak a kas
kadagiti amin a tattao iti amin a kasasaadda tapno adda maisalakanko
kadakuada. 23 Aramidek amin dagitoy gapu iti ebanghelio tapno
mairamanak iti paraburna. 24 Ammoyo nga agtaray dagiti amin a
makilumba ngem maymaysa laeng ti mangabak. Agtaraykayo ngarud
tapno magun-odyo ti gunggona. 25 Nainget ti disiplina ti tunggal
makisalisal a mangsansanay iti bagina. Aramidenna daytoy tapno umawat
iti korona a di agpaut. Ngem agtaraytayo tapno magun-odtayo ti korona
nga agpaut iti agnanayon. 26 Isut’ gapuna nga agtarayak a sipipinget
agingga iti pagpatinggaan ti lumba. Saanak a nakibokboksing a kasla
dumandanog iti angin. 27 Iruamko ti bagik iti danog ket iturayak a naan-
anay tapno diak mapagtalaw kalpasan ti panangawisko kadagiti dadduma
a makisalisal.
1 Corinto 10
1 Kakabsatko, kayatko a lagipenyo ti napasamak kadagiti kapuonantayo a
simmurot ken ni Moises. Addada amin idi iti salinong ti ulep. Awan ti
napagpagtengda iti ilalasatda iti Nalabaga a Baybay. 2 Iti salinong ti ulep
ken iti baybay, nabuniaganda amin a kas pasurot ni Moises. 3 Nanganda
amin iti maymaysa a naespirituan a tinapay. 4 Imminumda amin iti
maymaysa a naespirituan a danum. Imminumda manipud iti naespirituan a
bato a kimmuykuyog kadakuada. Ni Cristo dayta a bato. 5 Ngem uray no
kasta, saan a naay-ayo ti Dios iti kaaduan kadakuada, ket naiwarawara
dagiti bangkayda iti let-ang. 6 Agbalin koma dagitoy pagwadan a
pakaballaagantayo tapno ditay aggartem kadagiti dakes a banag, a kas iti
inaramidda. 7 Ditay koma agrukbab kadagiti didiosen, a kas iti inaramid ti
sumagmamano kadakuada. Kas kuna ti Nasantoan a Surat: “Nagtugaw
dagiti tattao a mangan ken uminum; timmakderda tapno agsasalada.” 8
Masapul a ditay agaramid iti immoralidad, a kas iti inaramid ti
sumagmamano kadakuada—ket iti maysa nga aldaw, natay ti 23,000
kadakuada. 9 Ditay suoten ti Apo, kas iti inaramid ti sumagmamano
kadakuada—ket pinatay ida dagiti uleg. 10 Ditayo met koma agreklamo a
kas iti inaramid ti sumagmamano kadakuada—ket dinadael ida ti Anghel
ni Patay. 11 Napasamak dagitoy kadakuada a pagulidanan dagiti dadduma,
ket naisuratda a kas pakaballaagantayo. Ta dandanin ti kanibusanan ti
tiempo. 12 Siasinoman a mangipagarup a natalged ti panagtakderna,
agannad koma amangan no matnag. 13 Tunggal sulisog nga umay
kadakayo, gagangay a dumteng iti tao. Ngem tungpalen ti Dios ti karina;
dina ipalubos a masulisogkayo iti nalabes a diyo kabaelan a sarangten. No
masulisogkayo, ikkannakayo iti pigsa a mangibtur, ket iti kasta,
makalisikayo. 14 Isut’ gapuna a dikay agrukbab kadagiti didiosen, patgek
a gagayyem. 15 Agsaoak kadakayo a kas nanakman a tattao. Dakayo ti
mangeddeng no pudno wenno saan ti ibagbagak. 16 No uminumtayo iti
kopa ti bendision a nagyamanantayo iti Dios, ditayo kadi mairaman iti
dara ni Cristo? Ket ti tinapay a pisientayo, ditayo kadi mairaman met iti
bagi ni Cristo? 17 Gapu ta maymaysa a tinapay ti pagbibingayantayo,
maymaysatayo a bagi uray no adutayo. 18 Kitaenyo ti ugali dagiti
nagkauna a Hebreo; dagiti mangan iti naidaton a taraon, makipagserbida
met iti altar. 19 Ania ti kayatko a sawen? Adda aya kaipapanan ti didiosen
wenno adda kadi pateg ti kanen a maidaton iti didiosen? 20 Awan! Daytoy
ti kayatko a sawen: Saan nga iti Dios ti pakaidatonan dagiti taraon iti altar
dagiti pagano, no di ket kadagiti demonio. Ket diak kayat a
makikaduakayo kadagiti demonio. 21 Diyo mabalin nga inuman ti kopa ti
Apo ket kalpasanna, inumanyo met ti kopa dagiti demonio. Diyo mabalin
ti sumango iti panganan ti Apo ket kalpasanna, sumangokayo iti lamisaan
dagiti demonio. 22 Wenno, pagimonentayo kadi ti Apo? Napigpigsatayo
kadi ngem isu? 23 “Siwayawayakami nga agaramid iti kaykayatmi,”
kunada. Wen, ngem saan nga amin a banag ket nasayaat.
“Siwayawayakami nga agaramid iti aniaman a banag”—ngem saan nga
amin a banag ket makatulong. 24 Masapul a biroken ti tunggal maysa ti
pagimbagan ti sabali, saan la a ti bukodna a pagsayaatan. 25
Siwayawayakayo nga agsida iti aniaman a magatang iti paglakoan iti
karne a dikay agsaludsod gapu ta mariribuk ti konsensiayo. 26 Kas kuna ti
Nasantoan a Surat: “Ti Apo ti akinkukua iti daga ken amin a linaonna.” 27
No awisennaka a makipangan ti maysa a pagano ket mapanka, manganka
iti aniaman a maipasango kenka a dika agsaludsod gapu ta mariribuk ti
konsensiam. 28 Ngem no adda agkuna kenka, “Naidaton daytoy a taraon
kadagiti didiosen,” saanmo a kanen gapu iti nangibaga kenka ken gapu ta
maburibor ti konsensiam— 29 kayatna a sawen, saan a ti konsensiam,
ngem ti konsensiana. Adda agsaludsod, “Apay a makedngan ti wayawayak
gapu iti konsensia ti sabali a tao? 30 No agyamanak iti Dios gapu iti
taraonko, apay a mababalawak?” 31 Daytoy ti sungbatko: No adda
aniaman nga aramidenyo, mangan man wenno uminumkayo, aramidenyo
a pakaidayawan ti Dios. 32 Dikay agaramid iti aniaman a pakaigapuan nga
agbasol dagiti Judio wenno Hentil wenno ti iglesia ti Dios. 33 Siak a
maysa, ikagumaak a pagustoan ti amin a tattao iti aniaman nga aramidek.
Saan a ti pagsayaatak ti pampanunotek, no di ket ti pagimbagan ti amin
tapno maisalakanda.
1 Corinto 11
1 Tuladendak ngarud a kas iti panangtuladko ken ni Cristo. 2
Dayawenkayo gapu ta kanayon a malaglagipdak ken sursurotenyo dagiti
pannursuro nga inyawatko kadakayo. 3 Ngem kayatko a maawatanyo a ni
Cristo ti pannakaulo ti tunggal tao. Ti lalaki ti pannakaulo ti babai, ket ti
Dios ti pannakaulo ni Cristo. 4 Isut’ gapuna a no nakadalungdong ti lalaki
no agkararag wenno mangasaba, ibabainna ni Cristo. 5 Ti babai a saan nga
agdalungdong no agkararag wenno mangasaba, ibabainna ti asawana.
Awan dumana iti babai a nakuskosan ti ulona. 6 Kinapudnona, no saan
nga agdalungdong ti babai, nasaysayaat laengen no agpakuskos. Ngem
gapu ta nakababain nga agpakuskos ti babai, agdalungdong ngarud. 7 Saan
a rumbeng nga agdalungdong ti lalaki, ta isu ti pakakitaan iti ladawan ken
dayag ti Dios. Ti babai ti mangiladawan iti dayag ti lalaki. 8 Ta saan a
nagtaud ti lalaki iti babai, no di ket ti babai ti nagtaud iti lalaki. 9 Ken saan
a naparsua ti lalaki gapu iti babai, no di ket naparsua ti babai gapu iti
lalaki. 10 Ngarud, gapu kadagiti angheles, agdalungdong koma ti babai
tapno maipakita nga iturayan ti lalaki. 11 Nupay kasta, iti panagbiagtayo
iti Apo, ti babai napateg iti lalaki ket ti lalaki napateg iti babai. 12 Ta
idinto a nagtaud ti babai iti lalaki, mayanak met ti lalaki iti babai; ngem
agtaud amin a banag iti Dios. 13 Dakayo ti mangeddeng: Rumbeng kadi
nga awan dalungdong ti babai no agkararag iti Dios iti publiko? 14 Saan
kadi nga isuro ti nakaisigudan nga ugali a naalas nga atiddog ti buok ti
lalaki 15 ngem napintas a banag iti babai? Naited kenkuana ti atiddog a
buok a pannakadalungdongna. 16 Ngem no adda sumuppiat iti daytoy,
ibagak kadakayo nga awan kasta nga ugalitayo, uray pay kadagiti iglesia ti
Dios. 17 Ngem iti panangibagak kadakayo kadagitoy sumaganad,
saankayo a dayawen. Awan ngamin ti pagimbagan nga ited ti
panaggigimongyo, no di ket pagdaksan. 18 Umuna, naipadamag kaniak a
mabingaybingaykayo kano no aggigimongkayo, ket mamatiak bassit iti
daytoy. ( 19 Nasken a masinasinakayo tapno maiparangarang dagiti pudno
a mapagtalkan.) 20 Iti kastoy a panagtataripnongyo, saanen a ti Pangrabii
ti Apo ti kanenyo. 21 Ta no mangankayo, agiinnunakayo a mangan iti
bukodyo a pangrabii. Iti kasta, adda mabisinan, adda pay mabartek. 22
Apay, awan kadi ti balayyo a panganan ken paginumanyo? Wenno
laisenyo kadi ti iglesia ti Dios ket ibabainyo dagiti napanglaw? Ania ti
namnamaenyo a sawek kadakayo maipapan iti daytoy? Dayawenkayo?
Saan a mabalin! 23 Ta inawatko iti Apo ti pannursuro nga inyawatko met
kadakayo: Iti rabii a pannakaliput ni Apo Jesus, innalana ti tinapay. 24
Kalpasan ti panagyamanna iti Dios, pinispisina ti tinapay ket kinunana,
“Daytoy ti bagik nga agpaay kadakayo. Aramidenyo daytoy a
panglaglagipyo kaniak.” 25 Kasta met a kalpasan ti pangrabii, innala ni
Jesus ti kopa ket kinunana, “Daytoy ti kopa ti baro a tulag a napatalgedan
babaen iti darak. Tunggal uminumkayo iti daytoy, aramidenyo a panglagip
kaniak.” 26 Kaipapananna daytoy a tunggal mangankayo iti daytoy a
tinapay ken uminumkayo iti daytoy a kopa, ipakaammoyo ti ipapatay ti
Apo agingga iti panagsublina. 27 Isut’ gapuna a ti siasinoman a mangan iti
tinapay wenno uminum iti kopa ti Apo iti wagas a nakababain,
makabasolto iti bagi ken dara ti Apo. 28 Ngarud, masapul nga umuna nga
usigen ti tunggal tao ti bagina sakbay a mangan iti tinapay ken inumanna ti
kopa. 29 Ta ti siasinoman a mangan iti tinapay ken uminum iti kopa a dina
ammoen ti kaipapanan ti bagi ti Apo, yegna ti pannakaukom iti bagina. 30
Daytoy ti gapuna nga adu kadakayo ti nakapsut ken masakit ket adun ti
natay. 31 No usigentayo koma nga umuna ti bagitayo, dinatay ukomen ti
Dios. 32 Ngem ukomen ken dusaennatayo ti Apo tapno ditayo mairaman
iti pannakadusa ti lubong. 33 Ngarud, kakabsatko, agiinnuraykayo no
aguummongkayo a mangan iti Pangrabii ti Apo. 34 Ket no adda mabisin
kadakayo, mangan idiay balayna tapno dikayto maukom inton
agtataripnongkayo. No maipapan kadagiti dadduma a parikut, risutekto ida
inton umayak.
1 Corinto 12
1 Ita, kakabsatko, kayatko ti agsao maipapan iti insuratyo a sagsagut nga
aggapu iti Espiritu Santo. Kayatko a maammoanyo ti pudno. 2 Ammoyo
nga idi paganokayo pay laeng, naisungsongkayo nga agrukbab kadagiti
didiosen. Awan biagda dagitoy a didiosen a kanayon a nangyaw-awan
kadakayo. 3 Kayatko a maammoanyo a ti tao nga idalan ti Espiritu ti Dios,
dina mabalin a kuna, “Mailunod ni Jesus!” Awan ti makabalin nga agsao,
“Ni Jesus ket Apo,” malaksid no idalan ti Espiritu Santo. 4 Nadumaduma
a kita dagiti naespirituan a sagut, ngem isu met la nga Espiritu ti mangted
kadagitoy. 5 Adu a kita ti panagserbi, ngem isu met la nga Apo ti
pagserbian. 6 Nadumaduma ti kabaelan nga agserbi, ngem isu met la a
Dios ti mangted iti kabaelan ti tunggal maysa. 7 Maipakita a pagimbagan
ti amin ti kaadda ti Espiritu iti tunggal maysa. 8 Iti maysa a tao, ited ti
Espiritu ti nainsiriban a panagsao; iti sabali, ti pannakaawat iti mensahe. 9
Ti Espiritu a mangted iti pammati iti maysa a tao, isu met laeng ti mangted
iti kabaelan a mangpaimbag iti masakit. 10 Babaen iti Espiritu, maikkan ti
maysa a tao iti kabaelan nga agaramid iti milagro. Iti sabali, ti kinalaing a
mangiwaragawag iti mensahe ti Dios. Ket iti sabali pay, ti kabaelan a
mangigiddiat no ania dagiti sagut nga aggapu iti Espiritu ken dagiti saan.
Itedna iti maysa a tao ti kabaelan nga agsao kadagiti datdatlag a pagsasao.
Iti sabali, ti kabaelan a mangipatarus iti naisao. 11 Ngem maymaysa nga
Espiritu ti mangar-aramid amin kadagitoy; kas pagayatanna, nadumaduma
a sagut ti itedna kadagiti tattao. 12 Mayarig ni Cristo iti maysa a bagi nga
adu ti pasetna. Maysa latta a bagi uray no buklen ti nadumaduma a paset.
13 Kasta met kadatayo amin—Judio man wenno Hentil, tagabu man
wenno siwawayawaya—nabuniagantayo a naikamang iti maymaysa a bagi
babaen iti maymaysa nga Espiritu nga isu met laeng ti naited nga
inumentayo. 14 Ta saan la a maymaysa no di ket adu ti paset ti bagi. 15
No kuna ti saka, “Saanak a parte ti bagi, ta saanak met nga ima,” dina
kayat a sawen a saanen a paset ti bagi. 16 No kuna ti lapayag, “Saanak a
parte ti bagi, ta saanak met a mata,” dina kayat a sawen a saanen a paset ti
bagi. 17 No mata laeng ti mangbukel iti entero a bagi, kasano a
makangngeg? No lapayag laeng, kasano a makaangot? 18 Ngem iti
kinaagpaysona, inurnos ti Dios dagiti amin a parte ti bagi, segun ti
nagayatanna. 19 No maymaysa laeng a kita ti amin a paset, kasano nga
adda bagi? 20 Kinapudnona, adu dagiti paset ngem maymaysa a bagi. 21
Ngarud, di mabalin a kuna ti mata iti ima, “Saanka a masapul!” Wenno ti
ulo kadagiti saka, “Saankayo a masapul!” 22 Saan koma a kasta! Awan ti
maaramidtayo no awan dagiti paset a kasla nakapkapsut. 23 Ad-adda ketdi
a taripatoen dagiti paset nga ipagaruptayo nga awan serserbina.
Ipangpangrunatayo met a taripatoen dagiti naalas a paset, 24
panangtaripato a di masapul dagiti napimpintas a paset. Ti Dios a mismo ti
nangbukel iti bagi tapno maikkan iti dakdakkel a pammadayaw dagiti
nanumo a paset. 25 Iti kasta, awan panagsisina iti bagi ngem agsisinnakit
ketdi dagiti amin a paset. 26 No agsagaba ti maysa a paset, makipagsagaba
met dagiti dadduma. No maidayaw ti maysa, makipagragsak met dagiti
dadduma. 27 Ngarud, baginakayo ni Cristo ket kamengna ti tunggal maysa
kadakayo. 28 Iti iglesia, insaad ti Dios ti tunggal maysa iti lugarna:
umuna, dagiti apostoles; maikadua, dagiti profeta; maikatlo, dagiti
mamaestro; sumarsaruno, dagiti agaramid iti milagro sa dagiti naikkan iti
pannakabalin a mangpaimbag wenno tumulong kadagiti sabali wenno
mangidalan kadakuada wenno agsao iti datdatlag a pagsasao. 29 Saanda
nga apostoles amin wenno profeta wenno maestro. Saan nga amin ket
addaan iti pannakabalin nga agaramid iti milagro 30 wenno mangpaimbag
iti masakit wenno makapagsao iti datdatlag a pagsasao wenno
makailawlawag iti kaipapanan dagiti naisao. 31 Ngarud, tarigagayanyo
koma dagiti nasaysayaat a sagut. Nupay kasta, ipakitak kadakayo ti
nasaysayaat pay a dalan.
1 Corinto 13
1 Uray no makasaoak kadagiti pagsasao dagiti tattao wenno dagiti
angheles, ngem no awan ayatko, awan serserbi ti panagsaritak ket awan
dumak iti makatitileng nga aweng ti gansa wenno naringgor nga uni ti
piangpiang. 2 Uray no nalaingak a mangasaba, uray no maawatak amin a
palimed, uray no napigsa ti pammatik tapno mayalisko dagiti bambantay,
ngem no awan ayatko, awan serserbik. 3 Uray no ipadawatko ti amin nga
adda kaniak, ken uray pay itedko ti bagik tapno mapuoran, ngem no awan
met ayat kaniak, awan magunggonak. 4 Ti ayat naanus ken naasi. Saan a
naimon wenno napasindayag wenno natangsit. 5 Saan a naalas ti
kababalinna wenno naimut wenno nalaka nga agpungtot. Awan im-
impenna a sakit ti nakem. 6 Saanna a pagragsakan ti dakes. Pagragsakanna
ketdi ti kinapudno. 7 Ti ayat ituredna amin a banag, mamati iti amin,
mangnamnama iti amin, ibturanna amin. 8 Ti ayat agpaut nga agnanayon.
Adda dagiti naipaltiing a kaskasaba, ngem saanda nga agpaut. Adda sagut
a mangted iti kabaelan nga agsao iti sabali a pagsasao, ngem aggibus.
Adda pannakaammo, ngem agpatingganto. 9 Ta saan pay a naan-anay ti
ammotayo, kasta met dagiti naipaltiing a kaskasaba. 10 Ngem inton
dumteng ti naan-anay a banag, agpukawton ti adda pagkuranganna. 11 Idi
ubingak, inuubing ti panagsaok, ti panagriknak ken ti panagpanunotko. Ita
ta nataenganakon, inwaksikon dagiti inuubing nga ugalik. 12 Ti
makitatayo ita, kasla nakudrep a ladawan iti sarming, ngem makitatayton
iti rupanrupa. Adda pagkurangan ti ammok ita, ngem kalpasanna, naan-
anayton a kas iti pannakaammo ti Dios kaniak. 13 Kabayatanna, dagitoy
tallo ti agtalinaed: pammati, namnama, ayat; ngem ti kangrunaan
kadagitoy, isu ti ayat.
1 Corinto 14
1 Ti ayat ngarud ti ipangrunayo a gun-oden. Tarigagayanyo dagiti
naespirituan a sagut, nangruna ti saguday a mangasaba. 2 Ti agsao iti
sabali a pagsasao, saan a dagiti tattao ti kasaona no di ket ti Dios agsipud
ta awan makaawat kenkuana. Ar-aramatenna ti pannakabalin ti Espiritu
nga agsao maipapan kadagiti bambanag a narigat a maawatan. 3 Ngem ti
mangipakaammo iti mensahe ti Dios, kasaona dagiti tattao ket tulongan,
bagbagaan ken liwliwaenna ida. 4 Ti tao nga agsao iti sabali a pagsasao, ti
la bagina ti tulonganna. Ngem ti agsao iti mensahe ti Dios, tulonganna ti
entero nga iglesia. 5 Kayatko a makasaokayo amin iti karkarna a pagsasao,
ngem kaykayatko a maaddaankayo iti pannakabalin a mangipakaammo iti
mensahe ti Dios. Ad-adda a makatulong ti tao nga agsao iti mensahe ti
Dios ngem ti agsao iti karkarna a pagsasao—malaksid no adda naitallaong
a makailawlawag iti kayatna a sawen tapno matulongan ti entero nga
iglesia. 6 Kas pangarigan no umayak kadakayo, kakabsatko, ania ti
pagimbagan a maitedko kadakayo no agsaoak iti sabali a pagsasao? Awan!
Wen, awan, malaksid no ipakaammok kadakayo ti maysa a mensahe nga
impaltiing ti Dios wenno adda ibagak a sirmata wenno naipaltiing a
kaskasaba wenno pannursuro. 7 Uray dagiti awan biagna a pagtokaran, a
kas iti fluta ken iti arpa, kasano nga adda makaammo iti matoktokar a
musika no di nalawag ti pannakatokarna? 8 No di nalawag ti
pannakapuyot ti trumpeta, siasino ti agsagana a makigubat? 9 Kasta met
kadakayo, kasano nga adda makaawat iti sasawenyo no saan a matarusan
ti sarsaritaenyo iti karkarna a pagsasao? Agpukaw a kas asuk dagiti
balikasyo. 10 Agduduma dagiti pagsasao iti lubong, ngem adda
kaipapanan ti tunggal maysa. 11 Ngem no diak ammo ti pagsasao a maar-
aramat, ganggannaet kaniak ti agsasao ken ganggannaetak met kenkuana.
12 Gapu ta aggagarkayo a maaddaan kadagiti sagut ti Espiritu,
ipangpangrunayo ngarud nga aramaten dagiti sagut a makatulong iti
panagdur-as ti iglesia. 13 Ngarud, ti tao nga agsao iti karkarna a pagsasao,
nasken nga agdawat iti pannakabalin a mangilawlawag iti kayatna a
sawen. 14 Ta no agkararagak iti sabali a pagsasao, pudno nga agkararag
met ti espirituk, ngem saan a maitunos ti panunotko. 15 Ania ngarud ti
aramidek? Agkararagak a buyogan ti espirituk ken ti panunotko.
Agkantaak a danggayan ti espirituk ken ti panunotko. 16 No agyamanka iti
Dios babaen iti espiritu laeng, kasano a sumungbat iti “Amen” ti
kadawyan a tao a makigimgimong kadakayo iti kararag ti panagyaman no
dina maawatan ti sasawem? 17 Uray no napintas ti kararagmo nga
agyaman iti Dios, pulos a saan a matulongan dayta a tao. 18 Agyamanak
iti Dios ta ad-adda a naparaburanak iti pannakabalin nga agsao kadagiti
karkarna a pagsasao ngem ti uray siasino kadakayo. 19 Ngem iti iglesia,
kaykayatko ti agsao iti lima a balikas a maawatan tapno masursuroan
dagiti karkarna, ngem iti agsao iti rinibribu a balikas iti sabali a pagsasao.
20 Saan koma nga inuubing ti panagpampanunotyo, kakabsatko.
Agbalinkayo laeng nga ubbing nga awan ammona no maipapan iti
kinadakes, ngem nataengan koma ti panagpampanunotyo. 21 Nailanad
daytoy iti Nasantoan a Surat: “Kasaokto dagitoy a tattaok, kuna ti Apo,
babaen kadagiti tattao a sabali ti pagsasaona, Ken babaen kadagiti bibig
dagiti ganggannaet. Ngem uray no kasta, saandakto nga ipangag.” 22
Ngarud, ti panagaramat iti karkarna a pagsasao, saan a pagilasinan
kadagiti mamati, no di ket kadagiti saan a mamati. Ti pannakabalin a
mangipakaammo iti mensahe ti Dios, pagilasinan kadagiti mamati, saan a
kadagiti di mamati. 23 No ngarud aggigimong ti entero nga iglesia ket
agsao amin iti karkarna a pagsasao, ipagarup dagiti awan pammatina a
makigimong nga agmauyongkayo. 24 Ngem no ti mensahe ti Dios ti
sarsaritaen ti amin, ket maitallaong ti awan pammatina, maallukoyto nga
isu ket maysa a managbasol. Maukomto babaen kadagiti amin a
mangngegna. 25 Maiparangarangto dagiti palimed ti pusona ket agtamedto
nga agdaydayaw iti Dios a kunana, “Pudno nga adda kadakayo ti Dios!”
26 Ania ti kayatko a sawen, kakabsatko? No aggigimongkayo, adda koma
ited ti tunggal maysa: himno, pannursuro, paltiing ti Dios, mensahe iti
sabali a pagsasao wenno panangilawlawag iti naisao. Masapul a maaramid
amin dagitoy a pangtulong iti iglesia. 27 No adda agsao iti sabali a
pagsasao, saan koma a nasursurok ngem dua wenno tallo ti agsisinnublat,
ket adda sabali a mangipatarus. 28 No awan ti makaipatarus, ti agsao iti
sabali a pagsasao, agulimek laengen. Ti la koma bagina ken ti Dios ti
kasaona. 29 Dua wenno tallo a naikkan iti mensahe ti Dios ti agsao koma,
ket utoben dagiti dadduma ti sawenda. 30 Ngem no umawat iti paltiing ti
Dios ti maysa nga agtugtugaw iti gimong, masapul nga agulimek ti
madama nga agsarsarita. 31 Mabalinyo ti agsasaruno a mangipakaammo
iti mensahe ti Dios tapno masursuroan ken mapapigsa ti amin. 32 Ti
naikkan iti parabur a mangipakaammo iti mensahe adda kenkuana ti
kinaparbeng, 33 agsipud ta ti Dios saan a Dios ti riribuk no di ket
panagtutunos. Kas maar-aramid kadagiti amin nga iglesia dagiti tattao ti
Dios, 34 agulimek koma dagiti babbai kadagiti panaggigimong iti iglesia.
Saanda a mapalubosan nga agsao. Segun ti Linteg, saanda koma a
mangipangulo. 35 No adda kayatda nga ammoen, damagenda koma
kadagiti assawada no addada iti balayda. Naalas nga agsao ti babai no
adda iti paggigimongan. 36 Dakayo kadi ti nagtaudan ti sao ti Dios?
Dakayo kadi laeng ti dimmanonanna? 37 No adda mangipagarup nga isu
ket profeta ti Dios wenno addaan iti naespirituan a sagut, masapul a
bigbigenna a ti bilin ti Apo ti isursuratko kadakayo. 38 Ngem no dina
bigbigen daytoy, diyo ikaskaso dayta a tao. 39 Isut’ gapuna, kakabsatko, a
tarigagayanyo koma a sipapasnek ti mangipakaammo iti mensahe ti Dios,
ngem diyo lapdan ti panagsao iti sabali a pagsasao. 40 Masapul a
maaramid nga umno ken naurnos ti amin a banag.
1 Corinto 15
1 Kakabsat, kayatko nga ipalagip kadakayo ti Naimbag a Damag nga
inkasabak kadakayo, nga inawatyo ket pagbatayan a sititibker ti
pammatiyo. 2 Dayta ti ebanghelio nga inkaskasabak kadakayo.
Isalakannakayo no salimetmetanyo—malaksid no barengbareng ti
panamatiyo. 3 Inyawatko kadakayo ti kangrunaan nga inawatko: a natay ni
Cristo gapu kadagiti basoltayo, kas nailanad iti Nasantoan a Surat; 4 a
naitanem ket napagungar iti maikatlo nga aldaw, kas nailanad iti
Nasantoan a Surat; 5 a nagparang ken ni Pedro sa kadagiti sangapulo ket
dua nga apostoles. 6 Kalpasanna, nagparang iti naminsan kadagiti nasurok
a limagasut a pasurotna a kaaduanna kadakuada ti sibibiag pay laeng ita,
nupay natayen ti dadduma. 7 Kalpasanna, nagparang ken ni Santiago sa
kadagiti amin nga apostoles. 8 Kamaudiananna, nagparang met kaniak,
nupay arigna a nayanakak a saan a naitiempo. 9 Ta siak ti kanunumoan
kadagiti apostoles. Saan pay ketdi a rumbeng a maawaganak iti apostol ta
indadanesko ti iglesia ti Dios. 10 Ngem gapu iti parabur ti Dios,
nagbalinak nga apostol ket natulongannak ti paraburna. Saan la a dayta,
napingpingetak a nagtrabaho ngem dagiti amin nga apostoles, nupay iti
kinapudnona, saan a siak ti akin-aramid no di ket ti parabur ti Dios nga
adda kaniak. 11 Ngarud, naggapu man kaniak wenno naggapu kadakuada,
daytoy ti ikasabami ket daytoy ti patienyo. 12 Ita, yantangay ta
ikaskasabami ti pannakapagungar ni Cristo, apay a kuna ti sumagmamano
kadakayo a saan a mapagungar dagiti natay? 13 No saan a mapagungar
dagiti natay, saan ngarud a napagungar ni Cristo. 14 Ket no saan a
napagungar, awan ngarud ti serserbi ti ikasabami, kasta met ti pammatiyo.
15 Maipakita pay nga ulbodkami a saksi ti Dios, ta imbagami a
pinagungarna ni Cristo—ngem dina met gayam pinagungar, no pudno a di
mapagungar dagiti natay. 16 Ta no saan a mapagungar dagiti natay, saan
met ngarud a napagungar ni Cristo. 17 No di napagungar ni Cristo, awan
serserbi ti pammatiyo ket agturay pay laeng ti basol iti biagyo. 18
Kaipapananna pay a sawen a napukawen dagiti natay a nagtalinaed iti
pammatida ken ni Cristo. 19 No agpaay laeng iti daytoy a biag ti
namnamatayo ken Cristo, ket awanen sabali, datayo dagiti nakakakaasi
unay kadagiti amin a tao ditoy lubong. 20 Ngem iti kinapudnona,
napagungar ni Cristo kas umuna a bunga ken pammatalged a
mapagungarto met dagiti matmaturog iti tanem. 21 Ta kas iti yaay idi ti
patay gapu iti maysa a tao, kastoyto met ti pannakapagungar dagiti natay.
22 Kas iti ipapatay ti amin a tao gapu iti pannakipagmaymaysada ken ni
Adan, kasta met ti panagungarto ti amin a tao gapu iti
pannakipagmaymaysada ken ni Cristo. 23 Ngem tunggal maysa iti
batangna: umuna, ni Cristo; kalpasanna, dagiti tattaona, inton tiempo a
yaayna. 24 Ket umayto ti panungpalan. Pukawento ni Cristo ti amin a
turay, amin a pannakabalin ken bileg, ket yawatnanto ti Pagarian iti Dios
Ama. 25 Ta masapul nga agturay ni Cristo agingga a maparmek ti Dios ti
amin a kabusorna. 26 Ni patay ti maudinto a kabusor a maparmek. 27 Ta
kuna ti Nasantoan a Surat: “Amin a banag ikabil ti Dios iti babaen dagiti
sakana.” Ngem nalawag a ti balikas “amin a banag,” dina iraman ti Dios a
nangikabil kadagiti amin a banag iti babaen ni Cristo. 28 Ngem inton
maikabil ti amin a banag iti babaen ti turay ni Cristo, paiturayanto ti Anak
iti Dios a nangikabil iti amin iti babaenna. Ket naan-anayto ti panangituray
ti Dios iti amin. 29 Ita, anianto ti gunggona dagiti tattao a nabuniagan a
maigapu kadagiti natay? Anianto ti namnamaenda a magun-od? No pudno
ti kunada a di mapagungar dagiti natay, apay ngarud a mabuniagan
dagitoy a tattao maigapu kadagiti natay? 30 Ket iti biangmi, apay a
sarangtenmi ti peggad? 31 Kakabsat, gapu iti panangitangsitko kadakayo
iti biagtayo ken ni Cristo Jesus nga Apotayo, inaldaw a sarangtek ni patay.
32 Ania ti magunggonak, no kas iti pagsasaoda, “Nakirangetak kadagiti
narungsot nga ayup” idiay Efeso? Ngem no di mapagungar dagiti natay,
“Mangan ken uminumtayo, ta inton bigat, mataytayo,” kas kunada. 33
Dikayo paallilaw: “Madadael ti nasayaat a kababalin gapu iti
pannakikadua kadagiti dakes a tattao.” 34 Agsublikay iti nasayaat a
panunotyo ket dikay agbasolen. Ibagak nga agbain koma ti sumagmamano
kadakayo a di makaammo iti Dios. 35 Ngem adda dagiti agkuna, “Kasano
a mapagungar dagiti natay? Anianto a kita ti bagida?” 36 Maag! No
mangimulaka iti bukel, saan nga agtubo malaksid no matay. 37 Ket ti
immulam, saan a ti dakkelen a mula, no di ket bukel latta, nalabit a bukel
ti trigo wenno sabali a kita. 38 Kas pagayatan ti Dios, ikkanna ti bagi
dayta a bukel. Itedna iti tunggal bukel ti tumutop a bagina. 39 Ket saan
nga agpapada ti lasag dagiti amin a sibibiag. Maysa a kita ti lasag ti tao,
sabali kadagiti ayup, sabali kadagiti tumatayab, ken sabali pay kadagiti
ikan. 40 Adda dagiti bagi a nailangitan, adda met dagiti naidagaan. Adda
dayag dagiti bagi a nailangitan. Sabali met ti dayag dagiti naidagaan. 41
Adda kabukbukodan a dayag ti init; sabali met ti bulan. Naigiddiat met ti
dayag dagiti bituen, ket uray kadakuada, agduduma ti dayagda. 42
Kastoyto met inton mapagungar dagiti natay. Agrupsa ti bagi no maikali.
Saanen nga agrupsa no mapagungar. 43 Nalaad ken nakapsut no maikali.
Napintas ken napigsa no mapagungar. 44 Maysa a nailasagan a bagi no
maitanem. Maysa a naespirituan no mapagungar. Adda nailasagan a bagi,
adda met naespirituan. 45 Ta kuna ti Nasantoan a Surat: “Ni Adan a
kaunaan a tao, naparsua a naikkan iti biag.” Ngem ti maudi nga Adan, isu
ti Espiritu a mangted iti biag. 46 Saan nga umuna ti naespirituan no di ket
nailasagan. Sumaruno ti naespirituan. 47 Naaramid iti tapok ti umuna nga
Adan. Naggapu sadi langit ti maikadua. 48 Mayarig dagiti naidagaan a
bagi iti tao a naparsua iti daga. Mayasping met dagiti nailangitan a bagi iti
tao a naggapu sadi langit. 49 No kasano nga immalatayo iti langa ti tao a
naidagaan, umalatayto met iti langa ti Tao a nailangitan. 50 Daytoy ti
kayatko a sawen, kakabsatko: Ti bagi nga adda lasag ken darana, saan a
makipagtagikua iti Pagarian ti Dios. Ti agrupsa, saanna a tagikuaen ti di
panagrupsa. 51 Ibagak kadakayo daytoy a palimed: saantayto a matay
amin, ngem mabalbaliwantayto amin iti apagdarikmat, 52 kas iti kapardas
ti kirem, iti maudi nga aweng ti trumpeta. Ta inton agaweng ti trumpeta,
mapagungarto dagiti natay. Didanto matayen ket mabalbaliwantayto amin.
53 Ti agrupsa a bagi, makawesanto iti saan a panagrupsa. Ti bagi a matay,
makawesanto iti saan nga ipapatay. 54 Isut’ gapuna nga inton makawesan
ti agrupsa iti saanen a panagrupsa, ken inton makawesan ti bagi a matay iti
saanen nga ipapatay, matungpalto ti Nasantoan a Surat: “Naparmeken ni
Patay; naan-anayen ti balligi!” 55 “O Patay, sadino ti yan ti balligim? O
Patay, sadino ti yan ti panniludmo?” 56 Ti basol ti pangalaan ni patay iti
panniludna. Ti Linteg ti pangalaan met ti basol iti bilegna. 57 Ngem
agyamantayo koma iti Dios a mangted iti balligi kadatayo babaen ken ni
Apotayo a Jesu-Cristo. 58 Ngarud, patpatgek a kakabsat, agtalinaedkayo a
natibker ken di magaraw. Kanayon a sangoenyo ti trabahoyo a maipaay iti
Apo, ta ammoyo nga adda bunga ti amin nga aramidenyo iti panagserbi iti
Apo.
1 Corinto 16
1 Ita, saritaek ti maipapan iti maur-or a tulong a maipaay kadagiti tattao ti
Dios idiay Judea. Nasken nga aramidenyo ti bilinko kadagiti iglesia idiay
Galacia. 2 Kada umuna nga aldaw ti lawas, mangilasin ti tunggal maysa iti
sagutna segun ti kabaelanna tapno saanton a masapul ti agur-or inton
umayak. 3 Kalpasan ti yaayko, ibaonkonto idiay Jerusalem dagiti piniliyo
a lallaki tapno ipanda sadiay ti sagutyo. Ikuyogdanto dagiti surat a
mangyam-ammo kadakuada. 4 No masapul a mapanak, makikuyogdanto
kaniak. 5 Sarungkarankayo dita kalpasan ti ilalasatko idiay Macedonia—ta
panggepko ti magna sadiay. 6 Nalabit a makipagnaedakto kadakayo iti
sumagmamano nga aldaw wenno iti tiempo ti lam-ek, tapno
matulongandakto a mangituloy iti panagbiahek, iti sadinoman a papanak
pay. 7 Ta diak kayat nga apagbiit laeng a makitakayo. No ipalubos la ketdi
ti Apo, agbayagak bassit iti dennayo. 8 Agyanak ditoy Efeso agingga iti
aldaw ti Pentecostes. 9 Nupay adu ti kabusor, adda napudpudno a
gundaway nga agpaay iti naindaklan ken nabunga a trabaho. 10 No
dumaw-as dita ni Timoteo, kitaenyo a di mabutbuteng iti kaaddana
kadakayo, ta kas met kaniak nga agtartrabaho iti Apo. 11 Awan koma ti
manglais kenkuana, ngem tulonganyo ketdi a mangituloy a sitatalna iti
panagbiahena tapno agsublinto kaniak. Padpadaanak ni Timoteo agraman
dagiti kakabsat. 12 Maipapan ken ni kabsat nga Apolos: kanayon a
dagdagek tapno bisitaennakayo a kakuyogna dagiti kakabsat, ngem dina
maikeddeng no umay ita. Nupay kasta, umayto no adda gundawayna. 13
Agsiputkayo. Agtalinaedkayo a natibker iti pammati ket tumured ket
pumigsakayo. 14 Aramidenyo a siaayat ti amin a trabahoyo. 15 Malagipyo
a ni Estefanas ken ti familiana ti immuna a nagkristiano idiay Grecia.
Intedda ti bagida iti panagserbi kadagiti tattao ti Dios. Yunay-unayko
kadakayo, kakabsatko, 16 a paidalankayo kadagiti kakastoy a tattao ken
uray siasinoman a makipagtrabaho ken makipagserbi kadakuada. 17
Maragsakanak iti yaay da Estefanas, Fortunato ken Acaico. Isuda ti
nangisaup kadakayo. 18 Pinaragsakdak a kas iti panangparagsakda
kadakayo. Rebbengna a mabigbig dagiti tattao a kas kadakuada. 19
Pakomustaandakayo dagiti iglesia ti probinsia ti Asia. Nabara ken
nakristianoan ti pakomusta kadakayo da Akila ken Priscila, ken dagiti
kamkameng ti iglesia nga aggigimong iti balayda. 20 Pakomustaandakayo
met dagiti amin a kakabsat ditoy. Agkikinnablaawkayo iti nainkabsatan
nga agek. 21 Iti bukodko nga ima isuratko daytoy: Kablaaw nga aggapu
ken ni Pablo. 22 Mailunod koma ti siasinoman a di agayat iti Apo!
Maranatha—Umayka, Apomi! 23 Sapay koma ta adda kadakayo ti parabur
ni Apo Jesus. 24 Agtaeng koma ti ayatko kadakayo amin nga adda ken ni
Cristo Jesus. Amen.
2 Corinto 1
1-2 Iti iglesia ti Dios idiay Corinto ken kadagiti amin a tattao ti Dios iti
entero nga Acaya: Sapay koma ta parabur ken talna ti ited ti Dios nga
Amatayo, kasta met ni Apo Jesu-Cristo. Naggapu kadakami daytoy a
surat—ni Pablo nga apostol ni Cristo Jesus babaen iti pagayatan ti Dios,
ken ni kabsattayo a Timoteo. 3 Agyamantay iti Dios, ti Ama ni Apotayo a
Jesu-Cristo; wen, ti manangngaasi nga Ama, ti Dios a pagtaudan ti
pigsatayo! 4 Tulongannatayo iti amin a sagsagabaentayo tapno
matulongantayo dagiti addaan iti aniaman a pakarikutan babaen iti tulong
met laeng nga inawattayo iti Dios. 5 Ta idinto a nagsagaba ni Cristo,
agsagabakami met a kas kenkuana idi ket mairamankami met iti
nawadwad a tulongna babaen iti kaaddami kenkuana. 6 Tunggal
agsagabakami, agpaay daytoy iti pannakatulong ken pannakaisalakanyo.
Tunggal matulongankami, matulongankayo met, ket maikkankay iti pigsa
tapno maibturanyo met a siaanus ti sagsagabaenmi. 7 Isu a dakkel ti
namnamami kadakayo. Ammomi nga idinto a makipagsagabakayo
kadakami, mairamankayo met iti tulong nga awatenmi. 8 Kayatmi nga
ipalagip kadakayo, kakabsat, ti parikut a naglasatanmi idiay probinsia ti
Asia. Saanmin a madaeran ti kadagsen ken kaadu ti parikut a naipabaklay
kadakami, ket napukawmi ti namnamami nga agbiag. 9 Kasla
nasentensiaankami a matay. Ngem napasamak daytoy tapno saankami nga
agpannuray iti bagimi, no di laeng iti Dios a mamagungar kadagiti natay.
10 Insalakannakami iti nakabutbuteng nga ipapatay, ket
isalakannakaminto pay. Mangnamnamakami kenkuana nga
isalakannakaminto manen. 11 Isut’ gapuna a tulongandakami met babaen
iti panangikararagyo kadakami. Ngarud, kayatna a sawen a masungbatanto
dagiti adu a kararag nga agpaay kadakami ket bendisionannakaminto ti
Dios. Adunto ti agyaman kenkuana gapu kadagiti parabur a maited
kadakami. 12 Daytoy ti pagpasindayagmi: Paneknekan ti konsensiami a ti
panagbiagmi ditoy lubong, nangruna ti pannakipulapolmi kadakayo, ket
inturayan ti nadalus a panggep ken nadiosan a kinapudno, babaen iti
pannakabalin ti parabur ti Dios, a saan a ti sirib ti tao. 13-14 Ti la
maawatanyo ti isuratmi kadakayo. Saan a naan-anay ti pannakaawatyo
kadakam ita, ngem namnamaek a naan-anayton a maawatandakami tapno
mabalindakami nga itangsit a kas met iti panangitangsitmi kadakayo, inton
Aldaw ni Apo Jesus. 15 Gapu ta kapkapnekak daytoy, pinanggepko a
sarungkarankayo nga umuna tapno maminduakayo a mabisita. 16 Planok
ngamin a sarungkarankayo inton mapanak idiay Macedonia, kasta met
inton aggapuak sadiay tapno agpatulongak kadakayo iti biahek nga agpa-
Judea. 17 Agbaliwbaliw aya ti panunotko iti daytoy a panggepko? No
adda panggepko, aramidek kadi segun ti nainlubongan a gandat, ket
paggiddanek nga ibaga ti “Wen” ken “Saan”? 18 Ngem kas iti kinapudno
ti Dios, saan nga agbalbaliw a “Wen” ken “Saan” ti karimi kadakayo. 19
Ta saan a “Wen” ken “Saan” ni Jesu-Cristo nga Anak ti Dios nga
inkaskasaba kadakayo da Silas, Timoteo ken siak. Ngem isu ti “Wen” ti
Dios, 20 ta isu ti pakatungpalan ti amin a kari ti Dios. Daytoy ti gapuna a
no idaydayawtayo ti Dios, kunatayo iti “Amen” iti nagan ni Jesu-Cristo.
21 Ti Dios ti mamagkaykaysa kadatayo ken ni Cristo. Ti Dios met laeng ti
nangpili kadakami. 22 Isu ti nangikabil iti marka a kukuanakami ken isu ti
nangted iti Espiritu Santo iti pusomi a kas talged ti amin nga ipaayna
kadakami. 23 Awagak ti Dios a kas saksik a gapu ta diak kayat a masaktan
ti riknayo, intantanko ti yaayko dita Corinto. 24 Dimi panggep nga ibaga
kadakayo no ania ti masapul a patienyo; natibkerkayon iti pammati.
Agtartrabahokami ketdi kadakayo para iti bukodyo a pagragsakan.
2 Corinto 2
1 Daytoy ti gapuna nga inkeddengko a saanto a makapaladingit ti
isasarungkarko manen kadakayo. 2 Ta no pagladingitenkayo, siasinonto
pay ti mangparagsak kaniak no di dakayo met laeng a pinagleddaangko? 3
Imbes nga umayak, nagsuratak laengen amangan no pagladingitendak
dagiti tattao a mangparagsak koma ketdi kaniak. Kapkapnekak ngamin a
no naragsakak, naragsakkayo met amin. 4 Kasta unay ti pannakariribuk
ken panagdanagko idi nagsuratak kadakayo; adu a lua ti nagarubos! Ngem
awan a pulos ti panggepko a mamagladingit kadakayo. Kayatko laeng a
maammoanyo no kasano ti kadakkel ti ayatko kadakayo. 5 Ita, no adda
nangpaladingit iti siasinoman, saan a siak ti pinaladingitna no di dakay
amin wenno nalabit ti sumagmamano kadakayo. (Kunak daytoy ta diak
kayat a nagubsang ti panagsaok kenkuana.) 6 Umdasen ti dusa nga
impatay ti kaaduan kadakayo iti kasta a tao. 7 Nupay kasta, nasken a
pakawanen ken liwliwaenyo amangan no malmes iti napalalo a ladingit. 8
Yunay-unayko ngarud nga ipatalgedyo kenkuana a pudno nga ay-
ayatenyo. 9 Daytoy ti gapuna nga insuratko dayta a surat ta kayatko a
maammoan no kasano ti panaglasatyo iti pannakasuot ken no
sisasaganakayo a mangtungpal kadagiti pammagbagak. 10 No
pakawanenyo ti siasinoman gapu iti inaramidna, pakawanek met. Ta no
mamakawanak—no pudno a masapul a pakawanek ti siasinoman—
aramidek gapu kadakayo iti sangoanan ni Cristo 11 tapno dinatayo
gundawayan ni Satanas. Ammotayo dagiti panggepna. 12 Idi dumtengak
idiay Troas tapno ikasabak ti Naimbag a Damag maipapan ken ni Cristo,
natakuatak a linuktan ti Apo ti dalan nga agpaay iti trabaho sadiay. 13
Ngem nagdanagak unay ta diak nasarakan ni kabsattayo a Tito. Isu a
nagpakadaak kadagiti kakabsat sadiay, ket napanak idiay Macedonia. 14
Ngem yaman pay iti Dios, ta gapu iti pannakikaysami ken ni Cristo,
kanayon nga ikuyognakam iti parada ti panagballigi ni Cristo.
Aramatennakami ti Dios a mangisaknap iti nabanglo nga ayamuom ti
pannakaammo ken Cristo kadagiti amin a tattao. 15 Mayarigkami iti
nabanglo nga insenso a puoran ni Cristo a maidaton iti Dios ket agwaras
kadagiti maisalakan ken kadagiti mapukaw. 16 Kadagiti mayaw-awan,
makapatay daytoy nga ayamuom. Kadagiti maisalsalakan, maysa nga
ayamuom a mangted iti biag. Siasino ngarud ti makabael iti daytoy a
trabaho? 17 Saankami a mayarig kadagiti kaaduan a mangipakpakaammo
iti sao ti Dios a kasla ket tay tagilakon ti mensahena. Ngem gapu ta
imbaonnakami ti Dios, sipupudnokami nga agsao iti sangoananna, kas
adipen ni Cristo.
2 Corinto 3
1 Iti panagsaomi kadagitoy, ipagarupyo kadi nga idaydayawmi manen ti
bagbagimi? Wenno, kas iti ar-aramiden ti dadduma, kasapulanmi kadi ti
surat a mangyam-ammo kadagiti bagbagimi kadakayo wenno adda surat
nga aggapu kadakayo a mangyam-ammo kadakami kadagiti sabali? 2
Dakayo a mismo ti suratmi a nailanad iti pusomi tapno maammoan ken
mabasa ti siasinoman. 3 Nalawag a ni Cristo ti nangisurat iti daytoy ket
pinaitulodna kadakami. Naisurat daytoy, saan nga iti tinta no di ket iti
Espiritu ti sibibiag a Dios ket saan a kadagiti tapi a bato no di ket iti puso
ti tao. 4 Sawenmi daytoy ta agtalekkami iti Dios babaen ken ni Cristo. 5
Awan ti panggapuanmi nga agkuna a kabaelanmi daytoy a trabaho.
Aggapu iti Dios ti kabaelanmi. 6 Isu ngamin ti nangted iti kabaelanmi a
kas adipen ti baro a tulag a saan a buklen ti naisurat a linteg, no di ket ti
Espiritu. Patay ti yeg ti naisurat a linteg, ngem biag ti ited ti Espiritu. 7
Naikitikit ti Linteg kadagiti tapi a bato, ket idi maited, nagparang ti dayag
ti Dios. Nupay agpukpukaw idi ti raniag iti rupa ni Moises, nagpaiduma
latta ti raniagna ket saan a maiperreng dagiti Israelita ti matada kenkuana.
No ti Linteg a pannakatay ti ibunga ti pannakaipatungpalna ket dimteng a
nabuyogan iti kasta a kinadayag, 8 saan aya a dakdakkel pay ti dayag ti
aramid ti Espiritu? 9 No nadayag ti Linteg a pakaukoman ti tao, ad-adda
pay ti dayag a mangyeg iti pakaisalakanan! 10 Mabalin a kunatayo a gapu
ta naranraniag nga adayo ti dayag ita, napukawen ti nagpaiduma a dayag ti
napalabas. 11 Ta no adda dayag ti banag a limmabas laeng, ad-adda pay ti
dayag dayta agpaut iti agnanayon. 12 Naturedkami gapu ta adda daytoy a
namnamami. 13 Saankami a kas ken ni Moises a nangabbong iti rupana
tapno di makita dagiti Israelita ti panagpukaw ti raniag. 14 Pudno a
nakullaapan ti panunotda. Agingga ita, no basaenda dagiti libro ti daan a
tulag, adda pay laeng daydi abbong a nangkumot iti panunotda. Maikkat
laeng ti abbong no adda ti tao ken ni Cristo. 15 Uray kadagitoy nga aldaw,
tunggal basaenda ti Linteg ni Moises, naabbongan pay laeng ti panunotda.
16 Ngem maikkat ti abbong, kas kuna ti Nasantoan a Surat, “Naikkat ti
abbong ni Moises idi sumango iti Apo.” 17 “Ti Apo” iti daytoy a paset, isu
ti Espiritu, ket iti sadinoman a yan ti Espiritu ti Apo, adda wayawaya. 18
Ngarud, datayo amin nga awan abbong ti rupana, ipakitatayo ti dayag ti
Apo. Balbaliwannatayo dayta met laeng a dayag nga aggapu iti Apo nga
isu ti Espiritu tapno umaspingtayo kenkuana iti naranraniag pay a dayag.
2 Corinto 4
1 Iti kaasi ti Dios, naited kadakami daytoy a panagserbi, ket saankam a
maupay. 2 Iwaksimi amin a nalimed ken nakababain nga aramid. Dikam
agaramid iti kinasikap. Dimi ballikugen ti mensahe ti Dios. Ngem iti amin
a kinapudno, agbiagkam iti imatang ti Dios ket italekmi ti bagimi iti
konsensia ti tunggal tao. 3 No kas pangarigan nailemmeng ti ebanghelio
nga ikaskasabami, nailemmeng laeng kadagiti mayaw-awan. 4 Saanda a
mamati, ta ti isipda kinullaapan ni Satanas a mangituray iti daytoy a
lubong, ket dida makita ti silaw nga aggapu iti Naimbag a Damag
maipapan iti dayag ni Cristo a ladawan ti Dios. 5 Saan a ti bagimi ti
ikasabami: Ikasabami ni Jesu-Cristo a kas Apo, ken dakami a kas
adipenyo gapu ken ni Jesus. 6 Ti Dios a nagkuna, “Agraniag ti silaw
manipud iti kasipngetan!” ket isu met laeng ti Dios a nangted iti silawna
kadagiti pusomi tapno maammoanmi ti dayag ti Dios iti rupa ni Cristo. 7
Ngem dakami nga addaan iti daytoy naespirituan a gameng, mayarigkami
kadagiti narukop a banga tapno maipakita a ti kangatoan a pannakabalin
ket kukua ti Dios, saan a dakami. 8 Masansan a maipasangokami iti
riribuk, ngem saankami a maparukma. No dadduma, agduaduakami, ngem
saankami a maupay. 9 Adu ti kabusor, ngem adda latta gayyemmi. Uray
no nakaro ti pannakakabilmi, saankami a matay. 10 Iti amin a kanito,
ibakbaklaymi ti ipapatay ni Cristo tapno makita ti biagna babaen
kadakami. 11 Kanayon a maipasangokami iti patay gapu ken ni Jesus
tapno maiparangarang ti biagna babaen kadagiti agrupsa a bagimi. 12
Kayatna a sawen a patay ti agtartrabaho kadakami, ngem biag ti
agtartrabaho kadakayo. 13 Kuna ti Nasantoan a Surat, “Namatiak, isut’
gapuna a nagsaoak.” Iti isu met laeng nga espiritu ti pammati, agsaokami
met ta mamatikami. 14 Ammomi a ti Dios a nangpagungar ken ni Apo
Jesus, pagungarennakaminto met a kas ken ni Jesus ket ikuyognatayto iti
saklangna. 15 Maigapu amin daytoy kadakayo; ket iti panagwaras ti
parabur ti Dios iti ad-adu a tao, ad-adunto met ti pagyamanda a kararag a
pakaidayawan ti Dios. 16 Gapu iti daytoy, pulos a saankam a maupay.
Uray no main-inut nga agrupsa ti nailasagan a bagimi, inaldaw met a
mapabaro ti naespirituan a kinataomi. 17 Ket daytoy nalag-an ken apagbiit
a sagsagabaenmi, itedna kadakami ti dakkel ken agnanayon a dayag nga
awan pakaipadaanna. 18 Ta dagiti banag a di makita ti kitaenmi, saan a
dagiti makita. Apagbiit laeng ti banag a makita, ngem agpaut iti
agnanayon ti banag a di makita.
2 Corinto 5
1 Ammomi nga inton marakrak daytoy kalapaw a pagnaedantayo, nga isu
ti bagitayo ditoy daga, addanto balay nga ited ti Dios a pagnaedantayo
idiay langit, balay nga isu a mismo ti nangaramid ken agpaut iti
agnanayon. 2 Ita, agsennaaytayo ta dakkel ti tarigagaytayo a sumrek iti
bukod a balay nga aggapu sadi langit. 3 Iti kasta a pannakakawestayo,
saantayton a lamolamo. 4 Bayat ti panagtaengtayo iti daytoy naindagaan a
kalapaw, agsennaaytayo gapu iti rigattayo; saan a gapu ta kayattayo nga
iwaksi ti naindagaan a bagi, no di ket kayattayo ti makawesan iti
nailangitan tapno ti matay a bagitayo makawesan iti biag. 5 Ti Dios ti
nangisagana kadatayo iti daytoy a panagbalbaliw, ket intedna ti Espirituna
a kas talged ti amin nga insaganana kadatayo. 6 Isut’ gapuna a kanayon a
natalgedkami. Ammomi a bayat ti panagtaengmi iti daytoy a bagi,
adayokami iti Apo. 7 Ta maidalankami babaen iti pammati, saan a babaen
iti banag a makita. 8 Natalgedkam unay ket adayo a kaykayatmi ti
pumanaw iti balaymi tapno makipagnaedkami iti Apo. 9 Nupay kasta,
uray agtaengkami iti biag ditoy wenno iti sabali a biag, ikagumaanmi ti
pannakaay-ayona. 10 Ta masapul a dumatagtay amin iti pangukoman ni
Cristo tapno awatentayo ti rumbeng nga agpaay kadatayo, segun ti
inaramidtayo, naimbag man wenno dakes, bayat ti panagbiagtayo. 11
Ammomi ti kaipapanan ti panagbuteng iti Dios, isu nga ikagumaanmi a
guyugoyen dagiti tattao. Naan-anay ti pannakaammo ti Dios kadakami.
Namnamaek a kastoy met ti pannakaammoyo kaniak. 12 Saanmi a
panggep ti mangidaydayaw manen iti bagimi kadakayo. Panggepmi ketdi
ti mangted iti panggapuanyo a mangipannakkel kadakami tapno
masungbatanyo dagiti agpasindayag gapu iti langa a saan ketdi a ti
kababalin ti tao. 13 No agmauyongkami a kas kunada, gapu iti Dios
daytoy; no manakemkami, gapu kadakayo. 14 Iturayannakami ti ayat ni
Cristo, ta mabigbigmi a natay ti maysa a tao nga agpaay iti amin, kayatna
a sawen, nairaman ti amin a tattao iti ipapatay ni Cristo. 15 Wen, natay
gapu iti amin a tao tapno dagiti sibibiag dida agbiagen para iti bukodda a
pagimbagan, no di ket para kenkuana a natay ken napagungar gapu
kadakuada. 16 Ngarud, dimi bigbigenen ti siasinoman babaen iti
pagrukodan ti tao. Uray no binigbigmi idi ni Cristo babaen iti daytoy a
pagrukodan, dimi aramiden itan. 17 Maysa a baro a parsua ti siasinoman a
mainaig ken ni Cristo. Naglabasen dagiti daan a banag ket dimtengen
dagiti baro. 18 Inaramid amin ti Dios daytoy. Babaen ken Cristo,
inkappianakami kenkuana met laeng. Intedna kadakami ti trabaho a
mangikappia kadagiti tattao kenkuana. 19 Daytoy ti mensahemi:
Nakikappia ti Dios iti amin a tattao babaen ken ni Cristo. Saan nga
imbilang ti Dios dagiti basolda a maibusor kadakuada ket intalekna
kadakami ti mensahe a mangibaga no kasano ti pannakikappiana
kadakuada. 20 Ngarud, adtoykami a pannakangiwat ni Cristo. Kasla ti
Dios a mismo ti agdawdawat kadakayo. Iti nagan ni Cristo, yunay-unaymi
a makikappiakayo iti Dios! 21 Awan basol ni Cristo. Ngem gapu
kadatayo, imbaklayna dagiti basoltayo tapno iti pannakikaysatayo
kenkuana, mairanudtayo iti kinalinteg ti Dios.
2 Corinto 6
1 Ngarud, iti pannakipagtrabahomi iti Dios, ipakpakaasimi daytoy
kadakayo: Naawatyon ti parabur ti Dios ket diyo ipalubos nga awan
kapaypay-anna. 2 Ta kuna ti Dios, “Impangagka idi dumteng ti tiempo a
pannakaipaayna, Tinulonganka idi dumteng ti aldaw nga isalakanka.”
Dumngegkayo! Adtoyen ti tiempo a maiparbeng. Itan ti aldaw a
pannakaisalakan! 3 Dimi kayat nga adda pakababalawan ti panagserbimi.
Isut’ gapuna nga ikagumaanmi a lapdan ti panagbasol ti siasinoman. 4
Ipakitami ketdi nga adipennakami ti Dios iti amin nga aramidmi. Ituredmi
a siaanus dagiti sagabaen, pakarigatan ken pakariribukan. 5 Napangpang-
or, naibalbalud ken naluglugobankami. Nabambannogkamin, ket
napadasanmin ti napuypuyatan ken nabisbisinan. 6 Babaen iti kinadalus,
pannakaammo iti pudno, kinaanus ken kinamanangngaasi,
naipamatmatmin nga adipennakami ti Dios; babaen iti Espiritu Santo,
babaen iti napudno nga ayatmi, 7 babaen iti panangipakaammomi iti
mensahe ti kinapudno ken babaen iti pannakabalin ti Dios. Kinalinteg ti
igammi a dumarup ken mangsalaknib iti bagimi. 8 Mapadpadayawan ken
mapabpabainankami. Mairurrurumen ken maitantan-okkami. Kunada nga
ulbodkami, ngem pudno met ti sawenmi. 9 Kunada nga awan makaam-
ammo kadakami, ngem agdindinamagkami. Kasla nataykamin, ngem kas
makitayo, sibibiagkami. Uray no maparparigatkami, saankami a matay. 10
Uray no mapaladingitankami, naragsakkami latta. Kasla napanglawkami,
ngem pabaknangenmi ti adu a tattao. Kasla awanankami, ngem iti
kinaagpaysona, addaankami. 11 Tattao iti Corinto, pulos nga awan
inlemmengmi iti panagsaomi. Inlukatmi ti pusomi kadakayo. 12 Dimi
rinikpan ti pusomi kadakayo. Dakayo ti nangrikep iti pusoyo kadakami. 13
Ita, kasaokayo a kas pudno nga annakko: ipakitayo met ti isu met laeng a
rikna a mariknami kadakayo. Luktanyo ti pusoyo! 14 Saankayo a
makikadua kadagiti saan a mamati a kasla ket tay kapadayo ida, ta saan a
rumbeng dayta. Kasano nga agkadua ti nalinteg ken ti nakillo? Kasano nga
agtipon ti lawag ken ti sipnget? 15 Kasano nga agtunos ni Cristo ken ti
Diablo? Ania kadi ti pagkaysaan ti mamati ken ti saan a mamati? 16
Kasano nga agkappia ti templo ti Dios ken dagiti didiosen? Ta datayo ti
templo ti sibibiag a Dios. Kas kuna ti mismo a Dios: “Agyanakto iti
sidongda ket makipagnaedakto kadakuada, Siakto ti Diosda ket isudanto
dagiti tattaok.” 17 Isut’ gapuna a kuna ti Apo: “Panawanyo ida ket
suminakayo kadakuada. Diyo sagiden dagiti makatulaw a banag, Ket
awatenkayto. 18 Siakto ti amayo, Ket dakayto ti annakko, Kuna ti
Mannakabalin-amin nga Apo.”
2 Corinto 7
1 Naikari amin dagitoy kadatayo, patgek a gagayyem! Ngarud, awan koma
ti pakapilawantayo babaen iti panangikkattayo iti amin a makatulaw iti
bagi ken kararuatayo. Ket naan-anay koma a nasantoantayo babaen iti
panagbiag a sibubuteng iti Dios. 2 Ilukatyo ti pusoyo kadakami. Awan
siasinoman a nakabasolanmi. Awan siasinoman a dinadaelmi. Awan
siasinoman a ginundawayanmi. 3 Saanko a sawen daytoy tapno
pabasolenkayo. Kas nasaokon kadakayo, napategkayo la unay kadakami
isu nga agkaykaysatayo a kanayon iti patay wenno iti biag. 4 Agtalekak
kadakayo; pagpannakkelkayo unay. Iti amin a pakariribukanmi, naturedak
latta. Kasta unay ti ragsakko. 5 Uray idi makasangpetkami idiay
Macedonia, awan ti inanami. Adu ti rigatmi iti sadinoman a papananmi.
Adda riribuk iti aglawlaw kadakami. Adda panagbuteng iti pusomi. 6
Nupay kasta, ti Dios a mangpapigsa kadagiti maupay, pinapigsanakami
gapu iti yaay ni Tito. 7 Saan laeng a ti yaayna ti nangparagsak kadakami.
Pinapigsanakami pay ti impadamagna a panangpatibkeryo kenkuana.
Impadamagna ti ayatyo a makakita kaniak. Impakaammona ti ladingityo,
ti regtayo a mangsalaknib kaniak. Isu a naragragsakak pay ita. 8 Ta uray
no pinagladingitnakayo ti suratko, saanak nga agbabawi a nangisurat.
Maldaanganak koma ta makitak a pinagladingitnakayo iti apagbiit dayta a
surat. 9 Ngem maragsakanak ita—saan a gapu ta pinagladingitkayo, no di
ket gapu ta pinagbabawinakayo ti ladingityo. Inusar ti Dios dayta a
ladingit, ket saandakayo ngarud a dinangran. 10 Ta ti ladingit a
mayannurot iti Dios yegna ti panagbabawi nga agturong iti
pannakaisalakan—ket saan a pagbabawyan dayta! Ngem ti nainlubongan a
ladingit yegna ti patay. 11 Kitaenyo ti namay-an ti Dios iti ladingityo!
Pinaregtanakayo unay, pinaggagarnakayo unay a mangipaneknek nga
awan ti basolyo! Anian a rurod, anian a buteng, anian nga iliw, anian nga
anep, anian a panangdusa iti nakabasol! Dakayo a mismo ti nangipakita
nga awan pakapilawanyo iti daytoy a pasamak. 12 Nupay nagsuratak iti
kasta, saan a gapu iti nakabasol wenno iti naranggasan. Ngem nagsuratak
tapno ilawlawagko kadakayo, iti imatang ti Dios, no kasano ti
panangipategyo kadakami. 13 Daytoy ti gapuna a mapapigsakami.
Saankami la a napapigsa, no di ket naragsakankami ta pinaragsakyo ni
Tito gapu iti panangtulong ken panangliwliwayo kenkuana. 14
Impasindayawkayo kenkuana ket saandak a pinaay. Kanayon nga ibagami
kadakayo ti pudno. Kasta met a napaneknekan a pudno ti
panangipasindayawmi ken ni Tito. 15 Isut’ gapuna a bumarbara ti ayatna
kadakayo no malagipna ti sisasagana a panagtungpalyo, ti
panangsangailiyo kenkuana a binuyogan iti buteng ken pigerger. 16 Anian
a ragsakko ta mapagtalkankayo nga awan pagkuranganna!
2 Corinto 8
1 Kakabsat, kayatmi a maammoanyo no ania ti gapuanan ti parabur ti Dios
kadagiti iglesia idiay Macedonia. 2 Nakaro ti pannakasuotda kadagiti rigat
a naglasatanda. Ngem kasta unay ti ragsakda ket nabulos ti panagitedda
uray no nakapangpanglawda. 3 Paneknekak kadakayo a nangtedda kas
kabaelanda ngem sinursurokanda pay. Iti agtaud iti nakemda, 4
sipapasnekda a nangipakpakaasi kadakami a makitimpuyogda nga agserbi
kadagiti nasantoan a tattao ti Dios idiay Judea. 5 Nasursurok pay ngem ti
ninamnamami! Indatonda nga immuna ti bagida iti Apo. Kalpasanna,
nagserbida met kadakami, babaen iti pagayatan ti Dios. 6 Ni Tito ti
nangirugi iti daytoy nga aramid. Isut’ gapuna a dinawatmi kenkuana,
idinto nga isut’ nangrugi, nga ituloyna koma daytoy ket tulongannakayo
koma a mangileppas iti daytoy naisangsangayan a panagserbi gapu iti
ayat. 7 Nabaknangkayo unay iti amin nga adda kadakayo: iti pammati, iti
sao, iti ammo, iti gagaryo a tumulong ken iti ayatyo kadakami. Iti kasta,
kayatmi a managparaburkayo met koma. 8 Saanko nga ibilin daytoy.
Ngem iti panangipakaammok iti gagar dagiti dadduma a tumulong,
kayatko a mapaneknekan no pudno met laeng ti ayatyo. 9 Ammoyo ti
parabur ni Apotayo a Jesu-Cristo: Idinto a nabaknang, nagbalin a
napanglaw gapu kadakayo tapno pabaknangennakayo babaen iti
kinapanglawna. 10 Daytoy ti ibalakadko maipapan iti daytoy a banag:
Nasaysayaat no ileppasyon ti inrugiyo itay napan a tawen. Saan la a
dakayo ti nangirugi, no di ket tinarigagayanyo pay daytoy a siaayat a
nagtignay. 11 Ituloyyo ngarud ket ileppasyo ti trabahoyo! Aggagarkayo a
mangileppas iti planoyo. Aramidenyo kas maibatay iti kabaelanyo nga
ited. 12 No sigagagarkayo a mangted, awatento ti Dios ti sagut a
maitedyo, saan a ti awan kadakayo. 13-14 Diak panggep a mapalag-anan
dagiti sabali ket dakayo ti mapadagsenan. Ngem gapu ta aduankayo ita,
rumbeng a tulonganyo met dagiti makasapul. Ta no dakayto met ti
makasapul ket isudanto ti aduan tumulongdanto met kadakayo. Iti kasta,
addanto panagpapada. 15 Kas kuna ti Nasantoan a Surat: “Ti tao nga adu ti
inurnongna, saan a nagsobsobraan, Ket ti bassit ti inurnongna, saan a
maawanan.” 16 Anian a yamanmi iti Dios gapu ta pinaggagarna ni Tito a
kas kadakami a tumulong kadakayo. 17 Saanna la a pinatgan ti dawatmi,
no di pay ket sireregget a tumulong a naknakemna ket inkeddengna nga
umayen kadakayo. 18 Kadua ni Tito nga ibaonmi ti kabsat a madaydayaw
iti amin nga iglesia gapu iti panangikaskasabana iti ebanghelio. 19 Saan la
a dayta, pinili ken dinutokan dagiti iglesia tapno makikuyog kadakami
bayat ti pannakaipatungpal daytoy a panagserbi gapu iti ayat a
pakaidayawan ti Apo ken tapno maipakita ti ayatmi a tumulong. 20
Agannadkami tapno awan ti pakababalawanmi iti pannakaimaton daytoy
nabuslon a sagut. 21 Natakneng ti panggepmi, saan la nga iti imatang ti
Apo, ngem uray pay iti imatang ti tao. 22 Ipakuyogmi daytoy a kabsat
kadakuada. Namin-adun a napadasmi ket napaneknekanmi a kanayon a
sigagagar a tumulong. Ita ta agtalek unayen kadakayo, ad-adda manen ti
gagarna a tumulong. 23 No maipapan ken ni Tito, isu ti kaduak a
tumulong kadakayo. No maipapan kadagiti dadduma a kakabsat a
kumuyog kenkuana, isuda ti pannakabagi dagiti iglesia ket itan-okda ni
Cristo. 24 Ipakitayo ti ayatyo kadakuada tapno mapaneknekan ti amin nga
iglesia a saankam a nagbiddut iti panangipasindayagmi kadakayo.
2 Corinto 9
1 Saanen a masapul nga agsuratak kadakayo maipapan iti tulong a
maipatulod kadagiti nasantoan a tattao ti Dios idiay Judea. 2 Ammok a
siaayatkayo a tumulong, ket impasindayagkayo kadagiti taga-Macedonia.
Kinunak, “Sidadaan a tumulong dagiti kakabsat idiay Acaya manipud pay
itay napan a tawen.” Gapu iti reggetyo a tumulong, natignay ti kaaduan
kadakuada. 3 Ita, ibaonko dagitoy a kakabsat tapno saan nga ubbaw ti
panangipasindayagmi kadakayo ngem kas nasaokon, sisasagana koma ti
tulongyo. 4 No kumuyog kaniak dagiti taga-Macedonia ket maduktalanda
a saankay a nakasagana, anian a pannakaibabainmi—uray dakayo
mabainankayo la ketdi—ta dakkel ti panagtalekmi kadakayo! 5 Isu a
napanunotko a masapul a mauyotan dagitoy a kakabsat tapno umun-unada
nga umay ngem siak a mangkita iti pannakaisagana ti sagut nga inkariyo
nga ited. Sisasagananto koman dagitoy inton sumangpetak, ket
maipakitanto a siaayatkayo a mangted saan a gapu ta mapilitkayo. 6
Laglagipenyo a ti tao a bassit ti imulana, bassitto met ti apitenna. Ti tao
nga adu ti imulana, adunto met ti apitenna. 7 Ngarud, mangted koma ti
tunggal maysa kas agubbog iti pusona. Saan koma a nasakit ti nakemna
wenno mapilpilit, ta ayaten ti Dios ti mangted a siraragsak. 8 Kabaelan
nga ited ti Dios ti ad-adu pay ngem ti kasapulanyo ket
aglaplapunosankayto a kanayon tapno agsobsobraankayto a maipaay iti
panagaramidyo iti naimbag. 9 Kas kuna ti Nasantoan a Surat: “Sibubuslon
a mangted kadagiti napanglaw, Ket agnanayon ti kinamanagparaburna.”
10 Ket ti Dios a mangted iti bukel iti agmulmula ken iti tinapay a taraon,
ikkannakayto met iti amin a bukel a masapulyo ket paaduennanto tapno
adunto ti apitenyo gapu iti kinamanagparaburyo. 11 Pabaknangennakayto
met a kanayon tapno mabalinyo ti agparabur iti amin a tiempo, ket adunto
ti agyaman iti Dios gapu kadagiti tulongyo nga inawatda kadakami. 12 Ta
daytoy a panagserbiyo, saanna la a punnoan ti kasapulan dagiti tattao ti
Dios, no di ket tignayenna pay ti adu nga agyaman kenkuana. 13 Ket gapu
iti pammaneknek nga ibunga daytoy a panagserbiyo, adunto ti
mangidaydayaw iti Dios gapu iti panagtulnogyo iti ebanghelio ni Cristo.
Wen, agyamandanto iti Dios gapu iti ayatyo a mangipaay iti kasapulanda
ken iti pagimbagan ti amin. 14 Iti kasta, idawdawatandakayto a sipapasnek
gapu iti naisangsangayan a parabur nga inted ti Dios kadakayo. 15
Agyamantayo iti Dios gapu iti saan a magatadan a sagutna!
2 Corinto 10
1 Siak, ni Pablo, ti mismo nga agdawat kadakayo. Kunkunada a
napakumbabaak no addaak iti dennayo, ngem nagubsangak no adayoak.
Yunay-unayko, gapu iti kinaanus ken kinamanangngaasi ni Cristo, a 2
didak piliten nga agbalin a nagubsang kadakayo no umayak. Ammok a
kabaelak met ti agunget kadagiti agkunkuna nga agtignaykami gapu iti
nainlubongan a panggep. 3 Agpayso nga addakami ditoy lubong, ngem
dikam makiranget gapu iti nainlubongan a panggep. 4 Saan a dagiti igam
ti lubong ti aramatenmi a pakidangadang. Usarenmi ketdi dagiti nabileg
nga armas ti Dios a pangrebba kadagiti sarikedked ti kabusor. Dadaelenmi
dagiti ulbod a pannakisuppiat. 5 Ikkatenmi amin a kinatangsit a
makalapped iti pannakaammo iti Dios. Kayawanmi amin a panunot tapno
agtungpalda ken ni Cristo. 6 Ket kalpasan ti panangpaneknekyo iti naan-
anay a kinatulnogyo, sisasaganakamto a mangdusa kadagiti nasukir. 7
Kitkitaenyo laeng ti akinruar dagiti bambanag. No adda siasinoman a
mangipagarup iti bagina a tao ni Cristo, utobenna man ti kinasiasinona?
Uray dakami, tattaonakami met ni Cristo a kas kenkuana. 8 Saanak a
mabain, uray no nalabes ti panangipasindayagko iti turay nga inted ti Apo
kadakami—turay a mangpatanor kadakayo, saan a mangdadael. 9 Diyo
ipagarup a butbutngenkayo kadagiti suratko. 10 Addanto agkuna,
“Nauyong ken nagubsang dagiti linaon ti surat ni Pablo ngem no isu a
mismo ti adda kadatayo, kasla awan durina ket awan met mamaay ti
ibagbagana.” 11 Nasken a maawatan ti kasta a tao nga awan naggidiatan
dagiti isuratmi no adayokami ken dagiti aramidenmi no addakami iti
dennayo. 12 Ta saankami nga agtured a mangibilang wenno mangipada iti
bagimi kadagiti mangidaydayaw unay iti bagida. Nagkunengdan!
Agaramidda iti bukodda a pagrukodan a pangrukod iti mismo a bagida. 13
Nupay kasta, iti biangmi, saanmi a lablabsen ti agpasindayag. Aramidenmi
ti maiparbeng a trabaho nga intuding ti Dios. Mairaman ti trabahomi
kadakayo. 14 Ket gapu ta addakayo iti masakupan daytoy, saankami a
naglabes idi immaykami kadakayo tapno ipakaammomi ti Naimbag a
Damag maipapan ken ni Cristo. 15 Isu a saanmi nga ipasindayag ti trabaho
nga inaramid dagiti dadduma iti labes ti intuding ti Dios kadakami. Ngem
namnamaenmi ketdi a pumigsa ti pammatiyo, nga ad-adunto pay ti
maaramidmi iti dennayo, ket kankanayon nga addakami iti sakup nga
inted ti Dios. 16 Iti kasta, mabalinminto nga ikasaba ti Naimbag a Damag
kadagiti sabali a pagilian nga adayo kadakayo. Saan a masapul a
pagpannakkelmi ti trabaho a naaramiden iti sakup ti sabali a tao. 17 Ngem
kas kuna ti Nasantoan a Surat, “Siasinoman nga agpasindayag,
ipasindayagna koma ti inaramid ti Apo.” 18 Ta saan nga anamongan ti
Dios dagiti tattao a mangidaydayaw iti bagida. Anamonganna laeng dagiti
tattao nga idaydayawna.
2 Corinto 11
1 Anusandak koma uray no adda bassit mamaagko. Wen, anusandak! 2
Agimonak kadakayo, kas iti panagimon ti Dios. Mayarigkayo iti natarnaw
a balasang nga intulagko a mayasawa laeng ken ni Cristo. 3 Maamakak
amangan no masabidongan ti panunotyo ket laksidenyo ti naan-anay ken
nasin-aw a panagtulnogyo ken ni Cristo—kas iti pannakaallilaw ni Eva
babaen iti nasikap nga uleg. 4 Ngamin, awatenyo a siraragsak iti
siasinoman nga umay mangikasaba kadakayo iti sabali a Jesus, saan a ti
inkaskasabami. Ket bigbigenyo ti maysa nga espiritu ken maysa nga
ebanghelio a maigiddiat iti Espiritu ken ebanghelio nga inawatyo
kadakami. 5 Ammok a saanak a nababbaba ngem dagitoy
naisangsangayan nga “apostolesyo.” 6 Nalabit a saanak a nalaing nga
agsao, ngem saanak nga agkurang iti ammo. Inlawlawagmin daytoy
kadakayo iti amin a tiempo ken gundaway. 7 Awan uray sentimo a
siningirko idi inkasabak kadakayo ti Naimbag a Damag. Nagpakumbabaak
tapno maitan-okkayo. Basol kadi ti inaramidko? 8 Bayat ti panagtrabahok
iti arpadyo, tinangdanandak dagiti dadduma nga iglesia ket kas tay
kunadan, tinakawak ida, tapno matulongankayo. 9 Kabayatan ti kaaddak
kadakayo, dikay rinengrengreng no masapulko ti kuarta. Intugot dagiti
kakabsat a naggapu idiay Macedonia ti amin a masapulko. Kas iti
napalabas, kastanto met iti masakbayan: Diakto agbalin a
pakadagsenanyo! 10 Babaen iti kinapudno ni Cristo nga adda kaniak,
ikarik nga awan ti siasinoman iti entero nga Acaya ti mabalin a
mangpasardeng kaniak iti daytoy a panagpasindayagko. 11 Apay a kunak
daytoy? Gapu kadi ta dikay ay-ayaten? Ammo ti Dios nga ay-ayatenkayo!
12 Ituloyko latta ti ar-aramidek iti agdama tapno awan panggapuan dagita
nga “apostoles” nga agpaspasindayag ken agkunkuna nga agtrabahoda a
kas iti panagtrabahomi. 13 Saan a pudno nga apostoles dagitoy a tattao.
Sinan-apostolesda, manangallilawda iti amin nga aramidda, ket
agpammarangda a pudno nga apostoles ni Cristo. 14 Saan a nakaskasdaaw
daytoy! Uray ni Satanas, kabaelanna ti agparang a kasla anghel ti lawag!
15 Isu a saan a nakaskasdaaw no dagiti adipenna agpammarangda nga
adipen ti kinalinteg. Ngem iti kamaudiananna, madusadanto kas
mayannurot kadagiti aramidda. 16 Ulitek: Awan koma ti mangipagarup a
maagak. Ngem no ipagarupyo a maagak, awatendak ngarud a kas maysa a
maag tapno adda met sangkabassit a pagpannakkelko. 17 Kinapudnona,
saan a kayat ti Apo ti banag a sasawek ita. Iti daytoy a panagpasindayag,
pudno nga agsasaoak a kasla maag. 18 Yantangay ta adu unay ti
mangipasindayag iti nailubongan nga aramidda, agpasindayagak met. 19
Masiribkayo la unay isut’ gapuna a siraragsakak a mangan-anus iti maag!
20 Ibturanyo ti pannakaadipenyo, ti pannakagundawayyo, ti
pannakaumsiyo wenno ti pannakatungpayo. 21 Mabainak a mangannugot,
ngem dimi naitured nga inaramid dagita! Ngem no adda makaitured nga
agpasindayag iti maysa a banag—agsasaoak a kaslaak la maysa a maag—
maituredko met. 22 Hebreoda kadi? Uray siak met. Israelitada kadi?
Kastaak met. Kaputotan kadi ida ni Abraham? Uray siak. 23 Adipen kadi
ida ni Cristo? Kaslaak la agsasao a mauyong—ngem nalalaingak nga
adipen ngem isuda! Narigrigat ti panagtrabahok. Naibalbaludak. Ad-adu ti
pannakasaplitko. Ad-adu ngem isuda ti kaaddak iti ngarab ti tanem. 24
Naminlima a sinaplitdak dagiti Judio iti sagtatallopulo ket siam. 25
Namitlo a sinaplitdak dagiti Romano, ket naminsan a nauborak. Namitlo a
narba ti barko a nagluganak, ket iti naminsan, maysa nga aldawko a
nagpatpataw iti taaw. 26 Iti namin-adu a panagbiahek, nagpeggadak
kadagiti layus ken tulisan. Nagpeggadak kadagiti kadaraak a Judio ken
kadagiti Hentil. Adu ti peggad kadagiti siudad. Peggad kadagiti let-ang.
Peggad kadagiti tengnga ti taaw. Peggad kadagiti manglimlimo a
gagayyem. 27 Nabambannog ken narigrigatanak. Masansan a
mapuyatanak. Nabisinan ken nawawak. Masansan nga awan kanek, awan
balay a pagturogak wenno pagan-anayko. 28 Malaksid kadagiti sabali pay
a banag, inaldaw a madandanaganak gapu kadagiti amin nga iglesia. 29
No adda kumapsut, kumapsutak met. No adda matnag iti basol,
maladingitanak. 30 No masapul nga agpasindayagak, ipasindayagko dagiti
bambanag a mangipakita iti kinakapuyko. 31 Ti Dios ken Ama ni Apo
Jesus—madaydayaw koma ti naganna iti agnanayon—ammona a saanak
nga agul-ulbod. 32 Idi addaak idiay Damasco, pinaguardiaan ti gobernador
nga adda iti babaen ni ari Aretas dagiti ruangan ti siudad tapno patiliwnak.
33 Ngem inkabildak iti kuribot sadak impababa iti maysa a tawa ti bakud,
ket nakalibasak kenkuana.
2 Corinto 12
1 Masapul nga ituloyko ti agpasindayag, uray no awan ti maitedna. Ket
ita, saritaek dagiti parmata ken paltiing nga inted kaniak ti Apo. 2 Am-
ammok ti maysa a Kristiano a naipangato iti maikatlo a langit. Sangapulo
ket uppat a tawenen ti napalabas (diak laeng ammo no sibabagi a napan
wenno saan—ti Dios laeng ti makaammo). 3 Ulitek, ammok a naipangato
daytoy a tao idiay Paraiso. (Kas nasaokon, diak laeng ammo no sibabagi a
napan wenno saan—ti Dios laeng ti makaammo). 4 Nangngegna sadiay
dagiti banag a di mabalin a saritaen, a saan koma a sawen ti tao. 5 Iti
kasta, ipasindayagko daytoy a tao—ngem saanko nga ipasindayag ti bagik,
malaksid dagiti banag a mangipakita iti kinakapsutko. 6 No kayatko ti
agpasindayag, saanak a maysa a maag ta pudno ti sasawek. Ngem saanak
nga agpasindayag gapu ta diak kayat nga adda mangipagarup a
nangatngatoak ngem iti nakitana nga inaramidko wenno nangngegna a
sinaok. 7 Tapno saanak nga tumangsit gapu kadagiti adu a
naisangsangayan a banag a nakitak, naikkanak iti nasaem a sagsagabaen
nga inkabil ni Satanas a mangparigat kaniak tapno diak agtangtangsit. 8
Namitlo a nagdawatak iti Apo nga ikkatenna kaniak daytoy. 9 Ngem
insungbatna kaniak: “Umanayen kenka ti paraburko; ta napigpigsa ti
pannakabalinko no nakapsutka.” Ngarud, maragsakanak unay a
mangitangsit iti aniaman a kinakapsutko tapno mariknak ti pannalaknib ti
pannakabalin ni Cristo. 10 Gapu ken ni Cristo, awan aniamanna kaniak no
nakapsutak, no mapabpabainanak wenno agsagabaak iti rigat. Awan
aniaman dagiti pannakaidadanes ken didigra a paglasatak. Ta napigsaak iti
kanito a nakapsutak. 11 Kaslaak la maag—ngem dakayo ti nangpilit
kaniak nga agbalin a kasta. Dakayo koma ketdi ti mangipakita iti
yaanamongyo kaniak. Ta uray no awan serserbik, saanak a maatiw iti uray
siasino kadagita naisangsangayan unay nga “apostolesyo.” 12 Siaanusak a
nangipakita kadakayo kadagiti pammasingked a maysaak a pudno nga
apostol. Adu ti inaramidko a milagro ken pagilasinan ken nakaskasdaaw a
banag. 13 Ania ti nakaatiwanyo kadagiti sabali nga iglesia, malaksid iti
diak panangrengreng kadakayo iti tulong? Pakawanendak koma iti daytoy
a biddut! 14 Daytoyen ti maikatlo a daras a nakasaganaak a bumisita
kadakayo. Saanakto nga agbalin a pakadagsenanyo. Dakayo ti masapulko,
saan a ti kuartayo. Ta saan a rumbeng a dagiti annak ti mangted iti
kasapulan dagiti nagannak. Dagiti nagannak ketdi ti mangted iti kasapulan
dagiti annak. 15 Siraragsakakto a mangibus iti amin nga adda kaniak—ken
uray pay ti amin a pigsak para iti naespirituan a biagyo. Bumassit kadi ti
ayatyo kaniak gapu ta dumakkel ti panagayatko kadakayo? 16 Ngarud,
anamonganyo a diak nagbalin a pakadagsenanyo. Ngem addanto agkuna a
nasikapak ket inallilawkayo kadagiti ulbod a sao. 17 Kasano?
Ginundawayankayo kadi babaen iti maysa kadagiti imbaonko kadakayo?
18 Mismo a siak ti nangdagdag ken ni Tito nga umay dita, ket imbaonko a
kaduana ti sabali a kabsat a Kristiano. Makunayo kadi a
ginundawayannakayo ni Tito? Saan kadi a maymaysa nga espiritu ti
nangidalan kadakami ket maymaysa ti panggepmi? 19 Nalabit nga
ipagarupyo nga agingga ita, padpadasenmi nga ikalintegan ti bagimi
kadakayo. Saan! Agsaokami a kas iti kayat ni Cristo a panagsaomi iti
imatang ti Dios, ket amin nga aramidenmi, patgek a kakabsat, maaramidda
tapno matulongankayo. 20 Agamakak amangan no inton sumangpetak
dita, masangpetankayo a maisupadi iti kayatko a pagbalinanyo ket
masarakandak met a maigiddiat iti kayatyo a pagbalinak. Agamakak
amangan no masangpetak nga agaapa ken agiinnimonkayo; agpipinnudot;
agiinnimut; agiinninsulto ken agpipinnadakeskayo; agtitinnangsit ken
kanayon nga awan urnosyo. 21 Agamakak amangan no iti sumaruno a
yaayko, pabainannakto ti Diosko iti sangoyo. Agamakak amangan no
agsangitakto gapu kadagiti amin a nagbasol iti napalabas a di nagbabawi
kadagiti narugit nga aramidda—dagiti basolda iti lasag ken kinaderrep.
2 Corinto 13
1 Daytoy ti maikatlo nga isasarungkarko kadakayo. “Iti aniaman a
pammabasol, masapul ti pammaneknek ti dua wenno tallo a saksi,” kuna ti
Nasantoan a Surat. 2 Kayatko a ballaagan dagiti nagbasol iti napalabas ken
dadduma pay. Imbagakon daytoy iti naudi nga isasarungkarko kadakayo,
ngem sawek manen ita ta adayoak: Awanto ti makalisi iti pannusa inton
umayak manen. 3 Maaddaankayto kadagiti amin a pammaneknek a
mangipakita a ni Cristo ti agsasao kaniak. Saan a nakapuy ni Cristo no
adda iti baetyo. Ipakitana ketdi ti pannakabalinna kadakayo. 4 Ta uray no
iti kinakapsut ti nakaigapuan ti ipapatayna iti krus, sibibiag babaen iti
pannakabalin ti Dios. Iti pannakipagmaymaysami kenkuana, nakapuykami
met ngem ti pannakilangenlangenmi kadakayo, makipagbiagkaminto
kenkuana babaen iti pannakabalin ti Dios. 5 Sukimatenyo ti bagiyo tapno
maammoanyo no pudno met laeng nga agbibiagkayo iti pammati. Awan
duadua nga ammoyo nga adda ni Jesu-Cristo kadakayo—malaksid no
parparawpaw ti pammatiyo. 6 Agtalekak a maammoanyonto a saankami a
napaay. 7 Ikarkararagkami iti Dios a dikayto agaramid iti dakes—saan a
tapno makita a nagballigikami no di ket tapno agaramidkayo iti naimbag,
uray no kasla dikami nagballigikami. 8 Ta awan pannakabalinmi a
bumusor iti pudno, ngem adda pannakabalinmi nga agserbi iti pudno. 9
Maragsakankami no nakapsutkami ket napigsakayo. Iti kasta,
idawdawatmi nga awan koma ti pagkuranganyo. 10 Isut’ gapuna nga
isuratko daytoy ita nga awanak iti dennayo tapno inton umayak, diakto
nainget a mangaramat iti turay nga inted kaniak ti Apo. Agpaay daytoy iti
pannakapatanoryo a saan nga iti pannakarakrakyo. 11 Kamaudiananna,
kakabsat, agpakadaakon! Ikagumaanyo ti agbalin a naan-anay. Denggenyo
ti dawatko: Agtutunoskayo ken agbiagkayo a sitatalna ket addanto
kadakayo ti Dios ti ayat ken talna. 12 Agkikinnablaawkayo babaen iti
nainkabsatan nga agek. Pakomustaandakayo dagiti amin a tattao ti Dios.
13 Sapay koma ta adda kadakayo amin ti parabur ni Apo Jesu-Cristo, ti
ayat ti Dios, ken ti pannakikadua ti Espiritu Santo.
Galacia 1
15 nga aldaw. 1-5 Kadakayo a kamkameng dagiti iglesia iti Galacia,
Awatenyo ti kablaawmi kadakayo, siak ken dagiti amin a kakabsat ditoy.
Sapay koma ta parabur ken talna ti ited kadakayo ti Dios nga Amatayo
kasta met ni Apo Jesu-Cristo. Inted ni Cristo ti biagna gapu kadagiti
basbasoltayo, kas mayannurot iti pagayatan ti Dios ken Amatayo, tapno
wayawayaannakayo iti daytoy agdama a lubong a napnoan iti kinadakes.
Madaydayaw koma ti Dios iti agnanayon! Amen. Siak, ni Pablo, ti
naggapuan daytoy a surat. Ti pannakaayabko a kas apostol ket saan a
nagtaud iti tao wenno babaen iti tao no di ket nagtaud ken ni Jesu-Cristo
ken iti Dios Ama a namagungar kenkuana. 6 Masdaawak kadakayo!
Naglakakayo ketdin a mangtallikud iti nangayab kadakayo babaen iti
parabur ni Cristo, ket sumurotkay iti sabali nga ebanghelio! 7
Kinaagpaysona, awan “sabali nga ebanghelio.” Kunak daytoy agsipud ta
adda tattao a mangrirriribuk kadakayo ket kayatda a ballikugen ti
ebanghelio ni Cristo. 8 Ngem uray no dakami wenno maysa nga anghel
nga aggapu sadi langit ti mangikasaba kadakayo iti ebanghelio a
maisupadi iti inkasabamin kadakayo, mailunod koma! 9 Nasaomi idin, ket
ulitek manen, a no adda mangikasaba kadakayo iti ebanghelio a
maisuppiat iti inawatyon, mailunod koma! 10 Iti kastoy a panagsaok,
saanko a sapsapulen ti yaanamong dagiti tattao iti sasawek. Ti
pananganamong ti Dios ti sapsapulek. Panggepko kadi ti agbalin a nalatak
kadagiti tattao? No kasta ti panggepko, saan a rumbeng nga adipennak ni
Cristo. 11 Kakabsat, ibagak daytoy kadakayo: Saan nga aramid ti tao ti
ebanghelio nga ikaskasabak. 12 Saan nga inted wenno insuro daytoy iti
siasinoman a tao no di ket impaltiing a mismo ni Jesu-Cristo. 13
Nadamagyon no kasano ti panagbiagko idi napasnekak a pasurot ti
Judaismo, no kasano ti nakaro a panangidadanesko ken panangipakatko iti
amin a kabaelak a mangdadael iti iglesia ti Dios. 14 Inartapak ti kaaduan
kadagiti kasadarak ken kailiak a Judio iti panangannurot kadagiti
annongen ti Judaismo. Napaspasnekak ngem isuda a nangannurot kadagiti
pannursuro dagiti kapuonak. 15 Ngem uray idi saanak pay a nayanak,
pinilinak ti Dios babaen iti paraburna, ket inayabannak nga agserbi
kenkuana. 16 Idi inkeddeng ti Dios nga ipakaammo kaniak ti Anakna
tapno ikasabak kadagiti Hentil ti Naimbag a Damag maipapan ken Jesu-
Cristo, diak nakiuman iti uray siasinoman. 17 Diak met napan idiay
Jerusalem a nakiuman kadagiti apostoles nga immun-una ngem siak.
Napanak ketdi a dagus idiay Arabia, ket kalpasanna, nagsubliak idiay
Damasco. 18 Napanak laeng idiay Jerusalem kalpasan ti tallo a tawen
tapno sarungkarak ni Pedro. Nakipagtaengak kenkuana iti 15 nga aldaw.
19 Awan nakitak kadagiti apostoles no di la ni Santiago a kabsat ti Apo.
20 Pudno daytoy nga isursuratko. Ammo ti Dios a saanak nga agul-ulbod!
21 Kalpasanna, napanak kadagiti luglugar iti Siria ken Cilicia. 22
Kadagidi a tiempo, didak pay nakitkita dagiti Kristiano idiay Judea. 23 Ti
laeng ammoda isu dagiti mangmangngegda: “Ti nangidadanes kadatayo
idi, maysa itan a mangikaskasaba iti dayta met la a pammati a ginandatna
a pukawen!” 24 Ket dinaydayawda ti Dios gapu kaniak.
Galacia 2
1 Nagsubliak idiay Jerusalem kalpasan ti sangapulo ket uppat a tawen.
Kaduak ni Bernabe. Inkuyogko met ni Tito. 2 Napanak ta impaltiing ti
Dios a masapul a mapanak. Iti pannakisangok kadagiti panguloen ti
iglesia, impalawagko kadakuada ti ebanghelio nga ikaskasabak kadagiti
Hentil. Diak kayat nga awan ibunga ti nagbambannogak iti napalabas ken
ti pagbambannogak iti agdama. 3 Uray no Griego ni Tito a kaduak, saan a
napilit a makugit, 4 nupay kayat idi a kugiten ti sumagmamano a lallaki a
nakitipon iti grupomi a nagpammarang a kas kakabsat. Simrek a sililimed
dagitoy a tattao a kas espia tapno ammoenda ti wayawayami a nagtaud iti
pannakikaysami ken ni Cristo Jesus. Kayatdakami a tagabuen, 5 ngem
pulos a dikam immannugot iti kayatda tapno masalimetmetan a sitatalged
kadakayo ti kinapudno ti ebanghelio. 6 Ngem dagiti kasla pangulo—kunak
daytoy ta saan a nasken kaniak ti kinasiasinoda agsipud ta saan a kitaen ti
Dios ti akinruar a langa—kunak nga awan baro a banag a naisingasingda
kaniak. 7 Nabigbigda ketdi nga inted ti Dios kaniak ti trabaho a
mangikasaba iti ebanghelio kadagiti Hentil, kas met iti panangitedna iti
trabaho ken ni Pedro a mangikasaba iti ebanghelio kadagiti Judio. 8 Ta
nagbalinak nga apostol kadagiti Hentil babaen iti pannakabalin ti Dios, a
kas met iti panagbalin ni Pedro nga apostol kadagiti Judio. 9 Binigbig da
Santiago, Pedro ken Juan a maibilang a papangulo nga intalek ti Dios
kaniak daytoy naisangsangayan a trabaho. Daytoy ti gapuna a
linamanodakami ken ni Bernabe kas pakakitaan iti panagkakaduami.
Nagaanamonganmi nga agtrabahokami kadagiti Hentil ket agtrabahoda
met kadagiti Judio. 10 Ti laeng dinawatda isu ti pananglaglagipmi kadagiti
napanglaw kadakuada. Isu met ti inkagkagumaak nga ar-aramiden. 11 Idi
immay ni Pedro idiay Antiokia, sinuppiatko iti imatang dagiti tattao
agsipud ta nalawag a nagbiddut. 12 Ngamin ta masansan idi a
makilanglang kadagiti Hentil a mamati. Napasamak daytoy sakbay ti
idadateng ti sumagmamano a lallaki nga imbaon ni Santiago. Ngem idi
nakasangpetda sadiay, nagin-inut ni Pedro nga immadayo kadagiti Hentil
ket dinan kayat ti makisango kadakuada iti panganan gapu ta kabutengna
dagiti mangipapilit iti pannakakugit dagiti Hentil. 13 Nagbuteng metten
dagiti dadduma a kakabsat a Judio a kas kenkuana ket naisursurot pay ni
Bernabe. 14 Idi nakitak a saan a nalinteg ti ar-aramidenda ket saan a
mayannurot iti kinapudno ti ebanghelio, kinunak ken ni Pedro iti
sangoananda amin: “Maysaka a Judio, ngem agbibiagka a kas maysa a
Hentil, saan a kas Judio. Apay a pilitem dagiti Hentil nga agbiag a kas
Judio?” 15 Pudno a nayanakkami a Judio, ket saankami a kas kadagiti
kunkunada a Hentil a managbasol. 16 Nupay kasta, ammomi a mapalinteg
ti tao iti sangoanan ti Dios babaen iti panamatina ken ni Jesu-Cristo, a saan
ketdi a babaen iti panangtungpalna iti ipaannurot ti Linteg. Namatikami
met ken ni Cristo Jesus tapno agbalinkami a nalinteg iti sangoanan ti Dios
babaen iti pammatimi ken Cristo, saan a babaen iti panagtungpal iti
ipaannurot ti Linteg. Ta awan ti tao a mapalinteg iti sangoanan ti Dios
babaen iti panangtungpalna iti ipaannurot ti Linteg. 17 Ngarud, no
maibilangkami a managbasol gapu ta ikagumaanmi ti agbalin a nalinteg iti
sangoanan ti Dios babaen iti pannakikaysami ken ni Cristo, kayatna kadi a
sawen a ni Cristo ti nangisungsong iti panagbasol? Saan! 18 No bangonek
manen ti nalpaskon a rinakrak, mapaneknekan a salsalungasingek ti
Linteg. 19 Ngem no maipapan iti Linteg, natayakon—ti met laeng Linteg
ti nangpatay kaniak—ket iti kasta, agbiagak tapno agserbiak iti Dios.
Natayakon a nairaman ken ni Cristo iti krusna. 20 Iti kasta, saanen a siak ti
agbibiag, no di ket ni Cristo ti agbibiag kaniak. No kasano ti panagbiagko
itan, agbiagak a maipaay iti pammati iti Anak ti Dios a nagayat kaniak ken
nangted iti biagna gapu kaniak. 21 Diak iwaksi ti parabur ti Dios. No
mapalinteg ti tao iti sangoanan ti Dios babaen iti Linteg, awan ngarud ti
serserbi ti ipapatay ni Cristo.
Galacia 3
1 Nagnengnengkayo ketdin a taga-Galacia! Siasino aya ti nangallilaw
kadakayo? Nalawag la ngaruden a naipakita kadakayo a nailansa ni Jesu-
Cristo iti krus! 2 Saludsodek man daytoy: Inawatyo kadi ti Espiritu ti Dios
babaen iti panangtungpalyo iti ipaannurot ti Linteg wenno babaen iti
panagdengngeg ken panamatiyo iti ebanghelio? 3 Nagmaagkayon!
Nangrugikay iti baro a biagyo babaen iti Espiritu ti Dios. Ita, kayatyo
kadin ti agpatingga babaen iti nainlasagan a wagas? 4 Pulos kadi nga awan
serserbi dagiti amin a padasyo? Kunak nga adda! 5 Ited ti Dios ti
Espirituna ken agaramid kadagiti milagro kadakayo. Aramidenna kadi
dagitoy gapu ta tungtungpalenyo ti ipaannurot ti Linteg wenno gapu ta
dumngeg ken mamatikayo iti ebanghelio? 6 Ket ita, masapul nga
amirisentayo ti padas ni Abraham. Kuna ti Nasantoan a Surat, “Namati ni
Abraham iti Dios ket gapu iti pammatina, imbilang ti Dios a nalinteg.” 7
Ngarud, masapul a bigbigenyo a dagiti addaan pammati isuda ti
napaypayso a kaputotan ni Abraham. 8 Impakpakauna ti Nasantoan a
Surat a palintegen ti Dios dagiti Hentil babaen iti pammati. Ket
naipakaammo ti Naimbag a Damag ken ni Abraham, “Sikanto ti aramaten
ti Dios iti panangbendisionna iti amin a sangkataoan.” 9 Namati ni
Abraham ket nabendisionan. Mabendisionan met ngarud dagiti amin a
mamati a kas kenkuana. 10 Nailunod dagiti mangipagarup nga awatento
ida ti Dios gapu iti panagtungpalda iti Linteg. Ta kuna ti Nasantoan a
Surat, “Mailunod ti siasinoman a saan nga agtungpal iti amin a naisurat iti
libro ti Linteg!” 11 Ita, nalawag nga awan ti agbalin a nalinteg iti
sangoanan ti Dios babaen iti Linteg. Ta kuna ti Nasantoan a Surat,
“Agbiagto ti pinalinteg ti Dios babaen iti pammati.” 12 Ngem saan nga
agbatay ti Linteg iti pammati, no di ket kas kuna ti Nasantoan a Surat,
“Agbiagto babaen iti Linteg ti siasinoman a mangannurot iti amin nga
ipaannong ti Linteg.” 13 Ngem idi nagsagaba ni Cristo gapu kadatayo,
nawayawayaannatayo iti panangukom ti Linteg. Kas kuna ti Nasantoan a
Surat, “Naukom ti siasinoman a maibitin iti kayo.” 14 Inaramid ni Cristo
daytoy tapno maited kadagiti Hentil ti bendision nga inkari ti Dios ken ni
Abraham babaen ken ni Cristo Jesus, ket awatentayo koma ti Espiritu nga
inkari ti Dios babaen iti pammati. 15 Kakabsat iti pammati, aramatek ti
inaldaw a pangarigan: No agtulag ti dua a tao ket firmaanda ti
pagtulaganda, awan ti makabalin a mangwaswas wenno mangbalbaliw iti
nailanad. 16 Ita, adda inkari ti Dios ken ni Abraham ken iti kaputotanna.
Saan a kuna ti kari, “ken kadagiti kaputotam,” kayatna a sawen, adu a
tattao; ngem kunana, “ken iti kaputotam,” kayatna a sawen, maymaysa
laeng a tao nga isu ni Cristo. 17 Daytoy ti kayatko a sawen: Nakitulag ti
Dios ket inkarina a tungpalen dayta a tulag. Ti Linteg a naited kalpasan ti
430 a tawen dina mawaswas dayta a tulag ket dina met maukas ti kari ti
Dios. 18 No agbatay iti Linteg ti sagut ti Dios, saanen a maibatay iti
karina. Nupay kasta, inted ti Dios ti sagutna ken ni Abraham agsipud ta
inkarina kenkuana. 19 Ania ngarud ti panggep ti Linteg? Naited tapno
ipakitana no ania ti panagsalungasing. Nairanta nga agpatingga inton
umay ti kaputotan ni Abraham a nakaitedan daytoy a kari. Dagiti angheles
ti nangted iti Linteg babaen iti maysa a tao a kas mangibabaet. 20 Ngem
saan a masapul ti mangibabaet no maymaysa laeng ti makitulag; ket
maymaysa ti Dios. 21 Kayat kadi a sawen daytoy a ti Linteg maibusor
kadagiti karkari ti Dios? Saan! Ta no adda koma linteg a naituyang a
mangted iti biag, mapalinteg ngarud ti tunggal maysa iti sangoanan ti Dios
babaen iti panangtungpalna iti dayta a linteg. 22 Ngem kuna ti Nasantoan
a Surat nga adda ti entero a lubong iti babaen iti pannakabalin ti basol
tapno maited kadagiti mamati ti naikari a sagut babaen ti pammati ken ni
Jesu-Cristo. 23 Ngem sakbay nga immay ti tiempo a mabalin dagiti tattao
ti mamati, kaslatayo balud nga impupok ti Linteg, agingga a
maiparangarang daytoy a pammati. 24 Ngarud, inaywanannatayo ti Linteg
agingga iti yaay ni Cristo tapno agbalintayo a nalinteg iti sangoanan ti
Dios babaen iti pammati. 25 Ita ta panawenen a mamati dagiti tattao,
agpatingga metten ti panangaywan ti Linteg kadatayo. 26 Annaknakayo
amin ti Dios babaen iti pammati gapu iti pannakipagmaymaysayo ken ni
Cristo Jesus. 27 Nabuniagankayo iti pannakipagmaymaysayo ken ni Cristo
ket iti kasta, inkawesyo a mismo ni Cristo. 28 Ngarud, awan ti pagdumaan
ti Judio ken Hentil, ti tagabu ken ti siwawaya, ti lalaki ken ti babai:
maymaysakayo amin ken ni Cristo Jesus. 29 No taonakayo ni Cristo,
kaputotannakayo ngarud ni Abraham, ket awatenyonto ti inkari ti Dios.
Galacia 4
1 Kastoy ti kayatko a sawen: No ubing pay laeng ti agtawid, maibilang a
tagabu nupay isu ti akinkukua iti amin. 2 Adda dagiti mangaywan
kenkuana ken manarawidwid kadagiti sanikua a tagikuaennanto agingga a
dumanon ti tiempo nga inkeddeng ni amana. 3 Tagabunatayo met idi
dagiti nainlubongan a pannakabalin sakbay a nataengantayo iti espiritu. 4
Ngem idi dimtengen ti tumutop a tiempo, imbaon ti Dios ti mismo nga
Anakna. Immay a nayanak iti babai; nagbiag iti babaen ti Linteg dagiti
Judio 5 tapno subbotenna dagiti adda iti babaen ti Linteg, ket agbalintayo
nga annak ti Dios. 6 Tapno maipakita nga annaknakayo ti Dios, imbaonna
ti Espiritu ti Anakna iti puspusotayo. Daytoy ti Espiritu nga umawag iti
“Ama! Tatangko!” 7 Ngarud, saankan a tagabu no di ket maysakan nga
anak. Ket gapu ta anaknaka ti Dios, itedna kenka dagiti amin nga adda
kenkuana nga ipatawidna kadagiti annakna. 8 Idi saanyo pay nga ammo ti
Dios, tagabunakayo dagiti parsua a sinan-dios. 9 Ngem ita ta ammoyon ti
Dios—wenno, kunak ketdi, ita ta ammonakayon ti Dios—apay a
tarigagayanyo ti agsubli kadagiti nakapuy ken nakaay-ay-ay nga agturay
nga espiritu? Apay a kayatyo manen ti patagabu kadakuada? 10
Ngilinenyo pay ketdin dagiti ibilangyo a naisangsangayan nga aldaw,
bulan, panawen ken tawen! 11 Yam-amakkayo, amangan no awan serserbi
ti nagbannogak kadakayo. 12 Kakabsatko, yunay-unayko nga agbalinkayo
a kas kaniak yantangay ta nagbalinakon a kas kadakayo. Awan dakes nga
inaramidyo kaniak. 13 Ammoyo no apay nga inkasabak kadakayo ti
ebanghelio iti umuna a gundaway; gapu ta masakitak idi. 14 Nupay dakkel
a nakasuotanyo ti salun-atko, didak inumsi wenno tinallikudan. Inawatdak
ketdi a kas iti panangawatyo iti anghel ti Dios. Wen, inawatdak a kas iti
panangawatyo ken ni Cristo Jesus. 15 Kasta unay ti ragsakyo idi! Ania
kadi ti napasamaken? Makunak daytoy maipapan kadakayo: No mabalin
la koma, uray suatenyo pay idi dagiti matayo ket itedyo kaniak. 16 Ita,
nagbalinak kadin a kabusoryo gapu ta imbagak ti pudno? 17 Napigsa unay
ti kalikagum dagita sabali a tattao a manggun-od iti panagtalekyo, ngem
saan a nasayaat ti panggepda. Kayatda laeng a maisinakayo kaniak tapno
sumurotkayo kadakuada. 18 Ita, nasayaat met ti kaadda iti kasta a
panagkalikagum no la ket naimbag ti panggep—pudno daytoy a
kankanayon, saan la a no addaak kadakayo. 19 Ingungotek nga annak!
Mariknak manen nga agrigatak a kas iti panagpasikal ti maysa nga ina,
agingga nga agbalinkayo a pudpudno a pasurot ni Cristo. 20 Addaak la
koma iti dennayo ita tapno agbaliw daytoy riknak. Madanaganak unay
kadakayo! 21 Saludsodek man kadakayo nga agtarigagay a paiturayan iti
Linteg: Ammoyo kadi ti pudno a kaipapanan ti Linteg? 22 Naisurat nga
adda dua a lallaki nga annak ni Abraham. Maysa ti anakna iti tagabu ket ti
maysa, iti siwawayawaya a babai. 23 Naipasngay ti anak ti tagabu a kas iti
kadawyan a pannakayanak, ngem ti anak ti siwawayawaya, naipasngay a
pakatungpalan ti kari ti Dios. 24 Mabalin a maawatan a kas pangarigan
dagitoy a bambanag. Dagiti dua a babbai, iladawanda ti dua a tulag. Ti
babai a nagipasngay kadagiti tagabu nga annak isu ni Agar; iladawanna ti
tulag a naaramid iti Bantay Sinai. 25 Iladawan ni Agar ti Bantay Sinai
idiay Arabia, ket kayariganna ti agdama a siudad ti Jerusalem a natagabu
agraman dagiti amin nga umili sadiay. 26 Ngem siwawayawaya ti
nailangitan a Jerusalem, ket isu ti inatayo. 27 Ta kuna ti Nasantoan a
Surat: “Agragsakka, babai nga awanan anak! Agpukkaw ken agdir-ika iti
rag-o, Sika a di pay nakarikna iti rigat ti agpasikal! Ta ad-adunto ti anak ti
babai a nabaybay-an Ngem ti babai nga adda iti denna ti asawana.” 28 Ita,
kakabsatko, kas ken ni Isaac, annaknakayo ti Dios. Dakayo ti
pakatungpalan ti karina. 29 Kadagidi a panawen, ti lalaki a naipasngay a
kas kadagiti ubbing a kadawyan a mainaw ken mayanak, indadanesna ti
naipasngay babaen iti Espiritu ti Dios. Kasta pay la ti mapaspasamak
agpapan ita. 30 Ngem ania ti kuna ti Nasantoan a Surat? Kunana,
“Pagtalawem daytoy a tagabu ken ti anakna a lalaki. Ta ti anak daytoy a
tagabu saan a makipagtawid iti sanikua ni amana a kas iti panagtawid ti
anak ti siwawayawaya a babai.” 31 Ngarud, kakabsatko, saan a ti tagabu a
babai ti inatayo, no di ket ti siwawaya.
Galacia 5
1 Winayawayaannatayo ni Cristo! Kayatna a sawen a pudno a
siwawayatayo. Agtalinaedkayo ngarud a kas nawayawayaan a tattao, ket
diyo ipalubos nga agbalinkayo manen a tagabu. 2 Dumngegkayo. Siak ni
Pablo. Ibagak kadakayo a no ipalubosyo a makugitkayo, kayatna a sawen
nga awan serserbi ni Cristo kadakayo. 3 Ballaagak manen ti siasinoman
nga agpakugit: rebbengna a tungpalen ti entero a Linteg. 4 No
tarigagayanyo ti mapalinteg iti sangoanan ti Dios babaen iti
panagtungpalyo iti Linteg, naisinakayo ken ni Cristo ket nailaksidkayo iti
parabur ti Dios. 5 Iti biangmi, namnamaenmi nga agbalinkami a nalinteg
iti imatang ti Dios babaen iti pannakabalin ti Espiritu gapu iti pammatimi.
6 Ta iti pannakikaysami ken ni Cristo Jesus, awan paggiddiatan ti
pannakakugit wenno saan a pannakakugit. Ti nasken ketdi, isu ti pammati
nga agtrabaho babaen iti ayat. 7 Naimbag unay ti inrugiyo nga aramid!
Siasino kadi ti nangpasardeng kadakayo nga agtulnog iti pudno? Kasano ti
panangallukoyna kadakayo? 8 Saan nga aramid daytoy ti Dios a nangayab
kadakayo. 9 Kas tay kunadan, “Ti bassit a lebadura, pabussogenna ti
entero a masa.” 10 Ngem gapu iti pannakikaysatayo iti Apo, agtalekak a
saanyo a suroten ti sabali a kapanunotan. Dusaento ti Dios ti siasinoman a
tao a mangrirriribuk kadakayo. 11 Iti biangko, kakabsat, no ikaskasabak a
nasken ti pannakakugit, apay a maidaddadanesak pay laeng? No pudno
nga ikaskasabak daytoy, awanen ti riribuk a patauden ti
panangikaskasabak iti krus ni Cristo. 12 Nayonan pay koma dagiti
mangrirriribuk kadakayo ti ar-aramidenda, uray no sugatsugatenda dagiti
bagbagida! 13 Iti biangyo, kakabsatko, naayabankayo nga agwayawaya.
Ngem saan a daytoy a wayawaya ti panggapuanyo a mangipalubos nga
iturayannakayo ti tarigagayyo a kas tao. Agtitinnulongkayo ketdi gapu iti
ayat. 14 Ta madagup ti amin a Linteg iti maymaysa a bilin: “Ayatem ti
padam a tao a kas iti bagim.” 15 Ngem no kaskayo la kadagiti animal nga
agkikinnagat ken agdidinnangran, agannadkayo amangan no
agiinnibuskayo. 16 Daytoy ti kayatko a sawen: ituloyyo ti paidalan iti
Espiritu, ket diyo pagustoan ti tarigagay ti kinataoyo. 17 Ta maibusor ti
tarigagay ti Espiritu iti tarigagay ti kinatao. Maibusor met ti tarigagay ti
kinatao iti tarigagay ti Espiritu. Agbinnusor dagitoy, kayatna a sawen,
diyo maaramid ti kayatyo nga aramiden. 18 No idalannakayo ti Espiritu,
saannakayo nga iturayan ti Linteg. 19 Nalawag a makita ti aramid ti
kinatao. Isuda dagitoy: pannakikamalala, kinarugit, kinaderrep, 20
panagrukbab kadagiti didiosen, panagan-anito, panaggiginnura,
panagaapa, panagiinnimon, panagpungpungtot, kinaagum, 21
panagiinnapal, panagbarbartek, nalabes a panagragragsak ken dadduma
pay a kas kadagitoy. Ballaagankayo ita a kas panangballaagko kadakayo
idi a dagiti agaramid kadagitoy didanto mairaman a makipagyan iti
Pagarian ti Dios. 22 Ngem ti Espiritu pataudenna ti ayat, rag-o, talna,
anus, kinamanangngaasi, kinaimbag, kinamatalek, 23 kinapakumbaba ken
kinamanagteppel. Awan ti linteg a maibusor kadagitoy. 24 Ket dagiti
pasurot ni Cristo Jesus, inlansada ti daan a kinataoda agraman ti amin a
gartem ken naindagaan a tarigagay. 25 Inikkannatayo ti Espiritu iti biag;
masapul nga iturayanna met ti biagtayo. 26 Ditay koma agpalangguad,
wenno agpipinnasakit wenno agiinnapal.
Galacia 6
1 Kakabsatko, no adda maduktalan nga agaramid iti aniaman a kita ti
kinadakes, dakayo nga agtungtungpal iti Espiritu iturongna koma iti
nasayaat a dalan. Ngem masapul a sayaatenyo a bagbagaan. Annadanyo
dagiti bagbagiyo, amangan la ketdi no masulisogkayo met. 2
Agtitinnulongkayo iti pakadagsenan ti tunggal maysa tapno matungpalyo
ti linteg ni Cristo. 3 No pagarupen ti maysa a tao nga adda kabaelanna,
idinto nga awan met, al-allilawenna laeng ti bagina. 4 Masapul nga usigen
ti tunggal maysa ti bukodna nga aramid. No naimbag, mabalinna a
pagpannakkel ti gapuananna. Saan a masapul nga idiligna ti gapuananna
iti gapuanan ti sabali a tao. 5 Masapul a baklayen ti tunggal maysa ti
bukodna nga awit. 6 Ti tao a masursuroan iti nakristianoan a mensahe,
rebbengna nga ibingayan ti maestrona kadagiti amin nga adda kenkuana a
naimbag. 7 Diyo allilawen dagiti bagbagiyo; saan a marabrabak ti Dios.
Apitento ti tao ti aniaman nga imulana. 8 No agmula nga agpaay iti
bukodna a naindagaan a tarigagay, apitennanto ti patay. No agmula nga
agpaay iti Espiritu, apitennanto ti biag nga agnanayon. 9 Isut’ gapuna a
ditayo koma mauma nga agaramid iti naimbag; ta dumtengto ti tiempo nga
agapittayo no ditay maupay. 10 Ngarud, no adda gundawaytayo,
agaramidtayo iti naimbag a maipaay kadagiti amin a tattao, nangruna
kadagiti kakabsatyo iti pammati. 11 Kitaenyo ti kadadakkel dagiti letra
nga isursuratko kadakayo babaen iti mismo nga imak! 12 Dagiti tattao a
mangipapilit a makugitkayo isuda dagiti agpabuya tapno aglatakda ken
mangipangas kadagiti banag a makita. Nupay kasta, aramidenda daytoy
tapno malisianda ti panagsagaba a maipatay kadakuada gapu iti krus ni
Cristo. 13 Ta uray dagiti nakugit, dida met tungpalen ti Linteg; kayatda a
makugitkayo tapno mabalinda nga ipasindayag nga anamonganyo daytoy
a seremonia. 14 Ngem iti biangko, ti laeng krus ni Apotayo a Jesu-Cristo ti
pagpasindayagko; ta babaen iti krusna, natay ti lubong kaniak, ket natayak
met iti lubong. 15 Saan a nasken no kugit man wenno saan ti tao; ti nasken
ket ti panagbalin a baro a parsua. 16 No maipapan kadagiti agtungpal iti
daytoy a pagalagadan iti biagda, sapay koma ta agturay ti talna ken
kinaimbag—kadakuada ken kadagiti tattao ti Dios! 17 Kas panggibus,
kunak ti kastoy: awanen koma ti mangted kaniak iti riribuk ta ipakita
dagiti piglat iti bagik a tagabunak ni Jesus. 18 Kakabsatko, sapay koma ta
maaddaankayo amin iti parabur ni Apotayo a Jesu-Cristo. Amen.
Efeso 1
1-2 Kadagiti tattao ti Dios isuda a mapagtalkan iti panagbiagda ken ni
Cristo Jesus. Sapay koma ta parabur ken talna ti ited kadakayo ti Dios nga
Amatayo ken ni Jesu-Cristo. Siak, ni Pablo, ti naggapuan daytoy a surat.
Maysaak nga apostol ni Cristo Jesus babaen iti pagayatan ti Dios. 3
Agyamantay iti Dios ken Ama ni Apotayo a Jesu-Cristo! Iti
pannakikaysatayo ken ni Cristo, binendisionannatay iti amin a
naespirituan a sagut iti nailangitan a disso. 4 Sakbay ti pannakaparsua ti
lubong, pinilinatayon ti Dios nga agbalin a kukuana babaen ken ni Cristo,
tapno nasantoan ken awan pakababalawantay iti imatangna. Gapu iti
ayatna, 5 inkeddengen ti Dios a babaen ken Jesu-Cristo, pagbalinennatayo
nga annakna. Daytoy ti pagayatan ken panggepna. 6 Idaydayawtayo ti
Dios gapu iti nakaskasdaaw a panangipakitana iti kinaimbagna kadatayo,
gapu iti intedna a sagut kadatayo babaen iti inaramid ti dungdungngoenna
nga Anak. 7 Babaen iti ipapatay ni Cristo, nagun-od ti wayawaya ket
napakawan dagiti basbasoltayo. Anian a nagdakkel ti parabur ti Dios 8 nga
impaayna a sibubuslon kadatayo! Gapu ta masirib ti Dios ket ammona ti
amin a banag, 9 inaramidna ti pinanggepna. Impakaammona kadatayo ti
nalimed a planona nga inkeddengna a tungpalen babaen ken ni Cristo. 10
Ania ti plano ti Dios nga inkeddengna a tungpalen inton dumteng ti
naituding a tiempo? Isu daytoy: pagkaykaysaenna ti sangaparsuaan, amin
nga adda sadi langit ken ditoy daga a ni Cristo ti pannakaulo. 11
Maaramid dagiti amin a bambanag kas mayannurot iti plano ken
pangngeddeng ti Dios. Pinilinatayo nga agbalin a tattaona babaen iti
pannakikaysatayo ken ni Cristo gapu iti panggepna idi punganay. 12
Idaydayawtayo ngarud ti nadayag a Dios, datayo nga immun-una a
nanginanama ken ni Cristo. 13 Nagbalinkayo met a tattao ti Dios idi
nangngegyo ti pudno a mensahe, ti Naimbag a Damag a nangyeg iti
pannakaisalakanyo. Namatikayo ken Cristo ket minarkannakayo ti Dios
babaen iti pannangtedna iti Espiritu Santo nga inkarina kas pakakitaan iti
panangtagikuana kadakayo. 14 Gapu ta adda kadatayo ti Espiritu ti Dios,
awan duadua nga awatentayo ti inkari ti Dios kadagiti tattaona. Daytoy ti
mangpatalged kadatayo nga ikkanto ti Dios iti naan-anay a wayawaya
dagiti kukuana. Idaydayawtayo ti dayagna! 15 Gapu iti daytoy, manipud
idi nadamagko ti maipapan iti pammatiyo ken ni Apo Jesus, ken ti ayatyo
kadagiti amin a tattao ti Dios, 16 diak mamingga nga agyaman iti Dios
gapu kadakayo. Malagipkayo kadagiti kararagko, 17 ket idawdawatko iti
nagloriaan nga Ama ken Dios ni Apotayo a Jesu-Cristo, nga itedna
kadakayo ti Espiritu a mangted iti sirib ken mangiparangarang iti Dios
kadakayo tapno maammoanyo ti pudno maipapan kenkuana. 18
Idawdawatko a maluktan koma dagiti pampanunotyo tapno makitayo ti
lawag nga agtaud kenkuana, tapno maammoanyo ti namnama a
nangayabanna kadakayo, ti kinabaknang dagiti nakaskasdaaw a bendision
nga inkarina kadagiti tattaona 19 ken ti naindaklan a pannakabalinna nga
agtartrabaho kadatayo a mamati. Daytoy a pannakabalin nga adda
kadatayo, isu met laeng ti nabileg a pannakabalin 20 nga inusarna idi
pinagungarna ni Cristo, ket pinagtugawna iti makannawanna sadi langit.
21 Agturay ni Cristo sadiay. Nangatngato ngem dagiti amin a nailangitan a
papangulo, agtuturay, pannakabalin ken appo. Addaan iti akem a
nangatngato ngem dagiti amin nga akem ti pannakabalin iti agdama ken iti
masakbayan. 22 Inted ti Dios ti pannakabalin ken ni Cristo a mangituray
iti amin a banag, ket isu ti insaadna a kangatoan nga ulo iti iglesia. 23 Ti
iglesia isu ti bagi ni Cristo, ti pakadagupan daydiay mismo a mangpunno
kadagiti amin a banag iti amin a lugar.
Efeso 2
1 Adda idi tiempo a naibilangkayo a natay iti espiritu gapu ta sinukiryo ti
Dios ket nagbasolkayo. 2 Sinurotyo idi ti dakes a panagbiag daytoy a
lubong. Pinaiturayankayo iti naespirituan a pannakabalin ti tangatang, ti
espiritu a mangituray ita kadagiti tattao a saan nga agtulnog iti Dios. 3
Kinaagpaysona, kaslatay amin kadakuada idi. Nagbibiagtayo kas
mayannurot kadagiti naidagaan a tarigagaytayo. Inaramidtayo ti aniaman a
kayat ti bagi ken nakemtayo. Gapu iti daytoy, naitudingtayo met nga
agsagaba iti pannusa ti Dios a kas kadagiti amin a tattao. 4 Ngem dakkel ti
panangngaasi ti Dios ket ay-ayatennatayo la unay, 5 isu nga uray
nataytayo iti espiritu gapu iti kinasukirtayo, pinagbiagnatayo a mairaman
ken Cristo. Insalakannakayo ti Dios gapu iti paraburna. 6 Iti
pannakikaysatayo ken Cristo Jesus, pinagungarnatay iti naespirituan a biag
tapno makipagturaytayo kenkuana sadi langit. 7 Inaramidna daytoy tapno,
iti amin a tiempo iti masakbayan, iparangna ti naisalsalumina ken saan a
matukod a kinamanangngaasina iti panagayatna kadatayo babaen ken
Cristo Jesus. 8-9 Ta gapu iti parabur ti Dios, naisalakantayo babaen iti
pammati. Saanyo nga insalakan ti bagiyo gapu iti inaramidyo. Insagut
kadakayo ti Dios ti pannakaisalakanyo tapno awan ti mangipasindayag iti
daytoy. 10 Datayo ti aramid ti Dios, ket iti pannakikaysatayo ken ni Cristo
Jesus, pinarsuanatayo nga agaramid iti naimbag bayat ti panagbiagtayo
nga intudingna idi. 11 Laglagipenyo no aniakayo iti napalabas, dakay a
nayanak a Hentil nga awagan dagiti Judio iti “saan a nakugit,” ket
awaganda ti bagida iti “nakugit,” (daytoy ti seremonia nga aramiden dagiti
lallaki iti bagida). 12 Naisinakay idi ken Cristo. Ganggannaetkayo idi ket
saankayo a naibilang kadagiti napili a tattao ti Dios. Saankay a nairaman
kadagiti katulagan ti Dios kadagiti tattaona ken naibatay kadagiti karina
kadakuada. Nagbiagkayo ditoy lubong nga awanan namnama ken awanan
pannakainaig iti Dios. 13 Ngem ita, babaen ti pannakikaysayo ken ni
Cristo Jesus, dakayo nga adayo idi, nayasidegkayo gapu ta natay ni Cristo
a kas sakrifisio iti krus. 14 Ta mismo a ni Cristo ti nangyeg iti kappia
kadatayo babaen ti panamagkaykaysana kadagiti Judio ken Hentil. Babaen
iti ipapatayna, rinebbana ti pader a namagsina ken namagbinnusor
kadagitoy a tattao. 15 Winaswasna ti Linteg dagiti Judio a buklen dagiti
bilin ken al-alagaden tapno kadagitoy dua a puli—Judio ken Hentil—
parsuaenna ti baro a puli ti tao babaen iti pannakipagkaysada kenkuana,
tapno ipasdekna ti kappia. 16 Babaen iti ipapatayna iti krus, pinukaw ni
Cristo ti guranggurada ken pinagkaykaysana dagitoy dua a puli iti maysa a
bagi ket inkappiana ida iti Dios. 17 Immay ni Cristo a nangikasaba iti
Naimbag a Damag ti kappia kadagiti amin a tao—kadakay a Hentil nga
adayo iti Dios ken kadagiti Judio nga asideg kenkuana. 18 Gapu ken
Cristo, mabalintay amin ti umasideg iti Ama, Judio man wenno Hentil,
babaen iti maymaysa nga Espiritu. 19 Ngarud, saankayon a ganggannaet
wenno sangsangaili. Agkakailiankayon kadagiti tattao ti Dios.
Kamkamengkayon iti familia ti Dios. 20 Nabangonkayo met iti rabaw ti
fondasion nga impasdek dagiti apostoles ken dagiti profeta, ket ni Cristo a
mismo ti kangrunaan a pasuli. 21 Isu ti mamagkakamang iti entero a
patakder ket parang-ayenna a kas maysa a templo a nasantoan iti Apo. 22
Iti pannakikaysa kenkuana, maikamangkayo met agraman dagiti dadduma
iti pannakabangon ti maymaysa a balay a pagtaengan ti Espiritu ti Dios.
Efeso 3
1 Daytoy ti gapuna a siak, ni Pablo a balud ni Cristo Jesus gapu kadakay a
Hentil, agkararagak iti Dios. 2 Awan duadua a nadamagyon a babaen iti
parabur ti Dios, intedna kaniak daytoy a trabaho a maipaay iti
pagimbaganyo. 3 Imparangarang ti Dios ti nalimed a planona ket
impakaammona kaniak. (Insuratkon ti ababa a pakasaritaan daytoy. 4 No
mabasayo, maammoanyonto no kasano a maawatak ti palimed ni Cristo.)
5 Saan a naipakaammo idi daytoy a palimed iti sangkataoan, ngem
imparangarangen ti Dios babaen iti Espiritu kadagiti nasantoan nga
apostoles ken profetana. 6 Daytoy ti palimed: Babaen iti ebanghelio,
mairaman dagiti Hentil kadagiti Judio nga umawat iti bendision ti Dios.
Kamkamengda iti isu met laeng a bagi, ket mairamanda iti inkari ti Dios
ken ni Cristo Jesus. 7 Nagbalinak nga adipen ti ebanghelio gapu iti
naisangsangayan a sagut nga inted kaniak ti Dios babaen iti
pannakabalinna. 8 Siak ti kanumoan kadagiti nanumo a tattao ti Dios,
ngem siak ti pinili ti Dios a mangipakaammo kadagiti Hentil iti di
matukod a kinabaknang ni Cristo, 9 ken mangipakita kadagiti amin a
tattao iti pannakaibanag daytoy nalimed a plano ti Dios. Iti amin a tiempo
iti napalabas, inlemmeng ti Dios, isu a namarsua iti amin, daytoy nalimed
a planona. 10 Ita, babaen iti iglesia, maammoan dagiti agtuturay ken dagiti
pannakabalin sadi langit ti kinasirib ti Dios iti nadumaduma a
pannakaiparangarangna. 11 Kastoy ti inaramid ti Dios kas mayannurot iti
agnanayon a panggepna a tinungpalna babaen ken ni Cristo Jesus nga
Apotayo. 12 Gapu iti pannakipagmaymaysatayo kenkuana ken gapu ta
agtalektayo kenkuana, saantayo nga agbuteng nga umasideg a sitatalged iti
sangoanan ti Dios. 13 Dawatek ngarud a dikayo maupay iti panagsagabak
gapu kadakayo; pagsayaatanyo amin daytoy. 14-15 Daytoy ti gapuna nga
agparintumengak iti sangoanan ti Ama a paggapuan ti pudno a nagan ti
tunggal familia sadi langit ken ditoy daga. 16 Iti kinabaknang ti gloriana,
dawatek nga itedna kadakayo ti pannakabalin babaen iti Espirituna tapno
bumileg ti akin-uneg a kinataoyo. 17 Agnaed koma a kanayon ni Cristo iti
pusoyo babaen iti pammatiyo kenkuana. Ikararagko a mairamut ken
maipasdekkayo iti ayat 18 tapno dakayo ken dagiti amin a tattao ti Dios,
naan-anay ti pannakaawatyo no kasano ti kadakkel ken kauneg ti
panagayat ni Cristo kadakayo. 19 Wen, mapadasanyo koma no kasano ti
panagayatna kadakayo—nupay saan a naan-anay a maammoan, tapno
awan pagkuranganyo ken mapnokayo iti nadiosan a galad. 20
Madaydayaw koma ti Dios a makaaramid iti nasursurok ngem ti dawaten
wenno panunotentayo babaen iti pannakabalin nga agtartrabaho kadatayo.
21 Maipaay koma kenkuana ti dayaw iti iglesia ken ti dayaw ni Cristo
Jesus, iti amin a tiempo ken iti agnanayon nga awan inggana. Amen.
Efeso 4
1 Ngarud, kas maysa a balud gapu iti panagserbik iti Apo, yunay-unayko
nga agbiagkayo kas maikari iti nangayaban ti Dios kadakayo. 2 Kanayon
koma a napakumbabakayo, naanus ken nasingpet. Ipakitayo ti ayatyo
babaen iti panagtitinnulongyo. 3 Aramidenyo ti amin a kabaelanyo a
mangtaginayon iti panagkaykaysa nga ited ti Espiritu babaen iti talna a
mamagsinggalut kadakayo. 4 Adda maysa a bagi ken maysa nga Espiritu,
kas iti kaadda ti maysa a namnama a nangayaban ti Dios kadakayo. 5
Adda maysa nga Apo, maysa a pammati, maysa a buniag. 6 Adda maysa a
Dios ken Ama ti sangkataoan, Apo ti amin, agtrabaho iti amin ken agtaeng
iti amin. 7 Naikkan ti tunggal maysa kadatayo iti naisangsangayan a sagut
kas mayannurot iti rukod nga inted ni Cristo. 8 Kas kuna ti Nasantoan a
Surat, “Idi immuli sadi langit Adu a balud ti inkuyogna. Nagited iti
sagsagut iti sangkataoan.” 9 Ania ti kayat a sawen ti “immuli”? Kayatna a
sawen nga immuna nga immulog iti kaunggan a paset ti daga. 10 Ngarud,
daydi immulog, isu met laeng ti immuli iti ngatoen ken labes ti tangatang
tapno adda iti amin a lugar iti amin a lubong. 11 Isu ti “nagited iti sagsagut
iti sangkataoan.” Dinutokanna ti sumagmamano nga agbalin nga
apostoles, ti dadduma profeta, ti dadduma ebanghelista, ti dadduma pastor
ken maestro. 12 Inaramidna daytoy tapno isaganana amin a tattao ti Dios
iti nakristianoan a panagserbi, tapno dumakkel ken mapapigsa ti bagi ni
Cristo. 13 Iti kasta, sangsangkamaysatayto iti pammati ken pannakaammo
iti Anak ti Dios. Agbalintayto a pudno a nataengan a mairukod iti kinaan-
anay ni Cristo. 14 Ket saantayton a kasla ubbing wenno bassit a bangka a
yallo-allon dagiti dalluyon wenno yalla-alla ti agbaliwbaliw nga angin.
Kasta ti mapasamak iti panangisuro dagiti manangallilaw a tattao.
Mangyaw-awanda babaen kadagiti ulbod nga ibagbagada. 15 Ngem
babaen iti panangtaginayon iti kinapudno idinto nga iparangarangtayo ti
panagayattayo iti tunggal maysa, dumakkeltayo nga awan pagkuranganna
iti pannakikaysa ken ni Cristo. Isu ti ulo a mamagtutunos 16 iti amin a
paset ti bagi, ket agkakamang ti entero a bagi kadagiti nagsusuopanna.
Isut’ gapuna a no agtrabaho ti tunggal paset a kas rebbengna, dumakkel ti
sibubukel a bagi ket pumigsa babaen iti ayat. 17 Iti nagan ti Apo, kunak
ngarud daytoy ket ballaagankayo a dikay agbiagen a kas kadagiti Hentil.
Awan serserbi ti panagpampanunotda 18 ken nakullaapan ti isipda.
Nailaksidda iti biag nga ited ti Dios agsipud ta awan a pulos ti ammoda
ken natangken ti uloda. 19 Saandan nga ammo ti agbain. Naigamerdan iti
kinadakes ket awanen ti makaigawid iti panagaramid-da kadagiti amin a
kita ti kinarugit. 20 Saan a kasta ti nasursuroyo maipapan ken ni Cristo! 21
Awan duadua a nangnangngegyon ti maipapan kenkuana ket kas
pasurotna, naisuro kadakayo ti kinapudno nga adda ken ni Jesus. 22
Iwaksiyo ngarud ti daan a kinataoyo a nangidalan iti sigud a
panagbiagyo—ti daan a panagbiagyo a mangdaddadael idi kadakayo gapu
kadagiti tarigagay a nangyaw-awan kadakayo. 23 Masapul a naan-anay ti
pannakapabaro ti puso ken isipyo. 24 Masapul nga agbalinkay a baro a tao
a pinarsua ti Dios nga umasping kenkuana, ket maipakita daytoy iti
nalinteg ken nasantoan a panagbiag. 25 Dikayo ngarud agul-ulboden! Ti
pudno laeng ti ibaga ti tunggal maysa iti kabsatna iti pammati, ta
kamkamengtayo amin iti bagi ni Cristo. 26 No agpungtotkayo, diyo
ipalubos nga agbasolkayo. Saan koma a lumnek ti init a di bumaaw ti
pungtotyo tapno 27 diyo ikkan ti Diablo iti gundawayna a mangsulisog
kadakayo. 28 Ti mannanakaw, isardengnan ti agtakaw. Agtrabaho ketdi
tapno mangged a sitatakneng iti kuarta nga agpaay kenkuana ket
makatulong met kadagiti napanglaw. 29 Dikay agsao iti makapasakit.
Usarenyo laeng dagiti balikas a nasayaat ken maiparbeng tapno
matulongan ti siasinoman a kasasaoyo. 30 Ket diyo pagleddaangen ti
Espiritu Santo ti Dios, ta isu ti marka ti Dios iti panangtagikuana kadatayo,
maysa a pammatalged a dumtengto ti Aldaw a panangwayawaya ti Dios
kadatayo. 31 Lipatenyo ti amin a sakit ti nakem, gura ken pungtot. Diyon
bugkawan wenno padpadaksen ti padayo a tao. Ikkatenyo ti aniaman a
sakit ti nakem iti siasinoman. 32 Agkikinnaasi ken agiinnayatkayo ketdi.
Agpipinnakawankayo, kas iti panangpakawan ti Dios kadakayo babaen
ken ni Cristo.
Efeso 5
1 Gapu ta dakayo ti annak a patpatgen ti Dios, masapul a tumuladkayo
kenkuana. 2 Ti koma ayat ti mangiturong iti panagbiagyo, kas iti ayat nga
impaay ni Cristo kadatayo babaen iti pannangtedna iti biagna gapu
kadatayo, kas nabanglo a sagut ken daton a makaparagsak iti Dios. 3
Tattaonakayo ti Dios. Saan ngarud a rumbeng nga adda pakasarsaritaanyo
maipapan iti pannakikamalala wenno kinarugit wenno kinaagum. 4 Di met
tumutop nga agisawangkayo kadagiti naalas, minamaag wenno narugit a
balikas. Agyamankayo ketdi iti Dios. 5 Dikay agduadua iti daytoy:
Awanto ti lugar ti mannakikamalala, narugit wenno naagum iti pagarian ni
Cristo ken ti Dios. (Ta ti kinaagum ket maysa a kita ti panagrukbab iti
didiosen.) 6 Dikay paallilaw iti siasinoman babaen kadagiti ulbod a
sarsarita. Dagitoy ti pakaigapuan ti panagdissuor ti pungtot ti Dios
kadagiti saan nga agtulnog kenkuana. 7 Ngarud, dikayo makikadua
kadagiti kasta a tattao. 8 Addakay idi iti sipnget, ngem gapu ta
nagbalinkayon a tattao ti Apo, addakayon iti lawag. Isut’ gapuna a
masapul nga agbiagkayo a kas tattao a naruam nga agtaeng iti lawag. 9 Ta
ti lawag ti mangyeg iti nawadwad a bunga ti amin a kita ti kinaimbag,
kinalinteg ken kinapudno. 10 Birokenyo no ania ti pakaragsakan ti Apo.
11 Adaywanyo dagiti tattao nga agaramid kadagiti awan serserbina a
banag nga agtaud iti sipnget. Ibutaktakyo ketdi ida. ( 12 Kinapudnona,
nakababain uray ti panangsarita laeng kadagiti ar-aramidenda iti nalimed.)
13 Ket inton maiparangarang ti amin a banag iti lawag, makitanto a
silalatak ti pudno a kababalinda. 14 Ta ti aniaman a maipalgak a silalawag
agbalin a lawag. Daytoy ti gapuna a makunkuna, “Agriingka, sika a
matmaturog, Bumangonka ken ni patay! Ket lawagannakanto ni Cristo.”
15 Ngarud, annadanyo ti panagbiagyo. Dikay agbiag a kas nakuneng a
tattao, no di ket kas mamasirib. 16 Usarenyo ti amin a gundawayyo nga
agaramid iti naimbag agsipud ta dakes dagitoy nga aldaw. 17 Dikay
ngarud agkunkuneng. Ammoenyo ketdi ti kayat ti Apo nga aramidenyo.
18 Dikay agbarbartek ta isut’ pakadadaelanyo. Ikagumaanyo koma ketdi
nga agtaeng kadakayo ti Espiritu. 19 Iti panagsasaritayo, usarenyo dagiti
balikas dagiti salmo, himno ken naespirituan a kankanta. Kantaanyo ti
Apo kadagiti himno ken salmo a buyogan ti naimpusoan a
panagdaydayaw. 20 Kanayon nga agyamankayo iti Dios Ama gapu
kadagiti amin a banag, iti nagan ni Apotayo a Jesu-Cristo. 21
Paiturayankay iti maysa ken maysa kas pakakitaan iti panagraemyo ken ni
Cristo. 22 Babbai, paiturayankayo kadagiti assawayo, kas iti panangituray
ti Apo kadakayo. 23 Ta adda kalintegan ti lalaki a mangibaga no ania ti
aramiden ti asawana, a kas met iti kaadda ti kalintegan ni Cristo a
mangibaga iti aramiden ti iglesia. Ket ni Cristo a mismo ti Mangisalakan
iti iglesia a bagina. 24 Iti kasta, masapul a paiturayan dagiti babbai
kadagiti assawada iti amin a banag, a kas met iti iglesia a paiturayan ken
ni Cristo. 25 Lallaki, ayatenyo dagiti assawayo a kas iti panagayat ni
Cristo iti iglesia. Indatonna ti biagna gapu kenkuana. 26 Inaramidna
daytoy tapno pasantoenna ti iglesia iti Dios babaen iti panangugasna iti
danum ken saona, 27 tapno idatagna iti sangoananna met laeng: ti iglesia a
kasla babai a nakapimpintas—nadalus, awan mansa wenno kuretret wenno
aniaman a pakapilawanna. 28 Rebbeng ngarud nga ayaten ti lalaki ti
asawana a kas iti panagayatna iti bagina. Ti lalaki nga agayat iti asawana,
ayatenna met ti bagina. ( 29 Ta awan ti tao a manggura iti bukodna a bagi.
Taraonanna ketdi ken taripatoenna a kas iti panangtaraon ken
panangtaripato ni Cristo iti iglesia. 30 Ta kamkamengnatayo ti bagina.) 31
Kas kuna ti Nasantoan a Surat, “Daytoy ti gapuna a panawanto ti lalaki
dagiti nagannak kenkuana. Makitiponto iti asawana ket agbalindanto a
maymaysa.” 32 Adda dakkel a kinapudno nga iparangarang daytoy a paset
ti Nasantoan a Surat, ket maawatak a mayaplikar daytoy ken ni Cristo ken
iti iglesia. 33 Mayaplikar met daytoy kadakayo. Masapul nga ayaten ti
tunggal lalaki ti asawana a kas iti bagina. Masapul met a raemen ti tunggal
babai ti asawana.
Efeso 6
1 Dakayo nga annak, agtulnogkayo kadagiti nagannak kadakayo, ta daytoy
ti maiparbeng nga aramidenyo. 2 “Dayawem da amam ken inam,” kuna ti
umuna a bilin a napakuyogan iti kari, 3 “tapno aglak-amka iti amin nga
imbag ket atiddog ti biagmo ditoy daga.” 4 Dakay a nagannak, dikay
agsao wenno agaramid kadagiti banag a mamataud iti panagpungtot dagiti
annakyo kadakayo. Padakkelenyo ketdi ida iti nakristianoan a
pannakadisiplina ken pammagbaga. 5 Dakay a tagabu, agtulnogkayo a
sipapasnek kadagiti appoyo ket agraemkayo kadakuada. Aramidenyo
daytoy a naimpusoan a kasla ni Cristo ti pagserserbianyo. 6 Aramidenyo
daytoy saan la a no kumitkitada kadakayo tapno maay-ayoda kadakayo.
Ngem kas tagabu ni Cristo, aramidenyo ketdi ti pagayatan ti Dios iti amin
a pusoyo. 7 Ngarud, kas tagabu, aramidenyo a siraragsak dagiti trabahoyo
a kasla ti Apo ti pagserserbianyo, a saan ket a dagiti appoyo. 8 Tagabuka
man wenno siwawaya, masiguradom a gunggonaanto ti Apo ti tung-gal
tao iti naimbag nga aramid-na. 9 Dakayo nga appo, kasta met koma ti
umno a pannakilangenyo kadagiti tagabuyo. Isardengyon a butbutngen
ida. Laglagipenyo a dakayo ken dagiti tagabuyo, agpapadakayo nga
agserserbi iti maymaysa nga Apo sadi langit nga awan ti idumdumana. 10
Kamaudiananna, agbalinkay a natibker iti pannakikaysayo iti Apo ken iti
nabileg a pannakabalinna. 11 Ikawesyo ti amin a kabal nga ited ti Dios
tapno mabalinyo a sarangten dagiti pangallilaw ti Diablo. 12 Saan a dagiti
tattao ti kagubgubattayo, no di ket ti armada dagiti demonio iti tangatang,
dagiti agturay, dagiti pannakabalin ken dagiti didiosen wenno espiritu a
pagdaydayawan dagiti tattao iti daytoy dakes a panawen. 13 Ngarud,
ikabilyo ti salaknib nga inted kadakayo ti Dios! Iti kasta, inton dumteng ti
dakes nga aldaw, mabalinyonto a sarangten ti kabusor, ket kalpasan ti
pannakigubatyo, addakayto pay laeng a nakatakder a sisasagana iti
irarautna ma-nen. 14 Ngarud, sisasaganakayo koma latta. Aramatenyo a
pannakabarikesyo ti kinapudno, ti kinalinteg a kas kabal a salaknibyo 15
ken ti gagaryo a mangipakaammo iti Naimbag a Damag ti talna a
pannakasapatosyo. 16 Mainayon kadagitoy, alaenyo pay ti pammati a
pannakakalasagyo, ta iti daytoy, maiddepyonto ti amin a dumardarang a
pana nga ibiat kadakayo ti Managdakdakes. 17 Awatenyo met ti
pannakaisalakan a pannakahelmetyo ken ti sao ti Dios nga ited ti Espiritu a
pannakakampilanyo. 18 Agkararagkayo bayat ti panangaramidyo
kadagitoy ket iti panagkararagyo, dawatenyo a tulongannakayo ti Dios.
Aniaman nga aramidenyo, agkararagkayo kas idalan ti Espiritu. Gapu iti
daytoy, agsalukagkayo ket dikayo maupay. Kanayon nga idawdawatanyo
dagiti amin a tattao ti Dios. 19 Idawdawatandak met nga ikkannak ti Dios
iti mensahe inton nakasaganaak nga agsao tapno naturedak a
mangipakaammo iti palimed ti ebanghelio. 20 Maipuon iti daytoy nga
ebanghelio, maysaak a pannakabagi ni Jesu-Cristo nupay sibabaludak.
Idawdawatyo a naturedak a mangipakaammo iti daytoy, kas rebbengko
nga aramiden. 21 Ipakaammonto kadakayo ni Tikico ti amin a damag
maipapan kaniak tapno maammoanyo ti kasasaadko. Napateg a kabsattayo
ni Tikico ken mapagtalkan nga adipen iti trabaho ti Apo. 22 Daytoy ti
gapuna nga ibaonko nga umay kadakayo—tapno ibagana kadakayo ti
kasasaadmi amin, ket iti kasta, pumigsa ti pakinakemyo. 23 Sapay koma ta
ited ti Dios Ama, kasta met ni Apo Jesu-Cristo, ti talna ken ayat a buyogen
ti pammati kadagiti amin a kakabsat. 24 Sapay koma ta adda ti parabur ti
Dios kadagiti amin a di agressat ti panagayatna ken ni Apotayo a Jesu-
Cristo.
Filipos 1
1-2 Kadagiti amin a tattao ti Dios nga agnaed dita Filipos, isuda a
makipagkaykaysa ken ni Cristo Jesus, kasta met kadagiti panglakayen ken
nadutokan a katulongan iti iglesia, Sapay koma ta parabur ken talna ti ited
kadakayo ti Dios nga Amatayo ken ni Apo Jesu-Cristo. Naggapu
kadakami daytoy a surat—da Pablo ken Timoteo—nga adipen ni Cristo
Jesus. 3-5 Agyamanak iti Diosko tunggal malagipkayo. Tunggal
idawdawatankayo, agkararagak a sirarag-o gapu iti panangtulongyo kaniak
iti pannakaisaknap ti ebanghelio manipud idi damo a naikasaba kadakayo
agingga ita. 6 Kapkapnekak a ti Dios a nangirugi iti daytoy naimbag nga
aramid kadakayo, ileppasna agingga iti Aldaw a panagsubli ni Cristo
Jesus. 7 Kanayon nga addakayo iti pusok. Maiparbeng a kastoy ti riknak
kadakayo ta nakiramankay amin iti daytoy a parabur nga impangruna nga
inted ti Dios kaniak, uray idi siwayawayaak pay a mangsalaknib ken
mangpatalged iti ebanghelio, ken uray pay ita nga addaak iti pagbaludan. 8
Ammo ti Dios a pudno ti kunak a kasla kadakkel ti ayat ni Cristo Jesus
daytoy nga iliwko kadakayo. 9 Ikararagko a dumakkel koma a dumakkel ti
ayatyo agraman pudno a pannakaammo ken naan-anay a pannakaawat 10
tapno mabalinyo a pilien ti kasayaatan. Iti kasta, awanto ti aniaman a
kinarugit ken pakababalawanyo inton Aldaw a panagsubli ni Cristo. 11
Mapnonto ti biagyo iti pudno a kinaimbag a ni laeng Jesu-Cristo ti
makaaramid ket daytoy ti pakaitan-okan ken pakaidaydayawan ti Dios. 12
Kakabsatko iti pammati, kayatko a maammoanyo a pudno a nakatulong iti
pannakaisaknap ti ebanghelio dagiti napasamak kaniak. 13 Kas bungana,
ammo dagiti amin a guardia iti palasio ken amin nga adda ditoy a
naibaludak gapu ta adipennak ni Cristo. 14 Ket gapu iti pannakaibaludko,
immad-adda ti panagtalek ti kaaduan kadagiti kakabsat iti Apo. Iti kasta,
timmuredda a mangikaskasaba iti mensahe nga awan pagbutnganda. 15
Agpayso nga ikasaba ti sumagmamano kadakuada ti naimbag a damag
maipapan ken ni Cristo gapu ta naapal ken mannakiapada. Ikasaba met ti
dadduma ta nadalus ti panggepda. 16 Aramidenda ti kasta gapu iti ayat, ta
ammoda nga inted ti Dios kaniak ti trabaho a mangsalaknib iti ebanghelio.
17 Aginkukuna dagiti dadduma a mangikasaba iti maipapan ken ni Cristo,
ta mangasabada gapu iti agum. Ipagarupda a manayonanda ti rigatko iti
kaaddak iti pagbaludan. 18 Ngem ania ngarud ti mabalinko?
Maragsakanak ketdi iti napasamak—ti nasken ket maikasaba ni Cristo iti
uray ania a pamuspusan, naimbag man ti panggepda wenno agpaay laeng
iti pagimbaganda. Wen, agragsakakto latta, 19 ta ammok a
mawayawayaanakto babaen kadagiti kararagyo ken iti tulong ti Espiritu ni
Jesu-Cristo. 20 Nasged ti tarigagay ken namnamak a diak koma agliway iti
pagrebbengak uray kaanoman, no di ket kankanayon koma, nangruna ita, a
mapnoak iti tured, tapno babaen iti bagik, maidayaw ni Cristo, agbiagak
man wenno matayak. 21 Ta ania ngamin ti biag? Kaniak la a biang, ti biag
isu ti panagserbi ken ni Cristo ket ti ipapatay ibilangko a gunggona, saan a
pannakapukaw. 22 Ngem no babaen iti panagbiagko, ad-adu ti
maaramidko a napateg, diak maibaga no ania ti piliek 23 ta agin-innagaw
kaniak dagitoy dua. Tarigagayak unay ti sumina iti daytoy a biag ket
tumiponak ken ni Cristo—nasaysayaat daytoy para kaniak. 24 Ngem
nasken unay nga agbiagak pay gapu kadakayo. 25 Awan duaduak iti
daytoy; isut’ gapuna nga ammok nga agbiagak pay. Makipagbiagak pay
kadakayo amin tapno nayonak ti panagrang-ay ken panagrag-oyo iti
pammati. 26 Isut’ gapuna nga inton addaak manen iti dennayo, ad-addanto
pay ti panggapuanyo a mangipannakkel kaniak iti panagbiagyo ken ni
Cristo Jesus. 27 Mayannurot koma ngarud ti panagbiagyo iti ebanghelio ni
Cristo, ta sarungkarankayo man wenno saan, madamagko koma a
natibkerkayo iti maymaysa a panggep, ken sangsangkamaysakayo a
makidangadang gapu iti pammati a naibatay iti ebanghelio. 28 Dikay
agbuteng kadagiti kabusoryo. Agturedkayo a kankanayon. Daytoy ti
mangipakita kadakuada a maabakdanto, ngem agballigikayto ta
pagballigiennakayo ti Dios! 29 Ta naited kadakayo ti gundaway nga
agserbi ken ni Cristo, saan laeng a babaen iti panamatiyo kenkuana, no di
pay ket iti panagsagabayo gapu kenkuana. 30 Ita, kaduakayon a
makiranget iti dangadang a nakitayo a nakirangrangetak iti napalabas ken,
kas madamdamagyo, pakirangrangetak pay laeng.
Filipos 2
1 Mapapigsakayo iti panagbiagyo ken ni Cristo ken maliwliwakayo gapu
iti ayatna. Adda pannakikadkaduayo iti Espiritu ket agdidinnungngo ken
makipagriknakayo iti tunggal maysa. 2 Dawatek ngarud kadakayo nga
itedyo ti naan-anay a ragsakko babaen iti panagmaymaysayo iti panunot,
ayat, kararua ken nakem. 3 Dikay agaramid iti aniaman gapu iti kinaagum
wenno kinapalangguad. Agpakumbabakayo ketdi iti maysa ken maysa ket
diyo ipagarup a naim-imbagkayo ngem dagiti dadduma. 4 Saan la a ti
pagimbaganyo ti kitaenyo. Kitaenyo met ti pagimbagan ti tunggal maysa.
5 Adda koma kadakayo ti kababalin a kas iti kababalin ni Cristo Jesus: 6
Nupay addaan iti galad ti Dios, Dina inkankano ti pannakipadana
kenkuana. 7 Siaayat ketdi a nangibaba iti bagina Ket innalana ti kasasaad
ti maysa nga adipen. Nagbalin a tao, nagparang iti nataoan a langa. 8
Nagpakumbaba ket nagtulnog agingga ken ni patay, wen, uray iti
ipapatayna iti krus. 9 Gapu iti daytoy, intan-ok ti Dios iti kangatoan a
saad, Ket intedna kenkuana ti nagan a natantan-ok ngem ti amin a nagan.
10 Iti kasta, kas pammadayaw iti nagan ni Jesus, Agparintumeng dagiti
amin a parsua sadi langit, ditoy daga ken iti uneg ti daga. 11 Ket silalatak
nga ipablaak ti amin a tao a ni Jesu-Cristo isu ti Apo, a pakaidaydayawan
ti Dios Ama. 12 Isut’ gapuna, ingungotek a gagayyem, a no kasano ti
kanayon a panagtulnogyo idi addaak kadakayo, ad-adda pay koma ita ta
awanak iti dennayo. Agtrabahokayo a sipapasnek ken naan-anay ti
panagraem ken panagdayawyo iti Dios agingga nga awan pagkurangan ti
pannakaisalakanyo. 13 Kankanayon ngamin nga agtrabaho ti Dios
kadakayo tapno pagbalinennakayo a siaayat ken madadaan nga agtungpal
iti panggepna. 14 Iti uray ania nga aramidenyo, dikay agtantanabutob
wenno agsusuppiat, 15-16 tapno awan pakababalawanyo ket nadaluskayo,
kas awan mulitna nga annak ti Dios nga agnaed iti lubong a napno iti
agkakadakes ken managbasol a tattao. Bayat ti panangipaayyo kadakuada
iti mensahe a mangted iti biag, agraniagkayo kadakuada a kas silaw tapno
addanto panggapuak a mangitangsit kadakayo inton Aldaw a panagsubli ni
Cristo. Ta maipakitanto a nasayaat ti nagbanagan ti amin a
nagbambannogak. 17 Agragsakak uray no masapul a maibuyat ti darak a
mainayon iti sakrifisio nga idaton ti pammatiyo iti Dios. 18 Kasta met a
masapul nga agragsakkayo ket makipagrag-okayo kaniak. 19 Iti mabiit, no
ipalubos ni Apo Jesus, ibaonkonto kadakayo ni Timoteo tapno ammoenna
ti kasasaadyo ket maparegtaak no maammoak ti maipapan kadakayo. 20
Isu laeng ti makipagrikna kaniak. Isu laeng ti napaypayso a mangisakit
kadakayo. 21 Awan ti sabali a birbiroken dagiti dadduma a tattao no saan
la a ti bukodda a pagsayaatan. Dida pampanunoten no kasano a
maaramidda ti pagayatan ni Jesu-Cristo. 22 Ammoyo ti kabaelan ni
Timoteo, ta kaskami la agama a nagtrabaho maipuon iti ebanghelio. 23
Namnamaek ngarud nga ibaon ni Timoteo kadakayo apaman a maammoak
ti pagbanagak. 24 Agtalekak iti Apo a makaumayak met laengen kadakayo
iti saanen a mabayag. 25 Napanunotko a masapul a pagsubliekon
kadakayo ni kabsattayo nga Epafrodito, maysa a katrabahoak ken kaduak
a nakidangadang. Isu ti dinutokanyo nga agserbi a kas pannakabagiyo a
tumulong kaniak. 26 Mailiw a kumita kadakayo amin, ket madanagan
unay agsipud ta naammoanna a nadamagyo kano a nagsakit. 27 Agpayso a
nagsakit ket nagistayan natay, ngem kinaasian ti Dios. Saan laeng nga isu
ti kinaasian ti Dios, ngem uray pay siak, ta inlisinak iti dakdakkel a
ladingit. 28 Ad-adda ngarud ti gagarko a mangibaon ken ni Epafrodito,
tapno maragsakankayo a makakita manen kenkuana, ket mapukaw metten
ti ladingitko. 29 Awatenyo ngarud a sirarag-o a kas maysa a kabsat iti
Apo. Ipakitayo ti pammadayawyo kadagiti amin a kas kenkuana, 30 ta
impustana ti biagna ket nagistayan natay gapu iti trabaho ni Cristo tapno
maitedna kaniak ti tulong a saanyo a mabalin nga ited.
Filipos 3
1 Kamaudiananna, kakabsatko, agragsakkayo koma gapu iti
pannakikaysayo iti Apo. Diak rigaten nga ulit-uliten kadakayo dagitoy a
bambanag nga insuratkon, ket mayadayokayo iti peggad. 2 Agannadkayo
kadagiti aso. Agannadkayo kadagiti tattao nga agaramid iti dakes.
Agannadkayo kadagiti tattao a mangipapilit iti pannakakugit. 3 Datayo,
saan nga isuda, ti pudno a nakugit ta agdaydayawtayo iti Dios babaen iti
Espirituna. Agrag-otayo ta ti biagtayo adda ken Cristo Jesus ket saantayo
nga agtalek kadagiti seremonia. 4 Mabalinko met ketdi ti agtalek kadagiti
kakasta a bambanag. No adda mangipagarup a mabalinna ti agtalek
kadagiti seremonia, dakdakkel pay ti panagtalekko. 5 Nakugitak iti
maikawalo nga aldaw kalpasan ti pannakayanakko. Nayanakak nga
Israelita iti tribu ti Benjamin. Maysaak a puro a Hebreo. Kas maysa a
Fariseo, inannurotko idi ti Linteg dagiti Judio. 6 Napasnekak unay idi nga
agaramid kadagiti impagarupko a pagayatan ti Dios, ket urayko la
indadanes dagiti tattao ti iglesia. No maipapan iti panagtungpal iti Linteg,
awan idi ti pakababalawak. 7 Ngem dagiti amin nga imbilangko a
gunggona, mabigbigko itan nga awan pategda, gapu ken Cristo. 8 Wen,
ibilangko amin a pukaw tapno magun-odko ti napatpateg nga isu ti
pannakaammo ken ni Cristo Jesus nga Apok. Gapu kenkuana, binaybay-
akon ti amin a masansan idi nga aramidek. Imbellengko aminen ida a kas
rugit tapno, kas kunadan, magun-odko ni Cristo, 9 ket awan ti
pagkurangan ti pannakikaysak kenkuana. Awanen ti bukodko a kinalinteg,
wen, ti kinalinteg a magun-od babaen iti panagtungpal iti Linteg. Adda
kaniakon ti kinalinteg a magun-od babaen iti pammati ken ni Cristo; wen,
ti kinalinteg nga agtaud iti Dios, ken maibatay iti pammati. 10 Ti la
tarigagayak isu ti pannakaammok ken ni Cristo, ti pannakapadasko iti
pannakabalin ti panagungarna, ti pannakipagsagabak kenkuana ken ti
panagbalinko a kas kenkuana iti ipapatayna, 11 iti namnamak a
mapagungarakto met. 12 Diak kunaen a nagballigiakon wenno awanen ti
pagkurangak. Ngem itultuloyko nga ikabil ti amin a kabaelak a manggun-
od iti gunggona. Daytoy ti panggep nga adda iti panunot ni Cristo Jesus idi
inawisnak a sumurot kenkuana. 13 Kinapudnona, kakabsat, diak ibaga a
naragpatkon daytoy. Aramidek ketdi ti maysa a banag: Lipatek amin a
napalabas ket ipakatko ti amin a kabaelak a manggun-od iti adda iti
masangoanan. 14 Iti kasta, sipipingetak nga agtaray nga agturong iti
pagtungpalan tapno magun-odko ti gunggona a yaw-awis ti Dios kadatayo
babaen ken Cristo Jesus. 15 Ngarud, kastoy met la koma ti riknatay amin a
nataengan iti pammati. No adda sumagmamano kadakayo a maigiddiat ti
riknana, ilawlawagto ti Dios daytoy. 16 Ngem uray no anianto dayta,
agtuloytayo nga agturong iti masangoanan kas mayannurot iti mismo a
pagalagadan a tinungtungpaltayo agingga ita. 17 Itultuloyyo, kakabsatko,
ti tumulad kaniak. Impakitamin kadakayo ti umno a pagtuladanyo.
Siputanyo a naimbag dagiti sumurot iti daytoy a pagtuladan. 18 Namin-
adun nga imbagak daytoy kadakayo, ket agsangitak a mangibaga manen
nga adu dagiti mangdaddadael iti kaipapanan ti ipapatay ni Cristo iti krus
gapu iti kita ti panagbiagda. 19 Agtungpaldanto idiay infierno. Ibilangda
ngamin a diosda dagiti paggarteman ti bagida. Pagpalangguadda dagiti
rebbengda koma ketdi nga ibain, ket dagiti laeng nailubongan a bambanag
ti pampanunotenda. 20 Ngem datayo, makipagilitayo sadi langit, ket
sigagagartayo nga agur-uray iti yaay ti Mangisalakan kadatayo nga aggapu
sadi langit, ni Apo Jesu-Cristo. 21 Baliwannanto daytoy nakapuy ken
matay a bagitayo. Pagbalinennanto a kas iti nagloriaan a bagina babaen iti
isu met laeng a pannakabalin a mamagturay kenkuana iti amin a banag.
Filipos 4
1 Kakabsatko, napategkay unay kaniak, ket mailiwak kadakayo! Dakayo ti
ragsak ken balangatko! Isut’ gapuna, ay-ayatek a kakabsat, nga
agtalinaedkayo a sititibker iti panagbiagyo iti Apo. 2 Ipakpakaasik
kadakayo, Evodias ken Sintike, nga agtunoskayo koma a kas agkabsat iti
Apo. 3 Kasta met kenka a mapagtalkan a katulongak, kayatko a tulongam
dagitoy dua a babbai. Impasnekda ti timmulong kaniak iti pannakaisaknap
ti ebanghelio, agraman ni Clemente ken dagiti amin a katrabahoak a
nailanad ti naganda iti libro ti biag. 4 Kankanayon koma nga agrag-okayo
iti Apo. Kunak manen: agrag-okayo! 5 Ipakitayo ti kinaanusyo kadagiti
amin a tattao. Asidegen ti yaay ti Apo. 6 Awan koma ti pakadanaganyo,
ngem tunggal agkararagkayo iti Dios ket agdawatkayo, diyo liplipatan ti
agyaman kenkuana. 7 Aywanannakayto ti talna ti Dios a di matukod a
panunoten ti tao tapno natalged dagiti puso ken panunotyo iti
pannakikaysayo ken ni Cristo Jesus. 8 Kamaudiananna, kakabsatko,
panunotenyo laeng dagiti bambanag a naimbag ken maikari a raemen:
dagiti napudno, natakneng, nalinteg, nadalus, napintas, ken nadayaw. 9
Ipakatyo dagiti inadal ken inawatyo kaniak—dagiti nangngegyo a sinaok
ken nakitayo nga inaramidko—ket addanto kadakayo ti Dios a mangted iti
talnayo. 10 Nagdakkelen ti rag-ok iti panagbiagko iti Apo! Kalpasan ti
nabayag a tiempo, gundawayyo manen nga ipakita ti panangipategyo
kaniak. Diak kayat a sawen a naumakayon. Awan la ti gundawayyo idi a
mangipakita iti panangipategyo kaniak. 11 Diak met kuna daytoy gapu ta
mariknak a nabaybay-anak. Nasursurokon ti mapnek iti aniaman nga adda
kaniak. 12 Ammok ti rikna ti makurkurangan. Ammok met ti rikna ti
aglaplapusanan. Nasursurok daytoy a palimed, tapno iti sadinoman, iti
amin a tiempo, mabsogak man wenno mabisinak, aglaplapunosanak man
wenno agkurkurangak, mariknak latta ti pannakapnek. 13 Kabaelak a
sarangten ti aniaman a banag babaen iti pannakabalin nga ited kaniak ni
Cristo. 14 Nupay kasta, naimbagkayo unay ta tinulongandak kadagiti
rigatko. 15 Dakayo a taga-Filipos, ammoyo a dakayo laeng ti iglesia a
timmulong kaniak idi pimmanawak idiay Macedonia, idi mairugi a
maikaskasaba ti Naimbag a Damag. Dakayo laeng ti nakiraman kadagiti
gunggona ken pukawko. 16 Saan laeng a namimpinsan nga impaw-itandak
iti tulongyo idi masapulko ti tulong idiay Tesalonica. 17 Saan a gapu ta
kayatko laeng ti umawat kadagiti sagut; tarigagayak ketdi a makita ti ad-
adu pay a naimbag nga aramid a mainayon iti aramidyo. 18 Adtoy ngarud
nga awatek dagiti amin nga intedyo kaniak, ket agyamanak unay.
Nagsursurok pay ti intedyo. Adda aminen a masapulko, ita ta inyeg ni
Epafrodito dagiti amin a sagutyo. Arigda ti daton a nabanglo ti
ayamuomna iti Dios, maysa a sakrifisio a maikari ken makaparagsak
kenkuana. 19 Ket itedto ti Diosko ti amin a masapulyo babaen iti
nawadwad a kinabaknangna ken Cristo Jesus. 20 Madaydayaw koma ti
Dios ken Amatayo iti agnanayon. Amen. 21 Kablaawak dagiti amin a
tattao ti Dios ken ni Cristo Jesus. Pakomustaandakayo dagiti kakabsat a
kaduak ditoy. 22 Pakomustaandakayo met dagiti amin a tattao ti Dios
ditoy, nangruna dagiti agserserbi iti palasio ti Emperador. 23 Sapay koma
ta adda kadakay amin ti parabur ni Apo Jesu-Cristo.
Colosas 1
1-2 Kadakayo a tattao ti Dios dita Colosas a mapagtalkan a kakabsat ken
Cristo, Sapay koma ta parabur ken talna ti ited kadakayo ti Dios nga
Amatayo. Naggapu daytoy a surat kadakami—ni Pablo nga apostol ni
Cristo Jesus babaen iti pagayatan ti Dios, ken ni Timoteo a kabsattayo. 3
Kanayon nga agyamankami iti Dios nga Ama ni Apotayo a Jesu-Cristo
tunggal ikararagandakayo. 4 Ta nadamagmi ti maipapan iti pammatiyo
ken ni Cristo Jesus ken ti ayatyo kadagiti amin a tattao ti Dios. 5 Idi damo
a maipakaammo kadakayo ti pudno a mensahe, ti Naimbag a Damag,
nangngegyo ti maipapan iti namnama nga ipaayna. Iti kasta, maibatay ti
pammati ken ayatyo iti namnama a naisagana idiay langit nga agpaay
kadakayo. 6 Mangted ti ebanghelio kadagiti bendision ket agsaksaknap iti
entero a lubong. Maar-aramid met daytoy kadakayo manipud idi damoyo a
mangngeg ti maipapan iti parabur ti Dios ket naammoanyo ti kinapudno
daytoy a parabur. 7 Nasursuroyo daytoy ken ni Epafras a mangibagi
kadakami. Isu ti patpatgenmi a katrabahoan ken matalek nga adipen ni
Cristo. 8 Imbagana kadakami ti maipapan iti ayat nga inted ti Espiritu
kadakayo. 9 Isut’ gapuna a kanayon nga ikarkararagandakayo manipud
pannakadamagmi iti maipapan kadakayo. Idawdawatmi iti Dios a magun-
odyo ti naan-anay a kinasirib ken pannakaawat tapno maammoanyo a
naimbag ti pagayatanna, 10 ket agbiagkayo a kas iti pagayatan ti Apo.
Aramidenyo a kanayon ti makaay-ayo kenkuana. Agbungakayo iti amin a
kita ti naimbag nga aramid, ket umad-adunto ti ammoyo maipapan iti
Dios. 11 Sapay koma ta mapakiredkayo babaen iti amin a pigsa nga
aggapu iti nagloriaan a pannakabalinna, tapno maibturanyo a siaanus ken
siraragsak ti uray aniaman a mapasamak. 12 Agyamankayo iti Ama a
namagbalin kadakayo a maikari a makipagtawid iti inkari ti Dios nga ited
kadagiti tattaona iti pagarian ti lawag. 13 Inispalnatayo iti pannakabalin ti
sipnget ket impannatayo iti pagarian ti dungdungngoenna nga Anak. 14
Babaen kenkuana nawayawayaantayo, kayatna a sawen, pinakawan ti Dios
dagiti basoltayo. 15 Ni Cristo ti pudno a ladawan ti saan a makita a Dios.
Isu ti inauna nga Anak, kayatna a sawen, katatan-okan kadagiti amin a
parsua. 16 Ta babaen kenkuana, pinarsua ti Dios dagiti amin nga adda
idiay langit ken ditoy daga, dagiti makita ken saan a makita agraman
dagiti naespirituan a pannakabalin; trono, panagturay, kinatan-ok ken
bileg. Pinarsua ti Dios ti entero a lubong babaen kenkuana ken maipaay
kenkuana. 17 Addan ni Cristo sakbay a naparsua ti amin a banag, ket gapu
kenkuana naurnosda iti lugarda iti pannakikaysada kenkuana. 18 Isu ti ulo
ti bagina, kayatna a sawen, ti iglesia. Isu ti paggapuan ti biag ti bagi. Isu ti
inauna nga Anak ti Dios. Napagungar tapno agbalin a kangatoan kadagiti
amin. 19 Ta inkeddeng ti Dios nga agtaeng ti naan-anay a galadna iti
Anak. 20 Ngarud, babaen iti Anak, inkeddeng ti Dios nga ikappia ti
isuamin kenkuana. Ket babaen iti ipapatay ti Anakna iti krus, nagkappia ti
Dios ken ti isuamin a parsua ditoy daga ken sadi langit. 21 Adda idi
panawen nga adayokayo iti Dios. Nagbalinkayo a kabusorna gapu kadagiti
dakes nga aramid ken panunotyo. 22 Ngem ita, babaen iti ipapatay ti
Anakna, inkappianakayo kenkuana tapno agtakderkay iti sangoananna a
nasantoan, nadalus ken awan pakababalawanna. 23 Masapul ngarud nga
agtalinaedkayo a natibker ken natalged iti pammati. Diyo itulok a
magunggonkayo ket mapukawyo ti namnama a nagun-odyo idi
nangngegyo ti ebanghelio. Daytoy ti ebanghelio a naikaskasaba kadagiti
amin a tattao ditoy lubong. Daytoy ti gapuna a siak, ni Pablo, nagbalinak
nga adipen. 24 Ita, maragsakanak kadagiti sagsagabaek gapu kadakayo. Ta
babaen kadagitoy, punnoak ti pagkurangan ti panagsagabak a kasapulan iti
panagserbi ken ni Cristo. Maipaay daytoy a panagsagaba iti iglesia a bagi
ni Cristo. 25 Pinagbalinnak ti Dios nga adipen ti iglesia. Intedna kaniak
daytoy a trabaho, ti naan-anay a panangipakaammok kadakayo iti
mensahena. 26 Nailimed idi daytoy a mensahe kadagiti adu a kaputotan,
ngem naipakaammo itan kadagiti tattaona. 27 Plano ti Dios nga
ipakaammo kadagiti tattaona ti palimedna. Anian a kinadayag ken
kinadaeg ti palimed nga agpaay kadagiti amin a tattao: Agtaeng kadagiti
puspusoyo ni Cristo, ti namnamayo a makiranud iti gloriana. 28
Ipakaammomi ngarud ti kinapudno maipapan ken ni Cristo kadagiti amin
a tattao. Iti amin a kinasirib, ballaaganmi ti tunggal tao iti maipapan iti di
rumbeng nga aramiden ken sursuroanmi ida iti rumbeng nga aramidenda
tapno idatagmi iti sangoanan ti Dios ti tunggal maysa a pulos nga awan
pagkuranganna iti pannakikaysada ken Cristo. 29 Tapno maaramid daytoy,
agbannog ken agrigatak ket aramatek ti amin a bileg ken pannakabalin nga
agtaud ken ni Cristo.
Colosas 2
1 Kayatko a maammoanyo ti rigatko a nagtrabaho a tumulong kadakayo
kasta met kadagiti taga-Laodicea ken amin a saan pay a nakakita kaniak. 2
Aramidek daytoy tapno mapapigsada ken agmaymaysada iti ayat ket
mapnoda iti kinabaknang ti namnama nga ited ti napudpudno a
pannakaawat. Iti kasta, maammoanda ti palimed ti Dios nga isu met laeng
ni Cristo, ket 3 isu ti nangiparang iti amin a gameng ti kinasirib ken
pannakaammo. 4 Ibagak ngarud kadakayo a diyo itulok nga adda
mangallilaw kadakayo babaen kadagiti makaay-ayo a denggen a sao. 5
Uray awanak kadakayo a sibabagi, addaak kadakayo iti espiritu.
Maragsakanak a makaammo a nairut ken natibker ti panagmaymaysayo
nga agtalinaed iti pammatiyo ken Cristo. 6 Yantangay ta inawatyon ni
Cristo Jesus a kas Apo, agbiagkayo koma a mainaig kenkuana. 7
Mairamut ken maipasdek koma ti biagyo kenkuana, ken pumigsa ti
pammatiyo kenkuana kas naisuro kadakayo. Ken kanayonkayo nga
agyaman. 8 Ngarud, agannadkayo tapno dinakay adipenen ti kinasirib nga
aggapu kadagiti sursuro nga impatawid dagiti tattao ken dagiti espiritu nga
agturay iti lubong. Awan serserbi ken mangallilaw dagitoy a pampanunot
ket saanda nga aggapu ken Cristo. 9 Ngamin, agtaeng ken Cristo a kas tao
ti amin a galad ti Dios, 10 ket iti pannakikaysayo kenkuana, inawatyo met
ti pudno a biag. Ta nangatngato ni Cristo ngem ti amin turay ken
pannakabalin. 11 Nakugitkayo iti pannakikaysayo ken Cristo, saan nga iti
pannakakugit nga aramid ti tao, no di ket iti pannakakugit nga agtaud ken
ni Cristo—ti panangiwaksiyo iti daytoy managbasol a bagi. 12 Ta idi
nabuniagankayo, naitanemkayon a nairaman ken Cristo, ket iti dayta a
pannakabuniagyo, napagungarkayo met a kas kenkuana gapu iti
panamatiyo iti nabileg a pannakabalin ti Dios a namagungar kenkuana. 13
Adda idi panawen a naibilangkayo a natay iti espiritu gapu ta
managbasolkayo ken gapu ta saankayo a Judio, kayatna a sawen, awan ti
linteg ni Moises kadakayo. Ngem ita, pinagungarnakayo ti Dios kas iti
pinangpagungarna ken ni Cristo. Pinakawan ti Dios ti amin a basoltayo. 14
Pinunasna ti listaan dagiti basbasoltayo agraman dagiti kakuykuyogna a
paglintegan, ket dinadaelna ti kaipapanan daytoy babaen ti panangilansana
iti krus. 15 Iti dayta a krus, pinarmek ni Cristo dagiti naespirituan nga
agtuturay ken pannakabalin. Impabuyana ida a sipupungo iti parada ti
panagballigina. 16 Isut’ gapuna a manipud ita, diyo itulok nga adda
mangikeddeng iti kanen ken inumenyo, wenno ti aldaw a rambakanyo,
wenno ti Fiesta ti Baro a Bulan, wenno ti maipapan iti Aldaw a
Panaginana. 17 Amin dagitoy, anniniwan laeng dagiti umayto; ngem ti
pudpudno ket isu ni Cristo. 18 Diyo ipalubos nga adda mangsaur
kadakayo iti gunggonayo, isu a mangibagbaga nga ad-adda a
nangnangruna ngem dagiti dadduma gapu kadagiti parmatana ken
mangipapilit iti panagimpapakumbaba ken iti panagdayaw kadagiti
angheles. Napalangguad nga awan gapuna ti kasta a tao. Nailubongan ti
panagpampanunotna. 19 Insardengnan ti panagtalinaedna ken Cristo nga
ulo ti bagi. Ni Cristo ti mangtaraon iti entero a bagi, ken
pagkakamangenna dagiti nagsusuopan ken ur-uratna ket padakkelenna
segun iti kayat ti Dios a panagdakkelna. 20 Iti ipapatay ni Cristo,
nataykayo metten ket naisinakayon kadagiti espiritu nga agturay iti
lubong. Apay ngarud nga agbibiagkayo pay laeng a kasla taga-lubong?
Apay a tungpalenyo dagiti kakastoy a bilin: 21 “Dimo iggaman daytoy,”
“Dimo ramanan dayta,” “Dimo sagiden daydiay”? 22 Mayaplikar amin
daytoy kadagiti bambanag nga agbalin nga awan serserbina apaman a
mausarda. Pagalagadan ken pannursuro laeng ida ti tao. 23 Agpayso a
kasla naibatay iti kinasirib dagitoy nga annuroten: inkapilitan a
panagdayaw kadagiti angheles, panagimpapakumbaba, ken nakaro a
panangparigat iti bagi. Ngem awan serserbida ta dida kabaelan a tenglen ti
panaggartem ti bagi.
Colosas 3
1 Idi napagungar ni Cristo, napagungarkayo met. Ngarud, birokenyo dagiti
adda idiay langit a yan ni Cristo a situtugaw iti tronona, iti makannawan ti
Dios. 2 Panunotenyo dagiti adda sadiay, saan a dagiti adda ditoy daga. 3
Ta nataykayon. Naidulinen ti biagyo iti Dios iti pannakikaysayo ken ni
Cristo. 4 Ni Cristo ti pudno a biagyo. Inton agparang, addakayto met a
kaduana ket mairanudkayto iti gloriana! 5 Ngarud, masapul nga iwaksiyo
dagiti naidagaan a tarigagay a kas iti immoralidad, kinarugit, kinaderrep,
kinarugso ken kinaagum (ta ti kinaagum maysa a kita ti panagrukbab iti
didiosen). 6 Gapu kadagitoy, agdissuorto ti pungtot ti Dios kadagiti saan
nga agtulnog kenkuana. 7 Adda idi tiempo a nagbibiagkayo kadagiti kasta
a panaggartem, idi iturayannakayo dagita a tarigagay. 8 Ngem ita, masapul
nga idianyo amin dagitoy: pungtot, derrep ken gura. Dikay agsao iti
makapabain. Awan koma ti narugit a balikas nga agaon kadagiti bibigyo. 9
Dikay agiinnulbod, ta inuksobyon ti daan a kinatao agraman dagiti
ugalina, 10 ket inkawesyon ti baro a kinatao. Daytoy ti baro a tao a
kanayon a mapabpabaro tapno umasping iti Dios a namarsua kenkuana,
ket naan-anay ti pannakaammoyo kenkuana. 11 Iti kasta, awan Hentil
wenno Judio, nakugit wenno saan a nakugit, ganggannaet, narungsot a tao,
tagabu ken siwawayawaya, no di ket ni Cristo ti isuamin ken adda iti
isuamin. 12 Tattaonakayo ti Dios. Inayat ken pinilinakayo a kukuana.
Ngarud, ipakitayo a naasikayo, naimbag, napakumbaba, nasingpet ken
naanus. 13 No adda pagkunaan ti maysa ken maysa, agiinnanus ken
agpipinnakawankayo. Masapul nga agpipinnakawankayo a kas iti
panangpakawan ti Apo kadakayo. 14 Ket kadagitoy amin, inayonyo ti ayat
a mamagsinggalut a naan-anay iti isuamin. 15 Ti talna nga agtaud ken ni
Cristo ti mangiwanwan koma kadagiti panangeddeng nga aramidenyo.
Daytoy ti nangawisan ti Dios kadakayo iti maymaysa a bagi ket
agyamankayo iti Dios. 16 Agtalinaed koma kadagiti pusoyo ti mensahe ni
Cristo iti amin a kinabaknangna. Agsisinnuro ken agbibinnalakadkayo iti
amin a kinasirib. Agkantakayo kadagiti salmo, himno ken naespirituan a
kankanta, a napno ti pusoyo iti panagyaman iti Dios. 17 Ngarud, amin nga
aramiden ken sawenyo, aramidenyo iti nagan ni Apo Jesus. Agyamankayo
iti Dios Ama babaen kenkuana. 18 Babbai, agtulnogkayo kadagiti
assawayo, ta dayta ti rebbengyo nga aramiden a kas Kristiano. 19 Lallaki,
ayatenyo dagiti assawayo, ket diyo rangranggasan ida. 20 Annak,
agtulnogkayo kadagiti nagannak kadakayo, ta daytoy ti pakaragsakan ti
Dios. 21 Amma, diyo pagsakiten ti nakem dagiti annakyo tapno dida
maupay. 22 Dakayo nga adipen, agtulnogkayo iti amin a banag kadagiti
appoyo, saan laeng a no kitkitaendakayo tapno maay-ayoda kadakayo,
ngem aramidenyo daytoy a sipupudno gapu iti panagraemyo iti Apo. 23
Aniaman nga aramidenyo, ipapusoyo a kasla maipaay iti Apo, a saan a
kadagiti tattao. 24 Laglagipenyo a gunggonaannakayto ti Apo.
Awatenyonto ti tawid nga agpaay kadagiti tattaona. Ta ni Cristo ti
napudpudno nga Apo a pagserserbianyo. 25 Ti siasinoman nga agaramid
iti dakes, madusanto a kas iti kaikarianna, gapu ta awan idumduma ti Dios
iti panangukomna.
Colosas 4
1 Dakayo nga appo, aramidenyo ti nalinteg ken rumbeng kadagiti
tagabuyo. Laglagipenyo nga adda met Apoyo sadi langit. 2 Diyo sardayan
ti agkararag a sisasalukag ket agyamankayo iti Dios. 3
Ikarkararagandakami met tapno ikkannakami ti Dios iti nasayaat a
gundaway a mangasaba ken mangipakaammo iti palimed maipapan ken ni
Cristo. Ta daytoy ti gapuna nga addaak ita iti pagbaludan. 4 Idawdawatyo
a mailawlawagko daytoy kas rebbengko nga aramiden. 5 Annadanyo ti
tignayyo kadagiti saan a mamati ken ni Cristo. Usarenyo a naimbag ti
tiempo a kaaddayo kadakuada. 6 Makaparagsak ken makaay-ayo koma ti
pannakisaritayo kadagiti tattao, ammoyo koma ti tumutop nga isungbatyo
iti uray siasinoman. 7 Ipakaammonto kadakayo ni ay-ayatentayo a kabsat
a Tikico ti amin a damag maipapan kaniak. Mapagtalkan ni Tikico a
kaduami nga agserserbi iti Apo. 8 Ibaonko tapno ibagana ti kasasaadmi
amin, ket iti kasta, mabang-arankayo. 9 Makikuyog kenkuana ni Onesimo
nga ay-ayaten ken mapagtalkan a kabsat a maysa kadakayo.
Ipadamagdanto ti amin a mapaspasamak ditoy. 10 Pakomustaannakayo ni
Aristarco a kaduak a balud, kasta met ni Marcos a kasinsin ni Bernabe.
(Inawatyon ti bilin maipapan ken ni Marcos. Inton umay, awatenyo.) 11
Komustakayo met kano, kuna ni Jesus nga aw-awaganda pay iti Justo.
Kadagiti Judio a mamati, isuda laeng ti makipagtartrabaho kaniak a
maipaay iti Pagarian ti Dios, ket adu ti naitulongda. 12
Pakomustaannakayo ni Epafras a kameng met iti grupoyo. Adipen ni
Cristo Jesus ket kanayon a sipapasnek a mangikarkararag kadakayo.
Idawdawatna iti Dios nga agtalinaedkayo a natibker ken awan
pagkuranganna nga agtungpal iti pagayatan ti Dios. 13 Siak ti makasaksi
iti anepna nga agtrabaho iti maipaay kadakayo ken kadagiti tattao idiay
Laodicea ken Hierapolis. 14 Pakomustaannakayo ni Lucas, ti patpatgenmi
a doktor. Pakomustaannakayo met ni Demas. 15 Idanonyo ti pakomustami
kadagiti kakabsat idiay Laodicea. Pakomustaanyo met ni Nimfas ken ti
iglesia nga aggimgimong iti balayna. 16 Kalpasan ti panangbasayo iti
daytoy a surat, kitaenyo ta maibasa met iti iglesia idiay Laodicea. Kasta
met a basaenyo ti surat nga aggapu kadagiti kakabsat iti Laodicea. 17
Ibagayo ken ni Arkipo nga ileppasna ti trabaho a naitalek kenkuana iti
panagserbi iti Apo. 18 Siak ti akinsurat iti daytoy: Kablaaw ni Pablo. Diyo
liplipatan a sikakawarak! Sapay koma ta paraburannakayo ti Dios.
1 Tesalonica 1
1 Kadagiti kamkameng ti iglesia dita Tesalonica, isuda a tattao ti Dios
Ama ken tattao met ni Apo Jesu-Cristo, Sapay koma ta adda kadakayo ti
parabur ken talna. Dakami, da Pablo, Silas ken Timoteo, ti naggapuan
daytoy a surat. 2 Kankanayon nga agyamankami iti Dios maipuon
kadakayo amin, ket idawdawatandakayo tunggal agkararagkami. 3 Ta
tunggal agkararagkami iti Dios ken Amatayo, malagipmi no kasano ti
panangipakitayo iti pammatiyo babaen iti panagbiagyo, ti gagetyo nga
agtrabaho gapu iti ayat ken no kasano ti kinatibker ti namnamayo ken ni
Apotayo a Jesu-Cristo. 4 Kakabsat, ammomi nga ay-ayatennakayo ti Dios,
ket pinilinakayo nga agpaay kenkuana. 5 Ta inyegmi kadakayo ti Naimbag
a Damag, saan laeng a babaen iti panagsaomi no di pay ket iti
panangipakitami iti pannakabalin ti Espiritu Santo, ket awan
panagduaduami iti kinapudno ti mensahe. Ammoyo ti panagbiagmi idi
nakipagtaengkami kadakayo. Nagpaay daytoy a pagsayaatanyo. 6 Dakami
ken ti Apo ti tinuladyo. Nupay kasta unay ti panagsagabayo, inawatyo ti
sao a napnoankayo iti rag-o, ti rag-o nga agtaud iti Espiritu Santo. 7 Iti
kasta, nagbalinkayo nga ulidan dagiti amin a mamati idiay Macedonia ken
Acaya. 8 Saanyo laeng nga insaknap idiay Macedonia ken Acaya ti damag
maipapan iti Apo. Ngem nagdinamag payen kadagiti amin a disso ti
pammatiyo iti Dios, ket awan ti masaomi. 9 Saritaen amin dagidiay a
tattao ti panangawatyo kadakami idi simmarungkarkami kadakayo, ken ti
panangtallikudyo kadagiti didiosen tapno agserbikayo iti napaypayso ken
sibibiag a Dios. 10 Sarsaritaenda pay ti panagur-urayyo iti yaay ti Anakna
nga aggapu sadi langit. Isu daytoy ni Jesus a pinagungarna ken
mangisalakanto kadatayo inton ukomen ti Dios dagiti tattao gapu kadagiti
basbasolda.
1 Tesalonica 2
1 Pagaammoyo, kakabsat, a saan a nasayang ti tiempo nga isasarungkarmi
idi kadakayo. 2 Ammoyo met ti pannakaparparigat ken pannakaibabainmi
idiay Filipos sakbay nga immaykami dita Tesalonica. Nupay kasta,
inikkannakami ti Diostayo iti tured a nangipakaammo kadakayo iti
Naimbag a Damag nga aggapu kenkuana, uray pay no adu dagiti lapped. 3
Ti panangawismi kadakayo saan nga agtaud iti biddut wenno dakes a
panggep. Awan met ti panggepmi a mangallilaw iti siasinoman. 4
Kanayon ketdi nga agsaokami iti mayannatup iti kayat ti Dios a sawenmi,
ta intalekna kadakami ti Naimbag a Damag. Saan a dagiti tattao ti
paragsakenmi no di ket ti Dios, isu a makaammo kadagiti panggepmi. 5
Pagaammoyo unay a dikam immay nangpaspasablog kadakayo. Saanmi
nga inaramat dagiti balikas a nangilinged iti naagum a panggep. Ammo
daytoy ti Dios! 6 Kasta met a dimi kinalikaguman ti panangdayaw ti
siasinoman kadakami, dakayo man wenno dagiti sabsabali, 7 nupay kas
apostol ni Cristo, adda kalinteganmi nga umawat kadagitoy manipud
kadakayo. Ngem naayat ken naasikami idi addakami iti dennayo, kas iti
ina a mangtaripato kadagiti annakna. 8 Gapu iti ayatmi kadakayo,
sidadaankami a nangipaay kadakayo saan laeng a ti Naimbag a Damag
nga aggapu iti Dios no di pay ket ti mismo a biagmi. Ngamin,
napategkayo unay kadakami! 9 Diak agduadua, kakabsat, a malagipyo no
kasano ti panagtrabaho ken panagbannogmi. Aldaw-rabii a
nagtrabahokami tapno dikam agbalin a pakadagsenanyo bayat ti
panangikasabami kadakayo iti Naimbag a Damag nga aggapu iti Dios. 10
Dakayo ken ti Dios ti saksimi, a nasantoan, nalinteg ken awan
pakababalawan ti panagbiagmi idi iti imatangyo a mamati. 11 Ammoyo a
tinulonganmi ti tunggal maysa kadakayo, kas iti panangtulong ti ama
kadagiti annakna. 12 Pinaregta ken liniwliwadakayo. Indagadagmi met
nga agbiagkayo a pakaragsakan ti Dios a mangayab kadakayo tapno
mairanudkayo iti pagarian ken gloriana. 13 Adda pay sabali a gapu no
apay a kanayon nga agyamankami iti Dios. Idi impakaammomi kadakayo
ti mensahe ti Dios, inawatyo, saan a kas mensahe ti tao, no di ket kas
pudno a mensahe ti Dios. Ket pudno nga aggapu iti Dios daytoy a
mensahe. Ngamin, adda nga agtartrabaho ti Dios kadakayo a mamati. 14
Dagiti mapaspasamak kadakayo, kakabsatko, napasamak met kadagiti
tattao ni Cristo Jesus, kadagiti iglesia ti Dios idiay Judea.
Pinagsagabadakayo dagiti bukodyo a kailian, kas met ti panamagsagaba
dagiti Judio kadagiti taga-Judea. 15 Pinapatayda ni Apo Jesus ken dagiti
profeta, ket indadanesdakami met. Saanda a makaay-ayo iti Dios!
Busorenda dagiti amin a tattao! 16 Iparitda pay ti panangikasabami
kadagiti Hentil iti mensahe a pakaisalakananda koma. Daytoyen ti
pagpatinggaan ti kinadakesda, ket agdissuoren kadakuada ti pungtot ti
Dios! 17 Iti biangmi, kakabsat, idi nayadayokami kadakayo iti apagbiit,
kasta unay ti iliw ken gagarmi a makakita manen kadakayo! Agpayso a
nayadayo ti bagimi kadakayo ngem saan ti panunotmi. 18
Tinarigagayanmi ti agsubli koma kadakayo. Uray siak, ni Pablo, namin-
adu a pinadasko ti umay, ngem linapdannakami ni Satanas. 19 Awan
sabali a namnamami no di dakayo. Dakayo ti ragsakmi. Dakayo ti korona
ti balligi a pagpannakkelmi iti sangoanan ni Apotayo a Jesus inton umay
manen. 20 Wen, dakayo ti gapu no apay nga agpannakkel ken agrag-
okami!
1 Tesalonica 3
1 Kamaudianna, pulos a saankam idin a makaibtur. Nagnunumoanmi
ngarud nga agbatikami a dua idiay Atenas, 2 idinto nga imbaonmi nga
umay kadakayo ti kabsattayo ni Timoteo. Katrabahoanmi ni Timoteo iti
Dios iti pannakaikasaba ti Naimbag a Damag maipapan ken ni Cristo.
Imbaonmi a mangpatibker iti pammatiyo ken mangpapigsa iti
pakinakemyo 3 tapno awan ti sumina gapu kadagitoy a pannakaparigat.
Ammoyo a naituding a sagabaentayo dagitoy a pannakaidadanes. 4
Kinapudnona, idi addakami iti dennayo, imbagbagami a maidadanestayto.
Ket kas pagaammoyo, dayta ti napasamak. 5 Daytoy ti gapuna nga idi
saanakon a makaibtur, imbaonko ni Timoteo tapno ammoenna ti sasaaden
ti pammatiyo. Madanaganak amangan no sinulisognakayon ti Diablo. No
kasta ti mapasamak, awanen ti serserbi dagiti amin a nagbannoganmi. 6
Ngem ita ta nagsublin ni Timoteo, impadamagna ti makaparagsak a
sasaaden ti pammati ken ayatyo. Nasaona pay a silalagipkayo ken
mailiwkayo a makakita kadakami a kas iti iliwmi met a makakita
kadakayo. 7 Isut’ gapuna, kakabsat, a dakayo ti nangparegta kadakami iti
amin a pannakariribuk ken panagsagabami. Ti pammatiyo ti nangpapigsa
kadakami 8 agsipud ta itan, pudno nga agbiagkami no agtalinaedkayo a
natibker iti panagbiagyo iti Apo. 9 Mabalinmin ti agyaman iti Dios gapu
iti rag-o nga impaayyo kadakami. 10 Aldaw-rabii a sipapasnek ti
panagdawatmi iti Dios tapno makitadakayo iti rupan-rupa, ket punnoanmi
ti pagkurangan ti pammatiyo. 11 Sapay koma ta ti mismo a Dios ken
Amatayo, ken ni Apotayo a Jesus ti mangiturong iti dalanmi nga umay
kadakayo! 12 Padakkelen koma ti Dios ti panagayatyo iti tunggal maysa
ken kadagiti amin a tattao, ket dumakkel koma a kas iti panagayatmi
kadakayo. 13 Iti kasta, papigsaennanto dagiti puspusoyo, ket naan-anay
ken nasantoankayto iti imatang ti Dios ken Amatayo inton umay ni Apo
Jesus agraman dagiti tattaona.
1 Tesalonica 4
1 Kamaudiananna, kakabsat, nasursuroyo kadakami no kasano ti
pannakilangenyo iti padayo a tao tapno maragsakan ti Dios kadakayo.
Kinapudnona, kasta ti an-annurotenyo. Ngem iti nagan ni Apo Jesus,
idawat ken igunamgunammi kadakayo a pasayaatenyo pay. 2 Ammoyon
dagiti al-alagaden nga intedmi kadakayo nga aggapu ken ni Apo Jesus. 3
Kayat ti Dios nga agbiagkayo a nasantoan ket adaywanyo ti immoralidad.
4 Tunggal lalaki ammona koma ti nasantoan ken natakneng a wagas ti
panangasawa, 5 saan a dinederrep a kas ar-aramiden dagiti saan a
makaammo iti Dios. 6 Awan koma ngarud ti siasinoman a mangilupit
wenno manggundaway iti kabsatna. Imbagamin daytoy ket nainget ti
panangballaagmi kadakayo a dusaento ti Dios dagiti agaramid kadagiti
kakastoy a kinadakes. 7 Saannatayo nga inayaban ti Dios tapno agbiagtayo
iti kinaderrep, no di ket iti wagas a nasantoan. 8 Ngarud, ti sumukir iti
daytoy a pannursuro, saan a tao ti sukirenna, no di ket ti Dios a mangted
kadakayo iti Espiritu Santona. 9 Saanen a masapul a mapalagipankayo iti
maipapan iti panagayatyo kadagiti kakabsat iti pammati. Insuronakayo a
mismo ti Dios nga agiinnayatkayo. 10 Kinapudnona, kastoy ti
panagayatyo kadagiti amin a kakabsat nga adda iti entero a Macedonia.
Isut’ gapuna a dawatenmi kadakayo, kakabsat, a degdeganyo ti kastoy a
panagayat. 11 Ikagumaanyo koma ti natalna a panagbiag. Bianganyo laeng
ti bukodyo nga aramid. Agtrabahokayo a maipaay kadagiti kasapulanyo.
Imbagbagamin dagitoy idi 12 tapno agraemto kadakayo dagiti saan pay a
mamati. Ket dikayton agpannuray iti siasinoman a mangted iti uray ania a
kasapulanyo. 13 Kakabsat, kayatmi a maammoanyo ti pudno maipapan
kadagiti natayen, tapno dikayto agladingit a kas kadagiti awanan
namnama. 14 Mamatitayo a natay ni Jesus ngem nagungar met laeng. Isut’
gapuna a patientayo nga alaento ti Dios dagiti natay a nagtalinaed iti
pammati tapno makipagyanda ken ni Jesus. 15 Daytoy ti pannursuro ti
Apo nga ibagami kadakayo: Inton aldaw nga yaay ti Apo, datayo a
sibibiag ditayto un-unaan dagiti natayen. 16 Bumabanto ti Apo manipud
langit ket mangngegto dagiti tattao ti maipukkaw a bilin, ti timek ti
pangulo dagiti angheles, ken ti trumpeta ti Dios. Umunanto nga agungar
dagiti natay a nagtalinaed iti pammati ken ni Cristo. 17 Kalpasanna,
datayo a sibibiag iti dayta a tiempo, maurnongtayto a maikuyog
kadakuada iti ayan dagiti ul-ulep tapno sabtentayo ti Apo idiay tangatang.
Iti kasta, kanayonton nga addatayo iti denna ti Apo. 18 Aglilinniwakayo
ngarud babaen kadagitoy a sao.
1 Tesalonica 5
1 Saanen a masapul, kakabsat, nga agsuratak kadakayo maipapan kadagiti
tiempo wenno panawen a mapasamak dagitoy. 2 Ammoyo unay a
dumtengto ti Aldaw ti Apo, kas iti mannanakaw nga umay iti rabii. 3 Inton
kuna dagiti tattao, “Nagtalna ken nagtalged ketdin,” isunto metten a
kellaat nga agdissuor kadakuada ti pannakadadael. Kellaatto nga umay a
kas iti rigat ti maysa a babai nga agpaspasikal. Ket awanto ti makalisi. 4
Kakabsat, saankayo nga agbibiag a kasla addakayo iti sipnget. Saankayto
ngarud a maklaat iti dayta nga Aldaw a kas iti panangkellaat ti maysa a
mannanakaw. 5 Annaknakayo amin ti lawag; wen, annaknakayo ti aldaw.
Saantayo a tattao ti rabii wenno ti sipnget. 6 Ngarud, ditay koma maturog
a kas kadagiti dadduma, no di ket siririing ken naalibtakkayo. 7 Iti rabii ti
pannaturog dagiti tattao. Iti rabii met a mabartekda. 8 Ngem tattaonatayo ti
aldaw, ket nateppeltayo koma. Aramatentayo ti pammati ken ayat a
pannakakalasag. Aramatentayo met a pannakahelmet ti namnamatayo iti
pannakaisalakan. 9 Saannatay a pinili ti Dios tapno agsagabatayo iti
pungtotna, no di ket tapno magun-odtayo ti pannakaisalakan babaen ken ni
Apotayo a Jesu-Cristo 10 a natay gapu kadatayo tapno makipagbiagtayo
kenkuana, sibibiagtayo man wenno nataytayton inton umay. 11 Daytoy ti
gapuna nga agpipinnaregta ken agtitinnulongkayo a kas iti ar-aramidenyo.
12 Kakabsat, dawatenmi kadakayo nga ipaayyo koma ti rumbeng a
pammadayaw kadagiti agtartrabaho iti sidongyo. Isuda ti mangidalan ken
mangisuro kadakayo iti pannakikadkadua iti Apo. 13 Ipakitayo ti natan-ok
a panagraem ken panagayatyo kadakuada gapu iti trabahoda. Agbiagkayo
koma a natalna. 14 Igunamgunammi kadakayo, kakabsat, a ballaaganyo ti
nasadut. Paturedenyo ti managbutbuteng. Tulonganyo dagiti nakapuy.
Anusanyo amin ida. 15 Diyo supapakan iti dakes dagiti agaramid
kadakayo iti dakes. Ikagumaanyo ketdi a kanayon ti agaramid iti naimbag
iti tunggal maysa ken kadagiti amin a tattao. 16 Kanayon nga
agragsakkayo. 17 Diyo koma liwayan ti agkararag. 18 Agyamankayo iti
Dios, dakes man wenno nasayaat ti kasasaad. Daytoy ti kayat ti Dios a
panagbiagyo a kas tattao ni Cristo Jesus. 19 Diyo depdepen ti Espiritu
Santo. 20 Diyo laisen dagiti sao dagiti profeta. 21 Usigenyo ketdi a
nalaing dagiti amin a bambanag. Salimetmetanyo dagiti naimbag 22 ket
liklikanyo ti amin a kita ti kinadakes. 23 Sapay koma ta pasantoennakayo
a naan-anay ti Dios a mangted iti talna. Aywananna koma ti espiritu,
kararua ken bagiyo, ket awan pakapilawanda agingga nga umay ni
Apotayo a Jesu-Cristo. 24 Mapagtalkan ti mangayab kadakayo ket
aramidennanto daytoy. 25 Kakabsat, ikarkararagandakami met. 26
Kablaawanyo dagiti amin a kakabsat iti nasantoan nga agek. 27
Igunamgunamko kadakayo, babaen iti pammalubos ti Apo, nga ibasayo
daytoy a surat kadagiti amin a kakabsat. 28 Adda koma kadakayo ti
parabur ni Apotayo a Jesu-Cristo.
2 Tesalonica 1
1-2 Kadagiti kamkameng ti iglesia dita Tesalonica, isuda a tattao ti Dios
nga Amatayo ken tattao met ni Apo Jesu-Cristo, Sapay koma ta parabur
ken talna ti ited kadakayo ti Dios Ama, ken ni Apo Jesu-Cristo. Naggapu
kadakami daytoy a surat—Pablo, Silas ken Timoteo. 3 Kakabsat, masapul
a kanayon nga agyamankam iti Dios gapu kadakayo. Tumutop a kastoy ti
aramidenmi agsipud ta rumangrang-ay ti pammatiyo ken dumakdakkel ti
panagayatyo iti tunggal maysa. 4 Isut’ gapuna a dakami a mismo ti
mangipasindayaw kadakayo kadagiti iglesia ti Dios. Pagpannakkelmi ti
panagibtur ken pamamatiyo nga adda kadakayo uray pay no
maidaddadanes ken agsagabakayo. 5 Ipaneknek amin dagitoy a
nainkalintegan ti panangukom ti Dios ket kas pagbanaganna, maikarikayo
iti Pagarianna, nga isu ti agdama a pagsagsagabaanyo. 6 Ngamin, nalinteg
ti aramiden ti Dios: Pagsagabaennanto dagiti mangparparigat kadakayo. 7
Pagin-awaennakayto nga agsagsagaba, ket kastanto met kadakami.
Aramidennanto daytoy inton agparang ni Apo Jesus nga aggapu sadi
langit, a kaduana dagiti mannakabalin nga anghelesna. 8 Babaen iti
gumilgil-ayab nga apuy, dusaennanto dagiti di mangbigbig iti Dios ken
dagiti di agtulnog iti Naimbag a Damag maipapan ken ni Apotayo a Jesus.
9 Madusadanto iti agnanayon a pannakadadael, ket maisinadanto iti
sangoanan ti Apo ken iti dayag ti pannakabalinna. 10 Mapasamakto
daytoy inton umay iti dayta nga Aldaw tapno awatenna ti pannakaitan-ok
nga aggapu kadagiti amin a tattaona ken pammadayaw nga aggapu
kadagiti amin a mamati. Mairamankayto met kadakuada agsipud ta
pinatiyo ti mensahe nga impakaammomi kadakayo. 11 Daytoy ti gapuna a
kanayon nga ikarkararagandakayo. Dawatenmi iti Diostayo a
pagbalinennakayo koma a maikari iti biag a nangayabanna kadakayo.
Sapay koma ta babaen iti pannakabalinna, matungpal ti amin a
tarigagayyo iti kinaimbag ken ti aramidyo iti pammati. 12 Iti kasta, itan-
okyonto ti nagan ni Apotayo a Jesus, ket itan-oknakayto met babaen iti
parabur ti Diostayo ken ni Apo Jesu-Cristo.
2 Tesalonica 2
1 No maipapan iti yaay ni Apotayo a Jesu-Cristo ken iti
pannakaurnongtayo tapno addatayto iti sidongna, kakabsat, dawatenmi
kadakayo 2 a dikay koma mariribukan wenno madanagan iti maibagbaga a
dimtengen ti Aldaw ti Apo. Kunkunada a kasta ti naibagami bayat ti
panangaskasabami wenno panagsuratmi. 3 Dikay paallilaw iti siasino man
iti uray ania a wagas. Ta dinto dumteng dayta nga Aldaw no di
mapasamak ti Yaalsa a maibusor iti Dios ken panagparang ti
Managdakdakes a naituding a mapan idiay infierno. 4 Kontraennanto amin
a pagrukbaban dagiti tattao ken amin a bambanag nga ibilangda a
nadiosan. Isaadnanto ti bagina iti ngatoenda amin ket sumrekto pay nga
agtugaw iti Templo ti Dios, sananto ibaga nga isu ti Dios. 5 Imbagakon
amin dagitoy idi addaak iti dennayo. Diyo kadi malagip? 6 Ngem adda
mangigawgawid iti pannakapasamakna, ket ammoyo no ania dayta.
Ngarud, iti naituding a tiempo, agparangto ti Managdakdakes. 7 Madaman
nga agtartrabaho ti Palimed ti Kinadakes, ngem santo la agsardeng inton
maikkat ti manglaplapped. 8 Kalpasanna, agparangto ti Managdakdakes,
ngem inton umay ti Apo Jesus papatayennanto babaen iti pug-awna ken
dadaelennanto babaen iti makapurar a raniag ti panagparangna. 9 Umayto
ti Managdakdakes nga addaan iti pannakabalin ni Satanas. Agaramidto
kadagiti amin a kita ti milagro ken kadagiti makaallilaw a pagilasinan ken
datdatlag. 10 Aramatennanto ti amin a kita ti dakes a pangallilaw kadagiti
mapukaw. Mapukawdanto ta dida inawat ken impatpateg ti kinapudno a
makaisalakan koma kadakuada. 11 Daytoy ti gapuna a ti Dios ibaonna ti
pannakabalin ti biddut nga agtrabaho kadakuada tapno patienda ti ulbod.
12 Agbanagto a maukom dagiti amin a di namati iti kinapudno, ta ad-adda
nga inayatda ti basol. 13 Masapul a kanayon nga agyamankam iti Dios
gapu kadakayo, kakabsat, dakayo nga ay-ayaten ti Apo. Ta dakayo ti pinili
ti Dios kas umuna a maisalakan babaen iti bileg ti Espiritu a mangpasanto
kadakayo ken babaen iti pammatiyo iti kinapudno. 14 Inayabannakayo ti
Dios iti daytoy a kasasaad babaen iti Naimbag a Damag nga inkasabami
kadakayo. Wen, inayabannakayo a makipagtagikua iti dayag ni Apotayo a
Jesu-Cristo. 15 Isut’ gapuna, kakabsat, nga agtalinaedkayo a natibker ket
salimetmetanyo dagiti kinapudno nga insuromi kadakayo babaen iti
panangaskasabami ken iti suratmi. 16 Sapay koma ta ni Apotayo a Jesu-
Cristo a mismo ken ti Dios nga Amatayo, a nagayat ken mangted kadatayo
iti agnanayon a tured ken nasayaat a namnama babaen iti paraburna, 17
patureden ken papigsaennakayo a kanayon nga agaramid ken agsao iti
naimbag.
2 Tesalonica 3
1 Kamaudiananna, kakabsat, ikarkararagandakami tapno agtultuloy nga
agsaknap a sipapardas ti mensahe maipapan iti Apo ket maitan-ok a kas
met iti panangitan-okyo. 2 Idawatyo met nga ispalennakami ti Dios
kadagiti nakillo ken dakes a tattao. Ta saan nga amin a tattao ket mamati
iti mensahe. 3 Ngem mapagtalkan ti Apo. Papigsaen ken
salaknibannakayto iti Managdakdakes. 4 Ti Apo ti mangted iti dakkel a
panagtalekmi kadakayo nga aramidenyo ken itultuloyyo nga aramiden
dagiti ibagami kadakayo. 5 Sapay koma ta idalannakayo ti Apo iti naun-
uneg a pannakaawat iti panagayat iti Dios ken iti panagibtur nga ipaay ni
Cristo. 6 Kakabsat, iti nagan ni Apo Jesu-Cristo, ibilinmi kadakayo nga
adaywanyo dagiti amin a nasadut a kakabsat a di mangtungpal kadagiti
imbalbalakadmi kadakuada. 7 Pagaammoyo unay a rebbengyo a tuladen ti
inaramidmi. Saankami a nasadut idi addakami iti dennayo. 8 Awan ti
inawatmi a tulong a dimi binayadan. Ngem nagtrabaho ken
nagbannogkami ketdi. Nagtrabahokami iti aldaw ken rabii tapno dikam
agbalin a pakadagsenan ti uray siasinoman kadakayo. 9 Inaramidmi
daytoy a pagtuladanyo, saan a gapu ta awan ti kalinteganmi a dumawat iti
masapulmi, no di ket pagtuladanyo. 10 Bayat ti kaaddami iti dennayo,
imbagbagamin idi kadakayo, “Ti saan nga agtrabaho, saan a pakpakanen.”
11 Kunami daytoy ta nadamagmi nga adda kano sumagmamano a nasadut
kadakayo. Awan kano ti ar-aramidenda no di la bumibiang iti aramid ti
sabali a tao. 12 Iti nagan ni Apo Jesu-Cristo, ibilinmi kadagitoy a tattao
ket ballaaganmi ida nga agbiagda kas maiparbeng ken manggedda iti
pagbiagda. 13 Ngem dakayo, kakabsat, masapul a dikayo mauma nga
agaramid iti naimbag. 14 Nalabit nga adda maysa dita a dinto agtungpal iti
imbagami iti daytoy a surat. Tandaananyo ti kasta a tao ket diyo ikankano
tapno mabainan. 15 Ngem diyo ibilang a kabusor. Bagbagaanyo ketdi a
kas maysa a kabsat. 16 Sapay koma ta ti Apo a mismo a paggapuan ti
talna, ikkannakay iti talna iti amin a tiempo ken iti amin a kasasaad. Adda
koma ti Apo kadakay amin. 17 Siak a mismo ti akinsurat iti daytoy:
Pakomusta nga aggapu ken ni Pablo. Kastoy ti panangfirmak iti tunggal
suratko. Kastoy ti panagsuratko. 18 Ti parabur ni Apotayo a Jesu-Cristo
adda koma kadakay amin.
1 Timoteo 1
1-2 Kenka, Timoteo a napudpudno nga anakko iti pammati, Sapay koma
ta ti Dios Ama ken ni Cristo Jesus nga Apotayo ti mangted kenka iti
parabur, asi ken talna. Naggapu kaniak daytoy a surat, ni Pablo nga
apostol ni Cristo Jesus babaen iti bilin ti Dios a Mangisalakan kadatayo
ken ni Cristo Jesus a namnamatayo. 3 Kas indawatko kenka idi agpa-
Macedoniaak, kayatko nga agbatika idiay Efeso. Adda sumagmamano a
tattao sadiay a mangisursuro kadagiti saan a pudno a doktrina ket masapul
a pasardengem ida. 4 Ibagam kadakuada nga idiandan dagiti parbo a
sarsarita ken dagiti atiddog a listaan dagiti kapuonanda. Panagsusuppiat
laeng ti patauden dagitoy, ket saanda a makatulong iti pannakatungpal ti
panggep ti Dios a maammoan babaen iti pammati. 5 Panggep daytoy a
bilin a riingen ti ayat nga agtaud iti nadalus a puso, nalawag a konsensia
ken napudno a pammati. 6 Simmina ti sumagmamano a tattao kadagitoy a
banag ket nayaw-awanda kadagiti awan kapaypay-anna a
panagsisinnuppiat. 7 Kayatda ti agbalin a mamaestro iti Linteg, ngem dida
maawatan ti sasawenda wenno dagiti ibagbagada a sitatalged. 8
Ammotayo a naimbag ti Linteg no la ket nainkalintegan ti
pannakaaramatna. 9 Ngem masapul a laglagipen a ti linteg saan a
naaramid para kadagiti naimbag a tattao. Naaramid ketdi nga agpaay
kadagiti managlabsing iti linteg ken nasukir; kadagiti managbasol ken
awanan Dios; kadagiti saan a relihioso ken saan a naespirituan; kadagiti
pumatay kadagiti amma wenno innada; kadagiti mammapatay; 10 kadagiti
mannakiabig; kadagiti aggartem kadagiti padada a lallaki wenno babbai
nga aggartem kadagiti padada a babbai; kadagiti kidnaper; kadagiti suitik
ken ulbod a saksi wenno siasinoman nga agaramid iti maibusor iti pudno a
pannursuro. 11 Masarakan dayta a pannursuro iti ebanghelio a naitalek
kaniak nga ipakaammok; wen, ti Naimbag a Damag nga aggapu iti
nadayag ken madaydayaw a Dios. 12 Agyamanak ken Cristo Jesus nga
Apotayo a nangpapigsa kaniak iti trabahok. Wen, agyamanak kenkuana ta
imbilangnak a maikari ket dinutokannak nga agserbi kenkuana, 13 uray no
iti napalabas, nagsasaoak iti maibusor kenkuana, ken indaddadanes ken
linalaisko. Nupay kasta, kinaasiannak ti Dios agsipud ta diak pay mamati
idi ket diak ammo ti ar-aramidek. 14 Agliplipias ti parabur nga impaay ti
Apo kaniak, ket inikkannak iti pammati ken ayat a matagikuatayo iti
pannakikaysatayo ken Cristo Jesus. 15 Pudno daytoy a pagsasao a
rumbeng nga awaten ken patien: Immay ni Cristo Jesus ditoy lubong tapno
isalakanna dagiti managbasol. Siak ti kadadaksan kadakuada. 16 Daytoy ti
gapuna a kinaasiannak ti Dios tapno iparangarang ni Cristo Jesus ti di
agpatingga nga anusna kaniak, siak a kadadaksan a managbasol, tapno
agserbiak nga ulidan kadagiti amin a mamatinto kenkuana, ket awatenda ti
biag nga agnanayon. 17 Iti agnanayon nga Ari a saan a matay ken saan a
makita, isu a kakaisuna a Dios, maited koma ti dayaw ken dayag iti
agnanayon nga awan inggana. Amen. 18 Timoteo, anakko, italekko kenka
daytoy a bilin, kas mayannurot kadagiti sao dagiti profeta maipapan
kenka. Usarem dagitoy a kas armasmo a makiranget a situtured. 19
Salimetmetam ti pammatim ken ti nadalus a konsensiam. Saan nga
impangag ti sumagmamano a tattao ti konsensiada, ket dinadaelda ti
pammatida. 20 Mairaman kadakuada da Himeneo ken Alejandro.
Inyawatko ida iti pannakabalin ni Satanas tapno masursuroanda a di
agsasao iti maibusor iti Dios.
1 Timoteo 2
1 Umuna unay, yunay-unayko ngarud a maidaton iti Dios dagiti dawat,
kararag, panangibabaet ken panagyaman para iti amin a tattao. 2
Ikararagam dagiti ar-ari ken amin nga agtuturay tapno agbiagtayo a
natalna ken naulimek, nadiosan ken natakneng iti amin a banag. 3
Nasayaat daytoy ket makaay-ayo iti Dios a Mangisalakan kadatayo. 4
Tarigagayanna a maisalakan dagiti amin a tattao ken maammoanda ti
pudno. 5 Ta maymaysa ti Dios, ket maymaysa met ti mamagkappia iti
Dios ken iti tao, ni Cristo Jesus a tao a 6 nangyawat iti biagna tapno
mawayawayaan dagiti amin a tattao. Dayta ti pammaneknek nga, iti
naituding a tiempo, kayat ti Dios a maisalakan ti tunggal maysa. 7 Daytoy
ti gapuna a naibaonak a kas apostol, tapno ipakaammok ti Naimbag a
Damag kadagiti Hentil, ket isurok kadakuada ti pudno a pammati. Saanak
nga agul-ulbod. Pudno ti ibagbagak. 8 Iti amin nga iglesia, tarigagayak
nga agkararag dagiti lallaki. Masapul a napudnoda iti Dios ket masapul
nga ingatoda ti imada bayat ti panagkararagda, nga awan pungtot wenno
tarigagay a makisuppiat. 9 Kayatko met a naemma ken nanakman koma ti
panagkawes dagiti babbai. Saanda koma a maaddaan iti nagarbo a buok
wenno agarruat iti alahas a balitok wenno perlas wenno agkawes iti
nangingina a pagan-anay. 10 Kas maiparbeng kadagiti babbai a
managtulnog iti Dios, masapul a mararaemda gapu kadagiti naimbag nga
aramidda. 11 Siuulimek ken sipapakumbaba koma nga agsursuro dagiti
babbai. 12 Diak ipalubos a mangisuroda wenno iturayanda dagiti lallaki.
Masapul nga agulimekda. 13 Ta naparsua nga immuna ni Adan sa ni Eva.
14 Saan a ni Adan ti naallilaw no di ket ti babai a nangsalungasing iti
linteg ti Dios. 15 Ngem maisalakanto ti babai babaen iti panaganakna, no
la ket agtalinaed iti pammati ken ayat ken agbiag a manakem ken
nasantoan.
1 Timoteo 3
1 Pudno daytoy a pagsasao: Siasinoman nga agtarigagay nga agbalin nga
obispo, natan-ok a trabaho ti kalikagumanna. 2 Ngarud, masapul nga awan
ti pakababalawanna. Maysa la ti asawana. Managteppel. Managparbeng
ken nasayaat ti kababalinna. Managpadagus. Kabaelanna ti mangisuro. 3
Saan a mammartek wenno nauyong, no di ket nasingpet ken saan a
mannakiringgor. Saan a rupa ti kuarta. 4 Maidalanna a naimbag ti
familiana ken mapagtungpalna a sitatakneng dagiti annakna. 5 Ta no saan
a maidalan ti maysa a tao ti mismo a familiana, kasano a maaywananna ti
iglesia ti Dios? 6 Masapul a saan a kabarbaro iti pammati, ta amangan no
tumangsit ket madusa a kas iti Diablo. 7 Masapul a pagraeman dagiti saan
a kameng ti iglesia tapno saan a maibabain ken matnag iti palab-og ti
Diablo. 8 Kasta met dagiti diakono: Masapul a nasayaat ti kababalinda ken
napudnoda. Saanda a mammartek wenno naagum. 9 Masapul a
salimetmetanda dagiti naipakaammo a kinapudno ti pammati nga awan ti
panagduaduada. 10 Rebbengna a mapadasda nga umuna, ket no
agballigida, mabalindan ti agserbi. 11 Masapul a natakneng met dagiti
assawada, ken saanda a mamadpadakes. Managteppelda ken
mapagtalkanda iti amin a banag. 12 Ti agbalin a diakono, maysa la ti
asawana, ken maidalanna a naimbag dagiti annakna ken ti familiana. 13
Ta dagiti nasayaat ti panagserbina, magun-odda ti naimbag a kasasaad ken
mabalinda ti agsao a situtured maipapan iti pammatida ken ni Cristo Jesus.
14 Bayat ti panangisuratko iti daytoy, namnamaek nga umayka kitaen iti
mabiit. 15 Ngem no mataktakak, maammoam iti daytoy a surat no ania
dagiti rumbeng nga annurotentayo a kas kameng ti iglesia. Kamengtayo ti
familia ti Dios, kayatna a sawen, ti iglesia ti sibibiag a Dios. Ta ti iglesia
isu ti adigi ken pamuon ti kinapudno. 16 Anian a nagdakkel ti palimed ti
pammatitayo: Isu ket nagparang a kas tao, Pinaneknekan ti Espiritu ti
kinalintegna, Ket nakita dagiti angheles. Naikaskasaba kadagiti pagilian,
Pinati dagiti tattao iti entero a lubong, Ket nayuli sadi langit.
1 Timoteo 4
1 Nalawag ti kuna ti Espiritu a kadagiti maudi nga al-aldaw, suminanto ti
sumagmamano a tattao iti pammati. Ipangagdanto dagiti mangallilaw nga
espiritu ket surotenda ti pannursuro dagiti demonio. 2 Dagitoy a
pannursuro ket iwarwaras dagiti manangallilaw ken ulbod a tattao a
natayen ti konsensiada, a kasla nauram iti bumegbeggang a landok. 3
Iparitda ti pannakiasawa ken ti pannangan iti dadduma a taraon. Ngem
pinarsua ti Dios dagitoy a taraon tapno kanen dagiti mamati ken
makaammo iti pudno, kalpasan ti panagkararagda iti panagyaman. 4
Nasayaat amin a pinarsua ti Dios. Awan ti dakes no la ket no maawat a
buyogan ti panagyaman, 5 agsipud ta agbalin a nasantoan ti taraon babaen
iti sao ti Dios ken babaen iti kararag. 6 No isurom dagitoy a pammagbaga
kadagiti kakabsat, agbalinkanto a naimbag nga adipen ni Cristo Jesus, ket
pumigsaka a naespirituan babaen kadagiti annuroten ti pammati ken
babaen iti panangsalimetmetmo kadagiti pudno a pannursuro a sinurotmo.
7 Ngem adaywam dagiti saan a nadiosan ken parbo a sarsarita. Agsanayka
ketdi para iti nadiosan a biag. 8 Adda maited ti panangwatwat iti bagi,
ngem naserbi iti amin a benneg ti biag ti panagwatwat iti espiritu, agsipud
ta yegna dagiti pagimbagan iti agdama ken iti masakbayan. 9 Pudno
daytoy a pagsasao a naan-anay nga awaten ken patien. 10 Daytoy ti
gapuna nga agagawatayo ken igaedtayo ti agtrabaho, agsipud ta
intalektayo ti namnamatayo iti sibibiag a Dios a Mangisalakan iti amin,
nangnangruna kadagiti mamati. 11 Ibilin ken isurom kadakuada dagitoy a
bambanag. 12 Dimo ipalubos a laisendaka gapu iti kinaubingmo.
Ikagumaam ketdi ti agbalin nga ulidan dagiti mamati: iti sao, iti
panagbiag, iti ayat, iti pammati ken iti kinadalus. 13 Agingga iti yaayko,
ipaaymo ti amin nga oras ken pigsam iti pannakaibasa ti Nasantoan a Surat
iti publiko, ken iti panangasaba ken panangisuro. 14 Aywanam dagiti
naespirituan a sagut a naited kenka idi nagsao dagiti profeta ken idi ipatay
dagiti panglakayen ti imada kenka. 15 Itedmo a mamimpinsan ti bagim
kadagitoy ket isuda laeng ti asikasoem tapno makita ti amin a tattao ti
idurdur-asmo. 16 Annadam ta bagim ken ti isursurom. Ipasnekmo nga
aramiden dagitoy tapno maisalakanmonto ti mismo a bagim agraman
dagiti dumngeg kenka.
1 Timoteo 5
1-2 Dimo ungtan ti laklakay ngem sika. Kasaom ketdi a kasla isu ti
bukodmo nga ama. Iti amin a kinadalus, ibilangmo a kasmo la kabsat
dagiti lallaki nga ub-ubing ngem sika; a kasmo la ina dagiti babbaket; ken
kasmo la kabsat dagiti babbai nga ub-ubing ngem sika. 3 Tulongam dagiti
babbai a balo a pudno a makasapul iti tulong. 4 Ngem no adda annak
wenno appoko ti maysa a balo, masapul a sursuroenda nga umuna dagiti
pagrebbenganda iti familia tapno makasubadda kadagiti nagannak
kadakuada ken appoda, agsipud ta daytoy ti pakaragsakan ti Dios. 5 Ti
pudno a balo nga agbibiag nga agmaymaysa, intaleknan ti namnamana iti
Dios ket aldaw-rabii nga agkararag ken agdawat kenkuana iti tulong. 6
Ngem ti balo nga agbibiag iti nailubongan a ragsak, maibilang a natayen,
uray no sibibiag. 7 Ibilinmo daytoy kadakuada tapno awan ti
pakababalawanda. 8 Ngem no adda saan a mangasikaso kadagiti
kabagianna, nangruna dagiti kameng ti familiana, tinallikudannan ti
pammati, ket dakdakes pay ngem ti saan a mamati. 9 Dagiti laeng 60
wenno nasursurok pay ti tawenna ti mailista a balo. Naminsan la a
nakiasawa, 10 agdindinamag pay kadagiti naimbag nga aramidna, kas iti
nasayaat a panangpadakkelna kadagiti annakna, nagpadagus kadagiti
ganggannaet, binuggoanna dagiti saka dagiti tattao ti Dios, tinulonganna
dagiti agsagsagaba ken impamaysana ti nagaramid iti amin a kita ti
naimbag nga aramid. 11 Ngem dimo ilista dagiti ub-ubing a balo, agsipud
ta no dida magawidan ti riknada ket kayatda manen ti makiasawa,
tallikudanda ni Cristo 12 ket makabasolda iti saanda a panangtungpal iti
umuna a karida kenkuana. 13 Daddadaelenda pay ti tiempoda a
mamalaybalay. Saan la a dayta, masursuroda pay ti agbalin a manarsarita
ken mannakibiang, ket sawenda dagiti banag a di rumbeng a saritaen. 14
Isu a kaykayatko a makiasawada, aganakda, asikasoenda ti balayda tapno
awan ti pangbabalawan kadatayo dagiti kabusor. 15 Ta nayaw-awanen ti
sumagmamano a balo ket simmurotda ken ni Satanas. 16 Ngem ti
siasinoman a mamati a babai nga adda balo a babbai iti familiana, masapul
a taripatoenna ida ket dina ipabaklay daytoy iti iglesia tapno maipamaysa
ti iglesia a tulongan dagiti pudno a balo. 17 Mamindua koma ti tangdan
dagiti panglakayen a nasayaat ti panangtarawidwidda iti iglesia, nangruna
dagiti mangipasnek a mangasaba ken mangisuro. 18 Ta kuna ti Nasantoan
a Surat: “Dimo busalan ti baka a madama nga agir-irik,” ken “Rebbengna
a matangdanan ti agtrabaho.” 19 Dimo denggen ti darum a maibusor iti
maysa a panglakayen, malaksid no idatag ti dua wenno tallo a saksi. 20
Babalawem iti publiko ti amin nga agbasol tapno mapabutngan dagiti
dadduma. 21 Iti imatang ti Dios ken ni Cristo Jesus ken dagiti nasantoan
nga anghelesna, yunay-unayko a tungpalem dagitoy a pammagbaga, nga
awan idumdumam iti aniaman nga aramidem. 22 Dika agganat a
mangipatay iti imam iti siasinoman para iti panagserbi iti Apo. Dika
makiraman iti basol dagiti sabali. Agtalinaedka a nadalus. 23 Saan la a
danum ti inumem, ngem gapu iti tianmo ken ti masansan a panagsakitmo,
uminumka met iti sangkabassit nga arak. 24 Adda dagiti tattao a nalawag a
makita dagiti basbasolda sakbay ti pannakaukomda. Adda met dagiti
basbasol ti dadduma a makita laeng iti ud-udina. 25 Kasta met a nalawag a
makita dagiti naimbag nga aramid, ngem uray no saanda a makita ita,
saanda a mailemmeng iti agnanayon.
1 Timoteo 6
1 Amin a tagabu, masapul nga agraemda kadagiti appoda tapno awan
agsao iti maibusor iti nagan ti Dios wenno iti pannursurotayo. 2 Dagiti
tagabu dagiti appo a mamati, masapul met a saanda a laisen dagiti
pagserserbianda gapu ta agkakabsatda iti pammati. Nasaysayaat koma
ketdi ti panagserbida gapu ta dagiti aglak-am iti panagserbida, mamatida
met ken napategda a kakabsat. Isurom ken ikasabam dagitoy. 3-4
Natangsit ken awan ammo ti siasinoman a mangisuro iti sabali a doktrina,
ket saan nga umanamong kadagiti pudno a sao ni Apotayo a Jesu-Cristo
ken iti nadiosan a pannursuro. Ti kasta a tao adda sakitna a makisuppiat
ken makiapa ket pataudenna ti imon, ringgor, pammadpadakes, dakes a
panangipagarup 5 ken kanayon a panagsusuppiat dagiti tattao a rinuker ti
panunotda ket awanen ti kinapudno kadakuada. Ipagarupda a maysa a
pagsapulan ti relihion. 6 Agpayso met ketdi nga adda dakkel a magun-od
iti relihion no la ket mapnektayon iti adda kadatayo. 7 Ania ti inyegtayo
ditoy lubong? Awan! Ania ti mairuartayo iti lubong? Awan! 8 Isut’
gapuna a no adda la ket kanen ken pagan-anaytayon, umdasen. 9 Ngem ti
siasinoman nga agtarigagay a bumaknang, matnag iti sulisog ket
maipalab-og iti adu a minamaag ken makadadael a tarigagay a
mangirarem kenkuana iti pannakadadael ken pannakapukaw. 10 Ta ti
panagayat iti kuarta isu ti pagtaudan ti amin a kita ti kinadakes. Simmina ti
sumagmamano a tattao iti pammati gapu iti tarigagayda a bumaknang ket
nagsagabada iti adu a ladingit ken leddaang. 11 Ngem sika, kas maysa a
tao ti Dios, masapul nga adaywam dagitoy. Ikagumaam a suroten ti
kinalinteg, ti nadiosan a biag, ti pammati, ti ayat, ti kinaanus ken
kinatakneng. 12 Makidangadangka iti natan-ok a salisal ti pammati. Gun-
odem ti biag nga agnanayon a nangayaban kenka ti Dios idi
impakaammom ti kinapudnom iti sango ti adu a saksi. 13 Ita, bilinenka iti
imatang ti Dios a paggapuan ti amin a biag ken iti sangoanan ni Cristo
Jesus a nangsaksi iti kinapudno iti saklang ni Poncio Pilato: 14
Salimetmetam ti bilin ket dimo ipalubos a matulawan wenno adda
pakababalawanna agingga iti Aldaw a panagparang ni Apotayo a Jesu-
Cristo. 15 Inton dumteng ti tiempo, iparangarangto ti Dios, ti madaydayaw
ken Kakaisuna a Mangituray, ti Ari dagiti ar-ari ken ti Apo dagiti appo. 16
Isu laeng ti saan a matay. Agnaed iti silaw nga awan ti makaasideg. Awan
ti siasinoman a nakakita kenkuana. Awan ti makakita kenkuana. Adda
kenkuana ti dayag ken agnanayon a pannakabalin! Amen. 17 Bilinem
dagiti babaknang ditoy lubong a dida agpaspasindayag ken dida italek ti
namnamada iti kinabaknang a mapukawto met laeng. Agtalekda ketdi
koma iti Dios, isu a sibubuslon a mangted iti amin a pagragsakantayo. 18
Ibagam nga agaramidda iti naimbag, a bumaknangda kadagiti nasayaat
nga aramid, a managparaburda ken siaayatda a mangted kadagiti sabali. 19
Iti kasta, agurnongdanto iti kinabaknang nga agbalinto a natibker a
fondasion iti masakbayan, ket maragpatdanto ti napaypayso a biag. 20
Timoteo, aywanam a naimbag ti naitalek kenka. Adaywam dagiti saan a
nadiosan a sarsarita ken minamaag a panagsusuppiat maipapan iti
ibagbaga dagiti sumagmamano a tattao a “pannakaammo,” idinto a saan
met a pannakaammo. 21 Adda tattao a nagkuna nga adda kadakuada
daytoy, ket gapu iti daytoy, simminada iti pammati. Sapay koma ta
bendisionannakayo amin ti Dios.
2 Timoteo 1
1-2 Kenka, Timoteo a patgek nga anak, Sapay koma ta ti Dios Ama ken ni
Cristo Jesus nga Apotayo ti mangted kenka iti parabur, asi ken talna. Siak,
ni Pablo nga apostol ni Cristo Jesus gapu iti pagayatan ti Dios, ti
naggapuan daytoy a surat. Naibaonak a mangipakaammo iti naikari a biag
a magun-odtayo babaen iti pannakikaysatayo ken ni Cristo Jesus. 3
Agyamanak iti Dios a pagserbiak iti nadalus a konsensia, kas iti
panagserbi met idi dagiti kapuonak. Wen, agyamanak kenkuana iti
pannakalagipko kenka kadagiti kararagko iti aldaw ken rabii. 4 Malagipko
dagiti luluam ket mailiwak unay a makakita kenka tapno mapnoak iti rag-
o. 5 Malagipko ti napudno a pammatim, ti pammati a nagtalinaed nga
immuna kada apongmo a Loida ken nanangmo a Eunice. Kapkapnekak
nga adda met kenka daytoy. 6 Isut’ gapuna nga ipalagipko a parangrangem
ti sagut nga inted ti Dios idi ipatayko dagiti imak kenka. 7 Ta saan nga
espiritu ti kinatakrot ti inted kadatayo ti Dios, no di ti Espiritu a mangted
kadatayo iti pannakabalin, ayat ken kinamanagteppel. 8 Ngarud, dika
agbain a mangsaksi iti Apotayo. Saannak met nga ibain a sibabalud ita
gapu ken ni Cristo. Makipagsagabaka ketdi gapu iti Naimbag a Damag,
kas mayannurot iti pigsa nga ited ti Dios. 9 Insalakan ken inayabannatayo
nga agbalin a tattaona, saan a gapu iti naaramidantayo, no di ket gapu iti
bukodna a panggep ken parabur. Intedna kadatayo daytoy a parabur
babaen ken ni Cristo Jesus sakbay ti pannakaparsua ti lubong. 10 Ngem
naiparangarangen kadatayo ti parabur babaen iti yaay ti Mangisalakan
kadatayo, ni Cristo Jesus. Babaen iti Naimbag a Damag, ammotayo a
ginibusan ni Cristo ti panagturay ti patay ken impakitana ti biag nga
agnanayon. 11 Dinutokannak ti Dios a kas apostol ken maestro a
mangikasaba iti Naimbag a Damag. 12 Daytoy ti gapuna a sagsagabaek
dagitoy. Ngem saanak a maupay, agsipud ta ammok no siasino ti pinatik
ket awan duaduak a kabaelanna nga aywanan ti intalekna kaniak agingga
iti dayta nga Aldaw. 13 Surotem a kas pagwadan dagiti insurok kenka, ket
agtaengka iti pammati ken ayat a kukuatayo iti pannakikaysatayo ken ni
Cristo Jesus. 14 Babaen iti bileg ti Espiritu Santo nga agtaeng kadatayo,
salluadam a naimbag dagiti natan-ok a banag a naitalek kenka. 15 Kas
pagaammom, binaybay-andak dagiti amin a taga-probinsia ti Asia,
agraman da Figelo ken Hermogenes. 16 Sapay koma ta kaasian ti Apo ti
familia ni Onesiforo. Namin-adu a liniwliwanak ni Onesiforo. Saanna nga
imbain ti kaaddak iti pagbaludan, 17 ngem apaman a simmangpet ditoy
Roma, sinapulnak a dagus agingga a nasarakannak. 18 Sapay koma ta
kaasian ti Apo iti dayta nga Aldaw! Ad-adu ti ammom maipapan iti amin a
panagserbina kaniak idiay Efeso.
2 Timoteo 2
1 No maipapan kenka, anakko, bumilegka koma babaen iti parabur a
kukuatayo iti pannakikaysatayo ken ni Cristo Jesus. 2 Ikumitmo kadagiti
tattao a mapagtalkan dagiti pannursuro a nangngegmo nga inkasabak iti
sangoanan ti adu a saksi. Isudanto met ti mangisuro kadagiti sabali. 3
Makipagsagabaka a kas napudno a soldado ni Cristo Jesus. 4 Ti soldado
nga adda iti serbisio, tarigagayanna a maay-ayo kenkuana ti ofisialna. Iti
kasta, adaywanna dagiti inaldaw a parikut ti biag ti sibilian. 5 Ti
makilumba saanna a magun-od ti premio no dina suroten amin a
pagannurotan ti salisal. 6 Ti naanep nga agtaltalon masapul nga isu ti
umuna nga aglak-am iti bunga ti nagbannoganna. 7 Amirisem ti sasawek
agsipud ta ikkannakanto ti Apo iti kabaelan tapno maawatam ti amin a
banag. 8 Lagipem ni Jesu-Cristo a napagungar, isu a nagtaud iti kaputotan
ni David. Daytoy ti mensahe ti Naimbag a Damag nga ikaskasabak. 9
Gapu ta ikasabak ti Naimbag a Damag, agsagabaak ket makawaranak pay
a kas maysa a kriminal. Ngem saan a makawaran ti sao ti Dios. 10 Isut’
gapuna nga ibturak ti amin gapu kadagiti napili a tattao ti Dios tapno
awatendanto met ti pannakaisalakan nga adda ken ni Cristo Jesus,
agraman ti agnanayon a gloria. 11 Pudno daytoy a pagsasao: “No
nairamantayo kenkuana a natay, kaduatayonto met nga agbiag. 12 No
makaibturtayo, makipagturaytayto met kenkuana. No kunatayo a saantayo
nga am-ammo, kunananto met a dinatay am-ammo. 13 No
pagtallikudantayo, agtalinaed latta a sipupudno, agsipud ta dina mabalin a
pagtallikudan ti bagina.” 14 Palagipam dagiti tattao, ket bilinem ida iti
sangoanan ti Dios a dida pagsusuppiatan dagiti sasao nga awan imbag nga
ibungana, ngem dadaelenna laeng dagiti agdengngeg. 15 Aramidem ti
amin a kabaelam a manggun-od iti pananganamong ti Dios, kas maysa nga
adipen ni Cristo a di mangibain iti trabahona ken husto ti panangisurona iti
mensahe ti kinapudno. 16 Liklikam dagiti saan a nadiosan a panagsasao
ken minamaag a panagsusuppiat nga ad-adda a mangyadayo laeng
kadagiti tattao iti Dios. 17 Mayarig ti pannursuroda iti sakit a kanser nga
agwaras ken mangdadael iti entero a bagi. Dua kadagitoy a maestro isuda
da Himeneo ken Fileto. 18 Simmiasidan iti dalan ti kinapudno ket
rirriribukenda ti pammati dagiti dadduma babaen iti panagkunada a
napasamaken ti panagungar. 19 Ngem natibker ken di magunggon ti
fondasion nga impasdek ti Dios. Nailanad dagitoy a balikas: “Ammo ti
Apo no siasino dagiti tattaona,” ken “Siasinoman nga agkuna a mamati iti
Apo, masapul nga adaywanna dagiti dakes nga aramid.” 20 Iti dakkel a
balay, adda amin a kita ti pinggan ken malukong. Adda naaramid iti pirak
ken balitok. Adda met kayo ken damili. Adda para iti naisangsangayan a
pasken, ket adda met dagiti agpaay kadagiti kadawyan nga aldaw. 21 No
adda mangdalus iti bagina kadagitoy dakes a bambanag, agbalinto a kas iti
alikamen nga agpaay iti Apona ken sidadaan nga agserbi iti aniaman a
nasantoan a panggep. 22 Dimo ipalubos nga iturayannaka ti rugso ti
kinaagtutubo. Ikagumaam ketdi ti agbiag a nalinteg, napudno iti pammati;
ayatem dagiti padam a Kristiano ken makikappiaka kadakuada. 23
Adaywam dagiti minamaag a panagsusuppiat nga agtaud iti kina-ignorante
ta ammom nga agtungpalda iti panagriringgor. 24 Masapul a saan a
makiringringgor ti adipen ti Apo. Masapul a naasi iti amin a tattao, nalaing
ken naanus a maestro; 25 nasingpet ken naannad a mangpatigmaan
kadagiti kabusorna, bareng no ikkanto ida ti Dios iti gundaway nga
agbabawi ket maammoanda ti pudno. 26 Iti kasta, agsublida iti nasayaat a
panunotda ket makaruk-atda iti palab-og ti Diablo a nangtiliw kadakuada
tapno aramidenda ti pagayatanna.
2 Timoteo 3
1 Laglagipem a napeggadto dagiti maudi nga aldaw. 2 Adunto dagiti tattao
a naimut, naagum, napangas, ken napalangguad. Nauyawdanto,
sukirendanto dagiti nagannak kadakuada, didanto bigbigen ti naimbag a
nakem, awanto ti pammatida. 3 Naranggas, awanan asi, mamadpadakes,
nauyong ken narungsotdanto, kaguradanto dagiti naimbag. 4 Mangliliput,
darasudos ken natangsitdanto. Ad-addanto nga ayatenda ti nalabes a
ragragsak ngem ti Dios. 5 Agparangdanto a relihioso ngem saan met a
makita iti biagda ti pudno a bileg ti relihion. Adaywam dagitoy a tattao. 6
Sumagmamano kadakuada ti sumrek kadagiti balay ket allilawenda dagiti
babbai a naigamer iti basol ken naikulbo iti amin a kita ti gartem, 7 babbai
a kankanayon nga agsursuro ngem pulos a dida maammoan ti pudno. 8
Sinukir idi da Janes ken Jambres ni Moises. Sukirento met dagitoy a tattao
ti pudno. Rinuker ti panunot dagitoy a tattao ket sinsinan ti pammatida. 9
Ngem didanto makaadayo, ta makitanto ti amin a tao ti kinamaagda. Kasta
ti napasamak da Janes ken Jambres. 10 Ngem sinurotmo ti pannursurok, ti
panagbiagko, ken ti panggepko iti daytoy a biag. Napaliiwmo ti pammatik,
ti anusko, ti ayatko, ti panagibturko, 11 ti pannakaidadanesko ken ti
panagsagabak. Ammom dagiti amin a napasamak kaniak idiay Antiokia,
Iconio, Listra, ken dagiti nakabutbuteng a pannakaidadanes nga inibturak.
Ngem insalakannak ti Apo kadagitoy! 12 Maidadanesto ti amin nga
agtarigagay nga agbiag iti nadiosan a panagbiag ken ni Cristo Jesus. 13
Ngem dumakdakesto dagiti dakes a tattao ken manangallilaw, ket
agtultuloydanto a mangallilaw ken paallilaw. 14 Ngem no maipapan
kenka, agtalinaedka koma iti nasursurom ken pinatim a sitatalged.
Ammom dagiti nangisuro kenka. 15 Laglagipem a sipud pay iti
kinaubingmo, naammoamon dagiti Nasantoan a Sursurat. Mabalindaka
nga isuro maipapan iti pannakaisalakan babaen iti pammati ken ni Cristo
Jesus. 16 Impaltiing ti Dios ti amin a Nasantoan a Surat, ket naserbi a
pangisuro iti kinapudno, pangbabalaw, pangatur iti biddut ken
pakasursuroan iti nalinteg a panagbiag, 17 tapno awan pagkurangan ti tao
nga agserbi iti Dios, ket sisasagana nga agaramid iti amin a kita ti
kinaimbag.
2 Timoteo 4
1 Iti imatang ti Dios ken ni Cristo Jesus a mangukomto kadagiti amin a
tattao, natay man wenno sibibiag, ken gapu iti yaayna a mangituray a kas
Ari, yunay-unayko 2 nga ikasabam ti mensahe. Wen, agawaam nga
ipakaammo, nasayaat man wenno dakes ti tiempo. Mangallukoy,
mangtubngar ken mangbalakadka. Mangisuroka a siaanus. 3 Dumtengto ti
tiempo a di ipangag dagiti tattao ti pudno a pannursuro, ngem
surotendanto dagiti tarigagayda, ket dawatendanto iti ad-adu pay a maestro
a mangibaga kadakuada iti pagay-ayatda a dengdenggen. 4 Saandanto a
kayat a denggen ti pudno, ket ad-addanto a mamatida kadagiti parbo a
sarsarita. 5 Ngem masapul nga agtalinaedka latta iti
kinamanagparbengmo. Ibturam ti panagsagaba. Annongem ti trabaho a kas
mangaskasaba iti Naimbag a Damag. Aramidem amin a pagrebbengam a
kas adipen ti Dios. 6 No maipapan kaniak, dimtengen ti oras a
pannakaidatonko. Adtoyen ti tiempo nga isisinak iti daytoy a biag. 7
Inaramidko ti amin a kabaelak iti salisal. Nadanonkon ti pagpatinggaan ti
lumba. Nagtalinaedak iti pammati. 8 Ita, agur-urayen kaniak ti gunggona ti
balligi, ti korona ti kinalinteg nga ited ti Apo, ti nalinteg nga Ukom, iti
dayta nga Aldaw—ket saan la nga agpaay kaniak no di ket kadagiti amin a
siaayat nga agur-uray iti yaayna. 9 Ikarigatam ti umay kaniak iti mabiit. 10
Nakayawan ni Demas iti daytoy agdama a lubong ket binaybay-annak.
Napanen idiay Tesalonica. Napan ni Cresente idiay Galacia ket nagturong
met ni Tito idiay Dalmacia. 11 Ni laeng Lucas ti adda iti dennak. Dagasem
ni Marcos ket itugotmo ditoy, ta makatulong kaniak iti trabaho. 12
Imbaonko ni Tikico idiay Efeso. 13 Inton umayka, pakialam ti kagayko a
nabatik ken ni Carpo idiay Troas. Itugotmo met dagiti librok, nangruna
dagiti pagsuratan. 14 Adu ti dakes nga inaramid kaniak ni Alejandro a
mammanday. Dusaento ti Dios gapu iti inaramidna. 15 Agannadka met
kenkuana ta binusorna a sipipinget ti mensahetayo. 16 Idi damo a
pannakausigko, awan ti nagtestigo a mangikalintegan kaniak. Binaybay-
annak ti tunggal maysa. Sapay koma ta saanda a mapabasol gapu iti
daytoy. 17 Nupay kasta, tinulongannak ti Apo ket pinapigsanak, isu a
nabalinak nga impakaammo ti sibubukel a mensahe tapno mangngeg ti
amin a Hentil. Iti kasta, naisalakanak iti ngiwat ti leon. 18 Ispalennakto ti
Apo iti amin a kinadakes, ket alaennakto nga awan pakaan-anoak iti
nailangitan a Pagarianna. Maipaay koma kenkuana ti dayag nga awan
inggana! Amen. 19 Pakomustaam da Priscila ken Akila ken ti familia ni
Onesiforo. 20 Nagyan ni Erasto idiay Corinto, ket imbatik ni Trofimo
idiay Mileto ta masakit. 21 Ikagumaam ti umay sakbay ti lam-ek.
Komustaka kano, kuna da Eubulo, Pudente, Lino ken Claudia, kasta met
dagiti amin a kakabsat. 22 Sapay koma ta adda ti Apo iti espiritum. Sapay
koma ta adda kadakayo amin ti parabur ti Dios.
Tito 1
1-4Kenka, Tito, a napaypayso nga anakko iti pammati nga adda kadatay
amin: Sapay koma ta parabur ken talna ti ited ti Dios Ama ken ni Cristo
Jesus a Mangisalakan kadatayo. Siak, ni Pablo nga adipen ti Dios ken
apostol ni Jesu-Cristo, ti naggapuan daytoy a surat. Naibaonak a tumulong
kadagiti tattao tapno maidalanda iti kinapudno ken kinasanto. Naibatay
daytoy iti namnama iti biag nga agnanayon nga inkari ti Dios sakbay ti
panangrugi daytoy a lubong. Saan nga agulbod ti Dios. Iti intudingna a
tiempo, impaltiingna daytoy a namnama iti mensahena a naitalek kaniak
ket ipakaammok babaen iti bilin ti Dios a Mangisalakan kadatayo. 5
Imbatika dita Creta tapno urnosem dagiti amin a masapul a maurnos ket
mangdutokka kadagiti panglakayen ti iglesia iti tunggal ili. Laglagipem ti
imbalakadko: 6 Masapul nga awan pakapilawan ti maysa a panglakayen.
Maysa la ti asawana. Mamati dagiti annakna ket awan pakasarsaritaanda a
dakes ken saanda a nasukir. 7 Agsipud ta isu ti katalek ti Dios a
mangimaton iti iglesia, masapul nga awan ti pakapilawanna. Saan a
natangsit wenno nalaka nga agpungtot. Saan a mammartek wenno
naranggas wenno naagum. 8 Masapul a managpadagus, naayat iti
naimbag, nateppel, nalinteg, nasantoan ken naparbeng. 9 Masapul a
salimetmetanna ti mapagtalkan a mensahe a kas mayannurot iti
pannursuro tapno maallukoyna dagiti dadduma iti pudno a pannursuro ken
masungbatanna dagiti sumuppiat iti daytoy. 10 Ngamin, adu ti nasukir ken
manangallilaw, nangruna dagiti mangipapilit iti pannakakugit. Awan
serserbi ti sao dagitoy. 11 Pasardengem ida agsipud ta riribukenda dagiti
adu a familia babaen iti panangisuroda kadagiti saan a maiparbeng tapno
makakuartada laeng. 12 Maysa kadagiti profetada ti mismo a nagkuna:
“Ulbod a namimpinsan dagiti Cretano. Naagum ken sadutda, kasdala
narungsot nga ayup.” 13 Pudno ti imbagana. Gapu iti daytoy, dika agamak
a mangbabalaw kadakuada tapno nasalun-atda iti pammati, 14 ket didan
denggen dagiti sarsarita a pinarbo dagiti Judio ken dagiti bilin nga
impaulog dagiti tattao a simmina iti kinapudno. 15 Kadagiti nadalus,
nadalus amin a banag. Ngem kadagiti natulawan ken awanan pammati,
awan ti nadalus, agsipud ta narugit ti isip ken konsensiada. 16 Kunada nga
ammoda ti Dios ngem makita kadagiti aramidda a dida am-ammo ti Dios.
Nakarimrimon ken nasukirda, ket dida maikari nga agaramid iti naimbag.
Tito 2
1 Ngem no maipapan kenka, masapul nga isurom laeng ti mayannurot iti
naimbag a pannursuro. 2 Patigmaanam dagiti lallakay: Masapul a
managparbeng, manakem ken maiturayanda ti bagida. Nasalun-atda iti
pammati, iti ayat ken iti panagibtur. 3 Kasta met a patigmaanam dagiti
babbaket: Agbiagda koma kas mayannurot iti nasantoan a panagbiag.
Masapul a saanda a mamadpadakes wenno mammartek. Masapul a
naimbag ti isuroda 4 tapno masursuroan dagiti ub-ubing a babbai nga
agayat kadagiti assawada ken kadagiti annakda. 5 Managteppel ken
nadalusda, naimbag a managtagibalay ken paiturayanda kadagiti
lallakayda tapno awan agsao iti maibusor iti mensahe ti Dios. 6
Patigmaanam met dagiti agtutubo a lallaki a masapul nga agparbengda. 7
Iti amin a banag, sika ti ulidan ti naimbag nga aramid. Iti panangisurom,
ipakitam a napudno ken napasnekka. 8 Aramatem dagiti sao nga awan
pakababalawanna tapno mabainan dagiti kabusortayo iti kaawan ti dakes a
masaoda kadatayo. 9 Ibagam kadagiti tagabu nga agtulnogda kadagiti
appoda ket ikagumaanda a maragsakanda kadakuada iti aniaman nga
aramidenda. Dida supringen 10 wenno takawan ida, ngem ipakitada ketdi
a napudno ken mapagtalkanda, tapno iti amin nga aramidenda, idayawda ti
pannursuro maipapan iti Dios a Mangisalakan kadatayo. 11 Ta impakitan
ti Dios ti paraburna nga agpaay iti pannakaisalakan ti sangkataoan. 12
Isuronatayo dayta a parabur a mangiwaksi iti dakes a panagbiag ken
kadagiti nailubongan a tarigagay. Iti kasta, agbiagtayo a naparbeng,
nalinteg ken nadiosan iti agdama a tiempo 13 bayat ti panaguraytayo iti
nagasat nga Aldaw a namnamaentayo, inton agparang ti dayag ni Jesu-
Cristo a naindaklan a Dios ken Mangisalakan kadatayo. 14 Inyawatna ti
biagna gapu kadatayo tapno isalakannatay iti amin a kinadakes ket
pagbalinennatayo a nadalus a tattao nga agpaay kenkuana ken napasnek
nga agaramid iti naimbag. 15 Isurom dagitoy, ket usarem ti amin a
turaymo a mangpatigmaan ken mangbabalaw kadagiti agdengngeg kenka.
Dimo ipalubos a maikkat ti panagraemda kenka.
Tito 3
1 Ipalagipmo kadagiti agdengngeg kenka a rebbengda ti agtungpal
kadagiti turayen ken pannakabagi ti gobierno. Sisasaganada koma nga
agaramid iti naimbag. 2 Ibagam kadakuada a dida mamadpadakes wenno
makiringgor, no di ket naparbeng ken mannakigayyemda koma.
Natakneng koma a kanayon ti pannakilangenda iti amin a tattao. 3 Ta
maag, nasukir ken nayaw-awantayo met idi. Tinagabunatayo ti
nadumaduma a kita ti tarigagay ken paggarteman. Nagbiagtayo iti dakes a
panagem ken apal. Ginuradatayo dagiti sabsabali ket ginuratayo met ida. 4
Ngem idi naiparang ti asi ken ayat ti Dios a Mangisalakan kadatayo, 5
insalakannatayo, saan a gapu iti aniaman a nasayaat nga inaramidtayo no
di ket gapu iti asina kadatayo. Wen, naisalakantayo babaen iti
panangugasna iti danum, ket gapu iti daytoy, naipasngaytay iti baro a biag
babaen iti Espiritu Santo. 6 Sibubuslon nga inted ti Dios ti Espiritu Santo
babaen ken ni Jesu-Cristo a Mangisalakan kadatayo 7 tapno babaen iti
paraburna, mapalintegtay iti sangoanan ti Dios ket maaddaantay iti biag
nga agnanayon a namnamatayo. 8 Pudno dagitoy a pannursuro. Kayatko a
yunay-unaymo dagitoy a bambanag tapno dagiti mamati iti Dios
nareggetda nga agaramid iti naimbag. Nasayaat ken naserbi dagitoy a
pammagbaga iti amin. 9 Ngem adaywam dagiti minamaag a
panagsusuppiat, dagiti saan nga aggibus a pakasaritaan dagiti kapuonan,
panagsususik ken panagsusuppiat maipapan iti Linteg. Awan serserbi
dagitoy ket awan maitedda. 10 No maipapan iti tao a pagtaudan ti
panagsisina, ballaagam iti maminsan wenno mamindua ket no di pay la
dumngeg, saanmon a pakibiangan. 11 Mabigbigmo a dakes ti panagbiag
dayta a tao, ket dagiti basolna ti mismo a mangipaneknek iti
panagbiddutna. 12 Apaman a maibaonko kenka ni Artemas wenno ni
Tikico, ikarigatam ti umay kaniak idiay Nicopolis, ta napanunotko a
palabasen sadiay ti tiempo ti lam-ek. 13 Ikagumaam a tulongan ni abogado
Zenas ken ni Apolos tapno mairubbuatda ti biaheda. Kitaem ta adda koma
amin a masapulda. 14 Masapul a sursuroen dagiti tattaotayo nga agaramid
iti naimbag tapno makatulongda iti pudno a pakasapulan ken agbiagda a
naserbi. 15 Komustaka kano kuna dagiti amin a kakaduak ditoy.
Pakomustaam met dagiti gagayyem iti pammati a mangipatpateg
kadatayo. Sapay koma ta adda kadakay amin ti parabur ti Dios.
Filemon 1
1-3 Patgenmi a Filemon a gayyem ken katrabahoanmi, Sapay koma ta
adda kadakayo ti parabur ken talna nga aggapu iti Dios nga Amatayo ken
ni Apo Jesu-Cristo. Agpaay daytoy a surat kenka, kadagiti kameng ti
iglesia nga aggigimong iti balaymo, kasta met ken ni Apia a kabsattayo a
babai, ken ni Arkipo a kaduami a soldado ni Cristo. Dakami ti nagsurat—
ni Timoteo a kabsattay iti pammati ken siak, ni Pablo a balud a maigapu
ken ni Cristo Jesus. 4 Kabsat a Filemon, diak liwayan ti agyaman iti
Diosko ket ibabaetka tunggal agkararagak. 5 Ta madamdamagko ti ayatmo
kadagiti amin a tattao ti Dios, kasta met ti pammatim ken ni Apo Jesus. 6
Ikarkararagko a ti panaglalangentayo iti pammati, agbunga koma iti naun-
uneg pay a pannakaawat kadagiti amin a bendision nga adda kadatayo iti
panagbiagtayo ken ni Cristo. 7 Pinaragsak ken pinaregtanak ti ayatmo,
ingungotek a kabsat. Pinaragsakmo dagiti amin a tattao ti Dios. 8 Kas
kabsatmo ken ni Cristo, agturedak a mangbilin kenka iti rumbeng nga
aramidem. 9 Ngem gapu ta napategka kaniak, kaykayatko ti agpakpakaasi
kenka. Aramidek daytoy, nupay siak, ni Pablo, maysaak a pannakabagi ni
Cristo Jesus, ken agdama met a balud gapu kenkuana. 10 Agdawatak
ngarud kenka gapu ken ni Onesimo nga anakko ken ni Cristo. Ta
kabayatan ti kaaddak iti pagbaludan, nagbalinak a pannakaamana iti
pannakainaigmi ken ni Cristo. 11 Awan idi ti serserbi ni Onesimo kenka
ngem ita, makatulongen kadata. 12 Pagsubliekon kenka ni Onesimo nga
ikuyogna daytoy pusok. 13 Kayatko koma a makipagyan pay kaniak ditoy
bayat ti pannakaibaludko gapu iti ebanghelio, tapno isu ti sunom a
tumulong kaniak. 14 Nupay kasta, dika piliten a tumulong kaniak, no di
ket kayatko koma nga aramidem daytoy nga agubbog iti nakemmo. Isut’
gapuna a diak aramiden ti aniaman no dika umanamong. 15 Nalabit nga
immadayo kenka ni Onesimo iti apagbiit tapno agsubli met laeng kenka iti
agnanayon. 16 Ket itan, saan laengen a kas tagabu, no di ket nangatngato
pay ngem tagabu: Maysan a napateg a kabsat ken ni Cristo. Napateg unay
kaniak, ket ad-adda pay koma ti panangipategmo kenkuana a kas tao itan
ta kabsatmo iti Apo. 17 No ibilangnak met la a kaduam, awatem ngarud ti
isusubli ni Onesimo kenka a kas iti panangawatmo koma kaniak. 18 No
adda basol wenno utangna kenka, siakto ti singirem. 19 Kitaem, siak a
mismo ti agsurat ken agfirma iti daytoy: Siak ni Pablo. Agbayadakto
kenka. (Saanen a masapul nga ipalagipko kenka nga utangmo kaniak dayta
biagmo.) 20 Isut’ gapuna, kabsatko, a patgam kadi daytoy dawatko, ket
ipagpagapum iti Apo. Kas maysa a kabsat ken ni Cristo, paragsakennak
kadi. 21 Bayat ti panangisuratko iti daytoy, kapkapnekak a patgamto
daytoy a dawatko. Kinapudnona, ammok nga aramidemto ti nasursurok
pay ngem ti dawatko. 22 Maysa pay, di la mabalin nga isaganaannak iti
kuarto a pagyanak? Mangnamnamaak nga ipangagto ti Dios dagiti
karkararagyo amin, ket pagsubliennakto kadakayo. 23 Komustakayo kano
kuna ni Epafras a kaduak ditoy pagbaludan gapu ken ni Cristo Jesus. 24
Agpakomusta met dagiti katrabahoak, da Marcos, Aristarco, Demas, ken
Lucas. 25 Sapay koma ta adda kadakayo amin ti parabur ni Apo Jesu-
Cristo.
Hebreo 1
1 Kadagidi un-unana nga aldaw, nagsao ti Dios kadagidi kapuonantayo iti
namin-adu a daras ken iti nadumaduma a wagas babaen kadagiti profeta. 2
Ngem kadagitoy maudi nga aldaw, nagsao kadatayo babaen iti Anakna.
Pinarsua ti Dios ti amin a lubong babaen kenkuana, ket isu ti pinilina nga
agtagikua kadagiti amin a banag. 3 Ti Anak ti mangipakita iti dayag ti
Dios. Isu ti napaypayso a ladawan ti kinadiosna. Isu pay ti
mangtartarawidwid iti amin a lubong babaen iti mannakabalin a saona.
Kalpasan ti pananggun-odna iti pannakapakawan ti basol ti sangkataoan,
nagtugaw sadi langit iti makannawan ti Kangatoan a Pannakabalin. 4
Naaramid ti Anak a naturturay ngem dagiti angheles. Nadaydayaw met ti
naganna nga inted ti Dios ngem ti naganda. 5 Awan a pulos kadagiti
angheles ti nangibagaan ti Dios, “Sika ti Anakko; Ita nga aldaw,
nagbalinak nga Amam.” Awan met ti anghel a nangikarianna, “Siakto ti
Amana, Ket isunto ti Anakko.” 6 Ngem kuna ti Dios idi dandanina ibaon ti
inauna nga Anakna ditoy lubong, “Masapul nga agdaydayaw kenkuana
dagiti amin nga angheles ti Dios.” 7 Daytoy ti kuna ti Dios no maipapan
kadagiti angheles: “Pagbalinen ti Dios nga angin dagiti anghelesna.
Pagbalinenna met a sumsumged nga apuy dagiti adipenna.” 8 Ngem no
maipapan iti Anak, kunana daytoy: “Ti tronom, O Dios, agnanayon nga
awan patinggana! Agturayka a sililinteg iti pagariam. 9 Inayatmo ti
kinalinteg ket ginuram ti kinadakes. Isut’ gapuna a pinilinaka ti Dios; wen,
ti Diosmo. Ket linanaannaka iti rag-o—inikkannaka iti dayaw a dakdakkel
ngem ti intedna kadagiti kakaduam.” 10 Kunana pay, “Sika, Apo, ti
nangparsua iti daga idi punganay, Ket dagiti langit aramid dagiti imam. 11
Mapukawdanto, ngem mataginayonka. Dumaandanto amin a kas pagan-
anay. 12 Kupinemto ida a kas iti kagay, ket masukatandanto a kas pagan-
anay, ngem pulos a dika agbalbaliw, ket ti biagmo dinto agpatingga.” 13
Awan a pulos kadagiti angheles ti nagkunaan ti Dios iti kastoy:
“Agtugawka ditoy makannawanko, agingga a maparmekko dagiti
kabusormo ket addada iti babaem.” 14 Siasino ngarud dagiti angheles?
Espirituda nga agserserbi iti Dios ket imbaonna ida a tumulong kadagiti
umawat iti pannakaisalakan.
Hebreo 2
1 Rebbengtayo ngarud nga imutektekan a naimbag dagiti kinapudno a
nangngegtayo tapno saantayo a mayaw-awan. 2 Napatalgedan a pudno ti
mensahe nga impakaammo dagiti angheles, ket siasinoman a
nangsalungasing wenno nangsukir iti daytoy, inawatna ti tumutop a dusa.
3 Kasanonto ngarud ti panaglisitayo no ditay ikankano daytoy a
naindaklan a pannakaisalakan? Ti Apo a mismo ti immuna a
nangipakaammo iti daytoy a pannakaisalakan. Dagiti nakangngeg
kenkuana ti nangpatalged kadatayo a pudno daytoy. 4 Kasta met nga
innayon ti Dios ti pammaneknekna babaen kadagiti inaramidna a datdatlag
ken nakaskasdaaw a pagilasinan ken kadagiti nadumaduma a kita ti
milagro. Nagibunong pay kadagiti sagsagut ti Espiritu Santo kas
mayannurot iti pagayatanna. 5 Saan a dagiti angheles ti pagturayen ti Dios
iti baro a lubong a sarsaritaenmi. 6 Kas kuna ti maysa a paset ti Nasantoan
a Surat: “Ania la unay aya ti tao, O Dios, ta silalagipka kenkuana, wenno
ti anak ti tao, ta ipategmo unay? 7 Inaramidmo a nababbaba ngem dagiti
angheles iti apagbiit a tiempo; binalangatam iti dayag ken dayaw, 8 Ket
pinagturaymo iti isuamin a banag.” Nalawag ngarud nga awan a pulos ti
nailaksid ta naisao ditoy a pinagturay ti Dios ti tao kadagiti isuamin a
banag. Ngem saantayo met a makita nga iturturayan ti tao dagiti amin a
bambanag. 9 Makitatayo ketdi ni Jesus a naaramid a nababbaba ngem
dagiti angheles iti apagbiit a tiempo, tapno babaen iti parabur ti Dios,
mapadasanna ti matay a maipaay kadagiti amin a tattao. Makitatayo a
nabalangatan ita iti dayag ken dayaw gapu iti sinagabana a patay. 10
Rumbeng la unay ti inaramid ti Dios a namarsua ken manarawidwid iti
amin a bambanag: Pinagbalinna a naan-anay ni Jesus babaen iti
panagsagaba tapno iramanna dagiti adu nga annak iti dayagna. Ta ni Jesus
ti mangidalan kadakuada iti pannakaisalakan. 11 Dalusanna dagiti tattao iti
basolda, ket isu ken dagiti nadalusan maymaysa ti Amada. Isut’ gapuna a
saan a mabain ni Jesus a mangawag a kakabsatna ida, 12 ket kunana,
“Ipakaammokanto kadagiti kakabsatko, O Dios; Idaydayawkanto iti
imatang ti gimong.” 13 Kunana pay, “Agtalekakto kenkuana.” Ket kunana
manen, “Adtoyak ken dagiti annak nga inted ti Dios kaniak.” 14
Yantangay ta tattao dagitoy nga annak, kas awagna kadakuada, nagbalin
met ni Jesus a tao a kas kadakuada ket nakiraman iti kinataoda.
Inaramidna daytoy tapno babaen iti ipapatayna, pukawenna ti Diablo nga
adda pannakabalinna ken ni patay, 15 ket wayawayaanna dagiti amin a
natagabu iti amin a panagbiagda gapu iti butengda ken patay. 16 Ta
nalawag a saan a dagiti angheles ti tulonganna, no di ket “dagiti kaputotan
ni Abraham.” 17 Ngarud, masapul a pudpudno a maipada kadagiti
kakabsatna tapno agbalin a napudno ken naasi a Kangatoan a Padi iti
panagserbina iti Dios. Iti kasta, pakawanen ti Dios dagiti basol ti tao. 18
Ita, matulonganna dagiti masulisog, agsipud ta isu a mismo, nasulisog ken
nagsagaba.
Hebreo 3
1 Isut’ gapuna, kakabsatko a napili, dakayo nga inayaban met ti Dios,
panunotenyo ni Jesus nga imbaon ti Dios ken agakem a Kangatoan a Padi
ti pammatitayo. 2 Kas iti kinapudno ni Moises kadagiti tattao ti Dios,
napudno met ni Jesus iti nangdutok kenkuana a mangakem iti daytoy. 3
Dakdakkel ti dayaw ti mangbangon iti balay ngem ti mismo a balay. Kasta
met a maikari ni Jesus iti dakdakkel a dayaw ngem ni Moises. 4 Agpayso
nga adda mangbangon iti tunggal balay, ngem ti Dios ti nangbangon
kadagiti amin. 5 Napudno ni Moises iti trabahona a kas agserserbi iti
entero a balay ti Dios. Nagsao iti maipapan kadagiti bambanag nga
ipakaammo ti Dios iti masakbayan. 6 Ngem napudno ni Cristo a kas Anak
a mangaywan iti balay ti Dios. Datayo ti balay ti Dios no agtalinaedtayo a
natured ken natalged iti namnamatayo. 7 Ngarud, kas kuna ti Espiritu
Santo: “Ita nga aldaw, no mangngegyo ti timek ti Dios, 8 Dikay
agsuksukir a kas kadagidi kapuonanyo, Dida tinungpal ti bilinna
kadakuada iti daydi tiempo a sinuotda idiay let-ang. 9 Sinuotdak sadiay
dagiti ammayo, kuna ti Dios Uray nakitada ti inaramidko iti uppat a pulo a
tawen. 10 Isut’ gapuna a nagpungtotak kadagidiay a tattao, Ket kinunak,
‘Naglikudandak, ket dida tinungpal dagiti bilinko.’ 11 Nagpungtotak ket
insapatak: ‘Pulos a didanto sumrek iti daga a pangtedak kadakuada iti
panaginana!’” 12 Kakabsatko iti pammati, agannadkayo tapno awan
kadakayo ti agbalin a dakes ken awanan iti pammati ket laksidenna ti
sibibiag a Dios. 13 Agtitinnulongkayo koma iti inaldaw bayat ti kaadda ti
tiempo a makuna nga “ita nga aldaw” tapno awan ti maallilaw kadakayo
babaen iti basol ket agbalin a nasukir. 14 Ta kaduanatayo ni Cristo no la
ket agtalinaedtayo a natibker iti panagtalek kas naipakita idi damo a
namatitayo. 15 Kastoy ti kuna ti Nasantoan a Surat: “Ita nga aldaw, no
mangngegyo ti timek ti Dios, Dikay agsuksukir kas iti inaramid dagidi
kapuonanyo.” 16 Siasino dagiti nakangngeg iti timek ti Dios ken
bimmusor kenkuana? Isuda amin nga impanaw ni Moises idiay Egipto. 17
Siasino dagiti nagpungtotan ti Dios iti uneg ti 40 a tawen? Dagiti tattao a
nagbasol, isuda a napasag idiay let-ang. 18 Siasino dagiti nangisapataan ti
Dios a dida makastrek a pulos iti daga a pangitedanna kadakuada iti inana?
Dagiti bimmusor kenkuana. 19 Makitatayo ngarud a dida nakastrek
agsipud ta dida namati.
Hebreo 4
1 Yantangay ta kari ti Dios a makastrektayo a makipaginana kenkuana,
agbutengtayo ngarud tapno awan masarakan kadakayo a di makastrek iti
dayta a panaginana. 2 Ta nangngegtayo met ti Naimbag a Damag a kas
kadakuada. Wen, nangngegda ti mensahe ngem awan imbag nga intedna
kadakuada agsipud ta dida namati iti nangngegda. 3 Datayo ngarud a
mamati ti sumrek iti panaginana nga inkari ti Dios. Kas iti kinunana,
“Nagpungtotak ket insapatak: ‘Pulos a didanto sumrek iti daga a
pangtedak kadakuada iti panaginana!’” Kinunana daytoy uray no nalpasen
dagiti aramidna manipud panangparsuana iti lubong. 4 Ta kuna ti maysa a
paset ti Nasantoan a Surat maipapan iti maikapito nga aldaw: “Naginana ti
Dios kadagiti amin nga aramidna iti maikapito nga aldaw.” 5 Kunana pay:
“Pulos a didanto sumrek iti dayta a daga a pangtedak koma kadakuada iti
panaginana.” 6 Saan a nakastrek a makipaginana iti Dios dagiti immuna a
nakangngeg iti Naimbag a Damag agsipud ta dida namati Nupay kasta,
adda dagiti mapalubosan a sumrek. 7 Mapaneknekan daytoy gapu iti
panangikeddeng ti Dios iti sabali nga aldaw a makuna, “Ita nga aldaw.”
Kalpasan ti adu a tawen, dinakamatna daytoy idi nagsao babaen ken ni
David, kas masarakan iti nasao a paset ti Nasantoan a Surat, “Ita nga
aldaw, no mangngegyo ti timek ti Dios, Dikay agsuksukir.” 8 No indalan
ni Josue dagiti Israelita iti panaginana nga inkari ti Dios, saan koman a
kasapulan a nagsao ti Dios maipapan iti sabali nga aldaw. 9 Ngarud, adda
pay panaginana a maipaay kadagiti tattao ti Dios, a kas iti panaginana ti
Dios iti maikapito nga aldaw. 10 Ta siasinoman a sumrek iti daytoy a
panaginana kas inkari ti Dios, aginana met kadagiti aramidna a kas iti
inaramid ti Dios. 11 Masapul nga ikagumaantayo ti makagteng iti dayta a
panaginana tapno awan ti uray maysa kadatayo a mapaay a kas kadakuada
gapu iti kaawan ti pammatida. 12 Sibibiag ken nasamay ti sao ti Dios.
Natadtadem ngem ti uray ania a kampilan nga agsumbangir ti tademna.
Kabaelanna a salputen ti pagsabatan ti kararua ken ti espiritu, ti
nagsusuopan ti tulang ken pata. Ukomenna dagiti tarigagay ken
pampanunot ti tao. 13 Awan ti naparsua a mailinged iti Dios. Sipapanayag
amin iti imatangna, ket masapul nga ilawlawagtayo iti Dios ti amin nga
inaramidtayo. 14 Salimetmetantayo ngarud a sititibker ti pammatitayo. Ta
addaantayo iti naindaklan a Kangatoan a Padi a limmasat kadagiti langit
ken simrek iti ayan ti Dios—ni Jesus nga Anak ti Dios. 15 Maawatan ti
Kangatoan a Padi nga agserserbi kadatayo ti kinakapuytayo. Kas
kadatayo, napadas iti amin a kita ti sulisog ngem saan a nagbasol. 16
Ditayo koma ngarud bumdeng nga umasideg iti trono ti Dios a pagtaudan
ti parabur. Sadiay, magun-odtayto ti panangngaasi ti Dios ket
masarakantayo ti parabur a tumulongto kadatayo iti tiempo a
kasapulantayo.
Hebreo 5
1 Mapili ti tunggal kangatoan a padi kadagiti kailianna ket matudingan
nga agserbi iti Dios iti nagan dagiti tattao tapno idatagna dagiti sagsagut
ken sakrifisio gapu kadagiti basbasol. 2 Yantangay ta adda met
pagkapuyanna, naanus kadagiti agaramid iti dakes gapu ta dida ammo a
dakes ti ar-aramidenda. 3 Gapu ta nakapuy, masapul a mangipaay kadagiti
datdaton, saan laeng a gapu kadagiti basbasol dagiti tattao, no di ket gapu
met iti basolna. 4 Awan ti mangdutok iti bagina a kangatoan a padi. Ti
laeng Dios ti makabalin, kas iti panangdutokna ken ni Aaron. 5 Kasta met
a saan a dinutokan ni Cristo ti bagina a Kangatoan a Padi. Kinuna ketdi ti
Dios kenkuana, “Sika ti Anakko; Ita nga aldaw, nagbalinak nga Amam.” 6
Kinunana pay iti sabali a paset, “Padika nga agnanayon A kas iti kinapadi
ni Melkisedec a padi.” 7 Bayat ti panagbiag ni Jesus ditoy daga, inyikkis
ken insangitna ti nagkararag ken nagdawat iti Dios a makaisalakan
kenkuana iti patay. Impangag ti Dios agsipud ta natulnog ken
napakumbaba. 8 Ngem uray pay no Anak ti Dios, nasursurona ti agtulnog
babaen kadagiti sinagabana. 9 Idi naaramidnan ti panggepna, nagbalin a
pakaisalakanan nga agnanayon dagiti agtulnog kenkuana, 10 ket dinutokan
ti Dios a Kangatoan a Padi a kas ken ni Melkisedec. 11 Adu ti maibagami
maipapan iti daytoy a banag, ngem saan a nalaka nga ilawlawag kadakayo
agsipud ta kasapulanyo ti adu a tiempo sakbay a maawatanyo ti
kaipapananna. 12 Adun ti limmabas a panawen ket rebbengna koma
metten a dakayo ti mangisuro. Ngem saan met, ta masapulyo pay laeng ti
sabali a mangisuro manen kadakayo kadagiti nasken a sursuroenyo
maipapan iti Sao ti Dios. Imbes koma a ti taraon ti nataengan ti kanenyo,
saan ta gatas pay laeng ti masapul nga inumenyo. 13 Siasinoman a gatas ti
pagbibiagna, ubing pay laeng a dina ammo ti pagdumaan ti naimbag ken
dakes. 14 Iti sabali a bangir, ti natangken a taraon, agpaay kadagiti
nataengan, isuda a nasursuroan a mangaramat kadagiti panunotda a
mamaglasin iti naimbag ken dakes.
Hebreo 6
1 Ngarud, umaddangtayo iti nangatngato a tukad ti sursuro ni Cristo ket
ditayo pagsasaritaan manen dagiti umuna a pannursuro maipapan ken ni
Cristo. Ditay agsubli manen iti nangrugiantayo a sursuro, kayatna a sawen,
ti panangtallikudtayo kadagiti ubbaw nga aramid ken panamatitayo iti
Dios; 2 pannursuro maipapan iti buniag ken ti seremonia ti panangipatay
iti ima; ti panagungar dagiti natay ken ti agnanayon a pannakaukom. 3
Wen, umaddangtayo, ket aramidentayo daytoy no tulongannatayo ti Dios.
4 Saanen a mapagbabawi dagiti simmina iti pammati tapno agsublida
manen. Addada idin iti silaw ti Dios. Linak-amda ti nailangitan a sagut.
Inawatda ti pannakabagida iti Espiritu Santo. 5 Manipud iti padasda,
natakuatanda a naimbag ti sao ti Dios ket nariknada ti pannakabalin ti
mapasungad a panawen. 6 Kalpasanna, simminada iti pammati! Pulos a
saandan a mapagsubli tapno agbabawida manen, gapu ta arigna nga
ilanlansada manen iti krus ti Anak ti Dios ken ibabainda iti imatang dagiti
tattao. 7 Paraburan ti Dios ti daga a mangsagepsep iti tudo a masansan nga
agtinnag ken mangpatubo kadagiti mulmula a pagtaudan iti taraon kadagiti
pakaipaayanna. 8 Ngem no agtubo dagiti sisiitan ken barsanga iti dayta a
daga, awan serserbina ket awan duadua nga ilunod ti Dios—dadaelento ti
apuy. 9 Uray no kastoy ti kunami, patgenmi a gagayyem, saankami a
madanagan kadakayo. Ammomi ngamin a nasayaat ti kasasaadyo ket
mangnamnamakam iti pannakaisalakanyo. 10 Nalinteg ti Dios. Dinanto
lipaten ti aramidyo, kayatna a sawen, ti ayat nga impaayyo kenkuana
babaen iti panangtulongyo ken ti panangtultulongyo pay laeng kadagiti
kakabsatyo iti pammati. 11 Tarigagaymi nga ituloy ti tunggal maysa
kadakayo ti sigud a regtana agingga iti panungpalan tapno magun-odyo ti
namnamaenyo. 12 Dimi kayat nga agbalinkayo a nasadut. Kayatmi ketdi a
tuladenyo dagiti namati ken nagan-anus ket inawatda ti inkari ti Dios. 13
Idi nagkari ti Dios ken ni Abraham, insapatana a tungpalenna ti karina.
Yantangay ta awan ti nangatngato a pannakabalin ngem isu, inaramatna ti
bukodna a nagan iti dayta a sapata. 14 Kinunana, “Ikarik a
bendisionankanto ket paaduekto ti kaputotam.” 15 Naawat ni Abraham ti
inkari ti Dios gapu ta nagur-uray a siaanus. 16 No agsapata ti tao,
aramatenna ti nagan ti natantan-ok ngem isu, ket dayta a sapata ti
mangrisut iti amin a pagsusuppiatan. 17 Agsipud ta kayat ti Dios nga
ipakita a silalawag kadagiti umawat iti karina a dina baliwan ti panggepna,
pinatalgedanna ti kari babaen iti panagsapatana. 18 Saan nga agbalbaliw
dagitoy dua: ti kari ti Dios ken ti sapatana. Gapu kadagitoy, dinatayo
mabalin nga ulboden ti Dios. Isut’ gapuna a datayo a nagkamang
kenkuana, mapapigsatayo nga agtalinaed a natibker iti namnama nga adda
iti masangoanantayo. 19 Adda kadatayo daytoy a namnama a kas angkla ti
kararua. Natalged ken natibker daytoy a namnama ket sumrek iti kurtina
iti nailangitan a templo agingga iti akin-uneg a santuario. 20 Tapno
matulongannatayo, immun-una ni Jesus ngem datayo a simrek sadiay
agsipud ta nagbalin a Kangatoan a Padi iti agnanayon a kas ken ni
Melkisedec a padi.
Hebreo 7
1 Ari idi idiay Salem daytoy a Melkisedec ken maysa a padi a nagserbi iti
Dios a Kangatoan. Idi aggapu ni Abraham iti paggugubatan a
nangparmekanna iti uppat nga ari, sinabat ni Melkisedec sana inkararagan
a bendisionan koma ti Dios. 2 Inted ni Abraham kenkuana ti apagkapullo
ti amin a sinamsamna. (“Ari ti Kinalinteg” ti kayat a sawen ti nagan a
Melkisedec. “Ari ti Kappia” ti kayatna pay a sawen gapu ta ni Melkisedec
ti ari ti Salem.) 3 Awan ti naisurat maipapan iti kinasiasino dagiti
nagannak kenkuana wenno kapuonanna. Awan met pakakitaan no kaano ti
pannakayanak wenno ipapatayna. Mayarig ni Melkisedec iti Anak ti Dios.
Agtalinaed a padi iti agnanayon. 4 Makitayo ngarud no kasano ti kangato
ti saad ni Melkisedec! Inted kenkuana ni Abraham nga ama ti nasiontayo ti
apagkapullo ti amin a nasamsamna iti gubat. 5 Ket kas sagudayen ti
Linteg, naibilin kadagiti papadi a nagtaud iti kaputotan ni Levi nga
awatenda a kas daton ti apagkapullo nga aggapu kadagiti tattao ti Israel,
kayatna a sawen, kadagiti kailianda met laeng uray no kaputotan met ida
ni Abraham. 6 Saan a nagtaud ni Melkisedec iti kaputotan ni Levi, ngem
inawatna ti apagkapullo ken ni Abraham. Inkararaganna pay a
mabendisionan koma daytoy a tao a nagkarian ti Dios. 7 Di pagduaduaan a
nangatngato ti mangbendision ngem ti mabendisionan. 8 Iti biang dagiti
papadi, dagiti tattao a matayto iti kamaudianan ti umawat iti apagkapullo.
Ngem iti biang ni Melkisedec, ti sibibiag ket isu ti umawat iti apagkapullo
a kas kuna ti Nasantoan a Surat. 9 Mabalin pay a kuna nga idi inted ni
Abraham ti apagkapullo, nangted met ni Levi (a naibilin kadagiti
kaputotanna nga awatenda met ti apagkapullo.) 10 Ta saan pay a nayanak
idi ni Levi, no di ket, kastay kunadan, adda pay laeng iti bagi ni Abraham
a kapuonanna idi sabaten ni Melkisedec. 11 Adda nasken nga akem dagiti
papadi a Levita kas sagudayen ti Linteg a naipaulog nga annuroten dagiti
Israelita. Ita, no nagun-od ti awan pagkuranganna babaen iti kinapadi
dagiti Levita, saan koman a kasapulan ti sabali a padi a kas ken ni
Melkisedec, a saan a padi a nagtaud iti kaputotan ni Aaron. 12 No agbaliw
ti kapuonan dagiti papadi, masapul met a mabaliwan ti linteg. 13 Nagtaud
iti sabali a tribu ti Apotayo ket awan ti uray maysa a katribuanna ti
nagserbi a kas padi. 14 Nalawag a nagtaud ti Apotayo iti tribu ti Juda, ket
awan ti nadakamat ni Moises maipapan iti daytoy a tribu idi nagsao
maipapan kadagiti papadi. 15 Nalawlawag pay a makita daytoy iti kaadda
ti sabali a padi a kas ken ni Melkisedec. 16 Nagbalin a padi babaen iti
pannakabalin ti biag nga awan patinggana, saan a babaen iti paglintegan
maipapan iti panagtaud iti maysa a kapuonan. 17 Ta kuna ti Nasantoan a
Surat, “Padika nga agnanayon a kas iti kinapadi ni Melkisedec.” 18
Naiwaksi ngarud daydi daan a sagudayen gapu ta agkurang ken awan
serserbina. 19 Ta awan ti inaramid ti Linteg a nagbalin a naan-anay. Ket
ita, naited kadatayo ti nasaysayaat a namnama a mangyasideg kadatayo iti
Dios. 20 Saan la a dayta. Adda pay sapata ti Dios. Awan ti kasta a sapata
idi nagpadi dagiti sabsabali. 21 Ngem idi nagbalin ni Jesus a padi, insapata
ti Dios: “Siak nga Apo Dios, insapatak, Ket dinto agbaliw ti panunotko:
‘Padika nga agnanayon.’” 22 Daytoy ngarud ti namagbalin ken ni Jesus a
mamatalged iti nasaysayaat a tulag. 23 Adda pay sabali a paggiddiatan:
Adu dagiti papadi a nagsasaruno a nadutokan, ngem natayda ket dida
nagtalinaed iti saadda. 24 Ngem sibibiag nga agnanayon ni Jesus, ket saan
nga agsardeng ti panagserbina a kas padi. 25 Isut’ gapuna a kabaelanna
nga isalakan dagiti umasideg iti Dios babaen kenkuana agsipud ta agbiag
nga agnanayon a mangibabaet kadakuada iti Dios. 26 Ngarud, ni Jesus ti
Kangatoan a Padi a makaaramid iti amin a kasapulantayo. Nasantoan,
awan tulaw wenno basolna, naisina kadagiti managbasol ket naipangato
sadi langit. 27 Saan a kas kadagiti dadduma a kangatoan a papadi a
masapul nga inaldaw a mangipaay iti daton a maigapu, umuna, iti bukodna
a basol, ket kalpasanna, maipuon met kadagiti basol dagiti tattao.
Naminsan a nagidaton ni Jesus ket daytoy para iti agnanayon—idi
indatonna a mismo ti bagina iti Dios. 28 Kas mayannurot iti Linteg ni
Moises, adda dagiti matudingan nga agbalin a nangato a padi, uray no
adda pakapilawanda; ngem babaen iti kari a sinapataan ti Dios, a naud-udi
nga immay ngem ti Linteg, matudingan ti Anak, isu a naaramid nga awan
pakapilawanna iti agnanayon.
Hebreo 8
1 Daytoy ti kayatmi a sawen: Adda kastoy a Kangatoan a Paditayo a
situtugaw iti makannawan ti trono ti Natan-ok nga Ari sadi langit. 2
Agserserbi kas kangatoan a padi iti Kasasantoan a Disso, kayatna a sawen,
ti napudpudno a tabernakulo a binangon ti Apo, saan a ti tao. 3
Natudingan ti tunggal kangatoan a padi tapno idatagna dagiti sagut ken
sakrifisio iti Dios. Isut’ gapuna a masapul nga adda met idaton daytoy
Kangatoan a Paditayo. 4 No adda koma ditoy daga, saanen a masapul nga
agpadi, ta adda metten dagiti papadi a mangidaton kadagiti sagsagut kas
mayannurot iti Linteg. 5 Ti trabahoda kas padi ket umasping ngem
anniniwan laeng ti adda sadi langit. Kasta met idi ken ni Moises. Idi
rugianna a bangonen ti tabernakulo, imbilin ti Dios kenkuana, “Kitaem a
naimbag a maaramid amin a kas iti naipakita kenka idiay bantay.” 6 Ngem
ita, naikkan ni Jesus iti trabaho a nasaysayaat ngem ti trabaho dagiti
papadi. Kasta met a nasaysayaat ti baro a tulag nga insayangkatna iti
nagbaetan ti Dios ken dagiti tattao. Nasaysayaat daytoy ngem ti immuna
gapu ta inkari ti Dios nga agsagrap dagiti tattao kadagiti nasaysayaat a
banag. 7 Adda pakapilawan daydi immuna a tulag, isu a kasapulan a
maaramid ti maikadua. 8 Ngamin, nasarakan ti Dios nga adda
pagkurangan dagiti tattaona idi kunana: “Dumtengto dagiti aldaw, kuna ti
Apo, A mangaramidak iti baro a tulag iti Israel ken Juda. 9 Saan a kas iti
tulag nga inaramidko kadagiti kapuonanda Iti daydi aldaw a
panangiruarko kadakuada idiay Egipto. Saanda a sinalimetmetan ti
nagtutulaganmi, Isut’ gapuna a binaybay-ak ida, kuna ti Apo. 10 Daytoy ti
baro a pannakitulagko kadagiti Israelita Kadagiti masakbayan nga aldaw,
kuna ti Apo: Ikabilkonto dagiti linlintegko kadagiti isipda, Ket isuratkonto
ida kadagiti pusoda. Siakto ti Diosda, Ket isudanto dagiti tattaok. 11
Saanton a masapul nga agsisinnuroda Wenno ibaga ti tunggal maysa,
‘Ammoenyo ti Apo.’ Agsipud ta ammodakto aminen, Manipud iti
kanumoan agingga iti katan-okan. 12 Pakawanekto dagiti basbasolda,
Saankon a lagipen dagiti dakes nga inaramidda.” 13 Nagsao ti Dios
maipapan iti baro a tulag. Ngarud, imbilangna a daanen daydi immuna, ket
aniaman a daan ken saanen a maaramat, agpukaw iti saan a mabayag.
Hebreo 9
1 Adda dagiti alagaden daydi immuna a tulag maipapan iti
panagdaydayaw ken iti disso a pagdaydayawan nga aramid ti tao. 2
Nabangon ti maysa a tabernakulo, daydi akinruar, a maaw-awagan iti
Nasantoan a Disso. Ditoy ti ayan ti kandelero, ken ti lamisaan nga ayan ti
tinapay a naidaton iti Dios. 3 Iti likudan ti maikadua a kurtina ti
tabernakulo, masarakan ti Kasasantoan a Disso. 4 Ditoy ti ayan ti balitok
nga altar a pagpuoran iti insenso ken ti lakasa ti tulag a nakalupkopan iti
balitok. Ti lakasa ti nakaikabilan ti balitok a banga a nakaikargaan ti mana,
ti nagsaringit a sarukod ni Aaron ken dagiti dua a tapi ti bato a
nakaisuratan dagiti bilin. 5 Iti ngatoen ti lakasa, adda met dagiti kerubim a
mangiladawan iti dayag ti Dios. Linlinonganda kadagiti payakda ti disso a
pakapakawanan dagiti basbasol. Ngem saan pay nga ita ti
pannakailawlawag dagitoy a bambanag. 6 Kastoy ti urnos dagitoy iti uneg
ti tabernakulo ket inaldaw a sumrek dagiti papadi iti akinruar a paset ti
tapno aramidenda ti annongda. 7 Ngem ti laeng Kangatoan a Padi ti
sumrek iti akin-uneg a paset, ket maminsan laeng iti makatawen. Itugotna
ti dara nga idatonna iti Dios gapu iti basolna ken iti basol dagiti tattao a di
makaammo nga agbasbasolda. 8 Silalawag nga impaawat ti Espiritu Santo
babaen kadagitoy a pagannurotan a saan pay a naluktan ti dalan nga
agturong iti Kasasantoan a Disso, bayat ti kaadda pay laeng ti akinruar a
paset ti tabernakulo. 9 Daytoy ti mangiladawan iti agdama a panawen.
Kayatna a sawen a dagiti sagsagut ken sakrifisio, saanda a maugasan a
naan-anay ti konsensia dagiti agdaydayaw. 10 Dagitoy nga alagaden
maipapan iti taraon, inumen ken nadumaduma a seremonia ti
pannakadalus, agpaayda laeng agingga a dumteng ti tiempo ti
panagbalbaliw. 11 Ngem immayen ni Cristo a kas Kangatoan a Padi dagiti
naimbag a bambanag nga addan. Dakdakkel ken nasaysayaat ti
tabernakulo a pagserserbianna, ta saan nga inaramid ti tao, kayatna a
sawen, saan a paset daytoy naparsua a lubong. 12 Idi simrek ni Cristo iti
Kasantoan a Disso—naminsan laeng ken para iti agnanayon—saan a dara
dagiti kalding ken urbon a baka ti intugotna nga idaton, no di ket ti mismo
a darana. Iti kasta, naitrabahona ti agnanayon a pannakaisalakantayo. 13
Maugasan dagiti tattao a makuna a “saan a nadalus,” babaen iti
pannakawarsida iti dara dagiti kalding ken baka ken dagiti dapu ti
napuoran nga urbon ti baka. 14 Ngem ad-adda pay ti pannakabalin ti dara
ni Cristo! Ta babaen iti agnanayon nga Espiritu, impaayna iti Dios ti
bagina a kas daton nga awan pakapilawanna. Ti darana ti mangugas
kadagiti konsensiatayo kadagiti awan serserbina a panagdaydayaw tapno
aramidentayo ti pagayatan ti sibibiag a Dios. 15 Daytoy ti gapu no apay a
ni Cristo ti mangisayangkat iti baro a tulag: tapno awaten dagiti inayaban
ti Dios dagiti agnanayon a bendision nga inkari ti Dios. Maaramid daytoy
agsipud ta iti ipapatayna, wayawayaanna dagiti tattao kadagiti
salungasingda idi adda pay laeng iti babaen ti immuna a tulag. 16 No adda
testamento, masapul nga adda pammaneknek a natay ti nagtestamento. 17
Awan bileg ti testamento no sibibiag pay laeng ti nagtestamento. Sa la
adda bilegna kalpasan ti ipapatayna. 18 Dayta ti gapuna a napasingkedan ti
immuna a tulag babaen iti pannakaaramat ti dara. 19 Impakaammo ni
Moises dagiti amin a bilbilin kadagiti amin a tattao kas nailanad iti Linteg.
Kalpasanna, innalana ti dara dagiti urbon a baka ken kalding sana inlimog
iti danum, ket winarsianna ti libro ti Linteg ken dagiti tattao babaen iti
hisopo ken lumabaga a de lana. 20 Kunana, “Daytoy ti dara a
mangpasingked iti tulag nga imbilin ti Dios a tungpalenyo.” 21
Winarsianna met ti tabernakulo ken ti isuamin nga alikamen a mausar iti
panagdaydayaw. 22 Kinapudnona, kas mayannurot iti Linteg, gistay amin
a bambanag maugasanda babaen iti pannakaiparukpok ti dara, ket
mapakawan ti basol babaen iti pannakaiparukpok ti dara. 23 Masapul a
maugasan kadagitoy a seremonia dagiti bambanag a naadaw kadagiti
nailangitan a pagtuladan. Ngem dagiti bambanag a nailangitan, masapulda
dagiti nasaysayaat a daton. 24 Ta saan a simrek ni Cristo iti Nasantoan a
Disso nga aramid ti tao ken ladawan laeng ti napaypayso a disso. Simrek
ketdi sadi langit a yanna ita iti sangoanan ti Dios gapu kadatayo. 25
Tinawen a sumrek ti Kangatoan a Padi iti Kasasantoan a Disso a
mangidaton iti dara ti animal. Ngem saan a namin-adu a simrek ni Cristo a
mangidaton iti mismo a bagina. 26 Ta no kasta ti naaramid, mamin-adu
met koma nga agsagaba manipud iti pannakaparsua ti lubong. Ngem iti
kinaagpaysona, iti paggibusan dagiti panawen, naminsan la a nagparang
ket saanen a naulit, tapno ikkatenna ti basol babaen iti panangidatonna iti
mismo a bagina. 27 Naituding a matay ti tao iti maminsan, ket kalpasanna,
ukomen ti Dios. 28 Kasta met a namimpinsan a naidaton ni Cristo a
mangikkat iti basol ti adu. Agparangto iti maikadua a daras, ngem saanen
a gapu iti basol, no di ket tapno isalakanna dagiti mangnamnama iti
yaayna.
Hebreo 10
1 Saan a naan-anay ti Linteg dagiti Judio; saan met a pudno a pagtuladan
kadagiti napaypayso a bambanag. Anniniwanda laeng dagiti naimbag a
bambanag nga umayto. Tinawen a maidatag ti isu met laeng a kita ti
daton. Ni kaanoman saan a kabaelan ti Linteg a pagbalinen a naan-anay
dagiti tattao nga umasideg iti Dios babaen kadagitoy a daton. 2 Ta no
agpayso a maugasan ti basol dagiti agdaydayaw iti Dios, awan koman ti
riknada a nakabasol, ket agsardengda metten nga agidaton. 3 Nupay kasta,
tinawen nga ipalagip dagitoy a daton ti basol dagiti tattao. 4 Saan a
kabaelan ti dara dagiti baka ken kalding nga ikkaten dagiti basol. 5 Daytoy
ti gapuna nga idi umayen ni Cristo ditoy lubong, kinunana iti Dios: “Dimo
tarigagayan dagiti sakrifisio ken daton, ngem insaganaannak iti maysa a
bagi. 6 Dika maragsakan kadagiti daton a mapuoran iti altar, wenno dagiti
daton a mangikkat kadagiti basbasol. 7 Iti kasta, kinunak, ‘Adtoyak, O
Dios, a mangaramid iti pagayatam, Kas naisurat iti maipapan kaniak iti
libro ti Linteg.’” 8 Umuna, kinunana, “Dimo tarigagayan ken dika
maragsakan kadagiti sakrifisio ken datdaton ken animal a mapuoran iti
altar ken kadagiti daton a mangikkat kadagiti basbasol.” Kunana daytoy
nupay maidaton amin dagitoy kas mayannurot iti Linteg. 9 Kalpasanna,
kinunana, “Adtoyak, O Dios, a mangaramid iti pagayatam.” Iti kasta,
waswasen ti Dios ti immuna ket insukatna ti pannakaidaton ni Cristo! 10
Babaen iti pagayatan ti Dios, nadalusantayo iti basoltayo babaen iti
namimpinsan a panangidaton ni Jesu-Cristo iti mismo a bagina. 11
Inaldaw nga agserbi ti tunggal padi ket mamin-adu nga idatagna dagiti isu
met laeng a kita ti daton. Ngem pulos a saan a kabaelan dagitoy a daton
nga ikkaten dagiti basol. 12 Nupay kasta, indatag ni Cristo ti maymaysa a
daton a maipaay iti agnanayon gapu kadagiti basol, ket kalpasanna,
nagtugaw iti makannawan ti Dios. 13 Agur-uray ita sadiay agingga a
maparmek ti Dios dagiti kabusorna ket addada iti babaenna. 14 Ngarud,
babaen iti maymaysa a daton, pinagbalinna a naan-anay iti amin a tiempo
dagiti mapagsanto. 15 Paneknekan met daytoy kadatayo ti Espiritu Santo.
Umuna, kunana: 16 “Daytoy ti tulag nga aramidekto kadakuada, Kadagiti
masakbayan nga aldaw, kuna ti Apo: Ikabilkonto dagiti lintegko kadagiti
puspusoda, Ket isuratkonto dagitoy kadagiti pampanunotda.” 17 Kunana
pay, “Diakto lagipenen dagiti basbasol ken kinadakesda.” 18 Ngarud, no
napakawanen dagitoy, saanen a masapul ti daton a mangikkat iti basol. 19
Isut’ gapuna, kakabsat, nga adda wayawayatayo a sumrek a situtured iti
Kasasantoan a Disso gapu iti dara ni Jesus. 20 Inlukatna kadatayo ti baro
ken nabiag a dalan a lumasat iti kurtina, kayatna a sawen, ti bagina met
laeng. 21 Maysa pay, adda naindaklan a paditayo nga agay-aywan iti balay
ti Dios. 22 Umasidegtayo ngarud iti Dios iti napudno a puso ken natalged
a pammati. Wen, umasidegtayo a nadalus ti pusotayo—nadalusan iti dakes
a konsensia—ken ti bagitayo a naugasan iti nadalus a danum. 23
Agtalinaedtayo ngarud a natibker iti namnamatayo agsipud ta mapagtalkan
ti Dios a mangtungpal iti karina. 24 Panunotentayo no kasano ti
panagtitinnulongtayo iti panagayat ken panagaramid iti naimbag. 25
Ditayo liwayan ti panaggigimongtayo, kas ar-aramiden dagiti dadduma.
Ad-adda pay koma ti panagpipinnaregtatayo, ita ta makitayo nga
umasidegen ti Aldaw. 26 No itultuloytayo pay laeng ti agbasol kalpasan ti
pannakaammotay iti pudno, awanen ti uray ania a daton a makaikkat
kadagiti basbasol. 27 Awanen ti maaramidtayo no di aguray iti
nakabutbuteng a pannakaukom ken ti gumilgil-ayab nga apuy a
mangikisap kadagiti bumusor iti Dios. 28 Mapapatay nga awan asi ti
siasinoman a mangsalungasing iti Linteg ni Moises no dua wenno tallo a
tattao ti mangted iti pammaneknek a maibusor iti dayta a tao ket
masentensiaan a nakabasol gapu iti panagsaksida. 29 Panunotenyo no
kasano ti kadagsen ti dusa ti tao a manglalais iti Anak ti Dios, mangumsi
iti dara a nangpatalged iti tulag a nangugas kenkuana iti basol ken agsao iti
maibusor iti managparabur nga Espiritu! 30 Ta ammotayo ti nagkuna,
“Siakto ti agibales, siakto ti agdusa.” Ammotayo no siasino pay ti
nagkuna, “Ukomento ti Apo dagiti tattaona.” 31 Nakabutbuteng ti matnag
iti ima ti sibibiag a Dios. 32 Ngem lagipenyo ti kasasaadyo iti napalabas.
Kadagidi nga aldaw, adu ti sinagabayo kalpasan ti pannakalawlawagyo,
ngem saankayo a naparmek. 33 Adda dagidi tiempo a nalalais ken
naparparigatkayo iti publiko. No dadduma, siaayatkayo a nakipagsagaba
kadagiti kasta ti pannakaidadanesda. 34 Ta nakipagriknakayo kadagiti
naibalud. Idi nasamsam dagiti sanikuayo, inibturanyo a siraragsak ti
pukawyo ta ammoyo nga addaankay iti nasaysayaat ken mataginayon a
sanikua. 35 Isut’ gapuna a diyo pukawen ti namnamayo, ta yegna ti dakkel
a gunggona. 36 Masapul nga agibturkayo tapno maaramidyo ti pagayatan
ti Dios, ket awatenyo ti inkarina. 37 Kas nailanad iti Nasantoan a Surat,
“Iti bassit laengen a tiempo, Umayen daydiay umayto; dinto agtaktak. 38
Nupay kasta, agbiagto ti nalinteg a taok babaen iti pammati; ngem no
pagpanawanna ti pammati, saan a maragsakan ’toy kararuak kenkuana.”
39 Saantayo a kas kadagiti nangiwaksi iti pammatida ket napukawda.
Addaantayo ketdi iti pammati ket maisalakan ti kararuatayo.
Hebreo 11
1 No adda pammatitayo, ditay agduadua a pumudno dagiti
namnamaentayo ket natalgedtayo nga adda dagiti bambanag a ditay
makita. 2 Gapu iti pammati, nagun-od dagiti tattao idi un-unana ti
yaanamong ti Dios kadakuada. 3 Gapu ta adda pammatitayo,
maawatantayo a naparsua ti lubong babaen iti sao ti Dios ket iti kasta,
napataud dagiti makita kadagiti saan a makita. 4 Gapu ta adda pammati ni
Abel, nangipaay iti Dios iti nasaysayaat a daton ngem ti daton ni Cain.
Babaen iti pammatina, nagun-odna ti yaanamong ti Dios kas nalinteg a tao
agsipud ta inawat ti Dios dagiti sagutna. Gapu iti pammati ni Abel,
agsasao pay laeng uray no natayen. 5 Gapu ta adda pammati ni Enoc,
nailisi iti ipapatay. Nayuli ketdi iti ayan ti Dios, ket awan ti nakasarak
kenkuana agsipud ta innala ti Dios. Kuna ti Nasantoan a Surat a sakbay a
nayuli ni Enoc, naragsakan ti Dios kenkuana gapu iti inaramidna. 6 Ngem
no awan ti pammati, saan a mabalin a maparagsak ti Dios. Ta no
umasidegka iti Dios, masapul a patiem nga adda Dios a manggunggona
kadagiti agsapul kenkuana. 7 Gapu ta adda pammati ni Noe, impangagna
ti balakad ti Dios maipapan kadagiti bambanag iti masakbayan a dina pay
makita. Nagtulnog ket nangaramid iti daong a nakaisalakananda a
sangafamiliaan. Gapu iti inaramidna, impakitana a dakes ti lubong ket
babaen iti pammati, inawatna ti kinalinteg nga aggapu iti Dios. 8 Gapu ta
adda pammati ni Abraham, nagtulnog idi ayaban ti Dios ket napan iti
maysa a pagilian nga inkari ti Dios nga ited kenkuana. Pimmanaw iti ilina,
nupay dina ammo ti papananna. 9 Gapu ta adda pammatina, nagnaed a kas
ganggannaet iti daga nga inkari ti Dios kenkuana. Nagyan kadagiti tolda
agraman da Isaac ken Jacob, isuda a nagkarian met ti Dios. 10 Ta
paspasungaden idi ni Abraham ti siudad a binangon ken inaramid ti
Dios—ti siudad a nabangon iti mataginayon a fondasion. 11 Babaen iti
pammati, naparaburan ni Sara iti gundaway nga agsikog nupay baketen
agsipud ta nagtalek a tungpalen ti Dios ti inkarina. 12 Nupay naibilang a
kasla natayen ni Abraham, timmaud kenkuana ti adu a kaputotan a kas
kaadu dagiti bitbituen sadi langit ken kas kaadu ti darat iti igid ti baybay.
13 Nagtalek amin dagitoy a tattao iti Dios agingga iti ipapatayda. Saanda a
naawat dagiti inkari ti Dios, ngem nakita ken pinaspasungadanda dagitoy a
kari uray no mabayag pay ti pannakatungpalda. Dida nagaripapa a
mangibaga kadagiti tattao a ganggannaetda ket agdaldaliasatda ditoy daga.
14 Ta iparangarang dagiti agkuna iti kasta nga agbirbirokda iti bukodda a
daga. 15 Saan a ti daga a pinanawanda ti pampanunotenda. No ti daga a
pinanawanda ti pampanunotenda, adda koma gundawayda nga agsubli. 16
Ngem tartarigagayanda ti nasaysayaat a lugar, kayatna a sawen, ti
nailangitan a lugar. Isut’ gapuna a saan a mabainan ti Dios no awaganda a
Diosda agsipud ta insaganaanna ida iti maysa a siudad. 17 Gapu ta adda
pammati ni Abraham, indatonna ni Isaac nga anakna idi suoten ti Dios.
Wen, ni Abraham ti nakaitedan ti kari ti Dios. Sisasagana idi a mangidaton
iti kakaisuna nga anakna. 18 Daytoy ti gapuna a kinuna ti Dios kenkuana,
“Tumaudto dagiti kaputotam ken ni Isaac.” 19 Binigbig ni Abraham a
kabaelan ti Dios ti mangpagungar, isut’ gapuna nga iti sabali a pannao,
naisubli ni Isaac kenkuana manipud ken ni patay. 20 Gapu ta adda
pammati ni Isaac, imbagana kada Jacob ken Esau, “Bendisionannakayto ti
Dios iti masakbayan.” 21 Gapu ta adda pammati ni Jacob, binendisionanna
ti tunggal maysa kadagiti annak ni Jose sakbay ti ipapatayna.
Nagsammaked ni Jacob iti sarukodna ket nagdaydayaw iti Dios. 22
Babaen iti pammati, sakbay ti ipapatay ni Jose, imbagana ti ipapanaw
dagiti Israelita idiay Egipto. Imbilinna met ti aramidendanto iti bangkayna.
23 Gapu iti pammati, idi nayanak ni Moises, inlemmeng dagiti dadakkelna
iti tallo a bulan. Gapu ta nakitada a nalungpo ti ubing, dida nagbuteng a
nangsalungasing iti bilin ti ari. 24 Babaen iti pammati, idi nataenganen ni
Moises, dina kinayat ti maibilang nga anak ti babai nga anak ti Faraon. 25
Kinaykayatna ti makipagsagaba kadagiti tattao ti Dios ngem ti panaglak-
amna iti di agpaut a ragsak nga ited ti basol. 26 Imbilangna a napatpateg
nga adayo ti panagsagaba a maipuon iti Cristo ngem ti amin a
kinabaknang ti Egipto agsipud ta kanayon a situturong ti panagkitana iti
gunggona iti masakbayan. 27 Gapu ta adda pammati ni Moises,
pimmanaw iti Egipto a di nagbuteng iti pungtot ti ari. Dina kinayat ti
agsubli ta kasna la kitkitaen ti Dios a di makita. 28 Gapu ta adda
pammatina, inrugina ti pannakarambak ti Fiesta ti Ilalabas. Pinawarsianna
dagiti ridaw iti dara tapno saan a gudasen ti Anghel ni Patay dagiti inauna
nga annak dagiti Israelita. 29 Gapu ta adda pammati dagiti Israelita,
binallasiwda ti Nalabaga a Baybay. Kasda la nagna iti namaga a daga,
ngem nalmes dagiti Egipcio idi pinadasda ti bumallasiw. 30 Gapu iti
pammati, narba dagiti bakud ti Jerico, kalpasan ti panangrikrikos dagiti
Israelita iti pito nga aldaw. 31 Gapu iti pammati, saan a nairaman a
napapatay ni Rahab a balangkantis a babai idi napapatay dagiti simmukir
iti Dios, agsipud ta siaayat a nangpasangbay kadagiti espia. 32 Ituloyko
pay kadi ti agsarita? Awanen ti tiempok a mangibaga iti pakasaritaan da
Gideon, Barac, Samson, Jefte, David, Samuel ken dagiti profeta. 33
Babaen iti pammati, pinarmekda dagiti pagarian. Inaramidda ti nalinteg
ket inawatda ti inkari ti Dios. Inapputda ti ngiwat dagiti leon. 34 Iniddepda
dagiti gumilgil-ayab nga apuy. Nalisianda ti pannakapapatay iti kampilan.
Nakapuyda ngem pimmigsada. Nagbalinda a maingel iti gubat ket
pinarmekda ti buyot dagiti ganggannaet. 35 Inawat dagiti babbai dagiti
napagungar a minatayda. Saan a kinayat dagiti dadduma ti
mawayawayaan. Kinaykayatda ketdi ti maparparigat agingga a natayda
tapno mapagungarda iti nasaysayaat a biag. 36 Nalalais ken nasapsaplit
dagiti dadduma. Nakawaran ken naibaludda. 37 Nauborda, naragadida a
nagkadua, napapatayda iti kampilan. Nagpagnapagnada a sikakawes iti
lalat ti karnero wenno kalding. Napanglawda, naidadanesda ken
naparparigatda. 38 Saan a maikari ti lubong kadakuada! Nagalla-allada
kadagiti let-ang ken bantay. Nagigianda kadagiti abut ken rukib ti daga. 39
Nagun-od amin dagitoy a tattao ti nasayaat a pakasaritaan gapu iti
pammatida! Nupay kasta, dida naawat ti inkari ti Dios, 40 ta adda
nasaysayaat a plano ti Dios saan laeng a para kadakuada no di pay ket para
kadatayo. Panggep ti Dios a kaduatayonto ida nga umawat iti inkarina nga
awan ket ti umun-una.
Hebreo 12
1 No maipapan kadatayo, nalikmuttayo kadagitoy nakaad-adu a saksi.
Ikkatentayo ngarud dagiti amin a makasali iti dalan ken ti basol a
mangsimbalud kadatayo, ket agtaraytayo a sipipinget iti lumba a
pakisalipantayo. 2 Ditay isinsina ti matatayo ken ni Jesus a pangulo ken
mangpunno iti pammati. Saan a naupay ni Jesus gapu iti krus. Ngem gapu
iti rag-o nga agur-uray kenkuana, dina pinampanunot ti pannakaibabain iti
ipapatay iti krus. Adda itan a situtugaw iti makannawan ti trono ti Dios. 3
Tapno dikay agkapuy wenno maupay, panunotenyo no kasano ti
panagsagabana gapu iti napalalo a panangbusor kenkuana dagiti
managbasol. 4 Di pay nagsayasay ti darayo iti pannakidangadangyo iti
basol. 5 Nalipatanyo kadin ti sao ti Dios iti panangbalakadna kadakayo a
kas annakna—dagiti balikas a mangpapigsa iti pakinakemyo? Kunana:
“Anakko, ipangagmo a naimbag ti Apo no ipakitana kenka a nagbiddutka
Ket di koma kumapsut ti pakinakemmo no ipatayna kenka ti pannusa. 6
Ngamin, babalawenna ti ayatenna ken saplitenna ti awatenna a kas
anakna.” 7 Ibturanyo ti panagsagabayo ket ibilangyo a kas iti
panangdisiplina ti maysa nga ama. Ipakita ti panagsagabayo nga
ibilangnakayo ti Dios a kas annakna. Adda aya anak a saan nga aturen ti
amana? 8 No saannakayo nga aturen a kas kadagiti amin nga annakna,
kayatna a sawen a bastardokayo ket saannakayo a napaypayso nga annak.
9-10 Panunotentayo ti maipapan kadagiti bukodtayo nga amma:
dinisiplinaandatayo ket nagraemtayo kadakuada. Ngarud, saan kadi nga
ad-adda a rumbeng laeng nga awatentayo ti pannusa nga ipatay ti
naespirituan nga Amatayo tapno agbiagtayo? Iti las-ud ti ababa a tiempo,
dinusadatayo dagiti bukodtayo nga amma, kas maibatay iti ipagarupda a
naimbag. Ngem no maipapan iti panagsagaba nga ipalak-am ti Dios,
aramidenna daytoy a pagimbagantayo tapno agbalintayo a nasagradoan a
kas kenkuana. 11 Bayat ti pannakadisiplinatayo, saantayo a maragsakan
no di ket agladingittayo. Ngem kalpasanna, sagrapentayo ti kappia ken
talna a bunga ti nalinteg a biag: ti gunggona dagiti dusaen ti Dios tapno
ipakitana kadakuada a nagbiddutda. 12 Ingatoyo ngarud dagiti naktang
nga imayo! Papigsaenyo dagiti nakapsut a tumengyo! 13 Magnakayo iti
nasimpa a dalan tapno saan a madegdegan no di ket maimbagan ti napilay
a sakayo. 14 Ikagumaanyo ti makikappia iti amin a tattao. Ikagumaanyo
met ti agbiag a nasantoan amangan no diyonto makita ti Apo. 15-16
Agannadkayo tapno awan ti mangtallikud iti managparabur a Dios.
Kitaenyo nga awan ti agbalin a kas iti napait a mula nga agtubo ken
mangdadael iti biag ti tunggal maysa. Awan koma ti agbalin nga immoral
wenno di agraem kadagiti nasantoan a bambanag a kas ken ni Esau.
Insukat ni Esau iti sangamalukong a linugaw ti kalinteganna a kas inauna
nga anak. 17 Kas pagaammoyo, kayatna idi a maited koma met laeng ti
pamendision ni amana, ngem napaay gapu ta awan ti mabirokanna a
pamuspusan a mangbaliw iti inaramidna, uray no nagsangsangit a
nangsapul iti daytoy. 18 Saankayo a kas kadagiti Israelita, isuda nga
immasideg iti mabalin a sagiden—iti Bantay Sinai nga adda idi gumilgil-
ayab nga apuy, ti sipnget ken ti lidem, ti bagio, 19 ti makatitileng nga uni
ti trumpeta ken ti maysa a timek. Idi mangngeg dagiti tattao ti timek,
impakpakaasida a sumardeng nga agsao kadakuada 20 agsipud ta saanda a
mabalin a tungpalen ti naibilin: “No adda bumaddek iti bantay, uray
animal, masapul a bato-batoenyo agingga a matay.” 21 Nakabutbuteng
daydi a buya, isut’ gapuna a kinuna ni Moises, “Agpigpigergerak iti
buteng!” 22 Immasidegkayo ketdi iti Bantay Sion ken iti siudad ti sibibiag
a Dios, ti nailangitan a Jerusalem a yan dagiti rinibribu nga angheles. 23
Immasidegkayo iti naragsak a taripnong dagiti inauna nga annak ti Dios,
isuda a naisurat ti naganda sadi langit. Immasidegkayo iti Dios a
mangukom iti sangkataoan ken kadagiti espiritu dagiti nalinteg a tattao a
naaramid nga awan pagkuranganna. 24 Immasidegkayo ken ni Jesus a
nangisayangkat iti baro a tulag ken iti naiparukpok a darana a
mangipanamnama kadatayo kadagiti bambanag a nasaysayaat ngem ti dara
ni Abel. 25 Agannadkayo ngarud ket ipangagyo ti agsasao. No saan a
nakalisi dagidi saan a nangipangag iti nasantoan a mensahe, ad-addanto
pay a ditayo makalisi no tallikudantayo ti agsasao manipud langit! 26
Gapu iti timekna, nadayyeg idi ti daga ngem ita inkarina, “Maminsan pay
a dayyegek saan laeng a ti daga no di pay ket ti langit.” 27 Ti sao a
“maminsan pay” ipakitana a silalawag a madayyeg ken maikkatto dagiti
naparsua a bambanag tapno dagitinto laeng saan a madayyeg ti mabati. 28
Agyamantayo ngarud agsipud ta awatentayo manipud iti Dios ti pagarian a
saan a madayyeg. Agyamantayo iti Dios ket agdaydayawtayo kenkuana iti
wagas a makaparagsak kenkuana a buyogan ti panagraem ken
panagbuteng. 29 Ngamin, mayarig ti Diostayo iti apuy a mangibus.
Hebreo 13
1 Ituloyyo ti agiinnayat a kas agkakabsat ken ni Cristo. 2 Laglagipenyo a
pasangbayen dagiti ganggannaet. Adda dagiti nagpadagus iti balbalayda a
dida ammo nga angheles dagiti sinangailida. 3 Laglagipenyo dagiti adda
iti pagbaludan ket panunotenyo a kasla kaduadakayo met iti pagbaludan.
Laglagipenyo dagiti agsagsagaba, a kasla agsagsagabakayo met. 4
Masapul a saan a matulawan ti matrimonio ket agtalinaed dagiti agassawa
a napudno iti maysa ken maysa. Ngamin, ukomento ti Dios dagiti immoral
ken makikamalala. 5 Dikay agagum iti kuarta. Mapnekkayo koman iti
adda kadakayo. Ta kinuna ti Dios, “Dikanto panawan, dikanto baybay-
an.” 6 Isut’ gapuna a sitatalgedtayo nga agkuna, “Ti Apo ti tumulong
kaniak, Awanto ti panagbutengko. Ania ti maaramid kaniak ti tao?” 7
Panunotenyo dagiti immun-una a panguloyo a nangipakaammo iti
mensahe ti Dios kadakayo. Ammirisenyo no kasano ti panagbiag ken
ipapatayda ket tuladenyo ida iti panangipakitada iti panagtalekda iti Dios.
8 Saan nga agbalbaliw ni Jesu-Cristo. Isu met laeng idi, ita ken iti
agnanayon. 9 Dikay payaw-awan kadagiti nadumaduma ken karkarna a
pannursuro. Nasayaat a mapapigsa ti pakinakemtayo babaen iti parabur ti
Dios a saan ket a babaen iti panagtungpal kadagiti alagaden maipapan iti
taraon. Awan imbag a nasagrap dagiti nagtungpal kadagitoy nga alagaden.
10 Awan ti kalintegan dagiti papadi nga agserserbi iti tabernakulo dagiti
Judio a mangan kadagiti naidaton iti altartayo. 11 Ipan ti Kangatoan a Padi
dagiti Judio ti dara dagiti animal iti Kasasantoan a Disso tapno idatonna ti
dara a maipaay iti basol dagiti tattao. Ngem mapuoran ti bangkay dagiti
animal iti ruar ti kampo. 12 Daytoy ti gapuna a natay met ni Jesus iti ruar
ti siudad tapno ugasanna dagiti tattao kadagiti basbasolda babaen iti
darana a nagsayasay idi pimmusay. 13 Ngarud, mapantayo kenkuana iti
ruar ti kampo ket sagabaentayo met ti pannakaibabainna. 14 Ta awan ti
permanente a siudadtayo ditoy daga. Birbirokentayo ti maysa a siudad nga
umayto iti masakbayan. 15 Ngarud, masapul a kanayon nga
agdaydayawtayo iti Dios a kas datontayo kenkuana babaen ken ni Jesus—
ti daton nga agtaud iti bibig no ipakaammotayo ti dayag ti naganna. 16
Diyo liwayan ti agaramid iti naimbag ken ti panagtitinnulongyo, ta dagitoy
ti daton a pakaragsakan ti Dios. 17 Agtulnogkayo kadagiti panguloyo ket
tungpalenyo dagiti bilinda. Saanda nga agsarday a mangaywan kadakayo,
gapu ta masapul a sungbatandanto iti Dios no kasano nga inaramidda ti
pagrebbenganda. No agtulnogkayo kadakuada, agtrabahoda a siraragsak.
No dikay agtulnog kadakuada, agtrabahoda a silaladingit ket awan ti
maitedna a pagimbaganyo. 18 Itultuloyyo latta ti mangikarkararag
kadakami. Ammomi a nadalus ti konsensiami agsipud ta kayatmi nga
aramiden ti maiparbeng kadagiti amin a tattao. 19 Yunay-unayko nga
idawdawatyo a makasubliak kadakayo iti kabiitan a panawen. 20-21
Pinagungar ti Dios ni Apotayo a Jesus a nagbalin a Naindaklan a Pastor
dagiti karnero gapu iti ipapatayna a kas daton a nangpatalged iti
agnanayon a tulag. Sapay koma ta ti Dios a gubbuayan ti talna ipaayna
kadakayo ti amin a naimbag a banag a kasapulanyo tapno maaramidyo ti
pagayatanna. Sapay koma ta aramidenna kadatayo ti makaparagsak
kenkuana babaen ken ni Jesu-Cristo, isu a madaydayaw iti agnanayon nga
awan inggana! Amen. 22 Dawatek kadakayo, kakabsatko, nga anusanyo a
denggen daytoy a pammagbagak, agsipud ta ababa met laeng daytoy
suratko kadakayo. 23 Kayatko a maammoanyo a nakaruaren ni kabsattayo
a Timoteo iti pagbaludan. No makaumay ditoy iti mabiit, ikuyogkonto
inton umaykayo bisitaen. 24 Idanonyo ti pakomustami kadagiti amin a
panguloyo ken kadagiti amin a tattao ti Dios. Pakomustaandakayo met
dagiti kakabsat a naggapu idiay Italia. 25 Sapay koma ta adda kadakayo ti
parabur ti Dios. Amen.
Santiago 1
1 Patgek a Kakabsat: Kablaawankay amin a tattao ti Dios a naiwaraswaras
iti entero a lubong. Siak, ni Santiago nga agserserbi iti Dios ken ni Apo
Jesu-Cristo, ti naggapuan daytoy a surat. 2 Kakabsatko, ibilangyo a ragsak
no aglak-amkay iti amin a kita ti pakarigatan 3 agsipud ta ammoyo a no
agballigi ti pammatiyo a mangsaranget iti kasta a rigat, pataudenna ti
anusyo nga agibtur. 4 Managibturkayo koma a kanayon ken awan
pakapilawan ken pagkuranganyo. 5 Ngem no agkurang ti siasinoman
kadakayo iti kinasirib, agkararag koma iti Dios ket maikkanto. Ngamin,
managparabur ti Dios ken siaayat a mangted kadagiti amin a tattao. 6
Ngem no agkararagkayo, nasken a mamatikayo ket dikay agduadua. Ti
siasinoman nga agduadua, mayarig iti allon ti taaw a yalla-alla ti angin. 7-
8 Agbaliwbaliw ti panunot ti kasta a tao, ket pagduaduaanna ti amin nga
aramidna. Dina koma ipagarup nga addanto awatenna iti Apo. 9 Agragsak
koma ti nakurapay a kabsat iti panangitan-ok kenkuana ti Dios. 10
Agragsak met koma ti nabaknang iti panangipababa kenkuana ti Dios. Ta
kas iti sabong ti atap a mula, saanto nga agbayag ti nabaknang. 11 No
nakangaton ti init, malanet ti mula iti makasinit a darang. Malaylay ti
mula, maregreg ti sabongna, ket madadael metten ti pintasna. Kasta met ti
pannakadadael ti nabaknang bayat ti panangas-asikasona kadagiti
aramidna. 12 Nagasat ti tao nga agtalinaed a natibker bayat ti
pannakasuotna. Ngamin, no agballigi, awatennanto ti balangat ti biag nga
inkari ti Dios kadagiti agayat kenkuana. 13 No masulisog ti tao, dina koma
ipagarup a ti Dios ti mangsulisog kenkuana. Ta saan a masulisog ti Dios iti
kinadakes, ket di met mangsulisog. 14 Ngem masulisog ti tao no yaw-
awan ken iturayan dagiti dakes a tarigagayna; 15 ket inton mainawen ti
dakes a tarigagay, maipasngay ti basol. No makadakkelen ti basol, yegna ti
patay. 16 Dikay maallilaw, ay-ayatek a kakabsat. 17 Aggapu sadi langit ti
amin a nasayaat ken naan-anay a sagut. Wen, aggapu iti Dios a namarsua
kadagiti nailangitan a silaw. Awan kenkuana ti panagbalbaliw a mamataud
iti kinasipnget. 18 Iti bukodna a pagayatan, inikkannatay iti naespirituan a
biag babaen iti sao ti kinapudno tapno datayo ti kangrunaan kadagiti amin
a parsuana. 19 Ay-ayatek a kakabsat, ammoenyo daytoy: Sisasagana koma
ti tunggal maysa a dumngeg iti sabali, ngem natanang nga agsao ken di
nalaka nga agpungtot. 20 Saan a magun-od ti pungtot ti tao ti nalinteg a
pagayatan ti Dios. 21 Ngarud, idianyo amin a naalas nga ugali ken dakes a
kababalin. Agtulnogkayo iti Dios ket awatenyo ti sao a makaisalakan
kadakayo a naimulana iti pusoyo. 22 Ngem diyo allilawen ti bagiyo. Saan
nga umdas a dumngegkayo laeng. Babaen iti aramid, ipakitayo ketdi a
dumngegkay iti sao. 23 Ti dumngeg iti sao ngem dina met tungpalen,
mayarig iti tao nga agsarming. 24 Makitana ti pudno a langana ngem
malipatanna a dagus kalpasan ti yaadayona. 25 Ngem ti sipapasnek a
mangadal ken sigaganetget a mangannurot iti naan-anay a linteg a
mangwayawaya iti tao, ken dumngeg ket saanna a lipaten ti mangngegna
no di ket tungpalenna pay, paraburanto ti Dios iti aniaman nga
aramidenna. 26 Mabalin a mamatika a naimbagka a Kristiano. Ngem no
dimo matengngel ti dilam, allilawem ti bagim ta awan serserbi ti
kinarelihiosom. 27 Ti pudno a relihion nga awan pakapilawanna iti
imatang ti Dios Ama isu daytoy: Ti itutulong kadagiti ulila ken biuda iti
nakakaasi a kasasaadda ken ti panagtalinaed a nadalus a di patulawan
kadagiti kinadakes ditoy lubong.
Santiago 2
1 Kakabsatko, kas mamati ken ni Apotayo a Jesu-Cristo, ti nadayag nga
Apo, awan koma ti idumdumayo. 2 Kas pangarigan, dumar-ay iti
taripnongyo ti nabaknang ken ti napanglaw. Nagsingsing ti baknang iti
balitok ken nagaruat iti napintas idinto a rutayrutay ti pagan-anay ti
napanglaw. 3 No ad-adda a bigbigenyo ti nabaknang ket kunayo,
“Agtugawka ditoy nasayaat a lugar,” ngem kunayo iti napanglaw,
“Agtakderka wenno agdalupisakka iti sakaanak,” 4 nagbasolkayon iti
panangidumduma ken panangukom a maibatay iti dakes a panggep. 5
Dumngegkayo, ingungotek a kakabsat! Dagiti napanglaw ditoy lubong ti
pinili ti Dios tapno mapabaknang ti pammatida ken agbalinda a kameng ti
Pagarian nga inkarina kadagiti agayat kenkuana. 6 Ngem pabainanyo met
ti napanglaw! Sinno kadi ti mangirurumen ken mangidarum kadakayo?
Dagiti babaknang! 7 Isuda ti mangpilpiltak iti mararaem a nagan a naited
kadakayo. 8 Masarakan daytoy iti Nasantoan a Surat: “Ayatem ti padam a
tao a kas iti panangayatmo iti bagim.” No tungpalenyo daytoy, nasayaat ti
aramidenyo. 9 Ngem agbasolkayo no mangidumdumakayo babaen iti
posturada. Iti imatang ti Linteg, maibilangkayon a managbasol. 10 Ti
siasinoman a mangsalungasing iti maysa a bilin, salungasingenna metten ti
sibubukel a linteg. 11 Ta ti nagkuna, “Dika makikamalala,” kinunana pay,
“Dika mamapatay.” Uray no dika makikamalala, no pumatayka,
sinalungasingmon ti linteg. 12 Ngarud, agsao ken agaramidkayo a kas
parsua nga ukomento ti linteg a mangwayawaya iti tao. 13 Ta dinto
mangngaasi ti Dios inton ukomenna ti tao a di nangngaasi; ngem inton
oras ti panangukom, agballiginto ti kaasi. 14 Kakabsatko, ania ti
magunggona ti agkuna nga adda pammatina no dina met ipakita kadagiti
aramidna? Saannaka a maisalakan ti kasta a pammati. 15 Kas pangarigan
ta adda kakabsat a makasapul unay iti lupot ken kanen iti inaldaw, 16 ket
diyo ikkan ida kadagiti kasapulan ti biag, awan serserbi ti panagkunayo
kadakuada, “Bendisionannakayo ti Dios! Agpapudotkayo ken kaaduenyo
ti mangan.” 17 Kasta met ti pammati: awan serserbina no di mabuyogan iti
aramid. 18 Ngem addanto agkuna, “Adda pammati ti maysa a tao; adda
met aramid ti sabali.” Kastoy ti sungbatko: “Ipakitam kaniak no kasano
nga adda ti pammati ti siasinoman a dina pakuyogan iti aramid, ket
iparangko met ti pammatik babaen iti aramidko.” 19 Mamatikayo kadi a
maymaysa ti Dios? Nasayaat! Ngem laglagipenyo a mamati met dagiti
demonio—ket agpigergerda pay iti buteng. 20 Sika a maag, kayatmo a
mapaneknekan nga awan pagmamaayan ti pammati a di mabuyogan iti
aramid? 21 Kasano a napalinteg idi ni amatayo nga Abraham iti imatang ti
Dios? Napalinteg babaen iti aramidna! Iti rabaw ti altar, indatonna ni Isaac
nga anakna. 22 Dimo aya maawatan? Nagtunos ti aramid ken ti pammati
ni Abraham. Dagiti aramidna ti nangpunno iti pammatina. 23 Ket
pimmudno ti maysa a paset ti Nasantoan a Surat: “Namati ni Abraham iti
Dios, ket imbilang ti Dios a nalinteg gapu iti pammatina.” Isut’ gapuna a
naawagan ni Abraham a “gayyem ti Dios.” 24 Ngarud, mapalinteg ti
maysa a tao iti imatang ti Dios gapu iti aramidna, saan la a gapu iti
pammatina. 25 Kastoy met idi ken ni Rahab a babai a dakes ti
panagbiagna. Pinalinteg ti Dios gapu iti inaramidna idi pinasangbayna
dagiti espia a Judio ket tinulonganna ida a makalibas babaen iti
panangipatuldona iti sabali a dalan a pagnaanda. 26 Ngarud, kas ti bagi a
makuna a bangkay no awan espirituna, maibilang met a natay ti pammati a
di mabuyogan iti aramid.
Santiago 3
1 Kakabsatko, sumagmamano la koma kadakayo ti mangisuro. Kas
ammoyo, naing-inget ti pannakaukommi a mamaestro ngem dagiti
dadduma. 2 Masansan nga agbidduttay amin. Naan-anay ti tao a pulos a di
agbiddut iti isaona, ket kabaelanna a gawidan ti bagina. 3 No busalantayo
ti kabalio tapno agtungpal kadatayo, mabalintayo nga iturong iti
sadinoman. 4 Wenno alaentayo a pangarigan ti barko: idinto a kasta unay
ti kadakkelna nga iduron ti angin, bassit laeng a timon ti aramaten ti piloto
tapno iturongna iti sadinoman. 5 Kastoy met ti dila: Idinto a bassit a paset
ti bagi, mabalinna a pagpalangguad dagiti dadakkel a bambanag. Kitaenyo
laengen no kasano ti kalawa ti bakir nga uramen ti bassit la nga apuy. 6
Mayarig ti dila iti apuy. Kasla lubong a napnoan iti biddut. Adda naituding
a lugarna iti bagitayo, ket isaknapna ti kinadakes iti entero a kinataotayo.
Bayat ti panagbiagtayo, puorannatay iti apuy a kasla aggapu iti infierno
met laeng. 7 Kabaelan ti tao ti mangpaamo iti amin a kita ti atap nga ayup,
dagiti tumatayab, agraman dagiti agkarkarayam iti daga ken dagiti nabiag
a parsua iti taaw. Kinapudnona, napaamona aminen ida. 8 Ngem awan pay
ti nakapaamo iti dila. Nakadakdakes ken di magawidan ket makapatay a
kas iti gita ti uleg. 9 Aramatentayo a pagyaman iti Apo ken Amatayo,
pagilunodtayo pay iti padatayo a tao a naparsua a kalanglanga ti Dios. 10
Maymaysa a ngiwat ti paggapuan dagiti balikas a pagyaman ken
pagilunod. Kakabsatko, saan koma a kasta! 11 Saan a mabalin nga
ipussuak ti maymaysa nga ubbog ti nasam-it ken napait a danum. 12
Kakabsatko, saan nga agbunga ti igos iti olibo wenno ti ubas iti igos. Di
met mabalin ti naapgad nga ubbog ti mangted iti danum a mabalin nga
inumen. 13 Adda kadi masirib ken mannakaawat kadakayo? No adda,
masapul nga ipakitana babaen iti nadalus a panagbiagna ken dagiti
nasayaat nga aramidna a mabuyogan iti kinapakumbaba ken kinasirib. 14
Ngem no imon, pait ken kinaimut ti agturay iti pusoyo, dikay
agpasindayag ken agsao iti ulbod a maibusor iti kinapudno. 15 Saan nga
aggapu sadi langit daytoy a kinasirib, no di ket agtaud ditoy lubong.
Nagtaud iti demonio ken saan a naespirituan daytoy a kinasirib. 16 Iti
sadinoman a yan ti apas ken panagririri, masarakan met ti di panagtutunos
ken amin a kita ti kinadakes. 17 Ngem, umuna unay, nasin-aw ken awan
mulitna ti kinasirib nga aggapu iti ngato. Natalna, naalumamay ken
mannakigayyem. Mannakipagrikna ket agbunga iti nasayaat nga aramid.
Di mangidumduma ken di aginkukuna. 18 Kinaimbag met ti apiten dagiti
mamagkakappia manipud kadagiti bukel nga itukitda iti nagan ti kappia.
Santiago 4
1 Ania ti pagtaudan dagiti panagsusuppiat ken panagriririyo? Aggapuda
kadagiti dakes a tarigagay a kanayon nga agbibinnusor iti unegyo. 2 Adu a
bambanag ti tarigagayanyo ngem diyo matagikua ida, ket sidadaankayo a
pumatay. Agumanyo dagiti bambanag ngem awan magun-odyo, isut’
gapuna a makiriri ken makikabilkayo. Diyo maala ti kayatyo gapu ta dikay
met agdawat iti Dios. 3 Ket no agdawatkayo, awan maawatyo. Ngamin,
dakes ti panggepyo; dagiti laeng bukod a pagragsakanyo ti dawatenyo. 4
Tattao a di mapagtalkan! Diyo kad ammo a maibusor iti Dios ti
pannakigayyem iti lubong? Wen, siasinoman a makigayyem iti lubong,
maibilang metten a kabusor ti Dios. 5 Diyo ipagarup nga awan serserbi
daytoy a paset ti Nasantoan a Surat: “Naimon ti Dios ket dina kayat nga
adda kaagaw ti espiritu a pinagtaengna kadatayo.” 6 Ngem nabilbileg pay
ti iparabur ti Dios. Kas nailanad iti Nasantoan a Surat: “Busoren ti Dios
dagiti napasindayag ngem itedna ti ad-adu a parabur kadagiti
napakumbaba.” 7 Agtulnogkayo ngarud iti Dios. Sarangtenyo ti Diablo,
ket itarayannakayto ti Diablo. 8 Umasidegkay iti Dios, ket umasidegto met
ti Dios kadakayo. Dakayo a managbasol, buggoanyo dagiti imayo!
Dakayo nga aginsisingpet, dalusanyo dagiti pusoyo! 9 Agladingit, agsangit
ken aganug-ogkayo. Imbes nga agkakatawakayo, agsangitkayo. Imbes nga
agraragsakkayo, agleddaangkayo. 10 Agpakumbabakayo iti sangoanan ti
Dios, ket itan-oknakayto. 11 Dikay agpipinnadakes, kakabsatko.
Siasinoman a mangpadpadakes wenno mangukom iti kabsatna, agsao iti
maibusor iti Linteg ket ukomenna ti Linteg. No ukomem ti Linteg,
saankan a tao a mangtungpal iti Linteg no di ket maysakan a mangukom.
12 Ti Dios laeng ti mangipaulog iti Linteg. Isu laeng ti ukom. Isu laeng ti
makabael a mangisalakan ken mangdadael. Ngem sika, siasinoka aya a
mangukom iti padam a tao? 13 Ita, denggendak, dakayo nga agkuna: “Ita
wenno inton bigat, agbiahekaminto iti maysa a siudad. Agnaedkaminto
sadiay iti makatawen. Agnegosiokaminto ket adunto ti maganansiami.” 14
Diyo ammo no anianto ti panagbiagyo inton bigat! Ngamin, mayarigkay
iti angep nga agpukaw kalpasan ti apagdarikmat a panagparangna. 15
Kastoy koma ketdi ti sawenyo: “No ipalubos ni Apo Dios, agbiagkaminto
ket aramidenminto daytoy wenno daydiay.” 16 Ngem natangsitkayo met.
Napasindayagkayo. Dakes amin ti kastoy a panagpasindayag. 17 Ngarud,
agbasol ti tao a di mangaramid iti naimbag nga ammona a masapul nga
aramidenna.
Santiago 5
1 Ita, denggendak, dakayo a babaknang! Agsangit ken agdung-awkayo
gapu kadagiti didigra a mapagtengyonto. 2 Nadadaelen dagiti
kinabaknangyo. Sinangan dagiti pagan-anayyo. 3 Naglatin dagiti balitok
ken pirakyo. Tinto latida ti saksi a maibusor kadakayo ket mayarigda iti
apuy a mangibus iti lasagyo. Nagurnongkayo iti adu a kinabaknang
kadagitoy maudi nga aldaw. 4 Diyo pay tinangdanan dagiti
pinagtrabahoyo. Denggenyo dagiti angalda. Dimmanonen iti Dios, ti Apo
a Mannakabalin-amin, ti ikkis dagiti pinaganiyo. 5 Ditoy daga,
nagbiagkayo a naglaplapunosan iti nam-ay ken ragsak. Nagpalukmegkayo
a maisagana iti kaaldawan ti panagparti. 6 Inukom ken pinatayyo dagiti
awan basolna a tattao, uray pay no saanda a simmupiat kadakayo. 7
Aganuskayo ngarud, kakabsatko, agingga iti yaay ti Apo. Kitaenyo ti anus
ti mannalon iti panangurayna kadagiti napateg a bunga dagiti mulana.
Siaanus nga aguray iti damo ken iti naladaw a tudo. 8 Nasken met nga
aganuskayo. Papigsaenyo ti namnamayo ta asidegen ti yaay ti Apo. 9
Kakabsat, dikay agdidinnayamudom tapno dinakayto ukomen ti Dios.
Asidegen ti Ukom ket sisasaganan a sumrek. 10 Kakabsat, lagipenyo
dagiti profeta a nagsao babaen iti nagan ti Apo. Isuda ti pagulidananyo iti
kinaanus nga agibtur iti panagsagaba. 11 Gapu ta nakaibturda, kunatayo a
naragsakda. Nadamagyon ti kinaanus ni Job nga agibtur ken ammoyo ti
pannangted ti Apo kadagiti kasapulanna iti kamaudiananna. Ngamin,
manangngaasi ken mannakipagrikna ti Apo. 12 Kangrunaan ti amin,
kakabsatko, dikay agsapata no agkarikayo. Diyo pagsapata ti langit wenno
daga, wenno agaramat iti uray ania a kita ti sapata. “Wen,” kunayo no
mayatkayo. “Saan,” no madikayo tapno dinakayto ukomen ti Dios. 13
Adda kadi agsagsagaba kadakayo? Agkararag koma. Adda kadi naragsak?
Agkanta koma iti pagdaydayaw. 14 Adda kadi masakit kadakayo?
Paayabanna koma dagiti panglakayen ti iglesia tapno ikararagan ken
sapsapoanda iti lana iti nagan ti Apo. 15 No mamati dagiti panglakayen
nga ipangag ti Dios ti kararagda, umimbagto ti masakit; pasalun-atento ti
Apo ket pakawanennanto pay dagiti basolna. 16 Ngarud, ipudnoyo dagiti
basbasolyo iti tunggal maysa. Ikarkararaganyo ti tunggal maysa tapno
maagasankayto. Adda nabileg a pannakabalin a parnuayen ti kararag ti
nalinteg a tao. 17 Padatayo a tao ni Elias. Sipapasnek a nangikararag a di
koma agtudo ket saan a nagtudo iti dayta a daga iti tallo ket gudua a
tawen. 18 Nagkararag manen ket nagtudo iti napigsa. Nagbunga ti daga.
19 Kakabsatko, no adda sumiasi iti kinapudno ket adda met mangidalan
kenkuana nga agsubli, 20 laglagipenyo daytoy: ti manggutugot iti
managbasol tapno idianna dagiti dakes a kababalin, isalakannanto ti
kararua dayta a managbasol, ket isu ti pakaigapuan ti pannakapakawan ti
adu a basol.
1 Pedro 1
1-2 Patgek a Kakabsat: Kablaawankayo a napili a tattao ti Dios a
naiwaraswaras a kas ganggannaet nga agnanaed iti Ponto, Galacia,
Capadocia, Asia ken Bitinia. Napilikayo a kas mayannurot iti panggep ti
Dios Ama ken napasantokayo babaen iti Espirituna ken tapno
agtulnogkayo ken ni Jesu-Cristo ket madalusankay iti darana. Sapay koma
ta maaddaankay iti naan-anay a parabur ken talna. Siak ni Pedro nga
apostol ni Jesu-Cristo. 3 Madaydayaw ti Dios ken Ama ni Apotayo a Jesu-
Cristo! Gapu iti dakkel a kaasina, naipasngaytayo iti baro a biag babaen iti
panagungar ni Jesu-Cristo. Sibibiag a namnama ti impaay kadatayo daytoy
baro a biag. 4 Namnamaentayo ngarud a tawidentayo dagiti nawadwad a
bendision a di agrupsa, di madadael wenno mapukaw nga iduldulin ti Dios
sadi langit. 5 Agpaay dagitoy kadakayo. Babaen iti pammati,
aywanannakayo ti Dios agingga a dumteng ti pannakaisalakan a naisagana
a maipaduyakyak iti kamaudianan a tiempo. 6 Agragsakkay iti daytoy,
nupay masapul nga aglidaykay ita iti apagbiit gapu iti adu a kita ti
panagsagaba a paglasatanyo. 7 Nairanta dagitoy a pangpaneknek iti
kinapudno ti pammatiyo. Uray pay ti balitok a madadael, magugoran iti
apuy. Ket ti pammatiyo a napatpateg ngem balitok, masapul met a masuot
tapno mataginayon. Iti kasta, awatenyonto ti dayaw, dayag ken tan-ok
inton maiparangarang ni Jesu-Cristo. 8 Ay-ayatenyo nupay diyo nakita.
Uray ita, mamatikayo kenkuana nupay saanyo a makita, ket agrag-okayo
iti dakkel ken nagloriaan a ragsak a di mayebkas, 9 ta gapu iti pammatiyo,
magun-odyo ti pannakaisalakan dagiti kararuayo. 10 Daytoy a
pannakaisalakan ti inam-amiris ken sinuksukimat dagiti profeta a
nangipadto iti sagut nga ited ti Dios kadakayo. 11 Inkagumaanda idi nga
ammoen no kaano ken kasano ti pannakapasamakna. Daytoy ti tiempo nga
imbagbaga ti Espiritu ni Cristo nga adda kadakuada, idi impakaammoda
dagiti panagsagaba a lak-amen ni Cristo ken ti dayag nga umay
kalpasanna. 12 Impakaammo ti Dios kadagitoy a profeta a saan nga
agpaay a pagimbaganda dagiti ar-aramidenda no di ket agpaay a
pagimbaganyo. Naibagan kadakayo ti maipapan kadagitoy a bambanag.
Impakaammo ida dagiti nangikasaba iti Naimbag a Damag, isuda nga
indalan ti Espiritu Santo a naibaon manipud langit. Dagitoy dagiti
bambanag a kayat a maawatan uray pay dagiti angheles. 13 Isaganayo
ngarud dagiti panunotyo nga agtignay. Agsalukagkayo ket
mangnamnamakay iti bendision a maited kadakayo inton maiparangarang
ni Jesu-Cristo. 14 Kas natudio nga annak, agtulnogkayo iti Dios. Diyo
ipalubos ti biagyo nga iturayan ti kinaderrep a kas idi saanyo pay nga
ammo ti pudno. 15 Nasantoankayo koma iti amin nga aramidyo, a kas iti
kinasanto ti Dios a nangayab kadakayo. 16 Kas nailanad iti Nasantoan a
Surat: “Agsantokayo, agsipud ta nasantoanak.” 17 Awan idumduma ti
Dios. Ukomenna dagiti tattao kas mayannurot iti aramidda. Kunayo,
“Amami” no agkararagkayo iti Dios. Ngarud, no kasta ti awagyo, masapul
nga agbuteng ken agraemkayo kenkuana bayat ti panagbiagyo ditoy daga.
18 Ta ammoyo no ania ti naibayad tapno mawayawayaankay iti awan
serserbina a panagbiag a tinawidyo kadagiti kapuonanyo. Saankayo a
nagatang babaen iti banag a madadael, kas iti pirak wenno balitok. 19
Nawayawayaankayo ketdi babaen iti pannakaidaton iti napateg a dara ni
Cristo a mayarig iti kordero nga awan mulit ken tulawna. 20 Sakbay a
pinarsua ti Dios ti lubong, pinilina ni Cristo ket naiparangarang kadagitoy
maudi nga aldaw tapno maisalakankayo. 21 Gapu ta namatikayo
kenkuana, nagtalekkay iti Dios a namagungar ken namagbalin kenkuana a
mannakabalin unay. Naiturong iti Dios ti pammati ken namnamayo. 22
Babaen iti panagtungpalyo iti kinapudno, napakawan dagiti basbasolyo ket
nadalusankayo. Gapu ta addan pudno a panagayatyo kadagiti kakabsatyo
iti pammati, agiinnayatkayo ngarud iti amin a pusoyo. 23 Naipasngaykayo
manen saan a babaen iti agrupsa a bukel no di ket babaen iti sibibiag ken
agnanayon a sao ti Dios. 24 Kas kuna ti Nasantoan a Surat: “Kasla ruot
dagiti amin a tattao Ket mayarig kadagiti sabong ti dayagda, Magango ti
ruot, ket maregreg ti sabongna 25 Ngem ti sao ti Apo agtalinaed nga
agnanayon.” Daytoy a sao isu ti Naimbag a Damag a naikasaba kadakayo.
1 Pedro 2
1 Iwaksiyo ngaruden ti amin a kinadakes. Awan koman ti panagulbod,
panaginsisingpet, panagimon ken pammadpadakes. 2 Kaskay la koma
kayyanak a maladaga a kanayon a mawaw iti puro a gatas a naespirituan
tapno iti yiinumyo, dumakkelkayo ket maisalakankayo. 3 Kas kuna ti
Nasantoan a Surat, “Babaen iti padasyo, natakuatanyo a manangngaasi ti
Apo.” 4 Umasidegkay iti Apo. Isu ti sibibiag a bato nga imbelleng dagiti
agipatpatakder ta imbilangda nga awan serserbina, ngem pinili ken
impateg ti Dios. 5 Umasidegkayo a kas sibibiag a batbato a maaramat iti
pannakabangon ti naespirituan a templo. Agserbikayo a kas nasantoan a
papadi a mangipaay iti daton a naespirituan ken makaay-ayo iti Dios
babaen ken Jesu-Cristo. 6 Ta kuna ti Nasantoan a Surat: “Pimmiliak iti
napateg a bato a kas pasuli; ikabilko ita idiay Sion. Ket siasinoman a
mamati kenkuana, pulos nga awanto pannakapaayna.” 7 Napateg unay
daytoy a bato kadakayo a mamati. Ngem kadagiti saan a mamati, kunana
pay: “Ti bato nga imbelleng dagiti agipatpatakder, nagbalin a kangrunaan
unay a bato.” 8 Kuna pay ti sabali a paset ti Nasantoan a Surat: “Daytoy ti
bato a pakaitibkolan, ken pakaitublakan dagiti tattao.” Naitibkolda agsipud
ta dida namati iti sao. Kasta ti intuding ti Dios a pagbanaganda. 9 Ngem
dakayo ti napili a puli. Papadikayo nga agserbi iti Dios nga Ari.
Nasionkayo a nasantoan. Tattaonakayo ti Dios. Inruarnakayo iti
kasipngetan ket impannakayo iti nakaskasdaaw a lawagna. Pinilinakayo a
nangipakaammo kadagiti nakaskasdaaw nga aramidna. 10 Saankay idi a
tattao ti Dios, ngem ita tattaonakayon. Diyo ammo idi ti kaasi ti Dios,
ngem ita inawatyon ti kaasina. 11 Kakabsatko, kas ganggannaet ken
agdaldaliasat iti daytoy a lubong, agdawatak kadakayo. Dikay paiturayan
kadagiti nailasagan a tarigagay a kanayon a makiranget iti kararua. 12
Agbiagkayo koma a natakneng iti imatang dagiti Hentil. Uray no kunada a
managdakdakeskayo, mabigbigdanto met laeng dagiti naimbag nga
aramidyo ket idaydayawdanto ti Dios inton dumteng ti Aldaw a yaayna.
13 Gapu iti Apo, masapul a paiturayankayo kadagiti agtuturay nga insaad
ti tao: iti Emperador a kangatoan nga agturay, 14 ken kadagiti gobernador
nga imbaonna a mangdusa kadagiti managdakdakes ken mangidaydayaw
kadagiti agaramid iti naimbag. 15 Ta kayat ti Dios a, babaen kadagiti
naimbag nga aramidyo, maawanan iti gundaway dagiti maag nga agsao iti
ulbod ken awan serserbina. 16 Agbiagkayo a kas tattao a nawayawayaan,
ngem diyo aramaten ti wayawayayo a pangkalub iti aniaman a dakes.
Agbiagkayo ketdi a kas tagabu ti Dios. 17 Agraemkayo kadagiti amin a
tattao. Ayatenyo dagiti kakabsatyo iti pammati. Agbutengkayo iti Dios ket
padayawanyo ti Emperador. 18 Dakayo a katulongan, paiturayankayo
kadagiti amoyo. Ipakitayo kadakuada ti naan-anay a panagraem, saan
laeng a kadagiti naasi ken mannakaawat, ngem uray pay kadagiti nauyong.
19 Gunggonaannakayto ti Dios no maibturanyo ti agsagaba a saan a
nainkalintegan ta ammoyo ti pagayatanna. 20 Maidaydayawkayo aya no
ituredyo ti dusa a kaikarianyo gapu iti dakes nga inaramidyo? Ngem no
ibturanyo ti agsagaba idinto a naimbag ti aramidyo, bendisionannakayto ti
Dios. 21 Daytoy ti nangayaban ti Dios kadakayo, agsipud ta nagsagaba ni
Cristo gapu kadakayo ket nangibati iti pagulidanan tapno surotenyo ti
tugotna. 22 Saan a nagbasol. Awan ti insawangna a kinaulbod. 23 Idi
nalalais, saan a nanglais. Idi nagsagaba, saan a namutbuteng. Nagtalek
ketdi iti Dios, ti nalinteg nga Ukom. 24 Inawit ni Cristo dagiti
basbasoltayo iti krus tapno mawayawayaantay iti pannakabalin ti basol ket
agbiagtay a nalinteg. Ta babaen kadagiti sugatna, naagasankayo. 25
Mayarigkay idi kadagiti karnero a nayaw-awan. Ngem ita, naisublikayon a
sumurot iti Pastor ken Agaywan kadagiti kararuayo.
1 Pedro 3
1 Dakayo a babbai a naasawaan, masapul a paiturayankayo kadagiti
assawayo tapno iti panagbiagyo, maguyugoyyonto a mamati iti sao ti Dios
dagiti saan pay a mamati kadakuada. Saanen a masapul nga agsaokayo 2
ta makitadanto ti kinasingpet ken kinatakneng ti panagbiagyo. 3 Dikay
koma aglablabes nga agpapintas kas iti nagarbo a panagbubuok,
panagalahas ken panagkawes. 4 Ngem buklen koma ti pintasyo iti
nasayaat a panagpuspuso, ti di agkupas a libnos ti kinaemma ken kinatalna
ti espiritu. Isu daytoy ti kinapintas nga ibilang ti Dios a kapapatgan. 5
Kastoy ti panagpapintas dagiti nasantoan a babbai idi un-unana:
nagtalekda iti Dios ket pinaiturayanda kadagiti assawada. 6 Kasta idi ni
Sara. Nagtulnog ken ni Abraham ket inawaganna nga apona. Dakayo ita
dagiti annak ni Sara no agaramidkayo iti naimbag ken awan koma ti
pagbutengan-yo. 7 Kasta met kadakayo a lallaki a naasawaan. Iti
pannakitaktakunaynayyo kadagiti assawayo, masapul a bigbigenyo a
nakapkapsutda ngem dakayo. Isut’ gapuna nga agraemkayo kadakuada,
agsipud ta kas kadakayo, awatendanto met ti agnanayon a biag a sagut ti
Dios. Aramidenyo daytoy tapno maipangagto dagiti kararagyo. 8
Kamaudiananna, agmaymaysakay iti panunot ken rikna. Agiinnayatkayo a
kas agkakabsat. Manangngaasi koma ti tunggal maysa ket saankayo nga
agpalpalangguad. 9 Diyo balsen dagiti agaramid kadakayo iti dakes. Diyo
ilunod dagiti mangilunod kadakayo. Dawatenyo ketdi a bendisionan ida ti
Dios agsipud ta idi ayabannakayo ti Dios inkarina a bendisionannakayo.
10 Kas kuna ti Nasantoan a Surat: “Siasinoman nga agtarigagay iti
naragsak ken narang-ay a panagbiag, masapul a saan a mamadpadakes,
saan nga agulbod. 11 Adaywanna ti dakes ket agaramid iti naimbag.
Birokenna ti kappia iti amin a kabaelanna. 12 Ta siiimatang ti Apo
kadagiti nalinteg, ket dengdenggenna dagiti kararagda; ngem busorenna
dagiti agaramid iti dakes.” 13 Adda aya mangranggas kadakayo no
nareggetkayo nga agaramid iti naimbag? 14 Ngem uray no agsagabakayo
gapu iti panagaramidyo iti naimbag, nagasatkayo. Dikay agbuteng kadagiti
tattao. Ket diyo ipalubos nga adda mangted iti pagdanaganyo. 15-16 Ngem
iti pusoyo, raemenyo ni Cristo a kas Apo. Sisasaganakayo koma a
kanayon nga agpalawag no saludsodenda maipapan iti namnama nga adda
kadakayo, ngem agsaokayo a sipapakumbaba ken napnoan dayaw.
Pagtalinaedenyo a nadalus ti konsensiayo tapno mabainan dagiti
nangibagbaga a dakes dagiti aramidyo kas pasurot ni Cristo. 17 Ta naim-
imbag ti agsagaba gapu iti panagaramid iti naimbag, no isut’ pagayatan ti
Dios, ngem ti agsagaba gapu iti panagaramid iti dakes. 18 Naminsan a
natay ni Cristo a maipaay iti amin tapno mapakawan dagiti basbasoltayo.
Natay ti nalinteg a tao gapu kadagiti nakillo tapno yasidegnakayo iti Dios.
Napapatay iti bagi ngem napagungar iti espiritu, 19 ket iti daytoy a
kasasaadna napan nangasaba kadagiti naibalud nga espiritu. 20 Dagitoy ti
espiritu dagiti saan a nagtulnog idi tiempo ni Noe idinto a siaanus ti Dios a
nangur-uray kadakuada bayat ti pannakaaramid ti daong. Walo amin dagiti
tattao nga adda iti daong. Naisalakanda iti danum. 21 Mayasping daytoy a
danum iti buniag a makaisalakan ita kadakayo. Saan a babaen iti
pannakaugas ti rugit ti bagi, no di ket iti panagkari iti Dios babaen iti
nadalus a konsensia. Isalakannakayo ti buniag babaen iti panagungar ni
Jesu-Cristo 22 a napan sadi langit. Adda itan iti makannawan ti Dios, ket
iturayanna dagiti amin nga angheles, dagiti nailangitan nga agtuturay ken
pannakabalin.
1 Pedro 4
1 Gapu ta nagsagaba ni Cristo iti bagi, sisasaganakayo koma nga agsagaba
a kas kenkuana, agsipud ta saanen nga agbasol ti siasinoman nga agsagaba
iti bagi. 2 Ngarud, manipud ita, masapul nga iturayan ti pagayatan ti Dios
ti nabati pay nga aldaw ti panagbiagyo ditoy daga, a saan ketdi a dagiti
nailubongan a tarigagay. 3 Masapul a diyo aramidenen dagidi inar-
aramidyo iti napalabas—dagiti pagay-ayat dagiti Hentil nga aramiden.
Iwaksiyon ti kinarugit, kinaderrep, panagbartek, kinabuklis, aglablabes a
panagrarambak ken ti makarimon a panagrukbab kadagiti didiosen. 4 Ket
ita, masdaawda ta dikay makibunggoyen kadakuada iti aglablabes ken
nabarayuboy a panagbiag. Daytoy ti gapuna a padpadaksendakayo. 5
Ngem dumatagdanto iti Dios a sisasagana a mangukom kadagiti nabiag
ken natay. 6 Isut’ gapuna a naikasaba met ti Naimbag a Damag uray
kadagiti natay tapno maukomda met a kas kadagiti amin a tattao. Ngem
naikasaba kadakuada ti ebanghelio tapno makapagbiagda a naespirituan
kas iti pagayatan ti Dios. 7 Asidegen ti panungpalan dagiti amin a
bambanag. Agbiagkayo ngarud a nanakem ken nateppel tapno mabalinyo
ti agkararag. 8 Kangrunaan unay, agiinnayatkayo a sipupudno agsipud ta ti
ayat punasenna ti adu a basbasol. 9 Nabara koma ti panagsisinnangailiyo.
10 Aramaten koma ti tunggal maysa ti bukodna a sagut nga inawatna iti
Dios a maipaay iti pagimbagan ti padana a tao, kas naimbag nga agaywan
kadagiti nadumaduma a parabur nga inted ti Dios. 11 Siasinoman a
mangasaba, masapul nga ikasabana ti sao ti Dios. Siasinoman nga agserbi,
masapul nga agserbi babaen iti pigsa nga inted ti Dios kenkuana. Iti kasta,
iti amin a banag, maidaydayaw koma ti Dios babaen ken ni Jesu-Cristo,
nga addaan iti dayag ken pannakabalin iti agnanayon nga awan inggana.
Amen. 12 Gagayyemko, diyo pagsiddaawan ti nasaem a pannakasuot a
sagabaenyo a kasla adda karkarna a mapaspasamak kadakayo. 13
Maragsakankayo koma ketdi ta agsagsagabakay iti wagas a panagsagaba
ni Cristo tapno naan-anay ti rag-oyo inton maiparangarang ti dayagna. 14
Nagasatkayo no mapabainankayo gapu ta pasurotnakayo ni Cristo; ta
agtaeng kadakayo ti dayag ti Espiritu ti Dios. 15 Awan koma ti agsagaba
kadakayo a maigapu iti pammapatay, panagtakaw, panagaramid iti dakes,
wenno iti panangpataud iti riri. 16 Ngem no adda agsagaba gapu ken
Cristo, dina koma ibain no di ket agyaman iti Dios ta ibaga dagiti tattao
nga isu ket pasurot ni Cristo. 17 Dimtengen ti tiempo a panangukom ti
Dios ket umunanto nga ukomenna dagiti bukodna a tattao. No datayo ti
pangrugian ti panangukomna, anianto ngata ti pagtungpalan dagiti saan
nga agtulnog iti ebanghelio ti Dios? 18 Kas kuna ti Nasantoan a Surat:
“No narigat a maisalakan ti nalinteg, Anianto ngarud ti pagbanagan dagiti
managbasol ken awan Diosna?” 19 Ngarud, no agsagabaka kas pagayatan
ti Dios, agaramidka, iti naimbag ket agkammatalekka iti Namarsua, isu a
mangtungpal iti karina.
1 Pedro 5
1 Agdawatak kadakayo, padak a panglakayen ti iglesia. Maysaak a saksi
iti panagsagaba ni Cristo, ken mairamanakto met iti dayag a
maiparangarang. Igunamgunamko ngarud kadakayo nga 2 aywananyo ti
grupo dagiti mamati, ti arban nga inted ti Dios kadakayo, kas iti
panangaywan ti maysa a tao iti arban ti karnero. Aywananyo a siaayat ti
arban a kas iti kayat ti Dios nga aramidenyo. Saankayo koma a mapilpilit.
Agtrabahokayo, saan a gapu iti tangdan, no di ket gapu iti pudno a
tarigagay iti panagserbi. 3 Diyo adipenen dagiti naitalek kadakayo.
Agbalinkayo koma ketdi a pagwadanda. 4 Ket inton agparang ti Pangulo a
Pastor, awatenyonto ti nadayag a korona a dinto agpukaw ti raniagna. 5
Dakayo nga agtutubo, paiturayankayo met kadagiti nataengan. Dakay
amin, agtitinnulongkayo kas napakumbaba nga adipen, ta kuna ti
Nasantoan a Surat, “Busoren ti Dios dagiti natangsit, ngem paraburanna
dagiti napakumbaba.” 6 Awatenyo a sipapakumbaba ti mannakabalin nga
ima ti Dios tapno itan-oknakay inton dumteng ti tiempona. 7 Itaklinyo
kenkuana dagiti amin a pakaringgoranyo gapu ta ipatpategnakayo. 8
Agsalukagkayo. Agsiputkayo. Agdakdakiwas ti Diablo a kabusoryo—
kasla leon a ngumerngernger nga agsapsapul iti alun-onenna. 9
Agtalinaedkayo a natibker iti pammati ket saankay a sumuko kenkuana.
Kas ammoyo, saan laeng a dakayo ti agsagsagaba iti kastoy a rigat no di
pay ket dagiti kakabsatyo iti pammati iti entero a lubong. 10 Ngem
kalpasan ti mabiit a panagsagabayo, pagbalinennakayto a naan-anay ti
Dios. Wen, ti Dios ti amin a parabur a nangayab kadakayo a makiranud iti
agnanayon a dayagna babaen iti pannakikaysayo ken Cristo.
Patibkerennakay iti pammati, papigsaenna ti pakinakemyo ken
ipasdeknakay iti nalagda a fondasion. 11 Sapay koma ta agturay iti
agnanayon awan inggana! Amen. 12 Insuratko daytoy babaen iti tulong ni
Silvano nga imbilangko a mapagtalkan a kabsat. Sinuratankayo ta kayatko
a papigsaen ti pakinakemyo ken paneknekan a daytoy ti pudno a parabur ti
Dios. Agtalinaedkayo a natibker iti daytoy. 13 Pakomustaannakayo ti
iglesia iti Babilonia a pinili met ti Dios a kas kadakayo. Agpakomusta met
ni Marcos nga anakko. 14 Agkikinnablaawkay iti nakristianoan nga agek.
Sapay koma ta adda kadakay amin ti talna ken ni Cristo.
2 Pedro 1
1-2 Patgek a Kakabsat: Kablaawankayo, dakayo a naaddaan iti pammati a
napateg kas iti pammati nga adda kadakami. Naawattayo ti maymaysa a
pammati gapu ta nalinteg ti Dios ken ni Jesu-Cristo a Mangisalakan
kadatayo. Sapay koma ta umad-adu ti paraburyo ken maikkankay iti talna
iti pannakaammoyo iti Dios ken ni Jesus nga Apotayo. Naggapu kaniak
daytoy a surat—ni Simon Pedro nga adipen ken apostol ni Jesu-Cristo. 3
Babaen iti nadiosan a pannakabalinna, naited ti amin a kasapulantayo
tapno masursurotayo ti agbiag a kas pudno a Kristiano. Maigapu daytoy iti
pannakaammotayo ken ni Cristo a nangayab kadatayo tapno mairanudtay
iti bukodna a dayag ken kinaimbag. 4 Kastoy ti pannangtedna kadatayo
kadagiti naindaklan ken napapateg a sagut nga inkarina tapno malisianyo
ti pannakadadael a pinarnuay dagiti nailubongan a tarigagay ket
nairanudkayo iti nadiosan a kasasaadna. 5 Gapu iti daytoy, ikagumaanyo
nga inayon ti kinaimbag iti pammatiyo; iti kinaimbag, inayonyo ti
pannakaammo; 6 iti pannakaammo, inayonyo ti panagteppel; iti
panagteppel, ti panagibtur; iti panagibtur, ti panagbuteng iti Dios; 7 iti
panagbuteng iti Dios, ti ayat a nainkabsatan; ket iti ayat a nainkabsatan, ti
nadiosan nga ayat. 8 Dagitoy ti kababalin a masapulyo, ket no
nawadwadda kadakayo, aggagetkayto ket agbunganto ti pannakaammoyo
ken ni Apotayo a Jesu-Cristo. 9 Ngem ti siasinoman nga awanan
kadagitoy, arrap ken nalipatanna a naugasanen kadagiti basbasolna iti
napalabas. 10 Isut’ gapuna, kakabsatko, nga ikagumaanyo ti mangpatalged
iti panangayab ken panangpili kadakayo ti Dios tapno saankayto a sumina
iti pammatiyo. 11 Iti kasta, mapalubosankayto a sumrek a siwawayawaya
iti agnanayon a Pagarian ni Jesu-Cristo nga Apo ken Mangisalakan
kadatayo. 12 Daytoy ti gapuna a kanayon nga ipalagipko dagitoy
kadakayo uray no ammoyon ida ken natibkerkayon iti naawatyo a
kinapudno. 13 Pagarupek a rebbengko nga ipalagip kadakayo dagitoy a
bambanag bayat ti panagbiagko. 14 Ammok a panawakton daytoy matay a
bagi a kas imbaga kaniak ni Apotayo a Jesu-Cristo. 15 Ngarud, aramidek
ti amin a kabaelak tapno kanayon a malagipyo dagitoy a bambanag
kalpasan ti ipupusayko. 16 Dikami nagusar kadagiti naparbo a sarsarita idi
impakaammomi kadakayo ti mannakabalin a yaay ni Apotayo a Jesu-
Cristo. Ammomi ti sarsaritaenmi ta nakitami a mismo ti nadiosan a
kinadayagna. 17 Addakam idi iti sibayna idi maited kenkuana ti dayaw
ken dayag a naggapu iti Dios Ama, idi kuna ti timek manipud iti Katan-
okan a Dayag, “Daytoy ti Anakko a dungdungngoek a pakaragsakak
unay!” 18 Nangngegmi daytoy a timek a naggapu sadi langit idi
naikuyogkami kenkuana iti nasantoan a bantay. 19 Iti kasta, ad-adda
manen ti panagtalekmi iti impakaammo dagiti profeta. Pagsayaatanyo no
ipangagyo daytoy a kasla maysa a pagsilawan nga agranraniag iti
nasipnget a lugar agingga iti agbannawag, ket agraniag kadagiti pusoyo ti
lawag ti bituen ti agsapa. 20 Nangnangruna unay, laglagipenyo nga awan
ti makailawlawag iti uray ania a padto iti Nasantoan a Surat iti bukodna a
panunot. 21 Ta awan a pulos ti padto a nagtaud iti nakem ti tao. Indalan
ketdi ti Espiritu Santo dagiti tattao nga agsao iti mensahe ti Dios.
2 Pedro 2
1 Iti napalabas, timmaud dagiti sinan-profeta iti Israel. Kasta met nga
addanto dagiti sinan-maestro nga umay kadakayo. Awanto ti
makadkadlaw iti panangiserrekda kadagiti makadadael ken saan a pudno a
pannursuro ket laksidendanto ti Apo a nangsubbot kadakuada. Iti kasta,
kellaatto a dumteng ti pannakadadaelda. 2 Uray pay no kasta, adunto ti
tumulad iti saan a nasayaat nga aramidda, ket gapu kadakuada, madadaelto
ti Dalan ti kinapudno. 3 Gapu iti kinaagumda, pagsapuldanto ti
panangipakaammoda kadagiti parbo a sarsarita. Ngem nabayagen a
nakasagana ti Mangukom kadakuada, ket saan a matmaturog ti
Mangdadael kadakuada. 4 Saan a kinaasian ti Dios dagiti angheles a
nagbasol. Intappuakna ketdi ida idiay infierno, iti kasipngetan a lugar a
nakakawaranda, a pangur-urayanda iti idadateng ti Aldaw ti Panangukom.
5 Saanna met a kinaasian dagiti tattao nga awanan-dios iti daydi daan a
lubong idi pinaglayusna ti daga. Ni laeng Noe a nangikasaba iti kinalinteg
ti insalakanna agraman dagiti pito a tattao. 6 Dinusa ti Dios dagiti siudad ti
Sodoma ken Gomorra. Pinuoranna agingga a dimmapoda ket pinagbalinna
ida a pagulidanan ti mapasamakto kadagiti awanan-dios. 7 Inispalna ni
Lot, maysa a nalinteg a tao a nariribuk iti kinadakes dagiti managlabsing
iti linteg. 8 Nagnaed iti sidongda ket inaldaw a natutuok kadagiti dakes a
nakita ken nangngegna nga aramidda. 9 Kas ipaneknek dagitoy, ammo ti
Apo nga isalakan dagiti nasingpet a tattao iti pakasuotanda. Ammona met
a guardiaan dagiti managdakdakes agingga a dumteng ti Aldaw ti
Panangukom a panagsagabada, 10 nangruna unay dagiti sumursurot iti
awis ti kinaderrepda ken manglalais iti turay ti Dios. Natured ken
napalangguad dagitoy a sinan-maestro. Saanda nga agbuteng a manglais
kadagiti nadayag sadi langit. 11 Uray dagiti angheles, idinto a napigpigsa
ken dakdakkel ti pannakabalinda ngem isuda, dida aramaten ti
pammabalaw iti panangidarumda kadakuada iti imatang ti Apo. 12 Ngem
saan a pampanunoten dagitoy a sinan-mamaestro ti aramidenda—kasdala
kadagiti atap nga animal a nayanak tapno matiliw ken mapapatayda.
Madadaeldanto a kas kadagiti atap nga animal. 13 Gapu ta pinagsagabada
dagiti sabali a tattao, agsagabadanto met. Ta kitaenyo, tapno matungpal
dagiti nailasagan a tarigagayda, aggangganasda iti nalabes a
panagraragsakda uray tengnga ti aldaw! Dumar-ayda met iti
panagsasangoyo iti panganan, ngem nakababain ken nakaal-alas ti
aramidda. Maragsakanda la unay iti panangallilawda kadakayo. 14
Kayatda a kaiddaen ti tunggal babai a makitada; saanda a mauma nga
agbasol. Iturongda pay dagiti nakapuy iti pakatnagan. Iturayan ida ti
kinaagum. Awan duadua a mailunoddanto! 15 Pinanawanda ti pudno a
dalan ket nayaw-awanda. Inaramidda ti kas iti inaramid ni Balaam nga
anak ni Bosor, a nagbasol gapu iti kinaagumna iti kuarta. 16 Ngem
nagballatek kenkuana ti basolna; nagsao a kas tao ti bakodna nga asno ket
pinasardengna ti minamauyong nga aramid ti profeta. 17 Mayarig dagitoy
a tattao iti namagaan nga ubbog. Kasda la ulep a mayang-angin iti napigsa.
Insaganan ti Dios ti pagyananda iti mangliwengliweng a sipnget. 18
Napigsa ti timekda ngem minamaag ken awan serserbi ti sawenda. Babaen
kadagiti dakes a tarigagay ken kinaderrep, ipalab-ogda dagiti tattao a
mangrugrugi a makaruk-at iti dakes a panagbiag. 19 Ikarida kadakuada ti
wayawaya, idinto nga adipen ida dagiti dakes a tarigagayda ta ti aniaman a
mangparmek iti tao, iturayan dayta a nangparmek kenkuana. 20
Maisalakan dagiti tattao iti kinadakes ti lubong babaen iti pannakaammoda
ken ni Jesu-Cristo nga Apo ken Mangisalakan kadatayo. Ngem no
makayawan ken agsublida manen iti sigud nga aramidda, dakdakesen ti
kasasaadda ngem idi damo. 21 Naim-imbag pay koma a dida nasursuro ti
dalan ti kinalinteg, ngem tallikudanda kalpasan ti pannakaisuro kadakuada
ti nasantoan a bilin a naited kadakuada. 22 Ipakita ti napasamak
kadakuada a pudno ti pagsasao: “Kanen manen ti aso ti insarruana” ken
“Agsubli nga aglugnak ti nadigos a baboy.”
2 Pedro 3
1 Gagayyemko, maikaduan daytoy a suratko kadakayo. Kadagitoy dua a
surat, pinanggepko a patibkeren dagiti pakinakemyo babaen iti
panangipalpalagipko kadagitoy a bambanag kadakayo. 2 Laglagipenyo
koma ti kinuna dagidi nasantoan a profeta ken ti imbilin ti Apo ken
Mangisalakan nga impakaammo dagiti apostolesyo. 3 Umuna unay,
maawatanyo koma a kadagiti maudi nga aldaw, umayto kadakayo dagiti
tattao nga awan sabali a panggepda no di ti mangtungpal iti dakes a
tarigagayda. Pagang-angawandakayto 4 a kunkunada, “Inkarina nga umay,
saan kadi? Ayanna ngarud? Natayen dagiti ammami, ngem awan met
nagbaliwan ti amin manipud pannakaparsua ti lubong!” 5 Saanda a
bigbigen ti kinapudno nga idi un-unana, nagbilin ti Dios ket timmaud ti
langit ken ti daga. Naparsua ti daga manipud iti danum ken babaen iti
danum. 6 Ket ti danum met laeng, wen, daydi Layus, ti nangdadael iti
daan a lubong. 7 Ngem babaen iti isu met laeng a sao ti Dios, mataginayon
ti agdama a langit ken daga tapno dadaelento ti apuy. Ta mapuorandanto
inton dumteng dayta nga aldaw a pannakaukom ken pannakadadael dagiti
awanan-dios. 8 Ngem, gagayyemko, diyo liplipatan ti maysa a banag! Iti
imatang ti Apo, awan paggiddiatan ti maysa nga aldaw ken sangaribu a
tawen. Agpadpada dagitoy kenkuana. 9 Saan nga itantan ti Apo a
tungpalen ti inkarina, kas ipagarup ti dadduma. Ngem an-anusannakayo ti
Apo gapu ta dina kayat a madadael ti siasinoman, no di ket kayatna nga
agbabawi ti amin a tattao kadagiti basbasolda. 10 Dumtengto ti Aldaw ti
Apo a di mapakpakadaan, kas iti yaay ti mannanakaw. Iti dayta nga
Aldaw, agpukawto dagiti langlangit a kagiddan ti napigsa a daranudor, ket
matunaw iti apuy ti init, bulan ken dagiti bituen ket awanton ti daga ken
amin a linaonna. 11 Yantangay ta kastoy ti pannakadadaelto dagitoy, ania
ngarud a kita ti tao ti pagbalinanyo? Masapul nga idatonyo ti bagiyo iti
Dios ket agbiagkay a nasantoan. 12 Kabayatanna, urayenyo ti idadateng ti
Aldaw ti Dios. Aramidenyo ti amin a kabaelanyo a mangpapardas iti
yaayna—ti Aldaw a pannakauram ken pannakadadael dagiti langlangit ken
pannakatunawto dagiti planeta. 13 Ngem namnamaentayo ti inkari ti Dios:
ti baro a langit ken ti baro a daga a pagnaedanto ti kinalinteg. 14 Iti kasta,
gagayyemko, bayat ti panagur-urayyo iti dayta nga Aldaw,
makikappiakayo iti Dios ket ikagumaanyo ti agbalin a nadalus ken awan
pakapilawanna iti imatangna. 15 Naanus ti Dios ket ibilangyo ti
kinaanusna a kas gundaway nga itedna tapno maisalakankayo. Kasta met
ti insurat kadakayo ni Pablo nga ingungotentayo a kabsat babaen iti
panangaramatna iti kinasirib nga inted ti Dios kenkuana. 16 Iti amin a
suratna maipapan iti daytoy, kasta ti ipalpalagipna. Adda sumagmamano a
bambanag a narigat a maawatan kadagiti sursuratna, ket balballikugen
dagiti nengneng ken nakapuy ti pammatina a tattao a kas ar-aramidenda
kadagiti dadduma a paset ti Nasantoan a Surat. Iti kasta, yegda ti bukodda
a pannakadadael. 17 Ngem dakayo, gagayyemko, ammoyon daytoy.
Agannadkayo ngarud tapno dikayo mayaw-awan kadagiti biddut dagiti
dakes a tattao ket matnagkayo manipud kadagiti natalged a lugaryo. 18
Dumur-askayo iti parabur ken pannakaammoyo ken ni Jesu-Cristo nga
Apo ken Mangisalakan kadatayo. Itan-ok ken idaydayawtayo ni Cristo, ita
agingga iti agnanayon! Amen.
1 Juan 1
1 Isuratmi kadakayo ti nangngeg ken nakitami maipapan iti Sao ti biag nga
addan manipud idi punganay. Nangngeg ken nakitami; wen, nakita ken
nasagidmi. 2 Idi naiparangarang daytoy a biag, nakitami; iti kasta,
paneknekan ken ipakaammomi kadakayo ti naipakaammo kadakami
maipapan iti agnanayon a biag nga addan idi iti Ama. 3 Ngarud, ibagami ti
nakita ken nangngegmi tapno mairamankayo met iti pannakikadkaduami
iti Ama ken ni Jesu-Cristo nga Anakna. 4 Isuratmi daytoy tapno naan-anay
ti rag-omi. 5 Daytoy ti mensahe a nangngegmi iti Anakna ken
ipakaammomi kadakayo: Ti Dios ket silaw; awan a pulos ti sipnget
kenkuana. 6 No kunatayo a makikadkaduatayo kenkuana, ngem
agbibiagtayo met iti sipnget, ulbodtayo iti sao ken aramid. 7 Ngem no
agbiagtayo iti lawag, a kas iti kaaddana iti lawag, agkakaduatayo ngarud,
ket ti dara ni Jesus nga Anakna ugasannatayo iti amin a basol. 8 No
kunatayo nga awan basoltayo iti Dios, allilawentayo ti bagitayo ket saan
nga agtaeng ti kinapudno kadatayo. 9 Ngem no ipudnotayo dagiti
basbasoltayo, tungpalenna ti karina ket aramidenna ti maitutop.
Pakawanenna dagiti basoltayo ket ugasannatayo iti amin a kinadakestayo.
10 No kunatayo a ditay nagbasol, pagbalinentayo nga ulbod ti Dios, ket
saan nga agtaeng ti saona kadatayo.
1 Juan 2
1 Annakko, isuratko daytoy kadakayo tapno dikayo agbasol. Ngem no
adda makabasol, adda mangibabaet kadatayo iti Ama—ni Jesu-Cristo a
nalinteg. 2 Ni Cristo met laeng ti pakapakawanan dagiti basoltayo, ket
saan laeng a dagiti basoltayo, no di pay ket dagiti basol ti amin a tao. 3 No
tungpalentayo dagiti bilbilin ti Dios, awan duadua nga am-ammotayo ti
Dios. 4 No adda agkuna nga am-ammona ti Dios ngem dina met tungpalen
dagiti bilinna, ulbod ti kasta a tao ket saan nga agtaeng ti kinapudno
kenkuana. 5 Ngem ti mangtungpal iti sao ti Dios, ipakitana a naan-anay ti
ayatna iti Dios. Ti pakapnekan nga agbibiagtayo iti Dios isu daytoy: 6 Ti
agkuna nga agtalinaed iti Dios, masapul nga agbiag a kas iti panagbiag ni
Jesu-Cristo. 7 Ay-ayatek a gagayyem, saan a baro a bilin daytoy isuratko
kadakayo. Isu met laeng daydi daan a bilin a naited kadakayo idi damo,
daydi mensahe a nangngegyo. 8 Nupay kasta, makuna a baro a bilin ti
isuratko kadakayo ta makita ken ni Cristo, kasta met kadakayo, ti
kinapudno daytoy. Ta agpukpukawen ti sipnget, ket agraniagen ti pudno a
silaw. 9 Ti agkuna nga adda iti lawag ngem guraenna met ti kabsatna,
adda pay laeng iti sipnget. 10 Ti agayat iti kabsatna, agtalinaed iti lawag,
ket awan kenkuana ti pakaigapuan ti panagbasol ti sabali. 11 Ngem ti
manggura iti kabsatna, adda iti sipnget ken magmagna iti sipnget, ket dina
ammo ti turturongenna, agsipud ta kinullaapan ti sipnget dagiti matana. 12
Annakko, agsuratak kadakayo, agsipud ta napakawanen dagiti basbasolyo
gapu ken ni Cristo. 13 Amma, agsuratak kadakayo, agsipud ta am-
ammoyo ti Dios nga addan manipud idi punganay. Agtutubo a lallaki,
agsuratak kadakayo, agsipud ta pinarmekyo ti Managdakdakes. 14
Nagsuratak kadakayo, annakko, agsipud ta am-ammoyo ti Ama.
Nagsuratak kadakayo, amma, agsipud ta am-ammoyo ti addan manipud idi
punganay. Nagsuratak kadakayo, agtutubo a lallaki, agsipud ta
napigsakayo, ken agtalinaed kadakayo ti sao ti Dios ken pinarmekyo ti
Managdakdakes. 15 Diyo ayaten ti lubong wenno uray ania nga adda iti
lubong. No ayatenyo ti lubong, awan ti panagayatyo iti Ama. 16 Ta agtaud
iti lubong ti amin nga adda ditoy lubong, a kas iti kinaderrep ti derrep,
kinaderrep ti mata ken kinapalangguad. Saanda nga agtaud iti Ama. 17
Agpukaw ti lubong ken ti amin a linaonna nga aguman ti tao. Ngem
agtalinaed nga agnanayon ti agaramid iti pagayatan ti Dios. 18 Annakko,
asidegen ti panungpalan! Nangngegyo nga umayen ti Anti-Cristo. Ita,
nagparangen ti adu a kabusor ni Cristo, ket daytoy ti pakaammoantayo nga
asidegen ti panungpalan. 19 Nupay no kaduatayo idi dagitoy a tattao,
pinanawandatayo agsipud ta iti kinapudnona, saantayo a kadua ida. No
kaduatayo ida, nakipagtaengda koma kadatayo. Ngem pimmanawda tapno
nalawag a makita nga awan kaduatayo kadakuada. 20 Ngem addan
kadakayo ti Espiritu Santo nga inted ni Cristo, isu nga ammoyo amin ti
pudno. 21 Agsuratak ngarud kadakayo, saan a gapu ta diyo ammo ti
pudno, no di ket gapu ta ammoyon ti pudno ken ammoyo pay nga awan
kinaulbod nga agtaud iti pudno. 22 Siasino ngarud ti ulbod? Ti agkuna a ni
Jesus saan nga isu ti Cristo. Kabusor ni Cristo ti kasta a tao, ta dina
bigbigen ti Ama ken ti Anak. 23 Ta ti saan a mangbigbig iti Anak, saanna
met a bigbigen ti Ama. Ti mangbigbig iti Anak, bigbigenna met ti Ama.
24 Ngarud, italimengyo iti pusoyo ti nangngegyo manipud idi damo. No
salimetmetanyo daytoy a mensahe, awan duadua a makipagtaengkayo nga
agnanayon iti Anak ken iti Ama, 25 ket daytoy ti inkari ni Cristo
kadatayo—ti biag nga agnanayon. 26 Isuratko dagitoy maipapan kadagiti
mangal-allilaw kadakayo. 27 Ngem no maipapan kadakayo, agtalinaed ti
Espiritu nga inted ni Cristo ket saanyon a masapul ti sabali a mangisuro.
Ta ti Espirituna ti mangisuro kadakayo iti amin. Pudno ti isurona, saan a
kinaulbod. Ngarud, kas mayannurot iti pannursurona, agtalinaedkayo ken
ni Cristo. 28 Wen, annakko, agtalinaedkayo kenkuana tapno naturedtayo
ket ditayto mabain a sumango kenkuana iti dayta nga Aldaw a yaayna. 29
Ammoyo a nalinteg ni Cristo. Masapul nga ammoyo met nga annak ti
Dios ti amin nga agaramid iti nalinteg.
1 Juan 3
1 Kitaenyo no kasano ti kadakkel ti panagayat ti Ama kadatayo! Wen,
kasta unay ti panagayatna kadatayo ta maawagantayo nga annak ti Dios,
ket pudno a kastatayo. Dinatayo bigbigen ti lubong agsipud ta dina
binigbig ti Dios. 2 Ay-ayatek a gagayyem, annaknatayon ti Dios, uray no
saan pay a nalawag no anianto ti pagbalinantayo. Ngem ammotayo nga
inton agparang ni Cristo, agbalintayto a kas kenkuana, agsipud ta
makitatayto ti kinasiasinona. 3 Tunggal maysa nga addaan iti daytoy a
namnama ken ni Cristo, masapul nga agbiag a nadalus a kas ken ni Cristo
a nadalus. 4 Ngem ti siasinoman nga agbasol, salungasingenna ti linteg ti
Dios, agsipud ta ti basol ket panagsalungasing iti linteg. 5 Ammoyo nga
immay ni Cristo tapno ikkatenna dagiti basbasol; ket awan ti basolna. 6 Iti
kasta, saanen nga agbasol ti siasinoman nga agtalinaed ken Cristo. Ngem
ti agbasol, dina nakita wenno naammoan ni Cristo. 7 Annakko, dikay
paallilaw iti uray siasinoman. Nalinteg ti siasinoman nga agaramid iti
nalinteg a kas ken ni Cristo a nalinteg. 8 Ngem kadua ti Diablo ti saan a
sumardeng nga agbasol, ta nagbasolen ti Diablo manipud pay idi
punganay. Daytoy ti gapuna nga immay ti Anak ti Dios tapno dadaelenna
dagiti aramid ti Diablo. 9 Saan nga agbasol ti anak ti Dios, agsipud ta adda
kenkuana ti kababalin ti Dios. Gapu ta ti Dios ti Amana, saanna a mabalin
ti agbasol. 10 Ti nalawag a pakaigiddiatan dagiti annak ti Dios kadagiti
annak ti Diablo isu daytoy: Saan nga anak ti Dios ti siasinoman a di
agaramid iti naimbag wenno di agayat iti kabsatna. 11 Daytoy ti mensahe
a nangngegyo manipud idi damo: masapul nga agiinnayattayo. 12
Saantayo nga agbalin a kas ken ni Cain a pinaiturayan iti Managdakdakes
ket pinatayna ni Abel a kabsatna. Apay a pinatayna? Gapu ta dakes dagiti
aramid ni Cain, ket nalinteg dagiti aramid ti kabsatna. 13 Kakabsatko,
dikay masdaaw no guraennakayo ti lubong. 14 Ammotayo a
pinanawantayo ni patay ket simrektayo iti biag. Ammotayo daytoy
agsipud ta ay-ayatentayo dagiti kakabsattayo. Ti saan nga agayat, adda pay
laeng ken ni patay. 15 Mammapatay ti siasinoman a gumura iti kabsatna.
Ammoyo met a ti mammapatay awan kenkuana ti biag nga agnanayon. 16
Ti pakaammoantayo no ania ti ayat isu daytoy: Impaay ni Cristo ti biagna
kadatayo. Rebbengtayo met ngarud nga ipaay ti biagtayo kadagiti
kakabsat! 17 No addaanka ket makitam ti maysa a kabsat a makasapul iti
tulong ngem dika pulos mangrikna, kasano ti panagkunam nga ay-ayatem
ti Dios? 18 Annakko, saantayo koma nga agayat babaen iti sao wenno
sarita laeng. Ipakitatayo ketdi ti pudno a panagayat babaen iti aramid. 19-
20 Ngarud, daytoy ti pakaammoantayo nga addatayo iti pudno. Uray no
ukomennatayo ti konsensiatayo, natalgedtayo latta nga umasideg iti Dios.
Ammotayo ngamin a dakdakkel ti Dios ngem ti konsensiatayo, agsipud ta
ti Dios ket ammona amin. 21 Wen, gagayyem, no saannatayo nga ukomen
ti konsensiatayo, natalgedtayo nga agtakder iti sangoanan ti Dios. 22
Ikkannatayo iti aniaman a dawatentayo, agsipud ta tungpalentayo dagiti
bilbilinna ken aramidentayo ti pakaragsakanna. 23 Daytoy ti bilinna:
Masapul a mamatitayo iti nagan ni Jesu-Cristo nga Anakna ken
agiinnayattayo a kas imbilin ni Cristo. 24 Ti mangtungpal kadagiti bilbilin
ti Dios, agtalinaed iti Dios, ket agtalinaed met ti Dios kenkuana. Daytoy ti
pakaammoantayo nga agtaeng kadatayo ti Dios: Ammotayo babaen iti
Espiritu nga intedna kadatayo.
1 Juan 4
1 Ay-ayatek a gagayyem, diyo patien ti amin nga agkuna nga adda ti
Espiritu kadakuada, ngem suotenyo ida no agtaud iti Dios ti espiritu nga
adda kadakuada. Ta nagwarasen ditoy lubong ti adu a sinan-profeta. 2
Daytoy ti pakaammoanyo iti Espiritu ti Dios: Siasinoman a mangbigbig
nga immay ni Jesu-Cristo iti lasag, adda kenkuana ti Espiritu nga agtaud
iti Dios. 3 Ngem siasinoman a di mangbigbig a nagbalin ni Jesus a tao,
awan kenkuana ti Espiritu nga agtaud iti Dios. Agtaud iti Anti-Cristo ti
espiritu nga adda kenkuana. Naibagan kadakayo ti isasangpetna ket ita
addan ditoy lubong. 4 Ngem kukuanakayo ti Dios, annakko, ket
naparmekyon dagiti sinan-profeta, agsipud ta nabilbileg ti Espiritu nga
adda kadakayo ngem ti espiritu nga adda kadagiti taga-lubong. 5
Nailubongan dagiti sarsaritaen dagitoy a sinan-profeta, ket denggen ida ti
lubong agsipud ta kukua ida ti lubong. 6 Ngem datayo, kukuanatayo ti
Dios. Dumngeg kadatayo ti tao a makaammo iti Dios. Saan a dumngeg
kadatayo ti saan a kukua ti Dios. Daytoy ngarud ti pakaammoantayo iti
paggiddiatan ti espiritu ti kinapudno ken ti espiritu ti kinaulbod. 7 Ay-
ayatek a gagayyem, agiinnayattayo, agsipud ta ti ayat agtaud iti Dios.
Anak ti Dios ti siasinoman nga agayat, ket am-ammona ti Dios. 8 Ti saan
nga agayat, saanna nga ammo ti Dios, ta ti Dios ket ayat. 9 Kastoy ti
panangipakita ti Dios nga ay-ayatennatayo: Imbaonna ditoy lubong ti
bugbugtong nga Anakna tapno maaddaantayo iti biag babaen kenkuana.
10 Daytoy ti pudno a kaipapanan ti ayat: Saan a gapu ta inayattayo ti Dios,
no di ket inayatnatayo, ta imbaonna ti Anakna a pakapakawanan dagiti
basbasoltayo. 11 Patpatgek a gagayyem, no kastoy ti panagayat ti Dios
kadatayo, rebbengna met nga agiinnayattayo. 12 Awan pay ti nakakita iti
Dios. Ngem no agiinnayattayo, agtaeng ti Dios kadatayo ket maan-anay ti
ayatna kadatayo. 13 Inted ti Dios ti Espirituna kadatayo. Ngarud, awan
duadua nga agtaengtayo iti Dios ket agtaeng met ti Dios kadatayo. 14
Nakita ken paneknekanmi nga imbaon ti Ama ti Anakna a Mangisalakan
iti lubong. 15 No ipaduyakyak ti maysa a tao a ni Jesus ket Anak ti Dios,
agtaeng iti Dios ket agtaeng met kenkuana ti Dios. 16 Ammo ken
mamatikami nga ay-ayatennatayo ti Dios. Ti Dios ket ayat! Agtaeng iti
Dios ti agtaeng iti ayat, ket agtaeng met kenkuana ti Dios. 17 Agbalin a
naan-anay ti ayat kadatayo tapno awan ti panagbutengtayo inton dumteng
ti Aldaw ti Panangukom. Maaddaantayto iti tured agsipud ta ti
panagbiagtayo ditoy lubong kas met idi ken ni Cristo. 18 No adda ayat,
awan panagbuteng, ta paksiaten ti naan-anay nga ayat ti amin a
panagbuteng. Ngarud, saan pay a naan-anay ti ayat ti siasinoman nga
agbuteng, agsipud ta agkuykuyog ti buteng ken ti dusa. 19 Agayattayo
agsipud ta immuna nga inayatnatayo ti Dios. 20 Ulbod ti agkuna nga ay-
ayatenna ti Dios ngem guraenna met ti kabsatna. Ta dina mabalin nga
ayaten ti Dios a dina makita, no dina ayaten ti kabsatna a makitana. 21
Ngarud, daytoy ti bilin ni Cristo kadatayo: Ti agayat iti Dios, rebbengna
met nga ayaten ti kabsatna.
1 Juan 5
1 Anak ti Dios ti siasinoman a mamati a ni Jesus isu ti Cristo, ket ti
siasinoman nga agayat iti maysa nga ama, ayatenna met ti anak dayta nga
ama. 2 No ayatentayo ti Dios ken tungpalentayo dagiti bilbilinna, daytoy ti
pakaammoantayo nga ayatentayo dagiti annak ti Dios. 3 Ta no ayatentayo
ti Dios, kayatna a sawen a tungpalentayo dagiti bilbilinna. Saan a narigat a
tungpalen dagiti bilbilinna, 4 agsipud ta amin nga anak ti Dios
maparmekna ti lubong. Ket babaen iti pammatitayo, agballigitayo a
mangparmek iti lubong. 5 Siasino ti makaparmek iti lubong? Awan sabali
no di ti mamati a ni Jesus ket Anak ti Dios. 6 Ni Jesu-Cristo ti immay
babaen iti danum ken iti dara. Immay, saan laeng nga iti danum, no di ket
iti danum ken iti dara. Paneknekan met laeng ti Espiritu a pudno daytoy,
agsipud ta pudno ti Espiritu. 7 Tallo ti mangpaneknek: 8 ti Espiritu, ti
danum ken ti dara. Ket agpapada ti ibagada. 9 Mamatitayo iti
pammaneknek ti tao. Ngem natibtibker ti pammaneknek ti Dios, ket
intedna daytoy a pammaneknek maipapan iti Anakna. 10 Ngarud,
siasinoman a mamati iti Anak ti Dios adda kenkuana daytoy a
pammaneknek. Ngem ti di mamati iti Dios, pinagbalinna nga ulbod ti
Dios, ta dina pinati ti pammaneknekna maipapan iti Anakna. 11 Daytoy
ngarud ti pammaneknek: Inikkannatayo ti Dios iti biag nga agnanayon, ket
masarakan daytoy a biag iti Anakna. 12 Ti tao a pagtaengan ti Anak,
agtaeng met kenkuana ti biag; ti saan a pagtaengan ti Anak ti Dios, saan
met nga agtaeng kenkuana ti biag. 13 Insuratko dagitoy kadakayo a
mamati iti nagan ti Anak ti Dios, tapno maammoanyo nga addaankayo iti
biag nga agnanayon. 14 Ditayo bumdeng nga umasideg iti Dios agsipud ta
ammotayo nga itedna ti aniaman a dawatentayo no la ket mayannurot iti
pagayatanna. 15 Ket no ammotayo a denggennatayo iti aniaman a
dawatentayo, ammotayo met nga awatentayo ti aniaman a dawatentayo
kenkuana. 16-17 No makita ti siasinoman kadakayo ti kabsatna nga
agbasol iti saan nga agtungpal iti patay, masapul nga ikararaganna iti Dios
a mangted kenkuana iti biag. Agpaay daytoy kadagiti dadduma pay a
nagbasol iti saan nga agtungpal iti patay. Basol ti amin a kita ti kinadakes.
Ngem adda basol nga agtungpal iti patay, ket adda met basol a di
agtungpal iti patay. 18 Ammotayo a di agbasol ti anak ti Dios, ket saan a
dangran ti Managdakdakes, ta salakniban ti Anak ti Dios. 19 Ammotayo a
kukuanatayo ti Dios, nupay iturturayan ti Managdakdakes ti entero a
lubong. 20 Ammotayo nga immayen ti Anak ti Dios, ket inikkannatayo iti
pannakaawat tapno maammoantayo daydiay a pudno. Addatayo kenkuana
a pudno, wen, addatayo ken ni Jesu-Cristo nga Anakna. Isu ti pudno a
Dios ken ti biag nga agnanayon. 21 Annakko, annadanyo dagiti saan a
pudno a dios.
2 Juan 1
1 Patgek nga Ina: Isuratko daytoy kenka ken kadagiti annakmo, dakayo a
pudno nga ay-ayatek. Saan la a sisiak ti agayat kadakayo, no di pay ket ti
amin a makaammo iti pudno, 2 agsipud ta agtalinaed kadatayo ti pudno,
ket addanto nga agnanayon kadatayo. 3 Sapay koma ta maaddaantayo iti
parabur, asi ken talna nga aggapu iti Dios Ama ken ni Jesu-Cristo nga
Anak ti Ama. Wen, magun-odtayo koma dagitoy babaen iti biag a
napudno ken napnoan ayat. Siak a Panglakayen ti naggapuan daytoy a
surat. 4 Naragsakanak unay a nakaammo a sumagmamano kadagiti
annakmo ket agbibiagda a mayannurot iti pudno, kas imbilin ti Ama
kadatayo. 5 Ket ita, dawatek kenka, patgek nga Ina: agiinnayattayo koma
amin. Saan a baro a bilin daytoy isuratko kenka—isu met laeng daydi bilin
nga addan kadatayo manipud idi damo. 6 Ti kaipapanan ti ayat a
sarsaritaek isu ti panagtungpal kadagiti bilbilin ti Dios. Ti bilin a
nangngegyo amin manipud idi damo isu daytoy: Agbiagkayo iti ayat. 7
Nagwarasen ditoy lubong ti adu a mangallilaw, tattao a di mangbigbig nga
immay ni Jesu-Cristo iti lasag. Mangallilaw ken Kabusor ni Cristo dagiti
kakasta a tattao. 8 Agannadkayo ngarud, amangan no mapukawyo dagiti
nagbannoganyo ket diyo maawat ti naan-anay a gunggona. 9 Ti
siasinoman a saan nga agtalinaed iti pannursuro ni Cristo, awan kenkuana
ti Dios. Ti agtalinaed iti pannursuro, adda kenkuana ti Ama ken ti Anak.
10 Ngarud, no adda umay a mangyeg kadakayo iti pannursuro a saan a ti
pannursuro ni Cristo, diyo awaten iti balayyo, wenno uray kablaawan la
koma. 11 Ta ti mangkablaaw kenkuana, agbalin a kaduana iti dakes nga
aramidna. 12 Adu pay koma ti ibagak kadakayo, ngem diak kayat nga
isurat iti papel ken tinta. Uray ta panggepko ti sumarungkar kadakayo ket
kasaokayto laengen a personal tapno naan-anay ti ragsaktayo. 13
Pakomustaandaka dagiti annak ti patpatgem a kabsatmo a babai.
3 Juan 1
1 Ingungotek a Gayo: Isuratko daytoy kenka, sika a pudno nga ay-ayatek.
2 Patgek a gayyem, ikarkararagko a nasayaat latta koma ti kasasaadmo.
Sapay koma ta nasalun-atka a kas iti ammok a naespirituan a
panagbiagmo. 3 Kasta unay ti ragsakko idi simmangpet dagiti kakabsat ket
imbagada kaniak ti panagtalinaedmo iti pudno. Wen, ta agpayso met nga
agbibiagka iti kinapudno. 4 Awan sabali a makaited kaniak iti dakdakkel a
ragsak, no di ti pannakadamagko nga agbibiag dagiti annakko iti
kinapudno. Siak a Panglakayen ti naggapuan daytoy a surat. 5 Ingungotek
a gayyem, nasayaat unay ti panagserbim kadagiti kakabsat iti pammati,
nangruna kadagiti ganggannaet. 6 Impadamagda iti iglesia ditoy ti
maipapan iti ayatmo. Pangngaasim ta tulongam ida nga agtuloy iti
panagdaliasatda, iti wagas a makaay-ayo iti Dios. 7 Ta nagluasda gapu iti
panagserbi ken ni Cristo. Saanda nga umawat iti tulong dagiti Hentil. 8
Datayo ngarud a mamati ti rumbeng a mangted iti kasapulan dagitoy a
tattao tapno tumulongtayo iti pannakaisaknap ti kinapudno. 9 Nagsuratak
iti iglesia, ngem saannak nga ikankano ni Diotrefes. Kayatna ngamin nga
isu ti agbalin a panguloda. 10 Ngarud, inton umayak, iruarkonto amin nga
ar-aramidenna, agraman dagiti iwarwarasna a pammadpadakesna kaniak.
Ngem di pay la mapnek iti dayta. Saanna a sangailien dagiti kakabsat, ket
saanna la a paritan dagiti mayat nga umawat kadakuada, no di pay ket
kayatna a pagtalawen ida iti iglesia! 11 Patgek a gayyem, dimo tuladen ti
dakes nga aramid. Tuladem ketdi ti naimbag. Kukua ti Dios ti agaramid iti
naimbag. Ngem ti agaramid iti dakes, dina nakita ti Dios. 12 Nasayaat ti
ipadpadamag ti tunggal maysa maipapan ken ni Demetrio. Mismo a ti
pudno ti mangpaneknek iti maipapan kenkuana. Wen, paneknekak met,
ket ammom a pudno ti kunak. 13 Adu koma pay ti ibagak kenka, ngem
diak kayat nga isurat iti pluma ken tinta, 14 ta agkitata iti mabiit, ket
agsaotanto laengen a personal. 15 Talna koma ti adda kenka.
Pakumostaandaka dagiti gagayyemmo. Saggaysaem a pakomustaan dagiti
gagayyem dita.
Judas 1
1-2 Kadakayo nga inayaban ti Dios ken agbibiag iti ayat ti Dios Ama ken
iti panangsalaknib ni Jesu-Cristo: Sapay koma ta adda kadakayo ti naan-
anay nga asi, talna ken ayat. Naggapu daytoy a surat ken ni Judas nga
adipen ni Jesu-Cristo ken kabsat ni Santiago. 3 Ay-ayatek a gagayyem,
panggepko idi ti agsurat kadakayo maipapan iti pannakaisalakantayo
amin. Ngem kapilitan nga agsuratak kadakayo a dagus tapno dawatek nga
ikabilyo ti amin a kabaelanyo a mangsalaknib iti pammati a namimpinsan
nga inted ti Dios kadagiti tattaona. 4 Ta nakastrek a ditay nadnadlaw ti
sumagmamano a tattao nga awanan Dios. Balballikugenda ti mensahe
maipapan iti parabur ti Diostayo. Aramatenda ti sao ti Dios a panglinged
kadagiti kinaderrepda. Dida bigbigen ni Jesu-Cristo a kakaisuna a Maestro
ken Apotayo. Nabayagen nga impakaammo ti Nasantoan a Surat daytoy a
pannakailunodda. 5 Nupay ammoyon dagitoy, kayatko nga ipalagip
kadakayo ti panangisalakan ni Jesus kadagiti Israelita manipud idiay
Egipto, ngem kalpasanna, dinadaelna dagiti saan a namati. 6 Laglagipenyo
dagiti angheles a di nagtalinaed iti sigud a kasasaadda, no di ket
pinanawanda dagiti pagtaenganda. Impupok ti Dios ida iti kasipngetan iti
baba. Agnanayon a nakawaranda agingga a dumteng ti naindaklan nga
Aldaw a maukomda. 7 Laglagipenyo ti Sodoma ken Gomorra ken dagiti
kabangibang nga il-ili. Nagbasolda iti pannakikamalala ken kinaderrep ket
sagsagabaenda ti dusa iti agnanayon nga apuy. Daytoy ti
pakaballaagantayo amin. 8 Kasta met nga iti arapaap dagitoy a tattao nga
awanan Dios, agaramidda kadagiti basbasol a mangtulaw iti bagida met
laeng. Laksidenda ti turay ti Dios ken laisenda dagiti nadayag a parsua
idiay ngato. 9 Uray pay ni Miguel a pangulo dagiti angheles dina inaramid
ti kasta. Iti pannakidangadangna iti Diablo, idi pagsuppiatanda no siasino
ti mangala iti bangkay ni Moises, dina inukom ti Diablo. Kinunana laeng,
“Tubngarennaka koma ti Apo!” 10 Ngem agsao dagitoy a tattao iti
maibusor kadagiti bambanag a dida maawatan. Dagiti bambanag a sigud
nga ammodan, a kas iti nakaisigudan a rikna dagiti atap nga animal,
dagitoy met laeng ti mangdadael kadakuada. 11 Nakabutbuteng ti
mapasamak kadakuada ta sinurotda ti dalan ni Cain. Kas ken ni Balaam,
binay-anda nga iturayan ida ti biddut gapu iti gunggona. Immalsada a kas
ken ni Core ket nadadaelda met a kas kenkuana. 12 Isuda ti mangikkat iti
ganas ti panagsasangoyo iti panganan gapu iti kinarawet ken nakababain a
panagbartekda. Dagiti la bagbagida ti as-asikasoenda. Kasda la ulep nga
itayab ti angin a di makaited iti tudo. Kasda la kayo a di agbunga uray iti
tiempo ti panagbubunga, kayo a naparut ket natayen a namimpinsan. 13
Mayarigda kadagiti nadawel a dalluyon iti baybay. Kasla labutab a narugit
dagiti nakababain nga aramidda. Kasda la kadagiti agalla-alla a bituen nga
insaganaan ti Dios iti pagyanan iti agnanayon a mangliwengliweng a
sipnget. 14 Dagiti kakasta a tattao ti pinampanunot ni Enoc a maikapito a
kaputotan ni Adan, idi impadtona daytoy: “Kitaenyo! Umayto ti Apo
agraman dagiti rinibribu a nasantoan nga anghelesna 15 tapno ukomenna ti
amin. Dusaennanto dagiti managbasol nga awanan Dios gapu kadagiti
amin nga inaramidda a saan a nadiosan ken amin a sinaoda a maibusor iti
Dios!” 16 Managreklamo ken managpabasol dagitoy a tattao ket surotenda
dagiti dakes a tarigagayda. Ipasindayagda dagiti bagbagida, ket patiray-
okanda dagiti sabsabali tapno maalada ti kayatda. 17 Ay-ayatek a
gagayyem, laglagipenyo dagiti impakdaar idi un-unana dagiti apostoles ni
Apo Jesu-Cristo. 18 Kinunada kadakayo, “Inton dumteng dagiti maudi nga
aldaw, agparangto dagiti tattao a manglalais kadakayo, tattao a mangsurot
kadagiti dakes a tarigagayda.” 19 Dagitoy dagiti tattao a mangparnuay iti
panagsisina. Iturayan ida dagiti nailubongan a tarigagayda, ket awan
kadakuada ti Espiritu. 20 Ngem dakayo, ay-ayatek a gagayyem,
pumigsakayo iti nasantoan a pammatiyo. Agkararagkayo babaen iti
pannakabalin ti Espiritu Santo. 21 Agtalinaedkayo iti ayat ti Dios.
Agpannuraykay iti kaasi ni Apotayo a Jesu-Cristo a mangted kadakayo iti
biag nga agnanayon. 22 Tulonganyo dagiti agduadua. 23 Isalakanyo dagiti
dadduma ket rabsutenyo ida iti apuy. Kaasianyo met dagiti dadduma a
buyogen ti panagbuteng, ngem guraenyo pati dagiti pagan-anayda a
namansaan iti kinaderrepda. 24-25 Madaydayaw koma ti Dios a
mangaywan kadakayo tapno saankayo a matnag. Isu met ti mangidatag
kadakayo a sidadalus ken siraragsak iti sangoananna. Iti maymaysa a Dios
a Mangisalakan kadatayo babaen ken ni Apotayo a Jesu-Cristo, maited
koma ti dayag, tan-ok, pannakabalin ken turay, manipud idi ugma, ita, ken
iti agnanayon! Amen.
Paltiing 1
1 Nailanad iti daytoy a libro dagiti impaltiing ti Dios ken ni Jesu-Cristo.
Naipaltiing dagitoy kenkuana tapno ipakitana kadagiti adipen ti Dios
dagiti masapul a mapasamak iti mabiit. Impakaammo ni Cristo dagitoy
ken ni adipenna a Juan babaen iti panangibaonna iti anghelna, 2 ket
impakaammo ni Juan ti amin a nakitana. Daytoy ti pammaneknekna
maipapan iti mensahe a naggapu iti Dios ken iti kinapudno nga
impakaammo ni Jesu-Cristo. 3 Nagasat ti mangbasa iti daytoy a libro.
Nagasat met dagiti dumngeg kadagitoy naipadto a mensahe ken
mangtungpal iti nailanad iti daytoy a libro! Asidegen ti tiempo a
mapasamak dagitoy. 4 Siak, ni Juan: Kablaawak dagiti pito nga iglesia iti
probinsia ti Asia. Adda koma kadakayo ti parabur ken talna nga aggapu iti
Dios nga adda ita, adda idi ken umayto. Aggapu met daytoy kadagiti pito
nga espiritu iti sangoanan ti tronona. 5 Aggapu pay ken ni Jesu-Cristo a
mapagtalkan a saksi, inauna nga Anak a nagungar ken kangatoan kadagiti
agtuturay iti lubong. Ay-ayatennatayo ni Jesu-Cristo, ket
winayawayaannatayo kadagiti basbasoltayo babaen iti ipapatayna. 6
Pinagbalinnatayo a pagarian, ken papadi nga agserbi iti Dios ken Amana.
Ipaduyakyaktayo ti agnanayon a dayag ken pannakabalin ni Jesu-Cristo!
Amen. 7 Kitaenyo, umayen ni Jesus a silulugan kadagiti ulep! Makitanto ti
tunggal maysa, agraman dagiti nangduyok kenkuana. Dung-awanto dagiti
tattao iti amin a pagilian ditoy lubong. Maaramid koma a kasta! Amen. 8
“Siak ti Alfa ken ti Omega,” kuna ni Apo Dios a Mannakabalin-amin, isu
nga adda ita, adda idi ken umayto. 9 Siak ni Juan a kabsatyo. Kas pasurot
ni Jesus, kaduakayo iti panagsagaba, iti pagarian ni Cristo ken iti naanus a
panagibtur. Naipanak iti puro a managan Patmos gapu ta impakaammok ti
sao ti Dios ken ti kinapudno nga impakaammo ni Jesus. 10 Iti aldaw ti
Apo, addaak iti pannakabalin ti Espiritu ket nangngegko iti likudak ti
maysa a napigsa a timek a kasla uni ti trumpeta. 11 “Isuratmo ti maipapan
kadagiti makitam,” kinunana, “ket ipaw-itmo ti nakaisuratanda kadagiti
pito nga iglesia: idiay Efeso, Esmirna, Pergamo, Tiatira, Sardis, Filadelfia
ken Laodicea.” 12 Timmaliawak tapno kitaek no siasino ti agsasao, ket
nakitak ti pito a pagsilawan a balitok. 13 Iti tengngada, adda umas-asping
iti anak ti tao a sikakawes iti pagan-anay a dumanon iti dapanna. Adda
nabalitokan a banda iti barukongna. 14 Napudaw a kas iti kapas wenno
puraw a delana ti ulo ken dagiti buokna. Kasla gumilgil-ayab nga apuy
dagiti matana. 15 Agranraniag dagiti sakana a kasla napasileng a gambang
a naglasat iti apuy. Ket ti timekna kasla daranudor ti agdissuor a danum.
16 Ig-iggaman ti makannawan nga imana ti pito a bituen. Rimmuar iti
ngiwatna ti maysa a kampilan a natadem ken dua ti tademna. Makasisirap
ti rupana kas iti raniag ti init iti agmatuon. 17 Idi nakitak, kaslaak la natay
a napasag iti sakaananna. Impatayna kaniak ti makannawan nga imana ket
kinunana: “Dika agbuteng! Siak ti Pangrugian ken ti Paggibusan. 18 Siak
ti sibibiag! Natayak idi, ngem kitaem, sibibiagak iti agnanayon nga awan
inggana. Adda kaniak dagiti tulbek ni Patay ken ti Hades. 19 Isuratmo
ngarud dagiti makitam, dagiti mapaspasamak iti agdama ken iti
masakbayan. 20 “Daytoy ti nalimed a kaipapanan dagiti pito a bituen nga
ig-iggamak ken dagiti pito a pagsilawan a balitok: Dagiti pito a bituen
isuda dagiti angheles iti pito nga iglesia, ket dagiti pito a pagsilawan a
balitok isuda dagiti pito nga iglesia.”
Paltiing 2
1 “Kastoy ti isuratmo iti anghel ti iglesia idiay Efeso: “Daytoy ti mensahe
nga aggapu iti mangig-iggem kadagiti pito a bituen iti makannawan nga
imana ken agpagnapagna iti nagbabaetan dagiti pito a pagsilawan a
balitok: 2 Ammok dagiti aramidmo, dagiti panagbannog ken ti naanus a
panagibturmo. Ammok a dimo maanusan dagiti dakes a tattao. Sinuotmo
dagiti agpampamarang nga apostoles, ket natakkuatam nga ulbodda. 3
Ammok a naanuska. Inturedmo dagiti rigat gapu kaniak ket saanka a
naupay. 4 Ngem daytoy ti diak kayat kenka: saannakon nga ay-ayaten a
kas idi damo. 5 Laglagipem ti kasasaadmo idi sakbay ti pannakatnagmo.
Agbabawika ket agbiagka a kas idi nangrugika a nagkristiano. Ta no
saanka nga agbabawi, umaykonto ikkaten ti pagsilawam iti nakaisaadanna.
6 Ngem adda met naimbag kenka: guraem, kas kaniak, ti ar-aramiden
dagiti Nicolaita. 7 “No adda pannakaawatyo, denggenyo ngarud ti sao ti
Espiritu kadagiti iglesia: “Ti agballigi, ikkakto iti kalintegan a mangan iti
bunga ti kayo ti biag nga adda iti minuyongan ti Dios.” 8 “Kastoy ti
isuratmo iti anghel iti iglesia idiay Esmirna: “Daytoy ti mensahe nga
aggapu iti Pangrugian ken Paggibusan, isu a natay ken nagbiag manen: 9
Ammok dagiti pakariribukam. Ammok met a napanglawka, ngem iti
kinapudnona, nabaknangka! Ammok pay dagiti pammadpadakes kenka
dagiti agkunkuna a Judioda uray no saan met. Maysada a bunggoy nga
agdaydayaw ken ni Satanas. 10 Dika agbuteng kadagiti panagsagaba a
dumtengto kenka. Denggem, suotennaka ti Diablo babaen iti
panangipisokna iti sumagmamano kadakayo iti pagbaludan. Agrigatkayto
iti uneg ti sangapulo nga aldaw. Agtalinaedka ngarud a mapagtalkan uray
pay no isut’ pakatayam ket itedkonto kenka ti biag a kas gunggona ti
balligim. 11 “No adda pannakaawatyo, denggenyo ngarud ti sao ti Espiritu
kadagiti iglesia: “Ti agballigi, malisiannanto ti maikadua nga ipapatay.”
12 “Kastoy ti isuratmo iti anghel ti iglesia idiay Pergamo: “Daytoy ti
mensahe nga aggapu iti addaan iti natadem a kampilan a dua ti tademna:
13 Ammok ti pagnaedam—ti lugar a yan ti trono ni Satanas. Nupay kasta,
nagtalinaedka a napudno kaniak. Dimo tinallikudan ti pammatim kaniak
uray idi tiempo ni Antipas a mapagtalkan a saksik a napapatay iti daydiay
a pagtaengan ni Satanas. 14 Ngem adda diak kayat kenka: adda
sumagmamano kadakayo dita a pasurot ni Balaam. Isu ti nangisuro ken ni
Balak a mangaramid iti pagbasolan dagiti Israelita babaen iti pannanganda
iti taraon a naidaton kadagiti didiosen ken panagaramidda kadagiti
immoralidad. 15 Adda met sumagmamano kadakayo a sumursurot iti
pannursuro dagiti Nicolaita. 16 Agbabawika ngarud kadagiti basbasolmo.
Ta no saan, umayak kenka iti mabiit ket pukawek dagita a tattao babaen iti
kampilan a rummuar iti ngiwatko. 17 “No adda pannakaawatyo,
denggenyo ngarud ti kuna ti Espiritu kadagiti iglesia: “Ti agballigi,
ikkakto iti naidulin a taraon. Ikkakto pay ti tunggal maysa iti puraw a bato
a nakaimalditan ti baro a nagan nga awan ti makaammo malaksid ti
umawat.” 18 “Kastoy ti isuratmo iti anghel ti iglesia idiay Tiatira: “Daytoy
ti mensahe nga aggapu iti Anak ti Dios nga addaan kadagiti mata a
gumilgil-ayab a kasla apuy ken kadagiti saksaka nga agranraniag a kas iti
napasileng a gambang. 19 Ammok dagiti aramidmo, ti ayat ken
pammatim, ti panagserbim ken ti naanus a panagibturmo. Ammok nga ad-
adu ti ar-aramidem ita ngem idi damo. 20 Ngem daytoy ti diak kayat
kenka: palpalugodam ni Jezebel, dayta babai nga agpampamarang a
profeta. Isursuro ken isungsongna dagiti adipenko a makikamalala ken
mangan kadagiti taraon a naidaton kadagiti didiosen. 21 Inikkak iti naan-
anay a panawenna nga agbabawi kadagiti basbasolna ken mangtallikud iti
immoral a panagbiagna, ngem dina kayat ti agbalbaliw. 22 Adtoy,
idalitkonto iti pagiddaan, agraman dagiti nakikamalala kenkuana.
Agsagabadanto iti nakaro malaksid no agbabawida iti kinadakes nga
inaramidda iti sidongna. 23 Papatayekto met dagiti annakna tapno
maammoan dagiti iglesia nga ammok ti panunot ken tarigagay dagiti
tattao. Dusaekto ti tunggal maysa kadakayo, segun ti inaramidyo. 24
“Ngem ti dadduma kadakayo dita Tiatira, diyo sinurot daytoy dakes a
pannursuro. Saanyo a nasursuro ‘ti nauneg a palimed ni Satanas,’ kas kuna
ti dadduma. Kunak kadakayo a dikayton pabaklayan iti sabali nga awit. 25
Ngem masapul a pagtalinaedenyo a natibker ti adda kadakayo agingga iti
yaayko. 26 Ti agballigi nga agtungpal iti pagayatak agingga iti
panungpalan, ikkakto iti pannakabalin a kas iti inawatko ken ni Amak:
Pagturayekto kadagiti nasion 27 tapno iturayanna ida babaen iti baston a
landok ken burburakenna ida a kas iti damili a banga. 28 Itedkonto met
kenkuana ti bituen nga agraniag iti agsapa. 29 “No adda pannakaawatyo,
denggenyo ngarud ti sao ti Espiritu kadagiti iglesia.”
Paltiing 3
1 Ket kinunana kaniak, “Kastoy ti isuratmo iti anghel ti iglesia idiay
Sardis: “Daytoy ti mensahe nga aggapu iti addaan kadagiti pito nga
espiritu ti Dios ken kadagiti pito a bituen: Ammok dagiti aramidmo.
Ammok nga agdindinamag a sibibiagka, ngem ti kinapudnona, nataykan!
2 Isut’ gapuna nga agriingka ket papigsaem ti adda pay kenka sakbay a
matayka a mamimpinsan. Ta masarakak nga adda pay la pagkurangan
dagiti inar-aramidmo iti imatang ti Diosko. 3 Ngarud, laglagipem dagiti
nasursuro ken nangngegmo. Tungpalem ida ket agbabawika kadagiti
basbasolmo. No dika agriing, umayakto kenka a kas iti mannanakaw—
dimonto ammo no ania ti oras nga isasangpetko. 4 “Ngem ti
sumagmamano kadakayo dita Sardis, pinagtalinaedyo a nadalus ti pagan-
anayyo. Makipagnakayto kaniak a sikakawes iti puraw ta maikarikayo. 5
Kastoyto ti pannakakawes ti agballigi, ket diakto punasen ti naganna iti
libro ti biag. Ipaduyakyakkonto ti naganna iti sangoanan ni Amak ken
dagiti anghelesna nga isu ket kukuak. 6 “No adda pannakaawatyo,
denggenyo ngarud ti sao ti Espiritu kadagiti iglesia.” 7 “Kastoy ti isuratmo
iti anghel ti iglesia idiay Filadelfia: “Daytoy ti mensahe ti nasantoan ken
napudno. Ig-iggamanna ti tulbek a kukua idi ni David. No adda ilukatna,
awan ti makairikep, ket no adda rikpanna, awan ti makailukat. Kunana: 8
Ammok dagiti aramidmo. Kitaem, nangikabilak iti sangom iti silulukat a
ruangan nga awan ti makairikep. Ammok a bassit ti pannakabalinmo.
Nupay kasta, tinungpalmo ti pannursurok ket nagtalinaedka a napudno
kaniak. 9 Denggem, no maipanggep iti bunggoy nga agdaydayaw ken ni
Satanas, dagita nga ulbod ken agpamarang a Judioda, ibaonko ida kenka
tapno agrukbabda iti sakaanam ket maammoandanto amin nga ay-
ayatenka. 10 Agsipud ta tinungpalmo ti bilinko, nga anusam nga ibturan ti
panagsagaba, aywanankanto met inton dumteng ti riribuk a pakasuotan ti
amin a tao iti sangalubongan. 11 Umayak iti mabiit. Saluadam ngarud ti
adda kenka tapno awan ti mangagaw iti gunggonam. 12 “Ti agballigi,
pagbalinekto a maysa kadagiti adigi iti templo ti Diosko, ket agyanto
sadiay iti agnanayon. Ikitikitkonto kenkuana ti nagan ti Diosko ken ti
nagan ti siudad ti Diosko, ti baro a Jerusalem a bumabanto manipud langit
ken aggapu iti Diosko. Ikitikitkonto met kenkuana ti baro a naganko. 13
“No adda pannakaawatyo, denggenyo ngarud ti sao ti Espiritu kadagiti
iglesia.” 14 “Kastoy ti isuratmo iti anghel ti iglesia idiay Laodicea:
“Daytoy ti mensahe nga aggapu ken ni Amen, ti matalek ken napudno a
saksi, ti pangrugian ti amin a pinarsua ti Dios: 15 Ammok ti ar-aramidem.
Ammok a saanka a nalamiis wenno napudot. Tarigagayak unay a nalamiis
wenno napudotka koma. 16 Ngem agsipud ta saanka a napudot ket saanka
met a nalamiis, ituprakanto! 17 “Kunam a nabaknang ken narang-ayka ket
adda amin a masapulmo. Ngem dimo ammo a daksanggasat ken
kakaasika. Napanglawka. Lamolamoka. Bulsekka. 18 Ngarud, ibalakadko
kenka a gumatangka kaniak iti balitok a nagugoran iti apuy tapno
bumaknangka. Gumatangka met iti puraw a pagan-anay a pagkawesmo
tapno saan a makita ti nakababain a kinalamolamom. Gumatangka pay iti
agas ta matam tapno makakitaka. 19 Babalawek ken dusaek ti amin nga
ay-ayatek. Agregtaka ngarud ket agbabawika kadagiti basbasolmo. 20
Denggem, addaak nga agtatakder iti ruar ket agtuktuktokak iti ruangan. No
adda makangngeg iti timekko ket luktanna ti ruangan, sumrekakto iti
balayna ket agkalanglangkamto a mangan. 21 “Ti agballigi, ikkakto iti
kalintegan nga agtugaw iti dennak iti tronok, kas kaniak a nagballigi, ket
ita, agtugtugawak iti abay ni Amak iti tronona. 22 “No adda
pannakaawatyo, denggenyo ngarud ti sao ti Espiritu kadagiti iglesia.”
Paltiing 4
1 Kalpasan daytoy, adda manen sabali a parmata a nasaksiak. Nakakitaak
iti silulukat a ruangan sadi langit. Ket nangngegko manen ti timek a kasla
uni ti trumpeta a kunana kaniak: “Umulika ditoy ket ipakitak kenka dagiti
dumteng a mapasamak.” 2 Pagammoan, addaak iti pannakabalin ti
Espiritu ket nakitak sadi langit ti maysa a trono. Adda nakatugaw iti trono.
3 Rumimatrimat ti rupana a kas iti haspe ken karnelia. Iti lawlaw ti trono,
adda bullalayaw a naraniag a kas iti esmeralda. 4 Iti aglikmut ti trono,
adda duapulo ket uppat a sabali a trono a pagtugtugawan ti duapulo ket
uppat a panglakayen a nakakawes iti puraw ken nakakorona iti balitok. 5
Manipud iti trono, agkimatkimat a kagiddan ti agkakapigsa nga uni ken
gurruod. Iti sango ti trono, adda pito a pagsilawan a sumsumged; dagitoy
dagiti pito nga espiritu ti Dios. 6 Adda pay iti sangoanan ti trono ti kasla
baybay a sarming, nalitnaw a kasla kristal. Iti aglikmut ti trono, adda uppat
a sibibiag a parsua a mata amin ti sango ken likudda. 7 Kasla leon ti
umuna a sibibiag a parsua; kasla toro a baka ti maikadua; karuprupa ti tao
ti maikatlo; ket kasla tumaytayab nga agila ti maikapat. 8 Innem ti payak ti
tunggal maysa kadagiti sibibiag a parsua, ket mata amin iti uneg ken ruar
ti payak. Aldaw-rabii nga awan sardengda a mangikankanta: “Santo,
santo, santo, ni Apo Dios a Mannakabalin-amin, Isu nga adda idi, adda ita
ken umayto.” 9 Ikanta dagiti uppat a sibibiag a parsua dagiti kanta ti
dayag, pagdayaw ken pagyaman iti situtugaw iti trono nga agbiag nga
agnanayon nga awan inggana. Bayat ti panagkantada, 10 agrukbab dagiti
duapulo ket uppat a panglakayen iti sangoanan ti trono ket agdaydayawda
iti situtugaw sadiay, isu nga agbiag iti agnanayon nga awan inggana.
Ipurruakda ti koronada iti sangoanan ti trono sada kuna: 11 “Apo ken
Diosmi! Maikarika nga umawat iti dayag, dayaw ken pannakabalin. Ta
pinarsuam dagiti amin a bambanag, ket babaen iti pagayatam, naparsua
ken naikkanda iti biag.”
Paltiing 5
1 Iti kannawan nga ima ti nakatugaw iti trono, nakitak ti maysa a nalukot a
pagbasaan a nasuratan iti agsumbangir ket naserraan iti pito a timbre. 2
Ket nakitak ti maysa a mannakabalin nga anghel a nangipakaammo iti
napigsa a timek: “Siasino ti maikari a mangikkat kadagiti timbre ken
mangukrad iti nalukot a pagbasaan?” 3 Ngem awan sadi langit wenno iti
lubong iti baba wenno iti uneg ti daga ti makalukat ken mangkita iti linaon
ti pagbasaan. 4 Nagsangitak iti nasaem agsipud ta awan ti nasarakan a
maikari a manglukat wenno mangkita iti pagbasaan. 5 Iti kasta, kinuna
kaniak ti maysa kadagiti panglakayen: “Dika agsangit. Kitaem, nagballigi
ti Leon a nagtaud iti tribu ti Juda, ti naindaklan a kaputotan ni David, ket
naikkan iti kalintegan a mangikkat kadagiti pito a timbre ken mangukrad
iti nalukot a pagbasaan.” 6 Kalpasanna, nakitak ti maysa a Kordero nga
agtaktakder iti tengnga ti trono a linikmut dagiti uppat a sibibiag a parsua
ken dagiti panglakayen. Kasla napapatay ti Kordero. Pito ti sarana ken
addaan iti pito a mata nga isu dagiti pito nga espiritu ti Dios nga imbaonna
iti entero a lubong. 7 Napanna innala ti pagbasaan iti makannawan nga
ima ti nakatugaw iti trono. 8 Bayat ti panangalana, nagruknoy dagiti uppat
a sibibiag a parsua ken dagiti duapulo ket uppat a panglakayen iti
sangoanan ti Kordero. Adda arpa ti tunggal maysa ken balitok a malukong
a napno iti insenso nga isu dagiti karkararag dagiti tattao ti Dios. 9
Kinantada ti maysa a baro a kanta: “Maikarika a mangala iti nalukot a
pagbasaan Ken mangikkat kadagiti timbre. Ta napapatayka ket babaen iti
ipapataymo, sinubbotmo dagiti tattao a maipaay iti Dios, Manipud iti
tunggal tribu, pagsasao, nasion ken puli, 10 Pinagbalinmo ida a pagarian
tapno agserbida a kas papadi iti Diostayo; Ket agturaydanto ditoy daga.”
11 Kimmitaak manen, ket nangngegko ti ragup a timek dagiti rinibu ken
riniwriw nga angheles. Linawlawda ti trono, dagiti sibibiag a parsua ken
dagiti panglakayen, 12 ket inkantada iti napigsa: “Maikari ti napapatay a
Kordero, Wen, maikari nga umawat iti pannakabalin, kinabaknang,
kinasirib ken kinapigsa, Dayaw, dayag ken pannakaitan-ok!” 13 Ket
nangngegko nga agkankanta dagiti amin a parsua sadi langit, dagiti adda
ditoy daga, dagiti adda iti uneg ti daga, dagiti adda iti taaw—amin a
parsua iti entero a lubong: “Iti situtugaw iti trono ken iti Kordero, Maited
koma ti tan-ok ken dayaw, dayag ken pannakabalin Iti agnanayon nga
awan inggana!” 14 “Amen,” insungbat dagiti uppat a sibibiag a parsua.
Ket nagparintumeng dagiti panglakayen sada nagdaydayaw.
Paltiing 6
1 Kalpasanna, nakitak nga inikkat ti Kordero ti umuna kadagiti pito a
timbre ket nangngegko ti napigsa a timek a kas iti gurruod ti maysa
kadagiti uppat a sibibiag a parsua a kunana, “Umayka!” 2 Kimmitaak, ket
adda nagparang a puraw a kabalio. Adda bai ti pana ti nakasakay. Naikkan
iti korona ket rimmuar tapno ituloyna ti panagballigina. 3 Inikkat ti
Kordero ti maikadua a timbre, ket nangngegko a kinuna ti maikadua a
sibibiag a parsua, “Umayka!” 4 Rimmuar ti sabali a kabalio a nalabaga ti
kolorna. Naikkan ti nakasakay iti pannakabalin a mangyeg iti gubat ditoy
daga tapno agpipinnatay dagiti tattao. Adda dakkel a kampilan ti naited
kenkuana. 5 Inikkat ti Kordero ti maikatlo a timbre, ket nangngegko a
kinuna ti maikatlo a sibibiag a parsua, “Umayka!” Maysa a nangisit a
kabalio ti nakitak. Adda pagtimbangan nga iggem ti nagsakay. 6
Nangngegko ti maysa a timek a kasla naggapu iti ayan dagiti uppat a
sibibiag a parsua: “Sangkasukat a trigo ti pakaigatangan ti maysa a
denario, ken tallo kasukat a sebada ti pakaigatangan ti maysa a denario.
Ngem dimo dadaelen ti lana ti olibo ken ti arak!” 7 Inikkat ti Kordero ti
maikapat a timbre, ket nangngegko a kinuna ti maikapat a sibibiag a
parsua, “Umayka!” 8 Adda nakitak a kabalio a nabessag ti kolorna. Patay
ti nagan ti nakasakay, ket sumursurot kenkuana ti Hades. Naikkanda iti
pannakabalin a mangituray iti apagkapat a paset ti daga, a pumatay babaen
iti gubat, bisin, sakit ken kadagiti atap nga animal ti daga. 9 Inikkat ti
Kordero ti maikalima a timbre. Nakitak iti sirok ti altar dagiti kararua
dagiti napapatay gapu ta impakaammoda ti sao ti Dios ken napudnoda idi
iti panagsaksida. 10 Impukkawda, “Kangatoan nga Apo, nasantoan ken
napudno! Kasano pay kabayag ti panaguraymi? Kaano ti panangukom ken
panangdusam kadagiti tattao a pimmatay kadakami?” 11 Naikkan ti
tunggal maysa iti puraw a kagay. Naibaga kadakuada nga aginanada pay
bassit agingga a madanon ti naikeddeng a bilang dagiti padada nga adipen
ken kakabsat a mapapatay a kas kadakuada. 12 Inikkat ti Kordero ti
maikanem a timbre. Nagginggined iti napigsa. Ngimmisit ti init a kasla iti
nakersang a nangisit a lupot idinto a limmabbaga ti bulan a kas iti dara. 13
Natinnag ditoy daga dagiti bituen iti tangatang. Kasda la naata a bunga ti
igos a maregreg no agangin iti napigsa. 14 Nagpukaw ti langit a kas iti
pagbasaan a kellaat a nalukot ket nayalis iti ayanda dagiti amin a
bambantay ken purpuro. 15 Naglemmeng dagiti ari ditoy daga, dagiti
agtuturay ken pangulo dagiti soldado, dagiti nabaknang ken nabileg, ken
amin, adipen ken siwawaya. Napanda kadagiti rukib ken sirok dagiti bato
kadagiti bambantay. 16 Kinunada kadagiti bato ken kadagiti bambantay:
“Gaburandakami tapno saanmi a makita ti rupa ti nakatugaw iti trono ken
marikna ti pungtot ti Kordero. 17 Dimtengen ti naindaklan nga aldaw a
panagdissuor ti pungtotda ket awanto ti makalasat.”
Paltiing 7
1 Kalpasanna, nakitak ti uppat nga angheles nga agtaktakder iti uppat a
suli ti daga. Tengtenglenda dagiti uppat nga angin tapno saan nga
agpuyupoy iti rabaw ti daga, iti taaw wenno iti aniaman a puon ti kayo. 2
Nakitak met ti sabali nga anghel nga agpangpangato iti deppaar ti daya
nga iggemna ti timbre ti sibibiag a Dios. Pinukkawanna dagiti uppat nga
angheles a nangtedan ti Dios iti pannakabalin a mangdadael iti daga ken iti
baybay: 3 “Saanyo pay a dadaelen ti daga, ti taaw wenno dagiti kayo;
urayenyo a malpas ti panangmarkami kadagiti muging dagiti adipen ti
Diostayo.” 4 Ket naibaga kaniak a 144,000 ti bilang dagiti naikkan iti
marka ti Dios kadagiti mugingda. Nagtaudda kadagiti sangapulo ket dua a
tribu ti Israel: 5 12,000 manipud iti tribu ti Juda, 12,000 manipud iti tribu
ti Ruben, 12,000 manipud iti tribu ti Gad, 6-8 12,000 manipud iti tribu ti
Aser, 12,000 manipud iti tribu ti Neftali, 12,000 manipud iti tribu ti
Manases, 12,000 manipud iti tribu ti Simeon, 12,000 manipud iti tribu ti
Levi, 12,000 manipud iti tribu ti Isacar, 12,000 manipud iti tribu ti
Zabulon, 12,000 manipud iti tribu ti Jose, 12,000 manipud iti tribu ti
Benjamin. 9 Kalpasan daytoy, nakitak ti nakaad-adu a tattao—awan ti
makabilang iti kaaduda. Naggapuda iti amin a puli, tribu, pagilian ken
pagsasao. Nakatakderda iti sangoanan ti trono ken ti Kordero. Puraw ti
kawesda ken nakaiggemda iti sanga ti palma. 10 “Aggapu ti
pannakaisalakan iti Diostayo nga agtugtugaw iti trono, ken iti Kordero!”
impukkawda. 11 Linikmut dagiti amin nga angheles ti trono, dagiti
panglakayen ken dagiti uppat a sibibiag a parsua. Nagpaklebda iti
sangoanan ti trono ket nagdaydayawda iti Dios. 12 Kinunada, “Amen!
Dayaw, dayag, sirib, panagyaman, tan-ok, pannakabalin ken bileg ti
maipaay iti Diostayo iti agnanayon nga awan inggana! Amen!” 13
Sinaludsod kaniak ti maysa kadagiti panglakayen, “Siasino dagitoy a
tattao a nakakawes iti puraw? Sadino ti naggapuanda?” 14 “Diak ammo,
apo! Sika ti makaammo,” insungbatko. Kinunana kaniak: “Isuda dagiti
nakalasat iti napalalo a pannakaidadanes. Linabaanda dagiti pagan-anayda
ket pinapudawda ida babaen iti dara ti Kordero. 15 Dayta ti gapuna nga
addada iti sangoanan ti trono ti Dios ket aldaw-rabii nga agserserbida
kenkuana iti templona. Aywananto ida ti agtugtugaw iti trono. 16 Pulos a
didanto agbisin wenno mawaw. Saandanton a mapudotan iti init wenno
aniaman a makasinit 17 agsipud ta pastordanton ti Kordero nga adda iti
tengnga ti trono. Iturongnanto ida kadagiti ubbog ti danum a sibibiag.
Punasento ti Dios dagiti amin a luada.”
Paltiing 8
1 Idi ikkaten ti Kordero ti maikapito a timbre, nagturay ti ulimek sadi
langit iti agarup tallopulo a minuto. 2 Kalpasanna, nakitak a naikkan iti
trumpeta ti tunggal maysa kadagiti pito nga angheles a nakatakder iti
sangoanan ti Dios. 3 Simmangpet ti sabali nga anghel nga addaan iti
insensario a balitok, ket napan nagtakder iti sango ti altar. Naikkan iti
nawadwad nga insenso nga inayonna kadagiti kararag dagiti tattao ti Dios
ken idatonna iti balitok nga altar iti sangoanan ti trono. 4 Manipud iti ima
ti anghel a sitatakder iti sangoanan ti Dios, nagpangato ti asuk ti
mapupuoran nga insenso a naikuyog kadagiti kararag dagiti tattao ti Dios.
5 Kalpasanna, innala ti anghel ti insensario, kinargaanna kadagiti beggang
manipud iti altar sana impurruak iti daga. Naggurruod, rimsua ti napigsa
nga arimbangaw, nagkimat ken nagginggined. 6 Nagsagana dagiti pito nga
angheles a mangpuyot kadagiti trumpetada. 7 Pinuyot ti umuna nga anghel
ti trumpetana. Nagtudo iti yelo ken apuy a nalaokan iti dara. Napuoran ti
apagkatlo a paset ti daga, ti apagkatlo dagiti amin a kaykayo ken dagiti
amin a nalangto a ruot. 8 Pinuyot ti maikadua nga anghel ti trumpetana.
Adda sumsumged a kasla dakkel a bantay a naipurruak iti taaw. Nagbalin
a dara ti apagkatlo a paset ti taaw. 9 Natay ti apagkatlo dagiti nabiag a
parsua iti taaw ken nadadael ti apagkatlo dagiti barko. 10 Pinuyot ti
maikatlo nga anghel ti trumpetana. Manipud langit, natnag ti maysa a
dakkel a bituen a sumsumged a kasla pagsilawan, ket nagdisso iti
apagkatlo a paset dagiti karayan ken dagiti ubbog. 11 (“Napait”—daytoy ti
nagan ti bituen.) Pimmait ti apagkatlo a paset dagiti danum, ket natay ti
adu a tattao ta napait ti danum nga ininumda. 12 Pinuyot ti maikapat nga
anghel ti trumpetana. Nadadael ti apagkatlo a paset ti init, ti apagkatlo a
paset ti bulan ken ti apagkatlo a bilang dagiti amin a bituen, isut’ gapuna a
napukaw ti apagkatlo a lawagda. Nagsipnget iti apagkatlo a paset ti aldaw
ken iti apagkatlo a paset ti rabii. 13 Kalpasanna, nakitak ti maysa nga agila
nga agtaytayab iti langit ket nangngegko nga impukkawna: “Nakaal-
alingget! Nakaal-alingget! Nakaal-alinggetto ti pagbanagan dagiti amin a
tattao ditoy rabaw ti daga inton pagunien dagiti tallo nga angheles ti
trumpetada.”
Paltiing 9
1 Pinuyot ti maikalima nga anghel ti trumpetana. Nakitak ti maysa a
bituen a natnag manipud langit a nagdisso ditoy daga, ket naited kenkuana
ti tulbek ti ruangan ti nakaun-uneg a yuyeng. 2 Idi luktanna ti yuyeng,
rimmuar ti asuk a kasla iti asuk a naggapu iti dakkel nga orno. Nagsipnget
ti init ken ti tangatang gapu iti asuk. 3 Manipud iti asuk, nagruar dagiti
dudon ket nagdissoda iti daga. Naikkanda iti pannakabalin a mannilud a
kas iti pannakabalin a naited kadagiti manggagama. 4 Nabilinda a dida
dadaelen dagiti ruot wenno dagiti kayo wenno uray ania a mula. Dagiti
laeng tattao nga awan marka ti timbre ti Dios iti mugingda ti ranggasanda.
5 Saan a napalubosan dagiti dudon a pumatay kadagitoy a tattao, no di ket
parigatenda laeng ida iti las-ud ti lima a bulan. Umasping ti ut-ot iti silud ti
manggagama ti ut-ot ti panangparigatda. 6 Kabayatan dagita nga aldaw,
sapulento dagiti tattao ti patay ngem didanto masarakan. Kayatdanto ti
matay ngem itarayanto ida ni patay. 7 Kasla kabalio a nakasagana a
makigubat dagiti dudon. Adda kasla korona a balitok iti uloda. Kasda la
agruprupa a tao, 8 agbubuok a babai, ken agngipngipen a leon. 9
Naabbongan dagiti barukongda iti kasla kabal a landok. Agkaykay-ab
dagiti payakda ket kasla uni ti karadakad ti adu a lugan a guyguyoden
dagiti kabalio nga agdardaras nga agturong iti paggugubatan. 10 Adda
ipus ken siludda a kas iti manggagama. Adda iti ipusda ti pannakabalin a
mangparigat kadagiti tattao iti las-ud ti lima a bulan. 11 Adda arida a
mangituray kadakuada, ket isu ti anghel a mangbambantay iti nakaun-uneg
a yuyeng. Abaddon ti naganna iti Hebreo, ket Apolion met iti Griego
(kayatna a sawen, “Ti Mangdadael”). 12 Nalpasen ti umuna a
nakabutbuteng a didigra. Dua pay dagiti dumteng. 13 Pinuyot ti maikanem
nga anghel ti trumpetana. Nakangngegak iti timek a naggapu kadagiti suli
ti altar a balitok iti sangoanan ti Dios. 14 Kinunana iti maikanem nga
anghel nga adda trumpetana: “Ruk-atam dagiti uppat nga angheles a
nakagalut iti dakkel a karayan Eufrates.” 15 Naruk-atan dagiti uppat nga
angheles. Naisaganada a mangpatay iti apagkatlo a bilang ti amin a tattao
iti daytoy met la nga oras, aldaw, bulan ken tawen. 16 Naibaga kaniak ti
bilang dagiti nagkabalio a bunggoy: 200 a milion. 17 Ket nakitak iti
parmatak dagiti kabalio ken dagiti nakasakay a nakakabal iti kasla kolor ti
apuy, asul a kasla kolor ti safiro ken amarillo a kasla kolor ti asufre. Kasla
ulo ti leon ti ulo dagiti kabalio. Agipugpugsoda iti apuy, asuk ken asufre.
18 Natay ti apagkatlo dagiti amin a tattao babaen kadagitoy a didigra: ti
apuy, ti asuk ken ti asufre nga aggapu iti ngiwat dagiti kabalio. 19 Adda
pannakabalin iti ngiwatda, kasta met iti ipusda. Kasla uleg nga addaan iti
ulo dagiti ipusda, ket dagitoy ti pangparigatda kadagiti tattao. 20 Saan a
nagbabawi dagiti tattao a nakalasat kadagitoy a didigra. Dida insardeng ti
panagdaydayawda kadagiti demonio ken kadagiti didiosen nga
inaramidda—dagiti ladawan a balitok, pirak, bronse, bato ken kayo a di
makakita, makangngeg wenno makapagna. 21 Saanda met a nagbabawi iti
panagpappapatayda, panagan-anitoda, pannakikamkamalalada ken
panagtaktakawda.
Paltiing 10
1 Kalpasanna, nakitak ti sabali a mannakabalin nga anghel a bumabbaba
manipud langit. Nabungon iti ulep ket adda bullalayaw iti ngatoen ti
ulona. Naraniag ti rupana a kas iti karaniag ti init ket kasla adigi nga apuy
dagiti sakana. 2 Adda iggemna a silulukat a bassit a nalukot a pagbasaan.
Imbaddekna ti makannawan a sakana iti taaw ket ti makannigid, iti daga. 3
Nagpukkaw ket kasla ungor ti adu a leon ti timekna. Nasungbatan iti
dulluog dagiti pito a gurruod. 4 Idi malpas ti dulluog, agsuratak koman,
ngem nangngegko ti maysa a timek a naggapu sadi langit. “Ilimedmo ti
imbaga dagiti pito a gurruod,” kinunana. “Dimo isurat.” 5 Ket ingngato ti
anghel a nakitak nga agtaktakder iti taaw ken iti daga ti makannawan nga
imana idiay langit. 6 Nagsapata iti nagan ti Dios a sibibiag nga agnanayon
nga awan inggana, isu a namarsua iti langit, daga, taaw ken amin a
linaonda. “Saanen a maitantan,” kinunana. 7 “Inton puyoten ti maikapito
nga anghel ti trumpetana, ibanagton ti Dios ti nalimed a panggepna kas
impakaammona idi kadagiti adipenna a profeta.” 8 Nagsao manen kaniak
ti timek a nangngegko a naggapu sadi langit. Kinunana, “Inka alaen ti
silulukat a pagbasaan iti ima ti anghel nga agtaktakder iti baybay ken iti
daga.” 9 Immasidegak iti anghel ket dinawatko nga itedna kaniak ti
nalukot a pagbasaan. “Alaem ket kanem,” kinunana. “Nasam-itto a kasla
diro dita ngiwatmo ngem napaitto iti tianmo.” 10 Innalak ti pagbasaan iti
ima ti anghel ket kinnanko. Nasam-it a kas diro iti ngiwatko, ngem idi
matilmonkon, napait iti tianko. 11 Ket naibaga kaniak, “Masapul nga
ipakaammom manen ti mensahe ti Dios maipapan kadagiti tattao iti adu a
pagilian, puli, pagsasao ken ar-ari.”
Paltiing 11
1 Naikkanak iti pagrukod a kasla baston, ket naibaga kaniak: “Inka
rukoden ti templo ti Dios ken ti altar, ken bilangem dagiti agdaydayaw
sadiay. 2 Ngem dimo rukrukoden ti akinruar a paraangan ti templo
agsipud ta naited daytoy kadagiti pagilian—baddebaddekandanto ti
Nasantoan a Siudad iti las-ud ti tallo ket gudua a tawen. 3 Nupay kasta,
ikkakto ti pannakabalin dagiti dua a saksik a nakakawes iti nakersang a
lupot ket ipakaammodanto ti mensahe ti Dios iti uneg ti 1,260 nga aldaw.”
4 Dagiti dua a saksi isuda dagiti dua a puon nga olibo ken dagiti dua a
pagsilawan iti sangoanan ti Apo ti entero a daga. 5 No adda mangranggas
kadakuada, rummuar ti apuy iti ngiwatda ket dadaelenda dagiti kabusorda.
Kasta ti pannakapapatay ti siasinoman nga agpanggep a mangranggas
kadakuada. 6 Adda pannakabalinda a mangirikep iti langit tapno saan nga
agtudo bayat ti panangipakaammoda iti mensahe ti Dios. Adda met
pannakabalinda a mamagbalin a dara kadagiti ubbog. Adda pay
pannakabalinda a mangyeg iti amin a kita ti didigra iti daga tunggal
kayatda nga aramiden ti kasta. 7 Inton maipakaammo dagiti dua a saksi ti
mensaheda, rummuarto ti narungsot nga animal iti nakaun-uneg a yuyeng
tapno gubatenna ida. Parmeken ken papatayennanto ida. 8 Maiwalangto
dagiti bangkayda iti kangrunaan a kalsada ti dakkel a siudad. Sodoma
wenno Egipto ti naespirituan a naganna. Ditoy met a lugar ti nakailansaan
ti Apoda iti krus. 9 Iti uneg ti tallo ket gudua nga aldaw, buybuyaento
dagiti tattao iti amin a nasion, tribu, pagsasao ken puli dagiti bangkayda,
ket didanto ipalubos a maitanemda. 10 Maragsakanto dagiti tattao ditoy
daga gapu iti ipapatay dagitoy dua. Agrarambak ken agririnnegalodanto
agsipud ta natayen dagiti dua a profeta a nangyeg iti adu a panagsagaba iti
sangkataoan. 11 Ngem kalpasan ti tallo ket gudua nga aldaw, pinagungar
ida ti Dios ket timmakderda. Kasta unay ti buteng dagiti nakaimatang
kadakuada. 12 Kalpasanna, nangngeg dagiti dua a profeta ti maysa a
napigsa a timek a naggapu sadi langit. “Umulikayo ditoy!” kinunana
kadakuada. Ket bayat ti panangkita kadakuada dagiti kabusorda,
naipangatoda sadi langit babaen iti maysa nga ulep. 13 Iti dayta met la a
kanito, nagginggined iti napigsa. Nadadael ti apagkapullo a paset ti siudad
ket 7,000 a tattao ti natay. Nagbuteng dagiti tattao a nabati ket
nagdaydayawda iti Dios sadi langit. 14 Nakalabasen ti maikadua a
nakabutbuteng a didigra. Ngem kitaem, umayen ti maikatlo. 15 Pinuyot ti
maikapito nga anghel ti trumpetana. Adda dagiti napipigsa a timek a
naggapu sadi langit a kunkunada, “Naiteden iti Apotayo ken iti Cristona ti
pagarian ti lubong, ket agturayto iti agnanayon nga awan inggana!” 16
Nagpakleb dagiti duapulo ket uppat a panglakayen a situtugaw iti tronoda
iti sangoanan ti Dios ket nagdaydayawda kenkuana 17 a kunkunada: “Apo
Dios a Mannakabalin-amin, Dioska ita ken Dioska idi: Agyamankami ta
inaramatmo ti dakkel a pannakabalinmo Ket inrugimon ti agturay! 18
Nakaunget dagiti pagano, Ta dimtengen ti tiempo ti pungtotmo, Ken ti
pannakaukom dagiti natay. Tiempon a gunggonaam dagiti profeta nga
adipenmo, Kadagiti amin a tattaom, ken amin nga agbuteng kenka, Natan-
ok man ken nanumo, Tiempon a dadaelem dagiti nangparigat iti daga!” 19
Nalukatan ti templo ti Dios sadi langit, ket nakitak ti Lakasa ti Tulagna iti
uneg. Kalpasanna, nagkimat, adda napigsa nga arimbangaw, naggurruod,
nagginggined ken nagtudo iti nakaad-adu nga yelo.
Paltiing 12
1 Nagparang iti langit ti sabali a nakaskasdaaw a pagilasinan. Adda babai
a nagkawes iti init, ken agtugtugaw a naisaad dagiti dapanna iti bulan: iti
ulona adda korona a binukel ti sangapulo ket dua a bituen. 2 Dandani
agpasngay ket agik-ikkis iti sakit ken rigatna nga agpasikal. 3 Sabali pay a
nakaskasdaaw a pagilasinan ti nagparang iti langit: Adda dakkel a dragon
a nalabaga a pito ti ulona ken sangapulo ti sarana. Adda korona ti tunggal
ulo. 4 Babaen iti ipusna, inaprasna ti apagkatlo dagiti bituen iti langit sana
intappuak ida iti daga. Nagtakder ti dragon iti sangoanan ti babai nga
agpaspasikal tapno alun-onenna ti ubing apaman a mayanak. 5 Ket
impasngay ti babai ti maysa a lalaki a mangiturayto iti amin a nasion
babaen iti sarukod a landok. Ngem narabsut ti maladaga ket naipan iti
Dios a situtugaw iti tronona. 6 Nagkamang ti babai iti let-ang, iti maysa a
lugar nga insagana ti Dios a pakataripatoanna iti uneg ti 1,260 nga aldaw.
7 Kalpasanna, bimtak ti gubat sadi langit. Rinaut ni Miguel ken dagiti
anghelesna ti dragon. Nakirupak ti dragon ken dagiti anghelesna. 8 Ngem
naabak ti dragon ken dagiti anghelesna, ket saandan a napalubosan nga
agyan sadi langit. 9 Naitappuak ti dakkel a dragon, daydi uleg idi ugma a
managan Diablo wenno Satanas, a mangal-allilaw iti entero a lubong.
Naitappuak ditoy daga agraman dagiti anghelesna. 10 Kalpasanna,
nangngegko ti maysa a napigsa a timek sadi langit. Kinunana, “Dimtengen
ti panangisalakan ti Dios, ti pannakabalinna ken ti pagarianna! Ipabigbigen
ti Cristona ti turayna iti sangalubongan. Ta napagtalawen sadi langit ti
mangidardarum kadagiti kakabsattayo iti pammati iti aldaw ken rabii iti
sangoanan ti Dios. 11 Pinarmek dagiti kakabsattayo babaen iti dara ti
Kordero ken iti panangsaksida iti pudno. Siaayatda a mangipatli iti biagda
gapu iti pammatida. 12 Agragsakkayo ngarud, dakayo nga agnaed sadi
langit. Ngem asikayo pay, dakayo nga agnaed iti daga ken taaw!
Bimmaban kadakayo ti Diablo a kasta unay ti pungtotna, ta ammona a
bassit laengen ti natda a tiempona.” 13 Idi nadlaw ti dragon ti
pannakaitappuakna ditoy daga, kinamatkamatna daydi babai a
nangipasngay iti ubing a lalaki. 14 Ngem naikkan ti babai iti dua a payak
ti dakkel nga agila tapno makatayab a mapan iti lugarna idiay let-ang.
Sadiayto ti pakataripatoanna iti uneg ti tallo ket gudua a tawen tapno
malisianna ti pungtot ti uleg. 15 Gapu iti daytoy, nangipugso ti uleg iti
danum a nagbalin a kasla karayan tapno mayanud ti babai. 16 Ngem
timmulong ti daga iti babai. Nagrengngat ket inigupna ti danum nga
impugso ti dragon. 17 Gapu iti pungtot ti dragon, napanna ginubat dagiti
nabati nga annak ti babai, dagiti amin nga agtungtungpal kadagiti bilbilin
ti Dios ken mangsaksaksi iti pudno nga impaltiing ni Jesus. 18 Ket
nagtakder ti dragon iti igid ti baybay.
Paltiing 13
1 Nakitak ti maysa a narungsot nga animal a rumrumkuas iti taaw. Pito ti
ulona ket sangapulo met ti sarana. Nagkorona ti tunggal sara ket iti
tunggal ulo, adda dagiti naisurat a nagan a nanglais iti Dios. 2 Kasla
leopardo ti nakitak nga animal, kasla agsaksaka nga oso, ken kasla
agngiwngiwat a leon. Inted kenkuana ti dragon ti bukodna a pannakabalin,
ti trono ken ti naindaklan a turayna. 3 Kasla nasugat ti maysa nga ulo ti
animal. Nagistayanna impatay daytoy ngem immimbag met laeng.
Nasdaaw dagiti amin a tattao iti lubong iti napasamak ket simmurotda iti
animal. 4 Nagdaydayaw dagiti amin a tattao iti dragon gapu ta intedna ti
turayna iti animal. Nagdaydayawda met iti animal. “Siasino ti kas iti
narungsot nga animal?” kinunada. “Siasino ti makabael a makirupak
kenkuana?” 5 Napalubosan ti narungsot nga animal nga agsalawasaw,
agsao iti maibusor iti Dios, ken agturay iti uneg ti 42 a bulan. 6
Rinugianna ti agsao iti maibusor iti Dios, iti nagan ti Dios, iti balay ti Dios
ken amin nga agnaed sadi langit. 7 Napalubosan a manggubat ken
mangparmek kadagiti tattao ti Dios, ket naikkan iti kalintegan a
mangituray kadagiti tattao iti amin a tribu, pagilian, pagsasao ken puli. 8
Agdaydayawto kenkuana dagiti amin a tattao iti rabaw ti daga, malaksid
dagiti naisurat ti naganda iti libro ti biag sakbay a naparsua ti lubong.
Daytoy a libro kukua ti napapatay a Kordero. 9 “Dumngeg ngarud ti
siasinoman nga adda pannakaawatna! 10 Siasinoman a nairanta a matiliw,
matiliwto. Ti nairanta a mapapatay iti kampilan, mapapatayto iti kampilan.
Daytoy ti pakasapulan iti panagibtur ken pammati iti biang dagiti tattao ti
Dios.” 11 Nakakitaak manen iti sabali a narungsot nga animal a rimmuar
iti daga. Dua ti sarana a kasla sara ti karnero, ngem kasla agsasao a
dragon. 12 Inaramatna ti amin a turay ti immuna a narungsot nga animal.
Pinilitna ti daga ken dagiti amin nga agnanaed ditoy nga agdaydayawda iti
umuna a narungsot nga animal a naimbaganen ti sugat a dandanina
impatay. 13 Nagiparang kadagiti nakaskasdaaw a pagilasinan ti maikadua
a narungsot nga animal. Iti imatang ti amin, pinagtinnagna ditoy daga ti
apuy manipud langit. 14 Inallilawna amin a tattao nga agnanaed ditoy
daga babaen kadagiti pagilasinan a naipalubos nga iparangna iti imatang ti
umuna a narungsot nga animal. Imbaga ti narungsot nga animal kadagiti
tattao ditoy lubong a mangaramidda iti ladawan a pammadayaw iti
narungsot nga animal a nasugat iti kampilan ngem nagbiag. 15
Napalubosan ti maikadua a narungsot nga animal a mangted biag iti
ladawan ti immuna, tapno makasao ti ladawan ken mabalinna a patayen
dagiti amin a saan nga agdaydayaw kenkuana. 16 Pinilit ti narungsot nga
animal dagiti amin a tattao, nanumo ken natan-ok, nabaknang ken
napanglaw, tagabu ken siwawayawaya, a mamarkaan iti makannawan nga
ima wenno iti mugingda. 17 Awan ti makapaglako wenno makapaggatang
no saan naimarka kenkuana ti nagan ti animal wenno ti numero a
kaibatogan ti naganna. 18 Kasapulan ditoy ti kinasirib. Mabalin a
maammoan ti masirib ti kaipapanan ti numero ti animal gapu ta
kaibatogan daytoy ti nagan ti lalaki. Ti numero ket 666.
Paltiing 14
1 Nakitak ti Kordero nga agtaktakder idiay Bantay Sion. Kaduana ti
144,000 a tattao a nasuratan ti mugingda iti nagan ti Kordero ken iti nagan
ti Amana. 2 Manipud sadi langit, adda nangngegko a timek a kasla
daranudor ti dissuor ti danum ken napigsa a gurruod. Immaweng a kasla
musika nga agtaud kadagiti matoktokar nga arpa. 3 Nakasango dagiti
144,000 iti trono, kadagiti uppat a sibibiag a parsua ken kadagiti
panglakayen. Agkankantada iti baro a kanta nga awan ti makasursuro
malaksid laeng kadakuada a nasubbot ditoy daga. 4 Isuda dagiti saan a
natulawan babaen kadagiti babbai, ta nadalusda. Sumursurotda iti Kordero
iti sadinoman a papananna. Isuda dagiti nasubbot iti sangkataoan ken
dagiti umuna a maidaton iti Dios ken iti Kordero. 5 Pulos a saanda a
nagulbod. Awan mulitda. 6 Kalpasanna, nakitak ti sabali nga anghel nga
agtaytayab iti tangatang. Adda kenkuana ti agnanayon a mensahe ti
Naimbag a Damag nga ipakaammona kadagiti agnaed ditoy rabaw ti daga,
iti amin a puli, tribu, pagsasao ken pagilian. 7 “Agbutengkay iti Dios,”
impukkawna, “ket agdaydayawkayo iti kinatan-okna! Ta dimtengen ti
tiempo a panangukomna. Agdaydayawkayo iti Dios a namarsua iti langit,
daga, taaw ken kadagiti ubbog.” 8 Simmaruno ti maikadua nga anghel ket
kinunana, “Natnagen ti Babilonia! Wen, natnagen ti agdindinamag a
siudad! Pinainumna dagiti amin a tattao iti arak—ti naingel nga arak ti
kinaderrepna.” 9 Simmaruno ti maikatlo nga anghel a nangipukkaw,
“Dagiti agdaydayaw iti narungsot nga animal ken iti ladawanna, ken
umawat iti marka iti muging wenno imana, 10 inumendanto a mismo ti
arak ti napalalo a pungtot ti Dios, ti arak nga imbukbokna nga awan
lalaokna iti kopa ti pungtotna! Matutuokdanto iti apuy ken asufre iti
sangoanan dagiti nasantoan nga angheles ken ti Kordero. 11 Agnanayon
nga awan inggana ti panagpangato ti apuy a mangparparigat kadakuada.
Aldaw ken rabii nga awan inana dagiti nagdaydayaw iti narungsot nga
animal ken iti ladawanna, ken dagiti namarkaan iti naganna.” 12 Daytoy ti
pakasapulan iti panagibtur dagiti tattao ti Dios, dagiti agtulnog kadagiti
bilin ti Dios ken dagiti agtalinaed iti pammati ken ni Jesus. 13 Kalpasanna,
nakangngegak iti timek a naggapu sadi langit. Kinunana kaniak, “Isuratmo
daytoy: Manipud ita, nagasat dagiti matay iti panagserbida iti Apo.”
“Wen, nagasat,” kuna ti Espiritu. “Makainanadan kalpasan ti nadagsen a
trabahoda ta kumuykuyog kadakuada ti bunga ti panagserbida.” 14
Kalpasanna, adda nakitak a puraw nga ulep a pagtugtugawan ti maysa a
parsua nga umas-asping iti anak ti tao. Adda korona a balitok iti ulona ken
nakaiggem iti natadem a kumpay. 15 Sabali pay nga anghel ti rimmuar iti
templo ket impukkawna iti agtutugaw iti ulep, “Aramatem ti kumpaymo ta
aggapaska, ta dimtengen ti tiempo. Mabalinen ti agani iti daga!” 16
Pinagparaspas ngarud ti nakatugaw iti ulep ti kumpayna ket nagapas ti apit
ti daga. 17 Adda manen sabali nga anghel a nakitak a rimmuar iti templo
sadi langit. Nakaiggem met iti natadem a kumpay. 18 Adda pay sabali nga
anghel a nakitak a rimmuar iti altar. Isu ti agay-aywan iti apuy.
“Aramatem ti kumpaymo,” impukkawna iti anghel a nakaiggem iti
kumpay. “Burasem dagiti ubas iti daga, ta naluomdan!” 19 Iti kasta,
pinagparaspas ti anghel ti kumpayna, binurasna dagiti bunga ti ubas, ket
impurruakna dagitoy iti dakkel a pagpespesan ti napalalo a pungtot ti Dios.
20 Napespes dagiti ubas iti ruar ti siudad, ket manipud iti pagpespesan,
nagayus ti dara a dimmanon iti 320 a kilometro ti kaatiddog ken lima a
kadapan ti kaadalem.
Paltiing 15
1 Nakitak sadi langit ti sabali a naindaklan a pagilasinan, maysa a
nakaskasdaaw a buya. Pito nga angheles nga addaan kadagiti pito a
didigra. Dagitoy dagiti maudi a pakatungpalan ti napalalo a pungtot ti
Dios. 2 Ket nakitak ti kasla taaw a kristal a gumilgil-ayab. Nakitak pay
dagiti nangparmek iti narungsot nga animal ken iti ladawanna, agraman iti
animal a numero ti kaibatogan ti naganna. Agtatakderda iti igid ti taaw a
kristal; ig-iggamanda dagiti arpa nga inted ti Dios kadakuada. 3 Ket
kankantaenda ti kanta ni Moises nga adipen ti Dios, ken ti kanta ti
Kordero: “Apo Dios a Mannakabalin-amin Natan-ok ken nakaskasdaaw
dagiti aramidmo! Ari dagiti pagilian. Nalinteg ken napudno dagiti
dalanmo! 4 Siasino ti saan nga agbuteng kenka, Apo? Siasino ti saan a
mangitan-ok iti naganmo? Agsipud ta siksika laeng ti nasantoan. Umayto
dagiti amin a pagilian Ket agdaydayawda iti sangoanam, Ta maimatangan
ti amin dagiti nalinteg nga aramidmo.” 5 Kalpasan daytoy, nakitak a
naluktan ti templo sadi langit. Adda iti unegna ti tolda ti pammaneknek. 6
Rimmuar iti templo dagiti pito nga angheles nga addaan kadagiti pito a
didigra. Nakakawesda iti nadalus ken narangrang a linen a lupot ket adda
balitok a banda a naiputipot iti barukongda. 7 Maysa kadagiti uppat a
sibibiag a parsua ti nangted kadagiti pito nga angheles iti pito a malukong
a balitok. Napno dagitoy iti napalalo a pungtot ti Dios a sibibiag iti
agnanayon nga awan inggana. 8 Napno ti templo iti asuk a naggapu iti
dayag ken pannakabalin ti Dios. Awan ti makastrek iti templo agingga a di
aggibus dagiti pito a didigra nga inyeg dagiti pito nga angheles.
Paltiing 16
1 Manipud iti templo, nakangngegak iti napigsa a timek a mangbilbilin
kadagiti pito nga angheles: “Inkay ibuyat iti daga dagiti linaon dagiti pito a
malukong ti napalalo a pungtot ti Dios.” 2 Napan imbuyat ti umuna nga
anghel ti linaon ti malukongna iti daga. Gapu iti daytoy, nagtaud dagiti
nakabutbuteng ken naut-ot a gaddil kadagiti tattao nga addaan iti marka ti
narungsot nga animal, ken kadagiti nagdaydayaw iti ladawanna. 3 Imbuyat
ti maikadua nga anghel ti linaon ti malukongna iti taaw. Nagbalin ti
danum a kasla dara ti natay a tao ket natay dagiti amin a sibibiag a parsua
iti taaw. 4 Imbuyat met ti maikatlo nga anghel ti malukongna kadagiti
karayan ken ubbog, ket nagbalinda met a dara. 5 Nangngegko ti kuna ti
anghel a mangay-aywan iti danum: “Nalinteg ti panangukommo, O
Nasantoan, Sika nga adda ita ken sika nga adda idi; 6 Imparukpokda ti
dara dagiti tattao ti Dios, Ken ti dara dagiti profeta, Isut’ gapuna a
pinainummo ida iti dara. Lak-amenda ti kaikarianda a dusa.” 7
Nangngegko ti timek a naggapu iti altar: “Apo Dios a Mannakabalin-amin,
awan duadua a napudno ken nalinteg dagiti panangukommo!” 8
Kalpasanna, imbuyat ti maikapat nga anghel ti malukongna iti init, ket
napalubosan a mangpuor kadagiti tattao. 9 Mapupuoran la ngaruden dagiti
tattao, ilunlunodda pay laeng ti nagan ti Dios nga adda pannakabalinna
kadagitoy a didigra idinto nga agbabawida koma kadagiti basbasolda ket
agdaydayawda iti dayagna. 10 Imbuyat met ti maikalima nga anghel ti
malukongna iti trono ti narungsot nga animal. Nagsipnget ti entero a
pagarian ti animal. Kinagat dagiti tattao dagiti bibigda gapu iti rigat. 11
Inlunodda ti Dios sadi langit gapu kadagiti ut-ot ken gaddilda. Ngem
saanda a nagbabawi kadagiti dakes nga aramidda. 12 Imbuyat ti maikanem
nga anghel ti malukongna iti dakkel a karayan Eufrates. Namagaan ti
karayan tapno adda pagnaan dagiti ari nga aggapu iti daya. 13 Ket
nakakitaak iti tallo a narugit nga espiritu a kasla tukak a rumrummuar
kadagiti ngiwat ti dragon, ti narungsot nga animal ken ti sinan-profeta. 14
Isuda dagiti espiritu ti demonio nga agiparparang iti pagilasinan. Mapan
dagiti tallo nga espiritu kadagiti ari iti sangalubongan tapno ummongenda
ida a makigubat inton dumteng ti naindaklan nga aldaw ti Mannakabalin-
amin a Dios. 15 “Denggenyo, umayak a kasla mannanakaw! Nagasat ti tao
a siririing ken di manguksob iti pagan-anayna tapno saan a lamolamo a
magna ken saan a mabain kadagiti tattao.” 16 Ket inummong dagiti
espiritu dagiti ar-ari sada impan ida iti lugar a maaw-awagan Armagedon
iti pagsasao a Hebreo. 17 Kalpasanna, imbuyat ti maikapito nga anghel ti
malukongna iti angin. Adda napigsa a timek a naggapu iti trono iti templo.
“Nalpasen!” kinunana. 18 Nagkimatkimat, rimkuas dagiti dulluog ken
gurruod ken nagginggined iti napigsa. Daytoy ti kapigsaan a ginggined
manipud pannakaparsua ti tao. Wen, nakapigpigsa! 19 Nadadael a
nagkatlo ti dakkel a siudad, ket narba dagiti siudad iti amin a pagilian.
Saan a nakalisi ti agdindinamag a Babilonia iti pannusa ti Dios;
impainumna kenkuana ti arak iti kopana—ti arak ti nakaam-amak a
pungtotna. 20 Limned amin a purpuro ken bambantay. 21 Manipud langit,
nagtudo iti dadakkel nga yelo—aglimapulo a kilo ti dagsen ti tunggal
maysa—ket natupakan dagiti tattao. Inlunod dagiti tattao ti Dios gapu iti
daytoy a didigra, ta nakabutbuteng unay.
Paltiing 17
1 Immasideg kaniak ti maysa kadagiti pito nga angheles nga addaan iti
pito a malukong ket kinunana: “Umayka, ket ipakitak kenka ti
pannakadusa ti reyna ti immoralidad, dayta agdindinamag a siudad a
nabangon iti asideg dagiti adu a karayan. 2 Nakikamalala kenkuana dagiti
ari iti daga, ket nabartek dagiti tattao iti sangalubongan iti arak ti
kinaderrepna.” 3 Nariknak nga addaak iti pannakabalin ti Espiritu ket
impannak ti anghel iti let-ang. Nakitak sadiay ti maysa a babai a
nakasakay iti narungsot nga animal a nalabaga a nasuratan ti entero a
bagina kadagiti agkakadakes a nagan a maibusor iti Dios. Adda pito nga
ulo ken sangapulo a sarana. 4 Kolor ube ken nalabaga ti pagan-anay ti
babai. Rumimatrimat dagiti alahasna a balitok, agkakapateg a bato ken
perlas. Nakaiggem iti kopa a balitok a napno iti agkakaalas ken
agkakarugit a banag a gapuanan ti kinaimmoralna. 5 Naisurat iti mugingna
ti nagan nga adda nalimed a kaipapananna: “Ti Agdindinamag a
Babilonia, ina dagiti dakes a babbai ken amin a kinaderrep ditoy lubong.”
6 Ket nakitak a nabartek ti babai iti dara dagiti tattao ti Dios ken iti dara
dagiti martir—dagiti napapatay idi gapu iti kinapudnoda ken ni Jesus.
Kasta unay siddaawko a nakakita iti babai. 7 “Apay a masdaawka?”
sinaludsod ti anghel kaniak. “Ibagak kenka ti nalimed a kaipapanan ti
babai ken ti nagsakayanna a narungsot nga animal nga adda pito nga ulona
ken sangapulo a sarana. 8 Sibibiag idi ti nakitam nga animal ngem ita,
natayen. Dandani rummuaren iti nakaun-uneg a yuyeng ket agturong iti
pannakadadael. Dagiti tattao nga agbibiag iti daga a saan a naisurat ti
naganda iti libro ti biag sakbay ti pannakaparsua ti lubong, masdaawdanto
a makakita iti narungsot nga animal. Sibibiag idi ket ita, natayen, ngem
agparangto manen. 9 “Daytoy ti pakasapulan iti kinasirib ken
pannakaawat. Dagiti pito nga ulo isuda ti pito a turod a pagtugtugawan ti
babai. Iladawanda ti pito nga ari: 10 Naparmeken ti lima kadakuada,
agturturay pay laeng ti maysa, ket di pay immay ti maysa. Inton umay,
apagbiitto laeng ti panagturayna. 11 Ket ti narungsot nga animal a sibibiag
idi ngem ita natayen, isu ti maikawalo nga ari a maibilang kadagiti pito—
agturongen iti pannakadadael. 12 “Dagiti sangapulo a sara a nakitam,
isuda dagiti sangapulo nga ari a di pay nagturay, ngem agturaydanto a
kaduada ti narungsot nga animal iti uneg ti maysa nga oras. 13 Maymaysa
ti panggep dagitoy a sangapulo, ket itedda ti pannakabalin ken turayda iti
narungsot nga animal. 14 Gubatendanto ti Kordero, ngem parmekento ida
ti Kordero ken dagiti naayaban, napili ken mapagtalkan a pasurotna
agsipud ta isu ti Apo dagiti appo ken Ari dagiti ar-ari.” 15 Kinuna pay ti
anghel kaniak: “Dagiti nakitam a danum a pagtugtugawan ti immoral a
babai, isuda dagiti adu a tattao iti amin a puli ken pagilian. 16 Guraento
dagiti nakitam a sangapulo a sara ken ti narungsot nga animal ti immoral a
babai. Agawendanto amin a sanikuana sada panawan a lamolamo.
Kanendanto ti lasagna ket puorandanto ti nabati. 17 Tinignay ida ti Dios
tapno sangsangkamaysada a mangibanag iti panggepna babaen iti
pannangtedda iti turayda iti narungsot nga animal agingga iti
pannakatungpal dagiti sao ti Dios. 18 “Ti nakitam a babai, isu ti dakkel a
siudad a mangituray kadagiti ar-ari iti daga.”
Paltiing 18
1 Kalpasanna, nakitak ti sabali nga anghel a bumabbaba manipud langit.
Adda dakkel a turayna ket rinaniagan ti dayagna ti entero a daga. 2
“Natnagen!” impukkawna. “Natnagen ti Babilonia nga agdindinamag a
siudad! Taeng laengen dagiti demonio ken dakes nga espiritu.
Pagaponanen ti amin a kita ti agkakarugit ken nakarimrimon a tumatayab.
3 Ta pinainumna dagiti amin a pagilian iti naingel nga arak ti
kinaderrepna. Nakikamalala kenkuana dagiti ar-ari iti daga, ket
bimmaknang dagiti agtagtagilako ditoy lubong gapu iti aglablabes a
kinaderrepna.” 4 Nangngegko ti sabali pay a timek a naggapu sadi langit a
kunana: “Adaywanyo, rummuarkayo kenkuana, tattaok! Saankayo a
makiraman kadagiti basbasolna, tapno diyo baklayen met ti
pannakadusana! 5 Ta tumukno sadi langit ti kaadu ti basolna, Ket dinto
malipatan ti Dios ti kinadakesna. 6 Ipalak-amyo kenkuana ti inaramidna
kadakayo. Ibalesyo iti mamindua ti impaayna. Punnoenyo ti kopana iti
inumen a napapait ngem ti insaganana kadakayo. 7 No kasano ti
kinapasindayag ken kinabarayuboyna, Kasta met ti rigat ken ladingit nga
ipalak-amyo kenkuana. Ta kanayon nga ibagbagana iti bagina: ‘Naisaadak
a reyna, saanak a maysa a balo. Diakto aglak-am iti ladingit uray kaano!’ 8
Gapu iti daytoy, aggigiddan nga agdissuor kenkuana dagiti didigra iti uneg
ti maysa nga aldaw, Angol, ladingit ken bisin. Ket mapuoranto agingga a
dumapu, ta mannakabalin ni Apo Dios a mangukom kenkuana.” 9
Mapuoranto ti siudad ket agdung-aw ken agsasangitto dagiti ar-ari a
nakikamalala ken nakiraman iti kinaderrepna inton makitada ti asuk ti
apuy a mangikisap kenkuana. 10 Agtakderdanto iti adayo agsipud ta
mabutengda a mairaman iti pannakadusana. Kunadanto: “Nakabutbuteng!
Iti uneg laeng ti maysa nga oras, nalpasen ti pannakadusa ti agdindinamag
a siudad ti Babilonia!” 11 Sangitan ken dung-awanto met dagiti
agtagtagilako ditoy daga ta awanen ti gumatang kadagiti tagilakoda. 12
Awanen ti gumatang kadagiti balitok, pirak, agkakapateg a bato ken
perlasda; kadagiti linen, ube, seda ken nalabaga a lupot; kadagiti amin nga
agkakabanglo a kayo ken amin a kita ti alikamen a naaramid iti marfil ken
agkakangina a kayo, bronse, landok ken marmol; 13 ken kadagiti kanela,
rekado, insenso, mirra ken olibano; kadagiti arak ken lana, arina ken trigo;
kadagiti baka ken karnero, kabalio ken lugan, tagabu, kayatna a sawen,
dagiti kararua dagiti tattao. 14 Kunanto kenkuana dagiti agtagtagilako:
“Awanen dagiti naimbag a bambanag a kayatmo a tagikuaen, ket saanton a
mapasubli ti amin a kinabaknangmo agraman ti kinapintasmo!” 15 Saan
nga umasideg dagiti agtagtagilako a bimmaknang iti dayta a siudad
agsipud ta mabutengda a mairaman iti panagsagabana. Agsangit ken
agdung-awdanto, 16 a kunada, “Nakabutbuteng ti napasamak iti
agdindinamag a siudad! Agkawkawes idi iti nalabaga a lupot, de lana ken
ube. Agar-aramat idi kadagiti alahas a balitok, agkakapateg a bato ken
perlas! 17 Iti las-ud laeng ti maysa nga oras, nagbalinda amin a dapu!”
Manipud iti adayo, agbuybuya dagiti amin a kapitan ken tripulante ti
barko, dagiti pasahero ken ti dadduma pay nga aggapu iti taaw ti
pagbiagda. 18 Agsangsangitda a mangbuybuya iti asuk ti maur-uram a
siudad. “Awan umasping iti kinalatak dayta a siudad!” kinunada. 19
Inikkanda dagiti uloda iti tapok ket kinunada a sililiday: “Nakabutbuteng!
Nakaam-amak ti napasamak iti agdindinamag a siudad! Dayta a siudad ti
bimmaknangan dagiti amin nga adda barkona nga agbibiahe. Ngem
napukawna amin iti uneg ti maysa nga oras!” 20 Agragsakka, O langit,
gapu iti pannakadadaelna; agragsakkayo, dakayo a tattao ti Dios, dakayo
nga apostoles ken dakayo a profeta! Ta inukom ti Dios gapu iti inaramidna
kadakayo! 21 Kalpasanna, nangala ti maysa a mannakabalin nga anghel iti
bato a kas iti kadakkel ti gilingan ket impurruakna iti baybay a kunkunana:
“Kastoyto ti nakaam-amak a pannakatnag ti Babilonia nga agdindinamag a
siudad, ket saanton a makita uray kaanoman. 22 Saanton a mangngeg iti
siudadmo ti tokar dagiti umaarpa ken musiko, dagiti agpuypuyot iti fluta
ken trumpeta. Awanton ti masarakan kenka a managpartuat. Saanton nga
aguni dagiti gilingan! 23 Saannakanto metten a raniagan ti uray maysa a
pagsilawan; saanto metten a mangngeg dagiti naragsak a timek ti agkasar.
Dagiti komersiantem ti kabibilgan iti amin a lubong. Inallilawmo dagiti
amin a nasion babaen iti salamangka.” 24 Nadusa ti Babilonia gapu ta
nasarakan kenkuana ti dara dagiti profeta, dagiti tattao ti Dios ken dagiti
amin a napapatay iti sangalubongan.
Paltiing 19
1 Kalpasan daytoy, nangngegko ti kasla nagtitipon a timek ti adu a tattao
sadi langit. Ikankantada: “Madaydayaw ti Dios! Ti pannakaisalakan,
dayaw ken pannakabalin kukua ti Diostayo! 2 Nalinteg ken rumbeng
dagiti panangukomna. Dinusana ti agdindinamag nga immoral a babai a
nangmulit iti daga babaen iti kinaderrepna. Dinusa ti Dios agsipud ta
pinatayna dagiti adipen ti Apo.” 3 Kinunada pay iti napigsa a timek:
“Madaydayaw ti Dios! Agpangato iti agnanayon nga awan inggana ti asuk
ti mapupuoran nga agdindinamag a siudad!” 4 Nagpakleb dagiti duapulo
ket uppat a panglakayen ken dagiti uppat a sibibiag a parsua, ket
nagdaydayawda iti Dios nga agtugtugaw iti trono. Kinunada, “Amen!
Madaydayaw ti Dios!” 5 Adda nagsao manipud iti trono: “Dayawenyo ti
Diostayo, dakay amin nga adipenna, dakay amin nga agdaydayaw
kenkuana, natan-ok man wenno nanumo!” 6 Kalpasanna, nangngegko ti
kasla timek ti adu a tattao a kasla daranudor ti agdissuor a danum ken
napigsa a gurruod. Kinunada: “Madaydayaw ti Dios! Ari ti Apo a
Diostayo a Mannakabalin-amin! 7 Agrag-o ken agragsaktayo!
Idaydayawtayo ti kinatan-okna, ta agkasaren ti Kordero! Nakasaganan ti
Babai a Maikallaysa, 8 nakawesan iti nadalus ken nasileng a de lana.” (Ti
de lana isu dagiti nalinteg nga aramid dagiti tattao ti Dios.) 9 Ket kinuna ti
anghel kaniak, “Isuratmo daytoy: Nagasat dagiti naawis iti
pannakarambak ti kasar ti Kordero.” Innayonna, “Pudno a sao ti Dios
dagitoy.” 10 Nagpaklebak iti sakaananna tapno agdaydayawak kenkuana,
ngem kinunana, “Dimo aramiden ti kasta! Adipenak met a kas kenka ken
kas kadagiti kakabsatmo a nangpaneknek iti pudno maipapan ken ni Jesus.
Ti Dios laeng ti pagdaydayawam!” Ta ti pammaneknek maipapan ken ni
Jesus isu ti mangtignay kadagiti profeta. 11 Naglukat ti langit ket nakitak
ti maysa a puraw a kabalio. Adda nakasakay. Maaw-awagan iti Matalek
ken Napudno agsipud ta nalinteg ti panangukom ken pannakigubatna. 12
Kasla gumilgil-ayab nga apuy dagiti matana ket adu ti korona iti ulona.
Naisurat ti naganna iti bagina, ngem isu laeng ti makaammo iti
kaipapananna. 13 Daradara ti pagan-anayna. “Sao ti Dios” ti nagan a
pangawagda kenkuana. 14 Sumarsaruno kenkuana dagiti armada ti langit.
Nakasakayda kadagiti puraw a kabalio ket sikakawesda iti nadalus ken
puraw a de lana. 15 Manipud iti ngiwatna, rimmuar ti maysa a natadem a
kampilan a pangparmekna kadagiti pagilian. Iturayannanto ida babaen iti
baston a landok, ket manipud iti pagpespesan iti ubas, pagayusennanto ti
arak ti napalalo a pungtot ti Mannakabalin-amin a Dios. 16 Iti kawes ken
luppona, naisurat dagiti balikas: “Ari dagiti ar-ari ken Apo dagiti appo.”
17 Nakitak ti maysa nga anghel nga agtaktakder iti init, ket impukkawna
kadagiti amin a tumatayab sadi langit: “Umaykayo tumabuno iti dakkel a
padaya ti Dios. 18 Umayyo kanen ti lasag dagiti ar-ari, dagiti heneral,
dagiti soldado, dagiti kabalio ken dagiti nagsakay kadakuada, dagiti amin
a tattao, tagabu ken siwawayawaya, natan-ok ken nanumo.” 19 Ket
nakitak ti narungsot nga animal, dagiti ari iti daga ken dagiti buyotda.
Naguurnongda a manggubat iti nakasakay iti kabalio agraman dagiti
buyotna. 20 Natiliw ti animal ken ti sinan-profeta a nagiparang idi kadagiti
nakaskasdaaw a pagilasinan iti sangoanan ti animal. (Dagitoy a milagro ti
pinangallilawna kadagiti tattao nga addaan marka iti animal ken
nagdaydayaw iti ladawanna.) Sibibiag a naitappuak ti animal ken ti sinan-
profeta iti dan-aw ti gumilgil-ayab nga asufre. 21 Natay dagiti buyotda iti
kampilan a rimmuar iti ngiwat ti nakasakay iti kabalio. Ket nagum-uma
dagiti tumatayab a nangan kadagiti lasagda.
Paltiing 20
1 Nakitak ti maysa nga anghel a bumabbaba manipud langit. Iggemna ti
maysa a dakkel a kawar ken ti tulbek ti nakaun-uneg a yuyeng. 2
Tiniliwna ti dragon, daydi duduogan nga uleg nga isu ti Diablo ken
Satanas, sana kinawaran tapno saan a makaruk-at iti unos ti 1,000 a tawen.
3 Intappuakna iti nakaun-uneg a yuyeng. Rinikpan ken tinimbreanna ti
wangawangan tapno saan a makaruar ti dragon ken mangallilaw kadagiti
pagilian. Inton aggibus ti 1,000 a tawen, masapul a mawayawayaan iti
apagbiit a tiempo. 4 Ket nakakitaak kadagiti trono. Naikkan dagiti
nakatugaw sadiay iti pannakabalin a mangukom. Nakitak met dagiti
kararua dagiti napapatay gapu iti panangpaneknekda ken ni Jesus ken iti
panangipakaammoda iti sao ti Dios. Saanda a nagrukbab iti narungsot nga
animal wenno iti ladawanna. Saanda a pinaikkan dagiti muging ken imada
iti marka ti narungsot nga animal. Nagungarda ket nakipagturayda ken ni
Cristo iti unos ti 1,000 a tawen. 5 (Saan a nagungar dagiti dadduma
agingga a di malpas ti 1,000 a tawen.) Daytoy ti umuna a
pannakapagungar dagiti natay. 6 Nagasat ken nasantoan dagiti mairaman
iti umuna a pannakapagungar. Awan pannakabalin ti maikadua nga
ipapatay kadakuada. Agbalindanto a papadi ti Dios ken ni Cristo, ket
makipagturaydanto kenkuana iti 1,000 a tawen. 7 Kalpasan ti 1,000 a
tawen, mawayawayaanto ni Satanas iti nakaibaludanna. 8 Rummuarto a
mangallilaw kadagiti nasion iti entero a lubong, kayatna a sawen, da Gog
ken Magog. Ummongento ida ni Satanas a kaduana a makigubat. Adunto
ti armadada kas iti kaadu ti darat iti igid ti baybay. 9 Nagwarasda iti
sangalubongan ket linakubda ti kampo dagiti tattao ti Dios ken ti inay-
ayatna a siudad. Ngem nagtudo iti apuy manipud langit a nangibus
kadakuada. 10 Kalpasanna, naitappuak iti dan-aw ti apuy ken asufre ti
Diablo a nangallilaw kadakuada. Daytoy met la a dan-aw ti
nakaitappuakan ti narungsot nga animal ken ti sinan-profeta.
Matutuokdanto sadiay iti aldaw ken rabii, iti agnanayon nga awan
inggana. 11 Kalpasanna, nakitak ti maysa a dakkel a trono a puraw
agraman ti nakatugaw. Nagpukaw ti langit ken daga iti sangoananna ket
awanen pakakitaan kadakuada. 12 Nakitak dagiti natay, natan-ok ken
nanumo, nga agtatakder iti sangoanan ti trono. Naluktan dagiti libro ken ti
sabali a libro, ti libro ti biag. Naukom dagiti natay segun ti inaramidda a
kas naisurat kadagiti libro. 13 Inyula ti taaw dagiti natay nga adda
kenkuana. Inyula met ni Patay ken ti Hades dagiti natay nga adda
kadakuada. Naukomda amin kas mayannurot iti inaramidda. 14
Kalpasanna, naitappuak ni Patay ken ti Hades iti dan-aw ti apuy. (Daytoy
a dan-aw ti apuy ti maikadua nga ipapatay.) 15 Ditoy a dan-aw ti apuy ti
nakaitappuakan dagiti awan naganna iti libro ti biag.
Paltiing 21
1 Kalpasanna, nakitak ti baro a langit ken ti baro a daga. Awanen ti
immuna a langit ken ti immuna a daga. Awan metten ti taaw. 2 Ket
nakitak ti Nasantoan a Siudad, ti baro a Jerusalem, a bumabbaba manipud
langit nga aggapu iti Dios, a kas iti babai a nakawesan nga agkasar ken
mangpadpadaan iti lalaki a mangikallaysa kenkuana. 3 Nakangngegak iti
napigsa a timek a naggapu iti trono. Kunana: “Agnaeden ti Dios iti sidong
dagiti tattao! Makipagtaengto kadakuada ket isudanto ti ilina. Kaduadanto
ti Dios, ket isunto ti Diosda. 4 Punasennanto dagiti luada. Awanton ti
patay, ladingit, sangsangit wenno ut-ot agsipud ta limmabasen dagiti
immun-una a banag.” 5 Kinuna ti nakatugaw iti trono, “Pabaroekon ti
amin a banag!” Kinunana pay kaniak, “Isuratmo daytoy:
Mapangnamnamaan ken pudno dagitoy a sao.” 6 Kinunana pay,
“Natungpalen! Siak ti Alfa ken ti Omega, ti pangrugian ken ti
panungpalan. Siasinoman a mawaw, ikkakto iti kalintegan nga uminum iti
ubbog ti danum ti biag. 7 Daytoy ti gunggona ti agballigi: Siakto ti Diosna
ket isunto ti anakko. 8 Ngem nakabutbutengto ti pagbanagan dagiti takrot,
dagiti traidor, dagiti naderrep, dagiti mammapatay, dagiti
mannakikamalala, dagiti managanito, dagiti agrukbab kadagiti didiosen
ken amin nga ulbod—agyandanto iti dan-aw ti gumilgil-ayab nga apuy
ken asufre nga isu ti maikadua nga ipapatay.” 9 Inasitgannak ti maysa
kadagiti pito nga angheles nga addaan iti pito a malukong a napno kadagiti
pito a maudi a didigra. “Umayka,” kinunana, “ket ipakitak kenka ti babai
nga ikasar ti Kordero.” 10 Addaak iti pannakabalin ti Espiritu ket
impannak ti anghel iti rabaw ti nakangatngato a bantay. Impakitana kaniak
ti Jerusalem, ti Nasantoan a Siudad a bumabbaba manipud langit nga
aggapu iti Dios. 11 Agranraniag daytoy gapu iti dayag ti Dios.
Agrimatrimat a kas iti alahas a haspe ken aganninaw a kas iti kristal. 12
Napuskol ken nangato ti bakud ket adda sangapulo ket dua a ruanganna a
nagsaggaysaan a bambantayan ti sangapulo ket dua nga angheles. Iti
tunggal ruangan, adda nagan a naisurat. Dagitoy dagiti nagan dagiti
sangapulo ket dua a tribu ti Israel. 13 Tallo ti ruangan ti tunggal benneg ti
bakud: tallo iti daya, tallo iti abagatan, tallo iti amianan ken tallo iti laud.
14 Nabangon ti bakud ti siudad iti sangapulo ket dua a bato a nakaisuratan
ti nagan dagiti sangapulo ket dua nga apostoles ti Kordero. 15 Adda
balitok a pagrukod ti anghel a nagsao kaniak. Rukodenna ti siudad, dagiti
ruangan ken bakudna. 16 Kuadrado ti siudad: 2,400 a kilometro ti
kaatiddog; kasta met ti kaakaba ken kangatona. 17 Rinukod ti anghel ti
bakud ket 216 a kadapan ti kangatona kas mayannurot iti rukod nga ar-
aramaten dagiti tattao. 18 Haspe ti bakud, puro a balitok ti siudad, ket
aganninaw a kas kristal. 19 Namontaran dagiti fondasion a bato ti bakud
kadagiti agkakapateg a bato. Haspe ti umuna; safiro ti maikadua;
kalsedonia ti maikatlo; esmeralda ti maikapat; 20 sardonika ti maikalima;
karnelia ti maikanem; krisolito ti maikapito; berilo ti maikawalo; topasio ti
maikasiam; krisoprasio ti maikasangapulo; hasinto ti maikasangapulo ket
maysa ken amatista ti maikasangapulo ket dua. 21 Perlas dagiti sangapulo
ket dua a ruangan; naaramid ti tunggal maysa iti sangkanayon a perlas.
Paspasig a balitok dagiti kalsada ti siudad; aganninaw a kas kristal. 22
Nadlawko nga awan templo iti siudad agsipud ta ni Apo Dios a
Mannakabalin-amin ken ti Kordero ti pannakatemplona. 23 Saanen a
masapul ti init ken ti bulan a manglawag iti siudad agsipud ta ti dayag ti
Dios ti mangranraniag ket ti Kordero ti pagsilawan. 24 Iti lawagna,
magnanto dagiti amin a tattao ket ipanto sadiay dagiti ari ditoy daga ti
kinadayagda. 25 Agmalmalem a silulukat dagiti ruangan ti siudad agsipud
ta awanen ti rabii sadiay. 26 Maipanto iti siudad ti dayag ken dayaw dagiti
nasion. 27 Ngem saanto a makastrek sadiay ti uray ania a saan a nadalus
iti imatang ti Dios, ti siasinoman nga agar-aramid iti nakababain ken dagiti
naulbod. Dagitinto laeng naisurat ti naganna iti libro ti biag nga adda iti
ikut ti Kordero ti makastrek iti siudad.
Paltiing 22
1 Impakita pay ti anghel ti karayan ti danum ti biag. Nalitnaw a kas kristal
ti danumna nga agubbog manipud iti trono ti Dios ken ti Kordero. 2
Agayus ti karayan iti tengnga ti kalsada ti siudad. Iti agsumbangirna, adda
dagiti puon ti kayo ti biag a binulan nga agbunga, ket nasamay dagiti
bulongda a pangagas iti sakit dagiti pagilian. 3 Awan sadiay ti aniaman
nga inlunod ti Dios. Masarakan iti siudad ti trono ti Dios ken ti Kordero
ket agdaydayawto kenkuana dagiti adipenna. 4 Makitadanto ti rupana ket
maisuratto ti naganna iti mugingda. 5 Awan ti rabii sadiay ket didanto
masapul ti pagsilawan wenno ti lawag ti init agsipud ta ni Apo Dios ti
silawdanto ket agaridanto iti agnanayon nga awan inggana. 6 Kalpasanna,
kinunana, “Napudno ken mapangnamnamaan dagitoy a sao. Ni Apo Dios
a nangted iti Espirituna kadagiti profeta, isu ti nangibaon iti anghelna
tapno ipakitana kadagiti adipenna met laeng ti masapul a mapasamak iti
mabiit. 7 Umayakon! Nagasat dagiti agtungpal kadagiti padto a nailanad
iti daytoy a libro!” 8 Siak ni Juan a nakangngeg ken nakakita kadagitoy a
bambanag. Kalpasan ti pannakangngeg ken pannakakitak kadagitoy,
nagpaklebak iti sakaanan ti anghel tapno agdaydayawak kenkuana. 9
Ngem kinunana kaniak: “Saanmo nga aramiden ti kasta! Adipenak met a
kas kenka, kas kadagiti kakabsatmo a profeta ken kas kadagiti amin nga
agtulnog kadagiti sao iti daytoy a libro. Ti Dios laeng ti pagdaydayawam!”
10 Kinunana pay: “Dimo ilimed dagiti padto iti daytoy a libro agsipud ta
asidegen ti pannakapasamakda. 11 Agtultuloy a dumakes ti
managdakdakes. Agtultuloy nga agbiag a narugit ti narugit ti panagbiagna,
ngem agtultuloy nga agaramid iti nalinteg ti nalinteg, ket ti nasantoan,
agtultuloy ti panagbiagna a nasantoan.” 12 Naibaga kaniak:
“Dumngegkayo, umayakon! Itugotko dagiti gunggona nga itedko iti
tunggal maysa kas mayannurot iti inaramidna. 13 Siak ti Alfa ken ti
Omega, ti umuna ken ti maudi, ti pangrugian ken ti panungpalan.” 14
Nagasat dagiti mangdalus kadagiti kawesda ta maikkanda iti kalintegan a
sumrek iti siudad ken mangan iti bunga ti puon ti kayo a mangted iti biag.
15 Ngem mabati iti ruar ti siudad dagiti narukop a tattao, dagiti
managsalamangka, dagiti mannakikamalala, dagiti mammapatay, dagiti
agdaydayaw kadagiti didiosen ken dagiti managayat ken agaramid iti
kinaulbod. 16 “Siak ni Jesus a nangibaon iti anghelko tapno saksianna
dagitoy kadakayo nga adda kadagiti iglesia. Nagtaudak iti ramut ken
kaputotan ni David. Siak ti naraniag a bituen ti agsapa.” 17 “Umayka!”
kuna ti Espiritu ken ti Babai a Maikallaysa. “Umayka!” kuna met ti amin a
makangngeg iti daytoy. Umasideg ti siasinoman a mawaw. Awaten ti
siasinoman a mayat ti danum ti biag a kas sagut. 18 Siak ni Juan.
Ballaagak ti siasinoman a makangngeg kadagiti padto a naisurat iti daytoy
a libro: No adda mangnayon kadagitoy, inayonto met ti Dios iti dusana
dagiti didigra a naisurat iti daytoy. 19 Ket no adda mangikkat iti aniaman
kadagiti padto a naisurat iti daytoy, ikkatento met ti Dios ti kalinteganna a
mairanud iti kayo ti biag. Ikkatento pay ti Dios ti kalinteganna a mairaman
iti Nasantoan a Siudad kas nailanad iti daytoy a libro. 20 Kuna ti
mangpaneknek iti daytoy, “Agpayso nga umayakon!” Amen! Umaykan,
Apo Jesus! 21 Sapay koma ta magun-od ti amin a tattao ti Dios ti parabur
ni Apo Jesus. Amen.