buhay nga naman
TRANSCRIPT
BUHAY NGA NAMAN!
Ni: Jenita D. Guinoo
Hindi ko alam kung bakit ako nabubuhay? Ano kaya
ang papel ko sa mundo? Ito ang mga katanungang kahit
ako ay hindi makasasagot.
Ano nga ba ang buhay? At paano mo magagawang
magkaroon ng kabuluhan ang iyong buhay?
Sa palagay ko’y iba-iba ang pananaw ng tao ukol sa
kaniyang buhay. Marahil ang ilan ay magsasabing ang
kanilang buhay ay isang paraiso o kahalintulad ito sa
isang impyerno ng iilan. Bakit kaya? Siguro’y maiisip
mong tiyak na nakararanas ang mga ito ng pangyayaring
nagiging basehan nila kung bakit nila nasabi ang kanilang
pagpapakahulugan ukol sa buhay. Tiyak na maganda ang
naging buhay ng unang nagpahayag ng kaniyang
pakahulugan at naging taliwas naman ito sa mga taong
masama ang naging takbo ng kanilang buhay na
itinuturing na impyerno ang kanilang pamumuhay. Ito ang
nag-uudyok sa isang tao upang hihilinging huwag na
lamang mabuhay. Kasi ba naman itong letseng buhay,
kung kailan ka naghihirap at sobrang kinakapos ay saka
pa darating iyong mga problemang pagkabigat-bigat, para
bang binagsakan na tayo ng mundo na magtutulak sa atin
upang maisip na wawakasan na lamang itong walang
silbing buhay. Mga masasakit na dagok na nagpapawala
sa atin sa tamang direksyon, kawalang halaga at
pagpapahalaga sa sariling buhay.
Ganito ba talaga ang mabuhay? Puro na lamang
paghihirap ang ating nararanasan. Kailan ba natin
mararamdaman ang isang maginhawang buhay? Kung
ganito na lamang lagi, nanaisin na lamang natin ang
mamatay!
Ngunit, hintay! Nasaan na ang sagot sa tanong ko
kanina? Ano nga ba ang buhay? At paano natin
magagawang makabuluhan ang ating buhay?
Wala talagang tunay na makapagbibigay kahulugan
ng salitang buhay kundi ito ay puno ng misteryo.
Napakahiwaga na walang maaring makaaalam kung ano
ang magiging takbo nito. Ang iba nga, nakahiga na ay
hindi pa rin namamatay habang ang ilang may malulusog
pang pangangatawan ay bigla na lamang nating
mababalitaang namatay. Kakakausap pa lamang natin at
agad nang nawalan ng buhay dahil sa isang aksidente.
Kaya, napakahirap man ng ating naging buhay sa
kasalukuyan, habang nabubuhay pa ay may pag-asa pa
rin. Upang maging makabuluhan ito, sikaping maging
daan sa pagkakaroon ng maayos na buhay ng iba.
Tulungan natin sila ayon sa abot ng ating makakaya. Kung
hindi man naging paraiso ang ating buhay at least hindi
naman tayo ang naging dahilan kung bakit naging
impyerno ang buhay ng iba.
Wakas!