HOTUBA YA MHE. JAKAYA MRISHO KIKWETE, RAIS WA JAMHURI YA

MUUNGANO WA TANZANIA KWENYE KILELE CHA

MAADHIMISHO YA SIKU YA MWALIMU DUNIANI TAREHE 11 OKTOBA, 2006

Waziri wa Elimu na Mafunzo ya Ufundi, Mh. Margaret Sitta (Mb);

Mkuu wa Mkoa wa Mtwara, Mheshimiwa Henry Shekifu (Mb);

Makamu wa Rais wa CWT, Ndugu Yahya Msulwa;

Waheshimiwa Viongozi wa chama na Serikali;

Viongozi wa Vyama vya Wafanyakazi;

Wajumbe wa Baraza la Taifa la Chama cha Walimu Tanzania;

Walimu wote, Wageni Waalikwa, Mabibi na Mabwana:

Nianze kwa kutoa shukrani zangu za dhati kwa heshima mliyonipa ya kunialika

kushiriki nanyi katika sherehe hizi za maadhimisho ya Siku ya Mwalimu Duniani.

Nawashukuru kwa mapokezi mazuri mliyonipa na burudani murua za kwaya na

muziki wa Boka Boma Music Band.

Nawapongeza wale wote walioshiriki kuandaa maadhimisho haya yaliyofana.

Nimefurahishwa sana na niliyoyaona kwenye mabanda ya maonyesho. Pongezi za

pekee kwa Chama cha Walimu Tanzania kwa kuendelea kuwaunganisha walimu

nchini, na ninawapongeza walimu wote kwa kuadhimisha siku yenu leo

hii. Nawaahidi ushirikiano wangu na ule wa wenzangu wote Serikalini.

Ndugu viongozi, ndugu wananchi;

Leo tunawapongeza walimu kwa kuadhimisha siku yao duniani. Hii ni siku

muhimu kwa walimu. Ni siku ambayo walimu duniani kote hutafakari mahali walipo

na kule waendako katika kutimiza wajibu wao wa kutoa elimu. Na sisi wadau wengine

ni fursa ya kuonyesha shukrani na pongezi zetu, kama Taifa, kwa walimu wote nchini

kwa kazi kubwa wanayoifanya katika kulijenga na kuliendeleza Taifa letu.

Nchi yetu ni kubwa na maeneo mengi yanapishana kwa viwango vya

maendeleo, lakini Mwalimu yuko katika kila kona ya nchi hii. Walimu ndio huwafunda

na kuwalea raia na viongozi wa kesho wa taifa letu.

Vilevile, walimu ndio wanaotutengenezea viongozi katika fani mbalimbali za

taaluma na ujuzi. Walimu ndio wanaotujengea nguvu kazi ya kutumainiwa ya Taifa

letu. Walimu ndio wanaoijenga haiba ya taifa. Nakubaliana nanyi kabisa kwamba

walimu ndio chimbuko la taifa na utaifa. Miongoni mwa walimu ndio

wametoka viongozi wengi wa nchi yetu wakiwemo Wabunge na Mawaziri. Hata Rais

wetu wa kwanza Baba wa Taifa, hayati Mwalimu Julius Kambarage Nyerere na Rais

wetu wa pili Mzee Ali Hassan Mwinyi walikuwa walimu.

Ni ukweli uliodhahiri kwamba, aina ya walimu tunaokuwa nao, inaamua aina

ya Taifa tunalolijenga. Kwahiyo basi, kwa Serikali na jamii yote kwa jumla, kutambua

na kuheshimu nafasi ya Mwalimu katika ujenzi na maendeleo ya Taifa letu, ni jambo

muhimu sana.

Ahadi yangu kwenu ni kwamba tutaendelea kuutambua, kuuheshimu na

kuuenzi mchango wa walimu kwa Taifa letu. Tunatambua kuwa wengi wenu

mnafanya kazi katika mazingira magumu. Serikali haitachoka kuzifanyia kazi kero za

walimu na kutafuta njia mbalimbali za kuwasaidia.

Ndugu Makamu wa Rais wa CWT, Ndugu Walimu;

Mimi na wenzangu Serikalini tunalipa kipaumbele cha juu suala zima la Elimu

nchini. Mipango na malengo yetu katika Sekta ya Elimu inaongozwa na Malengo ya

Milenia ya Elimu, Dira ya Taifa ya Maendeleo ya 2025, Ilani ya Uchaguzi ya CCM ya

Mwaka 2005 na Mpango wa Kukuza Uchumi na Kuondoa Umaskini Tanzania

(MKUKUTA). Nia yetu ni nini basi?

Moja, ni kuhakikisha upatikanaji wa elimu kwa wote.

Mbili, ni kuhakikisha kuwa kunakuwa na usawa na haki katika utoaji

elimu;

Tatu, kuona kuwa ubora wa elimu inayotolewa unaongezwa na

kuimarishwa;

Nne, kuhakikisha kuwa rasilimali tunazotenga kwa ajili ya utoaji elimu

zinatumika kwa ufanisi na kutimiza malengo tunayoyakusudia.

Tano, tunaimarisha asasi za uongozi na uendeshaji wa Sekta ya elimu;

Sita, tunaongeza ushirikishwaji wa Wadau mbalimbali wa elimu,

ikiwemo sekta binafsi katika upangaji sera na mipango ya elimu;

Ndugu zangu, kwa bahati nzuri, haya vilevile ndiyo malengo ya mipango

mikubwa ya elimu inayotekelezwa hivi sasa, yaani Mpango wa Maendeleo ya Elimu ya

Msingi (MMEM) 2002 – 2006 na Mpango wa Maendeleo ya Elimu ya Sekondari (MMES)

2004 – 2009. Serikali inafanya kila juhudi ili kuhakikisha kuwa mipango hii

inafanikiwa. Lakini bila ushirikiano wa walimu hatuwezi kufika popote. Nichukue

fursa hii kuomba ushirikiano wa walimu wote nchini katika utekelezaji wa MMEM na

MMES.

Kuendeleza Ubora wa Elimu

Ndugu Makamu wa Rais wa CWT;

Malengo ya Milenia ya Elimu kwa watoto wote wenye umri wa kwenda shule

ifikapo mwaka 2015 yanasisitiza juu ya ubora wa Elimu itolewayo kwa watoto wote.

Mwalimu ndiyo raslimali muhimu katika kuyafikia malengo yetu tuliyojiwekea katika

Sekta ya Elimu likiwemo lile la ubora wa elimu. Hivyo basi, kauli mbiu yenu ya “Kila

Mwanafunzi Anahitaji Mwalimu Bora” ni sahihi. Ni kauli muafaka kwa kipindi hiki

tulicho nacho.

Ndugu zangu;

Kama nilivyosema hapo mwanzo, Serikali inamtambua Mwalimu na kuthamini

sana nafasi yake katika kuchangia maendeleo ya elimu na ya nchi kwa ujumla. Kwa

ajili hiyo, Serikali itaendelea kuhakikisha kuwa walimu wanaandaliwa vizuri,

wanaendelezwa kazini, wanaandaliwa mazingira mazuri ya kufanyia kazi na kujali

maslahi yao.

RISALA

Ndugu Makamu wa Rais wa CWT;

Ninawashukuru sana kwa risala yenu nzuri na iliyowasilishwa vizuri. Nafurahi

kwamba risala imebainisha vyema mafanikio na matatizo yanayowakabili walimu na

kutoa mapendekezo muafaka juu ya hatua za kuchukua. Vilevile mmetaja maeneo

yanayohitaji mazungumzo na maelewano na Serikali na wadau wengine ili tuweze

kuyafikia malengo ya kielimu tuliyojiwekea. Napenda kuwahakikishia kuwa

tumesikia, tumeelewa na tuko tayari kufanya kila tuwezalo kufanya yale yanayoihusu

Serikali.

Uboreshaji wa Mishahara ya Walimu

Ndugu Makamu wa Rais wa CWT;

Natambua haja na umuhimu wa kuboresha maslahi ya walimu, hasa mishahara

yao. Tumeanza kuchukua hatua. Katika mwaka huu wa fedha, tumeongeza mishahara

ya walimu, kama ilivyokuwa kwa kada mbalimbali za utumishi wa

umma. Tutaendelea kuboresha mishahara ya watumishi wa umma pamoja na walimu

kadri uchumi wetu unavyokua na hali inavyoruhusu.

Kwa kuzingatia hilo, tarehe 18 Mei, 2006 Serikali iliunda Tume ya Kuboresha

Mishahara ya Watumishi wa Umma pamoja na walimu. Tume ilianza kazi rasmi tarehe

01 Julai, 2006 na kazi yake kubwa ni kufanya uchunguzi kuhusu hali ya Mishahara ya

Watumishi wa Umma ilivyo sasa na kutoa mapendekezo ya namna ya kuiboresha

zaidi. Tume hiyo imeshakutana na wadau mbalimbali wakiwemo wawakilishi wa

walimu wa Shule za Msingi, Sekondari, na vyuo vya Ualimu.

Kwa upande wa Walimu, tume hiyo inapitia maeneo yafuatayo kwa lengo la

kushauri namna ya kuboresha mishahara ya walimu:

Misingi gani itumike kupanga mishahara ya walimu;

Serikali ifanye nini kuboresha mishahara ya walimu;

Mwalimu wa Shule ya Msingi, Sekondari na Chuo ana majukumu gani

anayoyafanya kuanzia asubuhi hadi jioni;

Kazi ya mwalimu inaweza kulinganishwa na ipi nyingine katika

Utumishi wa Umma na kwa nini;

Mambo gani mengine yazingatiwe katika kuboresha mshahara wa

mwalimu.

Tume hii tayari imeanza kupokea maoni na ushauri kuhusu uboreshaji

wa mishahara ya walimu. Ni matarajio yangu kuwa muda iliyopewa utatosha kabisha

kuwasilisha mapendekezo muafaka Serikalini. Naomba tuwe na subira Tume imalize

kazi yake. Nawaahidi kuwa Serikali itaifanyia kazi ipasavyo taarifa ya Tume hiyo.

Ucheleweshaji wa Mishahara ya Walimu

Mmelielezea kwa uchungu tatizo la ucheleshwaji mishahara ya walimu.

Naelewa machungu yenu, na nawaunga mkono. Tatizo hili sasa lina kila dalili ya kuwa

sugu na kuota mizizi lisipokomeshwa. Bila ya shaka mnakumbuka kwamba Serikali

ilikwishatoa maelekezo kuwa ifikapo tarehe 25 kila mwezi mishahara ya walimu iwe

imelipwa. Hata hivyo, bado maelekezo haya hayajatekelezwa kwa ukamilifu. Sababu

mbalimbali zimekuwa zikitolewa lakini bado hazikidhi haja. Sielewi kwa nini watu

wanajaribu kuhalalisha kutotimiza ipasavyo wajibu wao kwa jambo linalowezekana.

Wakati mwingine maelezo yanayohalalisha kutojali na uzembe kwa upande wa

wenzetu tuliowapa dhamana ya kushughulikia mishahara ya walimu. Bado mimi

naamini tukijipanga vizuri na kutimiza ipasavyo wajibu wetu tunaweza kulipa

mishahara ya walimu ifikapo tarehe 25 ya kila mwezi. Ingekuwa vyema basi Wizara ya

Elimu na Mafunzo ya Ufundi, TAMISEMI, Menejimenti ya Utumishi wa Umma na

HAZINA wakakaa pamoja na kuzungumzia vikwazo na kutafuta njia bora zaidi ya

kulipa mishahara ya walimu kwa wakati. Katika mazungumzo hayo, wazingatie suala

la walimu wapya na kuchelewa sana kulipwa mishahara yao.

Ningependa kupata taarifa kuwa baada ya kikao hicho kero hii itakuwa

imepatiwa ufumbuzi wa kudumu. Usumbufu wanaopata walimu kufuatilia stahili yao

unapunguza ari na tija yao kazini. Pia hupunguza mapenzi kwa kazi yao. Ualimu ni

kazi ya heshima. Tusimfikishe mahali Mwalimu anakopa kila mwezi ili aishi

wakati akingojea mshahara wake.

Upandishaji wa Madaraja kwa Walimu

Ndugu zangu,

Nimesikia pia kuhusu tatizo la ucheleweshaji wa upandishwaji wa madaraja

kwa walimu, ambalo nalo linachukua sura ya kuwa sugu. Pia lipo tatizo la

ucheleweshaji wa marekebisho ya mishahara baada ya kupandishwa madaraja. Wakati

mwingine mtu anapandishwa madaraja mawili au hata zaidi wakati ambapo hata kwa

daraja la nyuma alilopandishwa mshahara haujarekebishwa. Kupandishwa daraja

wakati ukifika na kurekebishiwa na kurekebishiwa mshahara kwa wakati ule ni haki ya

mtumishi. Kutofanya hivyo ni uonevu. Ni matatizo ambayo napata ugumu

kuelewa. Isitoshe hakuna maelezo ya msingi kwa nini jatatizo haya yasiishe. Naomba

sasa iwe ilani ya mwisho. Safari ijayo tupate taarifa ya mabadiliko. Hatuwezi

kuzungumza jambo hilo hilo kila mwaka.

Naomba kuitumia nafasi hii kuwakumbusha wahusika kuzingatia muongozo wa

Serikali wa mwaka 2005 kuhusu kushughulikia malalamiko ya watumishi wa umma

kuhusu kupandishwa vyeo na kuyashughulikia mapema iwezekanavyo.

Ni vyema mamlaka zinazohusika na upandishaji wa vyeo vya walimu zikiwemo Tume

ya Utumishi wa Umma - Idara ya Huduma ya Walimu, Wizara ya Elimu na Mafunzo

ya Ufundi na halmashauri za Wilaya na Miji kuhakikisha kuwa zoezi la walimu wote

wenye sifa kupandishwa vyeo stahili linakamilika kabla ya tathmini ya utendaji wa

kazi kwa njia ya uwazi (OPRAS) kuanza.

Madeni ya Walimu

Ndugu Makamu wa Rais wa CWT;

Ndugu Walimu;

Mmelielezea pia tatizo la malimbikizo ya madeni ya walimu. Tunatambua kuwa

hili ni tatizo la siku nyingi na kuna walimu wengi ambao hawajalipwa kwa muda

mrefu stahili zao mbalimbali hasa fedha za uhamisho, matibabu, mapunjo ya

mishahara, gharama za masomo na posho za kikazi na likizo.

Ndugu zangu Walimu, mkakati wa kulipa madeni ya walimu tunao na

mchakato wa kufanikisha azma hiyo unaendelea. Mpaka sasa madeni ya walimu wa

shule za msingi yaliyowasilishwa ni kiasi cha shilingi Bilioni 9.9. Hatua za uhakiki wa

madeni hayo zinakamilishwa.

Nawasihi wale wanaofanya kazi hii waongeze kasi ili waimalize mapema

iwezekanavyo na malipo yafanyike ndani ya kipindi hiki cha mwaka wa fedha 2006/07.

Fedha yake ipo, kinachosubiriwa ni kupatikana kwa taarifa hizo za uhakiki.

Kwa upande wa walimu wa Sekondari na Vyuo chini ya Wizara ya Elimu na

Mafunzo ya Ufundi, madeni yenye thamani ya Shilingi Bilioni 1.1 yaliwasilishwa

Serikalini. Baada ya uhakiki, madeni ya zaidi ya shilingi milioni 855 yameonekana

hayana matatizo (queries) na yatalipwa wakati wowote kuanzia sasa. HAZINA

imekwishatenga fedha hizo na nimeambiwa wako katika maandalizi ya mwisho ya

kulipa.

Nyumba za Walimu

Ndugu Walimu,

Nalitambua vyema tatizo kubwa la upungufu wa nyumba za walimu nchini,

hasa vijijini. Kama mlivyosema katika risala yenu, nyumba zilizopo zinakidhi asilimia

19.4 tu ya mahitaji. Nakubaliana nanyi kwamba tatizo hili ni mateso makubwa kwa

walimu. Lakini, napenda kuwahakikishia kuwa hili ni jambo linalonisononesha na mie

pia. Serikali inalitambua na imeendelea kulichukulia hatua za kukabiliana

nalo. Mikakati ya muda mfupi wa kati na mrefu ili kupunguza makali yake imewekwa

na inaendelea kutekelezwa.

Katika utekelezaji wa MMEM, kwa mfano, jumla ya nyumba 12,590 zimejengwa

kati ya mwaka 2002 hadi 2006 katika shule za msingi. Aidha, kwa mwaka wa fedha

2006/07 nyumba 2,000 zinatarajiwa kujengwa katika shule za msingi. Kwa upande wa

shule za sekondari, jumla ya nyumba 908 zimejengwa katika mwaka wa kwanza wa

utekelezaji wa Mpango wa MMES, unaoisha mwaka 2009. Kwa mwaka wa fedha

2006/07 jumla ya nyumba 1,000 zinatarajiwa kujengwa na fedha za ukamilishaji wa

majengo hayo tayari zimetumwa mashuleni. Aidha, kama mjuavyo, katika Mpango wa

MMES, kwa nia hiyo hiyo ya kupunguza tatizo hilo, kila yanapojengwa madarasa

mawili hujengwa nyumba moja ya mwalimu.

Mimi na wenzangu Serikalini tunatambua umuhimu wa kuongeza kasi ya ujenzi

wa nyumba za walimu. Tumedhamiria kufanya hivyo ila kasi yetu inapunguzwa na

uwezo wetu ukilinganisha na mahitaji mengi ya nchi pamoja na hili la nyumba za

walimu. Tunawahakikishia kuwa tutaendelea kuwekeza kwenye ujenzi wa nyumba za

walimu. Serikali pia itaendelea kuwashirikisha wadau mbalimbali wakiwemo wahisani

wa nje, , mashirika ya Serikali na yasiyo ya Kiserikali na watu binafsi katika ujenzi wa

nyumba za walimu. Kwa ajili hiyo, kwa mfano, Shirika la Maendeleo ya Jamii (TASAF)

limejenga nyumba za walimu 264 kati ya mwaka 2001 na 2005. Najua wanaendelea

kufanya hivyo.

Tumeanza mazungumzo na wahisani wetu wakubwa juu ya haja ya kuwa na

mpango maalumu wa kujenga nyumba za walimu nchini. Wazo hilo linapokelewa

vizuri ila bado tunasubiri uamuzi wa kiutekelezaji. Kwa nafasi hii, nawashukuru

wadau wote wanaochangia kwa hali na mali katika kupunguza tatizo la nyumba za

walimu.

Ubora wa Elimu na Muda wa Mafunzo ya Walimu

Ndugu Walimu,

Nimefurahi sana kuona kwamba suala la utoaji wa elimu bora shuleni na

uhusiano wake na muda wa mafunzo ya walimu na mafunzo kazini mnalitambua na

kulipa nafasi yake stahiki. Ni jambo muhimu kwamba sote tunashiriki kuchuna bongo

zetu na kuchangia katika jitihada za kutafuta njia ya kuboresha elimu tunayoitoa kwa

watoto wetu. Kwa ufahamu wangu, Elimu Bora ni matokeo ya majumuisho ya mambo

mengi, mwalimu akiwa muhimili mkuu wa ubora huo.

Kimsingi ufanisi kwa upande wa Elimu Bora unamtegemea mwalimu

anayemudu maudhui ya somo, mahiri katika matumizi ya njia za kufundisha na

kujifunzia masomo yaliyoko kwenye mtaala. Kadhalika, hutegemea mwalimu mwenye

utambuzi wa mahitaji ya walengwa, mazingira bora ya kujifunzia na walimu kuwa

mfano wa kuigwa.

Aidha, natambua pia kwamba mazingira bora ya kufanyia kazi kwa walimu

yana nafasi ya aina yake katika uwezeshaji wa mwalimu kutumia taaluma yake na

vipaji vyake alivyojaliwa na Mwenyezi Mungu.

Uzoefu ndani na nje ya nchi na utafiti wa kielimu unaonesha wazi kuwa Ubora

wa Mwalimu hutegemea sana mafunzo endelevu baada ya kupata Mafunzo ya Awali

(tarajali). Tunaweza kuwaweka walimu miaka 2, 3 au hata zaidi katika mafunzo ya

ualimu, lakini kama hakuna mafunzo ya kufuatilia ni vigumu kupata aina ya walimu

tunaowataka. Hivyo hatuna budi kuweka mkazo stahiki kwa mafunzo kazini kwa

walimu wetu.

Ndugu Walimu, naomba tutambue pia kuwa unapokuwa na mipango ya kuleta

mabadiliko makubwa katika elimu, aghalabu huna budi kutumia njia mbadala na

wakati mwingine za dharura kupata mahitaji ya msingi au kutatua matatizo muhimu.

Mpango wa muda mfupi wa kuandaa walimu ni mfano mmojawapo. Huu ndiyo

ulikuwa msingi wa kuendesha Mafunzo ya Ualimu Ngazi ya Cheti katika sehemu mbili

(yaani Chuoni na Shuleni) wakati wote wa utekelezaji wa MMEM. Baada ya mahitaji ya

haraka ya walimu kupungua, hivi sasa Serikali imerudi tena kwenye kutoa mafunzo ya

Ualimu kwa miaka miwili.

Kwa kutumia njia hii mbadala kwa mwaka mmoja tumeweza kuboresha uwiano

wa mwalimu kwa mwanafunzi kutoka 1:56 (2004) hadi kufikia 1:52 (2006) kitaifa

pamoja na kwamba bado zipo tofauti baina ya mikoa na wilaya. Kinachotakiwa sasa ni

kuendeleza mafanikio yaliyopatikana. Kazi iliyo mbele yetu ni kuimarisha mafunzo

kwa walimu wetu hawa ili kunoa ubora wao.

Kazi hiyo tunaendelea nayo. Tumekwishatumia shilingi milioni 880.5

kugharamia walimu wa Sekondari 655 na wakufunzi 370 kujiendeleza kwenye Vyuo

Vikuu.

Pia, nimejulishwa kuwa walimu 21,519 wa Daraja B na C wameendelezwa

kitaaluma na walipimwa Mei, 2006. Vilevile, Walimu 26,017 wanaendelea na mafunzo

na watafanya mitihani yao ifikapo Mei, 2007. Nimeambiwa pia kuwa Walimu 42,000 wa

daraja A wamehudhuria Mafunzo ya Ualimu kazini katika matumizi ya njia shirikishi.

Kwa hiyo, tunaendelea kufanya juhudi. Nia yetu ni kuhakikisha kwamba Kila

Mwanafunzi anapata Mwalimu aliye Bora, aliyeandaliwa vyema, kama ambavyo kauli

mbiu yenu inavyosema.

Kutokana na umuhimu wa kuendeleza walimu kitaaluma na kitaalamu natoa

wito kwa mamlaka zote zinazohusika na masuala ya walimu kuhakikisha kuwa fedha

zote zinazotengwa kwa ajili ya mafunzo zinatumika kama ilivyokusudiwa.

Waratibu wa Elimu ya Sekondari

Ndugu Makamu wa Rais wa CWT;

Elimu ya Sekondari ni muhimu katika maendeleo ya Elimu nchini na katika

kuleta maendeleo ya kijamii na kiuchumi. Tunashukuru kwamba Elimu ya Sekondari

inapanuka kwa kasi kubwa nchini. Hii inatupa changamoto ya kuendelea na jitihada za

kuiboresha. Hivyo, katika kuiboresha Elimu hiyo, tumeamua kusogeza huduma karibu

na walimu. Utaratibu wa kuwa na Waratibu wa Elimu ya Sekondari katika ngazi ya

wilaya ni hatua ya awali ya kufikia azma hiyo.

Vifaa vya Kufundishia na Kujifunzia

Ndugu zangu, Walimu,

Napenda sasa kuzungumzia suala la upatikanaji wa vifaa vya kufundishia na

kujifunzia. Elimu bora na Mwalimu Bora huchangiwa sana na upatikanaji wa nyenzo

na vifaa vya kufundishia. Vilevile, kuwa na mwanafunzi bora kunategemea upatikanaji

wa vifaa vya kujifunzia pamoja na walimu bora na mazingira mazuri ya shuleni na

nyumbani.

Tunatambua ukubwa wa matatizo ya upatikanaji wa vifaa vya kufundishia na

kujifunzia hasa katika kipindi hiki ambapo shule zinaongezeka na ubora wa elimu ni

agenda yetu muhimu. Tunaendelea na juhudi za kulikabili tatizo hili. Tumenunua

vitabu vya kiada vya kutosha sasa na kupunguza uwiano wa mwanafunzi kwa kitabu

kwa shule za msingi kutoka 1:20 mwaka 2000 hadi 1:3 mwaka huu.

Tutaendelea kutoa Ruzuku ya Uendeshaji kwa shule za msingi kwa ajili ya

ununuzi wa vifaa vya kufundishia na kujifunzia. Katika mwaka huu wa fedha,

tumetenga jumla ya shilingi bilioni 44.8 kwa ajili ya vifaa vya kufundishia na

kujifunzia. Hata shule za Sekondari zisizokuwa za Serikali nazo tumeamua

kuzichangia. Tumetenga shilingi milioni 250 kwa ajili hiyo. Serikali itaendelea

kuboresha mazingira ya kufundishia na kujifunzia katika ngazi zote ili kufikia lengo la

kutoa elimu bora kwa watoto wetu.

TATIZO LA UKIMWI

Ndugu Makamu wa Rais wa CWT,

Ndugu Walimu,

Nimefarijika sana kuona kuwa, katika risala yenu, mmeongelea suala la

UKIMWI. UKIMWI bado ni tishio la maisha ya Watanzania wote ikiwa ni pamoja na

walimu. Ugonjwa huu unatishia kuhatarisha na kudhoofisha juhudi tunazozifanya za

kupunguza pengo la upungufu wa walimu. Kila mwaka, UKIMWI unatupokonya

walimu wengi. Hatuna budi kuongeza juhudi za kupambana na maradhi haya hatari.

Nawaomba walimu muamue kukataa kuambukizwa UKIMWI.

Ugonjwa huu unaepukika, na nitashangaa sana kama yupo mwalimu asiyejua

njia za kuepuka UKIMWI. Ukweli ni kwamba jamii inawategemea walimu kuwaandaa

watoto wao wajiepushe na UKIMWI. Siamini kuwa wapo walimu wasiojua A,B,C za

kujikinga na UKIMWI: Abstain, Be faithful or Use condom. Sio mambo mapya.

Wasiokuwa na ndoa, wasubiri; wenye ndoa, wawe waaminifu – hata wenye wapenzi

hivyo hivyo. Na wale watakaoshindwa kabisa wahakikishe wanapofanya tendo la ndoa

wanafanya hivyo kwa usalama na usalama huo unafahamika. Nawasihi tuzingatie haya

kwani tatizo hili ni kubwa na linalotishia maangamizi.

Ndugu Makamu wa Rais wa CWT,

Serikali inao Mpango wa Elimu ya UKIMWI katika Shule za Msingi, Sekondari,

Vyuo na sehemu za kazi. Kupitia mpango huu, walimu hupata uelewa wa mambo

mbalimbali kuhusu UKIMWI ikiwa ni pamoja na elimu ya matumizi ya dawa za

kurefusha maisha. Ninaelewa kuwa si walimu wote wanaopata mafunzo hayo

vyuoni. Hata hivyo, tunawategemea hao wachache kuwaelimisha wengine

wanaporudi vituoni mwao ili nao wajumuike katika mapambano haya ya kufa na

kupona.

Kwa kuwa Chama cha Walimu kinawakilisha walimu walio wengi, ninashauri

Wizara ya Elimu na Mafunzo ya ufundi wakae pamoja na CWT kuona ni jinsi gani

wanaweza kushirikiana kukabiliana na janga hili.

Pengine niitumie nafasi hii kuwaarifu kuwa mke wangu, ambaye ni Mwalimu

mwenzenu, ameamua kutumia muda wake wa kuwa likizo bila malipo kujishughulisha

na juhudi za kupunguza maambukizi mapya ya UKIMWI kwa vijana. Nafahamu pia

kwamba anayo nia ya kutumia sehemu ya muda wake kuchangia katika mapambano

dhidi ya maradhi haya miongoni mwa walimu wenzake. Mimi na yeye tunatambua

kuwepo kwa wanaharakati wa mapambano haya miongoni mwenu. Ameamua

kushirikiana nanyi, kufanya kazi nanyi. Nawaomba mumpokee, mshirikiane naye.

Nadhani anaweza kuwa wa msaada kwa kiasi fulani.

Ndugu zangu,

Katika risala yenu mmeongelea pia masuala mengine ya maslahi na haki zenu

kama walimu. Yale yote yahusuyo matatizo ya Mfuko wa Bima ya Afya, Malipo ya

Pensheni, kuundwa kwa chombo cha majadiliano kati ya CWT na Serikali, nimeyasikia,

Waziri wa Elimu ameyasikia na viongozi wa Chama cha Walimu nao wameyasikia.

Bahati nzuri sana mnaye Waziri anayejua kwa undani kero na matakwa ya

Walimu. Yeye ni Mwalimu mwenzenu na kwa miaka kadhaa amekuwa mwanaharakati

mwenzenu wa kupigania haki za wafanyakazi (sijui baada ya kuwa Waziri wa Elimu

kama bado ni mwanaharakati).

Mnacho Chama imara cha Walimu Tanzania, na, nawahakikishia kuwa mnayo

Serikali inayosikia, inayosikiliza, inayojali na iliyo tayari kuchukua hatua. Tunayo

dhamira ya dhati ya kuboresha elimu kwa kuongeza walimu, kuboresha hali ya shule,

maslahi ya walimu, pamoja na mazingira yao ya kufanyia kazi. Tuendelee kuzungumza

na kushauriana.

Nimefurahi kwamba mmesema kwenye risala yenu pia kuhusu utekelezaji wa

kuundwa kwa chombo cha majadiliano kati ya Serikali na Chama cha Walimu

Tanzania. Ni kweli Tanzania imeridhia mkataba wa Shirika la Kazi Duniani ILO No. 98

unaohusu haki za wafanyakazi kujadiliana na waajiri kuhusu maslahi na mazingira

bora ya kazi. Sheria ya majadiliano ya Watumishi wa Umma ilipitishwa na Bunge

mwaka 2003 na ilitangazwa kwenye gazeti la Serikali mwaka 2004.

Sheria hiyo inatumika ila haijaeleza wazi ni nani mwenye mamlaka ya kuunda

chombo/baraza la majadiliano (joint staff council). Kufuatia hali hiyo ziliandaliwa

kanuni ambazo zinatoa mwongozo kuhudu uundaji wa chombo cha majadiliano, na

kanuni hizo zilitangazwa kwenye Gazeti la Serikali mwaka 2005. Kwa umuhimu wa

suala hilo, naiagiza Menejimenti ya Utumishi wa Umma kukamilisha kanuni hizo ili

zianze kutumika.

Hata hivyo mie na nyie hatuna haja ya kungoja kanuni ndio tujadiliane masuala

ya maslahi ya Taifa letu. Tuendeleeni.

Ndugu Makamu wa Rais wa CWT, Ndugu Walimu,

Nimesema mengi. Naomba nimalizie kwa kuwapongeza tena walimu wote

nchini kwa kazi nzuri mnayoifanya. Natambua mazingira magumu mnayofanyia kazi

ila napenda kuwahakikishia dhamira yetu ya kuchukua hatua kuyaboresha. Nawasihi

walimu wa ngazi zote nchini kufanya kazi kwa bidii, kuheshimu taaluma yenu na

kuendelea kuwa kioo cha maadili mema kwa watoto tuliowakabidhi kufundisha na

kwa Watanzania kwa ujumla. Hatma ya taifa hili ipo mikononi mwa Walimu.

Nawashukuru tena kwa kunikaribisha kushiriki nanyi katika kilele cha Sherehe

za Siku ya Mwalimu Duniani kwa mwaka huu wa 2006.

Asanteni sana kwa kunisikiliza!