a lu oi2 kahakai. ua pā ka naʻau, akā ʻaʻole wau ʻike i ke kumu i ilihia ai ka puʻuwai....
TRANSCRIPT
1
KA ULU HOI
ʻO Waimea: He Kai Heʻenalu? na Kaimana Alexander
Nui nā moʻolelo e pili ana i nā wahi like
ʻole. Ua haʻi moʻolelo nā kūpuna, nā aliʻi,
nā kānaka āpau i nā moʻokūʻauhau o nā
ʻāina like ʻole. ʻO kēia mau pūʻulu, na lākou
i hoʻomau i nā moʻolelo o ko lākou mau
ʻāina, i mea e maopopo ai nā kuleana o ke
kanaka a me ka ʻāina, a e hoʻomōhala i nā
kumu e noho ai i ka ʻāina. Mālama ʻia nā
pilina a me nā inoa ʻāina kekahi. ʻO ia ke
kumu e hoʻomanaʻo ai kākou i nā inoa o nā
mōʻī, nā kāhuna, a me nā kiaʻi, no ka
ʻauamo ʻia e nā hanauna hou. Ke ola nei
kēia mau moʻolelo i ko kākou noho paʻa
ʻana i nei pae ʻāina. Inā nalowale nā inoa, nā
moʻolelo iā kākou, e nalohia ka ʻuhane o ka
ʻāina. E noiʻi i nā moʻolelo a e ulu ka hoi o
ka poʻe Hawaiʻi.
I kou kipa ʻana i kekahi ʻāina, maopopo iā
ʻoe kona moʻolelo? ʻO wai nā inoa o ka poʻe
i noho i laila? He aha ke kumu i kipa
pinepine ʻia ai? ʻO Waimea kahi i
hoʻohanohano ʻia no ka heʻenalu ʻana. Akā
he wahi nō hoʻi ia i noho ai ʻo kekahi
kahuna kaulana. I ka poʻi ʻana o kekahi nalu,
lele ka ʻehukai, uhi i ka ʻāina, a ola. Pēlā nō
nā moʻolelo. Ke hala aku ka manawa, pā ka
poʻe kānaka i ka moʻolelo, uhi akula ia
moʻolelo i ka ʻāina, a ola.
He kamaʻāina au no nā kapakai a me nā
poʻina nalu mai Waialua a i Koʻolauloa, akā
malihini wau i nā moʻolelo a me nā inoa
kahiko o laila. Ke heʻenalu au i nā wahi like
ʻole makemake wau e pili me ua ʻāina nei.
ʻO Waimea koʻu wahi mua i heʻenalu ai ma
kēia mau kapa kai. Loku ka mana i ke
2
kahakai. Ua pā ka naʻau, akā ʻaʻole wau ʻike
i ke kumu i ilihia ai ka puʻuwai. ʻEiʻa: he
wahi pana ʻo Waimea. I ke kalaiwa ʻana aku
i Koʻolauloa, a iaʻu e māʻalo ana iā Three
Tables ua kūkākūkā aʻela māua ʻo koʻu
hoaaloha, ʻī aku kekahi i kekahi, “No ke aha
lā i kapa ʻia ai kēia wahi ʻo Three Tables?”
ʻAʻohe a māua pane i ia nlnau. No laila, ma
kēia kōlamu nūpepa, e haʻi ʻia ana nā
moʻolelo o kēia mau wahi. E hoʻomaka ma
ka moʻolelo o Waimea, a laila i kēia mahina
aʻe e haʻi ʻia ka moʻolelo o Three Tables
(Rubber Duckies), a ma hope aku ʻo Sharkʻs
Cove a ʻo ka moʻolelo o Pipeline ka hope
loa. Aia nō wau i ka heʻenalu a me ke
kalaiwa i ia mau wahi i nā lā āpau a ua
kamaʻāina ʻole kēia mau moʻolelo iaʻu. No
laila, makemake wau e hoʻokamaʻāina iā
kākou a pau i ke kapa ʻana i nā inoa kahiko
o ia mau wahi i lohe mau ʻia i kēia wā nei
nō.
I ka noho mōʻī ʻana o Kahahana i Oʻahu, ua
kiʻi ʻia aku ʻo Kaʻōpulupulu e kekahi ʻelele
no ka hālāwai ʻana me Kahahana i Waikīkī.
He kahuna kaulana ʻo Kaʻōpulupulu. E noho
ana ʻo ia i Waimea ma luna o ka puʻu ʻo
Keanaloa. Ma kahi hoʻi i noho ai i uka, ua
kūkulu ʻia ka heiau ʻo Puʻu o Mahuka e
Ka’ōpulupulu. Eia ke kumu, inā e hoʻouka
ʻia ke kaua i laila, hiki ke ʻike koke aku i ka
ʻau waʻa e hōʻea ana mai kai mai, a
mākaukau ka poʻe.
Ua hiki mai ʻo Kaʻōpulupulu i Waikīkī, a
pūʻiwa ʻo Kahahana i ka noʻeau o
Kaʻōpulupulu ʻoiai lāua e kamaʻilio ana.
Lilo ʻo Kaʻōpulupulu i kahuna nui no
Kahahana. A hala he mau makahiki, na
Kahahana i hana ʻino i nā makaʻāinana a
hele a kaumaha ʻo Kaʻōpulupulu. ʻO kona
hoʻi akula nō ia i Waimea. Huhū maila ʻo
Kahahana, no laila, ʻupu aʻe kona manaʻo e
pepehi ʻia ʻo Kaʻōpulupulu. Ua kauoha ʻo ia
i nā koa e hoʻokō i kona makemake. I ka
lohe ʻana o Kaʻōpulupulu, hele pū me kāna
keiki ʻo Kaulupuʻe ma Kāʻanaīʻau i ka lae ʻo
Kaʻena. Na lāua e koho i ka make ʻana. Akā
naʻe ua hopu ʻia nō lāua e Kahahana mā, a
ua pepehi ʻia ʻo Kaulupuʻe ma mua o
Kaʻōpulupulu. Iā Kaʻōpulupulu e nānā ana i
ka make ʻana o kāna keiki, ua ʻī akula ʻo ia:
“I nui ke aho a moe i ke kai! No ke kai kā
hoʻi ua ʻāina.” A pepehi ʻia ʻo Kaulupuʻe.
Mai ka moʻolelo mai i aʻo mai ai i kekahi
haʻawina, akā naʻe nui nā haʻawina i loko
nei. I ka make ʻana o Kaulupuʻe mau nō
kona ola i ka ʻāina. Ke poʻi nā nalu i ka
ʻāina, e ʻike ʻia ana ʻo Kaulupuʻe. Na kēia
moʻolelo e hoʻomanaʻo i ka pili ʻana o nā
kānaka i ka ʻāina. Mai ka ʻāina mai ke ola, a
e hoʻi nō kākou i ka ʻāina i ka make ʻana. A
ʻike kākou i nā pilina i Waimea. ʻO ia hoʻi,
pili nā inoa, nā kānaka, a me nā moʻolelo i
ka ʻāina a e ola nō i ko kākou haʻi moʻolelo
ʻana. He wahi heʻenalu ʻo Waimea... a he
wahi pana kekahi.
"Kūlia i ka Nuʻu, i Mau ke Ea o ka
ʻAina i ka Pono." na Kawailehua Hamberg
I kēia au e holo nei, aia he mau nīnau e
nunenune ai ke poʻo no ka pono o ka Lāhui
Hawaiʻi. A i holomua mau loa ai ka Hawaiʻi
ma kēia au i hihia i ke kuanaʻike o ke aupuni
e noho hewa ana i ka ʻāina kūʻokoʻa nei ʻo
Hawaiʻi, maliʻa paha he alahele kīkeʻe ka
mea e waele ai, i loaʻa ka pane no kekahi
nīnau nui i hao wale maila i ka naʻau o kēia
wahi keiki Hawaiʻi ponoʻī.
3
Akā ʻaʻohe nō oʻu kānalua i ka pohihihi o
kēia nīnau aʻu e hāpai aku ana i mua o
ʻoukou e kuʻu mau makamaka heluhelu o ka
Lāhui Hawaiʻi. ʻO ke Ea o ke kanaka i
ʻaeʻoia ai kona ola, he ala kīkeʻe nō hoʻi
paha ka hele ʻana a loaʻa ʻo ia. No laila, eia
kuʻu nīnau iā ʻoukou, pehea kākou e ʻike ai i
ke Ea o ke kanaka i ʻaeʻoia ai kona ola? A
pehea e kanu ʻia ai kēia ʻōlelo laha loa iā
kākou, “Kūlia i ka nūʻū i maū ke Ea o ka
ʻāina i ka pono” i loko o ko kākou poʻe
Hawaiʻi noʻonoʻo ʻana?
ʻOiai ke kanu ʻia nei a laha loa ke koanaʻike
o ke aupuni noho hewa, ʻo ia o ʻamelika, ma
luna o kākou poʻe Hawaiʻi, a ma loko o ka
manaʻo ʻana no ka pono o ka Lāhui Kanaka
Hawaiʻi, pehea hoʻi kākou e kūlia aku i ko
kākou nuʻu, ʻaʻole i ko iala?
No ka Hawaiʻi hoʻi, he ala ʻokoʻa paha kā
kākou e hele ai i hōʻea kākou i ke kūlana
ʻaeʻoia o ke kanaka, a i Ea aʻe nō. I ke
koikoi ʻia ʻana mai o kēia nīnau pāhaʻohaʻo,
komo pū hoʻi ka manaʻo o ua aupuni hewa
lā, kohu ʻanoʻano i poholalo ʻia i loko o ka
noʻonoʻo o kākou Hawaiʻi. ʻO ia hoʻi ka
mākia laha, ka mea e pae ai i ka nuʻu o
ʻamelika, a 1oaʻa ka american dream, ʻo ia
ka hele ʻana a ʻaeʻoia ke kanaka ma o ka
lako kālā. Ua manaʻo ʻia paha ʻo ka lako
kālā ka mea e loaʻa ai ke Ea i ke kanaka. A
inā ʻo ka lako kālā ka mea e kuhi aku, ua
hōʻea nō ʻo ia i ke kūlana o ke ola ʻaeʻoia, ʻo
ke Ea nō hoʻi o ia kanaka, aia hoʻi i ka lako
kālā. ʻAʻohe paha aʻu pane. Eia naʻe, no ka
pono o ka Hawaiʻi, ʻo kēia anei nō ka nuʻu a
kākou e kūlia ai? I hōʻea ai ke kanaka
Hawaiʻi i ke kūlana o ia mea he kanaka
ʻaeʻoia, he koina paha ka lako kālā?
Eia naʻe ma kekahi ʻaoʻao ʻokoʻa, ke ʻōlelo
kākou: “Kūlia i ka nuʻu i mau ke Ea o ka
ʻāina i ka pono,” aia nō paha ke Ea o kākou i
ka ʻŌlelo ʻoiaʻiʻo o ua ʻāina nei. A inā ʻo ke
Ea i ka ʻŌlelo Hawaiʻi ka mea e ʻaeʻoia ai
ko kākou ola, he nuʻu paha ia Ea o ka ʻŌlelo
Makuahine e mau loa ai ka pono o kākou
Lāhui Hawaiʻi. ʻO ia kūlana ʻaeʻoia o ka
Hawaiʻi, aia nō paha i ke Ea o kāna ʻŌlelo e
hoʻomau a hoʻōla ai i ka pono o ka Lāhui
Hawaiʻi. Akā, inā mau nō ke alakaʻi ʻana
mai o ke kuanaʻike ʻamekila i ka noʻonoʻo,
ʻo ke Ea i ke kālā ka mea e kō ai ia kūlana,
ʻaʻole anei? ʻO ke kālā paha ka mea e lani ai
ʻo luna a honua ai ʻo lalo. ʻAʻole paha kākou
e ʻike.
Inā ke hōʻoia ʻia nei kou ola i ka mākia a
ʻamelika, ʻo ia hoʻi e Ea ke kanaka i ke kālā,
ua kanu ʻiʻo ʻia nō paha ka ʻanoʻano o ke
kuanaʻike haole o ʻamelika i loko o ka
noʻonoʻo. Ma laila paha ka pohihihi loa o
kēia nīnau nui aʻu e hāpai nei i mua o
ʻoukou. Eia naʻe, inā ʻo ke Ea i ka ʻŌlelo
Makuahine ka mea e hōʻike aku ai ua ʻaeʻoia
ka Lāhui, a ʻaʻole kā hoʻi ʻo ka lako kālā,
hemo ʻia ka mākia o ʻamelika mai loko o ko
kākou noʻonoʻo ʻana a kanu hou ʻia ka
noʻonoʻo o ka Hawaiʻi e “Kūlia i ka nuʻu i
mau ke Ea o ka ʻāina i ka pono.”
4
Hoʻokahuli Au ʻAna: Nā Mele a
Johnny Noble na ʻElia Akaka
Ua hoʻomaka kekahi mau pahu pepa e piha
ʻia i nā mea haliʻa aloha o kekahi ʻohana.
Aia he ʻelua kānaka, he makua a he ʻōpio
kāne, e nanea ana i ka hale kaʻa o ko lāua
hale i ka ʻoluʻolu o kekahi ahiahi o
Kepakemapa. ʻO kā lāua wae ihola nō ia i nā
mea hoʻohaliʻa o ka ʻohana: ʻo nā kiʻi ʻoe,
ka lole ʻoe, nā hōʻailona lanakila ʻoe, a me
kekahi mau mea ʻē aʻe i hoʻoili ʻia iho e kēlā
hānauna a i kēia. ʻElua “waihona” kahi e
waiho ʻia ai ia mau mea ʻohana, ʻo ka mua,
he pahu pepa hou, ʻo ka lua he ʻeke ʻōpala
uliuli. ʻ“Eiʻa,” i mea mai ai ka makua i ka
ʻōpio, me ka hāʻawi ʻana iā ia i paila pepa,
lenalena i ke kahiko, no ke kiloi ʻana aku. Iā
ia e hoʻokomo ana i nā pepa i loko o ke ʻeke,
ʻāiki liʻiliʻi maila kekahi mau huaʻōlelo, a
me kekahi mau hua mele kekahi; he mele ia.
A haka pono ke keikikāne, ʻike ʻo ia i kekahi
inoa koʻikoʻi, ʻo Johnny Noble ia. ʻ“Aʻole
kā hoʻi kēia he ʻōpala, he mea makamae ia e
peʻe ana i ka puʻe!” He puke ka mea i i
ʻoliʻoli ai ka naʻau o ua wahi ʻōpio nei i puni
i nā mele Hawaiʻi. ʻO wau iho nō ia ʻōpio, a
ʻo Johnny Noble’s Royal Collection of
Hawaiian Songs ka inoa o ia puke.
Ma Oʻahu iho nō i
ka makahiki 1892 i
hānau ʻia ai kēia
makeʻe o nā mele
Hawaiʻi. I kona wā
ʻōpio ma ke kula
kiʻekiʻe ʻo ia i aʻo
ai i ka pahu kani a i
ka piano. Ma o
kona launa ʻana me
Sonny Cunha, he
puʻukani a alakaʻi bāna ia, i aʻo ai ʻo Noble i
nā kaila mele ʻo ka jazz, ka ragtime, a me nā
blues nō hoʻi. I nā makahiki 1920 i piʻi aʻe
ai ka hoihoi o nā malihini i ka mākaʻikaʻi
ʻana mai i Hawaiʻi. No ia mea, hoʻomaka nā
bāna o Waikīkī e hoʻopili i ko lākou kaila
mele i ke ʻano o nā kaila mai ka ʻāina ʻē; ua
lilo ʻo Noble i meʻe o ia au hou. Ma ko
Noble hoʻopili ʻana i kēia kaila mele i ko ka
Hawaiʻi, kupu maila he kaila mele hou
koʻikoʻi o nā mele Hawaiʻi: ʻo ka hapa-
haole nō ia.
Iaʻu e nānā ana i nā mele o loko o ka puke,
he hoihoi ka ʻike ʻana i nā mele kamaʻāina
iā kākou i kēia mau lā, a me kekahi mau
mele i lohe pinepine ʻole ʻia. ʻO “Kāne’ohe,”
“ʻEhehene (Henehene) kō ʻAka,” a me
“Puʻuwaʻawaʻa” kekahi o nā mele i
hoʻonohonoho ʻia e kēia Johnny Noble, a
mau nō ko lākou kamaʻāina i kēia au. ʻO ka
mea hoihoi loa o ia loaʻa ʻana mai, ʻo ia ka
ʻokoʻa o nā inoa, nā leo, a me nā huaʻōlelo
hoʻi. ʻO ka hapa nui o nā mea i kākau ʻia iho
ma ua wahi puke nei, ua like nō me ka mana
i lohe mau ʻia i kēia lā, koe naʻe kekahi mau
mea (i hāpai ʻia aʻela ma mua). Eia aʻela
kaʻu e ui aku ai iā ʻoe: ʻo ka mana hea ka
mea ʻoiaʻiʻo? ʻO ka mana i lohe mau ʻia i
kēia mau lā, i kamaʻāina i ka hapa nui o nā
kānaka? A i ʻole ʻo ka mana i paʻi ʻia ma
kēia puke kahiko, i kākau a hoʻonohonoho
ʻia e kekahi loea mele o ia wā?
I ka hui hoʻokani pila o ka Hōtele Moana ka
hoʻāʻo o ua wahi haku mele nei (Johnny
Noble) e hoʻopili i nā mele Hawaiʻi i ke
ʻano a me ke kaila haole. Penei i loaʻa ai iā
kākou ka inoa o ia kaila hou: ʻo ka hapa-
haole. Wahi a ka pepa noiʻi laeʻula a
Masakazu Ejiri, he haumana laeʻula no ka
polokalamu ʻimi naʻauao o ke Kulanui nei o
Mānoa, “from the conservative viewpoint,
[hapa-haole] seemed to signify the
degradation and commercialization of
traditional Hawaiian music” (1996, pg. 196).
I ko Johnny Noble wā uʻi, ʻaʻole i
makemake ʻia ka hapa-haole e ka poʻe
nopaʻa o nā mele Hawaiʻi; he mea ia e
kālepa ʻia ai ka moʻomeheu o nā Hawaiʻi i
5
nā malihini e huakaʻi mai ana i nā kapakai
hinuhinu o kēia ʻāina. I kēia mau lā, ʻoi aku
ka mahalo o nā Hawaiʻi i ka hapa-haole,
ʻoiai ua lilo ia i māhele nani o nā mele
Hawaiʻi.
I ke eʻe ʻana mai o ke kenekulia iwakālua, a
i ka manawa hoʻi o ka hoʻokāhuli aupuni
Hawaiʻi, ua manaʻo paha nā Hawaiʻi i nā ala
hele e ola ai nā loina ʻōiwi o kēia ʻāina ma
ke au hou. Mau nō ka hāpai ʻia ʻana o ia
manaʻo i kēia au e holo nei. E kuʻu lāhui
aloha, ʻaʻohe hiki iā kākou ke noho paʻa ma
ka naʻaupō a me ka moloā a e hōʻole i nā
liliuewe o kēia manawa. Ma ka makaʻu i ka
loli ʻana ka make ʻana o ka Hawaiʻi. Mai
hele kākou ā hihia i ka makaʻu. E ola iā
kākou nā loina o ko kāua kūpuna i ka hōʻano
hou ʻana i nā mele.
He hei ka ʻike kupuna na ke keiki naʻauao.
ʻO kēia nō ka manawa o ka naʻauao. E like
me kā Noble a me kekahi mau meʻe like ʻole
o kēlā au, e hoʻāla aʻe kākou i nā ʻoihana
like ʻole, ʻaʻole ma ke mele wale nō. E lawe
ʻia ka maʻalea o ka pae ʻāina ʻo Hawaiʻi, a e
kūʻonoʻono, e hoʻi hoū kēia ʻāina i kona
nani a pae ponoʻīl ma ke kahua o ka honua.
He Leo Pai Pepa: He Puke Mele Lāhui: Nā Mele Kūpaʻa,
Nā Mele Kūʻē, A Me Nā Mele Aloha O Nā
Kānaka Maoli, na Leilani Basham
Na Kaimana Chock
Ke heluhelu ʻia ke poʻo inoa o kēia pepa nui
laeoʻo, ua hiki nō paha ke kuhihewa ʻia kēia
pepa he kālailai wale nō i nā mele, ʻo ia hoʻi
nā mele lāhui o Hawaiʻi. Eia nō naʻe, ua
piha kuʻi ʻo loko o kēia pepa i nā mea ʻē aʻe
ma waho aku o ke kālailai mele wale nō. He
pepa kēia e hoʻopololei aku ana i ka
moʻolelo o ko Hawaiʻi lāhui ma kahi o ka
wā i hoʻokahuli ʻia a kāʻili ʻia ai nō hoʻi ke
Aupuni Hawaiʻi e ka mana pākaha o kekahi
mau kāne haole. Ma kēia pepa nei, hōʻike ʻia
kekahi hapa o ka moʻolelo i hala aku i nā
hoʻopaʻa moʻolelo haole, no ko lākou ʻike
ʻole ʻana i ka ʻōlelo Hawaiʻi, a hiki ʻole ke
heluhelu ʻia nā manaʻo o nā Kānaka Maoli
no ko lākou aupuni ponoʻī. Ma ʻaneʻi nō, ua
ʻike ʻia nō ka ʻoiaʻiʻo o ia ʻōlelo laha ma ke
ao haole, na Winston Churchill i hoʻopuka:
“History is written by the victors.” Ua
lanakila ka poʻe haole o ia wā ma kekahi
ʻano ma ka hoʻohui ʻāina ʻana o Hawaiʻi me
ʻAmelika, a no ia kumu nō, ʻo ia ka
moʻolelo i laha loa ma ʻAmelika.
Eia naʻe, ua kū wiwoʻole mai ʻo Basham no
ke kākau hou i ka moʻolelo, ma ka ʻaoʻao e
hōʻike ana i nā manaʻo aloha ʻāina, aupuni, a
Mōʻī o ko Hawaiʻi poʻe kānaka. A ma o ia
hana, ua hōʻike mai ʻo Basham i ka lanakila
ʻana o ko kākou lāhui: ma o ko kākou hoʻōla
ʻana i ka ʻōlelo makuahine a ko kākou poʻe
kūpuna, ma laila nō kākou e aʻo hou ai i nā
moʻolelo o ko kākou lāhui, a hoʻomau aku i
6
ke kūpaʻa ma ke aloha ʻāina. ʻO ke aloha
ʻāina ka mea nui no ko kākou poʻe kūpuna, a
pēlā nō kākou e hoʻomau ai i ka pono o ka
ʻāina, a me ka pono o kākou kekahi. Ua
haku noʻeau ʻo Basham i kēia haʻi moʻolelo
ʻana ma o kāna kālailai ʻana i kekahi mau
mele lāhui, a hōʻike pū ʻo ia i ke kumu i
kupu mai ai ia ʻano mele, a me kona loli
ʻana i ke au o ka manawa. Hōʻike pū mai ʻo
Basham i ka manaʻo o nā poʻe e ola ana i ia
wā, a me ko lākou hoʻopaʻa ʻana i ko lākou
moʻolelo ponoʻī ma nā wahi like ʻole i mea
e mālama ʻia ai ia moʻolelo no kākou: nā
pua, nā lei, nā mamo.
Eia kekahi, ua pālua ka hana a Basham, no
ka mea ua kākau ʻia kāna pepa ma ka ʻōlelo
Hawaiʻi, a me ka ʻōlelo haole kekahi. Iaʻu e
heluhelu ana i kāna pepa ma ka ʻōlelo
Hawaiʻi, ua aʻo mai au he mau mea hou e
pili ana i nā hana i hāpai ʻia e hoʻokahuli
aku i ke aupuni; a manaʻo ihola au, kāhāhā,
inā i aʻo ʻia nā kānaka a pau e pili ana i nā
hana malū a pākaha i hana ʻia ma ʻaneʻi, inā
ua hoʻopololei koke ʻia paha ko kākou
aupuni!
Akā nō naʻe, ua minamina au i ka maopopo
ʻana mai o ka helu liʻiliʻi wale nō o nā
kānaka i hiki iā lākou ke heluhelu i ia pepa.
No laila, ma koʻu hiki ʻana aku ma ka
hopena o ka māhele ʻōlelo Hawaiʻi, ua
pūʻiwa au i ka nānā ʻana i ka māhele ʻōlelo
haole, a ʻupu aʻe ka mahalo nui i loko oʻu no
kā Basham hana nui. No kekahi kanaka
hoʻōla ʻōlelo Hawaiʻi, he hana kēia (ke
kākau ʻana ma nā ʻōlelo a ʻelua) e
hoʻopilikia ai i ka holomua o ka ʻōlelo; ke
loaʻa mai ka haole, e kāpae wale ʻia ana nō
paha ka Hawaiʻi. Eia naʻe, i koʻu manaʻo, he
mea nui keia a kākou e noʻonoʻo ai, ʻoiai he
mau ʻike waiwai a koʻikoʻi nō ma loko o
keia pepa, i hiki ke hoʻonaʻauao aku i nā
kānaka he nui i hiki ʻole iā lākou ke
heluhelu aku i ka ʻōlelo Hawaiʻi. ʻAe, ʻaʻole
paha kūpono ka haku ʻana i nā pepa laeoʻo a
pau ma o nā ʻōlelo ʻelua. Akā naʻe, i kekahi
manawa, he kūpono nō ia a he kōkua nui i
ka hapa (nui) o ka lāhui i maʻa ʻole i ka
heluhelu ma ka ʻōlelo makuahine, e like me
keia. I hoʻokahi nō wai o ka like.
Hele Malihini ia Manoa na J.W. Kamali
- mai loko mai o ka Buke Mele Lāhui. ʻaoʻao
23-25.
Aia i ka luna o Manoa,
Ke aloha aina e luana nei,
Oiai makou e walea ana,
Hone ana e ka Ua Kuahine,
Me he la no a e i mai ana,
Imiia e ka pono o ka aina,
Hanohano e ka ohu i ke kuahiwi,
Hooheno i ka lau o ka laau,
E pupue na hoa la i ke anu,
I mehana i ke kapa lau laau,
O ke kani a ka pupukanioe,
Hoolale mai ana la ua ao,
Ua ao kakou a e na hoa,
Eia o Hoku Loa la iluna,
O ka waiho kahela a Waahila,
Me Pali Luahine noho i ka lai,
Waiakeakua kau i ka iu,
Ia wai kaulana a ka malihini,
Malihini kuu ike ana i ka loa,
7
Na mile pau ole i ka heluia,
A lalo makou a o Manoa,
Ikeia na koa ki pololei,
Ilaila makou ike iho ai,
Ka uwahi noe o ka pu raifela,
Uina e ka leo pukuniahi,
Na hora helu o ke ahiahi,
E hai mai ana i ka mea hou,
Ua ahu aku la, pala ka maia,
O ke kau mai a Ualakaa,
Hooipo ana me Mauna Kamala,
Malama i ke aloha i ka aina,
O ka home mai na kupuna mai,
E ola makou a pau loa,
A puka i ke ao malamalama;
Hainaia mai ana ka puana,
Wilikoki hopo ole i ka enemi
________________________________________________
8
_____________________________
NA POʻE HOʻOPUKA NŪPEPA
Kaimana Alexander Kawailehua Hamberg
ʻElia Akaka Kaimana Chock
J.W. Kamali
LUNA HOʻOPONOPONO
Kahikina de Silva