climate, culture, change - inuktitut companion

ᓯᓯᓚᓚ,, ᐃᐃᓕᓕᖅᖅᑯᑯᓯᓯᖅᖅ,, ᐊᐊᓯᓯᔾᔾᔨᔨᕐᕐᓂᓂᖅᖅ

ᐃᓄᐃᑦ ᐊᒻᒪᓗ ᐅᑭᐅᖅᑕᖅᑐᒥ ᐅᖃᓪᓚᖃᑎᒌᓐᓂᖅ ᒥᒃᓵᓄᑦ ᐅᑭᐅᖅᑕᖅᑑᑉ ᐅᖅᑰᓯᕙᓪᓕᐊᓂᖓᓂ

ᑎᒥᑎ B ᓕᑕᒃ

ᕿᕿᓪᓪᓕᓕᖅᖅᑐᑐᒥᒥᒃᒃ ᑕᑕᕐᕐᕆᕆᔭᔭᕐᕐᓗᓗᓂᓂ ᒪᒪᓕᓕᒋᒋᐊᐊᓖᓖᑦᑦ:: ᐃᐃᓄᓄᒃᒃᑎᑎᑑᑑᓕᓕᖅᖅᑕᑕᐅᐅᓯᓯᒪᒪᔪᔪᑦᑦ ᕿᕿᓪᓪᓕᓕᖅᖅᑐᑐᒥᒥ ᓂᓂᓪᓪᓕᓕᐊᐊᔪᔪᒧᒧᑦᑦ

DVD Handbook: Inuktitut Translations of DVD Narration

ᓯᓚ, ᐃᓕᖅᑯᓯᖅ, ᐊᓯᔾᔨᕐᓂᖅ ᕿᓪᓕᖅᑐᒥᒃ ᑕᕐᕆᔭᕐᓗᓂ ᒪᓕᒋᐊᓖᑦ

ᑕᑯᔭᒃᓴᖅ 1 ᐊᒃᑐᕝᕙ 2004-ᖑᑎᓪᓗᒍ ᐃᒡᓗᓕᒑᕐᔪᒻᒧᑦ ᑎᑭᓚᐅᖅᓯᒪᔪᖓ ᐅᓪᓘᓐᓃᒃ ᒪᕐᕉᓐᓂᒃ ᑲᑎᒪᓯᓐᓈᑦ ᐃᓕᓐᓂᐊᖅᑎᑦᑎᔭᖅᑐᖅᑐᖓ ᑐᓴᒃᑲᓐᓂᕈᒪᓪᓗᓂ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒻᒪ ᖃᓪᓗᓈᑦ ᖃᐅᔨᒪᔭᖏᓐᓂᒃ ᐅᑭᐅᖅᑕᖅᑐᒥ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ. ᑕᕝᕙᓐᖓ ᐃᓕᓐᓂᐊᕐᓂᐅᔪᒥᒃ ᑐᓴᓚᐅᖅᑕᒃᑲᑦ ᐅᖃᖃᑎᒌᒍᑎᒋᖃᑦᑕᓕᓚᐅᕐᒥᔭᒃᑲ ᐊᓯᖏᓐᓄᑦ ᐃᓄᓐᓄᑦ ᐊᒻᒪ ᖃᓪᓗᓈᓄᑦ ᐊᕐᕌᒍᑦ ᑭᖑᓂᐊᒍᑦ ᑖᒃᓱᒪ. ᑕᐃᒪᓕ ᓴᖅᑭᓕᓚᐅᖅᑐᖅ 2007-ᒥ ᐃᓄᒃᑎᑑᓕᖅᑎᓯᒪᔪᖅ ᐅᓂᒃᑳᖑᔪᖅ ᐊᐅᓪᓚᖅᑎᑕᐅᓚᐅᖅᑐᖅ ᐃᒡᓗᓕᒑᕐᔪᒻᒧᑦ ᐊᒻᒪ ᐊᓯᖏᓐᓄᑦ ᓄᓇᕗᒻᒦᑦᑐᓄᑦ, ᒫᓐᓇᐅᔪᖅ ᐅᖃᓕᒫᒐᐅᓕᖅᑐᖅ. ᑖᒃᑯᐊ ᐅᖃᓕᒫᒐᐅᔪᑦ ᑎᑎᕋᖅᓯᒪᓪᓗᐊᑕᖅᑑᒐᓗᐊᑦ ᐃᓕᓐᓂᐊᕐᕕᒻᒥ ᐃᓕᓐᓂᐊᖅᑐᓄᑦ, ᓇᓗᓇᐃᖅᓯᔪᒪᓚᐅᕋᒪ ᖁᔭᓕᓂᕆᔭᕐᓂᑦ ᐊᕙᒃᑯᑎᖃᕐᓗᖓ ᐱᔭᐅᑲᐅᑎᒋᔪᓐᓇᖅᑐᒥ ᐃᓄᒃᑎᑑᖓᔪᒥᒃ. ᑖᒃᑯᐊ ᐃᓄᑦᑎᑑᓕᖅᑎᒃᓯᒪᔪᑦ ᐅᖃᓕᒪᒑᕋᓛᖑᔪᑦ ᐊᒻᒪ ᕿᓪᓕᖅᑐᖅ ᑕᕐᕆᔮᒃᓴᖅ ᐊᐅᓚᓐᖏᑦᑐᑦ ᑕᑯᒃᓴᐅᑎᑕᒃᑲ ᐃᓄᒃᑎᑑᓕᖅᓯᒪᓪᓗᓂ ᑕᐃᒪᐃᓐᓇᓲᑎᒋᔭᕋ.


ᑕᑯᔭᒃᓴᖅ 2 ᑎᑭᒋᐊᓐᖓᕋᒪ ᐃᒡᓗᓕᒑᕐᔪᒻᒧᑦ ᐊᒃᑐᕝᕙ 2004-ᒥ ᐊᒻᒪ ᑲᑎᒃᑲᒃᑯ ᓯᒥᐅᓂ ᓴᒻᒧᖅᑐᖅ ᐅᓂᒃᑳᕐᕕᐅᓚᐅᖅᓯᒪᔪᐊ ᐊᒻᒪ ᐃᓱᒪᒋᓂᐅᓴᑐᐃᓐᓇᓕᖅᑐᒍ.

ᓂᒋᐅᕐᒪ ᐅᖃᐅᖃᑎᖃᑦᑕᓚᕐᒫᖓ ᐃᓚᖏᑦ ᐆᒪᔪᐃᑦ ᑎᑭᑦᑕᕌᖓᑕ ᓇᐹᖅᑐᖃᑦᑐᒥᒃ ᐅᑭᐅᖅᑕᖅᑐᒨᖅᐸᓪᓕᐊᔪᑦ, ᕿᒪᒋᐊᖃᓚᐅᖅᑕᐃᑦ ᐆᒻᒪᑎᓐᓂ ᐊᒻᒪᓗ ᐃᓱᓐᓂᒃ. ᐅᖃᐅᑎᓪᓗᓂᖓ ᔩᓱᓯᒎᖅ ᑎᑭᓛᓕᖅᐳᖅ ᒫᓐᓇᕈᓗᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᓄ. - ᓯᒥᐅᓂ ᓴᕐᒧᖅᑐᖅ

ᓯᓚ ᐊᓯᔾᔨᖅᐸᓪᓕᐊᓕᖅᑎᓪᓗᒍ, ᖃᓄᖅ ᑐᑭᖃᖅᐸ “ᓂᐊᖁᕐᓃᑎᑐᐃᓐᓇᕐᓗᒍ ᐆᒻᒪᑎᓐᓂᓗ?”



ᑕᑯᔭᒃᓴᖅ 30

ᖁᔭᓐᓇᒦᒃᑲᓐᓂᕈᒪᑐᐃᓐᓇᓕᖅᑐᖓ ᑕᐃᒃᑯᓄᖓᓕᒫᖅ ᐃᑲᔪᓚᐅᖅᑐᓄᑦ ᑕᕝᕗᖓ ᐅᖃᓕᒫᒐᕐᒧᑦ, ᕿᓪᓕᖅᑐᒧᑦ ᑕᕐᕆᔮᒃᓴᒧᑦ ᐊᒻᒪ ᐅᖃᓕᒫᖓᖓᓄᑦ. ᓂᐱᓯ ᐃᓱᒪᑖᖅᑎᑦᑎᑲᓐᓂᓚᐅᖅᑐᑦ ᖃᓄᖅ ᐃᓱᒪᖃᕐᓂᕐᓂᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ ᐊᒻᒪ ᖃᓄᐃᓕᐅᖃᑦᑕᕐᓂᕆᔭᕐᓂᒃ ᑕᕝᕙᓂ ᓯᓚᕐᔪᐊᒥ. ᑕᕝᕗᖓ ᐅᖃᕐᓗᖓ, ᓄᖅᑲᐅᓯᕈᒪᔪᖓ ᐅᖃᓕᒫᕐᓗᒍ ᐃᓱᓕᒍᑎᖓ ᐅᖃᓕᒫᒐᐅᔪᑉ:

“ᐆᒻᒪᑎᑦᑎᓃᖔᖅᑐᒥ ᖃᓄᐃᓕᐅᕆᐊᖃᖅᑐᒍ ᑕᐃᓱᑐᓇᐅᓐᖏᑦᑐᖅ ᓴᒻᒧᖅᑑᑉ ᓂᖏᐅᖓᑕ ᐅᖃᐅᓯᕆᓚᐅᖅᑕᖓᓂᒃ “ᐆᒪᑎᓐᓃᑎᑐᐃᓐᓇᕐᓗᒍ ᐃᓱᒪᓐᓂᓗ,” ᐅᕝᕙᓗ ᔭᐃᐱᑎ ᐊᕐᓇᒃᑲᐅᑉ ᓇᓗᓇᐃᖅᑐᓚᐅᖅᑕᖓᓂᒃ ᐃᓄᐃᑦ ᖃᐅᔨᒪᔭᑐᖃᖏᑦ ᖃᐅᔨᒪᓂᐅᓗᓂ “ᐅᒃᐱᕈᓱᑦᑎᐊᕐᓗᓂ ᓄᓇ ᐱᒋᐊᕐᓂᖓᓂᒃ ᐊᒻᒪ ᐃᓱᓕᓐᓂᖓᓂᑦ.” ᓴᖅᑭᔮᖅᑎᑦᑎᓂᖅ ᑕᐃᒪᐃᑦᑐᒥᒃ ᓯᓚᑐᔪᒥᒃ ᓯᓚᕐᔪᐊᒥ, ᑲᓇᑕᒥ ᐊᒻᒪ ᐊᕕᒃᑐᖅᓯᒪᔪᓂ ᐊᓯᔾᔨᕐᓂᐅᔪᖅ ᐃᓕᖅᑯᓯᒃᑯᑦ ᖃᐅᔨᒪᔭᑦᑎᓐᓂᒃ ᐊᒻᒪ ᖃᐅᔨᒪᔾᔪᑎᒋᔭᑦᑎᓐᓂᒃ ᐅᓪᓗᒥᐅᔪᖅ ᓯᓚᒧᑦ ᐊᒃᓱᕈᕐᓇᖅᑐᓂᒃ.” (ᒪᒃᐱᒐᖅ 233)


ᑕᑯᔭᒃᓴᖅ 3 ᐃᒡᓗᓕᒑᕐᔪᒻᒨᓕᓚᐅᖅᓯᒪᔪᖓ ᑲᔪᖏᖅᑎᑕᐅᓕᖅᑐᖓ ᔭᐃᐱᑎ ᐊᕐᓇᑲᕐᒧᑦ, ᐃᓅᔪᖅ ᐅᖃᐅᓯᖃᖅᐸᑦᑐᑦ ᐃᓅᓯᕐᒥ ᐃᓱᒪᒋᔭᖓᓂᒃ ᐊᒻᒪ ᐊᑐᐊᒐᓕᕆᔨᐅᓪᓗᓂ ᐃᖃᓗᓐᓂ, ᓄᓇᕗᒻᒥ ᑖᓐᓇᓗ ᖁᔭᒌᓐᓇᓂᐊᖅᑐᒍ. ᐊᕐᕌᖑᓂ ᑎᓴᒪᓂᒃ, ᔭᐃᐱᑎ ᐅᕙᓐᓄᑦ ᑎᑎᕋᐃᓐᓇᖃᑦᑕᖅᓯᒪᔪᖅ ᖃᕋᓴᐅᔭᒃᑯᑦ ᐅᖃᐅᓯᖃᖅᑐᓂ ᐊᔾᔨᒌᓐᖏᑦᑐᓂᒃ ᐃᓄᐃᑦ ᐃᓱᒪᒋᔭᖏᓐᓂᒃ, ᐊᑐᐊᒐᕐᒧᑦ ᑐᕌᖓᔪᓂᒃ ᐊᒻᒪ ᖃᓄᖅ ᑕᒪᒃᑯᐊ ᐊᑦᑐᐊᓂᖃᑦᑕᕐᒪᖔᑕ ᓂᕈᐊᖅᑕᐅᓯᒪᔪᓄᑦ ᑮᓇᐅᔭᓕᕆᓂᕐᒧᑦ ᓴᖅᑭᔮᓕᖅᑐᓂᒃ ᓯᓚᐅᑉ ᐊᓯᔾᔨᐸᓪᓕᐊᓂᖓ ᐱᔾᔪᑎᒋᓪᓗᒍ. ᐅᖃᖃᑎᒌᖃᑦᑕᓕᕋᑖᖅᑐᓄᑦ, ᐊᐱᕆᓚᐅᕌᖓ ᖃᓄᐃᒻᒪᑦ ᑕᒪᒃᑯᐊ ᐊᕙᑎᒥᒃ ᖃᐅᔨᓴᖅᑎᐅᔪᑦ ᐊᒥᓱᑦ ᐃᓱᒪᖃᖃᓯᐅᑎᖃᑦᑕᖏᒻᒪᖔᑕ ᓯᓚᑐᓂᕐᒥᒃ, ᑕᒪᒃᑯᓇᓂ. ᐅᕙᓐᓄᑦ ᐅᖃᓚᐅᖅᑐᖅ,

ᓯᓚ ᐃᓱᒪᔅᓱᕐᒪᑦ, ᐃᓅᓪᓗᑕᓕ ᐱᓕᕆᐊᒃᓴᕆᕙᕗᑦ ᓯᓚᑐᓂᖓ ᐅᑦᔨᕆᒋᐊᕐᓗᒍ. - ᔭᐃᐱᑎ ᐊᕐᓇᑲᒃ

ᓯᓚᑐᓂᖅ, ᓂᐊᖁᖅ ᐊᒻᒪ ᐆᒻᒪᑎ, ᖃᓄᕐᖑᑯᐊ ᐊᑦᑐᐊᓂᖃᖅᑐᑦ ᑐᑭᓯᓂᕐᒧᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ? ᐊᔾᔨᒌᓐᖏᑐᑎᒍᑦ, ᑖᓐᓇᐅᔪᖅ ᑭᐅᓇᓱᓪᓗᐊᑕᖅᑕᕋ ᐅᖃᓕᒫᒐᓕᐊᕐᓂ.


ᑕᑯᔭᒃᓴᖅ 4 ᐃᒡᓗᓕᒑᕐᔪᒻᒥ ᐃᓕᓐᓂᐊᓂᖃᖅᑎᓪᓗᒋᑦ ᓯᒥᐅᓂᒃ ᑲᑎᒪᑎᑦᑎᔨᐅᖃᑎᒋᓚᐅᖅᑕᕋ, ᐊᒥᓱᒃᑲᓂᕐᓂ ᐊᑑᑎᖃᑦᑎᐊᖅᑐᓂ ᑐᓴᓚᐅᖅᑐᖓ, ᐱᖃᓯᐅᑎᓪᓗᒍ ᐅᖃᐅᓯᕆᓚᐅᖅᑕᖓ ᐃᓚᐃᑉ:

ᐃᓄᐃᑦ ᐃᓐᓇᑐᖃᖏᑦ ᐊᖏᖃᑎᖃᖃᑦᑕᖏᑦᑐᖅ ᖃᐅᔨᓴᖅᑎᓂᒃ ᑕᒪᒃᑯᐊ ᖃᐅᔨᓴᖅᑏᑦ ᖃᐅᔨᒪᓱᒋᒻᒪᑕ ᑭᓯᐊᓂᓕ ᖃᐅᔨᒪᖏᑦᑐᑦ. ᐃᓐᓇᓪᓚᕇᑦ ᐅᖃᕋᓱᒃᑲᓗᐊᖅᑎᓪᓗᒋᑦ ᖃᐅᔨᓴᖅᑎᓄᑦ, ᐊᖏᖃᑎᖃᕈᓐᓇᖏᑦᑐᑦ. - ᐃᓚᐃ ᑭᒻᒪᓕᐊᑦᔪᒃ

ᑖᓐᓇ ᐅᖃᐅᓯᕆᔭᖓ ᐊᒻᒪ ᐊᔾᔨᐸᓗᖏᑦ ᐅᖃᐅᓯᕆᔭᐅᓚᐅᖅᑐᑦ ᑐᓴᓐᖑᐊᑐᐃᓐᓇᓚᐅᓐᖏᑕᒃᑲ, ᐊᒻᒪ ᐃᒪᐃᓐᓇᓱᐊᖅᓯᒪᔪᖓ ᑕᕝᕙᓂ ᐅᖃᓕᒫᒐᕐᒥ ᐊᒻᒪ ᐅᖃᐅᓯᖃᖅᑎᓪᖓ ᓇᓗᓇᐃᑦᑎᐊᕋᓱᐊᖅᑎᓪᓗᒍ ᐊᓯᖏᓐᓄᑦ ᐅᖃᐅᓯᕆᔭᐅᓯᒪᔪᓂᒃ ᐃᓕᑕᕆᔭᐅᑦᑎᐊᖁᒧᑦ. ᓯᒥᐅᓂ, ᐃᓚᐃ ᐊᒻᒪ ᔭᐃᐱᑎ ᑐᑭᓯᑎᑦᑎᑲᓐᓂᓚᐅᖅᑐᑦ ᐅᕙᓐᓂᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ. ᑕᐃᒪᓕ, ᑖᒃᑯᐊ ᐅᖃᓕᒫᒐᐅᔪᑦ ᓇᓗᓇᐃᖅᓯᑦᑎᐊᕋᓱᐊᖅᐳᑦ ᑐᓴᖃᑦᑕᖅᓯᒪᔭᕐᓂᒃ ᐊᓯᖏᓐᓂᒃ ᐊᒻᒪ ᖃᓄᖅ ᑕᒪᒃᑯᐊ ᐃᓱᒪᒋᔭᐅᔪᑦ ᑐᓴᖅᑎᑎᒃᑲᓐᓂᓚᐅᕐᓂᖓᓂᒃ ᐅᕙᖓ ᐃᓱᒪᒋᔭᖏᓐᓂᒃ ᐊᓯᔾᔨᐸᓪᓕᐊᖏᓐᓇᖅᑐᓂᒃ ᓯᓚᐅᑉ ᐊᓯᔾᔨᐸᓪᓕᐊᓂᖏᓐᓂᒃ. ᓂᕆᐅᓐᓂᖃᑦᑎᐊᕋᓗᐊᖅᐳᖓ ᑖᒃᑯᐊ ᐱᔭᕇᖅᓯᒪᓕᖅᑐᑦ ᒪᓕᓐᓂᐊᖅᑐᒃᓴᐅᕗᑦ ᓱᓕᔪᖅᓴᕈᒪᓂᕐᓂᒃ ᐊᔾᔨᒌᓐᖏᑦᑐᓂᒃ ᓂᓪᓕᐊᔪᓂᒃ ᑐᓴᖃᑦᑕᖅᓯᒪᔭᕐᓂᒃ ᐅᑭᐅᓂᒃ 6-ᓂᒃ ᐊᓂᒍᖅᑐᓂ.



ᓄᖅᖃᕈᑎᒋᓪᓗᐊᑕᖅᑕᖓ ᐅᖃᓕᒫᒐᓕᐊᒪ ᐃᓚᓕᐅᔾᔭᐅᔭᕆᐊᖃᕐᓂᖏᑦ ᐃᓕᖅᑯᓯᒃᑯᑦ ᑐᑭᓯᐅᒪᓂᐅᔪᑦ ᑕᒪᒃᑯᐊ ᐃᓄᐃᑦ ᐃᒪᐃᖁᔨᓂᖏᓐᓂᒃ ᖃᓪᓗᓈᓂᒃ ᖃᐅᔨᓴᖅᑎᐅᔪᓂᒃ ᐃᓕᒃᑲᓐᓂᕆᐊᖃᕐᓂᖏᓐᓂᒃ ᖃᓄᐃᑦᑐᑦ ᖃᐅᔨᒪᓂᐅᔪᑦ ᐃᓱᒪᒋᔭᐅᖃᓯᐅᔾᔭᐅᔭᕆᐊᖃᕐᒪᖔᑕ. ᐄ, ᐃᓄᐃᑦ ᓄᓇᒥᒃ ᖃᐅᔨᒪᓂᖓ ᓯᓚᒥᒃ ᐊᒻᒪ ᐆᒪᔪᕐᓂᒃ ᐱᒻᒪᕆᐅᒻᒪᑦ, ᑭᓯᐊᓂᓕ ᑕᒪᒃᑯᐊ ᐱᒋᐊᖅᓯᒪᓂᖏᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᐊᑦᑐᐊᓂᖃᕐᒪᑕ ᐃᓕᖅᑯᓯᐅᒐᔪᑦᑐᓄᑦ. ᑕᐃᒪᓕ ᐱᒻᒪᕆᐅᕗᖅ ᐊᑐᖅᑕᐅᔭᕆᐊᖃᕐᓂᖏᓐᓂᒃ ᐃᓄᐃᑦ ᑐᑭᓯᐅᒪᔭᖏᓐᓂᒃ ᓯᓚᑐᓂᕐᒥᒃ, ᓯᐊᑦᓇᒥᒃ, ᐱᑦᑕᐃᓕᔭᐅᔭᕆᐊᖃᖅᑐᓂᒃ ᐊᒻᒪ ᐊᓯᖏᓐᓂᒃ ᐃᓕᖅᑯᓯᐅᓲᓂᒃ ᖃᓄᖅᑑᕈᑎᖃᖅᐸᓪᓕᐊᓇᓱᐊᖅᑎᓪᓗᑕ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ. ᒫᓐᓇᐅᔪᖅ ᐱᓕᕆᐊᖃᖅᑐᖓ ᐊᕙᑎᓕᕆᓂᕐᒧᑦ ᐃᓕᓴᐃᔨᐅᓪᓗᖓ ᔪᐊᒃ ᓯᓚᑦᑐᓴᕐᕕᖓᓂ ᐃᓱᒪᖃᖅᑐᖓ ᖃᓄᖅ ᑕᒪᒃᑯᐊ ᐅᓂᒃᑳᖅᑐᐊᖑᔪᑦ ᑕᕝᕙᓂ ᐅᖃᐅᓯᕆᓯᒪᔭᒃᑲ ᐃᓕᑉᐹᓪᓕᕈᑕᐅᔪᓐᓇᕐᒪᖔᑕ ᐊᕙᑎᑦᑎᓃᑦᑐᓄᑦ ᓱᕐᓗ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ. ᖃᐅᔨᔪᒪᑦᑎᐊᖅᑐᖓ ᐃᓱᒪᒃᓴᖅᓯᐅᕐᓂᕐᒧᑦ ᖃᓄᖅ ᑕᒪᒃᑯᐊ ᐅᖃᐅᓯᐅᓯᒪᔪᑦ ᑕᕝᕙᓂ ᐅᖃᓕᒫᒐᐅᔪᒥ ᐊᑐᖅᑕᐅᔪᓐᓇᕐᒪᖔᑕ ᑕᐃᒪᐃᑦᑐᓂᒃ, ᐅᖃᐅᓯᖃᕈᒪᔪᖃᕈᓂ ᐅᕙᓐᓄᑦ ᐅᖃᕈᓐᓇᖅᑐᑎ ᖃᖓᑐᐃᓐᓇᑦᑎᐊᒃᑯᑦ.


ᑕᑯᔭᒃᓴᖅ 28 ᑕᐃᒪᓕᑦᑕᐅᖅ ᐅᖃᐅᓯᕆᔭᐅᔪᖃᓚᐅᕆᓪᓗᓂ ᐃᓕᓴᐱ ᐃᒡᓗᓕᒑᕐᔪᒻᒥᐅᑕᐅᔪᖅ:

ᖃᖓᑕᓲᑦ ᑕᕆᐅᑉ ᐊᑭᐊᓃᓐᖓᖅᑐᑦ ᖃᖓᑕᖃᑦᑕᖅᑐᑦ ᖁᓚᐅᑦᑎᓪᓗᑎᒃ ᓄᓇᑦᑎᓐᓂ ᐊᒻᒪᓗ ᓱᕈᐃᖃᑦᑕᖅᑐᑦ ᓄᓇᒋᔭᑦᑎᓐᓂᒃ. - ᐃᓕᓴᐱ ᑕᐅᑐ

ᖃᖓᑕᓲᒥᒃ ᓱᕈᕈᔪᐃᑦ ᐱᕚᓪᓕᐅᑎᖃᒻᒪᕆᑦᑐᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ, ᐊᒻᒪ ᑕᐃᒪᐃᓐᖏᓐᓂᕋᖅᑕᐅᔪᓐᓇᖅᑐᓂ ᑕᒪᒃᓱᒧᖓ ᓯᓚᒧᑦ ᑭᐅᔾᔪᑎᒋᔪᓐᓇᑕᑦᑎᓐᓄᑦ. ᐆᒃᑑᑎᒋᓗᒍ 2009-ᒥ ᓯᓚᕐᔪᐊᒥ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᑲᑎᒪᕐᔪᐊᑐᖃᓚᐅᕐᒪᑦ ᑰᐸᓐᕼᐊᐃᒐᓐᒥᒃ, ᑎᐊᓐᒫᒃ. ᓂᕈᐊᖅᑕᐅᓯᒪᔪᑦ ᐊᒻᒪ ᐊᕙᑎᓕᕆᔨᐅᔪᑦ ᖃᖓᑕᓪᓗᑎᒃ ᑎᑭᓚᐅᖅᑐᑦ ᓯᓚᕐᔪᐊᒦᓐᖔᖅᓯᒪᔪᑦ, ᐅᖔᑖᓂᓚᐅᖅᑐᑦ 140 ᓇᒻᒥᓂᕆᔭᐅᔪᑦ ᖃᖓᑕᓲᑦ ᓱᐱᔪᑦ ᓄᖅᑳᖓᓚᐅᖅᑐᑦ ᖃᖓᑕᓲᒃᑯᕕᒻᒥ ᐊᒻᒪ ᑕᐃᒃᑯᐊ ᐋᖅᑭᒃᓱᐃᓚᐅᖅᑐᑦ ᑎᑭᑎᑦᑎᓚᐅᖅᑐᑦ ᑕᐅᕙᓐᖓᑦ ᐅᖓᑖᓃᑦᑐᓂᒃ 1,000-ᓂ ᐊᒥᓱᓂᒃ ᐅᓯᔪᓐᓇᖅᑐᓂ ᓄᓇᓯᐅᑎᓂᒃ ᓄᒃᑕᕈᑕᐅᔪᒫᕐᓂᐊᖅᑐᓂᒃ ᑲᑎᒪᔭᖅᑐᖅᓯᒪᔪᓄᑦ ᑲᑎᒪᕕᒋᓂᐊᖅᑕᖏᓐᓄᑦ ᑐᔪᕐᒥᕕᖏᓐᓄᓪᓗ. ᐅᑭᐅᒃᓂᒃ 6-ᓂᒃ ᐱᓕᕆᐊᖃᓕᖅᑎᓪᓗᖓ ᐅᖃᓕᒫᒐᓕᐊᕆᔭᕐᓂᒃ, ᖃᖓᑕᓗᐊᕐᔭᐃᖅᓯᒪᕙᑦᑐᖓ ᐊᒻᒪ ᓄᓇᓯᐅᓗᐊᖅᑕᐃᓕᒪᓕᖅᑐᖓ ᓯᓚᒧᑦ ᐊᑦᑐᐃᔪᓐᓇᕐᓂᖓ ᐱᔾᔪᑎᒋᓪᓗᒍ. ᑕᐃᒪᓕ ᖃᖓᑕᑦᑕᐃᓕᒪᓂᖅᓴᒻᒪᕆᐅᓕᕋᒪ, ᑕᒪᒃᑯᐊ ᖃᐅᔨᔾᔪᑎᒋᔭᒃᑲ ᖃᐅᔨᓴᕐᓂᕐᓂᒃ ᑐᓂᖔᖅᑐᒋᑦ ᕿᓪᓕᖅᑐᒃᑯᑦ ᑕᕐᕆᔮᒃᓴᒃᑯᑦ ᐊᒻᒪ ᐊᓯᖏᑎᒍᑦ ᖃᖓᕋᓴᐅᔭᒃᑯᑦ ᐊᑐᖔᖅᑐᖓ. ᑕᐃᒪᓕᐅᕈᓐᓇᖅᑐᖓ ᑕᕝᕙᓂ ᐃᓅᓯᕆᔭᕐᓂ ᑕᒫᓂ ᑐᕌᓐᑐᒥ, ᐊᒻᒪ ᖃᓄᐃᓕᐅᕋᓱᐊᖅᑐᖓ ᐃᓚᒋᔭᐅᖃᑕᐅᓂᕆᔭᕐᓂᒃ ᐅᑭᐅᖅᑕᖅᑑᑉ ᓯᓚᖓᑕ ᐆᓇᖅᓯᕙᓪᓕᐊᓂᖓᓂᒃ.



ᐅᕝᕙᐅᑯᐊ ᐃᓄᐃᑦ ᐃᑲᔪᕐᓂᖃᓚᐅᖅᑐᑦ ᐃᓱᒪᐅᔪᒥᒃ ᑕᕝᕙᓃᑦᑐᒥ ᐅᖃᓕᒫᒐᕐᒥ ᑕᕝᕙᓂ ᐊᕐᕌᒍᓂ 6-ᓂ ᐊᕐᕌᒍᓂ ᐊᓂᒍᖅᑐᓂ. ᐱᖃᓯᐅᔾᔪᑦ ᔭᐃᐱᑎᒥᒃ ᐊᒻᒪ ᐃᓕᓐᓂᐊᖅᑎᓪᓗᑕ ᐃᓚᒋᔭᐅᖃᑕᐅᓚᐅᖅᑐᓂᒃ ᐃᒡᓗᓕᒑᕐᔪᒻᒥ, ᐊᒻᒪ ᐊᓯᖏᑦ ᐊᔾᔨᒌᓐᖏᑦᑐᑦ ᐃᓱᒪᒃᓴᖅᓯᐅᕈᑕᐅᔪᑦ ᐃᖃᐃᖃᑦᑕᓚᐅᖅᑕᒃᑲ ᖃᐅᔨᓴᕐᓂᒃᑯᑦ, ᑎᑎᕋᖅᑕᐅᖃᑦᑕᖅᓯᒪᔪᑦ ᐃᓄᓐᓄᑦ ᓲᕐᓗ ᓰᓚ ᐅᐊᑦ-ᑯᓗᑦᓯᐊᐃ ᐊᒻᒪ ᑕᕆᔮᓕᐊᖑᓯᒪᔪᑦ ᐅᓂᒃᑳᖅᓯᒪᔪᑦ ᐅᑯᓇᓐᖓᑦ ᒫᑎᓐ ᕿᓪᓚᖅ ᐊᒻᒪ ᔮᓐ ᕼᐃᐅᔅᑕᓐ. ᐃᒪᐃᓕᓯᒪᒐᒪ ᐅᖃᓕᒫᒐᐅᔪᒥ:

“ᖃᐅᔨᒪᔪᐊᓘᓐᖏᑦᑐᖓ ᐃᓄᐃᑦ ᐃᓕᖅᑯᓯᖏᓐᓂᒃ ᐅᕝᕙ ᐅᑭᐅᖅᑕᖅᑐᒥ ᐃᓅᓯᕆᔭᐅᔪᒥᒃ - ᑕᐃᒫᒃ ᑭᓯᐊᓂ ᐅᖃᕐᕕᒃᓴᐅᒐᔭᕐᒪᑦ ᐅᑭᐅᖅᑕᖅᑐᒥ ᓄᓇᖃᖅᓯᒪᓗᓂ. ᑭᓯᐊᓂᓕ, ᑭᒡᒐᑐᑦᑎᐊᕋᓱᐊᖅᑕᒃᑲ ᓱᓕᑦᑎᐊᖅᑐᒥ ᐅᑉᐱᕆᓪᓗᒋᓪᓗ ᐅᖃᐅᓯᕆᔭᐅᖃᑦᑕᖅᓯᒪᔪᑦ ᐃᓄᓐᓄᑦ ᐊᔾᔨᒌᓐᖏᑦᑐᓄᑦ, ᐊᑕᐅᓯᒃᑯᑦ ᐃᓱᒪᒋᓪᓗᒋᑦ ᐊᑦᑐᐃᓯᒪᓂᕆᑐᐃᓐᓇᕆᐊᖃᖅᑕᖏᑦ ᑲᓇᑕᒥ ᐊᒻᒪ ᖃᓪᓗᓈᑦ ᐃᓱᒪᖃᕐᓂᕆᔭᖏᓐᓂᒃ ᓯᓚᐅᑉ ᐊᓯᔾᔨᐸᓪᓕᐊᓂᖏᓐᓂᒃ. ᑕᒻᒪᕐᓂᕈᒪ ᐱᖃᓯᐅᑎᑦᑎᐊᕈᓱᐊᕐᓗᒋ ᐊᒻᒪ ᑐᑭᓕᐅᑦᑎᐊᕋᓱᐊᕐᓗᒋᑦ ᐃᓱᒪᒋᔭᖏᑦ ᑕᐃᒪᐃᒃᑲᔭᖅᐳᖅ ᖃᐅᔨᒪᓐᖏᓐᓂᑯᓐᓄᑦ ᐃᓕᖅᑯᓯᖏᓐᓂᓪᓗ ᖃᐅᔨᒪᓂᕐᓄᑦ ᖃᐅᔨᓴᖅᑎᐅᓪᓗᖓ ᓄᓇᖃᖅᑐᖓ ᖃᓪᓗᓈᑦ ᓄᓇᖓᓐᓂ ᑐᕌᓐᑐᒥ.” (ᐱᒋᐊᕋᑖᕐᓂᖓᓂ ᒪᒃᐱᒐᖅ v)



40 ᐳᓴᓐᑎᑲᓴᖏᑦ ᑕᕝᕙᓂ ᐅᖃᓕᒫᒐᒥᒃ ᓴᖅᑭᓯᒪᔪᑦ ᐊᔾᔨᒌᓐᖏᑦᑐᐊᓗᓐᓂ ᐃᓄᐃᑦ ᓂᓪᓕᐊᖃᑦᑕᖅᓯᒪᓂᖏᓐᓂᒃ, ᐊᒥᐊᒃᑯᖏᓪᓕ ᐊᐅᓪᓗᔾᔨᓪᓗᐊᑕᖅᑎᓪᓗᒋᑦ ᑲᓇᑕᒥᐅᑕᐅᔪᓂ ᐅᕝᕙ ᓯᓚᕐᔪᐊᒦᖔᖅᓯᒪᔪᑦ ᐃᓱᒪᒋᔭᖏᓐᓂᒃ ᓯᓚᐅᑉ ᐊᓯᔾᔨᐸᓪᓕᐊᓂᖏᓐᓂᒃ. ᑕᒪᔾᔭ ᖃᐅᔨᓯᒪᔭᒃᑲ, ᐃᓕᓯᒪᓪᓗᒋᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᖃᐅᔨᓴᕐᓂᕆᓚᐅᖅᑕᕐᓄᑦ ᔪᐊᒃ ᓯᓚᑦᑐᓴᕐᕕᔾᔪᐊᒥ ᑐᕌᓐᑐᒥ ᐊᒻᒪ ᐃᓕᓯᒪᔭᕐᓂᒃ ᐃᓄᓕᕆᔨᐅᓪᓗᖓ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂ. ᑕᕝᕙᓂ ᐅᖃᓕᒫᒐᐅᔪᒥ, ᐅᖃᐅᓯᕆᓇᓱᐊᖅᑕᒃᑲ ᐃᓄᐃᑦ ᑐᑭᓯᐅᒪᔭᖏᑦ ᐊᔾᔨᒌᓐᖏᑦᑐᓄᑦ ᖃᓪᓗᓈᓄᑦ ᐃᓱᒪᒋᔭᐅᔪᓂᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ, ᐱᖃᓯᐅᑎᓪᓗᒋᑦ ᓯᓚᐅᑉ ᖃᓄᐃᑦᑑᓂᖓ, ᐊᑐᓕᖅᑕᐅᓯᒪᔪᑦ ᑲᒪᔾᔪᑕᐅᔪᑦ, ᐃᑦᑕᕐᓂᓴᐅᔪᑦ, ᓂᕈᐊᖅᑕᐅᓯᒪᓂᕐᒧᑦ ᖃᐅᔨᓴᕐᓂᕐᒧᑦ ᐊᒻᒪ ᐅᒃᐱᕐᓂᒃᑯᑦ ᐃᓱᒪᒋᔭᐅᔪᑦ ᐆᒪᔪᓂ ᐊᒻᒪ ᓇᔪᖅᑕᖏᓐᓂᒃ. ᐅᖃᖅᑲᐅᒐᒪ ᐱᒋᐊᓕᕋᑖᖅᑐᖓ, ᐱᕙᓪᓕᐊᑎᓪᓗᖑ “ᐃᓕᒃᑲᓐᓂᖅᓯᒪᔪᖓ ᐃᓄᐃᑦ ᐃᓕᖅᑯᓯᖏᓐᓂᒃ ᐊᒻᒪ ᖃᐅᔨᒪᔭᖏᓐᓂᒃ, ᑭᓯᐊᓂᓕ ᓴᖅᑮᑲᓐᓂᖅᓯᒪᓪᓗᖓ ᑲᓇᑕᒥ ᐃᓕᖅᑯᓯᕆᖃᑦᑕᖅᓯᒪᔭᑦᑎᓐᓂᒃ ᐊᒻᒪᖃᓄᐃᒻᒪᑦ ᓄᑖᖑᔪᑦ ᐃᓱᒪᖃᕐᓂᐅᔪᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᑭᓐᖑᒪᔭᐅᒻᒪᖔᑕ.” (ᒪᒃᐱᒐᖅ VI).



ᐊᑕᐅᓯᖅᑕᐅᖅ ᐃᓄᒃ ᐃᓱᒪᒃᓴᖅᓯᐅᕈᑎᖃᒃᑲᓐᓂᐅᑎᒋᓚᐅᖅᑕᖓ ᐱᑦᑕᐃᓕᔭᐅᔭᕆᐊᖃᖅᑐᑦ ᒥᒃᓵᓄᑦ ᑕᒪᐅᖓ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᓰᓚ ᐅᐊᑦ- ᑯᓗᐊᑦᓯᐊᐃ. ᐆᒃᑑᑎᒋᓗᒍ, 2009-ᖑᑎᓪᓗᒍ ᐅᖃᓚᐅᕐᒪᑦ:

ᓄᓇᕐᔪᐊᕐᒥᐅᓂᒃ ᑎᓕᐅᕆᓇᓱᐊᖅᑎᓪᓗᑕ ᐊᓯᔾᔩᖁᓪᓗᑎᒍ ᐆᒪᔫᓂᕐᒥᒃ ᐊᑐᖅᑕᖏᓐᓂᒃ ᐱᐅᔪᓐᓃᐸᓪᓕᐊᑎᑦᑎᑐᐃᓐᓇᑎᓪᓗᒋᑦ, ᑕᒪᒃᑯᐊ ᐊᑐᖅᑕᐅᖁᖏᑕᕗᑦ ᓄᓇᒋᔭᑦᑎᓐᓂ ᐊᑐᕆᐊᖃᖏᑎᐊᖅᐸᕗᑦ ᐊᒃᓱᕈᒻᒪᕆᓕᕋᓗᐊᕐᕈᑦᑕ ᐃᖅᑲᓇᐃᔭᕆᐊᖃᕐᓂᕐᒧᑦ ᐅᕝᕙᓘᓐᓃᑦ ᑮᓇᐅᔭᑎᒍᑦ ᐱᕈᖅᐸᓪᓕᐊᓇᓱᐊᕐᓂᕐᒧᑦ -ᓰᓚ ᐅᐊᑦ-ᑯᓘᑦᑕᐃ, ᑎᓯᐱᕆ 2009

ᐃᓱᒪᒋᐊᖅᑎᓚᐅᕐᒪᖓ ᖃᓪᓗᓈᑦ ᐊᒻᒪ ᑲᓇᑕᒥ ᒐᕙᒪᐅᔪᑦ ᑮᓇᐅᔭᓕᐅᕈᒪᓂᖏᓐᓂᒃ ᐃᓚᒋᒻᒪᒋᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ - ᓲᕐᓗ ᐅᖅᓱᐊᓗᒃᓯᐅᓐᓂᖅ ᑕᐅᓇᓂ ᐊᓪᐴᑕᒥ ᓯᐅᕋᒥ ᐅᖅᓱᐊᓗᕈᔪᐃᑦ ᐊᒻᒪ ᐊᐅᒃᐸᓪᓕᐊᓂᖓᓄᑦ ᐅᑭᐅᖅᑕᖅᑐᒥ ᓱᓪᓗᐊᓗᒻᒥ - ᐊᒻᒪ ᑕᒪᒃᑯᐊ ᐊᑐᖅᑕᐅᓂᐊᖅᐸᑕ ᖃᓄᖅ ᐃᓕᖅᑯᓯᐅᔪᑦ ᐊᓯᔾᔨᕆᐊᖃᕐᓂᐊᕐᒪᖔᑕ.



ᐅᓪᓗᒥ ᓯᓚ ᐱᔾᔪᑎᒋᓪᓗᒍ ᐆᒪᔪᐃᑦ ᐊᓯᔾᔨᐸᓪᓕᐊᓂᖏᓐᓄᑦ, ᐊᐱᖅᓱᐸᓪᓕᐊᓕᓚᐅᖅᑐᖓ ᐃᓄᐃᑦ ᐃᓕᖅᑯᓯᖏᑦ ᐱᔾᔪᑎᒋᓪᓗᒋᑦ ᖃᓄᖅ ᓯᐊᑦᓇ ᖁᕕᐊᓱᓐᖏᔾᔪᑎᖃᕐᒪᖔᖅ. ᑐᓴᖅᓯᒪᔪᖓ ᐊᒻᒪ ᐅᖃᓕᒫᖃᑦᑕᖅᓯᒪᓪᓗᖓ ᐅᓂᒃᑳᓂ ᔭᐃᐱᑎᒧᑦ, ᕼᐃᐅᔅᑕᓐᒧᑦ ᐊᒻᒪ ᐊᓯᖏᓐᓂᒃ ᑕᐃᓐᓇ ᓯᐊᑦᓇ ᐆᒪᔪᖃᖅᑎᑦᑎᓲᖑᓐᖏᒻᒪᑦ ᐊᖑᓇᓱᑦᑕᐅᔪᓐᓇᖅᑐᒥᒃ ᑕᒪᒃᑯᐊ ᐱᑦᑕᐃᓕᒪᔾᔪᑕᐅᔪᑦ ᒪᓕᒃᑕᐅᓐᖏᑉᐸᑕ. ᐊᑕᐅᓯᐊᕋᓗᐊᖅᑐᓂ “ᓄᓕᐊᔪᒃ” ᐃᓐᓇᒻᒪᕆᐅᔪᖅ ᐅᖃᐅᔾᔨᔪᖅ ᕼᐃᐅᔅᑕᓐᒥᒃ ᐃᓄᐃᑦ ᑐᑭᓯᐅᒪᓂᖏᑦ ᐱᑦᑕᐃᓕᒪᔾᔪᑕᐅᔪᓂᒃ ᐃᓕᑕᐅᔭᕆᐊᖃᕐᒥᔪᑦ ᑭᖑᕚᖏᓐᓄᑦ ᔭᒐᑐᐃᓐᓇᓚᐅᓐᖏᓐᓂᖏᓐᓂᒃ, ᐊᒻᒪ ᐅᖃᒃᑲᓂᖅᑐᓂ ᐃᓱᒪᒃᓴᖅᓯᐅᕈᑕᐅᒃᑲᓐᓂᕆᐊᖃᖅᑐᑦ ᑕᑯᓐᓇᕐᓗᒍ ᖃᓄᐃᓕᐅᕐᓂᐅᓕᖅᑐᖅ ᐅᓪᓗᒥᐅᔪᖅ. ᑕᒪᓐᓇ ᐊᔾᔨᐸᓗᑐᐃᓐᓇᕆᓚᐅᖅᑕᖏᑦ ᐃᓱᒪᒋᔭᖏᑦ ᔭᐃᐱᑎᐅᑉ ᐅᕙᓐᓄᑦ ᐅᖃᐅᓯᕆᓚᐅᖅᑕᖏᓐᓂᒃ:

ᖃᐅᔨᓴᕐᒪᕆᖃᑦᑕᓕᖅᑎᓪᓗᒋᑦ ᖃᐅᔨᔪᓐᓇᖅᑐᒍᖅᑲᐃᑦ ᐊᑦᔨᐸᓗᖏᓐᓂᒃ ᐊᑐᖁᔭᐅᖏᑦᑐᓂᒃ. ᑕᒪᒃᑯᐊ ᐃᓅᓯᖃᑦᑐᑦ ᒪᓕᒐᕆᔭᐅᔪᑦ ᑲᑎᓪᓗᒋᑦ ᓯᓚᑐᓂᕆᔭᕆᐊᖃᑉᐸᕗᑦ. - ᔭᐃᐱᑎ ᐊᕐᓇᑲᒃ

ᐅᖃᓚᐅᖅᑐᖅ ᑕᒪᒃᑯᐊ ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪ ᖃᓪᓗᓈᑦ ᖃᐅᔨᒪᓂᕆᔭᖏᑦ ᐱᔾᔪᑎᒋᓪᓗᒋᑦ ᐅᖃᖃᑎᒋᒍᑕᐅᔪᓐᓇᖅᑐᑦ ᓱᓕᔪᖅᓴᖃᑦᑕᐅᑎᓗᑎᒃ, ᑕᐃᒪᓕᖃᐃ ᓄᑖᖑᔪᑦ ᐱᑦᑕᐃᓕᔭᕆᐊᖃᖅᑐᑦ ᐃᑲᔪᖅᐹᓪᓕᕈᓐᓇᖅᑐᑦ ᑲᑐᔾᔨᓗᑕ ᐃᓱᒪᒃᓴᖅᓯᐅᕈᓐᓇᕐᓗᑕ ᓯᓚᕐᔪᐊᒥ ᐊᒻᒪ ᓄᓇᓕᓐᓂ ᐃᓱᒪᒋᔭᐅᔪᓂᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ. ᑕᒪᒃᑯᐊ ᐃᓱᒪᒋᓪᓗᒋᑦ ᐃᓱᒪᒃᑲᓐᓂᓕᓚᐅᖅᐳᖓ ᓯᐊᑦᓇᒥᒃ ᐱᔾᔪᑎᒋᓪᓗᒋᑦ ᐱᓕᕆᕕᐅᔪᓂᒃ ᐊᒻᒪ ᖃᓪᓗᓈᑦ ᓄᓇᖓᓐᓃᖔᖅᑐᓂᒃ ᓱᕈᕐᓇᖅᑐᓂᒃ.



ᑕᐃᓕᓯᒪᔪᖅ ᐃᓱᒪᒋᔭᖓᓄᑦ ᔭᐃᐱᑎᐅᑉ ᐊᒻᒪ ᐊᓯᖏᓐᓂᒃ ᐃᓄᓐᓂᒃ, ᓯᓚᑐᓂᖅ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᑐᓐᖓᕕᒋᓪᓗᐊᑕᓚᐅᖅᑕᕋ ᐅᖃᓕᒫᒐᕐᒥ, ᑐᕌᖓᓂᖓᓄᑐᐃᓐᓇᐅᖏᑦᑐᖅ ᐃᓄᐃᑦ ᐃᓱᒪᒋᔭᖏᓐᓄᑦ. ᕿᓂᓚᐅᕐᒥᔪᖓ ᓯᓚᑐᓂᕐᒥᒃ ᖃᓪᓗᓈᑦ ᐃᓱᒪᒋᔭᖏᓐᓂᒃ ᓯᓚᒧᑦ ᖃᐅᔨᓴᕐᓂᕐᒧᑦ. ᐊᑕᐅᓯᖅ ᐆᑦᑑᑎᑦᑎᐊᕙᐅᔪᖅ ᐃᖃᐃᓚᐅᖅᑐᕋ ᐅᖃᐅᓯᕆᔭᐅᓯᒪᔪᖅ ᓯᓚᓕᕆᔨᐅᔪᒧᑦ ᓯᐱᐊᓐᓱ ᕕᐅᕐᑦ.

ᑐᑭᓯᐅᒪᓂᖅᐳᑦ ᓯᓚᒥᒃ ᐅᖓᑖᓅᖓᔪᖅ ᖃᐅᔨᓴᖃᑦᑕᖅᑐᑦ ᐅᓂᒃᑳᖏᓐᓂᒃ... ᓯᓚ ᓯᕗᓂᕆᓂᐊᖅᑕᑎᓐᓂ ᒪᓕᑐᐃᓐᓇᕆᐊᓕᒃ ᖃᓄᖅ ᐃᓱᒪᒋᒻᒪᖔᑦᑎᒍ. ᐃᓱᒪᒋᔭᕗᑦ ᓇᓗᓇᐃᖅᑎᕆᓂᐊᕐᒪᑦ ᖃᓄᐃᓕᐅᕐᓂᑎᓐᓂᒃ. - S. R. ᕕᐅᑦ, ᓯᓚᒥᒃ ᖃᐅᔨᓴᕐᓂᕐᒧᑦ

ᔭᐃᐱᑎᒧᓪᓕ, ᐅᖃᐅᓯᖃᖅᑑᔮᕐᒪᑦ ᓯᓚ ᐊᑦᑐᐊᓂᖓᓄᑦ ᑕᒪᐅᖓ ᖃᓄᖅ ᐃᓱᒪᔪᓐᓇᓂᑦᑎᓐᓄᑦ ᐊᒻᒪ ᑭᐅᖃᑦᑕᓂᑦᑎᓐᓄᑦ. ᐅᖃᖅᓯᒪᓪᓚᕆᓐᖏᑦᑑᒐᓗᐊᖅ ᓯᓚᑐᓂᕐᒥᒃ, ᕿᓂᕈᑎᒋᒃᑲᓐᓂᓕᓚᐅᖅᑕᕋ ᐊᔾᔨᒌᓐᖏᑦᑐᓂᒃ ᐃᓕᖅᑯᓯᐅᔪᓂᒃ ᖃᓪᓗᓈᓪᓕ ᐊᔾᔨᒌᓐᖏᑦᑐᑦ ᐃᓕᖅᑯᓯᖏᓐᓂᒃ ᐃᓱᒪᒃᓴᖅᓯᐅᕈᑎᒋᔪᓐᓇᕐᓗᒍ ᐊᑑᑎᖃᕐᓂᖓᓂᒃ ᓯᓚᑐᓂᒃᑯᑦ ᑲᒪᒋᔭᐅᓂᖓᓄᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ. ᐊᒃᓱᐊᓗᓪᓗ ᐃᓕᒃᑲᓐᓂᕈᒪᓕᓚᐅᖅᑐᖓ ᐃᓄᐃᑦ ᐃᓱᒪᒋᔭᖏᓐᓂᒃ ᓯᓚᑐᓂᐅᑉ ᒥᒃᓵᓄᑦ.



ᔭᐃᐱᑎᐅᑉ ᐃᓱᒫᓗᒍᑎᒋᔭᖓ ᓯᓚᑐᓂᐅᑉ ᒥᒃᓵᓄᑦ ᐊᒻᒪ ᐊᑦᑐᐊᓂᖓ ᐊᔾᔨᒌᓐᖏᑦᑐᓄᑦ ᐃᓄᐃᑦ ᐃᓱᒪᒋᔭᖏᓐᓄᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᐅᖃᐅᓯᕆᓪᓗᐊᑕᓕᓚᐅᖅᑕᕋ ᐅᖃᓕᒫᒐᐅᑉ ᓯᕗᓪᓕᖅᐹᖓᓂ ᓴᑉᑕᖓᓂ “ᓯᓚᒧᑦ ᓯᓚᑐᓂᖅ ᐊᓯᔾᔨᖅᐸᓪᓕᐊᑎᓪᓗᒋ.” ᐃᒡᓗᓕᒑᕐᔪᒻᒥ, ᑐᓴᖃᑦᑕᓚᐅᖅᑐᖓ ᐊᔾᔨᒌᓐᖏᑦᑐᓂᒃ ᐅᖃᐅᓯᐅᔪᓂᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ ᐅᕝᕙᓗ ᓯᓚᒥᒃ, ᐊᒻᒪ ᖃᓄᖅ ᐊᑦᑐᐃᓂᖃᕐᒪᖔᖅ. ᑕᒪᒃᑯᐊ ᐅᖃᐅᓯᕆᔭᐅᓯᒪᔪᑦ ᑲᐃᔅᒧᕐᒧᑦ ᐊᒻᒪ ᐋᓐᑐᕆᒧᑦ ᐆᒃᑑᑎᑐᐃᓐᓇᐅᔪᒃ ᒪᓕᒻᒥᔪᑦᑕᐅᖅ ᖃᐅᔨᔭᐅᖃᑦᑕᖅᓯᒪᔪᓂᒃ ᐃᓄᓐᓂᒃ:

ᖃᐅᔨᒪᖃᑦᑕᓚᐅᖅᓯᒪᔪᑦ ᖃᓄᖅ ᓯᓚ ᐊᓯᔾᔨᐸᓕᐊᒻᒪᖔᑦ, ᐅᖃᐅᓯᐅᖃᑦᑕᓚᐅᖅᓯᒪᔪᖅ ᐊᒻᒪᓗ ᓯᕗᓂᐊᒍᑦ ᖃᐅᔨᒪᕙᑦᑐᑎᒃ. ᒫᓐᓇᓕ ᐊᑦᔨᒋᔪᓐᓃᖅᑕᖓ, ᐅᖃᕈᓐᓇᐃᓪᓕᔪᑎᑦ ᖃᓄᐃᓕᖓᓂᐊᕐᒪᖔᑦ ᐃᑲᕐᕋᐅᓂᐊᖅᑐᒥᒃ ᐅᕝᕙᓘᓐᓃᑦ ᐅᓪᓗᑐᖃᐅᓕᖅᐸᑦ. ᑕᐃᒃᓱᒪᓂᑑᕈᓐᓃᖅᑐᖅ ᐊᕐᕌᒍᑦ 100 ᐊᓂᒍᓕᖅᑐᓂ ᐃᓄᐃᑦ ᖃᐅᔨᒪᓂᖏᑎᒍᑦ ᓇᓚᐅᒃᑖᕆᔪᓐᓇᓚᐅᖅᑐᑦ. - ᑲᓯᒧᕐ ᕿᑏHᐅᑉ



ᐊᒥᓱᐊᖅᑎᖅᑐᒍ, ᑐᑭᓯᓇᓱᐊᓗᐊᖅᓯᒪᔪᖓ ᐅᑭᐅᓂᒃ 7-ᓂᒃ ᐊᓂᒍᖅᑐᓂᒃ ᖃᓄᖅ ᓯᓚᑐᓂᖅ ᐊᒻᒪ ᓯᐊᑦᓇ ᐅᖃᕋᓱᐊᕐᒪᖔᑦ ᐊᓯᔾᔨᕐᓂᐅᔪᓂᒃ ᐅᓪᓗᒥᐅᔪᖅ ᑕᑯᔭᐅᕙᓕᖅᑐᓂᒃ ᐅᑭᐅᖅᑕᖅᑐᒥ ᐆᒪᔪᖏᓐᓂ. ᑎᑎᕋᖅᓯᒪᔪᖅ ᓴᑉᑕ 6-ᒥ ᓇᓗᓇᐃᖅᓯᔪᖅ ᐊᔪᕈᑎᒋᓚᐅᖅᑕᒃᑲᓂᒃ ᑐᑭᓯᓇᓱᐊᖅᑐᒍ ᖃᓄᐃᑦᑑᓚᐅᕐᓂᖓᓂᒃ ᓯᐊᑦᓇ:

“ᓯᕗᓪᓕᐅᑎᑦᑎᓇᓱᐊᕐᓂᕐᒧᑦ ᖃᓪᓗᓈᑦ ᐃᓱᒪᒋᔭᖏᓐᓂᒃ ᑐᑭᓯᔪᓐᓇᖏᔾᔪᑎᒋᓚᐅᖅᑕᕋ ᓯᐊᑦᓇᒥᒃ, ᐊᕐᓇᒃᑲᐅᑉ ᐊᐱᕆᓚᐅᕐᒪᖓ ‘ᑕᑯᓐᓇᖁᓪᓗᖓ ᓄᓇᒥᒃ, ᐊᕙᑎᒥᒃ ᐊᒻᒪ ᐆᒪᔪᕐᓂᒃ ᐃᒃᐱᒋᔭᐅᑦᑎᐊᓗᑎᒃ ᐃᖅᑲᒋᔭᐅᔭᕆᐊᖃᖅᑐᑦ.’” (ᒪᒃᐱᒐᖅ 183)

ᑕᒪᓐᓇ ᐊᔾᔨᒋᓐᖏᒻᒪᕆᑦᑕᖓ ᐃᓕᓴᑎᑕᐅᓂᕆᓚᐅᖅᑕᕐᓂᒃ, ᑕᒪᒃᑯᐊ ᖃᓪᓗᓈᑦ ᐃᓱᒪᒋᔭᖏᓐᓂᒃ ᓱᓕᔪᖅᓴᕐᓗᑎᒃ ᓯᓚᕐᔪᐊᒥ ᑭᓱᑐᐃᓐᓇᐃᑦ, ᐊᑐᐃᓐᓇᐅᔪᑦ, ᐱᔨᑦᑎᕈᑕᐅᔪᑦ ᐊᒻᒪ ᖁᕕᐊᓇᓐᖏᑦᑑᒐᓗᐊᑦ ᐱᓂᕐᓗᓐᓂᐅᕙᒃᑐᑦ ᐊᐅᓚᑕᐅᔪᓐᓇᖅᑐᑦ ᐅᕝᕙᓗ ᑲᒪᒋᔭᐅᔪᓐᓇᖅᑐᑦ ᐃᓚᒋᑐᐃᓐᓇᖏᓪᓗᒍ. ᐃᓄᐃᑦ ᐅᖃᐅᓯᖏᑦ ᐅᖃᓕᒫᒐᐅᔪᓂ ᓲᕐᓗ ᐃᒪᐃᑦᑐᑦ “ᐅᖃᓗᕋᐃᑦ” ᐊᒻᒪ ᕼᐃᐅᔅᑕᓐ “ᓄᓕᐊᔪᒃ” ᐃᓱᒪᒃᓴᖅᓯᐅᕈᑎᒋᒃᑲᓐᓂᓕᓚᐅᖅᐸᒃᑲ ᐃᓕᓯᒪᔭᒃᑯᑦ ᐅᒃᐱᕆᔭᒃᑯᑦ, ᓱᕐᓗ “ᐊᖓᒃᑰᕙᑦᑐᒥᓂᒃ” ᐅᖃᓚᐅᖅᓯᒪᒻᒪᑦ ᕼᐃᐅᔅᑕᓐᒧᑦ:

ᓯᐊᑦᓇᐅᑉ ᓂᓐᖓᒐᐃᒻᒪᑦ ᑳᑦᑎᑦᑎᖃᑦᑕᓚᐅᖅᑐᖅ, ᐊᓄᕌᖅᑐᒻᒪᕆᐊᓘᓪᓗᓂ, ᓄᓇᕐᔪᐊᕐᕗᑦ ᐋᖅᑭᒃᓯᒪᒍᓐᓃᖅᑐᓂᒃ, ᐊᒻᒪᓗ ᐊᖓᒃᑯᐃᑦ ᑭᓯᐊᓂ ᐋᖅᑭᒃᓯᔪᓐᓇᖅᑐᑎᒃ. – ᐊᖓᒃᑯᒥᓂᖅ ᐅᖃᑦᑐᖅ ᔮᓐ ᕼᐃᐅᔅᑕᒻᒧᑦ



ᐃᒡᓗᓕᒑᕐᔪᒻᒥ, ᑐᓴᖃᑦᑕᓚᐅᕐᒥᔪᖓ ᐊᔾᔨᑐᐃᓐᓇᐸᓗᖏᓐᓂᒃ ᐃᓱᒫᓗᒍᑕᐅᔪᓂᒃ ᐃᖃᓗᐃᑦ ᒥᒃᓵᓄᑦ ᐊᒻᒪ ᐃᒪᐅᔪᒧᑦ, ᖃᖓᒃᑰᓂᖓ ᑕᒪᒃᑯᐊ ᑎᖕᒥᐊᑦ ᒪᓐᓂᖃᓕᖃᑦᑕᕐᓂᖏᓐᓂᒃ, ᐊᒥᓲᓕᕐᓂᖏᓐᓄᑦ ᓇᓄᐃᑦ ᐊᒻᒪ ᑎᑭᒃᐸᓪᓕᐊᓂᖏᓐᓄᑦ ᖃᓪᓗᓈᓂᕐᒥᐅᑕᐅᔪᑦ ᖁᐸᓄᐊᑦ ᑎᒻᒥᐊᑦ. ᐊᓯᖏᑦ ᐅᑭᐅᖅᑕᖅᑐᒥᐅᑕᐅᔪᑦ ᓄᓇᓕᐅᔪᑦ ᐊᔾᔨᐸᓗᑐᐃᓐᓇᖏᓐᓂᒃ ᖃᐅᔨᓯᒪᒻᒥᔪᑦ. ᑕᒫᓂ ᐊᓯᔾᔨᐸᓪᓕᐊᓂᕐᒧᑦ ᓇᓗᓇᖅᑐᒦᑎᓪᓗᑕ, ᔭᐃᐱᑎ ᐅᖃᐅᑎᓚᐅᕐᒪᖓ ᐃᓄᐃᑦ ᖃᐅᔨᒪᔭᑐᖃᖏᑎᒍᑦ ᑲᑐᔾᔨᔭᕆᐊᖃᕋᑦᑕ ᖃᐅᔨᓯᒪᔭᒃᑯᑦ ᐃᓕᑕᐅᓯᒪᔪᑦ “ᓱᓕᓂᖅᐸᐅᒻᒪᑦ ᐊᒻᒪ ᐊᑑᑎᖃᕐᓂᖅᐸᐅᓪᓗᑎᒃ” ᖃᐅᔨᓇᓱᐊᖅᑎᓪᓗᑕ ᐃᓄᐃᑦ ᖃᓄᐃᓕᓂᐊᕐᒪᖔᑕ. ᐊᔾᔨᒌᐸᓗᓐᓂᖅᑕᖃᑐᐃᓐᓇᕐᒪᑦ ᑖᒃᑯᓇᓐᖓᑦ ᓯᓚᐅᑉ ᖃᐅᔨᓴᖅᑎᓄᑦ ᖃᐅᔨᓴᖅᑕᐅᓂᖓᓄᑦ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ, ᑭᓯᐊᓂᓕ ᑲᑐᔾᔨᓗᑕ ᔭᐃᐱᑎ ᓇᓗᓇᐃᖅᓯᓚᐅᕐᒪᑦ ᐃᒃᓱᒪᒃᓴᖅᓯᐅᒃᑲᓐᓂᕆᐊᖃᓚᐅᖅᐳᖓ ᐃᓄᐃᑦ ᐃᓕᖅᑯᓯᑐᖃᖏᑎᒍᑦ ᑐᑭᓯᐅᒪᓂᕐᒥᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ. “ᓄᓕᐊᔪᒃ” ᕼᐃᐅᔅᑕᓐ, ᔭᐃᐱᑎ ᑐᑭᓯᐅᒪᔭᖏᑦ ᐊᒻᒪ ᐃᓱᒪᒋᔭᖏᑦ ᐊᓯᖏᑦ ᐃᓄᐃᑦ ᐃᑲᔪᖅᐹᓪᓕᓚᐅᖅᑐᖅ ᐃᓱᒪᒋᖃᓯᐅᑎᓗᒋᑦ ᐆᒪᔪᐃᑦ ᓯᓚᒧᑦ ᒪᓕᑦᑐᑎᒃ ᐊᓯᔾᔨᐸᓪᓕᐊᓂᖏᓐᓂᒃ ᐊᑦᑐᐊᓂᖃᖅᑐᖅ ᓯᐊᑦᓇᒧᑦ.



ᐃᓄᐃᑦ ᖃᐅᔨᒪᓂᕆᔭᖏᑦ ᓱᓕᓚᐅᖅᑐᑦ ᑕᐃᒃᓱᒪᓂ ᐊᓯᔾᔨᐸᓪᓕᐊᓚᐅᖏᒻᒪᑦ ᓄᓇᕐᔪᐊᕐᕗᑦ. ᖃᐅᔨᒪᓚᐅᖅᑐᑦ ᖃᓄᐃᓕᐅᖅᐸᓪᓕᐊᓂᐅᔪᒥᒃ ᓯᓚᒧᑦ ᑎᓴᒪᓄᑦ ᐊᕐᕌᒎᑉ ᐃᓗᐊᓂ. ᐅᓪᓗᒥᓕ ᓯᓚ ᐊᒃᓱᐊᓗᒃ ᐊᓯᔾᔨᖅᓯᒪᓕᕐᒪᑦ ᐃᓄᐃᑦ ᖃᐅᔨᒪᓂᖏᑦ ᐱᑕᖃᕈᓐᓃᖅᑐᑦ ᓈᓚᐅᒃᑖᕆᔪᓐᓇᐃᓕᒻᒪᑕ ᓯᓚᐅᑉ ᐊᓯᔾᔨᕐᓂᖓᓂᒃ. - ᐋᑐᕆ ᑕᐅᑐ

ᐊᕐᕌᒍᑦ ᓯᕗᓂᐊᒍᑦ ᑲᑎᓚᐅᕐᓇᒍ ᔭᐃᐱᑎ ᐅᕝᕙᓗ ᐃᒡᓗᓕᒑᕐᔪᒻᒨᓚᐅᕐᓇᖓ. ᑕᕐᕆᔮᖑᔪᖅ ᑕᑯᓐᓇᓚᐅᖅᓯᒪᔭᕋ “ᓯᓚ ᐊᓪᓚᓐᖑᖅᑐᖅ” ᑕᑯᒃᓴᐅᑎᑦᑎᔪᑦ ᐃᓄᓐᓂᒃ ᐃᒃᑲᕼᐅᕐᒥ ᐅᖃᐅᓯᖃᖅᑐᖅ ᓯᓚᐅᑉ ᐊᓯᔾᔨᕐᓂᖓᓂᒃ.


ᑕᑯᔭᒃᓴᖅ 10 ᑕᐃᒪᓕ ᓯᓚᒥᒃ ᖃᐅᔨᓴᕐᓂᐅᔪᖅ ᑕᐃᒪᖃᑦᑕᕐᒪᑦ ᐅᑭᐅᖅᑕᖅᑐᒥ ᓯᓚᐅᑉ ᐊᑦᑐᐃᓂᕆᔭᖓᓂ ᖃᐅᔨᓴᕐᓂᐅᔪᖅ ᑎᑎᕋᖃᓯᐅᔾᔨᖃᑦᑕᕐᒪᑕ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐅᓪᓗᒥᐅᔪᖅ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ - ᑕᕝᕙᓂ ᑕᑯᔭᐅᓯᒪᔪᑦ ᐅᖃᖅᑕᐅᓯᒪᔪᓂ:

ᓯᓚ, ᑐᑭᖃᑉᐳᖅ ‘ᓯᓚ,’ ᐊᒻᒪᓗ ᐅᖃᐅᓯᖅᑕᖃᖏᑦᑐᖅ ᓇᓗᓇᐃᕐᕋᓱᐊᕐᓗᒍ ᓯᓚ (weather) ᐊᒻᒪᓗ ᓯᓚ (climate). - ᓯᓚᐅᑉ ᐊᓯᔾᔨᕐᓂᖓᓂᒃ ᖃᐅᔨᓴᖅᑏᑦ



ᖃᐅᔨᒪᔭᐅᔪᖅ ᑐᑭᓯᑲᐅᑎᒋᔪᓐᓇᓛᕆᓚᐅᖅᑕᕋ ᑕᒪᒃᑯᐊ ᖃᐅᔨᓴᖅᑎᐅᔪᑦ ᐊᒻᒪ ᐃᓄᐃᑦ ᖃᐅᔨᓴᖃᑦᑕᖅᓯᒪᔭᖏᑦ ᖃᓄᖅ ᓯᓚᐅᑉ ᐊᓯᔾᔨᐸᓪᓕᐊᓂᖓ ᐊᑦᑐᐃᓂᖃᕐᒪᖔᖅ ᐆᒪᔪᕐᓂᒃ - ᐅᖃᕋᓱᐊᓐᖏᑦᑐᖓ ᐊᔾᔨᒌᓐᖏᑦᑐᖃᓐᖏᒻᒪᑦ ᐃᓱᒪᒋᔭᐅᔪᓂᒃ ᓲᕐᓗ ᑕᒪᒃᑯᓄᐊ ᓇᓄᕐᓄᑦ. ᑖᒃᑯᐊᓕ ᖃᐅᔨᓴᖅᑎᓄᑦ ᖃᐅᔨᔭᐅᓯᒪᔪᑦ ᑎᑎᕋᖅᓯᒪᔭᖏᑦ ᐊᒻᒪ ᐅᑭᐅᖅᑕᖅᑐᒥ ᓯᓚᒧᑦ ᐊᑦᑐᐃᓂᖃᓄᖅ ᖃᐅᔨᒪᖅᑕᐅᓂᖏᓐᓄᑦ ᑕᑯᒃᓴᐅᑎᑦᑎᓪᓗᑎᒃ, ᓯᓚᒧᑦ ᖃᐅᔨᓴᖅᑎᔪᑦ ᑎᑎᕋᖅᐸᓪᓕᐊᔪᑦ ᐊᔾᔨᒌᓐᖏᑦᑐᓂ ᐊᑦᑐᐃᓂᖃᕐᓂᖏᓐᓂᒃ ᐃᒪᐃᑦᑐᓄᑦ ᐆᒪᔪᓄᑦ ᓇᑦᑎᖅ, ᐃᖃᓗᒃ, ᑎᒻᒥᐊᑦ ᐊᒻᒪ ᐊᓯᖏᑦ ᐆᒪᔪᑦ ᐊᑦᑐᖅᑕᐅᓯᒪᓂᖏᑦ ᓯᓚᐅᑉ ᐆᓇᖅᓯᕙᓪᓕᐊᓂᖓᓄᑦ.



ᑖᓐᓇᑑᓚᐅᓐᖏᑦᑐᖅ, ᐊᒥᓱᑦ ᖃᓪᓗᓈᑦ ᖃᐅᔨᓴᖅᑎᐅᔪᑦ ᐊᔾᔨᐸᓗᖏᓐᓂᒃ ᐅᖃᖃᑦᑕᖅᓯᒪᒻᒪᖅ ᐊᑐᖅᑕᐅᖃᑦᑕᕐᓂᖏᓐᓂᒃ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂᒃ ᐃᓱᒪᖅᓲᑕᐅᓇᑎᒃ. ᐆᒃᑑᑎᒋᓗᒍ, ᐆᒃᑑᑎᒋᓗᒍ ᔫᓕ ᑯᕈᒃᓵᒃ ᐅᖃᓚᐅᖅᑐᖅ:

ᓄᓇᓕᕆᓂᕐᒧᑦ ᖃᐅᔨᒪᓂᑐᖃᕆᔭᐅᔪᑦ ᑲᔪᓯᓂᖃᑉᐳᖅ ᐱᑕᖃᑦᑎᑦᑎᓂᕐᒥᒃ ᖃᐅᔨᒪᓂᐅᔪᒥᒃ ᐱᒻᒪᕆᐅᓗᓂ ᓇᓗᓇᖅᑐᓕᕆᓂᒃᑯᑦ ᑕᒪᓐᓇ ᖃᐅᔨᒪᓂᑐᐃᓐᓇᖅ ᐱᓕᕆᐊᒃᓴᑐᐃᓐᓇᐅᖏᓪᓗᓂ ᑐᓴᐅᒪᑎᑦᑎᓂᑐᐃᓐᓇᐅᖏᓪᓗᓂ ᓇᓗᓇᖅᑐᓕᕆᓂᒥᒃ. - J. ᑯᕈᐃᒃᓵᒃ, ᐃᓕᖅᑯᓯᕐᒥᒃ/ᐱᐅᓯᕐᓂᒃ ᖃᐅᔨᓴᖅᑎ

ᐅᖃᒃᑲᓂᕐᓗᒍ, ᐃᓄᐃᑦ ᖃᐅᔨᒪᔭᑐᖃᖏᑦ ᓄᓇᒥᒃ ᖃᐅᔨᒪᓂᕆᔭᖏᑦ ᐊᖏᖅᑕᐅᓯᒪᑐᐃᓐᓇᖅᐳᑦ ᖃᕿᐊᖅᓯᖏᒻᒪᑦ ᖃᓪᓗᓈᑦ ᑲᐅᔨᓴᕈᓯᒋᕙᑦᑕᖏᑕ ᐅᒃᐱᕆᔭᐅᓂᖏᓐᓂᒃ, ᑕᐃᒪᓕ ᐃᓕᖅᑯᓯᒃᑯᑦ ᐃᒃᐱᓐᓇᕐᓂᕐᒪᕆᖓ ᓯᓚᑐᓂᐅᑉ ᐅᕝᕙᓗ ᓯᐊᑦᓇ ᐅᓂᒃᑳᖅᑐᐊ ᐅᒃᐱᕆᔭᐅᓐᖏᑦᑐᖅ ᐅᐱᓐᓇᕋᓂ ᐊᔾᔨᒋᓐᖏᒻᒪᕆᑦᑕᖓ ᐃᓄᐃᑦ ᓄᓇᓗ ᐊᑦᑐᐊᓂᖏᓐᓂᒃ. ᑲᑎᓐᓇᓱᓚᐅᕋᓗᐊᕋᒃᑭᑦ ᑕᒪᒃᑮᒃ ᐃᓄᐃᑦ ᓄᓇᒥᒃ ᖃᐅᔨᒪᓂᕆᔭᖏᑦ ᐊᒻᒪ ᓯᓚᑐᓂᖅ, ᑭᓯᐊᓂᓕ ᑕᒪᓐᓇ ᐅᒃᐱᕆᔭᐅᓚᐅᕐᒪᖓ ᖃᐅᔨᒪᓐᖏᑦᑐᖓ ᑕᒪᒃᓱᒥᖓᓗ ᐅᕙᓐᓄᑦ ᐊᐱᖅᓱᐃᓐᓇᕐᓂᐊᖅᑐᖓ - ᑕᒪᓐᓇᑦᑕᐅᖅ ᐊᐱᖅᓲᑎᒋᔪᓐᓇᕐᒥᔭᐃᑦ.


ᑕᑯᔭᒃᓴᖅ 11 ᑕᑯᓚᐅᕐᒥᔪᖓᑦᑕᐅᖅ ᐊᔾᔨᒌᓐᖏᑎᐊᒻᒪᕆᑦᑕᖓᓂᒃ ᓯᓚᓕᕆᔪᒥᒃ ᐃᑦᑕᕐᓂᓴᐅᔪᓂ. ᐊᕐᕌᒍᑦ ᐊᒥᓱᑲᓪᓚᐅᓕᖅᑐᑦ ᐊᓂᒍᖅᑐᑦ ᓄᐊᒪᓐ ᑰᓐ ᐊᒻᒪ ᑯᕋᐃᔭᔅ ᑯᓄᒃ ᑕᕐᕆᔮᒃᓴᓕᐅᓚᐅᖅᓯᒪᒻᒪᑎᒃ “ᐃᖏᕐᕋᓂᖏᑦ ᒃᓄᑦ ᕋᔅᒧᓴᓐ” ᐅᓂᒃᑲᐅᓯᖃᖅᑐᖅ ᖃᓪᓗᓈᒥ ᒪᐅᓐᖓᕆᐊᓐᖓᖅᑐᕕᓂᕐᒥᒃ ᑕᒫᓂ 1920-ᖏᓐᓂᒃ ᐃᓄᓐᓂᒃ ᐃᓚᖃᖃᑦᑕᓚᐅᖅᑐᖅ − ᐊᓪᓛᑦ ᑕᒫᓂ ᐃᒡᓗᓕᒑᕐᔪᖅᐸᓯᒻᒥ - ᐅᖃᐅᓯᖃᖅᑎᓪᓗᒍ ᐃᓕᖅᑯᓯᕐᒥᒍᑦ ᑐᑭᓯᐅᒪᓂᖏᓐᓂᒃ ᓯᓚᕐᔪᐊᒥ. ᐃᓚᖓᑦ ᐊᖓᒃᑰᔪᖅ ᓇᔭᒡᓂᖅ, ᐅᖃᐅᔾᔨᓚᐅᖅᑐᖅ:

ᓯᓚ ᓴᓐᖏᔪᒥᒃ ᑕᕐᓂᓕᒃ, ᑎᒍᒥᐊᖅᑎᐅᔪᖅ ᓄᓇᕐᔪᐊᕐᒥᒃ, ᓯᓚᒥᒃ, ᐃᓘᓇᓕᒫᑦᑎᐊᖏᓐᓂᒃ ᐆᒪᔪᓂᒃ ᓄᓇᕐᔪᐊᕐᒥ - ᓴᓐᖏᔪᕐᔪᐊᕐᕌᓗᒃ ᐅᖃᐅᓯᖏᑦ ᐊᖑᒻᒧᑦ ᐅᖃᓐᓂᒃᑰᖏᑦᑐᑦ, ᑭᓯᐊᓂᓕ ᒪᑯᑎᒎᓴ ᐊᓄᕆᒃᑯᑦ, ᐊᐳᑎᒃᑯᑦ, ᓯᓚᓗᒃᑯᑦ, ᐃᒪᒃᑯᑦ, ᑕᒪᒃᑯᑎᒍᓕᒫᖅ ᐊᖑᑎᐅᑉ ᑲᑉᐱᐊᒋᔭᖏᑎᒍᑦ, ᐅᕝᕙᓘᓐᓃᑦ ᓯᕿᓐᓂᒃᑯᑦ, ᐅᖅᓱᐊᑎᓪᓗᒍ ᐃᒪ ᐅᕝᕙᓘᓐᓃᑦ ᓱᕈᓯᑯᓗᑦᑎᒍ. - ᓇᔭᒡᓂᖅ, ᐃᓄᐃᑦ ᐊᖓᒃᑯᐃᑦ 1920-ᖏᓐᓂ


ᑕᑯᔭᒃᓴᖅ 12 ᑕᒪᓐᓇ ᐅᖃᐅᓯᕆᓕᓚᐅᕋᒃᑯᑦ ᐃᒡᓗᓕᒑᕐᔪᒻᒥᐅᓄᑦ ᐊᒻᒪ ᐅᖃᐅᓯᕆᔭᐅᕙᓪᓕᐊᓕᓚᐅᖅᑐᖅ ᖃᓄᖅᑑᕈᑕᐅᔪᓂᒃ ᐅᖃᐅᓯᕆᔭᕐᓂ ᓯᕗᓪᓕᖅᐹᖓᓂ ᓴᑉᑕᖓᓂ. ᐊᑕᐅᓯᕐᒥᒃ ᐅᖃᐅᓯᖅᑕᖃᓚᐅᕐᒥᔪᖅ ᔭᐃᐱᑎᐅᓪᓗ ᑐᑭᓯᒃᑲᓐᓂᕈᑎᒋᑎᔭᐅᔪᓐᓇᕐᓂᕋᖅᑐᓂᐅᒃ ᐃᓱᒪᖃᖅᑎᓪᓗᑕ ᓯᓚᒥᒃ ᐊᒻᒪ ᓯᓚᑐᓂᕐᒥᒃ. ᐅᖃᐅᓯᕆᓚᐅᖅᑕᖏᑦ ᓯᒥᐅᓂᐅᑉ:

ᓯᓚ, ᒪᓐᓇ ᓯᓚᐅᑉ ᖃᓄᐃᓐᓂᖓ, ᓯᓚᓕᕆᓂᒃᑯᑦ. ᓯᓚ. - ᓯᒥᐅᓂ ᓴᒻᒧᕐᑐᖅ


ᑕᑯᔭᒃᓴᖅ 21 ᑐᔪᕐᒥᕕᒻᒦᑦᑐᖓ ᓴᓂᓪᓕᖃᓚᐅᕋᒪ ᔮᓐ ᕼᐃᐅᔅᑕᓐᒥᒃ, ᓴᓇᓯᒪᔪᖅ ᐊᒻᒪ ᑐᑭᒧᐊᑦᑎᑦᑎᔨᐅᓪᓗᓂ ᐅᓂᒃᑳᖅᓯᒪᔪᓂ ᑕᕐᕆᔮᓂᒃ “ᓂᕿᖏᑦ ᑕᕐᓂᐅᑉ” ᐊᒻᒪ “ᓄᓕᐊᔪᒃ”. ᑕᐃᓱᒪᓂᓕ ᖃᐅᔨᒪᓚᐅᓐᖏᑕᕋᓗᐊᕋ ᑭᓇᐅᒻᒪᖔᖅ ᕼᐊᓗᑐᐃᓐᓇᖅᐸᑦᑐᒍᓗ ᐃᒡᓗᓕᒑᕐᔪᒻᒥᓐᓂᕐᓂᒃ, ᐊᒥᓱᑲᓪᓚᐅᔪᑦ ᓄᓇᖃᖅᑐᑦ ᐊᒻᒪ, ᐅᐊᑦᑎᐊᕈᓖᖅᑎᓪᓗᒍ, ᔭᐃᐱᑎ ᑕᑯᓐᓇᖁᓕᓚᐅᕐᒪᖓ “ᓄᓕᐊᔪᒃ”. ᑕᑯᓐᓇᓚᐅᖅᑐᒍ, ᐅᖃᖃᑎᒋᓕᓚᐅᖅᑕᖓ ᔭᐃᐱᑎ ᓄᓕᐊᔪᒃ ᐊᒻᒪ ᓴᑦᑕ ᒥᒃᓵᓄᑦ. ᖃᓄᖅ ᐊᑦᑐᐊᓂᖃᕐᓂᖓᓄᑦ ᐆᒪᔪᕐᓂᒃ, ᐊᒻᒪ ᑕᒪᓐᓇ ᖃᓄᖅ ᐅᓂᒃᑳᖅᑐᐊ ᐅᕙᑦᑎᓐᓂᒃ ᐅᖃᐅᔾᔨᒻᒪᖔᖅ ᓯᓚᐅᑉ ᐊᓯᔾᔨᐸᓪᓕᐊᓂᖓᑕ ᐊᑦᑐᐃᓂᖓᓂᒃ ᐅᑭᐅᖅᑕᖅᑐᒥ ᐆᒪᔪᕐᓂᒃ ᐅᓪᓗᒥᐅᔪᖅ. ᓯᕗᓪᓕᖅᐸᐅᔪᖅ ᐅᖃᐅᓯᕆᓚᐅᖅᑕᖓ ᐊᒥᓲᓐᖏᑦᑐᑦ ᓯᓚᒥᒃ ᖃᐅᔨᓴᖅᑎᐅᔪᑦ ᐃᓱᒪᖃᓯᐅᔾᔨᕙᓐᖏᒻᒪᑕ ᓯᓚᑐᓂᖃᕐᓂᖓᓂᒃ ᐅᓂᒃᑳᖅᑐᐊᖑᔪᖅ ᓯᐊᑦᓇ ᐱᔾᔪᑎᒋᓪᓗᒋᑦ ᐃᓕᖅᑯᓯᕐᒥᒍᑦ ᑲᖐᒋᔭᒥᓐᓂᒃ ᐊᒻᒪ ᐃᓕᓯᒪᔭᖏᓐᓂᒃ ᖃᐅᔨᓴᕆᐊᖃᕐᓂᕐᒧᑦ. ᐅᖃᓚᐅᕐᒪᑦ ᐃᒫᒃ:

ᐃᓚᒋᖃᑦᑕᖅᐹ ᐊᑲᐅᒃᓴᖏᔾᔪᑎᒐᒪ ᐱᑦᔪᑎᖃᑉᐳᖅ ᐃᓄᐃᑦ ᖃᐅᔨᒪᔭᑐᖃᖓ ᐱᑦᑎᐊᖅᑕᐅᖃᑦᑕᖏᓐᓂᖓᓄᑦ ᑕᒪᐅᓇᕈᔫᖅᑰᔨᔪᕐᓗ ᐊᑐᖅᑕᐅᓇᓱᓐᓂᖓᓄᑦ. ᐊᑐᖅᑕᐅᔪᖅ ᐱᓕᕆᕝᕕᒻᒧᑦ ᑐᓐᖓᕕᖃᓗᐊᓪᓚᕆᒻᒪᑦ ᐱᕙᓪᓕᐊᑎᑦᑎᓇᓱᓐᓂᕐᒥᒃ ᐊᒻᒪᓗ ᐊᐅᓚᑦᑎᓂᕐᒥᒃ ᑕᐃᒪᐃᒻᒪᓪᓗ ᐋᖅᑭᒃᓯᒪᓂᖓ ᐃᓱᒪᒋᔭᐅᓗᐊᕆᐊᖃᖅᑰᖏᑦᑐᖅ ᓄᓇᖃᖅᑳᖅᑐᒥᓂᕐᓄᑦ ᖃᐅᔨᒪᔭᕆᓂᕋᖅᑕᐅᓗᓂ.

- ᔭᐃᐱᑎ ᐊᕐᓇᑲᒃ



ᑕᒪᒃᑯᐊ ᑲᑎᑕᐅᓂᖏᑦ ᐃᓕᖅᑯᓯᒃᑯᑦ ᐊᒻᒪ ᐅᒃᐱᕐᓂᒃᑯᑦ ᑐᑭᓯᐅᒪᓂᐅᔪᑦ ᐃᓱᒪᒋᐊᕈᑎᒋᔪᓐᓇᖅᓯᓚᐅᖅᐸᒃᑲ ᒫᓐᓇᐅᔪᖅ ᖃᓄᖅ ᑐᑭᖃᖅᑎᑕᐅᒻᒪᖔᖅ ᐅᒃᐱᖅᑐᓄᑦ ᑕᒪᒃᑮᓐᓂᒃ ᐃᓄᓐᓂᒃ ᐊᒻᒪ ᖃᓪᓗᓈᓂᑦ. ᐃᓕᓐᓂᐊᕐᓂᖃᖅᑎᓪᓗᑕ, ᐃᓕᓴᐱ ᐅᖃᓚᐅᖅᑐᖅ:

ᑕᑯᓗᒍ ᒫᑎᐅ ᓵᑉᑐ 24. ᑕᕝᕙᓂ ᐅᖃᖅᓯᒪᔪᖃᑦᑐᖅ ᐸᕐᓇᐃᔭᕆᐊᖃᓐᓂᑎᓐᓄᑦ ᓯᕗᓂᒃᓴᒧᑦ, ᐊᒻᒪᓗ ᒫᓐᓇᐅᔪᖅ ᑕᑯᕙᓕᖅᐳᒍᑦ ᓯᓚ ᐊᓯᔾᔨᐸᓪᓕᐊᑎᓪᓗᒍ. ᑕᒪᓐᓇ ᐅᖃᑦᑕᐅᓯᒪᔪᖅ ᑕᕝᕙᓂ ᑎᑎᕋᖅᓯᒪᔪᒥ, ᐊᒻᒪᓗ ᑐᑭᓯᔪᓐᓇᖅᑐᑎᑦ ᖃᓄᐃᓐᓂᕆᓕᖅᑕᖓᓂᒃ ᓯᓚᐅᑉ ᐊᓯᔾᔨᕐᓂᖓᑕ. - ᐃᓕᓴᐱ ᑕᐅᑐ

ᖃᐅᔨᓚᐅᕐᒥᔪᖓ ᐊᔾᔨᐸᓗᐊᓂᒃ ᓯᓚᐃᓪᓕᐊᓂᕐᒧᑦ ᑐᑭᖃᖅᑎᑕᐅᔪᒥᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ ᑕᐅᓇᓂ ᒥᐊᓕᒐᐃᑦ ᓄᓇᖓᓐᓂ ᑕᐃᒃᑯᐊ ᐊᒥᓱᑦ ᐅᒃᐱᖅᑐᑦ ᐃᑲᔪᖅᑐᐃᓚᐅᕐᒪᑕ ᐊᖓᔪᖅᑳᒻᒪᕆᐅᓚᐅᖅᓯᒪᔪᑉ ᔪᐊᔾᔨ ᕕ. ᐳᔅ ᕿᐱᓗᓚᐅᖅᓯᒪᔪᖅ ᖃᓄᖅᑑᕋᓱᐊᕆᐊᖃᕐᓂᕐᒧᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ. ᓵᑉᑕ 5-ᒥ, ᕿᒥᕐᕈᓯᒪᒐᒃᑭᒃ ᐊᔾᔨᒌᓐᖏᑦᑐᑦ ᑐᑭᖃᖅᑎᑕᐅᔪᑦ ᓯᓚᐃᓪᓕᐊᓂᕐᒧᑦ ᑐᕌᖓᔪᓂᒃ ᑕᒪᒃᑮᓐᓄᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᐊᒻᒪ ᐅᓕᓐᓂᐊᓗᒃ ᓱᕋᐃᓂᕆᓚᐅᖅᓯᒪᔭᖓ ᐊᓄᕆ ᑲᑐᕆᓇᐅᓂᕋᖅᑕᐅᔪᖅ ᒥᐊᓕᒐᐃᑦ ᓄᓇᖓᓐᓂ ᓂᐅ ᐅᐊᓖᓐᔅᒥ. ᐃᓱᒪᕙᓪᓕᐊᓕᓚᐅᕐᒥᔪᖓ ᐊᑦᑐᐊᓂᖓᓂᒃ ᓯᓚᐃᓪᓕᐊᓂᕐᒥᑦ ᓯᓚᑐᓂᕐᒧᑦ. ᖁᔭᓕᓕᕆᕗᖓ ᐱᔮᖅᑯᑕᐅᓐᖏᑦᑐᒥᒃ ᑲᑎᓯᓂᕆᓚᐅᖅᑕᕐᓂᒃ ᐃᒡᓗᓕᒑᕐᔪᒻᒥ, ᐃᓱᒪᒃᓴᖅᓯᐅᕈᑎᒋᒃᑲᓐᓕᓚᐅᕋᒃᑯᑦ ᓯᓚᐃᓪᓕᐊᓂᐅᔪᖅ, ᓯᓚᑐᓂᖅ ᐊᒻᒪ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ ᐃᓱᒪᒋᔭᖓᓂᒃ ᐊᑕᐅᓯᒃᑲᓐᓂᐅᑉ ᐃᓄᐃᑦ ᐃᓕᖅᑯᓯᖏᓐᓂᒃ ᑐᑭᓯᐅᒪᔪᒥᒃ.


ᑕᑯᔭᒃᓴᖅ 13 ᖃᕋᓴᐅᔭᒃᑯᑦ ᑎᑎᕋᖅᑐᓂ, ᔭᐃᐱᑎ ᓇᓗᓇᐃᖅᓯᓚᐅᖅᑐᖅ ᐆᒥᖓ ᐅᕙᓐᓄᑦ:

ᓯᒥᐅᓂ ᐅᖃᑦᐳᖅ: “ᓯᓚ, ᓯᓚᕗᑦ, ᓯᓚᒥᒃ ᖃᐅᔨᒪᓇᓱᐊᕐᓂᖅ. ᓯᓚ.” ᐅᖃᐅᓯᖃᕋᓱᑉᐸᓪᓚᐃᔪᖑᓇ ᓯᓚᒥᒃ ᐃᒫᒃ “ᓯᓚᑐᓂᖅ” ᑎᑎᕋᒻᒪᑦ ᐅᖃᐅᓯᐅᑉ ᑐᑭᖏᓐᓂᒃ. ᓯᓚ ᒪᓕᑉᐳᖅ ᐋᖅᑭᒃᓯᒪᓂᖓᓂᒃ ᐊᓯᔾᔨᖃᑦᑕᕐᓂᐅᑉ ᓯᓚᕐᔪᐊᖃᕐᓂᐅᑉ ᐃᓗᐊᒍᑦ. - ᔭᐃᐱᑎ ᐊᕐᓇᑲᒃ

ᑖᒃᑯᐊ ᐅᖃᐅᓯᐅᔪᑦ ᓯᓚᑐᓂᕐᒥ ᐊᔾᔨᐸᓗᑐᐃᓐᓇᖏᑦ ᐊᓯᐊᓄᑦᑕᐅᖅ ᖃᓪᓗᓈᓄᑦᐃᓱᒪᒋᔭᐅᔪᓄᑦ ᐃᓱᒪᒋᖃᓯᐅᑎᓚᐅᕐᒥᔭᕋ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ.


ᑕᑯᔭᒃᓴᖅ 14 ᐃᒃᓯᕋᕐᔪᓂ ᐃᓕᓐᓂᐊᖅᐸᑦᑐᖅ ᐋᓐ ᐳᕆᒪᕕᓯ ᐃᓱᒪᒃᓴᖅᓯᐅᖅᓯᒪᒻᔪᖅ ᖃᓄᖅ ᑕᒪᒃᑯᐊ ᓯᓚᕐᔪᐊᒥ ᐊᕙᑎᒧᑦ ᐃᓱᒫᓗᒍᑕᐅᔪᑦ ᐃᒪᐃᑦᑐᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ ᓇᓗᓇᐃᖅᓯᓯᒪᒻᒪ ᐱᑕᖃᕆᐊᖃᕐᓂᖓᓂᒃ ᐅᒃᐱᕆᔭᒃᑯᑦ ᓯᓚᑐᓴᓂᖃᖅᑐᒥᒃ ᑭᐅᓇᓱᐊᕐᓂᕐᒧᑦ. ᐃᒫᒃ ᐅᖃᖅᓯᒪᒻᒪᑦ:

ᐃᓚᒋᒋᕚ ᐊᒃᑐᐃᓂᐅᔫᑉ ᖃᐅᔨᒪᓂᐅᕙᓪᓕᐊᔪᒧᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ ᐃᒪᐃᑦᑑᒻᒪᑦ ᓯᓚᑦᑐᐸᓪᓕᐊᓂᖃᑉᐳᒍᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ ᐊᒃᑐᖅᑕᐅᓂᑦᑎᓐᓄᑦ ᐊᒻᒪᓗ ᐋᖅᑭᐸᓪᓕᐊᓂᕆᔭᕗᑦ ᐊᒃᑐᖅᑕᐅᓯᒪᒋᕗᖅ ᓯᓚᒥᒃ ᖃᐅᔨᒪᓂᕆᓚᐅᖅᑕᑎᓐᓄᑦ ᐊᒻᒪᓗ ᑕᒪᑐᒪ ᐱᓕᕆᖃᑎᒌᓐᓂᑎᓐᓄᑦ ᐊᒃᑐᐊᓂᖓᓂᒃ. - ᐋᓐ ᐳᕆᒪᕕᓯ, ᐊᕙᑎᒧᑦ ᖃᐅᔨᒪᔨᑕᒻᒪᕆᒃ

ᐅᖃᐅᔾᔨᔪᖅ ᖃᐅᔨᓴᖅᑎᐅᔪᓂᒃ ᐊᒻᒪ ᓂᕈᐊᖅᑕᐅᓯᒪᔪᓂᒃ ᒐᕙᒪᒃᑯᓐᓄᑦ ᖃᐅᔨᒪᖁᓪᓗᓂᒋᑦ ᑐᕚᖃᕐᓂᑎᓐᓂᒃ ᓯᓚᐅᑉ ᖃᓄᐃᓐᓂᖓᓂᒃ ᐊᒻᒪ ᓯᓚᒥᒃ, ᖃᐅᔨᒪᓪᓗᓂᓗ ᑕᒪᒃᑯᐊ ᖃᓪᓗᓈᓂ ᐃᓪᓗᓂ ᐳᔪᕈᔫᐃᑦ ᐊᑦᑐᐃᓂᖃᕐᒪᑕ ᐅᓪᓗᒥᐅᔪᖅ ᓯᓚᕐᔪᐊᒥ ᐊᓯᔾᔨᐸᓪᓕᐊᓂᐅᔪᓂᒃ ᐊᒻᒪ ᐊᑦᑐᐃᓂᖃᖅᑐᑎᒃ ᐊᒥᓱᓂᒃᐃᓕᖅᑯᓯᐅᔪᓂᒃ, ᓲᕐᓗ ᐃᓄᓐᓂᒃ. ᓯᓚᕐᔪᐊᕆᔭᕗᑦ ᑐᑦᑕᕕᓪᓗᐊᑕᐅᒻᒪᑦ ᑲᑎᑦᑐᒋᑦ ᖃᓄᐃᓕᐅᕐᓂᕆᔭᑦᑎᓐᓂᒃ, ᑕᐃᒪᓕ ᑭᒡᒍᓯᕗᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᑐᓴᐅᒪᔭᐅᔭᕆᐊᖃᕐᓂᐊᖅᐳᑦ ᓯᓚᑐᓂᖅᑕᖃᖅᑐᒃᑯᑦ.


ᑕᑯᔭᒃᓴᖅ 19 ᐃᒡᓗᓕᒑᕐᔪᒻᒥ, ᐊᒥᓱᑦ ᐃᓄᐃᑦ ᐅᖃᐅᓯᖃᓚᐅᖅᑐᑦ ᑕᐃᒪᐃᓐᖓᓂᑦ ᐊᓯᔾᔨᕐᓂᕐᒧᑦ ᑕᒪᐅᖓ ᓄᓇᒧᑦ, ᑐᓴᖅᑎᑕᐅᒃᑲᓂᖅᑐᑎᒃ ᑕᒪᒃᑮᓐᓂᑦ ᐃᓄᐃᑦ ᐱᖁᓯᖏᓐᓂᒃ ᐊᒻᒪ ᐅᒃᐱᕋᓱᐊᖅᑐᑦ ᑐᑭᓯᐅᒪᓂᖏᓐᓄᑦ. ᐆᒃᑑᑎᒋᓗᒍ, ᐴᓂ ᐅᖃᓚᐅᖅᑐᖅ:

ᐅᑉᐱᕈᓱᒃᑲᒪ ᐸᐃᑉᐹᖁᑎᓂᒃ ᐊᒻᒪᓗ ᐃᓕᖅᑯᓯᕐᓂᒃ. ᐃᓅᓚᐅᖅᑎᓐᓇᖓᓘᓐᓃᑦ ᐃᓕᖅᑯᓯᕗᑦ ᓄᓇᒥᒃ ᑲᒪᑦᑎᐊᖁᔨᔪᖅ, ᓱᕈᖏᓪᓗᒍ, ᐃᖅᑲᒋᑦᑎᐊᕐᓗᒋᑦ ᐆᒪᔪᑦ, ᐊᒻᒪᓗ ᐱᔪᒪᔭᓕᒫᓐᓂᒃ ᑕᐃᒪ ᐱᓂᐊᖅᐳᑎᑦ. ᓇᒧᑐᐃᓐᓇᖅ ᐊᖑᓇᓱᒋᐊᕐᕈᑦᑕ ᐃᓄᐃᑦ ᕿᒪᐃᖃᑦᑕᕐᒪᑕ ᑭᓱᒥᓂᒃ, ᑕᐃᒃᓱᒪᓂᓕ ᐃᓅᓚᐅᖅᑎᓐᓇᖓ ᐃᓄᐃᑦ ᕿᒪᐃᖃᑦᑕᓚᐅᖏᑦᑐᑦ ᖃᑦᑕᐅᔭᒥᓂᕐᓂᒃ ᐊᒻᒪᓗ ᑭᓱᑐᐃᓐᓇᕐᓂᒃ ᓄᓇᒥ. ᑕᐃᒪᓐᓇ ᐃᓕᖅᑯᓯᖃᓚᐅᕐᕋᑦᑕ ᓯᕗᓂᐊᒍᑦ ᐅᑉᐱᖅᑐᐃᑦ ᑎᑭᓚᐅᖅᑎᓐᓇᒋᑦ. -ᐴᕐᓂ ᐳᑐᓕᒃ

ᐅᖃᐅᓯᖃᖅᑐᓂ “ᐃᓱᒪᒃᑯᑦ ᐆᒻᒪᑎᒃᑯᑦ,” ᓯᒥᐅᓂᑉ ᐅᖃᐅᑎᓚᐅᕐᒪᖓ ᖃᓄᖅ ᓂᖏᐅᖓᑕ ᐃᓱᒪᒋᓚᐅᖅᑕᖏᑦ ᐊᓯᔾᔨᖅᐸᓪᓕᐊᓂᖏᓐᓂᒃ ᐆᒪᔪᐃᑦ ᑕᐃᒪᐃᑦᑑᓚᐅᕐᒪᑕ ᐅᒃᐱᕐᓂᖓᓄᑦ. ᐊᖏᕐᕋᕋᒪᓕ, ᑕᕐᕆᔭᓕᓚᐅᖅᑐᖓ ᐅᓂᒃᑳᖅᓯᒪᔪᒥᒃ “ᐊᒪᕉᑉ ᐱᓯᖓ” ᒫᑎᓐ ᕿᓪᓚᕐᐅ ᐅᓂᒃᑲᐅᓯᖓ ᐅᖃᐅᓯᖃᕆᓪᓗᓂ ᑕᐃᒃᓱᒪᓂᐊᓗᒃ ᖃᓄᐃᖃᑦᑕᕐᓂᕆᓚᐅᖅᑕᖏᑦ ᐊᔪᕆᖅᑐᐃᔨᐅᔪᑦ - ᐊᒻᒪ ᐃᓄᐃᑦ ᐃᒡᓗᓕᒑᕐᔪᒻᒥᐅᑦ, ᐊᒻᒪ ᒫᓐᓇᐅᔪᖅ ᖃᑦᓯᐅᓕᕐᒪᖔᑕ. ᐴᓂ ᐅᖃᓚᐅᕐᒪᑦ, “ᐊᓪᓚᓂᒃ ᐅᒃᐱᕈᓱᓪᓗᑎᑦ ᐊᒻᒪ ᐃᓕᖅᑯᓯᕋᓂᒃ.”


ᑕᑯᔭᒃᓴᖅ 18 ᐃᓄᓕᕆᔨᐅᓪᓗᖓ ᐃᖅᑲᓇᐃᔭᖃᑦᑕᖅᓯᒪᓪᓗᖓ ᓄᓇᖃᖅᑳᖅᓯᒪᔪᑦ ᓄᓇᖏᓐᓂ ᐃᓱᒪᒋᐊᕈᑎᒋᓕᓚᐅᖅ ᐊᑦᑐᐊᓂᖏᓐᓂᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᐊᒃᓱᕈᕈᑕᐅᔪᒥᒃ ᑕᐃᒃᑯᓄᖓ ᐊᓂᒍᖅᑐᓄᑦ ᓯᕘᕋᓇᓚᐅᖅᑐᑦ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓄ. ᐊᐅᓪᓗᑎᓪᓗᐊᑕᓚᐅᖅᑕᕋ ᐊᕐᕌᒍᑦ 100 ᐊᓂᒍᖅᑐᑦ ᑲᓇᑕᒥᐅᑦ ᐃᓄᐃᓪᓗ ᐱᓕᕆᖃᑎᒌᓐᓂᖏᑦ ᐃᒡᓗᓕᒑᕐᔪᒻᒥ ᐊᒻᒪ ᓄᓇᕗᒻᒥ. ᑕᐃᒃᑯᐊ ᐃᓕᓐᓂᐊᖃᑕᐅᓚᐅᖅᑐᑦ ᐅᖃᐅᓯᖃᓚᐅᖅᑐᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ ᐊᓯᖏᓐᓂᓪᓗ ᐅᖃᐅᓯᖃᖅᓯᓐᓈᑦ ᐃᓱᒪᒋᔭᒃᑲ ᐅᐊᑦᑎᐊᕈᓐᓂᓴᐅᔪᓂᒃ ᑕᕝᕙᓂ ᑕᑯᔭᒃᓴᒥ: 1) ᐅᑉᐱᖅᑐᓐᖑᖅᐸᓪᓕᐊᓂᖅ; 2) ᐊᕙᑎᓕᕆᓂᕐᒧᑦ ᐱᑦᔪᑎᐅᔪᑦ; 3) ᓯᓚᐅᑉ ᐊᓯᔾᔨᕐᓂᖓ. ᐅᖃᓚᐅᕋᒪ ᓴᑉᑕ 4-ᒥ ᑕᕝᕙᓂ ᐅᖃᓕᒫᒐᕐᒥ:

“ᓯᓚᐅᑉ ᐊᓯᔾᔨᐸᓪᓕᐊᓂᖓ ᓄᑖᖑᓂᖅᐹᖑᓕᕐᒥᔪᖅ ᐅᑭᐅᖅᑕᖅᑐᒥ ᖃᐅᔨᔭᐅᓯᒪᔪᖅ ᐃᓄᓐᓂᒃ. ᐃᒡᓗᓕᒑᕐᔪᒻᒥ, ᐊᒥᓱᐊᖅᑎᖅᑐᖓ ᑐᓴᖃᑦᑕᓚᐅᕋᒪ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐅᖅᑯᓰᕙᓪᓕᐊᓂᑐᐃᓐᓇᐅᖏᑦᑐᒧᑦ ᑭᓯᐊᓂᓕ ᑕᒪᒃᑯᓄᖓ ᓱᕈᕈᔫᔪᓄᑦ, ᐊᑦᑕᑯᓄᑦ, ᐊᒻᒪ ᐆᒪᔪᐃᑦ ᐃᓕᖅᑯᓯᖏᑕ ᐊᓯᔾᔨᐸᓪᓕᐊᓂᖏᓐᓄᑦ.” (ᒪᒃᐱᒐᖅ 110)

ᓯᓚᒧᑦ ᖃᐅᔨᓴᖅᑎᒻᒪᕆᐅᔪᖅ ᐃᓱᒪᒐᔭᖅᑐᒃᓴᐅᑎᓪᓗᒍ ᑕᒪᒃᑯᐊ ᐃᓅᓯᕐᒧᑦ ᐊᒻᒪ ᐊᕙᑎᒧᑦ ᐱᔾᔪᑎᖃᖅᑐᑦ ᐊᑦᑐᐊᓐᖏᒋᐊᖏᓐᓂᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ, ᐅᖃᖅᑐᖃᕈᓐᓇᖅᑐᖅ ᑕᒪᒃᑯᐊ ᐊᓯᔾᔨᕐᓂᐅᔪᑦ ᕿᓚᒥᑯᓗ ᐅᑭᐅᒃ 100 ᐃᓗᐊᓂ ᓴᖅᑭᓯᒪᒻᒪᑕ ᑕᒫᓐᖓᖅᑐᑎᒃ ᑕᕆᐅᑉ ᐊᑭᐊᓂᑦ ᐊᒻᒪ ᑲᓇᑕᒥ ᓴᓇᕕᐅᔪᓂᒃ, ᐅᐊᑦ-ᑯᓗᑦᓯᐊᐃ ᐅᖃᓚᐅᕐᒪᑦ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓᑦ ᐃᓕᖅᑯᓯᕐᒥᒃ ᐊᑦᑐᐃᓂᖃᕐᒪᑦ.


ᑕᑯᔭᒃᓴᖅ 15 ᑕᒪᒃᑮᒃ ᖃᓪᓗᓈᑦ ᐊᒻᒪ ᐃᓄᐃᑦ ᐃᓱᒪᒋᔭᖏᑦ ᑐᑭᓯᕙᓪᓕᕈᑎᒋᒻᒪᕆᓚᐅᖅᑕᒃᑲ ᐃᓕᖅᑯᓯᖏᓐᓂ ᖃᐅᔨᒪᓐᖏᑕᕐᓂᒃ ᓯᓚᑐᔪᒥᒃ ᑭᐅᔾᔪᑎᒋᔪᓐᓇᓐᖏᑕᕐᓂᒃ. ᑕᐃᒪᓕ ᐳᕆᒪᕕᓯ ᐅᖃᐅᓯᖃᖅᑑᒐᓗᐊᖅ ᐊᔾᔨᒌᓐᖏᑦᑐᓂᒃ ᐊᑕᖐᓐᖏᑦᑐᓂᒃ ᖃᓪᓗᓈᑦ ᑲᖐᓱᑎᒋᔭᖏᓐᓂᒃ ᐃᓄᐃᑦ ᓯᓚᓗ ᐊᑦᑐᐊᓂᖏᓐᓂᒃ. ᖃᐅᔨᓚᐅᕐᒥᔪᖓ ᐅᖃᐅᓯᕆᓯᒪᔭᖏᑦ ᐃᓄᐃᑦ ᓲᕐᓗ ᕋᐃᑦᓱ ᕿᑦᓱᐊᓕᒃᑎᑐᑦ ᐊᒃᓱᐊᓗᒃ ᐃᑲᔪᕐᓂᖃᖅᑐᑦ ᐃᓱᒪᒃᓴᖅᓯᐅᕈᑎᖃᖅᑎᓪᓗᑕ ᑕᒪᒃᓱᒥᖓ ᐊᑲᐅᓐᖏᓕᐅᕈᑕᐅᔪᒥᒃ. ᐃᒫᒃ ᐅᖃᖅᓯᒪᒻᒪᑦ:

ᐅᖃᐅᓯᖃᑦᑎᓪᓗᖓ “ᓯᓚᒥᒃ” ᖃᓪᓗᓈᒧᑦ, ᐃᓱᒪᑲᐅᑎᒋᓇᖅᑐᖅ ᑕᑯᒃᓴᐅᖏᑦᑐᒥᒃ, ᐊᓂᖅᓵᑐᖅᑕᑎᓐᓂᒃ ᒑᓯᒥᒃ…. ᐅᓪᓗᒥ, ᐅᓄᖅᑐᒻᒪᕆᐊᓗᐃᑦ ᐃᓄᐃᑦ ᐃᓱᒪᓂᐊᖅᑐᖅ ᐊᑦᔨᒌᒥᒃ, ᐊᒻᒪᓗᒃᑕᐅᖅ ᐊᓄᕆᒥᑦ ᐊᒻᒪᓗ ᓯᓚᒥᒃ. - ᕆᐱᑲ ᕿᑦᓱᐊᓕᒃ, ᐃᓄᒃ ᑎᑎᕋᖅᑎ

ᓇᓗᓇᐃᖅᓯᒋᐊᖅᑐᖅ ᐊᔾᔨᒌᓐᖏᒻᒪᕆᑦᑕᖓᓂᒃ ᓯᓚᒥᒃ ᐊᔾᔨᐸᓗᒋᔭᖓᓂᒃ ᔭᐃᐱᑎᐅᑉ ᓇᓗᓇᐃᓚᐅᖅᑕᖓᓂᒃ ᓯᓚᑐᓂᖅ - ᐃᓱᒪᒃ ᖃᐅᔨᒪᔪᒻᒪᕆᐅᔪᖅ ᓯᓚᒧᑦ ᖃᓄᐃᓐᓂᖓᒧᑦ ᐊᒻᒪ ᓯᓚᒧᑦ. ᐊᔾᔨᒌᓐᖏᒻᒪᕆᑦᑐᓂᐅᒃ ᓯᓚᐅᑉ ᒥᒃᓵᓄᑦ ᑕᐃᒃᑯᓇᓐᖓᑦ ᖃᓪᓗᓈᓂᑦ ᑐᑭᓯᔭᐅᓯᒪᔪᓂᑦ ᐊᕕᒃᑎᑦᑎᒻᒪᕆᑦᑐᑦ ᑕᑯᒃᓴᐅᔪᒥᒃ ᐃᓕᖅᑯᓯᐅᔪᒥᒃ ᓴᓂᐊᓃᑎᓪᓗᒍ ᐃᓄᐃᑦ ᐃᓱᒪᒋᔭᖏᓐᓂᒃ. ᑐᓴᕈᒥᓇᖅᑐᓂᓗ ᓯᓚᐅᑉ ᐊᓯᔾᔨᐸᓪᓕᐊᓂᖓ ᐃᑲᔪᖅᑐᐃᔫᔮᕐᒪᑦ ᐃᓄᐃᑦ ᐃᓱᒪᒋᔭᖏᓐᓂᒃ, ᐅᐱᓐᓇᕋᓂ ᓯᓚᕐᔪᐊᒥ ᑭᐅᔭᐅᔪᖅ ᑕᒪᒃᑯᓄᖓ ᐃᓄᓐᓄᑦ ᖃᓄᐃᓕᐅᓂᐅᕙᒃᑐᓄᑦ ᐊᒻᒪ, ᕕᐅᑦ ᐅᖃᖅᓯᒪᖅᑲᐅᒻᒪᑦ ᐅᐊᑦᑎᐊᕈ, ᐃᓱᒪᐅᑉ ᖃᓄᐃᓐᓂᖓᓄᑦ.


ᑕᑯᔭᒃᓴᖅ 16 ᒪᓕᒃᑐᒋᑦ ᐅᖃᐅᓯᕆᓯᒪᔭᖓᖏᑦ ᕿᑦᓱᐊᓕᐅᑉ, ᐃᓱᒪᒃᓴᖅᓯᐅᓕᓚᐅᖅᑐᖓ ᐊᔾᔨᒌᓐᖏᑦᑐᓂᒃ ᐃᓕᖅᑯᓯᒃᑯ ᐊᕝᕕᐊᕈᑎᒋᔭᕐᓂᒃ ᑐᑭᓯᓐᖏᔾᔪᑎᒋᑐᐃᓐᓇᕆᐊᖃᖅᑕᕐᓂᒃ ᐅᖃᐅᓯᕐᒥᒃ ᓯᓚᑐᓂᖅ. ᓯᕗᓪᓕᖅᐹᖓᓂ ᓵᑉᑕᒥ, ᐅᖃᐅᓯᖃᖅᑐᖓ: 1) ᖃᐅᔨᒪᔭᐅᓪᓚᑖᖅᑐᑦ; 2) ᖃᓪᓗᓈᑦ ᐊᒃᑐᐃᓂᕆᔭᖏᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ; 3) ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᐊᒃᑐᐃᓂᖃᕐᓂᖓ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ; 4) ᐊᖓᒃᑯᓕᕆᓂᖅ/ᑕᒪᐅᓇᕈᔫᖅᑐᓂᒃ ᑐᑭᓯᐅᒪᓂᖅ ᐅᑉᐱᕆᔭᐅᓇᑎᒃ ᖃᓪᓗᓈᓄᑦ ᓯᕗᓪᓕᖅᐹᖅ ᐅᖃᐅᓯᖃᖅᑐᖅ ᑕᒪᒃᑯᐊ ᐃᓕᓐᓂᐊᖅᑐᑦ ᐃᓕᒐᓱᐊᓲᖑᒻᒪᑕ ᓲᕐᓗ ᖃᐅᔨᒪᓂᐅᑉ ᐃᓚᐃᓐᓇᖓᓂᒃ. ᐃᓚᖏᑦ ᐃᓕᒍᒪᓂᖃᖅᑐᑦ ᐅᒃᐱᕐᓂᐅᑉ ᐊᒻᒪ ᐃᓕᖅᑯᓯᐅᑉ ᑐᑭᓯᐅᒪᔭᐅᓂᖓᓂᒃ, ᐊᒻᒪ ᐊᓯᖏᑦ ᐃᓕᒍᒪᑐᐃᓐᓇᖅᑐᑎᒃ ᓯᓚᑎᑦᑎᓐᓂᒃ ᖃᓄᐃᓕᐅᓂᐅᕙᒃᑐᓂᒃ ᓲᕐᓗ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ. ᑕᒪᒃᑯᐊ ᐊᕕᒃᓯᒪᔪᑦ ᐃᓕᓐᓂᐊᕐᓂᐅᔪᑦ ᑐᑭᓯᓐᖏᔾᔪᑕᐅᓕᕈᓐᓇᖅᑐᑦ ᒪᓕᓐᖏᑐᓪᓗ ᓯᓚᑐᓂᕐᒥᒃ. ᐊᐃᒃᐸᖓ ᐃᓱᒫᓗᒍᑎᖃᖅᑐᖅ ᖃᓄᖅ ᑕᒪᒃᑯᐊ ᖃᓪᓗᓈᑦ ᑎᑭᑎᓪᓗᒋᑦ ᓴᖅᑮᓚᐅᕐᓂᖏᓐᓂᒃ ᐊᕕᒃᓯᒪᓂᖏᓐᓂᒃ ᑭᖑᕚᕆᖑᔪᑦ ᐃᓄᐃᑦ, ᑕᒪᓐᓇ ᐊᑦᑐᐃᓂᖃᓕᖅᑐᓂ ᑲᔪᓯᑎᑦᑎᓂᕐᒧᑦ ᐅᖃᐅᓯᕐᒥᒃ, ᐃᓄᐃᑦ ᖃᐅᔨᒪᔭᑐᖃᖏᓐᓂᒃ, ᐊᒻᒪ ᓯᓚᑐᓂᕐᒥᒃ. ᐱᖓᔪᐊᑦ, ᓯᓚᐅᑉ ᐊᓯᔾᔨᐸᓪᓕᐊᓂᖓ ᐊᑦᑐᐃᓂᖃᓕᕐᒪᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᔪᕐᓇᖅᓯᕙᓪᓕᐊᑐᐃᓐᓇᕐᒪᑦ ᖃᐅᔨᒪᓇᓱᐊᕐᓗᓂ ᓯᓚᐅᑉ ᖃᓄᐃᓐᓂᐊᕐᓂᖓᓂᒃ. ᑭᖑᓪᓕᖅᐹᒥᒃ, ᖃᓪᓗᓈᑦ ᓯᓚᒥᒃ ᖃᐅᔨᓴᖅᑎᐅᔪᑦ ᐃᓱᒪᒃᓴᖅᓯᐅᕈᑎᖃᓗᐊᖅᐸᖏᒻᒪᑕ ᐅᒃᐱᕐᓂᕐᒥᒃ ᑐᑭᓯᓇᓱᐊᕐᓂᕐᒧᑦ. ᔭᐃᐱᑎ ᐊᐱᕆᓚᐅᕐᒪᖓ, ᖃᓄᐃᒻᒪᑦ ᒪᑯᐊ ᖃᓪᓗᓈᑦ ᖃᐅᔨᓴᖅᑎᐅᔪᑦ ᐃᓱᒫᓗᒍᑎᖃᓐᖏᓚᑦ ᓯᓚᑐᓂᕐᒥᒃ.


ᑕᑯᔭᒃᓴᖅ 17 ᒪᓕᒃᑐᒋᑦ ᑕᒪᒃᑯᐊ ᐃᓱᒫᓗᒍᑕᐅᔪᑦ, ᐊᒃᓱᐊᓗᒃ ᖃᐅᔨᔪᒪᓕᓚᐅᖅᑐᖓ ᐊᓂᒍᖅᓯᒪᔪᓂᒃ ᖃᓄᐃᓕᐅᕐᓂᐅᖃᑦᑕᖅᓯᒪᔪᓂᒃ ᐅᑭᐅᖅᑕᖅᑐᒧᑦ ᓄᓇᖓᓄᑦ ᑐᕌᖓᔪᓂᒃ ᓲᕐᓗ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ. ᐊᑕᐅᓯᖅ ᐃᓄᒃ ᐃᓱᒪᑐᔪᖅ ᐊᒻᒪ ᖃᓄᐃᓕᐅᖅᑎᐅᔪᖅ ᐊᒃᓱᐊᓗᒃ ᐃᑲᔪᕐᓂᖃᓚᐅᕐᒥᔪᖅ ᑕᓯᐅᖅᑐᓂᒋᑦ ᐃᓱᒪᒋᔭᒃᑲ ᑕᒪᒃᓱᒧᖓ ᓯᓚᕐᔪᐊᒥ ᐃᓄᐃᑦ ᑲᑎᒪᔨᖏᓐᓄᑦ ᐃᒃᓯᕙᐅᑕᐅᓚᐅᖅᓯᒪᔪᖅ ᐊᒻᒪ ᓯᓚᕐᔪᐊᒥ ᓯᓚᑐᓂᖅᐸᐅᔪᒧᑦ ᑐᓂᕐᕈᓯᐊᕐᓂᕐᒧᑦ ᐊᑎᖃᖃᑕᐅᓚᐅᖅᓯᒪᔪᖅ, ᓰᓚ ᐅᐊᑦ-ᒃᓗᑦᓯᐊᐃ. ᐃᒫᒃ ᐅᖃᖅᑎᓪᓗᒍ:

ᐅᑭᐅᖅᑕᖅᑐᒥᐅᑕᐃᑦ ᐃᓄᖏᓐᓄᑦ ᓯᓚᐅᑉ ᐊᓯᔾᔨᐸᓪᓕᐊᓂᖓᑦ ᐃᓕᖅᑯᓯᖏᓐᓄᑦ ᐃᓱᒫᓗᒍᑎᐅᕗᖅ. ᓯᓚ ᐊᓯᔾᔨᖅᐊᑦ, ᐆᒪᔪᑦ ᓂᕿᒋᖃᑦᑕᖅᑕᕗᑦ ᓄᖑᑉᐹᓕᖅᐸᑕ ᐅᕝᕙᓘᓐᓃᑦ ᐱᑕᖃᕈᓐᓃᖅᑲᑕ, ᐅᕙᒍᑦ, ᐃᓅᓪᓗᑕ ᐅᓗᕆᐊᓇᖅᑐᒦᓕᕋᔭᖅᑐᒍᑦᑕᐅᖅ. - ᓰᓚ ᐅᐊᑦ-ᑯᓘᑦᑕᐃ, 2004

ᑕᒪᓐᓇ ᓯᓚᐅᑉ ᐊᓯᔾᔨᐸᓪᓕᐊᓂᖓ ᐃᓕᖅᑯᓯᕐᒧᑦ ᑐᓐᖓᓪᓗᓂ ᐅᖃᐅᓯᕆᔭᐅᓗᐊᖅᐸᖏᒻᒪᑦ ᑐᓴᒐᒃᓴᓕᕆᔨᐅᔪᓂᒃ ᐊᒻᒪ ᐃᓕᓐᓂᐊᖅᑐᓂ ᐊᐃᕙᓂᐅᔪᒥᒃ, ᐊᐅᓪᓗᔾᔨᓪᓗᐊᑕᓕᖃᑦᑕᖅᑐᑦ ᖃᐅᔨᓴᕐᓂᒃᑯᑦ ᖃᐅᔨᒪᔭᐅᓪᓚᕆᓐᓂᖏᓐᓂᒃ ᐊᒻᒪ ᖃᓄᖅ ᑮᓇᐅᔭᑎᒍᑦ ᑭᐅᔭᐅᓇᓱᐊᕈᓐᓇᕐᒪᖔᖅ.

climate, culture, change - inuktitut companion

Documents